SUDDEN - TAKES THE TRAIL AUTHOR : OLIVER STRANGE (1940) EPISODE - 16

[HLalthazuala]

Squit-a leh Sudden-a te pahnihin Welcome khua an thlen meuh chuan a tlai tawh hle a, mahse zan dang ang lo takin an lo la meng vek hlawm a. In tinah chuan khawnvar a inchhi eng thluah mai a. Sloppy-a'n Sudden-a chu a lo hmuh veleh, "I lo thleng har ang tih ka hlau tawh teh asin. Thil țhalo deuh mai a lo thleng a, engtia tih tur nge a nih pawh kan hrethiam ve lo," a lo ti a. Sudden-a chuan, "Chanchin țha lo chu hriat ka chak rih vak lo. He pa hi Jail chhungah dah lut la. Eitur pe nghal ang che. A hliam pawh hi enkawl a ngai nghal bawk ang. Kawngkhar theihnghilh miah lovang che," a han ti a. Sloppy-a chuan, "Mahse, Jim...," a ti hman chauhva, Sudden-a chuan, "ka chau viau ania, hmanhmawh rawh. Red Light Saloon-ah sawn ka va kal anga, Nippert-a'n chanchin chu min lo hrilh mai ang," a ti ta a.
Saloon-ah chuan mi an lo tam kher mai a. Thu pawimawh fe sawi niawm tak hian an lo inbial hrang thluah mai a, inkhelh pawh chu a tu te mah chuan an lo ngaihsak lova. Sudden-a chuan Bar lam a pan nghal a, Bar bulah chuan Nippert-a te, Gowdy-a te leh Rapper-a te chu an lo awm hlawm a, Sudden-a chuan, "Engtizia nge in va han phur awm ve?" tiin a va zawt a. Nippert-a chuan, "Jim i lo thleng a ni maw? A lawmawm kher mai, chanchin i la hre ve nange?" a lo ti thuai a. Sudden-a chuan, "Ka lo thleng ve chiah a ni. Sloppy-a'n thu eng emaw chu min hrilh a tum a, mahse ngaithla hman lovin tah hian ka lo kal nghal mai a ni," a han ti a. Nippert-a chuan, "Mrs Gray-i a bo daih mai," a ti ta a. Sudden-a chuan makti deuh hian, "A bo i tia law?" a han ti a.

Nippert-a chuan, "Tukin zing khan a dan pangngai angin Mrs Gray-i dawr hnunglam kawngkhar chu Miss Chips-i chuan a va kik a, tumahin kawng an rawn hawn lawk loh avangin vawi tam fe a kik nawn ta a. In chhungah chuan naute țap ri a hria a, rei deuh hnuah chuan a ngaihțha lovin a pasal chu a kova, Chips-a chuan kawngka tichhiain in chhungah chuan an lut dun ta a. Mrs Gray-i chu an hmu zo lova, chhuatlaia a thawmhnaw inchap kual vel dan a țangin Mrs Gray-i chu hmanhmawh taka insiam a nih an ring ber a. Mrs Gray-i zawng turin mi ka tir chhuak thuai a, nilengin an zawng a, mahse an hmu zo lo a ni. Ke ngawt chuan thui a thleng theiin ka ring bawk si lova, engnge i ngaihdan Jim?" a han ti ta a.
Sudden-a chuan, "Ngaihdan ka la sawi thei mai rih lo, Dave-a hi khawnge a awm?" a ti phawt a. Nippert-a chuan, "Ani pawh Mrs Gray-i zawng turin a chhuak ve a, Mrs Gray-i bo thu a hriat veleh midang pawh nghak zo lovin, a sakawr a siam sawk sawk a, a chhuak nghal mai a ni. A thinrim hmel kher lehnghal a, khawthlang lam panin a chhuak a, a hmanhmawh si a, khatiang lutuka sakawr tlanchak kha ka la hmu ngai zen zen lo," a ti a. Sudden-a chuan, "Zaninah hi chuan engmah tih theih kan nei tawh lo, mu hma ila a țha zawk ang, naktukah kan hah dawn si," a han ti a, kalchhuah nghal mai a han tum a, mahse Nippert-a chuan, "Bentley khuaah chuan i va hlawhtling em?" tiin a zawt a.
