Thliah Hnu Dingdi

[Lallianpuii Ralte]

'THLIAH HNU DINGDI'
By Lallianpuii ralte



CHAPTER - 7




"A....hei coffee in pahin kan lo titi mai mai a, tih harh che kan hlau deuhin balcony ah kan awm a nih hi, kan tiharh che chu ni em lo maw ka pu ?" ka chhan pawh ngailoin ka bula mi chuan alo ti thuai thuai a, "E Sangliana chu i lo awmve nimaw ?..ti harh hran lo e, ka harh thutin bawihtei khuma a mu lo ka han hmu kha ka'n hlauthawng deuh mawle, lo inkawm ru chhuah lawk ka ngai a" tiin a lut zui leh mai a, Sangliana chu va melhin a thusawi tum chu sawizawm leh tura tiin ka mitko ka san khum ak a, nuisakin a sawizawm ve leh nghal mai bawk "Sentei kha ka bia lawm. Mahse, i ngaihzawng neih thu min hrilhin engmah thildang min hrilh ṭha duh lo a, 'Lo tibuai tawhlo law law rawh, bialpa a nei tawha, i telloin a hlim zawk' te kha a tia. I chanchin dang ka zawh pawha min chhan ṭhat duh tak tlat loh ah kha chuan ka be zui ngam ta bik lo anihkha" .




A thilsawi chuan ngaihtuahna a ti thui duh khawp mai, kan inṭhen lai boruak leh Sangliana nena kan inkar engkim ka hrilh ngam awmchhun kha chu Sentei chauh kha a ni a, khang hunlai khan Sangliana nen an inbiak thu a thawi pawn ka hnenah a sawilang lo a, chu chu ka la pawmzam thei; mahse, Sangliana vanga ka nat em em laia Sangliana hnena bialpa ka nei anga a lo sawi mai chu hriatthiam a har ka ti a, zawh fiah leh ngei ka duh bawk. A lakah chuan a ṭhalo zawnga ngaihdan lo siamfel nghal ngawt erawh ka duh lo, a chhan chu amah vanga ka nat zia kha a hrechiang ber tu a ni a, Sangliana vanga ka nat nawn leh te pawh hlauin an inbia tih pawh kha min hrilh duhloh phah te a ni ve thei tlat.




Ṭawng leh ka tum laiin inchhung lama ka dah phone chu a rawn ri ral ral a, tho a va lak lawk ka tum chu Sangliana pawh chu a rawn tho ve deuh hluaia "Rosanga pawh alo harh tawh ang, ka va ngaihven ve loh chuan" a lo ti var a, chhun lamah a awmpui dawn em tih ka zawh chuan "Chhun lam chu hna kal angai dawn a, a nau te hoin amaw an rawn awmpui anga, zanlamah i awm ve bawksia ka rawn thlak leh ang" a tih chuan ka rindan vel reng a ni ka lo ti rilru leh hmanhmawh. Kei awmlo ila chuan mil lem lo taka an sawi a nau dam lo hi a riahpui peih ka ring lo a ni. A kal dawn chuan "Lo inenkawl ṭha rawh aw" tiin ka biangah a rawn piai zauh a, ka lo lai nasa mai.




Chawhnu lamah chuan school a ka hnathawh pui te Emy leh Muanawma bakah Sangtei te pathum chuan min rawn kan ve hlawm a. Pangpar leh eitur eng enge maw an rawn ken ṭeuh bakah Sangtei chuan "Hei kan principal hoin itan kan lo thawhkhawm ve a, midang hi anlo kal ve thei rih silo a, nuamlo anti hlawm viau ania" ti pahin envelope chhah deuh tup mai hi ka kutah min rawn hmeh bel deuh chawt chawt. "Ava ṭullo tak !... zai em ka tawk pawh a ni hleinem sum sen tam ngaihna tur pawh a awmlo a, tinge hetiang intih duh, inbuai hlawm dawn nen inlo kal ngawt pawh hi kalo lawm tawk tawh nak alaiin" ka tive duah a, "Enge i an tawh hrim hrim ?In accident dan chiah pawh kha kan hre kimchang ve lo a, i bialpa nen in ni khan an sawi maiin ka hria" Lalmuanawma'n nuih deuh ruh ruh pah a alo tih ve chuan ka lo melh dur khawp mai.




"I bialpa chuan a humhim zo meuh dawn lo che a ang riau" min fiam tih hriat taka alo tih leh zat chuan ka lo chhang rang tawh khawp "Lalmuanawm dawt dawt rawn chhakchhuak suh. Ka bialpa pawh a ni bawk lo" ka lo ti hlar a, "In inruk tum te hi a ni hial zawk lo maw" a rawn tih leh chuan rum deuha melhin kalo beng thuk a, min fiam ani tih hrethiam Sangtei leh Emy chu an lo nui nasa ngang mai. "Sir muan a dam loh lai lehzel te chuan dim ve deuh la"Sangtei nui pah bawk bawk chunga alo tih chuan "A ho emai, an inchhaih kawlh thawm ka'n hre khat tawh bawk lawm le" Emy-i'n a lo ti ve bawk a, awm rei lo mah se an awm chhung chuan kan hlimin kan nui ho dar dar reng mai.




