SUDDEN - DEAD OR ALIVE (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

SUDDEN - DEAD OR ALIVE (COMPLETED)

Unread post by Rozami pachuau » May 14th, 2018, 8:51 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 1


"Marshal, ka hrilh dawt mai ang che, Jail-ah chuan ka lut dawn lo reng reng," tia thu rawn sawitu chuan a thu sawi chu a sawi chhuak satliah mai a ni lo va; ramsa dan chêp ang maia Bar bula dingin, pistol phàwi mai tuma pistol kawm hnaih taka a kut zung phar kâk ṭá-in leh thip zeta a hmaa ding chu melh chunga sehchilh deuh rapa a sawi a ni.

Chu pa mitmeng chu sazu mitmeng ang mai a ni a, hmui leh heh pan hleng hlawng, hnar zum tak mai a ni. Ramsa dan chêpte hi hlauhawm tak an ni ṭhin a; chu pa pawh chu ramsa dan chêp ang maia tlan chhiatna nei tawh lova táng tlat tawh, a kaw tawpa ṭan khawh ang mai a nih avangin a hlauhawm kher ang.

"I kal dawn khawp mai! I kal loh pawhin i khela i thil pài kha min hnutchhiah a ni ang chu," tia rawn chhâng let ve thungtu, dan chêpa ding hmachhawn mektu hi chu tlangval la naupan hmel tak leh chu lai rama hmel thar tak, Mike Hyde-a a ni.

La naupang hle mah se dan ken kawh thiam tak leh hna bumro tak tak te pawh lo hmachhawna, khawpui rura tak taka lo ngampa tawh tak a ni. Tunah pawh hian, chu dan ken kawh chu a tum tlat a ni. Tuna a dinhmun aia khirhkhan ngial ngial aṭanga a lo khawchhuah tawhna chuan a thil tih theihzia leh a rothapzia chu a lantir hle a ni.

"Ka silai hi i duh a nia maw? I duh a nih chuan lo kalin rawn lâk han tum chhin teh reng la," tih pah chuan chu thu rawn phuh chhuaktu chu a inring zual sauh a, silai phàwi mai tum hi a ang hle tawh a. Hyde-a hmingthanzia chu hria pawh ni se, engah vak a ngai bik lo a ni ngei ang. "Tu mahin buaina tâwk lo chuan Cullane-a silai hi an laksak ngai lo," a'n ti leh ngat a.

Chu pain a nihna a han pùan tâkah chuan Saloon chhunga a thu sawi lo hre pha chin chuan thâwk an la huai a. Chu lai ram chhunga cheng, Cullane chhungkaw chanchin hre lo chu an tlem hle reng a ni. An chet rura dan te, mi an rawk a, pawisak an neih loh dan te leh San Geronimo tlanga an tawm buk ngelnghehzia te chu mite sawi huai huai tur tling a ni.

Thlirtute zinga pakhat chuan a bula mi hnenah chuan, "Saw saw, Cullane chhungkaw zinga pakhat chu a lo ni reng a maw? Min zâwt ni la chuan 'hmelchhe lutuk a ni' tiin ka hrilh ngei ang che," a lo ti sap a. Pakhat pawh chuan, "Ka zawt hran lo che a; mahse, i sawi dik hrep mai! Ṭum khat ka hmuh hnaih deuh ṭum phei kha chuan, a ka chhungah sawn nghakuai ang zet thil kawm van hi a awm asin," a lo ti bawk a.

Chu mite fiamthu chuan Marshal Hyde-a rilru chu a la peng chuang miah lo va, ngun takin a hmaa ding chu a en ran a. Chu mite pahnih thlirtute zawng zawng chûan buaina lo chhuahna bul chu an hre chiang hlawm khawp mai. Hyde-a chuan chu khaw chhungah chuan Cullane chhungkua an ni emaw, ni lo emaw, tu ma'n silai an pai reng reng chu a phal lo tawp mai a ni.

Cullane-a silai pai chu a phal vaih chuan mi dang pawh pai tur an tam em em a. Darkar tlem tê chhungin inthahna namen lo a lo thleng lehnghal ngei dawn a. A Dan siam chu ken tlang ngei a tum tlat a, mi dangte pawhin an duhin, chutih lai ngei pawh chuan puitu tur a'n melh kual ngial a; mahse, tu mahin eng mah an lo sawi lo va, che lo chang lovin an lo thlir reng ringawt mai a ni.

Fronteras khua chu khaw tê reuh tê leh mihring awm chhun pawh puitling hlir an nih lai chuan khaw rura tak a ni a. Chhim kil ram chhengchhe tak, Federal Law awmna khua aṭanga ni eng emaw zat kàl ngai a niin, a mi chengte pawh chuan mahni sahimna ringawt an ngaihtuah avangin Hyde-a pawh chu amah a inven theih leh theih lohvah a innghat ringawt a, tu mahin ṭanpui tumna reng reng an nei lo.

"In Marshal chuan sakei meiah a vuan ta tlat mai le!" tiin tukverh bula mi pakhat chu, 'silaimu leng laka inven nan' tia zuan sawn vat inpeih sa ran chúan a rawn ṭawng chhuak a; a ṭawng pah chuan a khur deuh dat dat a, hlim hmel put hram zawng a'n tum na a; a hlawhchham chiang hle.

Chu pa thu sawiah chuan mi dang chûan an rilru an nghat hauh lo va, en pawh an en chhin duh lo; mi pahnih, inhmachhawn tlatte chu an en ran hlawm a. Hyde-a pawh chuan, thu a lo titlu tawh a, a thu tihtluk chu ken kawh ngei a tum tlat avangin a hmaa mi chu insehruh ṭeuh chungin a en tlat tawh a. A hmelah chuan a hmaa mi chu a cho hliah hliah tih hai rual a ni lo.

"Cullane, ka inhnuk hniam dawn miah lo a nia, chu chu i hming a nih pawhin eng mah a lem chuang lo. Mi dangte tih dan ang bawkin i silai chu ṭha takin rawn dah ve mai rawh; chutianga i tih loh chuan, tan in chu i pan nghâl dawn a ni," a rawn ti chhûak chheu chheu a.

"Phiangsen tak che hian, dar arsi lem vuah pa!" tih pahin Cullane-a chuan a pistol hnum hlarh leh a lo hman ṭhan êm êm chu rang lutuk tak hian a'n chuh a. Chu chu chutiang khaw tê reuh tê Marshal tih ang reng a lo thah tawhna leh mak tia a lo làmtir tawhna a nih avangin chutiang tih châk tak chúan tunah pawh hian a meng val a; mahse, chutianga meng kual vel chung chuan a thihna a dái thleng ta hlauh a ni.

Hyde-a chu a phawi rang em a ni, rang tih satliah mai a ni lo, rang berte zinga mi a ni ang. A silai chu Cullane-a'n a chuh aṭanga second tlem têah khan a rawn ri dawt a; a ri leh dawt a; a mu hmasa chûan Cullane-a áwmah tak a va verh siah a; mu hnihnain a mit leh mit inkarah chiah a verh kaw phawm bawk a. A hnunga a den tur ang ang a den hma chuan Cullane-a chu a thi chiang hman kher mai!

Hyde-a'n a mi thah, silai kàu leh inring tak chunga a pan lai chuan a kamsirah chuan thisen lar lo tak hi a rawn luang chhuak ngiai ngiai a, inring tak chung hian, "Che ve tur dang in la awm em?" tiin a han zawt a. A mitmengah leh a khawsak dan hrim hrimah chuan, che hlek chu thah a inpeih tih a lang chiang em em a ni.

Mi tu emaw hian, "Marshal, mi dang che ve tur an awm tawh lo. Kha pa kha Mosia ang maiin a thi chiang tawh e," a lo ti a. Marshal chûan a'n bih zawk zawk a, a thaw hap hap a. A pistol, a páia a khung hnuin mitthi bulah chuan a zuk ṭhingṭhi a, a mar zawng ni awm takin a ngháwng chu a han khawih a, "I thu sawi chu a dik e. Engati nge mi dangte ang bawka a silai hi a dah ṭhat ve mai loh chu le?" a ti ta ringawt a.

Beidawng takin a ding a, a thil tih chuan a duh aiin nasa takin amahah chuan nghâwng a rawn nei ta a ni. Dan ken kawh chu a duh ngei mai; mahse, thihna em hi chu thlen loh a duh fo; mahse, tunah chuan a nih tur ang ang a nih tawh avangin a tho va, Bar lam pan chuan mi dang lo pung khawmte pawh chu a kal pel ta a.

Mi tam takin a thil tih avang chuan chibai buk te an lo tum a, hmel hlim tak te an lo hmuh bawk a; mahse, mi pahnih chu Doc. Ziegler-a hnena ruang chu va dah turin a tir a; Bar nghâktu, laiking, a tawmna puk ko aṭanga ṭi taka rawn dâk chhuak ni awm tak hnenah chúan, "Eddie, in tur mi han pe teh; ni dang aia tam deuh khan han ti nghe nghe la," a ti ta a.

Eddie-a, Bar nghâktu, pa lian zet chuan rang takin, "Mike, inkah in ṭan hma aṭang khan, i in turin ka lo siam peih vek tawh asin. I mamawh dawnin ka hre tlat a," a lo ti thuai a. Eddie-a chu pa lian tak, hmuihmul kî vun nei a ni a, boruak sáng deuh han tawn chu a tlin vak lo a ni ang, khawnvar engah chuan a thlan tla chu a tle hlurh a. Hyde-a pawh chuan hlim hmel put a tum hle a; mahse, a nuiah chuan hlimna zawng a tel hauh lo.

Marshal chuan, "He laia mite'n keimahah rinna an nghat ta a ni tih han hriat hi nuam ka ti khawp mai; nichin deuh lawkah kha chuan ṭanpuitu hmel chu a vàn teh kha le!" a han ti a. Big Eddie-a chûan, "Tlangval, heng laia mite dinhmun chu i hria a, an nih ang ang an nihah khan demna tur i nei thei lo vang. An chhawrna chhan che i ti a ni mai a; ṭanpui i beisei tur a ni lo," a lo ti vat a.

Mahse, Marshal chuan, "Ka hria alawm. A langin min ṭanpui ngam chiah lo mah se rilru talin min thlawp tur a ni," a lo ti vat a. Mahse, Big Eddie-a chuan, "Rilrua thlawp te chu i ti duh e a, Fronteras-ah hian rilrua thlawp i beisei a maw? Mike, chutiang a awm theih loh dan hre tur chuan i upa tâwk ve tawhin ka hria," a la ti ta zel a.

Marshal chuan, "Ni khawp mai; mahse, thil awm dan an hmuh..," a tih laiin Eddie-a chuan, "Tuna i thil tih an hmuh avang khan maw? Cullane-a fate zinga pakhat i thah tâk kha mahni intih lar nan ṭha viauin i ring a ni a, tin, lamṭang siam nan pawh ṭha viauin i ring a ni maithei; mahse, eng mah hre lova rui let reng bâk chu tu mah lamṭang i siam chuang lo vang. Cullane-a do tura mi zawn nan phei chuan thil harsa lam a ni tlat; Cullane-a hi haw ṭheuh mah ila; do tura inbuatsaih chu rilru thara ngaihtuah a ngai asin," a lo ti ta tlat a.

Hyde-a pawh chuan, "Chu chu a ni kei pawhin ka ngaihtuah mek chu ni; keimah hi chuti takin ka inngaihtuah bik hlei nem; khua hi ka ngaihtuah a, ka enghelh zawk chu a ni. Heng kan mi sual rual ho hian tuna ka thil tih tâk avang khan khaw chhung mipuite chungah hian eng mah tih tur an neih ka hre lo," a han ti leh a.

Big Eddie-a pawh chuan, "Ka hre thiam phâk bik lo le; mahse, nang chu ni ila chuan ka vun himna tur ber hi ka ngaihtuah hmasa ngei ang," a lo ti a. Hyde-a chuan, "Kan inhmachhawn a, fair takin thahin a awm ta a nih ang chiah khan, an rawn ngai ve mai lovin i ring em ni?" tiin a han zawt a.

"Khatiang chiah khan rawn ring ve mai atan an ṭha; mahse, ka ring chiah lo asin. Old Cullane-a thu sawi ka lo hriat tawh dan aṭangin thil fel leh ṭha hi a awm hlei thei lo va, ama thu chhuak chauh lo chu fel leh ṭha a tih ka la hre lo tlat," Eddie-a'n a han tih chúan Marshal chuan, "Chu, eng thu nge min hrilh i tum tâk chu? Mei khupin he khua hi chhuahsan turin min duh tihna a ni maw?" a lo ti thuai a.

Eddie-a chuan, "Tlangval, chu chuan awmzia a nei ber ang. A huaisenthlak loh nain; awmzia a nei thui zawk dawn a ni," a ti a. Aw ki sáng deuh zawk hian Hyde-a chuan, "Ngawi teh, Eddie, mei khupa he khua aṭanga ka tlanchhiat phawt chuan eng ti kawng mahin khaw thlang ramah hían hna ka hmu leh ngai tawh lo vang. Chu chu keimah aiin i hre chiang zawk daih alawm," a ti ta a.

Mahse, Eddie-a chuan, "Marshal thi tate zinga chhiar tel nih ai chuan khawi maw laia lehkhabu hralhtu nih pawh a hlu zawk daih a ni lawm ni?" a lo ti ve hmiah a. Hyde-a chuan, "Fiamthu thawh tawh suh! Hetah hian Dan leh thupek ken kawh dan tur ka ngaihtuah a nih hi. Cullane-a hlauva Fronteras khua hi tlanchhiatsan ka nih ngat chuan he khua hi i rin phâk aia rangin setan-a khawpuiah Cullane-a hote hian an rawn siam leh nghâl mai dawn asin," a ti ta a.

Big Eddie-a chuan, "Tlangval, Cullane-a leh a fate hmachhawn ai chuan setan-a, ṭàwn hlawm tuma beih pawh hi ka thlang daih zawk asin. Chutiang khawp chuan Cullane-a leh a fate hi an hlauhawm a ni. A ṭha leh chhia leh a mawi leh mawi lo pawh hi eng mah hriat an nei lo reng reng. Mi tu pawh, a fate zinga mi silai lâksaktu chuan an zavaia a hmachhawn a ngai a ni ringawt mai. Rilru pangngai pu i nih angin mite pawh chutiang rilru pu tur chuan i ngai a; (ṭha hle mai - Rz) mahse, chu zawng Cullane chhungkaw rilru a ni ve chuang lo," a ti ta hmiah a.

Hyde-a chu a insehruh a, lu thing nar nar chung hian, "Ni lo, Eddie, i ngaih dan chu a dik lo a ni. He khuaah hian dikna ken kawh tumin ka awm a, chu dikna ken kawh ka tumnaah chuan kha tlangval kha mahni inven nan ka that a ni a, chu chu khuaa mite hi a hretu in ni. Cullane-a chanchin i sawi chu a dik maithei; mahse, he khua hi ka khua a ni a, ka enkawl a nih ang hian ka kal chhuahsan dawn chuang lo," a ti ve ta hmak a. A lukhum a khum ṭha a, tumruh tak chung chuan Saloon chu a chhuahsan ta a.

Eddie-a pawh chuan lungawi lo takin a lu a thing nawk nawk a, Bar kawngkhar inthen nawlh nawlh a thlir reng hnu chuan mi pahnih lo la ṭhu ve rengte chu in tur a va pe a. Chu mite pahnih pawh chuan Cullane-a, phuba laa a rawn thawh hunah eng tia lo awm tur nge ni ang tih leh Mike Hyde-a, an Marshal a rawn thah hunah khawi lamah nge an ṭan ve ang tih an lo sawi dun ve mek bawk a ni.

************************

Fronteras chu khaw tê reuh tê, eng tik ni-ah emaw chuan khaw lian leh nuam tak la ni ve tur a ni. Khaw dangte ang bawkin sumdawnna hmunpui leh building ṭha tak tak pawh lo la awm ve-na tur a ni; mahse, chhim tawp kila awm a nih avangin mi sualho tawmbuk, buaina chhuah tamna, a chingfel tura Dan leh thupekin a thlen phâk lohna ram, Mexico ramria awm a nih tlat avangin an suangtuahna ang chu a thleng phâk hlei thei lo.

Mihring pawh an pung chak lovin hmeichhia leh naupang tan phei chuan awm ve-na chi a ni lo; mahse, mi pakhat, pa lian leh rothap tak, Eddie-a an tih leh a ṭhian ṭhenkhatte'n inthurualin Marshal an rawih tâkah erawh chuan thâwkkhat chu tlemin a ralmuang ve deuh va, khaw dang nun pawh tlemin a iang ve ta.

Chuti chung pawhin chu khuaah chuan mikhual an zalenin an chanchin zawh ngam pawh a ni mang lo. Dik tak chuan khuaa mi cheng tlem tê chauh chûan chutianga Dan leh thupek keng kawh thei mihring chu an làwm a ni. Chutiang chu an dinhmun a nih avangin, chu Fronteras khua chu a changkang tak tak thei dawn chuang lo!

Zing khua a lo var a; mahse, in chhe tê tê aṭanga tukverhahte chúan zing tho mei chhem eng hmuh tur a awm chuang tlat lo. Khaw bul khawi maw laiah chúan sihal an u vak vak a; mahse, chu pawh chûan khaw chhung mite a tiharh chuang bawk hek lo. Muangchangin zíng ni chhuak eng mawi tak chuan Sierra tláng chu a rawn chhun eng a, mawi takin dil leh a chhehvel hnimte chu a rawn èn a.

Chu khaw chhim lam kawtthler ṭan tirhah erawh chuan sakawr chung chuang rùal khat an rawn làng ṭan ta a. Chûng sakawr chung chuangte chuan ralthuam famkim nen kawtthler chu an hnaih hriau hriau a, an thawmhnaw inbel chu a dum vek a ni a. Pakhat, pahnih, pali, pariat, sawm panga, an vaiin sawm pasarih an ni a, kawtthlerah chuan ngawi rengin an intlar a.

An chet vel pah chuan tu ma'n thawm reng an nei lo va, an sakawr tak ngial pawh an pen ri duh lo; mahse, an chet vel paha langsar êm êm chu, ni chhuakin an silai hnum tak a rawn em tle zawr zawr chu a ni thung. Zíng ni chhuak chûan an hmel nelawm lo tak chu a rawn èm de zawk zawk a, tu mah reng an ṭawng chhuak lo.

Nawalh nawh rik pharh aṭanga meichher eng tak lo chhuak ta chu zing boruakah chuan a alh ri cher cher a, meichher pakhat aṭang chuan a dang an chhi chhawng zel a, chung mi sawm pasarihte chuan meichher eng tak an keng ta ṭheuh bawk a.

An zinga pa lian leh sang ber, an hotu ni ngei tur chuan kawtthler lai takah chuan a sakawr chu a kaltir a, a meichher chhit chu a chángin a tisang a, a chángin a tihniam leh a. Chutianga a tih vel pah chuan Saloon pakhat in chung chu a han hliau alh zuai zuai a, zing boruak karah chuan a thawm chu a ri chur chur mai. Chutianga a han ti chu a hote tih dan tur a zirtir paha a lungawi lohna a hrik thlâkna tur a ni.

An hotupa tih ang zel chuan mi dangte pawh chuan van sang lam hawiin an meichher alh hluah hluah chu an khawh chho va. Fronteras khaw in chhe tê tê chungah chuan a tla a, a alh zuai zuai mai a. Zíng thlifim chuan rawn ṭanpuiin Marshal office chung ngei te pawh chu a alh ṭha duh hle mai le!

Mei alh ri ṭuk ṭuk te, in chhung aṭanga mi mangang áu thawmte chuan kawtthlera mite chu a khawih buai chuang reng reng lo va; thu pek an hmuh ang thlapin an Winchester Rifle-te erawh chu an kàu ri ṭhap ṭhap a, mi mangang rawn tlan chhuak hmasa apiang lo kah chu an hmabâk a ni ta ringawt mai! Chutiang chuan chu khaw mihring chungah chuan Hremhmun thlentir an tum ringawt mai a ni.

Mei kang leh a khu avang chuan, in chhunga mite chu mangangin an rum ta chuah chuah a. Ṭhenkhat chuan mangang takin, "In a kàng e," an rawn ti chhuak a, mei khu karah chuan an rawn khuh bawrh bawrh hlawm a, Saloon chung phei chu a kang chim ṭan ta!

Hlauthawng tak leh 'tih theih ka nei em' ti ni awm takin, in kil khat aṭangin mi pakhat hi a rawn vâk chhuak dak dak a; thil awmzia a hmuh veleh chuan, ring takin a áu va, kawtthlerah chuan a rawn tlan chhuak a; mahse, kawtlaia sakawr chung chuang lo ding tlarte'n silaia an lo tin reng a hmuh chuan sawi leh chùan tur a hre ta lo.

Chûng mite, mak ti taka a en reng hnu chuan, "In a kàng a, engah nge kha laiah che lova in din reng?" a ti hman chauh va, rifle chu vawi hnih a ri ṭhuai ṭhuai a, chu putar mangang tak chu kawtlai vaivut zingah chuan a let ta reng mai a.

Silai vawi hnih ri a reh rual rual chuan mak takin Fronteras khaw chhung chu a reh leh ta tlawk tlawk mai. Nakin deuhah chuan mangangin mi dangte pawh chu an rawn zuang chhuak ta a; mahse, an chan tâwk chu a hmaa mi ang bawk, anmahni kah hlumna tur silai kua hmuh chauh chu a ni ta zel a ni.

Doc Ziegler-a pawh chu a damdawi bawm nen a lo chhuak vat a, a bul velah, mi ṭanpui theih a nei em tia a hawi kual vel lai chuan hriat lawktirna pawh awm chuang miah lovin an kâp tlu ve ta nghâl a. A hnung lama mi dang lo tlan vete pawh chuan a tawn ang bawk silaimu chu an rawn tawng ve zel bawk a, an tawp chawih chawih mai a ni. Ṭanpuitu nei lovin leh an thih chhan pawh hre lovin, khawngaihna nei miah lova lo kâp zeltute hmaah chuan an thi pheng phung ta mai a.

Hremhmunah insawisakna rapthlak tak a thleng ta a ni ngawt a, a sawisatute lah chuan hmel nelawm reng an pu duh si lo, a tuartute lahin eng nge an thih chhan pawh an hre bulfuk thei tawh lo. A tawpah chuan anmahni sawisatute zinga an hotupa ber chu hnehtu chan changin a rawn áu chhuak ta a.

An hotupa chu kum sawmruk chuang ni tawh tur, sang leh lian zet mai, lukhum parh hlai tak hnuaia sam ṭuak var phoh phoh rawn lang tawh a ni a. A mitmeng chu huatnain a khat a, a hrawk ril aṭang chuan hming pakhat rawn lam rik hi a nei a, chu chu "Hyde" tih hi a ni.

Nakin deuhvah chuan an zinga pahnihte chuan Marshal Hyde-a chu a office aṭangin kawtthlerah chuan an rawn chhawm chhuak ta a. Kawtthlerah, an hotupa hmaah chuan an dintir a; pakhatin hnung lam aṭangin a rawn hnek a; pakhatin hma lam aṭangin a hnek bawk a. Leia a tluk hnu te chuan an spur hriam tak chuan an taiin an theihna lai apiangah an ṭûm ngheng ngheng mai a.

