SHANE!! Chapter-9 By Ziki nu

[Ziki_nu]

SHANE!



Chapter-9


By Ziki nu




"Dar zat kha ka sawi chiang viauin ka hria"
Ka hmazawnah tak a rawn ding a, hepa hian engnge maw a hriat le.. A pindan lamah min hruai lut a, khumah min thuttir in naupangchhe zilh tak hian min zilh ni berin ka hria.



"Office hours pawh a nih tawhloh hi" tum bara ka lo tih chuan "Kan awmna hmun leh hun hi i hrechiang em?" a ti leh nghut a, hela pui roh hi a thinrim tak tak em mawni chu le.


Ka tihngaihna hrelo chuan "Ka tihpalh" ka ti ta ringawt a, "I kal dawn khan ka hrilh chiang viau che, dik em? Helai hmunah hian mipa nena lengkual mai mai tur in ka hruai lo che" min tihkhum leh nek a, zawk zamah hian a..



"I thil sawi chu ka sawi tur ni zawk awm tak a ni Pu Shane.. Tunge ngaihzawng buaipui zawk chu huhh? Hna pawimawha zin tur ni siin I bialnu I rawn hruai ve a, keiin ka thian pakhat ka lo len chhuah pui ve chu engnge a sualna?" ka ti ve ta sak sak a, thildang chu ka ngawihpui thei mahse leplerh ber ang maia khatianga min tawngkhum kha chu ka en liam thei tlat lo.




Kawngkhar bul bang kila sofa in hung ah chuan thu thla dawtin chiang fahran hian min en run a, "Elina-i kha I thik em ni?" a tia nih chu..!




"Thik lullo" vin lutuka ka tih lai chuan ngeiawm fe hian min lo nuih suk a, ka melh rum nasa ngang mai.



"I thik vangin min runluih nan mipa dang kha I zui amaw?" a ti leh zel a, a tawngkam leh awri hrep chu leh..



"Min va ngaihniam awm ve a.. I assistant chu ka ni maithei, mahse khatianga I en hniam viau tur kha chu ka nilo ania" ka ti fiah fak a, a hmui hnuai chu pet sawi zauhin "En hniam hranlo e" te chu a ti leh ang lawi a, chung te hlei hlei chuan min hmuhsit zia a tilang ni mai zawk hian ka hria.



"I boss ka ni tih theihnghilh lo la a ni mai" ka chhan hma chuan ti lehin a thutna atang chuan a tho vut a, side table a cold coffee ni awm tak pahnih lo inhung chu la in min rawn pek pah chuan ka bulah a rawn thu ve a.



"Dar 9 a in tura ka chah ania, hun tiam i bawhpelh avangin a tui vak tawhlo ang" a ti leh reuh a, hepa hi a duh chuan a ngeiawm thei viau a nih hi maw..




"Khawiah nge Elina-i?" ka tih chu hrelo ang maiin a phone ngawt a bih leh tawh a, "Hetianga min rawn hmuh chuan min ngai diklo ange aw" ka tih leh pawh chu min la chhang lo fo.




Be lui duh tawh bik lovin ka coffee ken lai chu ngawi rengin ka in a, a tui lohna em em pawh ka hre hranlo, hepa hi chu awmdun reng lai pawhin a induh leh tlat zel.



"Report kha i lo la thawn lo em ni?" a tih chuan ka thil in lai chu ka phuh chhuak teuh kher mai.



Phawk deuha ka en lai chuan "Tlai ah khan ka lo thawn ang i tia" a ti leh a, karei leh.. ka muhil daih a engmah ka la thawn reng reng lo.



Ka hmel atang chuan a hrethiam aniang thawk a la hawk a, "Va la rawh, hetah kan tidun mai dawn nia" a ti a, lu ka lo thing nawk nawk chu hrethiam lo hmel fe hian min lo en a,
"Keimah pawn ka ti zo thei ang" tih paha thawh mai ka tum chu ka banrekah vuanin min pawt let rawk a, hnai lutuka kan in en vang nge ka thaw lak a tawp nghal chiang khawp mai.



