The Misfit Chp-18 by Barbara.k

[Zualtei hmar]

The Misfit
Chapter-18
~Barbara.K



Dawr pawh chu kan hawng leh tan tawh a, Andrewa pawh school anla kal tanlo bawk a,nimin leh vawiin lam chu dawr lamah a rawn leng a, awm tinuamlo zawng leh mit tikham zawng erawh in a awm ngai hauhlo thung. Nunpuia chanchin ka hre leh ta miahlo a, Irenei nen kan inbe leh ta miahlo bawk nen a dam tawh tur ah ka ngai ringawt a.

Dawr atanga kan haw chuan choka ah Sarahi chu alo awm a, min hmu chu minlo nuih nghal ver ver a, keipawh chuan ka nui let ve mai bawk. U Tei te nupa nen pawh kan inbe chhe em em rih lo a, mahse keichu U Tei lakah chuan ka inral ring reng tawh tih theih tur a ni. Kan inthlak zawh chuan Bawihteii chu a unau te bulah vawiin lama a toys thar neih nen chuan a kal leh nghal a, kei erawh inhnuai lam a ka chhuk peih rihlo avang in khum ah chuan thu in U Lawmi chu ka call a, tunlai chu kan inbe khat deuh bawk nen kan inbia chu a ni pawn sawitur alo ngah ve khawp mai.
“Sarahi in awmpui leh dawn chuan fimkhur ang che aw kut kem a nei deuhin ka hria kan awmpui hmasak zawk pawh khan ka tlereuh leh ka thil eng eng emaw te kha a bo nual a” tiin U Lawmi chuan Sarahi kan awmpui tur thu ka sawi rual rual chuan a rawn ti ve nghal a, inchhung khur nuam tihloh sa nen ka hnual ruih thei.


Chaw ei dawn tè ah inhnuai ah chuan ka chhukthla ve a,Sarahi chuan sitting room ah naupang ho chu alo awmpui a, min hmu chu a nui leh sang tawh. Chaw ei lai te chuan ka chhungte chuan an be siam siam reng a, ka puitlin lohna a rawn lang leh nge ni keichu chaw ei chhung zawng chu ka ngawi reng a, chaw eikham ah pawh chuan inhnuai lamah kan nufa in kan leng thla daih a.
“Unaunu thar I nei elaw” tiin U Sepha lah chuan minlo fiam a, chhan pawh ka chhang buai peihlo.


U Becky chuan ka awmdan chu a hrethiam aniang thil dang min sawipui nghal daih a, a sawi hmang ah Ruatdika te unau pawh Inrinni ah an rawn haw dawn a ni awm e, min rawn biak zuai bak kha chu Ruatdika chu a reh leh vang vang tawh a. Eitur chu min rawn hawn em ang chu maw.
“Vawiin ah Nunpuia damdawiin ah ka hmu tak asin” kan titi kar lakah chuan U Sepha chuan a rawn ti a. Pa Tluanga a tha lo leh tawh anih ka ring.
“Pa Tluanga an kalpui aniang” ka ti ve mai a,
“Amah pawh kha ka hmu cher riau mai, alo in zuah buk reuh bawk si a a lang tar vek thei alawm” a tih leh chuan a sawi uar ve deuh tih hre tho mah ila Nunpuia chu ka ngaihtuah ve ang reng.
“Damdawiin ah chuan eng nge itih reng reng a” ka ti chu U Sepha chuan an nu chu a melh deuh hrek a, ka ti fuh dawn riau in ka hria, “Mawh” min chhanloh lawk loh avang chuan kan ti leh rih a.
“A bialnu hlui te naute ava en mawle” U Becky zawk chuan a rawn ti a, U Sepha hmel nen zawng zawng chuan ka nuih an ti za khawp mai.
“Bialnu hlui ti ve ziah suh” pakhat lah chuan a rawn ti ve leh a.
“Ani miau sia lawm le” U Becky chuan a ti ve leh a, an inhau tak tak dawnlo tih ka hriat vang nge an awmdan chu keichuan ka nuih liam pui mai a.
“Bialnu hlui te naute lo va en reng reng I pa len ai hian I mawl tlat zel” ka lo ti ve chu U Becky chu a nui ring ber ber ah a tang ve leh tawh a.
“Keimah chauh a en pawh ka nilo kan thianho in en an rawt a ka kal ve mai mai anih kha mawle” U Sepha lah chuan a ti ve hlak hlak a.


