KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA







CHAPTER 7





“Sam, keichu ka zak e" mipui an tam si, khua an in hnaih bawka an rawn kal tam viau lehnghal. “Zah a ngailo, thingpui semtu ah tal pawh i tangkai dawn a lawm, hetah hian thu ang, in pa awm loh chhûng chu i bulah ka lo awm reng ang" a tihchuan ka nuihsaka, nula ho lah chuan kan lam an rawn en zauh zauh reng mai.








Reivak lo ah Valpuia te ho pawhin min rawn pana, “In lo kal ve maw? Mikhual kan sem lawk a lawm mawle, Sam nikuma duh deuh tu che kha a rawn kal leh ania aw, pi Hrili te inah kan daha, a zawng nasa che" Rengpuian a rawn tihchuan Samuela chu a khi suk ringawt, hepa hi chu hmeichhe lam hi a ngaihsak thlâwt lo, star tu a ngah tehlul nen.









“Tiru, midang kârah sawn va awm ve ang u" Kimbawihan a tihchuan ka lo ner saka “Va kal rawh u, hetah kan lo awm ang" Samuela chuan a ti thunga, midang chu an chet hlak mai. “In mak emai, mikhual in hmuak ve a in inkhung bo tlatin" an tihleh chuan Samuela chuan a kut a lo vaia.








“Nunui hian mi kara awm nuam a tiloa, nakinah kan lo kal ve mai ang" a tih takah chuan min ti lui duh ta em lova, Sama chungah chuan ka lâwm takzet, dik tak chuan tlângnêl ve tawh viau mah ila hetiang anga mipui tam karah chuan ka la ngampa chiah lo bawk nen chutia in lan tam loh pawh chu pawi ka ti vak lo.







Valpuia te ho an kalsawn takah chuan Samuela nen chuan eng eng emaw sawiin kan titia, keimah zawkin zawhna ka nei char chata, chu chu min chhang zawk a ni ber mai, a hranpa in a tawng tam miah lo. Mikhual chu an rawn thlen belh zela, keini pawhin panga vel lai chu kan nei dawn tih ka hre mai.







Sama nen chuan kan mikhual tur te chu kan in lamah chuan kan hruai zuia, nu Chhingi chuan a lo be nghal sawk sawk bawk nen rei awm lovin kan chhuak leh ta thuaia. “Zân chu min rawn sâwm rawh aw, fellowship vêlah pawh i bulah ka thu dawn a nia" ka tihchuan a bu nghat nghata..







“Ka bula thut loh pawh chu i va hlau awm ve, min lo nghah angai ang" a tihchuan ka beng thlawpa, ala nui huk huk zui lehnghal. Ka khawng fawk châk thin, “Ngeiawm viau suh,Vâlpuia te bulah kal dawn ila hmeichhia zui an tum bawk si, an hmeichhe zuina dâl ka duh lo a lawm" ka tihchuan min rawn en zawka.







“Keipawh hian ka zui ve duh mai thei asin, nangmaha tlat i hreh viau em ni?" a rawn tih veleh a vang chuan ka lawm lo lek lek mai. “A pawilo, zui rawh keimahin ka kal ve mai ang" tiin ka kalsan hlawk hlawka.







“Hey ding teh, titau nghal ngawt thin suh, ka fiam che a nihkha. Inkhawm ban rualin ka nghak nghal dawn che a nia, mahse rimawi tumtu lamah ka awm rih angai dawna, chu mi chhûng chu min lo nghah angai ang" a tihchuan ka bu nghat nghat ringawt, nghah pawh ka pawi ti lem lo, Vâlpuia te khan musical instrument lam a thiam zia an sawi tak kha mawle.









“Min runluih ziah a nihkha, sual lutuk mai. Kal ang" tiin ka kalzuia, ka sîrah rawn kal in a nui vur vura, ka dârah a rawn kuah thawk mai. “Sam i hmingpum hi ka la hre miah lo ania" tiin ka en chho ha a, a sâng bawk si a dar ka chen tâwk a ni.








“I va tâwng ve" tiin ka chalah chuan a rawn nawr vaka, “Eng nge min hrilh ngai hleinêm, sawi ve mai la" tiin ka tûm hmaka, a nui nghal hawk hawk mai. “Savawm lungawi lo i ang" a ngalah chuan ka chhuih nghal tawk mai.







“Min tilui ziah suh aw, ka kâwm duh tawh lo mai ang che"a nui nasa zual sauh “A nihchuan tunah pawh kan in kawm tawh loh mai a ngai a nihchu" ti a kal a tum chu a hnungah chuan ka pawhsak tâwng tâwnga, “Sam" ring zet chuan ka au that mai, rawn in herin a ding chata, a nuih a la zat hmel hle bawk. Kei erawh ka lungawi lo tulh tulh thung.









“Samuel Malsawmkima ka ni e, theihnghilh tawh miah suh. I lungâwi tawh em? Kal ang le, i thinrim tak ngial dawn" tiin Biak in lam pan chuan kan in zui leh hnak hnaka, rei hmuak tawh lovin mikhual rawn kal turte an rawn kal zawh takah chuan kan haw sap sapa.







“Zân chu lo in chei viau rawh, nula hmeltha lo bulah ka kal duh miah lo ania, min star tu te an hmeltha si" ka ngei lutuk chuan kuai kûnin a hnungah ka chum awk awka, “Aiah! Ana! Ana lutuk! Ka tlâwm....." tiin a au ta chûla, ka duhtawk ta hrama, tinge min runluih peih em em le.








“I hmeichhe duh chu a rawn kal ve a nimaw? Min tihluih reng ni, min hrilh ngei ngei ang che" ka tihchuan a lu a thing nu nu a “A rawn tello, zawng mahla i hmu lovang, ka hnaih takah a ni a awm ni" a hmel chu a danglam leh vek tawh, a mitmeng chu a cool ruiha, ngaihtuahna a hmang tih hriat takin hmalam chu a en vang vang bawk.








“Sam hrilh mai la, tinge i zep renga?" tiin a kutah chuan ka vuana, min nuih sakin ka biangah chuan a rawn piaia “Ka sawi tawh kha, mi ngaihzawng lo va chuhpui ka duhlo, a hlim hmel ka hmuh chuan ka duhtawk" tiin a kalzuia, a hmeichhe sawi ziah hi hriat ve ka chak. Hetiang mipa fel leh hmeltha lutuk hi engtin nge a duh loh theihzawk, hmeichhe â tak a niin ka hria, mahse keimah ang hi a nihchuan dem theih pawh a nilo.








Kan duh miah loh te hi chu duh luih tum a har ve em bawk a ni.





A hnungah chuan zuiin an in pengah chuan kan in mangtha zuia, ka en zui vang vang mai. Kawm a nuama, amah a fel bawk nen ani ang thian ka nei thei chu ka lâwm bawk, ka theihna lam a nih phawt chuan ka pui hreh heklo, a hmeichhe duh lah chu a sawi duh thak lo lehnghal.








Ina ka haw chuan kan mikhual ho pawh an lo intifai vek tawh a nih hmel, nu Chhingi chu rawng an lo bawlpui mawlh mawlha, mipa pahnih leh hmeichhia pathum an ni a, an fel hmel hlawm viau mai. In buai ve in ka va pui ve thuaia, an tawng duh bawk nen reiloteah kan in nel zui thuaia.








“Helai mi i nilo em ni? Kan va hmu ngai lo che" an tihchuan ka nuih saka, ni e kumtin khawmpuiah an in hmu hlawm dawna, an in hre pawh tawn viau ang chu. “Um Aizawl lam mi ka nia, an khaw middle school ah hian ka thawk ve a" ka tihchuan an bu nghat nghata.







“Ka ring renga, i vun ano bawk nen i hmeltha bawk sia u Rema hian a en vung vung reng mai ang che" a ringhal fawk mai “Dawt vek a nihkha, Lalnunsang dawt hlir hi sawi loh tur" a mipa pakhat zawk chuan a rawn ti zung zunga, kan nui ho dar dar mai, a zah hmel em em lehnghal, a thiante ho chu rum zet hian a en leh tawp thin, an mizia chu ka nel chi tak an ni.









Chutia che ho bawrh bawrh ta chu rawng chu bawl zo thuaiin pawnlamah kan in kawm khâwma, fiamthu an duh bawk nen kan nui ho bâwk bâwk mai, “Taka Nunu, Samuela nen khan in in kawm thin em ni?" Sangteiin a rawn tihchuan ka lo bu nghata.







“A van tha, zan chu in zui ang u aw" a tizui ngeia, an lang tlang bawk sia an bula awm a nuam zual. “In thup ve thin rawh, nikumah pawh" a ka chu Sangtei chuan a hup sak nghal vat “In sual, a chhelo ka tive a nimai a lawm. A cool si, awi fellowship naa a guitar perh ka hmuh atang khan a pa hi ka ti hluah hluah, nula dang pawh khan an duh em kha, Zosangpuia pawh kha a hmelthat zia kha" an la ti deuh deuh.








Chutia u Sangpuia an rawn sawi chhuak chu ka ngaihtuaha, ka ngai veng veng mai. An thleng tawh angem tih te chu ka ngaihtuaha, an thlen ve tawh chu ka ring. Chanchin min rawn hrilh tur thu a sawi avang khân ka be duh lo kha a nia.







Chaw ei lai te chuan kan titi bawrh bawrh hlawma, an tlangnel sa tawh bawk nen kan hlim phian mai, u Sangpuia pawhin message in an thlen tawh thu a rawn sawi thlapa, zanah ka be mai a niang chu.





