TRAP IN EUPHORIA CHAPTER 6

[Maveni hmar]

TRAP  IN  EUPHORIA



  BUNG - 6


XENA's P. O. V :


Thawhphan nei lek loin ka muhil chu ka harh hlawl mai. Zik mar ar ar pahin nizan thil thleng kha ka ngaihtuah a, hlim takin ka nui ver ver. Mahni duh berten min lo duh let ve chu tu nge hlim lo bik ang?


Ka hmuia nui hmel la pu reng chung chuan ka tho chhuak a, bual inah lutin ka morning routine ka zawh chuan  inbual fai ser ser pah chuan New Jeans hla 'Get Up' chu thiam leh thiam loin ka sa rat rat. Ka inbual zawh chuan chaw ei khama class kal nghal mai tur ka nih vangin   cotton jeans leh t-shirt hak nuam tak tak, a dum leh var inpawlh chu ka ha. Ka hmaiah chuan sunscreen hnawihin lip gloss ka inhnawih leh tawpa ka duh tawk viau.


Ka inchei zawh chuan chaw ei turin in hnuai lamah thawveng zet hian ka tlan thla auh auh a, kaihthawh ngai lova ka tho chu R-a chuan mak a lo ti ngawt ang tih ngaihtuah rauh rauhin ka nui ver ver mai.


Mahse, in hnuai panna steps tawp ber ka thlen thlak ruala ka thil hmuh chuan min barakhaih chiang hle mai. Ka lungphu chu a chawl nghal dup hian ka hria a, ka awm chhungah chuan na fiak thak hian min rawn hnawh nghal. R-a leh hmeichhe nalh zet hi duhthawh em emin an lo infawp dun a nih chu.



Thawm dim takin ka mut pindan lamah ka let leh nghal. Khum chungah thu hnawkin ka awm chhung na lutuk chu ka dawm vawng vawng mai. Rilru nat lutuk vang hian mittui hi a lo tla thei lo tih ka hre ta chiah. Ni e, ka rilru na lutuk chu ka tap thei lo.


Nizanah pawh min duh ber leh min hmangaih ber ni awm takin hmangaihna min chenpui a, ka kiangah a hlim ber emaw tih turin hun a hmang a nih kha. Darkar tam pawh a ral hmain hmeichhe dang chu lungchim takin a fawp leh thei a nih chu. A va na vawng vawng tak, ka thinlung chhungril hi a na tlawk tlawk a ni. A nat dan chu ka sawi fiah thiam lo zawk.


Tunah chuan Atei thinlung lo nat dan tur zia kha ka hriatthiampui ta ruakin ka inhria. Mahni nunna tihtawp duhna thinlung a lo pu ta mai kha a mak pawh ka ti tawh lo. Heti em ema thinlung na tawrh reng ai chuan natna awm tawh lohna hmun pan mai pawh chakawm rum rum tak a ni.


Mahse, kei chu hmeichhe chak tak ka ni a, mahni nunna hlu tak hi ka tiawp ve hauh lo ang. Min phatsantu vang hian ka nunna hi ka chan dawn lo. Ka tel lova a hlim thei a nih chuan eng vangin nge ka tah reng bik ang? Thinlung keh sawm vek khawpa na pawh tuar ila a hmuhah hian na angin ka awm ngai lo ang. Ka natna hi ka hmuhtir lo anga, ka thilung chu tap tlawk tlawk mah se ka hmui hmai erawh hlim hmel takin a nui lui sawng reng ang.


Ani'n min phatsan thei a nih chuan engah nge ka theih loh bik ang? Mi pakhat lakah min rinawm lohsan a nih chuan mi panga lakah ka rinawmlohsan ve thei. Mai mai chuan a! Ka nu'n Xena, worrior princess hming chawia ka hming hi phuah a ni alawm. Ka hming min phuah chhan ang taka mi tuarchhel leh hmeichhe chak tak nih ngei ka tum tlat. A ve mai mai a!