In a kan chhoh chuan an lo reh leh thiap tawh a, kawngka te ka kalh leh te te hnu ah kan nufa chuan inchung lamah chuan kan inzui chho ve leh a, Nunpuia chuan ka rilru a kam ve deuh tlat avangin Bawihteii bula a pa a biak duh leh duh loh ka zawt chu alo phur khawp mai a, ala mut ka rinloh avangin ka call a, tum dang anglo takin call chu a la nghal mai lo a, a in ring ral thak mai. Ka call nawn leh pawh chuan chutiang tho chu a ni.
“I pa chu a mu tawh aniang zingah be mai rawh aw” ka ti chu Bawihteii hmel chu a lungawi vaklo tih a hriat theih.

Khum ah kan mu fel awrh tih ah chuan ka phone chu a rawn ri a, Bawihteii pawh chuan min lo en ve vat a, mahse Andrewa zawk alo ni. Call ka la chu sawitur em em kan hre leh bawk silo a, keipawh chuan zep lo chuan call chu Nunpuia zawk anih ka lo beisei ve vang nge ni Andrewa chu ka be tuilo khawp mai. Sawitur kan hre vak bawklo nen rei pawh kan in be lo a, kan in call zo deuh chiah tih ah chuan Nunpuia call chu ka dawng ta tlat mai. Kan nufa chuan kan mu tawh chu kan ṭhu leh te te a, keichuan ka biak duhloh avangin Bawihteii zawk chu call chu ka chhan tir a.
“Apa I mu tawh mi?” Bawihteii chuan sawitur a ka tih ang chiah chuan a ti nghal a.
“Mu lo e, nangmah zawk kha I va mengrei ve” Nunpuia chuan dam thlup hian a rawn ti a.
“I damlo ami?” Bawihteii chuan a beng bula ka hrilh ang chuan a ti leh nghal a.
“Ka hritlang deuh mai mai mawle tunah chuan ka dam tawh” khuh kharh kharh pah hian Nunpui chuan a rawn ti ve a.
“Meizial te kha zu tlem deuh ta che” ka in rin hman hma chuan ka ti chhuak hlawl mai.
Nunpuia nui ri chu ka hriat chuan chhungril ah engti emaw tak hian ka lo hlim ve veng veng mai.
“Ka lo zu tlem deuh dawn nia” a rawn ti dam leh thlup a,keichu ka ṭawng ve tawhloh avangin Bawihteii zawk chu eng eng emaw zawtin an pafa chuan an inbe deuh reng a, keichuan ngawi reng in ka lo ngaithla ve thung.
“Bawihte I nu kha ka lo be leh lawk ang chu” a tih chuan Bawihteii chuan ka bulah phone chu a rawn dah hnai vat a.
“Kar leh ah hian Francisa nen khu lam a an bungrua ho la turin kan zin dawn a” a rawn ti nghal a.
“I dam tawh ami?” keichuan ka lo ti daih thung
“Dam tawh e hritlang satliah mai mai ka tih kha”
“Anih chuan a ṭha alawm zin harh ve rawh” keipawh chuan ṭha tak chuan ka ti ve leh a.
“Tinge phone I va la theilo ve” engmah a sawi tak loh avangin chhuahchhal aw ka deuh hian ka ti ṭha leh a, a nui ri chu ka hre thei.
“Induh khum che ka tum ve deuh mawle” a rawn tih chuan hmu theilo mahse tum lian tak ka ni.
“Keichu min induh khum la ka lawm daih zawk mahse Bawihteii”ka sawizo hmanlo
“A theihloh anih hi” a rawn tih ve leh avang chuan ka ngawi leh ta daih a.
“Mu tawh rawh u zingah thawh hma in ngaih kha” a rawn tih leh chuan kan nufa chuan kan mangṭha a, Bawihteii pawh a pa a bia chu a lawm viau nge ni mut hnu pawh chuan eng eng emaw sawiin a titi deuh reng a, rin aiin a meng rei phian.


A tuk lamah chuan ka nu te pawh rawn lem lo in chhun lamah Bawihteii nen chuan Pa Tluanga tlawh tur in an veng lam kan pan a, zing ah Irenei ka be lawk tawh a, Pa Tluanga te in zawk a kal ka duh avangin chuta min lo nghak tur chuan ka ti a, a unaupa erawh hrilh hre lo tur in ka chah thung a.
Nunpuia te veng kan thleng chu ka kal khat leh ta deuh bawk nen engkim chu la pangngai vek mah se ka thlir kual nasa khawp mai. Bawihteii pawh chu tukverh ah dak chhuak in kawngpui te chu a thlir nasa khawp mai.


