- PicsArt_02-03-07.07.43(2).jpg (28.68 KiB) Viewed 13697 times
Chapter 24
By
Abbra Reo Ririni Khiangte(Pitartei)
Ka beng zawn a Zothana lungphu ri dup dup chu ka ngaithla a, A ban tha ngah zet chuan min kuah bet tlat bawk, Ka chhipah a khabe a rawn nghat a, A kâ ațang a rawn thawchhuak zui ham ham a! Jayden lah khawdur khup mai ni (sun) engin a rawn chhun ven ang hãwk maiin a hmel a eng ta sawt sawt a, Thlawhna ri vung vung chuan a taksa peng pakhat ang maia ka behna lungphu ri chu a hliah khuh zo map lo bawk! Ka kuah let ve mai lohnan ka in thunun tang tang a, A ang chhunga awm hahdam thlak zia ka hriat thar lehna vang ngawt pawh chuan ka țah a chhuak țun thei!
Heng a ban tha chak zet a duat tak a min kuah hnuhnun ber zana thil thleng te kha an rawn thar leh ni maiin ka hria!
Zico an hotela min khawih zan kha Zothana nena inhnaih tak a kan awm hnuhnun ber ani a, a ni a chhut chuan ni tam a la rallo a, mahse ka ngaihdan ah erawh kum engemaw zat ral ta ang mai hial an ni thung!
Vansang lam ah kan thlawk vuâi vuâi reng a.
Zico khan engtinnge min rawn hmuh? Chuan Zothana hi rawn thleng hman lo ta se kan nufa hi engtinnge kan awmzui zel ang, thawk la in mit ka chhing zui vang vang a, Zico hmel chiang zet in ka hmu zawm zat a! Ka taksa chhunglam hi vawt in a rawn țham nghal sung sung mai.
"Hahdam tawh rawh le.. " Ka beng bula rawn phun sup pah in a hmuiin ka beng chu a rawn nawr leh vang vang a, ni e, Zothana bulah kan awm tawh a, min rawn tibuai pha tawh lo, helipad pan a hlauhthawnna nen a ka tlan lai te kha mitthla ah a rawn lang zuai zuai a, ka nunah hian thleng nawn leh turin ka duh tawh lo, min man let hman phei se chuan rawva takin ka chungah a che leh duh ngei ang!
Zothana'n ka lu ah a hmui a rawn nawr leh tak vang vang ah chuan chil ka lem dak a, ka thawk rang lutuk pawh an reh ve tual tual bawk.
Vansang tak aţang chuan leilam chu ka thlir thla a, Engtinnge Zothana hian min rawn hmuh theih, chutiang bawkin Zico kha engtinnge a tih? Ka nuna ka mamawh ber laiin a rawn lang nghal vat ţhin a! Thlawhna(helicopter) lian ve ang reng tak chhung ah chuan ka hawi kual thuak a, pilot leh midang pakhat chiah mihran an awm, ka fapa muhil sék sêk mai pawm hlu hlu chung a min lo en reng tu ka hmuh rual chuan ka sa pup mai hian ka hria, a ngawi ngul a, a hmel landan ațang a ngaihtuahna a thil awm pakhatmah a hriat theih loh.
Lawmthu hrilh mawlh mawlh tur ka nih laiin sawi tur ber ka hre bawk silo a, a mit ko a sen phei țân a, a shirt hak lai a thler tel hnuang bawk.
"Hahdam rawh, kan thleng țep!" Ka dar a rawn vawn pah in ka fapa beilohna lam, a awm ah chuan min kuah bet zui hmak a! A taksa lum vung vung mai vang chuan kei hmeichhe der dep ve tak hi ka hahdam suai suai thei.
Thawk a lak zawng in kan nufa chuan kan che ve ãk ãk a, a ban hrawl zet ka dar a a rawn kuah liamna chu ka melh zawk a, kut hnathawk chunga ka thil awh zawng leina tur ngaihtuah a a inhlawh țawk țawk zel te kha ka ngaihtuah let a, a hnathawhna vang a a kut thap hrup thleng khan ka tan hna a thawk ţhin a, vawikhatte pawh a sawisel chhin ngailo!
"Bawihi.. " Dimte in a khaberuh kualin ka chhip a rawn nawr rual chuan ka che ve țalh țalh a, thlawhna engine ri vung vung ri pawh alo reh duk tawh.
"Kan thleng tawh e. " ka hawi chhuah rual chuan a rawn ti sup bawk, a hmui hmulin a hmui a khuh tel pha a, a mitmeng ațang chuan duatna aia thuk ka hmu bawk.