An haw hnu deuh lawka ka pa chhuak rawn let chuan "I ṭhianpa te saw Saithangpuia fate anlo ni reng elaw" an rawn ti lut a, "Ka hreve nang i hriat hnu mi?" ka tih lah chuan "Hreve deuh reuh e" a ti maia, a awmdanah chuan thildang a awm tlata ka hriat pek chu !..."Zanin chu i ṭhiannu Mercyi'n khan ka lo riahpui ang atia, alo thleng ṭep ang ka ring" tiin thudang a sawi daih a, Mercyi'n min lo riahpui dawn tih ka hriat chuan ka lawm viau mai.




Bdi te chu an lo chhuak tlai viau nge ni khaw thim dawn ruai tawhah chuan anlo thleng ve thei ta chauh a, ka lo nghakhlelh ve tawh nen Lalrosanga awmna ward lama an tam tal rei lutuk chu ka lo lungawi lo hman dawn dawn.




Ka phone ka bih ngar laia "Hello dingdi" mipa aw tham angreng takin a rawn tih avang chuan ka hawichhuak thuai a, Mawimawia ka hmu hlawl mai, "Hey i ṭha maw Mawimawi?" tiin nui chungin ka lo chhawn var a, ka mutna khum rawn hnaih pah hian "Ṭha lutuk tlat...Nang i ṭha zawk maw?.Ohh i ṭhat loh vanga lokal kan ni tak e" a ti bah nawk a, a lai tih ka mit taka min en ṭhat ngam loh avang chuan ka hrethiam nghal mai "Nia mahse, hei ka ṭha tawh lutuk. Inlo thleng tlai angreng sia, a vawt duh viau lo maw" a lu a tuai vut avang chuan a sam rawng leh syle a thlak danglam tih ka hmu zui a, a inhmeh phian mai. "Vawt lo e" a ti maia, inngai dun viau e tilo chuan sawi tur kan haihchham dun takzet.




"Inlo thlen na a rei tawh nen eng em em nge Lalrosanga room ah chuan intih bik a?" nui lek leka ka tih leh chuan "Biaka a telve hi chuan thil tih zung zung hi a theih ṭhin loh. Hei tunah pawh zing dar10 vela rawn chhuak kha dar6 velah kan rawn thleng ve thei hram chauh ania, sawi tur leh tihtur hi a hre thei bik ania" a ti nuah nuah a, a thusawi chu ka lo nuih pui hak hak.




Kan titi laia Sangliana rawn dak zawk kal leh mai a tum chu ka va hmu fuh khawpa " Sanglian" tiin ka au a, a rawn lut zui ve mai bawk a. Engmah pawh sawi lem lo chuan Mawimawia ṭhut loh na lam ṭhutthlengah chuan a rawn ṭhu a, Mawimawia titi kal tluang lai pawh a tawp hmak mai. "Hei Mawimawia champhai khua, Lalrosanga te nen khan ṭhian an nia, an ti ṭha tak tak hei keimahni vangin champhai aṭangin an rawn kal vang vanga" ka tih chuan "E inva fel ve, lo inchibai ila, Sangliana ka nia" ding meuhin Sangliana chuan alo ti ve a, Lalrosanga u anih thu Mawimawia chu ka lo hrilh ve bawk.




Ka awmpui te pahnih chu titi vawrh thiam lo leh ngawichawi mi anni ve ve bawk nen kan ṭawng chhung aiin kan ngawih chhung a rei ṭhin mah zawk awm e. "Zanin nangman ami riahpui leh dawn ?" tia Sangliana ka en chuan "Aw" ti te hian minlo chhang a, kan awmna veng leh ka chhuah theih hun tur te Mawimawia chuan minlo zawt vein Bdi leh Zorama an rawn lang zui ve zat bawk.




Bdi te anlo lang ta chu ka lawm khawp mai, keiin dap chawp pawh ngai tawh lo in sawi tur a han hre mai mai khawp a, sawi tim a nei roh silo a Sangliana a awm ve bawk nen a thil sawi ṭhenkhat avang chuan ka lo ip leh deuh chawih chawih ṭhin a, min chhuahsan mai ka rin nen Sangliana lah chu a chhuak mai duh bik der bawk silo .




"Mate i bialpa mi?" tia Sangliana a melh zauh chuan kala inhmelhriattir lo tih hrechhuakin ka inhmelhriattir nghal a, "A unau suak te zinga mi kha ini maw?" Lalbiakdiki'n a tih zauh chuan mimeiin kalo khap vat a, awmzia erawh a awm tam lo a hnu lawkah "Hei in monu hual tur hi lo duat viau rawh, lo lawi vat a duh phah maithei ania" ka hlauh ang ngei ngeiin a rawn ti leh ka va han ngei tak.




