SHERLOCK HOLMES - THE VALLEY OF FEAR (COMPLETED)

Hnuchhuina lampang chi ho
Rozami pachuau
Posts: 305
Joined: March 17th, 2018, 7:40 pm

Re: SHERLOCK HOLMES - THE VALLEY OF FEAR Chapter 1 - 12

Unread post by Rozami pachuau » May 29th, 2018, 7:50 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 13
(Rozami Pachuau)

HLAUHAWM

McMurdo pawh chu Lodge Pro-Pastor-ah a kai chho ve ta a, engtikah emaw chuan an puithiam lalber, McGinty-a ai pawh a la awh mai ang tih rinhlelh ngam pawh a ni tawh lo. Tun apangin a thu lo leh a hriatpui loh chuan thil eng mah an ti ta mang lo va. Freemen-ho zingah a tlangtla tual tual a; mahse, Vermissa kawtthlerah chuan hnung lamah chhiatkhumtu leh mitngo râng hmuhtu a ngah tulh tulh mai.

Mipuite chuan an tawrh nin tawh em avangin inhlawm ruh a, anmahni tiduhdahtute chu do let ve an tum rilru tlat tawh a. Thuthangah phei chuan chu khuaa mi cheng, mi laktlak deuhho chu Herald Pisaah an inhmu khawm a, ralthuam an sem vel ni awm a ni.

Mahse McGinty-a leh a hote chuan chutiang thil mai mai chu an ngai thutak vak lo. An pawl chu an tam a, an buluk a, ralthuam lamah an pachhe lo bawk tlat. Chutih laiin anmahni dotu turte chu an awm darhsarh a, an tha a chau bawk si. Tun hma ang bawkin thuthangah an tawp leh kual vel mai mai ang.

May thla a ni a, Inrinni a ni. Inrinni zan hi chu Lodge Thlarau thawh zan a ni a, Thlarau tlem azawng chang ve tur chuan McMurdo pawh kal a tum a; a In a chhuahsan dawn chiah chuan Morris-a, pa vun pan deuh chu amah hmu turin a lo kal a. A hmel han en chuan a hah hmel kher mai. McMurdo-a hnenah chuan, “Mr McMurdo, I hnenah duh duh ka sawi thei ang em?” a han ti a. McMurdo chuan, “Teh reng e,” a lo ti a.

Morris-a chuan, “I hnenah ka rilru ka hrilh vek che a, Hotupa’n a zawt chung che pawhin eng mah i sawi chhuak ta lo va. Kha kha ka theihnghilh mai thei lo a ni,” a han ti phawt a. McMurdo chuan, “Min rin ve tlat si chuan tih tur dang vak ka nei em ni? I thu sawi kha ka pawm ve lo tih mai chauh alawm,” a ti mai a. Morris-a chuan, “Chu chu ka hria alawm. Hetah hi chuan nang chauh hi duh duha ka biak theih, chuti chung pawha ka vun a la him theihna i ni a.

" ’Tah hian thu ruk ka pai a...,” tih pahin a kut chu a âwmah a’n dah a, “Hei hian ka nun a ei chhe mek a ni. Keia thinlung ni lo, nangni zinga a tu ber thinlungah hian emaw ka ngaihtuahna ang hi lo lut ta zawk se ka ti ngawt mai. Ka puan chhuah chuan a hnu leh chu thih a ni mai a; ka puan chhuah si loh chuan kan vaia chhiatna a ni si. Lalpa min han ṭanpui teh, a ngaihna reng reng ka hre tawh lo mai,” a ti a.

McMurdo chuan chu pa chu a melh reng a. Ani lah chu a khûr deuh hlarh hlarh bawk a. McMurdo chuan zu a’n thli a, Morris-a chu a pe a. McMurdo chuan, “Khatiang kha nangni ang awm dan chu a ni. I thuruk chu i han ngaithla ang hmiang,” a ti a. Morris chuan zu chu a’n dâwt khawlh a, a hmaiah chuan tisen tlem a lo awm leh a. Ṭawngkam khat lekin ka sawi vek thei mai ang. Mi sual chhuitu pakhatin kan pawl hi a chhui mek a ni,” a ti ta a.

Mak ti âwm fe hian McMurdo chuan a’n en a, “I rilru a buai a nih hi. He hmun hi ‘police’ leh mi sual chhuitu hlirin an khat lo vem ni? Engtin nge min tihnat theih ngai?” a ti a. Morris-a chuan, “Ni lo, he pa hi chu he lai bial vela mi hi a ni lo. I sawi angin heng laia mite chu kan hria a. Kan chungah eng mah tih theih an nei lo; mahse, ‘Pinkerton’ an tih hi i hre tawh ngai em?” a han ti a. McMurdo chuan, “Chutiang hming chu khawiah emaw chuan ka chhiar tawh,” a ti duh lek a.

Morris-a chuan, “Ka hrilh a che, anni’n an chhui tawh che chuan i ropui ni a hnai tihna a ni mai. Sawrkar uibukho anga, ‘I theih leh man la, i theih loh leh man lo mai rawh,’ tih ang mai mai hi an ni ve lo. An seh tawh thlah duh lo mi, an tih tawh bansan ngai lo, ti tura an inpêk tawhna chu hlen chhuak ngei ngei zel an ni. Pinkerton mi pakhat chauh pawh he thilah hian a lo tel ve chuan kan chhe vek a ni mai,” a ti ta a.

McMurdo chuan sam zetin, “Kan thah a ṭul a nih chu,” a han ti mai a. Morris-a chuan, “Chu chu a ni maw i han suangtuah theih hmasak ber! Lodge rorel dan pawh chu chiah chu a ni ang. Tual thahnaah bawk a tawp leh dawn,” a han ti a. McMurdo chuan, “Ni e, a nih loh leh tual thahna hi eng nge ni? Heng laiah hi chuan ‘tual thah’ tih leh ‘behlawi hnah no’ tihte chu an hman rim zawng a inang reng alawm,” a ti mai a.

Morris-a chuan, “A ni khawp mai; mahse, mihring thah tur kâwk chhuaktua ṭan kher chu ka tih tur niin ka hre thei lo. Ka nunkhuain nawm tih ni a nei leh tawh ngai lo vang. Chuti chung pawhin a dawt lehah chuan kan nunna ngei hi a ni ve tawh mai thei bawk si. A engti hian emaw ka’n awm dawn chu aw?” a ti ta vawng vawng a.

