TRAP IN EUPHORIA CHAPTER 5

[Maveni hmar]

TRAP IN EUPHORIA

BUNG _ 5

XENA's P. O. V :

In ka thlen chuan R-a chu inah a lo awm der tawh a ni tih ka hmuh chuan ka phu deuh zawk a. "Oh, i lo haw der tawh elaw?" Tiin ka'n nuih tlawn titih a. Ka meizial zuk kha ka rilru chuan a hre rauh rauh mai. A rim a hriat mawlh chu ka hlau.

Ani chuan min rawn nuih var var pah hian, "I workout tan dawn tawh sia food supplements vel ka rawn hawnsak che a." A ti a. Thawklehkhatah a nui hmel chu reh nghalin mit tizim deuh san hian min rawn melh ta vang vang a. "Xena, eng emaw sawipui tur min nei em?" A ti vawt ta raih a.

Hamhaih zet hian ka nui lui hak, "Aih, nei lo. Ka inthlak anga Gym-ah ka lut nghal dawn a nia." Tiin kal nghal mai ka tum. Naupang chhia pawh ka ni tawh lova zial tlawn khat lek ka zuk ruk vanga inthiam lo leh thil tisual ta ngawih ngawih anga ka inhriat tlat reng mai le.

"XENA!" A rawn ti vin thak a.

Ka kal lai chu ka tawp nghal chawt, "Eng nge?" Ka ti lawi rat mai. A awka vin lutuk chuan min tikhur thei mai dawn alawm.

"Lo ding teh!" Tiin min rawn pan hnai nghal ruak a, "Engmah min hrilh tur i nei miah lo maw?" Chik zet hian min melh chhuk run mai.

Ka thin phu rang lutuk thunun tum chuan ka awm chu ka chul a, "Oh...ka ...tihpalh." Ti sapin chhuat lam chu ka melh ta zal zal.

"Eng chu maw i tihpalh?"

"Cigarette tlawn khat ka zu a..."

"I intiamkamna i bawhchhia tih i inhria em?" A awki chu dam thluam mah se a thinur a ni tih hai rual a ni lo.

Hlauhthawnnain min rawn tuam nghal hlup hlup mai. He in atang hian min hnawt chhuakin ka hna atangin min ban nghal dawn a ni tih ka hrethiam mai. Min ban dawn ta sa sa tiin ka intihuai chawp a. "Zial tlawn khat lek zuk chu thil sual lian em em pawh a ni hleinem." Ka ti fak a.

Min la melh vung vung chung chuan, "Thil sual lian a ni lo pawh ti la, i hmela inthiam lohna lo lang khan thil i tih sualzia chu a lantir zawk a ni. Thil sual ti lo la; khatiang hmel pha dai kha i pu dawn em ni?Nangmah ngei pawhin i thil tihsual chu hriain inthiam lohna i nei a nih zawk kha. Zial tlawn khat lek emaw tlawn za pawh ni rawh se, ti tawh lo tura i intiamna i bawhchhiatna kha thil sual lian chu a ni. I thutiamah pawh i din zawh loh chuan eng tin nge ka rin theih ang che?

A thusawi dikzia chu ka hai lo.

"Ka tihpalh. Ka hrethiam e. Ka thawmhnaw chu ka han pack nghal ang e." Ti zuai raihin kal nghal mai chu ka tum a.

R-a chu a meng vawt nghal raih mai. "Eng vanga i thawmhnaw pack chu tum nge i nih?" Nelawm loh zet hian a ti a.

"Ka thutiam ka bawhchhe sia min hnawhchhuah i tum lo em ni?" Beidawng tak chuan ka ti hnim riai a. Tuna ka landan hi ka khawngaihthlak ngawtin ka ring.

"Ka hnawt chhuak dawn lo che."

Chu thu ka hriat chuan ka dam sawng sawng mai. Ka lawm lutuk chuan kuah nghal chuk chuk mai ka chak et et. "Min hnawt chhuak dawn lo maw?" Hlim luat vanga aw lawi rat hian ka ti a.

"Mmm; mahse, hrem lohin ka chhuah lo ang che. Engtin nge ka hrem ang che tih chu ka la ngaihtuah ang." A ti vawt ruih a.