Chuang ve pakhat pawh kha a lo chhuk tawh a, Jayden erawh a mu tui ngang thung!
Thlawhna khan sang ve angreng tak ațanga ka țum thlak tharh rual chuan ka khupruh hi a rawn na hit zawk a, Zothana ka fapa pawm chunga inthazo zet a rawn chhuk thla ve chu inthunun tum zet hian ka lo melh ve ran bawk.
"Haw ang.. " ti sup pahin min kal pel a, helipad ah chuan thlawhna dang pawh a awm nual, chung thlawhna ding zing a Zothana pen pawk pawk chu ka melh reng a, ka ngaihtuahna a thil rawn awm hi a hun loh zia ka hriat rualin Army rothap zet mai, a ram tana feh chhuak hlim rawn haw hi ka tehkhin tlat pek anih chu! Ka fapa chu rihna neilo ang maiin a pen pui pawk pawk a, a sam hnim ve ang reng tak chu thliin a chhem che ve dar dar bawk. Mahse a inah khan ka haw thei tawh reng reng lo.
"Kan nufa in airport kan pan nghal dawn.." a hnung ațang ka tih rual chuan a ding chawt a! "Goa ah hna ka zawng dawn!" A rawn hawi let lo a, thawk a la in ka hria.
"Chawlh hmang in kan kal ho thei anih chu!" Awlsam zet a ti hluk pahin Helipad gate lam pan chuan a pen zui ta pawk pawk a.
A lo kal ve ka duh reng reng lo! Chawlh hmang satliah a kal tur pawh ka nilo a, awmhlen tawh tura kal tum asin ka nih! Ka theih ang a chak in ka umzui ve vat a, a pen khat lek pawh tlan chung pawhin ka pen hnih zu han tling a mawle.. Cotton dum hlap a ha a, a bawp sei thlurh mai chuan min nghah tum miah lo in a pen lui ve zel mai bawk si!
"Zothan.. "
"Taxi ah khan lut rawh.."
"I lo kal ve thei hleinem." Ka ti a, kan bul mai a taxi hman mai theih driver chu a be zawm daih a! Min ngaipawimawh lo lutuk chuan ka thin a tirim hlur thei!
Driver a țhut luh rual chuan a rawn inher vut a, rum mangkhéng hian ka lo melh nghek bawk.
"Lut rawh.. " a aw ri a zawi, mahse a rum takzet!
"Aih, Jayden kha min pe rawh."
"Lut rawh."
"Ka sawi chu i hria em? Jayden kha min pe rawh.." ka ti hlar a! A ner zui nawk chu ka melh zui nghek bawk.
"Ka tello in khawiah mah in kal tawh dawn lo, Goa a kal i duh anih pawn ka rual zelin in kal ang, i duh loh leh inah kan haw tlang thei bawk." Ti hmuk pahin ka fapa a pawm behlohna lam chuan Taxi hnunglam chu a pawt hawng zat a!
"Lut rawh.." a rûm țha ngang mai!
Kut kuangkuah in ka ding tlat a, chawlh hmang mai mai turin ka kal dawn lo a, chuan a rawn tel ve zel hi a țul hlawl lo, Zico lak ațanga min rawn chhan vang ngawt khan zanrei a a hmeichhe awmpui te kha ka theihnghilh tihna a ni ringawt lo!
"Bawihi, naupangchhia viau zel lo teh.. In nufa hian min mamawh a sin.." a rawn ti a, "Venhim che u ka duh, ka venhim phakloh a in awm hran ka phal i ring em? A teuh lo!" A ti zui leh hluk a, a taksa a lian in a hliam neih te nen zawng zawng chuan a lang hlauhawm ta vek mai!
"Ka thu i hnial hma hian ngaihtuah nawn ţhin rawh, tunah pawh ka ho in kan kal ang, ka hmuh theih loh a in awm ka rem ti reng reng lo!" Chhum zet hian a ti leh hmuk a, a thusawi chuan engtinemaw tak hian min țham bawk!
"Lut rawh, inhnial buai reng lo teh ang!" A kutphah hrawl zet a lek leh zuau rual chuan min en ve ta ngur a, engtinnge a hmeichhe lo awmpuinu bulah khan a insawifiah ang tih ka ngaihtuah tel daih bawk! 'Hmeichhia' huh, zanlai a a call lo chhangtu kha!
"Ka fapa kha min pe la, let rawh." Ti hlar pah in a taksa a ka fapa bet thlawp chu ka ban zui zat a, min hnial lo a, Jayden ka pawm rual chuan a lu ah ka fawp vang vang a, nichin kan boruak vel vang khan a chau ve hle aniang, a muhil tuiin a hahdam hmel tawh tak zet!
