THINGTLANG MISTIRI LEH KEI (BUNG-10 NA)

[Kennelly Bawitlung]

THINGTLANG MISTIRI LEH KEI


BUNG-10 NA
ZIAKTU: KENNELLY BAWITLUNG

____________________________________


Ka hlauh luatah ṭah pawh ka ṭap ṭha thei tawh lo, 'Ka thi ngei dawn a nih hi,' tia beidawng taka vanlam hawi chunga thawk ka lak halh lai chuan thawm ka hria a. Rul rawm tleng pheina lam ka en chiah chuan Ramdina ngei maiin chu Rul dum chu a lu bul velah a rawn chhawk bung hmawk a.





Ka lamah lo pen phei nghal pawk pawkin a rawn ṭhu hniam a, "I ṭha em? Na i nei em?" Dam dap hian a rawn ti a, min ngaihtuahna awka ka han hriat phei chuan lung a chhe zual ting mai.





"Khawiah nge i lo kal bo hman thawt thawt a ka thih ṭep kha!" Tiin a rem lai laiah chuan ka beng a.
Ka mittui hruk hul pah chuan, "I thih ka phal hleinem, bang tawh rawh le ka awm tawh hi...," a ti thawp sup a. Insut faih faihin ka ke rek chu ka kawk a, "A na lutuk ka ding theilo a ruh a tliak aniang," a ti deuh ṭiau a, mittui erawh a tla tawh lo.






Ka ke chu dimte in a zu khawih chhin vel a, "I bilh a nih dawn hi," tiin ka pheikhawk bun lai chu a phelh a, ka mawza pawh phelhin a ipte puia tui bottle chu ala chhuak nghal a. "Ka nu khan freezer a adah min pai tir a, a tui deuh tawh nain ala vawt ṭha viau mai," ti thum dut pah hian ka ke rek ah chuan a leih a, a na veng veng mai.





Ka ṭhen deuh chak chak a, ka hmaah chuan rawn insawnin "Ka pua ang che," tiin a hnunga lawn tur chuan min hrilh zui a. Ka pheikhawk chu a ak nghal a, thui vak lo min kalpui hnuchuan nutling ṭawng ri lang lang leh nui bawk bawk ri te chu ka hre thei tawh a, nichin khan engti kalin nge an kal bik le mitkhap kar lekah an bo diak kha a nia...nutlung dul kiar leh bawp tawi deuh deuh si chu an ṭuan a rang ka ti kher mai!





"Awi aw...engtizia nge Leen-i chu!?" Nu Mawii chuan min hmuh rualin a lo ti hliai a, midangho pawh chuan ka chesual a mi tiin zawhna minlo zawt nghal mawlh mawlh a, a tu a mah chu chhan tinah pawh ka tin lo. Ka ngei ṭhem ṭhum vek mai, ka au ri te kha hetiang ram hnuai reha han hriatloh chhan tur pakhat mah a awmlo.





"A ke hi a bilh deuhva ka hawng pui vat loh chuan...em hi chu nu Mawii tlawmngaiin min lo hawn sak mai ta che," Ramdina chuan a ti zung zung a. "Ni e ni e, han hawng pui vat mai rawh em hi chu ka rawn dah kawi mai dawn nia. A zialo ngei mai kan hnungah khan i rawn chhuk ve nghal emaw tiin kan lo kal thla mawp mawp mai a, hei i alawm hetiang nikhuaa a ṭuan muang chi nih chu i chesual tih pawh kan lo hriat miah loh kha," nu Mawii bawk chuan a ti deuh duah a.




A hmel chu en pawh ka en peih lo Ramdina chuan kan kal mai tur thu hrilh nawn lehin kawngpui lam min pan pui nghal a.





"Hetiang ramhnuai reha ka au thawm kha bengngawngte an nih ngawtloh chuan hriatloh chhan tur pakhat mah a awmlo! In ṭhenawmnu hi a ṭawngthei si a mitmengte saw ka ngei!" In sum karna ei lek lo hian ka ti bawrh bawrh a, "Ni e tiraw...," Ramdina chuan a lo ti ve sup a.