Ka banrekah rawn vuanin ka pindan lamah min kai chho dawr dawr, dimna tel hauh lo hian ka kut chu min silsak bawrh bawrh hnuin ka toothbrush chu a phawrh a, toothpaste a tah sain min pe a, "I ha i nawh fai zawhah inthlak nghal la, gym-ah kan workout dun dawn nia. Tihdan tur ka kawh hmuh phawt ang che a, a hnu lamah chuan nangmah pawhin i ti ve thei tawh mai ang." A ti bung nghut nghut a.

A aw chu nelawm loin bung vut mah se ka hlim veng veng si. Chutihrual erawh chuan gym thawmhnaw engmah ka nei lo tih hre chhuakin ka hnual nghal rawih. Muangchanga ha nawh pah chuan a hmel vawt raih chu ka melh a, "Mahse,..."

Ka sawi tur ka sawi zawh hma hma chuan, "Gym wear ka rawn leisak che a, i khumah ka dah a nia." Tih leh ka pindan chhuahsan a rual nghal. Hmanhmawh zeta ka pindan bual in lama min kai lut nghal dawr dawr a nih vang khan khuma ka gym wear tur a dah pawh chu ka lo hmu tel lo a nih dawn chu.

Ha ka nawh zawh chuan khuma ka thawmhnaw thar lo awm ka hmuh chuan ka thaw hak a. Enga ti nge ka tan he pa hi a that em em le? A thatna hi ka phu reng em tih ka ngaihtuah rauh rauh. Ka inthlak zawh chuan darthlalang hmaah ka han inbih a, inhmeh ka inti ngang mai. Chawlhni thawmhnaw ai pawhin ka inhmeh zawk daih. Ka pian a tilang nalhin gym-a kal thin nula hmeltha leh nalh changkang tak ang mai niin ka inhmu. Ka mitthlaah chuan social media vela gym-a hmeichhe nalh tak tak thlalak ka hmuh thin kha a lo lang a, khangho ai khan ka nalh loh bikna pawh ka hre lo hial a ni.

"I inpeih tawh em?" Tiin R-a chu ka pindanah a rawn lut a, ka thawmhnaw tight leh ka curves zawng zawng tilang chiang em em a hmuh chuan a meng de sawr sawr a.

"Aw..inpeih.." Ka tawng lai chu tawp chawtin amah chu ka en ta reng a. Wow! Hmanlai Greek-ho pathiante pawh min hriatchhuahtir rum rum alawm. Tawnzau ban bul var leh kekawr bul tawt teng tawng hi a rawn ha a, a taksa phiar mawi tak leh a tawnzau var chhana a six packs thla rawn langte chu hmuhnawm tham leh mit titlai tham a ni. Vawi khat melh a hawi san leh mai chi a ni awzawng lo. A pian fuh lutuk chu lemziak thiam takin duhthusama a ziah chhuah ang maia perfect a ni.

Hetiang mipa hmeltha leh pian nalh lutuk mai hi a lem mai ni lo, a nung chung ngeia hmu theia ka awm hi vanneihna ropui tak a ni. Helleluiah pek thuai thuaina tlak a ni hial ang. A skin tight kekawr bulin a khuh bak a malpui sek phiar talhte chu nalh tak a ni, nalh tak. A mal sek phiar tak kara a 'bulky' chu ka sawi lang tel lo mai ang.

Aw a thian kharh a, "Eng nge i ngaihdan?" Nuihzat awka leh meng de sawr sawr hian a ti a.

Chil ka lem khawlh a, "Eng chu ?" Hriatthiam loh hmel tak chuan ka tilui ve ngat.

"I mit tlaina khawp i hmu emaw chu?"

Ka hmai sa hat hat chu ka tawk zauh a, "Hmuhnawm tham khawpa nalh a ni." Ka nui hak a.

"Chu tawngkam chu keima hman tur zawk ni awm tak a ni. I nalh, i hmeltha, i itawm...." A nui zui hawk hawk a.

"Ka lawm...." Ka thusawi lai chu tawp chawtin a mitmeng de sawr sawr chu ka melh chho ha a, chu mitmeng de sawr sawrah chuan rawpna leh tisa chakna hmu tel tlata ka inhriat chu. "Itawm han tih khan hur rawng a kai tlatin ka hria." Ka ti ve ngat.

Tunah tak hian khum chungh min bawhthluin hmangaihna min chenpui han tum vaih teh se...ka tang rei lo chiang ngawt ang. Hmangaihna pathian Cupid hian a hmangaihna thal fangin min rawn kap dun char char se ka va ti tak.

