PARADISE LODGE 14-16 Author: Chhantea Pautu, Paradise Lodge

[Chhantea Pautu]

PARADISE LODGE!
Author: Chhantea Pautu

Bung 14 Na
©
Romantic Time!

"Ninawm, chuti ang sawi reng suh, heti ang chhungkaw mize maksak lutukah hmeichhia tumah an lawi peih lovang...!"

"Inneihte pawh i lo suangtuah hman bîk a ni maw?" Hruaitluanga chu a nui a; a mizia a hriatthiam deuh tawh avangin han fiam a châk tlat!

"I zak thei lo...khati lam kha sawi pawh sawi tawh suh...hna i thawk tlem si, huan saw va sam ta che...tlangval ve si..."

"Ka kal dawn a lawm le...mahse ka zawhna kha min chhang phawt la..." a han ti leh hram a.

"Ka bula i tawngduh angte, i nuih peih angte hian i nu bulah leh i chhungte bulahte hian awm ve ta che...in awmkhawm hi in tak ngul mai, in bula awm a hahthlak..." a han ti leh hlak hlak a.

Hruaitluanga chuan, "I awm reng peih tho bawk sia..." tiin a han nui suk a, "Keimah vanga la awm hram hram i ni zâwk em ni?" tiin a han fiam leh hram a.

A thlengsil lai chawl meuhin Ngaihtei chuan Hruaitluanga chu a han en a, "I va han zak lo tak...ka la awm chhan i hre duh a maw?"

"Han sawi la..." pangngai thlap hian Hruaitluanga chuan a lo ti mai a.

"Ka la awm chhan chu sum ka mamawh vang chauh a ni; i pu Mawia sum tawktarh hi ka tan chuan îtawm tham tak a ni..."

"Chu...sum ûm chi hmeichhia i ni maw...!?" a nui deuh a.

"Ka ni lo..."

"I la awmchhan kha keimah vang ni lovin sum i duh vang niin i sawi sia..." a la nui reng a.

"Ni e...ka mamawh miau a lawm. Kum khat tal ka awm ang a, ka mamawh zat pawisa neiin in In hrehawm tak hi ka chhuahsan ang..."

"A va khawharthlak duh dawn ve..." thutak hmel zet hian Hruaitluanga chuan a han ti a.

Ni e, an Inchhung boruak ipik tak tlema tizangkhai thintu chu Ngaihtei hi a ni tih, tun thla hnih kalta chhung khan a hria a ni...

"Sum ûm chi hmeichhia ni ila, i pu Mawia mo nìh dan phêt ka zawng ang...thla khat hlawh atana a phal zat chhut hian a hausak hmel ropui..." tiin Ngaihtei chu a nui rah rah a.

"Nih han tum chhin teh...tih chi phian tur a sin" Hruaitluanga chuan a han ti ve leh a.

"PARADISE LODGE mo ni tur chuan hmeichhe huaisen tak nih a ngai ang; kei chu ka peih lo..."

Hruaitluanga chuan han chhan leh mai dan tur a hre tawh lova; he nu a ngainat riauna chhan hi, a mize tlang tak, zep tit tet nei lo, a rilru puahchhuahpui phawng phawng chi, tih rin ren nei lo a nihna hi a ni maiin a hria!
Ngaihtei hian dik lo nia a hriatah chuan an Inchhunga tumah hi khak hreh a nei lova; a zahpah lo tihna chu a ni si lo. A pu Mawia ngei pawh a hlau chuang lo!

"A nih...ka pi ka kal ang'e..." a han ti ta ngawt a.

Ngaihtei han hnial leh dan tur kha a hre tlat lo; a hnunglam atang chuan, an awmpui nula chuan a nuih sak a, Hruaitluanga hi a ngaina ve tho, a bula a sawi tâkte erawh a rilru chu a ni tlat si! He Ina a awm tlatna chhan chu a han ngaihtuah a, "Sum hi mihring tân eng'e a nih le!?" tiin a han phûn sap a.

A che reng a, chhun chawlh ei tur a siam a, pi Nguri leh Pi Ngaihsakite nen chuan an titi luam a. Pu Mawia erawh a awm lo; ani tih loh, midang zawng hi chu an pangngai tawh viau, pu Thanglianmawia hrim hrim hi a buaithlak!

