Nun tihlimtu Lalnunhlimi - 17 By CVL.Awmpuii

[CVL Awmpuii]

Nun tihlimtu Lalnunhlimi
By CVL.Awmpuii



Chapter 17



Muhil thei lovin khumah chuan ka inlet tawn sek a, Nunhlimi nen kan in muttui na aṭang pawhin minute tam a liam tawh. Ka ngaihtuahna in hmun tin kil tin a dap kual a, thil ni thei tam tak te ka ngaihtuah a, ka rilru a buai telh telh mai.




Mihring tupawh hian nunhlui kan nei vek a, kan hun tawn zel ah hian sulhnu kan hnutchhiah ṭhin. Kan hun tawn a inang lo ang chiah hian kan sulhnu pawh a inang lo zul a. Ṭhenkhat in hriatreng tur hun hlimawm, hun hlu tak an hnutchhiah laiin ṭhenkhat chuan damchhung pawha an hriat duh tawh loh sulhnu an lo hnutchhiah ve fo ṭhin. A pawimawh ber chu kan tun hun hi a ni a. Mahse chu pawh chu kan nunhlui in a hril tho si a. Chu tak chu ka rilru tibuai tu a ni.




Ngaihzawngte nunhlui a buai vakte hi ka ngaihdan a ni ngai lo va, kan duh anih chuan duh tawp ila, an tun hun chauh ngaihtuah pui ila tih hi ka ngaihdan a ni ṭhin. Mahse Nunhlimi chungchângah kher hi chuan ka thei lo ania nge. Remi thusawi maltin khan ka ngaihtuahna a ti thui em em vek a. Ka rin phâk bâk in Nunhlimi hi ka lo duh hle tawh tih min ngaihtuah chhuah tir bawk. A thianghlim leh thianghlim loh ai maha ka rilru tibuai tu chu Remi sawi dân anga a'n che vêl tur ka ngaihtuah khan a inhmeh hlawl lo ani.



Nunhlimi chu midang zawng zawng aia ka dah san, kohhran leh KṬP huangchhungah pawh mi zawng zawngin an ngainat leh an hlimpui a ni a. Amah ro ro ah lepchiah taka a che vêl tur chu a inhmeh lo a ni. Hmeichhia, rinawm taka an thianghlimna vawng ṭang ṭang te hi ka ngaihlu takzet a, ka chhuang em em bawk ṭhin. Eng emaw vanga lo dài pelh tawhte ka hmusit hauh lo thung. Mahse mahni chunga a tlâk meuh chuan a mi den dân a dang a, min ṭhawng lo thei lo a ni e.




Nunhlimi hi ka va hmusit in ka va hmu hniam ta tihna lam a ni lo va. Eng ang nunhlui pawh lo nei mah se a tun hun vang hian ka pawm thei vek ang. Ka ngaihtuahna tibuai tu ber chu engmah min hrilh lo lai tak hi a ni. Min hrilh a tum nge tum lo ang aw tihte chu ka ngaihtuah a. Remi sawi kha a tak takte a lo nih chuan a ka aṭang ngeia hriat phû ve hliah hliah in ka inhria. Kan tun dinhmunah chuan sawi chhuah a la tum hmel loh ropui lehnghal a! A nunhlui ah buai lo inti eng ang mah ila ka buai hle chu anih hi maw...hnualsuat phah nana hman erawh ka tum hauh lo thung. Ka ngai ṭha êm a, Remi sawi anga a lo khawsa tur ka ngaihtuah chuan min ti na ni ta berin ka hria.



Hun a liam ve zel a, December thlà pawh kâr lovah kan chuangkai veleh ta dér mai. Krismas chawlh a hnai tawh bawk nen office lamah pawh kan induhthawhin kan buai leh tawh khawp mai. Zing, chhun, zan chawl mang lovin hna kan thawk mawlh mawlh ti ila ka sawi sual tam lo khawp ang. Nunhlimi pawh duh angin ka ngaihsak ṭha hman lo va, mahse rin ai takin min hrethiam thei zel mai a. A zâwn a zan thum ka lên loh ṭhak ṭhak châng pawh a awm a. Ka inthiamlo thei viau na in hnaah ka buai tih a hrechiang ve êm a, ka awm nawm lohna turin a khawsa ngai lo. Min fuih ve reng zawk a, "Office in chawlh hunah hun tam zawk kan la hmang dûn dâwn chauh alawm. I chauh lutuk chuan rawn lêng reng tur pawh hian ka beisei miah lo che ania. I hnathawh loh lai chuan mu hahdam tawp la, i tán pawh a nuam zawk ang" a lo ti mai zel a. Lehlam kawng zawng taka ngaihtuah chuan a puitling ṭhin khawp mai.