Taxi ah chuan ka țhu lut zui hmak a, kawngkhar ka pawhphui rual chuan front seat lam ah a rawn țhu lut ve nulh anih chu!
"Lengpui airport lam ah aw." Driver en zauh pah chuan a ti sup a.
"Ka sawi kha i hrelo a mi.....?"
"Jayden kha a harh ang, ri vak rih suh!" A rawn hawi let vut a, a palian in a hrawl ropui si, taxi body hniam tak chhunga a awm ve run chuan boruak a ti uap vek!
"Airport!" Ti leh sup pahin hma lam a en ta ngur a, Driver in engine a tih nun rual te chuan kal chhuah leh daih mai te hi ka duh rum rum mai!
Kan tlan chhung zawngin kan inbe tawh lo, lawmna chang hrelo hmuh pawn min hmu mahse pawi tihna ka nei lo, ka mamawh em em lai khan ka call chhang ni ngat se chuan!! Engthil tehhrep nge maw ka ngaihtuah le.
Bungrua engmah kan nei lo a, ticket online hmang a kalo book lawk vek tawh vang in awlsam takin min lo pe chhuak vat a, Zothana lah in awlsam zet in ticket a nei nghal der bawk! Engang pawhin hnial lui mahila a rawn kal ve dawn tho tih a chiang reng tawh.
" Keiman ka lo pawm ang." Jayden la muhil mek chu a rawn ban vut a, ka inrin ve hma in min laksak ta daih a, "Hei keng la.." ti leh sup pahin a ticket chu min pe a, ka'n melh deuh rawm phawt a chu ka lungawilo chu a haider lui ve tlat!
A kut ațang ticket ka phihthlak sak rualin țhutna lam ka pansan ta nal nal a, tuna kan buaina hi chu dahțha rihin a lakah ka lungawi lohna ka lantir tluang lui ve zel bawk.
" I duh hi chuan i luhlul ve mawle.?" Ti sup pahin ka bulah chuan a rawn țhu ve vat a, ka melh zawk a, chimawm zet a alo nui suk ka hmuh rual chuan hmalam ka melh leh daih a!
" Goa ah chuan kan cham rei dawn lo ania.."
"Ka thu thu!"
"Umm , kei leh Jayden chu ni thum hnuah kan haw ang." A tih sup rual chuan ka en vat a, a mitmeng sexy zet ah chuan min cho lutuk tih a lang reng.
"I thu lo. " ka ti hmuk a, a nui ri zui ta hawk a, kei a pawh chu engvanga naupangchhia deuh a ri leh vak ţhin nge maw ka nih le.! Ka en leh chuan nuihza insum tih hriat zet hian min lo melh ve reng a, 'tunge chak zawk chu kan hria ang chu!' Tih hi a mitmeng ah chuan a lang tel a, ka chak tir dawn reng reng lo!
Zan dar 9 pelh ah Clark International Airport ah kan țum a, hman deuh a Zico nen chawlh hmang a kan zin tawh vang in thil kalphung chu ka hre rei ruai a, amaherawhchu ka bula mipa hrawlpui hian ka buaipui ngailo in engkim a buaipui vek a, Jayden pawh a rawn harh tawh a, a khek chul hi a ni ber a!
"Deltin Suites." Airport taxi Driver bulah chuan a ti sup a! Driver lah chuan bungrua zawng ve ang hrim hian kan bul vel chu a rawn en thuak a!
"No luggage!" Zothana bawk in a ti leh sup a, țawngtheilo ang maiin an bulah chuan ka ngawi ran thung.
Taxi a ka țhut luh rualin Jayden pawm chungin a rawn ţhu lut ve a, Jayden lah chuan ka awm ve tih pawh hre tawhlo in min ngaihsak tawh der bawk silo.
"Apa, Long time kha ka bulah i awm lo a." A ti ve a, Zothana malchungah a țhu a, zan a Goa khawpui eng pe tuar mai chu tukverh ațang chuan ka en reng a, Jaydena zawhna vang chuan ka lo ip chawih bawk.
" Apa kha i lo ngai em"
"Aw, Mamma bulah pawh apa bulah kal ang ka ti a, mamma khan min lo listen duh lo reng reng."a ti ve bâi bâi a, min han puh vel chu le.
"Jayden." Ka ti sep a, a rawn hawi ve nghal vat reuh bawk.