Chau leh eng mah tithei tawh lova an sawisak hnuin an hotupa, setan-a mi tirh ni ngei tur, saddle chunga ṭhu hmaah chuan an han tiding a, a mit leh a biang vela thisen luang zawih zawih chung chuan a hmaa amah sawisakna thu pek siamtu chu chiang taka hmuh hram hram a han tum a. "Pathian hmingin, eng thil nge tih in tum ka zawt..," a han ti hman chauh va, na em ema a hmaia benna avang chuan vaivut zingah a tlu leh ta hnawk a.

Zangthalin a mu a, a hawi chhoh leh rual rual chuan a chung maiah chuan amah sawisatu, pa lian zet mai hmel chu chiang zetin a hmu ta a. Amah mantu chuan, "Tu nge ka nih min hria em?" a han ti a. Hyde-a chuan a lu a thing a, "Hre lo. Eng lai mahin i hmel hi ka la hmu ngai lo," a ti a. Pa liana chuan, "Engtikah mah min hmu leh ngai dawn tawh lo reng a ni. Tenawmpa, ka hmel hi chiang takin en la, thi nghâl rawh. Tlangval i thah tâk pa kha ka nih hi," a ti ta a.

Hyde-a chuan, "Cullane-a maw?" a rawn ti chhuak a; mahse, a thil hmuh chu awih harsa a la ti hle. Old Cullane-a chuan, "Ka fapa i that a ni," a'n ti ngawt a, zawhna zawt pawh a ni tawh chuang lo. Hyde-a chuan, "Duh thlan tur dang min pe lo a ni. Chu chu ka..," a tih lai chuan Old Cullane-a pheikhawk lian tak chuan a rawn rap hrual leh ta nawk nawk a; eng mah pawh a sawi zâwm thei ta lo.

Cullane-a chuan, "Dawt! Dawt! Dawt vek! I that a ni ringawt. He khaw tê reuh tê leh rimchhe zet hian ka fapa in that a ni. In zavai hian a thattu vek in ni," a ti tuar tuar a. A hote, tual thah hmang ṭhah, mi khawngaihna nei miah lote lam chu a hawi a, vin fe hian, "Heng mihring tling mang loho tawmna in hi hal chim vek rawh u. Chutianga in tih zawhah chuan hruizen sei tawk, he lai bawlhhlawh hlawm khaihlumna tur hi min rawn lâk bawk rawh u. He lai ram hian an theihnghilh ngai reng reng tawh loh tur zirtirna ka pe dawn a ni," tiin thu a pe ta a.

An pa, an pu thu pek keng kawh tur chuan a hote chu hlim awm takin an bu nghat nghat a. Khaw chhunga in zawng zawng an hal hnu chuan mihring che thei tawh phawt chu an kâp hlum hmiah hmiah zel a. An tih tur zawng zawng an tih zawh hnuin Old man Cullane-a'n Marshal Hyde-a, thingzar sang taka a khaihlum lai chu hlawhtling inti takin an thlir ta hlawm a...



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 15th, 2018, 8:28 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 2

"My God! Chutiang thu reng reng chu ka dam chhung hun hian ka la hre ngai hauh lo!" mak ti tak leh ring angreng tak hian mi pakhat chuan a rawn ti chhuak ta a.

Chu thu sawi chhuaktu chu pa danglam tak, a bul vela lo khawsa tawh chuan chutiang taka a awm dan a danglam chu an la hre ngai mang lo tih tur a ni. Chutianga a ṭawngkam chhuak chu mi tam takin an la hre zen zen lo va, a bul vela Dan leh thu pek ngaina mite rilru phei chu a khawih lehzual a ni.

Pa tawi, sa nghet tak, Politician ai maha Cattleman ni mai awma lang, Arizona ram Governor, Bleke-a a ni; mahse, tunah chuan a thu ngaihthlak chûan a tithinur tlat. Pa ṭawng tlem, inthunun thei tak; mahse, thupek khauh tak nei leh mahni pawhina zàwm tlat mi, thinrim zen zen lo a ni.

Chutia Bleke of Arizona meuh thinur hmel hmutu zingah chuan Big Eddie kha a tel ve tlat a, a thu sawi avanga Bleke-a meuh pawh hmel danglam khawpa thinur a ni. Big Eddie-a thu sawi chu ngaihthlak hrehawm viau mah se ngaihthlak nawn leh a duh avangin Eddie-a chu Bleke-a chuan a thu sawi ngai sawi leh tura a sàwm a ni.

Big Eddie-a chu Cullane-a leh a hote'n rawng lutuk tak maia Fronteras khua an nuai chimih dan sawi tura vawi hnih ngawt sàwm a ni chu a mak hle a; chu aia mak leh chu United States Marshal-te hnena sawi tura tirh a ni lo chu a ni.

Chutiang Dan keng kawhtute hnena sawi lova Bleke-a pawhin mi naran ang maia lang, cowboy satliah ve mai ni awm tak, puakruk pahnih fual hnelh hnawlha pai, chûng thu zawng zawng lo dawngsawng tura a sáwm tlat chu a ni.

Tin, chu tlangval satliah ang taka lang, Governor Bleke-a meuh pawhin, 'Ka ṭhian,' tia a ko tlat chu a mak lehzual bawk a ni. Chu a ṭhian hming chu 'Don Severn-a' a ni. Tichuan, Big Eddie-a chuan a thu hriat, sawi nuam lo zet chu a sawi leh ta a.

Governor ṭhianpa hnenah chúan Eddie-a chuan, Marshal Hyde-a'n mi pakhat a kah hlum thu te, chu a kah hluma chu a hnuah James Cullane-a a ni tih a hriat chhuah thu te chu a hrilh ta a. Chumi tuk maia zing ní chhuah sara Fronteras in zawng zawng hal a nih thu te, mangang tlan chhuak apiang khawngaihna tel hauh lova lo kah hlum zel an nih thu te leh Law-man la naupang tak chu a hrehawm thei ang bera sawisak a nih hnua khaihlum a nih thu te chu a sawi zel a.

Amah pawh chuan silaimu pathum lai a pai hnuah, thi anga an hnutchhiah laia mi dang an buaipui hnua, thei leh thei lova phèn tur zawnga a vah sawn thu te; ni thum lai eng mah hre lova a awm hnua a rawn dam khawchhuah leh dan zawng zawngte chu a sawi ta zel a. Eng tiangin nge Big Eddie-a chu a lo nun khawchhuah leh tih chu amah ngei pawh chuan a inhre reng reng lo va, a taksa a lêna, a pumruain a zawh ve hrim hrim vanga nung dama lo khawchhuak leh ta ni berin a inhria a ni.

Chûng thu zawng zawng a sawi zawh hnu chuan pindan chhung chu a reh ta tlawk tlawk a. Bleke-a chuan thil awm dan chu chik takin a ngaihtuah niin a lang a, a ṭhianpa, Severn-a pawh chuan a hnung kil, ṭhutthlenga ṭhu chung chuan thil awm dan a lo ngaihtuah ve vang vang bawk a.

Severn-a chu, la upa lo tak, kum sawmthum mi vel ni hian a lang a. A thawmhnaw inbel te chu cowboy-ho inbel ang tho a ni a; mahse, a hlui chhe lovin a thianghlim hle a. A silai pàite pawh chu thar vura lang zawng a ni lo; mahse, hman ṭhân a nihna chu a kawm aṭang chuan a lang chiang hle thung. A thawmhnaw dum pawl hâk chuan a dar pharh hlai ṭha tak leh a kawng fek ret ráwt pawh chu a khuh mawi tâwk hle a ni.

A hmel lan dan aṭang mai phei chuan Big Eddie chuan Indian ni mai awmin a hmu a; mahse, a biang ki sàn teh chiam loh dan aţang chuan half-breed (thlah pawlh - Rz) tia koh chi niin a hre lo thung. A sam chu dum ṭha hlep hlawp a ni a; a chalsam erawh chu tlemin a sen deuh thung a. A mitmeng chu dum pawl ṭha tak a ni a.

Big Eddie-a chuan, chu mitmeng aṭang chuan lungngaihna thuk tak hmuin a inhria a; mahse, chutiang chung chuan a mitmeng sir leh a hmui-hmaiah chuan nuihzat ruk eng emaw nei a ang hle bawk si. Bleke-a chuan a kut phar chhuak meuh chung hian, "Nakin lamah 'eng vangin nge' tih zawhna kan la chháng ang a, tunah chuan, Don, zawhna eng emaw i nei em min hrilh phawt teh," a rawn ti ta a.

Severn-a chuan awlsam zet hian, "Sang tam tak ka nei ang chu; mahse, zawhna pahnih pathum chhàn a nih chuan a tâwk thei mai ang. A nih leh, a hmasa berin, chûng mihringte chu eng zat chiah nge an nih ang?" a han ti a. Big Eddie-a chuan, "Sawm pahnih leh sawm panga inkár an ni ang. Fimkhur tak chuan ka lo chhiar hauh lo a ni," a lo ti a.

Severn-a chuan ṭhen sak chung hian, "Ka ring vel a ni. A nih leh, tu mah inrinna hun pawh pe chuang lovin ngawi rengin an lo lut a, an tih duh ang ang chu an rawn ti nghâl mawlh mawlh mai i ti a ni maw kha?" a han ti leh a.

Eddie-a chuan, "Ka thu sawi kha a nih ang khan pawm mai rawh. An lo kal dawn a ni tih lo hre lâwk ve ila chuan chet ve dan tur chhe tê tal chu kan lo nei thei ngei ang chu. An hmuh hmasak apiang an kâp tlu hmiah hmiah ringawt a; an hmuh loh pawh an zawng zui a, an that tho tho a ni," a ti a.

Bleke-a chuan, "A nih, eng zat chiah nge an thaha i rin?" a lo tih chuan Eddie-a chuan, "Sawmthum, sawmli vel an ni ang; ka chhiar chiah bik lo," a lo ti hmuk a. Bleke-a chûan, "Chûng zinga pakhat mah chuan han do let chhin pawh in tum miah lo a maw?" a han ti leh a.

Eddie-a chuan, "Governor, kan dinhmunah han indintir ve chhin teh. I in chung a kân hluah hluah laiin i rawn ṭhângharh a, chutiang hunah chúan eng vanga in chu kàng nge a nih tia ngaihtuahin i ṭhu veng veng ang em? Teuh lo mai. Ṭhânharh veleha eng mah ngaihtuah lova tlàn chhuah nghâl mai chu tih tur hmasa a ni. A thu hrimah, min lo beitute chu silai phawi rang leh kâp thiam tak tak an ni bawk nen," a lo ti a.

Severn-a chuan, "Chûngho chu Cullane-a leh a pawlte an ni ngei tih i hre chiang a a maw?" a lo ti zauh a. Eddie-a chûan, "Teh reng mai. Kha mihring kha anchhe dawng tlâk a ni!" a ti ta bawrh bawrh a. Bleke-a chuan, "A nih leh, chung zinga hming dang chu sawi theih i nei reng em?" tiin a lo zawt leh a.

Eddie-a chuan, "Nei dawn lawm ni. Old Billy pakhat," a han ti a, a kut chu a thliak nghauh nghauh a, "Ani chu Governor, nangmah ka hmu chiang che ang hian ka hmu chiang a ni. Pakhat leh chu Marco-a, tháu leh lian fahran mai a ni a. Yancey-a te leh Allen-a, an mi lái; mahse, Yancey-a leh Marco-a ang êma rothap ve lo; mahse, fing khekrek lutuk tlat si te. Chu bâkah, an fa tlum, a pa hming chawi ngat Billy-a a awm bawk a, mi thah nuam ti em em mai niin, 'Kid' tiin an ko mai ṭhin," a ti ta zel a.

Nuihzat ang reng tak hian Severn-a chuan, "Billy the Kid maw? Hming ropui tak a nih chu le," a lo ti a. Eddie-a chuan, "A ropuiin a nih ang chu ti theiin i ring lo a ni maithei a; mahse, he tlangval hi chuan Billy Bonney ngat pawh kha a sawisa hrep thei ang chu. Mi dang ka han sawi leh tur, Chapman-a te, Nixon-a te, Chuck Allen-a te leh Billy Morrison-a te pawh hi Killer dik tak vek an niin an rothap a, an phawi rang em em vek asin," a ti ta a.

Zawi sap hian Severn-a chuan, "Pakua chiah," a lo ti a. Bleke-a pawh chuan, "Mi sual pakua, heng hlingte hi he ramah hian nung damin an khawsa rei lutuk ta deuh zawng a ni," a lo ti ve a. Phur tak hian Eddie-a chuan, "Governor, chûng tichimit tur chuan sipaiho i tir dawn em ni?" a lo ti vat a. Mahse, Bleke-a chuan chhum hmak hian, "Chu chu ka ti thei lo. Sipaiho chungah thu neihna ka nei lo," a lo ti hmiah a.

Eddie-a chuan, "Chutiang hna pawimawh bikah te chuan Washington-ah thirhrui i thawn thei mai lawm ni?" tia a lo hnial pawhin Bleke-a chuan, "Thawn thei e; mahse, tuna ka hrilh che ang tho khan min rawn hrilh ve tho vang. Mr Eddie, United States hian Mexico ram chhungah thu neihna a nei tlat lo a ni" a ti leh ta hmiah a.

Severn-a pawh chuan, "Mexico ram chhungah heng mite hian bu an khuar tlat bawk si a," a lo ti ve thuai a. Eddie-a chuan, "A nih leh, chutiang vang ringawt te chuan an sual man hremna phu tâwk hmu lo chúan an chhuak chuang em lo vang chu maw? Bleke, chutiang ngawt chuan i chhuah hulhual thei hauh lo vang," a han ti leh a.

Bleke-a chuan, "Mr Eddie, pakhatnaah chúan, i duh angin sipai tha chak tak anmahni hrem tur chuan ka tir thei lo va; thu neihna ka nei tlat lo. Mexico ramah chutiang tih theihna thu neihna ka nei lo. Pahnihnaah chuan, tuna ka dinhmun chiahah hian Mexico leh united States inlaichinna a ṭha tâwk chiah lo bawk. I rawtna anga sipai tha chakna hman a nih chuan indona hial a rawn hring chhuak thei tlat a; chutianga ram leh ram inkara harsatna síamtute zingah chuan ka tel thei lo a ni," a ti leh ta tlat a.

Eddie-a chuan, "Chuti a nih chuan eng mah tih lohvin i chhuah mai dawn tihna a ni maw? Fronteras khua núai chimita, tual thahna râpthlak tak thlentute chu zalenin i awmtir mai dawn tihna a ni maw?" a ti ta hu hu mai a. Bleke-a chuan, "Ni hulhual lo ve; hemi avang hian alawm Don-a pawh heta lo kal tura ka ngen ni," a han ti a.

Bleke-a chhanna chuan Eddie-a chu a men phâwktir nasa ta mai a, "Bleke of Arizona meuhvin he tlangval satliah tak hi heta kal tur hian a ngen a maw?" a han ti hluai a. A mak ti hmel chu a mitmengah a lo lang chhuak a, a zawhna pawh chu Bleke-a chuan bu nghat chauh hian a lo chháng a.

Severn-a lam hawi chuan Bleke-a chuan zawi fiah tak hian, "Don, nang ang mihring hi tun hunah hian kan mamawh ta che a ni. Chu hmunah chuan ka tir duh che a, chutah chuan mi dang chu kal vaih se chuan second sawm chhungin an thi ngei dawn tih pawh ka hria. Chutiang hmuna ka tir tur che hi pawi ka ti tak zet.. Engkim kan tih..," a tih lai mek chuan Severn-a chuan, "Ka pu, chutiang lam chu i sawi lo teh ang," a lo ti vat a. "Chutianga hmanrua pawh nei ve hlei lo, chutiang teh hrepa sawisatute hmel hmuh chu ka châk zawng tak a ni ve hrim hrim zawk alawm. Thu dang sawi a ṭul lo vang, eng mah tih tur fumfe pawh ka neih loh lai a nih hi," a ti zui ta zel a.

Bleke-a leh Severn-a inbiaknaah chuan Eddie-a chuan hriat ve phâk loh thil a nei niin a inhre ta a. Ngun takin thil kal tawh a han ngaihtuah a, Severn-a hming aṭang chuan thil eng emaw hriat chhuah neiin a inhria a, hriat chian tumin a'n ngaihtuah ngial a, 'Severn, Severn,' a'n ti nawk nawk a; mahse, awlsam taka a thil hriat tawh han ngaihtuah chhuak leh mai tur chuan Eddie-a chu a upa lutuk tawh a ni.

Severn-a chu a tho thut a, Eddie-a chu chibai buk tumin a kut a phar chhuak a, "Thil pawimawh tak tih tur ka nei. Mr Eddie, kan inhmuh leh mai pawh ka beisei hran lo, Khaw en veleh ka kal chhuak nghâl dawn a ni," a ti ta a. Eddie-a chuan chibai a lo buk a, ngawi rengin Governor Bleke-a leh Severn-a inchibai lai chu a lo thlir a.

Severn-a chuan Eddie-a chu a lu a rawn buk khum leh nghat a. Kawngkhar lam chu a pan ta nghâl a; mahse, "Nangmah mai khan Cullane-a hote hnu chhui tur chuan i kal dawn a maw? Nangmah maiin maw?" tia ṭial deuh ruana Eddie-a rawn ṭawng chhuak leh chuan kawngkhar a thlen chiah chuan a tiding leh ta a. Severn-a chu a bu nghat nghat a, "Ni e, chu lam pan chuan kal ka tum a; i lo kal ve dawn te a nih loh chuan mahni maia ka kal mai lohvin," a lo ti mai a.

Eddie-a chuan, "Kal ve theih a va châkawm ve le; mahse, ka ke hi a na tlat a, sakawrah ka la chuang thei tlat si lo a ni; kal thei pawh ni ta teh reng ila, chutianga âtthlak taka che tur zawng ka ni lo," tih pah chuan Governor Bleke-a lam chu a hawi a, "Ka thu sawi kha a hre chiang lo a ni tal ang a," a ti ta ngawt a. Bleke-a chuan, "Kan hre chiang alawm," a lo ti mai a.

Mahse, Eddie-a chuan, "Chu pawh ni se, in pahnih hian in rilru a buai a ni phawt mai. Cullane-a leh a ṭhuihhruaite chanchin kha ka sawi chiang tâwk viau a ni lawm ni? Severn, chûng ka mi sawite chu tual thah ching, pawisak nei miah lo an ni a, an zingah chuan chetna hun i nei miah lo vang a, 'kâp rawh' tia i sawi chhuah hmain i khaw hmuhna mit kha an kâp del mai dáwn asin," a han ti leh hram a.

Mahse, Severn-a chuan nui chung hian, "Warning min pek avang chuan ka lawm khawp mai; mahse, 'kâp rawh' tih kher chu sawi loh hram ka tum mai dâwn nia," a ti a, a chhuahsan ta a.

Eddie-a chu a inher vut a, Governor Bleke-a hnenah chuan, "A kal tur hi i dang ngei ngei tur a ni. Mi pakhat mai tan chuan tih theih chi a ni..," a'n ti na a, Governor Bleke-a chuan a thu sawi reng a lo ngaithla tawh lo. A mi tirh thlir liam tur chuan tukverh lam a lo pan mek a, tukverh aṭang chuan a sakawr dum lian zeta Severn-a chuang lai chu a thlir ta vawng vawng mai a.

Eddie-a pawh chuan a han thlir ve vang vang a. Severn-a sakawr te leh a puakruk, fual hnelh hnawlh inrem fahran maia invuah te a'n hmuh leh tâkah chuan a hriat tawh hnu niin a hre thar leh ta a. Mi pakhat, Texas ṭawngkam chhûak dik taka ṭawng ṭhin, pistol fual taka pai leh sakawr dum lian taka chuang kha tu nge ni ţhin kha le? Mahse, chu hming chu eng nge a nih a hre chhuak thei ta chuang rih lo.

Severn-a kal liam hnu chuan Governor lam chu a han hawi leh a, "Governor, he mihringah hian rinna namen lo chu i nghat a ni phawt mai a. Tu nge maw a nih reng reng le?" tiin a zâwt ta phawng mai a. Governor Bleke-a chuan, "A hming chu Severn-a, Don Severn-a a ni a, Hatchett's Folly bulah Ranch a nei," a lo ti a.

Governor chhànna aṭangin Eddie-a chuan thil awmzia hre thuak thuakin a inhria a; mahse, Bleke-a mitmeng aṭang chuan thu sawi duh loh chin nei tlata a hriat avangin, "A hming chu ka hria alawm; Bleke, tu nge a nih leh eng nge a nih hriat alawm ka duha ka zawh che? Engtin nge mi pakhat maiin Cullane-a leh a hote chungah thil a tih theih i rin reng reng ni?" a ti ta a.

Bleke-a chuan, "Mi ṭhenkhat hi chu an thil tih theih dan azira rin ngâm chin tâwk an awm ṭhin alawm. Cullane chhungkaw chanchin hi hriat ka nei nual tawh; old Cullane-a fate zinga pakhat pawh khàihlum turin ka thawn tawh. Tunah hian thil pakhat chiah ka hrilh ang che, Cullane chhungkua, an thil tih phu tâwka hrem thei tur an awm a nih chuan, tuna i mi hmuh taka chiah - Don Severn-a chiah kha a ni ang," a ti ta hmiah a.

Eddie-a chuan thu tàwp a ngaihthlak tâk avang chuan, sawi leh chùan tur vàn ni awm tak hian a lu a han thing a, "Mahse, Governor, chutianga Jon-a ang maia thu hril lâwk dik turah ka inngai tihna chu a ni lo; mahse, heng ka sawi te hi mi pakhat tan chuan an chak lutukin thil an tithei lutuk deuh chu a ni. A ram leh mihring reng reng an kephah hnuaiah an rap bet tlat a, an chak êm êm a; chuvang chuan, i thil tih hi a dik lo tiin ka la sawi fan fan a ni," a ti leh ta hram a.

Bleke-a chuan, "Ka thil tih hi a dik ngei ang tih ka la ring tlat," tih pahin a ṭhutna aṭang chuan a tho va, a thil ngaihtuah chu theihnghilh duh tawh ni awm tak hian, "Mr Eddie, ka buai deuh va, min chhuahsan theih tawh chuan.." a ti ta a. Eddie-a pawh chuan, "Teh reng mai Governor, i buai em hi. I mi tirh ṭanpui theitu tur chu awm thei hram se chuan duhthusam zawng a nia lawm," a lo ti thuai a.

Bleke-a chuan, "Eng thil nge lo thleng zel lo thlir teh phawt mai ila," a lo ti mai a. Bleke-a hmel lo danglam ta deuh thut chu remchanga hmangin Eddie-a chuan, "Bleke, mi pakhat, a thihna tur hmunah i tir a ni tih hi pawisakna i nei miah lo a ni maw?" a han ti leh hram a; mahse, Bleke-a hmel danglam leh thinur hmel a han hmuh chuan a sawi zawm leh ta lo va.

