🤍SHANE
Chapter-11
By Ziki nu
"I dam tawh tih ka hria ania, Elina-i nen inbuaina hi tawk tawh teh se, naktukah ka rawn kal ang"
Message chu chhang lovin ka melh ngawt ngawt a, thinrim luatah ka khur ru lek lek mai!
Elina-i vanga office kallo turah min ngai a, a dik chiah! Kut min thlakna hnuhma vang khan mi zingah ka chhuak ngamlo reng a ni.
Mahse hetianga awlsam lutuka kan buaina te tihtawp mai a rawn tum erawh a thuneihna piahlam a ni tlat.
"Ngaihdam min dil hunah le" tih zawng chu ka thawn let a, message chu dar 10 thleng pawhin min chhang tawhlo.
Vawiin lamah an rawn lang dual a, thil thleng awm miahlo ang maia Elina-in min be thei kha mak ka ti hial zawk, mihring fake lutuk mai.
Ka muhil dawn tan siar siar tihah ka phone ri chuan min tiharh leh zawk a, kan pathlawia lek chu niin..
Sana ka en chuan dar 11 a lo pel tawh a, ka chhan rualin "Message kha en rawh" a lo ti nghal sup a, "Engnge?" tia ka zawh let chuan thaw chhuak hawk ri ka hre zui a, "Naktuk ami tur document leh thil pawimawh dang ka lo thawn a, I lo in enlawk duh takin" a tih chuan ka thinrim leh ringawt tawh.
"Kartluana ka kalloh vang khan ka hna tur i lo khek char char a ni maw?" ka ti hlak a, ka aw atang ringawt pawhin ka lawmloh zia chu a hre thei ang.
"I tel lo chuan ka ti thei hleinem, I mut tawh chuan en kher a ngai chuanglo, naktukah kan inhnu dawn nia" a lo ti leh sup a, hna a tam vang nge a awri te chu a dam dup a, kei ka thinrim hle thung.
"Lo kal har suh, tlai lamah chhuah ka ngai ania" ka tih chuan min chhang tawh lovin call chu a ti tawp a, ka mutchhuak zawng zawng a rawn tireh vek chu ka haw hle ringawt bawk a, a hmel hmuh chu ka chak lo takzet.
Zingah chuan ka nau in min rawn sawi dat dat a, dar 8 a pelh tawh thu min hrilh chuan ka inperh tho rang khawp mai.
A phone chu ka hmai zawnah rawn lek kang vain Marthai thlalak chu min entir a, inhnuai lam a kawk zui bawk nen hamhaih deuhin "An lo kal tawh em ni?" tiin ka zawt a, a bu nghut nia!!
Awihawm loh zawk hian.. Tunah dar 8 chiah a la ni si a, chaw ei hun chauh a la nih laiin chumite pafa pawh chu an va rawn kal hma em em bawk ve mawle.
Inphih fai zawk sawkin ka thuamhnaw te chu ka thlak leh rih a, zingkar chauh e ti lovin ka hmai te chu ka hnawih uluk hle ringawt a, a chhan pawh ka hre hrep lo.
Kailawna ka pen thlak tharh tharh lai chuan sitting room ah ka pa leh Shane te lo titi mawlh mawlh chu ka hmu zui a, ngawi renga choka lam pan tlang ka tum tehlul nen ka pa chuan min lo ko leh hman pek a, "Hei Shane te hian chaw an rawn ei nghal dawn ania, i nu khan chaw ei a peih chuan siam zung zung rawh u" a lo ti a, tum bara ka va melh zawk chu min lo en ve run a, choka lam atang ka nu in min lo ko zui bawk nen ka chhang tawh lemlo.
Tukthuan kan ei laite chuan ka nu leh pate chu an titi teng a, Shane chu ka hriat tirh atanga a la tawng tam ber tum niin ka hria, puitling titi na chu ka man pha vaklo bawk nen ka khamsan thuai a, Bawihtei nen Marthai pawh chaw ei kham atangin pindan lamah an in awm chawt mai.
Thleng ka sil zawh meuh chuan dar 9 a lo pel thui leh tawh a, "In hna chu thawk rawh u, Marthai pawh a u a awm a, a fel khawp kha" tih pahin ka pa chu a thutna atang a tho vut a, "I pindanah han thawk dun mai rawh u, inhnuai lamah chuan naupangin an tibuai ang cheu" a tih zawm leh bawk nen tha tho lo zetin ka pindan lam ka pan a, ka hnungah a office bag khaiin min zui ve zel bawk..
