Nun tihlimtu Lalnunhlimi - 19 By CVL.Awmpuii

[CVL Awmpuii]

Nun tihlimtu Lalnunhlimi
By CVL.Awmpuii



Chapter 19


Office ka ban veleh Nunhlimi chu ka va lam kawi nghal a, "Eirawngbawl pui ve hman turin min lo hruai rawh aw" a ti tlat pek a. Office pawh ṭum dang aiin ka bân hma phah a ni. Hna pawimawh khawih tur kan zo thuak tawh bawk a, a pawi thui lutuk lo turah ka ngai.




An in ka va thlen chuan min lo chhâwn vat hlawm a, amah Nunhlimi ber chu a lo insiam mêk a ni âwm e. Pu Ṭhaa pawh a lo ṭhu chhuak ve a, "Eng nge i an tawh a?" ka tih chuan "Ka ṭha tawh lutuk. Ka fate hian min ngaihtuah mai mai a, an beisei ai daihin ka dam sia" a lo ti ve vat a. A ṭha sâwt viau tak tak aniang a hmêl hmuh pawh a nuam ta khawp mai.



"Apa Hlu" Nunhlimi room aṭangin Duatpuia chu a rawn tlân chhuak khut khut a, min rawn bawh nghal rawk rawk a. Ka lo pawm rual chuan a râk chùl mai. Eng eng emaw hi min hrilh ve nghal nuap nuap a, Nunhlimi'n a lo hau pek aniang a rawn hek zat zat reuh a. "Ani in min hau a, a room-a ka awm laiin min hau ringawt a. A thil dah kha amahin a chhia a, ka tihchhiat a ti a" a ti nuap nuap a. "Lalduat, amahin lipstick kha a chhe thei lo aw, i tihchhiat anih kha" room aṭanga Nunhlimi rawn chhuak chuan a rawn ti nghal lang lang a. Duatpuia chuan a thiam ang tâwk in a lo hnial ve zut zut a. Tunlai chu a in khing tâwk ṭhin khawp mai.



"I inpeih tawh em ni?" Nunhlimi melh chung chuan ka lo ti sup a. "Inpeih chu a ni mai, ka inchei vur peih lo va. A pawi em?" a lo ti ve vat a, "Inchei a ngai lo, a ho mai mai. Tikhan a tâwk chiah" ka lo ti ve vat a. Jogger pants dum leh hoodie dum a ha a, crocs a bun leh tawp bawk a. Mi hrang ina chawei tur a ni chuang lo bawk a, a inthuam dân chu tâwk ka lo ti viau mai. "Lalduat, i Nu bulah va kal tawh rawh. I pa Hlua nen kan lêng tawh dâwn" Nunhlimi chuan a lo ti kher a. Duatpuia lah naupang fing rual a lo ni tawh bawk nen "Ka lo kal ve duh" tiin min ngên ta tlat a. "I sawi kher kher a aw" Pu Ṭhaa chuan a lo ti ve sup a.



Duatpuia chuab ṭap chungin min ngên a, a Nu in lâk a tum pawh chuan min ban ṭung a. Hruai ve mai pawh ka pawitih tawh loh laiin Nunhlimi leh a chhungte chuan an remti tlat lo va. "A tibuai mai mai ang che u" tiin Akimi chuan a lo pawm lui a, a ṭap nasa khawp mai.



Hmanhmawh zetin Nunhlimi nen chuan kan inzui chhuak ta a, "A chhangchhiat theih ngei mai" motor chhunga kan ṭhut luh hnù chuan Nunhlimi chuan a lo ti halh a. "I vahpa nen hian in inkhing tâwk ngawt mai" nui hawk hawk chung chuan ka lo ti thung a. "Lalduata hi chh chhaih kawlh a nuam ve êm alawm. Mahse i awm loh lai chuan min ngai ber tho, i awm hian min haw ta tlat ṭhin a. A ngeiawm tak tak ani ka duat tehlul nen" a lo ti zung zung a. "Chhelo in hai lo anih hi Duatpuia nen hian" ka lo ti zeuh pek a. A ner nasa ngang mai. Ka mit ka va siai rual chuan "Kal mai mai teh" a lo ti hlak a, nui hawk hawk chungin ka tlan chhuak ve mai bawk a.



Kan in kan thlen chuan kawtah kan tawi khawmuang leh tê tê a, Nunhlimi a lût ngam lawk lo a ni. "Kan lût dâwn tho tho a, lût vat zawm ang. Tinge maw i zâm viau le?" ka lo ti sup a. "Ka thâwk te hi a chham dâwn in ka hria" tiin a lo thaw halh halh a. "Zah chhan tur a awm lo, i hmuh ṭhin vekte kha alawm awm dâwn" ka lo ti liam puat a. "I ngaih ang ngawt kha a ni lo ania aw, a zâm ve theih lutuk" a lo ti bak hlar a. Ka han nghak leh tê tê a, "Ka haw leh mai ang, min thlah leh mai rawh. Ka huphurh emai ka thal tawp dawnin ka hria" te a ti thùl. Naupang dik tak ka lo ngaizâwng anih hi!