Bleke-a pawh a insum leh hmiah a, aw dam tak hian, "Mr Eddie, engkim ka ngaihtuahin pawi ti tak chungin ka tir a ni. Severn-a'n a hnathawh tur zawng zawng a thawh zawha a lo kir leh hunah, a chhan leh vang chu ka la hrilh fiah dawn che nia," a ti ta a.

Mahse, Eddie-a chu a la lawm tâwk thei lo. Lu thing nawk nawk chung hian, "A lo kir leh hunah' te i han ti a; Bleke, chutiang thleng thlenga ngaih dan siam tur i ni lo vang," a ti a, hmanhmawh takin a chhuahsan ve ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 16th, 2018, 8:07 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 3

Tláng chhîp tê reuh tê, a hnuai lam phaizawla khaw chhe tê lan theihna hmunah chuan Severn-a chu a kal chhuah aţanga a vawi khatna atan a ding a. Mexico ram chhunga khua ngei tih hriat tak, in chhe tê tê dinna chu a han thlir vang vang a.

Chûng in aṭangte chuan mei khu a rawn chhuak ngîai ngîai a; ral khat hla deuh aṭang chuan an zái thawm te leh an Guitar perh ri te chu a hre thei a. Zantir lam a la nih avangin kawtthlerah pawh mi an la tam lo va, sakawr pawh tih tham a la awm meuh lo.

A sakawr hnenah chuan, "Welcome to Mexico," a'n ti ngawt a. A sakawr pawh chuan chu chu hre thiam ve ni awm takin a beng a phût a, a chik deuh nghur nghur a. Phur taka a kal lai chuan duat taka a sakawr chul chungin, "Nang pawh hi keimah ang mai i ni a, tlemin i upa ta deuh a; fin zawng i la fing chuang eih lo a nih hi," a han ti leh a, khaw lam pan chuan a tlantir leh ta nghâl a.

Phur takin khaw lam chu an pan a, khuaah chuan ei tur tuihnai tak tak, mutna nuam leh intihfai theihna hmun a awm a, chu chu ni ruk lai sakawr chunga chuang tawh tan chuan thil thlakhlelhawm tak a ni reng a ni.

Severn-a chuan ni ruk zet a kal chhung chuan mihring a hmu lo reng reng a, a kalkawng buatsaih te a him thei ang ber zel a zawn ṭhin vang a ni. A thuvawn ve ṭhin chu 'hetiang hmelhriat awm lohna ram i pân chuan tu mah ṭhian i nei lo va, mihring hmu tlem thei ang bera khawsak hi a ni' tih hi a ni.

Mihring tlem tê, kawtthler leh bang bul vela lo ding kawi sawi tak takte chuan Severn-a, an kawtthlera lo lang ve chu an lo ngaihsak hranpa lo va. San Jose khuaah hian American-ho chu ngaih sàn an ni hran lo reng a ni. An ngaih danin, Dan lak aṭanga rawn tlan bo, ramri kâna himna zawngah an lo ngai mai ṭhin.

An tih dan phung hrim hrimah buaina zawn chu an hna a ni lo va, chu vang chuan mikhual reng reng zawhna an zâwt tam ngai lo. Ei tur, in tur leh mutna an pek chuan an duh tâwk mai a. An ngaih danin thil hriat tam hian thihnaah a hruai lut ṭhin a; an hriat loh avanga thi chu tlem tê chauh an ni. Chuvangin, an mi hmuh tawhte pawh hmu lo ang hmiaha awm chu an chìn dan duhawm tak a ni.

Severn-a chu in lian leh hniam chen chawn hma zâwnah chuan a ṭum thla chhak a, a sakawr a thlun hnuin chu in kawngkhar lam pan chuan a kal ta nghal a. Kawngka biang chungah chuan hawrawppui hian, 'CANTINA' tih hi a lo inziak ve kalh a, chu kawngkhar bul chiahah chuan Mexican pahnih hi thatchhe awm fahran hian an lo ṭhu a, muthlu an ang hle nghe nghe a.

Mahse, Severn-a rilruah chuan chûng mite chuan enthlâk eng emaw an nei a ni tih chu a lo lut vat a; mahse, eng vanga chûng mite chuan duty ang hrima enthlâk nei nge an nih tih chu a hre nghâl mai lo; mahse, chu pawh chu a la hre chhawm thuai dawn.. Kawngkhar a luh a, Bar a pan aṭang chuan in chhung boruak lo danglamzia chu a hre nghâl a.

Tu mah awm lo ang hrim hian an lo reh ṭhup a; dawhkan pakhat kiîla mi pali, lehkhadena inkhelte chu an lo en hlawm a. Severn-a chuan ama hriat tawk lek hian, "Card an khel a ni phawt mai a; Poker a ni phawt mai. An thil thàp pawh a sáng thawkhat hle a ni ngei ang le. Saw, mi pakhat, a chala thlan luang deuh zùl phei saw chu a chan a ṭha fahran lo a nih dawn saw," a ti sap a.

Mi pakhat, thlan tla phunga ṭhu chu pa lian leh hmuihmul ngah tak, sa ṭha fahran leh áwm hmul deuh chhur, bán tihrawl nei ṭha tak a ni a. Severn-a'n a teh dan aṭang chuan Feet ruk leh a chanve chu ni ngei tur a ni. A navy colt, a khela a pài te pawh chu amah a len em avangin puakruk lem ang chauhvin a bet leng mai a ni. Minute tin deuhthawin chu pa chuan a thlan chu a hru zoh zoh a, a mitmeng, rinhlelhnaa khat chúan a hmaa ṭhu chu a en ngun kher mai.

Severn-a chuan zu a han lam a, a in pah chuan ngun takin pindan chhunga mite awmhmun chu a thlithlai zung zung a. Chu Paliana ding lam leh vei lama ṭhute chu inchei dan pangngaia inchei zàwng an ni ngei a; mahse, an mitmeng huatthlalaawm tak leh an hmel pianzia aṭang chuan mi dangte lak aṭanga hriat hran awlsam tak an ni.

Pali zinga pakhat la awm chhun erawh chu Severn-a chuan a han en vang vang hnuin, "Ricky main-a a ni reng mai! Hatchett's Folly aṭanga lo kal a nih saw. Saw, a ṭhiante lah mi sual tawp khawk ṭhah ni ta mai," a han ti sap a.

Tunah chuan chung zinga Pa liana pawh chu tu nge a nih a hre thei ta a. Khawiah nge a hmuh tawh tih te leh a chanchin a'n chhui nap nap chuan, ramri hrula mite chawimawi hlawh hran lo; mahse, lal ni ve tlat, Black Bill Morrison-a a ni.

Black Bill-a chu El Paso leh Tucson velah chuan a hming a lar hle a. Bawng rûk emaw, rangkachaka sumdawn rûkna emaw, America leh Mexico inri-na, a ruka kál tlâng tur reng reng Morrison-a hian hriat loh a nei ngai lo. A rem tihna lo chuan tu mahin hetiang rûk rûk hna hi an thawk thei lo tluk a ni. Ama sawi dan takin chhiah tlem a lo lâk ve a, mite'n him taka rûk an rûk theih chuan a ṭha angreng hle a ni.

A hriat lohva kal tlâng tum tawh tifuh tak an la awm lo va; Cullane-a hote meuh pawhin Black Bill-a phalna lo chuan ramri kânin eng mah an ti thei ngai lo. A hriat lohva thil kal a awm chuan a titu chu nuihzat em em chungin a sawisa hlum mai ṭhin a ni.

Severn-a chuan Saloon chhung chu a han melh kual leh deuh va; chutih lai tak chuan kawngkhar bula duty pahnihte kha an lo lut chiah a; hmai cher zawk, Scatter Gun kengtu chuan chung lam kailawn a pan chat a; tlangval cher ṭhel ṭhawl, pistol pahnih fual zeta pai chuan Severn-a dinna aṭanga hla fahran lo, Bar bul deuh lawkah chuan ṭanhmun a rawn siam ta bawk a.

Chûngho zawng chu Bill-a hote ni maiin an lang; mahse, Ricky Main-a dinhmuna han indintir chuan chûng mite chu an tam lú deuh zawng a ni. Amah maiin Mexico khaw pakhatah a awm a, a bul velah Gunman leh rûk ru rualin an hual a; chutih lai chuan amah chuan lu man dollar zanga a nei bawk nen.

Chûng bakah, an dawhkan kilah chuan dollar eng emaw zat a intiang vum thur a, chu laia an ṭum khat pawisa hmuhah chuan a la tam ber ang tih tur a ni. Chutiang aia tlem chu Morrison-a leh a hote ngei pawh chuan mi tam tak an lo rawk tawh ṭhin a ni.

Chutiang chu Ricky Main-a hian ngaihtuaha, hlauhthawnna nei rilru pawh ni se a hmelah chuan eng mah a lang hauh lo. An chung khawnvar inkhai hnuaiah chuan ngaih ṭha awm takin a hmaa pawisa tling khâwm chu a en mai a ni. Rinhlelhawm hauh lo turin a kutte pawh chu lang chiang thei tur ang berin dawhkanah a tilang a, a lehkhaden ken lai chu a thlir vang vang a.

Chutih lai tak chuan Morrison-a chuan, na em em hian dawhkan chu a'n beng ṭhuai a, a chunga pawisa te chu a léng darhin a ri chuai a, "Mihring, ka Card ka entir mai ang che. En rawh, Lal leh zatli pai a nih hi; min hneh hauh lo vang," a ti a.

Black Bill-a thinrim áu chhuak avang chuan in chhunga mi dang ṭawng ri chu a reh duak a. Muangchang hian Ricky Main-a chuan a Card chu a rawn pharh ve thung a, "Bill, pawi ka ti khawp mai; Jack trio ka nei a, hei hi i ngâm ta chuang lo a ni," a rawn ti ta charh charh a.

Chutiang thawm avang chuan Bill-a hote pahnih, a bula ṭhute pawh chuan an hotupa chu thinrimin a puak keh ngeiin an ring a, anmahni pawh chu a rawn khawih duh mai ringin an lo insaseng a, an hnungtawlh dawrh a. Chutih lai vek chuan tlangval cher ṭhel ṭhawl, Severn-a bul lawka ding kha a lo pên chhuak a, hma lam a pan lai chu Severn-a chuan a lo mitmei reng thung a.

Mite rin dan ang lo takin Morrison-a chu a thinurna aṭanga inthununin a ṭhutnaah chuan ṭha takin a ṭhu leh ta then a. Thinur insum tak chung hian, "Mikhualpa, eng tiangin nge min rawn hneh mai theih dan hi?" tiin a zawt ta a. Main-a chuan, "Ka vanneih vang a ni ber mai," a ti a. A khingpuipa thinur inbengdai leh deuhah chuan awm nuam ti tak hian, "Zanin chu ka vanneihna a kal tluang a ni ber e," a han ti leh hram a.

Morrison-a chuan, "A nih tak chu. Eng chen chiah nge i vanneihna a kal tlùan dawn kan en ang. Tuna kan dahkham tawh zat lêt hi kan dah belh ang; chutiang a nih loh chuan tuna mi pawh hi eng mah lo a ni mai. Chumi hnuah card hi vawi khat ve ve chiah kan phawk ang a, chuta a huai zawk zawk chuan hnehtu chan kan chang tihna a ni mai," a rawn ti ta a.

Chutah zet chuan Main-a mitmeng pawh chu a rawn thip ve tain Morrison-a chu chiang zetin a rawn en a; Morrison-a hnung lama lo awmte pawh chu an insaseng ṭan ta a. Main-a chu a thinrim ve hle tawh nain a ṭawngkam chhûak chu a la dam ṭha hle a, "I sawi ang ang chu ni ang hmîang. Tuna kan dahkham leh ka mân tâkte hi American pawisain dollar zasarih zet a nih tawh hmèl a, hemi zat pawisa hi rawn phawrh ve rawh le," a ti ve ta a.

Morrison-a chu a ṭhutna ngheng chuan a han ṭhu eu a, a ipte aṭanga pawisa phawrh tur ni awm takin a nui huah huah a; mahse, a nuih chu a za hauh thung lo. Nakin deuhah chuan, "Ka tangka ip ka lo theihnghilh daih a nih pek hi; mahse, lehkhathemah ka zîak ang a, chu chu i pawm mai ang chu ti raw?" a ti ta a.

Main-a chu a ṭhen sak a, Morrison-a zawhna chu chhang ta lem lo chuan dawhkana pawisa tling hnur chu a hui khâwm ta hmiah a, a ipteah chuan a hnawh lut ṭan ta a. Chutih lai chuan Morrison-a chuan a lo nuih huah huah a; a nui thawm chu a ring hle nain nuihzatna chhe tê mah a nei hauh lo.

Main-a'n pawisa a iptea a khung zawh chiahah Morrison-a chuan, "Khatianga ka pawisa tam tak min lâksaka, hnehtu chan i chan lai khan min bansan ngawt thei lo vang. A ni lawm ni dawihzep pa?" a lo ti ta a. Main-a chuan, "Pawisa dang min khelhna tur i nei tawh lo alawm," tih pahin han thawh mai hi a han tum a; mahse, "Ṭhu rawh!" tih thupek chu a hmu ta tlat mai.

Main-a mitmeng chu a thip hle a, rang takin a koki hnung lam chu a'n ban zawk a; mahse, a chanve a ban hman chauh va, an intam hleihzia a hre chhûak zawk a; a tàwp leh ta chawt a. Chumi rual chiah chuan tlangval ria ṭhel ṭhawl kha a hma lawkah tuihnai lo zeta meng ráng ṭeuh chungin a rawn ding chhûak chiah a; chumi rual rual chúan Scatter Gun inkàu ri thawm chu chiang takin in chhunga mite chuan an hre ta bawk a.

Main-a pawh chuan a kut chu dawhkanah chuan a thlak thla leh ta a. Morrison-a chuan, "Khatiang khan awm hle hle mai tur asin. A thu hrimin, khawiah mah i kal sawn dawn chuang lo a ni lawm ni?" a lo ti a. Main-a pawh chuan, "Ka kal sawn hmèl loh a nih hi," a lo ti ve mai a, za vak lo hian a'n nui sak a.

Morrison-a bawk chuan, "Tunah chuan awmze neiin kan inbèi thei tawh ang ti raw?" a han ti leh a. Main-a chuan, "Kan inbeih dan a verther sawt hle mai. Duh thlan tur dang ka nei chuang lo zawng a nih hi!" a lo ti ve leh mai a.

Morrison-a chuan, "I nei teh chiam lo a ni. A thu hrimah, tlangval, ka hnen aṭangin pawisa khati zozai kha i la a; i mân dan chu a thianghlim phian pawh a ni maithei; mahse, eng tiang pawhin khatiang pawisa zozai nen khan ka hnen aṭangin i kal chhuak dawn lo reng reng a ni tawp mai," a han ti nghut a. "Thianghlim takin i hloh ve a ni mai alawm," Main-a chuan a lo ti ve leh ngat a.

Morrison-a chuan, "Tunah hían ka vannei ve ṭan dawn chiah a ni. Chu vang chuan kan inbèi ṭha leh tur a ni ang. Card hi kan phawk ang a, a phawk huai zawk zawkin hnehtu chan kan chang tihna a ni mai. I pawisa mân tâk kha eng zât nge nia i rin kha?" tiin a han zawt a. Main-a chuan, "Dollar zasarih vel a ni ang," a lo ti leh mai a.

Morrison-a chuan, "Zasarih vel," a ti a, a bu nghut nghut a. A iptea lehkha them chu a la chhuak a, pencil hian chhe zetin a ziak a, dawhkanah chuan a theh thla leh ta a, "Kha kha American pawisaa ka dollar zasarih chu a ni," a han ti a.

Main-a chu za lo takin a han ṭhen leh sak a, "Hnehtu lo ni ta ila, engtin nge pawisa chu ka lâk khawm tâk ang?" a han ti a. "Chu pawh chu i hna alawm; I pawisa chu rawn phawrh ve nghâl rawh le," Morrison-a chuan a lo ti hmiah a.

Mahse, Main-a chuan, "A nih leh, phawrh duh lovin khelhpui duh ta tlat lo che ila, engtin nge ni ang?" a lo tih chuan Morrison-a chuan, "Chutianga i tih chuan thil i tisual ropui hle tihna a ni mai; Ka pawisa nen khan khawiah mah i kal sawn thei dawn chuang lo," a lo ti leh hmiah a. A thu sawi chu ngaituahna hun siamsak ni awm tak hian a ngawi ta vung vung a.

Main-a chuan pindan chhung chu a teh nauh nauh a; thil lo thleng tur hre lâwk ang maiin tu mah rengin an ke pawh an dah sawn phal lo.

Chutia mite an ngawih lai tak chuan Severn-a chu a lo che ta a. Boruak inthlâk lai vel khan tu ma hmuh lohvin tlangval ria ṭhel ṭhawl awmna kha a lo pan ru hriau hriau a; vawi leh khatah, na êm êm leh rang fahran hian chu tlangval dul nemah chuan a hnek ta chawrh mai a. Tlangval chu a thaw hawlh a, paih ang derin chhûatah chuan a tlu ta a.

Severn-a chuan hmuh hman loh khawpa rangin a pistol chu a rawn phawrh chhûak nawlh a, tlangval lu-ah chuan a vaw nghek a, eng mah hre lovin chhûatah chúan a let ta nghâl tawp a. Chet ṭhulh chuang miah lo, inpha mán zatin, rang lutuk tak hian a silai chu vawi hnih a han hmet pûak nghâl ṭhuai ṭhuai a.

Scatter gun kengtu silai ken chu mu khat chuan a len lawp a, mu khat leh chuan a dàrah a han fuh a, bang deng dawtin silai kengtu chu a léng phei ta a. Kawngkhar bula Mexican pahnih lo lut vatte pawh chuan Severn-a pistol kua chu an rawn hmuh hmasak ber a ni ta; rang takin an kut chu an koki chenin an phar chho ta nghâl vat a.

Severn-a chu Bar bula a din tlat avangin mi dang zawng zawng chu a hmachhawn vek a, an hotupa ber pawh a silai kua chuan a tin zâwn kher mai. Morrison-a chuan, "Eng nge he thil lo thlen dan hi ni ta ngawt a?" a rawn ti a. Savern-a chuan, "Vawi leh khata thil lo thleng thut an tih ang hi a ni a; chu chu a lo dawngsawngtu i ni ta a nih hi!" a lo ti mai a.

Morrison-a chuan, "Mister, tu pawh lo ni ta la, thil sual lian tak i rawn ti ta a nih hi. He thil hi i tel ve-na tur chi a ni miah lo," a han ti a. Severn-a chuan chang khel khawl hian, "Mihring dan chêpa an awm ka hmuh hian thil min tihsualtir fo ṭhin reng asin. Rang takin i iptea thil awm kha rawn phawrh vat mai rawh!" a ti ta hmiah a.

Morrison-a chuan anchhe tinreng a lawh a; mahse, Severn-a chu a ṭhen sak duh chauh va. "I thu sawi chu tih theih a nih hrep loh chu! Tun aṭang hian pathum thleng ka chhiar ang a, pathum ka chhìar thlena i iptea i thil àh kha i la phawrh loh fo chuan i beng pakhat emaw, pahnih emaw kha chu i chán nghâl ngei dawn a ni," a ti leh ta hmiah a.

Pa lian leh hmuihmul chhur chuan Severn-a chu a haw êm êm a. Chutih lai chuan muangchang hian Severn-a chuan, "Pakhat," a lo ti ṭan ta a.

Morrison-a mitmengah chuan hlauhna a lo lang ṭan ta a, thinrim em em hian, 'he mihring hi tu nge ni ta hrep le?' tiin a ngaihtuah a. A hmel lan dan aṭang chuan a vauna, dam thlep thlawpa a sawi pawh chu tihlawhtling mai duh àwm hmel a pu tlat bawk si. Kit leh Headley-a te a han nghaisak dàn aṭang reng khan a chet dan tur pawh a hisap theih bawk si nen.

"Pahnih,"

"I nunna kha anchhe dawngin awm rawh se!" tih pahin Morrison-a chuan a iptea thil awm chu a rawn phawrh ṭan ta a. Ipte chhunga tangka tel chu dawhkanah chuan a rawn tla tawp tawp a, "Kha zawng kha a ni," a ti ta hlawl a. Severn-a chuan Main-a lam chu hawiin, "Nang khan chhiar rawh le," tiin thu a han pe a.

Chutih chhung zawng chuan Main-a chuan mak ti êm êmin thil awm dan chu a lo en kiau a. Hmanhmawh takin tangka tel chu a phelh a, a chhiar ta sawk sawk a, "Zariat chuang hret a nih hi," a ti ta a. Severn-a chuan, "A nih leh, card kha phuah pawlh rawh," tia thu a han pêk leh chuan Main-a chuan hneh takin card chu a'n shuffle a, dawhkanah a dah ta a.

Severn-a chuan a pistol hmawra Morrison-a tin pahin, "Nang khan phawk rawh le," a han ti leh a. Morrison-a chuan, áng nuah nuah chung hian card phawh chu a tum loh hmel deuh a ni ang, Severn-a chuan dàr chhin âk chung hian rang fahranin a silai chu a han hmet pûak ṭhuai a; tin pawh a tin miah chuang lo nain, pa lian zet Morisson-a pheikhawk ding lam keartui chu a thlawn ta hlawk a.

Morrison-a chu hlau êm êm hian a pai ta ṭawng ṭawng a; chutih lai tak chuan, "Phawk vat rawh," tiin Severn-a chuan thu a rawn pe leh ta a. Han phun leh ngial zawng a duh tih a hmelah a lang; mahse, he tlangval hian tin pawh tin lovin, eng chau angreng tak leh mi dang karah awlsam êm êmin a pheikhawk keartui a rawn kah thlâksak thei a, pen sawm panga emaw lai danah lehnghal!

Tunah hían a silai lah hmeh per leh mai theih a ni bawk si; a keartui kâp fuh lova a khûpa a rawn kah hlauh chuan kumkhaw chawr lohna a thleng tawh ngei ang. Hei hi khaw thlang mite hlauh ber a ni tlat. Chu thil ṭha lo pumpelh nan tiin Card pawh chu a phawk ta nge nge a.

Severn-a chu ngeiawm angreng tak hian a han nui a, "Ka ṭhelh hauh dawn lo asin," a han tih chûan Morrison-a chu a tithinur lehzual a. He mihring hian a ngaihtuahnate chu a lo hre thei vek em ni? A kuta card a phawh chu a han en a, muangchangin a nui ṭan ta a, zat sàwm a lo ni reng a.

Severn-a chuan Main-a chu a'n bûk khum nghat a, "I phawh ve hun," a han ti a. Main-a chuan card chu a han phawk a, a han pharh chuan Queen a ni ta tlat thung! Severn-a chuan, "Fair takin tunah khan hnehtu chan i chang a, i pawisa kha khâwm nghâl rawh," tiin thu a han pe leh a.

