Street Fighter 10

[Bawihtei chhangte]

Street Fighter


Chapter-10

By- Bawihtei Chhangte



Engtin maw?" Ka aw atang ringawt pawh chuan mak ka tih zia a hre thei ngei ang.




"I Birthday present khaa... Tun hun hi hman hun chiah tih i hmuh ve ka ring," zim te hian a rawn meng zawk a, a mitmeng pawh chu an sen rum mai.




A inhliam nasat em a vangin hnial chi ah ka ngailo a, rang takin a First Aid Box min pek kha ka va lachhuak ve mai a, a hliam ka khawihsak tak tak hma in ka chawhmeh chhuan te chu ka off phawt bawk.





Tui lum phawt in a so veleh a hmai a a hliam ho chu ka hruk fai sak phawt a,a fai tak hnu ah chuan a hliam chu a nasa em em lo, mahse pem neuh neuh erawh a ngah hle thung. A mitko ami chu a nasa ber a, a thi duh hle bawk, ka hruk zawng ringawt pawh chuan a rawn thi leh nghal tiam tiam a, ka rap reuh tak tak ani. Amah lah chu a maimitchhîng daih a, na ti awm pawh in a awm hauhlo,a muhîl ta emaw tih mai tur ani.






Pêmthar damdawi ka hnawih leh chiah chuan a rawn ner sak a, a chang chuan a si ve leh det det thin bawk.




A mitko ami ka hnawih leh leh lai chuan, "tun ai hian dim deuh dan a awm em" ati a, ka nuichhuak lo chauh. 'A na' tih chu a hreh ve hle ani ang.




Bandage ka bel leh mawlh mawlh lai chuan ka nau te ho chu anlo haw a, Christopher-a an rawn hmu thut chu an ding chawt hlawm a, mak an ti viau pawh a awm e kan inbe lai takngial pawh an la hmu dawn aih silo, chutah hliam ala nei nual lehnghal.




"Ngati nge a?" Carly-i chuan a rawn ti chhuak hmasa ber a, midang ho chu an lo lût tak tak hlawm ta bawk. Insual han tih kha a tha chiah a ka hriat loh avngin, " a accident a," ka ti ta ringawt a, mahse ka sawi zo chiah tih chuan Christopher-a chuan," ka insualna a nih hi," a rawn ti thum ruih a, mipa ho chu an meng phawk ngang mai.





Chutah lo kal hnai deuh in, "a tak tak a mi?" Mawimawia chuan ati a, a lu chu alo bu nghut bawk, "a van pa rem ren ve," Mampuia chuan a rawn ti chhuak ve hlawl bawk a, ka bul ami chu alo nui suk bawk.



"Mipa chu insual bur bur tur," a tih leh chuan ka melh rawm rawm a, mahse min en duh thak lo.



"A na em," Henry-A chuan a rawn ti ve nulh a, a tawng tam loh tehreng nen, mak ka lo ti hle.




"Hetiang te chu mipa tan engmah anilo, chawei ti tui tham lek," ati a a inchhuan hmel zawk hle.





"Iva pa riap rial ve," Mawimawia chuan alo ti leh hliai a, a hmel atang ringawt pawh chuan a ngaisang nghal der tih hai rual anilo, chu chu tha ka tilo hle bawk.




" Mipa dik tak chu a hmai a ser nuaih tur ani,"a tih leh rualin ka bandage ken lai chuan a hliam chu ka nawr sak a,a then nghal chawk chawk mai.





"Va intifai ula, chaw kan ei dawn nia," ka ti zui thuai a, Christopher-a bul a an awm rei chuan an ngaihtuahawm dawn tlat.




Reilote ah keipawh chuan a hmai hliam zualpui ah chuan bandage bêl zo tawh a, a ni pawh chuan ngung fe hian minlo en ve reng a, "rilru i tibuai," a rawn ti chhuak hlawl a, a sawi awmzia erawh ka hrelo nasa hle.





"Engtin maw?"



"Naupang tê hian engtin nge i puitlin nghal dêr theih," a rawn ti leh dut dut a, mak ka ti hle.