McMurdo pawh chuan Morris-a thu sawi chu a ngaihtuah nasa ve hle tih a hriat mai. Hlauhawm lo thleng tur lo hmachhawn chu a ṭul reng a ni. Morris-a darah chuan a’n dawm a, a’n sawi nawk nawk a, “Ngaithla rawh, khatia duh loh chung rai ang maia ṭhut ngui reng khan thil ṭha eng mah a thlen lo vang che. Thil awm dan chu chiang deuh zawkin i ngaithla teh ang. He pa hi tu nge ni? Khawiah nge a awm? Engtin nge a chanchin chu i hriat? Eng vangin nge ka hnenah i lo kal?” a ti ta duah mai a.

Morris-a chuan, “I hnena ka lo kalna chhan chu thurâwn min pe duhtu tur i nih vangin a ni. Tun hma, heta ka lo kal hma chuan khaw chhak lamah dawr ka nei a, ka ṭhian pakhat chu thirhrui thawnna pisa lamah a thawk a. Hei nimina ka dawn, a lehkha pawh ka kawl e. He lai hi a ziahna chu a nih hi. I duh chuan i chhiar thei ang,” a han ti a. Chu lehkhaah chuan hetiang hian a lo inziak a :

"Kha lamah khan Scowrers-ho hi engtin nge an awm? Chanchinbu lamah hian an chanchin kan chhiar zing hle mai. Nang leh keia kar thu chauh a ni bawk a, thil awm dan ka hriat ve thuai ka inbeisei. Pawl lianpui pui pali leh Railroad Company pahnihin he thil hi tih tak zetin an buaipui a. An duh ang ngata thil tih an tum ruh hle a, an duh dan angin thil a kal ngei bawk ang. An bei tak zet a nia. He thil hi Pinkerton-ho pawhin he mite thlazar hnuai aṭang hian an bei ve bawk a, an pawl zinga mi ṭha ber mai, Birdy Edwards chu an chhawr mek. He thil hi tihtawp vat tur a ni,"

Morris chuan, “A thu belh kha han chhiar leh teh,” a lo ti a. McMurdo chuan hetiang hian a’n chhiar leh a, "He thil hi nang leh keia inkar thil a nih avangin ka’n hrilh mai che a ni. Khawi dangah mah a put chhuak tur a ni lo. He laiah chuan thu ruk ziah dan chi hrang hrang, a awmzia hriat loh pui pui kan chinglet reng mai a ni,"

Chu lehkha chu McMurdo chuan ngawi rengin eng emaw chen a’n lek vel a. Chutah, “He thil hi hre vetu dang an awm tawh em?” a han ti a. Morris-a chuan, “Mi dang ka la hrilh miah lo,” a lo ti a. McMurdo chuan, “Hei i ṭhianpa hian mi dang, hetiang lehkha han thawn âwm chi ṭhian a nei ang em?” a ti a. Morris-a chuan, “Pahnih khat dang chu a hria ang chu,” a ti leh a. McMurdo chuan, “Lodge mi leh sa maw?” a’n ti a. Morris-a chuan, “Ni maithei,” a ti ringawt a.

McMurdo chuan, “Ka han zawhna chhan che pawh he mihring, Birdy Edwards-a pianhmang hi a lo hrilh tak bikin ka ti mai a nia. Tichuan a pianhmang hrilh fiahna kan neih chuan kan ûm let ve thei tawh ang,” a ti a. Morris-a chuan, “Chu chu thil awm thei a ni; mahse, a hriat bik kher chu ka ring lo. A hna lam a nih avang leh a thil hriat chhun a nih avang maia min hrilh a ni a, engtin nge he Pinkerton mi hi a hriat bik ang?” a ti ta a.

McMurdo chu a tho thut a, “Chhe heu! Ka hre ta le. Ka lo va han chhaw reng reng em! Mahse kan vannei hlauh ve! Thil eng mah a tih hman hmain kan dah ṭha mai ang. Morris, he thil hi ka kutah i dah duh ang em?” a ti ta a. Morris-a chuan, “Teh reng mai. Ka thih leh dam thu a kaihhnawih tel ve dawn loh phawt chuan pawi ka ti miah lo,” a lo ti a.

McMurdo chuan, “Lo ngawi reng la, keima’n kan suasam vel ang e. I hming pawh a ri tel ve hlek lo vang. He lehkha hi ka hmuh zawk ang maiin ka’n phusa vel ang e. Chuti chuan i lung a awi tawk ang em?” a ti ta a. Morris-a chuan, “Ka duh dan tak a ni,” a lo ti ve thlap a. McMurdo chuan, “Chuti a nih zawngin theihnghilh vek la, i kâ chîp hmak mai rawh. Lodge lamah ka’n kal ang a, kan Pinkerton mihring chu a inchhir hun a hla tawh vak lo vang,” a ti a.

Morris-a chuan, “He pa hi a thah chu i that êm lo vang chu maw?” a’n ti a. McMurdo chuan, “Ka ṭhian, i hriat tlem poh leh i mut a tuiin i chhia leh ṭha hriatnain a hawlh buai nêp ang che. Zawhna zawt zawt lovin thil chingfel tur hian min ring mai teh. Tunah chuan a hnukah ka vuan tawh alawm,” a ti a. Morris-a chuan, “A thisen chhuak tur mawhphurtuah hial a nia ka inngaih ni,” a han ti a.

McMurdo chuan, “Mahni inven hi tual thahna a tling hlei nem. Ani nge keini tih a ni mai. He lai velah hian he pa hi kan se zawl chhuah mai mai zawngin kan chhe vek a ni mai. Unaupa Morris, Lodge i chhanhim avangin Tisachungathuneituah kan la thlang ang che chu,” a tih khum a.

Mahsela, McMurdo-a chet dan aṭang chuan a sawi ang ngawt aiin chu thil chu a ngaihtuah nasa tih a hriat mai. Dikna lama ṭang tawka a inhriat loh vang a ni maithei; Pinkerton pawl hmingṭhatna chuan a thauvah a man ve ta pawh a ni maithei; Scowrers-ho nuai chimit tura pawl lianpui pui inzawm khawm chuan a ngaih a tiṭha lo pawh a lo ni zawk maithei.