"A pawi eng nge ka sawi ka hre hauh silo a ṭawngkam te hi min tihchhan tih ka hre ve vek sia, ka awm lai reng reng pawhin khati khan a ṭawng duh a nia nu pakhat chu ava ni chiang tak! Ka thin a ti rim ṭun mai!" Keimah leh keimah chu ka insawi thinrim hi ani ringawt!





"Dik chiah tinge ka nupui hi alo tih thinrim ni..!" Ramdina chuan a rawn ti ve hluk a. A darah beng thakin, "Lo fiamthu ve hman ziah suh! In inṭhenawmna a rei tawh em? A ṭawngthei viau ang a...khawtlang CCTV an tih ang kha a ni hial lo maw? Engtin nge ṭha tak taktea ila biak theih zawk?!" Tiin zawhna ka zawt nghal zut zut a, anih vaih chuan ka be ṭha reng thei dawnlo tawp mai.





"A biak che chuan ṭha takin chhang la, chuti anih loh chuan ṭul hle lovah chuan biak biak pawh a ngailo. A bulah chuan sawi tur chin tawk thiam a ngaia inveng renga awm tur," a ti charh charh a. A sawi dan aṭang chuan ka rin dan chu a lo dik ngei a nih hmel...a biak hian ka be hmasa dawn therte lo! Inṭhenawm mah ni ila nu Mawii pehhel chu ka thupui ber!





Khawchhung damdawiin thleng rakin Ramdina chuan chawl miah lovin min paw chho a, kal kawnga a hah hlauva chawlh ka rawt pawhin mi hnial tlat a. A in fit viau aniang chau chhe hmel leh hah hmel pawh a pu chuanglo.





Nurse chuan min lo buaipui vat a, chutah Doctor ko tura Nurse kal hlan chuan Ramdina chu tui in turin a kal sawn lawk a, ka kheimit bawr vel chu a vung ul tawh.





"I ke i bilh maw?" mipa aw ka hriat rual chuan ka hawi chhuak vat a, a ni pawhin min hmu thut chu a hamhaih ve deuh aniang meng deuh kawk chung hian min en reng a. "Nang?" kan ti rual ṭhawt a, kan han nui leh rih.





"Hetah te eng nge i tih ve a?" Tiin ka zawt hmasa a, "Hei hi min post-na alawm, nang engtizia nge? Hetah te i awm ve a phaiah ila awm char char emaw ka tia..?" Tiin ka ke chu min en sak a.





"Nia...awm tawhlo chu anih ber hi...," thu khuh deuh taka tiin ka nui hul hak a. Ka ke a han hmeh chuan ka ip deuh zawk a, mahse a na chu a zia awm deuh suai suai thung. "Hnathawh thawmhnaw nen..Eng tiin maw hetah i awm? Inhlawh tur chu a ni em lovang chu tiraw?" Fiamthu ti tih deuh taka a tihchuan,





"Pasal ka nei alawm, thla hmasa lawk khan," ka sawi zawh rual chuan a thiltih lai ṭhulh meuh hian min rawn en a, mit zim suna min en takah chuan a awih vaklo tih ka hre thei. "Dawt ka sawilo, pasal nei lo ila engvangin nge hetah ka awm ang?" Ka ti let khauhva, ka thutak hmel a ti ta deuh aniang a hmel pawh a inthlak danglam nghal thuai mai.





"Tunge i pasal chu?" Tih chu a zawhna hmasa ber a ni, ka chhan hma chiahin Ramdina kan lam pana lo phei chu ka va hmu a. "Saw saw," tiin ka mitmeiin hnunglam hawi turin Andrew-a chu ka ti a, Ramdina lo phei chu a en vang vang a.





"I lo hawng tawh ani maw engtik khan nge i lo thlen a?" nui var chunghian Ramdina chuan Andrew-a darah chuan a rawn beng ta thak thak a, "Nimin piah lawk khan, hei nupui te min lo neih san daih a ka awm loh lai tak ala ni zui a...i ti ho ngei mai," Andrew-a pawh chuan nel tak hian alo ti let ve a. Aw haw...an lo in hria a maw!? Keichuan a ṭawng apiang chu ka lo melh tawn zak zak ringawt a, ka ke na pawh ka hrechang tawh reng renglo.