Ka kai lui ta tawp a, a lo ṭang nghal ṭung a, thlah ila chu a tlanchhe nghal nal nal ang mawle. Kan inchhungah chuan ka pawt lût lui ta a, "E...Hluzual in lo thleng maw?" tiin ka Nu'n min lo chhâwn nghal vat a. Nunhlimi chuan ka bân luam a rawn sik nghal vawt mai, "Ka thi dâwn in ka hria" zawi si, sehchilh bawk si hian a rawn ti a. A chil a lem ri khalh khalh mai. A lo zâm hle anih dâwn hi!



"Khawnge midang?" Nunhlimi zâm lutuk tur ngaihtuah chung chuan ka Nu chu ka zâwt a. "Thil lei kim loh ka lo nei a, an pafa in bazarah ka tir leh lawk anih kha" ka Nu chuan a lo ti vat a. "Nunhlimi chu kan sawmna te i lo ngai pawimawh a, i fel hle mai. Eirawng ka bâwl mêk a, châw chu kan ei ṭhuai dâwn nia" tiin Nunhlimi, ka hnunga ding tlat chu a lo be leh zung zung a. "Ka va inthlak lawk ange, lo ṭhu la" ka ti sup a. Nunhlimi chu ṭap mai tur hmel te pawh a pu alawm le. "Ka thi dawnin ka hria" a lo ti leh nawk a. A sen ṭawn ṭawn dân ah a zâm tih hai rual a ni lo. Ka Nu biakna lah kha a chhâng lêm hlei lo va.




"Hluzual, va inthlak la. Nunhlim, lo ṭhu hahdam rawh. I pa Muana te pafa pawh an lo lêt leh ṭep tawh ang" ka Nu bawk chuan a rawn ti leh a. Nunhlimi chuan ka Nu thusawi lam reng reng chu a ngaihtuah tawh lovin ka hria. Min melh ngar a, "Min kalsan suh" tih melh hian min melh ka ti mai. Ka Nu chuan min rawn ngaihsak lutuk lo hlauh zawk a. A thiltih lai tih pahin a rawn ṭawng zel zawk a, a vanneihthlak letling phian mai. "Ka room-ah min lo zui ve mai ta che" ka tih chuan rang zet hian a lo bu nghal a. Amaha ka Nu nen chauha lo awm chu thih hrehin a hreh tak tak anih hi.



"Nu, Nunhlimi hian min lo zui lawk dâwn a, thil entir lawk tur ka nei a" ka Nu bula ka tih chuan "Aw, va inthlak zung zung r'u" a lo ti sawk sawk a. Nunhlimi chuan min ngaichâng hman tawh lo, ka room lam chu a pan nghal hlawk hlawk a. Ka Nu in a lo hmu hman si, a hrilhai hmêl khawp mai. "A zâm lutuk a, lo hrethiam rih mai teh" ka ti ta tawp a. "A va ho e aw" nui vur vur chung chuan a lo ti ve mai a, a hrethiam aniang chu.



Ka room ka va luh ve meuh chuan Nunhlimi chu a lo vei tawn sek a, "Aaa...U Hluzual, ka lo zui kher kher che ani. Ka thi tak tak dawnin ka hria, a hrehawm lutuk. Hetiang em em hian ka la zâm ngai lo, puakkeh tur ang mai hian ka sa chhuak vek. Awmngaihna ka hre lo, tinge ka zâm em em le. A hrehawm lutuk, ka lungphu te hi a thlawk chhuak dawnin ka hria" a lo ti nghal mawlh mawlh a. Keipawhin heti em em a a zâm hi mak ka ti. Ka tih luih kha chuan a hmachhawn ve mai theih kha ka ring ania. Mahse ka rin ai daihin a lo zâm mai.



"Hahdam rawh, awm tawp la, a dik a ni mai" ka lo ti sup a. "Awm tawp dân tur ka hre lo alawm. Awi ka rilru a hah e. Nichinah te khan i Nu kha ka chhâng miah lo ka va'n mãwl tak. Ka awm dân hi ka sawi chhuak thiam lo zawk, ka thâ a zawi vek rualin ka ṭang ṭung tho bawk sia. A hrehawm e, eng angin nge min ngaih ang le? I room-ah ka lo lût tlang nghal tawp mai bawk sia. Engtin nge ni ang?" a lo ti leh nawk nawk a. A mangang takzet anih hi!




