THINGTLANG MISTIRI LEH KEI (BUNG-9 NA)

[Kennelly Bawitlung]

THINGTLANG MISTIRI LEH KEI


BUNG-9 NA
ZIAKTU: KENNELLY BAWITLUNG

_________________________________


Rang lutukin ka in la hrang nghal vut a, Ramdina chu a nui ruh ruh mai. "Nangmah vang vek!" Ka ti hlak a, ka meng tur nasa mai. "Dawngdawnga chuan pitei kawlh deuh an neih thu ka nute bulah a han sawi mekin ka ring. Inchhung i luh rualin han insawifiah nghal deuh zung zung la a ṭha ang," fiamthu ti tak deuhva a tihchuan chhanglet tawh lovin ka chhuahsan a.





"Mipa mak leh lutuk..!" Ti nuah nuah chungin ka inphih fai a, a hmel te hi chu a che zawk zawk pawh a nilo. A pumrua pawh a lianin a taksa pawh a inphut mawi tawk viau a, hetiang ang mizia lo deuh hi chu nei se ka duh daih tawh ang. Ama thiamloh zawk a ni e, eng pawh tawng ila fiamthuah a lo la hman zel a chhe ziap zuap mai mai lutuk.





Bakah tukin ka insum theihloh chhan chu ka period vang ngei a lo ni. Ka vanneih ve deuhna chu taina leh kawngna hi ka nei ve ngai mang lova, han nat deuh chang hi chu awm ve ṭhin mahse awm ti hreawm khawp khawp a na chu a ni ngailo.





Inthlakna tur ka va lak lai chuan kawta Ramdina zi mar uan uan chu ka va thlek zeuhva, kekawrbul nen chauh a awm a, duh aia rei thlek a awl dawn dawn alawm mawle. Inthing harhin bualinah chuan ka lut leh a, ka inthlak zawh hnuah pindana lut tawh lovin pawnlam ka pan tlang a, kawmthlang huana thlaihnah sik chu ka zuk hmu thei a, inchunglam pan chuan ka chho nghal.






Tual zawla ka pu leh a ṭhianpa ni awm tak pahnihte nilum ai chungin an loin kawm malh malh hlawm a, min hmuh chuan min lo be ve luam hlawm a. Ka chhan vek hnuah inchhungah chuan ka lut ta chauh a, Dawngdawnga-te unau chu Tv enin chungin ṭhutthlengah an lo ṭhu awn diai a.






Nichina min lo hmutu zawk khan a hmaa Siper-man lem chuang kawr a ha a, Ramdinan 'Dawngdawnga' a tih tak kha mawle. Ka va lut chu min lo melh kar mai a, Sangsanga zawk chuan TV ngawt chu ala en thung. Sual deuh turah min ngai a ni hrim hrim ang, an putea thiamloh vek zawk a ni reng sia.





"E, i va tho hma ve Leen thingpui i duh ve em?" Mimi-i chuan a lo ti var a, "Duh lo mai ang, eng nge tih tur awm ka lo pui ang che u," ka tihchuan engmah tih tur a awmloh thuin min lo chhang mai a. Min dah awl leh lutuk chu nuam ka ti bik der lo va, hmangchang hrelo leh monu thatchhe deuh angah min ngai ang tih chu ka hlauh ber a ni.






Mahse eirawngbawl hi chu a ngaihna ka hre der lo, mahnia awm ṭhang ka nih bakah zinglamah chaw ka ei ngai lo va, ṭhiante nen kan ei chhuah fo avangin han in zirna hun takngial pawh ka nei lo ṭhin a nih kha...Mimi-te unau hi awmlo ta se monu eirawngbawl pawh thiamlo tiin min sawi luai luai tawh hialin a nia ka rin ni.





Hmunte chu ka han phiat ve lawp lawp a, chawlhni zinga ni bawk a dar 8 bawr velah chhung inkhawmna kan hmang a, ka nu huan kal khan vawksa rep chhum a thlak tur anṭam a lo la hi a lo nia, chaw ei siam lai chuan kan thlak a, a tui viau ang. Mahse keichuan ka ei ve thei chuanglo.





Mimi-i arsa kan chu a ngawt suah mai a, fanghma hel tui deuh kan hmeh tel bawk a, ei hnem lo mah ila ka ei tui ve khawp mai.





Chaw eina kan sengfel hnuah inkhawm turin kan insiam nghal a, he khuaa ka vawikhat inkhawmna tur a ni bawka lan nalh loh hlau zetin ka inchei hlarh hlarh a. Ramdina chu hmanhmawh lo zet hian kawtah zial zu chungin phone ala hmang ham ham thung.





Kawr chu ka ha tawh a, puan bih tur zawnga wardrobe ka thlek kual laiin Ramdina chu a rawn lut a. Ka va melh zawk chuan kawngka bula ding chunghian min lo melh vung vung a, "Eng nge..?!" aw pawr zet hian ka ti nghal tawng.





