*OBEDA* ch~13 by~Natasha Hrahsel

[Natasha Hrahsel]

CH-13






"U Jeneti nu leh pa te hi enge an chanchin?"tumloh deuhin mut hmunah chuan ka ti chhuak hlawl a,ka pasal alo ngaizawng ve tih ka hriat ni atang ka hmumawh ta riau a,he ina awm ve reng chi ah ka ngai lo.



"An rawn let leh tep tawh ang,Pa Sawia kha chuan inding sa kha a âwn riau a,an lei chhawn duh mai chu ka ring.In han sa thar leh turin an kum te alo tam ve tawh bawk a,kei pawhin tha ka tihpui viau mai"a ti ve charh charh a,a chang hi chuan atawngkam chhuak hi a patling ka ti thin a,akum ngaihtuahin a awmlo hran chuang hauhlo thung.


"Nia insak hi chu ahahthlak ve a"ka ti ve leh mai a,U Jeneti chungchang kha chu ka la hrilh hre duhlo.Hrilh pawh ni ilang a awih kherin ka ringlo.





Atuk kan tho chhuak chu U Jeneti'n min thawng leh dawt tawh! Rawng lo bawl fel diam tawhin ka nu leh pa te nen thutkhawmna lamah anlo nui tlâng dar dar a,mi tihlawm hi chu eizawnnan hmang dawn se sum ala lut hnem viau ang tih tur khawpin mi lawm zawnga awm a thiam.Ka tluk loh na lam tak ani.


"Aw...Mate,ngahnge maw in rawn thawh hma ve duh kher thin le"ka nu in min hmuh rualin alo ti hluai a,ka pasal erawh choka lamah a lut tlâng thung.





"Mut reng pawh aninawm alawm,inva tho hma hlawm ve a" ka ti ve zat a,chutah ka nu chuan dam deuh hian "upat lamah hi chu kan pang akham zung zung a,amut rei ve theih tawhlo.Hei Jeneti hi keini ai daihin alo tho hma a,rawng te alo bawl vek lehnghal a! Fanu fel neih man hi a awm thin teh e"a ti zui luam a,U Jeneti phakar zia mawlh hi an hre ve der silo a aw...

"Ka tihtheih ve tawk alawm,kan inchhungah naupai pahnih an awm a,a nula ber ka chet loh in.Nû, mo atan hian min awh hi ka ring thin alawm,ka duat nasa zual mai dawn che sia"U jeneti'n a ti zui har har chu ngaithlazui peihlo in choka lamah ka luhsan ta daih.Ka naupai rilru chhiat kha a rawn chhuak leh dawn tak takin ania ka hriat ni! A thil tih engkim hian ka mit a ti kham em em vel vek tawh chu ani ber.





Tukthuan kan ei khamin ka pasal hna kal tur insiam ka pui a,a thawmhnaw lakchhuah sak te hi nuam atih thu sawilo mahse a lawm ve em em tih ka hailo.






"Keichu ka ning tawh deuh" kan ti hluai a,ka nundan hi ka ning thar thut.




"Engmaw i nin?"kiai suk a tiin min nuih min nuih mai.



"Ka hna kha kalzawm leh ka chak tawh"ka ti chiah erawh a nui hmel a tawp nghal hmak thung.
"Mi te pawh nau an neih hma te chu hna an la thawk lawp lawp a,thingtlang lamah phei chuan an feh pui lawp lawp zel alawm" ka ti ta nang nang tho a,tunlai tak hi ina awm ka ning tlat ani.



"Mî ini hleinem,bakah Bawihi i hriselna dinhmun kan ngaihtuah angai alawm.Chawm zo lo che ka nih loh hi" ati deuh dut.
"Tunah chuan ka hrisel that ve tawh em hi" ka ti chu min hawisan hmak a,nileng lenga ina tawm reng hi ka ning tlat tawh,tuntum chu ka tilui ve tawh dawn.





"Nizan pawh khan principal in min rawn bia a,ka ai kal nu kha a bâng leh sia,midang lak thar leh ai chuan keimah hian..."

"Kimte,atullo" a rawn ti ta hmuk!




"Ina tawm ining anih chuan ka lenchhuahpui thin ang che,hna thawh leh chu a tul na a awm hrihlo" a ti leh deuh hmuk a, ka pasal chu ka ngei tel zo vek tawh.Lên leh hna a chhuah a in ang lo,mo ka ni leh nghal a,lên chhuah sek te chu ka tan pawh amawiloh bakah anuamlo hrim hrim tihte hi min ngaihtuah pui thleng ve se.

