SUDDEN - TAKES THE TRAIL AUTHOR : OLIVER STRANGE (1940) EPISODE - 17

[HLalthazuala]

Dumb-Bell ațanga Dave-a chhuak ta chu chau hle mahse a hmelma hlun ber nia a hriat, Sark-a chu a sawisak avangin a hlim ve tho mai. Amaherawhchu Mrs Gray-i a la hmuh loh avang chuan a hlim tur angin a hlim tak tak thei lo a ni. A awmna ram vel chu a han en a, chung lai velah chuan Mullins-a leh a hote chu an awmin a ring ve a. "Mullins-a pawhin Mrs Gray-i kha a duh ve tho a, ama tan a nih loh vek pawhin Sark-a hian a ruai ve mai thei a ni. Mullins-a chu zawn chhuah a ngai a ni" a ti rilru a.
Darkar khat zet a sakawr a tlantir hnuin tlang lian deuh bul hi a thleng ta a. Tlanga lawn chhohna tur kawng chu Dave-a chuan a han zawng chhin vel a, mahse, a hlawhchham thuai a. Thing tamna lai, tlanga lawn chhoh theihna mai tur awmah chuan a sakawr chu a kal tir leh ta a. Thui tak a kal hnu pawhin an kalna kawng chu a la chho ta chuang hlek lo mai a. Chu bakah a hma lawkah chuan kal theina chi rual loha lungbang sang deuh mai chu a va hmu leh ta nghal a. Beidawng tak chungin a lo kalna lamah bawk Dave-a chuan a sakawr chu a kirtir leh ta a.
An kal thui tawh avangin a sakawr pawh chu a chau tawh hle bawk a ni. Tichuan a tira an tih ang bawkin tlanga lawn chhohna tur kawng zawngin tlangbul chu an hel țan leh ta a. Țum tam fe chu hlawhtling ngei dawnin Dave-a chuan a inhre țhin a. A țawpah chuan tui awmna hmun an va thleng ta hlawl mai a. Dil ang deuh hlek hi a ni a. Tlang ațanga lui lo luang thlain chu dil chu a rawn chawm a ni tih Dave-a chuan a hria a. Dave-a chu tui in turin a sakawr ațangin a chhuk ta a. Tui awmna chu a zuk pan hnai a. Chutih lai chuan Dil kama sakawr hniak chu a hmu ta a.
Ngaihdan thar a neih tak thut avangin Dil kam chu a han hel chhuak a, mahse, sakawr hniak dang chu a hmu leh ta chuang si lova. Dave-a chuan, "An lo kalna lam, luihnar an zawh chho leh a ni phawt ang. Tui in tura lo kal an nih si chuan a hnarah khan in mai awm, engahnge heti lai kher hi an rawn pan chu le?" a ti rilru a. Lui hnar lam chu Dave-a chuan a pan chho ve leh ta a. Lui chu thui fe a zawh chhoh hnuin tui khawhthla fit sawm zeta sang hi a han hmu ta a. Lawnna chi rual a lo ni si lova, mahse, luikam lehlamah chuan kal chhoh theihna tur lungpui sirah chuan kawng chhe te hi a lo awm a. Dave-a chuan a va enchiang a, sakawr hniak a va hmu ta nghe nghe a. Tichuan, a sakawrah chuangin chu kawng chu a zawh chho ve ta zel a.
A kalkawng chu a zimin a kikawi nasa hle mai a. Darkar khat lai a chhoh hnuin thinghnah kar ațangin a awmna chhak lama meikhu lo chhuak chu Dave-a chuan a han hmu thei ta a. Hnai viau hian a hria a, mahse, darkar khat lai a kal leh hnuin meikhu chu a hmu leh thei ta chauh a. Chutah zawng meikhu lo chhuahna hmun chu a hnaih tawh hle a, hmun biru deuh tak ațangin an awmna ram vel chu Dave-a chuan a han thlir chiang ta a. A kawng zawh lai chhengchhe chin chu Dave-a awmna chhak lawkah chuan a lo tawp tawh bawk a. Chutilai hmun chu a lo zawl țha leh tawh hle a.