A enga pawh chu a ngaihṭhat lohna chhan chu lo ni ta teh reng sela, a han chet danah chuan a chhe ber lo thleng tura inpuahchah lawk a ang riau mai. A awmna In a chhuahsan hma chuan amah hêk theitu âwm, lehkha a hnutchhiah reng reng chu a tiriral vek a. Chutia a’n tih hnu chuan a ngaih a ṭha sawt hian a lang a; mahse, a ngaihṭhat lohna chu a la reh famkim chiah lo a ni ang, Lodge lam pana a kalnaah chuan Shafter-a In a’n tlawh kawi leh hram a.

Chu Inah chuan a luh pawh Ettie pa chuan a phal tawh lo va, chuvangin, tukverh lamah thâwm a va neih a, Ettie chu a lo chhuak a. McMurdo-a hmela ramhuai ze them lo lang chu Ettie chuan a chhiar thei nghal mai a; chu bakah, a hmel hlauhawm tak mai pawh chu a hmu nghal a. Ettie chuan, “Eng thil emaw a awm a ni! Jack, dinhmun hlauhthawnawm takah i ding a nia!” a lo ti chawt mai a.

McMurdo chuan, “A ni khawp mai; mahse, duhber, chuti taka chhia chu a ni lo. Eng pawh ni se, a chhiat lehzual hmaa chet kan thawh a finthlak ang,” a ti a. Ettie chuan, “Chet thawh a?” a lo ti a. McMurdo chuan, “Hmanah khan engtik niah emaw chuan ka la kal bo ang tiin ka tiam tawh che a. Tunah hian chu hun chu a lo thleng ta niin ka ngai. Zaninah thu thar ka hria a, thu thar lawmawm loh tak mai, buaina a inmung ṭan tih ka hria,” a ti a. Ettie chuan, “Police maw?” a lo ti a.

McMurdo chuan, “Pinkerton mi pakhat a ni; mahse, bawihte, nang zawngin chutiang awmziate chu i hre lo vang a, keini tan chutiang thilte chu eng ang fakauva pawimawh nge tih i hre mai bawk hek lo vang. He thilah hian ka tel thûk ve vak lo va, rang taka ka inhnuh dawh leh a ṭul maithei a ni. Ka kal bo dawn chuan i lo kal ve ang ti khan min hrilh a,” a han ti a. Ettie chuan, “Jack, awi, nangmah i inchhanhim a ni ve mai dawn asin,” a han ti a.

McMurdo chuan, “Ettie, eng kawngah emaw hi chuan ka rinawm ve asin. He khawvela thil awm eng ai mah hian i lu-a samzai khat pawh kha ka ngainêp dawn lovin ka ngaihlu dawn hlei nem, ka mita ka hmuhna che, chhûm chunga rangkachak lalṭhutthlenga i ṭhutna ata hi a hniam zawngin eng vang mahin ka hnuk dawn reng reng lo che. Min ring ngam ang em?” a ti ta a. Eng mah sawi lovin Ettie chuan McMurdo-a kut chu a’n dawm a.

McMurdo chuan, “Kan tana kawng inhawng chhun a nih avangin ka thu sawi hi ngun takin ngaithla la, ka hrilh ang chiah chein engkim i ti tur a ni. He lai hmunah hian eng emaw chu a thleng ngei dawn a, ka thlîngah hian a thleng dawn tih hriat theihna ka nei tlat a ni. Kan zinga tam tak hi chuan mahni sa himna ka zawn a ṭul maithei. Chung zingah chuan kei pawh ka tel ve tho mai. Zan a ni emaw, chhun a ni emaw, ka kal hun hunah chuan min rawn zui ve tur a ni,” a ti a.

Ettie chuan, “Jack, ka rawn umzui ang che,” a lo ti a. McMurdo chuan, “Ni lo, chutiang a ni thei lo. He lui ruam hi ka tana an khar vaih chuan ka lo kir leh thei dawn hlei nem, engtin nge ka hnutchhiah mai theih ang che? Police-ho hlauva ka bihrukte pawh a ṭul maithei a, thu chah takngial pawh ka chah remchang thei miah lo mai thei che asin. Ka rualin i lo kal ve tur a ni. Ka lo kalna ramah hian hmeichhe ṭha tak pakhat ka hria a. Chu nu hnenah chuan kan inneih theih hma chu ka hnutchhiah dawn che a ni. I lo kal ang em?” a ti leh ta a.

Ettie chuan, “Aw, Jack, ka lo kal ang,” a ti ta a. McMurdo chuan, “Min rin ngam avangin Pathianin malsawm che rawh se. Heti pawha ka la vanduai fo chuan hremhmunah pawh ka awm ve an phal lo hial ang. Khai le, Ettie, hei hi lo chhinchhiah rawh le, I hnenah chuan thu kam khat chauh emaw ka sawi hunah i hriat rual rualin thil dang dah vekin rêl chawlhmuna innghah khawmna pindanah i kal nghal ang a, ka rawn lam hma che chu chutah chuan i lo awm tur a ni,” a ti ta a.

Ettie chuan, “Zan ni raw sek sek, chhun ni raw sek sek, i thu ka hmuh veleh ka lo kal ang e,” a ti ve ta a. Chutianga tlân chhuahna lama an inbuatsaihna a kal tluan tak deuh avang chuan rilru thâwl deuh hlekin McMurdo chuan Lodge chu a pan ta a. Lodge chu an lo inhmu khawm tawh a, McMurdo chuan chhinchhiahna eng emaw zat a siam a, mi dang chhinchhiahna pêk a lo dawn chhâwn fe hnuah chauh Lodge In chhung chu a lut thei a.

Pindan chhungah chuan mi an lo zi nuai nuai a, a va luh ve chuan an lo lawm dar dar hle a. Pindan chhunga mei khu luih luih karah chuan Tisachungathuneitu sam pheng zet mai te, Baldwin-a sakhmel nunrawnnaa chhûn pawlh te, Harraway-a hmel, mulukawlh ang tak mai te leh mi dang, Lodge hruaitu lawk deuh deuh te pawh a va hmu nual a. Chutianga a thu thar hriat han ṭâwmpui tura an lo awm thliah mai a’n hmuh chuan a hlim pawh a hlim hle mai.

