MY FAULT Chapter 9- Te-i Mrs Ambrose

[Te-i Mrs Ambrose]

MY FAULT

Prologue;

"Nangmah avangin tun dinhmun hi ka thleng ta anih hi" tiin Hmingmuana chu ka aukhum nghek. "Duati" tiin min rawn ban mai a tum, "min khawih hlek suh, i bialnu hlui kha buaipuiin a hnena let lo ni la, tun dinhmun hi kan thleng lovang, bul ṭan hmasatu chu kei ni lovin nangmah i ni, nangmahin a hnena intulut lo thei lo khan min siam a ni" a tir lam ring viau mah se, a tawp lam erawh a ri che che chauh.

"I hria em? Vawitam rin che ka tum ṭhin, hnaih che ka tum bawk, mahse, nang chuan ani kha i pan a, kei pawhin ka kianga awm tur ka mamawh ve, ka mamawh em em laia ka kianga awm reng ṭhin kut chu ka chelh let ve ta mai a ni. Min dem thei lo" ka ti leh. Hmingmuana mita langchhuak chu engmah ka chhiar thiam lo. "Tihpalh Duati...."

_______________________________________

"Inṭhen ka duh" thumal thum lek ni mah se, kha thumal thum kha sawi harsa tak a ni. Ka hmaa mi chuan min melh ngawt ngawt. "Ai, Duati, ka thei lo tih i hriat kha" tih leh a lama min pawh hnaih a rual a, min kuah nghal. Ka talpit ang tih hlauh hmel zet chuan nghet takin min kuah a, kan inkar rem ve thei ngai lo tur avang chuan ka mittui a tla leh tawh.

"Duati, ka tana mi pawimawh ber i ni ka tih tawh kha, khawngaihin inṭhen thu chu sawi tawh suh aw" tiin ka chal, ka biang leh hnar a rawn fawp a, ka hmui a fawh a tum chuan ka thlesawn nghal thuai. "Kan tawp a hun tawh viau tih chu i hriat kha" harsa ti zet chuan ka sawichhuak thei hram.

A thaw hawk a, "Ka tum loh bik i ring em ni? Mahse ka thei lo, nang thlah tum che hi thil harsa tawp khawk a ni tih i hria em?" a insehruh nghal ṭawlh ṭawlh. "Ka kianga i awm theihna tur anih chuan engkim ka ti vek ang, engpawh chan huamin ka chelh ang che, ka neih zawng zawng pawh hi i tan chuan ka kalsan vek ang. Chuvang chuan inṭhen thu kha sawi tawh suh" a ti nghet charh.
_______________________________________

"Ka â thei mai ang, Duati min kalsan suh" kalsan nih a hlauhna chu a hmelah chiang takin a lang thei. "I hriatchian tawh em kha" tih chauhin ka chhang. Ni e, ani hian a hrechiang alawm. "Tun aṭang chuan kan inhmuh tawh loh hram ka beisei" tiin ka inhersan a, a thu rawn sawi chuan ka mittui lo dan ve ṭang ṭang tawh chu a ko chhuak leh ta.

_______________________________________


MY FAULT
By: Te-i Mrs Ambrose

Chapter 1



"Duhthlan theihna i nei lo. Pasal chu i nei khawp ang" ka pa in a tih chuan ka nu lam chu ka hawi a, ka beidawng zual sauh. "Mahse pa, pasal neih ka la duh hleinem" ka tih laiin "Duati, i pa thu chu zawm mai rawh, engmah sawi belh tawh suh" ka nu chuan a rawn ti ve a, ka mittui a tling pam tawh.








"He ina awm reng tur pawhin ka duh tawh lo che, a rang lamin pasal i nei ang, i pasal neih nî tur pawh kan ruatfel tawh" ka pa in a tih chuan ka biangah mittui a rawn luangchhuak a, "khatin an in ti vak vak ngai lo, a pasal neih tur thu avanga a rilru a buai dawn nen khatianga inṭawngkhum tur a ni ngai lo" ka pa bengdaih pah chuan ka nuin a ti a, kei erawhin ka ute ka ngai ngawih ngawih thung.







"Nang pawh hi lo ngawi rawh, i duat khaw loh vang vek anih hi ka thu pawh a awi duh loh" ka pa thinrim chuan a la ti tun tun. "Pa, tinge hetianga ka chungah in tih kher, kei chuan in kianga la awm ka duh alawm" ka mittui hruk pah chuan ka ti a, "keiin i kianga awm ka duh ve lo, pasal i nei ang ka tih chuan thuawi takin 'aw' ti hle hle rawh, i nei lo anih ngat chuan i nuam sa lo khawp ang" tih pahin ka pa chu an pindan lamah a lut nghal daih.








Ka nu chu ka bulah a rawn ṭhu a, ka kuta vuanin "Duati, i pa kha chuan pasal nei turin a duhsak em che a, nangin i duh ve loh avangin a thinrim mai mai anih kha aw, la thutak duh suh" dam diai hian a ti a, a aw dam tak avang chuan ka ṭah a chhuak zual sauh.







"Nu, pasal neih ka la duh hleinem, chu lovah ka pasal chu lo sual viau ta se,, a nu,,, in kianga la awm ka duh, ka u te anga kalsan ve che u ka duh lo. Tuktin i rawngbawl puih che ka duh a, nang leh ka pa te nena chaw kil ho ka la duh alawm" ka ti a, pasal neih ka duh lo.







"Duati, i pa tithinrim belh i duh loh chuan a thu chu zawm mai rawh" a tih chuan "ka pa tihthinrim ka duh loh avangin ka hlim vena zawng zawng ka thai botir dawn em ni? Ka pa tihthinrim hlauh avangin ka nun ka hralh a ni ngawt dawn asin" ka ti a, pasal neih chu ka duh lo.







"Eng thu maw i sawi kha?" rawn tiin ka pa chu an room aṭangin a rawn chhuak a, ding zetin ka lam a rawn pan a, ka bul a rawn thlen rualin ka biang a ri ṭhat. "Insum rawh, khatin fate an ti ngai lo" ka nu chuan a rawn ti nghal a, ka biang ka dawm reng.






"Ani hi chhan viau zel suh, anih loh chuan nangpawh kut ka thlak ang che" ka pa chuan kut lek vut pah hian a ti a, ka nu erawh a beng êm lo. "Lalrinzual, ka thu hi hnial leh tawh ngai suh, pasal i nei ang ka tih chuan i nei mai tur a ni. I duh loh tlat erawh chuan he chhungkua aṭang hian i hming hi kumkhua atan nawhreh a ni ang" a ti rum al mai.







An room lamah a lut leh nghal a, ka nu chuan min rawn kuahin "Duati, a na lo tiraw? I pa thu hi hnial tawh suh, i pasal tur pawh a fel a, kan chhungkaw ṭhian hnai tak a ni bawk, a duat ngawt ang che, he in ai fe hi chuan nuam i ti ngei ang" tiin ka nu chu an pindan lamah a lut a, keipawh ka room lam ka pan ve nghal.







Ka bianga mittui chu a hul thei meuh lo. Kei hi Lalrinzuali ka ni a, kumin hian kum sawmhnih pali ka pum dawn chiah a, unau pathum niin a naupang ber ka ni. Ka u te chuan pasal an nei ve ve tawh a, ka u nen kum riat ngawtin kan inthlau a, ka u te bulah chuan ka pangchang viau zel, ka pa bulah erawh ka naupan lai aṭang tawhin ka pangchang ngam ngai lo.







Ka u te ka ngai ngawih ngawih, awm ve sela chuan pasal ka neih hi an phal bikin ka ring lo. Chutia ka u te ka ngaihtuah lai chuan kan upa ber u Remi chuan min rawn call a, a hming ka hmuh rual chuan ka hnuk a rawn ulh nghal ṭeuh.






Call ka lak rualin "U" ka ti tiau. U Remi chuan "Duatte, i lo ṭap em ni?" a ti a, ka ṭah a chhuak zual sauh. Pasal a neih hma kha chuan ka pa in min hauh chang pawhin ani hian min chhan ṭhin a, ka thlamuanpui em em zel.







"U, ka pa in pasal min neihtir a tum a, ka pa hnenah khawngaihin pasal ka neih loh nan min dilsak rawh, ka pa chuan i thu a awi ṭhin em kha" ka ti a, ka rin loh deuhin u Remi chuan "Duatte, pasal neih kha i tan a ṭha alawm, ka pa thu kha zawm rawh aw" a rawn ti anih chu! "U, nang chuan hetianga min tih ka ring lo asin" tiin call chu ka titawp nghal hmak a, ka mittui bawk a sur leh zung zung. Ka u chuan min rawn call nawn leh a, ka dah hmak. A rawn call nawn dawn tih ka hriatchian em avangin ka phone chu ka switch off nghal.








Ka naupan lai ka ngaihtuah let a, chhungkaw tin deuh thawah chuan a pang ber hi chu an pangchang viau ṭhin. Kei ve erawh chuan ka ngam ngai lo. Ka u te chuan min duat viau ṭhin a, ka nu pawhin, mahse, ka pa lak aṭang erawhin eng duatna mah ka dawng ngai lo.








Tuna pasal min neihtir a tum hi ka hrethiam thei lo. Ka u te chuan pasal neih tura nawrna engmah an tawk lo, kei ve erawh chuan pasal ka neih loh chuan chhungkua aṭanga tuithlar ka nih tur thu ka dawng bik bawk si. Eng vanga heti tur tho si chuan ka lo pian ve kher kher le? Nge rilru natna awmzia hre turin khawvel êng hi ka hmu ve zawk.








Hna thawk turin damdawi in lam ka pan a, ka ṭhian neih ve chhun Muani chuan min lo lawm nghal chuk chuk. Mahse, ka hmel a hmuhchian hnu erawhin "Duati, dik lo a awm em ni?" a ti a, "pasal ka nei dawn a" ka tih chuan a nui vak vak. "Awi, ka awi che chu ring miah suh, nang tehlul hian khawiah mah pasal i nei lo ang e, inhre ṭhang lo chu ni ila, tuna i hmel landan zawng zawng nen hian ka awi ang che, mahse, ka hrechiang mah mah che, nang hian pasal i nei dawn lul lo, min bum lovang" a ti nghal mawlh mawlh.









"Dawt ka sawi lo, ka pa chuan ka pasal turte nen an inbiak fel diam tawh thu a sawi, kei erawhin ka pasal tur hmel pawh hmuh ka duh ve lo" ka ti a, Muani chuan min la awi hmel loh khawp mai. Ka kawr hak chu ka thlak mawlh mawlh a, ṭawng pawh ka ṭawng tawh lo.








"Dawt i sawi lo maw?" Muani'n mak tih hmel zeta a tih chuan "Dawt ka hrilh lai che leh ka bum lai che i hre ngai em ni?" ka ti a, Muani chuan a lu a thing nghat nghat. "Pasal chu i nei dawn tak tak maw? Awi, i pa vang bawk a ni leh ang, i pa hian a ti awm lo thei lutuk" Muani chuan a ti hlak hlak, kei erawhin engmah sawi tur ka hre lo.








Dam lo an tam ang reng a, kan buai khawp mai, ka pa thilsawi ho pawhin ka ngaihtuahna a luah ta ngut ngut lo, mahse în ka thleng ang a, ka pa hmel ka hmuh rualin engkim a thar leh vek ang tih ka hria.







Zan lama chawlh theih ve hun kan neih laiin inchung zawlah ka chho a, heta hian rilru hahna leh natna ka neih changin ka chho ṭhin. Tumah an awm ngai lo va, thli a thaw vuk vuk ṭhin tih chiah hi thawm chhuak awmchhun a ni mai.







"Lalpa, tuna ka chunga thilthleng hi i ruat sa reng em ni?" tiin chung lam enin ka phun sep. "Tinge hetiang thil hi ka chungah a thlen, hmahunah chuan sawi theih leh duh thlan theih kan nei lo tih ka hria, mahse,..." tiin ka ngawi zui a, bang nghengin ka tukhumin bang chu ka tauh dat.








Ka bianga mittui chu ka hru a, mahse hruk loh ang hlauh, a luan belh zung zung. "ka hrethiam lo, ka naupan lai aṭang tawha i thil rel dan ka hrethiam thei lo" ka ti tawp. A hnu deuhah Inhnuai lamah chuan ka chhuk thla a, ka thawl phah lem lo.






Ni a ral ve zel a, ka pasal neih ni a hnai tial tial, Damdawi în aṭang chuan nidang zawng aiin Muani nen kan haw hma a, Muani chuan "Duati, lo kal rawh, restaurant thar an hawng a, tah chuan lut ang, thil i ei ṭha lo tih a hriat lutuk, i cher tawh lutuk alawm" tiin ka chhan hma hauhin min pawt nghal dat dat.






Dawra kan luh chuan eitur kan chah a, kan nghah laiin Muani chuan "Duati, pawmthiam tum rawh aw, Pathian hian a tlachawpin thil a ruat ngai lo tih i hriat kha, i tana ṭha turin a ruat ngei ka ring tlat, Beiseina neih hi bansan ngai suh aw" tiin ka kut a rawn chelh a, mahse, ka beiseina neih ve ṭhin ho erawh ka bansanna a rei tawh.







Chutih lai chuan kan piah aṭang tu emaw hian chair a chhir pawp, thawm a rawn nasa zual sauh a, ka lungphu chu rang tak a ni. Thawm na zet karah chuan mipa aw thum bul inhrosa ri hriat tur a awm leh ṭhin a, dawr neitute an rawn lang mai lo chu mak ka ti takzet. Heti taka dawr liantham vea buaina siamtu rawn buaipui tura dawr neitute an rawn inlan lo chu thil mak a ni.








"Kan thu hi hnial hlek suh" patling aw hian a ti ri ve ta ṭhat a, aw thum bul bawk khan "ka nunah hian inrawlh theihna dan in nei lo" a ti vawt ruih. An aw chu hre thei mah ila, an hmel erawh ka hmu thei lo. Plate keh riin chu aw chu a zui zat a, chutah mipa lian leh sang ṭha zet hi a rawn lang a, a mitmeng mawlh chu hlauhawm tham tak a ni.








A hmel a lan nelawm loh hmel sa mai bakah tuna a thinrim hmel phei chu hlauhawm tak a ni. Ka damchhung zawnga ka tihthinrim ngam loh tur a ni. Ka lam a rawn hawi a, kan mit a intawn siah chuan ka lungphu lai kha tawp chawtin ka hria, ka hlau tih piah lam a ni. Ka lam a rawn pan a, ka lo en ve reng avanga min hnek chawrh dawn emaw ka ti laiin tissue ka ken chu a rawn la a, a rawn nui suk anih chu.








