*SUDDEN - TAKES THE TRAIL* *AUTHOR : OLIVER STRANGE (1940)* *EPISODE - 20* (Last Episode)

[HLalthazuala]

Sudden-a te hovin Mullins-a te bihrukna hmun an thlen lai chuan khua pawh a lo tlailam tawh hial a. Silai ri pawh a lo reh vek tawh a, mahse, zen rim erawh chu a la nam chuk chuk a. Thawm ngaithlain reilote an han ding rih a, Sudden-a chuan, "An inkap tawhlo chu a ni phawt mai, mahse, tu lam nge chak zawk kan hriat phawt loh chuan inlan rih lo ila a țha ang, ka va enchiang ange," a ti a, in awmna lam chu a pan phei a. In lan theihna a va thlen ațanga reiloteah tu lam nge chak zawk tih a hre ta thuai a, Inchhung ațanga lo chhuak te chu anmahni lam vek an ni tih a hria a, "Hei, Reddy," tiin Bar O foreman chu a va ko ta nghe nghe a. Ani chuan, "Jim, i lo kir leh thei maw? A nuam zawng i chan vek a ni," a lo ti a.
Sudden-a chuan, "A ni ngei ang, Sark-a hi khawiahnge a awm?" a han ti a. Reddy-a chuan, "Inchhawngah khian a awm, a lu-ah puakrukin a chhutsak a ni awm a, a thinrim zia mai chuh. Mullins-a chhut niawmin a sawi a, Mullins-a chuan Mrs Gray pawh a hruaibo a ni awm e. Nippert-a pawhin Dave-a nen Mullins-a chu in um ta niawm in a sawi bawk a," a ti a. Sudden-a chuan, "Mrs Gray chu kan rawn hruai leh tawh," a ti a. Reddy-a chuan, "A nih leh Mullins-a chu?" a han ti a. Sudden-a chuan, "Fit zathum vela sang khamah a tla thla a, lungah a zu insawh hlum ta a nih kha," a ti mai a. Reddy-a chuan, "Hruizen tih bawlhhlawh a ngai ta lo tihna a nih chu," a ti duh lek chauh a. In chhungah chuan an lut dun ve ta a.
Inchhunga mite chuan thil awmdan an lo zawt thuai a, mahse, anni pahnih chuan engmah an sawi duh rih lova. Sark-a chu lu tuam bur chungin țhutthlengah a lo țhu a, sir lehlamah mi panga, an kut phuar chungin an lo țhu bawk a. Owen-a leh, Nippert-a leh Sudden-a te pathum chu an ding hova, Dave-a pawh chu a lo lut ve ta a. Nippert-a chuan Mrs Gray awmna chu a lo zawt vat a. Dave-a chuan, "A mu chawl ta a nih kha," a han ti phawt a, an mi mante chu en chungin, "Hengte hi engtia tih nge in tum?" a han ti leh a. Owen-a chuan, "Kan khaihlum ang," a lo ti a. Dave-a chuan, "An zinga pakhat hi chu zuah tur a ni, ka nunna chhanhimtu a nih avangin," a ti a.

Owen-a chuan, "Bawng rukhmang a ni a, min dotute zinga tel ve a ni bawk si," tiin Dave-a chu a lo hnial a. Mahse, Dave-a chuan, "Amah vanga nangni pawh heta lokal thei hi in ni chauh zawk a sin," tiin a țang tlat a. Sudden-a chuan ngawi rengin chu pa kut chu a va phelh sak a, "Owen, he pa hi chu chhuak rawh se, inkah hma khan Mullins-a leh a hote chu a kalsan tawh a, kir leh tura kan ngen vang chauha an zinga tel leh a ni," a ti ta a. Owen-a țawng leh hmain Sark-a chu a lo ding chhuak a, "In zingah hian tunge hotu?" a han ti a. "I sawi duh chu sawi mai la, kan lo ngaithla tho ang," Nippert-a chuan a lo ti a.