Kawng han tawpna laiah chuan thing in, chhawng hniha sak hi a ding a. In hmalam leh sir velah te chuan thing pawh ding lovin a fai vek a, in hnung lam erawh chu lung bang chu a nghal mai a. A awmna hmun chu ngaw hnuaia awm a ni bawk a, bihrukna atana țha fahran hi a ni a. A tirah chuan tumah hmuh tur an awm lova, mahse Dave-a chuan reife a thlir hnuah in awmna piah ramhnuai ațang chuan mi pakhat sakawr chungchuang hi a lo lang ta a, kawt zawnah chuan a chhuk a, inchhungah chuan a lut ta a. Chu pa chu Javert-a a ni tih Dave-a chuan a hre thei nghal mai bawk a. Dave-a chuan, "Mister Mullins-a bihrukna hmun chu ka hmuchhuak ta ngei a nih hi," a sakawr beng bulah chuan a ti sap a. A awmna hmunah chuan a nghak ta reng mai a.
Zan a lo ni a, khu a lo thim hnu chuan in chhunga khawnvar inchhi pawh a lo eng chhuak tan ta a. Dave-a chuan a nghak thei ta ngang lova, a sakawr zin sira hruihrual chu a la a, a sakawr chu a kalsan a, in chu a pan chho ta a. Lungbang bulah chuan a han ding a, thawm a han ngaithla vang vang a. Reife a din hnuin in chhawnga tukverh ațang chuan a lo eng chhuak a, țawngri a hre ta a. Aw chuan, "Chaw i ei chhung chuan sathau khawnvar hi i kawl thei ang," a han ti a. Kawngkhar a han inkhar ri țhuai a, kailawna mihring lo chhuk thawm ni awm tak pawh chu Dave-a chuan a hre thei nghal bawk a, mi pakhat an tantir ni ngeiin a ring deuh a, "Mahse, Mrs Gray-i chu a ni kher dawn em ni?" a ti rilru a.
Rei ngial a nghah hnuin in chhunga awmte chu an mu tawh ngei niin Dave-a chuan a ring a. Tichuan, faifukin hla pakhat tunhma pawha a lo sak fo țhin, Mrs Gray-i pawhin a lo dem fiam țhin phahna hla, 'The Cowboy Lament' tih chu Dave-a chuan a sa ta a. A lu chung zawna tukverh ațang chuan aw zawite hriat theih tur tawk si hian, "Nangmah i ni elo, Dave?" tih ri hi Dave-a chuan a hre ta a. Dave-a chuan, "Ni e," zawite bawk hian a lo ti ve a. Amah rawn betu chu Mrs Gray-i tih a hriat mai bakah, Mrs Gray-i'n 'Dave' ti a a rawn koh avangin Dave-a lawm lutuk chu thimtham zingah Red Indian lam dan a han zir a, vawili lai a han virkual zak zak hman a, chumi hnu chuan, "An phuar che em ni?" tiin Mrs Gray-i chu a han zawt a.
"Phuar chu min phuar lo, mahse, ka nau tel lo chuan ka chhuak thei lovang," Mrs Gray-i chuan a han ti a. Mrs Gray-i thusawi awmzia Dave-a'n a han hriat chuan a thinrim lehzual a, "I nau chu an kawl miah hleinem," tiin a hrilh nghal a. Mrs Gray-i chuan, "Ka va lawm tehreng em," zawite hian a han ti sap a. Dave-a chuan, "Hrui ka rawn vawm chho ang a, a hmawr chu engah emaw lo thlung bet la, i lo uaithla thei ang em? I theih dawn chuan i eitur neih ang ang chu rawn keng nghal ang che, kan mamawh ngei ang," a han ti leh a.

Mrs Gray-i chuan thawm dim thei ang berin tukverh chu a rawn hawng ta a. Dave-a chuan a hrui chu a vawrh chho a. Mrs Gray-i chuan a lo man a. Khum keah chuan Mrs Gray-i chuan a han thlung ta a. Dave-a chuan, a dawl dawn leh dawn loh enchhin nan a han uai chhin a. Tahchuan, "Zawi zawiin lo uai chhuk rawh le," a ti ta a. Mrs Gray-i chu a lo uai chhuk ve mai a, mahse rang zet hian lei a rawn thleng thla nghal thut mai a. Dave-a chuan a lo pawm ding thuai a. "Ka kut a thip hle mai, mi rawn zawn chhuah ngei ka ring tlat a ni. Ka hmu che chu ka lawmzia ka sawi thiam lo," zawite hian a han ti sap a.
Dave-a chuan a kai a, a sakawr thlunna hmun panin a kalpui ta vat a. Mahse a sakawr chu a va hmu zo ta hauh lo mai a, Mrs Gray-i chuan, "I thlunna i hai palh a ni lo maw?" a han ti a. Dave-a chuan, "Ka hai lo, ka thlunna thing pawh a la din reng hi," a ti tlat a. An awmna bul vel chu an han zawng kual leh ngawt a, mahse, sakawr chu an hmu zo ta chuang lova. Dave-a chuan, "Ke ngawt chuan khawiah mah kan thleng zo chuang lovang, sakawr ruk tur han zawng mai ila a țha in ka ring," a han ti a.