An inkhawm kaihruaitu chuan, “Unaupa, kan han hmu hlauh che chu a va’n lawmawm em. He laiah hian thil pakhat, Nahaia thluak hmanna chi tak mai kan nei asin,” a lo ti a. A ṭhut rual rual chuan a bula ṭhu chuan, “Lander-a leh Egan-a alawm maw le. Stylestown-a Crabbe putara an thah chungchangah Lodge-in lawmman a pe a. A tu zawkin nge Crabbe putara tihlumtu silaimu kap chhuak a, a tu zawkin nge sumpui chang dawn tih thu-hlaah an buai tlat a ni,” a lo ti mawlh mawlh mai a.

McMurdo chu a ṭhuthmun aṭangin a ding chhuak a, a kut a phar chhuak nghal a. A hmel an han hmuh chuan inkhawmna chhimtute chu an ngawi nghal duk mai a. Thil eng emaw tak zawng an beisei chiang mai. Thupui fûn aw zet mai hian McMurdo chuan, “Hotu Zahawm Ber, thil hmanhmawh tak mai ka rawn pu lut a,” a han ti a.

Hotupa chuan, “Unaupa McMurdo chuan thil hmanhmawh a rawn pu lut a nih chu. Lodge-ah hi chuan a hmanhmawh apiang ngaihtuah hmasak a ni ṭhin, chu chu kan dan a ni. Khai le, unaupa, kan ngaichang reng che a nia,” a ti ta a.

McMurdo chuan a ipte aṭangin lehkhathawn a phawrh chhuak a, “Hotu Zahawm Ber leh unaute u, vawiinah hian chanchin lawmawm lo thlentu ka ni ta a nih hi; mahse, kan chhiatna thlen thei tur thil kan chunga a lo thlen dawna hre lova lo tuartu nih ai chuan hetia hriat tlana sawiho hi a ṭha zawk e.

"America rama pawl inhlawm khawm lian ber ber leh sum leh paia hnianghnar ber berte hi kan chhiatna zawngin an inhlawm ruh a. Tunah ngei pawh hian Pinkerton mi leh sa pakhat, Birdy Edwards an tih chu he lui ruamah hian a awm a; chu mihring chuan kan nghawnga hruivalh a inkual theihna tur leh pindan thima kan ṭhut vawih tlawk tlawk theihna turin kan chet dan leh thil tih dan a khawn khawm mek a ni. Chu chu a nia, thil hmanhmawh, sawi ho tura ka rawn put luh chu,” a ti ta a.

Chutia a’n tih chuan pindan chhung chu mitthi khua ang mai hian a reh duk a. Chutah inkhawm hruaitu a lo ṭawng chhuak a, “Unaupa McMurdo, chutiang thil chu a awm ngei tih i hriat theihna chu khawi lam thil nge ni?” a han ti a. McMurdo chuan, “He lehkhaah hian chutiang chu a inziak vek a, hei a lehkha chu ka ken hi,” a han ti a.

Lehkhaa thu inziak chu a’n chhiar a. Chutah, “He lehkha chungchang sawi zui hi chu ka chhechham tawh dan nen a inmil loh avangin ka hrilh fai kelh thei lo vang che u a. He lehkha hi in kutah ka pe thei bawk hek lo che u; mahse, chuti lam chu Lodge tana thil ṭangkai leh hnemhnanpuiawm a ni lo. Ka thil hriat chu ka hriat ang angin in hmaah ka pharh e,” a han ti leh ta a.

Unau zinga a chalchang deuh pakhat chuan, “Pu Laimin, he Birdy Edwards an tih hi a chanchin ka lo hre ve nual tawh a. Pinkerton-ho zingah chuan a ṭha ber neiha an neih a ni,” a lo ti a. McGinty chuan, “A hmel putze hria in awm em?” a han ti a. McMurdo chuan, “Ka hria e,” a lo ti a. Pindan chhunga mite chu mak tiin an phun mur mur a.

Chutah McMurdo vek chuan, “Ka ngaih ve dan chuan he pa hi chu kan tan chuan bel chhunga sa a ni mai. Fing tak leh rang taka kan chet chuan he thil hi chu kan tifel thuai thei ang. Min rin tawk a, min ṭanpui dawn chuan eng mah hlauh tur kan neiin ka hre lo,” a ti leh ta zel a. Hotupa chuan, “Eng thil nge hlauh tur kan neih reng reng? Kan thil tih hi eng mah hriat theih a nei hlei nem,” a lo ti chher chher mai a.

McMurdo chuan, “Councillor, nang ang tluka rinawm vek hi chu ni ila chutianga ṭawng mai chu thil harsa a ni hauh lo mai; mahse, he mihring hi mi hausa tawntaw tam tham tak tlawh chhana che a ni a. Kan Lodge mi leh sa zingah hian lei theih pakhat tal, mi chak lo deuh chu an awm ve i ring lo vem ni? He pa hian kan thuruk a hai chhuak ang a; tunah pawh a lo hai chhuak daih tawh pawh a ni mahna. A thawidamna kawng khat chiah a awm, chu erawh chu a chiang thung,” a ti leh a.

Baldwin-a chuan, “He lui ruam chhuahsantir loh hi a ni mai,” a lo ti bauh va. McMurdo chuan a lu a lo bu a, “Unaupa Baldwin, i ti ṭha kher mai. Nang leh kei hian inhmuh mawhna kan lo nei tawh ṭhin; mahse, zanina i thu sawi chu thu dik elkhên a ni,” a ti leh ta a. Hotupa chuan, “Tunah hian khawiah nge a awm a, engtin nge amah chu kan hriat theih dawn?” a han ti leh a.

McMurdo chuan, “Hotu Zahawm Ber, he thil hi chu Lodge chhungkaw pui zinga han sawiah chuan a pawimawh lutuk a ni ka han ti teh ang. Kan ṭhiante zinga mi, he pindan chhunga awm ve, tu ber emaw pawh han rinhlelh ngawt chu thil thiang pawh a ni lo vang. Mahsela, he mihring hian titi leng lak vel a dawn tam vaih chuan a dah ṭhat a harsa sauh dawn a ni.