A chhan pawh ka rinloh lutuk laiin Sangliana chuan "Sava thlawk lai te chu tu hual theih bik mah va ni suh, sairukherh nei ṭha ṭha perh thlak tur ani mai dawn lawm'ni" alo tive khauh a, Bdi nui lai pawh a tawp chiang hle , chhan zui dan erawh a hre lemlo aniang a ngawi ta daih.




"Riahpui tur nilo kha chu haw tawh ru" nurse in a rawn tih tak avang chuan an haw zui ve ta a. An chhuak ta chu a reh khawp mai. Mercyi lah chu a rei hrep lehnghal, chanchin engmah a rawn sawi bawk silo a, dawih chi ka ni bawk nen mahni te chauh a awm chu a nuam ka ti miah lo.




Awm a nuam thei tawh lo, tukverh darthlang thim ruih te chuan ka hlauhna ti zualin ka melh ṭha ngam tawh ṭhak lo. Ka piaha mi te thawm lah chu a reh vung vung a, va pawh ve mai ka rilruk tawh.




Lalrosanga te ward lama phei tuma rilru ka siam tawh lai chuan Sangliana a rawn lang hlawl maia, ka lawm lutuk chu lo kuah vawng vawng mai te ka chak rum rum.




"Mercyi alo la thleng nange" a tih chuan ka lo bu nghata "Ti em em nge mawnile i call em?" a tia ka call tawh thu leh a chhan theihloh thu ka hrilh leh hnu chuan "I hlau em?" nui suk hian ati leh a, chhan pawh ka chhang buai peih lo, a chhan chu ani aia ka dawih zia hrechiang tu hi an awmlo tlat a ni.




Ka bulah chuan rawn ṭhu vein mamawh ka nei em tih te min zawt a, ka neih loh thu ka chhan hnuah ka chal chu rawn khawihin "Khawsik chu a awmlo anih hi" ti dutin ka kut a rawn vuan zui a, ka hlauh lai ai pawn ka lung chu a phu nasa tawh zawkin ka hria.




"Ka nau lakah hian feelings i nei em?" ka mita min en pah kar chuan a ti a "Neilo" tiin ka lo chhang maia, "Anih leh ka lakah hian" a ti leh a, thup buai a ngaiin ka hre tawh lo. Diktak chuan hepa lakah hian feelings neih chu sawi loh ka thlahlel lutuk hi inthunun a harsa lam mah tawh zawk a ni. Ka duhdan lo a thil a kal kual leh hma a, a laka ka feelings neih te hi hriattir a hun tawh viauin ka hria a ni. A mi zawhna chu ṭawngkaa chhang loin ka lo bu nghut a, a hlauthawng hmel chu lawmna leh lungawina in a rawn thlak rang hle.




"Kan inkarah tla tumah zep an awm loh a i laka feelings ka neih ang i nei ve tho bawk anih chuan bul kan ṭan lehna tura min dang tu an awm tawhlo anih chu tiraw" a thusawi pawmpui taka lu buk nghat paha ka lo nuih let sak hnua a hmel zet chu a hmuhnawm takzet, he hmel ngei hi a ni hman aṭanga tun thlenga a zuna min la phuar bet tlat tu hmel ngei chu.




Lo kun hniamin min rawn fawp zeuh a, vawikhat mai duhtawk loin min rawn fawp nawn leh, a duhthawh tawh khawp mai. A mi fawhna chu ka thiam ang tawkin kalo chhang let ve a, hun rei tak a ta kalo thlakhlelh tawh a mi fawhna chuan zep rualloihin keimahah danglamna nasa tak a rawn thlen nghala, ani pawh chu ka awmdan ang thoin a awmve a ni tih hriat takin ka awm lam a rawn dap nghal ruai a, rilru fim ka put hmasak angai tih hriain ka lo dang vat thung.




"Duhtawk ang" tia ka inlak hran hnu chuan a hmui tuai zauh pahin "Mate ka tihpalh, rilru fim ka lo pu hman lo alawm mawle" inthiamlo hmel fahran hian a ti a, a inthiamlo hmel ka hmuh chuan ka khawngaih deuh tlat peka "Apawilo, thil pawi a thleng hman chuang hleinem, lokal teh" tiin ka kut chu ka phar chhuaka, kuah ka tumna chu hrethiam takin ka awmah a rawn bei zui ve nghal hlu hlu.




Ka khumah chuan rawn mu vein a awmah ka lu nghatin eng eng emaw sawiin kan titi dun a, inhawng taka kan han titi dun thei ta te chu nuam ka tiin mumang mai mai a chan ka hlau takzet.




