The Misfit Chp-17 by Barbara.k

[Zualtei hmar]

The Misfit
Chapter-17
~Barbara.k

Ni chu a liam ve zel a, tun kum atana ni hnuhnung ber kan thleng leh ta reng mai. Tun kum chhung ringawt hian thil thleng a va tam si em, ka nun a ka hlim ve lai ber te zing ami leh ka lungngaih lai ber te an thleng a. Ka tan chuan he kum hi kum chhinchhiahtlak tak zawng a ni. Nimahsela, a ṭha zawng in nge a chhe zawngin ka chhinchhiah ang tih erawh ka hre lo.

Chhun lamah chuan kan buai leh hle tawh a, ka chhungte bazar ho pawn min rawn tlawh hlawm a, an rawn in luh chhawk zut a ni ber. Zing aṭang kan dawr piah ami Pa Ruala chuan Lalsangzuali Sailo hla “Kumhlui aw ding rih rawh” tih kha a play dup dup reng a, hriatloh karah keini ho pawh chuan uar fe fe a lo sakpui chang kan ngah.

Chawhnu lamah chuan rin lawk ang ngeiin Nunpuia a rawn lang leh a, zing lamah Bawihteii chhuahpui min dil lawk tawh avangin an pafa chuan an in pawmchhuak leh ta nge nge. Ka pa in zan ah chhungkua a inkhawm vek tur a tih avangin Bawihteii nen chuan kan haw hma bik a, in kan thlen chuan ka chhungte pawh chuan woofer ah hla an lo play a, U Becky te chhung an rawn chho bawk nen an lo ri chel chul hlawm mai.


Naupang ho chu chaw kan ei hmasak tir a, chaw ei pah chuan an titi ve barh barh hlawm a. Zana an eitur leh halpuah hal tur ringawt chu an sawi a,
“Keichu zanah octopus ka ei dawn vawiinah Anu in a lei” Ruatruata chuan a chaw ṭhial pah chuan a ti a
“Keichu vawiinah Apa nen kan ei” Bawihteii’n a ti chu puitling ho beng a verh khawp mai.
An zavai mit chu ka chungah a fu tih theih tur a ni.
“Vawiinah Nunpuia alo kal ami?” titu chu U Johna a ni.
“Lo kal em em lo chawhnu lamah Bawihteii a len pui zawk a nimai” tiin ka lo insawithiam vat a.
“In la inbe fo em ni?” ka nu chuan a rawn ti leh zel a, lu ka lo thing vat thung.
“Hmanzan khan ka sawi chiang viau in ka hre sia” U Johna’n a tih leh phei chuan ka hawichhuak ṭha ngam tawh lo hrim hrim, ka zahzel ah ka ṭhutna sofa tlang chu ka tuai ka tuai a.
“Hetiang a nangin ilo biak ṭhat zel te chuan inṭhen hi enge awmzia awm ang, ti te chuan inṭhen ai chuan riak hrang ringawt te pawh in ang zawk alawm, mualpho pawh dawn lo in bungrua lai kan la tawh a lo inbiak ṭhat leh kha a chi in a chi loh hrim hrim” ka nu chuan a ti ve leh hmarh hmarh a, midang zawng chu kan ngawi a. Ka pa mawlh chuan sawi a nei ve ang tih ka hlau.
“I biak leh fo dawn ai chuan in hruai leh law law rawh u hetah I nawmsak loh hlau in I U Tei pawn theih tawp a chhuah a, inchhung ah lah nise engmah I ti ve ngai bawk silo” U Johna’n a rawn tih leh chuan ka mittui a hnai leh hle tawh.
“Ava mak e aw kan inbe lo atih kha Bawihteii a lenpui ringawt anih chu tu in nge mahni fa te chu lenpui chaklo bik ang in rilru hi a mak emai inchhung a che tura rawn let pawh a ni hleihnem hna nei ve tho anih hi inchhung chet a in phut viau ai chuan awmpui la mai rawh u”tiin U Sepha chuan ka thlavang a rawn hauh vat a.
“In hrang aṭang kha chuan ro rel tum lo mai teh” U Johna lah chuan a lo ti duh lek chauh,
“Ro rel ka tum a ni reng reng lo thil nihna ka sawi anih chu kan farnu hian inchhung nuam atih loh phah theihna tur khawp khawp a in chet hi ka remti bik miahlo ania” U Sepha chuan a ti ve leh zel a, ka unaupa te pahnih chu an intihthiamloh mai te ka hlau rum rum tawh.
“A nulat lai aṭang kan dah nawmsak lutuk vang anih hi tunah hetiang hian a awm tak, farnu nuthlawi kan nei der chu anih hi” U Johna’n a rawn ti leh chiah chu ka keh sawm vek nimai in ka hria.
“A tawk “ ka tih chuan an zavai chuan min rawn en ṭhap a, ka mittui luang vang chuan engkim chu ka hmu phe vek tawh.
“Nang leh zel chuan hetiang hian min tih duh ka ring ngailo asin le miin nuthlawi min tih pawh na ka tih tawh teh lul nen” tiin U Johna lam ngawt chu ka melh a. Engmah sawizui tawhlo in inchung lam ka pan nghal bawk. Step a ka chhoh lai pawh chuan tumah chu an ṭawnglo a, thawm chu a reh ṭhiap mai.