Pa Tluanga te in kan thlen chuan inleng ve tho nutling pahnih hi anlo awm a, an hmel chu ka hriat ngailoh avangin veng dang ami an nih ka ring. Irenei chu alo awm ngei a, min hmu chu Mapuii pawh a lawm khawp mai. Bawihteii chu Nu Rami chuan a lo ngai tawh khawp a, an pi tu chuan an in pawm leh nghal chawt tawh. Francisa pawh chuan min lo lawm thiam khawp mai, Pa Tluanga chu room ah a awm avangin room ah chuan kan nufa in min hruai phei a, min hmu chu khum aṭanga rawn thawh chhuah ve phet a tum a, kan inkhap leh rih ṭhin. A hmel erawh ka rin ai daih in ka hmu tlangval a, Nu Rami sawi dan ah nimin piah vel aṭang khan a lo ṭha leh sawt viau tawh a ni awm e.
“Ka nu te pawh rawn chhukthlak ve an tum a inleng an la nei laklawh a” Irenei’n a tih chuan ka hmuh hreh ang reng.

Irenei sawi hnu rei vaklo ah Nunpuia nu leh pa te pawh chu an rawn lang a, Bawihteii’n a pi leh pu a hmu chu alo pan nghal chawt a, mahse ka rin aiin boruak chu a zang phian mai. Nunpuia nu chuan kan nufa chu min be siam siam reng a, ka pa pawh chuan kan dawr lam chanchin te min zawt ve a, tumah chuan Nunpuia chungchang chu an sawi lang rih lo.

Kan nufa chuan kan awm ve reng a, inleng dang an awm em em rih lo bawk nen ka kal khat leh tawh dawn si a keipawh chuan rei deuh awm pawh chu ka hreh vak lemlo. Mapuii leh Irenei ho in choka ah chuan eitur kan siam a, chutia kan han inhmu khawm leh ta chu sawitur a awm ve reng a,
“Inleng in va nei hmelṭha ve” choka a rawn dah pah a Nunpuia’n a rawn ti chu phu chiang tak ka ni.
“Hmelṭha deuh mai asin anih ala single zui I duh mai em?” nui chung chuan Mapuii chuan a lo ti ve vat a, Irenei pawh chu alo nui ṭhaw mai.
“Buy1 get1 free ang chi kha a ni em?” Lalnunpuia lah chuan a rawn ti ve leh zel a, hmeichhe pahnih te chu an nui ṭhaw reng mai.
“An haw dawnah a number dil tur nih kha ka duh zawng tak a ni” a rawn tih leh phei chuan melhrum tak ka ni. Engmah sawi zui tawh lem lo in Pa Tluanga room lam a pan zui ta daih a, a kal chiah chu Irenei te pahnih chuan min fiam zuk zuk reng a, keipawh chu Nunpuia a awm ta lo bawk nen ka nui ve mai a.

Thingpui kan in lai pawh chuan Nunpuia chu room lamah ala awm reng a, Bawihteii lah chuan a pa bula kal leh vat vat a chak nge ni thil chu a ei tlem khawp mai, a ei zawh chuan a pa awmna room lamah bawk chuan a kal leh a khap vak chi a ni bawk silo.
“Engtik ah maw palai chu kan rawn tirh ang” Francisa lah chuan nui ruh ruh chung hian a ti a, ka pa te an awm ve bawk nen ka lai leh vek tawh.
“I nu te chuan Puia chu an la ngei viau lo maw?” Ka nu pawh chuan nui chung hian a rawn ti ve a.
“Ngei hran lo e” zawi sep hian keichuan ka lo ti a.
“Khatiang ngei loh chi pawh a ni hleihnem” Irenei lah chuan a unaupa thlavang hauh lo lutuk chuan a rawn ti ve leh a.
“Mai mai a che tunah te chuan I U pawh a insiam ṭhat ve nasat tawh em hi” ka nu chuan a lo ti ve leh a.
“Nia tun ṭum kan rawn haw chu Puia hi a mizia a dang tawp a lengchhuak te hi ka hmu khat kan in leh in in a kartawn tih mai loh chu hmun dang ah a chhuah awm pawh ka hrelo” Mapuii pawh chuan a lo ti ve a.
“Ehe haw tawh mai chi” Francisa lah chuan alo ti leh hmanhmawh a, ka nu te hmuhloh lamah chuan melhrum tak ka ni.