A vei tawn chhen lai chuan ka va ti ding chawt a, "Min en teh" ka tih rual chuan min lo melh nghal kiau a. "Nangmah a nangmah ang tawp khan lang chhuak rawh. Nunhlimi chu Nunhlimi ni reng rawh se. Danglam tum vak pawh a ngai lo. I nihna ang ang khan lang chhuak tawp la, chu chu a tawk reng. Engtin emaw riau a awm i tum anih kha. I lo lêng a, châw i lo ei dâwn a, chutiang ang tawp chuan ngai rawh. I rilru tihah suh" ka ti dam ta thluam a. "Min ngei ka hlau, i chhûngte hian" ṭap ṭep chung hian a lo ti sep a. "Engvang ngawtin nge an ngei ang che? I va han â mai mai tak e aw. Khatiang ngaihdan kha dah bo ngial hmak ang che. I nungchang, i mizia engkim an hre sa vek. Ka tán an iai lo che a, iai chhan tur pawh i awm lo. Ka thuthlukna ah hian kan lungrual a. Chhungte hriatpuina mai bâk ah pawmpuina thlap a nang hi thlang che ka ni. Chuvangin nangmah i inrintawk lohna te kha paih thlà la, i nihna ang tawp khan lang chhuak rawh. Awm tawp rawh" ka lo ti leh duah a.



Hmeichhia, mahni inringtawk ve tak, lu zo veh vawh hmuh khan ka lo hmu reng ṭhin a. Mahse zâm thei a lo nih ve zia ka hre thar leh ta! Mahni insitna leh hrehawm tihna te pawh a lo nei nasa ve hle tih a chiang viau bawkin ka hria. Kan lan dân hian kan nihna dik tak a phawk chhuak a, kan nihna zawng zawng erawh a lo phawk chhuak zo lo anih hi.



Ka inbual tur chu a lo phal lo tlat pek a "Inthlak ringawt mai rawh, heta awm rei lutuk chu a nuam lo" a lo ti sep a. A rilru nawm loh zia ka hre sa bawk nen ka lo hnial bîk lo. Ka inthlak dâwn chuan a lo hawisawn vat a, "Min lo en teh" nui hawk chung chuan ka ti kher a. "I ninawm, i over lutuk, inthlak vat mai teh" a lo ti ṭeu hlar thung a. Chhaih thinrim hi chu a nuam ve chiang alawm.



Ka kawr ka hak hma chuan "Ka zo e" ka ti hluai a, a awm dân tur ka hriat châk êm vang a ni. A rawn hawi rual chuan "Awi" a ti vak a, a mit a hup zui zat bawk a. "I sual emai aw, i ninawm lutuk inthlak zo vat rawh" a lo ti leh hlar a. A awm dân chu hmuhnawm tak a ni ringawt. Chhaih buai tawh lovin ka kawr chu ka ha ṭha veleh mai bawk a. Mahse "Ka inthlak zo" ka tih pawh chuan a lo hawi ṭha duh mang tawh tlat lo va. "I ti tak tak em?" a tih chuan " Dawt ka sawi lo" ka lo ti ve sup a. Ngaih ṭha deuhin a rawn hawi ngam chiah a ni.



Room aṭanga kan inzui chhuah chuan ka pa leh Kimtei te pawh an lo thleng ve chiah a. An ri nghal bawrh bawrh bawrh a, "Nunhlimi te chu, in lo thlenna a rei tawh em?" ka pa in a tih chuan "La reilo e" a lo ti ve sep a. Kan in kan thlen aṭanga ka chhungte hriata a ṭawng vawikhatna a ni. Ka Pa chuan a zâm tih a lo man thiam ve nghal aniang a Pa chanchin a zawt ta daih a. Ṭhutkhawmna ah chuan kan inzui phei zui zat bawk a. Chutia pangngai taka inbe ta chu Nunhlimi pawh a inthlahdul ve tial tial in ka hria.



Ka Nu leh Kimtei te chu choka lamah an buai nghal chawt a. Nunhlimi pawh bet zan lovin ka bulah chuan a ṭhu ve ta reng a. Ka pa in be thiam viau mah se eirawngbawl ve loh ngawt chu a ngaih a ngam ngang lo aniang choka lam chu a va thlek leh zeuh ṭhin a. Kal ve duh si, va pawh ngam chiah si lo hi a ang ber.



Kalpui ka tum lai tak chuan ka Nu in a lo ko ta hlauh a, "Nunhlim, hmarcha rawt lo siam ve la lo kal rawh" nêl tak hian a rawn ti hlauh a. Nunhlimi chu a tho rang kher mai, a lo châk et et tawhte pawh a ang zawk alawm mawle. Choka ah chuan a va lût ve nghal nal nal a, "A lo zakzum hle mai" ka Pa chuan nui suk suk chung hian a lo ti sup a. "A zâm lutuk a" ka lo ti ve vat a, "A ngaih ṭhat thlâk dâwn anih kha" ka pa chuan a lo ti daih thung a. A sawi tum ka man lo, "Tawnhriat a la nei tlem tih a hriat a, a ṭha zawk" a lo tih leh chuan ka hrethiam ve chiah. A sawi ang chu ni mawlh teh se.