Sark-a chuan, "Ka hote țhenkhat kha engvanga kaphlum nge in nih? A țhente kha engvanga umbo nge in nih?" a ti a. Sudden-a chuan, "Engvanga helai hmuna lo kalkhawm nge in nih min hrilh ta zawk che?" a lo ti a. Sark-a chuan a ipte ațangin Mullins-a lehkhathawn kha a rawn phawrh chhuak a, "Hei hi a chhanna chu a ni mai, he lehkha hi ka hmuh veleh pawisa ka zawng khawm a, Mrs Gray tlanchhuak turin hetah ka lo kal nghal a ni. Mullins-a chuan min bum a tum ka hlauh avangin ka hote pawh ka hruai nghal a ni," a han ti a. Sudden-a chuan a chhiar zawhin a țhiante a pe chhawng a, Sark-a hnenah chuan, "Pawisa chu khawiah nge i dah?" a ti a.
Sark-a chuan, "Mullins-a ka pe tawh mawle, nangni ho hi lo kal lo ula chuan Mary chu him takin Dumb-Bell Ranch ka thlenpui daih tawh ang chu, a peih veleh tunah pawh hruai ka la tum tho," a ti a. Sudden-a chuan, "A duh a thu aniang chu, tunah chuan ngaihtuah awm a ni tawh lo. Chuvangin i chungthu hi kan ngaihtuah hmasa phawt dawn a ni, țhu rawh Sark," a han ti a. Sark-a chuan, "Ka chungthu in ngaihtuah ang maw? Enge tihsual ka neih? Heta ka awm ve nachhan hi ka hrilh tawh che u a, in lam hawiin silai vawikhat pawh ka hmet puak hek lo, dan engmah.....," a tih lai mekin Sudden-a chuan, "Dan chu ka siam dawn alawm. Nippert, nang, Judge i ni ang, i Jury tur thlang nghal rawh. Sark-a puakruk kha laksak nghal la," a han ti a.

Sark-a chu a han hawi vel ruai ruai a, a lamțang tumah an awmlo tih a hrechiang hle a. Sark-a chuan, 'Ka chanchin hria tumah an awm chuang love' ti rilru chungin, Dumb-Bell Ranch-a Lyman-a ruang a kalsan tak kha a han ngaihtuah zui zel a. Lyman-a ruang a thukru ta mai lo kha pawi a ti deuh hlek a, chutiang thil a ngaihtuah lai chuan, "Kan inpeih tawh e," Nippert-a chuan a han ti a. Inchhunga mi te chu an ngawi ta duak a, Sudden-a chu a lo ding chhuak a, Sark-a chu a han kawk a, "He mi hian Jesse Sark tiin hming a invuah chawp a ni. A hming tak chu Ezra Kent a ni a, a Uncle thih hmain Sark-a chu Bentley lung inah a thi hman tawh. A thi ngei a ni tih fiah nan, Bentley Jail Warden lehkha pawh ka kawl a ni," a han ti țan ta a.
Inchhunga mi te chuan mak ti awm fe in Sark-a chu an en țhap mai a. Sudden-a Bentley khuaah a kal tih a hriat ațang khan Sark-a ngaih chu a țha tawh chiahlo a ni. Chuvangin phatna tur a lo ngaihtuah lawk diam a lo ni a, tichuan za lo deuh maiin a han nui a, "Chu chu a ni maw, Bentley khua i va tlawh chhan?" Sudden-a hnenah chuan a han ti a. Sudden-a chuan, "Ka kal tih engtinnge i hriat?" a han ti ve thung a. Sark-a chuan, "Sava te takte in min hrilh maw le," a lo ti a. Sudden-a chuan, "I Sava dawheh zet kha maw? Ka ka hup turin Squint-a kha i rawn tir tawh a tiraw?" a han ti ve a. Sark-a chuan, "Squint-a i tih chu tunge a nih pawh ka hre lo ve," a ti a.
Sudden-a chuan, "Hrelo mah la a pawi love, kan thusawi lai kha i han chhunzawm zel zawk teh ang u," a ti a. Sark-a chuan, "A pawi ka ti hlei nem. Mahse, Bentley khuaa i va hriat chhuah theih loh tawp tur thil pakhat ka han hrilh ang che. Ka thawhna Bank chu Kent-a'n a rawk a, Kent-a chu ka țhian a nih avang ngawtin kei chu min man tel ve ta a, in ang chiahin min hrem a, lung inah kan tang dun a, Warden lu tih hai ve nan hrim hrim hming inthleng kan rawt a, Jail hnathawktute chu an lo fimkhur teh chiam lo bawk a. Tichuan, kan bum thei ta a, Kent-a chu a thi ta a. Ka hmingin an phum ta tlat zawk a, chuvangin i lehkha khan awmzia a nei miahlo a ni," a han ti a.

