Nun tihlimtu Lalnunhlimi - 16 By CVL.Awmpuii

[CVL Awmpuii]

Nun tihlimtu Lalnunhlimi
By CVL.Awmpuii



Chapter 16



Hmanhmawh zeta tho chhuakin ka inha ṭha nghal sawk sawk a. Nunhlimi number chu ka dial zui zat bawk a, a lo la duh tawh bîk ṭhak lo. Kan in kawtah hial min lo kal chilh a, ka nau a la rawn be zui. Eng rilru hi nge a put ṭhin bîk ang aw ka ti?



Pâwn ka va chhuah chuan ka hmu mai lo va, call leh ka tum lai mêk chuan "U Hluzual" zawi tê hian a rawn ti a. Kan in leh ṭhenawmte in inkara Sintex phên ah chuan a lo ding rân mai. Ka va pan hnai vat a, "I va han mãwl tak e aw" ka ti hluk ringawt a, sawi tur pawh min ti hrelo. Hmeichhia si zanrei hi a ngam ka ti mai. A rilru thawh tawhna lama kal nghal mai chi a niin ka hre bawk. Zanrei a thlanmual kal te, zanrei a bialpate ina kal te, a hmeichhiatpuite hian an tih ve pawh ka ring lo.




"Tinge zan rei tawh ah i rawn chhuah a?" ngaihtuah si, lungawi bawk si lo chuan ka ti hluk a. "I thinrim lo tiraw?" min nuih var var chung hian a lo ti duh lêk chauh a. A mitmeng pawi sawi lo zet te, a nui hmêl nung sarh te chuan min tlâwm nghal vek a ni ber. "Ka tihpalh aw, i thin ka tih rim chuan" a lo ti leh sep a, ka kuah ta ringawt mai. "I mãwl thei emai" ka ti leh ringawt a. Nghet zet hian min lo kuah lêt ve a, "Titau chungin i haw nul nul sia, hrehawm ka ti alawm" a ti halh a. Heti tak hian a inthiamlo ang tih ka lo ring pha miah lo va, ka tauh hawsan kha ka inchhir hnuhnawh viau mai.




A inlahrang hlek a, ka mita min en kal chung chuan "Min thinrim khum tawh lo tiraw?" a lo ti leh sep a. "I va han mãwl tak e aw, ka lungawi lo ringawt alawm. Ka thinrim khum lo che" ka lo ti ve sup a. Ka kut lehlamin a sam chu ka chûl thuak bawk a. "Hrehawm ka ti lutuk alawm le, ka inthiamlo bawk sia" a lo ti leh halh a, min han kuah leh ringawt a. Ka khawngaih reuh lutuk, heti tak hian hrehawm a ti dâwn tih chu hria ila khatiang khan ka che hauh lo vang.



Kan in bul step-ah chuan kut insuih rialin kan ṭhu dùn a, tleirawl inngaizawng inhmu ru, chhûngte hriat hlau deuh pawh kan ang alawm mawle. Apuia chungchanga ka lungawi lohna te chu ka hrilh sup sup a. Mipa dang hrim hrim pawh biak dân chin tâwk hre turin ka chah bawk a. "Hmeichhia, Nula pangngai tak i ni a. Mipa dang chu nêl chin tâwk hria ang che aw. Mipa hi chu kan rilru a mak khawp a, hmeichhia in min lo biak ṭhat deuh hlek hian kan beisei nghal chawk zel a. Zuamawm tâwk vêl leka an lo awm veleh zeuh ṭhin bawk nen kan huangtau hma a. Chuvangin fimkhur ang che. Ka rin loh vang che ni lovin mipa dang ka rin loh vang zawka sawi ka nih chu" ka ti duah a. Naupang thuawih deuh ang mai hian a lo bu nghat nghat a.




"Apuia chu John-a ṭhianpa anih avang khan ṭhian angin ka lo en ve mai a. Amah a lo sual chuang lo bawk nen ngaih ṭhat lohna tur a awm lo vang" a tih chuan ka lo hnial vat a. "Mipa a ni ve tho tih theihnghilh miah suh. Mipate vek hian kan mipatpuite rilru leh mitmeng hi kan chhiar thiam ṭhin ania. Ṭhian angin ngai ringawt mah la, ṭhian angin a ngai ve kher lo thei che. Beiseina siam sak lo emaw i intih lai khan beiseina a lo nei tlat thei. Chuvang chuan i rem loh zia hriattir mawlh mawlh reng rawh" ka ti a. Nui var var chung hian "Awle boss" a lo ti zâng vah a. Thusawi hi chu a pawm awlsam a, a zawm lamah hian kan pachhe deuh ṭhin a ni.