Thlasik a ni tawh bawk nen zanriah chu dár 5 vêl ah kan ei ta a. Nunhlimi pawh a zâm lutuk tawh bîk lo va, pangngai takin a awm a. Ka chhungte'n an biakna te pawh ṭha takin a chhâng ve zel thei ta. Kimtei lah chuan "U Nunhlim" a ti ve sek a, an innel nghal khawp mai. Mahse Nonoi chungchang a rawn sawi chhuak kher chu ṭul lo ka ti kher mai. Tunlai Kimtei ṭawng kaltluang lutuk hi chu a pawi a ni.




"Ka ṭhiannu Nonoi chuan a û hi a star tawp a, mahse nangmah kan duh zawk che" te a ti a. A ni ngaihah chuan Nunhlimi tana dawnsawn nuam tur angin a ngai pawh a ni mai thei. Mahse Nunhlimi thîk thu chhiat zia leh tawh khirh zia a hre lo a ni. Nunhlimi chuan min rawn melh ralh ta rêng a. Kimtei chuan a thusawi chu a ngaihsak zui leh tawh chuang lo va. College chungchang te sawiin Nunhlimi chu an college kal ṭhin lai te a zawt luam a, ṭha takin a lo chhang ve zel mai bawk a. Kan pahnih chauha kan awm hunah chuan a tawh khirh leh vet vet viau ang le.



Zanriah kan eikham aṭanga rei vak lovah ka va thlah leh thlap a. Ka rin ang ngei ngeiin haw kawngah chuan a tawh khirh leh viau. Ka phone check hial min dil a, hlauh tur ka nei lo bawk a tiin ka check tir hmiah a. Nonoi'n min lo biakna te kha engmah ka la Delete lo na in hmu vek mah se pawi tihna ka nei lo. Ngaih kawih tur zawngin ka be lêt ve lo hrim hrim bawk a. A rilru a kawi viau te anih loh chuan a ngai kawi bîk lo vang.




"Heti hian a rawn inpuang kher a maw?" a tih chuan " Anih kha" ka lo ti ve sup a. "Kha" tih leh ka malchunga ka phone rawn dah chu a rual a. "Lungawi lohna tur i hmu em?" mahni inringtawk zet hian ka lo ti zâng vah a. "An laka i rilru puthmang hi chu thuhran, i laka an rilru puthmang hi ka thlak sak châk ṭhin" a lo ti sehchilh nawk a. Min dem duh, min demna tur hmu chuang si lo chuan hmeichhia te a puh ta vêl mai mai niin ka hria.



"Nangmahah ka rinawm nghet tlut ka tih fo kha" ka lo ti churh a, "I bul vela hmeichhia te hi ka ring lo alawm" a lo ti ve nghat a. "Hmeichhe sual hi chu sual tak kan nia. Kan rapthlak bawk si, nang chu ka ring che a, nangmah lo ngaizâwng ve tu che ho hi ka ring lo. Zak thei lo hlawm ropui si, ninawm" tiin a insawh tau leh ta nghawng nghawng a. "Kei ber min rin chuan a tawk viau alawm. Hmeichhe dangah chuan rilru tihah duh suh. Ka chhehvelah hian sual chhuah in rawn awm mah se ka hneh zel ang" ka lo ti charh charh a. A lungawi si lo, lungawi loh chhan tur nei bawk si lo chuan min tùm khum bur ringawt mai a ni.



An in kan thleng a, motor aṭanga a chhuk tur chu ka lo man bet leh rih a. "Khawi teh, ka ning ania" a lo ti hlar a, ka nui zui hawk hawk a. "Ka luck lutuk hi chu a pawi a ni" ka tih chuan rum zet hian min rawn melh a, "Bialpa luck deuh neih hi i phû ve rêng alawm" ka tih leh phei chuan ka samah min rawn ṭham ta vak a. "Awi i over e, hneawm lutuk" ti sehchilh nawk nawk in min kek a. A va han kawlh reuh tak! A kutthlak lah chu a na der mai si lo va.