Za tak hian a nui hawk hawk a, "Hur rawngkai ni loin infakna tawngkam a nih chu. Itawm ti loin a sap tawngin sexy ti zawk che ila i dawng sawng thiam zawk ang em? " a ti ta a.

Darkar khat chhung kan workout dun a, R-a chu ka instructor-ah tangin tihdan min kawhhmuhin min zirtir pah zel a. A awm ti hrawl tihsek nana chest press a ti laite chu mittla lo lekin ka lo thlir leh thin. A taksa phiar nalh tak thlanin a han bual huh mawm hluam maite chu nalh tih piah lam a ni.Hah leh chau hnapa treadmill -a ka tlan hnu chuan kan duh tawk ta.

Kan inbual fai hma chuan bawnghnute leh artui chhum kan ei leh te te a. R-a chuan, "Eng nge i an?" A ti a.

"Ka chau...ka taksa hi na lo lai a awm loin ka hria. Exercise ka la ngai si lova ka chauhpui hle a ni." Bawnghnute in khalh pah chuan ka ti a.

"Taksa kan sawizawia kan inlak fit reng chuan natna tam tak kan um bo a, damdawi man pawisa tam tak kan save a ni tih hriat a tha. Kar khat vel i tih hnu chuan i taksa pawhin ngaiah neihin i zia chho mai ang."

"Nia..."

"Tui lumin inbual la, i taksa sil zualpui kha chu a chhawk em em ang."

"Aw le..."

R-a sawi ang chuan tui luma ka han inbual chuan dam sawng sawng hian ka inhria. Ka inbual zo chu whatsap -a ka message dawnte check pahin ka mu zal mai maia, hriat loh chhungin ka lo muhil daih mawle. Ka chau bawk em a ni.


REMLALRUATA's P. O. V :

Ka inbual fai zawh chuan choka lamah chhukin rawng ka bawl tan ta nghal a. Xena-i chu a rawn chhuk ve mai ka lo rin rilruk laiin ka rawngbawl zawh hnu pawh chuan a la rawn lang ta lo cheu chuan ka ngaih a tinuam lo ang reng. Ani hi a chau lutuk anga a lo kulchopui a ni em lo'ng chu maw ti rilru chungin thlithlai tur chuan a pindam lam ka chho ta. Hahdam hmel taka khuma a lo muhil siai siai ka hmuh chuan ka kiai sak.

A muhil hmeltha tak chu ka thlir vawng vawng a, muang changin a bulah chuan thu hnaiin a hmui nalh leh fawh itawm zet chu ka khawih de de a, "Pathian hian mihring zingah siam fuh bik a lo nei a ni tih tichiangtu i nih hi." Keima hriat tham lek chuan ka ti sup a.

Duh tawka hrawm kuala ka ta, keima ta bik liau liau a siam duhna rau chuan nasa takin min rawn pawl a. He hmeichhia hi ka duh a, ka duhna nasa tak chuan ka ruh leh thling thlengin min fan chhuak hneh a ni. Ka duhzia chu Pathian chauhin min hriatpui.

Xena chuan a mithmul er sei sal mai chu rawn phut der derin a rawn meng chhuak ta a, chu mitmeng buang thak chuan min rawn melh buai nak. "R?" A ti tham chhal a.

"Daddy zawk mawle, naute." Tih sup pahin a hmui nalh leh fawh itawm lutukah chuan ka fawp ta de de a. Ka insum theihna neih ve ten min phatsan a, ka insum zo ngang lo. A tira fawp de de kha min lo dan emaw min lo hnial tak lohah chuan ka duhthawh tulh tulhin a ka chhung lum hiamah chuan ka lei hnawng chap chu ka rawlh lut ta a.

Ka nghawngah chuan lo kuahin ka fawhna chu duhthawh em em hian min lo chhan let ve takah chuan, tisa chakna nasa tak chuan min tur ut ut tawh mai.

Ka fawh lai mek chuan a lu chu thle sawnin min nam sawn a, "Eng vanga min fawp ngawt nge i nih?" A ti lawi rat a.

"A chhan i hre lo tak tak em ni, naute?"

"Aih, hre miah lo."

"Ka hmangaih che a ni."

Ka thu sawi chuan a nghawng hle ni tur a ni, chiang zet hian min rawn melh phar deuh awn mai. "Ka ring thei lo...." A ti bah niai a.

