A hmasa in thuphachawina leh ngaihdan dilna ni pah fawmin tlêmte ka rawn thai aw.Thawnthu ziak tura ka inbuatsaihna a rei teh lul nen tunah chauh post ka rawn siam thei a, min nghak țang țang tu țhian fel tak tak te in chungah lawmthu ka sawi mawlh mawlh e. Ka sawi duh ber zawk chu thawnthu hi ka vawikhat ziahna tur a nia, khawngaih in hawrawp diklo lai te, eng eng emaw siamțhat ngai a awm a nih chuan lo sawi ula sawi tawh ang khan ka vawikhat ziah na tur a nia, inzir zel tur ka nih avangin faksel kha a leng vek aw,in comment te lo țangkaipui zel ka tum ang, theih tawp ka chhuah dawna min chhiar sak ngei ka beisei dawn che a nia.
🫢“Duati i mut a chhuak tawh a nih kha va mu tawh mai rawh，zingah ka kai tho hma dawn che ania,”ti ri ah ka harh hlawl a, mit thip râmin sana awmna lam ka va melh țawk țawk , dâr kua leh minute sawmpanga chiah a la ni chungin ka meng țha thei tawh der lo,lehkhazir phei chu rilru ah lut mawh tak ani, mahse naktuka kan test tur ka la thiam kim silo a, men luih ka tum ngat ngat chu a nia, rilru ah erawh a lut tawh lo nasa thung, ka thiam sa te pawh ka theihnghilh vek zawkin ka hria.
Ka u chuan ka pa țawng ri chu a hre pha ni ngei tur a ni,“ A mak thei pa, zirtir mai mai rawh,a la hma,” a rawn ti bak hlak a,apa chu ka va melh leh a, mittui a tling pam tawh mai, ka hmu phe ruai a,min en danah sawn min khawngaih tih pawh ka hria,au saw awmlo sela chu ka mutna a rei tawh maithei a ni, mumang ka mang hman hial tawh maithei bawk, chuti khawp chuan ka mut chhuahna a rei tawh!
“Mu mai la, i rilru ah a lut tawh chuanglo a nih kha,” tiin ka lehkhabu chu a rawn khupa, ka mittui chu a kutzungpui chuan a rawn hru hul zeuh bawk; mu turin min thlêm ni berin ka hre tawh, au in a phal silo a ka mu ngam derlo thung.Hei hi ka lehkha zir apa in min ven chuan a tih dan țhin ania, ka mut a chhuak a a hriat chuan min mut tir daih zel.
Au bawk chuan “Lalmalsawm mut chhuahna hun pawh a la nih loh hi, zir țha hle hle rawh,” a rawn ti bak leh hlar a,ka ngawi dâk mai, ka țawng ve ngamlo hrim hrim.Apa chuan ,”Mu mai rawh se, a rilru ah a lut tawh chuanglo,” tiin min lo chhan a,au ngaihdan erawh a nilo nasa viau a.
“In mak fapa hi ka ti,tumah mah in țhahnemngaihna châng pawh in hrelo, pakhat lah kan zirlai ka thiamlo palh ang ti a țhahnemngaihna châng hrelo, pakhat lah ka fanu hian zirna ah rual a pâwllo palh ange ti a lehkha zir tura nawr luih tum reng renglo,” tiin a âng zawm nghal a,ka lehkhabu apa in a khup tawh chu la sawkin tûm bûr chungin ka kêu ri chawrh chawrh,au bulah ka titau ngam silo a, ti hian app hmuh a tihtauh hi ka tih theih tawk a ni,ka kiâng chiah a țhu a ni bawk a,a thaw hak ri pawh ka hre thei!
“I mu dawn em?” Apa pawh a zaidamna in a thin tawhlo a ni ang, a awki a sâng deuh tawh a,ka lu ka lo thing nar nar a,”Lehkha ka zir duh,”ka ti thâm țiâk, ka mu duh tawh tih a hailo tih ka hre chiang viau thung.