"I duh tâwkin min sawisa phawt la, i lungawina tur anih phawt chuan ka dawh zel ang" ka tih chuan a tâwp nan ti ang hrimin ka bengah a pawt vat a, min thlah ve ta hram a. "Bialpate kutthlak chîng nih chu a ṭha miah lo ania, insiamṭha vat rawh. Luck lo zawk zawk kan lo ni bîk si lo va, bialpa nei lovin i hawihil daih mai ang" ka lo ti leh kher a, a run kher mai. "Apuia ani ve mai" a tih rual chuan "Ka hnek ang che" ka lo ti kawkalh ve a. Rapthlak tih hmêl zeta min melh khai chung hian "Mahni bialnute hnekah tunge vau ngai?" tiin a lo chet tlak tlak a. "Mahni bialpate sawisak chîng bialnu nei tu in" sawi fuh inti fe a ka lo tih rual chuan "I ṭawngthei emai aw..." uar zet hian a lo ti leh a. Zanin chu kan inngeih hman thlawt lo a ni e.



Ka haw leh hnù erawh chuan phone kaltlangin pangngai takin kan inbe leh lawi a. Nonoi chungchang chu chîk zet hian min rawn zawt a, "Naupang alawm a nih" ka lo ti mai a. A lungawi chawp ve ta mai aniang engmah a rawn sawi zawm duh tawh bîk lo. "Ka ring che a, rintlak in awm zel la a ni mai" a ti charh charh a. Min vau deuh reuh te'n ka hria. Mahse chu chuan min ti lungáwi viau thung a. Thikthu te hi nei lo ve ve ta ila a ngaih ṭhat thlâk miah loh ang. Kan induh tawk lo hle tihna te pawh a ni dâwn a. Harsatna lian tham thlen tir lo tawk zela thîk thu pek chhiat te pawh hian inngaihzawnna boruak hlimawm a keng tel ve tlat a ni.




December ni 23 zan ah chuan inrawt phùr chawpin eng eng emaw kan huaihawt ve a. Kan inah ar kan kang ho ve dâwn a ni, Noodles leh eng eng emaw pawh siam kan tum nual a. Pawisa thawh khawm an tih chuan ka lo hnial vat a. "A thlengtu tur kan nih chuan keiman ka tum thei alawm" ka ti ve tlat a. Mi hrang kan awm chuang lo bawk a min lo pawmpui tlâng khawp mai. Ka ṭhiante leh Kimtei ṭhiante nena hun hman ve chu kan rawt a. Nunhlimi pawh a lo tel veleh ngei dâwn a ni.




"U, Nonoi a lo kal ve dâwn a, a pawi lovang tiraw?" Arsâ ka chan laia Kimtei'n a rawn tih chuan "Pawi lo e, lo kal rawh se lo kal rawh se" ka lo ti vat a. Engah mah ka ngaih loh lutuk vang nge ni Nonoi lakah kher hi chuan inlâkhran a, inthiarfihlim pawh ka tum hran lo. Ka nau ṭhiannu anihna laiah nau anga e na chen ka nei ve tlat a. Amah misual zawk zawk hmel a lo pu lo bawk nen ka phek en thei viau mai.




Dár 8 velah chuan Nunhlimi te ṭhian dûn pawh Msa hovin an rawn inzui lût ve ta a. Ka Nu leh Pa te erawh chhungte inah lengin hun an hmang ve dâwn a, an rawn haw hma vakin ka ring lo. Nunhlimi leh Msa te chu an rawn inhnial lût bap bap mai, "Awi hemi te pahnih ka hnê zia hi, kawngtluanin an inhau ka rawn ṭhelh a ni ringawt alawm le" Lalnuni chuan a rawn ti lût lang lang a. A hnê tak tak hmêl khawp mai. Msa chuan min rawn pui ve nghal zung zung a. Mi sàwm vêl bâk kan ni dâwn lo va, Ar pum hnih kan talh ve tawp kha ania, kan kham ange maw.



Kimtei ṭhiante pawh an lo thleng a, min rawn chêt pui an tum chuan "Lo va inkawm hlim zawk rawh u, ei tur chu kan lo buaipui thei mai ang" ka lo ti vat a. Min hnial lêm lovin thlang lam veranda-ah chuan an inzui chhuak ta sang sang a. Nonoi pawh a lo tel ve ngei a, Nunhlimi chuan a lo en duh khawp mai. A huat loh hram ka beisei.




Sâ kan chan zawh chuan a siam lam chu Nunhlimi'n a chuh tlat a. "A thiam lutuk Lalnuni'n a lo tih tâk ah chuan ngaih ṭha deuhin kan siam tir a. A kang hmui cher cher khawp mai. "A va rimtui tak e aw" Lalnuni chuan a lo ti leh hluai ṭhin a. "Eirawngbawl hi chu ka master na lam tak a ni ve alawm" pakhatnu lah chuan intithei zet hian a lo ti vat a. "A rim chauh hi a tui ang a, a tak hi a tui lo mai ang a" Msa chuan a lo ti zeuh pek a. An inhnial zui leh nghal chu a ni deuh mai. Anni pahnih awm dun pawh hi Lawma leh Nunhlimi awm dun ang chiah an ni tawh. An inhnial reng a, mahse a mipa zawk chuan ngawih a chuh hmasa mai zel a. Nunhlimi hi chu hnial dang a harsa ve bawk êm ani. A ṭawngthei han tih viau tur ni si lo hian ṭawngkam bungrua a nei ṭha tlat a.