"U Hluzual, thingpui" rawn titu lam chu ka hawi vat a, Remi thingpui chawi chunga lo lût zal zal chu ka hmu zui nghal zat bawk a. Pu Liana a la dam ṭha thei meuh lo va, damdawiinah khan an kalpui ta ngei a. Karkhat dâwn chu an lo admit nghe nghe a, an chhuah hnu ah pawh Doctor te'n a taksa enkawl uluk tura an chah avangin kum a ral ṭep tawh tho a. A aiah Remi a rawn thawk tluang ta zel chu ania. Ka huphurh ang he hu in eng boruak ṭha lo mah kan neih zawm lo va. Nunhlimi chungchâng pawh a sawi tawh ngai lo va, kei lahin ka pehhel ve ngar ngar bawk nen hetia thingpui min rawn pêk hi kan inhnimhnaih ber chu a ni mai.




"Tunlai in thawkrim sia, in chau hlawm viau lo maw?" tih leh ka dawhkana thingpui rawn dah chu a rual a. "Chau lo e, kan buai ṭhang alawm " ka lo ti ṭha ve mai a. A chhuak leh mai dâwn emaw ka tih lai chuan "Tunlai in tluang em?" a rawn ti leh hlawl a, Nunhlimi nen kan chungchang a sawina a ni tih hria in "Tluan loh chhan tur a awm hlei nem" ka lo ti awlsam mai a. Kan inkar thû ah hi chuan thâwm rawn nei vak lo sela, rawn inrawlh lo sela ka duh ber mai. Nunhlimi chungchâng pawh min hrilh tam vak tawh lo sela, a hahdam thlâk a ni mai.



"I fel ngawt mai" a rawn tih leh hluai tâk ah chuan ka han melh chho vat a, nui ver ver chung hian min lo melh ve a. "I laka ka rilru puthmang te hre reng chung pawhin min biak dân tâwk i thiam em em a. Zuamawm in i awm hauh si lo, chin tâwk i hria ka tia. Nunhlimi chungchângah lah nise, khatiang zawng zawng ka hrilh chung che pawh khan buaina in nei zui miah lo va. Mipa ngaihsanawm tak i ni U Hluzual " a ti leh mawlh mawlh a. A thusawi chu huat tur pakhat mah a awm lo na in dawnsawn nuam ka ti vak lo. Hmaichhana mi an fak emaw ka chungchang an sawi hrim hrim hian nuam ka ti ngai lo.



"Fakna ah ka lo ngai ang e" ka ti ringawt a, dik taka sawi chuan min chhuahsan vat vat se ka ti. Hmeichhia ang maia midang hnê leh biak peih loh neih vêl chu ka duh lo viau na in Remi lakah hi chuan theihtawp a inthiarfihlim ka duh a ni. "Nunhlimi chuan a hrilh tawh che em?" a rawn ti leh hram a, ka thinin a tuar ta vak lo va, "Chu zawng Nunhlimi nen kan inkâr ni rawh se" ka lo ti hmiah mai. A ngawi zui ve tawh mai ang chu ka tih laiin "Ni e, hrilh hun che a la nei ve ngeiin ka ring a. Chumi hunah chuan i lo dawngsawng thiam dâwn ania. Khawngaih takin hre lâwk sa angin awm lo hram rawh aw, ka hrilh che tih a hriat chuan a lungawi lo zual viau ang. Kan ṭhian dûn inkarah hian neuh neuh thil awm tawh mah se min duhsak ṭhinna te kha ka hre reng a, inhuat zui ka duh lo. In pahnih tán pawh a ṭha ber ka duh ani" a ti duah a. Leh lawi si chuan! A ṭhiannu chhiatna sawi rengtu hian rilru ṭha a put ka ring lo. Mahse a thusawite erawh ngaihtuah tham fê ani tho bawk si.




"Nunhlimi chu lo ngaihtuah duh suh, ka bulah a awm chuan a hlim zel ang" ka lo ti ve kher a. Ka laka a rilru puthmang te zah sak a, a natna tur sawi chhuah hi ka duh dân a ni bîk lo. Mahse Remi hi chuan min cho chhuak tlat zel a ni. A bulṭan a ni a, a dawnsawn dân tur chu a lo thiam ve mai tawh turah ka ngai. "Ka ring tâwk che alawm. Nunhlimi dawm thiam ber tur i ni ngei bawkin ka ring. A hmaa a chanchin ka lo sawi tawh zawng zawngte kha chu nunhlui mai a ni a. A tun hun leh hmalam hun neitu i ni tawh a, in hlim zel ka beisei" a tih leh zet hnù ah min chhuahsan ta a. A thusawi te avang chuan hnathawh zui pawh ka châk lo zo vek.



