SUDDEN - DEAD OR ALIVE (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: SUDDEN - DEAD OR ALIVE Chapter 1 - 6

Unread post by Rozami pachuau » May 21st, 2018, 7:47 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 7

Mawl angreng takin leh rang fahran hian Severn-a chuan, in chhung chu a rawn lut hlawl a; a kut pahnihah chuan pistol a rawn lang nghâl ṭhawt a, rang takin in chhung chu a melh kual nghâl vek a. In chhung chu a chhe vek hi a ni ber mai.

Mihringte chu hmun tinah an let phung mai a. Chûng zinga pakhat chu bang bulah chuan, na tuar leh rum hlat hlat chung hian a lo ṭhu a, chu chu Long-a kha a ni tih a hre nghâl a, Turnbull-a hote zinga pakhat kha a ni. Thil dang zawng ai chuan a awmna aṭanga hla lo têa Pa lian zet ding ngur chuan a rilru a la ta ber a.

A rilru chuan, 'He pa hi Marco Cullane-a a ni ngei ang; amah maiin a awm lo a ni,' tih chu a ngaihtuah a. Chutih laia a hnung lama thil che a hriat chu a tlai ta hret a ni. A tukkhumah chuan Chapman-a chuan silai hmawr a rawn chuktuah chiah a, "I silaite kha thlauh thla vat rawh. Chuti lo chu i thluak hi ka kâp darh vek dawn a ni," a rawn ti ta a.

Duh thlan tur dang a awm ta lo, thu pek zâwm mai chu a hna awm chhun a ni ta. Hrilhhai angreng takin Marshal chu a'n nui ngawt a; mahse, silai chuktuah reng tawh phàwi khalh tur khawp chuan mi â a ni lo. A hma lamah chuan pistol pahnihte chu a theh phei a, chhuatah chuan an tla ri ta thlawrh a.

Chapman-a chuan, "Saw lamah sawn phei vat rawh," tih pahin Severn-a chu na fé hian a han nam phei a, Bar bul, saidawium keh rem rumna lamah chuan a pai phei ta ṭawng ṭawng a. Marco Cullane-a, amah lo nghâk rengtu awmna aṭanga feet hnih lekah chuan ṭhingṭhi titih hian a tawp ta chawih a.

Marco Cullane-a chuan za lo zeta lo nuih pah chuan, na êm êm hian a kut chu a chho zawng deuh hian a lo vai fua a; a chalah na zet hian a kut vai chuan a han deng ta a. Severn-a chu a ding awk a, a hnung lamah bawk chuan a pai phei leh ta ṭawng ṭawng a. Chapman-a bawk khan a lo man a, a theih tawp tak zet hian Marco-a awmna lamah chuan a lo nam phei leh ta vak a.

Severn-a chuan thil awmzia a chhui zung zung a, a chet fimkhur hle loh chuan hmabâk a neih tlemzia pawh a hria. Chutih lai chuan Marco-a chuan a lu-ah bawk, na fahran hian a lo chum leh vak a; a lu chu a hai mup mup a, a khaw hmuh pawh a fiah ta meuh lo va; a bengah chuan ring fahrana nui thawm te hriain a inhre zui ta a.

A han pai awn awn chûan ṭhuthleng chhe tawh chu a va deng dawt a. Amah rawn bèi zawm zeltu awm nia a hriat avang chuan a theih ang angin a lu chu a veng a, a thle tawn sek mai a. Chutih lai chuan ring leh awrawl lian fahran maia nui ri huah huah chu a han hria a, a hriatna chian loh aleiah a mitmeng pawh a lo fiah leh ta deuh a; mak tak maiin pindan lai taka Marco-a lo ding reng chu a va hmu ta a.

Chu pa chuan Severn-a, inchhanhim tuma eng mah lova a lo phar buai vel chu nuihzat êm êm hian a lo nuih a, "Marshal, hlauh tur a awm hlei nem," tih pahin zaizira a lam pan tura ti chung chuan, "l ke khan ding la, hetah hian lo kal rawh. I chungah eng thil nge thleng tih i hriat ka duh asin. Ding rawh! Ding rawh! A hmanhmawh thlâk chhe tê hlei nem; zanin hi chuan i ṭhiante tu mahin an rawn ṭanpui dawn reng reng lo a che!" a ti ta a.

Muangchangin Severn-a chu a ding ṭalh ṭalh a, a na tawrh aia na anga lan a tum tlat bawk a. Marco-a'n a hnekna kha a na tâwk ve ve hle a; mahse, piangsual zawngin a la siam lo chu a ni phawt mai. Chhe tê pawha a tana ṭha tur kawng inhawng apiang chu a zawn zel a ngai tih a hria a.

Anmahni lo thlirtute chu a'n mitsir zawr zawr a, kil khata Ricky main-a ṭhu chu a va hmu vat a; mahse, Ricky Main-a chu Chapman-a khan silaiin a lo tin reng a. Chapman-a lo pawh mi dang pakhat a hmu leh vat a, anni pahnih dang bâkah hnung lam kawngkhar bulah pakhat awm ngeia a rin avangin an vaiin pali an nih a ring nghâl mai a.

Marco Cullane-a chaan Severn-a mitmei chu a lo man vat a, deusawh taka nui huah huah chung hian, "Marshal, ṭanpuitu i melh deuh em ni? Chutiang chu beisei duh ting suh! He thilah hian tu mah an rawn inrawlh dawn hlei nem," a lo ti a. Severn-a chu a rawn pan hnai a; mahse, ani chu a lo hnungtawlh vat thung a.

Severn-a a hnungtawlh chiah tih chuan pistol a rawn ri thawr a, a ke ding lam rahna bul chiah chu a mu chuan a rawn deng dawt a. Chapman-a chuan a silai kaw hmawra mei khu chu a han chhem phat phat a, "Marshal, i dinna ngaiah khan ding reng ringawt rawh; i din reng loh chuan i ke zungpui emaw zungṭang dangte kha i chán mai thei a nia, Marco-a hian làm a zirtir hran dawn hlei nem che," a rawn ti a.

Marco-a pawh chuan, "Zanin angah hian zirtir tur thil a awm a nih chuan Severn ropuia leh thiltitheia hian a zir tur a ni ang chu," a rawn ti ve a, phur fahran hian Severn-a chu a pan leh ta hurh hurh a.

***********************

"Senor Poynton, Senor Poynton, hmanhmawh rawh, hmanhmawh viau rawh!" tia rawn àu tuar tuartu hmeichhia chu a â deuh emaw ni tih mai tur a ni.

Buaina chhuah vel lai khan Hotel bul lawkah a kal a, thil awm dan zawng zawng a hmuh avangin hmanhmawh fahranin Jail lam a pan a; ṭanpuitu awm theihna tur ber nia a hriat avangin Jail kawngkhar chu a chum ngheng ngheng mai a ni.

Chutiang hmanhmawh thawm chuan Poynton-a pawh a hmanhmawhtir ve deuh a, kawngkhar a han hawng a, hmeichhe mangang êm êm hmel a han hmuh phei chuan a zam ve lek lek a ni. "Dolores, eng thil nge ni ta ngai a?" tiin a han zawt a.

Dolores-i chuan, "Marshal maw le; an man der tawh; Cullane-a leh a hote'n. Marco Cullane-a'n a man a, a that ngei ngei ang. Rang taka kalin i va chhan ngei ngei tur a ni," a lo ti thuai thuai a.

Poynton-a kawr fualah chuan manin a kai dawt dawt a; mahse, Poynton-a chuan, chu nula kut chu a thing thla ṭhuai a, hmai sen tàn chung hian, "Dolores, mi dang tu emaw i zawn vat a ngai a nih chu. Rang takin Shearer-a va zawng vat rawh; Yope-a pawh hmu nghâl ang che; Puithiam pawh pan nghâl la, rang takin chûng mite chu hmeichhia, va zawng hmu nghâl rawh," a ti ta ngawt a.

Hmeichhia chuan khur deuh zawih zawih chung hian, "Nang hian, amah chu i ṭanpui lo ang a maw?" a han ti a. Poynton-a chuan, "Ka chanchinah inhambuai duh suh. I theih anga rangin Shearer-a leh Yope-a chu va zawng hmu vat mai rawh" a lo ti leh hmiah a.

Hmeichhia chuan, "Ka va hre thiam lo em! Amah chu an that ngei ngei ang," a'n tih leh pawh chuan Poynton-a chuan, "Dolores, rang takin thlawk chhuak nghâl rawh. Rang takin ka tih chu i hria em?" a lo ti tuar tuar a.

Ramhuai hmu ta ang hrim hian chu hmeichhia chu a nam leng lawp a, Jail chhung lamah chuan a lut a; a bán a phar chhuak a, mi dang bán emaw ti ni awm taka hmuhnawm ti taka a en reng hnu chuan, "Nausen bán ang maia a han khurh khanglan chu le," a ti a, a lu a thing nar nar a. A bul lawka saidawium chu a la a; a chhin a hawng a; a chhunga zu chu a intulh ta piap piap a.

*************************-

Marco-a'n a rawn pan hnaih deuh chuan Severn-a chu inveng ran chungin a lo hnungtawlh hârh hârh a. He pa hian vawi khat a kuta a lu-ah emaw a rawn chum fuh leh hlauh chuan a thihpui loh vek pawhin eng mah ti thei lovin a awm ngei dawn tih a inhre reng mai a. He pa hi pa namai a ni lo va, awlsam taka Tlumpi a hmet hlum zung zung ang mai hian amah ang hi chu a tihlum thei ngei ngei dawn tih a hre reng a ni.

A chezia zawng zawng, hun an hman thlengin engkim a teh fel vek tur a ni. Tun ang tluka nung dama a awm a ṭulna hi a la tawng ngai lo va, chutiang tur chuan thih ngama a beih a ṭulzia pawh a hre chiang kher mai.

Marco-a chuan Severn-a inveng, tawlh vel chu a ngaithei lo ṭan hle a. Za lo fahran hian a han nui huah huah a; vawi leh khatah rang fahran hian Severn-a chu a zuan ta a. A chezia en ran chung chuan Severn-a chu a lo eu awrh a, na zet hian Marco-a zuang lai dulah chuan a lo pet ta ngheng mai a.

Marco-a pawhin na a ti hle a ni ang, a rum chhûak ṭhawt a, a hmel pawh chu a sen tun tun a; mahse, chutiang mai maia chau chi a nih loh avang chuan a bei zui zel a, na fahran mai, mi nazawng tawrh theih loh khawpa na hian Severn-a ngháwngah chuan a han chum a.

Severn-a chu mi dang zawng ni se, nikhaw hre lovin a let ran tawh ang; mahse, mi namai a ni tlat lo. An let dun tawp tawp a, Severn-a chuan Marco-a'n a man beh theih loh dan tur ngawt a zawng a, a theih anga rangin a let vel tawp tawp a.

Marco-a chuan a ding lamah phe vuai hi awmin a hria a, chumi laka inven tum ni awm tak chuan a'n phar chhuak ngawt a. Chutih lai chuan Severn-a chu a lo ding chhuak tawh a, a theih tawka na hian Marco-a rawn ding chhuak ve lai chiah hrawkah chuan a han hnek vak a.

Marco-a chu na tiin a rum chhuak leh ṭhawt a, chhuatah chuan a bawk leh ta ruah a. A indawm kang ûr ûr a, a tam thei ang ber boruak hip luh tum ni awm tak hian a thaw huam huam a; Severn-a erawh chu Marco-a ban phâk loh deuh chiah chiahah a rawn chet leh dan tur thlir leh nghâk chuan a lo ding ran a.

Rum ṭuah ṭuah chung hian Marco-a chu a rawn inbeng kang leh ûr ûr a, "Hrep tak che chuan! Uh.. uh..," a ti a; hrawk chhungril tak aṭanga a rawn ṭawng chhuak chuan mihring ṭawng pawh a ang tawh lo. A rawn ṭhingthit chhuah chiah chuan Severn-a pawh chu a lo inring leh hle tawh a. Main-a chuan, "Don, khatih lai chiah khan sawisa hlum nghâl ta che," a rawn ti tuar a.

Severn-a chuan chu áu thawm chu a hria a; mahse, chutianga tih mai chu a tum lo. Dik tak chuan chu mihring laka rilru ṭha pu chunga beih lêt chu thil âtthlak tak a ni tih pawh a hria; mahse, he khaw mipui hian he Marco-a, hneh tak maia sawisak leh che thei lova sìama a awm an hmuh chiah hi tun huna a lama an ṭan ngheh lehzualna tur a ni tih a ring nghet tlat bawk a. Hêngho hi amah sawisa tur leh che thei lova síam tura lo kal an nih ang chiah hian chutiang chiaha lo siam lêt chu a tum a ni.

Marco-a pawh chu a ṭhingṭhi rei bik lo, inrinlawkna hun pawh síam chhin miah lovin ṭhingṭhi chung hian a rawn zuan ta thut mai a. Severn-a kea rawn man tum chuan a kut hrawl zet zet chu a rawn phar kâk huang a; mi dang zawng ni se, Severn-a chu a rawn nangching hman ngei ang.

Mahse, Severn-a chuan chutiang chiaha a rawn chet chu a lo ring tlat a, lo dang tur chuan inring sain a lo awm reng tawh a ni. Marco-a a rawn zuan chiah khan a ke dahna chhe têin a lo sawn hret a, chumi rual rual chuan a khinghnihin na êm êm hian Marco-a ngháwngah chuan a lo sat ta a.

Marco-a chuan a tum tak a ṭhelh bakah a beisei loh tak chu a tawng ta chawrh mai le! Na tuarin chhuatah bawk chuan a let leh ta reng mai a. Chutiang reng renga na chuan tu mahin an la sawisa ngai lo va, a tawrh ang chu mi dangin tuar ni se chuan eng mah an ti thei tawh lo vang. Marco Cullane-a pawh chuan a thil tawrh chu na a ti thawkhat hle a; mahse, rilru buai phah nan erawh a la hmang chhin eih lo.

Marco-a chu thei leh thei lovin a rawn inbeng kang ûr ûr a, a khabe leh hmuiahte chuan thisen a rawn chhuak nguah nguah a. Severn-a pawhin a lo nghâk satliah duh ta bik lo; a hnaihchilh sauh sauh a, a na thei ang ber zelin a rem lai apiangah a va hnek ta hmiah hmiah a.

Marco-a chu a rum ṭuah ṭuah a, amah sawisatu chu chiang taka hmuh tumin a bei zel a; Pa lian eng ang pawh ni se, Severn-a hnekna chu na a tih ve tho avangin a rei deuh hnu chuan a ṭhingṭhi leh ta rup a.

Chutih lai tak chuan a hnung lama phe zeuh hi Severn-a chuan a mitsirin a hmu zauh a, insaseng tum hian a'n che hrat a; mahse, Chapman-a chuan a pistol-in Severn-a kokiah chuan a rawn vaw ta nghek mai a, a beng a thawi thla thuak a, a koki chu a hik deuh mup a.

Severn-a chuan a hnunga mi chu vai kian tumin na zet hian a bán chu a'n vai ngawt a, a vai fuh hlauh a, hnung lam bang deng dawt khawp hian Chapman-a chu a leng phei dawrh a; mahse, chutih lai tak chuan na em em hian Marco-a chuan a lu-ah a rawn hnek leh ta hlauh mai a. Severn-a chu a pai ṭawng ṭawng a, Bar hnung lamah a bu liam ta a.

Bar hnung lama a tlâkna bakah Marco-a hnekna te, a koki veilama Chapman-a'n silai kawma a chhutna te chuan Severn-a chu a tichau hle a, che leh tur a awm dawn ta lo emaw a inti hial a; mahse, vawi leh khatah a na zawng zawng theihnghilh khawpin a thinurna chu a lo sosang thut a. A han dâk chhuak a; a'n hawi kual dan dan a; kalna tur dang reng reng a awm lo, kalna tur awm chhun lai takah chuan Marco-a chu a ding mup mai si a.

Severn-a thinrim lutuk chuan hlauh reng a nei tawh lo va, thi tur tho tho a nih pawhin patling taka thih chu ṭhaa a hriat tâk avangin a koki vei lam veng deuh ran chung chuan Marco-a chu a pan ta siah a. A mitmengah chuan thihna lo chu hmuh tur dang a awm tawh lo. Hetiang hunah hi chuan Mihring hi tual thattu a nihzia pawh hai rual a ni lo.

Severn-a chêt leh dan tur chu a lo thlirtute chang ni lo, amah beitu, Marco-a ngei pawh chuan sawi tur reng a hre ta hauh lo.

Marco-a'n amah man tuma a kut ding lam a rawn phar chhuah chiah chuan Severn-a kut chu a phe vuai a; Marco-a bán ding lam chu a ri ta rawp a, a tliak ta a. Chutiang chiah chuan a vei lam a rawn ban chhuak leh dek dek a, a ri leh rawp a, a tliak leh ta a. Na lutuk tak mai hian Severn-a chuan a hmui leh hmaiah a hnek zui ta pawp pawp a.

Marco Pa liana pawh eng mah ti thei ta hek lo, na tuarin a rum ṭuah ṭuah a, chhuatah chuan nikhaw hre lovin a let ta run mai a. Amah, Severn-a pawh a thahrui zawng zawnga che a nih avangin eng mah han ti thei bik tur chuang a awm lo va; a pai an an a; a ding chawt a; hnuai lam melh ran chung chuan a thaw ham ham a.

Chu thil thleng rapthlak tak an hmuh chuan Marco-a ṭhuihhruaite chuan eng mah tih nachang reng an hre lo. Engkim ti thei tura an lo rin, an innghahna ber sawisak chàuhva a'n awm tâkah chuan che lovin an ding reng ringawt a. Eng mah tih nachang hre lova an din reng lai chuan Chapman-a kha lu thing nar nar chungin a tlûkna aṭang chuan a rawn tho chhuak ta a.

Mahse, chutih lai vek chuan kawngkhar aṭangin Pa tê deuh leh sa ṭha lo tak hi a rawn phe lut vuai a; Chapman-a chu a rawn zuan a; chemte sei rèng ràwng leh hriam fahran hian Chapman-a hrawk bul chiah chu a rawn tin a, amah chu Chapman-a hnung chiahah chuan a ding ran a, "I chêt leh vaih chuan i hrawk hrui hi ka zai chhum ngei dawn a ni," Poynton-a chuan a rawn ti ta a.

Chapman-a hlau chu che leh tur a awm ta lo. A meng ralh ralh a, "Poynton-a i ni maw?" a ti ta ngawt a.

Poynton-a chuan, "Ni chiah e Chapman, Keimah ka ni alawm! I nauteho pawh kha an silai, chhuata paih turin hrilh vat la, i tan a ṭha ber ang. Tun hma chuan ka chemtê ken hian timna leh khurhna tel hauh lovin ka duh ang ang ka lo ti tawh ṭhin; mahse, nangmahni hian, zu chhia min in tamtir luattuk avang hian ka kutte hi a lo khur ta a; i chet hlauh chuan ka kut khur avang hian i lu bur hi i taksa aṭang hian ka chawi kang mai tur a nia," a ti ta a.

Chapman-a pawh chuan hlau em em hian, "Ni rih lo ve. Naute u, in silai kha paih vat rawh u," a ti ta chul a. Chutih lai chuan mi pakhat hian, "Chutiang tur chu ni awm tak a ni e Chuck," a rawn ti ta a.

Chu thu rawn sawitu chu Paul Shearer-a kha a ni. Hun rei lo tê chhung khan remchang hmuin kawngkaah chuan Shotgun kengin a lo ding reng tawh a, Chuck-a nâk nemah silai hmawr chuan a rawn hawlh ve chiah a, "I nu, tar tawh tak leh i hmangaih tak chan tur tâwk chu hetiang hunah hi chuan i ngaihtuah thiam ve mai ang chu maw?" a rawn ti ta lehnghal a.

A ṭawng zàwi hle na a, a ṭawngkam chhuakah chuan rikrâpna eng emaw tak a awm tlat a, Chuck Allen-a pawhin chu chu a hai bik lo va, rang takin a silai ken chu a thlauh thla ta nghâl a. Nixon-a, tukverh bula ding pawh chuan a dàr a'n chhin ak a, a pistol chu a thlauh thla ve ta nghâl a.

Rang takin Ricky Main-a khan, chûng silai, chhuata tla ta-te chu a khawm sawk sawk a, a khawm zawh chuan ama pistol tê reuh tê chu phawi chhuakin Gunman hnungah chiah chuan a va ding a, "Don, engkim chinfel a ni ta," a rawn ti ta a. "Ray, kha pa pawh kha chhuah tawh ta che," a han ti zui a.

Poynton-a chuan chu thu chu a hre lo nge, a hre reng a, a hre lo lui zawk tih pawh a hriat theih loh; Chapman-a hrawk hruia chemte zum fahrana tin tlat chung chuan che thei map lovin a la dawm tlat a. Chapman-a lah chu a chet hlek chuan chemtê chuan a hrawk a zai ngei dawn tih a hriat reng avang chuan, chet chu sawi loh, thawk pawh thaw ṭha ngam lovin a ding hle hle a.

Severn-a chu zâwi takin chu mite awmna lamah chuan a kal phei a, a kal pah chuan a pistol, chhuata mi kha a chhar a, a páiah a khung ve ve a. Dam thlap hian Poynton-a dàrah chuan a va beng thak thak a, "Chhuah tawh rawh," a ti ta a. Poynton-a mitmeng ling hlar chu tlemin a rawn dûl deuh a, Chapman-a chu a thlah a, hnung lamah chuan a tawlh phei ta nghâl a.