Kan ei turte kan siam peih hnù chuan thlang lam veranda-ah kan inzui chhuak ve hlawm a. Kimtei te ṭhianho pawh sikri âi in an lo zai ve ral ral a, kan va zawm ve nghal a. Boruak a vawt vin tuk mai a, pâwn lam phei chu meilum ai loh chuan tawrhhlelhawm tak a ni.



Nunhlimi chuan Kimtei ṭhiante chu a be ve siam siam a, a lo kal hmasak ber ang ngawt kha chu a ni tawh bîk lo. Nonoi pawh a be pangngai ve thei fu mai a, ka ngaih a ṭha khawp mai. A thîk thû a chhe ve reuh sia, a enga mah hmaa a lo ngei ve ngawt ka hlau kha ania. Mahse a awm thiam khawp mai.



Kan thil siam ang angte chu eiin hun hlimawm tak kan hmang ve a. Nunhlimi chu boruak siamtu ber niin a tu a te pawh chuan kan hlimpui a. Kimtei ṭhiante paw'n an nêl khawp mai, "U Nunhlim" an ti seuh seuh ve reng mai a. Nonoi chu a zàwiàwi ber a ni ti ila ka sawi sual lo vang.



Dár 11 velah ka Nu leh Pa te pawh an lo haw a, ṭin kan lo tum lai tak a ni. "In hmang nuam bawk maw?" tiin ka Nu chuan min lo ngaihven nghal a. "Aw hei, haw darh kan lo tum chiah a" Kimtei ṭhiante chuan an lo chhâng vat a. "Ekhai, a la hma alawm le. La lêng ve rih r'u, keini lêng pawh kan lo haw ve chiah hi" ka Nu chuan a lo ti veleh zung zung a. Mahse an intihfel sang sang dân ah haw chu an tum tho anih hmêl.




Kimtei chuan a ṭhiante thlah tur chuan min phût ve deuh tlat a, kum dangah pawh ka tih fo dân a ni a, ka lo hnial bîk lo. Mahse tun ṭum chu ka thû ngawt a ni tawh lo va, Nunhlimi chu mitmeiin ka râwn a, hetia tih kher loh chuan huat tur a lo hmu leh hman ang tih ka hlau ani. Mahse a lo hrethiam khawp mai, "I thlah loh te'n, zan a rei tawh si hmeichhe hlang an nih hi" zawi tê hian a lo ti a. Ngaih ṭha deuhin Kimtei ṭhiante chu ka va thlah hmasa a. Pathum an ni a, a hnungah an ṭhu dial a, Kimtei chuan min thlah pui in ka sir ah a ṭhu ve thung a. Hla min play tir a, an ri chel chûl mai.



In kan thlen leh meuh chuan dár 12 a lo ri thuak tawh a, Nunhlimi te chuan min lo la nghak ve ṭhap a. Msa leh Lalnuni te an inphur haw ang a, keiin Nunhlimi chu ka thlah thung dâwn a ni. Hun a kal veleh deuh hlek tawh bawk nen anni pawh ṭhu khawmuang tawh lovin haw an rawt ta a.



Msa te inphur tur chu kan thlah liam leh hmasa tê tê a, "In Nu in min lo thîk mai ngah" Lalnuni'n a tih chuan "Thîk tham ah a ngai lo ang che" Msa chuan a lo ti uang vat a. An han in beng ri leh thlawp phawt a, "Lalnunhlimi emaw min ti em ni? I nghal emai ka thusawi hi chu uanpui lo teh" a ti khar khar a. Inhnial bap bap chungin an inphur ta a. Keipawh chabi la chhuak ve nghal in Nunhlimi chu ka thlah ve nghal a. Khúa a vawh êm avangin Bike ka khalh peih lo va, car chu tiphui vekin AC kan on a, a lum nuam ham ham khawp mai.




An in thleng ka thlah a, ka hawsan leh hma chuan car chhungah nghal ka chhuah leh hram pek a. Chance neihchhun chhun ang hi chu bawhpelh ka tum lo ve khawp mai. "I hur lutuk" vin hlar a a tih rual chuan ka lo nui chhuak hawk a. A âwm báwr chu a hup nghal ṭung bawk a, "Kut hnungsuiha infawh chu a har e" nui vur vur chunga ka tih chuan min melh ram ram a. "Min fawp tawh lo mai rawh" a lo ti deuh hmak mai. "Uikawm viau suh, a ho. Ka eng emaw dawn che pawh ni hlei lo" ka tih leh chuan "U Hluzual, i hur lutuk aw" nin hmel zet hian a lo ti leh hlar a. A biang chu a sen tài têk bawk a, a zak lehpek tawh aniang.