Sudden-a chuan, "Thil tam tak ka va hrechhuak a, mahse, Mrs Gray-i hi kan hmuh hma chuan engmah sawichhuak rih lo ila a țha zawk ang," tiin a chhang a. Nippert-a chuan, "Tunge i rawn hruai haw kha?" a ti a. Sudden-a chuan, "A hming chu Squit a ni a, heta țanga mel sawm velah inhmuhthiam lohna kan nei a, min kaphlum lo turin ka thlem thlu thei hram a ni. Sloppy-a'n a hliam a buaipui mek a, a damchhuak leh ngeiin ka ring," a ti a. Rapper-a chuan, "I lukhum kha a tihchhiat sak hle che a nih kha mawle, a kuakna lai han enin hnunglam ațangin a rawn kap che a ni ngei ang," a lo ti ve a.
Sudden-a chuan, "Ni e mawle, Squit-a chuan rukru leh suamhmangte hi min hmuh loh laia che tur emaw an nih a ti tlat a ni," a ti a. Nippert-a chuan, "Engvanga kahhlum lo tum ngawt che nge a nih?" a ti a. Sudden-a chuan, "Dollar zanga emaw ka nih a tih vang a ni. A pachhiat lai a ni a, Sarka-a'n ka lumanah Dollar zanga a lo phal hlauh si a, chuvangin......," a tih lai mekin Rapper-a chuan, "Sark-a'n maw thah che tum? Sawi theih kan nei ve dawn lawm ni?" a lo ti a. Sudden-a chuan, "Nei ngei ang, mahse, a hun takah chauh, tun hi a hun a la ni rih lo," tiin a chhang a.
A tuk zingah Sudden-a chuan Sloppy-a hnenah, "Dumb-Bell Ranch an rawn chuh hmain Sark-a hi i hmu tawh ngai em?" a ti a. Sloppy-a chuan, "Hmu ngai bik lo," a ti a. Sudden-a chuan, "A nih leh Drywash khuaa miten an hria a ngem?" a ti leh a. Sloppy-a chuan, "Drywash khua a tlawh tawh tih pawh ka hre chuang lo," a han ti phawt a. An thusawi lai chu bansan duh niawm takin, "Jim, Mary..... Mrs Gray-i hi enge a chanchin ni a i rin? Ka fanu ang maia ka en avangin Mary tiin ka han ko ve mai a nih kha," a ti a.
Sudden-a chuan, "Chanchin engmah kan la hre lo, mahse lungngai duh suh, dam takin kan hmu kir leh ngei ang," a han ti a. Sloppy-a chuan, "Bentley khua i va tlawh chhan chu, i hlawhtling em? I duh apiang..... i zawn apiang i hmu ziah a ni ti rawh.... Jim," a han ti leh a. Sudden-a chuan nui chungin, "Hmu ziah lo ve, tunah pawh hian eitur ka duh hle a, mahse, ka hmu dawn lo niin a lang," a ti a.

Chumi hnu rei vaklovah chuan Sudden-a chuan Mrs Gray-i dawr hnunglama tual vel te chu ngun zetin a enkual a. Mihring hniak hmuh tur a tam hle a, rei fe a enkual hnu chuan hmeichhe hniak a hmu ta a. Hmeichhe hniak leh mipa hniak țhenkhatte chu an awmna piah mual lam panin an phei a ni tih a hrechhuak thuai a. Hniak chu a chhui zui zel a, hmun pakhatah hian sakawr dinkhawmna hnuhma hi a va chhui thleng ta a. Sakawr hniak chu tawite a va zui leh a, mahse chhim lam pana sakawr hniak a lo tam tak em avangin chhui zui zel chi niin a hre ta lova. Red Light Saloon lam panin a kir san leh ta zawk a.