"Mister, sakawr ruk te chu Deputy Marshal tan chuan a tihchi lovang, chuvangin ring nawn leh la a țha zawk ngei ang. Chubakah, ruk mai tur pawh heng laiah hian i hmu bawk hek lovang," tih ri chu Dave-a te pahnih chuan an hre ta mai a. Dave-a chu puakruk keng chungin a hawi chhuak thuai a, mahse, thim zingah chuan tumah a hmu thei mai si lova, aw pangngai bawk chuan, "Tunah hian Rifle leh puakruk in an tin reng che ania, luhlul han chhuah hram la kan duh ngawt mai, han entir rawh u," a ti leh a. Dave-a te pahnih dinna hual vela thingbuk chu a che ta lawih lawih a.
Dave-a chuan chet ngaihna a awm ta lo tih hriain, "In chan a țha zawk a nih dawn hi," a ti ve ta a. Dave-a chu an rawn hnaih sauh a, mahse an vaiin hmai an tuam vek a. Chu chu a hmuhin Dave-a chuan, "Mulins, i duh chuan i hmai khuhna kha paih tawh mai rawh, I hmel erawh chu tlemin a țhat phah ve deuh hlek a nih kha," a han ti a. Mullins-a chuan, "Fing i inti hle a ni maw? Nghaisak dan tur che kawng țha zawk hi hre lo na ila chuan tunah hian ka'n kap darh nghal vek mai tur che hi ania, mahse, i la nghak rih hram teh ang," a han ti a. Dave-a puakruk chu an laksak ta nghal a.
Mullins-a chuan, "I hun tawp i thleng a nih hi," a ti leh a. A hote hnenah chuan, "Phuar hlawm ula, thing in-ah sawn thehlut rawh u," tiin thu a han pe nghal a. Dave-a chuan, "Zing ațang khan engmah ka ei tawh lova, min nghaisa dawn a nih chuan eitur tal min pek lohvin, rei ka daih lovang," a ti a. Mullins-a chuan, "Naktuk zingah a tuar rei theih deuh nan ei tur chu pe ang che u. Hmeichhia hi chu keiman ka lo buaipui mai ang," a hote hnenah chuan a han ti a. Mrs Gray-i chu inah chuan a hruai kir leh ta a.

In chhung pindan chhung an luh hnuin khawnvar engah Mullins-a chuan Mrs Gray-i chu it hmel zet hian a han en a, "Enge i ngaihdan chiah?" a han ti a. Mrs Gray-i chuan, "Ka ngaihdan i hre duh a ni maw? I sual tluk chiahin i dawheh a, i dam rei dawn tawh lo bawk niin ka ngai, Jake Mullins," a ti ta a. A tirah chuan Mrs Gray-i thusawi chu Mullins-a chuan a la thutak deuh viau a, zam pawh a zam deuh hial a, mahse reiloteah ngai a awh leh ta thuai a, ring zet hian a han nui a. "Chutia ka daih rei dawn tawh loh rau rau chuan ka damchhung hun tlemte hi a nuam thei ang bera hman dan ka ngaihtuah mai aniang chu," tih pahin Mrs Gray-i chu a hnaih ta hruau hruau mai a.
Mrs Gray-i chu a tawlh hnung zel a, Mullins-a chuan a hnaih ve zel bawk si a. Mahse, a rilruah thidang a lo lut leh thuai a, sum a duhna chuan a riru chu a hneh ta zawk a. Tichuan, tukverha hrui uaithla chu a la ta a, Mrs Gray-i chu a phuarbet ta a. Mullins-a chuan, "I țhianpa tur nen kan thil kan tihfel hnuah tuna kan thiltih tum kan țhulh tak hi kan la chhunzawm leh dawn nia," ner deuh nung hian a han ti a. Khawnvar chu a chhemhlum a, pawnah a chhuak ta a. Mullins-a chhuah hnua Mrs Gray-i ti hreawmtu ber chu Dave-a chu a ni ta a.
Zing khawvar hnuin Dave-a tanna kawngkhar chu an va hawng a, thing lukhama Dave-a lo muhil pawh chu a lo harh chhuak ve nghal a. Kawngkhar lo hawngtu chuan hmai a tuam tawh lo tih a hmuhin Dave-a chuan, "I hmel i lan tir ngam ta a ni maw?" a lo ti a. Chu pa chuan, "I chunga thil lo thleng tur chu hria la, i hlim fahran lo tur," a han ti a. Tichuan, eitur a rawn ken chu Dave-a chu a hlui a. Dave-a an phuarna hrui chu a phelh sak a, sir lehlamah puakruk a Dave-a chaw ei lai tin reng chungin a lo thlir a.