Ka mitah tak min en hnuah ka hmui chu a en tih ka hria a, "Tenawmpa" ka tih vak lai chuan ka kawng a chelhna pawh a lo thlah ve nghal a, rum lutuka ka melh laiin a khi suk duh chauh!




"File chu va la rawh" tiin min thawh san zui a, balcony lama a chhuak phei chu thinrim lutuk in ka melh tlawk tlawk.





Tlai lama ka lo muhil chu mawl inti lutuk in ka ner ka ner ringawt a, a pindana va luh leh chu chaklo sateh mah ila ka boss a ni tlat bawk si a, zan a tlai lam tawh bawk nen ka thuamhnaw pawh thlak hmasa lovin file keng chung huan ka let leh thuai a, bathlar lamah a la awm anih ka ring, pindan chhung chu a lo reh thiap mai.



"Shane..!"
Chhang Tu ka nei lo a, a reh tlawk tlawk ni maiin ka hria, ka thil ken lai chu dawhkanah dahin balcony lam pan chuan ka kal a, parda ka keu kau ruala ka thil hmuh chu awih a harsa zawk..


Elina-i chuan min hnung chhawn avangin min hmu ve thei kherlo ang, mahse Shane chuan min hmu, chiang takain min hmu tih ka hria..




Hmeichhe kawngah chuan dawmin duhthawh zetin a fawp a, ka en tih a hriat vang chuan tawp a tumlo kher mai, uar zeta an in fawp reng chu en zel chi pawh a ni lo.


Ka pindan lamah ka tlan phei hlawk hlawk a, bathroom lam ka pan ding chat a, shower chu herh haw in thawk ka la zui kawk kawk.



Ka rilru ah hian engnge awm pawh ka hrelo, engatinge khanu nena an awmdun ka hmuh apiang khan keimah ah hian danglam a lo awm thin le..


Ka thuamhnaw huh vek tawh chu phelh sawk sawkin ka inbual zui a, ka tap hauhlo na in ka mit kual vel chu a thip hlur hian ka hria, ka mut fel meuh chuan dar 12 a hnai tawh viau.



Mut chhuah chu sawi loh ka harh tulh tulh emaw tih mai tur a ni, ka file ken luh lah kha dawhkanah ka dah ringawt a, a pawi chai hleinem, report chu aman lo thawn vek rawh se...
Khatianga an awmdun lai min hmuh tir tum sa ni awm hrima an lo awm khan mi run takzet, pathlawi leplerh lutul leh zan nachang pawh hrelo, John-a ka chhuahpui vangte khan min han ngai lerh ve khanglang a, hrep hian.. A duh leh a nawmchen zawhah report chu ziak fel vek rawh se.




**



"Zothantluang.. "
Ka meng chhuak zawk a, ka thlenna pindan kawngkhar in beng dawt dawt thawm ka hriat leh rual chuan rang zetin ka tho chhuak nghal bawk.



Ka va hawn chuan kawr pawh ha lovin boxer nen Shane chu a lo ding reng a, a nghawng leh hmaiah te chuan lipstick nge hmeichhe fawh dukna tih pawh hriat hran theih loh khawpin a lo sen thluah mai, tenawm hian...


"Engnge a?" lungawi lo fe a ka tih chuan a thil ken lai chu ka hmai zawnah rawn lek kangin "Hei hi engnge?" a ti hmuk a, "File anih kha" ka lo tih chuan a che vut a, ka lo phu hman pek.

"Nimin ah report khi lama han thawn chho turin ka ti che a ni lawm ni?"
Ka lo nui hak a, nizanja an che na deuh nge a va theihnghilh hma em em bawk ve mawle..



