THINGTLANG MISTIRI LEH KEI (BUNG-8 NA)

[Kennelly Bawitlung]

THINGTLANG MISTIRI LEH KEI


BUNG-8 NA
ZIAKTU: KENNELLY BAWITLUNG

__________________________________


"Ka ni lo ah," tiin Ramdina chuan min han melh chiang em em mai khawp a. Zah vanga thih theih ni se zawng tukin zinga ka thiltawn teh hrep avang khanin chhumzinna piah ram nuamah Angel-te nen kan thlawk ziai ziai tawh ang chu.
Ni sa khian min han em thlu tawp mai se te ka ti thul...a tawnglo tu tan chuan tun dinhmuna a zah zia hi hriatthiam phak rual a ni lovang! A nilo hul hual!





"Khatia ding khawng renglo khan i inthlak dawn chuan va inthlak vat la pumnaa awm reng kha i duh em ni? Vawihte mai mai mihring nih phung alawm, vawih pawm pawm mahla ka iai lo che." thutak zet hian a ti deuh duah a. Kha, mi a fiam leh tawh! He mihring nghal dan em em hi chu vawikhat tal chu ka la sawk ang mawle!





Ka zah vang nge a mi fiam vanga ka thinrim pawh ka hrelo ka sa pup pup mai a, ka biang pawh a alh thei mai dawnin ka hria...Chuta karah pum lamin ro a rawn rel leh ṭan a, ka chet thuai thuai loh chuan khaw eng ka hmuh leh ngam tawhlohna tur khawpin ka che chhe rup mai ang tih pawh hlauhawm tak a ni.





Ka kawr chu hma lamah ka ṭham khawm a, thlam lampan chuan ka pen phei deuh hlawk hlawk. Ka dam chhung hian heti em ema zahna ka la tawng ngailo.





Thlama ka va lut rawk chu midangho chuan min lo en nghal ṭhap a, "Inthlak lawk ka va duh ve," nui lui chunghian ka ti halh a. Mipa ho zawng chu an chhuak nghal sap sap a, Thanpuii chu a lo inthlak fel diam tawh.





"I va rei ve eng nge intih kawi a?" Mitko san ak ak a Thanpuiin a tihchuan inphelh sawk sawk pahin, "Engmah," ka ti bung nghut a. Ka che vel chu hmanhmawh min ti deuh aniang hamhaih hmel dehh hian min lo en reng a.





"Hreawm deuha awm ai chuan va inthia-"




"Rawn lut suh!" Ka kawr ken laiin Ramdina hmaiah tak chuan ka vawm thlawp a, a ni pawh rang deuh chuan a chhuak lehnghal vut.




Kawr pawh ka la ha hleinem le..."Engah nge i zah viau a..? Nizan lamah hmangaihna par intlan dun tawh ang chu tih nak a laiin...," nui kur kur chunga Thanpuiin a tihchuan ka ner nghal nang nang...





"Eng par mah tlan tur a awmlp khawimaw kawr dang min lo pe teh...!" Ka kawr hak turin Ramdina ka vawm daih alawm mawle...min rawn pek leh nachang pawh a hre tawh chuang hlei lo va.






Ka inthlak zawh hnuchuan ka ngaihtuah chiang a, kawngtluana han ip tur chuan ka tlin dawnlo chiang sa a. Mahse saw tiang....commode pangngai pawh awmlohnaa inthiar te chu ka ṭih tlat! Ka pum nat luatah ka la ding ngil ṭha thei lo zui a, Thanpuii pawh chuan a hrethiam ve a niang





"Maimitchhing chungin va ti tawp mai rawh, kha i thlan fimte pawh a bawl ṭiam ṭiam tawh a nia i inhrem a ni ringawt alawm." A lo ti ve sek a, Ramdina lo lut chuan nichina ka vawmna kawr kha rawn dahin inthiar tur bawk chuan min rawn hrilh leh.