"Chuan...zanrei hi ka duh aiin i ngam mah mah" ka lo tih leh chuan a lo nui hak a. "Ka uang lo ania Nunhlim" ka lo ti leh hmuk a. Zana chhuah satliah hi chu ka la pawm zam thei mai a, mahse zanrei tawh lama chhuah hi chu ka thlawp viau lo a ni. Nunhlimi chuan "Zan lèn hi chu ka tih ṭhan ania, engah mah ka ngai lo" a lo ti awlsam thên a. "Chutiang a ni ringawt lo. Hmeichhia i nih kha hmeichhia, inhrechiang rawh" ka lo ti charh a. A ngaihsam lutuk hi chu a la pawi thui ang tih a hlauhawm.



A ṭhiante nen zana an lèn nasat ṭhin thû te, zàn chhuah nuam a tih zia te chu min hrilh zui chiam a. "I pharvar mah mah anih chu" ka ti ta ringawt a. "A nuam ve alawm. Thil sual kan ti pawh a ni lo va, ka chhûngte paw'n min hau ngai lo. Kan lèn pawhin khawlaiah kan lêng ngai chuang lo va. Ṭhiante inah kan inkawm hlim satliah ve a ni mai a. A ho emai a" a lo ti pang pang a. Ka duh dân ang diak diak a awm tur hian ka beisei lo va, a nun a ni a, inrawlh thûk pawh ka tum lo. Mahse tlem hi chuan insiamrem ve deuh chu a ngai a ni.




"Zàn chhuah nasat lutuk chu a ṭha lo hrim hrim. A bikin hmeichhe tán phei chuan chîn tam loh a ṭha. Thil sual in va ti lo pawh a ni mai thei, mahse mi mit in tikham hma a. Hmeichhe hmingchhiatna hi chu ho tê mai ania. Ṭawngthu chhelo ah eng emaw tawhsual lo tâwk ta la, a tisualtu ai a tuar tu i langsar dâwn. Chuvang chuan hmeichhe tán chuan zàn chhuah nasat loh hi a him ber. Ka thusawi chu i hrethiam ang tiraw?" ka ti ta dap dap a. "Ka hrethiam alawm, i thuawih pawh ka tum ang. Mahse zanin hi chu nangmah vang vek ania, min hau thei bîk lo vang" a lo ti leh hram a. A sawi dik ve tho bawk sia, ka hau zui tawh bîk lo.




A hma zawk zawk tawh lo bawk nen rei ṭhu khawmuang tawh lovin kan inthlah fel thuai a. A scooty-in a lo kal ve ngei a, amahin haw thei tho mah se ka va thlah hram a. Motor keng hranpa lovin a scooty chu keiman ka khalh a, ka phur thung a. "Thlah ka ngai lo" ti mah se ka thlah lui ta tho. An inkawtah chuan reilotê kan ding dûn leh a. "Ka rin ai daihin lirthei hi i chelek lo" ka tih chuan "Ṭul tàwp ah lo chuan ka khalh chhuak peih lo. Ka khalh thiam ṭha ṭhum lo hrim hrim a, ka ṭang ṭung zel a" a lo ti mai a. "Ka thusawi ho kha theihnghilh suh aw, hre reng ang che. Mipa biak dàn tâwk thiam tur, zàn chhuah tam loh tùr, rilru let but a chêt chhuah hluai tawh loh tur" ka ti leh dap dap a. A lo bu nghat nghat a, "Haw tawh rawh, a tlai tawh ropui si" a lo ti ve vat a. Ke a haw leh tur ka nih avangin ka lo hnial bîk lo.




Ka haw dâwn tak tak ah chuan min ngaihtuah veleh deuh nge ni "Ka va thlah leh mai dâwn che em ni? Nge ni a ka scooty hi hawn rih mai la" a ti leh hram a. "Ngai lo, ke in ka haw ang. Lût tawh rawh, ka lo en liam ang che" ka lo ti vat thung a. Hetiang chuan kan inthlah hlei thei dâwn lo tlat. Min ngaihtuah tih hriat takin ngaih ṭha zân lo chuan min luhsan ta a. "Ka va'n tibuai tak che e aw" a la ti nang nang zui a, ka lo nuih liam san mai a. Eng emaw hlek a thlen châng apianga a tal buai zel dâwn anih chuan dawhtheih a ngai vet vet dawn khawp mai.