Room ka lut chu khum ah chuan ka bawk thlawp a, aw rawl chhuah meuh in a ni ka ṭah ni. U Johna ṭawngkam kha ka beng ah a ri nawn tlut tlut a, room kawngkhar rawn in hawng ri pawh chu ka lo hrelo a.
“Ṭap tawh suh a ho lutuk” tih pah a U Becky’n ka sam a rawn chul te chuan ka ṭap uar sauh sauh a,
“U Johna khan tlaiah alo lem ve sek bawk nen a rui buai thusawi ah ngaihsak mai mai rawh khu ka pa in a hau a, a inthiamlo leh tawh ngawt ang I U mizia chu I hriatchian kha” U Becky bawk chuan a ti leh siam siam a.

Minute sawm dawn chutia kan awm hnu chuan keipawh chu ka zia leh tawh a, chaw ei tur a min rawn koh erawh ka ei peihloh thu in ka chhang a, U Becky pawh chuan min hrethiam ani ang amah chauh chuan a chhuk a. Bawihteii room a rawn luh chuan mak tih hmel deuh hian min en a, kan boruak chu hrethiam veklo mahse nuam a ti biklo tih chu ka hre thei.
“Anu I ṭap ami” khum a rawn ṭhut thlak pah chuan a ti a.
“Ṭap lo e ka hritlang deuh a” tih pah chuan ka han in hrut deuh hrawk a.
“Apa I ngai ve em?” a tih leh daih chuan ka mittui chu tla lo turin ka dang hram hram a.
“I ngai tawh ami?” tia ka zawt let chu a lu alo bu rang khawp mai.
“Apa bulah haw daih ila” a tih leh chuan ka chhang zui tawhlo.


Kan nufa chuan inkhawm pawh chu kan inkhawm ve ta lo a, an inkhawm chhung a lo mut hmak chu ka duh dan ber a ni. Bawihteii pawh chu a chau ve tho ani ang khum a ka mut thlak pui hnu reilo te ah a muhil a, kei erawh ala hma bawk nen ka muhil thei lawk lo a, inkhawm bang thawm ka hriat erawh chuan ka muhil der vat thung a.
“An muhil daih anih hi” room kawngkhar a rawn dah pah a ka nu in a tih pawh chuan ka meng duh miahlo a.
“Tihian muhil zawk mai rawh se a hahthlak emai tunlai kan boruak zet zawng” ti tu chu ka nu bawk a ni.
“Keini pawh kan rawn chho tawhlo mai ang Sepha lung a la awi chiahlo bawk nen” U Becky’n a tih chuan a awm ve tih ka hre chiah.
“Nia keipawh mut daih ka duh Johna pawh vawiin ang ah te chuan insum deuh tur a ni ngai hahthlak hlawm emai zu hi chuan eng hlim na mah min thlen tak tak lo anih hi” ka nu chuan a ti leh charh charh a, room kawngkhar bul mai a inbia an ni bawk nen an ṭawng chu ka hrechiang dun khawp mai.
“Nangpawn Tei awm lai phei chuan Aruati hi hau vak vak tawh suh a thlavang hauh sak zawk rawh Tei mizia hi a ṭha vak bawk silo a, Aruati thlavang hauh tu lam tal kan ṭhatloh phei chuan a huangtau lutuk dawn” U Becky chuan a ti ve leh a, an kalsawn ta nge ni thawm engmah a awmzui tawhlo.