"Rawn haw hma ka lo tum ang,ka lenchhuahpui ang che" dam zawk hian a ti leh a,a aw ngaihthlak chu ala nuam lutuk chuang lo.Ka rilru a no thar ta riau a,tawngka ti hmuk hmuk lutuk a min bia te chuan min ti na vawng vawng thei nia mawle!





"Angailo,ka lêngchhuak peihlo" ti hmakin a thawmhnaw bawm chu ka khar zui hmak.





Thaw hapin "Bawihi, ka ngaihtuah vang zawk che anih hi." Arawn tih leh pawh chuan ka la chhâng duh chuanglo a, kan ngawih duh reng hnu ah erawh "kal tawh rawh i tlai ang" chu ka ti zawi ta sep.

"Kawt thleng min thlah dawn lo em ni?" A ti ve ruih a,a hna kal tur hi kawt thleng ka zui chhuak ziah a,amah pawh hian ngaiah a nei tawh ang.Tukin erawh ka zui chhuak lo ang,mahni hmasial leh mahni tana tha hrelo pawh minti maithei.Mahse tunlai tak phei chu U Jeneti in lamah a awm tama ,Judithi chhuanlamin room ah an inkawm chawt a,Judithi lahin min be duh tawh derlo bawk.Ka tan he inchhung hrehawm ruk zia leh khawharthlak thin zia hi an hrethiamlo mai mai ani.




Ka pasal hnenah hian ka rilru a ka pai zawng zawng hi sawi ilang engteh ual ah angai hauhlo ang.Min tan chuan anau nen an inkar a chhia anga,anau lam atan erawh chuan kan nupa inkar a chhe thung ang.U Jeneti'n a ngaihzawn thu sawi phei ilang chuan a awihloh em vangin anui liam ringawt ang.Chutiang khawpa rilru tluang chu pasal ah ka nei a,ani ngaihah chuan U Jeneti hi anaute ang chiah ani.
An unau inkar mai bakah chhungkaw kar tihbuai ka duhlo a,ka tawt ru ve takzet alawm tunlai chu.







Ka biak duh miau loh vangin min en vung vung hnu ah a chhuak ta nge nge a,ka thinrimna a chunga ka hrithla chu thiam ka inti bik lo,mahse ka tawt ve hrih em ani.


Chhûnah chuan ka nu leh pa te an chhuak leh a,tunlai chu chhûn lamah an awm hman meuhlo.Ka pa damchho in a kal chhuak peih tih an hria a zanriah ei a sawm tu te hi an ngah hrih viau.Rual pawl an thiam bawk nen hmelhriat te hi an ngah a,damlo kan tur lah an ngah thei viau bawk.Chutih rualin kan awmna hi hmun lûn lai ani lo nen inleng erawh chuti lutuk in kan ngah khu chuk ngailo a,rawn lut chhuak tawk erawh an awm ve leh zeuh thin tho.





Judithi leh U Jeneti te pawh room ah tawm reng lo in inhnuai lamah an rawn thu chhuak ve a,ph khawihin an nui leh hak hak thin,kei in ka nu inchhunga plants hûn ho ka hrufai thung.Tunlai te hi U jeneti hian dawr lam angaihven lo ka ti dawn nge nileng leng a ina awm chang angah ngang mai .





"Ka ril atam eitur kan siam dawn ami?" U Jeneti chuan a rawn ti hluai a,Judithi pawhin pawmpui takin alo aw thuai.Choka lamah an inzui phei a,kei erawh ka riltam ala hunlo deuh nen inchung lama plants ho hrukfai nghal law law tumin inchung lamah ka chho ta daih thung.

Ka thil tih te chu hun khawhral nan tiin ka muangchang lui a,an ni bula awm kha ka peih hrih thlawtlo.
Ka thil tih ka zawh hnu ah pawh room ah ka tawm leh reng a,chawhnu her a rawn nih chuan ril atam ve ta ruih mai.






Inhnuai lamah chhukin inhnawhpuar na tur dap ka tum chu choka alo hnawk rum mai! Dawhkanah plate ruak thil eina hnu alo la awm a,sil hmun ah lah an noodles chhumna niawm tak bel ruak alo awm bawk a.Stove bul vel te chu alo hnawk rum bawk!
An mahni lah inhnuai ka chhuk dawn khan Judithi room ah an awm tih ka hrechiang si,min runluih nan an eina an sengfel duhlo lui ah ka ngai ber tawh.Judithi nen lam chuan ka haw dawn dawn ta mai! Mihring rilru puthmang tak hi chu aw...






An eina vel chu ka ti fel tho a,ngawi renga dawh reng ringawt erawh ka tum hauhlo thung.
Ka eitur ka ei fel hnu ah rawngbawl alo hun chho mai bawk nen ka bawl zawm a,dar li dawnah an rawn chhuak thla ve leh ta chauh.