"Ka hmangaih che a ni tih i rin theihnan hian eng thil nge ka tih ngai min hrilh rawh." Ka ti tham tuak a. A hmui kau phiauah chuan ka zuk liahsak zauh a.

"Nang leh kei chu chhiahhlawh leh a pu kan ni a. Nang ni ang mihausa leh keini ang mirethei karah chuan daidanna bang chhah tak a awm alawm."

"Chhiahhlawh enin vawite khat mah ka la en ngai lo che."

A mitmeng buang thang mai chu a de ser ser a, "Van sang taka awm, arsi mawi tak chu ka ban pha ve ta tihna em ni?" Ka bengkawm khawih neuh neuh pah chuan a ti a.

"Engtik lai pawhin i ban phakah ka awm reng alawm. Hmangaihnaah chuan indaidanna engmah a awm ngai lo. Hmangaihna chuan daidanna bang chhah ber pawh a su tlang thei a, tuifinriat thuk ber pawh a hleuh kai thei asin." Tiin ka lamah hnuk hnaiin ka kuah ta thlawp a.

"Nangmah khawih leh fawh chak hian ka taksa peng tin hi a na ut ut asin." Ka beng bulah chuan a rawn ti sa sa a. Lerh hmel zet hian a la nui ri hak zui.

Ka rum hak a, engmah ka ngaihtuah mumal thei tawh lo. He hmeichhe hmeltha uchuak lutuk itawmna chuan min bual aa vek. Ka hrawm nawk nawk a, hmangaihna tuipui thuk takah chuan hlimna leh nawmna vawrtawp thleng rawkin kan pil dun ta vawng vawng a.

Hmangaihna kan chen dun zawh chuan inkuah riala muin kan titi dun malh malh a. Eng eng emaw sawia a titi paha a hmui han siksawi velte chu hmuhnawm ka ti ngang mai. Mit pawh khap phal loin ka lo melh ngawt ngawt ringawt. He hmeichhia hi ka hmangaih lutuk a ni. A tan hian eng pawh ka ti thei anga ka tana a hlutzia hi teh dan pawh ka thiam hek lo. Pathian biakin ka be lo chauh ti ila a dik ber ang.

A hmuia va fawh zauh pah hian, "Chaw ei lamte hi ngaihtuah tawh ila." Ka han ti a.

Min rawn nek talh talh a, ka awma rawn bei thlem pah chuan, "Enteh...daddy...diktak chuan...." Ka hnute hmur rawn seh pah chuan a rawn ti sa sa a.

"Diktak chuan eng maw? Sawi zo loin i tawp leh daih a." Ka lo ti.

Lerh hmel taka nuih her her pah chuan, "Ka mamawh leh der tawh che." A ti ta ngher ngher a.

A biangah ka lo piai zauh a, "Chaw ei a hun tawh tak zet a ni. I workout chau nen i taksain a zo lo ang." Ka ti ta hmiah.

"Mawh....please, daddyyy...."

Ka tho thuta ka boxer chu ha nghalin khum khuhna puan chuan ka tuam hlawpa, pawm kang nawlhin choka lamah chuan ka chhukpui ta hmak. "Chaw ei a hun tawh ka tih chu." Ka ti hluk a. Hriselna hi ka ngai pawimawh a, a hun taka thil ei leh in hlutzia leh pawimawhzia ka hre chiang em a ni.

"Chaw tamin ka tam lo...nangmah tamin ka tam!"

"Min thlem suh!"

"I nunrawng em mai..."

Ka nui hawk a, "Nunrawng zawngin maw i lak dawn a? Ka naute hi sex addict-ah ka chhuah palh ang tih a va hlauhawm ta ve!" Ka ti a.

"Ei thiang lo thei min eipui a, hawi kir leh thei ka ni tawh hleinem." A nui hawr hawr a.

A mawngah ka bensak tawih a, "Chaw ei phawt ila....zankhua hun kan la nei alawm, a ni lo'm ni?" Mit khum sak pah chuan ka ti a.

Ka nghawngah chuan a rawn kuah chiala, dimtein ka hmui a rawn fawp, "Love you, daddy." A ti sep.

"Love you more."