Main-a chuan hmanhmawh takin chu thu pek chu a tihlawhtling sawk sawk a. A iptea a han khung zawh chuan Severn-a chu a han en a, "Ka lawm kher mai," a han ti a; mahse, Severn-a chuan a lo ngaithla hauh lo, "Pawnah i sakawr a awm em?" a lo ti vat a, a awm tih a han hrilh chuan Severn-a chuan Main-a chu pawn lam pan turin a hrilh a, "Min lo veng ve bawk la," a ti nghal a.

Main-a chuan pistol tê chi chu a dàra a pàina aṭang chuan a phawrh thuai a, kawngkhar bul a thleng chiah tihin Severn-a pawh chuan a awmhmun a siam rem ṭan ve chiah a.

Chutih lai chiah chuan Morrison-a pawh chu a lo che ve ta a. A kuttum rinawm tak chúan mak tih khawpa rang hian a hmaa dawhkan chu a chawi lawp a, a chàwi rual rual chuan Severn-a vawm nan a hmang a, a kut ding lamin a pistol chu a phawi nghâl bawk a, "Kan mi suala kha that nghâl rawh u," tiin a áu chhuak tuar tuar a, buaina a inṭan ta nghal a.

Thawk leh khata thil lo thlen thutah chiah khan Severn-a chu a ṭhingthi rawp a, dawhkan chuan a rawn khûm fua a, a piah bang chu na fé hian a va deng rawp a. A khûpin chhuat a tawh rual rual chuan a pistol chu a phawi chhuak zawk a, vawi thum ngawt a hmet pûak ta zawt zawt a.

Chûng silaimu pathumte chuan Morrison-a áwmah inchi khat danah a verh kaw chuk a. A pistol a phàwi chhuah kim ve hmain silaimu pathumin a déng hman a, a tluk hma la lain a thi chiang hman hle a, duh loh paih ang thlawrhin chhuatah chuan Morrison-a chu a tlu ta a..

Mexican pahnihte pawh khan an puin buaina a sìam chu lo hman ṭangkai ve tumin silai an chuh vat a, chhuatah an let tawp tawp a; mahse, mipui insaseng avang chuan awmze neiin an silai an chelek thei bîk lo. An khingpuite tawm-im theih deuh nan zawng an silai chu an hmet per ve hram a.

Severn-a chuan Main-a chu a va melh zawk a, Main-a chuan a pistol tê reuh tê chu a lo tin chiah a, a'n hmeh per chiah chuan Mexican pakhat zawk mit leh mit inkarah tak silaimu chu a lut phawm a, Mexican pa chu che leh tur a awm ta lo.

Mexican pakhat chuan mangang takin a silai chu a hmet pûak a, Bar phènah a tlan phei ta a. Bar hnuai deuha kaw (kua) awmna lai tak chu Severn-a silaimu chuan a va pan siah a, na tuar áu thawm chu a ri ta rawng rawng a. Bar hnung lam a va bih zawk chuan chu pa chu a thi nghâl tih a va hmu thei a.

Engkim a reh ṭan chiah tihin, "In veng ṭha rawh," tih thawm a rawn ri leh ṭhawt a. Severn-a chu a vir zawk a, a hma deuha mi pakhat a chhut thluk kha lo harh chhuak leh tawhin silaiin Severn-a chu a rawn tin chiah hi a lo ni a; mahse, chumi bâk chu a hmu hman ta lo. Silai tê reuh tê, Main-a kuta mi kha a rawn pûak ṭhuai a, chu pa chu a zâl leh nghâl ta rawih rawih a.

Engkim a reh fel ta tihah Severn-a chuan Gambler lam chu a hawi a, "I hnena lawm thu ka sawi hun a ni ve ta," a ti sap a. A thih teuhzia chu a ngaihtuah nauh nauh a; a upat ve tak deuh avanga a fimkhur loh vang ni tein a hria a; mahse, chutia a inngaihtuah lai chuan Main-a chuan, "Ha aiah ha' an tih ang deuh kha a ni ta a nih hi. Ti rawh, he hmun thianghlim lo tak lak aṭang hian i chhuak nghâl teh ang," a rawn ti ta hlauh a.

Severn-a chu a bu nghat a, pindan chhung chu a'n en kual thuak thuak a. Morrison-a leh a pawlte chu chhuatah chuan thiin an let phung a; tu mahin chûng mite chu an ṭah lo vang, hmun remchang hmasa berah chhinchhiahna awm lovin an phum bo mai dawn a ni.

*******************

Chhun zan zawmin tlang sang lam panin an kal zel a, a tuk leh zanah chuan ramri aţanga mel za laiah an awm ta a. Riahbuk an khuar a, coffee tak rem ráwm chu an in dun ta a. An coffee in lai chuan Gambler Main-a chuan San Jose khuaa thil thleng chu a rawn sawi chhuak ta a, "Chiang kuangin lawm thu pawh ka la hrilh hauh lo che a," a han ti a. Severn-a chuan, "Ha aiah ha' tih kha a ni mai alawm," a ti a, a nui sak a.

Main-a pawh chu a nui ve mai a. "A thu hrimah, nang chu rawn inrawlh lo la chuan, che tur zawng ka awm miah lo a nih kha," a han ti leh a. Severn-a chuan, "Dan chêpa mihring an awm hi ka ngaithei tlat lo a ni," a lo ti a. An ngawi leh vang vang a; ral khatah chuan sihal a u vak vak a.

Main-a chuan, "Engati nge i rawn inrawlh ve reng reng ni?" a'n ti leh hram a. Severn-a chuan, "Ṭanpui i ngaih hmel tlat alawm, khatiang zât khân an hual bet tlat si che a," a lo ti leh mai a. Mahse, Main-a chuan, "Ka hria alawm, ka hre chiang khawp mai; mahse, khatiangah kha chuan eng mah ti lovin i lo ṭhu fel mai thei a; ka buai buaiin ka buai mai tur a ni a," a ti leh.

Severn-a chu a ngawi vang vang a, ngaihtuah muk tak nei ni awm tak hian, "Thil tum thuk zawk ka nei alawm maw le," a ti ta phawng a. Main-a chu a ngawi reng a, mak ti awm tak hian a mit chu a han siai sak a. Severn-a bawk chuan, "Keimah zawk hian ṭanpui ka ngai a, nang hi chutianga min ṭanpui thei tur dik tak chu i niin ka hria a," a ti ta a.

"Tu nge ka nih min hria a maw?"

"Ricky Main-a i ni a, Saloon-a inkhelh ching; mahse, tenawm taka mi bum ching ni lo i ni. I card chan ang ang changa mi dangte khel mai ṭhin niin an sawi che a, chutiang ang chu inkhelh dan váng zawk a ni. Tin, i silai tê reuh tê hmang thiam tak i nih hi ka hre vek bawk,"

"Chûng zawng zawng chu khawi aţangin nge i hriat a?"

"Chûngte chu heng lai leh hmun hrang hrang aṭangin ka hria. El Paso-ah te, Fort Griffin-ah te, Abelene-ah te leh Tucson-ah te pawh ka hria. Chung khuaahte chuan Ricky, i awm tawh ṭhin reng a ni lawm ni?"

"Awm ṭhin teh reng mai; chet sawn fo hían min man har zawk tlat alawm!"

Severn-a chuan a coffee in lai chu a'n dut khalh a, Main-a chu a han en leh chiah a; mahse, a thil hmuh hmasak ber chu Main-a silai tê reuh tê kaw hmawr kaw pham chu a ni ta reng mai! Main-a chuan, "A nih tak chu Law-man! I silai kha i kawnghren chawp khan phelh thla vat mai rawh," a lo ti ta a.

Severn-a chuan, "Rick, i tisual der a ni," a han ti sap a; a kawnghren phelh chu a tum loh hmel hle a. Mahse, Main-a chuan, "Ka fiamthu a ni lo tih hrilh kher che hi ka châk vak lo a nia," a lo ti leh a.

Severn-a pawh chuan dar chhin âk chung hian zawi muang leh fimkhur takin a kawnghren chu a phelh thla a. Main-a chuan a pistol chuan zaizirin kal sawn turin a hrilh a, a pistol tlâkna aţang chuan Severn-a pawh chu a kal sawn ta a.

Chhum hmek hmawk, hlauhawm tak hian Main-a chuan, "Tunah hian, tu nge rawn tir che tih min hrilh rawh le," a ti ta a. Severn-a chuan, "Tu mahin min tir lo; i chanchin hi ka hre ve mai mai zawk a ni," a ti mai a.

"Chuti a nih chuan ka lu man awm pawh i hria tihna a ni ti raw?"

"Hre dawn lâwm ni?"

"Ka lu man khawm chu i tum ta tihna a ni maw?"

"Tum lo; chu chu ka ti thei lo,"

"I sawi dik chiah a ni. I phawi rang hle tih chu hre mah ila; tunah hi chuan i ti thei tlat tawh lo!"

Ṭhen sak chung hian Severn-a chuan, "A dik khawp mai. Keini, Bounty Hunter-ho hi chu kan inang tláng vek zawng a ni. Kan mi duha chu harsatna hmun aṭangin kan han la chhuak te te a; chumi hmun aṭanga mel za emaw lai kan tlànpui hnuah kan mi mana chu kan han inman lettir leh a; a finthlâk ṭhin ngawt mai," a ti ta ngawt a.

Main-a chuan mak a ti ṭan ta hle a. A thu sawi chuan awmze ril tak a nei tih a hria a, chu chu a la tak sâwt hle a. "Eng nge sawi i tum a? Chiang takin sawi thuai rawh," a han ti a. Severn-a chuan, "Ngáwi teh Main, i silai kha dah bo vat teh. I lu man hi khawm tum ni ila chuan hun ţha tam tak ka neih lai khan ka khawm daih tawh zawk ang. Tunah hian chutiang rilru chu ka pu lo va; i ṭanpui hi ka ngai zawk a ni," a ti ta a.

Main-a chuan ngun takin Severn-a chu a en a, he pa thu sawi hian awmzia a nei viau zel a; mahse, a ṭanpuina a dil tlat erawh chuan awmzia neiin a hre thei lo. "Ka ṭanpui hi i mamawh a maw? Eng atan nge ni ta a?" a han ti leh a. Severn-a chuan, "San Jaime khuaah Cullane-a man turin ka kal dawn a ni," a ti ta a.

Hun eng emaw ti chhung chu Main-a chu a ngawi vang vang a. He tlangval, tlangval satliah ve mai anga lang, a nunna ngei chhanhimtuin a ngenna chu ngun takin a ngaihtuah a; mahse, a ngaihtuah rei deuh hnu chuan a nuih a tiza ta riau a.

Rei deuh hnuah phei chuan Main-a chu a nui chhuak ta hial a; a nui nasa lutuk chu a pai ṭawng ṭawng a; mahse, chutih lai zawng chuan a mi man chuan thil a la thutak hle si. Chumi a'n hmuh chuan mak a ti ta hle a, "Eng vangin maw? Heng i thu sawi hi i ti tak tak angreng hle si a; a va âtthlak em!" a ti ta a. Severn-a chuan, "Ka la thutak reng ang chu," a lo ti mai a.

"A nih leh, chumia ṭanpui tur chuan min sáwm a nia maw?"

"Ka sáwm che chu a nia lawm,"

Main-a chuan a lu a thing nawk nawk a, a pistol tê reuh tê pawh chu a bawmah a khung leh ta a. "Severn, i â ta a nih loh pawhin ka hmuh tirh phat aṭang che khan mihring i lo tling chiah lo tihna emaw a ni phawt mai! Mi pakhat, Cullane-a rama amah chauhva a kal chuan Hremhmun kawngkhar a pan nghâl tihna a ni. Mahni intihlum turin a kal tihna a ni mai. Chûng lai ram chu vawi sàwm aia tam ka kal tlâng tawh a, a chanchin ka hre chiang em em a ni. Cullane-a chu chu lai ram pathian chu a ni mai a, tu mahin an khawih thei reng reng lo," a ti ta a.

Severn-a chuan, "Chu chu tihdanglam ka tum alawm," awlsam tak hian a lo ti then a. Mak ti tak hian Main-a chuan, "Tun maiah khan i thu sawi chu ka ring hman ṭhelh a; mi pakhat maiin chu lai ramah chuan thil awm dan a tihdanglam theih mai ka'n ring hman rum rum a; i tih theih ngat chuan ka neih zawng zawng hi ka pe ang che; mahse, chu chu tih theih a ni tlat lo. Ṭhianpa, Cullane-a khu khawih theih chi a ni lo," a ti leh ta zawk a.

Severn-a chuan, "Ka ti dawn alawm; mahse, ṭanpuitu ka mamawh dawn a, chu mi chu ka ring ngam bawk tur a ni," a lo ti hmiah a. "Keimah hi i tihna a ni maw?" Main-a'n a lo tih chuan Severn-a chu a lo bu nghat a. "Mi tu emaw, chu lai hmuna lo awm fo tawh leh chûng ho pawhina an hriat ṭhan leh harsatna hmunah pawh ka hnunga ding ngam tur ka mamawh a ni," a han ti a.

Main-a erawh chuan, "Severn, chutiang mi chu i mamawh khawp ang le; mahse, kei hi chu ni lo ve. Eng vang teh lulin nge kei hi hremhmunah kalin Cullane-a leh a hote ka inkah hlumtir ngawt ang ni? Chûng vang chuan eng mah ka chán phal hauh lo mai," a ti ta tlat a. "A dik alawm," Severn-a chuan a lo ti ve mai a.

Main-a pawh chuan, "A dik chiah reng a ni," a ti a, a ngawi ta reng a. Nakin deuhah chuan, "Ka lo inrawlh ve-na chhan tur reng reng a awm lo," a han ti leh a. Severn-a pawh chu a bu nghat a; mahse, "A dik e; a nih leh, i tual thah thubuai kha engtin nge ni ta ang?" a'n ti ta zauh a.

Main-a pistol tê reuh tê chu a rawn chhuak leh zawk a, Severn-a pawh chuan a rang a ti kher mai. "A ni tak maw Law-man! I sawi tur ang ang chu sawi thuai rawh. Engtin nge chutiang te chu i lo hriat leh zel chu le?" a ti ta khar khar a.

Severn-a chuan, Rick Main-a'n tual a thah dan te, a mi thaha chuan hriamhrei reng a lo pai ve loh thu te; Sheriff-in a man tâk thu leh khaihlum a nih dawn tûka a mantu Sheriff-in a chhuah leh tâk thu te; chu Sheriff chu Governor Bleke-a'n a dâwp chhuah leh vek thu te leh chu Sheriff chuan hremna phu tâwk a chan tâk thu te chu a sawi ta vek a.

Main-a chuan, "A lo nih hrep tak chu! Tunah chuan Law-man i nihzia a chiang ta a; John Law-a emaw i ni ngei mai; i nih lohzia i fiah a ngai ta tlat," a ti ta a, a pistol chuan a tin ran a. Severn-a chuan, "A nih loh leh, i pistol kha lek fimkhur deuh rawh. Ka saddle bag-ah sáwn lehkha them ka dah a, chu chu ka va phawrh ang e," a ti ta a. Ama bag chhunga lehkha a phawrhah chuan a chungah hawrawppuiin chiang fé hian thil inziak a lo awm a, chu chu Main-a a hmuh ta a.

"SUDDEN-A, RÛK RÛK LEH TUAL THAHNA AVANGA WANTED" tih hi a inziah bakah a nih dan, "Naupang deuh, sam dum ṭha tak leh hmuihmul nei, meng pawl rem rawm; cowboy satliah anga inthuam, pistol pahnih fual taka pai; sakawr dum lian tak, a hmaiah leh a ke hnung lam kaiza bula a vara ráng," tih inziak chu Main-a chuan ring takin a chhiar ta lauh lauh a. Chu poster chu Fourways Sheriff chhuah a ni.

Main-a chuan, "I naupang tâwk lo va, hmuihmul i nei lo bawk," a han ti a. Severn-a chuan, "Ka sakawr, Nigger-a pawh hian a hmaiah emaw a ke hnung lamah emaw thil var eng mah a pu chuang hlei nem; sahbawn leh tui sa deuh hmanga i sìam chawp ngawt loh chuan," a ti ve ta hmiah a.

Main-a chuan a lu a thing nawk nawk a, "Nang hi, Sudden-a an tih hi i ni a maw?" a ti ta a. Severn-a chu a bu nghat a; mahse, Main-a chuan hnehtu chan changa a la inhriat loh avangin a pistol chu a kàu ri ta bak a, "Tunah chuan dâwt i sawi chiang tih ka hre ta; Sudden-a chu a thi tawh alawm!" a ti ta a.

Sudden-a chuan a lu a thing a, "Rick, i silai kha dah la, thil awmze dik tak ka hrilh ang che. Sudden-a chu a thi tawh i tih kha a dik alawm. A pa thattu nia a ngaih zawnga kum tam tak a beih hnu khan Hatchett's Folly-ah a hmu ta a; a mi zawn zinga pakhat zawk kha ama pa ngei a lo ni tih a hmu chhuak a nih kha. A tawi zawngin ka'n sawi mai ang a, khata ṭang chiah khan Sudden-a chuan a hming a thlâk a, a bo pil ta hmiah reng a ni. Chumi aṭang chuan Hatchett's Folly-ah awmhmun a khuar ta a; Sudden-a hming tak chu Donald Severn-a hi a ni," a ti ta a.

Main-a chuan a lu a thing nawr nawr mai a. A hma lawka dâwt sawi nia a ngaih chuan thu dik tak a rawn hrilh ta tlat mai si. Sudden-a phàwi ranzia te, a thu sawi zawng zawng te chu amah ngeiin a dik tih a hre vek mai. San Jose khuaa a chet danah te pawh Sudden-a a nihzia chu fiah ta vekin a hria a. Cullane-a leh a hote ṭháwng darh tur chuan amah ngei hi kal àwmah pawh a ngai zui ta zel a. Mi thar hmu ta ang mai hian a bula mi chu a han en a, "A nih leh, chu, wanted i ni ta lo tihna a ni maw? I thu sawi hi ka awih zâwk ta fo mai ka ti," a ti ta a.

Severn-a'n, "Ni tawh lo ve; kum li, kum nga lai kal taah khan thai bo a ni ta a ni," a han tih chuan Main-a chuan, "Eng vangin maw?" a lo ti thuai a. Severn-a chuan sawi harsa ti angreng tak chung hian, "Tunah hian ka mihring zah tak maiin Cullane-a leh a hote tichimit turin min tir a. Ka tana hun a thim lai tak, harsat lai takin ti turin min tir a ni. Ka khawsak zel dan tur kawng min kawhhmuh a duh a ni," a ti ta a.

Main-a chuan Severn-a thu sawi aṭang chuan thil sawi chhuah hreh tak eng emaw a nei a ni tih a lo hre mai a; thu dang eng mah zawt leh ta lovin a pistol chu a páiah a thun a, chibai buk nan tiin a kut a phar chhuak a, "Don, tu pawh lo ni ta la, ka pawisa ta hauh lo mai. Ka ring tâwk che a, i hnenah chuan hremhmun thleng pawhin ka kal ang a, chuta ṭang chuan ka kír leh ang," a ti ta a.

Severn-a hmel pawh hlimnain a lo khat ta; mahse, a mitmeng ril takah chuan lungngaihna tak a la nei. "Hremhmun thleng chuan ka hruai thei ngei ang che; chuta ṭanga chhuah leh erawh kan theih tawpa kan beih a ngai ang," a ti ta a. Main-a pawh chu a nui sak a; mahse, Severn-a thu sawi hrul chiahah chuan kimkitna tak a hmu leh ta a; an hmaah chuan Cullane-a ram a awm a, anmahni mualpho taka sìam tum mi eng emaw zatin chu ram chu an veng tlat a ni.

Chumi zan chuan thing bul fal deuhah hian Severn-a chu a mu a, Main-a chuan ama hriat tawk lek lek hian, "Tunah chuan Cullane-a leh a hote chuan min tizam zên zên tawh lo vang. Sudden-a hmaah pawh ṭum hnih ngawt silai ka lo lek ve ta a, chutiang chung chuan damin ka la khawsa tlat si a," a ti nauh nauh a.

Mu chung chuan, 'eng vangin nge Sudden-a hian felfai taka a silai a tun tawh hnuin mi sual hnu chhui tura a lo thawh chhuah leh kher' tih chu a ngaihtuah vang vang a; mahse, amah hi Sudden-a a ni tlat a, chu vang ringawt pawh chuan mi sual hnu chhui chu a tih tur niin a hre ta ber a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 17th, 2018, 8:24 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 4

Severn-a'n San Jaime khua a thlen chuan, a thlen hma darkar sawmhnih pali dawn laiah Ricky Main-a chuan a thlen tawh a ring a. Tláng chhipah khan chhim lam leh khaw thlang lam hawiin an inṭhen kha a ni a; an in ṭhen dawn lai khan Severn-a chuan ṭhen sak chung hian eng mah enghelh chiam tawh lo turin a ṭhianpa chu a hrilh a.

Mahse, nui deuh chung bawk hian Main-a chuan, "San Jaime khuaah eng mah la thutak lo tura inhrilh chu hriat thiam harsa ka ti; Cullane-a khua a ni a, a hriat lohvin eng mah a awm thei si lo va," a ti a. Severn-a erawh chuan, "Nang leh kei hi ṭhian kan ni tih tal hi chu hre lo phawt mai se a ṭha ngawt ang. I kalna kawng chu zawh rawh le," tiin an inthlah liam ta kha a ni a.

Hmanhmawh lo takin a sakawr chu San Jaime khaw kawtthlerah chuan a kaltir a, in, L anga kawi hi a va thlen chuan sakawr dahna in a ni tih a hre mai a. Veranda-ah chuan ṭhutthlengah mi pakhat lian zet zawt, mitmeng sen rem rum hi a lo ṭhu a, ngun leh thip fahran hian Severn-a chu a lo thlir a. Severn-a chuan, "Nang hi, he sakawr dahna in neitu hi i ni ang maw?" a han tih chuan chhang hran lovin a lo bu nghut ringawt a.

"A nih leh, ka sakawr hi chaw te pein tui pe bawk la, riahna tur hmun lo siam bawk la," a han tih chuan chu pa chuan, "Zan khatah dollar sàwm a ni," a lo ti nghut a. Severn-a chuan mak a ti hle a, "Dollar sàwm maw? A to fer fawr hle mai a," a han tih leh chuan, "Chutiang rilru i put chuan ram dangah kal mai rawh," tih chu chhanna a hmuh chhun a ni leh ta mai a.

"Hei chauh hi sakawr thlunna awm chhun a ni maw?" tia Severn-a'n a han zawh leh pawh chuan, bu nghut chauhvin a chhang a. Chu mikhual tharlam tak chu a ngai sang lo hle tih a hmelah chuan a lang ngawih ngawih a. Severn-a'n, "Dollar nga ka pe ang che," a han tih leh chuan chu pa chu a ṭhutna aṭangin a rawn tho chhuak a, a lo lian kher lehnghal a. "Zan khatah Dollar sàwm a ni. I pek dawn loh chuan kal sawn nghâl rawh," a ti ta hmiah a.

Severn-a silai pai fual tak chu a'n melh a, "Khang i silaite kha hman tum chhin duh suh. San Jaime-ah hian khawi mah i thlenpui chuang lo vang," a ti ta zel a. Severn-a chuan, "Chu, khaw rura tak a ni dawn a ni maw?" a han tih chuan chu pa chuan, "Tu mahin he khuaa kal tur hian an sawm lo che," a lo ti leh hmuk a.