Ka rilru natna te, ka rilru buaina te kha hun in a liampui ve zel emaw ka tih laiin Remi chuan ka rilru a rawn ti thar leh vek nimai hian ka hria. Hna ah ka lo buai bawk nen karkhat a vei meuh kha chuan ka ngaihtuah zui ngut ngut tawh bîk lo kha ania. A lo sawi dik tehreng anih chuan Nunhlimi min hrilh hun ka nghak mai ang tiin thuthlukna pawh ka siam ta rêng kha ania. Chu chu ka duh dân tak pawh a la ni a, mahse rilru a rawn ti thar lo thei lo a ni ber e.



Ka ngaihtuah lai mêkin Nunhlimi hnen aṭang chuan phone call ka dawng a. Ka lâk rual chuan a rawn ṭap ta hlawp hlawp mai! "Nunhlim, i ṭha em? Tinge i ṭah?" ka lo ti nghal zung zung a. Ka ṭhu hle hle lai pawh chu ka tho uaih mai. A insût hlawp hlawp a "U Hluzual..." tih bâk a rawn sawi thei lo. "Aw ka ngaithla che, sawi rawh, tinge? Khawnge i awm? Engtin nge i awm?" ka ti leh nghal zung zung a. Min tihrilhaiin min ti mangang kher mai. "Apa hi..." a tih ri chu ka hre ruai ruai a, a ṭap zui leh hlawp hlawp mai. "Tinge i pa chu? A ṭha em? In ṭha em?" ka ti leh mawlh mawlh a, min rawn ti phawklek vek. Min chhâng lawk thei bawk si lo, rei fê chu ka ngaichâng a.



A hnù deuhah chuan Philip-a âw hi ka hre ta a, phone chu an inpe in ka hria "Aw Hluzual, hei ka Pa a tlusual a, nikhaw hrelo in a awm a. Damdawiinah kan awm mêk, ngaihtuah awm lutuk erawh a nih loh hram kan beisei" Philip-a chuan a rawn ti ta zung zung a. Nunhlimi insût hlap hlap ri chu ka la hre pha ruai ruai, "A va zialo ve aw, engtin nge a tluk sual theih a?" ka lo ti vat a. "Bathroom-ah inbual tura a lût kha a ri zui ta rum rum a, kan ngaih ṭha lo chuan kan ngaihven vat a, a tlu sual hi a lo nia. Nikhua a hrelo zui nghal a, a taksa ah chuan hliam hmuh tur a awm lo na in a i sawh fuh ve hle anih hmêl" a rawn ti leh zung zung a. An buai rih êm avangin lo biak reina hun pawh a awm lo, chanchin inhrilh leh vat tur chuan kan inthlah zui a. Keipawh Office bân veleh damdawiinah chuan ka va tlang ve nghal ang.




Nunhlimi nen pawh chuan kan inbe zui ta lo law law a, biak tlâk a awm rih lo bawk nen a bulah ka awm thei rih chuang bawk si lo. A rilru ti bo zual tura biak zui vak chî a ni rih lo zawkin ka hria ani. Ka hnathawh lai te chuan rilru ah an awm ve reng a, chanchin engmah an lo la sawi leh loh danah an la buai hle anih ka ring. Rilru bet lo zeta hnathawk na nâ nâ chu hna pawh a sâwt mawh khawp mai a. Hmanhmawh ru deuh chung chuan ka che muang sawt maiin ka hria. Nunhlimi ka ngaihtuah bawk nen a tàwp ah chuan ka ti lui thei ta ngang lo va. Hna tam vanga bân tlai mai tum si kha ka haw hma ta tawp a. Ka thawhpuite chanchin ka hrilh chuan min lo hrethiam khawp mai. "Kan chhungte chesual an awm a" ka ti ringawt a, ka hmanhmawh tih an hrethiam aniang engmah min zawt zui lo.




Damdawiin ka va thlen chuan Nunhlimi ka call leh a, a lo la thei mai lo lehnghal. Vawi li lai ka call hnu chuan a lo la ta hram a. "Damdawiin ka rawn thleng chiah, khawiah nge in awm?" ka ti nghal sup a. Pangngai takin an awmna chu a rawn sawi a, a hma ang em em kha chuan a phili tawh bîk lo anih hmêl.



Ka va thlen chuan cabin-ah an lo awm fel chiah a, an chhungkua an lo kim ṭhap mai. Nunhlimi'n min hmuh rual chuan min rawn pan vat a. A û te pawh chu a zah zo ta ngang lo aniang, min rawn kuah in a ṭap ṭha leh a. Ṭawngka a hnêm lovin nghet zet chuan ka lo kuah lêt a, a hnungzang leh samah chuan ka chûl nghal hauh hauh bawk a. A mangang viau in ka ring a ni.