Ka lukham hnuaia ka phone dah rawn ri thut avang chuan kan phu dun zawk a, ka han nui dun leh rih. Mercyi alo ni a, ka lak veleh chuan "Mate sorry lutuk...Intibuai an awm a, traffic an ti jam nasa lutuka, ka rawn thleng chiah aw hei" thaw hlawp hlawp chung hian a rawn ti zui nghal a, ka chhan ve hmain a dah zui daih bawk. Sangliana ka hrilh chuan Lalrosanga room lamah a insaseng zui ve nghal zat a, Mercyi pawh alo lang zui nghal mai bawk.




Min riahpui tuin a zir bawka, zan dar11 velah pawh kan la titi tui dun barh barh khawp mai. Sangliana te nena an intih chhungkhat chawp dan ka zawh chuan ti hian min chhang a "Sangliana pa leh ka pa hi tette aṭanga lo inkawm ṭhin sa an nia. Mahse, Mumbaia kan awm laia Sangliana'n college a rawn kala kan hnena a rawn awm aṭang khan kan inti chhungkhat zual. A hma a aizawla kan awm kha chuan keimah phei chuan an chhungkua hi ka hre ve vak lo" Sangliana an hnenah a awm ṭhin tih ka hria chu zawh belh chak ka ngah ngang mai. " A buaithlak em ? Mipa awmpui chu hmeichhia angin inchhung chet velah a pui thei awm silo che u a" ka tih chuan "Teuh lo, Sangsenior-a te hi chu e engkim a ti thei vek, rawngbawl phei chu kei aiin a hnehsawh daih zawk. A lerh lo bawk sia, a nau ang tak tak hian min en ve a, a graduated hnua a haw tur pawh kha kan ui hlawm zawk lutuk" a ti siam siam a, Sangliana a fakna ri hriat chu a nuam ka lo ti ve veng veng mai.




"Lalrosanga nen chuan an mizia a inang vak lo animaw?" nui hak hian ka ti leh a, minlo chhang rang ṭhin khawp mai "Lei leh van ang vel anni, Sangliana'n ngaihzawng neih a harsat em em laiin Rsa ve thung hi chuan 'in monu hual' ti hian hmeichhia a hruai haw zut reng a, zirlai pawh a ngaihsak lo, college pawh kha a zawh hmain a drop out daih nutein a tiin ka hria. Nangpawn i hre tho anga nu Ngaihi hi a nuhrawn tih chu; mahse maw a duat lutuk Lalrosanga zawk hi a diklo a, tun thleng hian 'Nu' tih takngial pawn la ko duh ṭhak lo a" a ti siam siam a, sawipui tur pawh ka hreve meuh lo. Lalrosanga chanchin a sawidan erawh nutei sawidan nen khan a inpersan deuh riauin ka hria a, ka zawt thui chak deuh tlat.




"Lalrosanga chu a nuhrawn leh Sangliana te nen hian an inkar a ṭha vak lo ang khan an sawiin ka hria a" ṭi deuh hian a titi kar lakah chuan ka lo tive a, "Mi sawi te chu thutak khuk pui chiam duh suh. Sangliana nen hi chuan an mizia a inan loh em vang te pawh hi niang inngeih deuh tia sawi tur chu anni hran lo a, mahse, chu pawh Rsa zir loh ṭhin vang tho ania. Sangliana leh a nu hi a nu luahlan tu annih vang aniang a do deuh tlat a, an hmangaih em em chung pawn ani chuan a hmelma en bik tlat a" a tih chuan nutei'n an chanchin min lo hrilh nual tawh vang nge ni Lalrosanga a sawidan chu ka lo tha nat pui deuh tlat 'A nu luahlan tu' a ti kher te kha pai daih har ka lo ti ve ringawt.Nui lui hak chung hian "I van hrechiang hmel, an in a khawsa ve ang mai alawm inih" ka ti ve ta deuh kher a, ka ṭawng dan chu a dawngsawng tu a zirin a ngeiawmin a ngeiawm lo thei viauin ka ring.




"An inah chuan ka chetla tam vak lo na a, nute Ngaihi nen hian kan inbe deuh renga, ṭhian a nei vak silo a, a titi pui duh khawhar hian min rawn be ṭhin a, an chhungkaw chanchin te min hrilh ṭhin alawm" a ti liam puat a, ka lo rindan vel reng a ni. Ka ṭhiani hi chu a rilru hneh a awlin thuhnuai pawh a awlsama a, a thusawi tur te hi a dawngsawng tu tan dawn a nuam angem? Thudik a ni em? Tih lam hi a dawn hmasa tawh ngailo, he a mize frank leh hneh awl zet hi ṭhalo ti deuh ṭhin mahila, mi tam zawkin an ngainata ṭhian a ngahna chhan kha a nive miau sia. Sangliana nu thusawi pawh thudik leh dik lo thlu lo a alo awih zel mai thei pawh chu ka dem lo, mite hi amah anga rilru ṭha leh frank vek turah hian ngai miau hek le!..