"Lodge hi ‘Committee’ rinawm tawk, an mi rin zawng thlang chhuak turin ka ngen duh a - Pu Laimin (Chairman), nang leh Unaupa Baldwin-a leh mi dang panga ka han rawt chhin mai mai a nia. Tichuan, chu ‘committee’ hmaah chuan ka thil hriat leh ka thurâwn pek duh dan chu ngampa takin ka sawi thei ang,” a ti ta a.

Chu a rawtna chu an pawm a, ‘committee’ mi leh sa tur pawh chu an thlang ta nghal a. Hotupa leh Baldwin-a bakah chuan mulukawlh ang tak, an ziaktu lian, Harraway-a te, Tiger Cormac-a te, an sum enkawltu Carter-a te leh hlauh nei lo Willaby-a te unau an thlang a.

Chumi zana an Thlarau chan chu a san pawh a sang thei lo, a daih pawh an daih rei na hek lo. A chhan pawh mitin rilruah chuan eng emaw a awm a, Dân chakna chuan phuba lakna lamah ke a pên ṭan a, an chenna khawvel, anmahni’n an duha chhûm an zîntir a, an duha khua an tihênna hmun, rei tak an lo chennaah chuan an tan chhûm a zing ṭan ta a ang tlat mai.

Mi dangte an tihthlabar ṭhinte leh mite chunga lungngaihna leh natna an thlen ṭhinte chu an chunga thleng tur chuan a suangtuah pawh an suangtuah der thiam phak ṭhin lo va, chuvangin, an chunga thleng ve thei ta awma a’n lan takah chuan an bangbo lehzualin an hawi phâwk zual a ni. Hma zetin an ṭin darh a, an hotute chu inhmu khawm turin an kalsan ta dial a.

An han ṭhut fal hnu chuan McGinty chuan, “Khai tawh le, McMurdo,” a’n ti chawt mai a. McMurdo chuan, “Nichin maiah khan Birdy Edwards-a chu ka hriat thu ka sawi tawh a. He lai hmunah chuan chu hming chu a hmang lo tih ka hrilh kher che u pawh hi ṭulin ka ring lo. Amah hi mi huaisen tak a ni tih ka hre chiang a; mahse, mi rilru tawi a ni hauh lo. He laia a hming chu Steve Wilson-a a ni a, Hodson’s Patch-ah a thleng a ni,” a han ti a.

McGinty chuan, “Engtin nge heng thil hi i hriat theih?” a lo ti leh ta a. McMurdo chuan, “Ka biak vangin maw le. Kan inbiak lai chuan ngaihtuah nachang pawh ka hre lo va, a hnuah pawh ka ngaihtuah zui hek lo; mahse, he lehkha hi ka’n hmu a, amah a ni tih ka hre chiang mai. Nilainia thlang lama ka chhuk ṭum pawhin rel pindanah ka hmu a, pa deh khirh tak zawng ni ve awm a ni.

"Ama insawi dan chuan chanchinbu lam mi ni awmin a insawi. Chutih lai chuan ka awih ve mai bawk a. Scowrers chanchin leh ama ṭawngkama ‘huaikawmbawlna’ a tih mai chu New York Press chanchinbu tana duh angin a insawi. An chanchinbu-a chhuah tur chu thil engkim mai min zawt a. Thil pawi eng mah chu ka hrilh lo ka ti ngam.

“Ka hnenah chuan, ‘A man ka pe zel ang, man ṭha tawk tak ka pe ang. Kan ‘Editor’ pa duh zawng tur ka hmuh theih chuan ka lei huai ngam viau ang,' te pawh a ti alawm. A ngaihthlak duh zawng ber ni awma ka rin ka’n hrilh kual vel a, chung thil ka hrilh avang chuan cheng za hu vel zet chu min pe a ni. Ka hnenah chuan, ‘Ka thil duh zawng zawng min hmuhsak theih chuan khami lêt sawm kha ka pe ang che,’ a ti nghe nghe bawk,” a han ti a.

Hotupa chuan, “Eng thil nge i hrilh tak?” a ti a. McMurdo chuan, “Ka phuah chawp theih ang ang ka hrilh mai,” a ti mai a. Hotupa chuan, “Engtin nge chanchinbu mi a ni lo tih i hriat theih?” a ti ta zel a. McMurdo chuan, “Ka hrilh ang che u. Rel aṭang chuan Hobson’s Patch-ah a chhuk a, kei pawh ka chhuk ve bawk a. Thirhrui thawnna pisaah ka tei lut hlauh mai a. Chutia ka tei luh lai tak chuan kan mihringa chuan thirhrui thawnna pisa chu a lo chhuahsan ve mek a.

"Chutah a chhuah hnu chuan thirhrui thawntu chuan, ‘Han en teh, hetiangte chu a man lêt ṭhîn awm a ni,’ tih pahin lehkha phek, hawrawp letling insaikalh zawng hlir ni awma ziah khah buai mai hi a’n lek chhuak a. ‘Hetiang hi nitin phek khat a thawn chhuak ziah,’ a ti a. Kei chuan, ‘An chanchinbu atana chanchin thar danglam bik a nih kha,’ ka lo ti a. Chutiang chu a nia, chutih hun laia thirhrui thawntu leh keia ngaih dan chu,” a ti ta a.

McGinty chuan, “Chhei raw! Chu zawng, i ti dik ang; mahse, amah hi engtin nge kan tih dawn le?” a ti ta a. Tu emaw hian, “Engah nge tunah hian kan dah ṭhat nghal mai loh vang?” a lo ti ve bawk a. Pakhat dang leh chuan, “Kan dah ṭhat hma poh leh kan vannei a ni mai,” a lo ti ve bawk a.

McMurdo chuan, “A awmna tur hmun chu hria ila zawn nghal mai pawh ka duh mai. Hobson’s Patch-ah chuan a awm ang; mahse, he In hi ka hre chiang chiah lo,” a han ti a. Chutah, “Ngaih dan ka nei, ka rawtna in pawm duh dawn chuan,” a han ti zui a. Hotupa chuan, “Eng nge ni?” a lo ti vat a.

McMurdo chuan, “Naktuk zingah Patch-ah chuan ka zuk kal ang a. Thirhrui thawntu hnen aṭangin a awmna ka’n zawng chhuak ang a. Ani chuan a awmna a hriat ngei ka ring a. Chutah keimah ngei pawh hi Freeman ka nih thu ka hrilh ang a. Chu ka chaw chah chu a ei ngei ang tih pawh a hriat mai.