Keipawh chu ka lo muhil ni ngei tur a ni ka phone ri ah chuan ka harh a, Nunpuia bawk alo ni, kan boruak teh hrep nen a call pawh chu ka la duh lo a. Sana ka en chuan dar12 alo pel tawh a, a awmzia chu kumthar a ni tawh tihna a ni. Nunpuia chu ka duh emaw duhlo emaw kumhlui ah chuan hnutchhiah a ngai a, chu chu nakin zel a ka nun awlsam nan a ni.

Phone ri bawk chuan ka chhing zet tawh chu min men tir leh a, mahse tun ṭum chu Andrewa a ni. Ṭhu chhuak te te in phone chu ka chhang a. Phone ka pick up rual chuan kumthar chibai min rawn buk nghal vat a, keipawh chuan ka lo buk let ve vat bawk.
“I aw chu mu tawh I va ang ve” a rawn tih chuan ka aw chu ka lo thian kharh a
“Nia vawiin chu ka lu a na deuh bawk nen ka lo muhil a” ka ti chu a rawn inthlahrung khawp a, keichuan inthlahrung lo tur in ka lo hrilh ve vat.

“Kum a thar ta bawk a min chhang tawh la” a tih chuan a thusawi awmzia chu zawh buai hran ka ngailo chiang hle. Ka han inngaihtuah fe hnu ah Nunpuia lak aṭanga ka inlak hran theih nan tal pawh a ṭha lo maw tih te chu ka rilru ah a rawn lut a. Nimahsela, Andrewa hi ka duh ve tak tak em tih ka hre lo a ni.
“Dik tak chuan maw, keichu nuthlawi mai ka ni tawh a, duhlo viau mah ila chu chu ka nihna a ni. Nula pangngai nen kan in ang ve thei tawhlo a, fanu ka nei tawh a hmana I mi hriat ṭhin ang kha ka ni tawh dawnlo ania” ka ti chu min lo chhang rang khawp mai.
“Nuthlawi tih vang mai mai in hman a ka duhna ṭhin che kha a nep phah chuanglo chance vawikhat chiah min pe la ka ti beidawng lo ang che” a rawn tih leh chuan sawitur pawh min ti hrelo.
“Tikhan chance min pe ang ah ka ngai mai ang aw” nui chung hian a rawn ti leh a,
“Min ti beidawng miah suh” keipawh chuan ka ti ve ta nge nge.

Call ka dah hnu chuan Nunpuia hnen a min ti beidawng lo tura ka ngen dan te kha ka hrechhuak a, a ni chuan min ti beidawng ta anih kha. Andrewa hian min tih beidawn loh ka duh a, chu erawh ka beisei ka pe sang ngam tawhlo, chuzawng ai chuan tunah rih chuan reilo te a tan chauh tal pawh hlim ve ka duh a ni.

Halpuah chu an hal ri chuah chuah reng a, mutthilh ngaihna awm tawh heklo room tukverh ah chuan ka dak reng a. Minute 10 dawn chutia ka ṭhut hnu chuan ka phone bawk chu a rawn ri leh a, Lalnunpuia bawk a ni.
“Hello” ka aw chu a nelawm loh leh hle tawh.
“Deuh hmuk hmuk che chuan” lehlam ami lah chuan a rawn ti leh a.
“Enteh I duh hun hun a I biak tur ka ni tawhlo, inṭhen kan nih tawh hi ti te chuan riak hrang ang lek alawm kan nih a ṭul tawp khawk ah lo chuan min rawn be tawh suh keipawn chutiang ang chuan ka ti ang” tiin ka nu min zilhna tlem chu telh in Lalnunpuia chu ka ankhum ve leh hnuhnawh a.
“Eheee” pakhat lah chuan a la rawn ti duh lek chauh.
“Ka uanglo” ka tih chuan a ngawi reng a.
“I duh dan chu ka zawm sak ang che Kumthar Chibai le” zawi deuh dam tak si hian a rawn ti ve ta nge nge a. Keipawh chuan chutia a rawn tih takah chuan ṭha te te chuan kumthar chibai te chu ka buk ve leh ta chu a nia.