"Meng rei suh aw, mut tam i mamawh ania, keipawh hei ka mu dawn chiah a, muttui ka hmangaih che" tih message Sangliana hnen aṭanga ka dawn takah chuan Mercyi titi lai pawh lo pawtchatin mut ka rawt ta chuk chuk a, Mercyi chu a mengrei viau aniang zinglam dar2 vela ka ṭhanharh pawh khan phone alo la hmet eng va va maia, bialpa a nei emaw ni chu ka ti hial.




Tukin pawh ka tho nuam khawp a, zingkara ka pa'n minlo call chuan keimahah insawisel na tur lai awm tawha ka hriat loh avang leh ka nin deuh tawh avanga doctor hnena chhuah mai min dil sak tawh mai turin ka ti a, ka pa chuan pawm hmel vak lo mah se ka tih luih deuh hnu chuan a aw ve ta hram a, ka lawm viau.




Mercyi chuan chhunlamah tihtur a neih avangin tukṭhuan eikhamah min kalsana. Rin loh deuhin nutei alo lang hlawl a, nizan khan Bdi te rualin alo chhuk vea, min surprise a duh vangin ka ṭhiante hnenah khan min hrilh lo turin alo tive ngei a niawm e.




"Nizan khan rawn riahpui nghal che ka duh viau na a, motor ka rui nasa lutuka, Mawimawia khan min phur hlauh lo phei se chu ka rui nasa zual ngawt ang" ti nghal siam siamin ka sam te chu min khuih sak a, chhuah dawn a ruai a min duat thiam ber tur alo lang hnuhnawh chu ka ui viau a ni.




Chhun thil ei tura nutei a chhuah hlan chuan thochhuakin ka theih ang tawkin damdawiin bathroom ah chuan ka insil fai ve a, ka awmna room dep chiah a awm Lalrosanga te thawm pawh a chiang ta viau a, an unau inhnialna avang chuan ka nui leh deuh hak hak ṭhin.




"Damdawiina awm laiin engatannge blazer te hi ka tih nga?" Lalrosanga chuan a ti deuh hluk a, "I chhuah dawn ni a i hak atan ka rawn keng tel anihkha" tiin Sangliana chuan alo chhanga, Lalrosanga lah a thinrim tulh tulh emaw tih turin a vin tawh "Tunah ka awm chin tur pawh hriat ala nilo a, i ngaihtuah thui ṭhin mah mah. Keng let leh vek rawh, i rawn let leh pawh a ngai tawh lo ang, keimahin ka inenkawl thei" a tih bak leh hlur chuan engtinnge Sangliana'n a chhan let ang tiin ka lo ngaichang kar.




"Tuman awmpui che hi an chak lo, ka awmpui duh che hi lawm hle mai rawh. I duhzawng chu sawila, ka va la leh mai dawnnia, office ka chawl laklawh tawh" a thusawi tawp lam chu a dam dap tawh a, Lalrosanga'n a tham lo lutuk chu ka lo lainat ru angreng khawp mai. Lalrosanga'n a chhan tak loh ah chuan "Notei kha call in i mamawh tur ilo hrilh mai dawnnia, ka lo let leh har lo ang" Sangliana chuan a ti leh a, thawm a reh zui hmak.




Ka insil zawh hnu pawha nutei alo let mai loh avang chuan Lalrosanga ward lamah ka va phei a, a khuma ka hmuh mai loh avang chuan balcony lamah ka zu chhuak thla a, ka hmuh tak chuang loh avanga let leh mai rilruk chunga a room lama ka lut leh chu bathroom aṭanga a rawn chhuak nen kan intawk hlawl a, ka phu nasa viau, ani pawh chu a phu ve zuk tho in ka hria.




"Eheu ! i rawn in teleport elaw thliah loh Dingdi"
tiin a nuisuka, walker hawla kun deuh chung chuan a khum lam a pan zui nghal ṭuih ṭuih.




"I la kal ṭha thei nange?"




"Ṭha thei e, ka la kal mawi thei lo zawk"




"Ila chhuak thei ve dawn rih lo animaw?"
inthiamlo hmel deuha ka tih chuan "Chhuah ka thlahlel ve vak lo, in ai chuan chicks an tam zawk alawm" tia nuisunga minlo chhan chuan ka lo ner khum sawk ringawt.




"Ka chhuah hunah ka lo kan ṭhin ang che?" zangkhai fea a khum pan paha ka tih leh chuan "Heta ka awmna chhan berin min chhuahsan daih ten" a lo ti bui bui a, ka lo nuih ringawt. "I u kha khati chiam khan vin tawh suh, tihdik loh nei pawh nise mahni u te lakah chuan ṭawngkam mawi hman hram hram a ṭha nia" ka lo ti daih a, za lo deuh a nui sukin "Ka u pawh a nilo kum khat chhuak alawm kan nih le" mi hnial dang chiang khawp, an inrual tih ka lo hre miah lo a, han sawi leh mai tur ka hriat loh avang chuan "Enge a laka i lawm loh na chhan ni hrim hrim a?" ka ti ta ringawt "A hak duh chi tur ang hlir thuamhnaw min rawn ken sak a, lawm vak na chi ni hek lo" a ti hmuk a, a thusawi chu adik ve tho bawk sia, nuih an tiza angreng, unau hmeichhia te kha an nei vein ka hre sia, ti khawpa an unaupa damlo serious a damdawiina a awm laia, an rawn lang ve miah lo chu mak ka ti deuh. A hmangchang hrelo ber tur Sangliana an tir phar reng maia, hmeichhe chet hun zawk a ni sinle.