"Chu bakah, ka chenna hmuna ka lehkha pawimawh zawng zawng a awm thu leh ka nunna tluka chung lehkhate chu ka ngaih-hlut thu ka hrilh ang a. Mi awm laia phawrh buangbar ka duh loh thu ka hrilh bawk ang. Chutah zan dar sawma ka chenna hmuna lo kal turin ka hrilh ang a, a lo kal ngei ang,” a ti a. McGinty chuan, “Tichuan?” a lo ti a.

McMurdo chuan, “A bak chu in duh leh nangmahniin in chhu zui ve tawh mai ang chu. Pi Mac Namara-i In hi In fâl deuh tak a ni a, nu mawl ve tak mai leh lazar ban tluk zeta bengngawng a ni a. A Inah chuan Scanlan-a nen chauh kan cheng nghe nghe.

"Kan mihringa chuan kan chenna hmuna lo kal a duh a, thu min tiam theih chuan ka hrilh leh ang che u a, zan dar kuaah in pasarih hian in lo kal ve bawk ang a. In chhungah kan hruai lut ang a, nung chunga a chhuah leh theih phawt chuan duh leh a dam chhungin a vanneihzia a ‘Sermon’ ve tawh anga a ni mai alawm” a ti ta a.

McGinty chuan, “Pinkerton-ho chuan hmun ruak luah khah tur an nei dawn a ang hle mai. Chutiang thil a thleng lo a nih chuan ka tisual hle tihna a ni mai. McMurdo, chu chu tawk rawh se. Naktuk zan dar kuaah i Inah chuan kan rawn kal ang. Kawng i’n khar hnan hmak ang a, a bak chu kan tum vek mai ang,” a ti ta a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 30th, 2018, 5:30 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 14 (Last chapter)
(Rozami Pachuau)

BIRDY EDWARDS-A PHIHAWH THU

McMurdo-a'n a sawi tawh angin Scanlan-a nena an chenna In chu in fâl tak mai, thil ruahman tenawm hlen chhuah nana remchang fahran mai hi a ni a. Khawpui thlafem, kawngpui aṭanga hla feah a awm a. Ni dang ang chu ni sela chuan McGinty-a leh a mi thianghlim lo thlan khawmte chuan an mi duha chu ko chhuakin a taksaah puakruk mu eng zah nge an kah luh theih tih an han en vel mai mai tur hi a ni a.

Mahse, tun ṭumah hi chuan he mihring hian eng thil nge a lo hriat hman a, khawi lam aṭangin nge an chanchin chu a lo hriat theih a, engtin nge a ruaitute hnenah a thil hriat chu a hlan chhâwn tih an hre duh tlat a ni. McGinty-a leh a uisathiam rual chu an lo che tlai lutuk tawh pawh a ni maithei. Mihringa chuan a thil hriat chu a thlenna hmun turah a lo thlen fel vek tawh pawh a ni maithei. Chuti pawh lo ni ta teh reng se, an thinrimna chu a taksa thi thei chungah chuan an hrithla ve reng reng dawn tihna a ni mai.

Mahse, thil pawi tham leh hriat tlak tak tak chu a la hriat hman a rinawm loh. Hre hman tawh ni sela chuan McMurdo-a dawt sawina khabe liam changin a ṭhu ngil peih lo vang a, McMurdo-a thu sawite pawh a lehkhabuah a ziak chhawng peih si se lo vang; mahse, chung thil zawng, ama kâ aṭang ngeiin an la dawng dawn alawm. Thu sawitir dan chi tam an hre dawn tlat. Mi ṭawngmawh an kawmna hmasa ber pawh ni hlei lo.

An sawi fel tawh ang chuan McMurdo chu Hobson’s Patch-ah chuan a kal ta nghal a. Chumi tuk tak mai chuan ‘police’ lam chuan McMurdo chu an ngaihven thar ve ta riau hian a hriat a. Chicago lam aṭanga lo hmelhriat tawhtua insawi, Captain Marvin-a pawh chuan rel chawlhhmun bulah McMurdo chu lo biak a tum a; mahse, be duh lovin McMurdo chuan a kalsan a.

A va kalna aṭang chuan chawhnu lamah a lo kir leh a. Union House-ah McGinty a va zawng chhuak a. McGinty-a hnenah chuan, “A lo kal dawn e,” a rawn ti a, McGinty chuan, “A ṭha!” a lo ti ringawt a. Hotupa chuan a lei thuam ropui ber ber a inbel a, a kawr tawngchham hakte chu lunghlu leh rangkachak hian a de chiai chuai mai a. Zu leh ‘politics’ hian hotupa hi zawng a tichakin thuneihna a pe nasa ve ngawt mai.

Chutiang taka lei ropuina a tawng tawh hnu phei chuan ani, vanram kai inrinna nei lem lo, thih thlamuanna pawh la chang ve lo a thuchang chuan thih a hlau lehzual a, lung-In chhung pawh a hlau sawt mai. Ngaihṭha vak lo hmel pu hian, “He pa hian a hriat tam hman i ring em?” tiin McMurdo chu a’n zawt a.

McMurdo chuan lawm hmel fahran lo hian a lu a’n thing a, "He laiah hian a rei lo berah pawh chawlhkar ruk chu a awm ta a. He lai hmun velah hian thil laih chhuahna khur kotlanga dak mai mai turin a lo kal hek lo. Kan zingah awmin hna a thawk a, sum leh pai lah chu a tuisik hman mai mai theih tur khawpin Railroad Company leh a puibawmtu dangte’n an vur bawk si a, chuvangin, eng emaw chen chu a hriat tawh ka ring. Chu mai ni lovin a pute hnen lamah pawh a theh lut ve fe tawh ang,” a han ti a.

McGinty chuan, “Lodge-ah hian mi rinawm lo pakhat mah an awm lo. Mitin mai hi kahpathir tluka rin tlak vek an ni. Karei, he kan Morris-a hi a awm ve tak e. He pa hi eng nge a chanchin? Kan zingah hian min phatsan duhtu an awm a nih chuan he pa hi a ni ngei ang. Zan rei hmaa kan naute eng emaw zah va tirh a, a thil hriat tawh zawh nan mai mai han hlaptir hlek ka lo rilruk deuh reng a ni,” a ti a.

