Nun tihlimtu Lalnunhlimi - 18 By CVL.Awmpuii

[CVL Awmpuii]

Nun tihlimtu Lalnunhlimi
By CVL.Awmpuii


Chapter 18



Damdawiin kan thlen chuan in entir tur an lo zi nuai nuai tawh a. Nunhlimi chuan a û a phone hmasa leh tê tê a, "ICU kawtah min lo nghak anih chu" an inbiak zawh chuan a lo ti vat a. "I hmu thei dâwn em?" ka tih chuan "Aw hmu thei ang ka ring, ka û khan min sawi sak thû a sawi a" a lo ti ve mai a. A phùr hmêl khawp mai. "U Hluzual, i duh leh min kalsan tawh rawh, i tlai lutuk palh ang" kalpui mai ka tum lai chuan a lo ti leh vat a. "I û chu ka lo hmu ve zuai ang" ka lo ti ṭalh a, min hnial zui bîk lo.




ICU lam pan chuan kan inzui phei ta a, nidang zawng aiin Nunhlimi chu a zângkhai a, hmuh a nuam khawp mai. Kan va thlen chuan Philip-a chu a lo awm ngei a, chanchin min lo hrilh ve nghal mawlh mawlh a. An beisei anga an ṭha chho zel te anih chuan zaninah ward pangngaiah an insawn theih hmêl e. "U Hluzual, kal tawh rawh. Keipawh ka Pa hmu tur chuan ka'n lût ange" Nunhlimi'n a lo tih leh tâk ah chuan office ka tlai ṭep tawh bawk nen ka lo hnial ta bîk lo. "Chanchin min lo hrilh leh la aw" ti sup in ka kalsan ta a. Rilruah erawh a châm zui veng veng mai.




Office ka thlen aṭanga darkar khat velah min lo call leh a, a Pa chuan ṭhat lam a pan ve zel anih hmêl. "Natna khuma a mu ka hmu chiah kha chu ka insûm zo lehpek lo va, ka ṭap leh vak a. 'Ka dam dâwn alawm' na chung chung khan a lo ti ṭawk ṭawk a. Theih chu nise a natna te kha tawrh chhawk ka châk asin aw. Anu a awm tawh lo bawk nen Apa hi chu kan neihchhun liau liau a ni ve tawh a" a rawn ti duah a. "Tlai lamah chuan in insawn chhuah theih hmêl em?" ka lo ti vat a, "Doctor sawi dân kha chuan kan insawn chhuah theih hmêl a. Mahse a dinhmun erawh a la derthawng ve deuh a, in enkawl uluk viau chu a ngai ang" a rawn ti zung zung a. A âw rêng rêng chu a zângkhai vah tawh mai a, a hlim hlê tih a hai theih loh.




"I awm reng dâwn em?" ka tih chuan "Aw, tlai thleng chu awm ve ang. Kan inlâk chhuah theih dâwn leh dâwn lohte pawh ka ngaichâng ve ang chu" a lo ti leh mai a. "Office bân ah ka lo pêng kawi leh ang" ka tih chuan min lo hnial vat a. "A ngai lo, ka tibuai che ropui si, hahdam ve tawh rawh. Ka Pa pawh ngaihtuahawm a ni tawh chuang lo bawk a. I duh chuan zanah i lo lêng leh zawk dâwn ania" a lo ti zung zung a. A inthlahrung leh tawh tih ka hrethiam mai. Ri phawr phawr si hi mi ningkhawng a man em em a. Kan inzui tak tak hnù a ka hriatchhuah tâk chu eng emaw kawng zawng tak hian a zakzum a, a rîk ang bawrh bawrh hi chu a ni bîk lo.





Tlai office bân ah chuan ka va kal ta tho a, "Lo kal a ngai lo" ti ve si kha a phûr ber ber ah a lo ṭang leh lawi a. A Pa nen an inbiakna, phone kaltlang a min hrilh hman tâk lohte chu min hrilh nghal mawlh mawlh a. Akimi leh Duatpuia te pawh an lo awm ve a, Philip-a chu a haw ve zuai anih hmêl. Duatpuia chuan min ngheng leh nghal chawt a, "Apa Hlu..." tiin ka phone chu min lo chuh nghal a, ka lo pe ve nghal mai bawk a. Ka malchungah a ṭhu leh thên tawh mai. Nunhlimi'n min lo hnaih ve deuh hlek te chu a ngai thei ta tlat lo va. Nunhlimi lah chuan a vahpa chu a tilui zel a, an inkhing tâwk viau mai. Akimi nen chuan kan nui kan nui a.