Chaw eikham chuan hmeichhe ho chu che sawk sawkin thleng chu ka hnial chungin min silpuia, nula fel tak an niin ka hria. Mikhualnaa awmdan tur an hre phian bawk, hmeichhe thenkhat hi chu mikhualnaah awmawl tum tlat, lên nuam ti em em hi an awm ve tlat zel.








Kan vai chuan insiam rualin kan in cheia, kan titi pah bawk. Samuela pawh a rawn thleng tawh a nih hmel, Sangtei lah chu a phi chung mai. Ka tihpui nghe nghe dawn emaw ni, room atanga kan chhuah chuan mipa ho chu an lo in kawm khawma, Samuelan min lo hmuh chuan tlaia a thusawi ka hre chhuak zawk mai, ka taksa chu ka lu lam atanga en dan danin a nui ta suka.








“Kal ang u, fellowship-naah pawh in zui dial dial ang u aw" tiin kan in zui chhuak hlawm, “Thu i awiha a tha e" ka bengbula rawn ti sur sur tu chu ka nghawk zauha “U Samu, zanin fellowship naah i kal leh ang tiraw? Awi i guitar perh thiam lutuk hi ka awt che, electric guitar i perh kha chuan maw khawpui tlangval ai pawhin i nep miahlo" Dinsiami chuan a rawn ti a, Samuela chu a lo nui hak mai.







“Aaa...kan ti ve thei naw naw chauh a lawm, tumah kan tluk thei nang. A thlir tu leh a entu a zir te a nia" tiin Biak in kan thlen dawn takah chuan an ngawi zui diaka, Biak inchhungah pawh kan thu tlang thap mai, mi kan tam bawka a hnunglam bak kan chang lo nen thut tlan a pawiloh thu an sawi miau sia kan thu tlang thapa.









Samuela lah ka bulah bak a thu duh lo bawk nen keipawhin ka hnial em em biklo, keimah zawkin ka sawm hmasa miaua, kan hma a thu hmeichhe pakhat lah chu a rawn hawi ngun riau lehnghal, Vâlpuia thusawi kha ka hre chhuak zawk mai.







Hla chu kan sa ho thap thapa, Sangtei zai sual leh thin chu nuih rin chi a ni silo, in sum tunin kan nui leh thin. A nilah a solfa a thiam loh an sak fuh phei chuan a aw a lang bawk si kan bula thu ve te pawh an nui tut tut mai.






Inkhawm banah chuan Vâlpuia te ho pawh ka hmu ve hram, nula pathum an zuia, mi pawh an hre chang tawhlo, la tihluih hlak chu an ngai dawn a nih hi.







Fellowship chu tan nghal an tih avangin an hall lam chu kan pana, a hmasa lamah thu in Samuela erawh stage ah a thu chho rih thung, ka bula thut a duh avangin a thutna tur chu kan zuah saka, mi pawh an rawn pung chak viau.








Hla chu la in kan zai dap dapa, an rimawi tumtu te pawh an thiamin hmuh an nuam, Samuela chu an sawi ang tak takin a lo thiam takzet e, a mah a cool bawk nen hmeichhe ho chuan an en duh viau tih ka mitin ka hmu ve reng, keilah hi ka hawkdak nasa mai sia.








Programme an tana, solo apiangin Samuela chuan a guitar a perhsaka, a dinpuite zingah pawh a langsar viau, hepa hi chu u Sangpuia awm lo se chuan keipawh hian ka vei viau ang. Het! Ka ngaihtuahna mai mai chuh, ka thian anij hi ka thiantha, a electric guitar peth hnehsawh leh rang lutuk bakah a mah a cool bawk nen nula ho chu an au dual dual reng mai, a changin solo ho chu a lo sakpui veleh zeuh thina, a zaithiam phian lehnghala, hepa hian talent a va ngah em em ve.









Thusawi lam an tih takah chuan kan bulah chuan a rawn thu thlaa, nula ho in an rawn en zui dak dak mai.






“Luck bik ve, Vâlpuia te sawi kha a dik a nih hi, duhtu i ngah hmel riau, ka thianpa hi nula ho in an en reng sia a bula ka thu te hi tute emaw chuan min tuk thluk an chak viau ang" ka lo tih sa sa chuan ka malah chuan a rawn hmer tawk mai, huiham hepa hi chu min tiahpui fiam ziah mai.

[mawitei bawihtlung]

KA HMANGAIH THINGTLANGPA






CHAPTER 8





“Le!Nunu i hun a ni e" an rawn tihchuan phur lo zet chuan ka chhuak hnak hnaka, buara chu la in ka kawng a chin hnuailam chu ka thuna, intlansiak tur a ni bawk nen kan position nalh lo lutuk tur ka ngaihtuah chuan ka zak hluah hluah mai, mahse chak ngei chu ka tum thung.






“In in ring em?" referee chuan a rawn tihchuan kan hmalam chu chiang takin ka ena, ka buara chu ka chelh nghet sauh bawk, chutah free a rik takah chuan kan sawt phei ta auh auha, mipui lamin min lo au phur bawk. Vâlpuia te ho pawhin min lo au nasa mai, ka ning deuh chuan chelh nghet sauhin buara chhung atang chuan ka tlan zet zeta, mipui an nui dur dur bawk. Vânneihthlak lutukin pakhatna ka ni hlauh mai.







Samuela chuan min pawm lawpin min chawi kâng nawlha, midang chuan min rawn bawr ve bawk. KTP thil tih mah nise a branch ang theuhin an tang bawk nen chutia an lawm lutuk chu a âwm lo love, a tawp zanah lâwmman an la siam dawn zui, pakhatna nih kan tum tlâng theuh miau va, in el na hrang hrang kan nei chho a, chak châng leh chak loh châng kan nei ve bawk.








Mahse a tlangpuiah kan branch ti tawh mai ang, chu kan ti tha berin ka hria. Infiamna lam an thei hlawm phian, bakah branch thenkhatah in la no tawk an lo awm bawk nen an vanneih phahin ka hria, Samuela nen chuan kan in zui leh chawta, an vur sen zawrh lah kan ei tam dun khawp mai, a ni pawh mipa e tilo in a hmui leh lei chu a sen tha khawp mai, a sexy phian lehnghal. A hmui leh a khabe a phir bawk nen a inhmeh lutuk tlat.









“Football-ah sawn ilo tel ve duh em?" Samuel-an a rawn tihchuan ka lo bu nghata, ka peih zâwng tak a ni bawk nen ka phur viau mai, mipa leh hmeichhia kan khelh kawp vek dâwn a nih hmel, mipa paruk leh hmeichhia panga zêlin.






Samuela nen chuan kan inzui pheia “He mite pahnih hi an in ngaizawng em ni? Awi a zak lo e, amah zawkin Samuela hi a bem hmasa a ni hrim hrim, rawn awm thar ve chiah si Samuela te thian ho nen an inzui nghal a nia, a awm duh dah hmel" lo titute aw ka hriatna lam chu ka melh zawka “In hriatchian loh thilah engmah sawi ve tawh suh u" tihrepin Samuela chu an hmuh lai kher chuan ka kaia, a nipawh a lo nui suk mai.







Ni e, heng ho hian an duh ruk zia hre miau hek, u Sangpuia a awm lo bawk a runluih hrep hlawm teh ang. Nula KTP a inhmang ve si mi rêl peih de daw hlawm lutuk mai.







Inkhel chu ṭanin pawnlamah a tel velo ho in mahni branch-ṭheuh ṭan chuan an lo au dur dura, keini ho pawh ṭang ve ve ta na na na chu mipa pawh ball kan chuh a, kan nui pah bawk. A ṭhen lah mipa chuh hneh heklo, mipa kawr leh kekawra lo pawh sak tawk lah bo lo, inkhelh ka neih tawh zawng zawngah chuan a nuam ka la tiber, bakah a thingtlang mite hi tam takah chuan an nelawma, Mizo zia hi khawpui mite ai an la chhawm nung tha bawk nen an kianga awm nuam ka ti viau mai.








Rengpuia pawh a tel ve a, a uang thei bawk nen lehlam hmeichhe ho chu an rak leh ṭhat ṭhat ṭhin, a kut a hlei zuk zuk khawp mai. Chutah, kan lamin kan pet goal chuan kan au vak vaka, kei phei chu field-chhûngah ka zuang tawr tawr mai, Samuela a pet goal tu a la ni zui.









First half zo in kan châwl zuaia, a hnuah lût leh in ka chau ve tawh bawk nen ka tlân vak vak thei tawhlo, midang erawh an la chau ve lo nge an la tlân chak thei phian mai. “I chauh viau chuan tilui suh aw, saw min thlâk tu tur an awm reng a nia" Samuela chu ka bulah rawn kalin a rawn ti a, ka lu ka thing na na mai.









“A tawp thlêngin le, ka nawi bik an ti lutuk palh ang" tiin ka nuih ver vera, a Cap chu phelhin min rawn khum tira “Ni a sa lutuk, in atang khum rawh ka tihlai khan khum mai tur che a nia" a tihchuan ka nuih ringawta, ni e tel ve vak ka lo tum lem lo bawk nen ka khum duhlo a, mahse a hmun thlen takah chuan ka phur leh bawk nen ni chu sa duh tak chu a ni.








“Tel ka in ring lo êm a lâwm" tiin ball an rawn khalh phei chu ka lo danga, pet na ve thei heklo, Samuela chuan min rawn pet sakin a khalh phei zuia, ball awm loh lai chuan field ah lo thu in ka inzap hauh hauh mai.