Nippert-a hnenah Sudden-a chuan, "Mi panga, sakawr chuang pakhat rawn kengin Mrs Gray-i chu an la bo niin ka hria, khawchhak lam pan tum niawm takin ka hre bawk, mahse, an hnu ka hloh ta a ni," tiin a thil hmuhte chu a va hrilh a. Nippert-a chuan, "Mrs Gray-i kawngkhar chahbi nei ve an awm a ni phawt ang, Chips-a'n a tihchhiat hma kha chuan a la inkalh tlat niin an sawi si a," a han ti a. An bula ding ve, an khaw thirdeng chuan, "Dawr kha Mullins-a ta a nih lai khan a kawngkhar kalhna min siam tir a, Chahbi pahnih ka siamsak asin, a lo pe tel vek lo a ni mai thei," a lo ti ve a.
An sa zuartu Cleavers-a chuan, "Mrs Gray-i hi a ngaina ru viau lehnghal a," a lo ti thuai a. Banker Morley-a chuan, "Sark-a pawh khan a ngaizawng ve hle bawk a..," a lo ti a. Gowdy-a chuan, "Sark-a zawngin Chahbi thar a siamtir ngam lovang, nei mahse a hmang ngamin ka ring lo," a lo ti ve bawk a. Sudden-a chuan, "Ka rindan chuan Mullins-a hnathawh a ni ngei ang. Chuvangin, Mullins-a chu zawnchhuah ka tum dawn a ni. Dave-a pawhin Mullins-a chu a ringhlel ngei ang. Thil hriatchhuah ka neih tak leh in la tel ve dawn nia," a ti a. Midangte chuan kal ve tumin Sudden-a chu an hnial laih laih a, mahse, an thu chu zawm duh chuang lovin amah chauh chuan a chhuak ta a.
Dave-a'n Mrs Gray-i bo thu a han hriat meuh chuan a rin ai daihin Mrs Gray-i chuan a rilru a lo khawih nasa tawh hle a ni tih a hrechhuak a. Hmanhmawh takin Mrs Gray-i dawrah chuan a va kal a, a duh lo chung chung an hruai chhuak ni ngeiin a hre tlat a ni. Dave-a chuan, "Tunge ni ang?" tiin nasa takin a ngaihtuah a. Chutihlai chuan Sark-a'n Mrs Gray-i fawh a tum lai hmel kha a mitthlaah a lo lang thuai a. Dave-a chuan a sakawr chu a buatsaih sawk sawk a, khua chu a chhuahsan ta nghal a.

A chhuak tur chu Sloppy-a chuan a lo hmu a, "Khawiahnge i kal dawn?" tiin a lo au va. Mahse, Dave-a chuan chhan pawh chhang lovin a tlan liam san ta a. Nippert-a pawhin a lo hmu ve bawk a, Sloppy-a chu a han zawt thuai a, mahse, Sloppy-a chuan, "A rilru a buai a ni ngei ang. A kalna tur chin ka lo zawt a, min chhan nachang pawh a hre lo. Engtia tihtur nge ni ang?" tiin a lo zawt zawk mah a. Nippert-a chuan, "Bar 'O' ho ka va chah a, Mrs Gray-i chu ramhnuaiah zawng chhin phawt ila a țha ber ang, Jim-a awm ve se ka ti tak zet a ni," a han ti a.
Hetih lai vel hian, Dave-a chuan Dumb-Bell Ranch panin a sakawr chu a tur hmanhmawh sauh sauh a. Hmanhmawh teh mahse fimkhur nachang hre lo khawpa hmanhmawh chu a ni bik lova. Sark-a chuan ho te a nei ve bawk tih chu Dave-a chuan a hrechiang a, chuvangin amah hi an lo man mai chuan Mrs Gray-i chu a va chhanchhuak dawn hauh si lova. Ranch in a thlen dawn hnaih chuan kawng pangngaia kal tawh lovin bawng kawngțum chu a zawh ta zawk a. Ranch ațanga Yards zahnih vela hlaah a sakawr chu a tiding a, Ranch in chu ngun zet hian a thlir hmasa phawt a.
Rei vaklo a awm hnu chuan mihring authawm leh sakawr hramri te chu a hria a. Cowboy ho chu hnathawk turin an lo chhuak țan tawh a. Dave-a chuan a bihrukna hmun ațangin a lo thlir reng a. Chungho chuan an rawn kal pel zel a, amah rawn peltute chu mi sawm pathum lai niin a hria a. Minute sawmhnih dawn lai a nghah hnuin a sakawr chu tlanchhiat theihna tur remchang laiah a thlung a, Ranch In chu a pan phei ta a. Chawei pindan tukverh ațangin inchhung chu a va bih chhin a, inchhung ah chuan amah chauhin Sark-a chuan chaw a lo ei dawn mek a. Dave-a chuan kawngkhar chu dimtein a hawng a, "I dam em, Sark?" a va ti ta a.