Nunhlimi min han ngheng ar ar te chu Duatpuia chuan nem sawn a lo tum ta ṭhin a. Nunhlimi lahin a lo tilui ve zel bawk si, ka dàr ah te a bei ta vêl a. A tàwp ah phei chuan an in vêl ṭap chu a ni ta deuh mai. "Ani chu i sual emai, tinge Duatpuia Apa Hlua bulah te i lo awm ve a" tiin Akimi chuan a fapa thlavang chu a lo hauh vat a. Duatpuia lah chu a ṭap uar sauh a, Nunhlimi nuih a za ngang mai. "Lalduat, engtin mah pawh ka tih loh che kha aw..." a tihte chuan Duatpuia chu a lo ṭeu hlur a, a ṭap rawng rawng mai. Midang tán hnawksak kan ni ang tih hlauvin Akimi chuan a fapa ṭap chu a pawm chhuak ta vat a. Pâwn ah an va in thlêm dâwn anih hmêl.




"Kei ai pawhin a ngaina tawh che in ka hria" nui hak hak chungin Nunhlimi chuan a lo ti vat a. "Naupang rilru thianghlim hi chuan mi ṭha hi an hria ania" intithei fê hian ka lo ti a, min ei loh hmêl khawp mai. "A nêl ve tak tak che anih kha. A sawi chhuak veleh nawlh ṭhin che a, 'Apa Hlua' a ti ve reng mai. Midang nêl a harsat nen a mak tak tak ani" a lo ti ve luam a. "Vawiinah Remi nen in inhmu leh em?" a rawn tih zawm leh zat a, "Hmù e" ka lo ti ṭha ve mai a. Office khata thawk na nâ nâ chu kan inhmu lo thei lo va. Mahse thil danglam engmah a thleng tawh lo thung. Ral aṭanga kan inhmu hi a ni deuh mai.



"Engtikah nge Pu Liana chu a dam ang le?" a rawn ti leh hlawl a. "Kumin chhung chu Remi'n a ai a rawn awh tluan dâwn anih hmêl. A dinhmun a la derthawng deuh a" ka lo ti ve vat a. "Awi Remi chuan nuam a ti àwm, duh berte nena office khata han thawh ho vêl chu" a lo ti nghat a. Thinrim a sawi erawh a ni lovin ka hria. "Nuam tih vak chhan tur a awm hlei nem, ka hna ka thawk a, a hna a thawk bawk a. Chu zawng chu a ni mai" ka lo ti hram a. Ngaih ṭhat loh hlek na tur pawh siam sak ka duh lo. "Ka ring che alawm" a lo ti ve mai bawk a, ka thaw huai mai. A thîk thû a chhe ve reuh sia, kawng engkimah fimkhur ka ngai.




Akimi te nufa pawh an rawn in thlêm lungawi ta aniang Philip-a hovin an rawn inzui lût a. "Hluzuala chu, i va'n ti lawmawm ve aw kan chanchin te min rawn ngaihven ve reng a" a rawn ti hlut a, ka lo nui mai a. Philip-a a lo thleng tawh tho bawk nen keipawh haw tumin ka intintuah ta nghal a. "I la awm dâwn nge ka rualin i lo haw dâwn?" Nunhlimi hriat tur tâwk chuan ka ti sup a. "In kan theih hun chhung chu ka la awm ve ang" a lo ti sep a. "Lo kal rawh, pâwn thleng ka va thlah ang che" tiin ka bân chu a rawn chelh zui nghal a. Philip-a te nen chuan kan in mangṭha zui ve nghal bawk a. Duatpuia pawh a thiam ang tâwk in a rawn ṭawng ve lang lang a. "Apa Hlu, zanah lo lêng leh rawh aw" a tih chuan kan nui hawk hawk hlawm mai.




"I pà pawh a ṭha chho zel turah beisei ila. Tun aṭang chuan a hma aiin in enkawl ṭha lehzual rawh aw. Thil ei ṭha la, mu ṭha la, i rilru hahdam tir tlat tawh rawh" ka motor bula kan din lai chuan ka phun sup sup a. A sam, thlî in a lo chhem lên chu ka hui mam sak thuak thuak bawk a. "Umm, ka in enkawl uluk zual viau tawh ang" tiin a lo bu ve nghat nghat a. "Nang pawh in enkawl ṭha rawh aw. Kan chhungkua vangin i buai ve zel si a, ka inthlahrung ve teh mai ania" a lo ti veleh a. "I inthlahrun tak tak chuan Krismas hma in kan inah châw i lo ei a ngai" ka lo ti vat a. Remchânna lei hun tak niin ka hre miau a ni.