Tlêma a ziaawm deuh hnu chuan a inlahrang hlek a, "Apa chu a la harh lo va, ICU-ah an dah" ṭap pur chung hian a rawn ti Ṭiau a. Philip-a zawk chuan chanchin kimchang min lo hrilh nghal zung zung a. Khatia a tlu sual kha inrap sual emaw inti palh ni lovin stroke vang a lo ni a ni âwm e. Philip-a chuan thukhuh nei miah lovin thil thleng thei zawng zawng, Doctor-in a hrilh te chu min hrilh fai ve kelh a. Stroke kher kher hi chu a hlauhawm êm a, nikhaw hrelo a an awm tawh phei chuan harhchhuahna chance a vâng khawp mai a. Beiseina pawh an nei chaurau hle anih hmêl. Ka thiam ang tâwk chuan ka lo hnêm ve mawlh mawlh a. Min thlamuanpui zo ngut pawhin ka ring lo.




An dinhmun te ka ngaihtuah a, hawsan nghal mai ka hreh avang chuan ka chhungte pawh chanchin ka hrilh ve nghal a. Nunhlimi te chu an lo lainat ve khawp mai. "I theih chen chen awmpui ve rawh" ka Nu pawhin a rawn ti hial a. An lo ṭawngṭaipui tur thû a rawn sawi nghal luam bawk a. Ṭawngṭai ṭawngkam a rîk tawh hi chuan tlemin thlà pawh a muang deuh ṭhin.



Kan nghak deuh ngar ngar a, khaw thim thleng pawh chuan chanchin thar em em kan nei lo va. Lo nghah deuh ṭhup pawh chu awmzia a awm loh êm avangin Philip-a chuan ro a rêl ta zung zung a. Midang zawng kan haw ang a, amahin a lo awmpui rih dâwn a ni. Nunhlimi chuan awm ve a duh leh ta tlat a, mahse a û chuan lo hnial vatin "Ka awm a ṭha zawk, kan riahpui vek thei dâwn chuang lo va. Lo va haw ula, naktukah in lo kal leh zawk dâwn ania" a ti a. Nunhlimi pawhin lungsi zan lo chuan a pawm ve ta a. Philip-a chuan lâwmthu min hrilh ve mawlh mawlh a, eng teh ual ka tih loh nen min thlamuanpui thû te chu a sawi ve luam a. Kei tehlul min thlamuanpui ve tak tak anih chuan a lawmawm viau mai.




Nunhlimi leh Akimi te nufa chu ka thlah kawi a, Duatpuia chuan a pu chungchang chu a lo ngaihtuah ve hle aniang a sawi ve sek a. A pu in thil a leisak te chu a sawi ve nuap nuap a, "Apu kha a thi dâwn mi?" a rawn ti pek a. "Thi dâwn lo" Nunhlimi chuan rang zet hian a lo ti vat a. "A muhil rei tawh e" Duatpuia bawk chuan a lo ti leh reuh a, "A harh leh vat dâwn alawm, naktukah chuan a harh leh mai ang" Akimi chuan a lo ti ve vat a. Naupang rilru thianghlim tih takah Duatpuia chuan a ngaihtuah zui hmel tehchiam lo.



Nunhlimi chu ka va melh zeuh a, a muttui a lo hru leh keuh keuh tawh. Ka kut lehlam chuan a kut chu ka va chelh vat a, mittui tling lam hian min lo melh ve vat a, ka lainat reuh lutuk. Bûk khum nghut in "A ṭha leh mai ang" ka ti sup a, hnunglam a ṭhu Akimi te nufa chu Duatpuia a ṭawng duh bawk nen min rawn ngaihven vak lo. Nunhlimi chu a lo thaw chhuak hak a, hrehawm a tih hmêl kher mai.



An in thleng ka thlah hnu ah keipawh tawi khawmuang tawh lovin ka haw ve nghal a. Zan lama lèn leh vat ka duh vang a ni. In ka thlen chuan ka chhûngte'n chanchin min lo zawt nghal sawk sawk a. Ka hriat ang ang chu ka hrilh chhâwng veleh a. Chhûng inkháwm hmang tura min lo la nghah avangin kan hmang zui nghal a. Ka pa hun hman ni a ni a, Nunhlimite chhungkua pawh ṭawngṭaina ah a hlan thlap a. Rilru in ka lo ṭawngṭaipui ve mawlh mawlh bawk a. Kristiante'n mangan chânga belh tur ṭawngṭaina kan nei ṭhin hi a thlamuan thlak hle a ni.



Zanriah min lo ei san tawh avangin keimahin châw chu ka ei a. Ka Nu in min ṭhut chilh a, Nunhlimi te chhungkua a lainat zia te chu a sawi mawlh mawlh a. A rilru ah a khatliam leh hle tawh aniang. "A Nu boralna pawh a la rei si lo, tunah a pa hetiang hian a ni leh a. Pathian thlamuanna kan dil pui nasat hle a ngai ang. An lainatawm bawk si, chakna an mamawh dâwn lutuk" a tih chu ka lo pawmpui khawp mai. Nu Châmi boral dân pawh kha inrin lawkna awm hauh lovin a ni a, tunah hetiang hian nat lawk pawh awm lovin a pa a awm leh a. An chhungkaw tán chuan hriatthiam a harsa in a manganthlak ve duh viau ang.




