My Destiny 19

[Lin kholhring88]

Nizan lama a mut har vang chuan zingah pawh chuan a harh lawk lova. Chawlh te ani bawk nen a rilru a hahdam ve deuh pah bawk avang chu ani ve pakhat bawk a. Mahse dar sawm ah pawh ala rawn thawh tak lovah chuan Robb a chu a ngaih a tha ta hauh lova, Julie i room kawngka bula a din vang2 hnu chuan a kik ta nge2 a.

Thophang aw taka lo lut rawh tihri a hriat rual2 chuan room kawngka chu a hawng nghal vat a. Julie i chu khumah chuan alo la inzial hlawm nasa mai a, menpawh hi alo la meng mang lova.

"Ila zia vak nange Julie? Doctor hi ko mai ila a tha in ka hria...." a tih takah chuan Julie i chu rang mangkheng hian a inperh thova.

"Doctor maw?? A ngai hauh lo Robb! Ka tha alawm, chawlh anih vang ania ka mut rei mai2," a ti ta chul a. Doctor a koh vaih chuan lo rai ta se a sawi ngei dawn si a, chu2 Robb a hriat atana a thil duhloh ber alo ni bawk nen, a theihtawp chuan a rilru chu hneh ngei a tum ta a.

"Mahse nidangah pawh chawlh te chu kan nei ziah alawm. I tha lo tawp anih kha, Julie," a hmela a ngaihtuahzia langchhuak chung chuan a ti leh a.

"Enteh, ka tha ka tih chu...mahse i awihlo anih chuan bazaar a kal ka ngaia chumi pah chuan ka in entir mai ang, aw....," thlem titih hian a ti ta a.

A ngawih vung2 hnu chuan," I tih tlat chuan le, mahse i in entir ngei tih ka hre duh ang," ala ti hram a.

"Awle...ka in entir ngei ani tih i hriat theihnan thla ka lo la dawn nia damdawi ina ka kal hunah aw...," tiin a tiam ta a.

"Awle2.... Anih chuan Mrs. Page i breakfast ka rawn dah tir ang e...," a ti ta a.

Robb an a thusawi a awih avang chuan a thawveng huai a," A ngailo, ka inti fai anga ka lo chhuk dawn nia. I ei tawh em nang?" alo ti vat a.

"Ei lo, ka lo nghak deuh reuh che a,"

"Awle...minute nga chiah hun min pe la aw...," tih leh thawh chu a rual a.

"Awle...varanda ah ka lo awm ange," tiin Robb a pawh chu room atang chuan a kalchhuak ve ta nghal a.

Rang takin bathroom ah chuan a lut a, a inbual fai zung2 a, mahse a tha chu a za viau lo ani tih chu a inhre ru kar a. Mahse chutiang ngaihtuah kual thei ani lo, Robb a ngaih a thatloh leh hma ngei a he in hi a chhuahsan loh chuan doctor chu a ko duh ngei dawn si a, chuvangin a hmanhmawh theihtawp chuan a che ta zung2 a. Awmhmun kawrfual pan angreng tak, hmuh hahdam thlak deuh hi a ha a, chappal hniam te bunin a theih anga rang chuan inhnuai lam chu a pan thla ta a. Varanda ah chuan Robb a chu alo thu mu vang2 a, a bula thuthmun rem pah chuan alo thleng tawh tih hriattir nan chuan a aw chu an thian kharh a.

Zawimuang a thu tha pah chuan,"Hetah hian ei mai ila, a nuam riau mai hei," Robb a chuan a ti a.

"A tha alawm, Mrs. Page i ka va hrilh ange," tiin choka lamah chuan a kal ta nghal a. Mrs. Page i chu alo buai hmel hle a, Julie i a hmuh chuan alo nui sang a," Iva that tawh hmel ve kha Miss Rothschild?" alo ti var a.

"Aw...ka tha tawh lutuk. Robb an varanda a breakfast ei a ti deuh va, ka lo pui ang che khawi....," tiin tray chu a ban nghal a.

"Mai2 a, angai hauh lo. Ka ti thei alawm, bakah ka hna ania tin nuam ka ti bawk," alo ti deuh hmak a.

"Mahse puihve che ka chak tlat sia," tiin Julie i chuan a luhlul a chhuahve ta a.