Zep lo chuan ka râp takzet, chupa chuan ka tissue a lak tak chuan a kamsir thi hru zui pah chuan a mitmeng fiah, thim ruih mai chuan min melh a, a chhuahfel hnuah ka thaw ve chiah. "A huhang a nâ lutuk" Muani chuan a rawn ti a, kei erawhin ka la râp em vang nge thawk pawh ka la thaw ṭha thei lo.







Dawr neitute chu an rawn lang a, hlauthawng lo turin leh engkim a ṭhat vek tawh thu an rawn sawi a, a hma aṭang daiha an rawn lan loh avang khan mak ka la ti reng. Engtin nge khapa kha khatianga an kaltir mai theih zawk? An dawr bungrua lah a tihchhiatsak dawn tih chiang reng.







Kan eitur a rawn thlen takah chuan thilthleng pawhin ka ngaihtuahna a luah leh ta lo. Nidang zawnga thil pawh ei hlei thei ṭhin lo khan ka ei ve ṭeuh mai. Kan ei zawhin "tuna i ei ang khan ei leh tawh ang che, i vun pawh a rawn mar leh vat mai ang" Muani chuan a ti a, "ka lo tum ang" ka ti ringawt.







Muani chuan scooty a neih avangin min thlah a, kan in ka thlen chuan ka nu eirawng bawla lo buai mek chu ka hmu hmasa ber. Inthlakin ka nu chu ka pui a, "Duati, tunlai chu i cher sawt riau" ka nu chuan min en vang vang pahin a ti a, "ka cher hran loh hi" ka lo ti mai.







Ka pasal tur chungchang an sawi pawhin engmah ka sawi ve tawh ngai lo. Ngawi rengin an thusawi ka ngaithla mai ṭhin. Bazar tur an tih erawhin an mahniin ṭha an tih apiang la turin ka ti ringawt a, ka pasal tur hmel min hmuhtir an tum ṭum chuan hna ka chhuanlam zel.






Ka nu chuan rilru nat hmel zetin "Duati, i mizia a dang tawh lutuk, kan inkar hlat sawtzia te hi i hria em?" a tih chuan lu ka thing ringawt. Mahse, zep lo chuan ka pasal neih tur hian min nghawng em a, a hma ang khan ka nu ngei pawh hi ka la pawh thei rih lo.







"Pasal i neih hi ka duh bik lo asin, kan kianga awm reng turin ka duh che a, mahse i pa chu i hriatchian em kha, a thilsawi tawh tihpuitlin loh a nei ngai lo tih i hriat kha, mahni pa te thu awi chu malsawm dawnna a ni hrim hrim a, i pa thu i awi mai hi a ṭha ber a tin ni" a tih leh pawh chuan ka bu leh ringawt. Pasal neih chungchang an sawi tawh hi chuan ngawi mai hi ka tan a ṭha ber, ka ṭawng ve chuan ka inti nâ mai mai.








Ka u te'n chaw an lo ei tur thu ka nu chuan a sawi a, ka lawm viau rualin a hma ang khan keimahah phurna tak tak a awm thei tawh lo. Ka u te an lo thlen chuan an fate an tel ve hauh lo. Mak ka lo ti deuh, chu chu ka u chiah u Sangsangi'n a hrethiam a ni ngei ang, "Duatte, zanin chu keini bik chiah, a hmaa kan chhungkuaa chaw kan ei ṭhin ang deuh kha a ni mai" a rawn ti a, ka bu nghat.








Chaw ei dawnah ka pa chu a ṭawngṭai a, a ṭawngṭai zawhin kan ei nghal a ni mai, chaw ei lai chuan ka ṭawng ve mang lo, ka pa erawhin ka ute chu a be deuh reng. Ka hriatthiam ṭhin loh chu ka pa hian eng vanga min en hrang em em ṭhin nge a nih tih hi a ni. A fa ka ni lo emaw ka ti hial ṭhin, mahse, ka pa ka chhun ve viau chuan ka hre lawi si. Tihdik loh ka neih lah ka hre bawk si lo.








Tuna ka ute a biak dan hi ka naupan deuh lai chuan ka thik thei lutuk, chaw kan ei lai pawhin ka ute chu a duhsak thei hle, chawhmeh tui a tih apiang a suahsak a, kei ve erawh chu ka nu in min suahsak ṭhin thung. Hun a kal zel a, ka pa in min enhranna chu ngaiah ka nei titih kha a ni mai. Mahse, rilru nâ erawh a awm leh ṭhin.








Chaw kan ei kham chuan kan unauin kan seng fel a, ka ute chuan engmah min tihtir an phal ve lo. "in în lamah in thawk nasa dawn si, heta in lo ei chhunah tal chuan hahdam deuha awm turin ka duh che u alawm" ka tih chuan "kan Duattei i nih hi, kan awm lai chuan engmah i tih kan phal lo" an ti tlat.








An haw dawnah chuan "Duatte, ka pa thu hi lo awi rawh aw, i tana ṭha tur bak ka pa hian engmah a ngaihtuah lo ania, i pasal tur lah a hmelṭha si a" u Sangsangi chuan a ti a, ka bu zeuh ringawt. An pahnih chuan ka chalah min fawhsak ve ve hnuin an haw ta a, ka ngai dun nghal veng veng.







Eng vanga ka chhungte zawng zawng chuan pasal nei tura min duh nge an nih? A chhanna tur ka ngaihtuah nasat viau ṭum pawhin a chhanna tur ka hre ngai lo.








Ni a ral zung zung mai a, naktuk mai hi ka pasal neih hun a ni tawh, ka khumah ka meng kar a, mut a chhuak mawh takzet. Ka nun ka hmanchhoh dan ka ngaihtuah a, ka nun chu a lem ka ti viau. Ka mu thei ngang lo va, ka tho chhuak ta nge nge, hoodie dum inthawlhin ka room aṭang ka chhuak a, thawm dim zeta sitting room chu kaltlangin ka chhuak a, pawn boruak chu ka hip vang vang.







Tlan bo mai te ka duh, mahse, ka thei ngawt si lo. 'Zanin bak nula ka ni tawh dawn lo' tih chuan ka ngaihtuahna a rawn luah a, ka bing mup mup, ka kuta sana ka bun chu ka bih zeuh a, sawmpahnih a hnai thuak tawh.








Ka hmalam pan chuan ka pen mawp mawp a, engmah hlauh ka nei lo, ka ngaihtuahnaah pasal ka neih tur thu chiah a lang miau. Ka kal thui tial tial a, ka pik tulh tulh thung, a chhan chu ka kal zawng leh ka pen zawng tin mai chuan ka pasal neihna tur hun a hnai deuh deuh tih ka hre miau.








Kawng chu a reh ruih mai a, khua a dur khup avangin a vawt deuh vur bawk, chumi avanga mi veivak pawh hmu lo ka nih ka ring. Chutia kawng pawh en mang lova kun ngul chunga ka kal lai chuan tu emaw ka su chawrh. "Ka tihpalh lutuk" tiin ka dakchhuak a, mipa hmelṭha zet hian min nuih chungin "A pawi lo" a rawn ti a, a hmel chu ka nelawm ka ti reuh hle.








Ka rilru a hah viau laiin a ni erawh a nui thei bik a, ka thik ru hle. Be zawm tawh lem lovin ka kalsan a, kawng kawi ka thlen dawnah tu emaw hian min pawt thut, thim chinah min nem nghal dawr dawr chuan au ka tum a, ka thiltih tum a hria nge ni ka hmui a lo hup a, ka tal nawk nawk.







"Shtt,, tal tawh suh, tun lawka i tawh kha ka ni" a tih chuan ka tal tawp a, amah ka en chuan a dan ngai tein min lo nuih leh tawh. Eng vanga hlim bik em em nge maw anih le? Chutia a rawn chetthut chhan lah ka hre der lo. "Kawiah sawn damdawi an ti mek, I thawm an hriat ka ring" a tih chuan ka meng deuh awk.







Amah bawk chuan "Miin hmuh an duh lo tih ka chiang, i thawm kha an hriat chuan an rawn lang em em ang" zawi sup chuan a ti leh. A sawi ang ngei chuan kawi aṭang mi pahnih hi an lo lang a, an hawikual thuak thuak, keini thim china lo awm chu min hmu hauh lo. Chutah pakhat zawk chuan "tumah an awm lo, let leh ang" a ti a, pakhat zawk chuan







"Awm se ka ti asin, tha te pawh a za alawm" ti bul bulin kawiah chuan an liam a, ka bula ding lah chuan min la thlah mai lo "min thlah thei tawh em? " ka tih chuan harhchhuak thut ang mai hian min thlah nghal a, "tihpalh lutuk, khatia tih reng che kha ka tum lo" a lo ti leh nghal a. A la nui reng tho anih chu!








Ka insum thei ta ngang lo, "I hlim awm bik hle mai" ka ti a, rawn nui leh supin "ka nunin hlimna vawr tawp a thlen vang te pawh a ni ang" tiin dar a kan zeuh. "I vannei bik hle mai" ka ti a, keia nun leh a nun chu inthlau tak a ni.








Leiah chuan ka ṭhuthla tawp a, ka bula mi pawh chu a rawn ṭhuthla ve nghal a, "ka lawm e" tiin a lam ka hawi a, a nui leh tawh. A nui hmel hi hmuh reng pawh ka duh lo, a chhan chu zep miah lo chuan ka thik. Ka hmela hlim hmel a lan lohna chin pawh ka hre tawh lo.








"Ih, Duati ka nia, ni leh lo, Lalrinzuali" ka tih chuan "Duati maw? Tu emaw tan chuan koh i nuam ngawt ang" a ti a, a hming min hrilh let lem lo chuan "zawhna ka zawt thei che ang em?" a ti a, ka buk nghat chuan "nichin aṭang tawhin i hmela natna langchhuak kha ka hmu tawh, a chhan te hriat a rem em?" a tih chuan ka thaw hak a.







Zep a ṭulna pawh ka hre lem lo, kan inhmu tawh dawn chuang lo va, inbun ruak ila ka zia deuh mahna. "pasal ka nei dawn a" ka tih laiin "a lawmawm lamah ka ngai thei em?" a rawn ti khauh a, lu thingin "chhungte tuah rem chawp kan ni, kei chuan neih ka duh lo. Mahse, ka chhungte thu ka hnial thei bawk si lo.







Pasal neih duh si lo, neih ngai si inkarah ka awm a, tui lai rapin ka awm a ni ber, pasal ka neih chuan tuiah ka pil ang a, ka neih loh pawhin ka pil tho ang" ka ti a, ka bula mi chuan chiang zetin min en a







"I pasal tur chu eng ang mizia pu nge?" a rawn ti a, lu thingin "engmah ka hre lo" ka ti sep. "I pasal tur meuh anih chuan a ṭha turah ka ngai" tiin ka darah a rawn hmer a, ka pasal tur chungchang kan sawi tawh hi chuan ka pik leh ṭun zel. Nichina kan ṭhuttirh khan ka pangai viau emaw ka tia, mahse, tunah chuan ka pik leh vek tawh.







"Kei chuan ka chhungte thu ka hnial thei lo, ka pasal tur tal hian min neih a duh lo thu sawi se ka ti lutuk, ani khan neih ka duh lo tih a hre ve em ka hre lo, mahse neih erawh ka duh lo ngawih ngawih. Min neih a duh loh thu sawi turin ka duh lutuk, naktuk mai hi kan inneih nî a ni tawh a, mahse, beiseina tlem te, tlem lutuk tê tak tak ka la nei, chu chu ka pasal turin min neih a duh lo thu a sawi hi a ni" ka ti sap sap, eng vanga a kianga hetiang thu sawi hi nge ka nih pawh ka hre lo. Mahse, ka thawl deuh chuan ka hria.







"Tunge i pasal tur chu?" a tih chuan a ngai tein lu ka thing leh . "A chanchin engmah hriat ka nei lo, a hming, a hmel engmah hriat ka nei lo" ka ti a, ka bula ṭhu chuan ka kut rawn humin "Chung lam ami khian thil hi a ruat lawk sa vek ṭhin alawm, i tana ṭha turin a ruatsak ngei ang che" a rawn ti a, min nuih leh suk tawh.







"I pasal tur chungchang ngaihtuah lo la, i rilru tihah duh tawh suh, nang chuan mi ṭha tak i phu a, i pasal pawh chu mi ṭha a ni ngei ang, nupa hlim tak in la ni maithei asin.







Tuna i awm anga awm tawh lo hian hlim reng tawh zawk ang che aw" a rawn ti a, ka nuih seih. Ka bula mi chuan min en vang vangin "ka thiltih tur avang hian ngaihdam ka dil a che" tih leh rawn kun hniama ka chala fawh chu a rual a, ka meng deuh kawk. Mahse, ka thinrim miah lo.







Ka bula mi chu a dingchhuak nghal a, a kut min rawn pein "khawvela mo hmelṭha ber tur inih kha, naktuka mawi taka i lan theih nan i mut a ngai , ka thlah ang che" tiin a kut min rawn pe a, ka lo vuanlet ve mai. Kan in lamah chuan kan let a, kan let lamah chuan ka hah viau, ka kal lam kha chuan heti tak hian ka kalthui tih pawh ka hre lo. Chuan tuna ka bula mi hi eng vanga ring ngawt nge ka nih ka inhre lo!







Kan in kawtah chuan kan ding a, ka bula mi chu enin "ka lawm lutuk e" ka ti a, min nuih leh tawh. A nuih reng avang chuan ka nuih ve ta tawp. "muttui aw, Duati" a rawn ti a, ka hming min zawha 'Duati' tih hi ngaiah ka nei tawh a, ka hmingpum hrilh aiin Duati tiin ka lo hrilh leh ngawt zel.








Ka kal hma chuan ka kianga ding chuan ka kut a rawn vuan a, a lam ka hawi chuan "hlim reng ang che aw, duhsakna ka hlan a che" a ti a, nuihin kan in lamah chuan ka letsan leh a, inchhunga ka luh chuan ka thaw ham ham, kawngka ka kalh hnuin ka room lan pan nghal mai ka tum a, light a rawn en deuh pup chuan ka kutin ka hmai leh mit vel ka hliah a, reilote chutia ka din hnu chuan ka kut chu ka lathla a, ka pa thinrim hmel lutuk nen kan inmelh ta siah mai.







(Chapter 1 te a ni bawk a, a ngaihnawm dawn em tih kha khawngaihin comment lamah aw.

In nin loh hram ka beisei, a thu ṭhenkhat chhiar har tih deuhte leh thu ulh deuhte pawh a lo awm maithei a, ka inzir chho ve zel ania..