Hruaitluanga chuan ngawi rengin thingpui a in a, a in zawhah ngawi reng bawkin a chhuak leh a. Tih tur tul tak a neih lem loh avangin Ngaihtei chu a va pâwn chhuak ve a. Hruaitluanga chuan kawtah thing ekin, a mawm hluam a, a thlan a luang zaih zaih bawk.

"I thlan hruksaktu tur che nupui neih a ngai a nih kha!" Ngaihtei chu a nui rah rah a!

"Nia...PARADISE LODGE mo ni ngam khawp hmeichhe huaisen an vang ngawt ang!"

"An la awm mai ang..."

"Ah! I duh dawn tihna mi?"

Ngaihtei chu za vak lo hian a han nui a, "Hruaia, tunlai i mizia hi a dang riau...i tawngkam a hleiin a frank thei si..."

"Tawngkam chhawrthlapui deuha titipui i duh tihna mi?"

"Eng'e tawngkam chhawrthlapui chu?"

"Hmeichhe bula intihzei tum taka tawngkam thlum hman emaw, thluaithluam deuh duah zel ang hi a nih hmel..."

"Tenawm e a..."

"Kha maw...tunlai hmeichhia chuan tlang hrekhrawk hi pa in ti zâwk..."

Ngaihtei chu a nui har har a, "Tak takin i dang riau...he Ina i rawn haw tirh kha i ang lo. Mi chhaih leh fiam ringawt hi i hrât a, chuti lam hlir chu min sawipui a, ka tan a nuam lo..."

"Ka duh miau che a lawm..."

"Teh tawp a...eng'e a chhan?"

"I tha em a lawm"

"Ni lo...tunlai i awm dan hiii..."

Hruaitluanga chuan a chhang lawk lova; a hnuah, "Ngaihte, ka khua a har a ni, ka nun a ruak ni berin ka hria...Muana bulah khan ka ziaawm thin...chuan, i bulah nen..." a thutak hle. "Ka pu Mawia rilru putdan lah hi; nang pawhin i hriat kha..."

Ngaihtei chuan han sawipui dan tur a hre lo hle mai..."Thildang sawi ang...i thianpa kha i ngainat hmel ka ti" a han ti daih a.

"A dik a lawm...a zia pawh ka la tawh viau tih ka inhria"

"Min bem dante leh, i tawngkam chimawm tak ang chite pawh hi mi?" a nui rah rah a.

"Aw ni chiah ee..." Hruaitluanga chu a nui hawk hawk a. "Mahse, a mizia hriatthiam a har"

"A hlauhawm viau ang a; a lerh phian dawn chu..."

"A hlauhawm...mahse, a lerh lo...ngaihven viau suh, ka thîk a nia"

Ngaihtei chu a nui ar ar a, "I mawl e a" a han ti a.

Bung 15 Na
©
Khuuu...Setana!

Hruaitluanga hian nun zalên a thlahlel a ni!

"Ngaihte, ramhuai emaw, thlahrang emaw hi i hlau em?" a han ti daih a.

Ngaihtei chu a a ding khawng lah a, "Eng'e sawi i tum!?" a han ti hâ a.

Dik tak chuan tunhnaiah In leh a velah hian thawm danglam emaw thil danglam emaw a hmu ngai ta lo; Hruaitluanga hian eng thil emaw a hmu ve em ni tih ngaihtuahna a nei nghal ringawt!

Hruaitluanga chuan, "Eng sawi tum love. A nih, setana hi i hlau em?"

"Ka hre nang...hlau lo"

"Huai hle mai..." Ngaihtei lam hawiin a han nui a. "Tak takin, Muana kan han sawichhuah tâkah chuan, a thil min hrilh ka hrechhuak a, ka han hrilh ang che aw"

"Umm..."

"Kum 2002 khan a ni. An khuaah chuan chhandamna camping an buatsaih a, Speaker atân chutih laia Synod Revival Speaker luck tak, Pu C.Zairemmawia an hmang a ni. Muanate thianho pawh an lût ve a.