"Ka duhlo e a" a lo ti vat a, "Min rulh lêt ve theih dân ani mai" ka lo tih leh chuan " Awi i phakar reuh e, phût lêt neiin midang puih loh tur. I phakar lutuk" ner nang chung hian a lo ti zung zung a. Kan ina rawn kal a hreh em em lutuk hi chu a manganthlak deuh a ni. "I Nu Matlani leh i Pa Muana'n sâwm tur che in min ti sek a, ka sàwm hlawhltin loh vaih che chuan min hau hrep mai tur asin" ka ti hluai a. "Awi...ka Nu leh ka Pa ti ve mai la, i over e..." uar zet hian a lo ti a. "I Nu leh Pa tur te " nghal zetin ka lo ti sup a, a lai nasa ngang mai.




"Kal mai mai teh, haw rawh, i ninawm" a ti ta ringawt a, a sen awp awp mai. "Chawei ah chuan ka lo ring tho tho dâwn che ania" tiin a hnar chu ka piai zeuh a, a lo ṭeu hlar mai. Ka kalliam hun pawh nghak ta lo chuan "I ninawm emai, haw rawh" tiin min kalsan zui ta nal nal a. Nui hawk hawk chungin a kal liam chu ka thlîr a, a rawn hawi lêt duh tawh eih lo anih chu! Ho tê tê a a lai vak zelte hi hmuhnawm ka ti a, chhaih thinrim nuam ka ti thar viau bawk. A ṭeu ve hlar ṭhin si a, ka lâwm riau alawm.





Pu Ṭhaa chu ICU aṭangin an dah chhuak ta ngei a, Nunhlimi bawk a hlim lehpek. Zanriah kan ei dâwn in phur zet hian min rawn hrilh a, zàn a lêng tur ka nih tho avangin rei erawh kan inbe lo. Zanriah kan ei lai chuan ka chhungte pawh ka hrilh ve luam a. An lo lâwm thiam ve khawp mai. "Pa Ṭhaa dam hunah innei daih ula" Kimtei chuan a lo ti pek a, ka lo nuih liam san mai a. Kan la ngaihtuah ve bawk ang chu!





"Nu...ka ṭhiannu Nonoi khan a û hi a star asin" Kimtei bawk chuan a lo ti leh hluai a. Ka Nu chu a lo nui nghal hak a, ka Pa pawh a lo khi ve suk mai. "I sawi ho emai" tiin Kimtei chu khap mai ka tum a, a sawi châk zawng tak a lo ni si kan inkhap zo leh tawh lo. "Nonoi khan a rawn lên hmasak ber aṭang khan a lo chhinchhiah nghal a. A star bawn tawp a, mahse min hrilh meuh chuan a lo tlai tawh sia. Ka khawngaih ania aw, a û a star zia chu maw...âtchilh tak tê hian a âtchilh " uar zet hian a lo ti zung zung a. "Chu...i û chu a va luck ve a" a sawi duh tur tâwk lekin ka Nu chuan a lo ti zeuh a. Kimtei chuan a sawi zui ṭeuh mai, bialnu ka nei tih a hriat a Nonoi'n a tawrh zia leh a ṭah nasat zia te, min theihnghilh tura a beih nasat zia te chu a sawi ṭeuh a. An thusawi chuan ka chawei pawh a ti tui tawh meuh lo.




"Nonoi chu ka va khawngaih ve aw...mahse in la naupang emai hmalam hun in la ngah lutuk" ka Nu chuan a lo ti ve vat a. "A û hian a phû loh tehlul nen a duhlo ve khanglang a" Kimtei bawk chuan a lo ti lehpek a, kan inmelh no lo tawh khawp mai. Farnu nei chuan in hrethiam vekin ka ring, an ṭawng duh nasa mai ṭhin si a. Nu leh Pa te bula kan chungchâng an report zawt zawt tawh phei chuan hawihil a awl duh khawp mai. "Kei chu Nunhlimi ṭha ka ti zawk" ka Pa chuan a lo ti ve ngei a. "Keipawh U Nunhlimi chu ka ṭan tho a" Kimtei chuan a lo ti veleh lawi a. A ṭhiannu duhsak tho siin a U Nunhlimi hi chu min duh pui ve tho a ni.