Zàn ka mu ṭha lo bawk nen zingah chuan thawh ka hai pek a, Kimtei'n min rawn kai tho a. Tukṭhuan kan ei lai chuan min rawn melh a, ka va melh fuh apiang chuan awmze nei zet hian min nuih leh tet tet thin a. Nizan boruak vâng kha a ni tih ka hai miah lo. Office ka kal hma in ka room-ah chuan min zui lût ta rêng bawk a. "Nizanah khan engtin nge in awm a?" a rawn ti nghal pang a. "Eng maw?" a sawi awmzia chu hre tho mah ila ka lo hrelo der tlat a, a lo ner nang mai. "Sawi teh û, ka hre châk ania. U Nunhlimi'n min lo biak khan a rilru a buai hmêl ropui si" a lo ti leh cheng cheng a.




"Engtin tak nge a rawn biak che a?" ka tih chuan " Whatsapp-ah min rawn text hmasa a, ka mut tawh leh tawh loh min rawn zawt phawt a. Ka chhan rual rual khan min lo call nghal a, 'I û kha a titau a, pawn ah ka nghak' a rawn ti ringawt a. Ka hrilhai letling zawk asin aw. 'Ka phone call engmah a la duh lo va, khawngaih takin lo chhuah tir lawk teh a' a rawn ti leh a. Number lo innei tawn sa lo mah ila a rawn insawi fel nghal vek a. A rawn chêt dàn kha a pà riau, ka sawi thiam lo. Ka duh ṭhak ṭhak tawp" a lo ti duah a. "A cial ve a, i U Nunhlimi hi chu" ka lo ti mai a, nizan kan boruak te ka ngaihtuah a, ka nui suk suk mai.




Kimtei chuan "Ehhh...a û hi...i U Nunhlimi te i ti kher vêl a, i nupui a ang tawh vêl e" uar zet hian a lo ti a. Nizan chungchang bawk chu min zawt ṭha leh tet tet a. Ngaihzawng la nei ve lo ta chu a dilchhut bawk si. Hrilh vek chi a ni chuang bawk si lo, a lungawina tur khawp chu ka hrilh tho a. Hetiang lam hi chu Kimtei ngaihven zawng leh ngaihthlak duh chî a nia. Ka Nu leh Pa te inngaihzawn lai chanchin te hi a zawt reng peih. A hriat tawh hnu pawh sawi mah se a ngaithla ning lo a ni ber e.




Office ka thleng a, rin loh deuhin Remi a lo awm leh nawlh tawh. A dân ngai tê in min lo nuih leh var var a, min lo lâwm thiam khawp mai. "Ka pa Liana a dam sam lo lehpek a, vawiin chu a ai ka lo kal leh anih hi" a lo ti nghal zung zung a, ka buk khum nghut ringawt a, ka office chhungah ka lût zui nghal daih. Nunhlimi thîk thû a chhe nasa mai si a, Remi chungchangah ngat phei hi chuan fimkhur zual ka ngai takzet a ni.



Chhunah thingpui min rawn pe leh hnâp a, min be zui luam bawk a. Chhàn loh theih ni bawk si lo, pangngai tak chuan ka chhang veleh a. Insawitheih nana lo hmangin Nunhlimi rilru a lo tibuai leh ang tih chu ka hlau khawp mai. Hmeichhe nasa nalai lêng hi chuan zah pawh an lo hrelo anih hi ka ti ta. Mipa nawr chin tâwk lah an hre hek lo. Mipa ṭha lo ṭhenkhat hi chu hmeichhe nawr chhuah tihna chen hi ka nei ve tlat. Chutiang chiah chuan mipa hlawhtlinna phên ah hian hmeichhe ropui an awm ngei ngei bawk.



Office kan bâng a, ruahman lâwk na em em pawh awm lovin ka thawhpuite chuan Pu Liana damlo kan chu an rawt chawpchilh a. Ṭum dang aiin kan bâng hma bawk nen aw ka lo pawh ve mai bawk a. Midangho zawng an kal laia kal lo bîk nih kha a mawi lo hrim hrim bawk a. Motor kan ken vek avangin mahni motor ṭheuh a kal kan ti ani. Kan chhuak tur chu ruahmanna an siam zung zung a. Remi ber chuan haw na tur a nei ve lo va, amah zui haw tura inruahman kha kan ni bawk si a. Ka thawhpuite chuan min hmehbel ta chawt mai a. "A tlangval ber i nia, nangin phur rawh. Nula i phur khat àwm ropui si" tiin ka kutah an dah ta mai a. Hnial viau dâwn ila, tih tih chî a ni bawk si lo. Mahse Remi nen tlawng a han inphurh chu ka va'n hreh tak!