A tâwpah chuan kan chak ta hram e, haw phak phak hlawmin u Sangpuian min rawn call avang chuan phur zet chuan ka la zuia “Hello" thaw hliam hliama ka tihlai chuan lehlam atanga a rawn nui suk ri chu ka hre nghal zat mai.







“I va châu awm ve" a rawn tih dam dup chuan ka lei chu ka chhuah zuka “Nia ka inkhel ve a" tiin ka sira kal “Chhe zêl zûl mange" min lo ti tu chu ka chum pah bawk, tawng thei lutuk hepa hi chu ngeiawm thiam lutuk mai. “Um Monday ah ka lo haw thei tawh dâwna, ka sawi kha mipa ilo hnaih em?" a rawn tihchuan Samuela nen bak kan in zui loh thu ka hrilh chuan ka fel thu a rawn sawi ngeia.







“Mahse ilo haw har lutuk chuan bialpa dang ka lo zawng duh mai thei a ni" ka tihchuan a rawn phun nghal hluk mai “Zawng vaih teh, a lêt ana viau ang, ka ta i nih kha" a rawn ti tawi tûka, ka nui nghal hak hak mai. “Lungngai suh, ka hmuh phat atanga ka duh hi ka phatsan thei nâng che, bakah i naute ho hian min vêng hneh lutuk, tiraw Sam" tiin Samuela lam chu ka hawia.









“Aih, a lerh lutuk vawiinah pawh mipa panga vêl a bia" hepa hi! Awi! Ka ngei lutuk “Dâwt dâwt sawi suh, u Sangpui dâwt vek a nih kha" tiin Samuela chu rum zetin ka melha, a ngaihpawimawh loh hmel em em lehnghâl.







“I lerh ka ring tlat" u Sangpuia lah chuan a la rawn tizuia, awi ka ning he mite pahnih ngeiawm lutuk hi a, “I sual, ka dah dâwn sual lutuk mai" ka tih takah chuan rawn nui hawk hawkin phone dah lo tur chuan min tizuia.







“Min ngai miah lo em ni?" a rawn tihsup takah chuan phone chhan mahnise ka lâi leh tawh “Um...." tiin ka ngawi daiha, “Bawihpui, um tih chauh maw ka chan dâwn a" a rawn tih leh takah chuan rang zet hian “Ngai che e, nangmah zawkin min ngai lo a nih kha" tiin Samuela lo nui pâwt pâwt chu ka chhir leh tawk mai.








Samuela chuan “Ka pên san tawh mai ang che, in pa i be tui si a min hre chang leh tawh lo emai" tiin an in lam chu a pana, ka dang duh ta lêm lo. U Sangpuia chuan rawn haw vat a châk thu leh min ngaih tawh thu chu a sawi ve sup sup a, keipawhin zêp loh chuan ka ngâi takzet, kan nihna la reilo mahse ka duh êm avang hian a niang a hmel ka hmuh loh chuan ka ngâi tih piahlam a ni.









“Lo haw vat rawh, i tello chuan a reh" tiin kan in thlen hmâ pêngah chuan ka ding chawl riha, “Aw le, ka lo haw vat ang. Eng nge ka lo hawn ang che" a rawn tihtakah chuan “Nangmah, chuan a dang chu i duh duh a nimai" ka tih takah chuan a rawn nui ve hawk hawka “Aw le, ka lo hawn ang che, min lo ngai reng rawh" a rawn ti dam dapa, biak hi a nuam ka ti thin.








Miin mi thinchhe tak leh nêlawmna neilo an ti ṭhina, mahse ka kiangah erawh tawngkam vin emaw, a thinrim hmel emaw min la hmuh tir miahlo thung. Hei hian miin an sualna lai chiah hmu lo a an ṭhatna lai hmuhsak a ṭhat zia a tilangin ka hria, mi nelawm loh kan tih te pawh hi an bulah awm in han kâwm ila an mahni zâwnah nelawmna lai an lo nei tho, kawm chiang ila mi fel leh rilru tha tak an lo ni leh daih thin tih hi.








“A nih ka dah phawt ang aw, zanah ka lo be leh ang che. Nuam ti tak khan lo hmang la, i thil tur chu kan lei sa a nge" a tihchuan ka lo aw ve mai bawk, kan dah hnu chuan muangchangin in lam chu ka pana.







Sangtei te ho pawh an lo in tifai leh vek tawh a nih hmel “In haw hma a nimaw? Ka hmu miah lo cheu, in va phakar ve" ka tihchuan an nui hak hak a “Aw...in la in khêl sia kan lo va haw mai, lo in tifai ve vat rawh rawng chu kan lo bâwl ang" an tihchuan hnial bik lo in ka room lamah ka luta, ka inkhel ka tang bawk nen ka thlan rim chu tlen fai vat ka duh.






Hun te pawh liamin meet pawh chu kan hmang zo ve ta a, u Sangpuia rawn hâw ni a nih avângin a a phur pawh ka phûr, eng tak min rawn hawn ang maw?





Naupang ho chu ka zirtir leha, ka hlim bawk nen ka ni hman pawh a fuh viau “Miss u Sangpuia nge u Samuela i bialpa" mipa naupang tih dâwnin tleirawl tan tawhin min rawn zawh avang chuan ka en vata, midang chuan an lo khap vat bawk.







“Naupang in la ni tlat, hre ve lo phawt mai rawh u. A hrim hrimin ngaihzawng lam ngaihven rual pawh in la nihlohkha" tiin ka nuihsanga, an naaa vak lehnghâl. Tunlai naupang pawh hian ngaihzâwng lam hi an hre hma ta viau mai, khawvêl changkanna in a ken tel nimahse zirna lamah tlak chhiat pui an tam tawh bawk nen a tha ka ti vak lo.









An class atanga ka chhuah hnu chuan u Sangpuia chu ka call a, vânneihthlâk lutukin a rawn chhâng hlauh mai. An rawn thlen ṭêp tawh thu a sawi chuan ka thaw huai mai, zin reilo mahse ka tan chuan a rei lutuk tlat, bakah kan pahniha hun hman dun em em kan la neilo, a kianga awm hi ka thlahlel ngawih ngawih ni berin ka hria.









School naupang ho chu in lama tih tur ka pe veka, lehkhazirah an tlahniam in zâna an lehkhazir ri hriattur avang bawk nen tlawh chhuah zeuh zeuh an ngai ang, hetiang chuan exam hunah result kan nei tha theiin ka ring lo.







Zanlamah chuan u Sangpuia lo lên hun chu nghakhlel takin ka lo thlira, zanin chu Samuela te ho an rawn lêng lo ve teh khiah mai, eng nge an hriat dâwn ni. Nge ni a u Sangpuia a lo haw tih hria in an rawn lêng duh lo nge mawni, in lak zei hi an tum ve thei bawk sia.







A tâwp a tâwpah chuan u Sangpuia ngei chu kan kawngkhar rawn hawngin a rawn lût ta zân zân mai, ka insum zo lo thelh a ni. Nu Chhingi lah hian u Sangpuia a ngai theilo bawk nen a mu lut leh daiha, pawilo kan pahniha inkawmna hun a nimai.








“Lo thu rawh, thingpui ka rawn thlit ang che" tiin thingpui chu thliin a bulah chuan ka zuk thu a, “In rawn thleng tluang thei maw?" ka tihchuan a bu nghata “Kha hei hi, mahse i mut hunah chiah en rawh aw" tiin bâwm lian ve deuh tak chu min rawn pe a, ka hlim ngei mai. Eng tak chu min rawn hawn ang maw?









Kan pahnih chuan inkâwmin kan nui leh hak hak ṭhina, a bula awm chu nuam ka ti takzet bawk. Ka hlim em vang nge mawni sana te chu a kal chak riauin ka hria.






“Ka haw phawt ange, naktuk zanlamah ka rawn lêng leh ang, muttui phawt aw" a tihchuan pawn thleng ka zui chhuaka, a kal hma chuan min fawp leh vang vang phawt a, nui var varin a kal liam thleng chuan ka kut chu ka vai lauh lauha, a thil min rawn hawn kha ka hre chak tawh bawk nen inchhungah chuan lûtin kawngka chu ka kalh zuia.








A thil min rawn hawn ka khuma ka phawrh chiah chu ka nui phuh ṭhawt mai, barbie a lo hâwn a nihchu! Hepa tak hi chu aw, a va han zeilo em em tak. Barbie lâwm rual lekin min hmu em ni le, a eitur rawn hawn erawh a zia viau, chocolate tam zet hi a nia. Chu zawng aia ka lawm chu a a barbie min hawn ber chu a ni, a sam a sei em em lehnghâl, keimahtê chuan ka nui leh kar kar thin, a zeilohna tak hian min ti hlim em em zêl chu a nisia aw.

[mawitei bawihtlung]

KA HMANGAIH THINGTLANGPA





CHAPTER 9






“Good morning" ka thawh veleha ka message hmuh avâng chuan ka nui var var mai. U Sangpuia min thawh khalh vawikhatna a ni, wish let vatin ka tho chhuaka, bathroom lamah lûtin ka hmai phihin ka ha chu ka nâwt zuia, ka chhuah leh chuan u Sangpuia pawhin min lo chhang leh tawh. Ka call nghal vat mai








“I thil min hawn kha ka lâwm lutuk aw, lawk. Tinge barbie ber kher kha min hawna?" tihchu ka zawta, a rawn nui hawk mai. “Aw, ka duh a lawm. A nalh ka tia, bakah hmeichhe naupangin an toys duhtak an nei ang hian ka tan chuan ka duh ber i nia, chuvângin ka lei che a nih kha, kawl ṭha reng rawh. Mipa dangin an bialnute an pêk angin a hlu ve lo ang tih ka hria; mahse ka tan chuan kha barbie ang chiah kha i ni, i duhawma, min hîp em em bawk" a rawn tihchuan ka nui seih mai.