"Nizanah kan pahnih in report kan siam ang i tia, mahse hmeichhia i thlang leh ta zawk anih kha" ka tih chuan hrethiamlo hmel te chu a han pu vel a, a mitmeng buai nak chu tenawm lamah a kal tlat.


"I mimal nun leh hna thil I ngaih pawlh chuan a va tha dawnlo ve boss" tih pahin a file ken lai chu ka pawh thlak sak a, "Report chu ka lo thawn ang, va mu rawh, dar 11 ah meeting a awm kha theihnghilh lo la, alarm I set dawn nia" tiin kawngka chu ka khar hnan hmiah a, ka lungphu dawt dawt chu ka kawr chhanah dawmin ka thaw chhuak suai suai,,, a landan mawlh mai kha...


Ka lu thing nawk nawkin hmai phih turin bathroom lam ka pan a, nizanah khanu nen khan... Urhhh eng vanga anni pahnih inkar chu lo buaipui ve viau nge maw ka nih le..




Min rawn kaitho hma bawk nen mu tha duh tawh lovin report thawn tur chu ka buaipui nghal a, a tam tham vaklo na in siam rem tur neuh neuh a awm a, ka buaipui rei hrep mai.



Dar 9 rik dawnah ka zo fel thei hram a, hotel chaw hi kan thlen tlai khan tui ka ti lo khawp a, ka ei nawn duh tawhlo. Ei tur pawn lam atangin ka chah a, chumi ei pah chuan ka phone ka en kual mai mai a, Kima te inneih thlalak ka hmu thut chu eng emaw zawng takin min thawng ve tho mai, ka rin ai daihin an innei hma.



F-i call ka dawng chiah bawk nen ka chhang thuai a, "Tuk in zingkar ah khan Kima te chu an inkutsuih a, I hre tawh em?" a rawn ti hmasa ber a, Rinhlui status ka lo en zawh chiah thu ka lo hrilh ve bawk.



"A leplerh man anih kha, a nupui neih ni ah pawh a tum bur alawm" ka thiannu chuan a ti hlak hlak a, min duhpui ngai lemlo bawka a sawichhe hnehsawh khawp mai.



Kan haw hun tur min zawh chuan naktukah kan haw theih ka rin thu ka hrilh a, Shane pathlawia chetdan tenawm lutuk kha hrilh ve ka han tum zet naa, kan haw hunah hmaichhanah ngei hrilh a tha zawkin ka hre leh a, kan inbiakna kan tih tawp hnuah Bawihtei nen atangin message ka dawng ve ngei a, ka en chuan Marthai thlalak hi a lo ni a, kan kawt zawlah khan puan phahin ka nau nen chuan an lo infiam a, an lang duhawm takzet.




"Apa Shane kha lo hmuh ve rawh" a rawn ti reuh a, Martha naupang khawngaihthlak, I pa lah chu nula bulah nuamtawlin a khawsa mai mai a ni bawk sia...



Ka pindan kawngkhar kik ri ah chuan ka phu leh zawk pek a, ka va hawn rualin Elina-i hmel ka hmu nghal zat bawk.



Zing zingah a rawn nalh leh viau a, a nghawng bawr vel ka lo en chîk nghal lutuk chu ka In haw lek lek.




"Shane I hmu em? A pindanah a awmlo a" a tih chuan ka hmuhloh thu ka hrilh a, "Zingkarah pawh in inhmu miahlo maw?" a toh leh chuan min ringhlel deuh hlek in ka hria.



"Zingkarah kha chuan hmu e, file min rawn pe a" ka ti a, ngaihthat lohna a nei hranlo aniang a bu nghat nghat a, "Khawiah nge a awm le?" ti nuah nuaha a kalsawn chu ka en zui reng a, a nghawng ah khan fawh dukna hnuhma a awm ve lo reng reng...