Severn-a chuan, "Buaina ka zawng hranpa hlei nem. A nih leh, Dollar sàwm chu ni ang hmiang," tih pahin dollar sàwm chu a pe a, Nigger-a pawh chu sakawr thlunna hmunah a hruai ta nghâl a. "He sakawrah hian chùan chhin tum duh suh; chu chu a hrisel zawk daih ang," a han ti zui a. In neitupa pawh chuan, "Sakawr hman tur ka nei ve tho alawm," a lo ti ve mai a. Inbe zui leh tawh lem lovin Severn-a chuan a chhuahsan a, a ding lam Hotel-a eng lo chhuahna lam chu a pan ta nghâl a.

Chu Hotel pawh chu Mexico ram in ang mai bawk a ni a; mahse, danglamna riau a neih chu chhawng hniha sak a ni ve khanglang a. A bang a chhah ṭha hle a, lum lutuk leh vawt lutuk tur lakah chuan a vawng ṭha hle a ni. A kal pah chuan mei a ṭan kai a, mi dang leng vel leh in hrang hrang aṭanga mite khawsak dan chu a chîk neuh neuh a. Mite chuan hlim hmel an pu ve tho chungin hlim lohna riau nei tlat hian a hria a.

Hotel chhung a va luh chuan mei khu a lo zing mup mup a, mite chu an awm ngei a; mahse, mahni thua an duh ang ang sawia hlim taka khawsa chu niin a hre thei tlat lo. A ni reng ang chu; hei hi Cullane-a khua a ni a; a thu chu thu tawp a ni a; a rorelna chu pistol a ni tlat alawm.

Bar lam a pan phei nghâl a, Mexican hàng ren rawn chuan a in tur chu lo buaipui nghâl vat a tum a; a mitmeng aṭang erawh chuan lo buaipui chu a phur hran hauh lo tih a lang thung. Severn-a chuan, "Hmel thar mak tak tak i hmuhte chu eng teh vakah ngai mah ta che," tih pah chuan Beer a order nghal a. "A tui khawp mai," tih pahin a no chu dawhkanah chuan a hung a, "No khat dang min han pe leh teh," a'n ti zui nghâl zat a.

A nghâktu chuan, "Ni e; mahse, no khat hi dollar hnih man zel a ni," a ti a; chu chu ramri hrul, hmun danga no khat man let 4 zel a ni si a, Severn-a chuan, "Dollar hnih zel maw?" a han ti há a. "Ṭhianpa, thil man in va tisang vei reuh ve le," a han ti zui a.

Severn-a chuan beer no khat no a dawm leh chiah tih chuan Bar tawp hla de daw aṭang hian pistol a rawn pûak dawt a; no chu a keh darh nghâl chuai a; beer chuan a nghâktu leh Severn-a hmai chu a phuh chuai mai a. Bar nghâktu chu a biru vat a; Severn-a erawh chu a inher vat thung a.

A piah feet sawm vela hlaah chuan pa cher lam deuh hian pistol .45 kengin a lo hmachhawn reng chu a hmu ta a. Chu pa chuan, "Mister, thil man ṭhenkhat ngaihthiam loh deuh i nei em ni a?" a lo ti a, a bulah chuan tawi deuh leh sa ṭha deuh zawk hi a lo ding bawk a. An hmel en reng reng pawhin ruk hmang leh Dan hlauva tlanchhia an nih chu hai rual an ni lo.

An pahnih chuan inthuamna mak tak tak an inbel a, Mexican spur an vuah te chu a hriam hmel hrep lehnghal a. Pakhat zawk, tawi deuh zawk leh la ṭawng chhûak ve miah lova phei kha chuan amah Severn-a ang mai chuan fual hnelh hnawlh hian pistol pahnih a pai nghe nghe a.

Rawn ṭawng chhûaka chu en reng reng pawha ngeiawm tak hi a ni a, a kawr ngháwng bal zet thlengin a sam chuan a khuh a. A hmelchhe tak chu rei ngial meh tawh loh, a hmuihmul chuan a khuh chhur bawk a.

A ṭhianpa chu a aiin feet khat velin a hniam a, a sam chu a sen thar a. A thawmhnaw inbelte chu a ṭhianpa thawmhnaw ang deuh mai a ni nain a thianghlim zawk a. A hmelah pawh chuan no rawn kâptu ai khan a thu neih hmel zawk bawk a.

Severn-a chuan a'n thlir vang vang a, rawn kâptu kha chu buaina chawh chhuah tumtu zawk niin a hria a, pakhat zawk mitmengah pawh chuan khawngaihna a tlakchhamzia chu chiang takin a lang chhûak a.

Severn-a chuan buaina sìam a tum lohzia chu a kut chet dan aṭang chuan lantir a tum hle a, hlim hmel tak put hram hram a tum bawk a. "A man thu chu a ṭha vek e; in fiamthu rawn thawh dan chu min tina ṭhelh alawm le," a han ti a.

Silai keng zawka chuan, "Mikhual bengchheng deuh that thei hi khaw chhungah hian a khahin an khat tlat a ni; an fimkhur hle loh chuan," a rawn ti a. Severn-a chuan ring deuha nui chung hian, "Kei aia fimkhur hi in tawng leh khát hle tawh ang chu. Chumi lantir nan chuan naute u, in tur ka'n leisak hial teh ang che u," a han ti a.

Pa tê zawka chuan, "Crawlin," a'n ti ṭhat a, a vawi khat rawn ṭawng chhuahna a ni. "A hma deuh khan chu chu lo hre tur ka ni a; ṭhiana, i in lai chu chhunzawm rawh; Flatman, i silai kha a páiah khung rawh; han chhaih buai tlâk a lo nih loh kha!" a han ti leh a.

'Flatman' tia a koha chuan a silai chu a páiah a khung vat a, bar-a zu no lâk tum chuan a ban ta nghâl a; mahse, no a hum ṭep tih chuan silai a rawn ri thawr a, a kut chu silaimuin a rawn déng ta emaw tih mai tur hian rang fahranin a la kir vat a. Meng phâwk hrá chung hian a inher vat a, "Tu nge ni ta phiang...," a han ti a; a sawi zawh hma chuan a tàwp ta chawt a.

A hma lawka a lo chhaih buaia ngei khan, aw dam thlep thlawp hian, "Keimah ka nia," a lo ti hmiah a; a hmela nelawmna erawh chu a bo hmiah tawh a. A hma ang tho khan thatchhe awm takin Bar chu a ngheng a; mahse, a hma aia a danglamna chu a kut ding lamah chuan che map lova pistol a lo awm ta chu a ni; chu .45 pistol chuan Hotel chhunga mite chu a tin vek bawk si!

Severn-a chuan, "I kut bul lawkah khan saidawium hring deuh nghelh nghulh ka hmu a, khatiang khân natna hrik, mi tihlum thei a pai an tih ka hria a; mi an fimkhur thiam hle loh chuan," a'n ti ve ngat a. Flatman-a hnunga pa tawi zâwka chu melh zauh chung hian, "Nichina in sawi ang chiah khan khua hi, mi that mai theiin an khat tlat a ni," a han ti leh a.

Chûng thil thleng lo hmutute chuan chiang lehzuala thil awm dan hmuh zel an duh a, 'He mi â tak, fimkhurna pawh nei lo hi tu nge ni ta ang? A awmna hmun hi a hre lo tihna em ni ang?' an ti rilru a. A nazawnga fing inti deuhte chuan, chu pa awmhmun thlan thiamzia, Hotel-a lo lut thut pawhin an rawn barakhaih theih lohna tura awmhmun a thlang thiam te chu mak an ti a.

Naupang deuhte erawh chuan a pistol pai dan leh a hma lawka kut ruaka awm si, hmuh hman loh khawpa ranga a kuta pistol rawn chawr chhuak ta mai leh tin pawh tin miah lova a tum tak a han kâp fuh siah thei mai si te chu ropui an ti hle a.

Chutiang hmuna chutiang taka a che thei thei ta mai chu ropui an tiin Pathian thu sawia vak vel zawng a nih an ring thei ta hauh lo. Tu mahin Bar chunga tho fu an hmu miah lo; ngun takin Bar lam chu an thlir a; mahse, silai rik thut pawha insaseng vat thei tur chuan an insiam rem vek thung a ni.

Flatman-a chuan thinrim em em hian, "Mi i va han bum chiang kher ve le! Mi i hliam ṭhelh alawm," a han ti há ha a. Severn-a chuan, "Kha kha i hre reng tur a ni ang; nang pawh khan ka mit bul lawkah khatiang khan i rawn ti a; ka mit i tidel ṭhelh a ni. Chumi awmzia chu Pa tawi, i silai chuh tumin nang pawh khân i kut vei lam i chet tihna a nih chu. Ṭhian ṭha thurawnin; tum chhin duh suh!" a han ti ngat a.

'Pa tawia' tia a koh pawh chuan a kut chu a dah thla zal zal a. A mit chuan haw àwm takin Severn-a chu a melh a; mahse, mi â a nih loh avangin pawi zawng a sawi rih lo, "I silai kha dah ṭha tawh rawh," thu pe aw tak hian a rawn ti a, "In thil tihah in intluk tâwk chiahah ngaiin i duhna hmun lam pan tawh rawh," a han ti zui a. Severn-a chuan a mit a'n siai khum deuh sak a, "Hei hi i hmun em ni?" a han ti a.

Pa tawia chuan, "Mi sawi dan tlangpui chu a nia lawm. A thu hrimah, thurawn chu zawm rawh; a ṭha zawk ang," a han ti a. Severn-a chuan, "Zâwm àwm tak chu a ni, thurawn ṭha tak tak hi ka tawng fo tawh asin," a ti mai a. A hmaa dingin a chhan leh hma chuan amah bawk chuan, "In tur kha dollar hnih zel i rawn ti khan ka hria a, a man thu chu he laiah chuan eng pawh lo ni ta se, no khat chu dollar khat han ti ve bawk la maw le," a han ti leh a.

A hmaa mi thinur chu a insum zo dawn lo emaw tih mai tur a ni. A kut bawr pawh chuan a pistol kawm chu a hnaih tawh hle a; mahse, "Silai phàwi sa phàwi khalh thei tur khawpa ranga che tur chuan ka â tawk lo va, Mister, chutianga chet chu ka tan a ṭul lo bawk. Thurawn ka siamsak tawh che a; mahse, i pawm lo va; i pàwm loh rau rau chuan thlaler savate chaw maiah i ṭang dawn ta a nih hi," a ti ta zawk a.

Severn-a chuan, "Pa tê reuh tê si, i ṭawng lian fet mai a," a han tih leh tâkah chuan chu Pa tawi leh sam sen ther thawra chu a thinrim a sangin a ṭang át mai a, chu chu pa tê awm dan a ni reng a. "I khaw hmuhna mit kha anchhe dawng tlâk a ni! Tu nge i bik meka hi i hre reng reng em?" a ti ta a.

Severn-a chuan, "Ulysses S Grant-a pawh i ni mai lo maw? A.. i ni thei lo, hmuihmul ṭo tur khawpin i upa thei lo. Eng pawh ni se, i hnìam danah hi chuan, ni thei mai zawng i ni," a han ti leh ngat a. A beisei ang ngei chuan a deusawhna chuan samsena thin chu a ti-ur leh zual a, thinrim phun nang nang chung hian silai chu a chuh ta nge nge a.

Severn-a chuan thil awm dan chu hmu reng chung chuan, "Tut, Tut," a lo ti a, rang lutuk takin a lo inher thut a, a pistol kawm chuan Pa têa chalah a va chhu ta chawrh a. Eng mah hre lovin chhuatah a let nghâl tawp a, a chhutna laiah chuan thisen a rawn chhûak ṭiam ṭiam a. Flatman-a chuan chet ve a han tum a; Severn-a silai hmawr bawk chu a hmu ta siah mai a; a chetin a che hman ngang lo a ni.

Severn-a chuan, "Tun ṭum party chu kan zo ta," a'n ti ngawt a. "Nang kha Flatman, i ṭhianpa khân hming a nei ve em?" a han ti zui zat a. "Cullane-a, Yancey Cullane-a a nih hi," tih thawm a han hriat meuh chuan a meng thip zual sauh a. Hetiang teh thut hi chuan a mi zawn zinga mi a hmuh mai hi a inbeisei lo a ni; mahse, vanneihthlak takin a tawng ta si.

Rang takin a rilru a siam vat a, "A nih tak chu Mister," a han ti phawt a, "He bungraw rit tak hi a awmna hmun turah hruai la; a rawn harh chhuah leh hunah chuan a thurawn ang khan awm ka tum lo tih hrilh nghe nghe ang che; he lai hmun hi nuam ka ti riau mai," a ti ta a.

Flatman-a chu a rawn pawng thar ve leh a, "Mister, i dái sual thuk hle dawn a nih hi. He khua hi Cullane-a khawpui a ni asin," a han ti a. Severn-a chuan a lu a han thin khum a, "I sawi sual leh ta! Tun hma chuan a ni ṭhin chauh reng alawm," a tihsan mai a. Mak ti takin Flatman-a chu a meng phâwk a, "Chu, lâksak i tum tihna a ni maw?" a lo ti há a.

Severn-a chuan, "Mi sawi dan tlangpui chu a ni reng alawm. Nangni ang, mi tuihnai lo zet kawtthler aṭanga then fai hi i thu sawi awmzia a nih ngai chuan; chutiang hna chu ka thawk zel dawn. I ṭhianpa kha tui taka a mu a rawn thânharh hunah chuan he thu hi hrilh ang che; ka kawng dala a rawn inlan leh vaih chuan a vun kha ka lihsak ang a, sakawr in bangah sawn ka khai phar ngei ngei dawn tih hi," a ti ta hmiah a.

Chu vauna chu Flatman-a chuan a pawisa reng reng lo tih a thu rawn phuh chhuah leh aṭang chuan a hriat hle a, "Mister, i ṭawng lian lu hrat a ni! Tu-a pawh lo ni ta la, Cullane chhungkua, nangmah hmu tura an rawn thawh leh hunah chuan tun ang hian i ṭawng lian tawh lo ang a, thu nei aw pawh i chhuah ngam tawh hauh lo vang. San Jaime khua hi Cullane-a ta a ni a, he leilungah hian an thil tih theihzia chu a lang a ni," a ti ta a.

Severn-a chuan, "Ka thil tih theihzia chu nangmahah khan a lang dawn alawm," a lo ti sap a, a sawi lai la la chuan Severn-a chuan a pistol chu vawi li lai a han hmet pûak nghâl zawt zawt a. Vawi li a hmeh puah hnu chuan a vei lamin pistol dang a phawi zawk a, a hma aia rang mah khan a han hmet pûak leh zawt zawt a. A silai han kah puah dan reng reng chu máwi, nalh tak, tun hmaa an la hriat ngai reng reng loh a ni tlat mai.

A silaimu pahnih chuan Flatman-a beng chung lam chu a thawi thi ve ve a, Flatman-a chuan rang takin a ban chho vat a. A mu thumna chuan a pistol pàina kawnghren chu a thil thla hlawk a, a dang chuan a pheikhawk keartui ve ve chu a lèn khawk hlawk bawk a. Flatman-a mangang, ding ṭha thei lo chu chhuatlaiah chuan a pai ṭawng ṭawng mai a.

In chhunga mite chuan a tirah chuan hlauthawng em emin Flatman-a lam chu an ên ṭhap a; nakin deuhah chuan lawmin an nui ta chiam hlawm a. Chutiang khawpa Cullane-a hote sawisa thei chu an la awm lo va, tláwm lutuk tak maia sawisak a túar lai an han hmuh chuan an hlim em em mai a ni.

Flatman-a ngei pawh chuan din ngaihna tak a hre lo va, hlau leh thlabarin a pai ṭawng ṭawng reng bawk a. Pai ṭawng ṭawng chung chuan a'n ding chawih a, a thil hmuh chu a ngai bawk; silai, khur miah lova amah tintu bawk chu a ni a hmuh leh ṭhin ni.

Severn-a lah chuan, "I lo chhiar hman lo a nih pawhin kei chuan ka kah zât kha ka chhiar thei asin; vawi nga chiah silai ka kâp a; ka chhiar sual palh der a nih loh chuan mu khat chu a la inthun ngei tur a ni. Ka chhìar sual leh chhìar sual loh fiah te i duh a nih phawt chuan i ke bula kha i silai a awm a, chuh nan hun tam tâwk tak i la nei a nia," a han ti lehnghal a.

A lo thlirtute pawh chuan a silai kah zat kha chhìar theih chi-ah an rûat lo va; chu tlangval sang zet zawt chuan bum a tum vel mai mai em ni ang? Bum a tum a nih ngat chuan a huaisen tho tho tihna zawng a ni tho mai. Chung zinga pakhat chuan, "Ka ngaih dan chuan, mi bum han tum chhin hmel a pu tlat lo," a han ti sar sar a.

Pakhat pawh chuan, "Davey Flatman-a pawh sâwn i ngaih dan chu a ṭawmpui thlap che a nih saw," a lo ti a, a sawi ang ngei chuan mei khupin Flatman-a chuan a silai awmna chu a kalsan ta hmiah a.

Severn-a chuan, "I ti dik e. Rang takin i sakawr pan la, khua hi chhuahsan vat rawh! Kan inhmuh leh hun chuan nang aia pa lian rawn hruai tawh ang che; ka hming chu Severn-a a ni e," a tih khum ta a. Flatman-a chuan a ṭhianpa chu a kuah chhuak a, sakawr awmna lam a panpui ta hna hna a, "Mister, kan inhmuh leh hun chuan i sawi ang chiah a ni tawh ang," a ti ve hmak hmak a.

Severn-a'n a pistol kah ruah a thun lai chuan ngawi rengin mite chuan ngai sang êm êmin an lo thlir reng a. Flatman-a'n a ṭhianpa a put chhuah nawlh hnu chuan, in chhung chu a reh ṭhap a. Nakin deuhah chuan amah an lawmzia entir nan chibai an rawn bûk ta nak nak a; mahse, Severn-a chuan hmun remchang, anmahni hmachhawn theihna tur hmun a pan hram hram a. Indian-ho tih danin kal kiang turin a bán a phar chhuak a.

An zinga pakhat phei chuan, "A va han ropui rapthlak em! Severn, khatiang ang reng reng kha ka piana hnu lamah ka la hmu ngai reng reng lo," a rawn ti chhuak a. Pakhat pawh chuan, "Kei pawh chutiang chiah chu. Yancey Cullane-a kha pháwi rang tak niin ka lo ngai ṭhin a; mahse, nichinah meuh kha chuan silai hmang tìr angah chauh i chantir ta a nih kha," a ti bawk a.

Severn-a chuan an bengchheng tih reh nan zawhna, amah ngei pawhin a chhànna tur a hriat sa chu a'n zawt nghâl a. "Kha mihringin he lai hmun neitu anga a insawi kha eng nge a awmzia?" a han ti a. An zinga pakhat, lu var deuh vah chuan, "Ṭhiana, Severn, tunah chuan kha Cullane-a kha i hmu ta a, he khua hi an ta ni hliah hliahin a hmu tlat a ni; in leh a bungrua hi an nei tihna a ni lo," tih pah chuan zau tak sawi tum ang hian a kut a'n vai kual a.

"San Jaime pumpui mai hi an ta a ni ringawt. Hei hi an khawpui a ni; an duh ang angin an awm a; an duh duh an la a; a man an pe ngai lo; an phalna lo chuan he khuaah hian tu mah an cheng thei lo. He khaw tan hian thil ṭha lo tak i rawn thlen ta a ni, nangma tana pawi pawh i khawih tel nghâl bawk. He Cullane-a hi a lo thawk leh ang a, rang takin a rawn that ang che. Hmanhmawh takin he khua hi chhuahsan vat la a ṭha ber ang," a ti ta a.

Severn-a chuan, "Chutiang chu thil awm dan a lo ni maw? An duh ang ang chuan in chêttir zel mai em ni?" a han ti a. Putar deuh pakhat chuan, "Senor, mi mawl awm khâwm mai alawm kan nih," a lo ti a. "Gunfighter kan awm lo va, han che thei hlek chu an that zel mai a ni," a han ti zui a.

Severn-a chuan, "An chêt dan dang turin in bei chhin tawh reng em?" tia a'n zawh leh chuan an ngawi ṭhap a. Pakhat chuan, "Teuh nang Severn! Mi zawng zawng hian Cullane-a leh a hote'n Fronteras khua an sawisak dan kha kan hre vek a, khatianga an chet lehna tur remchang siam thu a awm lo reng reng," a rawn ti a.

Mi dang chuan, "I thil tih kha tun atan chuan a tâwk. Rang takin mei khupin he khua hi chhuahsan nghâl rawh. Chhungkua neiin fanu, fapa kan nei a, he khuaah hian kan awm pangngaiin kan la awm duh a ni," a rawn ti leh a.

Severn-a chuan, "Mipa angin chûng harsatnate chu in hmachhawn thei alawm. In kuta silai kengin lo hmachhawn ve ta u la," a han ti a. A hma deuha rawn ṭawng chhuak tawh khan, "Chutianga tih chu mumang lamah chuan duhna kan nei ve fo tawh ṭhin asin," a rawn ti leh a.

Chu pa lam chu hawiin Severn-a chuan ngun takin a han en a. Chu pa chu kum sawmli panga vel a ni a, darpharh hlai hlep hlawp, hnathawh nasat avanga a hmel pawh thu that a ni a. Chu pa chuan a kut a rawn phar chhûak a, "Ka hming chu Shearer a ni. Alcalde ka ni a, mayor pawh i duh chuan min ti thei ang chu," a rawn ti ta a. ( Alcalde - Spanish ṭawnga Mayor / Magistrate sawina - Rz )

An inchibai a, Severn-a hmel pawh a lo hlim deuh sawt a, "I duh chuan, 'Don' tiin min ko thei ang," a ti a. Shearer-a chuan, "A ṭha. Don, kei pawh 'Paul' tiin min ko ṭhin. Hei hi Diego Cruces, he khuaa lo cheng hmasa ber a ni; hei hi Hardingham, General store neitu a ni," a ti a, a bula mite chu a hmelhriattir zung zung a.

Hardingham-a chuan, "Severn, ka hmu che chu ka lawm ngawt mai; mahse, ka thu sawi kha chu a la pangngai reng tho. Mi inzir tir tan chuan Cullane-a hi khin chi rúal a ni lo," a ti a. Putar Cruses-a pawh chuan, "Senor, rang takin chhuak nghâl la a ṭha zâwk ang," a lo ti ve a. Lungngai taka a thu sawi hmél chu Severn-a'n lu a lo thin khum takah chuan lawm hmel a rawn pu ta ang lawi a.

Severn-a chuan, "Ka tlanchhe thei lo," a lo ti hmiah a; an ngawi leh ta ṭhap a. Nakin deuhah chuan hlim tak leh nui huah huah chung hian Shearer-a chuan a rawn pan hnai a, mi dangte pawh chuan, chu tumruhna chu lawmin chibai buk tumin an rawn ban leh ta huai huai a.