Zingah chuan ka pa in U Sepha te chhung chu chaw ei turin a ko chho ve a, chhung inkhawm hman dawn ah chuan U Johna pawh chu phak fe hian a rawn tho chhuak a, min melh chuan ka melh ve duh hauhlo thung.

“Nizan kan boruak chu a zahthlak hle mai, puitling vek in ni tawh a in buaina tam zawk a lo inrawlh fo hi ka duh lo a mahse he thil ah kher hi chuan pa ka inrawlh a ngai ve in ka hria. A hmasa ber ah, Johna pawh hei Mambawihi’n vanduaina tawk in a rawn let leh a ni a, khatia a ngaimawh ang chi zawng a ṭawngkam I neih fo kha ka rem ti dawn miahlo ania, chu chu Tei paw’n ilo hre tel ve dawn ania, inpui chang in ni a, in tih tur chu tu pawh he in a rawn leng lut leh he inchhung ngei a cheng te ṭha tak zel a lo dawnsawn hi a ni, chutiang chu in tlin dawn loh chuan in hrang chang zawk mai rawh u. Tin, Mambawihi hi tunah chuan in farnu neihchhun ang a ni rih a, Lawmi erawh pasal a nei a, a ni chu sawi lang ta lo mai ila. In farnu neih chhun hi nangni’n in hmangaih loh chuan tuman an rawn hmangaih pui dawn lo che u, nakinah mipa ṭha tak tawng tura in la duhsak ve anih phei chuan a nuṭa te pahnih hian theihtawp a thuam mawi zawk tur in ni a. Tin, tun aṭang he inchhung ah hian Nuthlawi tih ṭawngkam hi in hmang tawh tur anilo” ka pa chuan chhung inkhawm hman lai chuan a ti ta charh charh a, U Johna chu a ṭhu kun reng a, U Tei hming a lam tel ve kher bawk nen ka lakah chuan a ṭuan leh nasa hle in ka ring.

Ka pa chuan U Johna te nupa chauh a zilh biklo a, U Sepha te nupa pawh chu an tlin loh na lai te sawiin a zilh a, an hmel ah phei chuan hua ang in an lang lo. Keipawh chu ka bang biklo ka pa chuan min zilh ve tho a, kum thar anih tawh ang a nun thar nei tur te in min hrilh a.

Chaw ei kan siam te chu tumah chu kan inbe lo a, chaw eichhung pawh chuan ka nu leh pa te titi tih loh chu kan unau ho chu tumah kan inbe lo. Chaw eikham a veranda a hmunphiah ka va la tur chu ka unaupa te pahnih chu meizual zu pah in an lo titi dun leh reng tawh.
“Remliana motor zawrh hi chu a tlawm ang ang hian a daih rei ngailo” meizial pak khuk hluk hluk pah in U Sepha zawk chuan a lo ti mek a, motor chungchang bawk an sawi anih ka ring.
Inchhung ka luh dawn te chuan Remliana an tih bawk chu sawisa leh in an nui dun leh der tawh.

Hmun seng lai chuan U Becky chauh chu ka bia a, hmeichhia hi chu kan heti tlat zel. U Tei chu thleng sil ka chuh avangin inchung lamah a chho vat a,chutia inbe lo a kan awm te chu ka lawm ah a tla daih zawk tih te hi hria se ka ti.