Eng anga hlawh tha leh chenfakawm pawh nise min phatsantu bula chen reng hi ka thangtlawm tlat. A tel lo pawha ka hlim theihzia entirna tha tak pek ngei ka duh. Ka backpack chu lain thawmhnaw hak thlak pathum, towel leh chapal pakhat ka khung a, ka note bu phek khat pawt thlain, " I lak atang hian ka bo hlen dawn, min rawn zawng buai duh suh. Min hmu zo chuang lo ang." Tih thu chu ka ziaka, ka lukham hnuaiah ka thawlh ta than a.


R-a mut pindan bul lawkah hian Theihai kung lian tak a awm a, bathlar hungna atangin awlsam te hian a lawn theih a ni tih kha ka la hre reng. Muangchang hauh loin a pindan lam chu ka pan ta nghal.  A pindan bathlar atang chuan theihai kungah awlsam zeta pakaiin in hnung lam huan pal hungna thir chu ka lawn liam ta. Hlim taka ka lo chenna in pawn ka thlen chuan thawk ka la ham ham phawt; chutah, a tawpnan tiin ka thlir vawng vawng a, ka kut zungchal ka tihpir khum vah a, hawi let tawh hauh loin ka kal ta vang vang.


Kan in piah kawi hnihna kawngkama waiting shed-ah chuan ka thu hnawk, ka phone phawrhin Julian chu ka call nghal. Mapuii ka biak loh chhan chu R-a hian kan inkawm thin tih a hre sia, a lo biak pawh palh ka hlau a ni.


Rei vak lovah chuan mut chhuak aw zet hian min rawn chhang a, "Hello? Inkaih thawh nan a la hma em mai a." A rawn ti bai bai a.


"Tun hi mut hun a ni tawh em ni?" Ka lo ti let ve hlar. "Min rawn hruai vat teh. Buaina ka nei a nia." Ka tih takah chuan thaw deuh halh thawm hi ka hria a.


"Eng buaina nge i neih a?"


"Phone atanga inhrilha chin fel mai theih thil nise min rawn hruai turin ka ti hauh lo ang che."


"Aw le, aw le, boss. Ka rawn hruai ang che. Khawiah nge i awm?"


Ka awmna hmun ka hrilh hnu chuan, "Ka phone ka switch off dawna, ka biak thei tawh dawn lo a nia aw..."


"Umm, ka rawn kal nghal....ka rawn thleng a ni chawpchilh mai." Tiin a nui hak hak a.


Kan inbiak zawh rual chuan ka phone chu ka off ta hmak. Min rawn zawn buaia min rawn call buai chu ring vak lo mahila ka switch off ta tho. Rei mawi tawk ka nghah hnu chuan Juliana bike nalh zet chu ka bulah a rawn ding chat a, nui var var chungin a hnung seat chu a beng thak thak a.


Hmanhmawh takin ka lawn nghal sawk sawk, ka thut fel rual chuan, "Khawi lamah nge ni ang? College kal nan chuan a la hma hle si a." A ti lawng lawng a.


"I duhna hmun hmunah min hruai rawh. A pawimawh ber chu he hmun atanga min hruai bo hi a ni." Ka tih chuan a kut zungpui a rawn tipir vah a, a tlan chhuak ta nghal.


Khawi hmun nge min panpui tih ka ngaihtuah buai peih lo. He thinlung na lutuk chhawknana ruih chhum hmawk tluka duh leh chak dang ka nei lo. "In chi lamna tur i hria em?" A beng bulah chuan ka han ti a.


"Juice lam maw?"


A hnung zangah chuan ka chum ri awk a. "Aw, juice. Alcohol content  sang ber chi!" Ka ti hlak.


A taksa han chet dat danah a nui hak a ni tih ka hrethiam mai. Rei vak pawh kan tlan hmain kawng kamah a ding dawta, a bike atanga chhukin ka backpack ah lai chu a rawn pawt thla a, a ak nghal hmiah.


"Eng thil nge i tih dawn?" Ka lo ti ha.


