Frenkie Zothanpuia 32

[LILY24]

CHAPTER-32

Kan in luah dam takin ka thleng a,thla tam kan kalsan bawk nen tihfai ve fe a lo ngai tawh a,dawhkan leh ṭhutthleng vel te pawh a lo paw viau tawh. Indim ka ngai tih hre mah ila chhungkaw nu ber ka nihna angin ka che lo thei lo a,ka puar len hunah phei chuan ka buai ngawtin ka ring. Duata chu kan thlen tuk aṭang training a zawm nghal a,a chawlh rei tawh em avangin han awm khawtlai leh kha atan a rem tawh lem lo. Kei paw'n ka theih ang ang te in lamah ka lo ti ve a,kan in luah a zau lutuk lo bawk nen tihfai chhung pawh a rei lo viau.


Nupa dangte pawh hi an ni ve tho em chu ka hre lo mahse kan nupa bik hi chu kan fa pakhatna turte a nih vang nge,eng emaw hlekah kan hlauthawng hma em em a,damdawi in pawh hi kan kal ngun ang reng. Thla 3 kan tlin meuh chuan ka dul pawh tlemin a rawn puar ve tawh a,damdawi in kal ngun tih takah doctor te abikin hmeichhe lam doctor te phei chuan min hre viau tawh. Ka vanneihna deuh chu Duata hian min kalpui ziah a, ka tih ve ngai hauh lo in engkim min tihsak vek ṭhin. Damdawi leh eng ilo lam khawma chhuah a ngaih paw'n ngawi rengin a ti a, a hmelah peih lohna emaw lungawi lohna hmuh tur a awm ve ngai hauh lo. Training tura a kal dawnin ka khawhar a hlauh luatah a bula kal ve mai turin min sawm ṭhin a,nuih a za ṭhin viau. Mipa rual awm khawmna ah va kal a,nilenga an che vel thlir chu ka zo dawn paw'n ka hre lo. Chhuah vel ai chuan tiin inah tih tur ṭul ang ang te ka ti a,awm hahdam pahin movie emaw lehkhabu chhiar tein hun ka hmang ṭhin.

*I rawn in check up khat tawh riau mai,I dam ṭha maw?* tih hi dr David a hnen aṭang ka dawng hlawl a, thla hnihna a ka kal bak kha kal tawh lovin helamah ka in check up zui kha a ni a,ka lo ngaihtuah tawh reng reng hlei nem.

*Dam ṭha e,kan awmna lamah kan let leh tawh a* tiin emoji nui lai chu ka dah tel a.
*I dam ṭha zawk maw?* A mawi hnai ah tiin ka zawt zui ve bawk a.

*Dam ve ṭawk ṭawk e,khu lamah in awm daih chuan i va ngaihawm dawn ve,thla tin hmelṭha hmuh ka lo inbeisei deuh kha a nia* a rawn ti ngei a, emoji a dah zui bawk nen fiamthu ah ka ngai ve hmiah bawk.

*Hmelṭha chu I hmu zut ang*

*An vang ang*
*Lo inenkawl ṭha rawh aw,buaina te a awm chuan min hrilh ve dawn nia* a ti a,doctor mah ni se biak a nuam a,eng tik lai paw'n kan tan hian a awm a,mi a ngaihsak em em lehnghal.


Ka ril a ṭam leh takah chuan fridge lamah ei tur dap turin ka tho a, thil thlum chu ka chak huam huam a ni ber. Vanneihthlak takin tukina Duata'n walk pah a jalebi min lo lei a awm hlauh a, nui ver verin ka ei zui a,chak huam huam lai a nih vang nge tui ka ti takzet. A hma kha chuan a thlum vang hian ka ei duh ngai lo kha a ni a mahse tunah chuan ka duh ber a ni leh lawi si a,rai lai hi chuan ei chak zawng thleng a lo danglam a, a dangdai ngawt mai. Ei chak ber ei tawh hi chuan lung hi a awi em em zel a ni.