Chuan khawngaihin ka tihdik loh in hmuh chuan min hrilh zel dawn nia, lo siamṭhat zel ka tum ang, ka tihdik loh min hrilh tam poh leh inzirtur leh hriat belh tur ka ngah a ni mai )

[Te-i Mrs Ambrose]

My Fault
By: Te-i Mrs Ambrose


Chapter 2



Ka pa chuan "Lalrinzual, khawiah nge i kal?" zawi si, rum si chuan a rawn ti a, a thinrim tih hriat zetin a bek a pawng ṭawlh ṭawlh a, ka hlau takzet. "Pawn boruak thiang dawng turin ka chhuak alawm" ka ti sep. A mitah pawh ka en ngam lo. "I pandanah lut rawh, i chhuah leh chuan a pawi ang" tiin an room lamah a lut a, ka thaw chhuak ta ham ham. A hma khan thawk pawh ka thaw ṭha ngam lo.









Ka pindan lamah chuan ka lut a, ka insil leh thuak thuak hnuin khum lam ka pan a, mut ka tum, mahse, ka thei der lo. Ka mu meng kar ringawt. Ngaihtuahna in thil tamtak a chhui a, chhuichhuah nei lem lo mah ila, ka hah ṭun tho. "Lalpa, i rel ang zelin ka chungah thleng rawh se" ka ti a, mahse, heti hian ti ve tak mah ila, thinlung lam chuan a zawng zawngin ka sawi thei lo. A chhan chu famkim lo mihring ka ni ve miau.








Zing lamah chuan ka kawngka an lo kik thawm avangin ka harh a, ka sana ka bih chuan dar ruk a pel awr chauh. Zing lam dar li bawr velah khan ka muhil ve thei hram kha ania. Mut ka kham lo takzet. Ka mit ka nuai chat chat a, "ka tho ṭep" tiin kawngka kiktu chu ka au a, mahse tho lem lovin ka la mu reng. Ka nu chuan "Tho rawh, in inneih ni anih hi, midang an phut sap sap laia a monu tur ber i mut kur" a tih chuan ka ṭhuchhuak nghal. Vawiin hi ka pasal neih ni a ni tawh!









Ka kawr tur kan hawh pawh pawrhchhuak lo khan ka wardrobe ah ka dah ringawt kha a nia, phur lo zetin ka tho a, kawngka ka va hawng bawk. "I va tho tlai em em ve" tiin ka nu chu a rawn lut a, ka hmel a hmuh rualin min ngaihtuah hmel zetin "I mu ṭha lo em ni?" a ti nghal, ka bu zeuh ringawt. Engtin nge ka mut ṭhat theih tehreng ang ni?







Mo kawr haa darthlalang hmaa ka din meuh chuan ka mittui a rawn luang a, tinge ka pa hian pasal min neihtir kher a tum? "Ṭap mah ta che, mo hmelṭha ber i nih hi" u Sangsangi chuan a rawn ti a, ka mittui a kir phah lo. "Duatte, ṭap suh le, cheitu tur che an lo kal mek ania" u Sangsangi bawk chuan min rawn kuah chung chuan a ti leh a, kamkhat mah chuan chhang lo mah ila, ka mittui tla chu ka hru sawk sawk.








Min chei tu chuan "Awi, i vun hi a nalh e, simple deuhin ka chei ang che aw" phur zet hian a ti a, ka nuih ringawt. Ka ṭhian atan Muani ka hmang dawn a, ani pawh ka bulah an chei ve mek bawk. "Duati, chhel taka awm tur aw, Pathian khian i tan thilṭha a la ruat ang" darthlalanga ka inen reng lai chuan ka kut rawn hum chungin Muani chuan a ti a, "ka tum dawn alawm" ka ti sep.








Biak in lam kan pan a, kawnga kan thang lai hian motor aṭanga chhuk lawka tlan bo daih chakna rilru te ka pu a, a chang lahin thih daih chakna rilru ka pu thul. Biak in kawt kan thlen chuan biak in chu ka en vang vang. Ka nu chuan "Duati, ka van ngai dawn tak che em! Ka fanu duat" tih leh min kuaha ṭah a rual a, ka u te pawh chu an mittui a hnai kuar tih ka hre thei.








"Duatte, pawm thiam tum rawh aw, hetia kan tih chhan hi i hriat hunah chuan i lawmna tur tho a ni ang" u Remi pawh chuan min rawn kuah chungin a ti ve a, ka mittui a rawn hnai ve leh kuar tawh. "Het, khati khan ti tawh suh u, kha intiṭap mai dawn,, a ṭah chuan a hmelchhe vek dawn ania" u Sangsangi chuan kan boruak thlak tum zet hian a ti a, a thlak deuh ta ngei bawk. "Ni e mawle, kan ṭahbelh lutuk a, mo hmelṭha hi tihṭah mai mai tur a ni hleinem" u Remi chuan a ti a, ka nu pawhin a mittui a hru nghal sawk sawk bawk.









Kei hian pasal ka nei dawn. Chupawh tu nge a nih ka hre lova, ka duhthlanna tel hauh lova pasal neihtir tum ka ni a, zanin aṭang mi nupui ka ni tawh dawn! Khawvel inher dan hi a mak takzet. Kan lo hmuah lawk loh leh beisei loh pui pui kan chungah a lo thleng ṭhin anih hi.








Maicham lam pan chuan ka pa in min kai a, khuk ral vang vang mai ka duh. Maicham hmaah chuan ka pasal tur chuan min lo hmuak reng tawh a, a hmel chu chiang takin ka hmu lo. Mahse, a pumrua a lian a, a hmel pawh a chhiat hmel loh. Kan inhnaih deuh deuh zel a, a hmel ka hmuchian takah chuan ka meng kawk! Ani hi ka pasal tur maw? Ka awi thei lo!








Kut insuihin, Pathian leh mipui hriatpuina ngeiin pasal ka nei ta chu a nia! Ka hlim lo va, ka lungngai tawh hek lo. Ka awmdan chu sawifiah dan pawh ka thiam lo. Bawm lian tak, a chhunga engmah awm si lo hi ka inchan ber. Ngaihtuah ber pawh ka nei thei meuh lo. Ka pasal tur hian min ṭhawng em a tin ni.








Engtin nge ani hi ka pasal anih theih? Nimin te kha chuan ka nel viau, tunah erawh chuan ka haw viau tawh. Ani hian ka hming leh nihna engkim a hre vek a, pasal ka neih duh loh zia a hria, ka pasal tur hre lo ang hmakin a awm a, nge a ni hian keimah ang thovin kei hi a nupui tur ka ni tih a hre lo zawk le? Nimin te kha chuan ka chal te a fawp anih kha! Engmah ka hrethiam tawh lo.








Zanah chuan khumah ka ṭhu reng a, ka pasal tur erawh a lo la lut lo thung. Ngaihtuahnain eng ber nge a ngaihtuah ang tih pawh a hrethiam lo. Ka ṭhu reng a, inthlak emaw pawh ka tum hran lo, ka melh ngai ka melh tlawk tlawk reng.








Pindan kawngka a lo inhawng a, hawi pawh ka hawichhuak lo, ka bulah chuan a lo ṭhu a, a hming pawh ka hre leh tawh lo, a hmel erawh ka theinghilh thei lo, ka kut a lo vawn chuan ka phihlet rang kher mai, "A ṭhawng che a ni tiraw?" a tih chuan chhang lovin ka ngawi reng.








"Ka tihpalh, nimin khan engkim hrilh vek tur che ka nia, mahse khatih lai khan i pasal tur ka ni tih sawi ta ila, i bula awm tur khan min duh dawn si lo va, chumi avanga inhriattir duh lo che ka ni" a tih chuan ka nuichhuak tawp. Nichin kha chuan huat tur a ni em tih ka hrethiam lo anih kha. Tunah chuan ka huat chhan tur ka hrechiang tawh viau.









Ka pasal hian nimin khan kei hi a nupui tur ka ni tih a hre daih tawh anih chu! Kei lah chuan hre lovin ka lo thlamuanpui ve hle a, ka thawk ipikna te, ka rilru a hahziate engkim ka hrilh vek a, pasal ka neih duh lo thu pawh ka sawi chiang viau anih kha. Khatih lai khan ani chuan ka pasal tur a ni tih a inhre reng a, hre lo ang hmakin min hnem a, ka pasal tur chu mi ṭha anih a rin thute min hrilh anih kha!








Ka neih duh loh thu kha chiang takin ka sawi a, ka hmelhriat pawh ni lo bulah pasal ka neih duh loh em avangin ka ṭap hial, ani erawh chuan engkim hre vek chungin mi ṭha ber anga langin min hnem vel a, ani hian min neih duh loh thu sawi se tunah hian pasal ka neih a ngai lovang.








"Duati" tia ka dara a rawn chelh chuan a lamah inherin a kut ka dara a ngah chu ka lathla a, chiang zeta a mita enin "I tan chuan Lalrinzuali" ka ti hmak, ka mitmenga amah ka huatna langchhuak chu a chhiarthiam anih techek ang chu. A kun a, a hmai a tuai puat.







" 'Ka tihpalh' ka tih hian min huatna kha a reh phah lovang tiraw?" a tih chuan "Aw, ka ngaihthlak sen loh khawp pawhin sawi mah la, ka huatna che hi a reh lovang" ka tih khum salh. A mitmengah chuan eng emaw a lang zawk a, a bo leh nghal, "kan mi duh takte huat nih chu a va nuam lo ve" a tih chuan engtia dawnsawn tur nge ka hre lo.








"Min haw mah la, kei chuanin ka duh che, chu chu theinghilh ngai suh...Engtikah emaw chuan ka neih chhan che hi i la hrethiam mai ang" a ti chhuak sup. "Kan mi duhte ai chuan min duhtu te hi an hlut zawk chang a tam ania, nupui atan hiala ka neih ngam che chuan ka duhna che hi a lem a ni lo tih i hrethiam ang" a tih chuan nui hakin "min hrilh pangai nge min bem?" ka ti a, chutia ka tih chuan a hmaa ka hmuh tirh lai ang tho khan a nui leh tawh.








"A panhnihin" tia min chhangin ka hmaah tak a rawn ṭhingṭhi a, "Duati" a tih chiah chuan "Lalrinzuali" ka sawi zawi viau, mahse, a chang ṭha hle thung. "Ka duat tur nu i nia, ka tan chuan Duati i ni, ka insawifiahna hi ngaithla rawh" a ti chiah tihin "I eng insawfiahna chu nge ngaithla se la min tih? Nangma hma chiah i sial a, min duh avang maiin ka neih duh loh thu che leh neih che ka hrehzia hrevek chungin min nei lui a, ka hrilh tawh che








'kei chuan nawrluihna avangin pasal ka nei dawn' tiin, nang ve erawh chu tu mahin an nawrlui ve lo che, min neih duh loh thu kha sawi la i chhungte hian rem an ti nghal ang a, kei pawhin ka neih che a ngai lovang, ka huat che a ngai lo bawk ang, mahse nang chuan mahni hmasial takin nang nei tur chea nawr ka ni tih hrereng chungin min nei lui a, eng chu nge sawifiah ngai?" ka ngaihtuah chhuah leh rual chuan thinrim lutuk avangin ka aw a khur thei hial.







Ka hmaa ṭhingṭhi mek chu a thaw hak a, "heti hi chuan eng kan ang thei dawn chuang lo, i thinrim daih hun ka nghak ang" tia ding chhuakin ka chalah a rawn fawp a, a tih ka rin loh em avangin lo indan nachang pawh ka hre lo. Ka pasal chu room aṭang chuan a chhuak a, rei lote hnuah lo dak lehin "Inthlak tawh rawh" a rawn ti a, ka melh rawm rawm lai chuan a kiai suk anih chu.







Kan pindan aṭang chuan a chhuak a, kei pawh ding chhuakin ka inthlak a, ka mut fel hnu thleng pawhin ka pasal chu a lo lut tawh lo. Mahse, ka lawm zawk, a hmel hmuh ka duh lo.







Zinga ka harh chuan ka sana ka en nghal a, dar nga a pel awrh a ni. Ka thochhuak a, pindan chu a ruak huai mai, ka pasal kha a lo lut lo anih hmel e, a hming lah ka theinghilh daih zui. Ka inphih fai a, tumah an la thawh ka rin loh avangin khumah bawk ka lawn leh a, muhil tawh lovin ka phone a en thung.







Dar ruk bawr velah chuan thawm a awm ṭan tawh avangin ka tho a, inhnuai lama ka chhuk chuan ka nu, ka pasala nu chu a lo che rak rak tawh, min hmuh chuan nui sangin "I va tho hma ve, Hmingmuana a la tho na nge?" tiin min zawt a, lu ka lo thing ringawt. Ka nu bawk chuan "lo ṭhu rawh, thingpui ka lum a, a so ṭep" a ti leh nghal a, a nelawm hi ka ti em em.







Thingpui kan in lai chuan ka pa pawh a rawn thochhuak ve a, ka nu ang thova nelawm a ni. Min be nghal bawrh bawrh mai. Inleng an lo lut ṭak ṭak a, thingpui lumin ka buai hle, ka chechhia ang tih ka hlau a, mahse,, vanneih thlak takin ka che chhe lo.







Inleng ho pawh chuan min fak ve luam a, ka hmelṭhat thute hmaichhana min hrilh chuan ka lai thei hle. Midang pawhin ka lai hmel an hmuh chuah min nuih leh ṭhin a, ka rin ai takin ka mona in chu nuam ka ti a, ka mo tuk khatna a nih vang nge ṭawngkam ṭha tak tak, dawnsawn nuam tak tak bak ka dawng lo.







Hmingmuana, ka pasal lah chu zing aṭangin a hmel a la inlan lo hrim hrim a, chaw ei dawn chuan ka nuin "a va mak e aw, nupui neih tukah te chuan a rawn chhuak hma ve ang chu tih nak alaiin, inleng ho kha awm lo sela chuan ka hnuh thawhna a rei tawh ang" a ti mawlh mawlh. A thinrim hmel tehreng nen, ka lam a lo hawi chuan a hmel a dam thlap ang lawi a.







Ka nu bawk chuan "Rinte, va kai tho mai ta che" a ti a, huphurh ru tak chuan pindan awmna lamah ka lut a, khawi pindan berah nge a mut pawh ka hre lo. Room tinah chuan ka lut kual a, Hmingmuana chu ka hmu hauh lo. Ka nu awmna lamah chuan ka let a, "nu a mu tawh lo, ka hmuh miah lo" ka ti sep, ka nu chu a rawn mengphawk nasa mai.