Shearer-a, an Mayor chuan, "Kum sarih chhung ngawt chutiang thu sawi chu hriat tumin ka lo nghâk tawh asin. He khua hi Cullane-a leh a pawlte laka lo khar hmiah thei tur mi hi ka thlir reng ṭhin a, chutiang mi chu nang hi i ni ngei mai; nang hian i ti thei ang em?" a ti ta a. Severn-a chuan, "Eng chu maw ka tih ang?" tiin a'n zawt let ngat a.

Mayor chuan, "E! ka nau, Town Marshal-ah i ṭang ang chu; hmun tinrengah hriattirna i tár ang a; chutah chuan, 'CULLANE-A LEH A HOTE TAN KHAR A NI,' tiin i zîak ang a, eng mah an tih theih loh nan i khawsa zui bawk ang chu," a lo ti mai a.

"Ni lo, ni lul lo ve, Senor Shearer, Senor Severn, khawngaihin ti lul suh u," tih pah chuan old Cruses-a chu Bar hnung aṭangin a lo tlan chhûak a, a kawr hma chúl hauh hauh chung hian, "Paul, hetiangin i ti thei lo," Shearer-a hnenah chuan a han ti phawt a, "Mi pakhat ringawt Cullane-a do turin eng mah a ni lo vang, ti reng reng suh," a han ti zui a; Severn-a chu beisei sang tak hian a en ran a.

Mahse, chutia eng mah sawi lova an ngawih ṭhap lai chuan putar pakhat, rui reng ringawt mai, thawmhnaw bal zet inbel hi a lo pen chhûak a, Severn-a chu chiang zet hian a rawn bih a, "Tu nge i nih ka hria che," a rawn ti a. A ruih em avangin amah pawh chuan a ding ṭha hlei thei lo va, mi dangin an lo dawm ding a, "Tun hmain ka hmu tawh che Mister," a han ti leh a.

Zawi sap hian Severn-a chuan, "Min hre maithei e ka Pu; mahse, engati nge i muthilh rih mai loh? I hriat rengna lo thawh chhuah hunah min la rawn hre leh zawk ta mai che," a ti sap a. Mi dangin han nawr kian mai an han tum chuan chu putar chu a lo ṭang ve nasa mai a, thinur tak chung hian, "Hriatna nei lo tur khawp chuan ka rui teuh hlei nem. Khawi maw lai hmunah chuan ka hmu tawh ṭhin che," a han ti leh hram a.

Mi pakhat hian, "Lo kal rawh Ray," a rawn ti a, a rawn hnuk kiang ta a. Chu pa chuan Gunfighter rilru a hre hle a ni. Gunfighter tam tak chuan anmahni lo hretute chu an làwm vak lo va, lu man an neih ngat phei chuan tu pawh lo ni se, hetianga titu chu an kâp hreh chuang tlat lo a ni. Severn-a pawh chuan chutiang rilru chu a put ve mai a hlauthawng a ni.

San Jaime khaw mihring zawng zawngin Ray-a chu mi tina chi a ni lo tih leh tho pakhat pawh a la thah lohzia chu an hre chiang hle a; mahse, chu tlangval, puakruk pai fual zet chuan chutiang chu a lo hre ve kher lo thei a ni.

An pawh kian dawn lai te chuan Ray-a chuan, "Mai mai ṭhin a, El Paso-ah zâwk nge indona lamah.. Mite pawhin hming pakhat emaw eng emaw tak chuan an ko ṭhin che," a la ti ta ṭalh a. A kal kian hnuin Severn-a chuan tu nge a nih Shearer-a hnenah chúan a han zawt a.

Shearer-a chûan, "Old Ray Poynton-a a nih kha. I hmuh ang khan a rui reng ringawt mai a ni," a lo ti thuai a. Severn-a chuan, "A nih tak chu. Forth Forth khuaa Poynton-a ngei kha zuk ni a! Chemte hman thiama mi hmingthang a ni a; Jim Bowie-a meuh pawh a chemte hlauvin a pawisa zawng zawng a chàntir der thei zuk nia!" a ti ta a.

Ring zet hian Shearer-a chu a han nui a, "Don, chutiangin Ray-a hi a khawsa ṭhin tih reng kan lo hre hlei nem. Chemte hmanga a khawsa kan hmuh teuhna ber chu sa zawrhnaa sa ti a hleh thlâk ṭum kan hmuh kha a ni mai asin," a ti a, mi dangte pawh chu an rawn nui chhûak ta hlawm a.

An nuih ham ham lai chuan Shearer-a bawk chuan, "Severn, engtin chuan nge ni dawn ta?" tiin a rawn zâwt ta a. Severn-a chu khùn takin a inngaihtuah leh ta a, mi dangte pawh chuan chu lamah chuan rilru an pe leh ta thung a. Ngun taka a ngaihtuah hnuin, "Ṭanpuitu ka mamawh dawn a ni," Severn-a chuan a rawn ti chhuak ta a.

Lawmin Shearer-a chu a meng tal rulh a, "I pawm tihna a ni maw?" a han ti leh a. Severn-a chuan, "Ka pawm a; mahse, ṭanpuitu ka..," a tih lai chuan a bula mite hlim áu thawm chuan a sawi tum chu a rawn khah chhilh zo ta a. Diego Cruses-a, a hma lawka pawm lo tura thlemtu pawh kha an in tur sema phur ber ber leh che rang berah a ṭang ta tho mai.

Chûng mite dinhmun makzia chu Severn-a chuan a thlir reng a. A hma lawk kha chuan Yancey Cullane-a pawh hetiang tak hian an lo lawm tawh ṭhinin, a thil tih ṭhîn avangin lawmin a dàrah te pawh an beng tawh ṭhin ngei ang; tunah a thil tih avang vekin ama dàrah te chúan an beng ta nawk nawk si! Khaw thlang ram nunah chuan a chak zâwk apiangin lâwm an hlawh mai ṭhin zawng a ni.

Chutia an hlim áu thawm zingah chuan, "I ngaih pawimawh leh theih loh tur ti turin intiam lo la a ṭha zâwk ang," tih thawm chu Severn-a chuan a hre ta a. Chu aw lo chhuahna lam chu Severn-a chuan a hawi vat a. Pa tê reuh tê, upa tawh tak leh lu ṭuak var vau tawh, feet nga leh a chanve emaw leka sang tur hi a bulah chuan a lo ding reng a, "Father Malcolm-a ka ni," a lo ti a.

Severn-a chu a bu nghat a, "Father, Hotel chhunga inserhna neih ṭhin hi chu thil mak tak a ni ngei ang chu maw?" a han ti a. Father chuan, "Gunfighter-in chutiang a rawn hriat thiam ai chuan mak danglam bikna a nei chuang hlei nem. He khua hi ven tumna leh enkawl tumna i nei deuh em ni?" a ti ta a.

"Chutiang chu hei, an sawi mek chu a ni a,"

"A nih leh, nang hian i tum em?"

"A enga chu maw?"

"Cullane chhungkua lo dan chu maw le,"

"Ṭanpuina tel lo chuan tum lo ve,"

Puithiam pawh chu a bu nghat a, "Ka rin dan tâwk a ni. Chutiang tumna i neih chuan ka khua leh tui tam tak hîan tawrhna an nei dawn a, tawpin tai a nei bawk hek lo vang," a ti a. Severn-a pawh chuan, "Mi, tu emaw talin chutiang dan tumna chu an neih hma loh chuan tawrhna chu a reh lo vang; San Jaime khua hi ṭawngka ringawta chhan chhuah theih chi ni dawn hek lo!" a lo ti ve hmiah a.

Father Malcolm-a chuan lungngai angreng taka nui chung hían, "Mr Severn, he khua hi ka hre chiangin, a ṭhatna turin kum tam tak ka lo bei tawh ṭhin a, nang ai chuan mite awmzia pawh hi ka hre chiang zawk daih ang. Cullane-a laka veng tur pawh hian theih tawp ka lo chhuah tawh ṭhin; chutiang taka engkim ka lo chian tawh avang chuan he hna hi pawm lo turin ka duh che a ni. San Jaime khua hi hun ṭha i la neih lai hian chhuahsan vat zawk rawh," a ti leh ta.

Severn-a chuan a lu a thing a, "Chutiang chuan ka ti thei lo tih i hria alawm," a han tih chuan Father chuan, "I tih theih hi ka ring lo reng a ni; mahse, ka mi leh sate tan hian ka hlauthawng a ni tih i hre thiamin ka ring. Kan zavaia tan hian hlauhthawnna ka nei a ni," a ti a. "Ngawi teh Padre, mitthi chu kan la ni vek êm hlei nem; chu chu i hria alawm," tiin Shearer-a chu a rawn inrawlh ve ta a.

"Mr Shearer, he Severn-a chunga rinna in neih hi a hlawhtling tluan chhuak lo ang tih hi ka hlau a ni. A thu hrimah, ṭawngkam mawi deuhte pawhin thu hi i sawi ṭan ve thei lawm ni?" Father chuan a lo ti a. Shearer-a chuan, "A ni tak maw Father; mahse, he thu-ah hi chuan i rawn inrawlh ve-na tur a awm hauh lo," a ti ta tlat a.

Mahse, Father chuan, "I sawi chu dik ni maiin a lang; mahse, a dik lo. Cullanes chhungkua chu hetah hian Severn-a zawngin an lo kal dawn a, hetah a lo awm chuan an rawn that dawn a ni. Tin, San Jaime khaw mipui thil ṭhenkhat zirtir intiin khuaa in ṭhenkhatte hi an rawn hal ang a, pawisawi lo ṭhenkhat hi an rawn that bawk ang. Chu vang chuan Severn-a, he laia a awm hi ka inrawlhna tur chhan a ni tlat. Severn, San Jaime khua chhuahsan turin ka ngen che a nih chu," a ti leh ta a.

Shearer-a chuan, "Lo ngawi lawk teh Father, tun maiah khan Cullane kalhin Don-a hi a ding tih kan hmu a. Ka hriat theih chinah Cullane chhungkaw do ngam mihring ka hmuh hmasak ber a ni. He khaw zahawmna rawn pe kir leh thei mihring awm chhun hi amah hi a ni maithei asin," a rawn ti a. Mi dangho pawh chuan chu thu chu zàwmin an rawn phun mar mar a.

Mahse, Father Malcolm-a chu a dang duh mai bik lo, "Rang takin an rawn that mai dawn reng a ni," a ti leh hmak a. Shearer-a chuan ngun takin Severn-a chu a ke ler aṭanga a chhip thlengin a'n en leh te te a, "Ngawi teh Father, chutiang ngawt chu a nih theih ka ring tlat lo. Chiang zawkin amah hi han en ve phawt mai teh," a ti ta a.

Rei ngial Father Malcolm-a chuan Severn-a chu a en hnu chuan lung si takin a rawn nui chhûak ve ta sak a. "Hetiang hna harsa hi i vawi khat tihna zawng a ni hauh lo mai," a ti ta a. Severn-a pawh chuan, "Vawi hnih khatna mai zawng a ni lo," a lo ti ve mai a. "Chutiang a nih chuan ka lo ṭawng sual deuh a ni ang e; Pathian i hnenah awm zel rawh se," Father chuan a ti ta a.

"Ṭanpuitu ka hmuh theih ang apiang chu ka mamawh dawn a ni," Severn-a'n a han tih chuan mite chu an hlimin Malcolm-a meuh pawh chu a hlim hle a; mahse, Mayor-in mi pakhat chu Marshal thar awmna tur kawhhmuh tura a tirh tâk avangin eng mah an sawi zawm ta lem lo.

"Naktuk lamah engkim kan la sawi zawm leh dawn nia," tih pahin Shearer-a chuan Severn-a dàrah chuan a beng thak thak a. "Ka thu sawi kha hre reng rawh. A tawp thlengin i lamah kan ṭang ang," a han ti zui a.

Severn-a chu chhuah tuma a kal sawn laite chuan a bul vela mite pawh chuan a lama an ṭanzia an sawi sap sap a. Chutih lai chuan sakawr ina a hmuh tawh kha, mi zingah chuan a rawn inzep lut tawlh tawlh a, fiah leh ṭeng deuh chhur hian Severn-a hming chu a rawn lam vak a.

Mite an ngawih tâk ṭhapah chuan Severn-a pawh chu muangchangin a rawn inher a, "Min hmu duh em ni?" a han ti a. Chu pa chuan, "Ka hming chu Yope-a a ni, sakawr in kha ka enkawl a," a rawn ti a. "A hma pawhin kan inhmuh tawh kha," Severn-a'n a han tih chuan Yope-a chuan, "Thil awm dan kha ka lo hria a, a dik reng em?" a lo ti thuai a.

Severn-a chuan, "A dik ka ring," a lo ti mai a. Yope-a chuan, "A va han tihzia em! Severn," a han ti phawt a, hlim fahran hian a han nui a, "I sakawr chu a thlàwnin ka chawm ang; heta hi i dollar sàwm pawh kha; ka kut ngei hían chibai ka'n bûk teh ang che," tih pah chuan a kut hrawl zet chu a rawn phar chhuak a.

Severn-a pawh chu a awm a nuam leh ta, "Tun maiah khan ka awm i tinuam lo hman tawh a, min beih tumin i lo thawk ta emaw ka ti asin," a ti a. Nui chung hian Yope-a chuan, "Nang beih te chu a teuh nang aw! I sipai lâkah rawn intlar ve zel zawk ka tum alawm," a ti bawrh bawrh a.

Severn-a chuan Yope-a dollar sàwm rawn pek chu Bar-ah chuan a theh phei a, "Diego, hei hian Mr Shearer-a leh a ṭhianteho kha zu lo intir ta che. Kei chu mu turin ka kal teh ang; Yope, ka lawm khawp mai," a ti a, amah hruaitu tur nen chuan Hotel chu an chhuahsan ta a.

Father Malcolm-a chuan mi dang hlim nui vak vak chu a en reng a. Nakin deuhah chuan lu thing nar nar chung hian Shearer-a hnenah chuan, "Paul, i thil tih hi i hria ang chu maw?" a ti ta a.

Ring taka nui huah huah chung hian Shearer-a chuan, "Father, hun rei tak aṭang tawh khan tun hi mihring pangngai nia ka inhriat chhuah lehna hun a ni a; tun hma zawng kha chuan rannung, bawlhhlawh tinreng zawltu mai niin ka inhria a. Chu chu a ṭha lo tiin min hrilh i tum em ni?" a ti a. (Shearer-a hian tun hmaa Cullane-ate thu thua Mayor hna a lo thawh tawh ṭhin thu a sawina a ni - Rz)

Father chuan, "Tum lo; I awm dan chu a tha; mahse, ina i hawn veleh, Thupuan bung 27 chang khatna chhiar ang che," a ti a, Hotel chu a chhuahsan ta nghâl a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 18th, 2018, 8:24 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 5

Mi pakhatin San Jaime khua a thlena Marshal a nih tâk hnu darkar sawmhnih pali hnu velah San Jaime khuaah chuan mi panga hi sakawrah chuangin an lo lut a. An thawmhnaw inbelte chu thlan leh vaivutin a khat a, an hmel pawh a nelawm loh hlawm kher mai. An hotupa, sang zet zawt leh sa ṭha tak chuan hma a hruai a.

Hotel-ah chuan an lut a, Diego Cruces-a Bar hmaah chuan an ding ta hlawm a. An hotupa ber chuan na fahrana Bar beng chung hian, "Whisky," a'n ti tuar a. Bar chunga zu um lo awm sate chu an leng lawp a, "Whisky, rang takin," a'n ti leh tuarh a.

Diego pawh chuan hmanhmawh fahranin zu chu a rawn pe a. An hotupa ber chuan a chhin a hawng sawk sawk a, a bur chuan a in ta piap piap a. Mi dangin an lo fuih zel a; chhum lo chat lovin zu chu a khiat ta khiah khiah a. Chu pa chu 'Mike' tiin an ko hlawm a. An zinga pakhat 'Ogston' an tih chuan pistol a phawrh a, ring taka áu chungin chung lam chu a kâp ta mawlh mawlh a.

An hotupa berin zu a khiah vang leh an hlimhlawp avang chuan Hotel chhunga Severn-a, ngawi renga lo lut chu tu mahin an lo hmu hauh lo va. Hotel bang nghenga dingin, zial zuk tur buaipui ni awm taka ding chung chuan aw dam thlap hian, "Naute u, in han intihlim lawk a ni maw?" a han ti a. A aw ki chu a sàn lo hle a; mahse, a thu sawi chu an hre chiang hlawm kher mai, muangchangin aw lo chhuahna lam chu an hawi sang sang a.

Ogston-a chuan a silai ken chu a hre reng a, Severn-a tin tum chuan a'n che hrat a; mahse, a tawp leh ta chawt a; "I inchhir lehna tur chuan eng mah ti suh," tih thu pek Severn-a bawk khân a lo chhâk chhuah leh vang a ni. A aw chhuak chu a la danglam chuang lo nain a dengkháwng riau a, a den a na hle a ni.

Ogston-a chuan a kutah pistol a la awm a ni tih a han hre chhuak leh a; mahse, a mu a kâp zo vek tawh tih a hre chhuak zui nghâl a; fiamthu angreng deuha nui chung leh a pistol ken chu a sa ta hle emaw tih tur ang mai hian rang fahranin chhuatah chuan a thlauh thla ta bal a.

An hotupa ber 'Mike Turnbull-a' an tih chu a che muang deuh a, muangchangin a zu um chu Bar-ah a hung a, Severn-a hmachhawn tur chuan a inher ve ta a. A zu in khân hna a thawk tawh a nih pawhin a mitmengah chuan eng mah a la lang chuang lo va. Chiang fahranin Severn-a chu a han en a, a áwma Marshal chhinchhiahna invuah pawh chu a hmuh hmaih hauh lo. "Chhe heu! Wyatt Earp-a chu i ni em lo maw? Marshal, eng nge i duh tak, in tur te i duh em ni?" a han ti a.

"Duh lo," tih pahin Severn-a chu hma lam panin pên thum lai a han pên a, enghelh nei lo takin a kut chu a then mai a, a hmelah pawh ngeiawm hmel put a tum hran lo; mahse, a mah lo hmutute chuan a che vel reng rengah chuan eng emaw ti riau hi an hmu tlat a ni. "Naute u, khuaah hian in rawn lut hlim hlawt a ni maw?" tiin a han zawt a.

Mike-a chuan, "Kan thleng fel chauh a ni; eng vangin nge he laiah hian i rawn tei luh ve ngawt a?" a lo ti a. Severn-a chuan chu pa thu sawi chu hre lo ang mai hian, "In lo thleng hlim hlawt a nih ka ring. Tin, hriattirna ka tàr pawh kha in hmu lo a ni ang chu maw?" a han ti leh a.

Mike-a chuan, "Hriattirna mâw? Eng hriattirna maw?" a lo ti a. Severn-a chuan, "Hmun tinah hriattirna chu keimah ngeiin ka tar a, in chhìar ve theih pawh ka ring," a lo ti leh mai a. Mike-a chuan, "I thil tihah fimkhur deuh rawh; eng mah hriattirna reng kan hmu lo," a lo ti a.

Severn-a chuan, "Ka ring deuh reng a ni. Hmu ni ula chuan tunah hian in silaite dah ṭha turin jail lam in rawn pan ngei ang," a han ti phawt a, "Chutiang in hmuh miau si loh chuan tunah hian ka'n hrilh leh ngat ang che u; vawiin aṭang chuan he khuaah hian silai pài awih a ni tawh lo," a ti leh ta a.

An ngawi deuh ṭhap a, mi pangate chu an inen a, za fé hian an nui ta hlawm a; Severn-a erawh chu a hmel a danglam chuang hauh lo; chu hmel pangngai reng chuan chûngho pawh chu a tingawi leh ta a. Ogston-a chuan, "A va ropui awm roh ve! Chu, i ti tak tak em ni?" a han ti a.

Severn-a chu a bu nghat a; eng mah a sawi zawm lo, an dinhmun chu a in-ep tâwk chiah a ni. Chûng mite chu tute nge an nih a hre lo va, a theih hram chuan buaina chawk tho lo zawnga pumpelh a tum tlat a. Khualzin satliah kal tlang mai tur pawh an ni maithei; an nih loh erawh chuan thu dang le.

Mike-a bawk chuan aw ring deuh leh tihzam tum tak hian, "He Cullane-a khuaah hian silai pai awih loh tih min hrilh i tum a ni maw?" a han ti leh a. "Hei hi Cullane-a khawpui a ni tawh lo," bung hmak hian Severn-a chuan a lo ti a.

Mike-a chu a rawn pên chhuak a, khabe dawh deuh hu hian Severn-a chu a en a, thinrim hle tawh tih hriat tak hian, "Chu chu tu nge sawi a?" a han ti tuar a. Severn-a chuan amah chu chiang fe hian a lo melh a. Mike-a bawk chuan, "Nangmah hian maw Mister? I rilru a buai a ni phawt mai; tu nge ni ta bera i inhriat chu le?" a'n ti leh a.

Severn-a chuan, "Hriattirna tártu mihring ka ni; chuta hriattirna ang chiah chuan tih pawh ka tum bawk. Chuvangin, tunah hian duh thlan tur in nei; in silaite kha a pàina chawpa phelha Bar-a dah emaw zan khuaa tan ina awm emaw a ni mai," a han ti a.

Mike-a chuan a lu a thing a, chu duh thlan tur chu a enga mah a duh lo tih a hmelah chuan a lang chiang hle a, "Tu mahin Mike Turnbull-a silai an lâksak ngai lo. Chu chu ka hote dinhmun hi a ni nghâl bawk," tih pah chuan a'n ding kâk hurh a, a kut chu pistol kawm hnaih takah chuan a phar kâk ta bawk a; mahse, Marshal chuan, "Thil hre chiang lova in chêt hmain lo en rawh u," a ti ta a.

Chûng mi pangate chuan an ên ṭheuh va; mahse, a che lai chu tu mahin an hmu hauh thung lo; chuti chung si chuan chu Law-man kut bawr pahnihah chuan pistol pahnih a rawn chawr chhuak nawlh a, a ran zia chu tu ma han khan chi hi a ni lo. Silai kua chuan anmahni chu timna reng nei hauh lovin a tin ta reng hlawm mai a.

Mike-a hote zinga pakhat, meng sìai sen sawn chu a thaw ta ham ham a, "Rura lutuk," tih pah chúan a gunbelt chu a phelh a, chhuatah chuan a tla thum ta ṭawk a. Mi dangte pawh chuan a tih ang chuan an ti nghâl sap sap a; Mike-a erawh chu a muangchang leh ta deuh; mahse, buaina pumpelh tum chuan a kut dawm dan erawh chu a danglam ve nghâl a.

A hnuah erawh chuan Mike-a chuan, "Marshal, i thu sawi chuan awmzia a nei hle mai, nang hi lo khing dawn ta che ila, ka dam chhung hun hi a tawi sawt dawn tihna a nih chu. Tin, âtthlak taka chetna hun min sìam duh loh avangin i chungah ka lawm e," tih pah chuan a gunbelt chu a phelh sawk sawk a, Bar chungah chuan a va dah ve ta a. "Kan zingah hian zu te pawh rawn in ve ta che?" tiin a sáwm zui ta a.