Ka chhuak leh tur chu ka Nu leh Pa te chuan lo kal ve an rawt a. Ka lo hnial lêm lo khawp mai. Kimtei erawh chuan in a lo nghak dâwn thung a, chhungkua kua a va inzui chu a lutuk deuh an ti pawh a ni mai thei a ni. Nunhlimi te in pan a kan tlan lai te chuan an lainat thû an sawi ve mawlh mawlh a. A ṭawng tam lo ber ka pawh a ṭawng ve ta ṭeuh mai.




Kan va thlen chuan in lêng dang pawh an lo awm ve nuk a. Nunhlimi chuan ṭha takin min lo chhâwn a, kan kal hma khan ka Nu leh Pa te'n min zui tur thû ka hrilh lawk tawh a. A lo chhâwn thiam khawp mai. Tlai lama a ṭah nasat deuh vang nge ni a mit chu a bui lâk a, mahse a hma ngawt ai chuan hmuh a nuam tawh.



Choka lamah kan inzui phei nghal a, a thingpui lumna ah chuan ka awmpui ve reng a. A û Akimi chu in lêng chhâwn tu ah a lo ṭang thung a. Chhungkhat laina bâk ah ṭhenawm khawveng te an lo awm ve nuk a, an bengvar ka tiin fel ka ti hlawm khawp mai. Duatpuia'n min rawn hmuh rual chuan kan bulah a tap ve nghal chawt a. A Nu in lêng chhawn in a buai si a, chutia ka bula a lo awm duh chu a Nu a tihbuai loh phah a, ziaawm ka ti phian mai.



"Ka rilru a hah khawp mai" ka hmaa rawn ṭhut thlâk pahin Nunhlimi chuan a lo ti halh a. "Lungngai lutuk suh, a harh chhuak leh mai ang" ka lo ti sup a, ṭawngkam thiam loh nen han inhnem vak ngaihna ka hrelo ani. "A hrisel ṭha ṭhin viau si a, hetia awm teh thut hi a inhmeh hlawl lo" a ti leh a. A thingpui chhuan lai en tur chuan a tho zui lehnghal daih a. "Eng êm a thleng lo vang, mangang lutuk duh suh. Tunlai thiamna a sâng tawh a, a rawn harh chhuak leh vat mai ang" ka lo ti ve luam a. Sawi tur a vâng duh khawp mai. Duatpuia a awm hlauh zawk chu a tihzia phian, ka phone khalh mual mual pah chuan a thil en lai te chu min hrilh ve zel a. Kan boruak a ti zângkhai phian mai.



Nunhlimi'n thingpui a lum fel zawh hnu chuan kan va inzui phei veleh a. Duatpuia chu ka la pawm reng a, a Nu in lâk a tum pawh chuan "Apa Hlua bulah" a ti ve tlat reuh a. In lêng dangte chuan an lo chhawnchhaih ve reng bawk a, damlo vanga kal khawm e ti lo chuan kan hlim ta phian mai. Nunhlimi pawh a nui veleh hak hak ṭhin a. Naupang dang awmte pawh chuan min ngaina ta phian mai a. Duatpuia lah chuan min inti hmêlhriat fe hian min ta neih hmiah a, "Apa Hlu" a ti sek a. A unau dangte lakah chuan min hauh hneh ve khawp mai.




Nunhlimi te chhûngkua pawh ka hriatchian phah a, naupang kikawi tur an lo ṭhahnem zek mai a. Min la ngaina vek zui a, ka tán chuan lawm lohna chi pawh a ni lo. Akimi lah a fel thar thar viau mai a, midang bula min inhmelhriattir dân pawh "Nunhlimi ṭhianpa" a ti deuh kher a. An chhungte ho chuan an hrethiam nghal vekin ka ring, nuam ve duh tak chu a ni. Ka Nu leh Pa te lah nise, an titi a rual tlâng em em mai a. An inngeih nghal viau chu ka lâwm khawp mai.




Dár 10 velah chuan keini pawh haw zai kan rêl ve ta a. Ka Nu leh Pa te'n min zui kher lo sela chu hei aia rei deuhte pawh hi ka lêng ve tur ania. Ka pa chuan "I duh leh la lêng la, i Nu nen chuan ke in kan haw phei mai ang" ti mah se haw tir ringawt chu ni theiin ka hrelo a. An ruala kal ka nihna angin an rual veka haw chu mawite pawh a mawi zawk ang. Nunhlimi pawhin a hrethiam viau aniang "Ngaihtuah awm kan ni lo e, tlaiah lah khan min awmpui rei tawh si a. I chau ang, haw vat la, mu hahdam rawh" min lo ti ve sawk sawk a. Ani pawh hi a chau ngawtin ka ring. A hmêl lah chu a bui deuh lâk reng mai a, a ngui nghiai bawk si. Ka lainat reuh tak tak a ni.