Door bell a rik ral ral takah chuan hawng turin ka phei a, hawn lawk lovin ka enthla leh rih. Tunlai ah misual an tam tawh si a,fimkhur hi a ngai takzet. In chhungah kan awm lai ngei paw'n in an rawk ngam a ni a,hmanlai kan pi leh pute hunlai,feh dawna kawngkhar thingfak nena an do mai ṭhin hunlai nen chuan danglam tawh tak a ni. Khawvel danglam zel hian sual hrang hrang a keng tel emaw tih mai turin sual a tam a,phai lam Kristian tlemna ramah chuan fimkhur tluk hi a awm meuh lo a ni.

"In thil chah a lo thleng a,tah hian I hming lo sign rawh" ka haw rualin thil thawn sem kual ṭhin pa(delivery boy) chuan a ti a,thil ka chah awm ka hre hauh si lo.

"A hming kha ka lo en leh lawk" ka tih chuan hming inziahna chu min entir leh a,Duata hming ka hmuh takah chuan hming sign na turah chuan ka sign ve ta chauh.

Eng thil nge a chah hriat tumin bawm chu ka hawng a,lehkhabu leh computer thil vel hi a lo nia, a thil dahna ṭhinah chuan ka dahsak nghal a. Dar 4 a rik takah chuan eiraang bawl turin ka intintuah a, pahnih chauh la ni mah ila chawhmeh siam turah ka buai ve thei viau. Siam tur chu thuhran ka siam thiam loh em avang hian thil dang dang siam vak kha ka peih ṭhin lo a, kan chawhmeh pawh a ho thei viau.

"Ka lo haw e" Au lang langin choka ah rawn lut a, a thlan hluam lehnghal.

"Ila inbual nange?" Tlai dangah hi chuan an training zawh ah a hmunah a inbual nghal a,fai ser sawrin a rawn haw ṭhin. Tun kar erawh inbual lovin a rawn haw anga, ka peih loh chung inah min insawizawi pui a,ka peih lo thei lutuk hi a chungah ka thinrim hlur zel.

"An hre lo der vel ngei a?Lo kal rawh le" tih leh ka banah min pawh a rual a, a rawn haw hun leh eirawng bawl laklawh lai nang turin ka bawl ve em em a,awmzia a awm lo reng reng.

"Ka peih tawh lo,a chauhthlak si" ka ti niah niah a, zep lo chuan ka chau ṭhin takzet. 'Ka nupui a nia,kan dim deuh ange'
tih chu khawi lam gym trainer in mi a hrual ṭhin ang hian min hrual a, tun ni hnih thum hi chu ka tla vek te'n ka hria.

"Ti ṭha rawh,I tih ṭhat loh chuan kan ti ṭha leh zel ang" a ti a, a thu hi hnial eng ang mah ila a sawhsawn ngai lo. Ka thlan hluam a,ka thawk te hi a rang vekin ka hria. Ka sa vek bawk sia,hrehawm tak a ni.

"Ka ning,ka ti peih tawh lo" Tho tharhin choka lamah chuan a tlanin ka tlan a ni ber. Fridge a tui bottle chu lachhuakin ka in khawlh khawlh a, nui vur vurin ka lam a rawn pan a,a hrim hrimin ani pawh training na aṭang a rawn haw ve chiah a,chauh te pawh a chau ve lo emaw ni?

"Va inbual rawh,takah i thil chah pawh kha a rawn thleng a,computer bulah kha ka dah" ka tih huan inher vutin pindan lam a pan a,ka umzui ve thuai bawk.

"Ngatan nge kha kha?" tiin a thil ken chu ka thlek ve a,a to hmel em em lehnghal.

"Games khelhna tur a nih hi,nalh i ti em?" A ti a nih chu! Games hi a khelh ve ziah a,khel tawh lo turin vawi tam ka hrilh a,vawiin thlengin a la zawm chuang lo.