Poynton-a'n a kiansan veleh khan Chapman-a thung chu chhuatah a bawk thlawrh a, a thaw nghâl ham ham a. Poynton-a ve thung chuan, a bowie knife chu Planet dang aṭanga a hmuh hlim hlawt nia ngai ang hrim hian mak ti êm êmin a en vawng vawng a, "A va màk angreng teh hrep em! Khatiang khan ka tih leh theih pawh ka lo inring hrep tawh lo asin," a ti ta a.

Shearer-a chuan Chuck Allen-a chu a silai chuan a nawr kal a, Marshal awmna lamah chuan a kaltir a; chutiang bawk chuan Main-a pawhin Nixon-a chu a rawn nawr phei ta bawk a, "Don, hêngho hi engtia tih nge i rilrûk?" a rawn ti nghâl a. Poynton-a chuan bung vut hian, "Khâng mi sualho kha khaihlum nghâl tur an ni," a rawn ti a, a thu sawi chu pindan chhunga mi zawng zawng chuan fiah takin an hria a.

Severn-a leh Cullane-a pawlte inbeihna bumro tak hmutute pawh chu an rawn pung khawm thuai a, chûngho khaihlum chu an phur tlangin roreltu ang hrimin tih dan tur an rawn sawi nghâl sup sup a.

Hlauthawng takin Chapman-a chuan a hmui a han liak hlap hlap a, a hnung tawlh harh harh a; a ṭhiante pawh chu an mitmeng leh an chet vel danah chuan an awm a nuam lo tih a chiang hle bawk a ni.

Severn-a chu a rawn pên chhuak ta a, "Inkhaihlumna vawiinah hian a awm lo vang. Hêngho hi Jail-ah kan dah zâwk tur a ni," a rawn ti ta tlat a. Chutih lai chuan, aw thám leh ti deuh chel chawl hian, "Hei, Severn, khângho kha ka hote nen inbeihna hun remchang pêk i rem ti lo bur lem em ni?" tih ri chu an hre ta a.

Chu thu rawn sawitu awmna lam Severn-a'n a han hawi chuan Mike Turnbull-a chu a va hmu ta a. Hmai thi pheng phung leh bàl zeta chau tak chunga Bar nghenga a ding a han hmuh chuan a la chau thawkhat hle tih a lang thei a.

A bul chiahah chuan Long-a kha a lo ding a, an hnungah chuan a hote pathum chu chau tak chungin an rawn ding chhuak ta bawk a. An hmaite chu a paw deuh thual a, ṭhenkhat laiah chuan thisen pawh hmuh tur a awm a; an thawmhnaw inbelte pawh chu a balh bâkah a thler pheng phung bawk a.

Severn-a pawh chu za vak lo hian a han ṭhen sak a, "Marco-a han beih leh in duh deuh tihna em ni?" a han ti a. Turnbull-a chuan, duh lo leh hlau tih hriat takin a kut a lo phar chhuak a, thing nar nar chung hian, "Duh lo ve; ka lawm e; bansan tumna ka nei zawk a ni," a lo ti a.

Long-a erawh chuan, "A hmaa mi ang deuh bawk khan a hote kha he laiah hian han sawisa lawk ila maw le; ṭhian infiam dan angin kan infiam thung ang chu," tiin a rawn rawt ta a. Ogston-a pawh chuan, "A ṭha khawp ang chu," a rawn ti ve a.

Severn-a chuan mi tángte lam chu a hawi a, "Eng nge in ngaih dan? Tunah hian jail lam in pan dawn a, vanneihthlak taka tan in bang te a chim thut a nih loh chuan, in awm reng mai dawn a ni. A nih loh pawhin Turnbull-a hote nen hian kut lawnga inbeih in duh zawk em? A chak zâwk zâwk chu he hmun aṭang hian in kal bo nghâl hmiah thei ang; silai in hmang dawn lo va, chutiang chu eng nge in ngaih dan le?" tiin a han zawt ta a.

Chapman-a chuan a lu a thing nawr nawr a, "Severn, chutiang thu âtthlak ring tur khawp chuan kan mawl hlei nem. A lehlamah chuan, in Jail te saw Cullane-a leh a hote dang zo thei tura sak pawh a ni lo bawk," a ti ta hmiah a. Severn-a pawh chuan, "A lo nih tak chu; mahse, fiahna hun ṭha tak in nei thei dawn alawm. Ray, Rick, hêngho hi Jail lamah chuan khalh phei nghâl rawh u le," a ti ta a.

Poynton-a chuan, "An zavai chuan an tâwt hret dawn a nih hi; a lum phian a, an thlante pawh a tla ṭha duh kher ang; a nawm fahran zawng a rinawm loh," a rawn ti a. Main-a chuan nui chung hian, "A àwm tâwk lek a nih chu. Ti rawh u le, kha laia mi dang ho khan thing emaw remchang dang han la u la, kha laia kan Goliatha pa liana kha kan zawn ngawt loh chuan," a ti ta a.

Mi dangho chuan phur fahranin eng eng emaw an la khawm a; inzawnna angreng hian an siam nghâl a; Marco pa liana chu an zawn chhuak ta a. An phur tláng hle a, nui ham ham chung hian, "Kawng min lo kian hlawm ta che u," an ti a, an nui ham ham a.

San Jaime khaw mihringho chu an innghawk salh salh a; zawi tê tê hian an phun sep sep a; Saloon chhunga tlangval sang zet zawt, thil mak tak ṭum hnih ngawt titu chu an en ralh ralh hlawm a. Severn-a chuan ngawi tura a kut a han phar hnu chuan, sikul naupang hmaa thu sawi ang mai hian an ngawi diak a, Marshal chu an en ta ṭhap a.

"Ṭhiante u, in in lamah haw tawh rawh u. Kan party chu kan zo ta rih a, zaninah chuan buaina a awm tawh lo vang. Tunah khan Cullane-a hote pawh tihnat theih an ni tih in hre ta a; mi dangte aiin an ropuiin an lian bik vek lo; tihnat theih ve tho an ni," tih pah chúan Severn-a chu a'n ṭhen leh sak a; mahse, a hmai vúng avang chuan a ṭhen mawi fahran bik lo.

Ring deuh zâwk hian, "Hetiang thil hi anmahni chunga thlentir turin kan chet hun hi an nghâk dawn lo, min rawn beih an tum zel ang; mahse, an phu tâwk kan lo pe ve zel dawn a ni. Tunah hian, in lam panin kal tawh rawh u. Tin, ka thu sawi, 'Cullane-a leh a hote hi kan hneh thei' tih kha hre reng u la, hneh turin kan bei dawn bawk a ni," a ti ta a.

A bul vela mite chu pàwr fahran hian an lo nui a, an nuih dar dar hnu chuan an chhuak ta hlawm a. Chûngho chuan hlim takin an hnehna chu an làwm a ni; mahse, Cullane-a a rawn thawh leh hunah chuan hmanraw famkim nen a rawn thawk tawh ang a, chutih hunah chuan chûngho chu an lo ṭang ngam a nih chuan Cullane-a chu hneh theih a nih an ring nghet tawh tihna a ni ang.

Zàwi sap hian Severn-a chuan, "Paul, Doctor hmuh ka duh tlat mai. Ka dàr vei lamah hian eng maw tliak a awm a nih ka ring deuh tlat mai," a han ti a. Ngaihven tih hriat tak hian Shearer-a chuan, "Engati nge chutiang ni si i sawi daih tawh loh? Kal rawh, Doctor chu entir turin i pan vat teh ang," a lo ti thuai thuai a.

Severn-a chuan ngawi turin a'n khap a, "Khatiangin bengchheng síam suh, ka bán pakhat a che ṭha thei lo tih hi mi hriat ka duh mang hauh lo a nia," a han ti sap a. Kawngkhar lam chu a pan chiah a; mahse, a hma chiah kawng lai takah chuan Turnbull-a chu a lo ding hmiah a, a hnung chiahah chuan a hote chu thutak fe hian an lo ding bawk a.

Turnbull-a hmel pawh chu a thutak hle a, "Severn, nang nen hian buaina neih leh ka inbeisei lo va, duh pawh ka duh bawk hek lo," a lo ti a. Mak ti angreng taka en chung hian Severn-a chuan, "Buaina maw? Keimah nen hian maw?" a han ti a. Ogston-a chuan, "Ni e; Severn, min hnar tum duh ting lo la a ṭha zâwk ang; kan tum a ruh teh a nia," a lo ti a.

Severn-a chuan, "A ni tak maw? A nih leh, a engah chuan nge in tum a ruh tak chu?" tiin a han zâwt lêt a. Turnbull-a chuan, hmel mawi lo khawpa nui chung hian, "Sakawr ruk hmang, sam dum ṭha tak nei, nangmah puih che hi kan tum maw le," a han ti ta a.

Ogston-a bawk chuan, "Marshal, heta ṭanga Hremhmun thlenga i hnung zui hi ka tum a lawm. A thu hrimah, Cullane-a leh a pawlte hi ka ngaina hran lo reng reng a," a rawn ti leh a. Long-a pawh chuan, a dul chul hauh hauh chung hian, "Zanina hetianga min sawisak hnuah ngat phei hi chuan a huatin ka haw hlur tawh," a lo ti ve bawk a.

Ṭèng fe hian Shearer-a chuan, "Kan lamah in rawn ṭang ve ang a maw?" a lo ti tuarh a. Turnbull-a chuan, "Kan hmaa Christmas lo thleng tur ang chiah hian, in lamah kan rawn ṭang ve ta a ni. He laiah hian Severn-a lakah leibat kan nei ta a; tin, Cullane-a leh a hote chungah pawh rulh tur bat kan nei ta bawk. Chûng kan leibat pahnihte chu kan tlâk hma chuan he lai hmunah hian kan awm ve dawn ta a nih chu," a ti ta hmiah a.

Ogston-a bawk chuan, "Kan zavai hian chutiang ti tur chuan kan inpe a ni," a lo ti ve leh a. Shearer-a chuan, "Naute u, chu chanchin chu kan tan chanchin ṭha a nih chu," a ti ta a.

Severn-a pawh chuan, "Ṭhiante u, in thil tih chu hre chianga ti in ni ngei ang chu maw? Rilru neia ti in nih a rinawm e. Inbeih leh hunah chuan kuttum leh kea inpet mai mai a ni tawh lo vang, mi sual leh rothap tak tak rùal hetah hian an rawn tlan lut tawh ang a, an thah theih loh pawh hàl hlum an rawn tum ang a, inte pawh hi an rawn hal mai dawn a ni. Flag dum kengin an lo kal ang a, eng pawh thlentir hnial lo leh tum ranin an rawn thawk dawn a ni," a han ti a.

Turnbull-a chuan, "Engtiang pawhin rawn thawk rawh se; kan dinnaah chuan kan ding nghet tlat a ni," a lo ti hmiah a. A kut a phar chhuak a, hlim em hian Severn-a, Marshal chu a sâwi ta nawk nawk a. A tawp lamah phei chuan Severn-a chu, na tiin a ṭhen ta sawk a.

An inkawp remna leh lam ṭanga an insìam tawhna lawm nan tiin Turnbull-a chuan zu in a rawt ta a. An zinga pakhat chuan, "Mi pangngai hnathawh ang thawk tur chuan he khuaah hian naupang chhia chu rawn tir tawh lo turin Old Cullane-a pawh va hrilhtir ni se a ṭha phian ang," a lo ti a, an nui ham ham a.

***********************



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 22nd, 2018, 8:10 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 8

San Jaime khuaah chuan Old Cullane-a chuan enthlatu ṭha tak a neih avangin thil thleng zawng zawng kha, a hnu darkar chanve emaw vel lekah khan a lo hre nghâl vek a. Darkar khat emaw lai chu biak pawh biak hleih theih loh khawpa thinrimin a insawh a insawh a.

A chenna hmunah chuan tu mah an lut ngam lo va, a fate ngei pawh chuan chutianga a thinrim meng sen ṭul tawh chu an ngâm ngang lo a ni.

Rei deuh hnuah chuan a thinur a reh ta deuh niin an hria a, intihuai takin a fapa naupang ber Billy-a chuan kawngkhar âwng aṭangin a bihthla ta dak dak a. Mak angreng takin Old Cullane-a chu ṭhutthlengah a lo ṭhu a, zu no a dawm lai chu a va hmu ta a.

Mei alh chu a lo en a, amah leh amah chu inbiain a lo nui suk suk a, "Puitling thawh tur ang thawk turin naupang chhia chu rawn tir tawh suh!' I thu sawiah hian dik tak tak a awm fo mai ka ti! Mister, a tu-a pawh chu lo ni ta la; a lo nih tak chu; kha aia ṭha leh zei kha ka la nei alawm. I thlarau chu anchhe dawngin awm rawh se," a ti mawlh mawlh a.

************************

Severn-a chu tukverh bulah a ding a, Ricky Main-a leh Poynton-a inhnial chu a ngaithla ran a. Poynton-a chuan, "Lehkhachaih aia sanga hêngho hi kan khaihlum ngei a tulin ka hre tlat. Hetiang mihring ei tur chhum ringawt pawh hi hnathawh âtthlak a ni reng reng a ni," a ti bal bal a.

Ricky Main-a chuan, "Ray, hêng mite hi kan duh anga kan chêt theihna tura thiltihtheihna kan neih a nih hi. Nang pawhin i hre chiang hle a ni lawm ni? Hetianga kan kuta an tàn chhung hi chuan Cullane-a pawh hian he khua tihchimih vek tum mai lo hian nem deuh zawk pawhin a la rawn thawh phah maithei asin," a lo ti ve thung a.

Poynton-a chuan, "Thu buluk a nih chu. I nu pum chhung aṭanga piang i nih a hre chiang ang bawk hian hêng mite hi a bul ṭan nana kan khaihlum lo a nih ngat chuan, eng mah tak tak kan ti dawn lo a ni tih hi a hre chiang ngawt ang," a lo ti hmiah thung a. A thu sawi chhànna pawh nghâk hman lo chuan tukverh bul bang chu a'n beng nghek a, chu bang lehlam chiahah chuan an mi mante kha an ṭhu a.

Chutih lai tak chuan hmeichhe pakhat hi an awmna pindanah chuan a rawn lut ta thut a. Ricky Main-a'n chu hmeichhe rawn lut a hmuh veleh chuan a tho thuai a, chibai buk nan tiin a lukhum chu a la thla vat a; Severn-a pawh chuan beisei loh taka hmeichhe inleng an neih chu a en vat bawk a.

Chu hmeichhia chu sang zeih zawih, ngo fahran lo, naupang chhia ni tawh lo tih hriat tak leh hmelṭha lutuk tak mai hi a ni a. A sam chu tawi deuh leh Indian-ho sam ang maia ngil siau hi a ni a. A mitmeng pawl rem rawm duhawm tak chu hmangaihnain a khat a, a biangki chu sang lam deuh a niin a no chek chawk hle a, a heh lah chu a sen hiam mai bawk a.

Main-a chuan, "Ka Pi, chibai," a lo ti thuai a. Nula chuan, "Pute u, chibai u le," a han ti sap a, a ṭawng chu a zàwi hle na-a; hriat a nuam hle. Chutih lai chuan Severn-a pawh chuan a rawn pan hnai a.

Hmeichhia chuan, "San Jaime khuaah hian hun eng emaw ti chhung chu ka lo cheng ve tawh nain min hre kher lo vang. He khaw tana in thil tih avang hian lo kalin lawm thu rawn sawi tur ka ni ve tlat. Ka...," tih pah chuan a thu sawi chu sawi zawm ta lem lo chuan a Basket khài chu Main-a hmaah chuan a han nghat a, "Thil tlem tham tak in tan ka rawn ken che u a ni. Thei te leh sa tlem leh eng eng emaw, in tana kan tih theih tâwk," a han ti leh ta a.

Main-a chuan, "Kan' i ti elo?" a lo ti a. Nula chuan, "Ti e; khaw chhunga nula ṭhenkhatte nen. Hemi chungchang thu-ah hian anmahni ka titi pui hlawm a, theih ang tâwk tâwka ṭanpui che u hi an duh ve ṭheuh a ni," a lo ti a.

Ray Poynton-a chu a rawn pên chhuak a, "Ka Pi, in ti ṭha hle mai, kan lawm tak meuh meuh a ni. Don, hei hi Mrs. Winn Jennifer-i a nih hi; Jennifer, hei hi kan Marshal, Don Severn-a a nih hi," a rawn ti ta a. Jennifer-i chuan, "Marshal, a tawp a tawpa hetianga ka han hmu thei ta che hi ka lawm ngawt mai," a ti a, an inchibai nghâl a.

Main-a'n lo inrawlh a châk hle tawh lai chuan Ray Poynton-a vek chuan, "He laia mi pakhat hi Mr. Main-a a ni a, he laiah hian min ṭanpui tura awm ve a ni," a rawn ti leh ta a.

Mrs. Winn-i chuan, "Mr. Main, ka hmu che chu ka lawm hle mai," a'n ti zawr a; Severn-a lam bawk chu a han hawi leh a, "Marshal, ka.. kan ngaih dan chuan heng mi tángte hi buaithlak takin in chàwm an ngai a; chutih lai chuan tih tur dang tam tak i nei bawk si a, heng i mi tángte lo ṭanpuia chaw lo pek te hi kan tih theih tâwk ni ta berin kan hre deuh a," a ti leh ta a.

A mitmeng chu a hnuai deuh raih a, a thu sawi chu a inzahpui hi a angin, inveng ru riau hian a lang bawk a. Poynton-a chu, chu nula inpeknaah chuan a lawm hle a, a thiam ang angin lawm thu a lo hrilh a, "Hêngho chaw chhum mah hi ka nin tawh nâk alaia, chutianga i rawn tih theih chuan kan lawm khawp ang chu," a ti ta bawrh bawrh a.

Ricky Main-a pawh chuan, "A nih leh, i thu sawi chu engtiangin nge kan tih hlawhtlin ang? Kan lo kalin, in chaw chhum sa chu kan rawn la ṭhin dawn tihna em ni ang?" a lo ti ve bawk a.

Nula chuan, "Ni lul lo ve. Chutiangah nangni in intihbuai a ngai lo vang, keimahin ka rawn pe mai ṭhin dawn a ni. Father Malcolm-a ka puih bâkah hian, eng mah thawh tur ka neih loh avangin hna ka insìam ve dawn tihna a ni mai a, lawm takin keimahin ka rawn pe mai ṭhin ang," a ti ta sawk sawk a. Severn-a pawh chuan, "Ka pi, I thil tih chu a ropui ka ti a, kan lawm khawp mai," a rawn ti ve ta a.

Nula chuan, "Mr. Severn, he khuaah hian lawm taka dawnsawn i hlawh a, hei vang tak pawh hian he laiah hian lo kal pawh ka duh nghe nghe a ni. Zaninah ka inah nang leh i ṭhiante hian zanriah min rawn kilpui thei nghe nghe ang emaw chu le tih te hi ka ngaihtuah neuh neuh asin," a ti ta zel a. Main-a chuan, "Chutiang te kan hnar phal i ring reng reng em ni? A ni lawm ni, Don?" a rawn ti chhuak ta a.

Severn-a chuan han nuih deuh vak mai hi a duh a; mahse, a insum hram hram a. Chutiang reng renga Ricky Main-a'n nula a lo duh tâk avanga a awm dan a danglam ta thut mai chuan a nuih a tiza a ni. Dik tak chuan chu nula chu tu mitah mah a chhe lo tlat a, Main-a chezia pawh dem chi-ah a ngai em em chuang lo.

Severn-a chuan, "Teh reng mai; mahse, Miss Winn, kan dawng hlawk hrep ang tih chu a rinawm e," a han tih chuan Nula chuan, "Don, engati nge 'Jenny' tia min koh ve mai loh? Hun rei tawh tak aṭanga lo hre sa tawh che ang hrimah asin ka lo inngaih. Mi tam takin i chanchin an sawi ka lo hriat tawh avang pawh a ni maithei," zak deuh ni awm taka kimki deuh chaih chaih chung hian a ti ta a.

Severn-a chuan, "A ni maw Ka pi.. oh, Jenny ka tihna, min ngaidam rawh. I mi sawmnaa lo kal chu a lawmawmin a inchhuan theih rum rum ang le. Eng pawh ni se, kan mikhualte avang hian tu emaw kan awm a ṭul a ni tih chu min hriatpui ka duh a," a han ti a. Jenny chuan kawngkhar lam pan pah chuan, "Teh reng mai; mahse, in zinga pahnih tal hi chuan kan in in rawn chùan kài ngei ka beisei tlat a ni," a ti a, a chhuak ta a.

A chhuah hnu chuan an ngawi ṭhap a, nakin deuhah chuan ring fé hian Ricky Main-a chuan, "Ray, engtizia nge khatiang khawpa hmelṭha, Helen of Troy nei reng si hian mi pawh i lo hrilh loh reng reng chu le?" tiin a rawn zâwt ta a.

Poynton-a chuan, "A hming chu Jennifer-i a ni; Helen-i chu a ni hauh lo," a lo hmak a, "Nuthlawi a nih bâkah, a bikin rawngbawlnaah a inpe zo kher em a, nangni ang tih chi niin ka ring lo a ni. A thu hrimah, kan awmna in chhung a rawn luh hma zawng kha chuan he khuaah hian a awm ve tih ka hre lo pek alawm," a han ti leh a.

Main-a bawk chuan, "Ka beisei aiin i tar â tawh hle a nih pek hi. Methusel-a ai pawh khan dam rei mah ila khatiang taka nula hmelṭha a awm chu ka theihnghilh thei hauh lo vang," a han ti leh a. Mahse, Ray-a chuan, "Chutiang zawng i nih hmèl hrep loh ve," a lo ti hmak a.