Kan ei na kan sengfel chuan thlengsil ka chuh tlat a,
“U Puia kha rawn ei ve law law se thlengsil hma hian” tiin Irenei chuan sitting room lama a nu te chu ava ko a.
“Ka chaw eina a la rei lo ati tlat a bakah tunlai chu a damkawr bawk nen a thil ei a tuilo emai a ei peih pawh ka ringlo” ka nu chuan a lo ti ve vat a.
Thleng ka sil lai chuan Mapuii leh Irenei chuan Pa Tluanga in tur thei tui a awm tawhloh avangin dawr lamah min kalsan a, ka nu te pawh chu room ah an lut leh nge ni sitting room lam thawm pawh chu a reh duk mai.

“Tunlai chu I va cher ve” tih ri ah chuan ka hawi phei vat a, choka luh dawnah Nunpuia chu alo ding reng mai.
“Min ti phu lawm” kei lah chuan vin zet hian ka lo ti a.
“I cher lutuk a kha I lu pawh a lang lawk vek alawm” pakhat lah chuan a la rawn ti cheu a.
“I cher fe zawk I inzuah buk bawk si a” keipawh chuan ka ti ve ta nge nge.
“I lu te kha met ta che” ka ti leh ṭalh a.
“Hetia buk deuh a ka awm hian ka luck lo zawk a ka duh zawk” nui chung a a rawn tih leh chuan ka chhang tawhlo.
“Thlawi lawma a rawn la leng ngai em?” a tih chuan ka chhang hreh riau leh nghal a.
“Leng ve ṭhin e” keichuan en lem lo in ka ti ve ta nge nge.
“Tunge mahni bialnu te rim lo bik ang a” tih leh paha a lam ka va hawi chu ṭawng tuma a ang zuau chu ka va hmu hman a, a mit ah tak ka en bawk nen a hmel chu en rei thei lo in ka thlengsil lai chu ka sil zui nghal daih a, engmah sawilo mah se ala ding reng tih chu ka hre thei.
“E Puia Aruati kha thlengsil zo se I Patea’n a hmu duh cheu aw” ka nu in sitting room lam aṭanga a rawn tih ri chu ka hre thei a, ka thlengsil chu rem fel sawk sawk in ka apron hren ka phelh lai te chuan ngawi reng in Nunpuia’n min lo en reng bawk nen ka che buai deuh tlat leh nghal a.

A din na lam ka pan chu ngawi reng in a in her vut a room lam chu min pansan nghal daih bawk. Bawihteii chu a pi bula lo awm tur a tiin room lam ah chuan ka phei ve nghal a, room ka lut chu Pa Tluanga leh Nu Rami te chu an lo awm a, khum bul a sofa ah chuan Nunpuia chu a lo ṭhu a, mi lah chu a melh chiang mai si a. A bul ah chuan ka ṭhu thla a, kan in kar ah chuan mi pakhat leng vel tur ṭhutna chu ka dah awl bawk.
“In nupa ka koh chhan che u hi chu rin dan in nei thiam tho ang tiraw” Pa Tluanga’n a tih chuan kan chhang lo ve ve.
“Keichu mihring thlir chin aṭang pawn ka dam rei a rinawm tawhlo a” a tih leh chuan ka hnîm ruih thei.
“Ka kal hma ngei hian in hruai leh ngei ngei rawh u, diktak chuan Bawiha te nupa ai pawn in nupa bulah hian ka khawsa tam zawk a, chuvang te pawh chu a ni ang in nupa hian ka ngai em em che u a, Aruati phei chu ka fanu ang tak tak a ka en I ni a, I rawn lang har lutuk te hi ka lawm vak tawh reng reng hleihnem mahse le I tan pawn rawn lan chu a harsa dawn tih ka hria a, chuvang chuan hetia awm hrang reng lo hian in hruai leh vat rawh u, kar ah fa hial in nei tawh a, zingkawng hrang zawh thei in ni tawhlo. Pathian hma ah kumkhua atan tiin thu in tiam tawh a, heti mai mai a inṭhen thei in ni tawhlo. Insiam ṭha tawn ve ve ula, Puia pawn a nunhlui sual te kalsan tawh sela, Aruati pawn Pathian hming in ngaidam tawh la a ṭha ka ti” tiin a ṭawng hnem deuh vang nge a ṭawng tawp lam ah chuan a khuh bawrh bawrh a, Nu Rami chuan tui alo in tir vat a.

“I Patea sawi kha keipawh ka sawitum tak a ni, mihring hian hma hun engmah kan hrelo a, chuvang chuan tunah hian thil danglam lutuk a thlen hma hian in hruai leh vat rawh u Bawihteii pawh a fahrah rei tawk tawh in ti ve lo em ni” Nu Rami pawh chuan a ti ve leh a, Nunpuia nen chuan kan ngawi reng thung.