"Nalh lo emai,I mit i sawisel leh chuan ka ngaihsak tawh miah lo ang che" tiin choka lamah ka let leh a, a mit sawisel reng chungin games khelh a bansan thei chuang lo a,doctor kan pan hnuah chuan a sim ve tawh ka ring kha a nia,ka ring sual chhia va a ni.

Chawhmeh atan artui leh tomato kan pawlh ka siam a,salad te pawh ka siam thlap tawh. Chawhmeh tihsat ngaite ka tihsat hnuah chaw ei ka siam zui a, game lawma pawh a lo chhuak ve chiah a,ani chu a lo inbual leh diam tawh.

Chaw kan ei kham hnuah thleng te ka sil a,tihfai ngai ang ang ka tihfai hnuah pindanah ka va lut a, khum lu lam nghenga ṭhu muin lehkhabu a lo chhiar a, a chah thar kha niin ka hria. Ka mamawh lam khawmin inbual tur chuan bual in lamah ka luhsan ve nghal a.

Inbual zawh chuan mut nghal mai a nih avangin hmanhmawh lem lo chuan ka inbual a, ka fai sar maiin ka hria. Ka inbual zo ka va chhuah chuan a lehkhabu chhiar kha a lo dah tawh a, min melh reng avang chuan ka nuih var var a,min nuih let ve miah lo. Min nuih let a hnekin min melh rum zui a, a ngaihna ka hre lo khawp.

"Eng nge khati vaka mi melh?" Tiin darthlalang hma ah chuan ka ṭhu zui a.

"I hre khawp ang chu" a tih laia a aw ri chu ngeiawm tak a ni. A lawm lohna tura han awm emaw ṭawngkam chheh ka neih awm ka hre si lo a, chuti anga min chhang ta daih chu ka hrethiam lo takzet.

"Sawi la,ka hriat loh vang chuan alawm le ka zawh che" ka ti a.

"A nih vel chu a" tiin a chhuak zui a,ka melh haw ringawt. Inbual hmain pangngai takin a awm a,tunah lem min chhuahsan hmak a, inbakkaihna kan neih awm ka hre si lo. In ha vat vatin ka sam ka chhem ro a, ka va chhuah ve chuan ṭhutkhawmna velah a awm lo a,pindan lehlamah a awm ringin ka va hawng a, ka thaw hak. Ngawi rengin computer hmaa ṭhu pa lam chu ka pan a, game a khel leh tawh tih hriat takin headphone a vuah bawk a,biak chu ka huphurh ru takzet.

"Inbe lawk ang" ka tih chuan engtin mah min chhang lovin a khelh zui char char a,a awmdan chu ka thinin a tuar dawn paw'n ka hre lo.

"I hre pha tih ka hria,inbe lawk ang" ka tih leh pawh chuan min en zawk a, a la khelh chhunzawm reng avang chuan keyboard chu zuk hmetin ka out nghal a, lawm lo tih hriat zetin ka banah a rawn vuan chawt bawk.

"Eng nge i lungawina chu?Hetia intitauh khum vel hi bansan rawh,ṭha takin min hrilh la,min biak loh chuan awmdan ka thiam lo tih i hriat kha" tiin a sam ka khawihsak a, ka kut chu a pawt thla rang hle.

"Va mu rawh" tiin computer chu on leh mai a tum a, min peh hel a tum ngar ngarin ka hria.

"Sawi rawh i lungawi lohna chu?" Ka ti vin ta chiam a, min melh rum takzet tawh.

"I phone kha va en rawh,min rawn tibuai tawh bawk suh. Hneawm lutuk!!" a ti hluk a,hneawm a tih chu ka lo la nâ kher mai.

"Min hne maw?" Ka tih rual chuan ka biangah mittui a luang thla nghal a,ka rilru no a chhuak leh tawh.