Ka thawhpuite nen hian vêng hrang hrang kan ni a, ka ngaihzawng neih chungchâng pawh an hre kher lo vang. Tin, anmahni ngaihah chuan hmeichhe ngaihsak lo leh mipa, hna a buai em em thil dang inchiahpiah tir vak lo hi ka ni ve a. Chutia Remi nen min hmehbel uang ta vêl pawh chu mak ka ti hran lo. Hetiang chungchanga min fiam zuk zuk hi an chîng ve riau a. Patling leh nutling rual an lo ni bawk nen a tlangval awmchhun ni ta chu fiam takah hian min nei ve a. Ka mizia te vang pawh hi a ni ta ve ang.




Remi nen chauh a chuan dun ka duh loh avang chuan ruahmanna dang ka siam ta keuh a. "Lirthei ken duah pawh chu a tih chî loh mai thei a, tunlai ah parking te a buaithlak bawk si. U Neihi te hi office an hnaih tho bawk a, a lirthei va dah pui zuai ila. Ka motor-ah chuan lo chuang tel ve daih sela a ṭha lo maw? Haw lamah pawh ka thlah leh mai ang a, ka haw na lam tur a ni tho bawk a" ka ti a. Vanneih thlâk takin min lo pawmpui tlâng hlauh mai. "Nula chauh phurh chu a hreh ngang ngang hle a nih hi. Rohluzuala zei lo lutuk hi chu aw..." tiin min la fiam zui hram a. Ka nuih liam pui ve tawp mai, a pawimawh ber ka ruahmanna an pawm a, ka lâwm tâwk viau.




"Kan pahnih chauh a chuan chu i hreh àwm hle mai" za lo deuha nui hak chung hian Remi chuan a lo ti salh a. U Neihi lirthei dah pui turin an in lam panin kan inkhalh phei mêk a. Remi chu ka phur nghal a, "Chutiang pawh a ni lo" ka lo ti sup tak na in a hrethiam ve thovin ka ring. Mahse pawi pawh ka ti hran lo, a rilru chhungril ṭhat loh zia ka hre tawh a, dim vak ka tum lo. "Nunhlimi nen chuan in hlim em?" a rawn ti leh a, ka va melh zeuh a. Hmalam a lo en ngar a, a lan dân ngêng zet chu ka vawikhat hmuhna a ni. Engtin emaw riau hian min elhsenin ka hre bawk.



"Kan hlim khawp mai, ka lung a awi" ka lo ti hmiah a, za lo tih hriat zet hian a lo ṭhen sak a. "A chungchâng hi eng chen nge i hriat?" a rawn tih leh chuan ka ngawi deuh vang vang a. Chhàn dân tur ka ngaihtuah fe hnu chuan "Eng chen nge hriat tur awm chu ka hre lo va, mahse ka hriat chinah chuan ka lungawi khawp mai" ka ti ta a. Mihring hi kan inhrechiang viau emaw kan intih pawh hian kan mize chanve pawh kan lo la inhre ngai lo va. Keimahni ngei pawh kan inhrechiang lo, chuvang chuan mi hi hrechiang ka inti mai mai thei lo a ni.



"I ngaih ang ngawt kha chu a ni lo vang mawle" a rawn ti kha leh fak a. Tun ṭum a awm dân chu a dik lo zual ka ti dawn nge, inthup pawh a tum buai peih tawh lo aniang. A awm dân ang tawpin, a nihna ang tawpin a mizia a rawn chhuah ni berin ka hria. "Ngaihdan lo siam ve vak pawh ka tum chuang hlei nem" ka lo ti leh mai a. Nunhlimi chungchângah chuan ka rinna min tih der thàwn sak a tum ni berin ka hria. "College kan kal lai a hrilh tawh che em?" a rawn tih leh chuan "A ṭangkai tawh lo emai" ka lo ti liam puat a. Ka rilru tih kawih a tum ni a ka hriatna chuan a sawi zel tur min ti hre peih lo. Mahse a lo la duh tâwk teuh si lo.




"College Hostel-ah khan thla khat vêl chu kan awm dun ve zuai a, khata ṭanga inkawmngeih zual ta pawh kha kan nia. A felin a ṭawng duh barh barh bawk a, ṭhian siam a awlsam em em a. Amah vangin ṭhian pawh ka kawm ve nasat phah reng a. Ka lo ṭawng tam lo bawk nen ka ṭawng ai zawng zawngte kha min ṭawng kep vek zel niin ka hria. A chungchangah hian hriat tur i la ngah ania, i hriat loh tam tak hi ka hria" a lo ti duah a. Ka ngaih tih ṭhat loh nan thil a sawi kual vêl ni berin ka hria.