Rawn lutin kawngkhar chu a khar zui a, ka inchei uchuak viau em ni chu aw ka tih rilruk laiin khumah chuan ava ṭhu a, thatchhe zetin hnunglamah a kut khinghnih chuan a in nam khalh a, uluk lutukin a mit chu keimahah ngawt a fu ngar mai.





Chutia mit la lek lova min en tak rengah chuan han chet vel pawh a nuam tawh lo. Min ti khawr ṭut a, ka tukkhum za mer mer vang chuan min la en reng tih pawh ka hre thei. Ka puan bih tur zawng pawh chu rilruah a awm thei tawh meuhlo ka hai ka hai ringawt a, ka kawr nen eng nge inmil ang tih lampang ka ngaihtuah thleng pha tawh hauh lo bawk.





A thuhrimah chuti fa koa mi insiam lai lo enchik te chu tumahin nuam an ti bik nang, "Eng nge a!?" Inher vutin ka ti pawr hlar a mitko lo san ukin, "Engmah...," a lo ti mai a.




"Engah nge min en reng insiam rawh," nur nang hian ka ti zui a engah mah lah chuan a ngaihloh hmel nasa rapthlak mai bawk si.





"Eng nge...? Ka nupui insiam lai ka en ve a ni mai a, sual a ni em ni?" A lo ti let erh a, min ti dang lel mai. "Chupawh nise a nuam hleinem insiam rawh a tlai tawh," tiin ka puan hmuh hmasak ber chu ka phawrh a, ka bih nghal sawk sawk bawk.




"I zam anih kha,"



Ka inher a, a ṭhutdan ngai thova ṭhuin min lo la melh kalh mai. "Engvang ngawt chuan nge ka zam ang a..? I duh duh sawi suh." Ka ti deuh nghat a, a sawi confi em em leh nghal a.





"I chet khawr ṭut kha mawle, ka hmu vek alawm. I bul hnaiha ka awm hian i zam ṭhin a ni tiraw?" Fiah tak hian a ti thum dut dut a. Ve leh ringawt zel hian...! "Zam mai mai lo. I ngaihtuahna vak vel anih chu," tiin ka ṭang ve tlat a, ka chet khawr chhante chu min en reng vang a nia...Amah nilo midangin khatiang khan min en ta reng se hetiang tho hian ka awm ang.





"I chiang chiah maw?" A ti nawn leh ta kher a, chuveleh "Chiang chiang, i thu khel a ho si i insiam vat loh chuan ka kalsan dawn che a nia," ka ti khar khar a. Min enna aṭanga a mit la sawnin a nuisuk a, ka sam siam ṭha turin dressing table lam chu ka pan ta daih a.





Ka sam bawk chu phelhin sam khuiah laa ka kun ka din ngil chiah chuan kut pahnih hian hnunglam aṭangin ka kawngah a rawn kuah a, a kut chu ka dul zawnah a suih bet nghal hmiah bawk!





"E..engthil nge maw i tih le?!" Ti bah nawkin tal chuah ka tum a, mahse min si cheta rawn dingin min kuahna pawh a tinghet zual sauh bawk.




"Ramdinmawi min thlah rawh," sehchilh rap hian ka ti a.




Ka hmaa darthlalang aṭang chuan min rawn enin ka bengbul chetah chuan, "Ka zam lo i tih kha, heti chung pawh hian engtin mah i la awmlo maw?" A ti sup sup a, a ṭawng zawng chuan a hmuiin ka beng a rawn nul leh thuak ṭhin a, ka taksa pum chuan a mur chhuak uai uai mai a ni.





Mahse a chetdan avanga ka danglamna chu lan chhuah tir ka duh lo va inthunun hram hram chungin, "Awmlo min thlah teh," tiin a ban chu pawh phelh ka tum a. Min thlah ve maiin ama'rawhchu min kuai her lawp a, engkhaw sawi set set lo hian ka hmuiah chuan min fawp nghal chawt!





Ka hamhaih atalangin chet ngaihna pawh ka hrelo. Ka khawng awt a, chawp leh chilhin ka awm zawna mi chu a rawn sawt chhuak mai dawn emaw tih tur hian a phu rang a, rilru fim pawh ka pu thei hek lo.





Thlek sawn ka tum chuan ka biang tawn tawnah dawmin min fawp uar sauh mai a, ka tiril khur der der pawh chu chiangtakin ka hria.Ka chhanglet lo nain ka hnar chuang lova, eng nge ni ka hriat pawh ka hre hrep lo hreawm chu ka ti hauh lo, in lak hran chu ka duh mahse...ka theilo.





Min fawh dan chu a dam tial tial a, muangchang hian a inla hrang a. A kut chuan ka hmai chu ala khuap reng tho a, kan hnar pawh insi lek lekin ala awm tho.