"Min hne a nih te chuan engah nge Aizawl ah khan min hnutchhiah leh mai loh?" Ka tih rual chuan tho tharhin a chhuak daih a,zanina a awmdan chu ka thin a tirim takzet. Chhuak ve nghalin kan pindan lam ka pan a, chuti taka ka hneawm a nih te chuan a bulah ka awm lo tawp ang. Kawngka chu kalhin ka mu zui a, ṭha takin a lungawi lohna te ka zawt a mahse hneawm tih bak ka hlawh lo. Ka mize hmasa zawk kha chuan ngaihtuah loh tur ngaihtuahin haw leh mai a ngaihtuah tawh ang mahse tunah chuan nu ka ni tawh tih ka inhria a,engkimah puitling taka thil ngaihtuah ka ngaihzia ka hre bawk. Kan nupa rek a awm kan nih avangin inhauh leh inbiak loh tih velah hian ka awm thiam lo a,hrehawm ka ti ṭhin. Buaina te ka theih ang anga chinfel ka tum ṭhin mahse zanina a awmdan hi chuan engmah sawipui theih a ni lo tih a tichiang takzet.


Zingah hian training tura a kal hmat ṭhin avangin thawh hmat a ngai a,chaw ei hman lova a kal hi ka hlau ṭhin a ni. Nizanah khan khawi ah nge a mut tak ka hre lo va,thawh hlim aṭang ka la hmu lo bawk. Eirawng chu bawlin chawhmeh te pawh ka thiam ang ang ka siam ve a,ka thiam lo tih ah tawp mai ka tum lo va,eng emaw tal thiam tumin mi chawhmeh siam lai video te hi ka en a,ka siam ve hi chuan a tui thei thlawt lo.

Chaw chu ngawi rengin kan ei a,chawhmeh chungchang vel pawh engmah a sawi lo. Biak ka tum ut ut a mahse hneawm tih na mawlh mawlh a lo biak leh chu a mi â thil tih chi deuh a ni.

"Vawiin chu ka rualin lo chhuak ve ula?" Kut ka sil laiin a rawn ti a,ani erawh a la kham lo deuh.

"Chhuak lo mai ang" tiin ṭhutkhawmna lam chu ka pan a, nizana a ṭawng dan kha ka hrechhuak leh a,ka rilru hi a nâ thar zel a ni.

"Insiam rawh,vawiin chu ka bang hma dawn a,ka chhuahpui ang che u" a ti leh a,a aw a min thlemna ri tel chuan ka lung a tichhe takzet.

"Kan chhuak khat tawh lutuk a,ina awm i ning tawhin ka hria" tiin ka biang vel chu a rawn nul a,ka ṭang ṭeuh mai.

"Kan tibuai mai mai ang che" ka ti a,training chhung zawng kan lo nghah a ngai anga, va kal chu ka peih lem lo a ni.

Ka hnial ṭang ṭang chung pawn min tihluih tlat avang chuan ṭah chhuak ṭeuhin ka insiam a, nizan leh vawiina a awmdan chu danglam leh tawh tak a ni. Engmah thleng lo angin a awm thei a,a lungawi lohna te pawh kha a theihnghilh leh tawh emaw ni? Kan inkar tihchhiat leh ai chuan tiin ngawi ka chuh a,engmah ka sawi chhuak leh tawh lo bawk. An training na hmun kan thleng a, a ṭhiante pawh ka hmu hlawm a,an felin an hawihhawm hlawm em em lehnghal.

Rei deuh turah ka ngai kha a nia mahse meeting an neih a,training chu vawiin atan chawlh a lo ni.

"Khawiah nge in kal chak?" Tiin bike chu ka lawn theih turin a rawn tiawn a.

"Kal duhna pawh ka nei lo"

"Bike hi chu a harsa deuh a ni tiraw?Car lei vat vat kan ngai" a ti a, a sawi awlsam ka ti khawp. Rai lai chuan indim a ngai si a,lirhthei chuan phei chu a derthawng a,abikin bike leh scooty vel phei chu chuan lo hram hram hi a him a ni.