"Inhriatchian vak te hi a ṭha lutuk lo rêng asin. A tâwk tê hian inhria ila, zawimuang in kan inhrechiang chho zel ang a. Belhchian dawl leh dawl lo hi chu a hnu ah an hriat tho tho. Chuvangin Nunhlimi chungchângah pawh hian ka hmanhmawh lo" ka lo ti dam thluam a. "Chuloah, kei ai te chuan i hre tam ve bawk ang chu! In inkawmna a rei tawh a, keini te chu a tette aṭangin hre mah ila hetia kan awm chhohna tak tak hi a la rei lo va. Kan la inhre chhawm ve zel ang chu" ka ti leh duah a. Midang ka aṭanga Nunhlimi chungchâng hi hriat tam ka duh vak lo. Keimah ngei hian belchiang ila, amah ngeiin a duh chin min hrilh bawk se. Chutah chuan ka lungawi tâwk viau a ni.




Remi chuan "I ngaih ang ngawt kha chu a ni dâwn miah lo ania. Ngaihzawng a la nei ngai lo tih chu mi zawng zawng hriat ania. Mahse tunlai chhanah chuan ngaihzawngte kher lo pawh hi an mutpui hreh tawh lo" a lo ti fan raih a. Chu thû kher chu a serious tlat, Remi chu ka va melh leh zeuh a, min lo melh ve chiah bawk a. A thutak hmel khawp mai. "Eng nge i sawi tum?" ka ti ta sup a. "He thil kher hi chu lo sawi chhuah sak ka duh lo viau na in i hriat ngei ṭha ka ti bawk si a. Kan ṭhian dûn thuruk ni kumkhua tura kan tih kha ania. Mahse ka duhsak êm che avangin ka hrilh ang che. Chumi hma chuan zawhna pakhat ka zawt ang che, hmeichhe thianghlimna hi eng ang chiahin nge i ngaihhlut?" a rawn ti leh tê tê a.



A zawhna chuan ngaihtuahna a ti thui kher mai. Mipa ni mah ila ka Nu leh Pa te min fuih ṭhin dân in a zir bawk a. Nupui pasal inneih hmaa mipat hmeichhiatna hmang lo turin ka tleirawl chhuah tirh khan ka intiam ve rawih a. Pathian zarah tun thlengin chu ka intiamna chu ka la vawng nung ve reng a ni. Thianghlimna hi ka ngaihlu a. Mipa leh hmeichhia, rinawm taka inngaizawng a, dâi sual hauh lova Biakin hawng a innei thei te hi ka ngaisâng ṭhin. Chutihrual chuan lo dai pelh tawhte ka hmusit hauh lo thung. Mihring hian zahawmna kan nei vek a, inzahtawn ṭheuh tur kan ni.




"Thianghlimna chu ka ngaihlu alawm" ka lo ti sup ringawt a, ka rilrua awm zawng zawng anga chhan kher ka tum lo. "Nunhlimi chu a va hlu ta àwm lo ve aw" tiin a lo ner nang a. "Eng nge i sawi awmzia?" ka lo ti nghal hmuk a. Ka rilru in tin zâwn a lo nei nghal a, tlêm chuan ka zâm ve deuh. Ka thinphû pawh a rawn rang sawt khawp mai.



Chutah Remi chuan "Sawi dâwn chuan sawi tur a tam, mahse a tàwi zawngin ka'n hrilh ang che. Nunhlimi hi mipat hmeichhiatna ah a fihlim miah lo ania" a tih chuan min dêng ve dawt mai. Sawi zawm leh in "College Hostel-a kan awm lai khan ania. Kan Warden kha inla strict deuh, strict si lo ang chi kha ania. Kan hlau lo tlâng khawp mai a. Chhuah rûk a lo awlsam bawk nen zanah khan kan chhuak ru ṭhin a. Security chu awm ve bawk mah se pawisa kan pe a, min kal tir ve mai zel bawk a. Sawi leh sawi hnù, Nunhlimi chuan ṭhian a ngah ka tih tawh kha. Zan tin deuh thaw kha ṭhian thar a nei zel emaw tih mai tur ania. A ṭhian mipate tu emaw ber hi a phone a, lirthei an rawn keng nghal zel bawk sia kalna tur kan haihchham lo ṭhin khawp mai. Khang hunlai kha chuan lungkham kha kan la nei lo khawp a, zan khaw teirek pawh sawi lovin duh duhna ah khan kan lêng kual tawp zel a. Khawlaiah kan hun tam zawk kan hmang ti ila ka sawi sual lo vang. Motel-a kan awm tawp châng lah a tam. Nunhlimi ṭhian mipate lah khan zu an duh mai sia. Nunhlimi nen erawh harhfim karin kan awm ṭhin. Mahse zan khat chu a lo lem ve sek a, exam tur rilru hah lai a lo ni bawk nen a ṭhiante khan an fuih phûr thiam bawk si, a duh aia tam a in ta nghek a. Chumi zan chuan thil pawi a thleng ta alawm. A ṭhianpa nen khan an chesual ta a, a harhfim zawk kei lah khan dan nachang ka lo hre si lo. Harhfim lo zetin a ṭhiante puihna nen hostel-ah chuan kan inhruai haw leh thei hram a. A tûk a a inchhir zia leh hrehawm a tihzia kha! Mahse engmah a sâwt tawh si lo va. Midang bula sawi chhuak lo tur leh kan pahnih inkâr chauh a nih tur thû kan tiam ta ani".