Ngawi reng chuan an in melh deuh khang2 a, a hnu ah chuan Mrs. Page i chu alo nui ta hawk2 a," Awle...i duh te chuan min pui dawn nia," tiin Julie i try kenlai chu a laksak a, coffee leh thildang breakfast tura a siam te chu a dah ta a.

"Ka va chawi chhuak ange, thei ho kha lo keng mai rawh aw," tiin Julie i chuan a kalsan ta a.

Robb a awmna bula dawhkan ah chuan a thil ken chu a chhawp nghal mawlh2 a, Mrs. Page i pawh chu lo thleng ve in a thei ken tui hmel tak2 ho chu Julie i thil chhawpna bulah chuan alo chhawp ve nghal zung2 bawk a.

"Mamawh in neih chuan min lo au mai dawn nia," tiin a kalsan nghal thuai a.

Robb a chuan ngawi reng chuan Julie i te chetla chu alo thlir reng a, Mrs. Page i kal tak hnu chuan mak tih hmel taka Julie i en pah chuan," Khatiang zawng2 i tih kha a phalsak che a maw?" a ti ta hauva.

"Engvang mahin a phal lo, mahse ka ti lui anih kha," nui sen2 pah chuan a ti ve mai a.

"Mahse awm hahdam mai2 tur ini asin," alo ti hul hak a.

"Ka tha ka tih tawh kha Robb, chuan awm mai2 ai chuan maw....tihtur neih te hi a nuam zawk fo ania," a ti dam diai a.

"Mahse khatiang hna thawk tur khan he inah hian ka hruai hauh lo che ania," lungawi chiahlo tih hriat tak hian alo la tifan a.

"Awle....anih chuan ei phawt ang aw...," chhang buai peih tawhlo tih hriat tak hian ati ta daih a.

Ngawi reng chuan an breakfast chu an eidun ta mawlh2 a, ei thuai2 a a rang thei ang bera chhuah vat2 chu Julie i duhber ani tawh rih ani. A chhan chu Robb a hian a nuamsam lo ani tih a hriat thawi leh vaih chuan a hriat hauh lovin doctor chu alo ko duh mai ang tih a hlau zek2 tawh ani.

Breakfast an ei zawh chuan hahdam taka thu pah chuan thei chu an eidun ta a, Julie i chuan a hma a a ei duh ngai reng2 loh blue berry chu tui ti taka a ei tak mial2 chuan a phu deuh zawk a. Awl Lalpa! He thil hi ka duh ngai hauh lo asin, engvanga tui ti ta em2 nge ka nih le, tih chu a rilru chuan a ngaihtuah rauh2 lo thei lova. A hmel buai deuh hlek lah chu Robb a chuan alo thlir vung2 ani tih chu a hmu thuai bawk a. Mangang taka hawikual pah chuan chhuanlam siamtur chu a ngaihtuah kual ta ruai a.

"Englo ania Robb, ka han insiam tan tawh ange...ka lo haw tlai deuh maithei bawk ania," a ti ta ringawt a.

"Nia ka thlah dawn che nia," a tih takah chuan mangang tak hian Robb a chu ava en a,"A ngai lo reng2, ka kal thei alawm," alo ti vat a.

"Kal la han insiam mai rawh! Ka thlah dawn che ka tih chu...," alo tih tak hmak si ah chuan sawileh tur chu Julie i tan chuan a vang hle ani.

"Awle...," tiin phur lem lo tak hian a room lam pan chuan a kal ta hna2 a. Engtin nge a tih tak ang? Damdawiin ah chuan awm ve tlat ta sela? Tupawh in entir sela a rai anih chuan an hre dawn chiangsa si a, Robb a chu hnar dantur ngawt a ngaihtuah char2 angai dawn ani. Bazaar ah inthlah tir hmasa ta sela a tha zawk angem tih te chu a ngaihtuah kual ruai a. Rei a tih hlauvin a insiam ta zung2 a, jeans kekawr pawlduk a pian tilang chiang tur tight tha angreng tak hi a ha a, sneaker var a bun a, tshirt mawl tawp mahse amah tilang fresh em2 mai, a var hi a ha leh bawk a. Lukhum leh sun glass a la a inhnuai lam pan chuan a chhuk thla leh nghal a. Make pawh a hmang lem lo, a hmang peih lo rilru buai lai ani nen!