"Zan khat chu Muana leh a thiante pathum chu intifel tâwkin light down tawh hnuah tawngtai turin an chhuak a. An Biak In awmna kha thlanmûal bul lawk hi a ni a, Biak In hnunglam chu thlanmûal a ni nghal a ni!

"Chu thlanmûal tawntirh lamah chuan an tawngtai ta a, an tawngtaitui khawp mai. An thian zinga pakhat, Siamfela chu a haleluiah vak vak a; ani hi chu a râwl a ring ve hrim hrim a, a rau pawh a rau hmel ber zel! Halleluiah tih leh Amen tih hi a uar em em a, a tawngtai vawikhatah hian vawi 150 chuangte a ti thin. A tihzât an hriattheihna chhan chu Muana'n a lo chhiar thin vang a ni.

"An thiante zinga mi Remruata chu tawng tlem tak, aw thum tak si, zawi supa tawngtai chi hi a ni a, bawkkhup bungbu kûtin lei depah a tawngtai vei dût dût a, Pathian pawhin a hre phâk dawn emaw ni le, tih tur khawpin a tawngtai zawi thung.

"An thian zing ami tho Romawia thung chu tawng rang tak(a tawng rang mah mah thin) meng râng, mitmu pawng lek lek hi a ni a, a tawngtai chu a'n tawng rang mai mai khawp a, Pathian pawhin a awmzia a hre hman ang em aww tih tur khawp a ni. A nuai liam vut mai a, a rak hian a rak nawk nawk a ni ber mai!

"Muana chu a tawngtai mial mial a; mahse a tawngtai lai chu a tawp thut a. Chutih lai chuan a thiante chuan thlarau pawlna sang tak an chang a ni ang, an tawngtai tui em em a, mahni style style-in a tawngtai vak vak a, an tawngtai nawk nawk a, an tawngtai dût dût a...

"Muana chuan an thlang lam, thlanmûal mawng lamah chuan ke pen thawm dik tak hi a han hria a. Tawngtai chhunzawm ta lo chuan chu ke pen thawm chu a ngaithla a, an lam panin a rawn kal hnai tawlh tawlh lehnghal. Tawngtai laia han men êm chu dikin a hre si lo, men rûk chu a châk hle a, mahse a insum hram hram a...

"Chu ke pen thawm lah chuan an lam a rawn pan zel lehnghal...a thiante tawngtai thawm chu engahmah a ngai tawh lo. Chu thil chu eng'e ni ang tih a han ngaihtuah a, a ngaihtuah kual a ngaihtuah kual hnuah, a ni thei awm ber tur chu a han hrechhuak ta...

"Chutia, a thiante, vanvadak, lei hmai nawr leh tlangsam bul tanchhana mawng tai tâta an tawngtai hliam hliam lai chuan, "Khuuuuu...setana...!" a han ti ta thut mai a...

"Muana chu a au ring bawk a ni ang, a thiante tawngtai chu an ngawi nghal duk a; second reilote chu a reh hian a reh tlawk tlawk a. Thawklehkhatah thawm danglam tak hi an rawn ri thut a, sarak rapthlak tak, mangang awrawl, hlau thlabar te ri, aw sin deuh leh aw thum, leh aw tial riai ruai hi a ri inpawlh chho ta nuk mai! A thiante thlabar te ri a lo ni!

"Muana chu a chhak bera awm a ni a, a thiante chuan an rawn pal chho ta tak tak mai a. Muana chu a awihah thawt thawt a, a chhak bera awm chu a thlang berah a awm ta daih. Chutia a thlang bera a awm tak daih chu second reilote chhunga thleng a ni.

"Muana chuan a thlang berah a awm ta daih tih a han hre chiah chu, eng'e an hlauh pawh hre lovin a thiante chu a um chho ve ta tak tak a, a tlanpel chho fua fua a. Thui fê a thlen hnuah a thiante chu a lo nghak a.

"An han ding khawm chu an thaw huam huam a. Romawia phei chu Ui ni sa tuar ang maiin lei a chhuah hlûi a, a men ràn sa naklaiin pawngpur khawpin a men ràn belh a; chutih lai chuan, samzaiin a mitmu kha a phihawh theih hrim hrim ang, Muana'n a ti!