" Chutin ka puitling bik hleinem, nangpawh insual te hi ti tawh lo la, i nu leh pa ka ten an ngaihtuah em che hi," kan ti ve sap sap a, sawt tak maw.




"Street Fighter ka nia, ka thiam viau hun ah Pro Fight ah ka la tel ve dawn a lawm," nui deuh suk suk chung hian ati a, a thusawi chu amah ngei pawh chuan a awihlo tih a hmel ah chuan ahriat a, a uang ve ngei ani ang.




"I Fighter nih dan hi a hlawk lo emai,"


"Hlawk ka lo inti viau asin,"


"A engah chuan maw?" Ti a ka zawh chuan a nui suk a, min chhang tawh lem lo.



Ka zawh hnu chuan tha takin a chhuak ve mai a, nu Madini'n engtin tak lo ti leh ang maw.




A tûk ah chuan kan mikhual te pawh an haw a, Valpuia te unau an khua a har zual hle a, an khawngaihthlak khawp mai.



A hliam ka enkawl sak atang khan Christopher-a chu alo kal zîng ta hle a, hliam a rawn nei ngei ngei bawk. Tun hma zawng ai khan zan a chhuak ngun in a insual ngun a,a chang chuan zîng hma takah te zanlai ah te leh zîng khawvâr hma ten a lo kal tlangpui a, han ngei viau thin mah ila, hliam tuar chungin ka kawngka bul lawk ah a awm ani tih ka hriat tawh hi chuan kawngka hawn sak loh hi harsa ka ti thin.




Karkhat ah vawi 4 tal chu a hliam nen a rawn lang ziah a, lo buaipui a ngai ziah bawk.



Tlaikhat ka haw chu bike in min su teuh hle a, Christopher-a lo lang hlauh lo se chu min su chiang khawp ang. Min lo hmu lawk nge ni bike in min ka awmna a rawn thlen hma chiahin min rawn pawt sawm hlauh a, chuti nilo se chu ka dam khawchhuah theih kher pawh ka ringlo, bike kha a tlanchak nasa mai si a, Engati nge maw tunlai hi tawhsual ka tawh teuh theih em em ni.




Chumi zan chuan khawvâr hma hret hian alo kal leh a, zan dang zawng aiin hliam a ngah zual a, zan dang anglo takin a kamsir leh a hmai vel ah hliam anei vaklo a, mahse a taksa ah chuan duk a tam hle thung. A ban veilam phei chu a ti che tha ngam vaklo a, chu pawh a mah chuan engmah a sawi duhlo a, mahse awmdan ah a khawr riau a hriat vangin ka va tawk che lui zauh a, kha ta a hmel a na ti hmel ka hmuh a tang khan ka hre chauh nghe nghe.




Amah hi inti pa ve chi hi ani a, hliam na tak nen a alo kal chang pawh in na ti awm ang hian a awm duh ngailo," a na em?" Ka tih chang pawh hian a nui suk duh chauh thin.




A taksa duk lai a hnawihtur a rawn ken chu ka hnawih mawlh mawlh a, ngun zet hian minlo en ve reng bawk.



Ka hnawih zawh chuan nidang ang bawk in a chhuak leh nghal dawn ema ka ti a, mahse chutiang chuan ati ta hauh lo, bathroom a ka lut ka chhuah leh chuan kan ṭhutthlêngsei ah chuan alo mu a, a muhîl nge ni a mit a chhing tlat.




A hliam ho kha na dawn em a ka hriat avângin puan ka laksak a ka sintîr thlap a, nimin lam a min tanpui vang khan ka lawm a, ka puih theih na apiang ah chuan puih ka hreh tawh bik hauhlo.





Chumi a tang chuan alo kal pawh in phunnawi nei miahlo in a hliam te chu ka alo enkawl sak thin a, mahse ka zei vak bik loh vang hian han bawihsawm vak ngaihna ka hrelo thin bawk nen internet lam ah te hliam enkawl dan chu ka zawn phah hial.