"A chhuak a ni ang" inhlahrung tak chuan ka ti leh sep. "Aw, chaw chu ei phawt mai ang u" ka nu chuan a ti ta ringawt a, kan pathum chuan dawhkan chu kan kil ho a, ka nu leh pate chuan Hmingmuana chanchin te min hrilh luam a, induhna tel lova innei kan ni tih an hre ve a, ka dinhmun tur min hriatthiampui zia te sawiin an ni pawh keini ang thova innei, chhungte suih rem chawp an nih thute chu min hrilh ve a.







"Kan inneih tirh kha chuan kan inngeih lo asin aw, eng emaw hleka a rukin kan inkhak reng a" nui chungin ka nu zawk chuan a ti a, ka pa pawh a nui ve leh suk suk zel. Tunah chuan nupa inngeih leh inhmangaih tak an ni tawh a, keini ve hi engtin nge kan awm zel ang le.


Zanin chu a tawi tih ka hria... Naktukah hemi link ngaiah hian chhunzawmna ka rawn dah ang

[Te-i Mrs Ambrose]

ZAWMNA


Nileng mai chuan Hmingmuana chu a lo haw lova, inleng lo lut apiang mai chuan ka pasal Hmingmuana awmna min zawt ṭhin a, a nuam lo ṭhin khawp mai. Tlai lama zanriah bawl hun a nih meuh chuan ka nu chu a ang hlak hlak tawh. "Rawn haw teh se, nupui neih tukah tunge chhuak daw daw zel ni" a khat tawkin a ti leh ṭhin.







Zanriah ei dawn hnaiah Hmingmuana chu a lo haw ve hram a, a inthlahrun hmel hle. Ka nu zawk chuan bul hmukin "khawi laiah nge i va awm chawrh chawrh?" a ti a, Hmingmuana erawh chuan a nu pawh en lovin keimah min en reng, a nu bawkin "va inbual rawh, i inbual zawhah kan ei dawn nia" a ti leh a, Hmingmuana pawh pindan lamah chuan a lut a.







Chaw kan ei laiin a nu leh pa chuan Hmingmuana chu a zilh mawlh mawlh a, engmah sawi lovin a ngaithla tawp. "Zing aṭang i chhuak a, I chhuak tih lah kan hre ve der lo. I tel lovin Rintei'n inleng a dawnsawn a ngai a, a tana a nawm loh turzia i ngaihtuah lo em ni? Miin engtin nge an ngaih i rin, 'a mo tukah a pasal chuan nilengin a chhuahsan' an ti ang a, miin a chanchin sawi nuam an ti viau maithei a ni, bakah a rawn mo tukah te chuan a kianga awm tur i nia, a zah dawn teh reng nen, nang a pasal ber, a innghahna leh thlamuana tur ber lah i vak bo daih a" ka nu chuan a ti hlak hlak.







Hmingmuana chuan min lo en a, "tihpalh" a hmui phunin a ti sup. Ka chhanglet hran lova, ka ei zawm mawlh mawlh ringawt. "Nidangah chuan khatiang khan ti tawh lovang che, miin Rintei an hmuh dan pawh a dik lo palh ang" ka nu chuan a ti leh a, "Ni e Bawiha, I nu thusawi kha theinghilh loh tum ang che, i nupui pawh awm nuamin i siam hleinem" ka pa pawh chuan a ti ve a, Hmingmuana chuan a nu leh pa chu a chhanglet lo hrim hrim.









Chhungkaw ṭhenkhat chuan chaw ei lai hun hi inkawm khawm nan te, inpawh taka inbiak nan te an hmang a, a ṭhen phei chuan ei lai mawlh mawlhin thuṭha an inhrilh bakah an inzilh chang a tam a, ṭhenkhat thung chuan chaw ei laiin engmah an sawi lova, ngawi rengin an ei ṭhin. Tuna ka mona te pawh hi chaw ei laia thu engkim sawi ṭhin mi an nih hmel e.








Chaw ei kham chuan ka seng fel zung zung a, thleng ka sil chhung zawng chuan Hmingmuana chu ka bulah a ding ve reng, engmah a sawi lova, ka thleng sil chu min en reng ringawt. Ka nu chuan ṭhutkhawmna lam aṭangin "Bawiha, thingpui lo lum teh a" a ti a, Hmingmuana pawh chuan thingpui chu a chhuang ve nghal mai. Amah en hi chuan nu leh pa te thu awih tak anih ka ring.








Thleng ka sil zawh tawh avangin Hmingmuana thingpui lum chu ka pui a, "a hang nge a thlum an duh ang?" ka tih chuan no rawn lak pahin "ka nu leh pa chuan a hang chiah an in ṭhin" a rawn ti a, ka bu nghat nghat. No chawi chung chuan ka nu leh pa lam chu ka pan a, ka hmel an hmuh chuan an nui sang, ka nu zawk chuan "Kan Hmingmuanawma pui kha i tihtir vek lo anih kha mawle" thingpui lak pah chuan a ti a, ka nuih ringawt. Ṭawngtlem chu min ti ngawt ta ve ang. Mahse, sawi tur ka hre miau lo a tin ni.








Ka awm ngai lohnaa awm ka nih vang a ni ang, ka ṭhu te reng reng chu ka bet mang lo. Ka nu leh pa an mut hnu chuan ka thaw huai thei. Hmingmuana nen chuan pindan lamah kan inzui a, "I inbual duh em?" min rawn melh pahin Hmingmuana chuan a rawn ti a, lu ka bu nghat. Zing aṭang khan kan pindan lamah hian luh pawh ka lut hman lo.







Ka inbual zo ka chhuak chiah tihin Hmingmuana pawh chu bual in lamah a lut ve nghal a. Ka sam chu ka chhem ro tir a, Hmingmuana chu mipa tih takah bual inah a awm rei lo khawp mai. Keipawh ka sam ka chhem ro zawh chuan khumah ka ṭhu a, ka ṭhut fel rual rualin Hmingmuana chu ka hmaa chhuatah a rawn ṭhu ṭhingṭhi a, a kutin ka khup chung deuh hlekah a rawn man nghal a, phawk lutukin Hmingmuana chu ka en, eng thil chiah nge tih a tum ni.







"Eng nge i tih?" ka tih chuan min vawnna lai chu a tinghet sauh. "Ka tihpalh" a tih chuan "A eng vang ber khan maw?" ka lo ti a, ka mit taka en chungin "Engkim avang khan" a ti sup. Ka thin a rim leh tihtih der tawh, mahse engmah ka sawi lo. Sawi pawh ni ila awmzia a awm tawh dawn chuang lo.








"I thawh ruala ka hmel i hmuh chuan i thinrim ka hlau a, min haw rih bawk si, chumi avang chuan zingah khan ka chhuak, min hmuh ruala i thinrimna phena rilru natna lang chhuak kha ka hmuh hmaih lo, i na lai hmuh ka duh loh avangin ka inthiarfihlim san che, midang te'n an ngaih dan tur che ka lo dawn thleng tawh lova, min ngaidam rawh" a tih chuan engmah sawi tur ka hre lo.








"Kalsawn rawh, eng ang pawhin ngaihdam min dil mah la, a thleng tur ang chu a thleng vek tawh tho, ka ngaihdam leh ngaihdam loh chein awmzia a nei lo" tiin khumah chuan ka lawnkai a, Hmingmuana lakah hian hel reng tawh tur pawh ka ni lo, thil thleng tur zawng zawng a thleng vek tawh. Mahse, a lakah hian ṭhat chhuah ve tawh chu sawi loh, ka hmuh apiang hian ka ṭhin a rim, ka laka inthlahrung taka a awm hi hmuh nuam ka ti pawh a ni hran lo, mahse, a hlim ai chuan hetia a awm hi ka duh zawk tho tho. Hmingmuana chu a kal ta em pawh ka hre lo. Kan pindanah chuan eng thawm mah a awm lo.








Ka ngaihtuahna ka kawm nasa a ni ang, ka harh meuh chuan khua a lo var uar tawh. Chet ka tum a, eng emaw hian min khan bet un maiin ka hria, ka sir lam ka hawi chuan ka bulah Hmingmuana a lo mu ve reng a, min lo kuah reng chu niin. A mu lai hmel chu ka en reng, ka hmuh hmasak ber zan kha chuan ka nel ve hle anih kha. Khami zan khan engmah zep lovin sawi chu ni ta se tunah hian ka huat kher ka ring lo. Engkim hre vek chunga engmah hre lo ang maia a awm avang khan a ni tunah pawh ka huat em em ni.








Min kuahna kut chu ka lasawn a, ka thochhuak nghal. Choka lama ka luh chuan ka nu chu a lo che rat rat tawh. Min hmuh rualin "Rinte, i tho tawh elo? Hei thingpui hi in nghal rawh" tih leh thingpui min thlitsak a rual a, ka inthlahrung viau. Thingpui no chu ka ban a, ka nu tho hma lutuk chu mak ka lo ti deuh. Ka nu chuan ka ngaihtuahna chu a hria a ni tehchek ang chu "kan upa ve deuh tawh a ni ang, mut kan am ta meuh lo, zing lamah chuan i pa Sawma nen hian kan harh viau tawh zel" a ti a, ka bu nghat nghat ringawt.








Ka nu chu a ti ti siam siam a, kei pawhin thingpui ka lum zawh chuan ka pui ve nghal, ka nu chuan mo ang ni lovin a fanu ang maiin min cheibawl a, a nuam ka ti. "Engtikah nge i hna chu i chhunzawm leh ang" a tih chuan "Kar thar lamah hian zawm leh ka tum deuh, an lo buai hlawm viauin ka ring, tun kar erawh hi chu chawlh neih theih ve hun chhung tiin chawlh ka tum" ka ti a, ka nu chu a bu nghat nghat mai.







Ka pa a lo thawh chuan ka nu in thingpui a va pe a, an inhmangaih mai bakah an inkawmngeih hmel hle. Hmingmuana pawh a rawn tho a, ka hma chiahah ṭhutthleng rawn pawtchhuakin a ṭhu a, min en reng vang nge maw ni ka che khawr deuh tlat. "I tho nuam em?" a tih chuan ṭawngkaa chhang lovin ka buk khum nghat.







"Chhun lamah chhuahpui che ka duh a" a tih chuan a lam chu ka hawi ve ta nge nge. "Ka peih loh hmel" ka tih chuan lunghnur hmel zetin min melh a, min melh dan avang chuan nuam pawh ka ti lo. "Khawngaihin, thil hrilh tur che ka nei a" ngenngawl zet hian a ti leh a, "hetah hian sawi mai la" ka tih chuan lu a thing nghut nghut.








A nu rawn lut hnena "Nu, chhun lamah Duati hi ka chhuahpui dawn ania" a tih chuan ka melh deuh kawk. Ka lo khawngaih hman ṭhelh a, ka chhan lehna tur pawh nghak lo va a nu a lo dil leh avang chuan ka ngei leh vek phah. "Chhuak tak teh u, ina tawm nilen zawng Rintei tan pawh hian a nuam lovang" a nu pawh chuan a lo ti ve a, a nu berin hetia a tih tawh chuan kan chhuak ngei dawn anih hmel e.







Chhun lamah chuan phur lo zetin ka insiam a, Hmingmuana erawh a phur hmel ngang mai. Ka hmuh hmasak ber ṭum ang khan a nui leh vur vur thei tawh. He a nui hmel hi hmuh nuam ka ti, ka pasal ni lo hian ka ṭhian ni zawk se, englai pawhin a nui hmel hi ka hmuh duh ngei ka ring.








Darthlalang hmaa ka ṭhut lai chuan "Duati i hman ṭep tawh em?" darthlalang chhan aṭanga min rawn en chung chuan a ti a, "Rinzuali" ka lo ti hmak thung. Ka hman chuan ka ding tharh a, "ka chhuak rei peih lo ania" tiin Hmingmuana chu ka en a, "ka kal fona hmun ka tlawhpui che ang a, kan thang rei lovang" a lo ti ve mai.








Kan pahniha kan chhuak chu a tir lam chuan nuam tihna pawh ka nei lo. A bike in kan inphur a, hmun hran hranah min hruaikual a, ka kal dawna ka phur loh tehreng nen, a nuam ka ti phian. Nurse tan chuan buai a nat theih em avangin ka awl ve niah pawh mut leh ina chhungte bula awm ka thlan zawk ṭhin avangin tun ang hian ka chhuak vak khat a, hetia han chhuah takah chuan a lo nuam phian.








Ka thawhna hospital kawta bike a tihdin chuan mak ti zetin damdawi in lam chu ka thlir a, a bike a tihthi nghal avang chuan a ngaihna hre vak lem lo chuan ka chhuk a, Hmingmuana pawh a rawn chhuk ve tho. Ka kut chu rawn chelin damdawi in lam chu a thlir a, "heta ṭang hian ka hmeichhe duh em em ka thlir ṭhin, a hna kal lai te, a haw lai te" a tih chuan mak ti zetin a lam chu ka hawi a, "chutia duh I neih chuan tinge min neih kher?" ka ti ha mai.








Ani hi kei ang thovin a nu leh pate'n an nawrlui ve emaw ni le? Mahse, a nu leh pa kha chuan chutiang ti duh hmel an pu mang si lo. "Ka nei che alawm" a tih chuan ka meng kawk. "Ka duh em em mai kha ka nupui tura an thlan a lo ni reng a, ka nei ngei bawk che" a tih leh pawh chuan engmah sawi nachang ka la hre lo.








"Ka nupui tur i ni tih ka hriat khan ka lawmzia i hre lovang. Ka hmuh hmasak ber ni aṭang che khan la vei bur che, in damdawi inah hian ka ṭhianpa inhliam ka lo hruai a, nangmah hian i lo buaipui bawk, ka mit i la a, ka haw hnu thleng khan ka ngaihtuahzui che, ka vei reng ṭhin che. Nang chuan i hre kher lovang, nangmah hmuh chak avang hrim hrim chein tuk tin, tlai tin in damdawi in kawtah hian minute sawmhnih chuang ka ding ṭhin.








Ngahchhuah chang che ka nei a, hmuh loh tawp chang che pawn ka nei ṭhin. Ka nupui tur i ni tih ka hriat khan ka lawm lutuk, mahse, ka ngaihtuah a, ka duhzia che kha lo hrilh che ila, tun ang hian kan inkar a hla kher lo maithei.








Ka nupui tur i ni tih ka hriat khan ngaihzawng i neih leh neih loh te ka ngaihven a, a chhan chu ngaihzawng nei lai inih chuan i rilru hliam a, ka nupui nihtir che ka tum lo.