XXXXX

Zing ka thanharh chuan min si rial leh ka ban lehlam lukhama tui taka muhil sek sek Xena ka hmuh chuan ka mit nen a inchar bet ta emaw tih turin ka melh vawng vawng a. Zing thawh hlima hmuh hmasak ber atan chuan duhthusam a ni. Thawhphan pawh kan pe chhe lo deuh alawm. He nau hi chuan min va hip hneh vet vet tak em.

Lehkha zir tura kaih thawh ve mai ka tum deuh zuau a; mahse, nizan lama ka chhawr rimzia kha ka hrechhuak leh a, kiai suk chungin ka rilru chu ka thlak rang teh e. Tihharh hlau takin ka ban a lukham chial chu ka la sawn de de a.

Xena chu rawn meng siar siarin, "Daddy?" A rawn ti tham chal a


"Mmm.."

"Minutes nga chiah min muttir leh rawh....khawngaihin." Pangchang tak hian a ti a.

Ka nui suk, duat takin a sam chu ka chulsak a. "Nizan lamah i che hah bawka, la mu rih rawh. Rawng ka zuk bawl anga chaw ei ka peih hunah ka rawn kaitho ang che." Zaidam tak hian ka ti ta.

Mawi zet hian a rawn nui seih a, "Daddy, ka hmangaih che." Chiang lo riai leh hriat theih che chea tiin a muhil zui leh ta mai.

A biangah chul dan dan pahin, "Ka hmangaih nasat zia che hi i hrethiam pha lo ang. I tan chuan ka neih zawng zawng leh puk belh pawh ka chan vek phal a, ka nunna mai bakah ka thih hnu piah lam thlarau nun nen lam ka hralh vek phal ang chu." Ka ti rilru mawlh mawlh a.

Xena ang em em a min chawk phur thei leh min tizauthau thei mihring hi ka la tawng ngai lo. Ka tan chuan a special hliah hliah mai a ni.

Bual inah luta ka inbual fai zawh chuan rawngbawl turin choka lam ka pan ta nghal. Xena chawhmeh ngainat em em, bawngsa ti, alu tlem leh tomato nena kan kawi thak sek chu uluk takin ka siam mawlh mawlh a.

Doorbell rawn ri ral ral ka hriat chuan zing lama chawhmeh rawn zuar kual thin nu kha a nih ka ring mai a. Apron hreng chung leh ka chawhmeh kan chawhna buhtlei sei keng chung chuan kawngkhar chu ka va hawng a, "Tun tum chu mamawh engmah kan nei---" Chawhmeh zuar ni lova kawngkhar bula Milly lo ding nui ver ver ka hmuh chuan ka tawng lai chu ka tawp nghal chawt. Thawj lak halh pahin, "Nang maw?" Ka ti hu a.

Nui ver ver chung chuan, "Min hmu chu i va lawm hmel vak loh ve." A ti ngial a.

''Hmuh che ka inbeisei lo em a tin ni." Ka ti ro halh a. "Bawnghnute, coffee, juice, thingpui...a eng ber nge i in ang?" Ka tih zawm zat.

"Tuilum chi al ka lo in zawk ang e." Tiin in chhung chu a melh kual ruai a. "Awmpui i la ni khan ka hre si a, eng vanga rawng bawl ta kurh kurh nge i nih?"

Tuilum bela tui chu glass noah thli chhuakin chi tlem ka al a, pek pah chuan, "Rawng bawl hi nuam ka ti a, ka hmeh siam tui ti taka midangin an ei lai hmuh hi a hlimawm ka ti thin. Hun ka nei tam lo mai pawh a." Ka ti leh mai.

No chu lak pahin ka kut a rawn hum tel salh a, "Khawiah nge i awmpui chu?" Chik zeta ka mitah tak melh chung chuan a ti a.

"A nuam sam lova la mu rih turin ka ti a nih kha. Eng ti tura rawn kal nge i nih a?" Nelawm fahran lo chuan ka ti ngat a.


"Ka walk pahin ka rawn tlawh che a nih hi. Nang nen hian sawi dun tur tam tak kan nei a ni. Rawng kha min bawl kep ve nghal la, ka lo ei ve ang e." Zam map lo hian a ti leh.

Thawk ka la hawk a, "Milly, nang nen hian sawi dun tur kan neih ka va hre lo ve. Kan inkar kan titawp tawh bawka, khawngaihin min theihnghilh tum tawh rawh. " ka ti ta hmiah.