Andrew-a leh Ramdina te chu an lo inhre ṭha khawp a, tun kum kumtir khan Andrew-a chu hemi khuaah hian an post a ni awm a. Kan inneih lai khan Aizawl ah a lo zuk hawng daih a, tunah a rawn hawng ve deuh chiah alo ni.





Andrew-a nen hian phaiah College kan kal dun ṭhin a, ka mipa kawm nasat leh kawmngaih ber tih hialin a sawi theih awm e. Keiin Designing hmun hrana la zir tak avangin kan inhmu zui leh ta miah lo va. Number-te ka thlak avangin amah biak pawh lehna tur ka nei tawh hek lo. Mahse hei, tunah chuan a nih chak em em Doctor lai alo ni ve thei ta chu ka lawmpui ngawt mai.





"Remchangah ka la rawn leng lut thuai dawn nia. Leen, lo indim la ka lo len pahin i ke hi kan check zeuh zeuh dawn nia," ka ke a tuam zawh chuan Andrew-a'n a ti a. Kan hawng thei chu a ni der mai.




In kan thlen chuan ka nuin thil awmzia min lo zawt thuai a, damdawiina kan kal tawh thu leh na lutuk a nih tawh loh thu ka sawi chuan a ngaih a ṭhat ve hmel deuh ta alawm. Inhnuaiah Ramdinan min pawm thla a, khuma mut nghal tawp chu duh lovin intihfai hmasak ka duh si.




Bualinah min pawm lut lehin min ṭhut tir a, a chhuak nghal mai dawn emaw tih laiin ka bulah chuan a ṭhu rem ang sauh sauhva. "Chhuak ta che....tinge ila ṭhut?!" Ka tih he haw chuan, "Nangmahin i inbual thei nang...," a lo ti liam puat a. Ka kawr hlim mai a tum chu rang lutukin a kut ka lo man bet chawt.





"Ti awm ang lo lulai em mai rilru PM lo pu hman ziah suh chhuak vat mai teh..!" Ka ti bak hlar a, ka melhno fahran lo khawp mai. "A chawhnu ruih tawh hi rilru AM put reng theih pawh a ni lo..," a lo ti ve leh zat a. Hnial khan lah hi a hre ropui si hmeichhia ni phei sela chuan kan insual zing viau in ka ring.





"Ka ti thei mai ang lo va chhuak phawt teh thla i ti muanglo," ka tihchuan a nuisuk a. Mitmeng chalak deuh hian min han melh zui kher bawk a, "Ni e, mipa chu hlauh tur...kan rilru a bawlhhlawh a nia. Mahse hlauh loh tur mi pawh hriat tho tur," a tihchuan amah a insawi chhan tih ka man thiam nghal mai a. Hmel chu ka pe chhe ve ngang mai.





"Chhuak vat te (h)!" Tiin a awmah ka nem a, a ṭhu nghet em em mai lehnghal! "Min mamawh chuan kawngkhar bulah sawn ka lo ding ang 'Pa a...' rawn ti la vaivawih aia rangin ka rawn phit lut nghal a ni mai," tiin min siai zeuhva, a thawh pah chuan ka nak nem lai a piai pah zeuhva. Za ka tih avangin ka che hrut nghe nghe...a ka chang nilo a kut pawh a hlei tel ṭan tawh a, ka melh rum na lamah ka mitte hi ka kalh zo dawnin ka hria...





Kawngkhar kalh turin tho thei tawh hek lo min rawn bihthla em tih en reng chungin ka kawr chu ka phelh a, ka kawrhnuai erawh ka phelh ngam mai lo Ramdinmawia liau luau saw ka ring chhete lo!