Thawk ka la nghal ham ham a, ka lo thaw ṭha ngam reng renglo a ni tih ka hre ve chiah.
"Ti kha chuan i danglam a ni tih i inhria tiraw? Hei hian a tichiang viau a ni," tiin a kutphah lian zet chu ka lungphu dawt dawt zawnah chuan a rawn sawn thla a. Phat theih chi ziazang ni nghal lo chuan..





"Khatianga i chet thut te chuan ka lungphu te chu a rang ve bawk lohin," ka la ti fan a, chutah thawk la halhin "Chuti maw..." aw chang lam mah hian a ti dut a. "Aw," a mitah tak en chung hian ka ti ve ta ngat.





Min en run runin min thlah thut a, a inlak hran takah chuan hahdam huai awm tak ka nih vei nen a lungawi hmel vaklo ka hmuh rual chuan engtin emaw ni tak hian ka awm a, sawifiah ngaihna pawh ka hrelo. Khua chu a vawt miah lo a, mahse ka taksa chu vawt nghal sung sung ang hian ka hria...





Ngawi reng hian a insiam mawlh mawlh a, a pawi ka sawi ta emaw tih tur hmel hi a pu ta mai a. A khat tawkin ka va thlek leh zauh ṭhin a, a insiam mawp mawp a biak chakawm vak lo (h).





"I hman chuan chho ang," a insiam zawh chuan a ti a, a ṭawngkam chu a hmel en aiin a pangngai viau lawi a. Tukin zinga hmel leh tuna a hmel put chu inthlau tak a ni.





Inchungah kan inzui chho a, Thlengthlengi chu a ṭhiannu Hmangaihi khan a rawn sawm chho hi alo nia an kal deuh chiah a ni awm e. Ka pu hi a chak vak tawhloh avangin ke a kal vak a tlin tawh lo bawk nen Ramdina chuan motor ava ti nung a.





Dawngdawnga leh Sangsanga pawh Mimi-i chuan a chei mawi khawp mai a, an nufa hoin an lo han chho hmasa dawn a nih hmel.





Ka nu, ka pu leh kei chu Ramdinan min phur chho a, kan tlangval kha chu a inkhawm dawnlo ni ta in ka hria ka hmulo reng reng. Kawngtluanin ka nu leh ka pu titi kan ngaithla a ni deuh mai a, Ramdinmawia awmdan leu luau chuan awm a ti nuam derlo leh ta nghal a.





A mi fawh vanga ka danglam lo ka tih vang khan a lungawilo nge mawni dawn le...mahse chutiang mai maia han lungawiloh chhan tur lah chu ka hre der lo. Min duh te a nih ngawt si loh chuan...mahse min duh anga a awm awm pawh ka hre chuang si lova, mi fiam leh tihzah chiah kha nuam a tih ber niin keichuan ka hria.





Min fawh vanga ka lungphu rang lutuk te kha chu thil pangngaiah ka ngai, ka beiseiloh deuhin a che miau a, chuan mipa leh hmeichhe karah kha thiang a thleng a nihchuan danglamna laia mual mual pawh ka nei ta ve ang. Mahse amah ka duh vang chu a ni hauh si lo.





Biakin kawtah Thanpuii leh Sangkimi an lo ding a, Thanpuiin min hmuh rual chuan ban a lo vai vat a, tawi te chuan ka nuih let kha.





"I ṭhiannuin a lo nghak che a nih dawn saw, anihchuan kan luhsan mai ang che u aw, tirawh ka pa step-ah khan pem fimkhur la," ka nu chuan a ti a, ka pu nen chuan an inzui chho a.





Ramdina motor hung fel chu ka nghak rilru deuh a, mahse ka bul a lo thlen chuan, "Lut hmasa rawh u," a rawn ti a. Min kal pel zuiin Biakin choka lama Thangtea leh mipa ṭhenkhat dinna lam chu min pan san nghal nul nul. A thinrim chiang lutuk, nidanga a awmdan nen a in anglo hrim hrim. Ka chiang lutuk ringawt. Ka thinrimlo han ti sawmsarih tehse... za ah zain a thinrim tih ka chiang!





"Inva chhelo dun ve khawnge Ramdina kha a kaldawn?" An bul ka thlen rualin Thanpuii chuan a lo ti var a. "A ṭhiante bulah a kal lawk anih kha, lut ila," ka tih takah chuan kan pathumin kan inzui lut a. Kan hma bawka tlar hmasa lamah kan ṭhu a, hnunglam han hawi han hawi lah kha a nuam bawk si lo, Ramdina rawn luh tawh leh tawhloh en tumin mipa ṭhutna tlar lam chu a khat tawkin ka thlek leh zauh ṭhin.