"In thil eina hnawk nuaih in in kalsan a"choka a U Jeneti alo luh rual chuan kalo ti sap.





"Ilo ti fel mai ang chu kan ti" tiin nui sawng hian min chhâng let anih chu!





"In hmanloh chuan tih hrehna ka nei lo,mahse nang nula zawk i awm a,in sil peihlo anih pawhin hnawk nuaih a choka kalsan tur anilo.Inleng te pawh kan nei thei a,a zahthlak dawn" ka ti mawlh mawlh.

"Inleng an rawn awm leh 'an mo chu ava che mawh awm ve?' tih bak an sawi teuhlo" nui hak hian min chhang let leh a,ka thinrimna cho chhuah a tum emaw tih mai zawk tur ani!






Tawng tum a ka kâ ka ân leh zuai lai takin Judithi rawn lut ve lehin "I va rei" keimah min be lo chuan U Jeneti a rawn bia a,inbendaih tumin ka lo thaw halh halh thung.





"Hei,Matei hian kan eina hnawk vel kan kalsan kha minlo hau a"ka hau emawni? Judithi lah chuan "i tifai peihlo anih chuan min hrilh mai ta che,U Jeneti chunga tuan angai hleinem.Tih tak em ah chuan mo dang te aia i awm awl zia leh kan duat zia che hi.Tunah nau ka pai ve a min ngaitheilo anih hi" a ti nghal piap piap!

"Chutiangin ka sawiloh kha U Jenet! Inleng lut te nei ilang azahthlak dawn ka ti mai anih kha" ka ti ve hluai a,Judithi zawk phei chuan min melh thip hlar tawh!





"Â kan thiamloh anih kha,kan lo che pawlawh deuh a"awki inthlahrung deuhin a ti leh lawi a! Henu hi chu aw!!!




"Kan thiamlohna a awm lo,mo inih kha mo angin awm rawh" ti hmakin Judithi chuan U Jeneti chu akai chhuak ta hmak a,ka dinna ngaiah ka ding reng ringawt.Tiang reng anih dawn chuan ka tlin bik in ka ringlo.Ka lawina chhungkaw inkara buaina siam ka hlauh lutuk na lamah ipik in ka thi thei mai ang.





Minti ipik zual turin U Obeda lah zanriah kil dawn ah pawh ala rawn thleng lo a! Phone call lah a chhang thei derlo! Ka pa'n an thawhpui te abiak atang Professor ho in meeting an neih thu kan hria a,meeting engang pawhin nei dawn mahse message tal pawhin min rawn biak ve awm ania! Ka lungawiloh khum tih ahre reng chung pawhin chhûn ah lah vawi khat pawh min rawn be lo bawk a!







Ka nawmloh chhuanlam in thleng seng fel zawh ah room lamah ka chho ta daih a,diktak chuan midang zinga awm ka peih hrihlo ani ber zawk. U Jeneti ti ti ri leh nui ri ka hriat apiangin kalo chau ngawih ngawih zel.Ahma khan hetiang em em hian ka haw lo mawle,tunah erawh a rilru puthmang diktak ka hre tawh a,ka ngaithei tawh thlawtlo.





Room kawngkhar ri rak thawm ka hriat rualin ka mit ka chhing hmak a,hmu kher lo mah ilang kan room a rawn lut chu U Obeda ani tih ka hailo.





"I nuam lo em ni? Damdawiin kan kal duh angem?" Ka ngawi reng, ka mutna lamah rawn kalin a rawn thu thla a,ka pang a rawn dek ringawt te chu ka lo tang nghal tung.

"Bawihi,i muhil lo tih ka hria ania.Khawilai nge na?" A ti dam leh thlup a, ka meng ve ta nge nge.






"Na ka neilo, ka mu duh" ka ti tawl a,min melh reng ringawt.





"Ila thinrim em ni? Hna chungchang kha anih chuan ka ngaihdan ka la sawhsawn lo" a tih lai mekin room kawngkhar an rawn kik a,kawngkhar kik ri a tawp rualin "U Obed,ka dawr chungchangah ka van be duh che"U Jeneti aw ngei mai ka hria chu ka tang leh nghal tung tawh.

"A hmanhmawhthlak em ni Jenet?"U Obeda lah chuan alo ti damthluam!





"Aaa aw,ka room ah inbe lawk ila kha Matei a damsam silo,arem chuan" a ti leh chu zaklo hi ka va han ti ngawih ngawih tak.






"Ka rawn kal dawn nia"Pakhat ren run lah chuan ala ti dut zui a! Kawngkhar inkhar thawm in a zui nghal mai bawk.