Chuti na na na chu va ti ṭhuai ila a ni mai lawm! Hemi te pahnihin min tur reng reh nan hrim hrim pawh.





"Tumah lo awm hnai lo ang che u," tiin ka luh hma chuan ka Ramdina leh Thanpuii chu ka hrilh a. An bu ve nghat nghat a, a ṭulna in min nang miau si a ka mumang pawha ka la hmuh ngailohnaah ka inthiar dawn chu a ni sia aw...





Mitchhing chung tak meuh meuh chuan ka tih tur chu ka ti a, ava han hreawm mai mai tak!




Darkar chanve dawn ka ṭhut hnua ka han chhuak mai chu ka zawi hnawk thei.





"Hawng turin inbuatsaih ṭan ang u ni a dul ṭan tlat ruah a hnai tawh," thlam ka thlen dawn ṭep a Ramdina ṭawng ri chu ka hre thei a. Ka va luh chuan min lo en chik khawp a, "Ala na em?" alo ti hmasa ber a lu ka thin khum ringawt.





Kan in pack fel hnuchuan kawng zim zet leh chhe zet kha kan zawh chho leh a, Ramdina a kal hmasa ber a, kei a hnungah ka kal thung a. Thangtea hnungah Thanpuii a rawn kal ve bawk. Kawng a chhia a zim tih tawh nak a laiin ala nel tel zui a, vawi hnih thum vel chu ka rap pial nghe nghe...





Ka hmaa lama i leh hnunglama mi te hian min lo veng hman ṭhin lo se chuan hawng thleng tur ka awm tawh lovang.





Motor dahna kan thlen meuh chuan ni eng hmuh tur a awm tawh lo, chhumin a hliah thim khup mai a, thli a thaw deuh vuk vuk bawk. Chuvang chuan muangchang thei pawh kan nilo kan in khalh chhuak vat a, tlaiah ka pa zawnte inah chaw ei kan la ngai zui a, hahdamna hun a awm dawn lo a nih hi.





Kan tlan lai chuan ruah a rawn tla ṭan a, ni sa in min hmet chau zo a niang chu Thanpuii nen chuan ṭawng pawh kan ṭawng phei lo a seat hnunglamah in nghengin kan thle nguai ringawt.





"Kan chhuk anga motor hi inkhalh chho mai dawn nia," inkawt kan thlen chuan Ramdina'n a ti a, ka bag chu lain ka chhuak hmasa a. Ruah a sur hnem deuh avangin inhnuai lamah ka tlan thla a, step-ah chuan tlan thlak par par theih ni hek lo ka huh hman ta vek mai.





Sana ka en chuan dar 2:30 a ri thuak tawh a, Ramdina chu inchungah a lut a niang a rawn thleng thla har em mai. Lo inbual vat ila a ṭha ang.





"Ruah hi han han deuh se kan chho dawn nia," pindana ka luh chuan alo inphelh mek a, a huh ve hman tho a nih hmel..




Inbual tura a luh hnuah ka in ha sawk sawk a, pindana tawm reng chu ni theiin ka hre si lo nihliap phawrhin inchungah ka chho a. Patling pahnih leh pitar pakhat an lo ṭhu a, min lo be siam siamin ṭha tak chuan ka chhang vek a. Chokaah ka phei san ta hlawm.





"In thlalakna hmun chu a nuam em..? Chhunah ni a sa ropui mai sia mokawr nen chuan a hreawm ngawt ang a..," Mimi-i chuan maian hik pah hian a lo ti var a. "A hmun chu a nuam ve reng mai, a kawng chhe deuh leh khawlum kha a hreawm ber," tiin chaw ei dawhkan kil chuan ka ṭhu thla ve a.





"Hei hi mi in monu chu...?" Kan ep chiaha ṭhu Thlengthlengi ṭhiannu ni awm takin a ti ru sur sur chu ka hre phak reng a, mahse hrelo angin ka awm der hmak thung.