"Mi pangngai nihna alawm" zak duh bîk lo chuan ka lo ti leh hram a. Min melh leh hrep hnu ah a chhuak ta hmak a, an in lam pan chuan a kal nghal nghawng nghawng a. A la phun niah niah zui a, a thusawi chu ka hre pha tawh lo. "Anih leh aw" inchhung a luh dâwn chuan ring lènglàwng hian ka lo ti leh hram a. "Kal mai teh" rawn ti lêt ve hlar in min rawn chhiahkhum vak a. "Muah" ti a ka hmui ka va tih pawrh leh phei chuan a kut tumin min tin uaih uaih tawh. Nui hawk hawk chung chuan ka kut ka vai ta zeuh a, a lo vai lêt ve mai bawk a. Chhaih kawlh hi chu a nuam ve ngawt mai.



In ka thlen chuan Kimtei a lo la meng teh tlat a, "Biak lawk che ka duh a, ka lo nghâk che" a lo ti vat a. Mitko ka sàn uk ringawt a, "A pawimawh lutuk" a lo ti leh vat a. A thutak hmêl khawp mai. Ka room-ah chuan min lo zui lût nghal a, "Eng nge i sawi duh chu le?" ka tih chuan a ngawi leh daih lawi a. Rilru buai hmêl zeta min melh in a rawn thaw chhuak deuh halh a. "Ih maw...U...U Nunhlimi hi i hrechiang em? Ka tih awmzia chu, a hma aṭang daihin i hre tawh tiraw? Vêng khat chu ni tho mah ila chiang deuh ang khan i hria em?" a ti bah deuh nawk nawk a. Rilru kam tu lian tak nei, sawi hreh hmêl si hi a pu.





"I sawi duh tak chu sawi rawh" ka lo ti sup a, a ngawi leh deuh vang vang a. A awm dân chuan ka ngaih a ti ṭha lo. Nunhlimi chungchâng a ni tih lah a chiang reng mai a. Thu thin ṭhawng tak hre turin ka rilru chu ka lo buatsaih nghal hmiah. "Eng lo ania, ka ṭhiannu pakhat khan a sawi a. College an kal lai, hostel an awm lai velin a fel vak lo aniang. 'Zanah a chhuak ru a, zu a in a, mipa a tawm pui ṭhin' a tia. Ka awih vak lo va, mahse ka ngaih a ti ṭha chuang bawk si lo. I nau ka ni a, i tâna ṭha ber tur ka duh ve tho si a, ka rilru a nuam thei bawk si lo ka lo zawt tawp mai che anih chu" a ti duah a. Chu thû zet chu ka vawikhat hriatna a ni ta hauh lo mai.



"Tu i ṭhiannu in maw sawi?" ka tih chuan a sawitu a ṭhiannu hming chu a lo sawi vat a. "I u Nunhlimi chu dâwt in an puh mai mai anih chu. Chutiang mi a ni hlei nem, nang paw'n i awih reng reng em ni? A mizia te hi ngaihtuah la, chutianga awm tur mizia a put loh hi. Mi hian thil an sawi peih hrim hrim a. Awih tur chin hi thlit fim thiam tur" ka lo ti duah a. Nunhlimi chungchanga ka hriat chin hi chu ka hriatchin lo ni mai sela. Ka nau lehzel in dik lo taka a ngai tur chu ka duh lo a ni.



"Ka awih chuang lo va, mahse min hrilh tu khan hrechiang a inti êm a. U Nunhlimi chu ka lo ṭan ve lutuk ania" Kimtei chuan a lo ti vat a. "I ṭhiannu chuan khawi aṭanga a hriat nge ni reng reng?" ka tih chuan " Miin an sawi a ti ringawt a, chutiang bakin sawi chhuah dân a thiam bîk lo" a lo ti ve mai bawk a. "Mi chungchang hi sawi peih lutuk loh tur asin mawle. Dawt ngat phei chu sawi tam loh a ṭha. Thudik sawi tur kan hrelo anih chuan ngawih ngam mai tur ani. Tin, mi thusawi zawng zawng hi awih loh tur ania. Awih chin tur leh awih loh tur chin hi thliar hran thiam tur. Kan thuhriatna te hi hriatchian em em bawk tur" ka ti ta dap dap a. Nunhlimi chungchâng ka sawina kher pawh a ni lo. Kimtei pawh hi hmeichhia ve tho a ni a, a ṭawng duh em em bawk a. Mi pawi sawiin dawt a lo sawi ve mai ka hlau ani.





