Thliah Hnu Dingdi

[Lallianpuii Ralte]

'THLIAH HNU DINGDI'
By Lallianpuii ralte



CHAPTER - 17




Tukṭhuan kan kil lai chuan thil chik ta reng reng nutei chuan bawihpuia nen chuan min melh tawn leh zak zak tawh. "Chawhmeh vel kha kan nei tam tawhlo riau a, vawiin chu chawhnu lamah bawihpuia nen hian kan va bazar dawn ami niang ka ti deuha. Mimal mamawh min chah duh te in nei em?" biak bik em em pawh neilo chuan ka enkual hlawm a, "Nei lem lo aniang" nutei'n a tih bak chu tuman min chhang lo.




Thleng ka sil zawh veleh chuan ka pa biak ka duh avangin pawnah ka chhuak ru deuh zal zal.




"Pa bawihpuia hi thuamhnaw a nei ṭha tawh lo lutuka, college kal lai a ni sia, vawiin chu ka bazar pui dawn ami niang ka tia, pawisa lah chu ka keng mumal silo a" thu khuh deuh takah ka tih chuan "I gpay na account ah khan ka lo thun dawnnia. Phone te kha a la nei ṭha em?" alo ti nghal thar thar a, phone tak chu ala nei ṭha a ka hriat avangin phone man tur chu lo thun tello turin ka ti ta rih. Phone kan dah hnu reiloteah chuan tam tham angreng tak ka ac ah chuan a rawn transfer nghal a, ti hi chuan phone thar pawh lei sak duh ila kan daih zànin ka ring.




Inchhung sekrek khawiha ka buai chawhma ṭhak hnuah bawihpuia mu lai chu kaithoin insiam turin ka ti a, a peih lo hmel ngang mai. Mahse, nizan thil thleng avang khan melh pawh min la melh ṭha ngam lo a, chuti nilo se chhuah ka rawtna chu min hnial chiang viauin ka ring.




Chhun thil pawh pawnlama ei nghal mai ka duh avangin dar12 pelh thuakah bawihpuia bike in kan chhuaka, bazar lun lai tak tak thlen hma chiaha restaurant tereuhte lo awm a chawlh ka rawt chu "A ṭhing si, a aia nuam a tam lutuk" tiin ka kal pui pa chuan min hnial deuh ṭunga, "Lokal mai mai teh, a dang zawn leh a buaithlak" tia ka luh zui tak daihah chuan phur loh hmel fahranin min rawn zui lut ve ta hnu hnu. A len loh ngaihtuahin a lun phiana, a chhung pawh chu ṭhin chu sawi loh ka rin phak bak aiin a lo changkang daih.




Menu te chu an nei vei thlap a, a thawk pawh an tam vei phian. "Enge in chah dawn?" tia hmeichhe hang ngaihnabei zet la naupan hmel zetin a rawn tih chuan ka duhzawng te chu ka sawi nghal zat zat a, "Enge i duh ve?" tia bawihpui kun tlat ka nghawk zauh chuan "I duh duh kha nimai" ti ringawtin min chhanga ka bula hmeichhe dingin chik hmel zeta a en hnuah "Ehe Ruatdik nangmah elaw ! Ka hai dawn che lawm..." tiin eisiam ho chetna lam chu a melh pah zauha, a biak a berin a chhan tak loh ah chuan min rawn melh lehin min melh no vak tawh lo.




Kan awmna aṭanga kalsawn paha"Ex te dawra bialnu thar te han chawlh pui ngam chuh" zawi deuh tak leh kan hriat loh hlau tak si a a tih ri ka hriat chuan ka nuih bawm a sawh keh teuh hle.



Kan naua chu a ex te restaurant a ni tih kha min han hrilh ṭha hle hle se chuan ka chawlh pui lo nimai tur hi ania.




Amah en ngara ka nuih dir char char tak hnuah chuan lawm lo hmel taka rawn hawi chhuakin "Enge?" a rawn ti nghal tawnga, khi sanga "Enge ni zawk Lalruatdik?" ka tih let leh takah chuan za lo deuhin a nui ve ta suk.




Eitur rawn dah tu chu midang daih ni mah se dawhkana a eitur rawn chhawp dan sawk sawk avang te leh min melh duh dan vel aṭang te chuan nichina mite nen khan ṭhianzaho tho annih ka ring.




Eitur rawn dah tu a kal veleh chuan bet hmel lo zeta ṭhu bawihpuia lam chu ka hawia, nuih avan tiza mai mai tak "Tu bialnu hlui te emawni hian min tawng phah hrep ang tih ka hlau e, restaurant dangah kan chawl lehsi mai dawn em'ni?" tia ka fiam chuan a duh lo khawp mai "Ngawi mai mai teh, an mawl anihkha. Kan inan tehreng nen" nui put put pah hian a tive sup a, nuih insum a har ngar ngar khawp mai. Ka naua hi tlangval tak tak alo nive tawh anih dawn hi ex te a lo nei ve tawh ngeia.