"Thlai tui nei i duh a ni lo'm ni? Lakna'n i bag hi ka mamawh alawm." Tih leh ka chal tawn pen kawrh chu a rual. "Ti khan lo awm la,  ka rawn let leh har lo ang." Tiin kan piah steps-ah chuan a chhuk ta a.


Minutes sawm hnu velah bag puar awkin a rawn let leh nghal. "I hlawhtling maw?" Ka lo ti var.


"Umm, Stag chiah an nei a, um hnih ka rawn lei."


"Whisky lam aiin Rum leh Beer pawlh hi tui ka ti ber asin." Ka lo ti hlak.


"Nakinah kan ngaihtuah leh mai dawn nia." Tih pahin backpack chu min rawn ahtir a, a rit nulh thei alawm. A bike chu tinungin kan tlan chhuak leh ta nghal a.


Bawngkawn lamah tlanin Sairang road lam kan pan a ni tih ka hriat chuan, "Khawi hmunah nge kan kal dawn?" Ka ti ta chauh a.


"Kan thianpa Jose-a in luah lam ka panpui che mawle."


Joseph-a, Jose tia kan koh thin, tlangval te takte ngo pir per leh tuai deuh ze zaw; mahse, bialnu nei class thei deuh chu ka mitthlaah a rawn lang nghal. A bialnute hian amah an duh vang ni loin a sum an duh vanga ngaizawng an nih ka lo ring thin. A money theiin a thilphal hiau hiau thin em a ni. Kolasib lam mi niin kan college-a kal ve a ni a, biak nuam leh fel seuh seuh tak a ni.


Jose-a in luah chu concrete  chhawng thumna niin kan thlen chuan a lo la inkhar bar a. Julian chuan kawngkhar chu kik kauh kauhin a rawn chhan tak mai lohah chuan a phone chu phawrhin a call ta a. A lo pick up ni ngei tur a ni, "Tho la, i kawngkhar hi rawn hawng vat teh." A ti hlur a.



Rei loah Jose chuan kawngkhar chu a rawn hawng a, sam phir sengin a la ham ang bai bai a, mut a kham loh hmel ngiang mai. "Eng thil nge ni ta?" Min melh tawn zek zek chung chuan a ti a.


"Class bunk-in kan rawn rui dawn." Ka hnunglama bag ah rawn beng thak thak chung chuan Julian chuan a ti a. "Mahse, kan lam kep lo che a nia." A ti zui zat.


A mit nuai nauh nauh pah chuan, "Min kep a ngai lo. Ka intodelh mah mah." Jose chuan a ti nghat a, in chhungah chuan kan inzui lut ta a.


Bag atanga zu um khai chhuah pah chuan, "Seh hmeh tur engmah kan rawn lei lo a, eng nge i neih, Jose?" Ka ti lang lang a.


Glass no pathum rawn chhawp pah hian, "Bawngsa roast ka nei. Ka rawn chhawp ang. A thuhrimah, zu i in ve ngai em ni?" Tiin min han thlek he haw a. Gas thuk chunga a thirbel chhuan atang chuan bawngsa roast chu suakin a rawn chhawp ta teuh mai.


"In ngai lo. Mahse, tunah chuan engmah lungkham buai lova ruih chhum hmawk ka duh a ni."


"In rawn inru dawn tihna em ni?"


Julian nen chuan kan inmelh a, kan nui dun hawk. "Kan inngaizawngin i hre reng reng em ni?" Julian chuan a lo ti bauh a.


A lu chu a thle deuh bak a, "Ka hre lo le." Tiin a lu chu a tuai thuak a. "Xena, i in ngai vak si lo a, stag chu tui i ti hauh lo ang. Ka duati tana ka dahthat Tango a awm asin. Hmeichhe zu an ti mai thin a, i duh zawk em?" A ti a.