Chung lam khi a ṭha ka ti dawn nge mipa ngaihven i lo nei lo va, chumi avanga nupuia neih che kha hnar lo ka ni. Hnar chu sawi loh, ka pawm em em zawk. Ka nupui nihtir che a, duat leh hmangaih taka enkawl che kha ka duh a, mahse nang lah chuan min la haw sia" tiin a nui ro halh. Kan haw hnu thleng pawhin engmah kan sawi lo ve ve.








Zan lama kan mut dawnah Hmingmuana chuan "Duati, ka tihpalh, pasal neih i duh loh chungin min neih a ngai a, mahse, ka nei lo phal hlawl lo che a ni. Ka hma ka sial tih ka hria, mahse, tun bak hi chu mahni hmasial taka thil tih ka tum tawh lo. Min hmangaih turin nawr che ka tum lo, mahse, min hmangaih ngei theih nan erawh theih tawp ka chhuah ang. Rei tak nghah ngai mah la ka nghak ang che" tiin mitmeng thuk lutuk tak mai, min duh a ni tih hriat hliah hliah hian min melh a, ka awm a nuam lo, mahse ka thin erawh a rim tawh lo thung.








"Kan inneih hma zan khan engkim hrilh tur che ka ni, mahse ka insawi chuan nangmah hnem tur che leh i kianga awm turin min duh dawn lo tih ka hriat avangin engmah ka sawi ta lo kha a nia. Nangmaha rilru na zeta zan thima i awm ka hlau a, i pasal tur hre lo ang hmakin khatiang khan ka awm ta a ni.








Hei hi min hriatsak la ka duh, ka hmuh tirhin ka vei nghal bur che a, ka duh chho che a, ral aṭanga ka lo thlir ṭhin che kha ka duh khawp lo ta hial, ka tan chuan i pawimawh lutuk, i hlimna ka tihchhiatsak che avangin ka tihpalh, i hlimna thlentu nih ngei ka tum tawh ang.








Tunah chuan nupa kan ni tawh a, ka duh em em bawk che, min la haw mah la min huat tawh loh hun ka lo nghak ang, min huat tawh loh hnuah pawh chuta tawp mai lo chuan khawngaihin ka duhna che hi min chhanlet sak ve ngei ang che aw, ṭhian anga bul ṭan phawt i duh pawhin ka pawm vek ang, ka nghak ang che a, mahse, min innghahthlawntir suh aw, nghahchhuah ngei che ka duh, a rei leh rei loh lamah chuan...i lo rei ta viau anih pawhin ka nghak thei che, mahse min nghahchhuahtir ngei la aw" tiin ka chal a rawn fawp a.


(Naktukah chuan chapter khat a full in ka rawn dah ang)

[Te-i Mrs Ambrose]

My Fault
By: Te-i Mrs Ambrose

Chapter 3



Pasal ka neih aṭang ka nu leh pa te in lamah ka la kal lo hrim hrim. Ka ngai ṭhin viau, ka nu nen chuan phone kaltlangin kan inbe zeuh zeuh ṭhin, ka pa nen erawh vawikhat mah kan la inbe lo thung. Ka nu hnena ka pa in ka call a chhan duh ngai loh thu ka hrilh ṭum chuan "A ngai lutuk che a, a biak che chuan a lung a len zual mai mai a hlau a, a la be duh lo che anih hi, ni hi han ral se, amah zawkin a rawn be mai ang che, nitin i room-ah a lut a, rei tak a ṭhu ṭhin, a ngai lutuk che hi awm ngaihna a hre der lo" a rawn ti a, ka pa chu ka ngai nghal hle. Ka lakah khan pa ṭha tak angin awm ngai lo mah se, ka zah dan leh hmangaih dan hi a nep hauh lo.








Englai pawhin Hmingmuana chu ka chungah a ṭha em em reng a, a nu leh pa, ka nu leh pa ni ta te pawhin min duat thei hle. Hmingmuana chuan a sawi ang ngeiin ka hlimna tur ni a a hriat zawng zawng a ti ṭhin a, ka hlimpui ve ta phian bawk.









Hmingmuana hi fa mal a ni a, unau dang a neih loh avang hian a nu leh pa hian an ngaihtuah viau tih ka hria. Hmingmuana leh a pa hi an inchhun fuh hle a, hmel lamah chuan Hmingmuana hian a nu a chhun vak lem lo, mizia lamah erawh a nu leh pa ze ṭha lai hi a la kawp ve ve niin ka hria.







Ka pa leh Hmingmuana hian hna pangai tak an chelh ve ve a, ka nu erawh in lamah a awm mai a, a changin thawmhnaw a ṭhui ve leh zeuh ṭhin.








Ka awm tirha ka inthlahrun a, ka tlangnel loh tehreng nen, ka awm rei hnu chuan nuam ka tiin ka thlangnel ve ta viau bawk. Ka nu rawngbawl puih phei chu ka hna pakhat ang maiin ka ngai tawh. Ka nu (Hmingmuana nu) avang hian min hringtu ka nu ka ngaihna pawh tlemin a zia deuh. A chhan chu a kianga ka awm hian min hringtu, ka nu kianga awm anga ka inngaih vang a ni.







Kei chuan hna la ṭan lo mah ila, Hmingmuana thung erawh chuan a hna a kal chhunzawm leh tawh a, ka pa nen hian an thawhna hmun a inang lo hle a ni ngei ang. Motor hran hian an kal mai zel. Hmingmuana hna aṭanga rawn bang hian thil eng eng emaw hi min lo hawn ṭhin a, a naupangchhia ka tihsak ṭum chuan








"I ta tur thil lei tura din ringawt pawh hi nuam ka ti a, i tana thil lo hawn phei chu nuam ka ti utuk, chuvang chuan la mai mai rawh" min ti anih kha. "Ka nupui duh em em nu hi nurse a ni sia, i hna a hahthlak bawk nen, ei tur ṭha tinreng i ei a ngai" tiin a chang phei chuan ei tur hrisel, thei leh thil dang te hi a rawn hawn leh nawlh zel.








Ka awm rei ve tial tial a, in lam ka ngaihna chu la reh lo mah se, tuna ka awmnaah hian nuam ka ti ve tawh viau. Ka seilenna in a nih loh avangin inthlahrun chang chu awm ve ṭhin mah se, in dangah phei chuan awm ila, tuna ka awm ang hian ka awm ngam pawhin ka ring lo. Hetia ka awm ngam chhan bulpui ber chu ka pasal leh a chhungte hi an fel em a tin ni.









Naktuk mai hian ka hna chhunzawm leh tawh tur ka ni a, Hmingmuana pawhin a office kal paha min thlah a tum bawk. Nupa kan nih miau avangin khum khatah ka mu a, mahse, kan intawk ngai lo, khum a zau ṭha a, a laiah lukham ka dah zel bawk, Hmingmuana pawhin nui chungin "I mut laiin ka dawlh dawn che pawh ni hlei lo, kan inkara lukham dah hian awmzia a hran lo, ka duh chuan zan laiah lukham chu ka la daih thei" hi a ti ṭhin, mahse luhkham ka dah hian ka thla a muang riau zel.








Kan mut dawnin Hmingmuana chuan "Duati, min la hua em?" a rawn ti a, ka awmdan aṭang khan ka haw tawh lo tih chu a hrethiam tho tih ka hria. Amah ka en chuan a zangthal zawnga muin a kut a lukham a, inchung chu a en reng bawk. "Ka haw tawh hran lo che" ka tih sep chuan rang lutuk tak maiin ka lam a rawn hawi a, a hmela hlimna langchhuak chu hmuhhmaih lo chiang tak ka ni. Ka kâ ngeia ka huat tawh lo thu ka sawi hun a lo ngaichang reng ṭhin emaw ni le?







Hmingmuana hi ka huat reng a ngaihna ka hre tawh lo, ka lakah a ṭha em em reng a, ka huat chhan pawh ka pasal tur a ni tih ka laka a zep vang leh engmah hre lo anga a awm vanga hua kha ka nia, ani lahin engkim a sawifiah vek tawh a, huatna chhan tur ka nei tawh lo.







"Ṭhian angin awm rih ang aw" ka tih chuan nui vur vur chung hian a lu a bu nghut nghut a, a hlim hmel chu hmuh a nuam ka ti. "I ṭhian ṭha tak ka ni ang, chu aia thui kai i inhnuam hunah pawh i tan i ṭhian ṭha tak ni chungin ka duhna che ka lantir ve thei tawh ang" a tih chuan ka chhang let tawh lo.








Zing lamah chuan ka tho nuam khawp mai, ni tamtak hnuah hna ka chhunzawm leh tawh dawn ania, ka phur viau, mah se han chhunzawm leh chiah ila chu a hahthlak leh viau ang. Ka nu nen rawng kan bawl dun a, ka nu bula ka awm hian min hringtu ka nu tak tak bula ka awm laia ka hlim ang khan a kiangah pawh hian ka thla a muangin ka hlim ṭhin.







Dar riata hna ṭan tur anih avangin chaw pawh ka ei ve lova, ka nu ka hrilh khan "Chuti anih chuan zing lam chilu ei hma kan tum tawh dawn nia, chaw kil ho hian chhungkua chu kan inpawh sawt ṭhin" a ti anih kha, kei pawhin dik ka ti viau. Chaw bel khat zen ho na nâ na chu midang, chaw bel kan zenpui loh hote nen ai chuan kan inpawh zawk nge nge alawm.







Ka insiam laia Hmingmuana rawn lut chuan "I nurse kawr kha i hak hunah chuan duhtu che an lo lang ang a, i zungbun kha i hmuhtir zel dawn nia aw" a rawn ti a, chutia a tih avang chuan ka nuichhuak hak. Ka luck loh zia hi a hre lo a ni ngei ang.








Hmingmuana chuan bike a min thlah lovin a car zawk chuan min thlah a, kawngka kan tlan laiin Muani chu ka call a, a lo la har lo khawp mai, "Hna chu i rawn zawm leh dawn ta em?" a lo ti nghal var, "Imm, kan lo kal mek" ka tih chuan " 'kan' a ni??" tiin a rawn nui kar kar. "In romantic scene tur zawng zawng kan inbiak chhung hian a ral palh ang, kawtah ka lo nghak ang che, I aiin ka thlen hma ka ring" tih leh phone chu hang up a rual a.








"I phur hmel pawh hmuh a nawm viau hi le" Hmingmuana chuan a rawn ti a, "ni tam tak hnua hna han thawh zawm leh tawh leh puih ngaite pui thei tawh tura ka awm leh tawh tur hi chu a phurawm ve alawm" ka lo ti mai a, "ka thlan chhan che chu tikhan i hre mai em?" a tih chuan a ngaihna hre lo zetin "Eng chu maw?" ka ti ha, "engtikah emaw i la hrethiam mai ang" tih zawngin min chhang.







Damdawi in kawt kan thlen chuan Hmingmuana chu chhuk a tum a, ka dang vat, "ti duh suh, keimahin ka chhuk thei" tiin ka nuih var var a, chhuahluih a tum ta bik lo. "I night lo turah ka ngai, i hman hunah min rawn hrilh la, ka lo lam ang che" a tih chuan "taxi te pawh a tam a" ka ti a, Hmingmuana chuan "ka awm hi ka lo lam thei che" lungawi hmel vak lovin a ti a, amah bawk chuan








"I ṭhian anga min ngaih chuan ka thusawi hi zawm rawh, i kal lam leh haw lam chu ka mawhphurhnaah ka ngai che, i nuna rawn inrawlh lutuk ka tum lo, a ṭul chang chu a awm ang, mahse, a nazawnga rawn inrawlh ka tum lo, chuvang chuan ka sawichhun tlemte tal chu zawm ve turin ka duh che" a ti duah a, sawi tur reng reng ka hre ve leh tawh lo.








"I ti ang tiraw? I ban hunah min rawn hrilh ang tiraw?" a tih chuan lu ka bu ta nghat a, Hmingmuana pawh a nui leh tawh. Car aṭang chuan ka chhuk a, damdawi in kawtah Muani chu a lo ding reng tawh. Kan pahnih chuan damdawi in chhungah kan lut a, kan hming kan ziah fel hnuin staff room lam kan pan nghal a, Muani chuan,








"I pasal chanchin chu min hrilh ve la?" phur hmel zet hian a ti a, kei pawhin ṭha takin ka hrilh a, kan inneih hma aṭang daiha min lo duh tawh thute ka sawi chuan a biang dawm meuhin "a va cial rem rem ve" a ti hliai. "A hmel lah kha a chhe si lova, i pasal a ni tawh bawk a, a rang lamin duh ve tum rawh, i duh hma poh leh i hlim in i nuamsa hma a nimai" a ti nghal siam siam. Kei ai fe chuan a phur anih dawn hi.







Muani nen kan inthlak zawh chuan kan duty na tur lam kan pan a, vawiin chuan kan pahnihin counter-ah kan ṭhu dawn a, kan pahniha kan inkawp theih ni hi chuan a nuam vel vek zel mai. Damlo lo lut thar an awm mang lova, kan awl phian, ward lah chu doctor leh nurse dang te'n an fang a, keini chu kan awl phian. Muani chuan a khat tawkin Hmingmuana chanchin chu min sawipui leh ṭhin, "I pasal chu ni lo se ka star duh hrim hrim ang, a nui hmel kha a mawi ka ti, engtikah emaw chaw eiah min la sawm ula a ṭha ang, anih loh pawhin keimah zawkin in nupain chaw eiah ka sawm zawk ang che u" a ti bawrh bawrh.







Dam lo serious an awm vak loh avang leh kan awl ve ni tak anih avangin dar sawmpahnih leh a chanve velah chuan chhun chawlh hun kan nei thei mai a, nidanga kan buai zual ni chuan dar hnih tlanga kan chawlh ve theih chauh hun te pawh a awm ṭhin. Muani nen chuan canteen lam panin kan inzui a, ei tur ka lam laiin Muani ve thung chuan ṭhutna tur a lo melh thung.








Ei tur keng chung chuan Muani ṭhutna lo hoh/hauhna lamah chuan kal a, ka ṭhut hnu rei lo teah "Doctor thar an lak belh dawn kha I hria em? Keimahni department lamah hian a nia, I hriat angin emergency-a mi zai a ngaih changin doctor an indaih loh theih em hi, doctor thar an lakbelh dawn, tlangval la ni se aw" a ti vang vang. Kei erawhin patling bak an rawn lak belh ka ring lo.








"Doctor thar chu lo thawk ta tehreng pawh ni sela, eng atan nge i tih chuan ang?" ka tih chuan "hna kal tinuamtu a ni mai alawm, a ward fang te hi zui vel thin ila" a ei lai ṭhulh meuh chuan a ti a, a va han buaithlak ṭhin e aw. "Bialpa nei lai awm hian awm ve ṭhin rawh" ka tih chuan "a hunah te chuan awm mai zel a, englai pawha bialpa nei em em anga awm reng hi a ṭha lo. Bialpa nei anga awm hun leh nei lo anga awm hun hriat a ngai" a tih zuah zuah chuan beidawng zetin ka thaw hak ringawt.