"Mo atân chuan hmeichhia han nei phawt mai ila, a ngaih ṭhat thlâk a ni mai" ka Pa in fiamthu ti tak deuha a lo tih leh tâk ah chuan kan nui ta dar dar a. "A û hi tuai star tu ka hria asin" Kimtei chuan a lo ti leh hram pek a. A ṭawng a kaltluang bawk nen kan inkhap sêng tawh lo a ni ber e. Ka Nu leh Pa te lah chuan a ṭawng duhna tur tâwk leka han chhan an thiam si a. Ka hlauh ang ngei ngeiin hman zana Nunhlimi lo kal chungchang kha a rawn sawi chhuak ta hlawl a, mitmei in ka khap ṭhin, a hrethiam tawh der bawk si lo.




"An inhau aniang U Nunhlimi khan zan laiah min lo call thut a. 'I û lo chhuah tir lawk teh' a rawn ti hlawl a, a huaisen ka ti râp mai" a lo ti zung zung a. Ka Nu leh Pa te nuih a za nasa tawh mai. "A û hi chu a Thaibawih daih duh hmêl " Kimtei bawk chuan a lo ti zui leh zat a. "Mo kan nei dâwn emaw ka tia, makpa zawk kan lo nei dâwn a nimaw" nui suk suk chungin ka Pa chuan a lo ti ve sup a. Kimtei ṭawng kaltluang lutuk chuan min chawk ho zo vek. A sawi tam leh tak tak hma in ka khamsan ta daih a. Ka awm khan min ti lui ve deuh tlatin ka hria a ni.




Nunhlimi te inah chuan ka lêng leh ta ngei a, Msa a lo remchâng ve bawk nen kan pahnih chuan kan inzui a. In lêng dang pawh an lo awm ve nuk mai. John-a leh Apuia te pawh an lo awm veleh hlawl tawh a. Msa ka hruai châng hian an awm fuh thei riau mai a, hruai tawh loh zawk chi emawni te ka ti rum rum mai. A puitling leh upa zawk ka nihna laiah John-a leh Apuia te lakah pawh rilru kawi put loh hram hram ka tum tawh a. Mahse Apuia ngên hmêl ṭhin lutuk hian ka zaidamna a vaw chhe lek lek ṭhin. Nunhlimi fiam dân tâwk a hre ṭhin si a, ka mut a ti kham ve hman ziah.




Nunhlimi thingpui lum tur chu choka ah ka zui lût ve nghal a. "Apuia bulah hian nui hmêl pu tam tawh suh" tui in pah chuan ka va ti ringawt a. "Tûm búr a in lêng lo chhâwn te chu a mawi nang" ngaihsam zet hian a lo ti mai a. "A hmaa ka sawi kha i la hria em?" ka lo ti nghut a, min melh mang hlei lo hian "Eng maw?" a lo ti hu a, a tui chhuan lai ah chuan thingpui fe a thlak zui zat bawk a. Min ngaihsak thlawt lo niin ka hria. "Lalnunhlim" zawi si, vin si a ka tih tâk ah chuan a lo hawi ve ta nge nge a. "Awi min va melh rum ve, tihsual ka nei em ni?" a lo ti leh haw tawh. A va han hahthlak tak!



"Mipa nêl chin tâwk hre rawh ka tih tawh kha hre reng rawh. Apuia phei chu..." tiin ka thaw hrawk a, ka insehruh nghal ṭeuh mai. "I thîk thû a va'n chhe tak " a lo ti hlak a, "Chhia e, sawi lâwk lo pawh ka ni lo" ka lo ti hmuk a. Min chhan lêt vak ngaihna a hre tawh bîk lo aniang "Awle" a ti ringawt a. "Mipa nêl chin tâwk hria ang che. I thlîr dân vek khan an thlîr lo che tih hre reng bawk la. Bialpa i neih chuan a tán i rinawm tlat tur a ni" ka ti leh charh charh a. In phatsanna tenawm tawng tawh tu ka ni a, ka tawng leh duh tawh lo ani. Nunhlimi chungchângah anih ngat phei chuan mipa hi ka kehchhe vek theiin ka ring.




"Lungngai suh, Lalnunhlimi hi a rinawm reng ang" a lo ti deuh hnâp a, ka nêm nghal vek maiin ka hria. Mipa hi chu tih lungawi kan lo har lo anih hi. Hmeichhia in kan thû an awih phawt chuan an thuhnuaiah min dah lêt daih thei tih hi ka hrechiang ta khawp mai. "Thingpui ka va sem dâwn a, min lo zui chhuak dâwn nge hetah i lo la awm dâwn?" a tih chuan " Hetah ka lo awm ang" ka lo ti ve sup a. Chîk zeta min melh lai chuan ka lo melh ve reng a, "I titau lo tiraw?" a rawn ti leh kher pek a. "Tau lo tau lo" ka lo ti bul hmuk a, a nui hak hak mai. Choka aṭanga a chhuah dawn chuan "Mak ber bur ṭhin mang e" a tih ri chu ka hre hman hrâm pek a. Midangho haw rem hunah a châk dâwn lo alawm.