"Nunhlimi chu a lo fel reuh ngei mai" ka Nu chuan a rawn ti hliai a. In lam panin kan haw mêk a, motor ka khalh a. Ka pa nen chuan a hnungah an ṭhu thung a. "Chuti maw...?" ka lo ti ve sup a, Nunhlimi fel an ti chu ka ngaih a ṭha veng veng mai. "Hrehawm a tih àwm tehlul nen puitling takin in lêng te min lo la chhawn thei kha a fakawm reuh. Mi sawi ka lo hre fo tawh ṭhin a, 'A ri huah huah nâ in a puitling' an lo tih ṭhin kha a dik hmêl viau mai. Hluzuala chu i thlang sual dâwn lo e" a lo ti leh duah a. "A kum phû lovin a fel reuh anih kha" ka pa chuan a lo ti ve sup bawk a. Sawiselna ai chuan hriat a nuam in a ngaihṭhat thlak fe zawk.




"Kum engzât nge a nih ve tawh a?" ka Nu in a rawn tih leh chuan "22" ka lo ti ve sup a. "E...naupangchhe zawk zawk chu a lo ni tawh bîk lo anih chu. Vêng khat mah ni ila inngaihven vak loh hi chuan inhriat ṭhat a lo har ve tawh ṭhin si a. Nunhlimi erawh vêng chhungah a lâr ve êm a, kan lo hre ve a ni mai a. A mizia en khan pawlawh hmêl viau mah se sual tur chi chu a niin ka hrelo rêng ani. Ṭhenawm khawvengte rengin an fak emai, 'A thawveng' ti mah se a chhe zawnga sawi an ni ngai miah lo va. A ngainatawm thû leh a fel zia bâk an sawi ngai lo va. A ngaih ṭhat thlâk khawp e" a lo ti leh duah a. "Pasal nei rual a nih ve tawh tho chu a" ka pa chuan a lo ti ve sup pek a. A ruh langin sawi dawt lo mah se mo neih hi chu a châk ve tawh chiang alawm.




"Ngaihzawng nei kual mai mai rual i ni tawh lo tih hria la. I kum la upa viau lo mah se innghahna tur, nupui fanau châwmna tur i nei tawh tho a. Rilru nghet leh felfai tak put a hun tawh viau a ni. Taksa chak ṭhat lai, hrisel ṭhat lai hian nei zung zung ila. Nau neih pawh kan sam nge nge ania. Pathian thû erawh a ni viau mai a" ka Nu chuan a lo ti veleh zung zung a. Helen-i vâng khan nupui nei tur hian min tur lutuk ngam tawh lo va. Ka fimkhur zia an hrechiang tawh a, ka tihsual palh leh mawlh hi an hlau a. Mahse Nunhlimi chungchângah erawh an hmin viau ania nge nupui neih lam min sawipui veleh tawh tlat.



"Kum te han thar sela, kan ngaihtuah ang chu" ka lo ti ve sup a. Dik taka sawi chuan hei aia rei inngaihzawn hi ka la duh. Tlangval ka kham loh vang leh Nunhlimi ka iai vang lam ni lovin a la inpeih ka ring lo va. Nulat hi kham hnek hnawk phawt sela ka duh bawk. A pharvar leh hawiharh chi a lo ni ve bawk nen lerh hauh lo mah se nupui ni tur chuan a la inpeih lo vang. Kei erawh a pasal ni turin ka inpeih tawh viau thung. Ka ngaihtuahna avang chuan ka khi suk a, ani nena hmalam hun suangtuah vêl chu nuam tak ani.




Ni thum lai a liam ta, Pa Ṭhaa chungchângah chanchin thar em em a la awm rih lo va. Hniam lam a pan lo va, ṭhat lam pawh a la pan chuang lo va. A dinhmun chu a ngai reng a ni deuh mai. Doctor te tân pawh hma han lâk vak ngaihna a awm lo va. Ṭawngṭai chu kan innghahna awmchhun a ni ta deuh ber mai. Keini chhungkua pawhin chhûng inkháwm apiangin kan la ṭawngṭai pui ve zel a. Hmasawnna erawh a la awm thei meuh lo a ni.