"Ni e, a'u Leen-i a nih saw va chibai rawh," Thlengthlengi chuan a lo ti ve sup a, ka mitsir chuan a ṭhiannu ka lam hawia lo insiam rem chu ka hmu thei.





"A'u Leen chibai le," aw tham deuh chhalh hian a rawn tihchuan alam chu ka hawi ta vat a. Tleirawl kum-15 mi bawr vel hian min lo nuih sen sen a, a kut chu ka vawn sak vat a. "Hmangaihdawngkimi ka hian, Hmangaih tiin min ko ṭhin," nelawm taka nui chung hian a ti var a. Sawi tur vak ka hre si lo chuan, "I lo lenga i va fel ve...," ka ti ta ngawt.






"Fel hleinem in in hi chu ka second home alawm. Min hmu zing lutuk anga min ning mai ang, tukinah Aizawl aṭangin kan lo hawng ve chiah a, in inneihna pawh kan rawn nang hman ta lo va. Nalh deuhva inchei ve ka duh tehreng nen...," Hmangaihi chuan a ti zui siam siam a. A ṭawng pah chuan a biangsum chu chiang deuh hian a rawn lang ṭhin a, hmai bial lam deuh niin thleirawl duhawm tak a ni.





"Tlaiah chaw alo ei dawn a," Thlengthlengi zawk chuan a ti a, nui chungin ka lo bu nghat. "A'u Leen Designer i ni tiraw? I kawr design-te hi ka lo hmu ṭhin a ka ngaisang lutuk che. Nangmah anga Designer thiam deuh nih ve ka duh a...," phur hmel taka Hmangaihi'n a tihchuan, "I duh phawt chuan kei aia ṭha pawh i ni thei alawm," ka lo ti vat a.






"Nia, ka tum ang kawr mawi tak tak tuma la hmuh ngailoh ka la design ang," a tihlai a Ramdina a lo lut chuan, "Pani puri zawrh i tum a ni lawm ni?" a rawn ti a. "Khate chu plan D a nih kha, plan D! Nupui te i nei ve ngawta in fawh pawh i thiam ve a mi?" ngam tak hian Hmangaihi chuan alo ti pang pang a, "I hriat duh chuan i hmaa mi kha zawt la...," filter-a tui thlit chhuah pah hian Ramdina chuan min rawn melh kher a.





Hmangaihi chu a ner nasa mai, "Zawh buai ngai lovin ka hre sa, sa chang turin chhuak leh vat teh Sakhi sa ka ei chak tawh a nia," tia thudang a rawn sawi tak daih chuan ka lawm ngei mai.





"Nang nusalṭha i awm alawm keichu ka buai tawh dawn, ram chhuak hman ka ni tawhlo. Nupui te pawh ka nei ve ṭit ṭet tawh a...chhuak reng chi ka nilo," Ramdina'n a tihchuan a rukin ka lo then sawk a. An inngamtlak danah an inhre ṭha viau a nih ka ring...





"I va han over tak! Mite pawhin nupui an nei ve ṭhin tho nang ang em em an nilo."




"Mite ang ka ni ve hleinem, keichu ka over tawh viau ang maw...Lalhmangaih, nakin lawkah chuan 'A'u Ramtea anga pasal ṭha hi ka duh ve, nupui duat thiam leh hmangaih thei deuh mipa ka zawng ve dawn' ila ti ila ti mai ang." Titu chu ka melh no fahran loh khawp mai. Over dan zawng alo hre ber e.





Hmangaihi nen chuan an inhnial an inhnial a, pakhatin 'Naupang zawk a nia' ti ta nge tih awmlo a rul tawk zela lo chhanlet dan a thiam rohva, an inrualpui kawm hmiah hmiah mai alawm.