“Tunah i mu dawn lo a nih chuan sawmpahnih thleng rak ka menpui dawn che a nia,mutthluk ka remti miahlo bawk ang,” a ti khauh fak tawh a,
“Au in mut a la phallo,”tiin țap țuau in ka chhâng let a, ka hre biklo , apa bulah hi chuan ka rilru no hi a chhuak hma viâu zel a, lanchhuah tir pawh ka hre ngai heklo, ka lungngai hmel te hreawm ka ti hmel te hi hmuh hreawm a ti tih ka hriat vang te pawh a ni ang , a bula pangchan hi nuam ka ti viau zel,tun ang chiah hian min ngaihtuah vat zel.
Au a rawn chek tlak a,”Lalmalsawm i zak miah nange, mipa duh zâwng sawi zuah zuah tawh si in mut ngena i țah chu le,ka khâwng zawt zawk dawn che emawni zawk le! In test tur i thiam hmâ chu mu suh ang che.” Rin ang ngeiin au a lo inrawlh leh tawh.
“I mu dawn em, nge kan tleivâr dawn?” Apa chuan a rawn ti leh a ka chhâng tawhlo ,ka mittui erawh ka dang hmanlo a lehkhabu ah a far fap mai, ka in sût ri hrut bawk.
“ Pa enge maw nanga pawh chu, ka zir duh a tih chuan zir tir mai mai rawh,mu tura lo tih phet kha a ngailo,”tiin a rawn inrawlh leh a,
“Rilru pe tawhlo tur in men luih a zir in awmzia a nei lo,”tiin apa’n a lo chhâng thung.
“ Zingah a tho hma thei bawk silo, zanah tal meng rei ve rawh se,”au bawk chuan a rawn ti leh a,
“Men rei in awmzia a nei lo,a thiam theih tak tak loh ,taksa a chak lo mai mai,zan khat chauh mut hma kha a pawina a awm reng renglo,” tiin apa bawk chuan a chhâng a,
“An zir nanana chuan thíam chin an nei dawn hrim hrim, a mut a chuak, rilru a pe thei tawhlo tih vâng ringawt a in inmut tir zelin engtin nge ni ang? A mut a chhuah chuan rei lo tê chawl ve sela, thingpui te in se,a harh ve mai ang, chutia mut a chuak dêk dêka a mut nghal zêlin a dik thei nang, mi dang pawh an mut a chhuah in an mu nghal bik hleinêm, an in ti harh mai alawm,” au chuan a la ti hrâm a, sawi belh tur hi a lo nei ve ziah, apa ang hian min hriatthiamna hi a nei ve ngailo reng reng!
“ Aih, i nau hi chu ka hre chiang midang dang ang a ni ve lo, vaw hrep pawh ni ila a mut a chuah tawh chuan awmzia a awm lo,ti hian mu hmâ ve se la naktûkah kan inkai tho hmâ ve thung ang,”tiin min rawn en a,” Va mu rawh ,naktukah ka kaitho hma dawn che a nia,” a tih zawm zat bawk , ka sawi nâwi tawhlo chiang asin aw! Ka zun a chhuak viau na chu ka zung tawh lem lo, ka îp țang țang tawh mai ang,au hmai thim ka va tawng peih tawh teuhlo mai.
” In mak pafa emai,in la induat hlum thei hial in ania ka rin ni” a ti leh duah a,u Hminga nui huk ri pawh ka hre thei.U Hminga ka tih hi au bialpa ve ngawih ngawih ania, an inkawp rei ve tawh a, an inneih vat ka ring tawh; au hi mizia mak deuh mai a nei a, tihian a bialpa awm lai paw’n min hau tan tana, a âng phiar phiar tho zel, midang te chu nise an insûm ve deuh anga,au ve hi chu insûm theihna hi a han tlachham thei bik khawp a, bialpa te awmlai hi chuan in thup ve îk țhin tur a nia, zeilo bik lutuk mai, a thinchhiat êm vang hian u Hminga pawn a la nei duhlo a nih ka ring goal tawh , tawrhhlelh awm dawnin a hre ve a ni mahna, bakah thu tullo pui pui sawia min hauh a chîng si nichin ang te kha, a thuhrimah apa hian uchuak taka min duat awm ka hrelo ve chiang ê, a thinchhe velo a , au anglo takin min hriatthoamna a ngah zawk bawk, hauh ka ngaih hunah chuan min hau ve tho a, ka hmeichhiat pui zawk si hian min hrethiam derlo lai hi ka hrethiamlo.