Room aṭanga kan chhuah chuan Irenei te dawr kal pawh an lo haw tawh a, kan hmel ah chuan a langchhuak nge ni mak tih hmel deuh hian min en hlawm a.
“Kan haw tawh dawn ami niang?” Bawihteii bula ka tih chuan midang ho chuan la haw lo turin min lo ti ve sap sap a. Keichuan dawr chu chhuanlam ah ka hmang ve tlat a,
“Puia han thlah rawh” ka pa in a rawn tih chuan a aw chu thu pe aw tak a a rawn tih vang nge ka hnial hreh hle a,
“Taxi kan la mai dawn alawm” zawi te hian ka lo ti ve a.
“In ah car ka lo han la chhuak ang a in lo chho dawn nia” tih leh chhuah chu Nunpuia chuan a rual nghal a, hnial hman pawh a ni tawhlo.
“Inthlah tir rawh hei chen in rawn kal a thlah ngei ngei in ngai” ka nu pawh chuan a lo ti vat a.

Haw dawn chuan Pa Tluanga chu kan va mangṭha leh te te a,
“Ka thusawi kha in nupa pawn in lo sawizui dawn nia aw” thei leh theilo a a rawn tih leh ṭalh chuan ka kawchhung chu a tawt up up thei.


Irenei leh Mapuii ho chuan Nunpuia te in lamah chuan kan inzui chho a, kawt ah chuan Nunpuia chu alo ding reng tawh a.
“Anih kan kal phawt ang nidang ah kan rawn leng leh ang” car a ka luh hma chuan tiin ka mangṭha zui nghal a, an ni pawn leng leh vat tur te chuan min ti ve a.

Kan han tlanchhuak ta chu boruak chu a rit khawp mai, Bawihteii chuan a pa chu a be leh siam siam tawh a, kei erawh ka ngawi reng thung.
“Engtik aṭang nge?” Nunpuia’n a rawn tih chuan ka chhang hreh khawp mai.
“Ala reilo” ka tih ri chu zawi tak a ni.
Dawr kan thlen thleng chuan kan inbe zui tawh lo a, Bawihteii nen chuan ṭha tak chuan an in mangṭha a, a kal liam dawn thlengin kei chu min melh leh tawhlo.


Zawmna
Dawr kan thlen chuan awm nawmloh sa tawh tehreng nen Andrewa lo kal thu min lo hrilh leh ta nghal a,
“Zanah ka leng mai ang atia a chhuak leh nghal” Biaki’n a tih phei chuan thaw a ipik leh zual.

Hma deuh ah dawr aṭang chuan kan haw a, haw kawng ah Bawihteii bulah chuan vawiin a kan kal na chu tumah hrilh lo turin ka ti nghal bawk a, hrethiam ve awm tak chuan a lu a bu ve nghauh nghauh mai. In kan thlen chuan Sarahi chuan choka ah eirawng alo la bawl mek a, min hmu chu thingpui ka duh leh duhloh min lo zawt nghal vat bawk a. A rawn awm tirh aṭang mit ti kham zawng in vawikhat mah ala awm lo a, a bengvar em em a, a mawng a zang bawk si, U Lawmi khan sawi lawk kher lo se chu ka ngaina ve viau in ka ring.

Chaw eikham ah chuan a khat tawkin sana chu ka bih leh ṭhin a, Andrewa chuan phone ah engmah a rawn sawi chhunzawm bawk silo a, a rawn kal leh dawnlo anih te chu ka ring rum rum a. U Johna te nupa lah chu zan in berkher ah sitting room ah tv an en ve kher bawk nen ka awm chu nuamlo ru tak a ni. Doorbell rawn ri ral ral chu U Tei chuan alo chhawn vat a, Andrewa rawn luh chuan tumah lah chuan ṭawng nachang an hrelo a, keichu ṭawng chhuak in ṭhutna tur ka lo kawh hmuh vat a, Marcusa a rawn tel ve ka rin laiin amah chauh in a ni leh nghal a, ka chhungte an ṭhu ve kur bawk nen biak vak dan pawh ka thiamlo.

“Andrewa chu I va fel ve” U Johna chuan a rawn ti ta hlauh a, ka nulat laiin kan inkawm ve nasa bawk a anlo la hre ve reng a nih dawn hi.
Andrewa pawh chuan U Johna chu pangngai takin a chhang a, mipa tih takah an inbe tlangnel nghal thuai a. U Johna te nupa an ṭhu ve reng bawk nen Andrewa chu ka be tamlo khawp mai. Dar8 velah thingpui ka lum sak a, thingpui in zawh hnu rei vaklo ah haw a rawt nghal mai a, nuam a ti vak biklo anih ka ring.