Sark-a chu a phu zawk mai a, a lehhawi thuai a, Dave-a puakruk chu a va hmu hmasa ber a, an inkar chu Yards hnih emaw vel lek hi a ni a. Dave-a hmel lah chu a nelawm fahran bawk si lova, Sark-a hnenah chuan, "Ka thu i awih loh zawngin he khawvelah hian i nun bawlhhlawh tak hi i chhunzawm leh tawh ngai hauh lovang," a han ti a. Dave-a chuan amah Sark-a chu chhan engemaw hlek a neih chuan kahhlum nghal mai a chak hle a ni tih a hmelah chuan a lang chiang hle a. Chuvangin Sark-a chuan engmah sawi ngam lovin Dave-a thu chu a zawm ta thuai a,
Sark-a a din hnuin a puakruk pai lai chu Dave-a chuan a va phawi sak a, sir lehlamah chuan a paih phei nghal a. Puakruk dang a kawl tawh lo tih a hriat hnuah, "Tunah chuan thu kan sawi dun thei tawh ang. Mrs Gray-i chu khawiahnge a awm?" tiin a zawt țan ta a. Mulins-a chu a hlawhtling ta ngei a ni ang tih Sark-a chuan a ring thiam nghal mai a. Dave-a chuan amah a rawn puh mai a ni ang tih pawh hrilh ngai lovin a chiang sa vek a. Makti awm fe hian, "Mrs Gray-i awmna keiin engtin nge ka hriat ang? Kan inhmuh hnuhnun berna pawh a rei...," a ti hman chauh a, Dave-a chuan, "Daw daw kual mah la, i him phah chuang lovang. Thudik tak hriat ka duh a ni. Thudik tak min hrilh vat loh chuan...," tiin a vau ta nghal a.

Dave-a chuan a vau satliah mai a ni lo tih Sark-a chuan a hrechiang hle mai. Thi mai thei a nih zia pawh a inhria a, Dave-a hmel a hmuh ațangin chung thil chu a lang vek si a. Chuvangin, "Thudik tak a ni ka hrilh che. Mrs Gray-i chu engtinnge a awm?" a han ti ve a. Dave-a chuan Sark-a hmel landan en ran chungin Mrs Gray-i bo dan zawng zawng chu kimchang takin a hrilh ve ta a. Sark-a chuan, "Chutiang thu ka lo hre ve miah hleinem, hetah chuan a lo kal miah lo, i duh chuan zawng ta che," a ti ta a. Dave-a chuan, "I fel hle mai, kan pahnihin kan zawng dawn nia. Buaina kan tawh vaih chuan Dumb-Bell ram hian neitu thar a mamawh ngei ang," a han tihkhum a.
Sark-a chuan thinur deuh tak hian, "Ka hote an lo vakbo hman chu i vannei kher mai," a han ti let ve hram a. Dave-a chuan engdang mah sawi lovin a puakruk chuan a tin a, Sark-a chu hma a hruai tir ta a. Pindan hrang hrang chu an fang dun zel a, Bunk House te, Farm în te pawh chu an en chhuak vek a, mahse Mrs Gray-i chu an hmu zo ta chuang lova. Intithei fein Sark-a chuan, "I lungawi tawh em? Mrs Gray-i bo thuah hian tel ve na ka nei miah lo," a han ti a. Dave-a chuan, "I nuih la tiza mai suh, Puakrukin ka tin reng che hi, i tel lovang tih pawh ka la ring chiah lo," a ti a.
Sark-a chuan, "I huaisen kher mai maw? Puakruk kha dahbo la, eng ang chiaha huaisen nge i nih chu kan hrechiang mai ang chu," țhen deuh țhu hian a han ti a, Dave-a chuan, "Chutiang zawng chuan ngai ve la ka lo ti rilru hle asin, Jim-a khaihlum i tum lai ka hmuh ni ațang che khan, khawih che ka chak tawh tih i hria em?" tih pahin a puakruk paina kawnhren chu a phelh a, țhutthlengah chuan a va bang ta a. Phur em emin Sark-a chuan a kawrban chu a hlim chhing sauh sauh va. Dave-a chuan a lukhum chu țhutthleng zawnah a han theh phei leh a, "Lo kal rawh le zawnga!" a ti ta a.