Zan rei deuhah chuan ka harh a, ka harhna a rei tawh viau zawk,tui takin ka mulo hrim hrim, zunchhuak in min tur ut uta, muthilh luih ka tum ngiâl pawhin tawrh hreawm ngat ngat tak a ni,atawpah ka îp lui thei tawh nganglo a, apa tih harh hlau zetin thâwm dim deuhin khum ațang ka chhuk țhem țhem a, a hnâr ri bak thâwm hriat tur pawh a awm lo, a reh țhiap mai a, ngaih te lam lam a țhalo dawn dawn thei hial mai,ka mut dawna ka lo zung lui hrâm lo chu inchhîr tawh tak ka ni.A chhuahna a rei ngar ngar bawka Zuni chhung a rei duh ngei mai,ka ke a khem vek thei hial dawn alawm le!
“Duati tho tawh rawh le,”
“Immm,”
“I tho tawh em?,”
“Pa minute 5 leh chiah,”
“Bawihi minute 5 a ni tawh ania,tho rawh le,”
“Immm,”
“ tho rawh ,minute 5 i ti zel a, darkar chanve a ni leh tawh a nia,”
“Pa min kaitho hma ê,khua pawh a la vâr lo” mutchhuak deuh chuan ka chhâng let țuak a, a ngai pawimawh lo viâu thung.
“ Ka kaitho hmâ dawn che ka tih kha , a tlai zel , tho vat la lehkha chu zir rawh aw, nizanah i mut hma kha,”dawhthei deuh chuan min la khai tho,mahse le
“Lalmalsawm!”A ti chiah mai chu
ka tho rang teh asin aw!Apa hian ka hmingpum hian min ko zen zen loa, hming pum ngata min koh chinah chuan, a dawhtheihna a pan tawh hlê a ni tih min vo lawk na a nia,palzam chi a ni tawhlo tih ka hria, hmanhmawh deuhin ka tho a,in phih fai sawk sawkin thingpui te ka in leh têtê hnu a lehkha ka zir țan meuh chuan dâr ruk a leh a chanve a lo ri der tawh.
Ka zir laklawh lai chuan kawngka an rawn kik a,ka va hawng chu u Hminga leh bawk,zana a haw har teih tehrêng nen zîngah hian hma deuh deuhah a lo lang lang leh tho zel, kan in hi a in emaw a ti zawkin ka hria; a mut hun chhûngte bak chu an inah a awm ngailo reng reng!
“I va tho hma ve a,” tih pahin a nui ruh ruh a,a nuih chhan tur awmang ka hre ve derlo thung;țhutthleng sei ah țhu in chanchinbu a hlam diai a,bawp a khawkherh ât bawk, a va han chal ngawih ngawih tak! Ka chek tlak a, engtin nge au hian a duh theih tih ka ngaihtuah a ni, mak ka la ti tawp thei lo.
A chanchinbu phên a țang chuan a rawn dak heu a,
”Enge “ tih ni awm takin a mitko a kân veo âk a,sawti tak phei saw chuan tlumpî a kua ațanga rawn dâk chhuak heu a ang lutuk!
Infawh a zei ve angem le tih ka ngaihtuah deuh thut a, tum loh deuhin nizana ka thil hmuh kha ka hrechhuak,u Hminga chu nuih insûm deuh chuan ka va en leh țhin, nizana zung tura ka chhuah khan an lo infawp ve nasa lutuk a, rei deuh ding meuha ka en chung pawh khan ka awm tih an hrelo rêng rêng a,a landan mai saw chu bialnu te fawp ve lo tur, a nanchâng hre maplo ang chi kha a nih duh hmel riau a, mahse rin ai daihin a lerh tlat, a upat ve tawh tehrêng nen a la hrat ve em em zui a,a inhmeh lo ve thlawt! A țhutna lam ka va hawi chuan a chanchinbu chu ngaihnawm tih hmel em em hian a lo la chhiar a, Korean film a in ngaizawng te infawp hi chu an romantic a, a nawm hmel ka tih țhin tehreng nen nizana au te infawp ve kha chu a nawm hmel pawh ka ti lo.