Bawihteii nen chuan gate bul thleng kan va thlah a, tun ṭum chu bike in a rawn kal anih hmel.
“Vawiin ah dawr ah ka lo kal a” bike a a chuan fel hnu chuan a rawn ti ta reng a,
“Nia Biaki te khan an sawi a, Pa Tluanga kan va kan ve lawk a” keichuan ka ti ve mai bawk.
“Nunpuia hian a hre tawh em” a tih chuan kan pahnih inkar a sawi tih ka hre thei.
“Vawiin khan ka hrilh” zawi te hian keipawh chuan ka ti ve a.
“Engtin nge a tih” pakhat lah chuan a ti leh zel a,
“Engmah a sawilo a ngawi reng” ka tih chuan a bu nghauh nghauh a, kan in mangṭha leh te te hnu ah a tlanchhuak ve ta chauh a.

Inchhung luh hnu chuan U Johna chuan zawhna min zawh ka hlauh avangin inchung lamah kan chho nghal vat a, kan muhil zui mai bawk nen Andrewa missed call pawh chu zing ah ka hmu ve chauh a, ka call back lem lo. Diktak chuan nimin a Nunpuia ka hmuh leh aṭang phei kha chuan Andrewa nen a kan zinkawng zawh dun ah hian ka tui ve hlawl lo tih theih tur a ni.

Chhun ah chuan Ruatdika message ka dawng hlawl a, an lo haw tawh ani awm e, eitur pawh chu zan a U Becky te in a lam tur in min ti a keipawh chuan lawmthu te hrilh in zan lama ka len thlak tur thu in ka chhang ve a. Tlai lamah chuan kan nufa vitamin ei lai chu a zawh tawh dawn avangin kan dawr thlang a damdawi dawr ah chuan lei tur in ka chhukthla a, tumloh lutukin Mercy nen kan inhmu hlawl mai. Kan inhmuh lohna a rei ve tawh deuh bawk nen ka hmuh hnuhnun ber ai khan alo cher leh zual a, a sam buang chu a lo ti dum hlap bawk nen ka hmu dang takzet. Min hmu chu amah zawk chuan min lo be vat a, a nu damdawi tur alo lei ve a ni awm e.
“Tunlai chu in lamah kan in enkawl a” tiin a nu chungchang te chu min hrilh a, a ṭawngkam chhuak engkim te chu hman ang a ngeiawm kha a ni tawhlo a, a ṭawng dam thlup na chungin a chauh hmel em em thung.
“Nunpuia nen in chanchin ka lo hria a keimah vang anihloh hram ka beisei” inthiamlo hmel tak chuan a ti leh a, amah vang anihloh thu leh inthiamloh a ngaih loh thu te ka hrilh ve vat a.
“Nunpuia nen hi chuan sawichhuah tham si loh buaina kan ngah ve em a inṭhen hi kan tan a ṭha zawk” ka ti chu alo pawm loh hmel khawp mai.
“In inkar a ka rawn in rawlh chhung zawng pawh khan I tuar hram hram zel kha ania keipawh khan I tuarchhel ka tiin I tum ruh na te kha leh lam kawng tak chuan ka ngaisang zawk ṭhin che khatiang ang buaina lian tham pawh I sual chhuah theih lai a buaina ho te sual chhuak theilo a in inṭhen mai hi ka hrethiam theilo che u, ṭha takin sawidun ula inṭhen kher hi a ngailo ang mawle tunah pawh hian ala tlai miahlo ania ṭha deuh in sawi dun ula in hruai leh vat rawh u” a ti ve ta duah a, pasal te bialnu hlui ka aṭanga chutiang thu hriat chu a nuam duh teh chiamlo.

Zan ah chuan kan nufa in U Becky te in ah chuan kan leng thla a, Ruatdika leh Didiki chu an lo awm ran tawh. Ruatdika chuan parcel hi min pe a ka hawng chu a chhung ah burma eitur chi hrang hrang hi alo awm a, ka lawm khawp mai. U Sepha lah chuan naupangchhia min tih thu alo sawi ve sek a, chu erawh ka hnial peih lo.
“Nizan ah inleng I nei animaw” nui chung a atih chuan U Tei ka rilru ah alo lut hmasa ber a.
“A sawi kha ka ring reng a” keichuan ka lo ti pawr hlur mai
“A sawidik animaw” U Sepha’n a tih leh chuan ka ngawi reng a.
“Mambawih ala hma deuh lo maw” a tih leh chuan nui tho mah se a thutak tih ka hre thei a.
“In ngaih ang em em kha anilo” ka tih leh chuan Ruatdika te unau an awm bawk nen titi dang chu an vawrh ta daih a.