McMurdo chuan, “Chu chu a pawina a awm vak lo. Morris-a hi ka ngaina ve roh riau a, na leh ih vel a’n tuar tur chu ka duhpui vak lo. Lodge chanchin vel hi vawi hnih khat chu min sawipui tawh a, nang leh keia ngaih dan hi chu min ṭawmpui ve chiah lo nain ṭhiante hêk duh tur chi zawng a niin ka hre lo. Mahse a chunga tih duh i nei a nih chuan ani leh nanga inkara lo din chu ka tum hauh lo,” a ti mai a.

McGinty chuan thinrim insehruh ṭeuh chungin, “Kan ramhuai putar hi chu ka dah ṭha dawn a ni. Tun kum kalta chhung khan ka mitmei ru reng alawm,” a ti a. McMurdo chuan, “Chuti lam zawng, a tih dan ṭha chu nang hian i hre ber ang; mahse, he Pinkerton mihring kan buaipui lai hi chuan thil dang kan ngaihtuah tel tur a ni lo. Tun lai pawh ni lo, vawiin te angah kher kher hi chuan ‘police’-ho hi inzar buaitir reng reng tur a ni lo,” a ti ta zel a.

McGinty chuan, “I ti dik e. A ṭul leh Birdy Edwards-a thin pawh kan khei mai ang a, a hnen aṭang chuan chanchin a khawn khawmna chu kan hre ngei ngei tur a ni. Hlauh nei âwmin a awm em?” a han ti a.

McMurdo chuan nui chungin, “A mihrinnaa a chak lohna laiah ka man ve niin ka inhria. Scowrers-ho hnu a hmuh phawt chuan Scowrers-ho tawmkuk thlenga chhui mai peihin a mawi a ni. A sum ka laksak a...,” tih pahin McMurdo chuan pawisa têl a’n phawrh a, "Hei aia tam daih hi ka lehkha pawimawh ka entir hnuah chuan ka hmuh belh dawn,” a ti a.

McGinty chuan, “Eng lehkha pawimawh maw?” tiin a lo zawt a. McMurdo chuan, “Lehkha pawimawh ka neih ka hre hlei nem; mahse, Scowrers danpui bu te, dan bu tesep te leh Scowrer mi leh saa inziah luhna lehkha phek te chu ka’n sawi khum ve nual kha. He hmun a chhuahsan hma hian thil engkim hriat vek chu a tum khawp mai,” a ti a.

McGinty chuan, “A nih tak chu. Chung lehkhate chu eng vangin nge a hnena la mai tura a hrilh loh che?” tiin a zawt ta khauh mai a. McMurdo chuan, “Chung thilte chu kawtthlerah ka pawm phei ang a? Vawiinah rel chawlhmun bulah Captain Marvin-a'n mi lo au lehnghal,” a han ti a.

McGinty chuan, “Ka lo hria asin. He thil kan tihna velah hian a buaithlak lai ber i chang a ang ngawt mai. He pa hi kan dah ṭhat theih chuan a ruang chu thil laih chhuahna khur hluiah kan thlak daih anga a ni mai. Eng pawh ni se, Hobson’s Patch lam mihring chu kan hriattir ve reng reng tur a ni lo, vawiinah i va inlan bawk si,” a ti ta a.

McMurdo chuan dar thin nak pah hian, “A nih tur anga kan tih theih chuan kan thah a nih leh nih loh hi tu ma’n an finfiah thei lo vang. Ka chenna Ina a lo kal lam chu tu ma’n an hmu dawn lo; khua a thim dawn tlat avangin. A haw leh lam lah tu ma’n an hmu dawn bawk hek lo tih ka sawi ngam.

"Councillor, ka remruat dan ka’n sawi ang e. Nang leh mi dangte chu hma deuh hlekin in lo kal ang a; ani chu zan dar sawmah a lo kal ang. Tichuan, kawngkhar chu ṭum thum a’n kik ri kauh kauh ang a, keiin kawngkhar chu ka va hawnsak ang a, pawn lam aṭangin ka kalh khum mai dawn a ni,” a ti a. McGinty chuan, “Chu zawng, a harsa lovin a chiang tawk e,” a lo ti a.

McMurdo chuan, “Mahse, thil ngaihtuah ngai a la awm cheu. Pa deh khirh ve zet mai a ni a, ralthuam lah a keng ve ngei bawk ang. A bum chu bum thei teh reng pawh ni ila, a la inveng ru ve dawn tho va. Pindan, mi pakhat hmuh a inbeiseinaah mi pasarih a va hmu dawn ta tihna a ni a. Inkah a ṭul ngei ang a, tu emaw chuan hliam a tuar ngei dawn bawk a ni,” a ti ta zel a.

McGinty chuan, “A ni ngawt mai,” a lo ti ve mai a. McMurdo chuan, “Inkah thawm hriain he lai khaw ‘police’-ho zawng zawng hi an rawn fuan khawm dawn bawk a ni,” a ti leh ta a. McGinty chuan, “I la sawi dik zelin ka hria,” a lo ti bauh a.

McMurdo chuan, “Heti zawng hian ti ila a ṭhain ka ring. Pindan zau - i lo lên ṭuma kan titina pindanah khan in vaiin in ṭhu khawm ang a. Keiin kawngkhar a rawn kik hunah ka va hawn ang a, mikhual kawmna pindan pawnlawi zawkah ka luhtir ang a. Chutah lehkha pawimawh vel la turin In chhung lamah ka lut leh ang a, chutia ka luh pah chuan thil awm dan chu ka rawn hrilh ang che u a.

"Chutah, lehkha pawimawh phuahchawp nen chuan ka va chhuak leh ang a, lehkha a chhiar lai chuan a puakruk kahna lam bânah ka uai ta tlat ang a. Ka au ri hriain in lo chhuak ve tawh mai dawn a ni. In lo tlan chhuah a, pindan chhunga in lo tlan luh ran poh leh a ṭha a ni mai, a chhan pawh keimah tluk laia chak a nih ve vang a ni. Mahse, in lo thlen hma zawng chu ka lo vuan bet thei ang chu maw,” a ti leh ta a.