Dar nawn dawn ṭep a ka va hawi zawk chuan a hnunglam tlar a Thangtea nen an ṭhudun chu ka va hmu ta a, min rawm hmu ve lemlo a nih hmel. A ṭhianpa bulah chuan ka bula a hmel put ang kha a pu leh tawh miah lo va, ka ngei lek lek a ni.





Inkhawm chu biakin khatin kan awm ve a, biakin hi a hlui deuh tawh avangin a hnungah hian a thar an sa mek a ni awm a. Kan inneihni khan Thanpuii nen kan va en ve zawk tawh a, a lian ṭha dawn khawp mai.





Inkhawk ban chuan mipui tak zawk chhuah hun chu kan nghak a, a chep a chepa va inhnawh kha a peihawmloh bawk em a tin ni. "In nupain thingpui in turin rawn leng kawi ula," Sangkimi'n a tihchuan Ramdina-te ṭhutna lam chu ka va en a, a hnunglama ṭhu an ni bawka an chhuahna a rei tawh.






"Ka hrelo le amah ka zawh phawt loh chuan," aw pawh nghal mai lo chuan ka ti ve tlat a. "Nia, i nute pawh naktukah an hawng tawh dawn sia rawn lenthlak pawh an tum tho kha," Sangkimi chuan a ti a. An chhuak fel vek ta tihah kan pathum chuan kan inzui chhuak ta hlawm a.





Ka hawikual ruai a, ka chhungte chu hmuh tur pakhat mah an awmlo. "Leen, khawnge in pa nau hi...biakinah khan ka hmu miah lo a nia." Thanpuii chuan min rawn bek bawr sar sar a, Sangkimi hriat chu a duhlo a nih ka ring. "Inah a awm, inthlak la min zui thla nghal dawn nia." Ka tihchuan a phur khawp a. Khawiah nge kan Mistiri-a chu alo pildo tak daih ni mi pawh hi a ngaihsak lo reng reng..!






"Khawiah nge Ramdina hi?" Thanpuiin a tih lai mekin



"Saw a lo phei alawm," Sangkimi'n a rawn ti ve chiah a. A kawhna lam chu ka hawi nghal vut a, Ramdina chuan kan lam a lo pan phei mek alo ni.
"Sangkimi-te inah hian kan kawi thla lawk dawn a nia, ka nute chu an leng kawi dawn a ka phur thla ang cheu tikhan min lo nghak lawk rawh u," tiin motor dahna lam chu a pan a.





Sangkimi a melhte khan han nuih tel kher kha ava han ṭul lo tak! Ka bula a tum len len nen. Tikha chuan lungawlohna a nei tih pawh a hriat miah hleinem.




Kan hmaa a rawn din chuan a seat hmalamah ka ṭhu lut a, Thanpuii-te pahnih an rawn ṭhut luh hnuchuan a tlan chhuak nghal a. "Ramte pa Hlira-te dawhkan i siam kha i zo tawh em?" Sangkimi chuan hnunglam aṭangin a rawn ti a.





"Rawng hnawih chiah a ngai tawh a, kar tharah chuan a dah chhoh theih tawh ang," pakhata chuan a lo ti ve mai a. "A ṭhat chu, kan Tv dahna bawm khi thlak kan duh tawh a ka pain a hman dawn em lo zawt rawh a tia. Siam tur hmanhmawh thlak deuh i nei te a nih loh chuan min khawih sak hmasa thei angem le?" Polite tak hian kan hnunga mi chuan a lo ti leh a.





A hma glass aṭanga Ramdinan ava melh zawk chu ka lo hmu hman hram a, ka ner nawng ringawt. "Induh dan design-te lo thlang fel ula, khawih tur dang ka neih loh lai tak a nia order awm hmain ka lo siam vat ang." nui deuh suk pah hian a ti a. Ka va han eilo mai mai tak! Seng sung hian!A ni ang em ema ex-te be ṭha ka la hre ngailo.





Sangkimi-te inkawt kan thlen chuan ka chhuk tharh a, kawngkapui chu a inhawng hiau a midang nghak lem lo chuan ka lut nghal thawr a. "E Bawihi inlo leng kawi dawn a ni maw? I pa Chhuana hovin rawn len thlak kan lo tum a, Ramdina lo ṭhu rawh u," ka pa chuan a lo ti thuai a. Thanpuii chu inthlak turin a tlang a, ka nu bulah chuan ka va ṭhu thla tharh a.





Pa Chhuana chuan Tv dahna tur chungchang chu alo sawi pui ngei a. Thingpui ina kan ṭhut khawmuan hnuah puitlingho zawng chu Ramdinan a phur thla hlawm a, ka nu leh Pa Chhuana nupui hovin kein kan chhuk ve thung.