"Muana chuan, "Ngati nge in tlân vak a?" a han ti a.

Romawia chuan, "A hlauhawm em a lawm" a rawn ti tham tuak a.

Muana chuan, "Eng'e inhlauh a?" a lo ti leh hû a.

Remruata'n, "Setana!" a lo ti sup a.

Muana chuan nui ruh ruh chungin, "In va han ho tak e awww...ka lo tlân ve vak vak a" a lo ti a.

Siamfela chuan lungawi loh hmel zet hian Muana chu a han melh ner nawng nawng a, "Setana i hmu a ni lo'm ni?"

Muana lah chuan, "Hmu nang" a lo ti sam et a.

"Chuti si, ngee, 'khuuu setana' i tih chîam aaa...?"

"A nih duh hmel ber a lawm" a lo ti et a" a ti a...Hruaitluanga chuan Ngaihtei nui chu nui var var chungin a en a.

A nuih zawhah Ngaihtei chuan a rawn en a, "Fiamthu thawh i tum tiraw?" a nui var var a.

"Ka thiam hran lo tih ka hria...tak takin ka nuin i thil tawn thin min hrilh a...pawi ngawt mai"

Ngaihtei nui chu a tawp a, tawng tuma a kâ a àn zuau lai chuan In lamah mangang aw a lo chhuak a.

Bung 16 Na
©
Hmelma Chihnih!

Khua chu a thim thet thet tawh a. Hruaitluanga chu an In kawtah a ding ngawi reng a.

A chhan hriat si lohin thil thleng a va han tam tawh tak em! Tunah, Bawbawa, a chhia a tha pawh sawi thei lova tawngthei lo chungah leh zel a thleng a nia!

Thinghmun thimtham lam atang chuan mipakhat hian a rawn pawh phei a. A bul a rawn thlenin chupa chuan thawm a rawn nei chauh a; Hruaitluanga chu mi thinphút zuk nei nise a phuzuk ngei ang! Thimthamah chuan a hmuh chian vak theih lova; mahse, chupa a han tawng takah chuan tunge a nih a hre nghal mai!

"I lo tha maw Hruaia?"

"Aw ka tha e...teh hlawl che chuan...?" a han hmu chu a lawm hmel hle.

"Hruaia, I pu Mawiate nupa lo ngaihven ngun tura ka chah che kha i la hria maw?"

"Aw hria e; mahse..."

A sawi zawh hmain, "Tunah hian kawnghnih atangin an chungah chhiatna a lo thleng thei reng a ni" Muanawma chuan a lo ti a!

"Kawng hnih a...!?"
"Aw ni e"

"Kawng khat chuan a thleng der tawh a nih ka ring!"

Muanawma chuan, "Eng'e i sawi awmzia!?" a han ti a.

"Bawbawa a inhliam a ni...a na khawp mai...hriamhrei hnuhma ngei a nih ka ring"

"Ani chungah ber kher maw an tuan! Zawng ho tehhrep chu(h)!" tiin Muanawma chu a han rûm nghut a, "He thil thleng hi i pu Kaphrânga thiltih rahchhuah a ni tih i hre lo" a han ti ringawt a!

Hruaitluanga chuan mak tih hmel takin, "Eng a...!? Eng'e i sawi awmzia!?"

"Thawnthu sei tak a ni..." Muanawma chuan a han ti leh tawp a!

An ngawidun ta reng a.

A nakinah chuan, "Muana min han hrilhfiah teh, eng'e ka pu thiltih vang a nihna!?" tiin Hruaitluanga chuan a han zâwt a.

"Ka hrilh thei rih lo che...tuna i pu Mawia fapa chunga thil thleng chu tunhnaia i pu Mawia thil kawl rawn hre thartute atangin a ni ngei ang. He thil phei hi chu, ka thil buaipui hmasak ber nen khan a inzawm tlat lehnghal; a hmaa thil thleng pawh kha, ka thil ngaihven duh tak a ni tho bawk. Hei hi pu Ramtinsanga ka kawm atanga i pu Mawia pa, pu Kawlsiama pa kha Kaphrânga a ni tih ka hriat tâk avanga hre ve chauh ka ni! Hruaia, nangnena kan inchhar hi thil thleng palh a nih ka ring lo; tute emaw chunga ânchhia lo thleng mêk titâwp turin Pathian hian min duh a ni" a han ti duah a.