Chutia ka ngaihtuah neuh neuh lai chuan au a rawn chhuak hlawl a, ka lo nui hak a,a thophang hmêl chu pe chhe ve tak a ni, a tûm luau a, a sam lah a thur nasa mai si, saw pawh saw rin ai in a lerh tlat; ka en zui vung vung a bualinah a lut daih, u Hminga ka va en leh chu a lo khi vur vur a, au landan khan a nuih a ti za ve a nih ka ring.
Ka rilru ah a lut țan tih ah “Malsawm thingpui in ila,” u Hminga’n a tih avang chuan thingpui ka lum sak leh a , thingpui chhuan vil chhung pawh chuan lehkha chu ka zir pah reng bawk ,rilru a a luh țum chuan reilo tê ah pawh kan thiam țeuh hman tlata, chuvanga rem leh remlo a zir chu ka ni.
“ Zanah i mu hma em em a, zingah i zir duhthawh leh em em a, kha i thingpui chhuan a so,” tiin gas a rawn herh hniam a, thingpui fê banin a thlak nghal bawk,bualinah a la awm emaw tia, rin ai daihin a rawn chhuak rang.
” Âw rilru a luh lai chuan duhthawh a ngai alawm,” tiin ka lo chhang liam puat a, a ngaihdan erawh a nilo lehpek viau thung a,
”I zir peihlo ve hrim hrim ,” a tia, kei in “ Chuvang tak chuan alawm tunah ka zir peih lai hian ka duhthawh rêng ni, rilru a a luh lai hian duhthawh deuha zir hrâm hrâm ka duh,” tiin ka lo chhâng ve thung a.
“ Peih lo chung chung pawhin zir la nuam i ti chawp mai anga, i peih chawp mai ang ,tunge peih vang leh nuam tih vanga lehkha zir i hriat?” a tia, a țawng pah chuan thingpui a siam pah bawk a,a che buai eih lo hrim hrim a, a sawi tur pawh bah miahlo in a sawi par par thei bawk a, a thil thlawn pek a ni hial ta ve ang !
Chutiang thuartham ngaihtuah chuan ka lo en reng vang ni maw ,” Enge?” A ti bak leh hlar tawh , zingkarah pawh a awrawl hi chu a ring țha a nia aw!
Min en reng avang chuan,
“Sangsangi” ka lo tia,
a ngaihna hriat loh hmel fê hian ,
” Enge Sangsangi chu,” a lo ti hû a,
“Min zawt sia ,” tiin ka nui pât pât tawh,ani erawh a la bo hmel viau thung!
“ Tunge nuam ti deuhin lehkha zir ngai i ti sia,Sangsangi khuan lehkha zir chu a peih lutuk, țhian kawm nachâng pawh a hre lo,nuam a ti tawp,a nuam tih zâwng a nih mai bakah lehkhazir hi a hun khawhral na ania,” tiin ka chhâng a ,
“Țawng chu a la thiam ka ring tho a , mahse a țawng pawh a kal ang deuh khuan a pai deuh tawh maithei ani,” ka ti hrâm a,țawng a thiam pawh ka ring chiah tawhlo zawk, lehkha a zir deuh tlut tlut a , a țawng lai vawi khat tê pawh ka la hmu lo a,a kal te hi a bu deuh lûk lûk in ka hria , zurui kawng kal a ang thei lutuk.
“ Zet zet che hian, i țawngtheih dan em em kha ,” tiin lu a thing nar nar a,min melh sala leh viau tawh.
“Țawng theih te chu khawvel changkanna ken tel alawm,țawng thei ta tlatlo ila in hlim miahlo ang aw,” tiin ka lo chhâng then a, a thin a rim leh teh ang chu aw!
“ Lalmalsawm,” a ti țeu hlar mai! Ka tih rêng kha maw au thinrimna hi chu,”Hmeichhe lungawina chu ho tê,”an tih kha amah ah hi chuan a letling thawk a, a thinrimna hi hotê a ni ve thung a.
“ Lalmalsawm țawngthei viau suh aw ka khai zai ang che, khawvel changkanna i chhawm kha a țhing, a changkang lo nasâ a ni ,țawng theih kha hmânah pawh a changkâng lo a tunah pawh a la changkâng chuanglo,u te hnial zet zet reng nan bak i hmang țangkailo,” a ti bak hlar tawh mai a,a țawng tawp lamah,”Lehkha kha zir rawh ,” a ti hrâm a, lehkha zir mood zawng zawng a hnawt țiau vek tawh hnu a,
”Lehkha zir leh rawh,”in tih leh te chu a.