Lu ka lo bu nghat. Tango chu ka ngainat zawng tak a ni. Ser rim nam chekin a thlum veng veng a, ruih a nuam bik riau. "Rawn phawrh la." Ka tih rual rualin dawhkanah chuan a rawn chhawp nghal a.


Julian chuan zu chu noah thli chhuakin a han tlak pap a. "Eng buaina nge i tawh reng reng a?" Min rawn melh ha pah chuan a ti a.


"Ka bialpa, ka hmangaih leh duh em em chuan hmeichhe dang min lo kawpsan alawm." Tiin zu chu ka thli ve zat, tui pawlh lo chuan ka tlak vei pap a, pum ruak nen ka kawchhung chu a sa thla nghal hat hat mai. Bawngsa chu ka ban rang teh e, ka pumpui ruak hnawh khat tur chuan ka thial ta tawlh tawlh a.


"Mipa laka fimkhur turin ka tih reng che kha, mimawl!" Julian chuan ka chal a rawn tuk fawk a.


"Mipa zawng zawng hi nangmah ang an nih vek ka lo ring lo alawm, Jules!" Ka chal chu ka tuai nauh nauh mai. 


Zu no thum ka in hnu chuan ka kai tan hle tawh. "I biang lehlama bengtu chu beng let ve rawh' tih hi ka motto a nia," ka nui her her a. Tunah chuan ka zangkhai haiin a thawveng halh tawh. "Chuvangin, ka biang lehlamah min beng bawka a biangki-ah tak ka hnek let ve dawn a ni!" Ka ti lar lar.


Jose chuan kut a lo beng thak a, "A tha lutuk. Hmeichhia tih vanga no lutuk leh inla innocent vel vak chingho hi ka ten tlat." A lo ti pek a, ani pawh a rui ve tan niin ka hria.


Julian-a erawh a in ve nual tawha ka hriat laiin a la harhfim ang rengin a la pangngai khawp mai. "Nang hi i phakar dawn riau." Tiin a hmai bul chetah chuan ka kawk va a.


A nui hak a, " Eng vang ngawt chuan maw?" Bawngsa thial tawlh tawlh pah chuan a ti a.


"I rui tha ve duh mang lo."


"I thinlung na i ruih chilh a nih mai chu."


"Kan zinga thinlung kehsawm awm chhun ka nih vang hian min nuihzat deuh tihna em ni?" 


"Ni lo e, Miss Broken Heart."


Jose-a phone chu a rawn ri ral ral a, "Sshh..! Lo bengchheng miah s'u aw. Mother India-in min rawn call a nia." Tiin a pick up a, loudspeaker -ah a dah zui nghal. "Aw, nu. Eng nge ni ta?" Pangngai deuh tak chuan a ti a.


A nu chu a rawn inhnip hlawp hlawp  a, "Bawiha, i pi a awm tawh lo.!" A rawn ti ta tiau a.


Jose chu a thu ngil nghal awt a, harhfim ta kawk hmel hi a pu. "Aw, nu...tap tawh suh. Ka rawn haw nghal ang." Tih leh phone dah chu a rual a.


Jose tap deuh teuh hmel chu ka en vang vang a, "Pawi ka tiin ka tawrhpui lutuk che, Bro." Tiin ka kuah nghal thlawp a.


Ka darah rawn beiin a tap ta hliam hliam a, "Ka pi chuan min duatin min ngai thin asin...Pi, ka ngai dawn che e..." 


Julian chuan, "Mipa i nih kha insum teh. Mipa an tap ngai lo." A lo ti hluk.  "I kai ang reng sia car khalh tur chuan ka ring zo chiah lo che. Kan rawn kalpui ve ang che." Tiin Jose-a dar chu a beng thak thak a.


A mittui hruk hul sawk sawk pah chuan, "Ka inbual anga ka harh fim kak mai ang. Nangni zu rui pahnihin min rawn zui chuan ka nuin ka zu in thin a hriat phah ang. In hi min lo nghahsak zawk rawh u. Zu in la in duh chuan ka khum hnuaia percel-ah sawn ka dah nual." Tih leh thawh tharh chu a rual, inbual turin bual in lam a pan nghal nal nal.