"Lalhmangaihi'n chaw a rawn ei dawn vang a nih hi khua a chhiat em em. Ka chhungte ei tur awmlo khawp khawp khan i lo ṭuk hnem reu reu ang nge, ka rawn hawng hunah ka khai che a ni mai." Kan chhuah dawn chuan Ramdina'n ala ti ṭalh a, "Kal mai teh!" Pakhat lahin a lo ti bak hlar.





Ruah chu ala tla cherh cherh a, Ramdina-te ṭhiandun inhnial chhungin khua alo tlai duai hman alawm.




Chhum a zing deuh chiai a, khaw chhiat vangin a thim deuh ruih mai bawk a. A vawt sur mai, "A tla hnem tawh chuanglo pakhat hi kan inzawn mai dawn nia," a tih avangin nihliap pakhat chu kan inzawn a. Kalkawngah chuan ngawi rengin kan chho dun bek bek a, khawlaiah chuan mi hmuh tur an awm mang lo. Kan mi tawh chhunte erawh chuan min kalpel mai lovin min be ngei ngei zel.





"Kha i dar a huh dawn lo tawlh phei rawh," tia ka dara min lo kuah chuan ka melh chho ha a. Hmalam a lo en leh daih tawh a, min kuahna chu thlah a tum hmel loh.





Engmah sawi ta biklo chuan hmalamin ka pen ve zel a, ka pazawnte in kan thlen chuan an lo ri nak nak hlawm a. Tukin zing khan kan ṭhianṭha te leh chhungkhat laina te chu an hawng tawh hlawm a, Thanpuii nu leh pa tiamin. Ka nu leh pa, pi leh pu leh nutei, Rinrini-te unau chiah chu ka pazawn-te ina la thleng an ni tawh mai.





"Ee...inlo thleng thei maw? Lo ṭhu rawh u kan lo nghak reng che u alawm," ka pazawn, pa Chhuana chuan a lo ti var a. "Ruah han kan han nghak deuha tum angin kan lo kal hma theilo alawm mawle..," ṭhutthlak pahin Ramdina zawk chuan a ti a. Ka pate ho nen an titi in an nui hawk hawk a.





A eng vanga ka nu leh pate hian Ramdina hi makpa atana duh em em nge maw an nih le..? An biak dan leh en dan aṭangte hian an ngainat hmel bik ngawih ngawih mai.





"Leen enteh vawiin a ka thlalak ho kha ka inthawn tir a ig a post tur min lo thlan pui," tia Thanpuiin min lo biak takah chuan a thlalak chu ka en sak a, a lang ṭha hlawm kher mai. A inthawm dan leh a hmunin a zir ngang bawk a, hmuh nuam tak a ni.





"Ti hi chuan kawng chhe deuhva kalin mawng sawh dawta i tlu tih pawh a hriat miah loh," tia ka fiam chuan "I ninawm!" tiin ka malah a beng thlawp a. A nalh ber thlang turin min han rawn ve tak naa ka thlan apiang chu, "Hetah hi chuan ka nui sawi" a tihloh leh, "A nalh lo," a ti thul. A tawpah chuan amah bawkin a thlang leh tho sia...





Dar 5 bawr velah chaw ei an rawt a, hmeichhe ho chu kan tho nghal sang sang a. Kan indaih bawk a fian chiah ka sem hman. Kan tam tham deuh avangin dawhkanah chuan kan leng vek lo a, Rinrin-te unau leh Sangkimi te chu an inchawi a. Thanpuii chu ka bula ṭhu tura ka duh avangin a inchawi ve ta lo.





Chaw ei laia titi vak hi ka thiam ve lo a, ka duhlo bawk. Chuvang chuan keichu ngawi rengin ka ei mial mial a, min biak pawhin a rul tawk lekin ka chhang mai zel.





"Keini pawh kar thar lamah dam chuan kan hawng thla ve tawh ang. In leh lo awm bo san reng chu a ngaihṭhatthlak loh em mai a," ka nu chuan a ti a, vawiin inrinni a ni a. Han cham reng kha a inthlahrun awm ve dawn bawk nen cham reilo mahse pawi pawh ka ti hranlo.