Zawmna

Inkhawm pawh chu ka inkhawm ve peih ta lo a, Bawihteii erawh a pi te bulah ka kal tir a, inkhawm chhung chuan ka tih ṭhin dan ang bawkin kan nufa thawmhnaw ho chu ka su a, ka phone ri pawh chu ka hre lawk lo, ka en chuan alo tawp hman tawh a, Andrewa alo ni. Ka call back hma chuan amah bawk chuan a rawn call leh a, ka la rang viau mai.
“I inkhawm na nge?” phone ka pick up rual chuan ka ti nghal thawr a.
“Khawm chu khawm e, mahse inchhung kan changlo a pawn ah kan ṭhu a, a ho duh lutuk a ka haw daih” a rawn ti ve a, chhan vak ngaih na pawh ka hrelo.
“I inkhawm kha ka ring lo reng a” nui chung hian a rawn ti leh a, keipawh chu ka lo nui ve mai.
“Lo len a rem em?” a rawn tih leh chuan ka rilru a buai nak mai.
“Ka hrelo vawiin ang chu ka chhungte awm kim ni a ni ṭhin a” ka aw chu a zawi khawp mai.
“A pawi chuanglo” a rawn tih ve vat avang chuan ka inthlahrung leh bawk si.
“I duh chuan lo leng tho rawh” te chu ka ti ve leh a.
“Rem chang dang ah kan ti zawk dawn nia” ati ve ta tlat a.

Rei pawh inbe tawh lo in kan in mangṭha vat a, ka insuk chhung zawng chuan Andrewa chu ka rilru ah a awm a, a awm chhan zawk tak chu a lak a ka rilru put hmang hi ka hriatthiam ve chiahloh vang a ni. Nunpuia kha chu ka duh em em a, a ngaihzawng ka ni miahlo chung pawh khan ka chung ah thu a nei nghal thei em em anih kha, thil ho te a sawi pawh in Nunpuia sawi a nih vang hrim hrim in keichuan ho ka ti ve ngai hauhlo. Chutiang ang chu Andrewa lak aṭang hian engmah ka tawng ve ngailo. Ṭhian ang chiah a ka en ṭhin vang anih ka ring a, nimahsela chu bak a thui chuan ka la en ve ngailo hi ka buaina chu a ni, thil ṭullo pui ah ka in ham tang dawn ni te in ka inhria.


Bawihteii inkhawm bang chuan sawitur a rawn ngah leh khawp mai a, a thawmhnaw ka thlak lai te chuan inkhawm naa mi lam dan chi hrang hrang te chu a zir kual a, ka nui ka nui leh ṭhin. U Becky te in ah kan nufa chuan kan leng thla ta daih a, eirawng bawl dawn ah kan chho chauh nghe nghe.

Choka ah chuan U Tei’n phone alo hmang mek a, min hmu chu a ṭawng zawi nghal kher bawk nen ka ngaih chu a ṭha zan lo.
“Nia Sarahi pawh chuan a hreh vakloh chuan kar leh lamah rawn chhuk se animai lawm ka nau neih a hnai telh telh tawh bawk si a” atih ri chu step a kan chhoh lai chuan ka hre pha a, a awmzia erawh ka hrethiam vaklo.

Tlai chaw ei laiin tlaia ka thil hriatchian tak loh chu U Tei chuan a rawn sawichhuak ka ti mai, “Sarahi chu kar leh nilaini hian rawn chhuk tawh mai se ka tia naupang school luh a hun chho leh tawh dawn a nau neih a hnai leh tawh bawk si a” ka nu leh pa te rawn deuh tak si chuan a ti a, ka nu pawh chuan alo rem ti ve vat a, an sawizui vakloh dan ah a hma in an lo sawi tawh anih ka ring. Sarahi atih chu an khaw lama an chhungte niin ka hria a, an inchhun dan tak erawh ka hre ve lemlo, ka pasal neih hnu lawk pawh khan rei deuh tak chu an awm pui tawh nghe nghe in ka hria.

Ruai ṭheh ni pawh chuan ka ṭheh ve leh peih ta lo a, ka chhungte chuan min la hrethiam zel aniang chu min ti lui leh bik chuanglo, ka chhungte ruai ṭheh hlan in in lam ah noodles leh chaw ṭhing nen ka lo in hnawh puar ve a. Andrewa erawh an veng a a ṭhiante ho nen an fatu a a reh rih khawp mai. Nunpuia lah chuan min la rawn be leh ta miahlo a, mahse chu erawh ka duh dan zawk a ni.