Ricky Main-a chuan, "Tar â pa, i lukhum kha khum la, kal vat zawk mai teh," a ti ta a. Severn-a lam hawi pah chuan, "Zanin chu ka hnenah i kal ve a ngai tihna a nih chu; Ray-a hian Jail chu a lo venghim thei mai ang. Kha hmeichhia kha khawvelah a hmelṭha lawr lak àwm e, chutiang nula chuan zanriah kilpuiah min han sáwm ta chu a ni a. Halleluiah!" a ti ta piap piap mai a.

Severn-a chuan, "Ka hriat reng dan chuan kan zavai hian min sáwm ni tain ka hria. Tin, nang leh Ray-a hi va kal ula a ṭha ang; tuna kan dinhmunah hi chuan khatiang nula han chhai thei niin ka inhre rih lo," tih pah chuan a dàr vei lam chu a'n melh deuh ralh a. Pawn lama lang theiin a tùamna te chu awm lo mah se nasa taka tùam khawng tlat a ni a, a bán vei lam chu a che thei hauh lo reng a ni.

Main-a chuan, "Ngawi teh Don, ani kha chuan silaia a lo kah che chu a rinawm chiah lo ve," a han ti zet a, "Eng pawh ni se, tu nge kal ang tih leh tu nge vannei ber dawn tih ṭhumvawrin i han zawng teh reng ang u," tih leh pah chuan buhpawl pathum a va thlang chhuak a; a tàwi dan indawtin a siam thliah thliah a, "A tawi ber pawt chuan Jail hi a nghâk tur a ni," a han ti zui leh a.

Uluk taka dawhkan chunga a han sawngbawl hnu chuan a kut hnung lamah a keng ta a. A hnung lama mi chu Ray Poynton-a chu a lâktir a, ani chuan a sei ber a la ta nalh a, "Ka tifuh rap. Zanin chu chaw pangngai tak ka ei dawn tihna a ang ta hle mai," a lo ti hlut a. Main-a chuan, "Don, nang, i pàwh ve ni," a han ti a.

Severn-a chuan a tawi ber pàwh a duh hle a, a ngaihtuah nauh nauh a; Ricky Main-a lah chuan a tawi ber pàwh a hlauhzia chu a hmelah pawh a lo lang chhuak hial si a! Severn-a chuan a'n pàwt ve ta ngei a; a sei zawk chu a pawt ta hlauh mai a; Main-a hmel chu a ngui rawih mai a, "A vanneih loh theih kher mai a! Lehkhaden chuan ti ila a dang zar ang," a han ti a.

Mahse, Severn-a chuan, "Rick, a pawi lo. Engah mah ngai suh; nangmah i kal zawk dawn nia; kei chu he laiah ka lo vei kual mai mai ang. A thu hrimah, hmeichheho bula khawsak hi ka châk fahran lo a ni e," a ti ta a. Main-a chuan pháwk deuh hra chung hian, "Chu, i sawi danah hmeichhe dangte pawh an awm i ring elo?" a lo ti a.

Poynton-a zawk chuan, "Boy, i lo piang chhuak ang bawk hian hmeichhe dangte pawh an awm dawn tih chu a chiang sa alawm. Amah nen chauh khawnvar eng hnuaia khawsa dun turah i lo inngai pek a ni maw? A teuh lo mai, ka rin dan chuan Father Malcolm-a pawh a tel ve ka ring," a ti ta a.

Severn-a chuan, "Rick, ka thu sawi awmzia tak chu ka aiah i kal dawn tihna a ni. Tlai hun hlim taka i hman tur dan che leh dàl ai che chuan tihian hetah ka lo awm mai dawn a ni," a lo ti leh a.

Main-a chuan a lu a thing a, "Don, chu thu chu hre lo ila ka duh zawk. Tlai hlimawm leh fianrial neih a ṭul a nih ngai chuan nangmah zawk hi a mamawh ber chu i ni alawm; ka kal lo vang. Tunah mai khan engkim ka ngaihtuah chhuak ta a; kei chu ka kal lo vang. A reng reng thuah, nangmah khân kal turin i inpawt a, chu chu hemi chungchanga ka thu tawp a ni," a rawn ti ta a.

Mahse, Severn-a chuan nui chung deuh hian, "Chûng nulaho chu biak duhna tak leh thlakhlelhna tak nei che khan ka hre si che a?" a'n ti leh ṭalh a; mahse, Main-a chuan, "Ni lo ve, a tu-a mah ka hre bawk hek lo. A thu hrimah, i kal tur zawk a nia lawm; chu bak, eng mah ka sawi tawh lo vang," a lo ti leh ta tlat a.

Poynton-a ve thung chuan, "Nang hi, sakawr pà ang mai i ni, Main. Thil awmze dik tak ka'n hrilh ang che; I nula hmelṭha hmuh chu i theihnghilh nghâl hmak theih nan," a han tih chuan, "Eng nge ni ta ngai a?" Severn-a chuan a lo ti vat a.

Raymond Poynton-a chuan, "Jenny Winn hi hmeichhe tumruh tak a ni. Tunah hian kum sawmthum mi vel a nih tawh ka ring. San Jaime khuaah hian kum ruk, kum sarih vel emaw chu a cheng ve tawh ang. A pasal hian Nueces velah Farm a nei a; sakawr ruk tum pakhatin a pasal chu a thahsak a; chumi hnu-ah chuan hetah hian a rawn cheng ta a; chûng chanchin chu eng mah a sawi duh ngai lo. Chuta a rawn chen chinah chuan khaw màwitu a ni ta ngawt a.

"Mi, tu pawhin ṭanpui an ngaih emaw chuan a ṭanpui hmasa bertu leh an bul hnai thleng hmasa bertu a ni zel. Ama enkawl seilen ringawt pawh mi sawm panga vel an awm tawh ang. Jennifer-i hian a thil mamawh hi tu pawh dil se, a dil aia tam pe lo tur he khaw chhungah hian an váng viau ang; mahse, tu mah a dil duh hauh lo thung. Mite ṭanpui hi a thil châk zawng tak a nih avang hian Father Malcolm-a ṭanpuitu ber a ni ta a ni," a ti ta zel a.

Severn-a pawh chuan, "Heta kan awm min rawn ṭanpui duhna a neih mai dan aṭang khan mi dik tak ni àwm zawng a nih kha," a lo ti ve ta a. Poynton-a chuan, "Mi ṭha lutuk tak a nih avang ringawt hian, nang pawh Main, a bulah ṭawng fimkhur ang che; i ṭawng sual vaih zawngin i hmui kha keimah ngei hian ka ṭhui chip hmak dawn a nia," a ti ta a.

Hlau hle ni awm tak hian Ricky Main-a chuan a kut a phar chhuak a, "A nih tak chu Uncle. I sawi ang zel chauhvin ka awm dawn," a ti ta chul a. Poynton-a vek chuan, "Chutia nula bulah te zanriah ka kil dawn si chuan ka thawmhnaw te hi ka thlak duh a, ka inziah fai ve deuh loh te'n," a han ti leh a.

Nui hawk hawk chung hian Main-a chuan, "Ray, i nih ang ang khan i kal lohva i inmeh fai chuan i hmelchhe zet kha a lang fiah dawn a; i nula chawhlui kilpui te'n an hlau ang che a, an tlanchhe zo vek mai ang," a lo ti a, Poynton-a chu nui sak chung hian a chhuak ta a.

A chhuah hnu chuan a chanchin chu an sawi dun a. Ricky Main-a chuan, chu putar a ngainat thu leh a chanchin a lo hriat tawh dante chu a sawi ve ta hial a. Severn-a pawh chuan, "Amah ang sawmhnih hi chuan Cullane-a hote pawh an ching buai thei kher ang," a ti ta hial a.

Main-a chuan, "A nuihzatthlâk angreng hle mai ka ti. Engati nge hetiang taka thil awm dan hi a danglama a reh vung vung mai chu le. A fate Jail-ah kan khung a ni tih a hriat veleh khan ka lo rin danin, a rang a rangin thlipui ang maiin Billy Old Cullane-a chu a rawn thawh mai ka lo ring a," a han ti a. Marshal chuan, "I rin dan chu ka zawmpui viau che; mahse, a nuihzatthlâk i tih kha chu ṭawngkam dik tak a nih ka ring lo," a lo ti a.

"A nih leh, eng vanga rawn thawk lawk lo nge a nih i rin le, Don?" tiin Main-a chuan a han zâwt a. Severn-a chuan, "Ka hre chiah bik lo; mahse, kan putara chuan thil dang eng emaw enghelh deuh a nei a nih ka ring. A rilru put dan leh a tum dan chu rei lo teah kan hriat thuai tawh a rinawm," a lo ti mai a.

A sawi zawh chuan a silaite chu ngun takin a en fiah malh malh a; a lukhum a la a; Jail chu a chhuahsan a; kawtthler chu a fang kual ta a.

Amah chauh chuan a vak kual a vak kual a, a vah kualna lamah chuan Mike Turnbull-a leh a hote chu lehkha dengin hlim takin an awm tih leh mi dangte pawh chu thlaphang hran lovin an awm tih a hmu zel a. Tlai ni tla tur sen phút hnuaiah San Jaime khuaah chuan amah chauhvin a vâk ta zel a.

*************************

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 23rd, 2018, 10:42 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 9

Glenn Cullane-a chuan an tawmkûk thlen leh nan leh a chanchin hriatte a pa hnena thlen leh nan a sakawr pahnih chu a tihlum ṭhak a; a pathumna pawh chu a thlung fel chauh va, eng atan maha hman tlâk leh tawh loh tur chuan a hnutchhiah ta tawp mai a.

Glenn-a a thlen aṭanga minute sàwm chhung chuan Cullane-a chuan a hote, buru leh rothap tak takte chu a in lian takah chuan a ko khawm ta vek a. Chûngho chu mitmeng sen rem rum, huatna tinrenga meng chung chuan a lo hmachhawn a. A fapa naupang ber chuan, "Ka Pa, eng nge ni ta a?" a han ti a.

Cullane-a chuan, "Lo ngawi reng rawh. Vawiina ka thil hriat hian San Jaime khuaa thil awm dan engkim a tichiang ta vek a ni. I thu min hrilh ang chiah khan Glenn, hêngho hi han hrilh ve rawh le," a ti ta a.

A thu va hriat avanga intipawimawh tak hian Glenn-a chu a han ngawi deuh vang vang a. Nghâkhlel taka an nghah hnu chuan, "San Jaime khuaa mihring, saw Severn-a saw tu nge a nih in hria em?" a han ti phawt a. Nghakhlel lutuk tak hian Yancy Cullane-a chuan, "Glenn, pehhel kual khanglang teh suh. I hriat ang ang chu sawi thuai thuai zawk teh," a lo ti hlar a.

Glenn-a chuan, "Unaupa, ka la sawi dawn alawm. Tin, tun thlenga nung dama i la awm avang hian lawm thu sawia i ṭawngṭai hial pawh a ngai maithei a nia. San Jaime khuaa mi pakhat hmaah i silai i phawi ve khanglang bawk si a; tun thlenga i la dam tlat hi tu hmaah nge i silai kha i phàwi tih ka sawi hunah chuan lawmin i lám ngei ang," a han ti leh a.

Yancy-a chuan, "Tu maw? Severn-a hmaah maw?" a lo ti thuai a. Glenn-a chuan, "Severn-a ni e; mite hriat lar ber dan zawk chuan, Texas Outlaw, Sudden-a a ni," a ti ta hmak a.

Chu ṭawngkam khat lek a sawi avanga chûngho chunga thu tam tak sawi ang leh ngaihtuahna pe thei thu chu Glenn-a chuan vawi khat mah a la sawi chhuak ngai àwm lo ve, Severn-a chu Sudden-a, outlaw a lo ni reng si a.

Chu pindan chhunga awm zawng zawng chuan, chu Gunfighter hmingthang hming chu an hriat bakah a puakruk pahnih a phàwi ranzia leh a chêt ranzia te chu an hre vek bawk si a. Yancy Cullane-a chuan a hmaah silai a lo phawi ve a; chumi hnuah chu laiah ngei chuan nung damin a la kal thei a nih si chuan mi vannei tàwp a ni teh meuh reng a ni.

Chutia an ngawih ṭhap lai chuan a fa tlum ber, Billy Cullane-a chu a rawn ṭawng chhuak ta a, "Ngawi teh ka Pa, Glenn-a hi a rilru a buai a ni phawt mai; mi zawng zawngin Sudden-a chu a thi tawh tih an hre vek alawm; kum li kum nga kal ta-ah khan a bo pil hmiah tawh; Arizona hmun khawi maw laiah an that tawh tih hi an hriat dan a ni," a rawn ti ta a.

Flatman-a pawh chuan, "Chutiang chiah chuan kei pawhin ka hria. Hatchett's Folly velah a ni nghe nghe lawm ni kha?" a rawn ti ve ta a. Kawngkhar bulah amah chu a ding ran a.

Mi dangte pawh chuan chu chu an hriat dan a nih thu an rawn sawi sap sap a. Yancy Cullane-a phei chu a ṭhutna aṭangin a tho tharh a, kawngkhar lam chu a pan ta nghâl a, "Glenn, chu chu i thil va hmuh chhuah a nih si chuan ka sakawr kha eng mah lovah i tihlum der tihna a nih chu," a ti ta hmak a.

"Ṭhu rawh, Yancy!" tia Pa ber thu pek chu ṭek tla ang mai a ni a. Yancy-a pawh chuan hriat loh hlanin a ṭhutna a lo thleng hman reng a; mahse, "A.. Ka pa, thil dang tih tur ka..," a tih lai mek chuan Old Billy Cullane-a chuan, "Tih tur i nei tia ka sawi loh chuan eng mah tih tur i nei reng reng lo. Tunah khan i hmui kha chip hmak la, ka sawi leh tur hi ngun takin lo ngaithla rawh; nang pawh Glenn, i sawi tur chu sawi zung zung rawh; pehhel kual tawh suh!" a lo ti ta hmiah a.

Hmanhmawh fe hian Glenn-a chuan, "Teh reng mai ka Pa," a lo ti sawk sawk a, "Ṭhiante u, hetiang hi a ni, ka pa hian he mihring dinhmun hre hmasa uk lova va beih mai chu thil âtthlak tak niin a hria a, he mihring, Severn-a an tih hian eng vang emaw ber chuan San Jaime khuaah hian awmhmun a rawn khuar a nih ngei a ring tlat a ni," a han tih chuan a Pa chuan, "I sawi tur ber kha sawi thuai ta che," a lo ti sek a.

Glenn-a chuan, "Ni e, San Jose khuaah ka va kal a, chutah chuan Severn-a leh Black Billy Morrison-a inhmachhawn thu te kha ka va hre chiang ta a; silai khu a reh fel meuh chuan Severn-a hian Bill-a chu mu thum ngawtin a lo kâp fuh hman der tawh a ni. Chuta ṭang chuan Gambler pakhat, Main-a an tih nen an tlan chhuak ta a ni," a han ti leh a.

Billy-a chuan, "Tuna San Jaime khuaa awm ve reng nen hian maw?" a lo ti vat a. Flatman-a pawh chuan, "Severn-a ṭanpui mektu saw a nih chu," a lo ti ve vat bawk a.

Glenn-a chuan, "Ni chiah e. Chuta ṭang chuan Arizona-ah ka lut a; Tucson khuaah ka kal ta nghâl a; Hotel-ahte Severn-a chanchin leh pianziate hi ka sawi a; Dan hre mite pawh ka ráwn kual ta zel a. Chumi zan chuan Shoo Fly Hotel-ah ka cheng a, chumi aṭang chuan Governor pawh he mihring hian a tlawh ngei tih ka hre ta a ni," a han tih zawm leh a.

Flatman-a chuan, "Bleke-a maw? A nih chuan, Governor chuan he Sudden-a hi hetah hian a rawn tir tia sawi i tum ta em ni?" a lo ti a. Glenn Cullane-a chuan, "Chutiang chiah chuan ka sawi dawn reng a ni. Chu bâkah, Bleke-a chuan nula hmelṭha zet mai Secretary nei a. A chanchin hre chiang tur chuan hun pawh ka khawhral nual a, a hming pawh Lavinia a ni a, hmelṭha leh pian nalh tak a ni.

"Pangpar mawi tak takte ka lâksak hnu chuan thupui tak tak ka sawipui thei ta a. A hnathawh chanchin ka sawipui hnu chuan a tawpah Severn-a hi Bleke-a'n hetah hian a rawn tir a ni tih a sawi duh ta chauh a ni; chu ai maha pawimawh ta zâwk chu Severn-a'n Governor a hmuh lai hian mi pakhat a hming, Coffey-a pawh a tel ve nghe nghe a ni," a ti ta a.

Yancy-a pek chuan, "Governor chaw eipui Coffey-a i tih chu tu Coffey-a nge maw ni le? Thawnthu tawi tê sawi nan kum khat ngawt i hmang dawn alawm," a lo ti a. Glenn-a chuan tifuh inti tak hian, "Coffey-a, Big Eddie Coffey-a; Fronteras khuaa Saloon neitu ṭhin kha maw le," a han ti a.

Thinur tak hian Yancy-a chuan, "Fronteras khuaah tu mah nung dama chhuah kan nei hlei nem. Chûng thil vel mai mai chu maw min hrilh tur i neih chu?" a tih lai chuan Old Billy Cullane-a chuan, "Chutiang chiah chuan Yancy, hmanah khan min hrilh tawh a; i thil tih reng reng hi a chanve zo chauh zelin i ti ṭhin tihna a lo nih chiah hi," a lo ti ta hmiah a.

Mahse Yancy-a chuan, "Ka Pa, chhia pawh ka chham ngam a ni. Fronteras khaw mihring ho kha silaimu dawrzawn chanve deuh zel kan paitir hlawm a, tu mah nung dama khawchhuak an awm lo," a lo ti leh hram a.

Putara chuan, "Ngawi reng ringawt rawh. I hmel chhe zet kareh kha àntir tawh suh. Phatna i hriat nalh ang zel hi chuan thil a takin lo ti ṭhin ni la chuan hetiang thawnthu te hi kan ngaihthlâk a ṭul tawh lo ang a, Coffey-a pawhin Governor hnen a thleng hek lo ang a, Bleke-a pawhin San Jaime khuaah hian Severn mihringa pawh a rawn tir hauh lo ang le," a ti ta hmiah a.

Yancy-a chuan, "Chu pawh lo ni ta se, thuhmun vek a la ni tho alawm. Severn-a hi nuai bo thuai la, a tawpna a ni nghâl mai a lawm. Sudden-a an tih meuh pawh hian a luruha puakruk mu thun chu a tùar chuang bik lo ang a, a hnung lam aṭanga kah te chu a bum seng bik chuang nâng! Sudden-a in tih pawh chu lo ni tak tak ta mah se," a han ti leh hram a.

Glenn-a chuan, "Sudden-a chu a ni ngei alawm. Hatchett's Folly lamah te pawh ka kal zel a, chinchang hre fiah turin ka hnár ka lèn reng a; he Severn-a ngei hian chu laiah chuan Ranch a nei a; chu chu tunah hian Lunt-a an tih chuan a enkawl mek a ni.

"Chu lai vela mi dangte pawhin tun hma kum thum vela thil thlen dan kha ngaihnawm ti takin an sawi châk hle. Chutih lai chuan chu laiah chuan buaina lian tham tak an tawng ta a, he Sudden-a ngei hi lo zuang lutin buaina chu a rawn ching fel ta vek a, chuta ṭang erawh chuan a pil bo ta hmiah a ni," a'n ti leh ngat a.

"Chuti chuan?"

"Vawi leh khatah khâwi aṭanga lo kal nge tih pawh hriat theih miah lohvin chu laiah chuan Ranch pakhat hian chhinchhiahna tharlam tak 'YZ' chu a rawn nei ta hlawl a, chu chhinchhiahna neitu hming erawh chu Don Severn-a hi a ni ta a ni," Glenn-a chuan a han tih zawm leh a. Flatman-a chuan, "Ka hre thiam ta viau mai, Severn-a hi Sudden-a ngei niin a lang ta," a lo ti a.

Glenn-a bawk chuan, "Chu aia mak leh pawimawh zawk chu he Sudden-a hi Bleke of Arizona rawn tirh a ni," a han tih leh chuan mi dangte pawh chuan an ṭawmpui hle a; mahse, Putara thung chuan, "Kan Bleke mihringa hrep tak chu!" a lo ti hluk a. "Ka dam chhung hian lungngaihna min siamsak hnem ta lutuk. San Carlos khuaah ka fate zinga pakhat min khaihlumsak tawh a; Fronteras khuaah a Law-man pakhatin Jimmy-a min thahsak tawh bawk a.

"Tunah hian he samduma; Sudden-a an tih chu min do turin a rawn tir leh ta a ni. Ani lahin ka fapa chu, saw khaw rimchhe zetah sawn a tantir mek a; mahse, hetiang thil a tih tawh hnua tlàn chhuah leh theih a inbeisei a nih ngat chuan a tisual teh ang chu! Bleke-a chanchin ka hria, a chanchin mai bâkah a Sudden-a pawh ka hria alawm, chu chu ropui tak a ni. Hetiang taka ka chunga thil a tih avang hian thih châk rum rum khawpa hrehawm tuarin ka la siam dawn a ni," a ti ta zel a.

Chu Putar chuan in chung lam a hawi a, hmanlai mite'n van arsi an cho ang mai hian a lu chu a thing ta nawr nawr a. A fate chuan mak ti takin amah chu an lo thlir reng a, hetianga a awm hi tun hma pawhin an hmu fo tawh ṭhin, hetianga a awm reng reng hi chuan biak pawh biak ngâm a ni lo tawp tih pawh an hre chiang tâwk hle tawh a ni.