"Thianpa, chhel takin le!" Tiin Julian chuan ban a lo vai khum zauh. Jose-a chuan  a hre pha pawhin ka ring lo.


Zawi chhe zet hian dawhkanah bawka, ka zu no melh ran ran chung chuan, "Jules, engtin nge ka awm zel tak ang? R-a kiangah ka haw duh tawh lo." Ka ti bai bai a.


"I haw loh te'n....a chi nang! College hi dropout i tum em ni?" 


"Mmm, ka kal peih tawh lo. Ka eng tih mah a phur tawh lo. Min phatsantu kiangah hian ka kir dawn tawh lo." Ka ti buai nuai a.


A nui hak a, "In khatah in cheng dun em ni a?" A tih chuan uar zetin lu ka lo bu. "I inhmeh lo!" Min la ti zui.


"A eng chu maw ka inhmeh loh?"


A kut zungchal pahnih chu insiktirin, "Inneihna awm si loa in khata chen dun." A ti leh mai.


"A inah awmpui angin hna ka thawk alawm, hmela!"


Za tak hian a nui ta hawk hawk.


Jose-a inbual zo chu Kolasib lama haw turin a insiam nghal mawlh mawlh a. Julian chuan, "Rawn zui thlak chu i ngai lo tak tak ang maw?" A lo ti deuh chhen.


"Ngai lo ka tih mawlh mawlh chu. Ka kal dawn, chabi spare ka kawl tho bawka in chhuah hunah kawngkhar hi kalh ula chabi kha chu lo kawl tha mai rawh aw." Sneaker bun mawlh mawlh pah chuan a ti a.


"Aw le, tluang takin i kal dawn nia."


Jose-a kal chhuah hnu chuan zu chu kan la in zawm zel, duh aiin ka rui tawh mah mah. Ka rilru natna ka ruih chilh nen ka tap deuh pur tawh mai a. Tunah chuan hna ka nei tawh lova awmna tur in tak ngial pawh ka nei tawh lo. Ka tan chuan lehkha han zir chhunzawm zel ngaihna a awm tawh lo. Ka nu leh pa, ka laka beiseina nei sang em em hnenah chuan eng nge ka sawi tak ang?


Beidawng tak hian ka thaw hawlh a, he khawvelah hian mal ta rawih rawih hian ka inhria. A pawi lo, a pawi hrep lo! Mihring rinawm lo leh ka rin ngam tawh hauh loh tur nena in khata chen dun ai chuan mal taka awm hi a tha zawk daih.


R-a leh hmeichhe pakhat infawp lai chu ka mitthlaah a lo lang a, lu thing nawk nawkin ka kut ka hum ruh fan fan. "Jules..." Tiin a mitah tak chuan ka melh ding ngar a.


"Umm?"


"Ani pawhin hmeichhe dang lakah min phatsan theih chuan keiin ka theih loh bikna tur a awm em ni, tiraw?" Ka ti a, ka nui lui hawk hawk zui.


"A dik alawm."


"A nih chuan min mutpui duh em?"


"I aa mai siah! I rui a nih kha."


"Ka rui, ka hria. Hmeichhe dang a fawh thei chuan mipa dang ka mutpui ngei ang. Min mutpui duh loh chuan Mazualtea ka call mai ang." 


Ka darah vuanin min rawn sawi nawk a, "Harh teh. Nakina i inchhir lehna tur thil a ni tih i hria em? Lerh viau mahila maw chhia leh tha hmang thei lo khawpa rilru fim lo hi ka mutpui ngai lo. Ka hmeichhe thian neih chhun i ni a, chutiang bakin ka en tawh ngai lo che." A ti hmiah mai a.