'Ka duh ka hmu e' ti ang maiin Sark-a chuan Dave-a chu a va zuan ta nghal a. Dave-a ai chuan a sang zawk a, a lian zawk bawk a. Chuvangin chak zawk ngei dawnin a inngai a, a phur tak meuh meuh a ni. Dave-a chu naupang te, insual dan pawh la thiam tham lo niin a ring tlat a. Mahse a rin ang ngawt chu a lo ni bik lova, Sark-a'n a rawn zuan lai chuan Dave-a chuan a bekah na tawkin a lo hnek chawrh mai a. Sark-a chu a tlu ta nghe nghe a. A tluk zawngin thutthleng pakhat chu a delh chhe lehnghal a.
Sark-a chu a rawn thova, țhutthleng chhia chu a pet leng ta lawp a. Dave-a chu a pan hnaih leh ta hruau hruau va, ding chungin intihnat tumin an in hnek tawn ta mial mial mai a. A tir lam minute sawm vel chhung chu Sark-a chuan chak zawk ngei dawnin a la inhria a. Mahse minute sawm a ral meuh chuan Sark-a chu a chau țan ta hle mai a. Hnathawk lo, nawmsipbawla lo khawsa țhang a nih avangin chauh pawh a chau hma hle a ni. Dave-a lah chu hnathawk țhang, zangkhai tak mai a ni si a. Sark-a chu a thaw hlawp hlawp tawh mai si a.
Sark-a chuan hneh dawn lovin a inhre ta deuh a, chu chuan a ti thinur zual sauh a, tichuan tha tharin a han bei leh chiam a, an inhnek ri leh an per rite pawh chu hriat hran a harsa tawh hle a ni. A tawp atawpah chuan Sark-a chau tak tak dawn ngeia a inhriat a vangin a tha neih zawng zawng chu sawmkhawm leh a, bang thleng dawn laiin a tawlh kir a, kun chungin Dave-a chu sut vak mai tumin a bawh phei ta chiam mai a. Chutianga mi insual dan chu Dave-a chuan lo la hmu ngai lo chu ni se, Sark-a chan chu a țha zawk ngei ang le.

Mahse Dave-a chuan miin lu hmanga an hmelmate an sual lai chu a lo hmu ve tawh țhin a ni phawt ang, Sark-a lo tlan phei chu sir zawngin a lo zuan per san a, Sark-a kun lai khabeah tak mai chuan a khupin a lo chhoh dawm ta vak mai a, Sark-a chu hnung zawngin a tlu a, dawhkan a delh a, chhuatah chuan a thal ta reng mai a. Dave-a chuan a va pan hnai a, "I thi tawh a nih chuan pawi ka ti miah lova, mahse la thi lovin dawt min hrilh a nih si zawngin nakina ka la nghaisak dan tur che ngaihtuah chuan tun hi chu nepte a ni ang. Kei hi hlawhchham mah ila Jim-a a la awm," a han ti a. A lukhum leh kawnghren chu a la a, pawnah a chhuak ta a.
Dave-a chhuak tur chu Sark-a chuan a va hmu zui a, hmui thi phung chungin anchhia a lawh chiam chiam a. Sark-a chu nikhaw hre lova tlu chu a ni bik chiah lova, mahse, Dave-a a hneh dawn lo tawp tih a hriatchian avangin a tho leh ngam tawh lo mai a ni. "Tunah chuan hnehtu emaw ka nih i inti a ni maw? Hlawkna enge i neih? Hmeichhia chu ka kutah a la awm tih hre rawh! Min tihnat zawh poh leh hmeichhia chuan a tuar na ve dawn tihna a ni mai. Jim-a i chhuang a ni maw? A chet ve hma a kan thah hlauh phei chuan engtia tih nge i tum?" tiin a in hrosa ve ta vak mai a.

ADVERTISEMENT CLICK