Robb a chu varanda ah chuan insiam sa hian alo awm tawh a, kekawr dum, sneaker dum leh tshirt ho angreng tak makse nalh taka tial thek2 hi alo ha a, alang pa in a fresh ngawih2 hian Julie i chuan a hria a. Julie i pen thawm a hriat chuan alo hawi a,"I hman chuan kal ila?" alo ti thuai a.

Damdawi in kawt an thlen chuan rang tak hian Julie i chu a chhuk a," Ka lawm e, ka lo haw tlai pawn min lo ngaihtuah suh ang che u....," tiin Robb an engmah a sawileh hma chuan damdawiin lam pan chuan a kal ta nal2 a. Zuitu pen thawm a awm em tih chu a ngaichang deuh reng bawk a, mahse a awm lova a hriat hnu chuan a ding a, Robb a motor chu ala awm em tih chu tukverh lo inhawng atang chuan a bih ta dak2 a. Robb a motor chu a hmuh ta hauh lova, a ding ngil a, thawk a la ta hawk a. Reception ah chuan a doctor mamawh ang chu a sawia, a kalna tur an hrilh a, midang ho thutna ah chuan a luh huntur nghakin a thuve ta ran a.

Banga poster te leh eng2 emaw an tar te chu a enkual a, a rilru chu a kalthui hle a ni. A hun alo thlen chuan a zam takzet a, a chhan chu a thil hriat tur chuan a hmalam hun thimzia a hriattir dawn a, tin Robb Marshall a lak atangin hla takah a kaltir dawn bawk ani tih chu a hre ran si a. Alo railo hlauh anih chuan.....chu2 a awmdan danglam tak atang chuan a beisei ngam hauh lo a ni. Doctor chuan alo en uluk hle a, zun test a neihtir bawk a. Reilote hnu ah chuan a hriat hlauh ber chu thudik ani tih doctor chuan a hrilh ta nge2 a.

"Miss Rothschild, nau i keng mek ani, thla khat leh a chanve ani tawh e....," doctor chuan lawmpui hmeltak hian ala tizui a.

Sawitur mai a hre lova, hmel buai naka a awm takah chuan, doctor bawk chuan," I pasal in naupai ala remti chiah lo ami?" khawngaih hmeltak chuan a ti leh a.

"Nia, a rem ala ti chiahlo ani....," a ti ve ta ringawt a. A nihna a sawi chuan chu doctor nu tuna a hmela khawngaihna lang chunga be tu nu chuan chutiang chuan a biak a ring hauh lo ani.

"Engpawh nise, inbe phawt ula, a duhlo a paih ati talh anih chuan a len lutuk hma a paih vat angai ang. Anih loh chuan nangma tan pawh a hlauhawm thei dawn ania,"a ti leh siam2 a.

A paih dawn hauh lo tih a inhriat chian em avang chuan," paih dawn lo ta ila, keimah leh naute hian kan mamawh tur te, kan in enkawl dantur te leh thildang pawh a awm anih chuan min hrilh ta che, doctor?" a ti ta nge2 a.

"Tehreng mai," tiin Julie i naupai chu a fa hmasa ber tur ani tih hriatthiam pui tak chuan doctor chuan a in enkawl dantur te, naute tana tha tur ei leh in in lama tha tur te chu a hrilh ta zel a. Damdawi lam a eitur ang te pawh chu lehkha ah chuan a ziah sak nghal thlap bawk a.

"Ka lawm lutuk e, doctor,"

"I pai tlang ngei theih nan duhsakna ka hlan a che," tiin doctor chuan a thlah ve ta a.

Doctor room atanga a chhuak chu rilru mumal chiah pawh a neilo hi ani ber a. A mit te chu a phe vek hian a hria a, zawimuang hian pawnlam pan chuan a kal zel a, a bul vela kal mihring te chu an hmel pawh hi a hmu mumal lo ani ber mai. Pawn a thlen chuan nisa in arawn chhun takah chuan a harh deuh hlek chuan a hria a, mahse enge a tih anga engtinnge a awm zel ang tih chu a ngaihtuah fel alo ngai ta tih chu a rilru ah chuan arawn lang nawn awn2 a. Damdawiin bula thutna thingkung hlim hnuaia an siamah chuan a thu thla hnawk a, a in kuangkuah than a, a melh ngai chu a melh ngawt2 a. Thil ngaihtuah fel chu sawilo a thluak ah chuan engkim chu a kal kual nuaih2 niber hian a hre zawk a.