“ Ka zir peihna zawng zawng i hnawt țiaû vek alawm,khawnge ka thluak te an kal bo hman ka hre lo,ka zir chak tawhlo ,” ka ti leh lek phei chu i chak dawn lo tih melh tak hian min melh ka ti mai, a thingpui no dawn lai a rawn thlawk phei fua lo chauh tawh.
“ Zir malêk la ni mai lawm, hre rawh han fail na teh sikul i kal tawhlo chiang khawp ang,”ti deuh hmukin țhutthlengah a in sawh tau nghawng nghawng tawh mai a, a thinrimna te lah hi a, ti khan amah a in phun thinrim leh der tawh chu a nia!
Au hi chu mi mak hi chu a thing ve ngawt alawm, lehkha ka zir loh in a phun a ka zir pawhin a phun tho bawk sia , awm ngaihna a vâng ve thlawt, thi silo dam silo, tui lâi rap an sawi ang maiin ka awm reng mai a ni.Insiam san daih teh ang sikulah kal bo san vang vang ila, tihian a ni chu lo in tûm lungawi ve tawh mai rawh se.
Kawngpui ka chhuak chho țêp tih a Mami bân min lo vai lauh lauh chu ka hmu a, tui pipe in kham phei pût chungah chuan a lo țhu thên a, ka thlen chhoh rual chuan ,” I va tlai ve ,” a lo ti a,” I va hma ve,” ka lo ti thung a, kan sawi rual lutuk chu kan han nui leh rih a,ka bânah kaiin min pen pui nghal dawr dawr a, pa Nuna te dawrah a pêng kâwi leh hrâm a, min rawn en in a khi vur vur a,a lei tur ka hre mai, rin ang ngei in ,” Pa Nun vur sen in nei em?” Tih lâng lâng pah in fridge chu a pawt hawng nghal a, an in ngamtlak tawh bawk a ni ang,a tîm lo khawp mai.
Choka lam ațanga ,“ Aw nei e, fridge chhûngah khan a awm ang, lo inlâk mai rawh u ,” a rawn tih chuan vur sen chu kan lo ei der tawh a, Mami nên inmelhin kan nui ringawt,pa Nuna lo chhuah chuan “ Mami chu i kal daih tawh emaw tia, i bialpa i lo hmu ru te a ni lo maw?” Tiin a fiam hluta, Mami lah chuan, “Ti awmang lo thei ê pa Nuna chu, star nei rual lek ngaihzawng min neih tir nghal ringawta,” tiin a tûm der vela, lungawilo tak tak te pawh a ang alawm le!
Pa Nuna chuan,“ Ka awihlo ê,bialpa i nei tawh hrim hrim ang,in îtawm lai tak a nia ,pakhat tal chu i nei ang, pa thun vel tal chu i nei tawh ang ,” a ti leh a , ka țhiani chuan “ Hmmm,” tih chauh a chhângin pawisa a pe a, pa Nuna bawk chuan,”Bialpa i neih si loh chuan enge i la tih a ?” A ti leh hrâm a, ka lo ngaithei viau tawhlo . Patling pui siin tleirawl tê a biak dân chu mawi ka tih loh zâwng tak a ni a, khatiang khan min be ve ngat se zawng ka dawr nawn tawhlo chiang ang chu aw!
Mami chu a ngawi mai dawn emaw ka tia,” Ele star tur ka zawng,” tiin a chhâng thên a,” Enteh pa Nun, kan vêng ve hi star tur chhelo deuh pawh an awm velo, kan khawngaih thlak ania, mi vêngah chuan star tur an tam tehrêng nen,ka zawn ngial pawhin ka hmu hlawllo, in chhe fâl nalh vek,”a ti vang vanga,a sawi zâwng chuan a va melh deuh kher bawk a,” Mahse nang chu nupui i hmu hrâm a,a la zia,” a ti deuh kher a chimawm thiam ve tak chu a ni. Pa Nuna pawisa nâwi zawng pawh chawl deuh datin Mami chu a en deuh vang vang a, lu thing nar narin a thil tih lai a tih chhunzawm ve leh mai bawk.