Mahse, nakin deuhah chuan a mitmengte chu a lo danglam leh ta deuhin a thinurna pawh a bengdai leh ta hret a, "Glenn-a hian Bleke-a'n he Sudden mihringa hi a chhawr a, a rawn tir a ni tih a va hmu chhuak ta a. He tlangval hi a Deputy niin buaina ching feltu a ni; Hell City thianfai turin a tir tawh a; Apache-ho lak aṭanga Davis-a fanu lakir tura tirh a nih angin a lakir leh bawk a; Lawless khuaah Marshal hna a thawk tawh bawk. Chûng zawng zawng chu Bleke-a tirhna vek a ni.

"Ka hriat dan chuan he Severn-a hi Bleke-a fa tluk a ni a; mahse, mi mak danglam tak a nih avangin chu chu tu ma hriat a duh lo; mahse, tunah hian ka lo hre ta! He khuaa keimah min zawng leh min do tura a fa chuam a rawn tirh avang hian inchhir tawp thei lo turin ka siam dawn a ni," a ti ta zel a. Glenn-a chuan, "A nih leh ka Pa, engtia chet nge i tum tâk?" a lo ti a.

Cullane-a chuan, "Ka tih dan tur maw? Khâwi maw laia Secretary tih angreng i tawmpui lai khan hlauva khûr khûr turah min ngai em ni? Ka tih tawh te chu tih tawhin a awm a; ka tih leh tur pawh a hun a lo thlen hunah i hre mai ang. Chumi hma chuan tu mah pawn chhuak lo turin ka duh che u a, San Jaime khuaah ngat phei chuan inlan reng reng suh ang che u; a bik takin Yancy, fimkhur hle ang che," a ti ta hmiah a.

Mahse, Yancy-a chuan, "Ka pa, San Jaime khuaah chuan keimahin engtik hunah pawh ka lut thei a, keimah mai hian Severn-a chu ka va hneh thei alawm; kan inhmuh hmasak kha chuan a vanneih vang mai mai a nih kha," a lo ti ṭalh a; mahse, a Pa chuan, "Mite hian vanneihna an dawng ṭhin a nih chuan nang tluka vannei hi an awm chuang lo vang. Tunah hian ka thu sawi hi ngun takin ngaithla rawh, ka tih dan tur ruahman felin a awm tawh.

"Tun aṭanga ni rei lo têah hian ka hriat duh te ka hre mai dawn a, chutah chuan kan chhuak nghâl ang. San Jaime khua saw kan lakir leh nghâl ang a, kan nuai chimit vek ang. In unaupa kan lâk chhuah hunah chuan an in zawng zawng kan hal darh vek ang a, Sudden-a an tih kàng bang chu Bleke-a hnenah keimah ngeiin ka hlan ang a; saw Bleke-a saw, rilru na leh thin na lutuka a puakkeh tur lai vel chu ka hmu dawn a ni," a han ti a; vawi leh khatah namen lo hian a nui ta huau huau a.

Chutianga a han awm ta thut chu a fate leh a hote zawng zawng chuan mak an ti êm êm a, a hmuh loh chuan a mal te tein kawngkhar lam an pan a; mak tia lu thing nawk nawk chung chuan an chhuak ta zeuh zeuh a; an chhuahsan ta phiar a.

***********************

Severn-a chu Jenny kawtlaiah chuan mei zu khu hlat hlat chungin Chair-ah chuan a ṭhu a, a hma lawka a lo sawi tawh chu a han sawi nawn leh a, "Badre, tun ang hian hun rei tak aṭang tawh khan chaw ka la ei puar ngai lo," a han ti a. Father Malcolm-a chu a nui sak a, "Jenny hian ar kha a lo kang tui em kher a nih kha," tih pah chuan a ṭhianpa, Poynton-a ṭhutna lam chu a'n mitsir zauh a, "I ṭhianpa pawh sawn tui a tih ve hmel kher mai," a han ti zui a.

Nipui laiah pawh khaw thian zàn tak mai niin zan arsite chu an eng hle a, inhnaih tak leh bichilh fe hian an eng noh noh a. Chutih lai chuan khaw chhung hmun ṭhenkhat lam aṭang chuan Guitar a rawn ri vang vang bawk a, Severn-a chuan a rilruah thil hriat chhuah thut a nei a, a chham chhuak ta mial mial a.

"A mitmengte chu khawvar lam arsi ang,
A biang lah Rose par mawi tak ang mai;
Annie kha hmeichhe hmelṭha tak a ni tih
Engkimtithei Pathianin min hriatpui,
Thli leh ruahte'n min tawrhpui,"

A thu sawi lai chu tawp hmak hian a bula Putar ṭhu pawh chu a hawisan hmak a. Father Malcolm-a chu a han ngawi deuh vang vang a; nakin deuhah chuan, "Ka nau, chu hmeichhia chu tu nge ni a?" tiin a rawn zawt ta a. Severn-a chuan a chhang nghâl mai lo, meizial a han ṭan kai hnu chuan zàwi sap hian, "A hming chu Noreen-i a ni a, ka nupui a ni," a ti ta a.

"A thi tawh em ni?"

"Thi tawh e," zawi sap hian Severn-a chuan a han ti a, "Kum khat dawn lai kal taah khan a thi; hmeichhe naupang kan beisei lai tak a ni a...," a han ti zui a.

"Zawh loh tur tur ka zawh che avangin pawi ka ti hle mai,"

"Pawi tih tur a ni hlei nem, thil lo thleng a ni ve mai,"

"Fa dangte i nei reng em?"

"Mipa naupang ka nei a, kum thum mi vel a ni,"

"Tu nge lo enkawl a?"

"Ka ṭhian ṭha ṭhenkhatte'n, a nu leh pate ni àwm tak an ni. Arizona ramah hmun ka nei a, i hmuh tawh zawng zawnga ram mawi ber ang a ni. Hnim a ṭhain tui a tam bawk si, a dam chhung hun hmanna atana itawm ngawih ngawih hi a ni,"

Puithiam chuan a lu a thing nar nar a, "Chutiang hmun nuam leh ṭha nei chung si chuan he laiah i lo kal a; Don, ka hre thiam lo kher mai," a han ti a. Severn-a chuan, "Lo kal hi a ṭul tlat alawm," a lo ti mai a.

Severn-a ṭawngka chhuak aṭang chuan, chu thu chu engti kawng mahin sawi zawm a duh lo a ni tih Father Malcolm-a chuan a hre thiam mai a. San Jaime khuaa a lo kalna chhan hi chhan ṭha tak dang a awm a ni ang tih a rin rûk chu a ring nghet zual ta sauh a.

He Puithiam hi mite chanchin hre tur hian a dam rei tâwk tawh. He Severn-a ang phei hi chuan tangka hi engah mah an ngaiin a ring lo. A ṭul an tihna hmunah chuan khawiah pawh hlawkna tel lovin an kal zel ṭhin niin a hria a, hmun nuam leh ṭha tak nei si; he lai, hlauhawm leh thihna hial thlen mai theihna hmuna a lo kal hian chhan ṭha tawk tak a awm a ni tih a ring ve mai bawk a; mahse, "Chu chanchin chu sawi dun duh hun te i la nei a nih chuan he lai hmunah hian hmuh theihin ka awm reng ang," a ti ta zawk a.

Severn-a chuan, "Ka lawm khawp mai; mahse, sawi nâwn leh hi ka duh hmèl lem loh. Sawi pawh sawi lang miah lo tur hi ka ni a; tuna ka thu sawi tâkte pawh kha hre lo angah inngai thei la ka duh zawk nghe nghe a ni," a han ti sap a.

Father Malcolm-a chuan, "Ka theihnghilh vek tawh e. Tunah chuan ka kal a hun ta; nang erawh chu la ṭhu khawmuang la, i meizialte kha zu zo law law rawh. Jennifer-i ka va mangṭha ta'nge; naktuk lamah ka hmu leh dawn che nia," a ti ta a.

Severn-a chuan thil awm dan a ngaihtuah vang vang a, tun hi San Jaime khuaa a awm aṭanga a hlim ber hun niin a hre ta a. Hun ṭha tak leh Jennifer-i chawhlui tui tak tak kilpuite chu dam chhan tlâk niin a hria a. Puithiamin a mangṭha thawm te chu a hre reng a, biak in lam pana a kal chhuah lai chuan Jennifer-i pawh chu a awmna lam pan chuan a lo kal a, Shawl nalh tak hi a rawn bât a, a duhawm kher mai.

A mikhual chu zu no a rawn hlan a, a hma lawka Puithiam ṭhutnaah chiah khan a rawn ṭhu a. Severn-a chuan a thil dawm hnìm vat vat chung hian, "Brandy a ni maw?" a lo ti a. Jenny chuan, "French Brandy a nih kha; ka mikhual duhsak bik tak tana ka dah ṭhat a ni," a ti a, a nui sak a.

Severn-a chuan, "A vanneihthlak kher mai a, ka Pi.. Oh! Sorry.. Jenny," tih pah chuan a han in a, "A tui ham ham hle mai. Ka dam chhung hun hian hetiang inna hun remchang hi ka tawng khat teh asin," a han ti zui a. Jenny chuan, "Don, pawi ka ti ngawt mai; in thu sawi kha ka lo hre reng asin," a han ti sap a.

Severn-a chuan, "Puithiam ka hrilh kha maw? Jenny, a pawi hlei nem; ka sawi duh ngai loh zawng a ni a; mahse, a pawi lo," a'n ti ngawt a. Jenny pawh chuan, "Ka hre thiam e," a lo ti sap a, an ngawi dun ta vang vang a. An ngawih vang vang lai chuan a rimtuina chu thliin a rawn chhem hiau hiau a, Severn-a chuan rimtui a tiin hnim vawng vawng a duh lek lek a ni.

An ngawih reng hnu chuan Jenny bawk chuan, "Don, eng vangin nge hetiang hi i tih?" a rawn ti leh ta a. Severn-a chuan, "Silai hmanga nun hi i tihna ni maw?" a lo ti thuai a. Jenny chuan, "Ni chiah lo ve; mahse, i ngaih dan dan le," a lo ti a. Severn-a chuan, "Chutiang bâka ngaih dan tur a awm chuang hlei nem. Jenny, Gun-fighter ka ni a, hemi ring hian ka nung a ni tih pawh i ring thei ang chu," a han ti a.

Jenny chuan, "Don, chutiang lam chu a ni lul lo, ka zawhna zâwk che chu Ranch ṭha tak leh mawi tak nei chung leh fapa duhawm tak nei chung si-a hetiang hmuna i lo kal hi a ni zâwk. I ṭhenawm khawvengte'n an zah mai che bâkah ṭhian ṭha tak tak i nei a; he laiah tu khaw hriat lohva artê thiha thih mai theihna hmuna i lo kal hi mak ka tiin àwm lo ka ti a ni zawk," a han tih chuan Severn-a chuan, "Chutiang chuan mi pakhat chuan min ti tawh reng asin Jenny," a lo ti mai a.

Jenny chuan, "I inveng nasa hle mai; mahse, hriat ka duh tlat a nia. Don, i neih ang zawng zawng chu nei ngat ila chuan chu hmun chu kei chuan ka kalsan hauh lo vang. I fapa chu tu nge a hming?" tiin a han zâwt a. Severn-a chuan, "James a ni, Jim kan ti bawk," a lo ti thuai a.

Jenny chuan, "A pi leh pute hming chawia sak a ni ang maw?" tiin a lo zawt leh a. Severn-a chuan, "Ni lo," a han ti phawt a, a nui sak a, "Mi pakhat, tun hmaa ka lo hriat tawh ṭhin hming chawia sak a ni," a han tih zawm leh a.

"A nih leh, chu pa chu mi ṭha tak a ni em ni, Don?"

"Chutiang mi chu ni ta awm chuan ka hria,"

Jenny chuan, "I fapa chu han hmuh ve ka va'n duh em!" a han ti leh a, "Naupang hi ka ngaina ṭhin ngawt asin; mahse, ka pasal hi hma takin a thi ta hlauh a. Kan pahnihin la naupang tak ve ve kan ni a, kan tun hnu nun tur pawh beiseinain a khat a. Eng emaw cháng phei hi chuan... oh.. ah.. mahse, ka thu sawi átthlak tak chuan a tihah mai mai ang che. Khawngaihin min ngaidam hram teh," a ti ta zawk a.

Mahse, Severn-a chuan, "Min tihah lul lo ve, i duh ang ang chu sawi zel teh. Eng ber chuan maw i rilru tihah a?" a lo ti thuai a. Ban deuh tak hian Jenny chuan, "Chu chu.. a bul ṭan nan chuan chhungkaw din ve hi ka duhin chhungkaw neih ve hi ka duh a ni ber mai. Khawi maw laiah neitu chan chang vein min neitu tu emaw hi awm se ka duh a ni," a ti ta a.

Severn-a chuan, "Jenny, nang ang nupuia nei duhtu tur chu mihring tam tak an awm ang chu. Nang neih che chu a ropuiin a inchhuan thlâk ngawt dawn lawm ni? A nih leh, engtiziaa pasal hi la nei leh lo nge i nih reng reng?" tiin a zawt let ve ta a. Jenny chuan, "Tum dan ka nei a; mahse, ka mi rin tâwk, kei min enkawltu tur hi ka la tawng ngai lo va, tunah chauh hian ka tawng ta a ni," a han ti a.

Severn-a chuan, "Jenny," a ti hman chauh va; Jenny chu a tho thuai a, a kut zungchal chuan a hmui chu a rawn khawihsak a, ṭawng lo turin a ti ta tlat a. Nem thlap hian, "Don, khawngaihin min ngaidam rawh. Chutiang thu chu sawi hauh lo tur ka ni a; mahse, ka zu in vang te pawh hian ka phuh chhuak ta mai mai ni ang chu," a ti ta tlat a.

Severn-a chuan, "A ni maithei e," a ti a, meizial a ṭan kai ta zawk a. Nakin deuhah chuan, "Chutiang thu chu ka hnenah chuan sawi duh suh. Ka kawng zawh hi mi dangte tel ve-na chi a ni lo, keima chanpual liau liau a ni e," a ti ta a.

Jenny chuan, "A nih leh Don, mi dang tu mah i hrilh duh hauh loh i chanchin hi eng nge ni reng reng chu le?" tiin beiseina tam tak nen a'n melh a, "A bik takin ka hnenah hian eng mah zep tur i nei dawn em ni?" a han ti leh a.

Severn-a chu a ṭhutna aṭang chuan a tho va, pal hungna chu a va vuan a, a kut tlemin a khur deuh tlat a ni tih a han hriat chhuah chuan mak a ti hle a, "Jenny, hna pawimawh tak thawh tur ka nei a ni; chu zawng chu i hriat atan a tawk ang," a ti ta hmak a.

A ṭawngkam hriat ep tawk chiah hian Jenny chuan, "A nih leh, i hna chu i thawh zawh hunah chuan engtin nge ni ta zel ang?" tiin a han zawt a, a thaw rang sawt hle a. Severn-a chuan, "He hmun aṭang hian ka kal sawn leh mai ang," a lo ti leh hmiah a; a ṭawngkam chhuak aṭang chuan eng mah hriat theih tur a awm lo.

Khawngaih thla la tak hian Jenny chuan, "Oh! Don, mipa-ho hi chutiang khawp chuan in lo â a nih hi. He khaw harsatnaa i rawn inrawlh hi i tan ṭangkaina reng a awm lo. Kum sawm chhunga mite'n an tih aia tam San Jaime khaw tan hian i thawk tawh.

"Cullane-a leh a hote hi thil an titheiin an chak lutuk a, nangmah mai chuan engti kawng mahin i do thei lo vang. Kan pahnih hian kan tlan bo thei mai alawm, Arizona-ah chuan kan kir leh ang a, hun rei lo tê chhungin he lai chanchin hi theihnghilh vek turin ka siam thei ang che," a ti ta a.

Severn-a a han inher meuh chuan Jenny chuan a rawn pawm fel der tawh a, a hmui lum sa hiam chuan a áwmah a rawn chuktuah a, a maimitchhing tlat a, zawi sap hian, "Saw laiah sawn," tih pahin a kài ta a.

"Eng mah sawi suh," tih pah chuan a hmui chu a han khawihsak leh a, "Eng mah sawi lo la, hun ṭha hi khawhral lul suh; ka thu sawi chiah hi ngaihtuah la, kan pahniha chanchin chiah hi ngaihtuah rawh," a ti a, a hmui leh heh sen no hiam leh a biang no tak te, a sam nem fai tak te chuan a áwmah a nùl thuak thuak a, a chalah te a han fawp vel ṭhin a; mahse, thawm nei hauh lo hian a in chhung lamah chuan a tlan lut ta daih a.

Che map lo hian Severn-a chu minute hnih dawn lai chu a ding a; a meizial thi tawh chu a han paih a, a dang zial leh tur chuan a ipte a dap ta nauh nauh a; muangchanga a zial zawh chuan a ṭankai a, a han hip vang vang a, chu chuan a ngaihtuahna te chu a tithiang ta deuh a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 24th, 2018, 8:22 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 10

Yancy Cullane-a chuan zu in a ṭan leh ta a. He tlangval hi a zu rui a hlauhawm hle a, tu ma han dan chi a ni meuh lo. A rui tawh hle nain whisky bur chu a han hawng leh a, a intulh mial mial a, a thil tih reng reng tih sawk sawk duh mi a niin nghah neih hi a tih theih loh ber chi a ni.

Severn-a nihna dik tak hriat chhuah a nih tâkah chuan Yancy Cullane-a chu a tuar thei lo pawlte zinga mi a ni a. San Jaime khuaah hnehin a awm tawh a, chu chu a hming lo chher ve-na khua a ni. San Jaime khuaa mite chuan Yancy-a chu phawi rang bera an sawi ni lo mah se a rang berte zinga mi niin an ngai a ni.

Chutiang mi a nih avang chuan San Jaime khuaa kal a, Sudden-a an tih chu eng ang chiaha phawi rang nge a nih fiah a duh tlat a; mahse, chutiang ang rilru a put laiin vawi khat pawh a hming lam ri lo tura tih a nih bakah khawi mah pana kal chhuak lo tura tih a ni.

"Hrep hlawm tak hian aw," tih pah chuan a zu inna um ruak chuan Bunkhouse bang chu a han vawm ṭhuai a. Saidawium keh tla ri chuan kil khata cowboy pathum lehkhadeng lai chu a tiphawklek hle a; mahse, tu mah chuan hria ang pawha lan an tum thung lo. Hetiang taka Yancy Cullane-a rui hi an lo hmu tawh ṭhin a; hetiang rilru chhia a put laia lo va chim buaitu nih chu tu mah chuan an duh hauh lo a ni.

Whisky bur dang hawng leh chung chuan, "Chu khuaah chuan Marco-a chu tan inah khungin a awm a, San Jaime khaw rimchhe tak boruak chu a hip mek a ni," a han ti a, zu chu a in tulh khawlh khawlh a, "Eng mah ti suh, a la hun lo' te a'n ti khanglang lehnghal," tih pah chuan kawngkhar lam chu a han hawi a, "Kan kel tarpa saw!" a'n ti leh ngawt a.

Bunkhouse chhunga mi pathum awmte chu rilru inpawh takin an inmelh ralh ralh hlawm a. Chutiang taka Yancy-a a ruih tawh chuan buainain a zui ziah thin a; chutiang hunah chuan hmun remchanga inthiarfihlim a finthlak ber ṭhin. Zawi muangin bengchheng siam hauh lovin an che ṭalh ṭalh a; nakin deuhah chuan pawnah an chhuak fai ta vek a.

Pakhat chuan, "A kal thui lutuk leh ta deuh a ni," a han ti a. Pakhat leh chuan, "A kal thui lutuk hrat ziah a ni," a lo ti bawk a. Ṭawng chhuak hmasa zawka khan, "A nih leh Putara kan hrilh duh ang em?" a han ti leh a; mahse, a ṭhiante chuan, "Ṭulna hranpa a awm lovah i ngai mai ang. Bunkhouse pakhat zawkah sawn hlim taka inkhelh dan ngaihtuah mai zawk tur a ni," an tihsan ta a.

Chu tlangval sam sen ther thawr chuan ama tuina ngawt a ngaihtuah avang chuan cowboy pathumte'n an ṭinsan lai chu a hre lo reng reng a. A zu um hnihna pawh a chanve leh der tawh a, nakin lawkah phei chuan a tlak ruai ta mai a. Zu a in mawlh mawlh lai chuan ngaihtuahna tharlam leh ṭha nia a hriat chu a hmu chhuak ta hlawl mai.

San Jaime khuaa a kal chu khap tlat ni mah se a ruka a va kal a, Marco-a leh mi dangte a va chhan chhuah theih hlauh chuan a pa chuan a hauh teh chiam a ring ta lo va. Tin, he khuaah hian hmanraw famkim nena va thawh hlawm ai chuan amah mai hian thil a tih theih zawk mah mah a inring a, a thil tih tur chu a tana ṭha tur lam hlirin a suangtuah chho ta zel a.

Amah leh amah chu a inbe mawlh mawlh a, "Yancy, my boy, i ngaihtuahna chu a ṭha khawp mai," tih pah chuan a tho va, a pistol chu a phawrh a, a endik ta malh malh a, "Ka tih dan ṭhin pangngai ang bawkin Injun-ho chet danin ka che ang a, tu ma min hriat hmain chhuak leh zal zal mai teh ang," a han ti leh nuah nuah a.

Rui tak chung chuan sakawr dahnaah a kal a, a saddle chu a bel ta chawt chawt a. A chung pawha chuang lo chuan a kai chhuak a, minute sawm hnuah chuan tu ma luh theih lohna tura vengtu awmna chu a thleng ta hlawl a. Guard chuan, "Kha, nang kha Yancy-a i ni maw?" a lo ti thuai a.