"Ânchhia aaa...!"

"Aw ni e. He In leh inchhungkaw chungah hian ânchhiain thla a zar mêk a ni" Muanawma chuan a la ti ta deuh deuh a. "I pu Mawia'n hmelma thar a nei taah ka ngai bawk" a la tizui.

"Ka va han hrethiam lo em!"

"Ka tel ve tih pawh an la hre thuai ang" a han ti leh ngawt a. Hruaitluanga hriatthiam leh hriatthiam loh lam chu a ngaihven pawhin a lang lo.

"Muana, i duh duh i sawi ringawt a, eng'e thil awmzia min han hrilh ve teh!" Hruaitluanga chuan a ti ta ngawt a!

Inthiam lo aw lek lek hian Muanawma chuan, "Ka tihpalh a ni, he thil hi ka vei em mai a, kan chhungkaw chunga vanduaina lo thleng ta pawh kha, thleng palh mai niin ka hre thei lo. In chhungkaw chunga thil thleng thin ka hriat hian ka rilru a tithar riau a tin ni" a han ti a. "I hriatthiam loh chu min han zawt ta che; mahse, ka hrilhfiah thei rih lovang che tih ka hlau ngawt mai" a han ti leh a.

"Ka pu Mawia chuan eng'e a kawl reng reng a?"

"Ka hrilh thei rih lo che!"

Hruaitluanga chu a rûm nghat a; a thianpa, a û rual mah nise Muanawma chhan danah chuan a lawm lo hle! Chu chu Muanawma pawhin a hrethiam reng; chuvangin, "Hruaia, min hrethiam rawh, engmah tak tak hi ka la hrekim bîk lo; mahse, a tawp rak thlengin ka bawhzui dawn tih ka sawi duh a ni...i mi beisei rûk ang ngeiin" tiin Hruaitluang lungawi lo chu thawidam a han tum a.

"A nih leh, kan chhungkaw chungah engvangin nge ânchhia chu a awm?"

"I pu Kaphrânga'n a thil lâk loh tawp tur thil a lâk vang a ni"

"Eng'e chu thil chu ni a?"

"Ânchhiaa phuar hnan, thil hlu tham tak a ni?"

Hruaitluanga a tawng leh hma chuan bathlar atangin Ngaihtei'n a rawn au a, a hawi zawk hlanin thimthamah Muanawma chu a lo pilbo hman tawh. Thimtham zîng atang chuan, "Hruaia, i la hrethiam vek mai ang" a rawn ti su su a.

Hruaitluanga chu a han thaw hawk a, an In lam chu muangchangin a pan ta chhat chhat a. Bawbawa a lo zual a ni! Pu Mawia chhuak a la haw lova, buaithlâk fû mai.

Muanawma chuan thimtham zingah pu Ramtinsangate In lam a pan a. Kum hmasa lam thil a han ngaihtuah lêt a, a thil lo ngaihven rûk reng bawhzuina remchang tak a han awm thut chu a phur ang reng hle mai; mahse, a hlauhawmin a hautak hle dawn tih a hria; a chhan chu 'THE JUDGES' kut rawlhna game a nih tlat vang a ni!

A tîr khan heti ang a ni ang tih a hre lâwk bîk lova; pu Thanglianmawia mizia mak tak avanga an chhungkaw chanchin a hriatchian duh avangin pu Ramtinsanga a kâwm a; chuta tang chuan pu Thanglianmawia pu hming chu Kaphrânga a ni tih a hre ta a; chu hming chu a hriat tawh hnu a ni tlat! An chhungkaw chunga thil thlengte a chîka thil awmzia a han thlîrin 'Kaphrânga' tih hming chu, a lo hriat tawh 'Kaphrânga' kha a ni ngei ang tih a ringhlel ta lo!

Thla mang lai a ni a. Thing hmun chu a thim hle; Muanawma chuan thawm a han hria a........