"U Nunhlimi chu khatiang mi kha a nih ka lo ring lo rêng ani. Min hrilh tu lah khan hrechiang a inti sia, ka lo hnial ve ṭang ṭang kha ka tisual lo e. Nakinah ka zawt ṭha leh hrim hrim ang a, a lo sawitu chu ka zawt chhuak dâwn khawp. U Nunhlimi mualphona anih bâk ah nangma tán pawh a mualpho thlâk ve a. Chuvangin zawn chhuah ngei a ṭha ang" Kimtei chuan lo ti ve nghat nghat a. "Buaipui duh suh, a ho emai. Zawn chhuah pawh a ngai lo, heti hian tâwp rawh se" ka lo ti ta daih a. Thudik zawng chhuak dâwn ta se, ka duh loh dân anih ka hlau em ani. Thudik hriat chu keipawhin ka duh a, mahse ka hlauhthawnna hian min la hneh zawk tlat si a ni.



Kimtei chhuah hnù thleng pawh chuan ka rilru a nuam thei ngang lo va. Ka ngaihtuahna in hmun tin kil tin a dap kual a, thil ni theite chu ka ngaihtuah leh vak vak tawh. Hetianga awm hi a sâwt loh zia hrechiang hle mah ila ka thunun phâk bâk thil a mi tlat bawk si.




Ka rilru ka kawm lai tak chuan Nunhlimi hnen aṭang ngei mai chuan phone call ka dawng ta hlawl a. Nichin lawk khan kan in muttui tawh kha ania, a mu leh thei lo anih ka ring. "Ka lung a lêng reuh lutuk a" ka lâk rual chuan a lo ti vat a. Naktip mai hi Krismas a lo ni tawh dâwn bawk nen a Nu a ngai hle anih ka ring nghal tawp. A tello va Krismas an hman hmasak berna tur a ni a. Duh angin a pa a dam ṭha bawk si lo, a lung a lêng ta viau pawh chu àwm ka ti hliah hliah.




"I lung chu ka bulah a rawn lêng a nimaw" tih zângkhai tum tak chuan ka lo uan khum daih a, a rawn nui ve hak hak mai. "I muhil lai ka rawn tiharh che em?" a tih chuan " Ka harh lai min rawn tiharh zual" ka lo ti vat a. "Naaa...nghal lo teh, pangngai deuhin inbe ve ang" a rawn ti nang nang a. A uang peih lutuk hi ka uanpui ve zo vek tawh ni berin ka hria.



"I Nu i ngai em ni?" ka ti ta sup a, ka sawi zawh rual chuan ka inchhir nghal. In zawh kher loh pawha chiang sa a ni a, ka lo zawt khut chu pawi ka ti nghal vawng vawng mai. Mahse "Ka ngai, mahse ka ngaih dân hi ka sawifiah thiam lo" pangngai tak hian a lo ti ve mai a. "Thihna ah hi chuan kan thû lo êm a, damna hlut zia hre turin thihna a awm a ngai miau si a. Pathian remruat pawm thiam apiang hi mi vannei an ni mai" ka lo ti veleh dap dap a. Hei aia hnem thiam hi ka châk ṭhin, ka thiam bawk si lo a bei hi chu ka ti dawng ve thei ngawtin ka ring.



"Huiham" a rawn ti hluai ringawt a, "I lo ṭap vêl ange" ka tih chuan "Ṭah pawh a lang lo, ka lunglên dân hi mittui ko chhuak záwng khan a ni lo va. Ka ruak veng veng maiin ka hria. Mahse heti hian a reh veleh mai ang. Lunglên châng hi chu awm lo thei lo ania. Ka ṭha leh vat mai ang. Lunglên hnêm ah ka rawn phone tawp che anih hi" a rawn ti duah a. Ka thiam ang tâwk a ka hnem hnù ah chuan a rilru ti zângkhai turin thudang ka sawi pui ta daih a.




Lehkha ka zirlaia kan zirtirtute'n min tih ṭhin dân te, hostel ka awm laia ṭhiante nen hun hlimawm kan hman te chu ka hrilh ta mawlh mawlh a. A lo nui ve nasa khawp mai.



"Keipawh hostel kan awm ve lai chuan..." a rawn ti chiah chu ka beng ka lo tun nghal hra a. An hostel awm lai chanchin te chu min hrilh ve ta mawlh mawlh a. Lungkham a neih loh zia leh an warden-in a hauh nasat ṭhin zia te chu a rawn sawi ta mawlh mawlh a. Chutia amah zawkin a rawn sawi chhuah tâk ah chuan ka rilru a zawhna lo awm char char ṭhin chu ka thup thei ta lo. A rawn puak chhuak tawp ka ti mai.



"Remi te nen khan in awm ho ṭhin tiraw? In sneak out ṭhin thû te ka hria ania aw..." pehhel deuh tak si chuan ka lo ti sup a. Nunhlimi chu a reh zui ta vang vang mai.



__________*__________*__________*____________