Severn-a chuan, "A lawmawm khawp ang chu; Diego hian in silaite chu hmun fianrial ah han dah phawt se; chuti lo zawng silai chuh tumna in lo nei ve leh hlauh dah ang e," tiin a lo chhang a.

Meng sìaia bawk chuan, "Mister, tuna khatiang thil kan hmuh hnu kha chuan chutiang chu hlauthawng duh suh. I kut phe veih pawh kha ka hmuh hman loh avangin hmuh theih nan tarmit lei ka lo rilruk mek asin. Khatiang taka ranga che thei chu tu nge maw i nih reng chu le?" a lo ti a. Marshal chuan, "Ka hming chu Severn-a, Don Severn-a a ni," a lo ti a.

Diego-a'n an in tur a rawn thlit lai chuan Mike Turnbull-a chuan, "He khua hi Cullane-a khua a ni tawh lo i tih kha a dik em?" a rawn ti a. Ṭhen deuh sak chung hian Severn-a chuan, "A dik thawkhat ang chu; thil awmze dik tak hi Old Cullane-a an tih hian a la hria pawhin ka ring chiah lo," a lo ti mai a.

Severn-a chuan ṭawngkam thiam fahran lo hian a hma nia thil thlen dan leh Marshal hna a pawm tâk thute chu a hrilh ta a, "Tun aṭang chuan San Jaime khua hian ama kea din a tum ve ta a ni," tiin a tlip ta a. "Tin, he khuaa lo lut tawh phawt hi chuan dan angin an silai Jail-ah an dah ṭha hmiah zel tur a ni; Cullane-a mi leh sa an ni emaw ni lo emaw, danin a thliar chuang lo va; Cullane-a mi leh sa zawn chhuah leh hriat zel pawh kan tum bawk," a han ti zui a.

Mike Turnbull-a chuan, "Keiniho chu a hrang ngata khawsa ve kan ni a, Cullane-a mi leh sate chu kan ni hauh lo," a lo ti a, a hote chu an nihna nena inhmeh tak tak hian fiamthu thawh pahin a hmelhriattir ta hlawm a.

Severn-a chuan, "A nih leh, heng thleng thlenga eng vanga lo kal ta nge in nih a?" a han tih chuan Turnbull-a chuan, "Ramri bulah Ranger-ho nen kan inhmu thiam lo deuh a, kan rawn tlanchhiatsan a ni. Eng emaw chen kan bik bo rih pawh a ṭul nghe nghe ang," a ti a.

Severn-a chuan chûngho chu rûk ru an ni maithei tih a ngaihtuah a; mahse, chuti tak chuan a ngainep hran lo. Lo ni pawh ni se; Turnbull-a leh a hote chu mi sual nileng leh buaina cho va, zawng hrim hrim chu an nih a ring thei chiah lo va, "In nun dan chu a nawm fahran dawn loh chu. A nih leh, pawisa te in nei reng em?" tiin a han zawt a.

Turnbull-a chuan, "Dik takin thu ka'n hrilh ang che Severn, tunah hian pawisa chhe tê pawh kan nei lo. Kan tum dan zawk tak chuan ei tur hmuh nan Cullane-a hote chu kan rawn zawm ve lawk ang chu kan ti a ni; anniho kan zawm chuan pawisa chu sawi loh kan nunna tur na na na chu ei tur min pêk ngei kan ring; chu chu, nang pawh ni la, i tih tur tho a ni ang. Chu bakah, dollar hnih khat pawh kan hmuh belh mahna," a ti ta a. Severn-a chuan a lu a thing a, "Chutah chuan kei chu ka innghat ve lo," a ti hmiah a.

Panga zinga pakhat Tom Lawrence-a an tih chuan, "A nih leh Severn, nangmah mai hian Cullane-a leh a hote chu i tichimit thei reng dawn em ni? Ka ring chiah lo a ni," a lo ti a. Severn-a chuan, "Ti thei chiah lo ve; mahse, a ṭul hmasa apiang tihin han awm zel phawt sela, tunah hian he khua hi an ta angin an ngai a; mahse, chumi lak aṭang chuan inthiarfihlim tura hriattir an ni ta phawt a ni," a lo ti a.

Mak ti takin Turnbull-a chuan, "Chu thu chu Cullane-a i hrilh a maw?" tiin a han zawt phawt a. "Ngawi teh Mister, buaina chawh chhuah leh buainaa tel châk hrim hrim mi i nih àwm hi maw le! Hetah hian an lo kal ang a, an rawn nuai bo mai dawn che asin; Fronteras khua an sawisak dan te kha i hre ve bawk lawm ni?" a ti ta zel a.

Severn-a chu a lo bu nghat a, "Ka hria alawm; an duh anga an che hi tihtawp a hun tawh reng a ni," a ti ta hmiah a. Ogston-a chuan, "A nih leh Mister, vannei takin che ang che, vanneihna pawh i mamawh ngei ang; kei chu ngaw thing sang tak tak awmna lam panin ka kal hmiah ang, silaimu a lo len tirh laiin he laia awm hi ka duh hauh lo," a lo ti a.

Turnbull-a chuan, "Nimin lam thil thleng in sawi dan aṭang chuan buaina a lo thleng thuai tawh ang. A nih leh Severn, nangmah ṭanpui thei tur mihring i ngah tâwk ang chu maw?" tiin a han zawt a. Marshal chuan a lu a thing a, "Ngah hran nâng; mi pahnih, pathum han rin tlâk tur zawng ka nei. Mayor leh Puithiam te, sakawr in neitupa leh Diego te hi an ni deuh mai," a ti a.

Diego chuan Bar phèn aṭangin an titi chu a lo ngaithla ve reng a, "Senor Poynton-a pawh," a lo ti thuai a. Severn-a pawh chuan, "A ni tak, kan putara kha ka lo theihnghilh der a ni," a lo ti thuai a. Turnbull-a chuan nuihzat deuh hian, "Old Dad Poynton-a maw? Sawtianga rui reng ringawt Cullane-a lo hmachhawn tur chuan i beisei reng reng em ni?" a lo ti a.

Ogston-a pawh chuan, "Severn, chu mihring chuan kum sàwm kal ta chhung khan harhfim lai a nei lo reng reng," a lo ti hmiah a; mahse, Severn-a chuan, "A harh chhuak tawh a, tunah hian Jailer atan ka ruai nghe nghe asin," a ti a.

Turnbull-a bawk chuan, "Ni tlâk hmain a rui let leh reng ang a, khawi maw lai khuara a mu i hmu leh tho vang. Eng pawh ni se, Severn, mihring i nei ṭha khawp mai; Shearer-a hi mi ṭha a ni; mahse, hun rei tak chhung silai a hmet pûak tawh lo; he laia Diego-a lah hi a huatthu suhah silai kaha mi hmingthang chu a ni thei lo," a lo ti leh a.

Severn-a lah chuan, "Mite pawhin chutiang chuan an ti vek a; mahse, ka tum a la pangngai reng. Ka rin dan chuan Cullane-a leh a hote hian min man tumin min rawn beih ka ring a; chutianga an tih loh pawhin an tawmkûk aṭanga bûm chhuah dan chu ka ngaihtuah tho vang. Ka rin dan zâwk tak chuan San Jaime khua hi zirtir tur an rawn neih duh ka ring a; chutianga rawn tih an tum hun chuan, lo barakhaih ka tum deuh a ni," a lo ti mai a.

Turnbull-a chuan, "I thu min hrilh tawh aṭangin kawng ṭhenkhatah chuan i barakhaih tawh a ni phawt mai a; Marshal, engah nge hun ṭha i neih lai hian i tlan bosan mai loh?" a ti ta hial a; mahse, Severn-a chuan, "A nih leh naute u, kal zel em ni in tum le?" tiin a zawt ta daih a.

An thu sawi lai tihtawp chu a duh deuh a ni ang, Turnbull-a chuan, "Han inbual faia, mut hahchawlh ve te pawh kan duh a ni lawm ni, Boys?" a han ti a. Ogston-a chuan, "A rang thei ang berin i chhuak ang u, buaina kara lo inzeh ve chu ka duh tawp lo mai," a lo ti vat a.

Lawrence-a erawh chuan, "Mike, zanin chauh chu i riak ang u, ka sakawr chùanna ka mawng te pawh a kham lutuk tawh," a lo ti thung a. Les Long-a pawh chuan, "Ni e, zan khat na hrim hrim chu i hahchawl ang u," a lo ti ve bawk a.

Ogston-a erawh chuan, "Cullane-a leh a hote'n an thil tih theihzia an rawn lantir hunah meuh chuan nuamin in mu ngut emaw chu?" a lo ti a; mahse, Turnbull-a chuan, "Pahnih leh pakhat in la ni a; nang Dickie, eng nge i ngaih ve dan?" tiin a han zawt zawm a.

Dickie Drew-a chuan, "Mike, Cullane-ate ka hlauhna ai chuan ka hûatna hian min hneh tawh zawk. I chawl rih ang u, sakawrte pawh an chau lutuk tawh reng reng," a lo ti a. Mike-a pawh chuan, "Ka rilru put dan chiah zawk a ni. Severn, pawi tihna i nei lem em ni?" a ti ta a. Marshal pawh chuan, "Cullane-ate zawm tumna in neih tawh lem loh chuan a pawina tur ka hre lo," a lo ti mai a.

Mike-a chuan, "Mister, ka ngaihtuah tam poh leh anniho leh keiniho hi inhlat thei ang berah awm ila ka ti tawlh tawlh asin. I chungah kan lawm e; naktuk zingah kan chhuak ang," a ti ta a. Severn-a chuan, "A ṭha e, in kal hmain Jail-ah in silai hi in rawn lam dawn nia," a ti a, a chhuahsan ta a.

A chhuah hnu chuan Turnbull-a chuan a lu a thing nawk nawk a, "Ka hmuh tawhah chuan silai phawi rang ber a la ni hial awm e; mahse, Cullane-ate do a tum tlat hi chu a âtna lai leh a rilru têtna lai a ni ngei mai," a han ti a.

"Chu chiah chu ka ngaih dan a ni. Cullane-a leh a hote hi chu che ṭawp tak an ni si a," Ogston-a pawh chuan a lo ti thuai a. Long-a erawh chuan muang chat hian, "Kha mihring kha awlsam taka nuai bo mai chi zawng a nih loh kha, mite han chhaih buai dan kawng hre tak ni ngeiin a lang," a lo ti a.

Ogston-a ve thung chuan, "Long, mite nungchang hi i sawi fuh thei hle a, chutiang mi tak pawh chu a ni maithei; mahse, eng anga che thei pawh ni se, mahni mai a nih hrim chuan naktuk zing, chaw ei hmain Cullane-a leh a hote chuan an rawn nuai bo tho vang," a lo ti a.

Chutih lai chuan Diego chuan, "Pute u, amah mai chuan a ni dawn hlei nem, he khua hian Mister Severn-a puihnain kan vaiin mi sualho kan bei dawn a ni," a rawn ti a. Ogston-a chuan, "Diego, i thu sawi chu âtthlak tak a ni; nangniho tehlul hian engtin nge Cullane-ate chu in lo do ang ni?" a lo ti a.

Mahse Diego chuan a hmaa Severn-a'n an khaw chhung mi zawng zawng a khâwm a, a thu sawi zawng zawngte leh an tumruhzia thute chu a han hrilh nawn leh a, "Mi hlauva ṭhingṭhia chibai buk tura dam reng ai chuan dikna ṭana do leh thih pawh a ṭha zâwk a ni lawm ni?" tiin a ti tawp a.

Turnbull-a chuan a ngaihtuah vung vung a; engtin mahin a chhang lo. Severn-a chanchin dangte Diego chu a han zâwt a; mahse, ani chuan, "Ka zawt lo; thil inzawh tam loh hi a thianghlim ber bawk," a lo ti hmiah a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 19th, 2018, 7:11 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 6

"Ka hriat dan chuan khuaa mite pawh a lamah an ṭang vek a ni awm e," tia thu sawitu chu pa lian zet, feet ruk leh inches sarih zeta sang, ban sei thliang thluang leh sa ṭha fahran mai, han en reng reng pawha záwng lian chi thlah ni thei mai awm a ni a. A hming chu Marco Cullane-a a ni; Cullane-a fa upa ber leh thil dang zawng zawng aia a hmangaih a ni a; a pa, meilum ai chunga an awmna pindan ṭhutthleng lian deuha ṭhu hnena a sawi a ni.

Chu an awmna in chu tu din nge tih pawh a hriat theih tawh loh va; kham kar titiha sak niin Cullane chhungkua hian a tam zâwk chu an sak belh a ni. Pindan chhungah chuan thil engkim hi a awm khawm ruih a, Cullane-a nupui a thih hnu phei chuan chu in chhung chu phiah pawh an phiat ngai lo a ni ang, a ṭawp em em mai a; Pa berin eng mah a sawi ngai si loh avangin tu mahin an sawisel hran lo.

Chu Putar chuan eng nge a ngaihtuah tih pawh tu mahin an hre thei lo. Hmeichhia emaw, zu emaw a duh cháng hi chuan El Paso-ah emaw, hmun dangah emaw a kal daih zel a, a duh ang hi chu a nei zel ringawt mai a ni. "Chu, khaw mipuite chu a lam ṭangah a siam tawh a maw?" a han ti a. Chu putar thu sawi chu ngun taka ngaithla chungin Marco-a chuan, "Chutiang chu ka hriat dan a ni," tiin a chhâng a.

Cullane-a chuan, "A nih leh, San Jaime khuaah enthlatu kan nei ṭha tâwk a, chung mite chuan Severn-a an tih chu eng ang mi nge nia an hmuh le?" a han ti leh a. Marco-a chuan, "Eng mah hriat chhuah reng reng an nei lo," a lo ti thuai a.

Cullane-a chuan, "Mi â-ho! I unaupa a sawisa hrep a; Flatman-a zahthlak takin a siam a; a thâwina tur eng emaw tal ti turin min cho bawk a; chutiang chung chuan a chanchin eng mah hriat chhuah in nei lo a maw? Mi â, mi â-ho! Chutiang mihring chu khaw thlang ramah sàwm lo liam an awm lo. Ka fapa, eng ang hmel pu nge a nih min han hrilh leh teh?" a han ti tuar tuar a.

In chhunga mi zawng zawng chuan Yancy Cullane-a, kawngkhar bula mit duk tluka ṭhu lam chu an en ṭhap a; Severn-a sawisakna kha a ni. Yancy-a chuan, "Kha uicho kha ka la sawisa ang. A mit kha..," a tih lai mek chuan Putara chuan, "A hmel lan dan chu min han hrilh vat teh," a lo ti thuai a.

Yancy-a chuan, "Hrep tak chuan! A hmel awm dan chu eng nge i tan a ṭangkaina? Ka hrilh dawn..," a han ti leh chauh va, Cullane-a bawk chuan, "I ka reh zau tak kha chîp vat rawh. Min hrilh tura ka tih che chu ṭha taka min hrilh loh chuan zirtirna ka pe ang che!" tih pah chuan a han ṭhu ṭha a, "A duh tawkin a sawisa che a; chu chu khuaa mite pawhin an hmu a, mi thianghlim leh ek pawh nei ve lo ang khawpin an hmu tawh hial reng ang chu; i sawi bak chu han chhunzawm vat rawh," a lo ti leh ta hmiah a.

Yancy-a chuan, "Ka Pa, ka sawi bâk kha chu sawi leh tur teh chiam a awm tawh chuang lo. Feet ruk vela sang a ni a; silai pahnih fual takin a pai a, a hman dan pawh a thiam hmel khawp mai; sakawr dum lian tak chungah a chuang a, cowboy satliah ve mai niin a lang," a ti ta a.

Cullane-a chuan, "Ka fapa, i va han â tehlul em! A chanchin i sawi aṭang chuan San Jose khuaa Black Bill Morrison-a sawisatu an sawi kha min hriat chhuahtir tlat mai. Bill-a khân Gambler pakhat, Main-a an tih chu a dan chêp laiin mi pakhatin a rawn chhan an ti a, chu mihring bawk chu i sawi hi a ni ngei ngei ang," a ti ta a.

An zinga pakhat chuan, "Chu mi bawk chu a nih ngat chuan buaina siam leh buainaa inrawlh hi a thil châk zawng tak tihna a ni phawt ang," a rawn ti a. Chu pa pawh chu Cullane-a thlahte zinga mi a ni tih chu han en thuak pawhin a hriat a, pa sa ṭha tak leh lian tâwk ṭhelh ṭhawlh, Yancy-a ang maia sam sen thar mai a ni.

Putara chuan, "Glenn, nang hi chuan ngaih dan fing deuh zawng i nei e; mahse, i finna chhawr tur hian huaisenna i nei lo erawh hi chu a zahthlak hle thung a ni. I thu sawi chu a dik ngawt mai. Tunah hian, he kan mihringa hian eng nge hmuh chhuah a tum ber ni ta ang le?" a han ti a.

Pindan kila naupang deuh tak lo awm ve chuan, "Buaina siam châk ve hrim hrim mihring a ni mai lawm ni?" a lo ti a. Chu pa chu Cullane-a fapa zinga naupang ber, a pa hming chawia 'Billy' tia an koh a ni. Hmui pan hleng hlawng, sual hmel fahran mai a ni a; Colt .38 silai a pai ràn a; 'Billy the Kid' tiin an ko mai ṭhin.

Old Billy Cullane-a chuan a lu a thing a, "Ni lo, ka fapa; mihring, silaia nunna dahkham chi tawh buaina zawng ngawr ngawr an awm ngai lo. Chutiang mai lo deuh, eng emaw tak a nih ka ring tlat a ni," a lo ti tlat a.

Marco-a chuan, "A nih leh, eng nge a nih tak ang? He lai hmunah hriat ngai pawh a ni si lo. Chu bakah, Old Poynton-a tih angreng te Jailer atan a hmang lehnghal a, a chet dan reng reng hi mi â chet dan a ang riauin ka hria. Tin, Shearer-a leh mi dangho pawhin chutianga khaw chhung vawng fel tur mihring chah ngaihna pawh an hre hrep lo vang," a lo ti ve thung a.

Old Cullane-a nui thawm chu a rîk hian a ri huau huau a, "Marco, fanghmir thluak tiat pawh thluak i nei lo a nih hi. San Jaime khuaa beram rualho khuan huaisennate hi an neih ve i ring reng reng em ni? Lo nei ta pawh ni se, an duh ang tihlawhtling tur chuan pawisa an mamawh dawn a, chutiang zat chu khawia mi nge an neih chuan ang?" a ti ta a.

Marco-a chuan, "An awmna aṭangin pawisa chu an hmu mai," a lo ti a. Old Cullane-a chuan, "A nih leh, an duh ang ang chu ka hriat loh hian an tih theih i ring reng reng a maw?" a han ti leh a, a lu a thing a, "Ni lo, chutianga tih theih mai mai a ni lo, thil dang eng emaw a awm a ni," a ti leh ta tlat mai a.

Glenn-a chuan, "Eng thil dang nge ni ang?" a lo ti a. Putara chuan, "Mi tuin emaw a rawn tir a ni maithei," a ti ta a. Yancy-a chuan, "Tirh maw? Tu teh lulin nge rawn tir ang?" a lo ti thuai a. "Chu chu alawm ka la ngaihtuah chhuah theih loh chu," Old Cullane-a chuan a lo ti thung a.

"Ngaihtuah, ngaihtuah!" Yancy-a chuan a rawn ti chhuak tuarh a, "I ngaihtuahna leh nangmah chawp hian eng mah a nih hrep loh hi! Sakawrah chuangin khuaah chuan va lut i la, chu mihringa chu va pawtsawm vek ila a ni mai alawm. A vun kha Yope-a sakawr in banga tar hlan a nia ka nghahhlelh êm êm chu ni! Kan kal hmà leh, chu chu kan tirang tihna a ni mai dawn bawk," a'n ti zui a.

Putara chuan, "Yancy, i â hle mai!" a'n ti bawng a. "A thu hrimin, in vai hian in â hle a ni. In pian leh murna ngaihtuahin tun aia fing deuh tura beisei zawng in ni a; mahse, in fing chai si lo. He Severn-a chanchin hi kimchang zawka hriat ka duh alawm, tu nge a nih a, khawi aṭanga lo kal nge a nih? Tin, eng vang berin nge hetah hian a lo kal? Âtthlak taka chet hian khuai kawlh bu a tàwn darh theih ṭhin avangin fimkhur taka chet ka duh a ni," a ti ta a.

Ngei aw deuh mai hian Billy Cullane-a chuan, "Ka Pa, fimkhur thu i sawi elo? I rawn sawi chhuah leh tur pawh an Puithiam, tuna Severn-a an tih ṭanpui tumtu nena in ṭawngṭaina a nih leh dawn chu," a lo ti a.

Yancy-a pawh chuan, "Father Malcolm-a pawh chuan âtthlak takin a ṭanpui dawn a maw? A biakbuk rawngbawlna chauh chu ngaihtuah sela, hetiang mi pangngai khawih chi hi chu mi dang kutah a dah mai zawk tur a ni ang," a han ti ve ngat a.

Mahse, Cullane-a chuan, "Ka fapa, Puithiam khu pawngpaw ngaihnep ngawt chi a ni lo; nang teh lul ai hi chuan mihring nih a tling daih zawk. Mi dang ang ngawta, beramno ang maia tihsam tura i ngai a nih chuan i thil tih vang chuan mak tiin i la boral ngei ang," a lo ti a.

Yancy-a chuan, "Father Malcolm-a maw? Engtikah emaw chuan a ṭawngṭaina lehkhabu leh a hrawk bawk khu ka la nuai bo vek ang," a'n ti leh ngat a.

Rang fahran hian Cullane-a chu a tho thuai a, Yancy-a awmna lam chu a pan nghâl a, Yancy-a kokia kut nghat chung chuan, "Yancy, ka fapa, nun dan tur hi i hre thiam thei ngang dawn lo a ni maw? Puithiam chunga kut i thlak vaih chuan San Jaime khuaa beram rùalho khûan an kut lâwng ringawt pawhin an pawt sawm vek ang che. Chumi hnuah chuan khua aṭangin an lo chhuak ang a, he hmunah hian lo kalin engkim hi an rawn tichhe vek dawn a ni," a ti ta a.

Ngeiawm fe bawk hian Billy-a chu a lo nui a; Yancy-a pawh chu a rawn nui ve a; mahse, na zet hian Putara chuan Yancy-a nui lai hmuiah ngei chuan a beng ta ṭhuai a.

Thinrim meng sen rum leh hmui khur dar dar hian Old Cullane-a chuan, "Hetah hian lehkhabu ṭha tam tak a awm a; mahse, chhiar nachang pawh i hre lo. Thu ṭha engkim ka hrilh che a; mahse, i zawm chuang bawk hek lo. Hei tal hi chu i chhiar tur a ni," tih pahin Bible hi a rawn lek chhuak ta a.