Bazar lam pana kan tlan chhuak chu a classmate te ni ngei tur hian min rawn tlan pelin "Va thur chhuak chhelo thei bik ve...khawilam product nge?" tih angreng hian an rawn au zui lawng lawng a, chhan pawh chhang lo a "An va mawl chhah tak" a tih leh hluk hluk ṭhin avang chuan hnunglam aṭangin ka lo khik khum sung.




Ama sawi ang tak takin bawihpuia nen hian kan hmaitlak leh vun rawng te hi a inang em em a. Kan mitmeng leh hmui tak phei hi chu kan inan lohna lai rawn zawng ngar ngar tu tan pawh hriat hran a har ve khawp ang tihtur khawp a ni. Kan chhungte leh hmelhriat ṭhate ho hian ka nauin min tluk loh thu hi sawi ṭhin mah se ka mit ah chuan kei aiin bawihpuia hi a ṭha zawk ve tlat, hetia a tlangval ti tuai a han chhuah tak hnu phei hi chuan ka nau mah nise hmuh ṭhat loh har tak a ni. Feet 6 a tlin loh na hi tlem te chauh a ni a, kum 14 a tlin khan ka pa te hi chu a chen vang vang tawh. Enkawl ve lem lo mah se a vun te hi a mam in a paw vah renga, ṭawnghmang te thiamin han zei ve deuh phei se chu kan Lalrosanga ang chauh tur hi mawle.




"A lum e....Lal u vur saw min lo lei teh" ka hnunga mi in a rawn tih dut chuan ka phu deuh zawk. A mi koh dan mawlh chu...a tet deuh lai khan thil lei min dila min tlawn deuh tawh hi chuan Lal u tih hlir hian min ko ṭhina, a intih tlangval deuh hnu hian a tetlai zia zawng zawng thlakin a ngeng ngul a, thil lei min dil chu sawi loh ka biak hmasak loh chuan min be ngai ta mang lo. A tetlai khan ice cream hi a duh em em a, a damlo khawsik tlun hlawk hlawk lai pawn "Ice cream i duh em?" tih tawh chuan alo yes thei zel. Ka chhuah pui ṭhin khan Ice cream dawr hi a hre thei em em a, ice cream an zawrhna dawr kawt kan thlen tawh hi chuan pangchang zeta min en in engmah pawh a sawi hmasak hmain "Lal u" ati hmasa ngei ngei ṭhin. Tun a tlangval uai tawh hnua Lal u tia min ko thut chu ka tan mak tiha lawm loh na chi rual a nilo.




"Enge induh?" hmeichhe ngo leh hmaitlang ṭha zetin nelawm fahrana alo tih chuan ka bula mi chuan "Ice cream " alo ti duta, ka va en phei chuan chu nu chu alo nuihsuk anihchu mak ka van ti tak, a nui hmel ka hmuh lohna chin pawh ka hre tawh lo. "Eng flavour nge niang?" tia vur dahna bawm lam a pan chuan bawihpuia chu che ve vutin vur bawm awmna lam chu ava pan ve nul nul a, chutia inhnaih taka an han ding dun ta phei chu an han lai dun hmel khawpa, hmuhnawm ti deuhin ka lo thlir reng.




A man pek ka tum chu "Hei chu keiman ka lo pe ang" tiin bawihpuia chuan 500 note hi a rawn phawrh a, pawisa min rawn kir a tum lai chuan "Kir kan ngailo aw" tiin a kal nghal vuta, nula in "Ruatdik" tia bawihpuia kal ta a enzui vung vung hnua min lo en leh chuan "100 man bak a la silo a, in kir loh ngawt atan chuan a tam emai, min lo nghak lawk rawh aw" tia pawisa dahna lam a dap rawk rawk chuan a pawisa neitu pawhina a dawn duh loh miau chuan ti rilru chungin "A ho lutuk min lo kir duh suh...." tiin ka nau chu ka umzui ve ta tawp.




"Tinge pawisa kir kha i lak duh loh a? A tam sia i ui lo mi?" a hnunga beng thuk paha ka tih chuan alo nui maia, "I bialnu hlui tho a mi?" ka tih chuan nersawkin "Teuhlo" alo ti hmuka "Anih leh i bialnu ami?" ka tih leh hnu chuan "Min duh ve lo" a ti leh tawl a, mak ka ti angreng bawihpuia a en dan vel aṭang kha chuan duh ve lo hmel pu pawh khan ka hmu silo a.




"Ka va awihlo....a endan vel che aṭang kha chuan a duhve hmel em che kha"




"Ka mizia ang hi a duh loh thu a sawi alawm"




"I eng zia tak maw a duh loh? i zia te chu a ṭha viau anilawmni"




"Zia tih lemah ka ṭhian kawp te ho zia hi a duh vak lo a, 'Kan ṭhian kawp te aṭang hian mihring mizia tur chu a hriat theih vek e' atia."