"Ka enthla lo che thlamuang tak khan inbual mai mai teh...nakina ka la hmuh tur vek tho ka hmanhmawh hran lo," a ti deuh bul bul a....rawn dak se nawhlunga lo vawm ṭawlh mai ka nap!
"I ke kha i ti huh ang nge," a rawn ti leh a, chhang lovin a rem dan ang ang chuan ka inbual sawk sawk a.





"Towel rawn vawm lut teh," ka tihchuan a reh vang vang a, rei rial lovin kawngkhar chu a rawn kik dat dat a, "I dawn ṭhelh palh takin rawn luta pek kher i ngai em?" A ti hmasa leh te te a, ava han ṭul tam lo e aw...mi mah hetiang dinhmuna din laiin lo uang ve hman ziah! Ka pasal chu a ni ve sia aw...





"I kut leng tawkin hawng la rawn vawm lut tawp mai rawh...!" muang ban charhin ka ti a. Ka nui ri suk pawh chu ka hria, towel chu a rawn vawm lut a, kawr hak tur ka lo keng lut si lo towel chuan ka intuam a. "I zo tawh em? Ka rawn lut dawn...?" Tiin kawngkhar chu a rawn hawng ṭhem ṭhem a, ka chhanloh avang chuanin a rawn lut tawp a.




Ka mal a lang thui bawk si ka awm chu ka kut pahnih dah cross chungin ka hup bet ṭut a. Mitko san uk chunghian a rawn ṭhu hniam a, "Ka rilru a thim," a ti thum dut a. A dar ben thlawp pahin, "Ti thim suh!" Ka ti sehchilh nak.





Pindanah min pawm lut a, ka kawr hak tur chu ava hai ve ngei a. Thanpuii min leisak mutkawr sexy zet kawr tihtham pawh tlinglo ber kher chu inher chungin a rawn khai chhuak va va a. "Ka ta nilo!" ka han ti thla rawk pek a, a awihlo lutuk tih chu a ner sawk danah a hriat theih.





"Thanpuiin fiamthua min pek anih kha dah mai mai teh a vawt tawh a nia...!" Chhuanlam tur ka hre ngang lo chuan ka ti a. Melh pawh ka melh rei duhlo, "Miin duhsak takin an pe ve chea hak sak ve mai tur che alawm," a ti deuh bul bul a, hmmmm a rilru ka hre em mai!




Kawrfual par hi a rawn la a, "Kekawr hak chu a buaithlak mai mai hei hi ha rawh," a ti teh tlat a. Hnial lo chuan ka ha ve mai bawk a, ka ngheng turin lukhamte chu min siam rem sak a, "Hnathawh tur ka nei sia ka kalsan dawn che a nia, mamawh i neih chuan Mimi-i i call mai dawn nia." pangngai tak hian a ti ve ngei a. A uang peih lutuka pangngai taka thu a sawi ve hian ka hmu lem tlat zel.





Min chhuahsan hnuchuan phone ka khawih mai mai a, Anita-i nen reilo te kan inbia a, ka mokawr design pawh kha an ṭhui mek thu alo sawi a. Pasal ka nei ta daih tih pawh ka hrilh hre tawh hlawm a, mi an ui der thiam ve khawp mai.
Tihian chawlh ka lak belh leh rih a, hetiang dinhmun thleng thei tura ka beih nasar zia hriain ka hna hi chu bansan ka tumlo bur.





Ka nu rawn chhukin min ṭhutpui ve reng a, Mimi-in thingpui leh a hmeh min rawn ken sak bawk a. Nileng chuan pindanah ka tawm a, Ramdina chuan Sangkimi-te Tv bawm tur kha a siam niin ka hria thingnawrna khawl a khat tawkin a ri reng mai. Huan bul lawk a rem laiah khuan a hnathawhna hmun a awm a, thawm pawh a chiang ṭhin viau mai.





Tlaiah Thlengthlengi-te ṭhiandun an rawn lang nawlh a, Hmangaihi chuan min kan nan a nuin an dawra theitui a rawn ken tir a, a nu chuan an dawr a nghah ṭhin avangin a rawn leng lut khat viau mai a, vawihnih vel chu ka hmu ve tawh a. Nu ria lam, vun ngo lampang leh hmelchhe lemlo tak a ni a. Hmangaihi hian a chhun viauin ka hria.