"Movie en i duh em?Nge thil ei hmasak i duh?" A ti a,thil ei nan chuan a la hma ka ti deuh a,movie en hmasak chu ka thlang a,nidangah min ngaihsak lo ka tihna ni lovin vawiina min ngaihsak dan chu nuam ka ti. Nidangah hi chuan kan bulah hun a hmang tam thei lo a,sum leh pai a ni emaw,eitur vel te pawh min ngaihtuahsak thlap ṭhin mahse kan thlakhlel ber amah a awm loh hi chuan a kim lo riau ṭhin. Ka hriat chian em em chu nupui te emaw fate tihlim tur hian sum leh pai neih tam a pawimawh ber lo a,pawimawh ber ni a ka hriat chu an tana hun reilote tal insiama,inpumpek hi niin ka hria.


Movie kan en a, eitur kan keng lut tel bawk nen ril pawh a ṭam hman meuh lo. Kan movie chu a chanve vel kan en chuan ka mut a chhuak titih a,ka muthlu leh zeuh ṭhin.

"Tihian mu zawk rawh" tiin ka mutdan tur min siam rem sak a,luh tawh chuan a tawp hma a chhuah theih si lo va,ka harh thei lo bawk nen mut mai loh chu duhthlan tur ka nei lo a ni.

"Duati" tiin min sawi dat dat a, a kutin ka biang chu a rawn tawk leh ṭhin.

"A tawp tawh ami?" Tiin ka tho a,min awn pui ve nghal zat.

"Awww theatre a mu tui ber i ni hialin ka hria" Nui chungin a ti a,midang pawh an chhuak sap sap mai.

Haw kawngah eitur kan lei haw a,min lei hnem em em lehnghal. Ka mut rei tehreng nen in thlen hnuah pawh ka la chau reng a,pawn boruak hi ka zo meuh lo a ni. Eitur te chu min tihlumsak a,ka mutna bul dawhkanah a rawn dah thlap bawk a,ani ang pasal hi chu hmeichhia zawng zawng hian nei se pasal neih hi a lo van nuam dawn tak.

Ni a liam ve zel a,thla hial a lo vei leh ta! Pathian zarah thla 5 kan tling chho a,a karah damdawi in han luh changte pawh kan nei ṭhin a mahse dam takin kan in luah ah ngei kan let leh ṭhin. Kan pa hian a theih tawp tak meuh meuhin min enkawl a, ka rai tirh a awm ngai lo,ke sa leh vung te ka nei a,zanah mu thei lovin ka tho leh nge nge ṭhin. Chuti ang hunah chuan tui taka muhil a, min hnar san bawrh bawrh lovin min menpui a,a thiam ang angin min enkawl ṭhin. Chhunah a tal hah em em chang paw'n lawm lo emaw peih loh hmel hi kan hmu ngai lo. Mihring ang zawnga ngaihtuah chuan rilru leh kum pawh la naupang ve tak a ni a,a changin nawi ṭhin viau mahse kawng tam zawkah a puitlingin innghahna tlak a ni a, kan fa lo piang turin ani ang 'Pa' a nei tur hi chu ka lawm ṭhin hle. Tunlai khawvelah pasal leh pa nihna dinhmun pawh hre tawh map lo va tal ho an tam tawh em em a,chhungkua uap lum aia pawn lama tal nuam ti an tam ta! Fate'n an pa lo haw hun nghakin ṭap bai bai chungin an nu bulah an vui a,nu ber tihngaihna hre lo leh rilru hah dan turte ngaihtuah chang hian ka vanneihzia ka hre thar leh ṭhin. Naute hmel la hmu lo mah ila,tun aṭang hian pa nih hi a tlinzia ka mitin ka hmu ṭan tawh a, a hahdamthlak bik hliah hliah.

"Naktuk tiraw in inkhel leh dawn kha?" Khumah muin phone ka en a,kan pa erawh chuan lehkhabu a chhiar thung.