Pindan kawngkhar ka hawn rualin ka khum hnawk hnuai chu ka hmu hmasa ber a, sofa inhung lam ka hawi lah chuan ka thuamhnaw bal ho ka dahkhawm a lo in tiang vûm thur mai bawk a, ka pheikhawk te lah chu aw...
Engkim mai chu a awm loh na tur hmunah vek an awm ni mai hian ka hria,,, zak ru ang reng deuh chungin ka pen lut zal zal a, thuamhnaw te chu han dahfel zung zung awm tak ni mah se ka zak lehzual mai mai dawnin ka hria a, chuvang chuan zak miahlo angin awm law law ila a that zawk ka ring.
Kan Shane pathlawia chu hawi kual thuakin a then sak a, chu ringawt pawh chu ka lo haw hlur mai bawk nen "Pindan hi a hnawk deuh a, I duh na lai ah khan lo thu ve tawp rawh" ka ti khawl a, zahloh chu ka tum lui ve ngar ngar tak na in min ngai zawmthaw lutuk ang tihte chu ka han hlau leh hnuhnawh a, ka awmdan chu a lai kual vel vek ni maiin ka hria.
Ka laptop awm na dawhkan chu tifel thuak thuakin "Hetah hian ti mai ang" ka ti zawi sap a, a dinna ngaia a la din reng vang chuan nuam ka ti chiah tawhlo.
Khum chu thlep fel sawk sawkin "Thu rawh" ka han ti leh ringawt a, a la tawngchhuak ve miahlo te chuan ka awm a tinuamlo ru hle bawk..
Ka pindan chhung chuan min tih hrehawm em avangin ka che sawk sawk a ni ber mai, thuamhnaw bal awm ang ang chu bual in ah ka vawm lut rawih a, pheikhawk ho chu khum hnuaiah ka rawlh lut nawk nawk bawk a, kan luh tirh ai ngawt chuan hawi vel pawh a nuam ta deuhin ka hria.
"Tlangval awm tha duhlo pindan a va ang ve" rei fe a ngaiwh hnuah a rawn tichhuak phawng mai, ka melh vak ringawt chu tawi te hian min lo nuih a, "Room i nei nuam hle mai" te chu han ti leh vel bawk mahse ka melh rum nasa lutuk tho.
"In lo kal hma em anih kha" ka ti hmuk chu "Lo kal har suh i tih kha" a lo tih leh vang chuan ka melh phawk deuh a, "Tkai lamah chhuah i duh sia, kan lo kal hma loh chuan kan zo hman lo ang" ti lehin a bag atang chuan file leh lehkha pawimawh dang a rawn phawrhchhuak nual a, dawhkan te chu katifel ve tak naa, khumah ngawt chuan kan awm a ni ber.
Enfel tur a tam bawk nen kan inbe hman meuh tawhlo a tih theih ang, khumah bawkkhup in hahdam angreng deuhin ka thil tih lai chu ka ti thei a, a ni erawh a awmdan chu a nawm loh hmel khawp a, a ke a hlang hreh ve deuh nia ka hriat avang chuan "Rawn thu kai ve daih rawh" ka ti a, min rawn melh zawkin "A ngai lo" tih zawngin min chhang a, a awmdan ing euh lutuk chu a nuam dawnlo tih ka hre ve reng bawk nen "I pheikhawk kha phelh la rawn thu pangngai ve mai rawh, a hrehawm tih ka hre reng ania" ka han ti leh a, a tang zo tawh biklo aniang chu a pheikhawk chu phelhin a rawn thu kai ve ta nge nge a,
"Elina-i chu i ngaidam tawh em?"
A thil rawn sawi teh daih vang chuan ka va en vat a, min lo en ve reng, "Ngaihdam min dil hleinem" a mitah tak en chunga ka tih chuan a thaw chhuak hawk a, "In buaina ka hrelo na in, I beng tih kha chu a dik tiraw?" a ti leh sup a, ka bu nghat ringawt.
Tun ang hunah khatiang thil a rawn sawichhuak leh chu duhlo viau mah ila ka sawi lang duh hranlo a, min tawngkhum dan kha a dik bik lo tih ka hriatchian avangin kutthlak hmasa Tu zawk ka ni pawh chu zep ka tumlo bawk.
"Engatinge i ben?" a tih chuan a ngai ang chiahin "Ka pawi a sawi" ka lo ti leh mai a, a ning ta deuh aniang laptop chu khup thawkin hnai zetah min rawn en a, "I eng pawi nge a sawi?" a tih laia a thaw lum hakte chu chiang takig ka hria, ka mitah min en ran a, chhan mai ngaihna ka hrelo chu mak ka inti zawk.