"Leen, in pa chu a fel i ti em...? In inmilin i hria em?" Pa Chhuana nupui Nu Mafeli'n a tihchuan ka ngawi vang vang a, "Mmm fel a ni mai," tih ringawtin ka chhang a. Kan la cheng dun reilo em mai pawha kan inmil dawn em chu ka la sawi thei lo a, ka hriat chinah erawh chuan kan inmil hlawl lo.





In kan thlen thlak chuan Thanpuii hnenah inhnuiah ka inthlak min lo nghak tura ka tih avangin kan chhuk tlang a. "In pa nau chu a awm tak tak em?" A ti leh ṭhin a, "Awm ang," hrechiang mang lo hian ka lo ti liam puat a. Ka hrelo tak tak a, a awm tak loh leh a lo kal thlawn a ni tawh mai.





"In inbul ve hi a dai sia a nuam e, compuond in nei zau bawk si. A hahdam thlak ngawt mai," Thanpuii chuan tukverha dak hauh hauh pah hian a ti halh a, "Ramnung an hram chuah chuah zel a bengchheng theih mah zia chu a," inthlak pah chuan ka lo ti ve thung a. "I ti mak e a! Aizawlah te chuan thereng hram hriat tur pawh avang nak a alai a, helai inbul vela sava hram hriat tur awm pawh a hlimawm dawn tehreng nen," Thanpuii chuan a lo ti ve leh a, kan rilru put hmang chu inperhsan haih haih tak a ni.





A lum deuh bawk nen kawr fual ban bul hi ka ha a,
ka insil fai thuak thuak hnuah kan inzui chho leh a. Kan chhoh hnu rei vak loah Ramdina chu inthlak turin a chhuk ve ta chauh a.Thingpui te lum lehin naktuk zingkarah ka nute chu chhuah an tum a ni awm a, ka thlah ve hman ngut ange maw.





Puitlinghoin ṭhutkhawmna an luah khat hneh lutuka choka lamah Thanpuii nen kan awm a, Dawngdawnga-te unau lo lut chuanin, "A pite khawnge a nu hi?" Tiin min rawn zawt a, a kalna ka lo hrebik bawk silo an rilṭam thu an sawi chuan "Tikhan lo awm rawh u inhnuaiah pawisa ka zuk la lawk anga thilin lei dawn nia," ka tihchuan an phur dun khawp mai thuawih tak hian Thanpuii bula chair-ah chuan an ṭhu thla a.





Inhnuaiah chuan chhukin pindana ka luh hma chiah chuan Pialrala a pindan aṭanga thophang zeta lo chhuak chu ka hmu a, alo mu char char a nih hmel..ka ṭhiannu ka hrechhuak zawk a, a chhuak tur chu ka ko ding leh rih.





Rawn hawiin a ham bui bui a, "Tikhan lo ding lawk rawh aw.." tiin ka kut zaizirin a dinna hmuna la ding tur chuan ka ti a. A bu ve nghat nghat a, hmanhmawh zetin pindan kawngkhar chu ka hawng ri rawk a, Ramdina lo inthlak mek pawh chu ngaihsak lovin ka purse ka la chhuak sawk sawk a, za tlang chu la chhuakin ka tlan chhuak lehnghal vut a.





Pialrala chu zawi hmel zet hian a dinna ngaiah chuan a lo la ding ve ngei a. "Hei hi chokaa ka ṭhiannu Thanpuii kha min lo pek sak mai ta che inthiar lawk ka duh sia ka pe hman tawh ngang lo," tiin dawt ka sawi ta ngawt a. A bu leh nghat a, a ṭawng peih ngang lo a niang. Tikhan Thanpuii chuan khabe sep alo thiam ve hle chu a ngai tawh ang.





Han chhoh lehnghal kha ni thei si lo pindanah chuan ka lut leh ta ngawt a, Ramdina chu kekawrbul nen chauh khumah chuan a lo mu a. A kut pakhat chuan a mit chu a hliah a, a muhil em mawni dawn le.





Ka thlek deuh dak dak a, muhil ni awm tak hian thawk ala ham ham a. Nichin lawk khan a inthlaka muthilhna hman chu a awm lo hrim hrim.





A kamis leh kekawr khum mawnga a dah tawp chu lain ka bang ṭhat sak a, ala thinrim em mawni dawn le aw...thinrimna tur ka sawi awm ka hre chei si lo va. Awm a tinuam lo reuh tak tak a ni.





Ka mutna lamah chuan ka va ṭhu a, Ramdina bawk chu ka melh leh ṭhin. Khumah chuan ka ke hlangin ka va bih hnai sat sat a, muhil tak tak ava ang reuh e...




"Eng nge?" a muhil emaw tih nak alaiin a rawn ṭawng thut chuan min va ti phu chiang kher e!
"I muhil der vel a," tiin a banah chuan na lo tein ka beng a. A kut chu la sawnin min en a, "Tinge i thinrim a?" Tiin ka melh chhuk ve ran bawk.