Yancy-a chuan, "Ni chiah e, San Jaime lam panin nawmchen ka rilrûk deuh a ni. Chu khuaah chuan Mexican nula tê reuh tê, hmelṭha tak ka nei a," tih pah chuan a'n nui hak hak a; Guard, a bûm pa pawh chu za angreng tak hian a nui ve a, "A nih tak chu, vannei takin kal rawh. He, in tawmkûk hi zankhuaa ka ven a ngai tlat a, ka rawn zui ve lo mai ang che," a ti ta a.

Yancy-a chuan, "Hank, ngun takin lo ngaithla teh, min hmuh thu hi tu mah hrilh suh; Putara'n a zawt che a nih loh chuan i sawi reng reng tur a ni lo," a han ti leh a, an inṭhen ta nghal a. Guard hmuh phâk lohva a tlan veleh San Jaime khaw lam pan chuan chak fein a sakawr chu a tlantir ta nghal par par a.

A thlen dawn hnaih chuan a rilṭamzia a hre chhuak a, chaw tlem tal a lo ei lo kha a inchhir lek lek a; mahse, a hlawhtlin hnua in lama mite'n an lo lawm dan tur a han ngaihtuah chuan a rilṭamna pawh chu a theihnghilh zo leh ta.

San Jaime khua a thleng ṭep tih chuan sakawr aṭangin a chhuk a, kea kalin sakawr chu a kai a, San Jaime khua chu tu ma hmuh lohvin a lut ta a. Biak in chhak lam a panna lamah chuan mi tlem tê a tâwk a; mahse, tu nge a nih an hriat theih loh nan a lukhum chu a kuai kun vak a; thim zingah leh chutiang hunah chuan mite'n tu nge a nih an lo chik vak bik lo a ni.

In pakhat, thim deuh rek rawk a va thlen chuan awmze nei takin kawngkhar chu vawi hnih a han kik a, vawi khat a han kik leh hnu chuan kawngkhar chu a chhunga mi chuan a rawn hawng ta a. Rang takin Yancy-a chu a lut nghal rawk rawk a, kawngka chu a inkhar leh ta nghal a.

"Hetah hian eng nge i rawn tih?"

Chu zawhna chu vauna aw leh nelawm lo tak a ni. "I rilru a buaiin i â zo ta em ni?" a'n ti leh nghal a. Yancy-a chuan, "Teuh nang, ka â awzawng lo," a lo ti a.

"Hetah hian i lo kal a ni tih Putara'n a hria em?"

"Hre lo; mahse, a hre thuai tho ang,"

"Eng nge hetah hian i rawn tih dawn tiin ka zawt che a nih chu,"

Chu zawhna zawttu awka chhuakah chuan thinrimna a tel tih Yancy-a rui tak pawh hian a hai hauh lo.

Thinur tak bawk hian Yancy-a chuan, "Kan Putara tih tur ti turin hetah hian ka lo kal a nih hi. Marco-a, Jail aṭanga la chhuak turin ka lo kal a ni. Kan tawmkûka eng mah ti lova tawm tlawk tlawk ringawt chu ka peih lo a ni. Kan Putara saw a tar tawhin a rilru te pawh a nem zo tawh a, ka...," a tih lai chuan a bula mi chuan, "Â leh lutuk! Rui chung leh rilru mumal pawh pu lo hian maw? Mi â pa!" a lo tih khum leh ta a.

Chu ṭawngkam chhe tak chuan Yancy-a chu a tithinur nasa ta mai a, thu sawitu chu thinrim tak hian a hmachhawn ta ha a. "Chutiang te zawngin ka hmaah hian thu sawi hauh suh!" a ti ta nghut a.

"Ka duh ang angin ka ṭawng ang chu. He khua hi ka kutah dah a ni a, ka thil hriat ka rawn hrilh chungchangah leh he laia ka thil tih danah Putara pawhin eng mah sawisel a la nei lo. I át thil tih avang hian chûng ka thil lo tih tawhte leh ka remruatna chu tihchhiattir ka tum hauh lo,"

"He khuaa enthlatu i nih avang hian pathianah i insiam ta tihna a ni miah lo. He Sudden-a chungchangah eng mah tih theih i nei lo ang bawk hian tih tum dan pawh i neih hrep loh hi!"

"Hun remchang chhe tê pawh a la awm lo a nih hi; mahse, rem ka ruat fel vek tawh a, a hun a lo thlen hunah chuan Mister Sudden-a hian a la hre mai dawn alawm,"

Chu mi thu sawi dana thutak leh thinrimna inzep tlat chuan Yancy-a rilru pawh a titim nasa ta mai a. Mak a ti hle a, "Eng vangin nge?" a'n ti ngawt a. Chu mi chuan, "Severn-a inti, Sudden-a pawh ni rawh se, he Severn-a chungah hian phuba lak tur ka nei; mahse, Sudden-a hian ka phuba lâkna tur chhan chu a hre hauh lo vang; amah hi chuan phuba ka lakna turah hian kawng peng pakhat chauh a awh a ni.

"Khawi maw laiah hian Severn-a hi fa ang tluka hmangaihtu a awm a. Chu mihring chu a ni ka huat em ema chu. He Severn-a hi chutiang hmanruaa a hman ṭhin leh engkim chawk buai zo vektu chu a ni. He Severn-a hi kan thah emaw kan man hunah chuan keimah ngei hian chu chanchin chu chu pa hnenah chuan ka hrilh ang a, ka man chhan leh kan thah chhan chu ka hrilh vek ngei dawn a ni," a ti ta zel a.

Yancy-a chuan, "A nih leh, chu pa i tih chu tu nge ni?" a lo ti thuai a. Zawi sap hian chu mi chuan, "A hming chu Bleke-a a ni," a rawn ti a. "Bleke of Arizona-in he Severn-a hi hetah hian a rawn tir a maw?" tiin Yancy-a chuan a han zawt leh a.

Chu mi chuan, "Ni chiah e; mahse, a pawi lo. Yancy, ka thu ngun takin ngaithla rawh, Severn-a do zawng hian eng mah ti suh. Marco-a pawh ṭha taka enkawl a ni, a hun a thlen hunah chet dan tur a awm mai ang. Severn-a chu chinfelin a awm dawn, eng anga thi tur nge a nih ka ngaihtuah lo va; a thih chuan ka duh tawk em em," tiin a lo chhang hmiah a.

"Chuti a nih chuan ka va chingfel nghal mai anga a ni mai alawm. Tunah hian Jail lam ka pan nghal ang a. Tin...," Yancy-a'n a tih lai chuan a kareh hup thak hian na fe hian a rawn beng ta a, a piah bang chu a deng lawp a, a lu chu a hai hneh map map ngei mai.

Chu mi chuan, "Rilru nei lo pa! Ka thu sawi kha i hre lo em ni? Heta ṭang hian chhuak vat la, i hmelchhe rui hmel kha he in aṭang leh he khua atang hian tlan bopui rang vat rawh. He khuaa mihring pakhat pawh hian an hmuh che emaw hmuh tura i inlan vaih chuan keimah ngei hian ka that dawn che a ni. Tunah hian chhuak nghâl vat rawh," a lo ti leh ta hmiah a

Yancy Cullane-a chu thinrim em em leh thinrim vanga khua pawh hmu lo, mihring thah chakna ringawt rilru pu chung chuan a chhuak ta a. Khua pawh hmu mang lo chungin kawtthlerah chuan a kal zel a, a cháng chuan a silai phawi mai tum ni awm tak tein a'n awm a; a cháng leh a ban a vai ang dawrh dawrh a.

Thinrim lutuk, ṭap ṭeuh chung hian khaw chhung veng chhak lam pang in chu a hel that that a, chutih lai chuan mi pakhat nen an insu ta chawrh a. A mi suta chuan a dar vei lam a dawm vawng vawng a, a tlu tawp bawk a, a hmel en reng reng chuan chu pa chuan na a tuar ni tih a hmuh theih mai a.

Yancy Cullane-a thung chu a hnungtawlh dawrh a, a mi sutthluka a han en chuan mak ti takin a meng phâwk a, a thil hmuh chu a ringhlel ni awm tak a ni; mahse, Pathianin a ṭawngṭaina a chhang ta a ni mai thei thung. "Severn, Severn," a ti ta tuar tuar mai a.

Severn-a ve thung chu a rin loh lai taka sut chawrh a nih vang khan a let tawp a, a dàr vei lam chu a hik hian a hik mup mai a. Chutia a hming lam rik ṭhawt ṭhawt a'n hriat veleh chuan amah kotu lam chu a han hawi vat a, Yancy Cullane-a sam sen ther thawr chu a hmu ta vat a; chumi rual rual chuan Yancy-a'n a pistol a phawi zawk chu a hmu nghal bawk a.

A theih anga rang chuan a pistol chu a kut ding lamin a'n chuh ve vat a; mahse, vanduaithlak tak leh mak tak maiin a páiah chuan a lo awm tawh reng reng lo; a tlûk khan a pistol chu a lo tla thla daih tawh lo niin!

Yancy-a chuan a silai chu a rawn hmet pûak ta thawr a, a lu bul vaivut chu a leng ṭhawt a. Severn-a chu a let tawp tawp a, a kut vei lamin a pistol chu lâkna hun remchang a melh vat a. Chutih lai chuan Yancy-a chuan a silai a rawn hmet puak leh a; mahse, a tlûkna bul bang chu a rawn deng thawr a, hlum leh bawlhhlawh a rawn tla nghâl ta chum chum a.

Severn-a chu a lum theihna tawp a'n thlen chuan a han chawi chho va; mitmeng sen rem rum, mi thah châknaa khat hian Yancy-a chuan a lo melh reng tawh a, zâwn êm êm hian a pistol chuan a lo tin reng tawh a.

Silai a puak thawr a; silaimu erawhin a taksa a thleng ta lo; Yancy-a hmeh puah niin a hre thei ta lo va; mak ti êm êm leh awih lo êm êm ang maia Yancy-a meng phâwk vel chu a hmu ta a, a pistol ken lai pawh chu a kut aṭangin a tla nghâl a, a kut zungṭangte chu a phar kâk ta ṭha ṭha a.

Yancy-a a tlûk hnu chuan silai lo rikna lam chu Severn-a chuan a han en chiang a, Jenny Winn-i, derringer pistol kenga lo ding reng chu a hmu ta a. Severn-a chu a tho thuai a, Yancy-a bula silai chu a han chhir leng lawp a; mahse, chu chu a lo ṭul hran tawh lem lo, Yancy-a chu a lo thi fel der tawh a ni.

Rang takin Jenny-i lam chu a pan a, Jenny chu mut kawr hain a lo inthuam tawh a, a thawmhnaw inbel pan tak hnuaia a taksa te chu a khur zawih zawih a, "Jenny, engtizia a...?" a tih lai chuan Jenny chuan, "Silai puak ri kha ka hria a, ka lo tlan chhuak tawp mai a ni. A that hman ṭhelh che a nih kha!" thinrim leh hlauh vanga khur zawih zawih chung chuan a lo ti a.

A mitmeng te pawh a mawi theih ṭhin nen; tunah hi chuan a mawi hranpa lo hle a ni. "Don, Don, a that teuh ngei mai che," a han tih zawm leh a, a ṭap chhuak ta hial a. Mi dangte pawh an rawn pung khawm ta a, an bula hmeichhe ding ve hnenah chuan Jenny chu buaipui turin a hrilh ta a.

Hmanhmawh fein Ricky Main-a leh Poynton-ate pawh an rawn thleng ve chiah a, "Don, i ṭha maw?" Poynton-a chuan a rawn ti thuai a. Severn-a chuan, "Ka la dam zawng a nia lawm; mahse, mitthi-ah ka chang hman teuh kher mai!" a lo ti a, a ṭhen sak a.

Poynton-a chu mitthi bulah chuan a'n ṭhingṭhi rap a, mak ti em em ang mai hian a rawn dák chhuak a, "A va mak ngai em! Yancy Cullane-a hian khuaah hian eng nge a rawn tih reng reng a, engtin nge tu ma hmuh lohva hetah hian a awm theih chu le?" a rawn ti chhuak ta a.

Severn-a chuan, "Zawhna ṭha tak ve ve a nih chu; mahse, chhan mai theih a ni rih lo vang. I zawhna pahnih chhanna angreng atan chuan hei hi ka han hrilh ang che; tun aṭang chuan eng lai pawhin khua hi kan khuahkhirh ngun lehzual tawh ang; tu mah kan hriatpuina leh kan phalna lo chuan chhun zan zawmin an chhuakin an lut hauh tawh lo vang," a ti ta a.

Jenny Winn-i ṭha taka a inah hruai thlen a ni tih a va hmuh hnu leh a nunna a chhanhimsak avanga lawmthu te a va sawi hnu chuan Marshal pawh chuan Jail lam a pan ve ta nghâl a. A ṭhiante pahnih chuan ngun takin an lo en a, eng mah sawi lovin an ṭhu hlawm a; mahse, Poynton-a bawk chuan, "Don, thil sawi tur ngah lutuk i an hle chu le?" tiin a zawt ta a, "Min hrilh te pawh i duh mai lawm ni?" a han ti leh a.

Severn-a chuan, "Sawi chhuah mai dan pawh ka la thiam lo. Yancy Cullane-a, amah chauhva khuaa a lo luh ngawt dan hi eng nge a chhan? Awmze mumal reng reng a nei lo," a han ti a. Poynton-a chuan, "Khumfa ang leka â a nih kha! He khuaa a awm hi a pa ngei, Old Cullane-a pawhin a hre hauh lo vang," a lo ti a.

Severn-a chuan, "A dik mai thei; mahse, min su tur ringawt chuan khaw chhungah hian rei tak chu a awm a rinawm chiah lo; khawi maw lai inah hian a tawm a nih hmel hle," a han ti leh a. Main-a chuan, "Tu emaw a tlawh i tihna em ni a?" a lo ti a. Severn-a chu a bu nghat a, "Chu aia àwm thil dang i sawi theih si loh chuan ka sawi kha a dik duh hmel viau a ni," a lo ti leh mai a.

Poynton-a chuan fiak deuh ṭhak hian, "Don, San Jaime khuaah hian Cullane-a'n enthlatu a nei i ti elo?" a rawn ti a; a aw chhuak aṭang chuan a awih loh hmel hle a. "A dik thei lo vang. He khaw chhungah hian mihring sawmnga (50) lo liam an awm lo va; mi zawng zawng, a hmei a pain saw Putara saw an haw vek bawk si," a han ti zui a.

Severn-a chuan, "Ka hria e, ka hria e; mahse, kha leh chen kha eng nge a tih ang a, khawiah nge a awm teh lul ang?" tih pah chuan in chhungah chuan a vei tawn sek a. "Ray, keini ai chuan khaw chhung chanchin leh a mi chengte pawh i hre chiang zawk a, he khaw veng chung lama in tin hi han ngaihtuah la, min han hrilh teh le," a ti ta a.

Poynton-a chuan dar chhin âk chung hian, "Don, chu chu thil harsa a ni hlei nem. In sawm emaw, in kua emaw lek an ni alawm. A nih leh, chhim tawp aṭangin ṭan ta ila, Pete Yope-a, sakawr dahna in neitupa a ni a; a dawtah Shearer-a, Mayor a awm a; a dawt lehah chuan Mexican chhungkua an awm leh a. Chumi dawt chiahah chuan kawmkar kawng a awm a; chumi hrul chiahah chuan Martin Chaves-a a awm a, fapa pariat a neih bâkah a nupui lah chu thau fahran mai a ni a, i hriat ka ring a.

"Chuan, an ṭhenawm chiah chu Father Malcolm-a in a ni leh mai a; ngawi teh, kan ngaihtuah leh deuh teh ang... Aw ni.. a dawt chiahah chuan kawng angreng deuh; kawtthler kan ti zawk ang.. chu a awm leh a; a dawt lehah chuan in nga (5) a intlar leh a ni mai a. Chûngte chu Jose Montana in te, Emiliano-a in te leh Miss Winn-i in te, Diego Puerto-a in te a ni leh a; a tawp ber in saw chu Carlos Montay-a in a ni. Chûng zawng chu a ni mai," a ti ta a.

"Ka lawm e," Severn-a chuan a lo ti sap a. Mak ti àwm fe hian Main-a chu a lo meng ráng vel a, dàr chhin ak chung hian, "Ray, han en teh, kan ṭhiana hian chhiarpui a bei ta a ni lo maw?" a lo ti a.

Poynton-a pawh chuan, "Don, eng nge i han suangtuah kual leh tâk a?" a lo ti ve a. Severn-a chuan, "Thil ka'n suangtuah kual vel mai mai a nia. Ka thil han suangtuah kual lah chu ka duh zawng tak a ni thei mang lo bawk," a lo ti ve mai a.

Main-a chuan, "Doctor pakhat hnena mi pakhat kal thu min hriat chhuahtir zawk mai. Chu pa hnenah chuan Doctor chuan, 'Eng nge min panna chhan chu?' tiin a lo zawt a. Chu pa chuan, 'Doc, a ṭha lo khawp mai, ka kut hi ka lu chunga ka lek chhoh apiangin ka zak hi a na ziah mai,' a ti a; Doctor erawh chuan, 'Chutiang te chu tihdam sam ber pawl a nia lawm; I kut chu i lu chungah lek chho tawh miah suh,' a lo ti hmiah mai zuk nia!" a lo ti a.

Severn-a chuan a ṭhianpa fiamthu chu hre lo lui tlat chung chuan ban bul, thing khumah chuan a ṭhu a, "Kan ngaih dan te chu i han sawi tláng teh ang u, ka thu sawiah khan in ngaih dan ni lo te a awm em?" a han ti leh a.

Poynton-a chuan, "I ngaih dan chu han sawi tlang la? Tun ang hunah hi chuan fiamthu thawh pawh a hun tawh lo," tih pah chuan Main-a chu a'n melh zauh a. "Thu dang deuh ngaihthlak tur pawh phuh chhuak ve chai la maw le," a han ti zui a. Severn-a chuan, "San Jaime khuaah hian Old Cullane-a hian enthlatu lo nei ta ang sela," a han ti leh a.

Main-a chuan, "Chutiang chu lo ni ta ang se, engtin nge ni ta zel ang?" a lo ti thuai a. "Khaw chhunga thil thleng zawng zawng hi engkim a hre vek zel tihna a ni mai ang chu," Severn-a'n a han tih chuan Poynton-a chuan, "A la dik zel," a lo ti hmak a. "Engkim hi kan hriat ang tluk zetin a hre zel tihnaah ngaih a dik ang," a han ti zui a.

Severn-a chuan, "Kan ṭhiante kan ven dan zawng zawng leh kan inthlak kual dan chen hian a hre vek zel a. Kan zavaia kan awm hun te, pakhat chauh emaw, pahnih emaw kan awm lai chen hian a hre ta zel tihna a ni," a ti leh a. Poynton-a chuan, "Don, i thu sawi chu ka ṭawm hmak e; mahse, he lai hmun hi mi pahnih chu sawi loh pakhat pawhin hneh takin kan veng thei a ni lawm ni?" a lo ti vat a.

Severn-a chuan, "A dik e. Tichuan, he laia kan enthlatu neih hian a tir aṭanga thil thleng leh engkim hi a hre vek zel a. Hmun tinah kalin ṭawng chaltlai deuh te pawh a hre zel a, Cullane-a hote chawh buai kan tum dan zawng zawng hi a hriat mai bakah a pu hnenah chuan engkim felfai takin a thlen zel ṭhin tihna ni," a ti ve ta a.

Poynton-a chuan, "Don, he khua hi i lo thlen hma zawng khan a duh ang anga a lo hman ṭhin leh a lo cheibawl ṭhin a ni alawm. Dik tak chuan he laiah mi tu mah hi Cullane-a hian a mamawh tak tak hauh lo a ni," a ti a.

Severn-a chuan, "Mamawh lutuk lo reng e; mahse, he laiah hian mi tu emaw chu a awm ve reng a, chu chuan awmzia chu a nei tlat thung si alawm. Cullane-a hi a tawmkûkah a tawm mai a; chuta awm chung si chuan he lai chanchin hi engkim a hre thung si. Hetiang tak hian kan tibuai tawh a; mahse, tun thlengin keimah min man tur emaw min that turin emawin a lo la thawk chhuak tlat lo. Hei hi eng vang ber nge ni ta ang?" a han ti leh a.

Main-a chuan Poynton-a chu a han melh zauh a, Poynton-a pawh chuan a lo en reng a. Main-a chuan, "Ka hre ta hauh lo mai," a ti ta ngawt a. Poynton-a erawh chuan, "Don, rinthu mai maiah i buai rei lutuk a, i thu sawi tum tak chu sawi thuai teh," a lo ti thung a.

Severn-a chuan khum bul ban nghen pah chuan, "A ni tak Ray, ka sawi duh tak chu Cullane-a'n he khua a rawn beih hunah hian engtin nge kan lo ṭan ve ang tih hi a ni," a ti ta a.

Poynton-a chuan, "Kimchang chuan kan la zam fel lo reng alawm; mahse, a tlangpui chuan kan...," a han ti zet a; Severn-a thu sawi khan a ngaih dan a thlaktir leh ta deuh a, "Eng vanga hetia nghâk vung vung mai nge a nih i ti a ni maw kha?" a ti ta zawk a.

Severn-a chuan, "Ni chiah e, a tir aṭang khan," a lo ti thuai a, a nui sak a. Main-a pawh chuan, "He laiah engtiang chiahin nge thil a kal tih a hriat hma chuan a nghâk vung vung mai i tihna a ni maw?" a lo ti ve ta a.

Severn-a chuan, "Ni chiah e. Khawi hmunah chiah nge beih tur tih te, eng hunah nge beih tur tih te, engtianga nasaa beih tur nge tih te leh khawi lai nge kan ven ngun ber tih te a hriat vek phawt hun a nghâk a ni. Tunah hian Old Billy-a dinhmunah indintirin amahah inchan ta u la, hetia a awm dan ang chiah hian in inkhung tlat lawng maw?" a ti ta a.