"Kei chuan kan inkar hi a tawpin ka la hre lo. Hmana ka hmangaih thin ang tho che khan ka la hmangaih che a, then tumna che ka nei chhin ngai lo."

"Dik tak chuan ka hmangaih tawh lo che a, i lakah eng feelings mah ka neih loh zia ka hrilh chiang viau tawh chein ka hria."

"Hmangaihna hi chutia duh hun huna tawp mai thei a ni hleinem."

"Chuti a nih chuan, ka lo hmangaih ngai miah lo che a, ka duh satliah mai che a nih zawk dawn chu."

A hmai hupin a tap ta hlawp hlawp a, "Ka engkim ka pe che a, nang hian natna leh tahna bak min pek let i nei lo." A ti hliam hliam a.

Chutia a tah takah chuan ka lainat tak zet a ni. Keimah vanga nat leh tawrh hi a phu hian ka hre thei lo. "Milly, ka tihnat che avangin min ngaidam ang che. Tihnat che ka duh ngai lo; mahse, ka thunun theih piah lam thil a ni ka tih tawh kha." Tiin hnem ngial ka tum; mahse, ka hlawhchham chiang hle.

Rawn ding chhuakin min rawn pana ka awmah bei thlawpin a tap ta hlawp hlawp a. "Ka hmangaih che a ni, R. Ka hmangaih lutuk che." A ti mawlh mawlh a.

Ka lu thak lo pui chu ka hiat ta ngawt. Sawi tur ka vana, chet han lak leh zel dan tur ka haihchham tlat bawk. "Tunah chuan farnu hmangaih ang chiahin ka hmangaih thei tawh ang che." Ka ti ta ngawt.

Ka inrin hman hma chuan ka tukhumah rawn kuahin min fawp ta chawt chawt a. Ka beisei loh leh rin loh dan lutuka a chet avang chuan ka hamhaih hle mai. Chair-ah chuan nam thu hnawkin nelawm lo takin a melh run run a, "Khatiang khan tenawm takin chet la tawh ngai suh. Mihringte inhmangaihna hi chuan kumkhua a daih ngai lo, tawp chin a nei thin tih hrethiam rual i ni tawh. Nang ang nula hmeltha leh smart tak hi cheap taka che tur i ni lo. Hmeichhe dang hmangaih ka nei tawh a, ani chu nupuia neih ngei pawh ka tum." Ka ti kha fak a.

Huatna a khat mitmeng chuan min melh rawm rawm a, "Ka haw lutuk che, Remlalruat! I hmeichhe hmangaih chu tu nge a nih ka zawng chhuak anga, in hlim bik chuang lo ang. Keiin ka neih theih loh che chuan tu hmeichhia mahin an nei bik lo ang che." A ti khur zawih zawih a.

A chair ban chu va hmera kun hniamin mitmeng hriam lutuk chuan ka melh a, "Ani hi i tina a nih chuan i tihnat let hnih zelin ka tina let zel ang che. Hei hi nang leh keia inkar thu a ni, engmah tel ve na a nei lo." Ka ti hriam hrawk a.

"Tel vena a nei lo a? Nang hi ani khan min chhuhsak lo em ni? Rukru leh mi rawk ching a ni."

"Mihring ka ni a, ruk leh chhuhsak theih ka ni ngai lo ang. Lo hmangaih tak tak che ni ila a hnenah ka kal ngawt thei lo ang. Khawngaihin duh tawk tawh teh ang." Ka ti

Mi aa ang mai hian a nui hawk hawk a, a eng emaw ti rapawm hial a ni. "In hlim dun chuang lo ang." Tiin a tho thut a, pawn lamah a tlan chhuak ta nghal. A chhuah pah chuan ring theih tawpin kawngkhar chu a la khar ri zui bur.

A chhuah rual rual chuan ka thaw huai mai. Muangchangin rawng chu ka bawl chhunzawm leh ta nghal a. Ka bawl zawh chuan ka naute kaitho tur chuan faifuk rat ratin pindan lam chu ka pan ta a.


"Hello, Sleeping beauty, thawh a hun tawh e!" Pindan kawngkhar hawn rual chuan ka ti lut a. Khum lo ruak huai ka hmuh chuan ka nui sak a, kaihthawh ngai loin a lo tho ve thei a nih hi.

Bual in atanga a rawn chhuah mai beiseiin ka lo nghak ren rawn a. A rawn chhuah tak mai lohah chuan ngaihthat lohna ka nei tan a, bual in kawngkhar chu va kik kauh kauhin, "Xena, i lo chhuak tep tawh em?" Ka han ti a.