Naa...ka va tlawm vawng vawng tak! Hmeichhe duh em em leh lerh kawh lutuk Julian-a pawhin min hnar a nih chu! Darthlalanga ka inhmuh anga hmeltha leh duhawm ka lo ni lo tawp tihna em ni? "Thian pawh ni ila friends with benefits a ni mai lawm." Tiin ka nuih tlawn vel. "Tunhma pawhin min duha, min hel reng a ni lawm ni?" Tiin a darah ka lu ka va nghat a.


Thawk a la vang vang a, "Xena, kei hi min duh ni la chuan ka hrethiam. Rebound atan min hman hi ka duh lo. Ka chapona hian a dawngsawng thiam lo a ni e. A tawk em?" A ti vawt raih a.


"Aw! A tawk! Ka hrethiam!" Ka ti that a. Mit khap lek lova min melh rengtu mitmeng mawi leh vawt raih chu ka melh let kal a. He pa mitmeng hian engtin emaw tak min tihlau a ni. A mitah chuan hriatthiam theih loh thil eng emaw tak a inphum ru tlat. Vur hlawm ang maia mitmeng vawt chu mi pangngai mit a ni thei lo. He ka thianpa hi ka lo la hre chiang lo tawp a ni. Hlauhna chuan min rawn tham sung sung mai a. Chu mitmeng vawt lutuk chuan min rap tlat, mi pangngai mitmeng ni loin rilru lama buaina nei mitmeng hi ang ka ti tlat pek a nih chu. Nge ka rui lutuka ka hmu sual zawk?



Meng khup zal zalin ka mit chu ka lasawn a, "Mut chhuak lamah a kal tlat mai." Tiin Jose-a khumah chuan ka tlu zal a, ka hriat loh chhungin ka lo muhil reng chu niin. Ka thanharh leh meuh chuan zan dar riat a lo ri der tawh.  Ka lu na tluk tluk leh zu thing rim ka nam huam chu ka inten. Then nawng nawng chungin ka han hawi chhuak a, ka bo deuh hu a, ka awmna chu ka chiang lo ta riau mai.


Julian-a thutthlengseia lo muhil ka hmuh chuan ka harh deuh kawk, ka awmna hmun chu Jose-a in a ni tih leh R-a min phatsannate chu hrechhuak nghalin ka na leh nghal vawng vawng. He thinlung na hi harhfima tawrh chi pawh a nih nek loh hi. Ngaihtuahna nu phulh chungin ruihna lipuiah cheng leh ila a ni mai lawm. Eng hi nge maw ka'n lungkham vak ang ni?



Tu nge zu hi a ṭha lo titu kha? A ṭha a niang hei rilru na reng hre loin ka nui awr awr alawm. Tun atan chuan ka rilru na thawidam hi a pawimawh hmasa bera, ka dam ve leh ka hmalam hun chu ka duang tawh zawk mai ang. Dam chhung tawite thih hnu sei leh si hi e hrehawm reng rengin ka tuar dawn bik lo.




Hmun Awl :

He thawnthu hi zirtir nei pawh a ni lem lo, a insaikal zeng zung maithei. Lo chhiar liam ve mai teh unnn.

In comments-te ka reply loh vangin induh min lo ti lo hram teh u. Chhungpuinu niha han buai tak tak hi chuan story kan rawn up hman hram a. In comments ka chhiara, ka reply dawn vel lai takin, "Nu, ka kawr ka hmu lo...Nu, khawiah nge ka moja i dah..." tih thawmin a zui nghal, in comment-nate chu chhan chu sawi loh ka react thla pawp pawp tawh mai ṭhin. Hriatthiam ka ngai reng bik mai a nih hi.

Ziaktu naupang zawkte chawh phurnana rawn ziak leh mai ka ni, a dik lo lai leh buh deuh nuaih lai a awm paw'n lo chhiar mam than mai teh u.

Tin, website lam a chiangkuan loh avangin engmah a post theih loh a, a theih ve leh ka rawn post aw. Thawnthu post theih loh hi a chhiartute'n hrehawm in tih aia nasa hian ziaktute hian hrehawm kan ti a nia..post regular lo nih hi a hrehawmin a inthlahrunawm bawk.