Remi thusawi chhûng zawng chuan ka thawk ka lo hip lêt ngar ngar ti ila ka sawi sual lo vang. Nunhlimi nen kan inkara hem thlak a tumna ah ngaihsak luih ka tum hram hram a. Mahse ka ngaihtuahna a va han ti thui tak! Thil ni thei anga suangtuah chu ka duh si lo, ka rilru a tibuai nghal em em bawk si.



"A ṭhianpa nen chuan an chesual ngei em tih pawh i chian loh chu" ka ti chhuak thei hram a. Remi chuan "Chiang e, room-ah an tawm zui hmak a, an thâwm aṭang khan a hai theih bîk hlei nem. A hnu lehzel a thil thleng zawng zawng nen phei chuan khami zana ka lo dang lo kha pawi ka ti asin aw" a lo ti vat a. Sawi tur dang a la awm cheu a maw! Za lo zet hian ka nui hawk a, Remi chuan a ngaihna hrelo fe hian min lo melh vat a. Ka lu ka lo thing ringawt. Thudik anih leh nih loh chu thuhran, hriat belh chakna ka nei tlat anih chu!




"Sawi rawh" ka lo ti bung nghut a, "A bâk chu Nunhlimi nen sawi dûn tawh zawk ula" a lo ti dek dek a. "I sawi ta sa sa, i duh ang chu sawi zo phawt rawh" ka lo ti bul leh vut a. Thâwk a han la tê tê a, keipawh ka lo ṭang leh nghal at mai. "Nunhlimi chu a inchhir lutuk a, mahse zan chhuah chu kan sim phah chuang lo va. Khang thil thlengte khan a ngaih a ti sam zual sauh ka ti mai. Engmah a pawisa ta lo va, zu pawh a in ve ta fo mai a. A ruih tawh lah khan duh duha khawih kual theih kha a ni tawh mai ṭhin si a. A ṭhian mipa ho lah kha, an rinawm lo ka ti dawn nge an ṭhiannu a nihna anga zah derna pawh an nei lo va. An duh duh angin an chên ta ṭhin a ni ber. Nunhlimi chu a tukah, a harhfim rualin a inchhir nghal ṭhin a, mahse zan a lo nih chuan a ngai tê ang bawk khan a awm leh ṭhin a. Hrehawm a tih thû hi chu min hrilh veleh zeuh ṭhin a, keipaw'n ka fuih nasa. Zàn ah chuan ka zui ṭha duh tawh ngai lo va, mahse ka ngaihtuah ve tho bawk si. Amahin a rawn inbuaipui thei dâwn lo tih ka hrechiang si a, ka zui veleh nge nge ṭhin a. Khati khan thla khat tal tawp chu kan awm a, mahse Nunhlimi hi a mãwl bîk lo va. A hnù ah chuan a harhchhuak ta a, theihtawpa insiamṭhat tumin hostel chu a chhuahsan ta a. Keipawh ani ber a awm tâk lovah kha chuan ka awm zui peih ta bîk lo. A chhuah aṭanga kar khatna ah ka chhuak ve nghal a. Kan inkawm zui ta char char a. Kohhrana a hmasawnna ka hmuh ṭe khan ka lo lâwm thei lutuk. Insiamṭhat a tum nasa bawk a, tunah chuan hei mi zawng zawng ngainat leh fel tih a hlawh tâk hi" a ti duah a.