Min chhang lo.

"Xena!"

A la reh hmak.

A lo tlu sual reng te hi a ni thei ang em? Kawngkhar chu ka kik ta dawt dawt a. "Xena, baby, ka lo lut dawn a nia." Ka ti chul a.

Chhanna ka la dawn loh avangin bual in kawngkhar chu sut hawn rawk mai ka tumin ka han insiam rem a, a lo inkalh hlek lo chu niin bual in chhuatah chuan ka tlu lut ta rawk mai. Bual in ka han melh kual chu a lo ruak vek. Xena hmel hmuh tur reng a awm lo.

Hlauhthawnna avangin ka thin chu a phu nghal hlawk hlawk mai. Khumah a mu lova bual inah a awm hek lo. Khawiah nge a awm tak ang? Hrep tak chuan! Ka sam chu ka tuai thur vak a, ka tahte a chhuak rum rum mai.

Eng vanga bo ngawt nge a nih? Khawiah nge a kal tak ang? Eng vanga engmah sawi lova kal bo ngawt nge a nih? Bual in atanga chhuakin khum chungah chuan ka thu hnawk a.

Xena, khawiah nge i awm? Nizanah pawh khan hlim takin kan khawsa dun a ni si a. Ka phone chu phawrhin a number-ah chuan ka call, switch off a inti. A thawmhnaw bawm chu ka va hawng a, a kawr a lo la awm thap si. Ka han hawi kual vel ruai a, college -a a ah thin, a backpack dum a awm lo tih ka hriat rualin college a kal tawh a niang tihna rilru ka nei a. Mahse, college kal nan a la hma lutuk mai bakah min hrilh miah lova a chhuak chu thil mak a tling hrim hrim.

Chutah, a lukham hnuaia lehkha them rawn lawr chu ka hmu ta, kut khur dawr dawrin ka la kang a.

"I lak atang hian ka bo hlen dawn, min rawn zawng buai duh suh. Min hmu zo chuang lo ang"

Tih hi a lo inziak a, ka hmai chu tuai puatin ka thaw hawk a. "Eng vang nge? Xena,eng vang nge?" Ka ti mawlh mawlh a, tih theih dang nei hek lo chuan a lehkha chu ka chhiar nawn tlut tlut mai.

Xena tel lo chuan ka in chhung chu a reh vawng vawng a, a ruak ngawih ngawih hian ka hria. Chhan leh vang awm loin min chhuahsan ngawt ka ring thei lo.

Ka rilruah thil pakhat a rawn lut nghal zawk a. Milly-in min fawp lai kha a hmu a ni chiang mai. Ka inhum ruh ngawt ngawt a, Milly ka tihnat vanga Pathian hremna chawp leh chilhin ka hmu nghal tihna em ni ang?

Hmeichhe dang nena kan infawp lai a hmuh chuan a rilru a hrehawmin a na ngawt hian ka ring. Mahse, buaina leh harsatna a nei emaw thil hriat fiah loh a neih chuan min zawt chiang tur leh mahnia ngaihdan siam ngawt lo turin ka hrilh a nih kha. Eng vangin nge ka thusawi chu a zawm si loh?

'Min rawn zawng buai duh suh. Min hmu chuang lo ang' a ti em ni kha? Min kalsantu hmeichhia um a, zawng buai hman ka ni em ni? Min tlansantu town bus umin tumah an tlan dawr dawr ngai lo. Hrep chuan! Thudik zawng hmasa tur a ni asin.

Thinrim zetin chaw ei ka siam a, a chawhmeh ngainat ber ka siam chu melh vung vungin bawlhhlawh bawmah ka va bun vek. Hmanlai hla hlui 'No Woman No Cry' Bob Marley sak chu ring mang kheng hian ka play a, chaw ei luih chu har talh talh tak a ni.

Chaw pawh ei chhunzawm thei ta lo chuan office kal tur chuan ka insiam ta nghal. Office ka thlen chuan tumah biak chakna pawh ka nei lo, min lo wish-na pawh chhang buai peih loin ka office ka lut tlang nghal hmiah a. Ka mood chu a off nileng a thinrimna tur leh huat tur ka hre em em mai. Min dawrtute pawh khan biak peihawm loh chu min ti ve ngawt ang.