Dave-a chuan, "Chaw leh Hmeichhia te hi chu innghah rei tir tur a ni lo ve' an ti bawk a, khawnge...," ti chungin chaw chu a ei ta hmawk hmawk a. Chaw a ei kham hnu chuan meizial a han zu leh vang vang a. "Engtinnge Mullins-a hnung hi i zui ve duh? Sual si, â hle bawk si; Bank an rawk țuma a thiltih dan atthlak ziate kha i hre ve nange?" Dave-a chuan a han ti a. Chutihlai chuan, "Mister, țawng tam lutuk suh khai, i lo inti hah ange?" Kawngkhar ațangin Mullins-a chuan a rawn ti ta a. "I sawi sei zel zawngin ka hming i sawichhe hlauh dah ang e," a rawn tih zawm leh a, ring zet hian a han nui a.
Dave-a chuan, "Thil chhe tawh sa tihchhiat leh chuan ngaihna a awm chuang em ni? Hei, ka bula Hmelțha-a hian chak turin min duh thu a lo sawi a, ka chak tawh viauin ka inhria, min chawm țha bawk a," a ti a. Mullins-a chuan thinrim zetin, "A țha a nih chu. Mi chak chuan hreawm pawh an tuar rei thei zawk a, an thi ve mai lo a nia," a han ti a. "Ni chhuah hnu, pawn khaw eng hmu thei ngeia thih hi ka duhthusam ve fo a ni țhin," Dave-a chuan a tihsan mai a. Mullins-a chuan, "I thusawi ang chu i hmu ngei ang, rawn hruai rawh ule," a hote hnenah chuan a ti ta a.

Sakawr chungchuang pali an lo lang nghal a, Dave-a chu pawnah an hruai chhuak nghal a, ama sakawrah chuan tirin an phuarbet tlat bawk a. Dave-a chu an kalpui dawn a, Mullins-a pawh a sakawrah a chuang ve tawh a, an kal hmain chaw rawn petu hnenah Dave-a chuan, "Hmelțha, dam takin le, Misual zinga i lo tel ve kher kher chu pawi ka ti ngawt mai. Mi țha tak ni thei ngei tur i ni na a le," a han ti zui a. Chu pa chuan Dave-a te liam hnu chuan, "Kha nau kha a pasalțha kher mai, ka pui thei lo chu pawi ka ti hle zawk a ni," a ti rilru ta hial a.
Dave-a chu an kalpui zel a, a changin hnimbuk kara ni zung lo tlang chuan a zuk chhun ve zeuh zeuh țhin a, mahse, hmun tam zawkah chuan ni pawhin a rawn chhun phak lo a ni. Thui fe an kal hnuin thing awm lohna hmun an thleng ta a. Chulai hmun chu a sa em em bawk a. Mullins-a chuan, "Hetilai hmun hi a țha ang. Ni sa a duh kha maw," a han ti a. Dave-a chu a'n hawi kual vel a, chutihlai chu thlaler ang maia țiauvut tamna hmun a ni a, hnimbuk tawi te te tih mai loh chu thing lian deuh hmuh tur pawh a awm lo. Dave-a rilru chu hria niawm takin Mullins-a chuan, "I thi hma lutuk dawna kan hriat avangin khaihlum che kan tum hleinem. Chuti maia i thih te chuan ka leiba i rul kim hman nang le," a han ti phawt a, a hote hnenah chuan, "Khai le, inpeih rawh u," a ti ta a.
Dave-a chu sakawr ațangin an hlang thla a, hnimbukin a țo hualna lai țiau leiah an va mut a, a kut leh ke te chu phuar vek mah se, a lei an phuar tel ve loh avangin Dave-a chuan chhawr a tum tlat a ni. Dave-a chuan hreawm nasa tak tuar tir phawt a, thihtir an tum tih a hriat avangin Mullins-a chu tih thinur a thih nghal mai chu a duhdan a ni zawk a, chuvangin, "Mullins, Uichoah pawh a dawihzep ber i niin ka hria, Sazupui tluk leka huaisen pawh ni la, i tih ngam loh ti turin i hote pali hi i ruai duhin ka ring lo," a han ti a.