Chaw ei khamah ṭhutkhawmna lamah chuan puitlingho chu titi pahin thingpui an in lehnghal a, Sangkimi chu nula zuan zang tak a ni bawka thlengsil pawh phal lovin ama'n a chuh vat a. Thanpuii sawi danin an khaw ṭhenawm lawka Bank-ah a thawk a ni awm e...





Ramdina chu puitlingho titi vawrh pui peih tak mi a ni teh chek aniang chu hawi pawh a rawn hawisawn hman lo an be char char a, an nui hawk hawk bawk. Thanpuii awmlo phei se chuan ka ning tawh viau ang.





"I ngaihawm reuh dawn e...inkawm tamlo mah ila hun rei tak ata ka kawm tawh ang maiin ka kawm thei che a, nang hi chu mi lungleng chi i nih ve hmel lova hreawm i tih vak pawh ka ringlo. In pa saw a fel bawk sia, i chhungte pawh kha an fel hmel chu ka ti. Chuan ka sawi ang a tih ka theihnghilh tak chu....in pa nau kha...a chhelo ka ti e..., man hlan zan aṭang khan ka mit ala chat a, ka be ngam bawk si lo. Thlalak lai te khan ka hnungah a ding a, ka zam zia mai chu (h).." nui kar kar chung hian a ti deuh duah a. A thusawi ṭan tir lam leh tawp lam in perh san lutuk chuan ka nuih a ti za zawk e a.






"Bia la..eng nge biak hrehna tur awm. Biakna tur chhuanlam a tam e...," ka tihchuan, "Engtin nge ka biak ang? Mipa biak hmasak chu ka zak e a! Hmeichhe zaktheilo deuh nih ve fe chu a ngai ang," nui hawk hawk pah hian a ti a.





"Naktukah lo leng la, biakna tur chance ka zawn pui dawn che nia," ka tih chuan phur hmel zet hian min rawn en a. "Tak tak maw?! Nangman min tihpui rawh aw. Ka biak hmasak ngai lovin kawng min zawn sak ang che," a ti nghal zung zung a, keimah vangin an buai chhungkua bawk nen hei tal chu ka tihsak ve poh aniang chu.





Dar 8 bawr velah chuan hawng zai kan rel ta a. Zan lam boruak chu a thiang kak mai a, thla pawh van zawlah a eng bial pap bawk. "I puar em?" Ka sira miin a tihchuan, "In titi khan min tipuar," ka lo ti vat a. A nui ri suk a, "Ka bialnu hlui a nih kha," a tihchuan ka ding nghal chawt a, rawn hawi let lehin a ni pawh chu a ding ve leh.





"Tu chu maw?!" hamhaih ang reng tak hian ka ti he haw...Chutah ngaihsam hmel fe hian, "E le, Sangkimi kha..," a ti hem mai. Ka mak ti leh hamhaih atalangin sawi tur ka haihchham zo a, ka pazawn fanu chu ka pasal bialnu hlui maw lo ni a.
Khai aw...A nihchuan Sangkimi khan engtin nge ṭha taka min biak theih zawk le...keichu ni ila a melh pawh ka melh peih teuhlo.





"Tinge chu chu min hrilh a..?" inthing harhin ka zawt a. Chutia min hrilh mai chu mak ka ti deuh, "Nakinah mi ka aṭangin ila hre dawn tho a, mi ka aṭanga dawt tlem nena i hriat tel ai chuan ka hrilh lawk che a nih chu. Kan inkarah engmah a awm tawhlo, ani chu khaiuai nei enin ka en," a ti deuh kher a. 'Kan inkarah engmah a awm tawh lo' tih kha a tawk mai sia..deuh kher zel hian...