A kal hmaa ka thingpui tur min dah sak in pah chuan phone ka lo khawih mai mai a. Ka phone te hi hna thil a nih ngawt loh chuan ka hmang ṭangkai lo ve khawp mai. Tlangval ṭhalai si hi ka khawih tam lo khawp mai a. Social Media-a han inphochhuak vak chî hi ka lo ko hawk lo nen tih tur a vâng ṭhin khawp mai.



"I va tawm thei ve" rawn titu lam chu ka va hawi zeuh a, Apuia a lo ni. Min nuih suk chungin ka hma zawnah chuan a rawn ṭhu ve nghal a. Thingpui no a dawm pah bawk a, "Hluzuala tiraw i hming kha?" a rawn tih leh chuan " Ni e" ka lo ti ṭha ve mai a. A lo berah kei aiin kum 5 vêl chuan a naupang ngei ang a, ka hming pangngaia min ko deuh bawl chu chaltlai ka ti ve lek lek. "Hemi veng hi tiraw in nih?" a tih leh chuan " Ni e" ka lo ti ṭha veleh mai a. Ka be tam vak peih lo. Naupang zawk lehnghal min melh dân te lah chu a chaltlai riau lehnghal a. Ka thin tertek a kai tho dâwn tlat.




"Eng hna nge i thawh ve a?" min rawn tih leh chuan ka dawhtheihna in a tlin ta vak lo va. "Apuia tiraw i hming kha?" ka ti ve ta sup a, ṭha deuhin min zawt sela ka chhâng ṭha em em ang. Mahse a chaltlai mah mah ani. "Eng hna maw i thawh?" ka zawhna ngai pawimawh lo zet chuan a rawn ti leh hram a. Chhâng lovin ka thingpui in lai chu ka lem zeuh a, ka phone chu ka khawihsan leh ta daih a. Ngaihsak lo law law ila thinrimna a tlêm deuh ang. "I beng a ngawng em ni?" elhsen zeta a rawn tih leh tâk ah chuan min cho chhuak ka ti mai. "IRS officer ka nia" ka ti ve hmiah, officer chu ni mah ila mi hriata han sawi lan kher hi ka duh lo ṭhin a. Mahse he nau hi chuan sawi chhuak lo thei lo in min siam tlat a ni.



Awih loh hmêl zet hian a lo ṭhen sawk a, "I chhûngte ah officer an awm em ni?" a lo ti duh lêk chauh a. Ka thinrim thut ka hlauh avangin ka chhâng lêt duh tawh lo va. Mahse amah zawk chu a rawn ṭawng zel a, "Tunlaiah chuan M.A hna hmu lo te hi an tam tawh asin. Tlangval pui, hna pawh thawk ṭha peih lo te hi an tam tawh khawp a. Hmeichhe laka inla cool em em, inti eng emaw riau te hi an awm ṭhin a. Ka mipa ngaihnep záwng tak an ni lehnghal" a lo ti duah a.



A thusawi duh dân aṭang chuan a mizia tur âwm ang chu ka tin zâwn thiam ruak mai. "Eng hna nge i thawh a?" ka ti ve ta nge nge a. Min zâwt hreh lo salh salh bawk a, a hnathawh hriat ve reng reng pawh a châkawm alawm mawle. "Business man ka nia" a lo ti deuh ṭalh a, "Sumdawng maw i nih a?" ka lo ti ve sup a. "Kan thlah kal zelte hi business man deuh vek kan nia. Tunah hian kan chhungkaw sumdawnna ka enkawl mêk a. I duh chuan ka hnuaiah ka lo thun ve ang che. Hnathawk thar lâk kan tum lai tak a lo ni bawk a, a remchâng dâwn riau" a lo ti deuh duah a. Sumdawng mi ni mah se Business man han tih deuh ṭalh khan a changkan hmel a ti deuh aniang chu!




"Ka hnathawh laiah hian min la ui der ve sia, ka lo thawk rih lo phawt mai ang Mama" ka lo ti ve charh a. Hetiang hian tumah ka be ngai lo, deuh sawh leh elhsen takin tumah ka la ti ngai lo bawk. Mahse he nau zet hi chuan a phû ka ti ve tlat. 'Mama' ti a ka ko kher chu a run viau nge ni min melh thîp khawp mai. Nui suk chungin phone chu ka khawihsan leh ta daih a.