Remi thusawi chu a dik emaw dik lo emaw Nunhlimi chungchâng ngaihthlak hrehawm ka tih ber ṭum ani. Chhàn ngaihna pawh ka hre lo va, ani pawh a ṭawng zui tawh bîk lo. A thusawi chu ka awih phal lo va, mahse hetiang chungchangah em hi chuan dawt a sawi duh ka ring bîk si lo. Ka ngaihtuahna a buai mup mup mai. Chu chu a lo hrethiam a ni chêk ang chu "Ka thil hrilh zawng zawng che hi in inkara hem thlak ka tum vang ani miah lo ania. A ngaihzawng i nihna angin hriat ve i phû ka ti a. Nunhlimi pawhin a la hrilh ve tho che in ka ring, a la inpeih loh vanga sawi lo mai mai aniang. Nakin zel atân in inkara thil pawimawh lutuk tur a ni a, chuvangin ka hrilh lawk ta mai che anih hi" a lo ti leh zung zung a. Ngaihdan siam pawh ka thiam tawh nek lo e.



Nunhlimi mizia te ka ngaihtuah a, hmeichhe zàwiàwi lutuk hi chu a ni miah lo. Zân a ngam zia pawh ka hrechiang tawh a, mahse Remi sawi ang êm ni tur chuan ka ring phal si lo. Han awih lo dâwn ngawt ila ngaihbel tur tingin a lo ri ve phawr phawr ṭhin bawk si. Mahse a tàwp ah chuan ka awih lohna chu a sâng ta zawk tho tho a. Rilru erawh a buai pha tho, engtin emaw pehhel deuhin ka la sawi chhuak tho ang.



U Neihi te in kan thlen tâk avang chuan engmah kan sawi zui tawh lo va. Ngaihtuahna erawh ka kal thui khawp mai. Thil ni thei tam tak ka ngaihtuah a, ka tâwt up up mai. U Neihi'n a motor a dah fel hnù chuan a rawn lût zui ve nghal a. Ka sir ah Remi a ṭhut miau avangin a hnungah amah té chuan a ṭhu a. A titi nghal bawrh bawrh a, ṭum dang chu nise ngaihnawm tiin uluk deuhin ka ngaithla ang a, ka titi pui ve luam ang. Mahse tun ṭum chu ka ngaihtuahna hmun dangah a awm daih a. Chu chuan sawifiah theih si loh hrehawmna min pe ti ila a dik ber ang.




Pu Liana chu rinai takin a lo ṭha lo zek mai a, kan lèn chhung chuan chhawn pawh min lo chhâwn ṭha peih meuh lo. A nupui chuan min lo chhâwn ṭha em em thung a. Ka lo rin dân chuan damlo satliah ve maiah ka lo ngai a, mahse tuna a awmdan aṭang hi chuan a serious ru hle in ka hria. "Hetia awm tawp ai chuan in entir ula a ṭha lo maw?" ka ti sup a. Ka rilru a awm tak phei chu ka sawi chhuak duh lo, anmahni tih hlauhthawn phah ka hlau ani. "In entir chu kan duh a, mahse amah hian thih hreh in a hreh a. Tihngaihna kan hre bîk lo anih hi" a nupui chuan a lo ti vat a. Ka thawhpui dangte pawhin in entir tur chuan thurawn an lo pe ve liam liam bawk a. "Zaninah ziaawm lam kan la pan lo anih chuan damdawiin chu kan pan tho tho a ngai ang" an nu bawk chuan a lo ti ve ta nge nge a. Kan remchân angin sum leh pai pawh kan pe ve hlawm a. An in enkawlna tur senso eng emaw tak chu a lo phuhru ve mahna.




"Heti tak hian in rawn ngai pawimawh a, kan phû lovin kan lâwm takzet a ni. Office-a in thawhpui pangngai pawh a ni lo va, mahse in rawn ngaihven em em a. Rawn kal satliah mai lovin sum leh pai in min la rawn ṭanpui leh ta nghal a. Kan chunga in ṭhatna te hi a lêt tam takin Pathianin mal a sàwm ngei ang che u" a ti mawlh mawlh a. A thinlung takin lâwmthu min hrilh tih a hai theih loh.



Kan hawsan dâwn chuan in entir ngei ngei turin kan ti leh mawlh mawlh a. Pu Liana chu a chau rau riau mai a, hetiang teh tawp a awm chu a ngaih ṭhat thlâk loh tlat a ni. Remi chuan pâwn thleng min thlah hlawm a, a fel thar thar bawk a ka thawhpui dangte chuan an lo ngaina hman viau mai a. Ka tán erawh invèn thiam a ngai ṭhin khawp mai.




Ka haw hnù thleng chuan a thu min hirlhte chu ka ngaihtuah zui lo thei lo va. Nunhlimi han zawh dawt chu ka hreh a, mahse Remi ber chu ka ring pumhlum theilo bawk si lo. Ka rilru a luah hneh ngang mai bawk si a, ka thâ a ti zawi ru riau bawk a. Ka tho thâng a ṭha lo khawp mai.