“Nilo e, ka lâwm lutuk, ka zawh chhan che pawh mak ka ti deuha; mipa dang min pek ai chuan ka duh tho tho a nia aw, ka lo kawl ṭha reng ang. Uluk takin ka enkawl bawk ang" tihchu ka hrilh ve a, “Vawiin eng nge i tih dâwn?" tihchu zawh zawmin room aṭang chuan ka chhuaka.







“Lo lamah ka feh ang, hlo thlawh a hun leh tawha. Zawh fel vat angai, thawhpuitu ka nei silo va, midang rawn tih hma a lo ṭan vat a ngai" a tihchuan ka hrethiam viau mai. Ni e a nu leh a mah tlawng an nia, a nu lah a upa ve lam tawh a ni nen a pui thei vak dâwn lo tih a chiang reng, School chawlh lai chu nise ka feh ve tûr a nia.






“Dam chuan inrinniah ka lo feh ve ang" ka tihchuan min hnial vat, mahse ka tihluih ve tlat avâng chuan a rem ti ve mai bawka. Phone dah hnuah nu Chhingi bula ka va ṭhut chuan min lo en kar mai “Bawihi, ka fanu ang chiaha ka en i ni a, i mipa kawp tur hi ka dang thei hauh lo che a. Mahse he khaw mipa a sûlhnu nei chhe ber mai i kawp hi chu ka duh vak lo a sin, miin an sawisêl nasa che a nia, hetiang hriatreng hi ka tan pawh a nuam lo a sin, mipa dang tam tak an awm mawle" a tihchuan ka chhâng mai lo.









Ni e, a ngaihdân pawh chu a âwm tho mai. U Sangpuia a duh loh zia chu ka thlen hlim pawh khân a lo sawi tawh a nih kha, mahse, ṭhen phah nâna hman ka tum lo. A engkim hre sa a duh ka ni a, ka ṭhen mai mai lovang.







“Nu, u Sangpuia hi i ngaih ang vek kha a ni biklo a sin, amah hi belchiang la i hre mai ang. Midang ngaihtuahna a ngaha, miin an sawi ang ai hian a fel daih a sin, ka lakah mai nilo Samuelate ho lakah pawh hian, i hmu ve in ka ring. Mi hian sual lutuk chhuahin an chhuah laklawh mai mai a ni, mipa chu in sual châng a awm lo theilo va, chûng avanga misual lutuka an chhuah kher hi a dik lo a ni" tisapin mei chu ka chhawm ṭhaa.








“Aw le, mahse fimkhur la ka duh, mipa ṭha lo avanga i nat ka phal lo a nia, ka fanu ang i ni a. Mipa lakah hian inneih hma chu in phal loh tur, mipa hi chuan an zia hi in ngaihzâwn lâi chuan an thup thei hle a nia" a tihchuan ka bu nghat nghata, ni e helamah hi chuan fihlim hram ka tum bur mai.






Chutia nu Chhingi berin min pawmpui tâkah chuan ka zâng hawk hian ka hria, Vawk chaw chu pe tûrin ka chhuahsan zuia; tûnah chuan ka zei ve viau tawh mai, a hma kha chuan a kalkawng chhe lutukah ka tawlhthlu ṭhuai tawh a nih kha.







“Rî te, rîte" ka tih lai chuan chaw ngên chuan an rawn hram nghal chûl mai, a chaw kuangah chuan ka dahsaka, a hap per leh chuai chuai tawh mai. Mi hi a ti berh ngei ngei chu a nih hi.






“Lalhminghlua ding rawh" class ka la chu lo mu thlu an awm leh pek tawh a nih hmel. Tûnlai naupang tam tak hi chuan lehkha zir hi an tum hlawl lo a ni e, a châng chuan dawh rengte hi an har ka ti ve ṭhin “Class lâk laiin lo muthlu tawh suh ang che. Pâwnah sâwn chhuak la, schoo-hi vawinga tlân hêl ang che" ka tihchuan peih loh hmel zet chuan a chhuaka, ka en zui reng bawk.








Class 7 leh 8 chin hi lerh hre ṭan an ni bawk nen a hmeichhia a mipa hian an buaithlak khawp mai, keini hunlai tive khanglang ila kha chuan hetiang ang hian kan awm ngai miah lo, kan la mâwl em em ṭhin a nih kha.








“Lehkhazir hi a hahthlak tih ka hria, mahsela in hma hun zêl ngaihtuah rawh u, kuthnathawh hi a la hahthlak fe a nia. Lehkhazir chu tunah hrehawm rih mahse nakina in nun nawmna tur a ni tih hre reng rawh u, lehkhathiamloa awm hi tûn ang laiah chuan a zahthlak tawh a nia. In rawn puitling anga hna neiloa awm hrehawmzia leh zahthlakzia in hre chho zel ang, chumi pumpelhna atan chuan tûn huna in lo zir ṭhat hi a pawimawh tih hre reng rawh u, mi ropui tam tak in zir te, in hmuh ho te hi nuamsa sa in tumah an awm lo, nasa taka an beih hnuah an hlawhtling mai zawk; tin exama a ti tha ber pathum 500 ṭheuh ka pe ang" pawisa ka neih vang a ni hauh lo, lehkhazir taima se a chhe lam zâwng nilovin lehkhazir lamah in el se ka duh vang a ni.





Ka thusawi avâng chuan an au nghal dar dara, “Le zir tur ka pek cheu kha byheart phawt ula, a thiam hmasa sa in break thei ang" ka tih leh takah chuan phur zetin an zir zuia, an duhnaah chuan an rilru a chak zia ka hria a, an zir peih ṭhin loh avâng hian test naah an fail ṭhin mai mai a ni.




Ka sawi ang tak takin hun an duh reilo kher mai, a huhote chuan rawn in zâwtin an sawi zawh rual chuan an tlanchhuak nghal zela, ka nui hak mai. Tha za rual lek an ni bawka, a âwm lo hran lo, kei ngei pawh tun thlengin ka la awm mai mai theilo miau a.



ZAWMNA...






School kan bâng chu haw lamah Valpuia te ho hnathawhna hmunah ka va kala. An lo ri chel chul mai, tui an siama. An bul ka va thlen hma chuan thingkung chu a lo che luih luih mai, Rengpuia a lo au chul bawk.






“Lalchhan.....him.......ka tla dawn...awn.....awn...." a au chûl mai, a ni thingkung sang lutuk loa lawn chu midang chuan an lo sawi vak vak chu niin a thinglah a lian lem silo, Rengpuia chu thingkung chawp chuan a pum nghin luai luai mai, ka khawngaih lutuk. A kungah chuan a in pawm tang ṭai mai, ka pan phei vata.







“Duhtawk rawh u, in sawi tla dâwn alawm, Valpui in â emai" ka tihchuan an duhtawk ve hrama. “Eng nge ilo tih dâwn? In pa a rawn lêng lo em ni?" Kiman a rawn tihchuan ka ner nanga.






“Eng nge u Sangpuia vang chuan min kawm tawh loh in tum em ni?" ti hlakin Rengpuia rawn chhuk thaw hlawp hlawp chu ka pana, “Mi mawl ho, min thah in tum em ni? Ka bân te hi a na vek" tiin a mu zuia, “I phu tawk chiah a nih kha. Ṭhiante tihder hrat lutuk mai" Valpuia bawk chuan a lo ti leha, Samuela ka hmu miah lo.








“Kan ṭhian i ni tawhlo kan tilo, mahse in pa in a hauh na em che a, Samuela nen an insual phah ṭep lehnghâl" a tihchuan mak ka ti ngei mai, “Enga? Enga tinge? Khawiah nge Samuela chu?" tiin ka zâwt nghal sawk sawka.







“In pa kha midangin dâwt an lo hrilh ani ang, Samuela nena in ngaizawng angin an lo hrilh a nih hmel. Samuela phei chu a lâwm lo teh a sin, i bialpa chuan engmah a hrilh na che nge?" an tihchuan mak ka ti takzet, u Sangpuia khân engmah min hrilh hauh lo, engvanga chutiang thudik lo chu lo awih nge a nih ang. A hma pawhin ka hrilh vek tawh si a.







“Engmah a sawilo, Samuela chu a ṭha em?" ka tihchuan Rengpuia chu rawn ṭhu chhuakin “Ṭha lo ṭha lo, a thinrim lutuk a hmu duh tawh lo hial mai thei che, in pa in a tihdan ah khân lâwm chi ni hek lo, lo ngaizawng ve tawh lo tur che in a hrilh a nih hmêl" a tihchuan ka rum haka.








“Keimahin ka lo sawipui ang, ka tan chuan ka ṭhiante vek in ni a, ani nen in inkârah duhthlan tûr bik ka neilo. Ka tân in pawimawh ve ve, khawngaihin in haw miah suh u aw, zânah pawh lo lêng ziah rawh u. In tello chuan ka awm anuam theilo a nia, ka haw phawt ange" tiin in lam chu ka pan hnak hnaka, engvanga u Sangpuia chuan chutiang thil chu lo ti nge maw a nih le?