"A sawi dik reng alawm. I ṭhian kawm tur te thleng thlenga thu rawn neih chu ka duh miah lo; mahse, i nakin hun tur hril tu tur anni tih hre ranin thlang fimkhur ang che, chutiang bawkin i kawppui tur pawh. I thlan fuh lo chuan tuar tu tur chu nangmah bawk i nia, hmangaih lo tu che chuan i hmakhua ngaih vangin thu ṭha an hrilh ngailo ang che" nizana ka zilhna kha a ngaih huat ka hlauh pakhat avangin ka ti deuh duah.




T-shirt leh jacket tih vel ka thlan sak lai chuan kan piah deuha thuamhnaw en ve tho hmeichhe rual khat chuan bawihpuia chu rawn melhin an phun leh sar sar ṭhina, a khat tawkin an nui kar kar reng bawk. Chuvang chu nge ni bawihpuia chu a bet lo leh hmel khawpa, ka t-shirt thlan chhuah ho ha chhin tura ka tih te chuan "Hetiang ka mamawh lo" a ti bul bul tawh. "Ha mai mai rawh, i wardrope ka en vek alawm thuamhnaw ṭha i nei mumal tawh lo" ka tih takah chuan hreh deuh takin a ha ve mai bawka, a t-shirt hak lai hak thuah mai a tum chu "Hlip phawt ta che i hak lai kha" ka lo ti a, hreh hmel taka min en in "U...i ti zahthlak thei emai" a ti nung nung a, ka tilui duh ta bik lo.




Leather jacket uk mawi deuh mai ka hmuh chuan Lalrosanga ka hrechhuak lo thei lo, a inhmeh viauin ka ring. Kal pel ka han tum ngial pawh chuan ka thei tlat lo, ka la tel ta nge nge.




Kan duh ang kan thlan zawha kan chhuah dawn chuan khang hmeichhe rual zinga pakhat khan "Ruatdik i bialnu mi?" a rawn ti lang lang a, enchian tuma ka hawi phei chu bawihpuia chuan "Aw" ti hmukin min nawrchhuak nghal dawt dawt.




"I va han che ṭhing thei tak ! I bialnu tak tak emaw min ti anga, i bialnu bialpa ve lo tu che beng kha a thlen chuan i buai leh viau mai tur asin" nui hman hman chungin ka ti a, "Min duh ve lo tu ka care chiam na tur ka hrelo" alo ti leh nghut tawh. Hetiang a mizia ang nen hi chuan hmeichhe chhai thluk a harsat ang chu aw.




Chawhmeh te leia kan bazar zawh leh hnu chuan haw tlang ta mai loin a hmaa Lalrosanga'n min hruaina hmunah khan titi pui ka duh avangin ka kal pui leh zet.




"Enge hetah kan tih dawn?" mak ti hmel deuha a bike aṭanga rawn chhuk paha a tih chuan "Lokal rawh tah sawn titi lawk ang" tiin thing hnuai rem zeta thing ṭhutna lo inhung lam chu ka kawk va va.




"Bawihpui" min chhang loin phawk deuhin min lo en hu.




"Ka nu boral aṭang khan Teberi nen hian intan in nu ni turin ka rilru hi ka siamfel hmak tawha, eng harsatna pawh tawkin hmachhawn dawn ula, telve zel ila ka duh ṭhin. Nangmah ni chauha inhmachhawna in sual bik ka duh lo a, tih theih ka nei ve lo anih pawhin hriat ve zel ka duh. Pasal te neia in hranga ka chen hnu thleng pawh khan intana ṭawngṭai ka thlahthlam ngailo , ka hlimna ber chu in chanchin ṭha lam hriat kha a ni a, chutiang bawkin min ti lungngai ṭhin tu chu in chanchin ṭhalo lam hriat hi ni. Teberi chu kan bulah awmin nuamsa takin ka pa nen kan kiangah ala awm thei a, nang chu nutei te chhawmdawl turin hrehawm leh nuam lo pawh pawisa loin kan hlat ah i tette aṭangin i khawsa a, ka chhuang ṭhin takzet che. Kei leh Teberi hi ka pa hlatah nang anga rei hi khawsa ve ta ila phunnawi na kan nei tam tawh viauin ka ring.




Kan tluk lo takzet che." ka thinlung chhungril ber aṭanga sawi ka ni. Heti chen nutei te bula a awm tawh chung hian complaint engmah a nei ngailo "I lo tlangval deuh tak hnu phei hi chuan i puitling tawh lutuk hi kan lo thlahthlam phah lek lek ṭhin ang che tih ka hria, nizana i chunga ka thiltih pawh kha ti turin dikna ka nei em tih pawh hi ka chiang chiah tawh lo, a chhan chu tun kum5 kal ta aṭang vel khan nu mawhphurhna chu sawi loh u mawhphurhna ngei pawh hi i lakah ka hlen zo lo hle tih ka hria. " bawihpuia laka ka mawhphurhna ka hlen loh zia chu inhre tharin ka hnuk chu a rawn ulh deuh tlat a, ka ṭawng zawm leh maithei rih lo.