Zana ka va lên pawh chuan rilru kaptu ka nei lian bawk a ka awm dân ah a lo lang ani mai thei a ni Nunhlimi chuan "I chauh hmêl" a ti sek a. A chhûngte an mu fel leh vek tawh a, kan pahnih chauhin insi rial chuan kan ṭhu dùn a. Ka kut chu a khalh niap niap bawk a, a titi siam siam a. "Hna kan ngah ve deuh hlek a" tiin dawt ka sawi ringawt a. Remi thil min hrilh chungchang te kha zawh chian ka duh a, bulṭan dân tur ka hre bawk si lo. A rilru tih nat ka hlau tho bawk si, ka awm dân chu a lai vêl vek a ni ber.



"Ka lo malis ang che aw" phûr zet chuan a ti a, inlahrang in a insiamrem zui nghal zat bawk a. Ka dàr te chu hmet in ka hnung te chu a chûm leh dat dat ṭhin a, a thiam phian mai. "I va thiam ve" ka tih chuan "College kan kal lai khan kan in malis nasa thei êm alawm" uar zet hian a lo ti a. Chu chu remchângah la in "Hostel i awm ṭhin tiraw?" ka lo ti zeuh a, tun baka zawhna hun remchâng hi a awm tawh ka ring lo. "Awm ṭhin tih lêm ah thla khat vêl chauh" a lo ti ṭha ve mai a. "Engtin nge i hriat a?" a rawn tih leh chuan "Pu Liana kha a dam lo leh tawh a, Remi kha a rawn kal leh tawh asin" ka lo ti thung a. Thudik ka hre duh anih chuan Remi ka sawi kai ngei ngei a ngai tlat a ni.




"Chuan..." a lo ti fan raih a, a mi hmehna kut chu lo chelh sakin ka hmaah chuan ka pawt ṭhu leh ta daih a, min lo dang bîk lo. An hostel awm lai chanchin vêl chu zawh ka duh a, ka tum bawk. Mahse ka kha a chhih tlat a, a hmêl pawi sawi lo lutuk avang chuan ka ṭawng chhuak thei lo. Ka rilru a ti na tlat pek a, ka awm dân hi ka sawifiah thiam lo.



"Engmah ni lo e, Remi chuan a rawn insawitheih khum leh lo che em ni?" nui suk chung chuan ka ti ta daih a. "Engmah a rawn sawi lo, i rawn sawi a ka hre ve chiah" ner nang chung hian a lo ti a. "I lo tihtauh leh bar bar ka hlauh hman tehlul nen" a hnara piai zeuh chung chuan ka ti leh a, a lo ṭeu hlar mai. "Chutiang em em in ka thîk thû a chhe lo aw, nangmah zawk anih kha thîk thu chhia. Apuia pawh i thîk avangin i titau haw nul nul thei ani" a lo ti tán tán a. Ka nuih liam pui ringawt, a thîk thu chhiat zia hi a hrelo nge a inpawm duh lo zawk ni.



Ka haw dâwn chuan an inkawt thleng min thlah leh a, kan awmdanin a zir bawk nen mitmei vèn tur awm ta lo chu ka fawp mawlh mawlh a. Ani pawhin min lo chhâng lêt ve tán tán a, kan vawikhatna a ni tawh lo bawk a zirtir a ngai hranpa tawh lo.



Kan infawh mawlh mawlh lai chuan ka ngaihtuahna a rawn vir zawk a. Nunhlimi chu thlah in ka inlahrang nghal hlawk a. Remi thusawi khan min mawlh lutuk, "Sorry" a ngaihna hrelo fe a Nunhlimi'n min lo melh lai chuan ka ti sup ringawt a. A hrilhai hmel chu ka khawngaih hnuhnawh khawp mai. Mahse a hmêl pawi sawi lo zet chuan engtin emaw riau hian ka rilru a ti na ta tlat anih chu! Mipa dangin an chûl nêl vêl tura ka ngaihtuah zawng ringawt pawh chuan ka sa chhuak pup pup thei.



"I ṭha em?" a rawn ti sep a, min ngaihtuah hmêl khawp mai. "Aw, ka hnar a za thut a" ti ringawt in za lo deuh hian ka ṭhen suk a. "Awi" a lo ti ve hluai a, a nui zui hak hak a. Ngaih ṭhat lohna a nei zui lêm lo chu ka lâwm khawp mai.



____________*___________*___________*___________


(Comments hlu tak tak min lo pe ṭhin tute, in chungah ka lâwm em em e. Ngaihdàn chhe tê tal pawh in lo sawi ve hian nasa takin min pui ṭhin a ni🤎)