"Tlangval upa lam tawh nih a, tlawng àwl lutuk hi a zahthlak viau asin Hluzual" a lo ti ve salh a. A rukin kan boruak chu a ṭang ṭha at at khawp mai. "In chhûngkua chuan eng sumdawnna maw in neih a?" ka lo ti dam thluam a. A thusawi chu haw lo lui tlat ila, a thinrim zual sauh zawk dâwn in ka hria. "Showroom kan nei alawm, Mizoram mai bâk ah North East hmun hrang hrangah kan in zar pharh tawh a. Kan huang kan zauh ve zel e. A tàwp nan ka sâwm leh ang che, i rawn thawh ve duh chuan min lo be hreh lo la. Midang pui theia awm hi kan duh ber ania" a lo ti duah a. Khin zui zel chi pawh niin ka hre tawh lo, a chapo anih hi. A mize hniam ru zet erawh ka beisei phâk bâk a ni.




"Tunlai chu office kan buai lai tak ania, i sawmna chu zahawm viau mah se ka lo hnar phawt mai ang e" a huat loh dân tur ber chuan ka ti a. "Min mamawhna i neih chuan min lo be dâwn ania" tiin a number chu min la pe hram a. Thinrim ai mah chuan ka nuih a ti za tawh, a chhûngte thawhrim zarah a chapo ve em em chu a ni sia. A chhûngte an lainatawm mang e tih daih ka lo ngaihtuah.



Nunhlimi lah chu a lo lêt har phian mai a, Apuia lah chuan kal mai a la tum si lo. Ngawi reng chuan inhmatawnin kan ṭhu ta reng a. Ka phone ka khawih mawlh mawlh a,tham loh hmel zet hian min rawn melh leh ṭhin tih chu ka mitsirin ka hmu thiam ve vek a. Buaina lian zawk a chhuah loh nan ka haider lui hram hram a ni.



"Awi Apuia chu hetah i lo awm ve daih elo?" Nunhlimi chuan a rawn ti lût a. A thingpui sem rei ka lo tih chhan pawh an in zawh hun nghak in a lo seng leh nghal vang anih dâwn hi. "Hei Hluzuala nen hian kan lo inkawm a" Apuia chuan a lo ti ve mai a. Nunhlimi bula a ṭawng dân vêl chu a pangngai khawp mai. Ka bula a intih pà ang kha chu a ni miah lo. "Hluzuala te i tih, û ta che. In unau zinga upa ber paw'n a rual pha lo aw" Nunhlimi chuan a lo ti zek a. Apuia hauh a duh vang leh ka thlavang a hauh vang pawh a ni kher lo vang. "A ho emai a, mipa chu in û kual vêl kha a ngai lo" ngaihsam zet in Apuia chuan a lo ti liam puat a. Mahse Nunhlimi ngaimawh zawng tak a lo ni ania nge, a sawi zui ta hrep a.





"Tunlai ṭhangtharte hi chu kan va han chaltlai sâwt tak e aw. Aia upa zahna te hi kan tlachham tawh, ho tê anga lang ah pawh hian aia upa zahna kan tilang duh tawh mang lo. Mipa ngat phei chu in mak zual, in û te hi in hreh ngang ngang si a. A harsat loh tehlul nen hian, ho tê anga lang pawimawh em em si ania. Hnam dang pawhin an neih ve loh, û tih ṭawngkam hi hman kan hreh ta tlat a. Kan hnam zia lanchhuahna pakhat a ni ka ti lo thei lo" a ti ta duah a. Apuia chu a ngawi ta reng a, "Kum hnih khat vêl leka inthlau te hi chu a la hriatthiam theih mai a. Mahse kum thum kum li chin anih tawh hi chuan in û hram hram a mawi ania" Nunhlimi bawk chuan a lo ti leh zung zung a. A rukin ka lo nui suk suk mai. A thusawi chu hnial dâwn pawh nise a sawi dik miah si a, hnial thlakna tur a awm tlat lo ani. "I tihfel zawh chuan va ṭhu phei ve tawh ang u" Apuia chuan a ti ta daih a, a zahzel ve anih ka lo ring nghal tawp. Nunhlimi hi chu an ngam lo deuh chu a ni e.