"Nilo u ka thiam loh zawk alawm. Ka pa nen hian ka laka inmawhphurhna chungchangah hian vawikhat mah ka dem ngailo che u. Dem a inthiam lo tur an awm anih chuan keimah hi ka ni ngei ang, rilru na takin ka siam che a, chuti chung pawh chuan ka lakah hetiang rilru ṭha lutuk hi ila pu thei ania, ka thil sual tih ah hian tumah puh mawh tur an awm lo" a u ṭap hmel a hmuh meuh chuan bawihpuia thinlung khauh lutuk pawh a chiah zawp ve ta a ni ngei ang.




"I tihna a rei tawh em bawihpui?"




"Reilo e, ka tih tirh chuan kartawpah bak ka ti ngailo a; mahse, tun thla khat kal ta vel aṭang khan ka in regu deuh."




"I la nghei thei ang tiraw?"




"Theih loh na tur a awm lo. Zu ngawlvei nih ka duh lo a, chutiang bawkin zu ngawlvei fapa a nei tih a hriat huna apa rilru na tur hmel ka hmu ngam lo" chu a thusawiin min tih hahdam zia chu hria se aw.




A hma tawh loh avangin rei pawh awmzui tawhloin kan haw thuai a, in kan thleng phone ka bih chu Lalrosanga missed call a lo tam ngang mai. Ka call back lah chuan a la pick thei ṭhak lo zui.




"Nute eirawng i bawl tawh mi? Kan sangha lo hawn hi a hmin hma dawn tho a, kan siam leh dawn ami niang" ka tih chuan "Zo dim diam tawh. A ngailo ang, kha Lalrosanga'n min lo pe ṭeuha, ka siam nghal a. A tui khawp ang a sen chi hlir ala ni zui a" a tih chuan vawiinah alo hawn dawn tih ka hrechhuak chiah. Zing aṭangin bawihpuia ah ringawt rilru ka lo dah a, ka lo chhuah daih mai bakah an lo thlen tawh leh tawh loh takngial pawh ka ngaihven silo a, a call ka la chhang lo zui.....a lungawilo ang chu aw Lalrosanga chu.




Lalrosanga sangha min lo pek han tui dan chuh... min lo pe tuin a zir bawka, kei sangha duh ṭawk pawn ka ei tam narawh e,.




"Min hrilh tur chu i nei leh silo ami?" ka thleng sil lai min lo nghawk zauh paha nutei'n a rawn tih chuan a sawi awmzia man lo zetin ka lo thlek haw.




"Zaithanpui hrelo der suh...nizanah 'Nakinah ka hrilh vek ang che' i tih kha a tih leh takah chuan ka hrechhuak zawk. Mahse, hrilh chi a ni dawn em mawni ka ti leh deuh. Bawihpuia chungah rilru chhia pu miah lo mah se a kam tam ve angreng sia, ka pa te reu reu alo hrilh ang tih ka hlau deuh. Bawihpuia khan ka pa hriat a hlauh hmel nasa sia, nghei tawh a tum laia nutei ten anlo thar thawh leh chiam chuan a rilru a thlak leh phah ang tih te pawh a hlauhawm zawkin ka hria. Mahse, eng emaw ala hriatloh thil pakhat tal ka hrilh lo anih chuan chat lak awm loin min zawt leh reng dawn si, Lalrosanga nen kan inkar sawichhuahna hun remchangah hian ka hmang zawk mai dawn em mawni chu aw!...ka rilru ava tibuai mai mai reuh e aw nutei chu lo inṭawngkhalh lo ni ila ka buai lo nimai tur.




Ka hnunglam aṭanga min rawn kuah tu an awm rualin "Min ngai ve lo hi i ang ṭhin mange" tih aw ri mawi deuh chu ka hre zawm nghal zat , "Hey min thlah teh...nutei ten min hmu nge" tia inher mai ka tum chu "Pahhnah roll pui turin Zobekangi te inah a kal, kan rawn intawk alawm. I pi leh pu pawh kan inlamah ka nu te nen an titi tui lutuk. Kan free ve lai ka chuh anih hi...tikhan awm ṭung teh suh inthlah dul rawh" a tih takah chuan ka inthlahdul ve ta deuh.




Zei zeta ka nghawng vela a hmuia min rawn nawk na lum thar thar chu hnar phal chi rual anilo. ka apron chhana a mi vawnna a kut chu phelhin ka kawr chhung ah chuan a kut a rawn zen luta, ka awmbawr a zen chhoh lai vel te chuan ka thaw tawh mang pawn ka hrelo. Ka nuam tihna ti zual tura ka beng bula "Ka ngai tawh lutuk che ka Dingdite" sexy zeta a rawn tih leh phei chuan ka rum chhuak deuh hawk.




Khuh ri khak thawm rawn awm thut chuan min va han ti phu chiang kher em ! Lalrosanga pawh a inla hrang viau. Ka zah lutuk avangin tunge lo lut tih hre tur takngial pawh chuan ka hawi let ngam lo, ka hlauhthawn luat avanga ka thinphu inthum rawn tlut tlut ri te chu ring tak a ni.




"I chhuak dawn ami naua?" Lalrosanga'n a tih takah chuan bawihpuia a ni tih hriain thaw a veng ta deuh. Mahse, ka zahna erawh ala reh chuang lo.