Irenei hnen aṭang chuan message ka dawng ve teh mial a, a type thui khawp mai.
“Happy New Year, kan chhungkua kan buai lutuk a in nufa pawh ka rawn ngaihven lawk hmanlo che u anih kha, Patea hi kumhlui thlah zan khan a buai leh deuh a, U Francisa leh U Puia’n damdawiin ah oxygen te an han buaipui leh chuk chuk a, mahse hei tunah chuan kan ṭha leh viau tawh. U Puia ber hian rilru a ti hah nimin tlai aṭang khan a khawsik a reh theilo a, room ah a tawm tlat bawk si a, vawiin pawh tuman ruai kan ṭhehlo, Patea te in ah eirawng kan bawl a, kan chhung hnih in chaw kan eikhawm ringawt dawn, ka nu hian in nufa khan a ngai ṭhin khawp mai che u, pawi itih viau loh chuan remchang hmasa ber ah rawn leng ve ula tunlai chu hun pui mah nise midang hian thildang ngaihtuah tur an ngah aniang inleng kan nei vak ngailo a, in lo len duh phawt chuan scooty pawn ka hruai thei reng che u ania” tih hi a rawn thawn a, ka reply lawk lo, Andrewa ka rilru ah a rawn lang a, uire ang hial in a ni ka in ngaih ni. Ṭum dang chu nise Irenei chu ka be hreh miahlo ang mahse tun ṭum erawh keimah ah a dan a dang tlat a ni.
“Remchang hmasa ber ah kan rawn leng dawn nia, lo dam ṭha zel rawh u. I u pawh chu lo dam rawh se, Pa Tluanga tan pawh ka lo ṭawngṭai reng ania” tih hi ka thawn let ve ta a.


Chaw kan ei hma hlawm bawk a, zan chu a rei duh ngei mai, a tlai tawh viau ang chu ka tih laia sana ka en chuan dar7 alo pel deuh chauh a, Bawihteii lah chuan a pi te inkhawm a zui ve leh daih bawk nen, keimah chuan sitting room ah ṭhu in reh dal ah tv te chu ka on a, en zui lem lo in ka phone bawk chu ka en leh a, ka ṭhiante ho whatsapp status chu hmuh hreawm ka ti lek lek ṭhin, nalh tak tak a an ruai ṭheh lai thlalak te, an kawnchei fan na tih vel te a ni nawk hlawm a, a hma chuan keipawn krismas leh kumthar vuak vet hi nuam ka ti thei ṭhin hle anih kha, tunah erawh ka tan chuan tlanchhiatsan ngai thil a ni tawh nimaiin ka hria, a hu ho a hmelhriat ka hmuhna hun a ni tawh miau a.

Door bell ri chuan ka ngaihtuahna aṭang chuan min kaitho zawk a ni ber, lut tur a ka han chhawn chuan ka rin loh lutuk in Andrewa leh Marcusa an lo ni a, ka hamhai lutuk chuan ṭhu tur a tih nachang pawh ka lo hre lawk lo a, Andrewa chu a lai deuh tlat te in ka hria.
“Khawnge I chhungte?” tiin Marcusa zawk chu a rawn ṭawng chhuak a.
“An inkhawm a, U Johna te chhungkua hi kawnchei an fang ve nge ka hre chiahlo” keipawh chuan ka lo ti ve vat a, Andrewa chu ka en ṭha ngam der lo leh nghal.

Marcusa chuan titi eng eng emaw hi a vawrh a, Andrewa pawh chu a ṭawng duh sawt ve ta khawp mai. Ka chhungte inkhawm bang thawm a an ṭhiandun ṭhu ngil nghal awt chu ka hmuh hmaihlo chiang teh e. Ka chhungte rawn lut lah chuan mak tih hmel deuh hian an han en te te a, ka lo ip ru nasa khawp mai.
“Awi aw Marcusa leh Andrewa ni reng in teh hlawl che u chuan” ka nu zawk chuan sitting room a rawn phei pah chuan a ti ve ta nge nge a, an ṭhiandun pawh chuan an lo be ve vat a.
“In va fel em em ve mawle in ṭhiannu lungleng in rawn hnem dawn ami?” nui chung a ka nu in atih lai chuan Andrewa ka va melh a, min lo melh ve chiah bawk nen ka hawisawn rang khawp mai.
“Tikhan lo ṭhu rawh u Bawihteii hi ka han thlak lawk ang” tiin inchung lamah ka chhohsan zui nghal a, reilo te ah kan nufa chuan kan inzui thla leh vat a.