Chutianga kan inen reng lai chuan pindan kawngkhar ri ah kan inhlat dawrh a, Marthai chuan kawngka bula dingin min lo en reng tawh.
"Engnge ni Bawihte?" ti supin ka bul ami chuan a panhnai thuai a, engnge a sawi ka hre pha ve lo, "Report kha lo thawn rawh aw, chuan kan chawl rih dawn nia" min rawn en paha a tih chuan ka lo bu nghat a, a fanu nena an inkai chhuak lai chu ka en zui vung vung bawk.
Chawhnu dar 2 velah kan zo thei hram a, kan thawh dan a hahdam bawka lungawi lohna em em pawh ka nei hranlo, ka nu chuan chaw eia han chelh leh a tum viau na in a hnial ve tlat a, zing lama an lo ei ringawt chhan pawh kha ka la hre ve lo, engtik laiin nge maw an lo in sawm hman ni.
Tlai lamah F-i te inah ka leng phei a, kan zin haw atangin kan la inhmu leh miahlo bawk nen sawi tur a lo ngah khawp mai.
Kima chanchin kan sawi hmasa ber a, Thlanawmi nena an inneih nia a hlim lohzia te chu kimchang takin min han hrilh nawn leh a, "An thlalak lai pawhin a nui lo hrim hrim, Thlanawmi khan a hrelo nge a hrelo der zawk pawh ka hrelo, monu a nuih sang laiin mopa zawk kha duhloh rai ang mai hian a tum hmuk reng a, an hmuhnawn letling zawk" a ti hlak hlak a, a thinrim nge a nuihzat tih pawh ka hre thiam lo.
"An chengdun anga an inhmangaih chawp zel mai ang" tih zawngin ka lo chhang thung a, kan zinna chanchin min zawh chuan ka sawi chaklo khawp mai.
"Thleng a tam lutuk alawm, A bialnu Elina-i nen kan insual ringawt leh nghal" ka han ti zauh chu hriat zawm chak lutuk hian min thut hnaih sawt sawt a, thil thleng te hrilh chuan min lo ngeipui lehpek khawp mai.
Tlai tluanin kan titi a, sawi tur kan indaih meuhlo zawk a ni. Nu Mawitei'n chaw ei nghal turin min ti mahse ka hnial ve tlat a, in ka thlen leh chuan khua a thim lek lek tawh.
Pathianni ah pawh chuan inkhawm peihlo in ka mu bo leh daih a, ka pa pawhin min tilui bik lem lo. Karthar atangin hna ngai ah kal leh a ngai anga, ka phurlo lutuk chu tah vak mai ka duh hial a ni.
***
"Naktuk ah min lo hmuak ve rawh aw Zopui"
John-a message chu ka chhiar nui var var mai, "Lutuk tlat" tih thawn letin Bawihtei bulah chuan a u John-a lo haw tur thu ka hrilh ve a, Mesaka hnen atangin a lo hre daih tawh a ni awm e.
Zan tirah ka muhil nghal a, zingah thawh ka hai zui bawk nen ka che buai leh viau tawh. Zan lama ka mut hma viau hian ka thawh hma phah ve chuang lo reng reng, a chang chuan mu tam vaklo ila mut ka kham zawk mahin ka hre thin.
"Vawiin chu ka lo haw tlai maithei ania aw, John-a hmuah ve ka tum a" tukthuan ei laia ka tih chuan ka pa pawhin a lo remti ve mai a, "Thenawm tlangval chu hmuh lohna a rei tawh bawka rawn haw ve teh se, an ni unau saw pahnih chauhe ti lovin an fel riau a, lehkha an thiam bawk si, pasal tlak mawle" a ti zui suah suah a, John-a te unau chu an tette atangin an hrechiang bawk a, han sawiselna tur em em a hre bikin ka ringlo hrim hrim.
Office ka thlen rualin kan receptionist Kimpuii chuan min lo hui vat a, "Vawiin chu Sir a thinrim teh ania aw" a lo ti ringawt chu hrethiam lo deuhin a chhan ka lo zawt let thuai a, "Lungei lama girls hostel tur sak meka contractor khan a lo eiru nasa lutuk an tia, chumi vel chu niin ka hria" a lo ti leh a, ka chhan let hmaa thawn ri bur kan hriat na lam chu hawi vutin Kimpuii chu ka melh leh zawk a, a mitmeng atang ringawt pawhin a hlauthawng hle tih chu hai rual a ni lo.