Sark-a chu Sudden-a chuan fing a tih em avangin a ngaisang letling viau zawk a. A thusawi chu a awih miah lo va, mahse, awihawm thei tak niin a lang ve tlat si a, chuvangin, "I thusawi chu a dik tih hretu an awm em?" a han ti a. Sark-a chuan a dawt sawi lo tlip puitu ber tur a thah tawh avangin pawi ti rilru deuh tak chungin a lu a han thing a, "Lungin ațanga ka lo chhuah hnu chuan ka hming pangngai/ ka hming diktak chu ka chhawm leh ta a, mahse, tumah ka hrilh duh ta lo a ni. A chhan chu in hrethiam maiin ka ring, tin, engmah hriat...," a tih lai mekin, "Sark-a thusawi chu dawt a ni tih hrechiangtu chu keimah hi ka ni," tih pahin Sloppy-a chu a lo ding chhuak ve tlat mai a.
Sudden-a chuan, "Enge hriat i neih chu?" tiin a lo zawt a. Sloppy-a chuan, "He pa hi Sark-a a ni lo tih ka hria," a han ti a. Sark-a chuan, "Mullins-a zu thuhruk a chharchhuak a ni ngei ang, a rui chhe der a nih hi," nuihzat deuh mai hian a lo ti a. Sloppy-a chuan, "Ka rui lo, rui pawh ni ila ka fapa chu ka hai chuang lovang," a han ti a. Inchhunga mi te mak ti hmel chu a han enkual leh rih a, tah chuan, "Ka â ta emaw in ti a nih ka ring, mahse, ka â lo," ti chungin Sark-a chu a han kawk a, "I pa hming bul enge ni?" tiin a han zawt ta a. Chu zawhna chu a chhan theih si loh avangin Sark-a rilru chu a hah țan ta hle mai a.
Sawi tur hre lova a ngawih reng lai chuan, "I nu chuan i pa a neih hmain eng hming nge a put?" tiin Sloppy-a chuan a zawt zui zel a. Phat thuai a țul a ni tih hriain Sark-a chuan, "Chutiang thil tenau lutuk chu ka hre reng tawh lo, hliam na tak tuar ka nih avangin....," a han ti hman chauh a. Sloppy-a chuan, "I thusawi zawng zawng chu dawt vek a ni, nangmah pawh hi a tak ni lovin a lem chauh i ni bawk. An zinga tel i tum a nih si chuan Sark-a te chhungkua chanchin hi kim deuh zawkin lo zir la, i tan a țha zawk tur, i chawh lua a ni, ka nau. Țhiante u, Ray Sark-a, Amos-a unaupa, Jesse-a pa ka ni," ti chungin Sark-a hming invuaha chu a kawk ta a.
Thawm bengchheng Khap nan Nippert-a chuan a puakruk kawmin dawhkan chu a han kik kauh kauh a, "Sloppy, he pa hi Jesse Sark-a a ni lo tih a tir ațanga hria i ni awm si a, engahnge hman ațang khan i sawi chhuah mai loh?" Nippert-a chuan a han ti a. Sloppy-a hming putu chuan, "ka hlauh vang a ni. Amos-a ruang hmu hmasa bertu pawh keimah ka ni. Chutih lai chuan Drywash khuaah ka awm a, Amos-a chu hmuh tumin Welcome ka pan a, kawng lakah Amos-a chu ka hmu ta zawk a. A tirah chuan a thi lo nghe nghe a, a bula ka awm laiin a rawn meng chhuak a, 'Nangmah hi i ni maw? Nang leh i fapa lungin tanga khan engmah in hlawk phah chuang lovang, ka ro khawmtu atan Mary ka ruat tawh,' a ti a, a thi ta nghal mai a.