"Ka thinrim lo," a ti sup a, ka hmui hnuai lam ka ti pawrh vak. "Hmmm...dawt sawi suh i hmel aṭangin ka hmu thiam vek i thinrim anih kha," ka ti deuh pang pang a, a kiai suk mai. Mit zim sun a ka en chuan, "Tinge ka thinrim leh thinrim loh chu i ngaihven viau a?" A ti ta khauh mai a, sawi tur reng reng ka hre tawhlo. Ni e, tinge a ni thinrim leh thinrimlohah chuan ka lo buai em em?!





"A...ka..ka ngaihven pawh a nilo..ih...," ka sawi tur haihchham chu ka riai nawi ta vel mai mai a. Chutah rawn ṭhu chhuakin hnai set sawtah hian min rawn en a, ka lo eu deuh awrh a.Mahse ka kawngah a lo dawm vat thung, "Ka thinrim chuan awm ngaihna i hre dawn lo anih kha...," tiin ka hnarah a piai zauhva.





Che chang lovin ka ṭhu ngawi reng a. "Leen...," ril raih a ka hming alam pah chuan a kut awl lamin ka biang a rawn dawm a, a kutzungpuiin a nul pah hauh hauh bawk. A mitah chuan ka en a, min en dan chu ka hrethiam lo, a mitmeng chu ril riau hian ka hre pek a.





Zawi muanga a rawn hnaih zel pawh chuan dan ka tum lo. Ka hmui zawna a rawn thawk lum tak ham hamah chuan ka hmul thi a ding nghal ur ur thei! Ka thaw dep dep tawh a, lungphu lah mumal lo zetin a lo phu ve dawt dawt bawk.





"I inchhir lo tiraw?" A ṭawng zawng chuan ka hmui a rawn si thuak a. "Engah chuan maw?" Ka ti lawi rat mai, pangngai taka ṭawng chhuah ka tum ve tehreng nen ka thei thlawt lo a tin ni. Ka kawnga a dawmna chu tinghet sauhin alamah min pawh hnaih belh a, a awmah ka kut chuan ka dawm a, a lungphu su dup dup chu ka hrechiang kher mai.





"Kei min nei hi i inchhir em?" thutak leh fiah fak hian a ti sup a. Kan mit a intawng ran a, chhanna a beisei tih hriat zetin min en kalh mai a. Chu zawhna chu keimah ngei pawh ka hanin zawt leh a, inneih ka huphurh zia te kha ka hrechhuak a. Ka nei anga, ṭhen leh vat ka rilruk a nih kha. Mahse ka inchhirin ka hre hauh lo, ka haw lo tih pawh a hre ve thoin ka ring.





Lu ka thing ta mat mat a, chutihruala a mitmeng de sawr sawr chuanin ka chhungril hi a khawih pha ve tlat nia...!





Thudang a sawi tawh lo, dam dap hian min rawn fawp ta a. A ni hi ka duh awm reng reng ka hre si lo tinge a mi fawhna hi ka hnar theih der loh mai le?! Ka nghawng chu a nul thla dan dan a, ka Koki chu a fawp vang vang a, ka lo thaw hle hle ringawt.





Rilruah thildang a leng tawh meuh lo a, tukin zinga a perfume hman rim a taksaa la changbangte chuan min zem chiai chiai a ni ber. Ka vai ruai a, ka mit ka han men leh meuh chuan engtik laiin nge ka lo mut thlak hman ka hrelo reng reng. Ka chunga miin ka kawr ban a kawih thlak chuan harh chhuakin a banah chuan ka dawm vat a.





"Hei...a chiloh," ka aw chu a ri chang chang chauh a ni. Chhun pachanga hetianga awm chu ka duh reng renglo, chu bakah ka nute inchungah an awm bawk si engtik lai pawhin min rawn ko thei reng tlat a ni.





A mitmeng sexy zet chuan min rawn en a, "Ka nute inchungah an awm min lo nghak reng tawh ang," pangngai tak chuan ka ti thei hram a. Lungphu erawhin ngai ala awh thei meuh lo zawng a ni. A thaw ham ham a, a tawp nan ti niawm hrimin uar zet chuan min han fawp leh ṭalh a, ka hnar biklo.





A inlak hran rual chuan ka ṭhu chhuak a, ka awmbawr chu a lang thui mah mah ṭep a ni. Ka kawr ban pawh chu ka siam ṭha nghal sawk sawk a ka harh chhuak tlai ang tih a hlauhawm ngei mai. "Ka chho dawn a nia," tiin ka tho a. "Ka in ha anga ka rawn chho ve ang," a lo ti a, ka chhoh san ta a.