An ṭhiandun hi pawl 10 zirlai ve ve niin an kum pawh a inrual chiah a. An ṭawng duh dunin an ni pahnih kianga awm chuan ṭawngna hun pawh ka chang ve hman lo. Ka tablet a ka kawr design te chu an ṭhiandunin kuma bawk chung chuan an en a, uar tak hian a nalh an tih thu te an sawi dun luam a, min fak nasa leh lutuka ka lai dawn dawn alawm...




Ramdina lo lut chu a chek tlat tlat a, "Khawilai zawng rual nge ka tia nangni pahnih lek maw lo ni a. In va han ru ra dun em em ve mawle," a rawn ti lut bul bul a, "I zo tawh a mi?" tiin ka lo zawt thung a, a bu nghut. Towel a la chhuak a, inbual turin a chhuak leh nghal.




"Au Leen, u Ramtea hian a duat ve che em?" Hmangaihi chuan a ti teh tawl a, hmun leh hmuna chutiang inzawh chu ava zam awm duh ve mawle...an ṭhiandun chuan min en kiau mai bawk si a, ka kalsawn thei bawk si lo. "Aa...duat a ni mai," nui hul hak pah hian ka ti a. A nau a awm ve reng a sawi chhiat vak chi pawh ni nghal lo chuan...





"A zei loh hmel ṭit ṭet si rin aiin nupui a nei hma leh ta sia u Sangkimi nen an inṭhenna ala rei bawk si lo-" Thlengthlengi chuan a ṭhiannu chu nghawk zeuhva, a mitmei chu ka hmu hman ta tho.





"A pawilo min hrilh tawh alawm, Sangkimi nen chuan engtia rei nge an inzui a..?" Tiin an ṭhiandun chu nuisang chunghian ka melh tawn zak zak a. An ṭhiandun chuan in rawn ni awm tak hian an han in melh ren rawn a, chutah Thlengthlengi zawk chuan, "A u in a hrilh tawh tak tak che maw?" Tiin min zawt nawn a, ka buk nghat takah chuan tihian min hrilh a.





"A u leh u Sangkimi chu tette aṭanga inhre tawh an nia, pawl 12 pawh kan khua aṭang hian an pass chhuak ve ve a. Khatih lai aṭang khan an inzui ṭan tawh niin ka hria, College pawh Aizawl ah an kaldun leh a. A u chuan hetiang lam a tui avang hianin BA a graduate hnuah a zir zawm ta lo va, u Sangkimi te chu an hausa a vai ramah zirzawm turin a kal daih a. Christmas a alo hawng chhoh chang pawhin a u nen an inzui ziah ṭhin.





Kan khaw mite pawh hian an hre ve vek ang, chuan u Sangkimi chuan Aizawl bank-ah hna a thawk a, an inzuina a rei ve tawh avangin inneih tepawh an sawi lang fo tawh bawk. Nikum hmasa khan u Sangkimi chu kan khaw ṭhenawma Bank-ah an sawn a, chutah chuan ngaihzawng dang a nei a ni awm a.Ni kuma a u ava zin ṭum chuan a kal lama a phur ang aiin a lo hawng hmel chu hmuh hreawm tak a ni.




Kar khat lai chu engmah a nute pawh a hrilh duh lova mahse a hnuah chuan u Sangkimi chuan ngaihzawng dang alo nei tak tak hi alo nia, a u ava zin ṭum khan a phawk dun chu lo niin an inṭhen zui ta a ni. Kan khaw mi zawng zawng chuan innei mai tawh turah an ngai vek a, chutia an inṭhen ta chu zawhna pawh kan dang zing malh malh khawp mai.




Mahse a u hian a chhan diktak sawi chhuah a phal ngai lova, a rilru a nat dawn tehreng u Sangkimi hmingchhiatlohnan ala thup pui zawk a. A hnuah u Sangkimi pawhin ngaihdam a rawn dil nasa ṭhin khawp mai, mahse a u chuan a rilru a siam fel tawh reng rengin a hawi kir leh tawh ngai lo.