"Ka dinhmun chu ka ngaihtuah chiang a, midangte pawhin ka thah niin an ngai vek dawn tih ka hrechiang a, chuvangin a sakawr chu Ranch in panin ka hnawt tlan vak a, kei erawh chu ka tlan bo ta daih a ni. Chumi hnu rei deuh takah chuan Dumb-Bell Ranch chu ka fapa in a rochun tih ka hre leh ta a, chutah zet chuan, Amos-a chu ka thah a ni ang tih mi zawng zawngin an ring nghet tlat tawh dawn tih ka hria a, a hma ai daihin hreawm ka ti zawk a. Chutih lai chuan Jesse-a thih thu ka la hre lova, he pa hian Jesse-a hming inchhalin Dumb-Bell Ranch chu a rochun ta bawk si a. Tichuan, dawihzep kawng chu ka thlang ta zawk a, ka hmui leh khabe hmul te ka zuah sei a, Welcome khuaah chuan ka va lut ve ta a, tumahin min lo hrelo bawk a, reife ka awm hnuin Jim-a hi a lo lang ve ta a ni." a ti a.
Sloppy-a thusawi chu Sark-a chuan deuhsawh deuh maiin a lo nuih a. "A rui lo, a thluak a buai a ni zawk, a thusawi awihawm loh zia in hre ve vekin ka ring. Ranch țha tak a fapain a thunun tih hrereng chung siin a sawidan chuan midangin an nei ta tihna a ni a. Ray Sark-a, ka pa niawm tak te in a inchhal a, mahse, a ni miah lo, Jo leh Amos-a a that a, ka thah anga lantir a tum niin ka hria," a ti ve thung a, țhenkhat chuan Sloppy chu ringhlel deuh takin an lo melh hlawm a.
Sudden-a chuan a ipte ațangin vaihlo ip a rawn phawrh chhuak a, Sark-a chu entir chungin, "Hei hi Amos-a kahhlumna bula ka chhar a ni a, tunhmain i hmu tawh ngai em?" tiin a zawt a. Sark-a chuan, "Hmanah khan min hmuh tawhin ka hria," a ti a. Sudden-a chuan, "Ka entir lai che khan engvanga min dil nge i nih?" a han ti leh a. Sark-a chuan, "Thil tlereuh hi ka lawm vang mai mai a ni," a ti a. "Bawm chhungah hian E.K tih a in ker leh ker loh en i duh vang mai mai a ni ti raw? I hre duh a nih chuan a in ker teh meuh mai," Sudden-a chuan a ti ta a. Sloppy-a chu a nui deuh țha a, "Naupangte a nih lai ațanga Mary chuan a uncle chu hmu tawhlo a ni a, chuvangin a hrelo tawp ang. Jesse-a chu ni la, chutiang mai mai chu i hrechiang ve tur," a han ti a.
Sark-a chuan, "Ka hria a, i hre ve em tih ka han chhin mai mai che a ni," a ti a. Dumb-Bell Ranch a tihtur pawimawh tak a neih chu a han ngaihtuah a, hun remchang neih a duh hle mai a. Lyman-a lehkha pawimawh kha hmuh chhuah a, a tih chhiat hman hlauh chuan.... a rilru a siam ta thuai a. Sloppy-a chu a han kawk a, "Ray Sark-a a in ti a. Mahse, fiahna engmah a nei lo. Tin, 'Jesse Sark' i ni lo ve min ti bawk a, hun tlemte min pek theih chuan dawt a sawi a ni tih ka fiah thei ang. Tunah hian kan zingah Lyman-a han awm ve phei se chuan...." a tih lai mek in kawngkhar bul ațang chuan aw tham deuh țuak hian, "A awm ve asin," a rawn ti ta a.