Ka lungphu pawhin ngai a awh ṭan ta tihah inchhungah chuan ka lut a, puitlingho ti ti chu an hlim tlang ngang mai. Chokaah ka lut a, Thanpuii chu alo awm tawh lo va, Dawngdawnga te unau pawh chu khawiah nge maw an kal tak ni?





Ka nu chokaa lo lut hnena ka zawh chuan dawra an kal thu a sawi a, Pialrala nen khan engtin tak lo in bia ang maw ka tih laiin an rawnin zui lut hlawl a. Dawngdawnga-te unau pawhin chips an rawn pawm lut ṭat ṭat a, an nui var var mai. Dawrah chuan an lo va kal ho vek a nih hmel...





"Zanah ka lo bia ang che," ka ṭhiannu bula Pialrala'n a tihchuan Thanpuii chu a bu nghat a. Inhnuaiah a chhuk dawn a niang a chhuak nghal daih a, Thanpuii chuan hlim hmel tak hian a thlir zui vang vang a alan danin a kal tluang tih chu hai rual a nilo.





Thawṭan tuk zing hma takah ka nute chuan min hawng san ta a, thlah chu ka thlah ve ngei kha. Thanpuii chuan min ngaih tur thu a sawi nasa mai a, hawng hreh deuh chhan a nei tel bawk nen ka khawngaih reuh khawp mai a. An hawng tak dialah chuan a reh deuh huaia ka hriat ve chu.





"Leen-i vawiin chu mitthi thing kan zuk phur ve dawn em ni ang?" Kan ṭhenawmnu nu Mawii'n a tihchuan ka lo nui ringawt a. Thingphurh ka thiam reng reng lo, "An pa a kal dawn thoa ani chu inah awm mai se kan lo tia," ka nu'n a lo ti hlauhva. Ka lawm rilruk ve tawh tehreng nen nu Mawii chuan, "In monu chu a chhuak khat bawk si a han kawm na hun pawh kan nei ve hleinem. Ṭhenawm inpawhlo deuh nih chu a nuam ngai lo, Pa Chhuana fanu Sangkimi pawh kan rualin alo kal ve dawn a, kan kal ho dawn nia lo insiam rawh aw kan rawn sawm ang che," a ti teh ṭalh a.





"Ni e, tiraw Mate Mimi-i a hman si lova nangin zu phur ve mai ta che...tam phurh pawh a ngailo a nia inpa-te ṭhianho pawh an kal dawn tho kha inrawn hawng rual leh ang a...," ka nu chuan a ti ta a, hreh sa teh mah ila ka duhlo tih ṭung theih ni nghal lo chuan, huphurh ru ṭeuh chungin ka aw ve ta a.




Chaw eikhamah Ramdina insiam rualin Mimi-i hnathawh thawmhnaw ka inbel a, ka inhmu mak zo. "Phurh ve kher a ngai hleinem ka kal chuan a tawk mai alawm," Ramdina chuan a ti a. "Ṭhenawmnuin min sawm tlat alawm, kan bulah in kal ve dawn tiraw?" Tiin ka zawh zawm nghal zat a. Kan ruala an kal tur chu ka lawm ngei mai.




"Ka bulah awm char char rawh aw," ka tihchuan a nui ruh ruh a, "Ṭhiante awm laia nupui te bula awm kuk reng bik te chu a...," a tihchuan ka ner nawng a. Mi biangbiak ka thiam bawk si lo nuam ka ti dawnlo tih ka chiang sa a,chuvanga ka bula awm tura duh pawh ka ni.




"Awm la a ni mai," ti hmakin a insiam lai chu ka kalsan a, veranda-ah ka nu chuan em chhungah chempui hi a lo dah a, tui bottle khat a lo dah thlap bawk. Ka nu hi chuan kawmthlanga huan i a zau tham ve avangin a enkawl chawt a, Ramdina hian a bak hna dang thawh a phal lo bawk. A thlai hna thar te hi tlaiah Thlengthlengi te ṭhiandunin an zuar leh ṭhin a, ka nu thlai thar te chu a ṭha thei bawka an hralh thei zek mai.





Nu Mawii leh nu pahnih hi kan inah chuan an rawn phul lut hlut a, kuhva ei sen suah chungin zial an pak khu talh talh mai bawk a. Sangkimi pawh chu a rawn thleng thla har lo, Thangtea leh mipa pahnih anlo thleng ve leh bawk a. A huhovin kawtchuah lam kan pan thla ṭham ṭham a, kan nuho kalpui chu an titi bawrh bawrh a, Ramdina-te ṭhianho nen chuan an nui ho hawk hawk bawk.





Sangkimi pawh chuan an titi chu a zawm thei zel a, nuho titi pui peih chi tak a ni. Kei erawh Ramdina bulah hlir ka kal zel a, tumah chu nel hek lo ka ngawi kar reng mai. Ka sira mi chuan a hrethiam aniang a khat tawk hian ka hnungah a rawn beng leh thek thek ṭhin a, ka hah tawh leh tawhlo min zawt khat tawk reng bawk.