Chuan nang ilo lang a, a nu leh a puten nupui neih chungchang an sawipui kha chuan a hnial zet nain Aizawl a rawn chhuk hnu khan a rilru a thlak leh daih a, a duhzawng tak i nih vangte pawh aniang. I lo awm hnu aṭang hian a hma ang khan a nuiin a uang leh peih tawh a, a u diktak kha a ni leh tawh asin. Au Leen nang chuan a u hi phatsan ve miah suh aw, a rilruna lai hmel kha hmuhnawn leh ka duh tawh lo."




Thlengthlengi thusawi chhungchuan uluk takin ka lo ngaithla kar a, thawk pawh ka lo thaw dim ang reng khawp mai. Kan Ramdinmawia chuan inphatsanna tenawm tak alo tawng ve tho a nimaw...engtin nge Sangkimi hi ṭha tak tak tea ala biak theih zawk le..?





"Nangni ho chu min rel chiang mai ka hahchhiau nasa lutuk...!" Ramdina rawn lut chuan a ti nghut a, towel chiah veng hian a rawn pen lut tharh tharh a, "Rel e i uang peih lutuk a au Leen-in a nin ṭhin zia che alo sawi mek a," Hmangaihi'n a lo tihchuan min rawn melh zawk a, "Lalhmangaih dawt hi a hawpin hawp ṭhin suh, in u Leen-i khan min it ru thei teh mai a nia," a ti teh daih a, ava han dawhheh reuh e...





"Awihawm loh e...i engah mah it tur pawh a awmloh kha a!" Uar fein Hmangaihi chuan alo ti let a, chuveleh "E he! Helai artui pum hnih hi en teh u..! Helam a pawh hi...!" Tiin a intisek kual vel a, sic pack te chu a nei ve ngei alawm.




Kan hmaah chuan a duhtawkin a hanin show off vel a, ka nuihpui ringawt. A nau thusawi te ka ngaihtuah let leh a, keimah vangin hetiang hian ngai a awh leh thei a maw..? A tan hian eng chiah nge ka nih a, eng angin nge min hmuh a ka lakah eng rilru nge a put ang? Heng zawhna te hi ka rilruah alo lut zut zut a, hriatchian chakna in ka khat a ni ber...





Hmangaihin chaw alo ei dawn bawk a inhnuaiah chuan Ramdina nen kan paliin kan ei ho va, a nau te pahnih nen chuan an inkhing tawk em em mai a. Chaw ei lai reng reng pawhin an in kap a, han khak zeuh changlah ka ngah. Hmeichhe tleirawl pathum bula awm ang reng ka ni!





Hmangaihi te ṭhiandun hriat tur ngeia min han koh duat te chuan an ṭhiandun chu anlo ner nasa thei mai a. A ni lahin nuam a ti em em thung a, an kianga awm chuan khua har lo khawp mai.




Pindana tawm reng ka ning avangin inhnuai ṭhutkhawmnaah chuan ka ṭhu chhuak ve a, Sangkimi te pafa pawh min kan turin an lo leng a, Hmangaihi te ṭhiandun an ṭangkai khawp mai thingpui te an lo lum sak zung zung a.




Ka thil hriatte avangin Sangkimi ka hmuhdan chu a dang ta deuh tlat a. Mahni kawppuite phatsan hi ka thil huat berte zinga mi a ni. Tunah a ngaihzawng nen chuan an innei leh chuang si lo va inthlahrunna te a nei ve miah lo em ni chu aw ka ti rilru nauh nauh.




Nu Mawii pawh a rawn lang ve ngei a ka lo be lumlam peih vak lo bawk nen pa Chhuana nen chuan an titi a. An ni chu inchunglamah an inzui chho a, ka nute nen an inkawm ho dawn a ni ang.
"Ka va zung lawk ang nge," tiin Sangkimi chu a tho va. Ka ke chu ka dah ngaiin ka dah rei tawh lutuk a a na deuh ngut ngut tawh.