"Aw...u pawisa tlema zawng min pai tur i nei em? Ka ṭhianpa birthday te ni ve sia, kut ruaka kal ringawt chu a nuam ka ti chiah lo a" inthlahrun hmel tak hian a ti a, "Lawks aw" tiin ka purse dahna ka room lam chu ka pan vat. 500 note ka lakchhuah hnu chuan chhuak leh vatin choka lam ka pan chu alo awm tawh miah lo "Ahh khawnge bawihpui kha?" ka ti haw a, "A kal chiah" Lalrosanga'n alo tih chuan "Pawisa min dil sia, tinge a kal leh daiha" tia kawngka lam ka en vung vung chu "Ka pe lawm ngaihṭha deuh khan i sil hmabak hi rawn sil zo vat zawk teh" a lo ti sam et a, "Nge ilo pek ? Engzatnge i pek a? Kha hei hian a daih em?" tia ka 500 note ken pek ka tum chu lo pawtthla vutin ka apron hmalam ipte ah chuan a thun tawka, hnunglam aṭang chuan thlengsilna lamah min nawr kal zui nghal dat dat.




Min lo kuah leh a tum chu "Kal teh...ka thlengsil zawh hma chu min rawn dek tawh suh. Miin minlo hmu leh reu reu ange" tiin ka lo ṭeu hlara, nui ruh ruh chungin min thlah ve mai bawk. Sil rei min tih em avang chuan min nem sawnin ka sil hmabak la awm te chu a sil sawk sawka, a tihdan vel aṭang hian a vawikhat tihna chu anilo tawp ang.




A sil zawha "Va inha lum rawh chhuak lawk ang" a tih takah chuan ka jacket leisak kha ka hrechhuak zawk pek na hun remchang tak a ni.




"Lokal lawk teh" tiin ka room lamah chuan ka pawt phei nghal dawr dawr.




"I jacket hak lai kha lo hlip lawk teh" ka tih chuan min hlauh hmel taka a kut pahnih a awma dah khawkherhin "Engtia min tih nge i tum? Midang an rawn haw ange" nui ṭha duh hauh lo hian a ti pek a nihchu "Hlip mai mai teh" ti paha ka wardrobe lam ka pan hnu chuan "A hnuaia mi pawh hi kan hlip tel nghal ang aw" fiamthu deuh takin alo ti leh a, ka nui hawk.




"Kha hei hi ha chhin teh" tia ka leather jacket lei sak ka pe chu jacket leh keimah chu min entawn zuk zukin "Ka ta tur ami?" alo ti ang he haw a, nuisanga lu ka lo buk tak nghatah chuan a lawm hmel khawp mai.




Ka rin ang ngeiin a ta tur bika an siam ni hial khawpin a inhmeh a, a hmelah chuan lungawi hliah hliah hmel bak hmuh tur a awm lo, hlip leh rih tura ka tih pawh chuan "Tian ka ha nghal dawn. Kha kha nangin ha la" tiin a jacket dum khuma let bam chu a melh zauh. Min melh ràn chung chuan min rawn hnaih deuh ruaka, hnunglama ka lo tawlh hrut chu ka kawnga min rawn kuah betin muangchang hian a rawn kun hniama, ka mit ka lo chhing nghal vat ka hmuiah min fawp dawn emaw ka tih laiin ka chal ah dimte a min rawn fawpin "Ka lawm lutuk aw" a ti sup a, hawichhoh ka tum chiah chu ka hmuiah dimte bawka min rawn fawp lehin "Ka hmangaih che" a ti zui sup. Engmah pawh tih chhunzawm lo chuan inla hrang zuiin a lai ve deuh nge mawni"Hmanhmawh rawh aw bike ka lo va la chhuak ang" tiin a chhuak zui daih.




Pawna ka chhuah chuan a bike ngheng ar ar in min lo nghak ran tawha, "Enge kan tih dawn reng reng a? Nutei te hrilh lo a chhuah tawp chu a tih chi dawn ami le" en ran paha ka tih chuan "Khalam kha chu ilo ngaihtuah hah ve angai hleinem. I pi leh pu bulah a dil vek tawh i duata hian" a tih laia a mitmeng chu sexy sawr sawr tak a ni. Keimah ngeiin a chhungte hrilh miah lo a, han chhuah mawl tawp mai chu ngaih ala ṭhat theih chiah loh avang chuan "Min lo nghak lawk rawh aw" tiin Lalrosanga te inlam chu hmanhmawh deuhin ka pan hlawk hlawka, "Ka hrilh tawh ka tih kha" tia Lalrosanga'n min lo auh zuina pawh chu ka bengrawng ah ka thun duh lo.




Nu Nemtei te in ka luh chuan tapchhak zawlah ka pi leh pu leh nu Nemtei te nupa chu anlo ṭhu bial laih a, kawngka pawh kik hmasa lem lo a ka lut thut chu mak tiin min lo melh ṭhap hlawm.