Ka insiam lai chuan John hnen atangin call ka dawng ve leh hlawl a, "Tlai lamah hun I nei angem? Kan bazar dawn em ni?" a rawn tihchuan ka phur leh pek khawp a, company lama kan thang rei lutuk ka ring tawhlo bawk nen 'aw' ka lo pawh ve leh thawr bawk a, kan pathlawia'n engtin tak ngai leh ang maw, ka buaina tur a ni tawhlo e...




"I hman hunah I lo sawi dawn nia aw,, bungrua I ngah vakloh chuan ka chhungte thawn tur lei ve te ka duh a" a tih chuan ka ngah loh thu in ka lo chhang vat a, tlai lama inhmuh chu kan han rawt ve leh phawt chu ania..




Hun ka ngah bawka ka in chei uluk leh viau a, Elina-i kha tluk loh ka hlau chu ka ti duh bik lo anga, mahse a ni aia lan mawiloh bik chu ka tum lo bur thung.




Dar 10 pelh hnua Shane pindan kawngkhar ka va kik karh karh chu min chhangtu an awmloh avangin zawi muangin kawngkhar chu ka hawng a, pindan chhungah chuan tumah an awmloh avangin let leh mai ka tum a, mahse bathroom atanga thawm ka hriat avang chuan ka pan hnai leh ta zawk.



"I inbual em ni?" ka han ti thawr a, min chhan hun ngaichanga kawngkhar bula ka beng ka dawh reng lai chuan a rawn hawng thut a, a âwm ka bawh zui rawk chu a la huh chap bawk nen ka nam let vak a, towel var a veng a, a taksa ami chu chiang takin hmeichhe fawh dukna a ni tih ka hre chawpchilh nghal bawk.




Ka nghilh deuh dup a, "Ka... Englo.. " sawi mai tur hreloa ka ti bah nawk nawk chu min kalpel vutin "I hman tawh em ni?" a ti a, "Aw hman tawh" tih zawngin ka chhang thung.




"Ka inthlak anga kan kal dawn nia, tukthuan I ei tawh em" a ti leh a, a tawngkam te chu a dam deuh diai mai in ka hria, mahse kha ka ngaihdan, mipa tenawm leh lerh tak a ni tih erawh kha chu a la ngai reng.



A taksa hru hul thuak thuak a a kamiz a ha tur chu a nghawng leh âwmbawr vel ka lo en reng tih a hria a ni mahna, a taksa chu en vutin "Hrep chuan" a ti hluk a, a kamiz kawrkilh chu kilh mawlh mawlhin "Chaw chu I ei tawh em?" tiin min zawt leh a, ka lo bu nghat ringawt.





"Kan zo har tawhlo ang, tlai lamah chuan kan bazar ve dawn nia" a tih chuan "John nen bazar kan tum" ka lo ti a, ka chhang rang mah mah chu ka duhlo leh hnuhnawh viau mai.



Min en vung vung vang chuan "Elina-i nen in bazar ve thei tho a" ka ti leh sap a, min chhang tawhlo thung.



Mipa na na na chu a insiam chhung pawh a reilo khawp mai, motor a kan thut luh rualin "Zingah khan Elina-in a zawng che a" ka ti a, ka sawi chhuah chhan ber pawh ka hrelo, min chhang lovin a bu nghut ringawt a, John nen kan bazar tur thu ka hrilh vang kha nge mawni a tawng tha leh duh tawhlo.




Tih tur tul ang ang te sawia kan inrem hnuah company chu kan chhuahsan a, chawhnu dar 1 a pel awrh chauh a ni.



"I thianpa chu lo nghak rawh" ti nghutin chhan pawh ka chhan ve hma chuan motor chhungah min luhsan daih a, min tlansan nghal anih chu!




Ngei zetin an tlanliamna lam chu ka melh ngawt ngawt a, John chu ka call nghal bawk.