Chutia thil eia kan ṭhut lai chuan Doctor Sammy a a rawn kal a, kan bulan rawn ṭhut pahin "i reh rei lutuk a, kan lo ngai hman che alawm" a lo ti nghal bawrh bawrh. Ani hi a la thlangval a, nikum hmasa aṭang mai khan hetah hian a rawn thawk tan a, a rawn thawh hma aṭang daih tawh khan keini chu kan lo thawk tawh thung, a rawn thawh tirhin a inthlahrun hmel hle a, kan innel chho a, kan han Inkawm tak tak takah chuan a lo inthlahrung reng reng lo, a ṭawng duh a, a hlim sang reng a, a harh ru phian bawk.







"Ka awm loh chhunga nuam i tih zia Muani hian a lo sawi zo chiah a" ka tih chuan a kut ṭang elh chung chian "A awiawm anih chu, ṭumkhat dam lo ka zai tumin nangmah emaw ka ti thut a, ka ṭah chiam lo chauh a ni" a tih chuan a hnungah ka chum pawp, ti awm lo thei lutuk. "Nge maw ni le? Ka ngaih avang chein dam lo kha nangmah hmuhin ka hmu alawm" a la ti ṭalh anih chu. Ka va han ngei reuh tak.







Thil kan ei zawh chuan kan duty na ngaih bawkah Muani nen kan let leh a, dam lo an awm lo bawk nen, kan ti ti dun mawlh mawlh. Chutia kan lo ti ti lai chuan dam lo pakhat hi an rawn hruai a, a vial ngawng ngawng a, a ṭap reng bawk. Muani nen kan tho vat a, a lo hruaitunu chuan "nurse hmanhmawh rawh u, a pum hi a na rei tawh lutuk" a tih chuan Muani nen kan che nghal zung zung.







Dam lo chu damdawi hmangin chiu kan tum, a tal nasa mai. A rawn hruaitu chuan "Bawihte, I damna tur alawm, i kut kha dawh ṭha rawh le" tiin a sam a chulsak a, kan dam lo ber pawh chuan a kut chu a rawn dawh ṭha ve ta bawk. A hnu rei vak lovah damlo chu a zia tan a ni ngei ang, a vial ngawng ngawng tawh lo va, a hahdam hmel ta huaiin ka hria.







Chutia kan lo awmkhawmna lamah chuan mipa lian zet hi a rawn tlanphei a, kan bulah a ding chawt, "Nu, eng nge a an?" tih leh damlo chu a chala fawhsak a rual, damlo pawh chuan mipa chu a nuih sen sen a, "ka Rosangzuala a lo thleng e" tiin a ṭhuchhuak a, a kut a beng nghal thak thak bawk.








A rawn hruaitu chuan "a ṭha tawh, tunah chuan na a nei tawh lo" tiin a chhang a, chupa chuan "nidangah chuan nangmaha buaipui tawh lovin min ko tawh ṭhin rawh, i fapa ka awm ve reng, nangmahin mangang takin engmah ti tawh lo turin ka duh che" a ti charh charh. "Ni e, ka lo mangang lutuk a, lo call na chang che pawh ka lo hre lo anih kha" nu chuan a ti ve mai.







Mipa chu ka lo en reng, ka hmuh tawh hnu a ni tlatin ka hria. Chutah mipa khan damlo chu enin "U haw tawh ang aw" a han ti a, damlo pawh chuan "Yes inah kan haw dawn" phur hmel zet hian a ti a, damlo chu kan u daih anih ka ring. A awmdan chu ka lainat takzet. A hmel a ṭha si, vohbik ni lo sela chuan tun ai fe hian hmahun a neih êng awm si a.








Mipa kha ka lo lam hawiin a nui suk a, a hmel hi ka hre tawh. Hmana restaurant a mipa thinchhe lutuk leh hlauhawm lutuk tak mai kha a ni. Ka kut aṭanga tissue la tu ngei kha! Khatih lai kha chuan ramsa koham lutuk kha a ang a, tunah lah mi hmangaihna ngah hmel tak a ang lawi si! Khawi zawk hi nge a mizia dik tak ni ang le? Ka hmuh tirh lai ang mai khan ka lungphu te chu an la rang zui.


CHHUNZAWM LEH TUR

(Nizan khan chapter thar chu a full a ka dah tur thu kha ka sawi a, ni ka lo hai vang a nia, min lo hrethiam dawn nia, kar thar aṭang chuan ka story dah dan tur ka sawi ang thlap thlap khan ka lo dah tawh ang. )

[Te-i Mrs Ambrose]

ZAWMNA


Mipa kha ka lo lam hawiin a nui suk a, a hmel hi ka hre tawh. Hmana restaurant a mipa thinchhe lutuk leh hlauhawm lutuk tak mai kha a ni. Ka kut aṭanga tissue la tu ngei kha! Khatih lai kha chuan ramsa koham lutuk kha a ang a, tunah lah mi hmangaihna ngah hmel tak a ang lawi si! Khawi zawk hi nge a mizia dik tak ni ang le? Ka hmuh tirh lai ang mai khan ka lungphu te chu an la rang zui.







An kal hnu thleng pawh chuan ka mitthlaah a hmel kha a cham reng, a mitmeng kha chhiar thiam ka chak thlat a, eng vang nge tih phei chu ka hre lo. Ka hmuh tirh pawh khan a kal liam hnu thleng pawhin ka lungphu kha a pangai thei lo kha ania. Tunah pawh a hmaa ka awm ang tho khan ka la awm.







Ka hmuh hmasak ṭuma a zia leh tuna a zia a inperhsan em avang hian nge maw ni ka ngaihtuahna a luah tlat a, ka hmuh hmasak ṭuma ka kuta tissue rawn bana a kamsir thi a hruk laite kha tum loh deuhin ka mitthla let leh zel. Nichina an chhuah dawn pawh khan rawn lehhawi meuhin nalh fahranin a kiai suk anih kha! Eng vanga ka ngaihtuahna chhuahsan thei reng reng lo nge maw anih le??








Tlai lam dar nga leh a chanve bawr velah Hmingmuana chu ka text a, kan ban theih ṭep tawh thu ka va hrilh a ni. Ka phone pawh chu en tawh lem lovin ka khup thak. "I pasal hming kha ka theinghilh daih" Muani'n a lo tih chuan Hmingmuana a nih thu ka lo hrilh mai a, "a lo lam dawn che em?" a tih leh chuan min lo lam ka rin thuin ka chhang a, phur hmel zet hian "a lan dan pawh ka hre mumal tawh lo, ka en chiang duh" nui var var chung hian a ti a, ka bu zeuh ringawt.







Kan haw theih chuan phur zetin staff room lamah inthlak turin kan lut a, zan lama night tur ṭhenkhat pawh an lo inthlak ve mawlh mawlh. Kan Inthlak zawh chuan damdawi in kan chhuahsan a, Muani chuan ka kutah a vuan ṭai a, Hmingmuana chu min hmuhpui a tum ruh hmel hle. A scooty a rawn keng reng a, Hmingmuana min hmuhpui hnuin a scooty awmna lam pan a tum chauh a ni. Kawtah chuan Hmingmuana chu a car nghengin a lo ding reng tawh, min lo hmuh chuan a kut a rawn vai zeuh. Muani zawk chuan rang zetin Hmingmuana lam pan chuan min kai dawr dawr. Hmingmuana awmna zawn kan thlen chuan







"Min la hria em? In inneih ni-a mo ṭhiana ka ṭan kha" Muani chuan a ti nghal a, "ka nupui ṭhian ṭha ber chu ka theinghilh thei nang" Hmingmuana pawh chuan a lo ti ve mai a, a nuih suk bawk. "Ka ṭhiannu hi lo duat hle ang che, i tihṭah vaih chuan ka nasa dawn teh mai ania, tihlim reng ang che" Muani'n a tih leh chuan ṭul ka ti lem lo khawp. "A nuih reng ka duh alawm, a hlim nan chuan engpawh ka ti ang" Hmingmuana chuan thutak zet hian a ti a, Muani pawhin nui var var chungin "chuti, ka kal hrang dawn, ka thusawi kha theinghilh ngai suh ang che, a hlim reng a ngai" tih leh ban vaia min inhersan a rual a, garage lam a pan nghal nal nal.







Hmingmuana chuan nui sukin "I ṭhiannu chuan i hma a ngai hle mai" a ti a, lu ka bu ve nghat nghat. Muani hi chuan ka hlim loh a hlau viau ṭhin reng a ni. Ka aiin kum khatin a u zawk a, eng kimah min dawm thiam a, min duhsak ṭhin viau bawk. Hmingmuana'n car kawngka min hawnsak lai chuan hmeichhe hmelṭha ve zet hi kan lam panin a rawn kal hlawk hlawk a, kan zawn a rawn thlen rualin "Duat, ka ngai tawh lutuk che" tih leh Hmingmuana chu rawn kuah a rual a, a ngaihna ka hre lo hle.







"Min thlah teh" Hmingmuana chuan nem lem lo zet hian a ti a, min biak ṭhin laia a awka leh tuna hmeichhia a biak dan chu inthlau tak a ni. "Ai, ka tihpalh, i phal lo chung ram dangah khan awm miah lo tur ka ni, ka chungah thinrim tawh suh, ka tan a nuam lo, a hreawm lutuk" hmeichhe zawk chuan tiin nghet lehzualin Hmingmuana chu a kuah a, kei erawh a ngaihna hre lem lo zetin an kiangah ka ding ve reng.








Hmingmuana chuan hmeichhia chu a nawrsawn dawrh, "Ruth, a tawk" a ti khauh ṭhat. A hmelah chuan lungawi lohna emaw, thinrim hmel a lang lo, chutih rual chuan hlim hmel pawh a lang chuang lo bawk. "Kan tawp tih chu kan chian dun viau kha" a ti leh hmuk. Henu a biak ang hian min be ve se chuan nuam lo ka ti ngawt ang.








"Ai, ka tihpalh, tihpalh lutuk, i duh loh zawng engthil mah ka ti leh tawh lovang, Sorry Babe" Ruth a tih chuan a ti leh a, Hmingmuana erawh a thaw halh, "kan tawp chhan chu kan chian dun viau kha, lo let leh tum tawh suh" Hmingmuana chuan a ti chang fak. "I tel lovin ka awm thei lo, nangpawh ka tel lovin i awm thei hek lo" Ruth-i chuan a ti leh a, Hmingmuana chu a nui suk.








"I te lovin ka awm thei lo maw?" tiin Ruth-i mitah chiang zet hian a en a, Ruth-i a buk nghat chuan " I hresual, i tel lovin ka awm thei khawp mai, hmalam ka pansan tawh che, nupui ka nei tawh" tih leh ka kawnga rawn chelh a rual a, Ruth-i hmelah chuan natna ni awm tak a rawn lang zawk a, mahse a bo leh nghal.








"Ka awi ring miah suh, min tihnat ve i duh avangin dawt i sawi mai mai anih kha" Ruth-i chuan a ti a, a hmelah chuan Hmingmuana a duh zia chiang takin a lang a, eng vanga inṭhen nge maw an nih le? "Ka nupui ngei anih hi. Ka tana hmeichhe awmchhun a ni bawk" tiin Hmingmuana chuan ka kut veilam chu a lekchhuak a, "tihian kan inneih zungbun i hmu tiraw? Kan kalsan tawh ang che" tiin car-ah chuan min nawrlut a, ani pawh driver seat-ah a lut ve bawk.








Ruth-i chu a ding reng a, keini pahnih chu min en reng. Hmingmuana chuan car chu tinungin min tlanpui a, rei pawh kan tlan hmain a steering humna lam zawk chuan ka kutah a rawn vuan a, "Duati, Ruth-i avanga nei che ka ni lo ania, ka neih chhan che chu chiang taka ka hrilh tawh che kha" tiin ka kut a humna chu a tinghet sauh a, a bak engmah a sawi tawh lo.








In kan thlen thleng chuan Hmingmuana chu a ṭawng leh ta lo va, a ngui riau hian ka hria. A bialnu hlui Ruth-i nena an chanchin te, an inṭhen dan te chu hriat chak viau mah ila, a sawi hmasak si loh chuan ka zawt ngam si lo. Ani lah hian a sawi hmel bawk si lo.








Ka ban tlai em avang chuan nuam lo chu ka ti ve hle, ka thu lah a ni bawk si lo. Mahni in tak tak a nih si loh avangin inthlahrun chu a na ve khawp mai. Ka nu nen chaw ei kan siam lai chuan "Nu vawiin lam i lo buai viau em?" ka ti thla rawk. Ka nu chuan min hriatthiam hmel zetin "Buai teh nang aw, i rawn awm hma zawng pawhin ka kut vek alawm ni ṭhin" nui chung hian a lo ti mai, "Duh hun huna haw thei ka ni bawk si lova, zanriah te pawh nangmaha i buaipui a ngai dawn sia" ka ti leh. "Hna thawk a chhuak i nia, thil ṭul lo avanga lo haw tlai lah i ni hek lo. Inthlahrun phah nan te I lo hmang ang e, ka peih tawh loh hunah chuan awmpui te pawh kan la mai ang, nuam lo tih phah nan hmang suh ang che aw" a ti siam siam a, awm pawh a nuam ve huai huai.








Zanriah kan kil thleng chuan Hmingmuana chu a la ngawichawi a, a nuam lem lo. Chutia Hmingmuana ber a awm avang chuan Ruth-i nena an chanchin chu hriat belh ka chakna a na a zual sauh lehnghal. Heti taka tingui theitu chu a tan a la pawimawh hle a ni ngei ang. Eng vanga inṭhen nge maw an nih reng reng le?







Ei kham chuan thleng vel chu sengin ka sil zung zung. Nilai zan anih avangin ka nu leh pa chu inkhawm tumin an insiam nghal a, keini erawh kan inkhawm dawn lo thung. Ka nu leh pa an kal fel rualin thleng ka sil zo ve chiah a, pindan lam ka pan nghal.







Hmingmuana chuan laptop a lo bih ngur a, ka lut tih pawh a hre lo. Keipawhin be lem lovin ka thawmhnaw hakthlak tur leh towel ka la a, bual in lam ka pan nghal bawk. Ka inbual lai lah chuan Hmingmuana leh Ruth-i chanchin chu ka han zeldin ve chiam a, engmah ngaihtuah chhuah erawh ka nei lo thung.