"Pi kan chhuak lawk dawna, Bdi te ho nen kan reilo ang aw" ṭi daia ka tih chuan "E inkal tawh emaw tia, bawiha khan minlo hrilh tawh alawm. Kàn na tur pawisa te i nei maw?" ka pu in alo tih chuan bangbo deuhin "Maw?" ka lo ti hu a, ṭawng leh a tum lai taka ka hnunglam aṭanga "Keiin ka neih chuan a tawk alawm pu..kal hi ti hma ila kan haw hma thei deuh ang, lokal rawh le Dingdite" Lalrosanga chuan rawn ti zawt zawtin min kaichhuak nghal dawr dawr.




"Eng dawt nge ilo hrilh a?" ka tih lah chuan "Va let lo la, dawt i sawi ve angailo nimai tur ania, hmanhmawh teh ang" ti chauhin min chhang a, ka zawt zui duh ta lem lo.




Kan tlanchhuah rual chuan ngampa zetin a kawngah ka kuah nghal hluna, a bike a min phurh hmasak ber zana ka hlauh zia te leh ka nel loh zia te kha hrechhuakin a hmuh loh lamah ka khik khum vur vur mai.




"Pinky i hlau em?" a tlanchak deun hnua a rawn tih leh phei chuan ka lo nuichhuak hak. A kawnga ka dawmna ka kutah chuan a kut lehlam chuan rawn vuanin a tlanmuang zuia, "He bike a i chuan hmasak ber zan aṭang khan heihi i ta a ni tawh sin" tiin a thin zawn chu ka kut chuan min zut chhoh tira "A neitu i ni tih i inhre har deuh erawh a tawrh ve phah ta deuh anih hi" tiin a nuiri zui suk. "Ka va awih em em lo tak ! I bike a min phurh hmasak ber zan te kha chu kan inhmuh vawihnihna vel chauh a la aniang chu. Engtinnnge a mizia leh nihna tak tak pawh i la hriatchian loh hmeichhia chu i thinlung i hlan nghal ngawt theih ang ni" a thusawi awih vak lo chung chuan ka lo ti ve tan tan a, a nui zawm leh dawn emaw ka tih laiin thutak deuh hian "Ka thinlung hian a milpui tur hi an mizia leh nihna aṭangin a zawng ve ngai hleinem. Thinlung aṭang bawkin ania a zawn ṭhin ni. Ka bike a i chuan hmasak ber te kha chu sawi loh ka hmuh hmasak ber che a mi endan leh khawsak dan vel aṭang khan min hneh daih tawh. I thinlung kha tharum leh ṭawngka thlum satliah avanga hneh lak sak ngawt theih i ni dawn lo tih ka hriat avangin hma ka rawn la zui lo mai mai. Chuti nilo se min haw hlen daih lo anih pawn min vei bur ang mawle!" tiin a nui vei hawk hawk.




Ka ngaihtuah daih chu kan intawn tirh vela ka laka a chetdan vel kha a ni. Khatih lai khan hmangaih chu sawi loh a chet dan engkim avang khan ka haw em em a, a huat loh hlaua ṭawngkam chhe tinreng ka chhahchhuah khum hnu pawha dam dap a min la chhang reng thei te kha min runluihnaah ngaiin ka thin a tirim zual ṭhin viau kha a nia. Mahse, ka lo ngai dik lo hulhual a ni. He mihring hian kan in tawn tirh phat aṭang tawh khan ka hriat miah loin a thinlung hi ka tan chauh alo serh hrang tawha; mahse, ka mizia a hriatchian em avangin a lan ang anga ka laka hma la pawp pawp loin fing takin min veh thlem hmasa te te a, zei leh dimdawi taka ka laka khawsa in tih luihna tel miah loin a chetdan te khan ka thinlung a hneh a nih kha.




A sawi ang tak tak khan min vehthlem hmasa loin ka laka a feelings te kha kan intawntirh phat khan lantir nghal se chu ka haw viau anih loh pawn ka vei viau ta ve ang !




"Kan thleng e" a tih rual chuan ka ngaihtuahna ata harchhuakin ka hawikual nghal ruai. Helai hmun hi min phurh hmasak ber zana Bdi nena min hruaina hmun bawk kha a ni.




Reiloah Bdi te pawh chu an rawn lang zui nghal sap sap. "Nizan khan racing anlo nei a, champion thar anlo awm a niawm e" Bdi chuan a rawn ti nghal thar thar a, min hmu hmel pawh a pu lo, "Eheu ! Dingdite i lokal ve thei animaw? Bawiha partner ah i ṭang nghal thei tak ang chu" Zorema'n alo tih takah chuan LalBdi pawh chuan "E mate, midang hmuhin asin ka lo hmuh che" a rawn tive ta a, ka awih chiah lo.
Zorema thil sawiin ka beng a verh deuh avang chuan "Racing innei dawn em'ni?" tiin Lalrosanga chu ka melh kar a, inthiam lo hmel taka min lo nuih in a lu a bu nghut. "Chutiang tur te chu mi te hrilh hmasak ve tur ania" tiin ka lo melh let ram ram.