Kan haw dawn thleng chuan Ruatdika chu lawmthu ka hrilh a, min rawn hawn hnem ang reng si a, ka inthlahrung ang reng.
“Nakinah ka treat ve ang che” ka tih chuan alo kiai suk duh chauh.


Sunday chuan ka nu in hming ziak ve tur a min tih tlat avangin phur lo zetin U Becky chu ka zui a, Bawihteii pawh naupang lamah hming ziak thei tawh mah se ka la duh rihlo a, a kawmrual hmelhriat em em kan nei bawk silo a, ka bulah ka la kal tir ta zel a. U Becky te ho pawl chu an nutling hlawm khawp mai a, hming kan ziah lai chuan an in hrilh ru leh sur sur zel a, an inhrilh ru ring ang reng si a ka hming an lam rik pawh chu hrechiang tak ka ni.

Inkhawm banah chuan Irenei hnen aṭang call ka dawng ve teh mial a, Bawihteii’n naupang lamah hming a ziak em tih te chu min rawn zawt a ka ziahtir loh thu ka sawi chuan
“Nia ziahtir duh rih suh helam a in rawn phei hun ah ziak law law rawh se” nui chung a a rawn tih chuan ka lo tim leh dai tawh.
“U Puia chu hei hming pawh a ziak peihlo a chaw eikham aṭang ala mu char char” a rawn tih chuan a dam leh dam loh te ka zawt ve a.
“Ala dam thei meuh lo khawhar nen hian a in pawlh nawk mai bawk si a tun ṭum a damlo chu rin aiin a daih rei zek mai” nui awr awr chung hian a rawn ti leh a.
“In entir se la khati ringawt chu ngaih a ti ṭha zan tawhlo alawm” ka tih mek laiin lem lam ah chuan “Tunge a” tih ri hi ka hre pha a, Nunpuia niin ka hria
“U Aruati” Irenei pawh chuan a lo ti ve vat a,
“Hei in entir rawh se ati che nia aw” Irenei lah chuan a ti leh zel a,
“Damlo chung pawh hian a bialpa kha ka cho ati ti rawh” Nunpuia’n a tih ri chu ka hre thei a, Irenei bulah kher a sawi chu pawi ka ti ang reng.
“Maw bialpa a” Irenei chuan a rawn ti ta chat reng a.
“A ti ve mai mai anih kha I u khan” keichuan ka lo ti ve vat.
“In ṭawng hi ka hrethiam teh nuai lo kha in be teh u” Irenei’n a tih zawh chuan thawm a reh deuh a, “Lulian” Lalnunpuia aw ngei mai in a rawn tih leh chuan ka ṭhu ngil nghal at mai.
“Lulian a” kei lah chuan lungawi lo fe hian ka ti a.
“I bialpa lu nge nangma lu lian zawk” a rawn tih leh phei chuan thinrim kal tluang duh tak a ni.
“Nanghi I â deuh tak tak tawh anih hi” ka aw chu zawi mah se a vin ve hle in ka hria.
“I khawsa zia hian min ti â zo vek tawh anih hi” a rawn tih leh chuan sawitur pawh ka hrelo.
“Bawihteii a awm hnai em” a rawn tih leh tak ah chuan inhnuai a a len thu chu ṭha tak chuan ka hrilh ve a.
“Ka chhungte hi ka la hrilh lo a nangpawn lo hrilh suh aw” a tih chuan Andrewa nen kan inkar a sawi na anih ka ring.
“Ka hrilh ngam ami I rin” keipawh chuan ka ti ve vat a,
“I mawl sia lang deuh te khan ilo ngaizawng ang tih ka hlau” nui chung a a rawn tih leh chuan a awmdan chu mak ka ti, a nupui hlui leh a ngaihzawng thar chungchang a sawi mek tih hria ang pawn a lang lo.


Ni a liam ve zel a, Bawihteii pawn school a kal leh ṭan tawh a, nu ho chuan chutia nitin nau hruai ve ta chu min biak tlangnel an tum hlawm hle a, mahse an zawhna chu nin lam ah a kal tlat avangin Biaki emaw Pekkimi hi nau hruai turin ka tir mai zel a. Andrewa pawh school an kal ṭan leh tawh avangin inbiak na hun kan nei tlem hle a mahse chu chu ka duh dan zawk a ni, zan lamah lah school lam hna tih tur neuh neuh a neih avangin a rawn leng hman vak ngailo a, rawn leng reng a ni lo bawk nen ka chhungte pawn ṭawngkam an nei rih lem lo. Nunpuia chanchin chu Irenei ka aṭang ka hre mai zel a, a damlo satliah emaw an tih kha a dengue hi alo ni a, chuvang chuan an zin hun tur pawh an sawn hla leh a, a dam ṭhat deuh tawh avangin tun kar ah chuan kal an in beisei ve tawh a ni awm e. Pa Tluanga pawh rin ai takin a tlangval sawt khawp mai.