"Bawihi,ka va be lawk ang chu" a ti te chu ka lo melh rum ngang mai. "Na ineih siloh chuan tinge tiang hian i awm? Zinglam vang kha ti dawn ila khatiang tun thleng thlenga thinrim nan i hman ka ring silo" a ti ta char char a,ka thu chhuak ve ta nge nge.

"Ka rawn let leh hunah kan inbe dawn nia" ti a thawh zui a tum chu "aih" ka lo ti hap.Nur nang in min melh ta run.






"I thinrim chhan chu min hrilh teh" ti hlukin "Bawihi, diklohna ka neih chuan ka insiam tha em em ang.Hetianga intawng hi a naupangchhiat thlak takzet" ti leh hlukin min melh chhuk ta run.




"U Jeneti hian angaizawng che tih i hre miahlo nge i haider lui tlat zawk?" Ka ti chhuak sap a,awihloh hmel zet hian a nernawk mai.





"Ngaihdan maksak tak i nei anih chu" kha maw! Min awih dawnlo tih ka chiang alawm.





"Ngaihdan maksak!" Ti ve hapin "ka lakah a awm thin dan te,min tawngkhum dan te hi ka zep reng a,chupawh inhauh buaina athlen ka hlauh vang chauhin.Nau anga i en laiin ani chuan û angin a en ve lo che.Biaktei pawhin a sawi a,a û nen in inngaihzawn lai pawhin a tibuai fo tawh cheu tih" ka ti chu "Biaktei"ti a phun ve sapin "naupang thusawi i awih em ni? Tette atanga seilian chho ho kan ni,ani pawhin û ang bakin min en lo a,keipawhin Judy te nen ka en dan a in ang reng bawk.I Ngaihtuahna atthlak zia kha i hria em?" A ti zui mawlh mawlh a,nau ang maia a en in angaihzawn thu ka hrilh,ngaihtuahna atthlak tih chiah ka hlawh!



"I ngaih dan dan le" ti ve hmakin ka mutha nghal hmak.
Min en reng tih ka hria,ka mit ka chhinkhum hmang thung.Keimah ah a tlulut ve viau tawh niin ka lo hria a,mahse ka thusawi min zawhchian a min rinsak chu sawiloh ka ngaihtuahdan diklo ah min puh hmak a! U Jeneti min tawngkhum dan ka sawilan te chu ahre tel tawhlo hrim hrim.


"Va kal rawh,anghah che kha"meng lo chuan ka ti sap a, thaw chhuak hluai in "ka rawn let harlo ang" tiin a kalsawn a,kawngkhar inhawng ri leh khar thawm in azui.






Ka mittui a rawn far thla nghal fap a,ka sawi chhuak nawn leh tawh dawnlo tih ka chiang ngang bawk.Pangai takin vawikhat ka sawi lang tawh a,a dawt leh ka awm tir tawhlo ang.





Room a a rawn let leh pawhin ka awmdan ngaiin ka la awm reng,khum a a rawn lawn te chuan ka chesawn duh chuanglo a,min rawn kuah a ka dul a rawn khawih pawhin ka che eih chuanglo.Ka be chak hrihlo a,a mi tawhna erawh ka hnar ohal hrih nganglo thung.





Zing ka harh chuan tui zet hian alo la mu a,minute nga dawn ka en reng hnu ah ka thawhsan zui a,inphihfai in inhnuai lamah ka chhuksan ta daih.

U Jeneti bawk tho hmasa ah lo tangin rawng alo bawl leh mawlh mawlh tawh.Engtak hi nge maw angaihtuah ang ni?Tunah hrih chuan Judy inah awmlo in a zin chhuak bawk si nen ka mal ngawih ngawih ni berin ka inhria.






"Thingpui kalo siam dawn che em?"he amize inthlak kual zung zung thei hi ka awt ta ber mai.
"Ka inchak lo" ti bul hmakin tui ka thli a,ka inzui khawlh khawlh.






#thui deuh ka rawn dah sak ang cheu ka ti a,mahse ka tlin ngang lo.Nizan ka tlaivar deuhthaw tawh nen ka mut a chhuak lutuk a ka mutthluksan hma cheu in ka rawn dah lut thawr aw.Angaihnawm loh viau ang keipawh ka in type tui theilo.Exam lai chu exam ni zan ah ka chau lutuk ka muhil hma thin tih hria in awm tawh nual ang ka ring.Ka meng lui thei nganglo,a rei dawnlo a,chawlhsan cheu ka tumlo mahse karleh zirtawp zan thleng chu minlo dawh hram hram teh u aw.Ka dah dawnlo ka tilo a,mahse ka sawilawk hleithei tlat hrihlo ka awmdan tur.Nizan ang te khan sawi lawk theihloh zan a lo awm pawhin karleh zirtawp zan thleng tak tak chu minlo dawh hram hram dawn nia.