"Leen-i chu khawpuia awm ṭhang i ni sia ilo hah lutuk ang nge chawlh i duh chuan sawi hreh lo la. Keini chu kan kal ṭhang avang hian kan kal deuh par par mai ṭhin a, Aizawl miho hi chu motor an chelek tam avang hian kal te hi an theilo riau ṭhin a nia," nui hawk hawk chunga nu Mawii'n a tihchuan ka helh deuh tlat a, min ngainepna angah ka ngai hmiah. Mahse ngawih ka chuh a, kei aia upa a nihna avangin chauhin ka ngawi san a ni.





Kawngtluan chuan Aizawl leh thingtlang mi nilo ten mahni Mizo nunphung leh hnam chin ṭhan an hrelo lutuk te chu ṭha an tihloh zia an sawi chamchi a, ka awm ve reng chung pawha min venthawnna nei chhete lova chhe tak taka khawpui mite min sawi chhe bawng bawng chuan thin a ti ur ve ṭeuh thei.




Ramdina chuan ka awmdan a hrethiam a ni teh chek ang chu ka kut a rawn hum vang vang a, "Khawpui mi zawng zawng chutiang an ni vek kher hleinem. Mahni hnam zia leh nunphung ngai pawimawh tak tak ṭhalai tun ang laiah an tam tawh alawm. A hrelo tepawh a inzirtir theih a," a ti ta nghat nghat a, ka ṭawngchhuah ngai lova min ṭawngkhalh vang chuan ka lawm kher mai.





Chutia Ramdina a ṭawng chhuah takah chuan an sawi zawm ta bik lo va, kan thingphurhna lai tur kan thleng ta aniang an em phurh chu an nghat sap sap hlawm a. "Chawhnu her hmaa let leh hman kan tum dawn nia," nu pakhat chuan a ti a. Kuhva te ei lehin zial an zu leh hlawm a, chumi hnuah kan thing phurh tur chu an zawng ṭan a.





Ka chempui ken ve chu ka hum reng ringawt a, hman ngaihna reng reng ka hrelo. Sangkimi chuan ban tiat vel tur thing ro sei deuh mai hi a sat bung hmawk hmawk hlawm a, keichuan sah ve loh law law chu intih mualpho ai chuan ka thlang zawk. Kalpui teho hian engtin tin emaw ṭawngkam an nei leh ngei awm si a.





"Khitilaia thingro ding khi a ṭha em mai han sat teh ang Leen-i," nu pakhat zawk a hming pawhcka hriat loh chuan a rawn ti a. A awih deuh avangin fimkhur deuh chuan kan chho a, kan kalna lai hmunah chuan thingro ṭha deuh deuh alo tam ngei mai.




"Helaia mi hi a ṭha hlawm ngei mai lo kal rawh u," nu chuan a ti lang lang a, mipa ho chu khawnge an kal tak dial pawh ka hrelo hmeichhe ho zawng chu an rawn chho vek a. Kan vai phur daih tur a tling ta der mai. "A ṭha deuh hi chu kan tuah turin ka hawn ang," phur hmel tak hian nu Mawii chuan a ti a.




Thing chu an theh thla mawlh mawlh a, han pawm thlak kha a rem dawnlo a tin ni. Midang zawng an chhuk hnua ka han chhuk ve tur chu ka lung rah chu a pial tur a, a awih deuh bawk nen ka tawlh thla rawk rawk a. Ka muang fal nge khawnge nu Mawii te ho kha an awm zawh tak vek ni?





Ka ke rek chu a na em em mai lehnghal a, han din ka tum nak chuan ka ṭhu rang leh kher mai! Ka ke rek nat mai mai zia chu aw a tliak emaw tih mai tur a na niin ka mittui a hnam nghal ṭiam ṭiam a.




"Sangkim! Nu Mawi!" ka hawi kual a, khawiah nge an bo tak vek le? Chutia na ti a ka ṭhut sawp niai laiin ka piah deuh hnah thlek kar aṭanga rul dum rawn tleng chhuak chu ka va hmu fuh a, ka lam panin ala rawn tleng phei zui a ka hlau lutuk chu ka ṭam pur tawh a. Tlan chhe turin ka che thei tawh bawk si lo!




"Ramdin! Ramdin lo tlan teh!" Tiin ka au ruai a, ka mittui a dir thla nghal char char a, a ni lah chu hmuh tur a awm der mai si lo...engtin nge ka awm tak ang?


****************

Nizan ka lo dah si lova zanin chu ka ti thui khawpin a hria...like leh comments kha aw

#Ads click kha theihnghilh lo ang u aw, a hnuai a fakna thlalak lo lang hrim2 khu click zeuh a ni mai aw