Kawngkhar bula ding te chuan kawng an lo kian sang sang a, tichuan inchhungah Negro pakhat hian pa te tak te, kawrchung dum, thisen kai hnuang chunga ha hi a rawn kuah lut ta a. A hmai te chu a dang chhe vek tawh a, a hmel chuan mitthi hmel a ang ber a, thinurna leh huatna hlira khatin Sark-a chu a han en a. A kiangah chuan a va ding ta a. Sark-a chuan ang deuh huau chung leh meng phawk hru chung hian a lo en ve bawk a. Lyman-a thi tawh anga a kalsan chu tunah a hmaah a lo ding leh ta a ni. Lyman-a mitmeng a han hmuh ațang ringawt pawhin Sark-a chuan beiseina a nei tawh miahlo tih a inhria a, chuvangin, "Sent' min chhan rawh. Kan țangdun chuan hlawhtling takin kan la awm..." a han ti hman chauh a,
Ngaihthlak hreawm deuhin Lyman-a chu a nui ta a. "A thusawi chu in hre ve em? Hremhmun ațanga amah tichhe tura lokir leh hnenah khawngaihna a lo dil a nih chu," a ti a, a han chawl leh rih a. Lyman-a chuan Sark-a chu a han kawk a, "In hma țhutthlenga țhu hi Ezra kent, dawt hmang, ruk ruk leh tualthah ching a nih hi, ka thu ngun takin lo ngaithla rawh u. Dumb-Bell ram ka awhna hi a rei tawh a, Amos Sark-a'n Lawer a min hman ațangin neih theih dan kawng ka ngaihtuah chhuak ta a. Jesse Sark-a chu chhawr ka tum ta a, mahse, lunginah a thi ta si a,..... tichuan..... he thil hi ka hmang ta zawk a.....," tih pahin Sark-a chu a kawk a.
".......Amos-a thurochhiah phuahchawp chu thil harsa lo tak a ni a, tin, henglaia mi te hian Jesse Sark-a chu an hriat mai loh avangin hlawhtling ngei dawnin ka inngai tawh a....." tiin a han chhunzawm a, a hah tawh avangin thawk a han la leh rih a. Lyman-a chu eng hunah thi mai thei ni hian a lang a, mahse, a thih hma ngeia Sark-a chhiatna tur thlen tir chu a tum ruh hle a ni tih a mitmeng ațang chuan a langchiang hle a. Dumb-Bell Ranch ațanga helai hmun a rawn thleng thei pawh hi thil mak tak a tling a ni.
Sark-a pawh chuan mit la lek lovin Lyman-a hmuiphun ringawt chu a en tawh a. Lyman-a bawk chuan, "Amos Sark-a thah kha chu ka thu a ni lo. Mahse, Ezra kent-a hian a nghak thei ngang lo a ni. Dumb-Bell chu ka nei tawh a, mahse, Welcome khua hian Marshal thar an nei ve ta a. kan mi â Ezra Kent-a hian hmelmaah a lo siam leh ta si a, chu chu ka chhiatna bul a ni ta," a han ti leh a, a chau lutuk chu a han thaw leh hawk hawk a, tahchuan, "Mrs Gray rubo turin Mullins-a i chhawr a, Mrs Gray chu nupuia neih a, i dinhmun sawh ngheh i tum a, mahse, chutah pawh chuan i hlawhchham leh ta a. Dollar sangnga senga Marshal hi thah i tum leh ta a, chu pawh chu i hlawhchham leh ta zel a nih kha," tih pahin a ipte a a lehkha ah chu a phawrh chhuak a.

Sark-a hmai zawna keng chungin, "Heng lehkha te pawh hi hmuh tumin i zawng a, i hlawhchham leh ta zel a nih kha. Ka inpuanna thu leh Amos-a thurochhiah dik zawk ziahna lehkha a nih hi. Amos-a chuan a thil neih zawng zawng Mary Gray a hnut chhiah vek a ni. Heng lehkha ka dahna hi a him tawk viau reng a ni. Nang, mi â hian i kal pel fo a, nikhat chhung lek pawhin vawi tam i kal pelin ka ring, Dumb-Bell Ranch-ah ka thukru a nih kha.... he... he.... I rilru a khawih hle mai maw? Min thah i tum a, mahse, khaihlum tir tur che in ka la dam a nih hi," a ti a.
Lyman-a thusawi chu hriat harsa khawpin a chiang tawh lo a ni. A sawi zawh rual chiahin a zawi hnawk a, Juba chuan a lo pawm thuai a, chhuatlaiah chuan a muttir a, a mar a deh sak a, "A thi tak tak ta niin ka hria," a ti a. Inchhunga mite chu an ngawi țhap mai a, Sudden-a chuan a lukhum a phawk a, midang te pawh chuan an phawk ve a. Mumanga thil hlauhawm tak hmuh hnu a, harhchhuak leh ang mai hian Sark-a chuan a lu a han thing a, inchhunga mi te chu a en vel a, khawngaihtu hmel hmuh tur a nei ta lo a ni. Nippert-a chuan, "Ezra kent, sawi duh enge i neih?" a han ti a.