"Hmmm.....hetah hian ani maw ilo awm daih a?" Robb an arawn tiri a hriat chuan a phu chiang kher mai. Zawimuang chuan a hawi chhova, a mitmeng ah chuan Robb a ahmu chu a awihlo hle ani tih pawh alang chiang hle a.

"Ih....i....haw...daih tawh emaw ka tia. Ilo la awm reng ani maw?" tiin a rilru a awm chu a sawichhuak ta nghal a.

"I kal pah khan ka thilsawi kha i hre turah ka lo ngaia, ilo hrelo ani maw? Pawnah hian ka lo nghak ang che ka tih kha!" ala ti ang tak deuh2 chu Julie i chuan mak a ti zual hle a. A kalsan hnu khan ava en leh kha ania, a motor pawh a awm tawh miahlo kha ania, mahse hmundang ah park turin a tlanchhuak hman tawh ani ngei ang chu.

"Oh!! Min hawsan tur khan ka ti si che a?" a ti zawi ta sap a.

"Ka P. A damlo in entir turin ka hruaia, ka hawsan leh daih anga maw? I sawi hmang chuan ka ngaihsak ngai hauh lo che anih hmel ve?" lungawi chiah lo hian Robb a chuan a ti nang2 a.

"Chutiang pawn ka sawiloh chu! Tihtur dangte i neih ka hlau alawm,"tiin a theihtawp a nem chuan Julie i chu a tawng hram2 a. A nihna takah chuan tunah hi chuan amah chauhva awm a mamawh ber lai ani. Robb a hian engchen nge a hriat ang? Mahse a hmel atang chuan engmah a hrelo ani tih chu Julie i chuan a hrethiam nghal mai a. A theihtawp chuan a in bengdai a, rilru fim tak put hram2 a tum bawk a, Robb a chuan a ringhlel tur ani hauh lo tiin a infuih malh2 pah bawk a.

"Awle, anih chuan lokal rawh le. Lunch ei phawt ang, chuan i bazaar na turah chuan ka hruai dawn che nia," te chu ala ti ang tak deuh2 va.

Julie i chu a mangang takzet zet tawh hi ani ber a, Robb a chu hlat a tum hle laiin a bula nileng lenga awm te chu alo la tum zui ani si a! Hnial mahsela a thu chu a duh ropui si a, a kai lui leh duh mai dawn tih a hriat avang chuan thuawih tak chuan," Awle...ei ila ani mai lawm," hmel hlim put luih tum hram2 chung chuan a ti ve ta a.

Restaurant changkang takah chuan Robb a chuan a hruai a, midang pawh an lo awm nual a. A kil deuhva tukverh bulah chuan an thuttir avang chuan Julie i chu a lawm rilru hle a. A chhan chu boruak tam tak hip tur a mamawh tlat ani, a pum chhunga naute pawhin! A tih than thin loh ang takin vawiin lunch an ei tur chu Julie i chuan ama duh chu a thlang ve ta tlat a, a chhan chu a ei theih loh tur awm ang chu Robb an a lam fuh vaih chuan an pahnih chuan an mualpho dawn ani tih a hriat kar vang a ni. Thildang ti leh tur anni bawk a lunch an ei chhung chuan an tawng tam lem lo khawp a.

"Awle, doctor chuan enge alo sawi min han hrilh tawh teh le?" waiter in an lunch tur order a lak zawh hnu chuan Robb a chuan a ti ta a.

"Ka tha lutuk ati, mahse ka pumpui hi alo thalo trep2 a in enkawl chu angai deuh dawn ani tiin min hrilh a,"

"A lawmawm lamah ngai ang aw...i dam leh thuai theihnan damdawi pawh keiman ka tum vek ang," alo ti hmiah a.

A damdawi tur chu a leisak tur ani hauh lo tih chu Julie i ngaihdan ani a, " A ngawi lo, ka sawi awmzia chu ka lei mai ang," a ti bah deuh nak a.

"Enge thil tihsak ka tum ve ang2 che hi i duhloh zel a?" a ti ta ngei a.