"Umm" ti chauhin min chhang a,hei hi lehkhabu a chhiar laia kan biak changa min chhan dan ṭhin a ni! Tihbuai a duh ngai lo a,a lehkhabu chhiarah hian rilru a pe thei lutuk a,koh pawh hi a hre ṭhin lo.

"Kan lo kal ve ang aw?" Ka tih leh cbuan lehkhabu dah meuhin min en a,mak a tih deuh paw'n a awm lutuk ringawt. A inkhel hi phone emaw tv aṭang kan en mai ṭhin a,a hmunah hian kan ṭawihawm ngai tlat lo.

"A ngai kher hlei nem,khua a lum si,in chau ang" Tiin ka dul chu a rawn chul a,a lan hma aṭanga khawih hrat kha a nia,a lan hnuah phei hi chuan ka hnaih ah a awm apiangin a khawih ngei ngei ṭhin.

"A rei dawn chuang lo a bakah ina awm reng chu a ninawm alawm,kan lo kal ve ang aw?" Ka tih leh zet chuan ṭul tih loh hmel zetin min en a,ka dil leh char char dawn tih a hriat vang nge min phalsak ve leh mai bawk.

"Muhil tawh r'u le,naktuk zing thawh in hre leh awm si lo" a tih chuan ka lo nui hak,khawvar lam mut hi ka ching a,thawh hi kan harsat hle.

Zingah chuan kan pa sawi ang takin kan tho leh thei lo va,ani'n min rawn kaithawh hnuah pawh kan chechang lawk si lo a,"Ka kalsan ang che u aw" ti a min sawi ṭhaih hnuah kan tho ve ta chauh kha a nia, a hmanhmawh tawh bawk nen min insiampui zung zung a, bike a kal a ti zet a mahse a hrechhuak leh a niang chu cab nen an inkhelhna hmun lam panin kan tlan ta zawk a, pawn lam chu a uap churh mai.


Thui ve tak kan tlan hnuah an inkhelhna tur hmun kan thleng a,inkhel turte bakah entu mipui pawh an awm ve nual a,kan kal fuh ve viau chuan ka hria. Mipui chim buai lohna,chhungte emaw hmelhriat ṭha te ṭhutna bikah min ṭhut tir a,ka nuam tih loh hlau in a ṭhiante nupui te nen min inhmelhriat tir leh te te a,Mizo nu erawh an awm miah lo.

Inkhel an ṭan a,ka ṭhiante chu an ṭang khawp a,mawng pawh an hung ṭha meuh lo.Kei erawh a changin ṭhuthmun aṭang kut ka beng a,boruak chu ka zo chiah paw'n ka hre lo. Chutia inhneh tawk taka an inkhel lai chuan hamrik hamtu(referee)in a ham a,player ṭhenkhatin physio lam ban phara an lo koh takah chuan inkhel chu an titawp rih a,nâ tuara am buaipui luai luai chu Duata a ni! A nâ viau a niang chu a kutin a mal thla chu a ṭham vak a, a zawntu turte an thlen phei nghal takah chuan inkhel chhunzawm thei a ni lo tih ka hria a,Duata khawngaihnain ka khat nghal der. A sir lamah buaipuiin a ai ah midang an lut a,a ke rek vel an khawih sek takah chuan a ke a ulh a nih ka lo ring ringawt.

Damdawi in an pan dawn takah chuan min rawn koh tir a,an club hotu lamin damdawi in hnai berah min kalpui a,a nâ viau a niang..mit a chhing ngawt ngawt bawk. Damdawi in thlen veleh tih tur ṭul ang ang dr in min tihsak a, x-ray a lan dan chuan a ruh a lo pelh bakah a tlemin a khi tel bawk a ni awm e.

Tum lo deuh a min admit takah chuan in lamah mamawh te lam turin ka haw a,kan chhungte pawh engmah kala hrilh hman rih lo. Cabin ah kan awm a,zun ram thiar velah pawh buaipui a ngai bawk nen keimahni tawkah kan buai ve em em mai a ni.