Chianglo ruai hian Ezra Kent chuan, "Lyman-a thu a engkim ti ka ni a, Dumb-Bell Ranch-ah pawh a thu hnial ka tum avangin puakrukin min tin ta a, chuvangin mahni inven nan chemte ka hmang ta mai a ni. Min khawngaih lul rawh u," a ti ta a. Nippert-a chuan, "Amos-a chungah eng khawngaihna nge i lan tir?" a han ti a. Ani chuan, "Lyman-a'n min tilui a ni," a han ti leh hram a. Nippert-a chuan engdang sawi lovin Jury tura a thlante chu a han en a, anni chuan a mal malin an lu an lo thing țheuh si a.
Ezra Kent-a chuan an hmel chu a hmuhin thiamloh an chantir tih a hria a, khaihlum ngawt loh chu hmabak a nei tawhlo tih a hre bawk a, thawk harsa ti niawm takin a han meng pual vak a, țhutthleng ațangin a tho chhuak a, chhuatlaia Lyman-a ruang chu a zu delh ta a. Nippert-a chuan a zuk bih chiang vat a, "A boral ta, zam luat vanga thi a ni ngei ang. Hetiang thil hi ka la hmu ngai lo, hriat pawh ka la hre ngailo, a mak hle mai. Khawnge, Jim-a kha?" a ti a.
Sudden-a chu tuma hriat lohvin a lo putchhuak hman tawh a, mahse, Bar O Cowboy pakhatin, "A buaithlak lo zawk ang chu, hruizen engzat nge kan mamawh dawn?" a tih lai mekin Sudden-a chu a lo lut leh a, "Pakhat mah kan mamawh lovang, vawin atan thi an tam tawk hle in ka hria," a rawn ti a. Owen-a chuan, "Heng ho hi bawng rukhmang, kan bawng rutu an ni, chuvangin ka khaihlum dawn," a han ti a. Sudden-a chuan, "Man phawt la, i la khaihlum dawn nia, khaihlum i tum ang tih ka hriat avangin ka chhuah vek tawh a, an zam tawk tawh bawk a, umphak an har tawh ngawtin ka ring," a ti ta a.
Inchhunga mite chu an han hawi vel a, pindan pawn lama rukru an phuar te chu an awm tawhlo tih an hre ve ta a. Lyman-a te thusawi an ngaihthlak lai khan thildang an lo ngaihtuah chang tawh lova, chutih lai chu chuhin Sudden-a chuan a lo chhuah vek a ni tih an hrechhuak ta a ni. Owen-a chuan, "Marshal pawh ni ngawt mahla, anni kha chhuah theihna thu i nei ngawt hlei nem," a han ti a. Sudden-a chuan, "Marshal ka ni tawh lo, ka chhuahtir hmain ka bang tawh, Sloppy, ka Badge kha Nippert-a i la pe nange?" a han ti a. Sloppy-a chuan nui deuh țhu chung hian, "Ka lo theihnghilh daih a ni, kan buai hlawm em a," a lo ti a.

Sudden-a chuan, "Owen, khaihlum tur i duh ve hrim hrim a nih chuan keimah hi min khaihlum mai rawh," nui chung hian a han ti a. A thusawi chu anglo lutuk a an hriat avangin in chhunga mite chu an nui zo ta a. Owen-a erawh chu a thin a la ur hle mai a. Nippert-a chuan, "Bar O tan Jim-a thiltih țhat zia hi kan ngaihtuah chuan a lakah in ba nasa hle zawkin ka hria," Owen-a hnenah chuan a lo ti ve ta a. Owen-a pawh chu mi pangngai tak a ni a, chuvangin, "I ti dik e, min ngaidam rawh Jim," tih pahin Sudden-a chu a kut a pe a, chibai an inbuk ta a. Sudden-a chuan, "Țhian mamawh lo apiang mihring fa an awm ngai lo," a han ti a.