Hetia Hmingmuana bialnu hlui a lo lan tak avanga Hmingmuana chungchang vel ka ngaihtuah a ngaihven viau hi a chhan awm pawh ka hre lo. Mahse, ni danga min tihhlim tum reng ṭhintu a hlim loh tak em avanga ngaihtuah te pawh ka nih ka ring.







Khumah chuan ṭhuin ka phone ka bih a, a khat tawkin Hmingmuana chu ka en leh ṭhin bawk. Ani erawh a hna lamah a insawrbing nge thil dang a ngaihtuah tih pawh a hmel lan dan aṭangin a hriat theih loh. Kei lah ta pek chuan a bialnu hlui nena an inṭhen chhan chu ka hre chak zek zek lehnghal.







Engtin pawhin an inṭhen chhan chu han zeldin ve mah ila, ka hre dawn chuang lo tiin hospital a ka duty dan tur chu ka en vel a, chutia phone ka bih reng lai chuan ka phone a rawn ri thut a, ka phu deuh zawk mai. Min lo call tu ka en chuan Nunsanga a lo ni. Eng vanga min rawn bia nge a nih tih chu ka hre nghal mai.







Ka lak rualin "In intithiam lo leh tawh a mi?" ka ti nghal, chutia ka tih avang chuan lehlam ami chu a nui deuh huk. An pahniha inkarah hian puarak ka ni ve ziah. An inngaihzawn hma aṭang tawh khan an puarak ah ka ṭang tawh a, tun thlengin ka la ṭang zel a nih hi.







"Min sawipui leh mai loh chuan" Nunsanga chuan a rawn ti ta nge nge a, a chhan leh a vang te a rawn sawi zawh chuan kan dahzui mai. Kei pawhin ka theinghilh hmain tiin Muani chu ka call a, a lo chhang har hran lo. A buai leh buai loh te ka zawt tê te a, a buai lon thua min chhan chuan ka call chhan ber chu ka sawi nghal zung zung.







A tir lam chuan hel ve deuh mah se, ka sawi fiah takah chuan ani pawh a lungawi a ni ang chu, a biak tur thu a rawn sawi a, call pawh chu kan titawp zui nghal mai. An pahnih hian inngaihzawnna kawngah rinawm dun hle mah se, thil an sawi nghal mai ṭhin loh avang hian an buai leh nge nge zel. Hetia an buai ṭum lah hian a tu a zawk mah hian be hmasa tu leh ngaighla tu nih an tum ngai lo, ka sawi anih erawh chuan ṭha takin an ngaithla leh mai a, an mak ka ti.







An pahnih lak aṭanga ka hriat tak chu inngaihzawnnah chuan inrin tawnna a pawimawh a, chutih rual chuan rinna ringawt chu awmze nei lo mai a ni. Thil danv ngai tam tak a awm a, chung ho zingah chuan inpawh taka engkim kan sawi dun theih leh zep ṭhen neih loh te pawh hi a tel.








Intihthiam loh ṭum te pawh hian be hmasatu nih hreh loh a ṭha a, tin, chu mai bakah insawifiah a duh chuan ngaithlak sak ngei hi a ṭha bawk. Awlsam taka chinfel theih mai buaina hi kan ngaihthlak duh loh avang leh kan thinlung kan tihkhauh luih tlat avangin chinfel harsa takah a chang thei. Chuvang chuan ngaithlatu ni leh be hmasa tu nih hi tlawma la lova hreh loh tur a ni.








Hmingmuana chu a laptop hmaah a la tlṭhu reng a, mut a la tum lo anih hmel e. Kei erawhin ka phone chu charge in khumah ka inthlawh than a, Muani leh Nunsanga inkawp dan vel leh an kar vel ka ngaihtuah rauh rauh lai chuan mutchhuakin in min rawn zem riai riai a.


(Naktuk Sunday hi ka chawl dawn a, Monday ah ka rawn dah leh ang)

[Te-i Mrs Ambrose]

My Fault
By: Te-i Mrs Ambrose

Chapter 4



Zinga ka harh chuan Hmingmuana chu a lo awm tawh lo va, ka sana bun lai chu ka en a, dar nga a la pel lo deuh. Tun ang huna Hmingmuana tho chu mak ka ti deuh. Nidangah a tho tlai a ni hran lo va, mahse, a thawh hun chat chatah a tho ṭhin.








Kan pindan chu chhuahsanin choka lam ka pan a, chokaa ka luh chuan Hmingmuana lo che mek ka hmu hmasa ber. A che reng reng chu a phur hmel em em vek a, Hmingmuana ka hriat ṭhin kha ka hmu leh nimaiin ka hria. Min lo hmuh chuan min nuih var a, "Lo ṭhu rawh, kha thingpui te kha inthlit la" tiin thingpuino min pe a, chutia a che vel leh phur hmel lutuk chuan min ṭhawng em a, engmah tih nachang ka hre lo.








"Tinge phung hmu ang maia i awm a?" Hmingmuana'n a lo tih leh takah chuan ka inthing harh a, "tinge phur viau na chhan tur a awm em ni?" ka ti ta thlawt. Heti em ema zingkar aṭanga han phur mai chu. "Oh, ka hrilh theinghilh che a ni maw? Vawiin hi ka nu piancham a nia" a tih chuan ka bu nghat nghat.







"Ka nu pianchamah chuan rawng ka bawlsak ziah ṭhin" a tih leh chuan a fel ka ti takzet. "Ka pui ve thiang che em?" ka tih chuan bu nghutin "ka nu chuan i eisiam a ngaina thei lutuk alawm, kan nupaa kan siam dun phei chu a ngaina lehzual ngawt ang" tiin a che surh surh a. Chutia a hlim leh phur hmel chu hmuh nuam ka lo ti ve em em.







Chaw kan ei laite chuan ka nu pawh chu nidang zawng aiin a hlimin ka hria. A chang chuan he in hi ka in tak aia nuam tih zawk chang ka nei ṭhin. Kan inah kha chuan ka pa nen kan kar kha a hla riau khan ka hre ṭhin a, ka nu nen inhnaih taka kan awm theih laiin ka pa ve thung erawh chuan kan pahniha inkarah indaidanna bang lian tak a siam a, kan inpawh ve thei tak tak ngai lo.






He inah erawh hi chuan tupawh an inpawh tlang a, karah daidangtu eng bang mah a awm ve ngai lo. Chumi avanga kei pawhin nuam ti ka ni.








Chaw ei kham chuan Hmingmuana nen insiam turin kan pindan lam kan pan a, kei chu damdawi in lama inthlak leh tho tur ka nih avangin in uluk em em ka ngai hran lo. Hmingmuana ai pawhin ka inpeih hma reng a, Hmingmuana chuan a necktie a rawn keng a, "Duati, min suih sak dawn em ni ang" a tih chuan ka melh te te phawt. Nidangah pawh amahin a suih ṭhin reng, vawiina a mtaka suihsak a ti kher chu ka ngei lek lek.








Ka ngaihtuahna hria ni awm hrimin "ka nupui, ka mamawh hun chea min pui ṭhintu tur i nih kha" nui chung chuan a ti a, tie chu lain ka suihsak a, "vawiin khera suihsak i duh ṭalh le" ka ti hram. Ka suih sak zawh chuan kal mai ka tum a, ka chal a rawn fawh zeuh chuan ka ding khawng lah. Inthing harhin "khatia i chet tawh lo hram ka beisei" tiin khumah ka ṭhu thla a, nupa kan ni tih chu ka hria, mahse, tunah chuan a lakah ṭhian feeling bak engmah ka nei lova, heti hian awm lo se la ka duh.







"Tihpalh, ka insum hman lo a ni, i inpeih hun ka nghak ang che" ka hmaa ṭhingṭhi in ka kut a vuan a, ka lam a lo pan lai leh a ṭhingṭhit lai ka hre lo reng reng. Hmingmuana hi ka pasal, ka damchhung zawnga ka kawppui tur a ni tawh a, hetia awm reng tur kan ni lo. Kei pawhin tuna ka awm dan hi ka thlak deuh a ngai a, kan hlim tlan ve ve nan keipawh ka pawimawh. Duh ve ka tum a ngai tawhin ka hria.







Kan damdawi in kawt thleng Hmingmuana chuan min thlah a, "in haw dawnah min lo bia la, ka lo lam leh ang che" tih leh kut min vai khum zeuha tlanchhuah a rual a, keipawh damdawi in chhung lamah ka lut ve nghal.







Muani a la then ve loh avangin hming pawh la ziak lovin ka nghak a, rei nghah pawh a ngai hran lo, Muani a lo thlen chuan kan hming kan ziak a, kan thawmhnaw thlak turin staff room kan pan zui zat.







"Zanin aṭang ka night dawn a, ka ning tak tak a ni" tiin a thawmhnaw a thlak mawlh mawlh, "keipawh naktuk aṭangin ka night ve dawn tho alawm" ka tih chuan a rawn nui a, "ni dawn tak e, Zovani te ṭhian ho chiah ka lo ngaihtuah a, zanin aṭang amah Zovani ber hi a night ṭan ve dawn a, kan inmil lo si, ka ning lutuk, I awm ve chuan a zia tal ang chu" a ti a, a hmel pawh a nung ta sarh alawm.








"Tinge zanin aṭanga night tur si i rawn kal a" ka tih chuan "ka lo hrilh na che nge? U Hmai ai ka rawn kal anih hi, chuan Inrinni ka day ni turah ka ai a awh ve thung ang a, zan lam tlang nghal turin" a ti a, U Hmai a tih hi Nurse, kan senior a ni a, kan thawh tirha min be tlangnel bertu a ni a, keini pawhin kan senior ang ni lovin u angin ka en tawh.







"Naktuk aṭang doctor thar kan neih dawn kha i hria em? Neurosurgeon ania, kan department lam ami tur a la ni zui" a tih chuan "thil te hi i hre bik sia, thinchhe deuh te hi a ni nge. Tar lampang, dul ngah deuh, ler deuh a nih chuan pawi ngawt ang" ka ti a, ka rilru tak tak a ni. Doctor ler ve deuh te hi ka ngei tlat zel. An lo thawh loh nan ka ṭawngṭai nasa thei viau.







"Teuh lo mai, a la naupang lutuk, tlangval a la nia maw, a thin erawh a chhe viau, thiamna lamah lah a inzir hlim e ti lovin a hming a chher nasa viau tawh an tia, a hming kha ka theinghilh daih, sawi hmaih theih loh chu, a hmelṭha, a pa lutuk, a thinchhiatna tak hian a tilang attractive zual bawk" a tih chuan ka lo beng vak.







"I ler thei lutuk, Nunsanga hi ka khawngaih ṭhin, i ler sia, a duh ve bawk che sia" tiin ka ner nang nang. "ka rinawm tho alawm, chuan Doctor thar chu maw, a thawhna hmasaah pawh nurse te'n an star nasa thei hlawm lutuk an tia, a Doctor ber lah khan tumah a ngaihven ve ngai bawk si lo, a cool over" a ti leh zat zat. Engtin nge maw chungte chu a lo hriat hman ni?







"Doctor thar chu sawi sawi lo teh, Dr. Rema'n ward fanpui leh che a chak tawh ngawt ang" ka ti ta daih. Chutia ka sawi takah chuan Muani pawh chu a ner nang nang a, "a ler sia e, mi te hi a be leh sur sur ang a, ka dawhtheih chin piah lam a thlen vaih chuan a nupui hnenah ka hek ang" tiin staff room aṭang chuan min kaichhuak a.







Dr. Rema chu a lo vei thauh thauh tawh. "E, kha in va mawi leh tawh ve" nui huah huah chung hian Zovani te ṭhian ho chu a fiam a, kei leh Muani chu kan ner nasa. Zovani te lah chu an nui har har a, mi pa a ni tih an hre reng, chuti chung chuan Dr. Rema'n a chhaih vel chang te hian hua anga awm chu sawi loh, an lawm hmel em em zel, hei vang hian Dr. Rema pawh a pawngpawrh sauh niin ka hre ṭhin.







Nimin lama kan awl nen, vawiin lam chu damlo in lo inluh chhawk zut a, keini pawh kan buai khawp mai. Chhun thil kan ei ve theih meuh chuan sana in dar hnih a lo kawk va tawh. Canteen lam kan pan a, Dr. Sammy chuan kut a lo vai lauh lauh a, eitur kan chah a, kan lak zawh chuan Dr. Sammy lam chu kan pan nghal a, "thil i ei ve hman chiah elo?" ka ṭhut thlak pah chuan ka ti a, lu thing nghutin "in chawl ve thei chiah tih ka hria a, ka lo thlen khalh che u anih hi, vawiin lam chu ka awl ni tak" a tih chuan ka ner sak. Hepa han hman bik ṭhin zia hi aw!








Thil kan ei ho lai chuan a ngai te bawkin Muani chuan Doctor thar chungchang ngawt chu a sawi leh tawh a. A sawitu lah hi a han phur leh mai mai khawp. Dr. Sammy pawh chuan "I ei tur kha ei tawh teh, i ṭawng nasa lutuk, i ril a ṭam leh thuai palh ang" a ti thlawt. Muani pawh a ngawi ve ta hram alawm.






Tlai lam chu a zia tawh viau. Damlo lo lut thar chu awm hlawm mah se, zing lam ngaihtuah kha chuan zia tak a ni. Kan ban dawn hnaihah chuan Hmingmuana ka text a, a seen leh seen loh pawh ka ngaihven hman tawh chuang lo.







Kan haw dawn chuan Muani'n "zanin chu a nuam lo ngawt ang, i awm ve dawn si lova" a ti sap. "I pasal kha min lo biak rawh aw" a ti leh nghal zat a, a sawi hmasak zawk chhanna tur hun pawh min pe lo. Ka nuih ringawt.






Pawna ka chhuah chuan Hmingmuana chu a lo ding leh reng tawh. "Ka nu thil tur ka lam kawi lawka, ka rawn thleng hma anih hi" ka rilrua ka ngaihtuah hria ni awm tak chuan a ti a, bu zeuhin ka nuih ringawt.







Zan lamah chuan chhungkaw ṭawngṭaina te kan nei a, kan neih zawhin kan room lamah kan lut a, ka phone eng lo thim hman chiah chu ka va hmu. Ka phone chu ka la kang a, ka nu missed call hi a lo awm a, ka call let nghal. Rei pawh a ri lo, ka nu chuan a lo chhang nghal a, "Duatte, eng nge in tih a?" aw hriat nuam zet hian a ti a, ka nu aw ka hriat chuan ka ngai nghal veng veng.