“ Â zawng tawhlo mai rawh hei hi pakhat ka la anga,tlaiah abangin thil dang ka rawn la mai ang,”tiin powder te chi chu a la a,” Kal ang,” tiin min nghak miahlo chuan a chhuak nghal daiha, ka chhuak ve nghal vat a, pawnah min lo nghak leh tho a,bei mak ve ania.
“ Mam,pa Nuna kha i va’n nêl em em ,” ka ti deuh phawng, a chhan lêt dân khan a mi nel viau lo chu khatianga a chhan let ka ring tlat lo.
“Nêl ve tho mai,tinge?” A lo ti deuh hu a,
Lu thing deuh nar narin “ Ka hrelo, i chhâng let deuh fak fak bawk sia,a haw chuang bawk silo a, a mak ka ti deuh mai mai, bakah a fiam dân che kha,” tiin ka ding deuh data,inkai chunga kal kan ni bawk a, a lo ding ve dat, a lamah hawiin, “ Khatiang khan min fiam tawh suh ti ta che,”tiin ka hau deuh a, a ngaihna hriat loh hmel lutukin min lo en a,
” Îtawm a tih che kha,” ka lo ti hlak ,
“ Ka îtawm a alawm ,” nui hak in a ti duh chauh a, a hnungzângah ka bêng pawp a,ka bêng na bawk a ni ang a eu ngawng ngawng mai.
“ I kutthlak a na reuh phîan a, tiin ban leh banlo in a hnungzâng chu a chûl leh țhin a, ka in thlahrung ve deuh tho ,mahse tinge thu paaimawh sawi laia a lo uẩn vel ni, a hnungzâng chu ka va chul sak a,” Tak tak Mam khatiang khan in chhaih tir tawh suh , a mawiloh bakah a țhalo , a zahawmlo“ka ti leh a, a lo bu ve nghut nghut.
“ Â mahse pa Nuna chu țha deuha hrilh in awmzia a neilo alawm,ka chhanlet ang khan fiamthu titak deuha kah a angai,” a rawn ti a, mahse chu chu chhuanlam tling a ni pawh ka tilo.
“Enteh khatianga a fiam leh che chuan i nu te hrilh tawh rawh. “ ka ti leh hrâm a,
“ Bakah min lo ît ta tehreng pawh nise min ît thlawn ve chiang ê, annu hian a zin bo san ziah a, a khawngaihthlak daih zawk,min ît mahse high hope thlawn ve chiang ê” tiin amah chuan a nui hak hak a, ka nuih a za ve derlo, fiamthuna chi pawh va ni suh.
Ka nuihpui loh vang nge a nui rei biklo , “Anu te nên phei chuan an in ngam tlak lutuk a, fiamthu ah bak an ngai leh lo ang.” A ti ve ta nge nge.
Lak thutak hmello ang takin lang mahse, a rilru a kam ve tihna a nia,ka ngaihtuah zawk daih chu țhenkhat nu leh pate chu fa te tana nelawm loh leh khirh lutuk an awm laiin, țhenkhat ve thung chu rilru zâu deuh leh inhawng deuh,fiamthu duh leh nelawm tak nih avanga fa te’n an thlamuanpui leh miah siloh hi a lo awm theih ve dawn tho a nih hi ka ti ta.
Ka ngawih reng vang nge min nghawk sawk a,” Teh,niminah Mr cool ka hmu ania aw,” tiin phûr deuhin min hrilh a, kan boruak thlak a tum tih ka hria a, boruak chhe tak neih chu ka duh bik lo!
Dilchhut deuh chuan ka lo zawt let a sawi nuam a ti khawp ang chu,Mr cool te chu kan țhian ho ralkhat duhrawn kha a ni tlata, engtik lai pawhin a chnchin sawi tur kan hre reng ,tu mai pawh hian kan ngaithla peih reng bawk, sawi ngai te hi kan sawi ngun a nia aw! Mahse Mr cool a chungchâng a nih chhûng chu kan sawi ning thei pawhin ka ringlo. Hei tunah pawh ngaihnawm ti deuhin ka ngaihthlak leh mêk hi.