"Amahin nge midang nen an awm?" tia ka zawhna chu "Tumah an awm ve lo" tiin min chhang a, a aw te chu a khur lek lekin ka hria.
"Hlauthawng suh, ka va lut ange" ka tih chuan fimkhur turin min rawn au zui hram a, office chhung ka luh rual chuan bungraw darh nuai leh lehkhapuan boruaka leng darh chum chum chu ka thil hmuh hmasak ber a ni.
A chhunga ka luh rualin bang kil lama a lo thu sawp nuai chu ka hmu chawpchilh nghal a, "Engthil nge thleng a?" ti hluta ka pan hnai chu min melh hauhlo.
"Tinge tiang hian i awm a? Engthil nge... " ka sawi zo hman lo, "Sum tam tak kan chân tih i hria em?" a lo ti nghut a, a awri chu a chang tha fak fak khawp mai.
"Kan sawi tha dawn nia, lo tho phawt teh" tih paha thawhpui mai ka tum chu min lo pawt thu zui lawp a, a âwm bawh rawk rawka ka awm takah chuan hnai te ah kan in en leh ran tawh.
Chutianga kan han inhnaih takah chuan zu rim ka hre zui a, hepa pui roh hian zu a in ve thin tih ka hre lo reng reng.
"I rui anih kha" ka ti sap chu a lo kiai ve suk a, a nuih erawh a zat loh hmel viau mai.
"Kha contractor tenawm lutuk vang khan sum tam tham tak kan hloh tih i hria em?" a ti nawn leh a, ka lo bu nghat ringawt chu ner sakin "I hrelo" a ti leh ang lawi a, hepa hi a rui tak tak a nih hi.
"Engpawh ni se tho phawt teh, nang ber hetianga i awm chuan keini tan chet ngaihna a awm dawnlo ania" tiin thei leh theilo hian ka pawt tho tawk tawk a, kan han chet deuh takah phei chuan a zu rim chu a na tawh khawp mai.
Couch ah thu tirin ka kawng chu ka dawm zui vang vang a, patling tha zet zawt tih takah a rit takzet.
Office chhung hnawk lutuk chu ka tifel zung zung a, kan thawhpui Siama rawn lutin thil thlen dan a rawn sawi zung zung bawk.
Lunglei lama kan project kallai girls hostel kan sak mek chu sum hman tur zat kan dah sa in a daih lo a, a daih lohna lah chu a la tam tham hle bawk si nen contractor zawh fiah turin an ti a, kan contractor ber lah chu hriat loh laiin ram pawn ah a lo kal daih tawh hi a lo ni a, a pawisa hum chhuah lah chu nuai 50 chuang lai a ni bawk nen Shane awmdan chu ka hriatthiam pui leh hnuhnawh a, chu tih rualin puitling taka a awm zawk lo erawh demna ka la nei tho mai.
Siama chuan office chhung chu min tihfel pui zung zung a, company lama kan pute an lo thleng zui mai bawk nen chawpchilh deuhin meeting kan nei zui bawk a, kan tum aiin vawiin ni chu kan buai dawnin ka hre tlat, tlai lama John hmuah hmanloh mawlh chu ka hlau a ni.
Meeting lai chuan kan pathlawia chu a chet nawi viau ka lo hlau ri khawp mai a, kan kal dawna Kimpuii ka zawh khan hetianga han buai zauh hi a hma pawhin a lo nei thin a ni awm a, a thinrim lutuk insum zolo hian company boruak a tichhia ang tih ka lo hlau ru ve hle ringawt.
"Police station ah report kan thehlut tawh a, a chhungte leh thiante biak pawh kan tum mek bawk a, hlauthawng lutuk lo phawt ang u" titu chu ka lo hmuh fo tawh Pu Sanglura a ni.
An ngaihdante an sawikhawm liam liam lai chuan
"Naktuk ah Lunglei ah kan kal ang" lo ti tu chu kan en zui thap a, Shane a ni!
A sawi leh tur ngaichanga kan en thap lai chuan "A hmun atang lo chuan thil a tih tak tak theihloh, ka assistant bakah midang lo kal tur pahnih inruat ula, naktuk zingkarah kan chhuak ang" a ti nghal bur a, min sawitel ve ringawt chu ka lo îp ru nasa angreng khawp mai, zin chhuah lam hi chu ka thlawp lutuk vaklo asin mawle... Thuneihna lah chu ka nei ve mang bawk silo.