Ramdina khawhar In va lang zawk pawh a ṭhianpa Thangtea nen an rawnin zui lut nawlh a. "Kan monu sial alo intina chu a va pawi tak..! Pa berin mutmu a tuah ṭha deuh dawnlo a ang hle mai," a rawn ti deuh hlut a, an ṭhiandun chuan an nui kur kur a.




Ramdina chu ka sirah rawn ṭhu thlain ka ke chu dimte hian a malah a hlang chhova, "Lukham kha ngheng la," tia min hrilh chuan ṭhutthleng ban nghengin lukham chu ka dah a. Sangkimi pawh bualin aṭang a lo chhuak ve chiah bawk.




"Khawhar Inah in han kal elo?" A rawn ti var a, "Aw, reilote kan han lang ve zawk mawle hei hetah
rilru pawt pengtu a awm tlat bawk sia awm rei theih pawh a nilo. Ṭhiandangte pawh an rawn thleng ve vat ang," Thangtea chuan a lo ti zung zung a. Sangkimi chu kan ep chiah ṭhutthlengah chuan a ṭhu thla a, Ramdina mal chunga ka ke chu a melh deuh bika a ka hriat avangin, "Ka chawn hi hmet pahte a mu chur chur mai," tiin Ramdina chu ka hrilh a.




I he lovin a hmet ve mai bawk a, Thangtea nen chuan an titi pah mawlh mawlh bawk. "Leen i hna hi engtin nge i tih tak? I thawn chhunzawm zel dawn em?" Sangkimi'n a lo tihchuan, "Tunah chuan ka chawl rih a, ka zawm leh thuai ang," tiin ka lo chhang a.




"Phaiah daih a ni lawm ni i thawh a..? Heta ṭang chuan ava buaithlak duh awm ve?"




"Buaithlak lo ve, a design chauh ka khawih tawh dawn bawk a a hmuna kal ngai kherlo pawhin ka thawh zawm thei lutuk alawm." ka tihchuan a bu nghat nghat a, nula sual tak chu a nilo a ni maithei e, mahse a chetdan kha khawvela ka mi huat berte zia a ni tlat a, ahma ang khan ka hmu ṭha thei tawhlo.





Ramdina ṭhian dang teho pawh an lo leng lut ṭak ṭak a, beiseiloh deuhvin Andrew-a a rawn lut tel ve nawlh leh nghal. Keileh Sangkimi chiah hmeichhia kan awm a, Thlengthlengi te ṭhiandun chu pindanah an lut daih tawh bawk nen mipa rual awmkhawm chu an thawm a ṭha ham ham kher mai.





Zo artui, bawnghnute thei leh eng ilo min rawn ken sak ve liam liam hlawm a, an fel hlawm khawp mai.




Midang an awm ve nual tawh avangin ka ke chu laksawn ka han tum a, mahse Ramdina chhan a phal tlat lo. A hmel ka en chuan min en ve lem lovin a ṭhiante bia chuan a nui a nui a, zanin a anui hmel chu ka hmu ṭha phian leh ta nghal a, eng ka hria nimaw duh aia rei ka lo en leh vung vung zel.





"Zan dangah kan rawn leng leh dawn nia lo dam vat rawh aw Leen," tiin kan inlengte hawng tur chuan min thlah liam liam hlawm a, lo leng leh ṭeuh tur chuan ka chah ve hlawm a. Thangtea rual chuan Sangkimi pawh a hawng ve nghal a, Andrew-a chuan naktuk zan alo leh hunah dressing na tur a rawn ken nghal tur thu sawiin in hawng san ve a.





Inleng te an hawng fel meuh chuan dar 10:00 pm a pel thui tawh viau mai. Kan tlangval leng pawh a rawn hawng ve chiah a, a pindanah a lut tlang nghal daih a. Mu turin keini pawh pindanah kan inzui phei a, pawmk kher ka duh loh avangin min kuah phei a. Ka bai ve suih suih mai.




Min mut fel tir hnuah Ramdina chuan a kawr a phelh leh te te a, boxer nen chiah hian a mu ziah lehnghal. Chutia a kawr a phelh vel lai chuan ka lo lai ngawt pek a, zan dangah hetiang hian ka awm ngailo asin le!