Chutiang reng reng chuan hun kan hmang a, hun pawh a kal ve zel a, novem ber thla chawhnu lam kan chuangkai ve der mai, naupangin exam an zo tawh a, karkhat chawlh kan nei ve leh na in ka nau te ho la exam ve lai kha a nih leh vangin ka haw thei lo lehpek a, tun ah hian anni erawh exam an zawh chiah vangin an haw mek a, keini erawh school kan tan leh hman chiah thung si avangin ka haw ve thei talo.






Thawhtan zan ani a, nu Madini'n chaw ei ah min sâwm avangin an in ah ka la awm a, pa Kima a zin daih vang leh Christopher-a in ah a awm hman loh em avângin 'mahni chauh chaw ei ka peihlo' tiin minlo sâwm ani.





Nu Madini rin lawk ang ngeiin Christopher-a chu chaw ei hun ha pawh hmuh tur a awmlo a, pa Kima te lah zan lam ah daih an lo thlen a rinawm a vangin kan pahnih chuan chaw kan eisan a. Chaw eikham TV kan en a kan thut lai chuan nu Madini chuan call a dawng a lâk hnu lawk chuan rawn ding hluai in," civil ah emmi niang?" Ati bah nawk nawk a, a hlauhthâwn hmel hle bawk. "Durtlang ah zawk a? Awle" tiin a phone chu a dah a, "i pa Kima nikhawhre lo in a tlu a, tun ah helam an rawn pam pui mek a nih chu," ati nawk nawk a, thaw pil hmel tak hian a thaw halh halh bawk.




" Damdawiin ah kan lo han nghah angai," tih leh room lam a tlan luh a ruala , "engtin nge kan kal ang," ka tih chuan harh chhuak zawk hmel hi a pu a,



" Ka va han â tak em Laly Bawiha engmah ka la hrilh lo," tiin a phone a hmet nghal mual mual a," aw bawiha, i pa nikhawhre lo in a tlu a nia rawn haw thuai rawh , damdawiin ah kan kal a ngai," tih leh a phone chu dah a rual a, khum ah chuan a thu nghal hnawk bawk.





Ka thiam ang ang a hnem ve pah in a bul ah chuan ka thu a, a chanchin rawn sawi tu te khan engmah an hrilh chiang bawk silo nen, a mangang zual a, a call lah in an la thei tawh bawk silo, a mangan thlâk khawp mai.





Reilo te ah kawngka a ri rawk a, Christopher-a a rawn lang zui nghal. "Engtin maw ka pa chu?"




"A zinpui te khan minlo phone a, 'Seling dâi ah chaw kan ei zo kha nikhawhre lo in a tlu a, a harh mai tehi bawk silo nen an kan rawn tlân thlak pui e,' an ti ringawt a, a bak
engmah an sawi zui leh tawhlo, ka phone lah in an la thei bawk silo, durtlang Hospital an rawn pan pui tur thu ani leh mai," lungchhe deuh tuau hian nu Madini chuan ati a, ka khanwgaih tak tak ani.





"A nih chuan kan lo han chhoh ve a ngai dawn anih chu, nu in ha lum ula kan kal dâwn nia," ati a, a ni pawh chu an room lam ah inthlak tûrin a kal zui nghal.





Keipawh in ah ka chho a, a lum thei ang ber a inthuam in ka chhuk thla leh nghal a, nu Madini pawh alo inpeih ve chiah.




Kal tum a pawn kan chhuah chuan pa Kima'n car a keng daih tih chu kan hrechhuak leh hnuhnawh hlawm a, a buaithlâk tak tak ani.




Tih ngaihna a awm ngang si loh vangin Christopher-a chuan nu Madini chu a phur a, taxi han zawng leh tûrin kan hmanhmawh tawh si a, kei chuan an hnung ka scooty in ka zui ve nghal bawk.


ZAWMNA

Khua a vâwt tawh nen, kalkawng chu a vâwt hle a, ka in ha chhah viau na in ka lum pha tak tak meuhlo chu ani.





A vawh em avângin kan tlanchak theilo a, Christopher-a pawh in a nu a phurh vang nge ni a ka hma chiah ah muang changin a tlân ve bawk.




Durtlang kan thlen chhoh chuan pa Kima te na lo la thleng a ni ang hmuhtur an awmlo a, casualty lam ah Christopher-a tlân vatin a va zata chiang a, chutiang damlo an neih loh thu a an lo chhan a vangin an lo la thleng lo ni tûrah kan ngai.