"La duh mahla buaina tur ka nei hleinem," ngai pawimawhlo zeta ka tihchuan rang farhan hian, "Tak tak maw?!" A rawn ti hlut a. Min ti phu zawk thei alawm. "Aw...tehchiam a che..!" Tiin ka awm a dawm vang vang a, Ramdina chuan min kal pel fuain kan liam tawhna lamah chuan a let leh.






Min va han ti hamhaih chiang mai mai tak! "Hey! Ramdinmawi khawnge i kal dawn?!" Tiin ka au a, thlen phei chu ala thleng thui lo. Chutah lo inherin,
"Khaiuai nei enin ka en lehlo tih ka va hrilh dawn,"
a ti nih chu....awi takzet hian! Dak chungin ka nui hul hak a, hetiang reng hi chuan ka thinin ala tiar lo khawp ang mawle..!





"Va han over tak...rawn let mai mai teh a tlai tawh!" Ka ti deuh hlak a, fiamthu a thawh emaw a uang deuh lah hian a nui duh ngai miahlo mai lehnghal a. A ti tak tak emaw tih awl deuh a ni.





Nghak lemlo chuan hmalam panin ka kal ta zel a, rei rial lovin min rawn um pha leh thuai tho.




"Tinge i rawn let leh si...i va renew pui dawn emaw ka tia," ka lo tihchuan ka darah a kut rawn bat liamin, "Let turin min ti sia nangmahah hian ka duhtawk mai. Sangkimi chu 'Bro' ang kha, nangchu 'Wifey'.." thawveng deuh hian a ti a. Ka hmui hnuailam ka lo ti pawrh chiam ringawt.





Inhnuaiah chhung tlang lovin kan hawng tawh thu ka nute hrilh turin kan lut kawi a, Sangsanga-te unau chu an nu hovin an lo mu tawh a, ka pu pawh a lo mu lut tawh a ni awm e.





Thlengthlengi leh Hmangaihi-te chu lukham leh puan nen ṭhuttleng sei pakhat ve veah chuan Tv en chungin an lo ṭhu thluang ar ar mai a, Hmangaihi chu alo riak dawn anih hmel...





"Zu chhuk tawh rawh u, Leen-i pawh i chau tawh ngawt ang vawiin ni a sa sia. Khawlum nen hahdamna hun pawh in nei mang si lo va zu mu hahdam tawh rawh u," ka nu chuan zial zial mawlh mawlh pah hian a lo ti a. A ṭawngkam aṭang leh chet dan aṭangte chuan nu zaidam tak a nih ka ring...ka ring sual lo bawk ang.






Rei awm lovin inhnuaiah kan chhuk a, inhnuaiah hian Ramdina nau mipa leh Thlengthlengi pindan a awm tel ve a, mahse Thlengthlengi chuan inchunga a nu bula a mut tam zawk thu a sawi...






An unau hmingah hian 'Ram' a tel vek a, mak leh common loh ka tih ber mai chu an naupangber dawt hming hi a ni, 'Pialral Lamramnghaka' niin Ka hriat tirh phei chuan mak ka ti ang reng viau a, mahse ngaihtuah chian chuan a nalh ka ti...midangin an ti angem erawh chu ka hrelo thung.





Kan mut luh hnuchuan Ramdinmawia pek chuan, "Infawh ka zei leh zeilo i hre duh em?" A ti mauh mai a. Tawlh hlat hret pah hian, "Min rawn khawihna te naktuk zing khawvar hmu thei tawh lo turin ka siam ang che," ka ti deuh khar khar a.
"Hmmm" a ti duh lek chauh.





Khum hmawrah tak tak chuan ka mu a, Ramdinmawia vang vekin nuam tak pawhin ka mu thei lo!