Zanah chuan Aizawl lama kan chhungte'n chanchin an lo hria a, hlauhthawnawm a nih loh thu kan hrilh takah chuan an thaw a veng huaiin ka hria. Ka nu(nu Marini) erawh awmpui kan ngaih loh thu kan sawi ngial hnuah pawh lo kal a tum deuh tlat avangin kan hnial ta lo a, naktuk atan flight ticket hauh turin a tur hlawm sek bawk.

A tuk lamah ka nu a lo thleng a,a ṭuan a rangin thil a hre bawk a,ka tan paw'n a hahdamthlak khawp mai. In lam aṭang kan mamawh min rawn pe ṭhin a, va lak ka tum paw'n veivak tam lo tura min tih tlat avangin amah hlirin thil min tihsak a,kan vei tir reng bawk nen chhuak vat tawh ila ka ti takzet.

"Tunge i biak?" Khumah mu chungin ka phone khawih chu min rawn en a, a thik leh tawh tih ka hre mai.

"Anna ka bia" ka tih chuan a awih lo hmel takzet.

"Khawi maw?" Ti a rawn ban a tum chuan ka lo awm sawn leh zel sia,a rinhlelhna chu sang tawh tak a ni.

"Kha dr kha i be leh em ni?" Lawm lo tih hriat zeta a rawn ṭawng takah chuan ka nui tawp chiang hle.

"I thik deuh ami?" Ti a a hmai zawnah tak ka va kun chuan nur nangin min melh a, naute mipa amah ang deuh hrinsak ka chak kher mai.

"Deuh pawh a ni lo,ka THIK" chiang fahranin a lam bik kher a,thup buai hi a nei lo reng reng.

"I va han cute tak!David a nen kan inbe lo,Anna nen alawm kan inbiak" tiin a hma ah phone chu ka lek va va a,a en leh tawp si lo. Duh angin a la che thei si lo va a duh lo zawnga awm a,amah run lui chu nuam ka ti tlat pek a, khum aṭanga rum fahrana min melh bak tih theih a nei lo.

Kâr 1 leh tih kan awm hnuah dr in in lamah kan inenkawl zui thei tur thu min hrilh a,chuti rualin in lamah pawh insawizui pui tur personal trainer tur ruai kan ngai dawn a, Duata pawh thla eng emaw chen chu a chawlh rih a ngaih hmel. Dr min kawhhmuh angin personal trainer tur chu kan hmu a, a lo fel khawp mai. Physio lamah sang tak a lo zir tawh a, ruai man pawh a tlawm lem lo. Nitin inah kal chilh turin kan inbe rem a,inbiak ang ngeiin a hun chat chatah a lo thleng nitin bawk. Ka nu pawh min la awmpui ve reng a, kan inchhung reh lutuk pawh a zia viau.

"I tei chhuak ngai chuang lo,naktuk aṭang ka rualin I insawizawi ve ziah tawh ang" Mut hmunah Duata'n a ti a,a bulah ka tih ṭhin lai pawh khan hrehawm ka ti thei viau a ni a,Vinit(trainer)bulah chuan engmah ka sawi ngam tawh dawn lo a,tih hma hma aṭang ka lo chau.

"Ka tih ve kher a ngai emaw ni?A hahthlak thei si" ka ti leh niah niah a,insawizawi a sawi tawh hi chuan ka hnial ngei ngei ṭhin.

"Nakinah nau I neih hunah a awlsam dawn alawm,a hrehawm hmel si nau vei hi" a tih chuan ka nui a hak hak. Nau vei lai chu a hmu tawh emaw ni?

"Hmeichhe nau vei i hmu tawh ami?" Ka tih chuan a bu nghut nghut a.

"Tunge?" Ka lo ti leh hmanhmawh.

"U Becky" a tih chuan chhung lamah hian sawifiah thiam loh,thil mak deuh a rawn awm.

Ads click