Nu Madini'n call leh a tum chuan swith off a inti ta tlat a, network awm loh na lai ah an awm a nih arinama rual in pa min achan hin tak ngial pawh engmah kan hrait theih si loh vangin ngaih erawh a tha duhlo viau mai.





Phone in kan chungchang chu ka chhungte ka han hrilh ve a, engmah han tihtheih nei lem lo mahse min lo tawngtai pui tur thu a min thla chuan awm a nuam ve huai thung.



Rilru nuamlo viau mahse ni Madini a mangan em a vangin kan rilru manganna te tihlan chi anilo a, a hmuh lai chuan ngaih tha tak ang a awm a ngai si a, a harsa khawp mai .





Darkar chanve chuang hret kan ama hnu chuan nu Madini chuan call a dawng ta a, a chhan hna chuan Christopher-a'n lo lak khalh in a chhâng zui ta bawk.




"Awle, kan lo awm e," tih zawng sawiin a dah leh deuh nghal mai a, nu Madini nen chanchin kan lo ngaihven ve thuai.





"Tunah Zemabawk an lo lût tan tawh a nih chu, an rawn tlân chak pui angreng a, an lo thleng vat mai ang," ati a, mahse amah, pa Kima ber kan hmu thei silo a ngaih erawh a tha hlei thei meuhlo.




"Amah a tha em? Engtin nge a awm, engmah a ka hrelo reng em ni?" Ti a nu Madini'n a zawh chuan," mah pawh a tha, nikhua a hrelo tuh mai a nia, a thaw pawh engmah a buailo anti," lehlam haia deuh chung hian a tia, Christopher-a chu a ngaih a that hmel em a vang leh emah a thaw lam ah buaina a awm lem loh chuan tiin kan ngaih a tha ta deuh.






Reilote ah an lo thleng zui mai a, casualty lam ah an luhpui nghal a vangin amah chu kan hmu vuaih hman chauh ani.




A zinpui te an bengvâr hlauh a, an rawn chhuah hma in Doctor hmelhriat nei ten an phone a, an ni chuan stroke a nih ringin an Doctor thutanq ang leh an thiam dan ang angin an rawn bawihsawm a a lawmawm khawp mai.





"Doctor kan han phone khan stroke a nih kha a ring nghal a, kan theih ang angin kan rawn buaipui ania, hlauthâwng reng reng suh u, hei Bawiha pawh kan rawn hrilh laka vek tawh kha," an zîng a patling deuh ber chuan a ti dap dap a, Christopher-a chu ka en vat a, kan hlauhthâwn lutuk loh nan asawi lawm duhlo a ni ngei ang.





An chanchin kan hriat khan khuan thim deuh chauh ani a, damdawiin an rawn thlen khan 6:30pm vel chauh a ni a, an rawn tlân chak pui viau a ni ang.





Dar 9 a ri tei tih ah doc8alk chhuak theih chauh a,chanchin ngaihven in kan tho vat hlawm.




Doctor chuan, " a Bp sang lutuk hi a tluk pui a ni ber mai , stroke a siam , kawnglak a in tana tih kha a tha khawp mai, tunge motor a rawn chuan ve in ka awm em?". Ati zawm zat a.




An lo chhan hlawm tak hnu chuan,kawnglak a thaw buai zat te a zata chiang leh te te a," tun ah chuan atha tawh a nia, mahse kan damdawi khai vang sawn a la harh mai hrih dawnlo a, naktuk vek ah a harh chauh ang, kan admit che u a ngai dawn a, inlo inring dawn ni," tiin a kal ta a, kan tha thaw huai hlawm mai.





A rawn hruaitu te ho chuan ngaihtuah awm a nih tak loh ah chuan min hawsan ta hlawm a, mahse kan chhuak tur kha khati nuai kha kan nih tâk a vang khan mutbu lam reng reng kan lo keng hauh lo mai a, zu lak leh ngei a ngai dawn.