Sitting room ah chuan ka pa ho in an lo ṭhu a, an titi pawh nichin lam ai ngawt kha chuan a kul muk hmel zawk. Thingpui lum turin choka ah ka phei zui nghal a, Bawihteii erawh a pu malchung a chuh leh vat tawh, a unau te awmloh chang a atih ziah dan a ni, a unau te an awm hi chuan mitmei a veng ve nge ni hman ang em em kha chuan a pi leh pu te bulah pawh a inti pangchang ngam tawh ṭhinlo. Andrewa chuan Bawihteii chu a be ve siam siam a, naupang biak a zei vak lo nen a ṭawng chu ka thingpui lum vil pah chuan ka nuih ka nuih leh ṭhin a.

Ka nu leh pa te an ṭhu ve ta reng bawk nen an ṭhiandun chuan thingpui in hnu reilo te ah haw an rawt zui a, kan nufa chuan pawn thleng kan va thlah a,
“Tah khan lo ding rawh ka rawn tlan phei ang” gate pawn kan thlen rual chuan Marcusa chuan Andrewa bulah chuan a ti nghal vat a,
“Motor park na mai tur kan hmu lo a, sawti lai deuh ah sawn kan park a” Andrewa chuan alo ti ve nghal vat a.
“Nidang ah chuan sawi lawk ula gate chhung ah pawh hian in rawn tlan lut thei reng alawm” ka lo ti ve vat a,
“Kan la rawn tlan lut fo ang” tih pah chuan a nui suk a, keipawh chu ka lo nui ve mai a, ka laih em em phei chu ka hrelo.
“I mut a chhuak tawh ami?” tiin Bawihteii ham bai bai chu a be ve ngei a, pakhat pawh chuan a lu alo bu nghauh nghauh mai.
“Len rei vak pawh a chi loh anih kha nau mut hun kan ti buai thei tlat” nui chung tho hian a ti leh a, hman ang tho in hepa hian a lang lo lama uang tak a ṭawng alo la ching anih dawn hi.
Marcusa a rawn tlan takah chuan kan in mangṭha zui a, chu tih lai taka UJohna te rawn haw chu pawi ka ti tak zet. An ṭhiandun chuan an tlanchhuak zui nghal mai bawk nen keini nufa pawh chu ka u te pawh nghak tawh lo in inchhung lamah kan in pawm lut vat a, room ah kan chho tlang nghal daih bawk.


A tuk lam pawh chu dawr kan la hawng duh rihlo a, ka hman tho bawk nen kan nufa chuan Dindini te in lama len phei tum in kan in tin tuah a, kan inhmuh lohna a rei ve tawh bawk nen kan insiam lai te chuan min rawn call sek a, a scooty siam a ngaih avangin Sawmtea min rawn lam tir tur thu te a sawi a, ka han hnial dawn viau na a Sawmtea ber a rawn ṭawng ve takah chuan ka hnial duh ta biklo.

Kawtzawl ah chuan U Johna leh U Sepha te pahnih chu nilum aiin an lo ṭhu a,
“Kum thar in nawn dawn ami?” U Sepha zawk chuan alo ti hmanhmawh a, ka chhiatkhum duh lek chauh. U Johna erawh ka en duh lem lo a, hmanni thil thleng aṭang khan ka la be leh ta miahlo.
“Taktaka khawnge in kal dawn a in mawi nufa mai si a” U Sepha bawk chuan a ti leh a.
“Dindini te in ah kan leng phei dawn” tiin pangngai takin keipawh chuan ka chhang ve a.
“Thlah in ngai em?” U Johna zawk chuan a rawn ti ve mial a, lu ka lo thing vat thung
“Sawmtea’n min rawn hruai dawn a” ka tih chuan a lu alo bu ve mai bawk.
“Sawmtea chu I bialpa nge” atih lai meka ka melh rum em avang chuan U Sepha ṭawnglai chu a tawp chiang kher mai
“Dindini nau” ka tih chuan “Ni dawn tak maww” te chu a tih leh ang lawi a.