"chhungkaw ṭawngṭaina hun kan hmang a" tiin ka chhang ve mai. "Zanin chu ka ngai lutuk che a" a tih chuan ka ṭah a chhuak ringawt. "Nu kei pawhin ka ngai lutuk che, ka pa lah hian min be duh ngai bawk si lo" ka tih chuan lehlam ami chu a ngawi vang vang a. "A lunglen a reh thei lo anih hi" a rawn ti sap.








Ka pa hian eng vanga min be duh miah lo nge a nih le? Ka nu thusawi pawh hi ka awi tawh lo lek lek. "Nu, eng nge i tih hrim hrim a, in hriselna te a ṭha zel em?" ka ti daih. Ka nu pawh chuan an dam ṭhat thu te chu min hrilh a, a aw aṭang chuan dik lo a awm tlatin ka hria. Rei fe chu ka nu nen kan inbia a, kan inbiak zawha call kan tihtawp chuan ka hnim ruih thei.








Hmingmuana chuan min lo en reng a, chutia chiang taka min en vang chuan nge ka lai lek lek. Sawi tur ka hre lo lutuk chuan "naktuk aṭang hian ka night ve tawh dawn a" ka ti ringawt, Hmingmuana chu a bu nghut a, "khua a va har dawn ve" a ti sup. "Lam i ngaih chuan min lo be tawp ṭhin la" a tih chuan ka bu nghat nangin ka haw lamah chuan taxi vel lam mai ka tum rilru deuh.







Mut hmunah chuan a tu a mah kan inbe lo ve ve. Ngaihtuah bik nei mang si lovin ngaihtuahna a vak ruai a, ngaihtuah chhuah tak tak erawh ka nei lo thung. Muthilh mai ka tum ṭhin, mahse ka thei der lo. Ka nun hman chhoh dan te ka ngaihtuah a, pasal ka lo neih tak dan te, ngaihtuah zel takah phei chuan lung a zing thar leh a, khuarelah ka lung a awi lo leh dawn dawn mai.






Ka harh leh chuan sana in dar thum a lo kawk va tawh. Ka muthilh lai awm reng reng ka hre lo. A la hma tho a tiin ka chhing leh a, ka muhil leh har lo.








Tu emaw in min sawi avang chuan ka harh a, ka meng diar diar, nui sang chungin Hmingmuana chuan min lo en reng. Zing thawh hlima inbih hnaih lutuk chu thil nuam a ni miah lo. "Morning" a ti sup. Ka hawi kual a, ni a lo chhuak ut tawh, "dar engzat nge?" ka tih chuan " dat sarih" a ti a, ka ṭhuchhuak nghal hlawl.








"Tinge min kaihthawh loh" ka tih chuan la nui sang chungin " i mut nawm hmel sia, ka tibuai duh lo che alawm, ka nu hnenah pawh kan thawh tlai tur thu ka hrilh vek tawh" tia min chhan chuan ka zak viau. Lo muhil leh lo ni ila thawh ka hai awm si lo va. " Min kaihthawh tur che alawm, heti te hi chuan ka chhuak ngam nang, ka nu rawngbawl sa ka ei ringawt dawn asin" ka ti halh ringawt. Sawi tur dang pawh a awm hran pa tawh lo. A thleng tur ang a thleng vek tawh.







"Tuk dangah chuan thawh i hai dawn pawhin ka kaitho zel tawh ang che, tukin chu hna i kal a ngai dawn si lova, ka kai tho hma duh lo mai che" a tih chuan dik ka ti leh viau. Zan lam duty ka neih dawn avangin vawiin chhun lam ka awl dawn tak e.







Hmingmuana nen chuan kan pindan kan chhuahsan dun a, ka pa chu ṭhutkhawmna pindan lama ṭhuin chanchinbu a bih ngur a, hawi pawh a rawn hawichhuak lo. Ka nu erawh choka lama a awm anih hmel e. Choka a kan luh chuan ka nu chu a lo che mek a, "a zia lo hle mai tukin chu thawh ka hai a, nu, ka lo pui ang che" tiin ka puih theihna awm apiangah chuan ka pui nghal vat zel. "A... tuk khat thawh tlai te chu a pawi hleinem" nui chung hian a ti mai a.







Chaw kan ei a, ei kham chuan chet a ngaihna apiangah ka che a, thleng ka sil lai chuan Hmingmuana chu ka bula a rawn kal a, min melh vang vangin "tukin chu thlah tur ka nei dawn lo a ni maw?" a rawn ti a, a lam ka hawi chuan tawi te hian min nuih a, "hna kal i ngaih kha, va insiam ta che" ka ti let daih thung.








"I sil zawhah min insiampui la" nui vur vur hian a ti a, a naupangchhia ka ti reuh tak tak a ni. Ṭawng ka tum, ka ang chiah tihin "aw.. i sil zawh ka nghak dawn che, nge ka lo pui ve zawk dawn che" a ti nghal zung zung. Ka hnial dawn tih a hre sa nge ni? "Puih ka ngai lo, va insiam rawh" ka ti leh pawhin lu a thing duh lek chauh anih chu. Ka thleng sil chhung zawng chuan ka bulah a tap char char a, tlai te a hlau ve lo emaw ni.








Thleng ka sil zawh chuan pindan lamah kan inzui lut a, "Duati, ka va inbual ang, ka thawmhnaw hak tur min lo laksak la" a tih chuan ka ner nak. "ka thleng silna bula awm lo khan inbual zawk tur che a nia" ka ti sap. A hre pha kher pawhin ka ring lo.








Hmingmuana a inbual hlan chuan a thawmhnaw hak tur chu ka ensak a, ka thlan zawh chuan khumah dahin ka phone ka charge mek chu ka phawi nghal a, tumah han biak tur em em pawh ka nei hran lo. Ka hmet kual vel mai mai.








Ka hmaa kut an rawn hmeh rik khep chuan ka phu zawk. Hmingmuana chuan min lo en reng tawh. "Thawm rawn nei hmasa ta che" ka tih chuan min chhang lovin ka ṭhutna bula a thawmhnaw ka dah chu a la a, "min insiampui rawh le" a ti nghal. "Nangmahin i insiam ziah kha, ka chawlh dawn avang maia min tirh ve phet tum suh" ka tih chuan a khi suk.







"Nidangah chuan hna i neih ve avangin ka tibuai duh lo che, vawiin erawh i awl sia" a tih chuan chhang tawh lovin ka pui ve leh nghal mai. A inpeih hnu chuan ka bianga piai zeuhin "fel reuh lutuk" tih leh pindan chhuahsan a rual a. A chhuah hnu chuan intifai turin bualin lam ka pan a, ka intifai nghal zung zung. Ka intihfai zawh chuan pindan aṭang ka chhuak a, chet ngaihna awm apiangah ka che leh nghal zung zung.







Ka nu an pindan aṭanga rawn chhuak ve chuan "Rinte, I lo va che nasa hman awm ve, in vel pawh a fai thlup mai alawm" a rawn ti a, "che nasa hman hran lo e" ka lo ti mai. "Vawiin chu pangpar pot vel kan hung ṭha dawn em ni ang?" a tih chuan ka bu nghat nghat a, kan pahnih chuan kan inzuichhuak nghal.







Ka nu chu a ti ti leh siam siam tawh a, ka nu nena an inkawm ṭhin lai te a sawi a, a hnu chuan ka hriat chak ve deuh ṭhin, mahse tumah zawh ka ngam loh leh tunge ka zawh ang tih takngial pawh ka ngaihtuah thiam loh chu a rawn sawichhuak a.








"Kan mo i ni hi chu kan lawm ngawt mai, kan Hmingmuana lah hi, Ruth-i lakah a bur chawt ṭhin a, Ruth-i lah Mizoram pawna a awm hnuin khatiang khan a chanchin duhawm lem lo zet kan hre leh bawk sia, Hmingmuana khan a duh ve ṭhin bawk nen kan tha kha a lo na ve khawp a, a tir chuan Hmingmuana pawh hian a tuar hle,








'hmeichhia pawh a ring zo tawh lovang a' tih thei tur khawlpa a lak nat avang khan kan mangmang hman khawp. Hun a lo rei a, nupui nei rual a nih thleng pawhin hmeichhia a la ngaihven lova, innei tura kan tih che u pawh khan a tir chuan a duh vak lem lo, mahse a han hmu che chu a pawm leh ang lawi a, nangmah avangin ka fapa hian hlim ni hmel thar a hmu leh a ni." a ti siam siam.







Ka nu bawk chuan "Aw, thil ṭul vak lem lote hi ka sawi leh phawng phawng zel mai a, hriat nuam lo deuh te ka lo sawi palh chuan min lo hriat loh der sak mai rawh aw" a ti leh zung zung. Engtin chiah nge Ruth-i chu ram danga a awm lai chuan a zuk awm le?








Pangpar vel kan hun zawh chuan inchhung lamah lutin thingpui te kan in a, dar sawmpahnih a lo pel ve reng tawh. Inah ka nu nen chiah awm mah ila, ka nu hi nu ti ti thiam leh ṭawng duh ve tak anih avangin a reh em em hran lo, chuan ka ngaina viau tawh bawk. Mahse, ka nu ka nel zual poh leh min hringtu ka nu kianga awm ka chakna a zual ṭhin.







"Pasal la nei lo ila chuan ka nu kiangah ka awm mai tur" tiin ka ngaihtuah ṭhin, hmuna inawmchilh leh phone kaltlanga inbiak chu a dan a dang em a, ka nu ka ngaih lutuk na tur chu phone hian min chhawk viau mah se, ka ngaihna leh thlakhlelhna a reh tak tak thei lo.







Tlai lamah rawng kan bawl laiin ka phone a ri a, ka en chuan Hmingmuana a lo ni. "Duati, vawiin chu kan buai deuh a, ka rawn haw hma thei dawn lo" a rawn ti a, "ka thlah hman dawn si lo che a, taxi ka rawn tir mai dawn em ni?" a tih chuan a ngaih loh thuin ka lo chhang mai. "ka nu te in lama kal kawi lawkte ka duh a" tiin ka hrilh a, "kan pahniha kan hman hunah kal i duh zawk lo em ni?" a tih chuan







"A ṭha viau na chu...tunṭum hi chu keimaha kal ka duh deuh a" inthlahrung deuh takin ka ti a, lehlam ami chuan "a ṭha alawm" a rawn ti ve mai. An buai em avang chuan rei pawh inbe lovin call kan titawp a, ka nu hnenah chuan "Nu, Hmingmuana chu a buai deuh a, zanriah ei hmanin a lo haw thei dawn lo anih chu" tiin ka hrilh a, ka nu chuan "a va zia lo ve, thlah hman che sela ṭha tur ania" a ti vawng vawng.







Ka pa lo haw chu ka nu chuan a buaipui nghal zung zung. An pahnih chuan an pindan lamah an inzui lut a, ka nu hnenah in lama ka kal kawi tur thu hrilh tumin ka phone ka phawrh a, mahse kan bai siam a liam dawn avang chuan call lovin phone chu ka ak leh vat, bai chu ka chawk sawk sawk a, bai rim chuan ril a ti ṭam raih raih mai.







Chaw ei kham chuan thleng vel ka tifel zung zung. Ka nu te hnenah pawh damdawiin lama zan lam ka duty dawn thu chu ka hrilh nawn leh a, ka insiam zawh chuan ka chhuak nghal. Taxi ka hmuh hmasak ber chu ka phar a, kan in lama tlan tur chuan ka hrilh nghal. Ka nu call ka tum khan ka call ta lo kha ania, ka surprise mai ang tiin ka call duh ta lo law law.







Kan in kawta taxi a din chuan chhukin chuan man ka pe a, ka seilenna in ngei hmaa ka ding leh ta chu mitthlaah thil hlui a lang zut zut. Ka in tia ka lo chhal ve ṭhin lam pan chu ka pen a, kawngka pawh kik hmasa lo chuan ka hawng nghal. Ka nu leh pa chu ṭhutkawmnaa an awm ka rin tehreng nen a lo reh duak mai.







Ka nu te ṭhawn ngei tum chuan an pindan lam chu ka pan leh a, ka pa aw zawk chuan min thawng chiang khawp mai! "Lalrinzuali hming hi sawi reng suh" a ti khur khur anih chu. Kawngka hawn tuma a vawnna ka chelh tawh chu ka lathla leh riai riai. "Khang kum chhung zawnga ka chawm kha a tawk viau" a ti leh fak. "I fanu ve tho anih hi, a u te nen hian en hrang lutuk suh, a naupang ber zawk ania, I duat te pawh a phut ve a, a lakah hian hel tlat lovin be ve tawh rawh" aw nem taka ti tu chu tudang ni lovin ka nu a ni.







"Ka fa ang pawhin ka en ngai lo, en ka tum ngai lo bawk" ka pa aw ka hriat leh chuan ka biang a lum thla nghal pap. In aṭang chuan zawi muangin ka pen chhuak a. Ka pa thusawi mal tinte khan min tina takzet. Kei hi a fanu angin min lo ngai ve ngai lo anih chu.







Damdawi in ka thlen pawh chuan ka zawi vek. Hmun fianriala mahni chauha awma, ṭah hawm hawm ka duh, mahse duhdan ang ngawtin a awm theih si loh. Muani'n min hmuh chuan a nui var var. "Ka thlen khalh che" tiin ka lam a rawn pan a, ka hlim lo hmel chu thup hram ka tum nangin ani zawng min hrechiang em em tu a ni a, tuna a mitmeng aṭang hian a hrethiam vek tih ka hria.







"Eng nge a chhan?" a rawn ti ta reng. "Tunah lo" ka ti ringawt. "Min la hrilh ngei a ngai dawn ania" tiin chiang zetin min en a, engmah a lakah hian ka zep ngai mang lo, tuna mi hi hrilh chi a ni em ka chiang mai lova, mahse Muani hian a hriat hma chu hriat ngei tumin min zawt char char ang tih erawh ka chiang thung.






Ka pa thilsawi ka benga ri nawn reng tihreh tumin tih tur a awm na lam apiangah ka tlan kual a ni ber, buai em em ila, ka zia deuhin ka ring. Chet a ngaih tawhnaah chuan rang takin ka inperh nghal zat zel. Kan awl deuh laiin Muani chuan "Teh maw, Doctor thar kha a rawn thawk tawh a, a chhe lo lutuk" a ti sar sar.






"I lo hmu hman tawh bik elo?" ka lo ti ve a, ka nguai chhan min zawh ka hlauh avanga zawhna hi zawt ka ni. "Nizan khan a rawn zawm alawm, a pa rapthlak, a hming chu maw..." a tih lai mekin "Nurse, he lamah mamawh in ni" an rawn tih avangin chu lam chu ka hawi a, Doctor coat var ha nen kan mit a intawng chat.



Ani hi maw kan doctor thar tur chu.

(Comment kha aw)