Buaithlak ber chu Nunhlimi mawlh mai hi! Hrehawm a tiin a ipik ngawih ngawih ṭhin a. Tun ni thum chhûng ringawt pawh khan a Nu thlàn kan tlawh zing malh malh khawp mai. A pa dam lohna chuan a lung a ti lêng thar ni ngei tùr a ni a Nu thlàn a kal a ti reng mai a. Amaha kal tur chuan ka ngaihtuah ṭhin si a, hunawl ka neih loh châng pawhin hun ka insiam chawp a, ka kalpui lawp lawp ṭhin a. Rei pawh kan awm ngai chuang lo, a ṭap vak a, a ziaawm deuh hnu ah ka haw pui veleh mai zel a. Han hnem vak ngaihna hre lo mah ila ka ngaihsak zia chu che zia in ka lan tîr fo a. Ani pawhin a hmuh hmaih bîk in ka ring lo. A châng phei chuan "Ka tibuai thei che e, a inthlahrunawm mang e" a ti leh hliai ṭhin a. "Ka mawhphurhna i nia lawm" ka lo ti mai zel a. A tâna ka awm reng thei chu nin a hnek in ka lâwm em em zawk a ni.



Hna ngah viau e ti lo chuan office lamah pawh rilru ka pe thei meuh lo va. Mahse ka thawkrim ṭhang bawk nen ka thawhpuite pawhin tun ṭum kher kher chu min lo hrethiam zel a. Ṭum danga pui ṭhin tu ni zawk ṭhin kha an puih te hial ka lo ngai ta a. An chunga ka thiltih ṭhat ve tlêm tê te kha an lo hre reng aniang puih ka dilna ah chuan min lo pui ve nghal sawk sawk ṭhin a. Ṭhat leh ṭhat in lâwm tawn ṭhin kan ni bawk a, harsatna kan tawh pawhin kan intlanchhiat san lo a ni ber e.




Remi pawh a lo la kal ve zel a, ka tana hnawksak in a awm ngai lo hlauh a. Rilru buaina tur ka ngah sa êm avang chuan thingpui pawh min lo pe tawhlo turin ka ti hmiah a. Eng thû thû emaw min rawn fah leh kha ania nga, ka dawngsawng peih lo. Ka sawi angin a lo awm ve ta mai bawk a, lehlam kawng zawng taka ngaihtuah chuan a thawven thlâk huai maiin ka hria.




Ka phone rawn ri val val avang chuan ka harh riai riai a, meng mang hlei lo hian phone chu ka ban a, Nunhlimi a lo ni. Tunah zing dár 5 vêl chauh a la ni a, a pa chanchin ngaichâng reng kan lo ni ve bawk nen min rawn call teh thut chu thu thin ṭhawng hre turin ka inbuatsaih nghal ringawt a. Mahse ka lâk rual chuan thu lawmawm ka hre ta hlauh zawk a. "U Hluzual, Apa a lo harh tawh ania" phûr zet hian a rawn ti a, a insût hlap hlap danah läwm vangin a ṭap ani ngei ang. "Ekhai, a va lawmawm ve aw" ka lo ti ve hluai a. Ka thinlung zawng zawngin ka lawmpui a ni.



"Nichinah khan a û in chanchin min lo hrilh a, ka lo hrilh ve nghal che. Ka lâwm eee...a lawmawm tiraw?" a rawn ti leh nawk nawk a. A hlim zia chu a âw aṭang pawhin a hai theih loh. "Lawmawm lutuk ringawt, Pathian hnenah lâwmthu sawi vat tur anih chu" ka lo ti veleh hlut a. "A harh tih ka hriat rual chuan ka rilru in ka ṭawngṭai nghal mawlh mawlh mai. Ka lâwm lutuk hi sawi ngaihna pawh ka hre lo. ICU-ah chuan a la awm tho na in a rawn harh tawh hrim hrim chu ka lâwm. Nakinah chuan a lo dam ṭha leh vat mai ang, a rawn harh leh kha ka ring rêng a" a rawn ti leh nawk nawk a. A insût leh hlap hlap ṭhin a, a ṭap zing ta malh malh khawp mai.




"I lungngaih in i ṭap a, i lâwm in i ṭap bawk a. I ṭahbelh emai, ṭap tawh suh" tiin ka lo fiam zeuh a. Kan tun hnai boruak a rit emai a, hetiang zawnga intih harh hi kan mamawh tawh takzet a ni. "Ka insum thei lo alawm, ka mittui hi a tla awlsam ve hrim hrim" a rawn ti ve mai a. A sawi ang tak takin a mittui hi a tla awlsam ṭhin khawp mai. Mi hlim thei ka hriat zawng zawng zingah a la ṭahbelh ber. Mahse ngaihtuah chian chuan a hlim theih em em chhan te pawh hi ṭah mai a awlsam vang a ni ve thei tho mai. An rilru ipikna tur leh hrehawmna tur te kha an in ṭap thâwl zung zung a. Hei hian vei zui em em nei lovin a siam a, an hlim theih phah zawk pawh a ni mai thei a ni.