"Apa call ang ka tih pawn 'a buai' i ti tlat nih kha " Jayden tho! Zothana call min dil laia ka hauh kha hrechhuak ve ang hrim in a tum zui ve pak pâk a!
" Mamma in hla deuh ah kal ang a tih khan Apa hrilh zel tur ka ti in ka hria." Zothana zawk in Jayden 'on' belh pah a a tih ve leh takah chuan rum zet hian ka melh a, ka fapa nen an ţang dun tlat zel hi ka hrethiam lo.
"Mum in a phallo alawm, Apa mummy thluak ah khan baby a awm tiraw?" Zothana malchung ah chuan a lawn kai that that a, A thusawi vang chuan ka thinrim hlur hi a ni tawp mai.
"Awm țhin e, Baby girl ang kha a awm alawm." Ka haw ngei dawn tih a hre lawk ani khawp ang; Jayden kuah beh hlun pah chuan a hawi sawn zui ta vut a! "Baby kawlh zet pawh."
Ka hriat loh ringin a phun zui sup a, ka va han ngei hluah hluah tak em aw.
Jayden lah chu a ngawi zui ta hle hle a, seat kil lamah chuan ka tawlh thla zui daih a, nuih insum zet a min rawn en leh chu han chum zui țawlh tak tak mai hi ka duh hial bawk.
Light a hmet thim khap a, a shower zawhna a la rei lo bawk a, a sam chu a la hnawm chhap bawk, Bathrobe var lianpui ha chung chuan kan nufa mutna lam khum chu a rawn pan a, hotel ah kan lut fel tawh a, Jayden pawh ka bual zawh vek hnuah a muhil zui nghal der mai!
Zothana'n engkim a buaipui vek a, he hotel hi a thlen vawikhatna a ni tawh lo tih hriat zet in hnathawktu ten an lo zah em em a, hotel thuamhnaw bik ka hak tur te thleng in kan room ah an rawn dah vek a, bungrua engmah keng lo in ka kal ve tawp a, Zothana rawn tel ve lo se kan talbuai dan tur lah ka hrechiang kher bawk! Mahse hrelo ang hmak leh hmeichhe lawmna chang hrelo ang maiin ka awm lui tlat thung.
"A muhil tawh ami?" A rawn ti sup a.Amah a palian in thuamhnaw dang a inbel miah lo tih hriat zetin bathrobe suih phuiloh a ațang chuan a awmbawr tihrawl a lang raih a! Ka thawk a sak ve vek bawk.
"A muhil tawh..!" Ka ti sep a, kan nufa bulah hian a rawn mut ve mai ka hlau a, mahse khum dang a awm der mai bawk silo, couch ah hian a mu em ang chu ka ti rilru mawlh mawlh a.
"Nang pawh mu hahdam tawh rawh." Khum sir a a rawn din ve rual chuan a ti leh sup a. Chhang lo in thawk ka la hak a, ka inlet thawk a, Jayden kuah chung chuan mit ka chhing zui nghal daih bawk. Zothana nui ri suk ka hre zawm leh ta hram bawk.
"Ka sawi kha i hria em? Ni thum chiah kan cham dawn." A rawn ti a, a ban in ka hnunglam khum chu a rawn nem zui tih hriat zet in a hniam zui âwk bawk! Mahse chhan ka tum lo hrim hrim, naktuk ah internet ațanga ka enlawk vek tawh hmunah ka kal a nga, ka be chiang bawk ang.
"I la muhil lo tih ka hria a nia." Ka darah a rawn hmer salh rual chuan vin hrep mai in peihsa at hian ka inher ve vat a, a lo la nui suk zui anih chu!
"Ka duh chen chen ka awm dawn ka tih tawh reng kha.." zawi sep vin tak si hian ka ti hlak a, khum ah chuan a rawn țhu hniam ve vut a, ka inher leh tur chu ka darah a rawn man a, Jayden nen kan inkarah chuan a ban pakhat in a rawn in nem zui nghal run bawk.
"Zanin hi inngaihtuah nan i hmang thei ang." Rawn kun hniam pahin chiang zet in ka mit ah tak a rawn en a! " He khawpui ah hian in nufa chiah in ka kalsan che u i ring anih chuan chu i ngaihdan chu thlak ang che " ka hmai bul chet ah a rawn phun leh sup a. Ka taksa chu a țang nghal vek thei!
"Naktuk ah pawh ka chhanna hi a la ngai reng ang." Ka ti sep a; a lian bawk si, ka taksa chu a ban inkarah a awm a, kan hmai insi lo chiah in a rawn kun hniam tlat bawk si.