Nilai thawhṭan chuan vanduaithlak takin ka pa nau Ni Sawmi pasal a thi hlauh mai a, thingtlang a awm an ni bawk si a, chhungkua kan vai kal thei bawk silo a ka pa leh ka nu te leh ka unaupa te pahnih chu kan motor in an kal a, kei erawh dawr lam ngaihtuah a ngai bawk nen Bawihteii hmun dang a dah chi a ni bawk silo a ka kal ve ta lo a, kan nufa leh U Tei te nufa leh Sarahi ho chuan in kan lo nghak thung a.

Ni Sawmi pasal chu kan tet te aṭanga zu rui reng ṭhin anih avang hian kei tak phei chuan ka nel em em lo a, mahse chutia a han thi ta chu Ni Sawmi te nufa ka khawngaih hle a, pa tello a fa te enkawl hi chu thil awlsam a ni dawnlo tih tun a ka tawn chin ringawt aṭang pawh hian ka hmuh thiam pui vang te pawh a ni ang. Chawhnu lam a thi a nih avangin a tuk Zirtawpni lamah an vui dawn chauh leh nghal a, ka nu te chu an tlaivar ve ngei ang a an chau hle in ka ring.


Zirtawpni pawh chuan ka nu te nen phone aṭang chanchin kan in hrilh ve zel a, ka pa in thlan nghah ni tal awm leh a tih avangin Inrinnni chawhnu lama rawn haw an tum thu te min hrilh a. Andrewa lah chu weekend ah a rawn lang ziah mai si a, chutia ka chhungte awmloh laia a rawn lan chuan U Tei hian nilo pui a thu a thehdarh chu ka hlau ru hle a, mahse rawn len a tum thu a sawi erawh chuan ka hnial lem lo.

Chaw eikham hnu rei vaklo ah Andrewa chu a rawn lang ta ngei a, U Tei te nufa erawh an room ah an tawm tlat thung a. Andrewa chuan Bawihteii chu eitur eng eng emawni hi a rawn kensak a, kan titi ve dawn ṭan chiah tih in doorbell a rawn rik avang chuan ka han chhawn leh rih a, rin loh lutuk in Ruatdika alo ni. A ni pawh chuan ka in leng a hmuh rual chuan nuam a ti vaklo nge za lo zet hian min rawn nuih ringawt a, keichuan ṭhu ve turin ka lo ti vat thung.

Andrewa leh Ruatdika te chu ka han inhmelhriat tir leh vel a, mipa na na na chu reilo te ah an titi pawh a inrual khai leh viau tawh, darkar chanve dawn Ruatdika ṭhut hnu chuan thingpui lum turin ka tho chhuak a, chutih lai taka door bell rawn ri leh avang chuan kawngkhar chu pan hnaiin ka chhawn zui nghal bawk a, kawngkhar rawn in hawn rual a Lalnunpuia hmel rawn lang chu phu nasa tak ka ni.

Lalnunpuia chu amah chauh pawh in a rawn kal lo a Vla nen an lo kal hi alo ni a, ṭhuthleng a an ṭhutthlak rual chuan Bawihteii lah chuan alo ban nghal vat a, an pafa chuan an inbe nghal siam siam a midang erawh kan ngawi ṭhap thung. Andrewa’n min rawn melh pawh chuan rei ka melh ve theilo, ka tih ngaihna hrelo chu thingpui lum tur chuan choka lam chu ka pan ta tawp a.

Vla zawk chuan ka ṭhianpa te pahnih chu a be hmasa a, Nunpuia erawh Bawihteii ah ngawt a bur a. Ruatdika pawh chuan a tih ṭhin dan ang bawkin fiamthu te a thawh ve leh tawh a, Andrewa erawh a hming hmer a an bia te anih ngawtloh chuan a ṭawng ve lo tih theih tur a ni. Thingpui ka chawi phei lai chuan ṭhutna tur ka hre mai lo a, ka ṭhutna ah Lalnunpui te ṭhiandun an ṭhu hmak mai bawk si a, ka tih ngaihna hrelo chuan Ruatdika bulah chuan ka ṭhu thla ve ngawt pek a. Andrewa leh Nunpuia hmel chu en pawh ka en rei duh lo.