"I ngai kawi anih chu, damdawi vak pawh min chawh lo. Ei ti tha deuh turin leh mawm lam eitam lo turin min ti mai chauh alawm," alo ti ve tang2 a. Chutia an inhnial deuh bap2 lai chuan an lunch pawh chu an ei duhtawk ve2 ta a. Robb an bill vel a pek hnu chuan Bazaar lamah chuan an in khalh chhuak leh ta a. A nihna takah chuan Julie i chuan leitur a nei hran hauh lo, haw tlai chhuanlam atan leh a inngaihtuah fim hnua haw a duh vanga bazaar ngai anga insawi mai kha ania. Mahse chutia Robb an a zui tak tlat ah chuan engemaw tal lei lova haw chu a theih dawn ta hauhlo tih a hrethiam mai a, a ruk tak chuan a pawisa khawl tlemte ala mamawh em2 tur an hmang phai tur chu a ui ngawih2 a ni.

Mall velah chuan an kal kual tan ta a, mahse a to hlawm em avang chuan a lei ngamlo deuh zel a, a tawpah chuan kawr pakhat ama ta tura an design niawm tak hi a lei ve ta a, chupawh alo theih tawhloh vang ani deuh ber a. In an thlen chuan khua a thim deuu thuak tawh a.

Inchhung an lut chiah chu Robb a chuan," lo nghak lawk teh aw, thil ka pek theihngilh daih che," tiin motor a dahna lamah chuan a let leh ta a. Enge a nih ang tih chu Julie i chuan ngaihtuah ngaihna pawh a hrelo hrim2 a. Robb a alo luh leh chuan thil hi arawn khaibawr ta luk mai a.

"Khang kha enge ni a?" Julie i chuan alo ti chiam a.

"I ta tur an nih kha," nui vur2 pah hian alo ti mai a.

"Mahse heng zozai hi enge an nih a?" mangang tak chuan alo ti ruai thung a.

"I room ah i hawng dawn nia, chuan enge an nih i hre mai ang. Kal rawh ka lo ken pui ang che," a ti ta a.

Sawitur chuang hre tawh hek lo, a then a zar chu khaipuiin a room lam pan chuan a kalve ta ngawt a. Room an thlen a thil vel an dahfel hnu chuan," Tikhan lo enkual la, nakin ah coffee in turin ilo chhuk dawn nia," tiin a kalsan ta daih a. Robb a kal hnu chuan a thu ngawi vung2 a, engatan zozai nge maw hetiang te chu a leisak le? Mi kalbo a tum tawh lai2 a, hawn pawh hawng lova pek kir leh mai chu a duh ut2 a mahse engpawh ni rawhse en ve phawt ang tiin a hawng tan ta a. Mall leh dawr dang2 an kalna a a thil en zinga a duh deuh bik kawr te, pheikhawk te, bag te, leh tlereuh ho zawng2 kha Robb a chuan alo lei khawm vek chu niin! A ang phiau ringawt a, a ngaihna pawh a hrelo hle bawk a. Hetiang zat2 hi engvanga a P. A mai2 tana leisak nge anih? A damloh avang hian a inthiamlo ani pawh lo nita sela, amah avanga damlo lah ani der si lova. Amah Julie in a tihsual nawn avanga he harsatna ala hmachhawn chauh tur hi lo thleng ani si a. Robb a lakah hian lo inveng sela, duh hle mahse lo do ngam bawk sela chuan vawiin ni hi a hmachhawn angai miah lo tur ania. Chumi piah lamah lah Robb an hmangaih dang a nei tih ala hrechiang em2 zui bawk anih kha! Ama thiamloh liau2 ania, chuan heng thil te hi ala thei lovang, duh lah a duh hek lo. Robb a room a va kala a thil leisak te chu lakir leh tura va hrilh nghal mai a tum deuhva mahse a inngaihtuah fim hman a, a reilo berah helai ah hian kar khat bak a cham tawh dawn chuang lova, tihian a hnutchhiah anga ani mai tih chu a rilru ah chuan arawn lan avang chuan a ke a pem tan tawh pawh chu a hnuk let leh ta a.

Inbual phawt chu tha in a hria a, rilru fim nan pawh, bathroom ah chuan a lut ta a. A inbual zawh chuan kekawr bul leh tshirt holam tak hi a ha a, slipper nen inhnuai lamah coffee intur chuan a chhuk thla ta a. Robb a pawh alo awm tawh bawk a. Sitting room a a luh veleh chuan Robb a chu a lam alo hawi nghal thuai a, a hmel chu nidang anglo takin a hlim deuh sarh hian Julie i chuan a hria a, mahse a ngaihbel pawh ani mahna lehpekin!