Min en deuh run runin "Engtinnge senior-a nen khan in inhriat a?" a ti khauh a, Sangliana a sawina a ni tih ka hrethiam nghal a, chhan mai erawh a harsa deuh a ni. "Hmanah ka ṭhiannu unaunu te inneih naah alo kal ve a" ka ti ta ringawt kan inhriat ṭan dan kha a nive miau bawk a, "I sawidan aia thuk zawka inzawmna nei in ang" alo tih leh chuan ka chhang tawh lem lo.




Nutei rawn lang zui vein "Kan nula damlo chu tlangval te minlo rim san vel animaw" a rawn ti lut lawng lawng a, Lalrosanga a hmuh rual chuan "Lalrosang i nula hip duh hi ilo na der chiam te nilo maw?" a ti zuia "Nute!" tiin ka lo khap vat. Lalrosanga chuan nutei thusawi chu eng he hu ah a ngaih hmel loh "Ehe Lalsenior-i chuhh... Champhai lama i inzawng beidawngin Aizawl lamah i phu tawk mipa i rawn zawng dawn ami? Zawnpui te i ngai dawn em?" zangkhai fe hian nutei en ran pah hian a lo ti ve a, nutei a lawm loh hmel nasa.




"Khati zet zawta ila dak theih chuan ila na lo tawp anih dawn kha" tiin nutei chuan a melh ram rama, Lalrosanga erawh nutei thusawi chuan a teng ek a fan lo tih hriat fahran hian a la nui sawng a, nutei ngei tawk a tling leh khawp ang chu.




"Chhe seng sung lutuk..e taka i nuin i thil tur min rawn thawn ka rawn ken theihnghilh daih" thutak zawka nutei'n alo tih leh chuan "Pawilo ka dam ṭep, thliah loh Dingdii te inah hian lo dah la, ka dam hunah ka rawn lam ang. Lo enghelh chiam duh suh, Dingdii rimna chance ṭha lutuk min siam sakah ngai tawp rawh" alo ti sam et a, nutei ngaihdan alo nilo nasa "A ṭul bawk lo, bawhi pa a rawn kal dawna ka lo chah maiang. I damloh laia i ei tur te a tel a, i dam hnua i va lam daihin awmzia a awm nang" nutei chuan alo tive leh a, kan titi rei deuh hnu chuan Sangliana pawh a rawn thleng zui ve ta mai.




Nutei chuan Sangliana chu a ei hmel vak loh a, ka in chibai tir lai pawh chuan melh pawh a melh ṭha duh vak lo. A hma a ngaitheilo em em si kha Sangliana awmlai chuan Lalrosanga chu a han be ṭha ta khawp a, Lalrosanga nen a khawsa zia chu kan man nasa si a, nui deuh tah tah chungin kan inmelh leh ralh ralh ṭhin.




"Bawiha i chhuah hun chu lo zin nghal rawh aw, khilamah kan ngai khawp che nia"nutei a rawn tih leh takah phei chuan insum thei ka awm ta lo ka nuichhuak deuh haka, nutei lemchan hrethiam ve lo awmchhun Sangliana chuan mak ti deuh hian minlo en vung vung. "Tinge i ṭha amaw?" ti zuiin lu ka lo buk khum nghat ringawt. "Ei chak te i nei em?" Lalrosanga chal khawih paha nutei'n alo tih leh chuan pakhata lah chuan "Nei e" tiin thutak fe hian alo chhanga nutei'n a ei chak a zawh chuan "I vahnu hi" alo ti peka Sangliana chu awmlo se a ri leh chawrh tawhin ka ring.




"Nangman ami awmpui?" Sangliana lam hawia nutei'n a tih chuan Sangliana chu alo bu nghut a, "Tinge unau hmeichhia awmpui tur che pawh i nei ve rengin ka hre sia, mipa berkher han in awmpui tir. I nu kan chah thla mai dawn ami bawiha" nutei ṭawngkam zet chu aw, Sangliana tan pawh a ni zozai tawhlo ti a ter et na tham a tling tawh, a tive mah mah ni.