Zanah u Sangpuia leh Valpuia te ho chu an rawn lêng ta ngeia, mahse Samuela erawh a rawn tel hauhlo, ka awm a nuam thei miah lo bawk. Ka ṭhian kawm ber a ni a, ka chungah a lungawi lo takzet a nih ka ring, midang pawh chu zan dang ai an ngawi chawia, fiamthu pawh an thawh ṭha peih meuhlo, mahse a thawveng chi hrim hrim an ni bawka rei erawh an ngawi thei hauh lo thung.







An haw hnu chuan u Sangpuia chu ka ko ding riha, Valpuiate ho an liam tâkah chuan ka en nghal kar mai. “Chanchin ka lo hria a, Samuela nen in inti thiam lo em ni?" ka tihchuan a thaw hawka, hmun dang chu a hawi daih bawk. A awm dân chuan thudik ngei a ni tih min hriattir bawk.








“Tinge dawt thu mai mai i awiha? Samuela te chu ka ṭhianṭha a nia, vawikhat mah min duh ang pawhin a awm hleinem, keiai ṭha a hmu ṭeuha, midangin dâwt an lo phuah chawp a nihkha. In ngeih takin awm ang u" ka tihchuan hnuailam chu a melh zauh va.








“Mipa in thu ka tiam tawha, a lo hnaih che kha ka duhlo. A duh tak tak mai thei che a sin" a tihchuan ka thaw ve ta haka, Samuela nen hian vawikhatmah in ngaihzawnna rilru kan la pulo, u Sangpuia ka duhzia a hria a, ka bulah ngei pawh a fak ṭhin a nih kha, u Sangpuia zâwkin hetianga a ngai mai hi a mak ka ti.








“Min duh nise min hrilh tawh ang, u Sangpui, in ngeih takin awm leh zâwk ang u. I awm loh chhûng zawnga ka bula awma nangmah pawh kalsan lo tura min hrilh reng tu a ni zawk a sin. Tinge i âwih duh miah loh va, Samuela hi ka hrechiang, ka tân chuan ṭhian a ni a. A ni tân pawh ṭhian ka ni" tiin an kut chu ka vawn saka.









“Ngaihdam dil rawh aw" ka tihleh takah chuan a rum nghuta “Ka dillo ang, ka haw phawt a nge" tiin a kalzui nul nula, tinge mipa hi an luhlul em em mai le. U Sangpuia ṭhen ka duh lova, Samuela pawh huat ka duh hek lo, ka duhzawng chu in ngeih takah awm ho a ni.






U Sangpuia kal liam chu ka ena, tinge a thu a duh em em le? Thil hrechiang hmasa tur a ni a sin, phone ah pawh be tawh lêm lovin ka mu zuia.








A tûk zingah chuan Samuela te in lam ka pan vata, ka ṭhian a ni a ka chunga a lungawi loh chuan ka hlim thei bîk lovang.




“Pi Sama a awm em?" ka tihchuan room lama a awm thu a sawi chuan ka lut zui vat mai, tukverh bulah lo ṭhu in pâwnlam a melh vung vunga.






“Samuel" ka koh ruala min rawn en chuan a ner nawk tih ka hmu thei, min haw viau a ni ngei ang le.

SANGPUIA

[mawitei bawihtlung]

KA HMANGAIH THINGTLANGPA





CHAPTER 10






“Min hua em ni?" tiin a bulah chuan ka ṭhu thla a, min rawn melh deuh hrawkin a hawisawn leh hmak mai. “Rawn lêng tur i nilo, i bialpa mahni chiah dik inti bulah khân awmla a tawk, min hnaih reng chuan ngaihdan atthlak zet a nei leh palh ange" a rawn tih bung vut chuan ka thaw haka.








“Sam, ka ṭhian i nih kha, u Sangpuia pawh a hriatsual a nih thu ka hrilh tawh a, khawngaihin in ngeih takin awm leh rawh u. Min huat phah em ni?" ka tihchuan a rum nghuta “I bialpa chuan a ring dik a lawm, i ṭhian nih ka duh tawhlo" a tihchuan ka phu zawk mai, a hmel chu ka ena a thutak bawk si.








“Eng nge i sawi awmzia?" ka tihchuan ka lam a rawn hawi thuta, chutah ka hmuiah tak chuan a rawn fawp ta siah mai. Ka ngaihtuah loh lam lutuk anih avang chuan chêt sawn mai nachâng pawh ka hrelo, ka tukkhumah chuan rawn vuanin duhthawh zet chuan min fawpa, chutah harh chhuakin namsawn tum chuan a awmah ka nem vaka, mahse min thlah duh hauh lo.







“Sam min thlah rawh" ka ti deuh ṭhata, mahse a duhthawh zual sauh mai, a tâwpah chuam ka tihngaihna hrelo chuan ka seh ta tawpa. Min thlah chiang ngei mai “Eng nge i hriata? Samuel khatiang thil kha engvanga tinge i nih?" ka ti khur dar dara, a chetdan chuan min ti hamhaih takzet, engvanga khatianga min fawp thut nge a nih ang?








“Kha kha ṭhian kan nih theih loh nachhan chu a nih kha, in pa khân a tidik, keihian ka duh che. Chu chu i pawm dâwn a nih loh chuan min rawn hnaih tawh suh" a tihchuan mak ka ti lutuk, ka ṭhianṭha ber angin ka ngaia, ka laka chutiang rilru a pu ang tih ka hrelo hrim hrim.







“Ka hmeichhe duh kha min zâwt fo a tiraw? Kha ka hmeichhe duh, mi mawl tak i tihkha nangmah ngei hi i ni" tiin za lo zet hian a ṭhen suka, chhân dân tur mai ka hrelo, a mah chu ka melh tlawk tlawk ringawt, a thusawi khan min ti dang vek. Kha a hmeichhe duh a neih theih siloh a tihfo kha keimah hi maw? Ka lu hi a ri mum mum in ka hria.







“Sam, khatiang sawi suh. Ka ṭhianṭha ber i ni a, ṭhian kan nihna angin ka lakah hetiang hian awm suh, u Sangpuia ka duh zia i hria a ni lawm ni?" ka tihchuan a kut a vai hlaka.







“Chuvang chuan a lawm min hlat tura ka tih che. Kha mipa i duh a i thlah theihloh ang chiah khân kei hian ka duh che, chu chu i pawm thei dâwn lo a nihchuan min rawn hnaih tawh suh" a ti tawi tak mai. Sawi mai tur pawh ka hrelo, nilo ka tân chuan a hlu lutuk, kan ṭhian nihna hi tawp lo se ka duh, engvanga hetiang thu sawi thut nge maw a nih le.








“Sam khawngaihin he khuaah hian nang lo thuruk sawia rinngam ka neilo ka tih tawh kha, hetiang hian awm lo teh. Ṭhian kan ni reng thei a lâwm, min huat phah suh ka thinlung hian thlan bik a nei si a lawm" tiin mittui tling parin ka ena, min chhang duh bawk silo. Ka insut faih faih ringawt, ka bialpa ka chân duh lova. Ka ṭhianṭha ber lah ka chân duh heklo, engvanga hetianga dinhmun khirhkhan tak hi tawk nge maw ka nih le?.







“Ṭap suh, a ṭha e ka duhna che avangin i na lai ka hmu theilo, ni e, nangin min duh lo mahla i ṭhian chu ka ni thei alâwm. Mahse, khapa in a tihnat che chuan i tâna ka awm ve theihna hun min siamsak tur a ni, chu chu i tiam theih chauhvin" a tih tâkah chuan ka ṭah nuih haka, ka lu ka bu nghauh nghauh bawk.







“Ka hmeichhe duh hmasak ber mipa dang ta a ni tur chu hrehawm timah ila i hrehawm tihmel hmuh ai chuan ka rilru chu ka thlak mai ania'ng chu, a ṭha em? Chuan ṭap leh tawh suh, kha mipa khân a tina che a nih vaih chuan ka ta ni turin ka bei ve thung ang che" tiin min kuaha, chutianga a awm tâkah chuan lawm zetin a âwm ah chuan beiin ka nui hak haka, hepa rilru ṭha lutuk leh mi ngaihtuah em em tu ka tawng hi ka vannei takzet, hei vang pawh hi aniang ka ṭhianṭha ber ni tura ka duh ni.






SAMUELA POV....







Ka room-aṭanga hlim zeta chhuak chu zuiin tual thleng chuan ka thlaha, ka thusawi avang khan a hahdam hle tih ka hria, ngawi rengin ka enliama. “Mimawlnu, a ni ai khân ka duh hmasa che a sin. Mahse a pawilo ve, a tihnat loh che chuan hrehawm mahse ka tuar mai ang chu, i hlimna ka duh ber, ka duh em che avangin i laka ṭhian chauh nih ka thlang leh chu a nia" ti a phun supin inchhungah chuan ka lut zuia.







Ka pi chuan min lo en leh kar tawh mai, “Samuel mi inkar chu tichhe miah suh ang che" a rawn tihchuan ka lu ka thing nur nur a, “Pi ka ṭhian a nih kha thildang engmah a awm lo. A ni nen kha chuan ṭhian chauh" tiin bathroom ah chuan lûtin ka intifai zuia, ni e Nunui chu ka duh a lawm. Kha mipa ai khân ka duh hmasa zâwk, mahse kha mipa kha a niin a duh thung a nih kha.








A mitmeng hmu lo vin min ngenna hre lo ila chuan engkim huamin ka ta a nih ngei theih nân ka bei ngei ang; mahsela a hmelma ka ni nghal dawn tih ka chian avangin ṭhian anga awm ka thlang pauh a niang chu.