Ka ban nat ṭhum avang chuanin ka meng siar siar a, ka mutna chu ava hniam ta em em ve ti a ka sir lam ka han hawi nak chuan chhuatah ka lo mu reng mai! Lukham chu ka lo kham ve ngei a, puan pawh ka sin thlap, thawh phan pawh awm lovin ka ding zawk a. Ramdinmawia muhil chu rum theih tawp hian ka melh nghal ram...





Zi mar ṭual ṭual pah hian a rawn meng a, "Tinge chhuatah hian ka mut?" Ka lo ti chang nghal fak.
"I tla a...," thophawng aw zet hian alo ti fan raih.
"Lukham leh puan nen hian ka tla a maw? Ka tla a nih te chuan min sawn chho ve leh mai ta che..!" sehchilh nak hian ka ti a...ham bui bui chunga ṭhu chhuakin,






"Min khawih suh i ti sia lawm...zing tho tur ka awmlo ang tih ka hlau ve tho a, lukham leh puante chu ka rawn sin tir ve tho che kha," pawisawilo hmel zet hian a ti a. Ka awih thei lo zawk! Engtin nge mahni nupui chhuata mu te khuma mut tir nachang pawh a hriatloh chu le!? Ka thusawite kha alo chaw tak khuk pui chiam a nih dawn hi!





Chhuata lukham chu la lawkin Ramdina vawm nan chuan ka hmang a, "A mak...," a lo ti ban charh. "Eng ang mipa nge maw i nih a mahni nupui te chhuata mut tir!?" Puan chu chhar lehin amah vawm nan bawk chuan ka hmang leh a.





"Ka mut tir loh che kha, i tla alawm...," tiin alo ṭang ve a. Ka tla pawh ni rawh sek sek, chhuata min mut tir tur hi a nilo hrim hrim!




"I nghal si! Chhurbur!" Tia a sama ka va tuai thur sak chuan ka ban rekah a lo dawm chat a, "Min thlah rawh," ka ti chang nghal fak. Ka mita min en kalh chunghian, "Hmeichhe nasa deuh hi ka ngaithei der lo a nia," a tihchuan a thutak ve hmel khawp a, mahse engah mah ka ngaih sak lo thung.





"I ngaitheihloh chi ka nih dawn chu," tiin a darah ka nem a, ka ban reka a man ve tlat avangin hnunglama a tluk rual chuan a awmah ka bei ve nghal thlawp a.




"Rin aiin i zei daih mai a...I duh chuan sawi ṭhat ve mai tur che a nia..." a rawn tih chuan a awmah ka beng thlawp a, "I duh duh sawi suh!" Tiin thawh mai ka tum. Mahse min pawt leh dawrhin kan in melh hnai set sawt ngei mai!





"Ka zei leh zei loh chu i hre duhlo a mi?" ti supin ka hmui chu a melh ralh a, ka lungphu a rang lehnghal sawt tawh. "I hre duh em?" A ti nawn leh a, chuveleh inthing harhin, "Ramdinmawi! I ninawm lutuk! Ṭawng thei bawk si!" Tiin ka tal buan buan a, tha kan inngah hleih nasa mai si.





Chutia khuma kan in chei buai lai tak chuan kawngkhar a rawnin hawng ri rawk a, rangzeta ka va hawi chuan kawngkhar bula Dawngdawnga nge Sangsanga lo ding chu ka va hmu a.





"A pute," a tihrualin Mimi-i chuan a rawn pawt chhuak lawp a, kawngkhar chu a khar nghal ṭhuai bawk. "A nu a putea te kha an insual a nia..!" Ring leng lawng hian ala ti zui a, "An insual hleinem...chho rawh chho rawh!" Mimi-i chuan a ti sawk sawk, "A pitei khan engtin nge a putea kha tih a tum a? I ṭhelh dawnlo a mi?" Mipa naupang ti lang lang ri chu a hla tial tial a, ava hun lo ber mai tak!






"Nia..engtia min tih nge i tum?" Lo tih zawm tu chu melh puah pawp mai ka duh!



******************