"Mu leh tawh rawh, i muhil lai ka rawn tiharh ringawt che bawk si" a rawn tih leh tâk ah chuan "Office kal hma in ka lo tlawh kawi ang che u" ka lo ti ve sup a. "E anih chuan i office kal pahin damdawiinah min thlah ve daih la. Ka pa chu ka hmu ve châk tho a" a rawn ti veleh vat a. Ka lo pawmpui ve mai a, a remchâng viau tak ang. "A la hma ropui si, nang pawh muhil ṭha leh rawh" ka tih chuan "Nia ka mu leh dâwn" thuawih zet hian a lo ti ve vat a. Thu hrilh te hi a nuam ṭhin ania.




Tukṭhuan kan ei laiin ka chhûngte chu chanchin ka hrilh ve a, an lo lâwm ve khawp mai. "Chutia amah ber a harh tawh chuan a ngaih ṭhat thlâk anih chu. Stroke hi chu a hlauhawm êm a, tih hlauhthawn ka hlauh avangin an bulah pawh khan ka ṭawng tam duh lo va. Mahse chutia a harh chhuah tawh chuan a dam ṭha veleh mai ang" ka Pa chuan a lo ti ve chuar chuar a. "Nunhlimi hi chawei a sàwm dân ngaihtuah vat rawh" ka Nu chuan a lo ti teh daih a. "Pu Ṭhaa han dam fel phawt sela, a rawn la ei ve ang chu" ka lo ti ve sup a. Rawn sawi lang kher lo mah se Krismas hma a chawei a sàwm kha ka lo rilruk hrim hrim tho a. Ka Nu chuan a rawn nemnghet ah ka ngai mai.




Office kal hma in Nunhlimi chu ka va lam kawi ta ngei a, jogger pants grey leh hoodie grey a ha a, sneakers a bun leh tawp bawk a. A sam a ṭawn sàn vah chuan a hmêl a ti lang faiin a hmêlṭhatna a tilang kher mai. An inah chuan reilotê ka ṭhu khawmuang ve a, Akimi chuan min lo be ve bawrh bawrh a. Duatpuia erawh a lo la tho lo thung a. "Kal ila, i tlai palh ang" Nunhlimi'n a rawn tih zui tâk ah chuan kan inzui chhuak ta nghal a. Akimi chuan pâwn thleng min thlah a, chawhnu lama damdawiin a kal ve tur thû te chu a sawi pah mawlh mawlh bawk a. An inchhunga chêng an tlêm bawk si, a pa an ngaihtuah vek bawk si a. Duatpuia enkawl a lo la ngai ve deuh bawk nen an indaih ṭha ṭhum lo chu a ni e.




"I va han chhelo tak" motor-a kan luh rual chuan ka ti hluai a, ka hmu hmêlṭha zual êm ani. "I over e" ner nang chung hian a lo ti a, a pa chanchin ṭha lam kan hre ta bawk nen a hmêl hmuh pawh a nuam ta khawp mai. A hnara va piai zeuh pah chuan "Ka lâwm e ti ve mai ṭhin rawh" ka ti nghut a, thinrim a ṭawng erawh ka ni hauh lo thung. A lo ṭeu nghal hlar a, "Min piai kher ṭhin suh" a lo ti hlar a, "Ka seh hrep mai ang che" ka lo ti hluk a. "I ti rapthlak thei emai" uar zet hian a lo ti a, a tûm vei hmân mai. A awm dân ka lawm lutuk avang chuan "Lo tawlh hnai lawk teh" ka ti sup a, "Kal mai mai rawh, office i tlai phah ange aw" a lo ti thung a.




"Lo tawlh hnai vat la, kan rei lo a nimai" ka lo ti leh tlat a, a rawn tawlh hnai ve ta nge nge a. A hmuia ka fawh rual chuan a inlahrang nghal vat a, a hawikual nghal ruai a, a u Akimi mitmei a vêng tih ka lo hre nghal mai. "A lût tawh" ka lo ti sup a, thaw huai hmêl hi a pu reuh a. "I duh hun hunah min fawp suh" a tih chuan "Duh loh huna fawh ngawt thû che a awm hlei nem" ka lo ti duh lêk chauh a. Nui suk suk chungin motor chu ka tinung zui a, nghal min tih hmêl fê a min lo en chung hian "Awi U Hluzual, ka rin ang i ni lo telh telh. I ṭawngthei e" uar zet hian a ti ta thlawt a, ka lo nui hawk hawk mai.



_____________*___________*____________*_______


(Ngaihdàn chhe tê pawh in lo sawi ve hian nuam ka ti ṭhin a, phurna tam tak min pe ṭhin. Ka thawnthu min lo ngaihhlut sak a, min lo chhiar sak ṭhin tute, in chungah hian ka lâwm ṭhin ngawt mai🤍)

Whatsapp Group link https://chat.whatsapp.com/FUhMq6EanQV2bgHX0kzKXE