“Bawiha Police lam te hi try la a hma pawhin an hrilh tawh che a, min ngaihtuah avangin hetiang hian nangmah awm suh. Police i nih theih hlauh chuan i pu nen hian kan lawm dâwn a sin, keimahni min châwm theihna tur zawk a lawm. Hlawh i neih te chuan kan tan pawh kan hahdamna tur a ni zâwk dâwn a sin, kuthnathawk reng tur chuan kan pui thei tawh silo chea, i hrehawm kan duh hauh lo ania" ka piin a tihchuan ka nuihsaka, a sawi tam ber a ni.








“Aw le ka pi leh pu duhtak te u, an lak leh dawn veleh ka try ve chhin ang chu. Kumin kum tâwp lamah khan an la leh dawn hialin ka hria, chutiang a nih loh pawhin hnadang a zawn theih a lawm" tiin chaw ei chu khamin ka tho chhuak zuia.








Ni e helaia ka awm reng chuan ka hmeichhe duh thinlung nei thei silo in ka tibuai ang tih ka hlau, chuvang chuan a duh ber bula thlamuang taka a awm theih nân ka awm bo hi a ṭha ber. An bula ka awm ve reng chuan insum zawh loh hun ka neih ka hlau a ni ber mai, ka nuih a za lam lam a mipa zâwkin hetiang khawp hian ka vei chu a ni si a.







Feh tura insiam zuiin ka chhuak a, lo ka thlen rualin a message a rawn lut nghal zat mai. “Thinrim tawh lo la, zanah lo leng ve rawh aw. Ka lo thlir reng dâwn che a nia, ka ṭhianṭha ber i ni a, nang in min hel tlat chuan a nuam miah lo a nia" tihchu, nui sukin ka thaw hawka.








“Ṭhian nih i duha, keiin ka hmeichhia ni tûrin ka duh thung che a, Nuntluangpui he hmeichhe ngaihsak ngailo mipa hi i tibuai hneh ta mange, ka hmeichhe duh ve chhun pawh ka chang silo" tiin za lo zet chuan ka ṭhen saka, thildang ngaihtuah duh tawh lo chuan hlo thlo tur chuan ka chhuak zui ta daiha.





Phone ka dah hma chuan status ah zanlama ka hla sak JH PEKA hla ṬHIAN LUNGDUM tihchu status in thlâm chu ka chhuahsan zuia.



Ṭhiana inchhal chunga i zûna uai ka bang theilo, ka tan a har mange hmalam pan zêl. Tlai ni a lo tlak dâwnin thinlai'an a thar, nang nena lên dun hi a rem ve thei mawlh silo. Nghilh nan che engkim ka hlan tawn loh che ka nuam, min ngaidam rawh; ka vei lo theilo che.



END OF SAMUELA POV...





Samuela status chu ka en renga, tinge min duh? Keichuan a rilru ka tihnat sak chu a ni si a, u Sangpuia ka nei tawh miau si a, a status chu keimah min hmanchhan tih lah ka hai hek lo. Ka khawngaih takzet.







“Tihpalh aw, u Sangpuia tan ka thinlung ka lo pe tawh si a, mahse nang chu ka ṭhian ka engkim hrilh ngamna i ni reng ang" ti a phun sapin class ṭan turin ka kal zuia, class lak lai te chuan ka awm a nuam thei bik lo. Naupang ho hriatthiam loh lai te chu ka hrilh mawlh mawlha, mahse ka rilru ah engdang mah a lut theilo.









Ka ṭhianṭha ka bula awm reng ṭhin in min duha, mahse kei lahin natna bak ka pe lêt silo, thawk la ham hamin pawnlam chu ka ena, tinge kei kher min duh le. Keiaia ṭha keiai fel a hmu reng awm si a, bialnu a nei ngai lo tih ka hria, tunah min duh thu a sawia, keilah heti hi ka ni bawk si.








Class ka lak zawh rual chuan rang zeta chhuakin tui chu ka in vaka, u Sangpuia nen lah an in haw mai si, in rem taka an awm hi ka duh leh takzet. Ka tan chuan an pawimawh ve vea, an pawimawh dân erawh a inang lo mai chauh a ni.






Pakhat ka ṭhian a ni a, pakhat ka ngaihzâwng a ni bawk, an pahniha duhthlan tur ka hrelo va, ka ngaihzawng avanga ka ṭhianṭha ber chan ka duh heklo, ṭhianṭha chu an awm mai mailo an tih fo kha, kan ngaihzawng te chu kan nupui pasal tur te an ni kher lova. Kan ṭhiante erawh kan damchhung in an pawimawh thung, hei vang te pawh hi a niang Samuela nen hian kan ṭhianṭhatna hi tih tawp ka duhlo va, u Sangpuia ṭhen ka duh heklo, ka duh zawng chu a hma anga awm leh kha a ni.









Engkim hi siamṭhat leh vek ka tum ang, zaninah ngei hian thleng se ka ti bawk. U Sangpuia hnênah pawh ka sawi ṭha leh bawk ang, tunge thil a nilo zâwnga lo sawi tu hi hriat ka duh takzet.

[mawitei bawihtlung]

KA HMANGAIH THINGTLANGPA






CHAPTER 11






“Le! Ṭan ang ule, tunge ei zo hmasa ber" tiin kan hmaah chuan spicy tam tham zet chu chhawpin kan ṭhu ṭhapa, u Sangpuia leh Samuela pawh an tel ve bawk. Ka in biak tîr hnu fe ah an in ngeih ta chauh kha a nia.






“Khat, Hnih, Thum" kan ei nghal par para, Kimbawiha chuan a ei ngam ve loh avangin endiktu ah kan hmang thung. U Sangpuia pawhin rinai takin a ei thei mai, plate nga vel kan ei takah chuan kei leh u Sangpuia, Samuela bak kan awm tawh lo. He mite pahnih hi tlawm an tum lo tih hriat takin an in sut hruih hruih thleng zuk ei peiha.



SAMUELA

An mittui leh an hnar hmawr thlengin a sen ṭun tawh mai. Keipawh ka bang bik lo, si hluam hluam chung chuan kan ei lui ngar ngara, a tawpah mipa pahnih an tlâwm veleh tâkah chuan ka chak tih hria in hlim zet chuan ka au vak vaka, “Le in chibai ru le, ka chak bawka, ka duh duh in ti thei" tiin u Sangpuia leh Samuela chu ka in chibai tira, an ni pawh chuan ngawi reng chuan ka tih ang in an awm ve mai bawk.








U Sangpuia chu a la lungawi chiah lo tih ka hria, enga tinge rilru dang a put luih tlat le? Valpuiate nen chuan kan thil eina chu seng felin kan silfai zuia, tun lai chu lo lamah an buai hlawm bawka. Zân tih lohah chuan kan in hmu ngai ta meuhlo, inrinnia feh ve ngei tumin u Sangpuia chu ka hrilh sa vek bawk, a phallo viau nangin ka tih luih tlat avangin min hnial duh ta lem lova.







U Sangpuia chu reiloteah a haw ta daiha, mak ti zet chuan ka en reng ringawt. Lungawilohna a neih chuan ṭha takin sawisela midang awm a tinuam lo tih te hriat ve tûr a sin mawle.





“I bialpa chuan keini ho hi min ngaina ta vak lo a va nih hmêl ve" Rengpuia chuan dar chhin ukin a rawn ti a, keipawhin u Sangpuia rilru chu mak ka ti lek lek mai, a hma te kha chuan an rawn lêng tlâng ziaha. Hetiang hian a awm ngai hauh silo va, tunah engvanga khatianga awm ta mai nge maw a nih le.







“Kan rawn lêng tawh lo mai dawn em ni? Mi bialnu i ni tawha, i bialpa tan pawh a nuam lo ang, naktuk zân aṭang chuan hmun dangah lêng tawh mai ang u" an tih avang chuan ka lo hnial vata “Nilo e, a ngai lo. Amah kha ka be leh ang, enga tinge a rilru a tih kawih tlat ni, khatiang khan a awm ngai hauh silo va, ka lo be leh dawn a nia" ka tihlai chuan Samuela chu a rawn nui haka.







“Kawng ro a su vak lovang, kan hriatna a rei tawh a lawm, ti rawh u keini pawh haw tawh mai ang u hmiang, kan thil ei khân pum lamah ro a rêl tlat mai" tizui in a ṭhiante chu a thawhpui ta diaka. Kal mai an tum lai chuan Samuela chu ka ko ding vat mai.







“Nang ni tal chu hetiang hian awm suh u" ka tihchuan ka lu ah a rawn chul zauha, chutia reilote hnua an mizia inthlak leh inla hrang ta daih chuan min ti lungngai takzet “I bialpa in keini min hmu thei miau siloa. Ka ṭhiante tan pawh a nuam lo ve ang, kei erawh i tân ka awm reng a nia" a tihchuan ka insut hraiha.







“Eng rilru nge put tur tih pawh ka hre thiam lo, tinge a hma ang khan kan awm leh theih loh? U Sangpuia ka duh hi a sual viau em ni?" tiin ka insut hlap hlapa, a aâwmah chuan min kuah beiin min chul hauh hauha.






Chu chuan tlêmin min ti hahdam deuh, thawk leh khata Valpuia te ho khatianga an awm a an thusawi khan min ti hnual takzet, u Sangpuia lakah an lungawi vak lo tih lah ka hailo.






“Ṭap suh, ka lo be hlawm dâwn ania, an lungawi lohna hi a ho ṭhin lutuka, an ṭha leh vat mai ang. Nangmah in ti hrehawm reng reng suh" tiin ka hnungah chuan a beng thek theka, hepa hi chu englai pawhin min hnem turin a awm renga, ka tân hian a hlu lehzual.