A chhang lawk lo chu ka thinrim belhchhah tun a, vawi 2 ka call hnuah pawh a la chhang thei chuanglo, ka ngah deuh vang vang hnuah amah zawkin a rawn call ve ta hram a, "Ka tihpalh lutuk, office ah ka la awm a, I hman tawh em ni?" a rawn ti zung zung a, a buai hmel riaua ka hriat avang chuan ka inthlahrung leh deuh.



"Imm I la hmanloh chuan a pawilo ania aw, a la tlai hleinem" ka ti a, lehlam thawm chu a reh vang vang hnu ah "Ka lo be leh ang che aw, dar 3 hma chuan ka hman turah ngai ang" a rawn ti a, kan inbiak zawh chuan ka thaw chhuak hawk ringawt. Dar 3 thleng han ngah tawp mai chu... A la rei dawn hlee mai...



Ka dinna atanga lang thei chin kawngpui ah chuan motor an in sulpel zut zut a, hmuh theih chin mihring te lah chu mizo hmelpu an awmlo reng reng....



John chu call lehin a hnathawhnaa lo aw ve ka dil mai dawn nge hotel ah ka lo va let leh ang tih ka ngaihtuah buai lai chuan motor horn ri tuar ah ka phu zawk a, ka zawnah tak motor chu rawn ti dingin a khalhtu hmel ka hmuh chuan ka hamhaih deuh a, Shane a ni tlat...




Nichin lawk khan min tlanerl si a, chu aia la mak zawk chu motor a rawn khalh hi a ni, company kan pan dawn leh kan haw lamah chuan driver in min hruaiin min thlah mai thin a, nichin lawka min tlansan pawh khan a hnung lamah a la thu a nih kha.



"I thianpa chuan a rawn hruai dawnlo che a ni maw?" ti vang vangin ngeiawm fe hian a nur zui nang a, "Kalsawn mai teh" ka ti ve tak nain ka thusawi ve te chu engahmah a ngailo tih hriat tak hian "Rawn lut rawh" a ti sup a, "Kal mai mai teh" ka tih leh chuan a lawm vak bik tawhlo aniang "Rawn lut vat rawh" a ti ta hluk a, mahse a thu thua awm chu ka tumlo nasa mai.




"Vai ho in min rubo daih dawn pawh nise ka rawn lut chuanglo ang" ka tih khum leh sak, hepa pui hi vai ho aia a hlauhawm logna ka hre bik lo e a, a lerh ropui si, tunah phei chuan amah chiahin motor a rawn khalh leh nghal a, ka chungah thil tha lo deuh a ti duhlo ang tih tunge sawi thei..?



Aning ta deuh aniang thaw chhuak hawkin motor atang chuan a rawn chhuak a, min nam lut lui ang tih hlauin ka lo tang nghal tung bawk.





"I lut dawn nge dawnlo"
Ka hmaah tak dingin a kut pahnih chu a kekawr ipte ah a thun lut a, a hmel thutak run chu en rei duhlovin ka hawi Sawn thuai bawk.




"Dawnlo" ka ti a, ka tumloh dan lutukin ka aw chu a lawi rût a, chang fek fawka han sawi ka duh viau naa, hepa hi ka tih ru riau a ni.




"A tha e" tih pahin ka kut pahnih chu a rawn man lawk a, ka hnung lamah kherh betin motor chhungah chuan min nam lut rawk rawk a, ka sawi kha, hepa hi vai ho aia a hlauhawm lohna a awmlo, mi rapthlak a nih hi.





Chhuah lehnghal tuma ka che phat chu a kut zungchala min rawn kawk siah pah hian "Che hlek suh" a ti hluk a, min la en chiang em em mai leh nghal, a awri rapawm leh vin lutuk vang chuan ka che sawn ngam tawh eihlo, ngawi rengin ka thu hle hle ringawt.













Cont...
Naktuk Pathianni a nih avangin story a awmlo ang aw... Muttui vek ule🤍

a hnuaia ads khu mi panga talin min lo click sa ve dawn nia