"Lo thu rawh Julie, coffee pawh an peih trep tawh ang," alo ti zung2 a.

"Ka lawm e, khiti zat2 te chu ka inbel hman dawn hleinem, thawn kir leh la a tha ang," a ti tawng a.

"Ho mai2 ka tihsak ve duh che alawm, i duhloh a awm anih pawn Eliana i pawh i pe mai ang chu," alo ti daih a.

"Mi pek atan phei chuan a to hlawm lutuk alawm, thawn kir la pawisa a neihlet kha a tha zawk!" ala ti ve fan a.

"Min lo ngaidam la Lady, khitiang mai2 thawn kir tur chuan min tilo ang chu tiraw?" mitko san ak pah chuan a ti deuh hmak a. Ani reng ani Robb Marshall a te ang mi hausa tawntaw tan chuan engtham mah ani lo reng a ni. Mahse Julie i erawh a inthiam theilo thung a, ni reilote hnu ah a kalna tur pawh hrilh lovin a kalbo san dawn chu ani si a. Hepa hian natna tam tak pe mahse a hmangaih tlat avangin engang pawn theihngilh a huat tum mahse a damchhungin chung thil pahnih chu a thleng ngai dawn lo ani tih pawh a hrechiang hle a ni.

"I tih tlat chuan le, ka lawm lutuk e," a ti ta ringawt a, sawitur dang pawh a hre meuh lo a ni.

Mrs. Page in coffee arawn chawi luh takah chuan engmah an sawi chhunzawm tawh lova, coffee chu ngawi reng chuan an indun ta a. An inzawh hnu chuan kea lenvah a rilru tih thawnven a duh avang chuan Julie i chuan sakawr in lamah Robb a chu a kalsan ta a. Sakawr in tak phei chu thlen a tum hauhlo, kea kal nan chuan a hla ve deuh em bawk a ni. Zawimuanga kal det2 pah chuan a pum chu a zut hleuh2 a, a kawchhunga naute insiam mek chu a be mawlh2 bawk a. Hlau miah suh aw ka naute, i nu ka awm alawm, keiman ka enkawl dawn che alawm. I pa hian ngaihsak dawnlo che mahsela pawiti reng2 suh i bulah ka awm zel dawn a, i chungah hian eng harsatna mah a thlen ka phal ngai lovang, tiin a naute chu a thlamuan sap2 a. Thui fe a kal hnu chuan rul te an awm palh ang tih chu a ngaihtuah chhuak ta thut a, inlam pan chuan a haw leh ta a. Thlifim in an chhem heuh2 chu a thluak buai lutuk te pawh chu a zia sawt hian a hria a. Doctor in eitha ei tura a hrilh kha a hre reng a, thei lampang pawh eitam a tum rilru ta ran a. Vawiin khan Robb a kha a bulah a awm ve tlat avang khan damawii vel pawh kha a lei ngam ta lova, mahse a remchan veleh lei a ei tan erawh a tum khawp mai, a fa chu a theih anga tha in a enkawl dawn a ni.

Ni a liam a, zawi2 in Robb a leh Mrs. Page i hriatloh chuan a insiam ta zeuh2 va. Kar tawp dawnah chuan a rilru leh a thawmhnaw kentur te pawh chu a siamfel diam tawh a. Khawi ramah nge a kal ang tih pawh chu a theih ang tawk chuan a ngaihven ru reng a, a tawp a tawp ah chuan New York ah let leh a tum ta a. Mahse a chhungte hlat thei ang berah awm a tum thung a, a chhan chu an hriatchhuah vaih chuan a nu leh a nauten an tawrh zawh a ringlo ani. Mahse an rama a awm chuan a chhungte nen inhmu ngailo mahse an bul hnaia awm angin a in ngai reng thei dawn thung a ni. Ticket te pawh saturday zan ami turin ala fel tawh a, Eliana i chu hrilh a duh hle nain a hrilh ngam lo a ni. Engemaw vangin alo sawichhuak palh hlauh anih chuan a pawi dawn lutuk bawk nen, tumah engmah hrilh lova kalbo chu tha ber dawnin a hre ta a ni.