Nu Madini a la zia hleihtheih siloh av hin keimah ka kal a ngai a, durtlang hi chu a hlat tham dueh bakah zan tlân tur a ni kher bawk nen ka chak fahran lo angreng khawp mai A, mahse a kla loh theih si lo. Nu Madini chuan kentir awm ang hi awmna min hrilh zuaih zuaih hnu ah ka in khalh chhuak ta a.





Zan a rei tan dawn tawh avângin kawngpui a thawl tawh a, keipawh ka tlanmuang hranlo.




Ka thlen thlâk chuan kan in ah pawh kei hmasa lo in nu Madini te in lam ah chuan ka kal nghal a.




Chahbi a tala hawn mai kan tum chu a lo inhawng sa a, kan chhuak tur kha kan phili angreng si a, kan lo klah hmaih ani ngei ang, tala mai nilo a hawlhkalh na pahw chu alo intawng tho a, ka ngaih a thalo angreng. Mahse le... Kan ngaihtuah ngial pawh in tu ber in nge kawngka kalh ka hre theilo a, nu Madini khan chahbi chu min pe ngei na in kawngka a kalh lai awm ka hrelo a, chutiang bawk in Christopher-a pawh, kawngka a kalh lai awm ka hre chuanglo.





Ngaihtha zetin ka lut a, mahse choka lam a light ka on dawn chiah tih chuan Christopher-a room lam ah thil eng emaw keh ri chuaih hi ka hria, ka au chhuak teuh hle.




Ka hlau lutuk chu ka tha a khur nghal dar dar a, ka au chhuah mai loh nan ka kâ ka hup vat bawk.





Ka din ngai in ka ding reng a, ka chetsawn ngam tawh hauhlo.




Rei tawk fang ka din hnu chuan, chutiang awm reng chu tha in ka hre chiahlo a, tu emaw awm an awm tak tak a nih chuan hetah hian lo chhuakin min rawn hmu thei reng thi tih ka hrechhuak a,..... Aw Lalpa min han pui lul teh.





Ka ngaihtuah fe hnu ah chutia awm ringawt chu tha dawn in ka hre thei ngang lo a, chu rûkru emaw a tu a pawh chu lo nise min hmuh hma a hmuh hmasak ngei chu ka tum ta.





Zawimuangin ka pan phei a, sitting room luh dawn a nu Madini nunmawi dah pakhat chu ka la phei zauh bawk. An lo chhuah thut palh ka hlauh a vangin inring takin, ka hmuh a piang vaw nghal pawp thei turin ka tin sa ran bawk.





Zawimuangin ka pan phei zel a, kawngka chu ka kut in ka hawng ang nge ka va tlawh hâwng thuai dawn tih ka ngaihtuah a, misual anlo awm tak tak a nih ngat chuan inpawm chilh lutuk kha ka zuam silo.





Kawngka ka thlen chuan chhûnglam ah chuan thawm ka hre leh a, thil eng emaw han hnuk ri hrawih thawm ni in ka hria, zawi muangin kawngka hawng tûr chuan ka ban da da a, kawngka handle ka vuan chiah tih chuan ka hnunglam aṭangin tu emaw hian min rawn pawm chawt in, ka ka a hup nghal a,keipawh chu ka theihtawp chhuahin ka lo tal ve nghal bawk, mahse min man tu chu a chak em a awmzia erawh a nei teh chiamlo.






Ka hlauh hle a, ka lungphu pawh rang tak ani, min ru bo ta se, khawiah nge min hruai ang, nge ni a helai hmun ah hian min that nghal zawk ang, min ru bo tase ka chhungte, a bik takin ka nu leh pa mangan dan tur te, leh keimah ngei pawh chu ka hrehawm tur zia leh pawngsual thlengin ka tawk a ngem. Nge ni A helai ah hian min that ta anih chuan, engtin nge ka nau te ho an lo khawsak chhoh zel tak ang tih zawng zawng chu second reilote chhungin ka ngaihtuah kim vek hman.





"Keimah" ka beng bul a rawn ti sup ri ka hriat rual chuan ka thlamuang huai huai a, ka che pawh chu ka tawp ve nghal chat bawk.