A tirah chuan Dave-a chuan hlawhtling ngei dawnin a inhria a, Mullins-a chuan puakruk a phawi chhuak a, thinrim meng sen rum chungin Dave-a chu a zuk melh ta khuih mai a. Mahse, a han nui vak a, a hote chu tihdan tur a hrilh ta zawk a. Pahnih chuan Dave-a chu an vuan bet a, pahnih dangte chuan leiah thing pali an kheng bur ta bawk a. Dave-a chu zangthalin an muttir a, a ban an phar tir a, a ke pawh chuti bawkin. A ke leh a kutte chu ban an khen burah chuan an phuarbet tlat a, Dave-a chu chet pawh che theilo khawpa marin an phuarbet ta a ni.
Chutia an phuar beh hnu chuan Mullins-a chuan Dave-a chu a zu en a, "I ngainat em em, ni sa chu i duh tawkin i ai thei tawh ang. Heta niin a em ro hlan che hian kei chu Mary kiangah nuamsa takin ka lo khawsa dawn tih i hria em?" a han ti a. Dave-a chuan, "Jim-a'n phuba chu a la rawn la ang, hremhmun kawngkhar i hlat tawh vak lovang tih hre rawh!" a lo ti ve a. Mullins-a chuan, "Hremhmun chu min thlen khalh ngeiin ka ring. Tun ațanga ni hnih velah kan rawn kan leh dawn che a, chumi hnuah zawng, i ruang hi chinghnia emaw Mulukawlh emaw sihalin emaw an lo tlan ral vek tawh ang a, i ruhro chauh ka rawn hmu tawh dawn a ni," a han ti leh a.

Chutia a tih zawh chuan Dave-a awmna piah lawka lei lo pawng deuh bik chu a va en a, Mullins-a thil en chu hrelo in Dave-a chuan, "Nihnih hnuah i ti a ni maw? Nihnih i daih tawh lovang," a ti a. Mullins-a chuan Dave-a chu chhang duh tawh lovin sakawrah a lawn kai ta a. A hote zinga pakhat hnenah chuan, "Nakinah an va hmuchhuak ve mai ang. Hmuchhuak lawk lo se, hreawm a tuar rei deuh zawk anga, a țha zawk ang chu," a han ti a. Tichuan Dave-a chu an kalsan ta a.
An kalsan tirh chuan Dave-a chu chet pawh a la tum duh bik lova, Mullins-a leh a hote chuan a che hmuh chakin an la enthla ang tih a ring tlat a ni. Mahse, reife a nghah hnuin a theih anga sangin a lu a han tikang a, mahse, tumah a hmu ta lova, chet a han tum chhin leh a, a kut leh ke te chu an pawh char tlat avangin han chet ngaihna a awm lo tih pawh a hria a. Reivaklo chu an phuarna hrui tihdul tumin a han bei chhin a, mahse a sawt dawn miah lo tih a hre leh ta thuai a. Engmah tih tum lovin van lam enin a mu ta a.
Ni chu a la vanlaizawl lo bawk a, chuti tehchiamin a la hreawm rih lova, mahse vanlaizawl a thlen hunah a sat dan tur erawh chu Dave-a chuan a hrechiang hle a ni. Mullins-a khan, "Nihnih hnuah" a ti a. Chaw tel lo chuan Nihnih a dam theih ngei a inring a, "Mahse tui tel lo chuan..." a ti rilru neuh neuh a. Ni chu a lo sang tial tial a, Dave-a hreawm tuar pawh chu a lo nasa tial tial a, a pumin thlan tuiin a bual vek tawh a, chil lem harsa ti khawpin a dang lah chu a ro tawh a. A kut leh ke te pawh a mu zo vek tawh a, Chuti chung pawhin Dave-a chuan thih mai a la tum rih bik lo, taksa țhalai a ni a, thi mai tur pawh a la ni bik lo.
Chutia a mut lai chuan a ke hmawr chu thip zawkin a hria a, a hnu lawkah a kut hmawr pawh chu a lo thip leh ta a. Dave-a chu a theih ang a sangin a'n dak kang a, a taksaa fanghmir lo lawn chu a hmu ta a. Mullins-a thusawi, 'Nakinah an va hmuchhuak ve mai ang' a tih kha a awmzia a hrethiam ta nghal a. Mullins-a khan fanghmir te chuan a taksa chu an la rawn bawm khat tlat anga, zawi zawiin an ei hlum thei dawn a ni tih chu Dave-a chuan a hrethiam tawh a, hun reilote chhung chu thlaphan tak te hian a thlaphang hman a, mahse, a inti pachang leh thuai a, a chunga thil lo thleng chu chhel taka tuar zel tumin a maimichhing ta tlat a.

ADVERTISEMENT CLICK