Bible chu Yancy-a mal chungah chuan a dah thla hnawk a, "Chhiar rawh! Hetah hian nangmah anga che khaw lo ṭhinte hremna tur chu a inziak a ni. Khu putar Puithiam chunga kut i thlak vaih chuan hei hi ka tiam a che, khaw chhung mite'n i taksa hal tur chhe tê tal an zuah hlauh chuan keimah ngei hian ka hal ral vek ang," a ti ta a.

Vawi leh khatah a thinrimna chu a reh leh duak a, a sam chu a chul thuak thuak a. "He Severn-a chanchin hi tam zâwk hriat ka duh a ni. Glenn, nang, i sakawr buatsaih nghal la, ramri lamah ka thil hriat duh chhanna zawng chuan kal nghâl rawh," a ti ta a. Glenn-a pawh chuan hmanhmawh takin a sakawr awmna lam a pan ta nghâl a.

Putara chuan a fapa, Marco-a lam chu a hawi a, "Chutih chhung chuan tuin nge Severn-a lama ṭan tum tih hriat chhuah ka duh bawk; khaw chhung mipuite ka ti chiah lo, anniho chu amah Severn-a ber lâk bo a nih hnu chuan beram rual an nih ang chiah khuan an tlan darh leh mai ang. Ka duh tak chu buaina lo chhuah hunah tu nge amah ṭanpui dawn tih hi a ni.

"Marco, Chapman, Nixon leh Chuck Allen-te hi hruaiin San Jaime khuaah chuan zuk kal rawh u. Nangniho mai chuan khuaa mite chu zuk do turah an lo ruat lo ang che u. Severn-a ngawt pawhin nangni pali chu a lo chinfel theih mai che u an rin dawn avangin khaw mipuite chu an lo inrawlh duh lo vang," a ti ta a. Marco-a chuan, "Teh reng mai ka Pa," a lo ti thuai a. "Mahse, silai nen hi chuan chutiang takin ka rang lo va," a han ti leh dek dek a.

Cullane-a chuan, "Mi â pa, silai nena inbei turin ka tirh che hi i ring reng reng em ni? Ni lo, silai hmangin lo chingfel thei dawn pawh ni la; ka tir chuang lo vang che. Silaia sawisak ni lovin, nasa taka chin hrepa ruh tliak nelh nulh khawpa sawisak zâwk tur alawm.

"Diego-a Hotel chhungah ngei mualpho taka sawisak a ni lai chu khuaa mite'n an hmu ngei bawk tur a ni. I sawisak lai chuan mi dangte chu i ṭhiante hian an lo buaipui ve mai ang. Severn-a chu cho tur awm miah lovin sawisa hrep la; mi dang chu an bibo zo vek mai ang. Ka thu sawi chu i hria maw Marco?" a ti ta a.

Phur zet hian Marco-a chu a nui ta vur vur a, "Ka thil tih châk zawng tak a nia lawm ka Pa," a ti ta a. A pa chuan, "Ka thu sawi hi ngaithla leh rawh; thah chu ka la duh lo a nia, na tak tuara sìam ringawt tur. Na tak tuarin siam la; mahse, that suh," a han ti leh a. Yancy-a chuan, "Eng vangin maw ka Pa?" a lo ti a. "Eng vangin nge thah maia, thil tihzawh ni thei mai tur si?" a han ti leh a.

Cullane putara chuan, "Ka sawi tawh anga ka ṭawng chhuah tawh vangin. Severn-a chanchin hi eng emaw riau awma ka rin bâkah San Jaime khuaa thah hi ka duh loh vangte pawh a ni bawk. Ka suangtuahna hi a lo dik hlauh chuan lung pakhatin sava pahnih kan that thei ngei dawn a ni. San Jaime khuaa sawisak vak ringawt chu kan tih tur a ni, thah mai zawng..," sawi zawm lovin a ngawi ta a.

Nakin deuhah chuan, "Kan that dawn a nih pawhin.. hmun dangah a ni zawk tur a ni," a han ti leh a. A lu a thing nawk nawk a, "Marco, ka thu hrilh che chu hre reng la, ka sawi ang chiah chuan ti rawh," a han tih zawm leh a. Marco-a chuan, "Ngaihṭha takin awm rawh ka Pa, ka that lo vang; mahse, Severn-a an tih chuan, that law law ila a duh zawk ngei thung ang," a ti a, a nui vur vur a.

**************************

"Khaw mipuite chu i lamah an ṭang ta chu a ni phawt mai a," Gambler Main-a chuan a han ti a. Jail chhunga Old Poynton-a leh Severn-a leh amah Main-ate ṭhu khawm chuan Cullane-a'n a rawn beih huna an lo chhan let dan tur an sawi khawm mek a ni.

Mahse, Main-a bawk chuan, "Chutiangin ṭanpui teh che mah sela, eng mah zawng i anpúi chuang lo vang," a han ti leh a. Severn-a chuan a lu a thing a, "An ṭangkai turzia hi i hre lo a ni," a lo ti mai a. "Chanchin dang i hriatte min han hrilh leh rih phawt teh," a han ti zui a.

Main-a chuan, "Thil thar hriat ka nei teh chiam tawh lo. Inkhelin ka tei kual vel a; mite thu sawi pawh ka ngaithla a, an thu sawi chu a pangngai deuh vek a ni, 'Senor Severn-a hi a ropui a ni, Cullane-a lakah min hum ang. Mihring hlauh nei leh thlabar ringawt kan ni tawh lo vang a, mihring pangngai dinhmunah kan ding ve tawh ang' tihte hi an sawi chu a ni mai. Severn, hengho zinga palia pathum zel hi chu hman tlâkna awm miah lo an ni vek ang," a ti leh ta a.

Old Poynton-a chuan, "Coffee ka lum so tawh a, a sat laiin zing khaw vawtah hian rawn in vat rawh u," a rawn ti a, choka lamah chuan an insuan lut ta a. Chu lai hmun chu engtik lai maha phiah fai a nih ngai loh avangin a ṭawp hle a; mahse, ṭhutna awm ang ang chu hmangin an ṭhu khawm a.

Severn-a chuan Cullane-a leh a hote'n an rawn beih huna lo barakhaih dan tur a hrilh ta malh malh a. Khaw chhung lem te chu dawhkan vaivutah chuan a ziak a, tih dan tur a hrilh pah zel bawk a. "Hei, khua hi in hmuh angin hmar tawp leh chhim tawp lam hi khaw luhna tur kawng awm chhun a ni mai a. Khaw chhak leh thlang lam hi luhna tur chi a ni lo. Khaw chhung lai taka in hi Diego-a Hotel a ni a, he lai hi Jail hmun hi a ni," a han ti a.

Poynton-a chuan, "He hmuna cheng hmasa berte hian Indian-ho laka inven nan tiin hetiang hmun hi an lo thlang a ni phawt mai a. Tichuan, engtin nge ni ta zel ang? I tih dan tur chu chiang takin min hrilh thuai thuai teh," a lo ti leh vat a. Main-a chuan, "Chutianga i hre chhuak chu thil thar ropui ber chu a ni hauhvin ka hre lo," a lo ti ta tlat a.

Mahse, Severn-a chuan, "I hre dik lo a nih chu. Luhna kawngkhar ve ve hi kan khar tlat chuan kulh kan insiam tihna a ni mai dawn asin. Hetiang hmun an lo thlan chhan chu Old Poynton-a sawi ang chiah kha a ni a, invenna tur nen a ni," a tih veleh chuan Poynton-a chuan, "A nih leh, kulh chu i nei ta a, engtia tih leh zel nge i tum tâk? Ka ngaih dan chuan sipai eng emaw zat a ngai a ni mai," a lo ti vat a.

Severn-a chuan, "Chu pawh chu kan neih theih mai ka ring a, ngaihtuah buai a ngai lo vang. Kan tih tur zâwk tak chu engtin nge Cullane-a hi thinrim lutuka kan siam anga, amah leh a hote nen he laia an lo kal duhna tur khawpa kan tih thinur ang tih hi a ni ta zawk," a ti a. A ṭhiante chu an ngawi ran a, nakin deuhah chuan Poynton-a chuan a lukhum a la thla a, a pawm ta hle hle a.

Ding phat chung hian Poynton-a chuan, "Ṭhiante u, ngathla teh u. Kan Marshal hi a rilru a buai deuh a ni. Cullanne-a hi a thinur tâwkin a la ring thei lo a nih chu," a han ti a. Severn-a chu a nui sak a, "Thinrim thawkhat tur chuan kan beisei ṭheuh a; mahse, a tawmkûk chhuahsan tur khawp chuan...," a tih laiin Main-a chuan, "A la thinur tâwk lo. A hote zawng zawng nena rawn thawk tur chuan a la thinur tâwk lo i tihna a ni maw?" a lo ti vat a.

"Ka ring a ni," Severn-a chuan a ti hmak a. kut zungṭang thliak nghat nghat chung hian, "Pakhatnaah chuan, an zahawmna chu kan timualpho thawkhat tawh; mahse, tu mahin nunna an la chán lo. Pahnihnaah chuan, saw Putar saw mi dawihzep tak chu a ni lo, pahnih leh pahnih belh chhuaha, paruk lai rawn tir mai chi a ni lo. San Jose khuaa thil thlengah te pawh khan keimah nen hian min la chhui zawm thiam mai thei.

"Nang pawh Rick, a chhui chhuak thiam phak maithei che. Chu vang chuan amah leh amah zawhna chi hrang hrang a inzawt ang a, 'Eng nge tih ka tum? Eng vanga he laia kan pathuma inhmu khawm ta nge kan nih?' He khua do tura a lo chhuah hma hian kei min lâk chhuah tum hian ṭum hnih khat chu a rawn beih ngei ka ring tlat a ni," a ti ta zel a.

An rawn beih dan tur kawng dangte an sawi zawm hnu chuan fiamthu titih hian Severn-a chuan, "Thawnthu pakhat ka hriat reng ṭhin a awm a, chu chu ka'n hrilh phawt mai ang che u," a ti ta a. A thu sawi ngaithla chuan phâwk fe-in mi dang pahnihte chuan an en ran a, mak an tiin awih har an ti a. A thusawi tawp hma hma chuan eng emaw an lo zâwt buai sek a.

Severn-a chuan, "A nih leh ka thu sawi in awih duh hrep si loh chuan ngawi chip cham reng ula a ni mai," a ti a, a ṭhiante'n an man beh hma chuan a chhuahsan ta daih a.

**************************

Mike Turnbull-a leh a ṭhiante chuan an silaite an lâk chhuah hma leh ramri lam an pan hma chuan inthlah nan tiin Hotel-ah chuan an inzui ta zel a. Hotel chhungah chuan mi pakhat chauh hi ngawi rengin amahin lehkhaden khalin a ṭhu ve reng a.

Marshal chuan Hotel chhung chu a'n thlir kual thuak thuak a, eng mah buai tur awma a hriat loh avangin kal chhuah leh mai a han tum a, a chhuah dawn chuan Turnbull-a leh a hote chuan thlah nan ti ni awm takin an zu no chu an chawi kang dial a; Marshal pawh chuan a lu a bu nghat a, a chhuak ta nghal a. Kawng laka mi dang a tawh leh a hmeichhe tawhte chu chibai bûk chung zelin a chenna in lam pan chuan a kal ta a.

Ogston-a pek chuan, "Kha mi nu kha chuan mi â nileng chu fa a nei lo zawng a ni phawt a," a'n ti zui hram a. Les Lawrence-a ve thung chuan, "Mike, Cullanne-a lakah kha pa khan chet ve theihna chance a nei reng reng dawn em ni?" a rawn ti a.

"Chance a nei tlem kher ang; mahse, chu zawng ama kova tla tur a ni a, kan tel ve hlei nem," Mike Turnbull-a chuan a lo ti thuai a.

Ogston-a chuan, "I sawi dik kher ang," a'n ti phawt a, "Diego, in tur han chhawp leh hram ta che," tih pah chuan Bar nghâktu, putar Diego lam chu a'n hawi a; mahse, Diego-a hmel danglam tak a hmuh chuan a phu zawk a, Diego-a thlirna lam kawngka lam chu eng nge awm tia hmuh tumin a thlir ve ta vat a. "Eng nge ni ta a?" tih paha kawngkhar lam a han en nâk chuan eng mah sawi zawm lovin a thu sawi chu a tawp ta hmak mai a.

Chutih lai tak chuan mi pali hian Hotel chhung chu an rawn lut chiah a, an zavai chuan lian tak tak vek an ni a, pakhat phei chu pathumte ai chuan a la lianin a hrawl bik kher mai a.

Marco Cullane-a chu khawnvar en chiahah chuan a ding ta a, a aw han chhuak te chu lung chang chunga sakawr rah rik ang ṭhuai hi a ni a, "Mi zawng zawng kha in awm ang khan ṭhu mai u la, ti chuan, tu mahin na in tuar lo vang," a rawn ti a.

Mi zawng zawng chu an ngawi ṭhap a, bar bula mi lo awmte pawh chu che thei lo ang hrimin an ding ta hlawm a. Dickie Drew-a chuan ri ser ser chauh hian, "Saw saw?" a han ti a. Mike Turnbull-a chuan zaizir pah deuh, ri chang chang bawk hian, "Marco Cullane-a leh a hote ṭhenkhat an nih saw," a lo ti vat a.

Marco Cullane-a chuan Bar chu a rawn pan hnai a, Putar Diego-a, Bar nghâktu chu a kawr áwmah hneh zet hian a rawn ṭham kang titih a, Diego chu a dingdihlip ar mai a. "Nang, dawihzep pa, in tur min han buatsaihsak vat rawh," a rawn ti ta a. Hneh zeta a'n thlah leh tâk avang chuan Diego-a chu a hnung lamah a pai ṭawng ṭawng a, dawhkan, zu hun tlarnate chu a va ngheng thlu deuh rap rap a.

A nem nat deuh avang leh a hlauh em avang chuan na tuar leh mangang takin Diego-a chu a áu chul a. A tlukna lama hmui thi súng chung chuan hlau leh khur chungin a rawn ding chhuak leh ṭaih ṭaih a, Bar dawhkan lam chu a rawn pan leh ta a.

Marco-a vek chuan, "In tur ka ti alawm beng chhet pa!" tih pah chuan na zet hian Diego-a chu a kut hnung lamin a'n beng leh ta a. Diego-a biangah tak a va fuh a, a léng lawp mai a, kil khatah chuan eng mah hre lovin a let ta reng a.

"Uicho mawl leh lutuk," tih pah chuan Marco-a chuan Bar bula mi dang lo dingte chu thip fé hian a han melh kual a, a kut zungchal, chhah leh lian tak chu vawi leh khatah a rawn kâwk chhuak a, a bula Turnbull-a dulah chuan a nawr nawk a, "Nang hi, Bar hnung lamah khian han kal la, in tur chu min han buatsaih sak vat rawh," a han ti a.

Turnbull-a chu a che mai duh bik lo. Hnung lam panin pen khatin a han hnungtawlh a, a kuta zaizir deuh chung hian, "Mister, buaina neih ka duh lo va, hmanrua pawh eng mah ka nei lo bawk. Tin, Bar nghâktu hi ka ni lo bawk a," a ti ta a.

Marco-a chuan a hote, a hnunga inring taka lo awm chu a han melh kual leh phawt a, za lo tak hian a'n nui ngial a, "Naute u, he kan mihringa thu sawi kha in lo hria maw? Bar nghâktu ka ni lo' zu han ti khanglang pek a!" a han ti a.

A hote zinga pakhat chuan, "Ha ha ha," a lo ti a. Chu pa chu hmelṭha tur awm tak hi a ni a; mahse, a kareh mawi lo leh thinchhiat hmel zet avang chuan a hmelṭhat tur ang pawhin a ṭha thei lo a ni; pa sa ṭha tak a ni lehnghal.

Marco-a chuan, "A nuihzatthlak kher mai," tih pah chuan chhe têin Turnbull-a chu a'n hawisan a; mahse, a han che leh chu Turnbull-a tan chuan beisei loh ang tak a nih phah lehzual ta a ni. Rang leh inzo fahran hian Marco-a chu a inher thut a, inher pah chuan na em em hian Turnbull-a hmaiah tak chuan a beng ta ngheng mai a. Turnbull-a chu a leng lawp a, a hnunga bang chu a va deng dawt a, hmai thi nuau chung hian chhuatah chuan a let ta reng a.

A chet dan a mak em avang chuan Turnbull-a hote chu rei lo deuh chhung chu tih tur an hre lo va, an han ngawi ṭhap a; mahse, vawi leh khatah Marco pa liana chu an bawh ta huk a.

Chûng mite chu tê chhe lo tak, rothap tak leh mahni tawka kei ka ni inti ve ngat, pawisak pawh nei êm êm lo an nih avangin Marco-a pawh chu an han bawh huk chuan a hnungtawlh ve dawt dawt a, an hneknate chu a ri zawt zawt a; mahse, pen thum chiaha a hnungtawlh chu Marco-a chunga an tih theih sàn ber chu a ni ta mai a ni.

Marco-a chu a nui huah huah a; mahse, a hmelah chuan namen lova thinurna a lo lang chhuak tawh a. Chung zinga pa tê deuh ber Dickie Drew-a chu a la lawk a, a ṭhiante ho vuak nan chuan tiang ang maiin a hmang ta hmiah mai a. Drew-a hmanga a han vuak tâkah chuan Ogston-a chu a ṭhingṭhi rawp a, nikhaw hre lovin a awm zui ta nghâl mai a.

Rapthlak tak leh ramsa ang maiin Marco-a chu a nui leh huah huah a, a kut ding lam kuttum ngei mai chuan Tom Long-a dulah tak, na êm êm hian a han hnek leh ta a. Na ti êm êm leh chiau ngawlh ngawlh chung chuan Long-a pawh chu chhuatah a vial a vial ta a. Marco-a hote zinga pakhat chu a rawn pen chhuak zauh a, dimna reng nei lovin Tom Long-a biangah chuan a'n chhir nghek a, Long-a pawh chu eng mah hre lovin a awm ve leh ta a.

"Chapman, lo kiang vat rawh," tih pahin Marco-a chuan hnung lam aṭanga a mah rawn zuantu, Lawrence-a chu a buaipui zui leh ta a. Lawrence-a chuan hnung lam aṭangin Marco-a chu a rawn zuan a, tifuh inti fe leh a theih ang tâwka na chuan Marco-a chu a hrawkah a lo rek mek a; mahse, a thahrui chu Marco-a tan chuan a la nep lutuk deuh a ni.

Marco-a chuan Lawrence-a ban pakhat chu a la a, a hma lamah a han ṭhuai vir nawk a, hma lamah a han pawt let leh nghek a. A dàr invuah vel danglam sawk avang chuan Lawrence-a na ti chu a'n áu chhuak ṭhawt a, a hmel pawh chu a rawn dáng nghâl sawp sawp a, na tuarin a ṭhingṭhi ta ngawih ngawih a.

Na tuara Lawrence-a a kun ngawih ngawih lai chuan a lu-ah tak, dim lo baksak hian Marco-a chuan a khûpin a rawn tauh leh ta ngheng mai a. Lawrence-a chu a bula dawhkan nen, chhuatlaiah chuan an let nghâl tawp tawp a, a lumna tawpah chuan che lo tawpin a mu ta reng a.

A mah rawn beitu lo hmachhawn leh tur chuan Marco-a chu thinrim meng â ruai chung hian a han inher vut a, a kutte chu a tikâk ṭhu ṭhu mai a; mahse, tu mah rawn beih tum an awm ta lo.

Saloon chhung chu a leh hian a let rem rum ringawt tawh mai a. Chu thil lo thlen dan chu a ran teh thut em avang leh a mak teh thut em avangin a lo hmutute chuan an mit ngei pawh chu an ringhlel rum rum mai a ni.

Marco Cullane-a erawh chu a bianga thisen chhuak ser ser chung chuan a laiah a ding luah a. A bul velah chuan Patling ṭhah panga ngawt che thei lovin, a tha chak taka a sawisakna avang chuan an let phung mai a. A thil tiha hlawhtling inti fahran chuan ring em em hian, "Ar vulhtuho! Beram vulhtuho! Lo neituho! In zingah hian mipa pangngai in awm ngang lo em ni?" tiin a inhrosa kuk kuk mai a.

A chet vel dan lo hmutute chu a han thlir kual a, an awmna ngai ngaiah che map lovin chûngho chu an lo awm reng ringawt mai a; chu Mi liana anchhia chu an dawn ve a, a rawn sawisak ve mai an hlauh avangin an che ngam eih lo a ni.

Marco-a bawk chuan, "Mipa han che ve ngam in awm eih lo a ni maw?" a han ti leh kuk kuk a. "Nang Chapman, min han pui ta che, mahni hna hnaah i'n bur chat hlawm teh ang u le," a han ti zui zat a.

Chapman-a pawh chu a rawn pên chhuak vat a, Bar bul, zu dahna chu a pan nghâl chat a. Darthlalang a hmuh apiang te, zu um a hmuh apiang te chu a tikeh ta nghauh nghauh a. Thil lak sawn theih chi zawng zawng chu khawih lova chhuah a nei lo. Mi dang pahnihte pawh chuan phur fahranin an tih chhiat theih ang ang chu an tichhe ve ta bawk a.

An duh tawka an chet hnuin, thil chhe let rem rum karah chuan Marco-a chu zu um dawm run chung hian a ding a, "Chapman, kawngka bulah khan kal la; Allen, nang, hnung lam kawngkhar bulah kal rawh; Nixon, bang bulah phei vat bawk rawh," tiin an awmhmun tur a sem zung zung a, amah chuan thinrim meng sen rum chung hian kawngkhar lam chu a melh run a.

A bula no him la awm chhunah chuan a zu ken chu a chhung lut a, tuisik ang hrim hian a in ta khawlh khawlh a. A in zawh veleh chuan zu um ruak chu tukverhah a thlawh chhuak ta nghâl a. A thlawh chhuah pah chuan, "Marshal ropui leh lian, i khaw hmuhna mit chu anchhe dawngin awm rawh se. Khua chu i kut aṭangin kan la kir leh ta. Lo kal la, theia i inhria te a nih chuan tihtawp tumin rawn bei chhin ta che," tiin a áu ta lung lung a.

Pindan kil khat khawnvar hnuaia lehkhaden khal mek, Ricky Main-a pawh chu a awmna ṭangin a rawn tho chhuak ṭaih ṭaih a, muangchang hian Marco-a zu um thlawh chhuahna tukverh kha a pan ṭan chiah a; mahse, Marco-a chuan thinrim em em hian a awmna lam chu a rawn pan thut a, "Nang, dawihzep pa! Khawia kal nge i tum khanglan pek?" a rawn ti ta a.

Main-a chuan Severn-a chu warning pek a tum rilru a; mahse, a tlai ta deuh a ni. Marco-a chuan Main-a chu sawisak hrep tum ni awm takin a bul a rawn thleng reng tawh a; Pipute pawhin an hlauh em em ramhuai rapthlak takin thihna ngei tura sawisak rawn tum ang mai hian a rawn tin run tawh tlat a ni.

Main-a chuan eng emaw sawi chhuah tum ni awm takin a ka a áng zuau a; mahse, chutih lai chuan Chapman-a, kawngka bula awm chuan, "Marco, amah Severn-a a lo kal chiah, kawtthler a rawn kân ṭan chiah a ni," a rawn ti ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)