Ṭhutkhawmna lamah chuan kan va inzui phei ve ta a. Choka a kan thusawi te kha an lo hre ve emaw tih mai turin an titi chu sawrkar hnathawk lampang leh sumdawnna chungchâng a lo ni a. "Hluzual, tunlai office in buai em?" pakhatin a rawn tih chuan ka lo chhang ve vat a. Apuia a lo meng phâwk nghal hru mai. Ka phû lohin min fak zui ta liam liam si a, fakna dawnsawn nuam ka la tih ber ṭum aniang. Apuia hmêl pawh hmuh a nuam ngang mai.



Sawrkar hnathawh leh sumdawnna chungchang chu kan sawi chho ta mawlh mawlh a. "Tunlai ah chuan sawrkar hnathawh aiin sumdawnna hi a hlawk tawh zawk" Apuia chuan a lo ti zeuh a. Thlawp tu tlêm awm mah se hnial kalh tu an tam zawk tlat. Kan ngaihdan te chu kan sawi khawm laih laih a. A tàwp ah chuan kan vengchhunga pa rawn kai ve deuh tak chuan a rawn khaikhawm ta a. "Nakin hun chu ka sawi thei miah lo va, mahse tun dinhmunah hi chuan sawrkar hnathawh hi a la chhenfâkawm rih zawk a ni. Sawrkar ah sum a tlêm apiang hian sum lêng vak a tlêm ve nghal zel a. Heta ṭang hian a chiang khawp mai. Sawrkar hnathawk in hlawh an lâk theih miau loh chuan sumdawngte pawh an hlawk thei lo. An sum hmuhna ber, a dawr tute ber kha Sawrkar hnathawk emaw te an lo ni ṭhin si a. Chutihrual chuan sawrkar hna hi kan indaih vek si lo va, kan thiltih engkimah theihtawp kan chhuah hi a ṭha a ni mai" a lo ti dap dap a. Sawrkar hnathawk ka nih vang pawh ni miah lovin a thusawi chu ka lo thlawp khawp mai. Apuia lo meng khup deuh zal zal pawh chu a hmuhnawm hrim hrim.



"Apuia nen khan in lo in hau lo tiraw?" Nunhlimi chuan a rawn ti sep a. Midang hovin min hawsan vek tawh a, an ṭhutkhawmna ah chuan insi rialin kan ṭhu dùn a. A kut nêm thep chu ka khalh mial mial bawk a. "Hau lo e" ka lo ti sup a, mahse a awih vak lo aniang "Apuia hi chu a buaithlak ve hret ṭhin a. Mahse kei chu ṭhian kawm duh loh neihte hi ka duh loh záwng tak ania. Min kawm tura lo lêng te hi chu ṭha taka lo chhâwn zel ka duh a. Chuloah ka ṭhian mipate zinga ka ṭhian ṭha ber John-a ṭhianpa a lo ni lehzel bawk nen ka tán biak chhiat a nuam lo va" a lo ti deuh duah a. Ka lungawi loh a hlau niin ka hria.




"Ka hrethiam alawm" ka lo ti ve sup a, a inthiamlo reuh lutuk chu ka khawngaih hnuhnawh leh viau tawh mai. "In lo inhau lo tak tak maw?" a rawn ti leh hram a, "Hau lo e, mahse a chapo ve deuh anih kha" ka tih tâk ah chuan sawi tur a lo hre ngang mai a. "Chapo ve deuh pawh a ni lo, a chapo alawm. Hei vang hi aniang keipaw'n tihtakzeta ka nêl theih loh. An thil neihte a sawi vak vak zel a, min insawitheih khum ṭhin ni berin ka hria. Mahs a mizia ka hrechiang telh telh a, ka ngai neih tawh" a lo ti duah a. "I bialpa Apuia" nui suk chunga ka tih chuan a lo duh lo nasa mai. "I sual emai aw...i thîk em kha" a lo ti tán tán a. Ka âng zui hlak hlak a, a hmui che ve niap niap ka hmuh chuan ka ngaihtuahna ah thil dang a lo awm leh daih tawh.



"Ka seh hrep ang che" a hmui sawk tàwn chung chuan ka ti hluk a. Ka ha a ti ziau tlat anih chu! "Khawi maw, thlah teh a nâ ania" thei leh thei lo hian a rawn ṭawng chhuak a. A tal sawn tur chu lo man betin ka kut ka lâk sawn rual chuan ka fawp zui zat a. Min chhâng lawk duh lo lehnghal a, a va han chimawm reuh tak! Ka inlahrang det a, "Min chhang rawh Nunhlim" ka tih tâk hlukah chuan a lo nui hak a. Ka fawh leh chuan min lo chhâng lêt ve ta vat a.