Poynton-a chu Severn-a thu sawi dik ti tak leh a chhanna mumal hre chuang bawk si lo chuan a rawn ṭawng chhuak a. Main-a chuan, "Yancy Cullane-a'n San Jaime khuaa buaina a rawn tawh chhan eng mah i la sawi chhuak reng reng lo. Chumi tal chu Finga, min chhang la maw le," a lo ti ve thung a.

Severn-a pawh chuan lu thin pah chuan, "Rick, kha khan ka ngaihtuahna a tibuai reng asin; eng pawh ni se, kha khan awmzia eng mah a nei reng reng lo," a lo ti mai a. Poynton-a chuan, "Thil ho mai mai vang ringawt chuan a lo kal hauh lo vang. I lu-a silaimu thun theih inringa lo kal a ni mai alawm," a lo ti a.

Severn-a pawh chuan, "A rinawm chiah loh nain a dik ve mai thei bawk," a lo ti a. "Hun rei lo teah kan hre fiah vek mai dawn alawm," an ti leh ngawt a. Main-a chuan, "A nih leh, a rem lohna a awm loh chuan i thuruk pawh chu min han hrilh ve la," a la ti ta ṭalh a.

Severn-a chuan, "San Jaime khua hi an rawn beih tak thuta lo inven dan tur tlem azawng lo ruahman ila a ṭha ang," a ti a, a han nui sak a. "Chu kan thuruk chu he khuaa mi zawng zawng hriatah kan puang chhuak bawk tur a ni. Ray, nangin Shearer-a va hmu la, naktuk zingah Diego-a hotel-ah mi zawng zawng lo kal khawm tura hrilh turin thu va chah rawh.

"Rick, Turnbull-a leh a hote hmu turin va kal la ka duh bawk; anniho kha chu thu hrilh tur bik ka nei a ni," a ti ta a, thu a sawi zawh chuan Jail chu a chhuahsan hmiah a, a ṭhiante pahnih chu an inmelh ta ralh ralh a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 25th, 2018, 8:21 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 11

Severn-a leh a ṭhiante pahnihin Diego-a Hotel an luh chuan mi an lo tam tawh hlein a chhung chu a lo khu nasa mai a. An luh veleh chuan mite karah kalin Bar lam chu an pan nghâl a. Severn-a chuan a kal pah chuan mite chu a en ngun hle a, an kim thawkhat hlein, hmeichhia, pasal nei tawhte pawh an kim hle tih a hmu a.

Kil khata Jenny Winn-i lo ding pawh chu a hmu thuai a, a hma zana thil thleng avang khan eng mah danglamna a nei leh tawh lo va, a hmel pawh a pangngai diak a ni leh ta. Chibai buk nan tiin a kut a rawn phar chhuak a, Severn-a pawh chuan a pan nghâl chat a, "Jenny, he laia i awm ve hi a ṭul hran hlei nem," a va ti a.

Nem leh ngaihnobei tak hian Jenny chuan, "Oh, Don, he lai thil awm dan hi ka chàn phal i ring bik em ni? He laia mi zawng zawng hian eng nge i sawi dawn tih hriat châkin an phi ruai a. Hun rei tak chhung, nang phei chuan i hriat phâk loh a ni hial ang, mi tu emaw tal, chutiang mite do dan tur min hrilh theitu hi kan lo nghâk tawh ṭhin a, chutiang mi chu tunah hian mite'n hmuh kan châkin, a thu sawi chu ngaihthlak kan inchuh a nih ngawt hi," a lo ti a.

Severn-a chuan, "A nih, chutiang a nih chuan Bar lamah sawn i phei ang hmiang, i duh chuan i awm ve thei reng alawm," tiin a sawm ta a. Rei lo te chhung Jenny mitmeng chu a rawn danglam zawk a, thinrim a ang hle a, "Kha kan uicho tenawm lutuk khan chet ve-na hun pawh pe miah lo chein a that duh che a nih kha," a han ti leh a.

Severn-a chuan, "Khami avang khan alawm Jenny, i hnenah lawm thu ka hrilh leh che ni. Nang kha lo inrawlh lo ngat la chuan tun ang hian hmel hlim ka pu thei tawh kher lo vang," a han ti ve a. Thinrim lek lek, nui lek lek chung hian Jenny chuan, "Oh, Don, khatiang thil kha nuihza siam nan i la hmang fo thei dawn a nia maw? Kha mihring khan thah che a tum a nih kha," a han ti leh hram a.

Mahse, Severn-a chuan, "A ni khawp mai; mahse, min that ta chuang hlei nem. Tun aṭang chuan i theihnghilh tawh ang khai, kan tih tur lamah rilru i pe tawh zawk ang," a ti ta a. Bar lam, Shearer-a'n ngawi tura a lo tih nana dawhkan a lo khawn rikna hmun lam chu an pan dun ta a.

Shearer-a chuan, "Ngawi tawh rawh u," a han ti phawt a, ring deuh zawk hian, "Tunah chuan bengchheng tawh suh u. Hei, Severn-a hian in hnenah thu sawi tur a nei a, hun rei tak aṭanga kan lo hriat châk em em ṭhin kha sawi tur a nei a ni," a lo ti mek a. A bul vela mi leh Hotel chhunga mi zawng zawng chu lawmin an lo áu dar dar a.

Severn-a chuan a chhunga mite zawng zawng chu hmuh kim vek tum ang hrim hian a mit chu a'n lèn ruai a. An zavaia zingah chuan sawm pahnih emaw chauh mingo pangngai an ni a; a dang zawng chu Mexican vek an ni. Chu bâkah, chûngho zawng zawng deuhthaw chu kut hnathawk mi, ni chhuah aṭanga ni tlâk thlenga taima taka thawk mi an ni a, an hlimna ber chu an theih ang tâwk tê têa an thawh rah hmuh kha a ni mai a ni.

Mite han do chi an ni em? Teuh nang! Chutiang mi chu tlem tê an ni. Mite han do thei tur chu kut zungṭang thliakin a chhiar thei mai ang; mahse, chûng mi tlem tête chu a chakna thahrui turte an ni thung. Chu vang chuan mite va beih lam ai chuan lo inven lam kha a suahtuahpui ber a ni ta reng a ni. Invenna lam ngawt an lo beih ngawrh khan an tan chet theihna tak kawng a inhawng ve mek reng a ni.

Severn-a chuan, "Pi leh pute u," tiin a han ṭan a, awm khawmho chu a han en a, an lo nuihin chibai buk ni awm tak hian an lo kun hlawm a. Dik tak chuan chu laia mite hmaa thu sawi chu ṭawngkam te a thiam hran loh avangin nuam a ti lo va, hreh tak chungin a ti hram hram a ni.

"Thu sawi thiam hmingthang ka nih loh vangin a tawi thei ang berin ka sawi tur tak ka'n sawi nghâl mai ang e. Yancy Cullane-a ruang kha sakawr chungah hlangin kan thawn chhûak ta a, nizan lam khan a lo kal ṭanna khua pawh a thlen leh tawh a beiseiawm a ni," a han ti phawt a.

Mi ṭhenkhat chuan, "I ti ṭha e," an lo ti hlawm a. Ogston-a chuan, "Chu thil chuan Putara pawh a tithinur tharin a thluak a tihbuai phian dawn chu," a lo ti a, kawngkhar bula ding chung chuan hmel hlim fe hian a lo nui a.

Severn-a chuan mi dang an ngawih deuh hnu chuan, "A ni maithei; mahse, ani pawhin kan lehkha thawn kha a chhiar hunah chuan kan chunga a thil tih dan tur pawh a ngaihtuah thleng vek bawk ang le," a han ti a. Jenny Winn-i chuan, "Don, lehkha i thawn a maw? Engtiang kawngin nge i thawn a?" a lo ti thuai a.

Severn-a chuan, "A bik taka thléng turin kan thawn," a lo ti mai a. Poynton-a ve thung chuan, "Yancy-a kawrah khan kan chilh bet ta mai a nih kha," a lo ti vat a. Nghakhlel tak hian Shearer-a, an Mayor chuan, "A nih leh, thuruk te a nih hran lem loh chuan in thu thawn dan chu min han hrilh ve la," a lo ti a.

Severn-a chuan, "Paul, thuruk chu ni lul lo ve. Hetiang hi lehkhaa kan ziah dan chu a ni mai; 'Yancy Cullane-a rawn thawn kìr a ni e. A unaupa, Jail ṭanga lak chhuah a tumna chu a hlawhchham a ni' tih hi a ni mai," a ti a. Ogston-a bula ṭhu Long-a chuan, "Severn, chumi tih tuma lo kalah chuan i lo ring a ni maw?" a lo ti a.

Severn-a chuan, "Chu bak tih tur a neih àwm ka hre thei lo a ni," a lo ti hmak a. "Eng pawh ni se, tuna ka sawi tâk ang khan lehkha chu thawn a ni ta a; mi dang a rawn tirh leh hran chu ka ring rih lo. Thil kalphung tur leh kan tih mek dan tlangpui ka'n sawi leh ang a.

"Tunah hian Circuit Judge kan chah mek a, ani chu sipaite nen hetah hian an lo kal ang a, Marco-a chungchang hi an rawn rel ang. Thiam loh an chantir a, an khaihlum dawn a nih chuan, silai pai luih vang leh a thil tih dangte vang kha a ni ang. Thiam lo hranpain hmu lo mah se chûngho chuan Marco-a chu an hruai reng reng ang a, Mexico khawpuia an hruai hnuah a ṭul angin an ti mai ang," a ti ta zel a.

Mike-a chuan, "Don, chutiang chu thil awm dan a ni tih Putara'n a hriat ngat chuan a rang thei ang berin keiniho min do tur hian a inbuatsaih nghâl ang a, min rawn phìn darh vat a tum ngei ang. Nang pawhin chance i nei tlem kher ang le," a rawn ti a. Mahse, Severn-a chuan, "Chu lam chu sawi a ngai hranpa lo maithei Mike. A thu hrimah, kei chu min ngaihtuah a ṭul lo vang, he hna thawk tur hian ka inpe tawh a," a ti ta hmiah a.

Kil khat aṭang chuan zàwi angreng tak; mahse, mite hriat ngei tur si hian Father Malcolm-a chuan, "Cullane-a chu San Jaime khua rawn bei ngei tur hian i cho phawk ta tihna a ni maw?" a rawn ti ta a. "A nih leh Severn, San Jaime khaw mi zawng zawng, naupang leh hmeichhiate thlenga thaha an awm tur hi ṭha i tiin chumi hmuh chu i châk ta riau em ni?" a'n ti leh ngat a.

Severn-a chuan, "Ni lo ve ka pu; an awmna hmunah Cullane-a leh a hote hi ka va do thei lo a ni. Inbeihna hmun hi kan thlan fuh hlauh chuan kan tan a ṭhat zawk ngei ka ring tlat bawk a ni," a lo ti thuai a. Lungngai tak chung hian Malcolm-a chuan, "Hmun ṭha thlan chu a dik maithei e; mahse, a nih leh kan Pathian lamah engtin nge ni ve ta ang le?" a lo ti a.

Hnung lam deuha mi pakhat chuan, "Padre, Pathian chu battalion tam lamah alawm a ṭan ṭhin," a lo ti a. Mahse, Father Malcolm-a chuan, "Ka fapa, Pathian chu dikna lamah leh ṭhatna lamah leh mihringte ṭhatna tur lamah a ni a ṭan ṭhin ni," a lo ti hmak a.

"A nih tak chu Padre," Poynton-a chuan a lo ti a, "Chutiang a nih phei chuan mihring hian eng mah lova thih hlauh ngawih ngawihna te nei reng chunga khaw chhunga chen ve reng chu thil dik a ni thei reng reng lo. Mihring hian ama nunna venghim tura mi dang a va thah hi a ropuiin a thianghlim hlein ka hria.

"Amah chauh a inveng dawn a ni lo va, a in leh lo, a fate ngei ngei nunna vengin tunah hian kan lo ṭang dawn tihna a ni. A thu hrimah Padre, zalenna leh dikna hi thil ṭha a ni a, i Pathian pawh hian chutiang duhna nei mite ral do chu a ṭanpui duh pawh ka ring ngawt mai. Tin, keimah ngei pawh hian Pathian chu ka lamah ṭang ngei se ka duh bawk," a ti ta zel a.

A thu sawi avang chuan mi dangte chu an lo lawm hle a, sawi zel tura lo fuih pah chuan hlim takin an lo áu va, a darah te an beng nawk nawk a. Chutiang taka thu ṭha chu a dam chhung huna a la chhâk chhuah ngai loh avangin amah pawh chuan mak a inti em em a ni. Father Malcolm-a pawh chu a nui ta sak a, "In zavai atan hian ka lo ṭawngṭai ang e," tih pah chuan a chhûak ta a.

A chhuah tak hnu chuan Severn-a chuan lehkha tel chhah zet hi dawhkanah chuan a pharh a, chutah chuan khaw chhung lem leh Cullane-a'n a rawn beih huna ṭanhmun tur engkim chu a lo ziak chhuak vek a. Chumi hmuh loh leh hriat loh hlau chuan in chhunga mite chuan an rawn pan hnai a, an hmuh theih ang ang ṭhutna atana hnuk hnai chung chuan an bih ta hlawm a.

Severn-a chuan, "Rinhlelh rual lohvin heng mite hian Jail hi an rawn beih hmasak ber a rinawm ṭheuh a. He laiah chiah hian eng emaw chen bum kan tum tur a ni ang. Marco-a leh a ṭhiante hi hetah, chhim tawp lam Pete Yope-a sakawr inah kan dah ang a, corral velah anmahni vengtu tur kan dah dawn a ni. Chutih lai chuan Jail chungah silai kâp thei deuh deuh kan dah bawk ang. Chutianga kan tih chuan eng emaw zat chu kan thah theih tawh ka ring a.

"He laia an phili buaina lamah hian khaw thlang lam zawnga tlanin, hmar lamah hian rawn luh an rawn tum ngei a rinawm a, heti laia an kal chuan Biak in lam kawng an rawn pan dawn tihna a ni a, he laiah hian silai kâp thei dang zawng chu dah bawk tur tihna a lo ni ta. Hetianga kan tiha kan la tih chimih theih loh cheu chuan Biak in leh Jenny in inkarah hian an rawn tlan lut dawn tihna a ni a, he laiah hian kan theih hram chuan dan beh kan tum ang.

"Mi tu pawh, khaw thlang lam emaw, khaw chhak lam emaw, a ṭulna lam apiang kâp thei tawh phawt chu, in chung tinah hian kan dah bawk dawn a ni. Heta ṭanga an la rawn tlan chhuak thei cheu a nih chuan Jail lam an pan tawh dawn a, chumi hunah chuan Yope-a hmuna awmte leh Jail chunga awmte'n an lo thum rawn thei tawh dawn a ni. Hetianga kan tih chuan kan hneh theih ngei ka ring; zawhna nei in awm em?" a ti ta a.

Shearer-a chuan, "A nih leh Severn, ding lamah lo kalin hmar lam hi rawn bei ta thut mai se, engtia tih tur nge ni ta ang?" a lo ti a. Severn-a chuan, "Chutianga min rawn beih chuan kan buai tihna a ni mai," a han ti phawt a, "Mahse, chutianga rawn bei lovin Jail hi an rawn tum hmasak ngei ka ring tlat a ni. Chutiang pawh chuan rawn bei ta teh reng pawh ni se, lo dan theihna hun ṭha tâwk tak chu kan la nei thei tho tho alawm," a ti ta zel a.

Hriat châk tih hriat tak hian Turnbull-a chuan, "A nih leh a hautak lai deuh deuhah chuan tute nge dah i tum a?" a lo ti a. Severn-a chuan, "Kei leh Poynton-a leh Rick-ate hi Jail chungah kan awm ang. Nang leh i hote pathum hi hmar thlang kil tàwpah in awm ang. Tom Long-a leh Lawrence-a leh khaw chhung mi ṭhenkhatte hi Montay-a in chungah leh Jenny in chungah an awm ang.

"Yope, nang leh Shearer-a leh mi ṭhenkhatte'n chhim chhak tàwp hi in lo veng bawk ang. Chutianga ka han sawi aṭang chuan thil awm dan chu in hre thiam tawh ang chu maw? In chung aṭanga ṭan lâk tur ka tih pawh kha a awmzia chu in hre turah ka ngai," a han ti a.

Poynton-a chuan, "Hre thiam teh reng e, Don. In chung aṭang chuan min rawn beihna lam apiangah tu pawhin kan lo kâp zung zung thei dawn tihna a ni mai alawm," a lo ti thuai a. Ricky Main-a chuan, "Inbeihna chu a hautak hle dawn a ni tih hre nâwn leh ta ṭheuh ila, zawhna dang a la awm em?" a lo ti bawk a.

Yope-a chuan, "A nih leh Severn, engtik hunah nge min rawn beih hi i rin reng reng?" a lo ti a. Severn-a chuan, "Ni chhuah hlim a nih a rinawm ber. A zana zan chuan he khuaah hian an lo luh loh hmel, a chhan chu zan thim hnuaiah an duh anga rangin Marco-a leh a hote hi an la chhuak thei dawn tlat lo," a lo ti a.

Long-a pawh chuan, "Naktuk zing, ni chhuah hlim a nih hmel hle mai maw?" a lo ti ve a. Severn-a chuan, "Ngaihtuah thâm tak a ni. He laia awmho hi chuan in rifle leh a mute engkim inring sa veka dah turin ka duh che u a, in silaimu-ah mi tin in innghat tak meuh a ni tih hre bawk ang che u.

"Tunah hian Yope-a chuan a silaimu neih zawng zawng a rawn thawh tawh a; Hardingham-a pawhin a mamawh apiang tan a phal bawk a; tu mahin silaimu in tlâkchham ka duh lo.

"In nupuite leh in fate chu, in chhungah pawh hmun him laiah dah rawh u, silaimu laka an himna tur hmunah. Anniho pawhin in silaite in kah ruah veleh an lo thun zel theiin, in mamawh dan angin an lo ṭanpui theih che u ka ring; mahse, hmun himah dah hram ula, silaimu a leng hautak phian dawn a nia," a ti ta zel a.

Severn-a chuan a lehkha pharh chu a zial a, mi dangte chuan thil awmzia zawng zawng an ngaihtuah a, a hmaa Poynton-a thu sawi vanga hlim taka áu chhuakte pawh kha tunah chuan an nui ta lo.

Yancy Cullane-a kawra lehkha an kilh beh thu te an han ngaihtuah a; a tuk maia thil thleng tur an ngaihtuah zel a, tu emaw ber chu an thi dawn a ni. An ṭhenawmte an melh ralh ralh a, tu ber hi nge naktuk aṭanga mitthi chang mai tur tiin an ngaihtuah nauh nauh a, tu mah hlim hmel pu an awm ta lo.

Severn-a chuan, "Tun atan chuan hei zawng hi ni rawh se. Mi tu pawh, mahni in ṭheuhah naktuk khawvar hmaa silai nena inring ṭheuh turin ka duh che u a ni. Tin, thu tawpna atan thil pakhat chauh; mi tu pawh, he lai chhuahsan duhte in awm a nih chuan tunah hian he khua hi in chhuahsan thei ang.

"Tu mahin an kâwk zui lo vang che u a, zawhna eng mah zawh in ni lo bawk ang; mahse, heta awm chuan a hriat reng tur chu ral a do dawn tih hi a ni. Zanin ni tlâk aṭangin khua hi kan khar hmiah ang a, mi tu mah an chhuakin an lut tawh lo vang," a ti ta zel a.

Poynton-a chuan, "Don, i thu sawi chu a chiang tâwk e. Tin, hetah hian kei ka awm a, tu mah hian he khua hi an chhuahsan dawn lo tih hi lawm takin ka hrilh nghâl bawk a che," a lo ti a. Severn-a pawh chuan, "Tu mah hian an chhuahsan chu ka lo beisei chiah lo reng a ni," a ti sap a, "In zavaia chungah ka lawm e," a han ti zui leh a.

Poynton-a bula Mexican pakhat chu a lo ding vat a, "Ni lo, Senor Severn. Keimahniin kum tam tak kal taa kan lo tih daih tawh tur, tih kan tum tâk chungchangah hian lawm thu i sawi a ngai lo vang; I chungah lawm thu kan sawi zawk tur a ni. Ka ṭhiante ai awhin tunah hian ka thinlung zawng zawngin i hnenah lawm thu ka sawi nghâl e. I bulah hian kan ral do tur chu kan bei ang a; ṭhenkhat chu a thih pawh kan thi hial ang; mahse, i bulah huaisen leh mipa takin kan thi dawn a ni," a ti ta a.

Tifuh inti leh inchhuang taka hawi valh valh chung hian chu Mexican-pa chu a chhûak ta nghâl a. A chhuah lai chuan mi ṭhenkhat chuan an lo kheuh zauh zauh a; mahse, chu pawh chu hre awmin a lang lo. "A rorum hmel phian mai maw? Engkim a ruahman fel vek tawh tihna a nih dawn kha," Poynton-a chuan a han ti a.

Ricky Main-a chuan, "Engkim ngaihtuah fel vek tawh tia i sawi chu eng nge a awmzia ni ta ngai?" a lo ti vat a. Hahni lang tuama nui chung hian Poynton-a chuan, "Ka nau, kha pa kha tu nge a nih i lo la hre lo pek a ni maw? Kha pa kha Martin Chavez-a a nih kha," a lo ti a.

Ricky Main-a chuan, "Kha pa kha mi pakhat nena...," a tih lai mekin Poynton-a chuan, "Ni chiah e ka nau," tih pah chuan a dàrah a han beng thâk thâk a, "Pa pakhat, fa, mipa hlir pariat nei a, a nupui thau tak nena chengho chu amah kha a nih kha," a'n ti zui zat a.