"Nute chutin ti ringawt suh. A fel alawm Sangliana te chu hmeichhe awmpui kher a ngai hleinem, mamawh a tam lo hrim hrim a" Sangliana rilru tur dawn pui taka ka lo tihve chuan "Tam lutuk min supply seng lo" Lalrosanga chuan alo ti chhum ve hmuka, "Khawimaw i thuamhnaw rawn ken chu" ti pahin sangliana a be zui nghal zata, Sangliana thuamhnaw lo ken a en chu a ner deuh suk suk mai "Hei te hi ava ṭangkai lo em valmawi!" tih paha over coat fual lum hmel zet a rawn phawrhchhuah chuan ka lo inrawlh ve vat "Lalrosang khirh viau suh, lawm hle ringawt rawh sawisel tur zawng reng mai" kalo tive hlar a, en pawh min en lo chuan alo ner sak ringawt.




Sangliana ding ngawi reng nuam tilo hmel hmuh hreawm ka ti chuan "Vawiin office in chawl ami?" tiin ka be ve a, "Chawl pawh nilo, chawhma ka kal a, chawhnu lam chawlh ka dil anih hi..midang ho an buai hlawm angreng sia keiman ka awmpui mai loh chuan" ti nuah nuahin Lalrosanga chu a melh zauh a, nutei'n Lalrosanga thuamhnaw khawih alo en pui ve mek chu "Nute kan phei tawh mai dawn mi ?" tiin ka kheuh zauh a, Sangliana chu inthlahrung chi anih bakah nutei khawsak dan chuan a awm ati nuamlo zual a ni tih hriat takin a din ngaiin a ding renga, awmreina chi pawh a ni tawhin ka hrelo "Nia mamawh i neih chuan hei bawihi ka awmpui dawn tho a, minlo hrilh hreh lo la" nutei'n a tih leh luam hnuah kan ward lamah kan phei zui .




kan ward kan thlen veleh "Nute khatin tinge i awm vak kher, over lutuk..nuam lo a tih hmel em kha...Sangliana te kha chu Lalrosanga chungah a fel lutuk, Lalrosanga hlek hluk zawk kha nia a u zah lo leh a u laka ṭawngkam mawi hmanna chang pawh hrelo ṭhin zawk chu" tiin a khawsak dan avang khan ka hau zui nghal mawlh mawlh a, "Lalrosanga laka fel tur alawm anih reng, a nu nen pawh awmdun theilo a siamtu chu khapa leh a nu kha an nia, engang pawn azia lo ṭha se ka be ṭha theilo" a ti deuh tlat a, ka ṭawng zawm leh pawh chuan a ngaihsak ṭha duh tawh vak lo.




"E taka nute Lalrosanga pa pa Saia kha ka pa nen anlo inhre sa deuh a mi, hmanni khan anlo inhmu aniang ka pa khan mak a tih hmel deuha, ka zawh lah khan min chhang ṭha duh vak lo a" ka tih leh chuan min melh rang ta khawp mai "Hria ang chu le ! A tan thil sawi nuam vak a ni nang. I nu nen an in break zuai lai khan pu Saia nen hian i nu kha anlo inkawp ve hman zuai a, i nu kha chuan i pa thik atan a ti ani mah zawka. Mahse, pu Saia khan i nu kha alo atchilh nasa mai sia, kan buai phah ṭhelh alawm, mi thil ti thei chhungkua anni sia maw" sawizawm tawh tum hmel lo a ka hriat avang chuan "Chuan engtin zel ? Ka pa nen an inhriat dan te chu sawichiang deuh teh. Ka hrechiang chak ania" tiin sawizawm leh turin ka lo tur deuh sek.




"I pa hi i nu ṭhen tura tiin sum hmanga lo tham te kha a tum a, i pa kha a lungawilo khawp a. Pu saia lah kha i nu'n mitmei a hmuh zui lo chung pawh khan an lo ni ve zawk tawh nen Champhai lamah lo zinin a rawn rim zui tluk tluk a. Kha khan i pa beng a thlenga i nu a rawn zin chilh ve ta rup a, kan buai phah khawp mai. Lalrosanga te nen unau inni hman ṭep alawm" Nui hak hak pah hian a ti zui a, ka lo duh lo nasa khawp mai. Ka nutei chuan a thilsawi chu min hrilh ani tih ka pa hnena hrilh lo turin min ti a, chutiang sulhnu duhawm lo ka nu leh Lalrosanga pa in anlo nei chu ka tan mak tih tham a tling leh khawp a, hemi te chhungkua hi chuan ka rinloh lam aṭang hian min ṭhawng dawt dawt reng mai chu nih hi.