Nghet takin min la kuah reng a, mahse ka hunmawi ken erawh kha chu min thlâk sak tawh thung.




Eng emaw chen thanq a ngaihchân hnu chuan," helai ah hian lo awm la, i beng hup tlat ang che. Chuti chung pawh a eng thawm emaw i hria a ni emaw, i hmu a nih pawh in i awmna ngai ah hian i awm reng tur ani," zawi tak a ti sap sap in choka lam min pan pui a, fridge leh common bathroom bang inkar ah chuan min thut tir nghal zat bawk.






Engtin mah ka che chang lo a, duh pawh ni ila ka taksa chu ka thunun thei tawh hauhlo. Ka kut chu la in a fawp vang vang a, " ka lo kir leh hma chu hetah hian awm tlat ang che, lo hlau lo la ka rei lo ang," tiin ka kut chuan ka beng min hup tir tlat a, kal mai tum a a inher tawh chu ka ngaihtuah em a vangin hlauh lutuk vang a mittui tla pûr tawh chung chuan ," kal lo mai rawh," ka lo ti tham tuak a, ka en ngawih ngawih bawk.






Tukverh atanga varanda light rawn lut chuan kan hmel chu hmuh theih chè chè hian a ti eng ve riai ruai a, a mitmeng ah chuan min kalsan a hreh ve hle tih ka hrethei.





Mahse engmah sawi tawhlo chuan fridge chung a han ban zauh a, a head phone, keipawh in a ka lo hmuh than ve em em tawh chu rawn la in, min vuah tir a, ka jacket ipte rawn zen zauh in ka phone a la chhuak a, a khawih neuh neuh hnu ah ka hla duh ber ,'you belong with me' tih hla Taylor Swift sak ngei mai chu ring zet hian a play a, ka chal ah a fawp zauh a, ka kut chuan headphone chhan a ka beng min hup nawn tir leh in a kal ta a.





Nghet takin ka mit ka chhing a, ka hmai chu ka khup leh khup inkar ah ka phûm daih bawk.





Engchen chiah a rei nge a thang hman ka hrelo, mahse ka hla ngaihthlak chu vawi thm ka ngaithla nawn hman tih erawh chiang tak a hriat ka neih chhun a ni.





Ka dar a rawn khawih tu an awm tih ka hriat chuan ka hming a min ko tu an awm a, chu veleh rang takin ka hawichhuak a, Christopher-a hmel ka hmuh chuan ka tah nuih hawk.





Dingchhuak thuaiin kan kuah chawt a, enge ka tih chhan lam chu ngaihtuah pawh ka ngaihtuah buai peihlo, ka rilru a lo lang ang angin ka che tawp.




A ni pawh in nghet takin ka kawng ah min lo kuah let ve a, amah a sang si a, ka lo te ve bawk nen ka tan chuan ka dingdihlip ak ak chung pawh in kei ai chuan ala sang fe mai.





"I tah em," la inhnit deuh faih faih chung chuan ka ti a, tawngka a min chhang lo in a kut chuan ka hnung a beng thak thak a, ka lungawi tawk em êm tho.





Hliam a neih leh neih loh en tum ka kuah na chu ka thlah a, mahse a ni chuan nghet takin min lo la kuah reng ani ti ka hre chiah," reilote heti hian la awm lawk ang," chauh hmel zet hian ati a, keipawh chu ka awm tha ve leh mai bawk a, a hlauthâwng ve hle a ni ang.



_________________



Tunlai chu ka buai a zual a, minlo hrethiam hram hram teh u, ka story type lai hian ka lo muhil leh tawp tawp zel. Zingah ka tho a rawng ka bâwl a, school ka kal a, ka ban veleh computer class ka kal leh a, ka haw veleh rawng ka bâwl leh a, ka bawl zawh ah dawr ah ka thu leh a, chuti reng reng chu ka hun hman dan a ni a, hunawl ka neih loh bak ah ka buai lutuk hi ka taksa a chau ve thin a, ka school kal lah hi naupang sual deuh ni phei chuan a hahthlâk ve thin lutuk a,min hriatthiam hram ka beisei. Theih chin chin ah rawn dah hram hram zel erawh ka tum ania.