Chawhnu dar 2 rik dawnah coffee in in kan thu chawl ve hman chauh a, ka boss ber a buai chuan ka tan lo awm mai mai theih a ni biklo a, a kalna hmun apiangah ka zui kual duan duan ti ila a dik ber ang, han thawh theih em em nei ve lo mah ila a thu ngaichang renga awm ka ngai miau si a.
Kimpuii nen reception ah thu in kan titi malh malh a, kan contractor tlanbo ta chanchin ka zawh chuan a lo hre thui vak biklo, ka thawh ve hma atang daih tawha project a nih avangin Aizawl pawn lam phei chu ka la hre thui lo khawp a, chutianga complete tep tawh a han tlanbopui ringawt chu ka hrethiamlo ang reng viau mai.
Ka fel bik e chu ka ti hauh lo a, mahse ka thawhchhuah phu bak hlawh lak hi ka tum ngailo, hna chu rinawm takin thawk ila, kan thawh phu tawk hlawh chu chunglam khian min pe mai tur ah ka ngai, duham viau hi tul ka ti hranlo.
Lungleia zin chu ka peihloh thu ka sawi uar khawp a, ka thiannu pawh chuan min khawngaih deuh aniang "I la damkawr tho sia, kal ve loh dil mai rawh" a lo ti ve a, mahse kan pathlawia hi a thinrim hmel si a, ka dil ngam ngût pawhin ka ringlo.
Dar 4 velah John hnen atangin call ka dawng a, airport an lo thleng tawh a nih ka ring.
Ka chhan rual chuan "Ka van hmu lo che ve" a rawn ti lang lang a, office a ka la awm thu ka sawi chuan min lo hrethiam khawp a, "Zanah ka rawn leng phei dawn nia, lo chhuak daih lo la" tiin a nui pah hawk a, hmanni a kan inhmuh zawk vang kha nge mawni, a ngaihawm ve riau mai.
"Tunge i biak?" titu chu melh zawkin "Ka thianpa" ka ti a, sawi thui viau chu ka tumlo khawp mai.
"Kan zin tur thu chu i chhungte i lo hrilh lawk dawn nia, zungkarah kan chhuak ang" a tih leh chuan "Ka kal ve kher a ngai em ni?" tiin ka lo zawt a, min rawn melh chian em avang chuan ka sawi fu vaklo in ka hria.
"Ka kal hreh chuanglo a" ka ti nawi leh niai a, fiah zeta "I kal ve ang" a lo tih takah phei chuan han hnial luih chi ah ka ngai tawh lo hrim hrim. Mahse ka phurlo tak zet a ni.
Kan haw dawn ah lehkha en fel tur a rawn thlen leh teuh avangin kan han enfel leh rih a, naktuk lama zin kan tum vang a ni pakhat.
"Duhtawk ang,a bak chu midangin lo ti tawh rawh se" a tih takah chuan rang lutuk in ka file en lai chu ka khup zui a, sana ka en chuan dar 7 a lo kawk va va tawh mai.
Ka pum a rawn ri zui rawk rawk a, a motor a kan thut luh rual chuan "Marthai engtinnge?" tiin ka zawt a, "Ka hrelo" a tih chuan min chhang bul khawp mai a, ka sawipui zel duh ta lo.
Kan inkawt a ka chhuk hnuah chuan tlan leh nghal mai a tum a, ka nu'n chawhmeh suak haw tura a lo tih ve tlat avangin a rawn chhuk ve leh rih a.
Inchhung kan luh ruala John hmel ka hmu chu ka phul hlut a ni ber, "I lo thlenna a rei tawh em?" ti chulin a bulah chuan a thu thla ve thuai a, "Ka Zopuii chu i lo puitling ve tawh tak tak anih hi a, office pawh i bang har thei tawh hle mai" uang zet hian a lo ti ve bawk a, chutia kan rik chel chul laia patling khuh kharh ri ah chuan ka hawi vat a, kan pathlawia min endan chu ka hrethiam hauhlo.
A kutah chuan ka nu chawhmeh suah sak ni awm tak chu bel te hian a kebg ran a, min en dan mawlh mai chu a ni.
Min melh rum lutuk tlat.
Cont..
Zanin chu a mood ah kan cheng thei meuhlo a ni, a boring in tih pawhin ka pawm thlap mai..
Karleh maiah hian 2CAT ka nei leh tawh dawn a, inbuatsaih ka ngai ve tawh bawk nen kan test chhung(karleh chhung) chu story hi ka update thei dawnlo a, tunkar ah erawh zan hnih tal dah kan la tum thung dawn nia aw..
Test zawh lamah chuan regular zawkin dah kan tum leh dawn nia, min lo hrethiam hram hram rawh u
🤍