Dar thum vela ka pa a rawn thlen ve chuan doctor hnena chhuah min dil sak turin ka lo ti nghal thawra, nutei'n alo hrethiam lo lehpek khawp mai. "Bawihi doctor ten chhuak tura an tih hma che a chhuah lo dil ngawt chu a chi dawn em'ni ? I ṭhat hunah chuan min chhuah tir mai dawn alawm" a lo ti var reng a, ka pa kal mai tum pawh chu a lu tuai pahin kawngka bulah a tawi a tawi ta ringawt "Nute, ka ṭha vek tawh tih ka hria lawm. Ka ning tawh lutuk hi ka awm leh chuan ka ṭhat loh belh leh thei zawk maiang" nutei en kala ka tih leh chuan "Naupang chhia ang maia awm tur a ni hleinem, i dam ṭhat tawh leh tawh loh pawh dawn lek lo a nin tawh avanga chhuah dil han tum tawp mai chuhh...i pa lah hi naupang thu thu hian a awm duan duan a" a ti vin nghal hlar a, a thinrim hmel hmuar hmuar lutuka naupang chhia ang maia awmlo tura min tih zawh chiah hnua ka thu chu naupang thu ang lek anih thu a chhahchhuah zawm leh zat te pawh chu a hre leh tawp nang.




"Lalnute nghal hmuar hmuar zel a che, an phal dawn em pawh ka'n la chianglo a, min chhuah tir theihnghilh te anih takin ka'n ti lawm. Lo buai chiam na tur a awmlo ka nute hmelṭha" tlawn aw zeta melhin ka bula alo kun duk duk lai chu a mawngah ka lo ben sak taih a, "Zaithanpui a ninawm emai" tia khuma min rawn bawhchilh rual chuan dêk a hua tih hriain ka lo dêk nghal chiam a, a nuih uar uar lai chuan ka pa kawngka bula ding chu kal turin ka mitmei pah ralh a, a kal zui ve nghal mai bawk.




Ka pa chu doctor nen lo let lehin ka bp leh eng enge maw an check hnuah "I bp pawh a pangai tawh hi i chhuak chak tawh viau em ni?" doctor in nui chunga minlo en paha a tih chuan chhan pawh ka chhang ngam lo, nutei min tihdan takin chutia nula a pumpa damloh avanga damdawiina awm han nin em em mai chu nuam ka ti bik lo a, ka zak ru ram ram mai "Zanin lam chu inriak leh nga naktuk lamah chuan inchhuah theih tawh mai dawn hi..Nang chu i vannei hle mai, i nu leh pain an awmpui thei bik che a, kha in inchhun nufa em em lehnghala" ti paha nutei lam a en chuan "Tluk chu min la tluk lo deuh tiraw?" alo tive leh ngawt a, "Nia, i nulat laia kan lo intawng lo chu inpa a vannei phah ta nih hi" doctor in alo tih leh chuan an nuidun hawk hawk a, nuichunga ka pa ka han en chu alo nui ve miah lo a, a hmelah lungawilo hmel te ka han hmu tel in ka hria.




Nutei hi ka nu ai mah hian hmelah chuan ka chhun zawka, mi pawh hian nufa emaw min ti fo reng a ni. Doctor a chhuah hnu chuan nutei chuan doctor pa chhelo a tih thu leh fel a tih thu ngawt a sawi a, ka pa erawh doctor in nutei a fiam aṭanga tun thlengin ala tum buau renga, a chhan ka hriat loh bakah hetianga a awm ngai hi ka hrelo a, han biak sawm dan vak pawh ka hrelo.




"Zanin chu keiman ka lo riahpui ang, naktukah bill pe paha doctor te kha hmuh leh angai dawna, kei ka awm loh chuan a buaithlak. Teberi pawn a thlahlel ve che a in a i awm a fuh zawk" ka pa in a rawn tih hluai chuan nutei'n alo chhang rang ngang mai "Va haw mai mai rawh, bawihi vanga lo zin alawm ka nih le. Damdawiin awm man te chu pek tur ka nei ve a, i tello pawn ka'n tifel ve thei vek ania,. Ngaihṭha deuh khan lo va haw zawk rawh" a ti ram hmak a, ka pa chhan ngaihna hre tawhlo chuan a lu tuai vutin nutei chu a thlek leh vang vang ṭhin a, ka khawngaih angreng nizan min riahpui silo a, min ngai ve deuh tawh ni ngei tur a ni.




Ka pa haw tawh chu zanriah kan ei dawnah a rawn lang leh hlawl a, Teberi'n zanriah tur min rawn pe tawh bawk nen nutei nen chutia a rawn lang leh hlawl chu mak ti deuh hian kan lo en ka ho , "Zanin chu a vawt hmel riau a, hei inthuah belh tur leh i nutei hak tur ka rawn kenga" a tive ngei a, a bag khai ka han en sak chu blanket te pakhat leh ka nu kawrlum phiar ka nu'n a damlai pawha a duh deuh mai hi a lo keng chu lo niin chu kawrlum phiar ka hmu chu ka phu deuh zawk, a chhan pawh he kawrlum hi ka nu kawrlum ngainat em em anih avangin ka pa hian a roh em em a, hak chu sawi loh ka'n khawih takngial pawh a phal ngailo kha ni si a, chutia nutei hak tura ui miahlo a a rawn keng ringawt chu ka tan mak tih tham a tling tlat a ni.







(End of chapter - 7)