Rukru leh misual an bo ta bawk a, Welcome khua chu an zalen tawh hle a, Sudden-a leh Dave-a chu Marshal Office kawtah an țhu dun a. Dave-a chuan, "Jim, engtikah nge kan chhuah dawn?" a ti a. Sudden-a chuan, "Tun ațanga ni hnih velah. Mahse, nang chu i tel ve dawn lo, he khuaah hian i awm dawn," tiin a chhang a. Dave-a chuan, "Ka awm dawn lo, thil kal tawh hnu kher chhuah, kher chhuah a ngai em ni? I ngawi ve mai mai thei nange?" a han ti a.
Nui chungin, Sudden-a chuan, "kal ve i tum thu Mrs Gray-i i hrilh tawh em ni?" a ti leh a. Dave-a chuan, "Hrilh nang, eng ang mihring nge ni a min hriat reng reng le?" a han ti a. Sudden-a chuan, "Pathianin nung tura a thawkkhum, leitlang zinga mawl ber i niin ka hria," a ti a, a tho ta a. Sudden-a kal chu Dave-a chuan a en zui reng a, "Jim-a hian thil awmdan a hrethiam ve lo a ni," ama hriat tham lek hian a ti sap a.
Mahse, Sudden-a chuan a hrethiam teh meuh a ni. Mrs Gray-i dawrah a va lut a, "Dave-a a lo kal lo maw?" a va ti a. Mrs Gray-i chuan, "Kal lo, niminah pawh a lo kal lo, chaw a chak ta lo a niang," a lo ti a. Sudden-a chuan, "Chak lohna chhan a nei ngei tur a ni, mahse, khua kan chhuahsan hunah a la chak chhawm ve mai ang chu," a ti a. Mary chuan, "In kalbo dawn em ni?" a lo ti vat a. Sudden-a chuan, "Dawn e, tunhnai lawk ațang khan Dave-a hi a danglam riau mai, a zakzum ta ni berin ka hria, intih hausak ngawt a ngaihtuah a ni awm e," a han ti leh a.

Mary Gray chuan, "Engvanga hausak chu chak ta thut nge a nih?" a lo ti a. Sudden-a chuan, "A thil neih theih loh neih a tum aniang chu," tiin a chhang a. Mary chuan a hrethiam ta mai a, hlim deuhin, "Jim, ka țhianțha ber i niin ka hria, i ngaihdan i......" a ti hman chauh a. Sudden-a chuan, "Ka rawn ngaihtuah ange," a ti vat a. Pawnah a chhuak ta thuai a. Office ah a va kir leh a, Dave-a hnenah chuan, "Dave, Mrs Gray a damlo a, a na viau mai," a ti a. Dave-a chu a zuangtho vat a, Sudden-a chu Dave-a hmuh hlauin lehlam hawiin a nui vur vur a.
Dave-a chu Mrs Gray dawrah chuan a va tlan lut a, dawhkan bawha, Mary lo țhu chu a pawm chawt mai a, "Mary, Engtizia nge? I damlo tih Jim-a'n min rawn hrilh a," a han ti a. Mary chuan, hlim takin, "Jim-a tak hi chu aw, ka damlo a ni ber ang chu, i kalbo dawn tih ka hriat avangin...," a han ti a. Dave-a chuan, "Mahse, Mary, kei chu...." a tih laiin Mary chuan, "I hlawh a ni e, nang chu Ranch neitu i ni tawh si a, enge kan tih tak ang?" a han ti a. Mary chuan, "Ka rilru leh ka Ranch chu i enkawl thei ngeiin ka ring," a lo ti a.
Chumi ni tlailam vekah chuan Red Light Saloonah Nippert-a chuan Sudden-a chu kalbo lo turin a thlem ve ngat ngat a, Sudden-a chuan, "Kalbo lo thei ka ni lo, tihtur ka la nei a ni," tiin a țang tlat a. Nippert-a pawhin hnial ngaihna hre lovin, "I kal tur chu ka huphurh ngawt mai," a ti a. A tuk zingah chuan khawvar veleh Sudden-a chu Drywash panin a chhuak ta nghal a, a tihtur hmabak huphurhawm tak chu bei zui zel turin kawng khawharthlak tak chu a zawh țan leh ta a.
A TAWP TA.

ADVERTISEMENT CLICK