Ka thinrim tih hriain ka bulah rawn kal hnaiin ka hnunglam aṭanga min rawn kuah pah chuan "Ka tihpalh...zanin chiah chu ka partner ah i lo ṭang thei ang chu tiraw?" ka beng bulah a rawn ti su su a, chhan pawh chhang duh loin lehlam hawiin ka lo ner khum suk ringawt.




"Eheu ! Zanin chu hei kan senior ten min lo telpui thei dawn a va ang ve !" ti lawng lawng thawm a rawn awm takah chuan kan hawichhuak vat.




Mipa rual pa5 vel hi kan lam panin an lo kal dum dum a, an boss niawm tak a hmasa bera mi chu a sang ṭhain a sar bik vuah mai, zam lo hmel pu taka nui khi sawng chunga min lo en kual lai chuan "Saw mihring saw maw in champion thar chu?" min kuahna phelh thawl pahin Lalrosanga chuan a ti supa, a ṭawngkam aṭang mai pawh chuan a ngaina teh chiam lo tih a hriat hle.




"Aw ni e, nizan khan racing an lo nei leh a niawm e, zanin ah i dah zero leh nghal ang chu le" Zorema chuan a rawn ti sur sur a, an rawn hnaih deuh takah chuan an ngawi zui ṭhap.




"Hmeichhe partner tur in hmu zo meuh lo animaw, kan lo pe ṭhen dawn che u em mi niang" paliana bawkin a rawn tih leh chuan "Khatiang thil tenawm lutuk i tih hnu ah khan engvanga rawn let leh ngam zawk nge i nih a?" Bdi chuan alo ti daih thunga, "Indona leh hmangaihna ah te chuan thiang lo a awm hleinem... kha leplerha awmna apiang ah kha chuan amah tlawm turin min hmuh zel inbeisei tawp ru" paliana chuan ngeiawm fe a nui ruh ruh chungin alo ti duh chauh a, 'Kha leplerha' a tih kha Lalrosanga hi em mawni dawn ni, a thil sawi awmzia chu hrethiam lo zetin ka lo melh tawn sek ringawt.




"Fair taka i che thei dawn anih loh chuan i tel kan remti tawh lo tih hre rawh" titu chu Bdi bawk a ni. Paliana bula ding verther hmel zet pakhat chuan min rawn melh rulhin "Kha chu hmuh hnu ava ang ve...i u nupui kha a ni tlat a ka hriat chu" a rawn ti khut a, "Chutah chuan buaina i nei em'ni?" Zorema'n alo tih zawh rual chuan chu pa bawk chuan ngeiawm zeta nui chung hian "I u kha a thi tawh tak e tiraw ? Nangni ang tan te chuan u te nupui chhawm te chu thil dik lo pawh a ni chuang hleinem" a rawn ti leh zat zat a, Lalrosanga'n ka kut a vawnna chu a hmer na sawt khawp mai.




"Nuthlawi kha i iai ṭhin viau amaw ka lo tia, kawp mai mai atana i tih leh vang nge i u thi tawh hnu dai hnu dai ve hrim hrim i chak vang zawk " paliana'n a tih leh zet chuan ka bula mi chu dan hman anilo, a tek chhuak rang lutuk tlat.
Paliana chu a kawr nghawng ah ṭhamin a hnek nghal siah a, ka chi-ai luatah ka lo au nghal chul a, ka bula mi te lah chuan dan tum hmel an pu miah lo lehnghal.




"Dang ta che u Bd" ka tih pawh chuan "A phu tawk a nih saw, lo awm mai mai rawh" a lo ti duh chauh a, paliana ṭhiante pawh chuan paliana leh Lalrosanga inhlau lo dun taka an inkhawih lai chu ṭhelh chu sawi loh hmuhnawm tih hmel takin an lo thlir ve vung vung.




An hmel ah chuan an thinrimin an ti mai mai tawhlo a ni tih ka hmuh chuan ka hlauthawng lutuk chuan ka en liam ve mai mai thei tawh lo "Duhtawk ru" tiin ka hnaih chilh zui ve nghal a, pawhṭhen tuma tha thawh ka tum chiah chu paliana kuttum dawngin ka hai nghal chhulh a, ka tlu bawkkhup zui nghal thlawrh.




"Dingdite" hlauthawng aw taka tiin rawn zui nghal tuarhin min hnekna ka bek veilam chu na ka tih lutuk avangin ka dawm zui nghal vawng vawng.




"A na em?" tiin Lalrosanga chuan min rawn pawm tho nghal nawlh a, "Lo va kal hran pui ru" tia Zobela min pawm tir mai a tum chu a ban ah lo chelhin "Kal tawh suh !" ka ti tham ṭiaka, ka biangah muttui a rawn sur nghal zung zung bawk. Paliana te awmna lam a melh zuk chuan va hawi vein min hnungchhawn a an inthiarfihlim lai chu ka va hmu thei.