A haw hnu chuan u Sangpuia nen in bia in kan in hau hrepa, ka la ṭah phah zui. Tinge hetianga a nilo zâwnga a awm tlat mai le, nge nu Chhingi sawi ang khan ka lo tisual reng zâwk nge ni ang, ka theih tâwpin siam ṭhat ka tuma; mahse ka rin phak bakin a harsa si a nih hi.







“U Sangpui hetianga awm ringawt lo hian kan awm thei lo em ni? Min ngaihtuah ve la, ka ṭhiante i hmuh theih loh chuan engtin nge hlim taka kan awm theih ang?" tihchu ka thawna, a seen nangin min chhâng mai lo, a awmdân chuan min ti lâwm lo takzet.






“I hmuh ang hi ka ni a, min pawm thei dâwn lo a nih chuan min hnaih suh ka tih kha. Tin, i ṭhiante ka hua tih lam a nilo, ka duh che a, an ni pawh ka hrethiam. Mahsela mipa dang in an duh che hi ka duh lo, mi hian dawt an sawi lovang" a la rawn ti leh ṭang ṭang mai. Ka sawi a ka hrilh ngun tawh nen.








“Samuela nen kan inkârah engmah a awm lo, i hmuh vek kha. Ṭhian kan ni, thudik lo sawitu chu min hrilh la kan zâwt mai dawn a lawm, hetiang a buai reng zawng a ṭha lo, Samuela hi duh ni ila ilakah ka in puang kher lovang, i rilru ti kawi tlat lo teh" ka tihchuan inhnial a duh loh thu sawiin min mutsan daih a nihchu!







Engvanga ka lungawilohna sawi ve dâwn a pianga min mutsan ziah nge maw a nih le? Sual thiam lutuk, ṭhen dâwn ila ka lo duh hman tawh si, kan duhna ah hi chuan kan lo dawhthei em a ni e.





Zingah chuan tum burin ka tho chhuaka, u Sangpuia pawh be duh lo chuan rawng ka bâwl mawlh mawlha. Ka lungawi lo ve tlat, ka thinrim apiangin min offline san loh leh min mut sana, a duh leh amahin min rawn ve ve tawh rawh se.






Rin ang ngeiin chaw eikhamah min rawn bia a, ka chhâng lo. Ka duh dan hi ngai pawimawh ve sela ka duh, hetiang reng chuan a hmeichhia zawk puitling taka awm ka ngai ziaha, ka tan hian a thawpik thlak emai.






School chu kalsan daihin tumah vak be lo chuan ka ṭhu ngawi rana, he khua ka awm aṭangin thla li na vel a ni ve tawh a, ka tlangnel ve tawh viau nangin keimah hi mi be tam vak chi ka nilo nen hmelhriat erawh ka la nei tlêm viau thung.







“I lungawi lo em ni? Tinge min chhân duh miah loh va?" u Sangpuia message chu ka en renga, a tawpah chuan ka chhang ta hrama.




“Ka thu hi i ngai pawimawh ve duh miahlo, ka lungawi loh apiangin min offline san loh leh min mutsana, u Sangpui ka tân pawh hian rilru siam dân tûr a har a sin. Ka duhzia che i hriat avang in em ni hetianga min siam bik, i duhzawng ka nih loh chuan ṭha takin min hrilh mai la, hetianga awm reng zawng a ṭha lo" tihchu ka thawna.








“Ka duh lo che tih ka sawi loh kha, mipa dang hnaih tam lo turin ka duh mai che a ni. Bakah, kei ruihhlo ti mi leh insual hrat tak hi min duh reng thei dâwn em ni?" a rawn tih let khauh chuan chhan dân tûr mai ka hrelo, ka ngawi vang vanga, mahse ka chhânna tur chu ka hrechiang viau thung.






“Khatiang hre sa a duh che ka ni tih i hria, ni e i thil tih te hi a ṭha chu ka ti hauh lo. I la nghei theiin ka ring tlat a ni, ka sawi tum ber erawh i hria, khatianga i awm khan ka ṭhianten nuam an tilo, an inthlahrun phah a sin. Min duh ve takzet a nihchuan keiin ka dawhtheih ang che hian ka ṭhiante lakah pawh dawh thei takin awm la ka duh. An ni khan i pawi an sawi reng reng lo, mipui an ngaihdana mi lo teh ringawt ṭhin te avangin ka ṭhiante i huat hi ka duh lo" ka ti duaha.









“Aw le a ṭha e,ka tihpalh. In hau lo teh ang ka chau viau a nia" a tih tâkah chuan engmah ka sawi tawh bik lem lo. In hauh chu ka duh bik miahlo, mahsela a ṭul miau bawk si a, thil dang chu sawipuiin inrina ka feh ve tur thu chu ka sawi nawn leh ngata,a ni pawh chuan engmah a sawi tawh lem lo. Inhnial chu a duhlo tak tak te pawh a niang.


ZAWM LEH TUR, STORY HI YOUTUBE LAM DAH TUR NEN KA TYPE TEL AVANGIN KA TISEI THEILOVA. MIN HRETHIAM HRAM HRAM DAWN NIA

[mawitei bawihtlung]

KA HMANGAIH THINGTLANGPA






CHAPTER 12





Inrin chuan ka feh ve ta ngeia, u Sangpuia nen chuan kan in hnial nileng a tih theih. “Tinge engmah hi min hrilh duh miah lova, a châng chuan kei hi min duh tak tak loah ka ngaih phah, u Sangpui ka lak aṭang hian i inla sawn tlata, engvanga hetianga awm hi nge i nih?" tiin ka au khum titiha.



SAMUELA PIC

“Mipa dang i hnaih ka duh loh thu ka hrilh tawh che kha, khatiang zawngin ngai suh" a tihchuan lâwm lo zetin ka ena “An ni chu hmer tel suh, an ni vang a nilo tih ka chiang. Min kawp thu miin an sawi ka hre fuha, chupawh i bialnu lo ni tawh ngei lehnghâl, min kawp tak tak a nih chuan ṭha deuhin sawi la ka kalsan mai dâwn che a lawm" tiin mittui nen chuan ka ena.








Ni e a bialnu hlui nena an in duh ṭhin zia an sawi ka hre fo tawh, mahse ka haider lui hrâm hrâm ṭhina. Tûn thlenga an lo la in be reng erawhin min tina lo theilo “Chutiang engmah a awm lo. Ka bialnu hlui mai a ni, min ring ta che midang ring lovin, ka kawp duh che in i ngai em ni? A hma pawhin engkim ka sawi tawh kha, hetiangah buai lo teh ang. A ninawm riau mai, kawp duh che ni ila ka nihpui lovang che" a ti ve tak nangin an in text na ka hmu ve reng bawk nen ka awih mai theilo.











“Mipa rinawm tak ni tûrah ka lo ngai che a sin, mahse nangpawh hi ilo dang chuang lo a nih hi" tiin ka ngawi ta daiha, “Min ring turin ka ti lui lovang che, mahse nang bak hmeichhe duh ka neilo, i tân ka theih tawp ka chhuah zawk chu a nih hi. Min ringhlel reng lo teh, ka ning a nia i status te kha delete ang che" a tihchuan ka thaw haka, “Ka status chu ka thu thu a ni, haw vat ka duh" tiin thlam chhuatah chuan ka mu thla a, kan in be leh tawh rihlo.








Thereng hram te leh tlaiberh leh vaki hrâm vel bâk loh chu hriat tur a awm lova, a khât tawkin lo lama feh ho au ri chu hriat tur a awm zeuh zeuh bawk. Ka rilru ana bawk nen biak châkna pawh ka nei rihlo, ka mit chu hupin ka mu renga.







“Tluangpui ka sawi tawh kha, eng duhthlanna pawh siam la ka zahsak ang che. Keichu heti mai hi ka ni, chuvang chuan a nia a tîr pawh khân min duh lo tura ka tih che. I rilru ka tina mai mai dawn, keichu tumah hian min hnaih lo se ka duh ka tih kha. Chuvang chuan min hnaih suh min hnaih chuan i na mai mai" beidawng lutuka ti chhuak in a kun ngula,ṭhu chhuakin a bulah chuan ka tawlh hnaia, a kut lian leh hnathawhna avanga thap hrup chu ka hum sak vang vang bawk.






“A pawilo, kan pahnihin bei dun ang, i chakna ka lo ni ang aw. U Sangpui kan pahnihin bei dun ang, chuan i kiangah awmin ka tanpui zel ang che. Engkim i hneh thei ngei ngei ang, chuvang chuan ka lakah thuruk nei tawh suh, in hriatthiamna nen hmalam pan dûn ang aw, mite'n engtin nge an sawi che ka ngai pawimawh lo, i nihna ang ang hian ka pawm che. Khawngaihin, hmeichhe dang awm suh se" tiin mittui nen chuan ka ena.









Nui hakin ka mittui chu a rawn hru a, chiang zet chuan min en reng bawk. Ni e, ka kalsan thei bik lo, hei chen ka thlen pui tawha, holam lutuka inṭhen kha ka duh bik lo “Ka sawi tawh kha nang lo hmeichhe dang an awm lo. Mi chuan an duh duh an sawi thei a lawm, khâng thil khân kan inkar tichhe ve suh se, min ring turin ka duh che Tluangpui" a tihleh chuan ka kuaha, ni e kan tum pauh a niang chu.