***********************

Chawhma lam chuan Severn-a leh Poynton-a leh Main-ate chuan khua chu an fang vel a; Mike Turnbull-a leh a hote leh mi dangte pawh rei lo tê tê an be zawr zawr hlawm a. Mite rilru la lo zawng hlirin an khawsa a, khua chu an fang kual zel a. Mi an bîak reng rengte chûan tumruhna tak an nei zel hian a hriat a, an hmel an lo hmuh chuan an lo hlim viau zel bawk a.

Tlai ni a han tlâk meuh chuan, in ṭhenkhat aṭangin Mexican-ho chu an rawn zai chhuak riai riai a; 'Con Dios' hla an sak a han hriat phei chuan, tlai ni tla sen ruai mai nen chuan inhmeh hlein Severn-a chuan a hria a. A chet dan tur a ruahman zawng zawngte chu a han ngaihtuah vang vang a, ama hriat tawk lek lek chuan, "A ṭha thawkhat ang chu maw, kan hlawhtling cháwk ang chu maw," a ti nauh nauh a.

Khua a thim ṭan ta tihah chuan Jenny Winn-i kawngkhar chu zawi tê hian Severn-a chuan a han kik karh karh a. Jenny pawh chuan hlim taka nui ver ver chung hian a rawn hawng thuai a. "Don, engtiziaa lo kal teh khiah nge i nih chu le? I buai viau ka ring a, min rawn hmuh hman pawh ka ring lo asin," a lo ti a.

Severn-a chuan, "Hna pawimawh ka neih avangin ka lo kal a ni. I in te hi han en chian deuh a ngai a, naktukah i in chunga mihring ka rawn tirh theih nan," a ti a. Zawi sap hian Jenny chuan, "An lo kal ngei chu i ring tak tak a maw?" a lo ti a.

Severn-a chuan, "Jenny, an lo kal ngei tur a ni. Billy Cullane-a hi Mexico sawrkar do tur khawp chuan a â tawk lo va, he khuaa Judge a lo thlen hunah chuan Marco-a chungchang hi a rawn chingfel ngei dawn a, chu chu Billy Cullane-a pawhin a hre reng a ni. A fapa upa ber an khaihlum lai hmu tur ringawt chuan a ṭhu mai mai thei dawn tlat lo, chutiang ngawta awm chi a ni lo," a ti mai a.

Jenny chuan mak ti àwm tak leh ngaihtuahna siam ta ni àwm tak hian Severn-a chu a han en vang vang a. Nakin deuhah chuan a thaw ta ham ham a, a hma tlaia Poynton-a, ngaihngam taka a ṭhutna chair-ah khan a ṭhu ta a. "Don, chutiang thilah chuan min fiamthupui lo vang ti raw?" a han ti a.

Severn-a chuan, "Fiamthu maw? Engti kawngin nge he laiah fiamthu ka la thawh cheu nia i rin?" tiin mak ti angreng tak hian a zawt lêt ta a. Jenny chuan, "E le, Judge lo kal tura i ngenna leh sipai lo kal tur thu-ah khan maw le," tiin a lo chhang a.

Severn-a chuan, "Zawhna âtthlak tak niin ka hria. Ka fiamthu lo va, ka tihder bawk hek lo che. Marco Cullane-a, Jail-a kan khung zan la la khan Juan Rodrigues-a ka tlantir nghâl nal nal alawm. A nih leh, bum che ni awma min rin theihna chu eng nge ni ta zawk a? Ka zawt tak meuh a che," a ti ve ta a.

Jenny chuan, "Thil ho mai mai leh hmeichhe ngaihtuahna màwl vang mai mai maw le," a ti a, a thil sawi leh ngaihtuah chu ho ti awm tak hian a han nui a. A ṭhutna aṭang chuan a tho va, hmanhmawh àwm fe hian a vei tawn ta sek a. Chumi a'n hmuh chuan Severn-a chuan, "Jenny, i awm hle hle thei ta hauh lo mai ka ti. I awm tinuam lo riau thil a awm ta em ni a?" a han ti a.

"Awm lo ve," zawng a ti na a; hmanhmawh leh ngaih ṭha lo tak ang maiin a lo vei tawn sek a ni tih Jenny chuan a hre chhûak ta a. A ṭhutna ngai chu a pan leh vat a, "Don, naktuk hun tur ka ngaihtuah hian ka awm a nuam chiah lo a ni. Don, fimkhur takin i che ang em? Khawngaihin fimkhur taka i chet turzia thu hi min hrilhin min tiam hial teh," a ti ta zawk a.

Bu nghat chung hian Severn-a chuan, "Ka tiam a che," a lo ti ve thuai a. Jenny chuan, "I chungah thil pawi a thlen hlauh chuan..," a han ti leh a, a tawp chawt a, a bula thil eng emaw chu a khawih ta mai mai a.

Severn-a pawh chuan thawh pahin, "Ka kal tawh mai ang e, thil dang tih tur...," a ti hman chauh va; Jenny chuan, "Tam tak a awm, ka hria alawm," a lo ti thuai a. "Don Severn, rei lo tê chhung chu la ṭhu rih teh. I hnenah hian thu sawi tur ka la nei," thu pe deuh tak leh chang deuh bang hian a ti leh ta tlat mai a. Ṭhut leh pahin Severn-a pawh chuan, "Ni e, ka Pi," a ti ve mai a, a nui pah deuh sak a.

Jenny chuan, "Zan danga kan inbiaknaah leh tunah pawh.. eng mah i la sawi lang hauh lo; ka tan chuan sawi chhuah harsa tak a ni. Don...," a tih lai chuan Severn-a chuan, "Chutiang a nih chuan sawi lo mai rawh, chumi chanchin chu nasa takin ka ngaihtuah ve bawk alawm. Hun remchang dang te ka nei thei a, hmuh lehna hun che ka nei thei te a nih chuan a inchhuan theih hle ang; mahse, thil chu a nih tur ang angin a kal mek tawh a nih hi," a lo ti nghâl ngawt a.

"I thil lo tih tawhte chu anchhedawngin awm rawh se," Jenny chuan a han ti sap a, a mitmeng te chu a dur khaih mai a. A thu sawi chu a zàwi hle na a; mahse, Severn-a chuan a hre thei tho a. "Pawi ka va han ti tak em! Don, i hnena thu ka sawi laia thil lo thleng kha i hria ti raw? Mahse, Don, ka duhlai...," tih pah chuan a rawn hawi chhûak a.

A mittui te chu a lo tla pheng a, han en reng reng pawh chuan khawngaih thla a la hliah hliah mai a, "A la tlai lutuk hlei nem. Tunah hian heta ṭang hian kan kal bo daih thei alawm. Naktuk zing khawvar hmain San Jaime khua aṭanga hla tak kan thleng daih hman ang chu. Nang leh keia tan lo buai ve a ngai reng reng lo," a ti ta zel a.

Severn-a chuan, "Jenny, chu chu ka ti thei lo tih ka hrilh tawh che kha," a lo ti a. Jenny pawh chuan, "Ka hria alawm. Ni e, hetia han sawi lan leh pawh hi thil âtthlak tak a ni tih ka hria a, sawi pawh ka sawi zawm leh tawh bawk lo vang," a ti a, a lu a thing nawk nawk a, "Vanduaina kan chunga lo thleng tur hi kan hneh thei rih lo a ni mai alawm," a han ti zui leh sap a.

Severn-a'n, "A nih, chutiang chu a thlen i ring nghet tlat a maw?" a han tih chuan Jenny chuan, "Ring nghet tlat e. Thil lo thleng tur ang ang chu a lo thleng ngei ang. Tunah hian kal chhuak nghâl turin Mister Severn, ka ngen nghal a che," a ti ta a. Chhuah tuma pen pahin Severn-a chuan Jenny puan hmawr chu a han khawih a, "Jenny," a han ti a.

Mahse, Jenny chuan, "Eng mah sawi tawh suh Don," vin angreng tak hian a lo ti hmak a. "Hetiang taka i hmaa zah pawh dawn lova ka inphah hnùai tawh hnu hian eng mah a sawt chuang lo va, mi pawh i titlawm na laileng a. Tunah chuan i rilru pawh i siam fel tawh a; i hnena ka sawi ve tur chu 'kal chhuak nghal rawh,' tih hi a ni ta," a ti ta hmiah a.

Chhûak tura kawngkhar a thlen chuan Severn-a chu a rawn lehhawi a, "Ka nunna min chhanhimsak kha engtikah mah ka theihnghilh lo vang Jenny. Eng thil pawh ka chungah lo thleng se, ka hre reng ang," a han ti leh a; Jenny erawh chuan a chhang lo.

Thawm nei hauh lova kawngkhar a khar hnu chuan ṭhutthleng lam bawk a pan phei leh a. A hmel pawh chu thinur hmelin a rawn luahlan tial tial a, nakin deuhah chuan thinrim insum thei lovin a la phiar lai chu a paih ta dawrh a, "Khanglang tak che hian, hrep taka che!" a ti a, a ṭap ta faih faih a. Minute nga dawn lai a ṭap a, chumi hnuah chuan a inhru hul a, a hna chu a chhunzawm leh ta a.

***************************

San Jaime khua aṭanga chhim chhak mel chanve vela a bihrûkna aṭangin Severn-a chuan khaw chhung lam chu a han thlir vang vang a. In pakhat tukverh, kawmawl dum zar hnan kar aṭanga eng lo chhuak zauh zauh chu a thlir reng a. Thlifim chuan a rawn chhem heuh heuh a, chung lam arsi ên chung chuan hmeichhe nui ri chu a ngaithla reng a.

Darkar khat lai a ral hnu chuan a lo rinhlelh rûk chu hriat chhuah tak tak theihna a nei dawn chuang lo niin a hre ta a. Darkar chanve dang a ral leh hnuah chuan fiahna a zawn chu a nei thei ta lova inngaiin beidawng taka kal mai a han tum a; chutih lai tak chuan sakawr chung chuang mi pakhat ni awm tak leh sakawr tlan thawm ri chu a hre ta a. Hmanhmawh takin a sakawr lam chu a pan a, a zuang kai ta nghal a.

A sakawr hnenah chuan, "Nigger, kan ṭhiante zinga mi chu a ni hauh lo mai ti raw?" a han ti a. Ngun lutukin chu sakawr chung chuang khuaa mi chu a thlir reng a, chu mi chuan zawi zawiin khua chu a chhuahsan a; khua a pelh veleh tlemin a sakawr chu a tlan chaktir deuh va; nakin deuhah phei chuan chak lutuk takin tláng ram lam pan chuan phaizawlah a tlantir ta a. A hriat hauh lohvin Severn-a hnuai lawkah chuan a tlan zel a.

Old Cullane-a tana he khua enthlatu chu a hre ta; Severn-a chuan a mit hmuh ngeia a mi rinhlelh rûk a han hmu ta mai chu awih harsa a ti hle mai a; mahse, rinhlelh rual a ni si lo. Chuti a nih si chuan, a tuk khawvar hnuah ngei khua chu an rawn bei dawn tih a chiangin a hre ta bawk a. An rawn beih hunah chuan engkim hre chiang sa, ṭanhmun an lo khawh dan tur zawng zawng hre sain an rawn thawk dawn tihna a ni ta bawk.

A sakawrah chuan a zuang kai a, "I thau ta lutuk a, tlan pawh i i tlan chak thei ta lo. I mei hi meia hàl a ngai dawn ta a nih hi," a han ti a, a thu sawi chu hre thiam ni àwm tak hian a sakawr chu a lim ta puat puat a, rang takin khua chu an lut ta a. Hmanhmawh takin Poynton-a leh Main-a bulah chuan a han ṭum thla ṭak a, "Eng nge chanchin?" tiin an lo zawt thuai a.

Severn-a chuan hmanhmawh tih hriat tak hian, "Ka ṭha," a lo ti thuai a. Thil awmzia hre thiam tak chung hian Main-a chuan, "Ṭhiana, buaina tur kan nei ta tihna a nih hi, awm mai mai lo khan che vat vat ta che," Poynton-a hnenah chuan a han ti a. Chutiang thu tawi tê a sawi, lo hre thiam nghal em em theitu chu Severn-a chuan an váng hlein a hria a, a chhuang rilru hle a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 28th, 2018, 6:51 pm

SUDDEN - DEAD OR ALIVE
AUTHOR : FREDERICK H. CHRISTIAN(1973)
TRANSLATED BY : R. LALDANGLOVA
(Rozami Pachuau)
Chapter - 12 (Last chapter)

Zing khawvar dawn chuan Putar Cullane-a leh a suamhmang rualte chuan ngawi rengin San Jaime khua chu an pan a. Chapo tak leh ropui inti tak chung hian Billy Cullane-a chuan hma a hruai a, ding lam leh vei lam pawh hawi duh miah lovin a hma lam chu dîng taka enin leh phuba lak châknaa khat chungin a thlir reng a.

Phaizawl an kal pelh hnu chuan hmanhmawhna nei miah lovin San Jaime khua chu zawi muangin an pan zel a. Tun ṭuma an thil tih tur hi chu tu mahin zep pawh an tum hran tawh lo. Ram hran hrana mite an niin, an hmingthan dan pawh mawi lo tak tak vek an ni.

Khaw chhak kil aṭang chuan ni zung a rawn inzawm ṭan a, phaizawl aṭang chuan khaw chhung pawh chiang zawkin khawvar engah chuan an hmu thei ta bawk a. Nakin deuhah chuan Old Cullane-a chuan a sakawr chu a tiding a, a hote zawng zawng pawh chuan an tiding nghal a, "Tunah chuan inring rengin awm u la, thil thleng eng pawh lo hmachhawn turin inpeih rawh u," a han ti a.

Severn-a ve thung chuan a laipui siam chawp chu a hman theih dawn leh dawn loh ngun takin a en vel a. Zankhuain khaw chhung mi tu mah an mu lo tih tur a ni a, khaw chheh vel te chu a ralmuang em tiin Marshal leh Tom Long-ate chuan an kan kual reng a, mi tin an inring em em vek a ni.

Main-a chuan Severn-a khawsa zia chu a hriat thiam loh deuh avangin Poynton-a hnenah chuan, "Kan ṭhiana hian eng nge maw a rilrûk a, heti taka a buai chu le?" a han ti a.

Poynton-a chuan, "Ka hriat i ring bik reng reng em ni? Nizan aṭang tawh khan, zawng sih siam sual ang maiin a phi cheng tawh a, a chhan pawh ka hriat ka theih ka inring deuh a; mahse, lo zawh chung kha ka duh lo a ni. Nang pawhin lo buaipui lo mai la a ṭha zawk ang, a tihfel hunah a la hrilh mai zawk ang che," a lo ti a.

Main-a chuan, "A nih leh eng vang nge, saw laia laipui ṭawl tawh saw a buaipui chhen a?" a han ti leh hram a. Poynton-a chuan, "Ka hre bik hrep lo ve. Eng pawh ni se, keimahni lo hi chu mi dang, tu mah rin tak tak a nei lo. Nang pawh chutiang mai maia lo phar buai lo khan, in chung, awmna tura min kawhhmuh kha pan vat ila a ṭha zawk ang," a lo ti ta hmiah a.

Severn-a'n Jenny Winn-i in bul a va thlen chuan Pete Yope-a pawh a ran chaw in bulah a lo awm a; Pete-a chuan entlang hlui zet leh ṭha angreng deuh hian khaw pawn lam chu a lo thlir vung vung a. Severn-a chuan, "Thil hmuh i nei em?" tiin a han zawt a. Yope-a chuan, "Don, saw laiah sawn an awm; mahse, thil nghah nei ni àwm takin sakawr chunga ṭhuin an ding reng mai," a lo ti thuai a.

Severn-a chuan, "A awmzia ka hre bik hauh lo; ni chhuah hun an nghâk pawh a ni maithei," a ti a. Yope-a chuan, "A nih leh, signal ka pe dawn em?" tiin a han zawt leh a. Severn-a chuan, "A ṭul i tih phawt chuan engkim peih fel vek tawh a ni e," tiin a lo chhang a.

Chutih lai chuan Jenny chu a rawn lang ve ta a, Severn-a chuan, "Jenny, he lai hi i awmna tur hmun a ni lo, i inah ka hruai nghâl ang che," a lo ti vat a.

A in lam pana an kal dawn laiin Jenny chuan laipui, ngun taka an chei ṭhat chu a han hmu a, beidawng tak hian, "Hei hi eng nge ni ta ngai?" a han ti a. Severn-a'n a han hrilh fiah hnu chuan Jenny hmel chu a ngui ta ngei mai, hnehin a awm ta hliah hliah ni hian a lang a.

Severn-a chuan khaw pawn lam melh zawk pah hian, "Anniho pawhin signal eng emaw an nghâk ni àwm tak a ni," a han ti ngat a; Jenny chuan a lu a thing nawk nawk a.

Severn-a bawk chuan, "Jenny, mi â nileng ka ni bik lo asin, signal eng emaw i pek duh hi ring lo tur leh i rilru hre lo tur khawp chu ka ni lo a nia," a han ti leh a; Jenny chuan a lu a lo thing leh ringawt a.

Severn-a bawk chuan, "Jenny, Jenny, tihnat che hi ka duh hauh lo; mahse, he khaw chhunga nunau zawng zawng nunna hi ralṭitawm takin a awm ta a nih hi. Eng vang leh engtiangin nge tih chu ka ngaihtuah teh chiam lo; i thil tih dan erawh hi chu min hrilh rawh tunah ngei hian," a tih khum ta hmiah a.

Jenny chuan, "Oh Don," a'n ti a, a inhnit deuh faih faih a. A va kal hnai a, a lu-in Severn-a áwm chu a'n nùl deuh thuak thuak a.

Severn-a'n khawngaih tak chunga a dar chùlsak a han tum lai tak chuan a che chu a tawp ta chawt a, (Mawl ṭet ṭut lutuk mai :oops: ) Pistol hmawr tih hriat tak hian a nakruhah ngei chuan a rawn nawr ta nawk mai! Mak ti leh lungawi lo tak chung hian Severn-a chuan a han en thla a, a hma zana Yancy Cullane-a a kah hlumna ngei derringer pistol hmawr chuan a lo hawlh reng tawh chu niin!

Tlema han hnungtawlh deuh pah hian Jenny chuan a bán chu a'n ti char at a, a mitah chuan mittui reng hmuh tur a awm tawh lo; mittui chu sawi loh, vertherna leh huatna hlir a mitmengah chuan a lo lang chhûak ta zawk a. Zawi sap hian, "Ni e, signal chu a awm dawn chiang alawm. Tunah ngei hian signal chu ka pe dawn chiang a ni. Rang takin i pistol paina kawnghren kha phelh nghâl vat rawh!" tiin thu a han pe zui a.

Severn-a chu a bu nghat a; mahse, a kawnghren phelh tum chuan a che chuang lo, "Cullane-a tan hian eng nge nihna leh ṭangkaina i neih?" tiin a han zawt a. Muangchangin a kawnghren buckle chu a han khawih a, hun a khawhral tam hian a tan a ṭha dawn tih a hre reng a ni. Mahse, inrinlawkna pawh awm miah lo hian Jenny chuan vawi leh khatah pistol chuan Severn-a hmaiah a vaw ta nghek mai a.

Severn-a chu a pai awn awn a, bangah a va indawm ding thei hram a. A mit bulah chuan thisen a lo luang ngiai ngiai a, thil hmuh fiah tuma a beih buai lai chuan Jenny chu a hmaa rawn kal harh harh hian a hmu a, thinrim lutuk, hmui khur dar dar chung hian, "I kawnghren kha i phelh thlak vat loh chuan tunah hetah ngei hian ka that nghâl ang che!" a han ti a.

Severn-a chuan a mitmeng leh a hmui khur dar dar dan aṭangin a thu chu a zawm mai loh chuan a that duh ngei dawnin a hre ta a; a kawnghren chu a phelh a, leiah chuan thawm pawh nei hranpa lovin a tla ta thlawrh a.

Jenny chuan, "Tichuan, Mister Severn Finga, Cullane chhungkaw tan eng nge ka nih i hre duh maw kha?" hmuhsit hmel taka nuih hak hak pah hian a ti a, a hmelṭha tak pawh chuan mawina reng a nei tawh lo. "Ka hrilh em em ang che, engkim ka hrilh vek ang che Mr Sudden!" a han ti leh a.

Dik tak chuan Severn-a meuh pawh, chu nu fin khekrek leh sualzia a han hriat chian meuh chuan a zam ve lek lek a ni. Jenny chuan, "Nang hi tu nge i nih tih leh tu nge hetah hian rawn tir che tih pawh kan hria, i ṭhian ṭha tak, Governor Bleke-a'n a rawn tir che a nih kha!" a han ti zui leh a. Severn-a chuan dam thlap hian, "Engkim hre vek i ang hle mai; mahse, engmah min la hrilh fiah chuang lo," a lo ti a.

Jenny chuan, "Ka hrilh khawp ang che, i thih dawn avang hian ka hrilh dawn che a ni; he laia i lo inrawlh ve avang hian i thi dawn a ni lo; chu phei chu i phu tho a; Mister Sudden-a i nih avang hian thih chu i chan tawk ni mah se chu vanga thi tur chu i ni lo. Mister Sudden, i thi dawn; i thihna chhan tur zâwk chu Bleke-a hian a lo khaihlum khanglan vang a ni, Billy Cullane-a fapa hi ka pasal a ni tawh asin," a ti ta a.