Chutiang buaina tehhrep kan tawh hnu chuan haw mai an tih tawh ka rin laiin racing na a tel chu an la tum hmel viau lehnghala,
Lalrosanga nena kan ṭhu dun lai chu Bdi te pathum chuan kan lam rawn panin an rawn thlen hnu chuan "Engtinnge niang Zautea sawn 'Partner an inthlak te anih ngawt loh chuan Rodingpuia saw fair taka a chet leh ka ring chuang lo e' atia...telh loh ngawt dawnin an zia kan hrechiang hlawm veka, buaina an chawk chhuak duh leh mai dawn sia" Zorema chuan a ti charh charh a, "Matei berkher hi zanin i partner tur alo ni bawk sia, a tih chi dawn em mawni le" Bdi'n a tih leh chuan an thilsawi awmzia chu ka lo hrethiam ruak tawh.




"I partner a ṭan pawh hreh tawh sa nak alaia, khapa partner ah khan ka ṭang dawn hauh lo ania" lo tive ti hlak hlakin Lalrosanga rilru buai meng tal tap chu rum theihtawpin kalo melh ram ram.




Min chhang lem loin ka sam ah chuan a rawn chul thuaka, "Biaka Dingditei kha lo awmpui lawk rawh... lokal ru Zobel" tiin kan piah hla deuh hleka midang ho zik nuaih nuaih na lam chu a pan nul nul.




"Mate a la na em?" ka biang rawn chul paha Bdi'n a tih chuan "Na lutuk" tiin ka lo nui saka, "Over viau suh..." tiin ka biang chu a rawn piai hlawka, ka ṭe zui tuarh. Ka ṭe ri chuan Lalrosanga hla deuh taka kal tawh chu alo hawilet tir rang khawpa, kan lam chu rawn hawi vung vungin a ngaih a ṭha ta aniang a nui in ka hria"Biaka lo duat rawh" rawn ti leh lawng lawngin an hmalam chu a pan leh.




"Hepa hi chu i va han bual â hneh ve chiang tak!" Lalrosanga te kal na lam melh pah vawng vawnga a tih chuan ka lo khi suk. "Mate Rodingpuia partner a ṭan chu i hreh viau ami? Sualin chapo viau mah se hmeichhe laka kut lek chi chu a ni chuang miah lo ania" a tih leh chuan "A ni aniang chu a mi hnek na tuar lo a ka tluk tawp" lawm vak lo a tiin ka tum zui deuh bar.




"Aw kha te chu a tum a ni bik nang...i hrechiang lo mai mai a nihkha, kut a thlak palh che pawh kha a inthiam lo viau ang."A tih leh phei chuan melh no lo tak hi ka ni, nuam a ti ta vak lo aniang a aw thian hmasa kharh kharh in "Ihmaw, a hma te kha chuan Rodingpuia te nen hian kan inkawm ho vek zela, a mipat pui te kut a thlak awl loh lai pawn keini hmeichhia te lakah hi chuan a zaidamin kut chelek zawng takngial pawn min fiam duh ngai hleinem" a thusawi zawh chuan a nui lui saka, a thil sawi chuan a lung a tileng viau nge ni kan hmalam chu thlirin a ngawi zui vang vang.




A thil sawi chu mak ka ti mai pawh anilo, ka awih lo hial zawk. "Rodingpuia te nen hian in inkawm ho ṭhin amaw?" tia ka zawhna chu "Aw ho ṭhin e. Kan Lalrosanga nen phei hi chuan an in best hman hial alawm, a tuemaw zawk zawk kan hmuh tawh hi chuan pakhat zawk awmna hi a hla ngailo...Bawiha'n Champhai a rawn kal khat deuh hi chuan Rodingpuia ngai lutuk hian an inlamah hian amah awm miah silo hian a leng lut tlut tlut zel, nu Nemtei pawh hian a ngaina thei lutuk...nutei pawn a hria ang Lalrosanga te in a kal pah hian a rawn chuang lut ve fo a" a tih leh zet phei chuan mak tih vangin ka meng pawng zawrh zawrh lo chauh a ni.




"Chutiang khawpa in ngaia in ngaina si chu tinge tuna hmelma ang maia in en ta nge an nih?...nilo nangni pawn inhuat hmel viau sia, enge awmzia?" chutiang taka inngaina ṭhin pahnih ni si tuna hmelma ang maia an in en tak na chhan ah hian thawnthu ngaihnawm tak a inphum ru ngeiin ka ring, ka hre chak viau bawk a ni.




"Remsangpuia rilru phakar leh ṭawngtheih luat lutuk vang mawle!" a tih hmuk chuan tunge Remsangpuia chu tih ka lo zawt vat , "Bawiha u nupui i ni tih rawn hre chat tu hmelchhe cher ban zet kha" a tih chuan kha pa verther hmel zet ka tih kha a ni tih ka hrethiam nghal "Sawi zel ta che" dawhthei vak lo taka ka lo tih chuan nui hukin "I hriat duh chin min zawt la ka sawi vek thiam lo" a ti mauh maia, thin a tihrim rual rualin nuih zat lamah kal telin ka nui ve ta hawk hawk.




"Remsangpuia'n Rodingpuia leh Lalrosanga chu a inhmelma tir tihna mi chu lai te chu sawifiah la a tawk" ka tih tak ṭhatah chuan nui puh puh in a aw a thian hmasa leh te te.








(End of chapter - 17)