Light off in ka bulah chuan a rawnin thlawh ve nghal. "Mut a hreawm em?" A tihchuan "Hreawm lo," ka lo ti tawi tak a. Rei tawk fang ngawi renga kan mut ren rawn hnuah ka lam hawiin a rawn sai sir sat sat a, "Rawn tawlh phei kher suh," ka lo ti nghal vat.





"I ho thei e...mahni nupuite ngei ngei pawh kuah theilova mut khawng reng zawng ka ning i ngam chuan min lo dang rawh!" Tih leh ka dula rawn kuah a rual nghal zat a, min si chetin a rawn tawlh phei bawk. "Ramdinmawi...min thhlah vat rawh," seh chilh nawk hian ka ti a. Naupangchhia zetin lu a thing mat mat a, min thlah chu sawiloh min kuah nghet suah va, ka nghawnga a hmai a rawn phum phei chuan ka lungphu chu phu rang zaih zaih tak a ni!




A thawk chhuah zawnga ka nghawng lum leh pap pap ṭhin chuan min ti mur sung sung a, thawk pangngai ka tum hram hram a ni ber...




"Ramdinmawi...,"



"Mmmm,"



"Tinge Sangkimi nen khan in inṭhen a?"



Engkim chu a reh nghal ṭhuap a, a chesawn eihlo.
"Min hrilh thei lo a nihchuan a pawi chuanglo," a sawi hreh takah tiin ka han ti hnuhnawh leh a. Engtin nge min chhan ang tih erawh ka hre chak viau mai.




"Ka tana Khuanu ruat a nilo aniang nge, atana ṭha zawka a hriat chu a thlang a, chelh din reng ka tumlo." Min chhang dawn tawhlo emaw ka tuh hnuah a rawn ti thum dut a.




"I rilru puthmang a danglam vek tawh tihna a mi?" Ka tihchuan ka hmel en thei turin a rawn hawi chhuak deuhva, "Ka tawn ni aṭang che khan i thlak danglam alawm...nang ka tawn theihnan che Sangkimi nen khati khan kan tawp taah ka ngai bawk," A ti nghet churh a, a ṭawngkam chhuak chuan engtin emaw ni tak hian min fan a.




"Tak tak maw?! Min duh tihna a mi?" Ka ti hliai a, ka ke na hrechang lek lova ka han saisir thut mai chu ka ṭe ṭhat a. "A mak ṭhin!" Ti hlukin a ṭhu chhuak a, ka ke chu a dah rem a, a rawn hmu thla leh nghal thuai.




"Ramdinmawi min duh a mi?" A mu fel chiah tihah a lo zawt leh nghal a, "Ka awmdanah i hrethiam mai lo a mi?" tih pahin min lo kuah leh, "I uang loh leh i fiamthu renga engtin hian nge maw ka hriat hiat huat ang ni!? Sawi ṭha ve mai la..," ka ti deuh bawrh bawrh a, ka hrechak zek zek tawh a ni ber...





A ngawi vang vang a, ka thinphu te chu a chhanna hrechakin a phu dep dep tawh..."Min muah phawt la ka hrilh ang che,"



"Aaa..Ramdinmawi! Uang uanglo teh!" Tiin a awmah ka beng thlawp a, a nui nghawr dat a. Mi mah thinphu dep depin kan awm ve tawh a, ka uang e lo la tih.




"Zawng chhuak ve mai rawh min muah duh bawk silo ka sawi dawnlo," a tih teh tlat a, min va han ti hrilhhai mai mai tak! "Min kuah tawh suh! Saw....tah a hmawrah sawn va mu rawh!" Tiin ka min kuahna kut chu ka phih sawn sak a, "I va han nunrawng ve...Rohlupui," a ti bung nghut a. Engah mah ka ngaihsak duhlo, tikhan kan inrul tawk chiah!


****************


Nizanah ka ziah sa ka discard palh a a bul aṭangin ka ziak ṭha leh a ka lo dah thei lo a min lo hrethiam dawn nia..