Ka duhthawh telh telh a, phùr zeta min lo chhân lêt ve na te chuan min ti phùr zual sauh. A taksa rem lai lai chu ka chûl kual nghal ruai a, a âwm báwr ka khawih rual chuan a lo phu ve zawk a. Mahse min dang lo hlauh, a kawrhnuai chhanah chuan duhthawh zet hian ka ṭham tàwn tàwn a, thil hrehawm tak chu a va'n ni lo tak.



Ṭhutthlengah chuan bawhthluin a taksa thlawp zaih chuan ka bawh nghal run a, rapthlak khawpin hnuai lam tur tu chu a nâ a ni. A taksa chu chawi kang zeuh in a kawrhnuai kilhna chu ka hmet phelh zui zat a. A kawr hlim ka tum leh rual chuan min lo dang ta chiah a, kan thâwk lâk a ring dûn khawp mai. Min danna chu ngai pawimawh duh lo lui in chêt lâk zawm ka tum hram a. Mahse "U Hluzual, duh tâwk ang" a rawn tih tâk sepah chuan ka tilui duh tawh bîk lo. A àwm ah chuan hmai ka phûm vang vang a, khati em em a phûr leh sosâng khan ka la awm ngai lo.




"A hrehawm em?" kan ngawih vang vang hnù chuan a lo ti sep a. Kan thâwk lâk a pangngai ve ve tawh a, mahse ka la inlahrang lawk thei lo. "A nuam hman ṭep" nui hawk chung hian ka lo ti sup a, ka hnungah a rawn beng ri nghal thlawp mai. "Min lo dang a" ui zeta ka tih chuan "Kan inchhir ve ve na tur thil anih kha" a lo ti sep a. A thusawi chuan thil dang daih min ngaihtuah chhuah tir. Ka rilru a rawn na nghal veng veng bawk a. "Inchhir turin i lo ti chhin tawh em ni?" ka rilru chuan a ti mawlh mawlh a. Mahse zawt chhuak turin huaisenna ka nei thlawt lo. He ka chhungril a nat rûkna thawi dam thei tu chu amah chauh hi a ni si a. A rawn sawi chhuah hma chu ka sawipui hreh bawk si.




Ka ngaihtuahna avang chuan ka thâ a zawi nghal vek a, ka hah hluah hluah mai. "Tho tawh la" a rawn tih leh tâk sepah chuan zawimuang hian ka lo inlahrang ve mai a. "I thin ka tirim lo tiraw?" chîk zeta min en chung chuan a lo ti leh a. Ka ngaihtuahna chu ka hmel ah a lo lang chhuak a ni mai thei a ni. "Thinrim lo e" ka lo ti sup a. Ka biang chu a rawn ban de de a, "A tàwp kan thleng anih chuan kan inchhir lehna vek tur ania. Chuvangin hetiang lam hi chu pumpelh tum hram hram ang aw" ngenngawl zeta a rawn tih leh tâk ah chuan a kut chu lo hum hnanin ka fawp ta vang vang a. Ka rilru a min kap tu awm tlat hi engtik ni ah emaw chuan thudik hai lanin a la awm ngei ang.



Kâr thar kan chuan kai meuh chuan Pu Ṭhaa pawh damdawiin aṭangin a lo chhuak thei ta! Nunhlimi hlim lutuk chuan min ti hlim khawp mai. In enkawl uluk zui erawh a ngai viau dâwn a. Mahse ka huphurh pui vak lo, Nunhlimi te unau in an duat thiam emai a. Akimi lah nise a mawng a zâng in a che zung zung thei a. Chhungkaw member tam lo mah se an indaihzai viau in ka ring.




Keini pawh karleh aṭangin office kan chàwl ve thei tawh dâwn a. Hnathawh tur tam deuh mah se phùr deuhin ka ti thei mai zel a. Kan hma lawkah chawlh a awm tih ka hre ve kar tawh bawk nen hnathawh pawh a nuam chho viau mai.



Vawiin tlaiah hian Nunhlimi'n châw a rawn ei dâwn a. Ka sâwm nasa ngat ngat bawk a, min hnial leh tlat hlauvin a chhûngte ka lo hrilh lâwk hmiah bawk a. Hreh deuh chungin a lo remti ve ta kha ania, a phurawm viau mai.



_____________*_____________*____________*_______



(Kan hmâ hle mai zanin chu, ngaihdàn chhe tê pawh in lo sawi ve khan min ti phûr ania🤍)