“Nangpawhin min ring rawh, mipa hlir ka kawm avang hian i lawm lo tih ka hria. Mahse ka tan an ṭha in hmeichhe ho in min kawm duh loh laiin ka kiangah an awm zawk asin. Nang chauh hi ka duh che, an ni chu ka ṭhiante chiah an ni, thik tur an awm miah lo ania. An vai maiin an ṭan em em zawk che a sin, i hriat angin he khuaah hian kumkhat êm pawh ka la awm lo, nula ten min kawm duh loh laiin an ni chu ka bulah an awm tlat zawk asin, engvanga min kawm duh lo nge an nih ka hrelo, Samuela te chiah hi min kâwm duhtu awmchhun an nih hi, khawngaihin thik tawh suh" tiin a darah chuan ka beia.







“Aw le, tûnah chuan in thinrim khum tawh lo teh ang. Kan pahnih tân hmalam hun thlir ila, midang thusawi mai avangin fiahna nen lo chuan kan inkar hi chhe ngai suh se" tiin ka hmuiah chuan a rawn fawp vang vanga. Keipawh chuan ka lo chhang lêt ve vata, a hnathawh kawr chungah chuan ṭhamin ka pawt hnai sauha, chutah kan inthlah rual chuan a dârah chuan ka bei nghal vang vang bawk.









A kut hnathawk nasa tih hriat taka thap hrup te, nisa hnuaia a awm nasat avanga a vun uk kharh te chu chiang zeta en in a hmai chu ka chûl sak riak riaka, ka chetdan chu ngawi rengin min lo en ve bawk. “I hmelṭha takzet" ka tihchuan a rawn nui suka, ka kut chu man betin min pawt herin ka hnunglam aṭang chuan min rawn kuaha.








Ka dara a khabe chu rawn nghatin lo mawng lam buh leh sawhthing kung hring dup chu kan thlir duna, thlifim rawn thaw heuh heuh in min rawn chhêm rual chuan khawlum avanga kan thlan te chu a dai nghal sawng mai. Hei ngei hi a nih hi zo thlifim an lo tih chu, a hahdam thlak hluah hluah bawk.







Thingtlâng nun zet zawng hna hahthlâk tak thawk ṭhin mahse an mahni nun hi a hahdamin hmuh an nuam ngawih ngawih. Ni sensa hnuaiah thlan luang zawih zawihin thawk mahsela an lungawi in hlim hmêl an pu reng thei tho si, khawpui nun an awt bik hauh lo. Ei rukna leh hlemhletna tel miah lo in an kuthnathawh ngeiin concrete in te hial an sa thei a nia. An ngaihsânawm ngawih ngawih mai.









U Sangpuia chu nghêng ar arin ka titi pah sap sapa, ka feh avangin a ni pawhin hlo thlawh lsm chu a ti vak lo. Inrinni a lo ni bawk nen thlai vêl kan veha kan duh tawk der mai, “Tihian nangmahin i thawk char char zêl tihna em ni?" tiin ka en ha a, a bu nghat mai, a mal bawk nen ka khawngaih takzet.







“Ka nu hian a khât tawkin min rawn pui ve a, a nih loh leh ṭhiante nen kan in lâwma, a hahthlak bik em em loh" a tihchuan ka bu nghat mai. Hmanlai pawhin an ngaihzawngte nen te in lâwmin an feh ho ṭhin tih ka lo hre fo va, tûnah pawh an la chîng zêl anih hmel, in lâwm hona kârah chuan ka tel ve chak takzet.







“In in lâwm leh hunah min telh ve ru aw, in lo in feh dâwn hunah ka tel ve duh" tiin ka hrilha, ka dula hmer salh pahin “I thiam ve dâwn em ni?" ka bengbula a rawn tih su su avang chuan ka nghawk zauha “Sual viau suh, thlama rawng lo bâwl tûr atan ka ṭangkai viau mai thei a sin. Ka thlawh ve kher angai chuang nang" tihlakin ka tum khum bâra.







Nui hak hakin “Aw le, ka hrilh ngei ngei ang che. Dam a kan awm chuan i lo tel ve ngei ngei ang" tiin ka biangah chuan a rawn fawp zauh zauhva. Ka lo nui nghal sen sen mai “He nula hmelṭha lutuk hi ka bialnu chu a nimai sia" tiin a aw thum bul bul chuan mi a inti fak ve ngeia. A inhmeh hlawl lo hetianga thu thlum chhak chhuah hi...







“Keiai ṭha an tam em hi, kei phei chuan engmah chhuan tur ka neih loh hi nangmah lo chu" ti ve zatin a sam chu ka ṭhamsak zauhva, lo danga mite haw tûra in au lâng lâng chu ka hre thei. Valpuiate ho pawh an feh ve tih ka hria a, haw ve tawh tak ang maw.







“Kan haw tawh mai dâwn em ni? Kan thleng tlai lutuk hlauh ange, kal i thei ve sia" a tihchuan ka beng thlawpa, ngeiawm lutuk. Cher viau mah ila nitin an ni angin feh ve hek lo kawng kal ka chak lo lutuk chu min tihel tih ka hria, ni e kal lamah tak ngial pawh ka chau thei miau a lawm. An ni erawh kumtluana an tih ṭhan a nia kal chu an thei tih piah lam a ni.







“Min tilui ziah suh aw, ka feh ve ngai hleinem. Kawng thui phei chu ke in ka kal ngailo, scooty nen zêl a lawm ka kal ṭhin, ke chuan kal ngun ila ka in thazo ve tho ang" tiin ka thlai phurh tur Êm a ka dah ve at chu ka ena, lo an neihna hi khua aṭang a hla over lo hlauha, chuti nilo se ka phur haw peih kher angem tih pawh ka hrelo.







Ni a sa ropui si ka phur ve thei pawhin ka ringlo, u Sangpuia chuan ka Êm chu min chawiin muangchang chuan thlam aṭang chuan kan in zûi chhuak zuia. Kal chak lo tura min hrilhin ka hnungah chuan kalin kan inchhawm bek beka,lo hnih vel kan pelh tâkah chuan midang haw tur lo châwl khawmuang ho chu kan pawh hlawla.








Min lo hmuh rual chuan an bula châwl ve tûr chuan min lo sawm sap sapa, u Sangpuian chawlh a pawiloh thu a sawi avang chuan kan in nghat ve a, midang chuan ka phur chu min lo chawi vat mai. An polite zia ka hmuh chuan ka ngaisang hle mai, an bulah chuan ṭhu in fiamthu an thawh chu kan nuih pui dar dara.








An lo hi inkhat a miin an neih pawh hi a zâu ṭha hle a, an hah ṭhin viauin ka ring. “Sanga pawh bialnu i nei chhelo bawka, i nui vur vur reng thei tawh alâwm, midangte hi rawn dah belh se a ṭha ang, lo kilh bet hmak hmak ila" tiin an nui dar dara, ka lo lai leh pek viau mai. An fiamthu a sâng a, mahse tumah hian an thinrim pui mai mai ngailo, khawlaiah pawh min fiam tâwk chu ka tawng ziah nen ngaiah neih tum mah ila ka nei hlei thei der lo.








“Tak takah, khawdangte hi lawi lut zut zut ila a ṭha. Nang ni pawh rei rial lovin innei thuai rawh u" tiin an nui zui hak haka, lai zet chuan ka lo ṭhen ve sak sak ringawt.





U Sangpuia chuan fanghma vel sa chu min rawn pe ngeia, chûngte hlei hlei chu an au nasat pui leh nghal. An hlimna kan siam belh a ni ringawt “In duat ṭan nghal tlat" tiin kut beng meuhin a ṭhen an lo nui thûl, an bula awm a hahdamthlak phian mai. Mi famkim tak an ni bik lova, mahse a tam zâwk hi chu misual tak an ni bik hauh lo, midang an rêl mai mai ngailo bawk, an hmeichhiate ah erawh chuan an awm ve zeuh zeuh thunga.







Kal an tih tâkah chuan kan phur chu inchawi hlawmin muangchangin khawlam kan pan a, kal pah te chuan hah hre lo ni awm takin fiamthu nen kawngtluan chuan an ri nak nak renga. Keipawh ka chau lutuk tur ka him phah hlauh zawkin ka hria, fiamthu an thawh reng bawk nen ka phur pawh rit ti lutuk lo in ka awm phah.








Ngawi reng chuan kal ila hei ai ka chau daihin ka ring. Titi pah chuan kalkawng pawh a lo tawi deuh bikin ka hria, u Sangpuia chuan chho laiah chuan ka êm hnunglam aṭang chuan min rawn nawr zela, chu chuan min chhâwk ve deuh bawk nen a hma ang em em kha chuan ka chau tawh lo, kalkawngah chuan kan chawl zeuh zeuh bawk nen chutia feh ve theia ka awm chu nuam ka ti takzet.







School chawlh a pianga feh ve tum chuan ka rilru ka siam sauh sauha, School kan kal kha chuan midang kâra awmna hun vak a awm lo nen tumah ka nel em em lova, mahse an bula han awm tam takah chuan mi kawm nuam leh fiamthu duhtak vek an niin ka hria, mi an ngaihsak hlawm bawk si.







In thlen dawn tâkah chuan in mangṭha hlawmin keipawh u Sangpuia chu mangṭhain kan inlam chu ka pan zuia, in ka thlen chuan nu Chhingi chuan min lo buaipui nghal vata, ka phur chawi thlak pah chuan a au chûl mai “Ka rinai i rawn phur tam thei daih maia, i chau em?" a tihchuan ka lu ka thing nar nara, kan nui nasa bawk nen chau ve mah ila ka chhunglam aṭang ka nui ver ver reng mai.






Ka dam chhûnga ka hun hman tawhah chuan nuam ka la ti ber hial ang.




ZAWM LEH TUR