Sawmtea alo thlen tak ah chuan ka unaupa te pahnih chu mangṭha in kan in phur chhuak a. Dindini te in kan thleng chu Bawihteii chu an lawm hlawm khawp a, an monu pawh a mood a lo on deuh nge ni kan nufa chuan min be ṭha ve khawp mai.

Dindini chuan a room lam a inkawm a tih avangin Bawihteii pawh chu kan hruai chho ve a, room kan lut chu sawitur kan ngah dun khawp mai, Dindini chu an veng a a biak ve deuh ṭhin nen chuan urlawk zan khan anlo insawi rem ve tawh hi alo ni a, keipawh chuan Andrewa chungchang te chu ka hrilh ve a, kan ṭhiandun chuan kan phul hlut a ni ber e.
“Thlamuanpuia chuan alo la duh ngar ngar che tih na ania ava han thei zawk em em ve pasal ṭhen nilo phei la chu chance a nei ve ngai dawnlo tih na ania”tiin Dindini chuan Andrewa chu a hmingpum ngat in a ko a,
“Mahse maw ṭhiannu ka chhang ta mai hi ka ti fuh angem ka hrelo Andrewa hi chu ṭhian ang chuan ka hmangaih lutuk mahse hetiang inngaihzawnna kawng zawhpui tur em hi chuan keimah hian ka duh reng em ka chiang theilo” ka ti chu ka ṭhiannu pawh chuan min lo hriatthiam hmel khawp mai.
“Bakah I pasal ṭhenna ala rei silo a nangmah ah inthlahrun na ala awm anih kha, Andrewa lah hian hun remchang a rawn bawhzui nghal chung chung mai bawk si a awmdan tur ila thiamlo anih kha mahse ṭhiannu I hreawm rei ve tawk tawh a I hlimna tur ni a I hriat lam chu pan ve tawp rawh pasal nei leh nghal tur em pawh I ni hleihnem” tia ka ṭhiannu in min hnem tak ah chuan tlem in ka rilru nuamlo pawh a zia ve leh ta deuh.

Chaw ei tur a min sawm tlat avangin kan ei leh ta nge nge a, chaw eikham ah pawh chuan kan haw an phal lawk lo a, dar9 pelh ah Sawmtea chuan min thlah leh a, haw kawng ah chuan Sawmtea chuan a chhungte bula dawr siam a ngen ve thu te a sawi a,
“Tun kum hi ka final year a ni ve tawh a, zir zawm ka peih bawk silo dawr siam hi ka chak ber a nangpawn nakinah U Dindini hi lo sawi pui ve teh aw” a tih chuan ka sawipui tur thu in ka lo chhang vat a, kan dawr bul hnai a dawr ruak tur hnai te ka lo melh sak tur thu ka hrilh phei chuan a lawm ve hmel khawp mai.
“Nupui nei daih mai la” nui chung a ka lo tih chuan a duh lo khawp mai.
“U Hriata te aṭang phei hi chuan nupui pasal neih mai mai hi ka duhlo Pathian hma ah a nuam ah pawh a hreawm ah pawh ti a thu kan tiam pui ten a hreawm apianga min ṭhen an tum te hi ka duh ve lo, ka neih dawn chuan a nuam ah pawh a hreawm ah pawh tlan mai mai lo tur ka nei dawn” nui chung a a tih chuan a tawp lam chu a fiamthu ve deuh tih hre mah ila ngaihtuah na a ti kal thui duh khawp mai.

Mut hmun ah pawh chuan Sawmtea thusawi chu ka ngaihtuah chhuak leh a, mihring hma ah nilo in Pathian hma a kan thuthiam kan bawhchhe ta chu a ni si a, hriat miah loh in Pathian pawi kan lo sawi reng em tih te chu ka ngaihtuah a.