Severn-a chuan, "Ka hria e. Kei min thah hian Bleke-a chungah phuba i la ve tihna a nih chu. Hei vang hian a ni maw Yancy Cullane-a pawh kha i lo thah? Ani khan i phuba lakna tur a lo tih pelhe dawn avangin nangmah ngeiin i unaupa chu i lo that pek zuk nia!" a han ti ve ngat a.

Jenny chuan, "He khua hian Cullane-a phuba lakna chu an hmu dawn alawm. Sudden, Uicho i nih ang ngei hian an that lai che hi khaw mipuite hian an hmu ngei ang. Chumi an hmuh hun chuan Putara chuan anmahniho pawh a nuai chimit vek bawk ang. Chumi hnuah chuan i taksa la bang awm chhun chu Bleke-a hnenah kan thawn dawn a ni," a han ti leh a. A mitmeng leh a che vel reng reng chu a ti harh harh mai a, "Kan ṭawng hnem ta lutuk, kal nghâl vat rawh," tiin thu a han pe zui a.

Corral lam pana kal tura a tih lai chuan Severn-a chuan, "Engkim i lo ruahman lawk vek a ni maw?" a han ti a. Jenny chuan, "Ni e, fimkhur lutuk tak lehnghalin maw le. Nang leh kei hi sakawr dang hmang sawn kan kal chhûak dawn a ni. I ṭhianteho chuan mak an ti viau ang a; mahse, eng nge kan tih dawn an hre hauh lo thung ang.

"Tu mahin keimah hi min kâp lo vang, nangmah kah fuh palh che an hlauh dawn tlat avangin. Tanpuina beiseia i ṭhiante i auh vaih chuan ui ang chauhin ka that nghal ang che; mahse, keima thah che ai chuan ka chhungte'n silai tam tak hmanga sâwm barh khawpa an kap hlum lai che hmuh ka duh zawk daih," a han ti hmarh hmarh a.

Severn-a chuan, "Eng emaw lai kha chuan min hmangaih emaw te ka lo ti pek a; hmeichheho hi chu in lo mak kher mai a!" fiamthu titih hian a han ti a. Jenny chuan, "Khanglang a che Severn!" tih pah chuan na zet hian a hnungah derringer hmawr chuan a'n hawlh a, "Vawi khat mah chutiangin min cho phawk tawh suh," tiin a han vau zui a.

Jenny bawk chuan, "Mi, tu pawhin min hmuh a, an lo biak che pawhin ngawi rengin i kut vai la a tawk mai," tih pah chuan a silai hmawr chuan a'n hawlh nawk a, "I duh leh nuih la, chu bak ṭawngkam khat pawh i chhâk chhuah vaih chuan ka that nghâl ang che," a'n ti zui leh a.

Severn-a chuan, "I sawi zing ta hle mai; Mi'n min hmuh pawhin chuti teh vakin an ngai runthlâk hran lo vang," a lo ti mai a. Jenny chuan, "Sakawrah khan lawn thuai rawh. Chuang nghal rawh!" tiin a lo tur sek a.

Sakawr, saddle pawh phah lovah chuan Severn-a chu a zuang kai a, fimkhur takin Jenny pawh chu a lawn kai ve ta a. A sakawra a chuan kài dawn chuan eng lai pawhin derringer pistol chuan khur miah lovin Severn-a chu a tin reng a, han chetna hun tur chhe tê pawh a pe lo reng reng a ni.

Chance awm theihna tur awm chhun chu gate pawn an thlen huna 'thih leh thih' tia tlan vak ringawt mai chauh chu niin Severn-a chuan a hre ta a, "A nih leh, engtin nge ni zel dawn?" a han ti a.

Jenny chuan, "I la hre dawn khawp mai. Khaw pawna sakawr chung chuang an hmuh veleh nang leh kei kan ni tih an hre nghâl mai dawn a. Khua aṭanga rifle kah phak lohna hmun kan thlen veleh i sakawr mawngtamah hian ka kâp ang a, hlauhlawpa a tlan laiin Cullane-a leh a hote khuan sawm vekin an lo kâp dawn che alawm," a ti ta hmiah a, a mitmeng chu huatnain a khat a.

Sudden-a erawh chuan a lu a thing ringawt a. Chu thu rapthlak zet mai sawitu hmeichhia chu a hma lawk zana a chala rawn fawptu kha a ni thei dawn em ni? Rin theih harsa a ti rum rum a ni.

Chutih lai chuan, "Hei, Don," tia kohna ri an hre ta a. Marshal a'n hawi phei chuan Pete Yope-a chuan a balcony-a ding chung hian a lo ko a ni tih a va hmu ta a. Yope-a chu shotgun hlui tawh tak kengin a lo ding vung vung a, Jenny zawk chuan, "Khaw hungna ṭhat leh ṭhat loh kan han en fiah lawk dawn a nia. Ngun takin Cullane-a leh a hote chet lâk dan lo en ringawt rawh," a lo ti thuai a.

Yope-a chuan, "Hmuh phak lovah awm reng reng suh u. Eng hun pawha rawn thawk mai theiin Cullane-ate an inring reng tawh a nia," a ti a; kal sawn leh mai tuma a han inher chiah chuan a shotgun kàu sa chu bangah a va tauh palh a, ring fahran hian a pûak ta dur mai a. A silai pûak ta dur vanga pawi ti êm êmin a áu chhuak ṭhawt a.

Silai pûak ta thut chuan Sudden-a leh Jenny-te chuanna sakawr chu a ti phawklek nasa ta mai a. Sudden-a chuan theih tawp chhuahin a chuanna sakawr chu thunun tumin a han bei a; saddle phah loh a nih bawk avangin a thunun hlei thei lo.

Mahse, a theih tawp tak meuh a han chhuah a, a tha tawp hmanga a han beih leh tâkah chuan a sakawr, chak em ema tlan lai chu a tiding thei ta hram a. A sakawr a thunun fel chiah, a han hawi chhuak leh chuan Jenny chuanna sakawr, khaw hungna pawn lam lo thleng reng tawh chu a va hmu ta a.

Jenny pawh chuan a sakawr, khatia phu ta zuk leh hlauhlawpa han tal ta thut kha thunun a han tum ve ngial a; mahse, a thunun ve thei ta lo. Chak lutukin sakawr chu corral aṭang chuan a tlan chhûak a, khaw hungna pawnah a biling a balangin a tlan chhuahpui ta a.

Sudden-a chuan Jenny-in mangang taka, "Keimah ka ni e," tia a áu van van ri chu a hre thei a; mahse, mipa thawmhnaw hlir a inbel avangin ralkhat aṭang chuan amah, Sudden-a chu a ang hle a ni. Chu bakah, amah lo thlirtute, Cullane-a leh a hote chuan tu nge a nih an lo hre mai thei lo va, Sudden-a ni ngei turah an lo ruat tlat bawk a ni.

Mi ṭhahnem tawk tak, sawmthum chuangin Sudden-a ni ngeia ringa lo kâp an ni bawk a, silaimu chu Jenny taksaah chuan a lut hnem hle a. A sakawr tlûk rual rualin a sakawr aṭang chuan Jenny chu a leng lawp mai a, sakawr tihkhuk avanga vaivut khu chu a tlukna laiah chuan a ding chho mup mup bawk a.

Vaivut khu a han reh fel chiah tih chuan Cullane-a chuan a kut a'n phar chho a, zawi muangin a hote nen chuan sakawr leh Jenny leh rengna lam chu an pan ta a. Chutih lai chuan Sudden-a chuan a lo thlir reng a. An mi kahhlum bul an han thlen chuan Cullane-a chu sakawr aṭangin a chhuk a, an mi kah hlum lam chu a pan ta a.

An mi kahhlum bulah chuan a han ṭhingṭhi a, tu mah reng ṭawng chhuak an awm loh avangin a reh vung vung a; mahse, nakin deuhah chuan lungchhe taka Cullane-a rawn ṭap chhuak ri chu Sudden-a chuan a hre ta a. Old Billy Cullane-a chu a tho chhuak a, ngui tak chungin a sakawr chu a pan nghâl a.

Hreh tak leh chau ta deuh ni awm taka Cullane-a, harsa ti tak chunga a sakawra a chuang kai a hmuh veleh chuan Sudden-a pawh a chuanna sakawr aṭangin inzo takin a zuang thla a, hmanhmawh takin kawtlaia a silai tla reng chu a chhar sawk sawk a; Yope-a, inthiam lo tak chunga bang nghenga lo ding reng chu a pan ta nghâl a.

Yope-a chuan, "Severn, ka tihpalh liau liau a ni. Ka tihpalh a nih chu aw, min hre thiam hram hram teh," a lo ti sawk sawk a. Sudden-a chuan Yope-a darah chuan a han beng thak thak a, "Pete, a ṭha e, engkim a ṭha vek e," a han ti a.

Yope-a chuan, "Mahse, mahse, Jenny kha an lo that alawm. Severn, sihal ang leka an lo kah hlum tak khu! Keima tih sual vang vek a ni si a, ka tih palh liau liau a ni," a ti leh mawlh mawlh a. Sudden-a chuan, "I thil tihpalh tawh zawng zawnga tihpalh ṭha ber a la ni ngei ang; Jenny khu anmahni zinga mi a ni alawm," a lo ti vat a.

Mak ti êm êm hian Yope-a chuan, "Jenny maw? Severn, eng thu nge maw i sawi tâk chu le?" a lo ti a. Marshal chuan, "An zinga mi pakhat a ni alawm. A pasal kha Cullane-a fate zinga pakhat a ni a, Cullane-a hnenah engkim a hriattir ṭhin a ni. Kan chet dan zawng zawng, kan ruahmanna zawng zawng, a bo a bang awm miah lovin a hriattir zel ṭhin a ni," a ti ta a.

Yope-a chuan, "Ka ring thei lo. Ka ring thei hlawl lo!" a la ti ṭalh a. Mahse, Sudden-a chuan, "Ring mai rawh. Tuna a dinhmun anga min dintir tum khuan khaw chhung aṭanga min khalh chhuah hi a tum a ni," a ti ta hmiah a. Chuti chung pawh chuan Yope-a chuan, "Cullane chhungkaw zinga mi! Rin harsa ka va ti em!" a la ti ta fo va.

Marshal chuan, "Pete, rang takin i awmna tur hmun pan vat rawh, minute hnih khat lekah an rawn che tawh ang. Eng pawh ni se, i signal pek avangin ka lawm e, kan nauteho pawh an lo inring vek tawh ang," a ti ta a. Yope-a chu a bu nghut a, Jenny dinhmun chu mak ti taka ngaihtuah chungin a awmna tur hmun a pan ve ta a.

Severn-a chuan phaizawl lam chu a han thlir leh vang vang a, ring fahran hian, "Heta hi an lo kal ta," a ti ta tuar a. Cullane-a leh a hote chuan Red Indian-ho ang maia sakawr chunga a phek thei ang bera bawk chungin chak lutuk tak mai hian khua an rawn pan ta a. Khaw chhunga mite pawhin engkim an lo hmu reng a.

Cullane-ate chuan Biak in lam, vengtu tlemna deuh lam chu dîng takin an rawn pan a, Sudden-a pawh chuan chu lam chu a pan ve ta a; mahse, a hote zinga a rin deuh deuh Turnbull-a te, Ogston-a te leh Drew-a te chuan ngun takin an lo thlir reng a, an inring êm êm a ni tih pawh a va hmu ta thuai a.

Ogston-a'n, "Severn, silaimu chu a leng ṭan ṭep a ni ta," a lo tih chuan chhang lem lovin Severn-a chu a bu nghat a, In chung danga mite, inring taka awmho chu a han thlir kual thuak thuak a. In chung pangaah mi pathum zel, silaimu ngah tâwk tak tak a dah vek a, In tawp ber, Montay-a in chungah phei chuan inrin leh chuan ngaihna awm hauh lovin Rick Main-a te, Les Lawrence-a te leh Paul Shearer-a te an awm reng bawk a.

Main-a chuan, "Paul, ding lama target khu nangin tum la; Lawrence, nangin a laia mi khu lo kâp rawh; keiin a vei lam ber khu ka tum ang. Pathum ka chhiarah kâp ang che u, inring rawh u le," a han ti zung zung a. Anmahni rawn beitu turin yard zali (400) vel an rawn thleng tawh tihah chuan, "Pakhat," a han ti ṭan a.

A chhiar muang hlein a lang a, Shearer-a phei chuan, "I hmanhmawh lo lam deuh a ni lo maw?" a lo ti a. An lo hnai hle tawh tihah chuan Shearer-a zawhna ngaithla lek lo hian, "Pahnih," a'n ti leh a; an awmna zawn chiah chiah an rawn thlena, "Pathum," a tih rual chiah chuan mi pathumte silai chu a pûak rual ta ṭhawt a.

An thil kah chu leia lehkha var, lo lang chang chang chu a ni. Chu lehkha var zawm chiah chuan thuk lo deuhah bur a awm a; chu burah chuan silai hlo ṭhahnem tâwk tak an khung a; khatia an zuk kah chiah khan ring fahranin a rawn pûak ta ṭhuai ṭhuai a. Meikhu nasa tak a rawn chhuah bakah vaivut khu pawh a ropui tham hlein, a pûak ri nen sakawrte chu an chi-ai nasa ta mai a.

Namen lo leh thunun theih loh khawpa buaina lo chhuak ta a. Sakawr chu an hram vak vak a; tlan zel ngaihna pawh hre lovin hnungtawlh pahin an ding uaih uaih hlawm a; ṭhenkhatte phei chuan thui tak tak thlengin an mi phurhte chu an vawrh nawl nawl ta mai a. Sakawr chung chuangte pawh chuan eng mah tih hleih theih an nei bik lo, mangang takin ring tak takin an au tuar tuar hlawm a.

Chutih lai tak chuan, in chung danga mite kha an rawn ding chhuak a, chûng mi sual rualte chu suan tlangin an rawn phuh ta mial mial mai a. Silai sawm panga zetin Cullane-a leh a hote chu kâp a ni bawk a, a manganthlak duh phian ang!

Buaina rapthlak tak karah ṭhenkhatte chu an hnungtawlh a; Cullane-a chuan a hote chu a'n hui khawm leh a, cavalry-ho tih dan dik takin Biak in hnung lam pana buaina chu tlansan turin thu a han pe a, "He lai hi chu 'thang' a ni e, hmun dang aṭangin i bei mai ang u," tia a áu thawm chu in chunga mite pawhin an hre phak a.

Mi sual rualho chuan chu lai hmun chu tlansanin Biak in panna lam kawtthler chu an pan ta a, an ṭhiante pasarih lai, chu lai hmunah chuan thiin an hnutchhiah ta a ni.

Biak in hnung lam panna kawtthlerah chuan Wagon pahnih hi a awm a, chu chuan kalna tur kawng chu a hnawh phui vek a. Chu wagon hnung lamah chuan Tom Long-a leh Poynton-ate an awm a, eng lai pawhin Tom Long-a chuan churut a fawp khu reng a; Poynton-a kut chuan leia awm reng bawm chu a hlat lo reng reng bawk a.

Cullane-a leh a hote'n wagon an rawn thleng chiah tih chuan Poynton-a chuan dynamite chu a bawm aṭangin a la chhuak a, Tom Long-a'n meiin a lo dep a, wagon hma lam chiahah chuan a va vawm ta a.

Cullane-a leh a hote mangang chu hmuhnawm tak an ni. Tom Long-a chu a nui var var a, Poynton-a'n a dang a rawn lâk leh chu a han dep kai leh a, sakawr chung chuang pakhat, phun nang nang hnuaiah ngei chuan a va vawm puak leh ta dur mai a; chu pa chu a phun zui rei ta lo.

Chutih lai chuan in chung pakhat aṭangin Mexican pakhat hi a rawn ding chhuak a, Cullane-a hote tal buai lai chu a zuk kâp a; pakhat chu a kâp let tawp a; pakhat chu a darah a thawisak a; mahse, chutia a ding lai chu lei lam aṭangin an rawn kâp chho va, Mexican-pa chu a eu awrh a, a thi ta nghal a.

Dad Poynton-a leh Tom Long-ate chuan an awmna chhuahsan a hun tih hriain fuse sei zet chu an mût khu a, an insaseng ta a. Chumi rual rual chuan Cullane-a hote chuan wagon kha ṭanhmuna hmangin a rawn bèl hlawm a; chutah, Poynton-a dynamite dah kha a puak leh ta dur a, Wagon pahnih chu a vawrh darh chiang kher mai! A chhunga awmte pawh chu dama chhuak chi ziazang an ni lo.

Chutih lai tak chuan Sudden-a chuan, "Heta hi ka lo kal e," a han ti a. A pistol pahnih chu rang lutuk takin, a tum tak fuh zel si hian a kâp pûak ta zawt zawt a; sakawr chung chuang ṭhenkhat chu an bu tla tawl tawl mai a. Mike Turnbull-a te, Ogston-a te, Tom Long-a te, Poynton-a leh Drew-a te chuan anmahni beitute hmasawn tumna chu an lo dal zo ta! An silai hmeh puah reng reng a thlawna hmeh puah a awm lo.

Sudden-a chuan insaseng a hun ta tih hriain, "Insawn tawh rawh u," a'n ti tuarh a, corral lam pan chuan a tlan ta nghâl a. Chutih lai chuan an inpawmchilh a ni ngawt tawh a, Mike Turnbull-a chuan sakawr chung chuang pakhat chu a'n ṭham thla nawk a, leiah hneh zetin a paih ta a; anmahni rawn beitute pawhin Ogston-a ke ding lamah an kap ve bawk a.

Hmanhmawh takin Sudden-a chu laipui awmna lamah a tlan phei a, Cullane-a hote awm khawm lai chu a han ṭhawng ta a, a hneh pawh a hneh hle mai. Jail lam panin a tlan leh a, Cullane-a'n Jail bang a kah lai chiah chuan a hnung lam aṭangin Sudden-a chuan, "Khatah kha chuan a awm lo," a ti ta sap a.

Old man Cullane-a chu zawi muangin a rawn hawi a, a pistol hmawr chu a la khu vat vat a, "Hetah hian a awm lo maw?" a lo ti a. Sudden-a chuan, "Biak inah a awm, i hote eng mah lovah i tihlum ta mai mai a nih hi. Cullane, i silai paih rawh, ka man a che!" a ti ta a. Chutih lai chuan silai pûak thawm a awm ta lo; mahse, chutih lai vek chuan Cullane-a chuan, "Billy, kâp nghâl rawh," a ti ta tuarh a, a hnung chiahah chuan Billy Cullane-a (Billy the Kid) kha a lo awm chu niin!

Rang lutukin Billy-a chuan a silai a han phawi a; mahse, a kah hmain Sudden-a chuan vir zawk pahin a silai chu a hmet pûak dawt a; a hnung lama Cullane-a'n a rawn kah hlauvin a bawk nghâl rawp bawk a. Cullane-a lam chu a han hawi nghal vat a; mahse, mak ti taka a meng phâwk vel leh a pistol tla ta leh a ngháwnga chemtê lo bur vu chu a hmuh a ni ta mai. Billy-a lah kha a mit leh mit inkarah tak a silaimu chuan a lo verh siah a, a tluk hmain a lo thi fel der tawh a lo ni.

Sudden-a chuan chau taka Poynton-a leh rengna lam chu a pan vat a, a bula a va țhingthit rual rual chuan, "Don, nangmah i ni maw?" a lo ti a. "Ni e dad, ṭawng suh; chawl rih rawh," Sudden-a'n a han tih chuan Poynton-a chuan, "Ni lo, ka chhungah eng emaw a lut ta.. ka ti fuh... ka ti fuh em?" harsa ti takin a rawn ti a. Sudden-a chuan, "I ti fuh a, i that ta e. Ka nunna i chhanhim a ni," a lo ti thuai a.

Poynton-a chu a ngawi vang vang a; mahse, nakin deuhah chuan, "A nih leh, kan hneh em Don? Eng mah pawh ka hre thei ta meuh lo," a'n ti leh a. "Ka ṭhian, kan hneh e, engkim a fel ta," inseh ruh ṭeuh chung hian Severn-a chuan a lo ti a.

Poynton-a chuan, "Don, i huatthu a ni em lo vang a, Texas tlangval an tih kha i ni em?" a'n ti leh hram a. Severn-a chuan, "I ring dik chiah e," a lo ti thuai a. Poynton-a chuan, "Sudden-a bula hnathawh leh thih hi inchhuan thlâk ka va ti em!" a ti a, a thle bak a, a thi ta a.

Main-a leh Shearer-ate pawh an lo thleng a, Poynton-a ruang an en vang vang hnu chuan Main-a chuan, "Don, mi ṭhenkhat kan chan ve nual; Montay-a, Drew leh Turnbull-ate an kâp hlum a ni," a han ti a. Eng mah sawi tur hre lovin an ngawi ṭhap a; Sudden-a chuan lei lam a bih ngar a, "Suahdur leh bawngtuthlawh han la rawh u, thawh tur kan nei ta nual a nih hi," a han ti sap a, ngawi rengin thlan an lai ta mawlh mawlh a.

Kar khat hnuah chuan engkim a chin fel tak avangin Severn-a pawhin a chhuahsan ve ta a. A chhuah hnua a chanchin, kimchang taka Main-a'n, "Kha pa, Don Severn-a kha Sudden-a an tih ṭhin kha a ni. Bleke of Arizona Governor rawn tirh a ni a, Bleke-a hian a fa ang tluka a hmangaih leh a duat, a rin em em a ni," tia a han sawi chuan mak ti êm êmin khaw chhung mite chuan an ngaithla ta a.

A TAWP TA...

Min lo chhiarsak ṭhintu zawng zawngte, ka lawm em em e. Sudden-a thawnthu ka thawh ve theih chin chu a zo ta; Billy the Kid leh Wild Bill Hockock thawnthu lamah ṭuan tawh ang aw, in lo chang leh ṭheuh dawn nia.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)