McGinty chuan, “I remruatna chu a ṭha khawp mai. He i thil tih avang hian Lodge hian i lei a ba nasa dawn ngawt mai. Tisachungathuneitu nihna ka chan loh huna ka ṭhutthleng rawn luahtu tur chu ka hre tain ka inhria,” a han ti zui a. McMurdo chuan, “Teh reng mai Councillor, sipai ‘rawngrût’ ngawt ai chuan ka zei ve deuh hlek chuan ka inhria asin,” a lo ti a.

Hotupa fakna aw-ka a’n hria chu a lawm em em tih hi a hmelah chuan a lang reng mai. A chenna Ina a va haw chuan McMurdo chu chumi zan aṭang chuan a inbuatsaih ta nghal a. A hmasa berin a puakruk, Smith and Wesson chu a tifai vek a, hriak a hnawih a, a mu a thun a. Chutah, Pinkerton mihring an bum luhna tur pindan chu a’n thlek kual vel a.

Chu pindan chu pindan lian angreng tak a ni a, a laiah chuan dawhkan sei fe a awm a, lehlam kilah chuan thuk a awm bawk a. Pindan sir ve veah chuan tukverh a awm a, chung tukverhte chu khar thim phui hmiahna tur, tukverh chhana thing emaw, rangva emaw an dah hran leh ṭhin hi a awm ve lo va. (Hetiang hi shutter an ti a. Zoramah hi chuan kan ching ve vak lo. Pll) Tukverh puanzar thêmlêm deuh an zar ringawt a.

Chungte chu McMurdo chuan ngun takin a en vek a. Chu pindan han ualau dan vel chu chutiang thil pawimawh leh tlangzarh loh chi han tih nan chuan a duhawm vak lo tih a hriat reng mai. A hmunah ualau ta deuh mah se kawng aṭanga a awmna chu a hlat deuh avangin a remchang ve tho chuan a lang. A tawpah chuan thil awm dan chu a pindan luahpui, Scanlan-a a sawipui ta a.

Scanlan-a chu Scowrer a ni ve tak nain a pawi khawih lo chia piang hi a ni ve fuh khawp a, a ṭhiante rual a rem zo ṭhaṭhum meuh lo va, a chang phei chuan thisen a’n hmuhte hian a mur leh uai uai ṭhin. Thil awm dan chu McMurdo chuan tawi tek tawkin a hrilh ta a. Chutah, “Mike Scanlan, nang chu ni ila ka inthiar fihlim daih ang a, intihhlimna hmun dang ka zawng ang. Naktuk khawvar hmain he hmunah hian thisen chhuahna chi hna kan thawk dawn tlat,” a ti ta a.

Scanlan-a chuan, “A ni ngawt mai Mac; ka duh lo pawh a ni lo; mahse, ka hriatna thazam hian a tlin ve tlat pek ṭhin lo a ni. Hmannia thil laih chhuahna khur enkawltu Dunn-a a’n tlu velte kha ka en hlei thei lo zawng a ni. Nangnite leh McGinty-a te angin hetiang hna atana siam hi ka ni ve lo a ni. Lodge hian min ngaih thiam dawn chuan i mi râwn ang chuan ka ti ang a, zanin chu ka awm bosan mai ang che u,” a ti ta nghe nghe a.

An remruat lawk ang chiah chuan a lo kal tura te chu a hun hma deuh fein an lo thleng a. An hmel han en mai chuan khawtlang thila pa zahawm pui pui leh pa inchei nalh pui pui zawng an ni; mahse, mihring hmel aṭanga mi mizia hre thiam chi chuan an hmel chu han thlir chiang ngat sela chuan an kâ chîp ngheh dan aṭangte, an mitmeng rorum dan aṭangte chuan Birdy Edwards-a tan chuan beisei a bo hle tih an hre thei ang.

Chu pindan chhunga mi lo lut khawmte zingah chuan kuta thisen kai lo an awm tawh kher lo vang. Chu mai ni lovin a ṭhen phei chu vawi sawm tam, thisena kut lo sil tawhte an ni nawk mai. Ran talhtuin ran talh a awlsam tluk leh a ngaih thutak loh hu leka mihring talh ngai pawimawh lo an ni hlawm a.

An zinga thinlung leh beng serhtan loh zingah chuan Hotupa chu a buru ber awm e. Harraway-a ve thung, an ziaktu lian chu pa chêr sang deuh, hmel en reng reng pawha naupang melh ṭap atana itawm fahran mai, Order pawisa inhnamhnawihna thilah reng reng chuan sawisel bova rinawm a ni a, tu ma han sawisel eih pawh a la hlawh lo.

An sum enkawltu, Carter-a chu pa valai zawt chauh, ngui hmel lek lek, vun rawng eng lek lekin a kah phoh phoh a ni a. Mi dang kawi khawm thei zet mai a ni a, Scowrer thianghlim lohna ṭobul ni hial awmin ṭhenkhat phei chuan an sawi.

Willaby-a te unau hnih chu tharum thawh ngaina mi, hmel en reng reng pawha tumruh tih hriat tak, ruangâm zawi hmel deuh nek nawk an ni thung a. An ṭhianpa, Tiger Cormac-a chu pa mawng rih hmel ṭuah mai, pa hmai dur deuh, a duh rum ṭhin em avanga a ṭhiante ngei ngei pawhin an hlauh ruk riau mai a ni.

Chung mite chu McMurdo-a chenna In chhungah chuan Pinkerton mi rawihpa that tur chuan an inkhawm ve mai mai a nih chu. Anmahni lo dawngsawngtu, McMurdo chuan dawhkanah zu a chhawp chhuak a; anni lah chuan huaisenna damdawiah an lo hmang zel bawk a. Dik chauh chuan Baldwin-a leh Cormac-a phei chu an rui titih tawh a, an huai tawh hle nghe nghe a ni.

Cormac-a chuan a kut chu thuk meiah chuan a’n hem zawk a, “Ti kha chuan a ṭawng ve mai ang,” a han ti sap a. A thu sawi awmzia chu hre thiam takin Baldwin-a chuan, “Nia, kha laia kan phuar beh ngat kha chuan thu dik chu mihlim ṭawng hriat loh chang fuh ang maiin a phuh chhuak zawih zawih mai ang,” a lo tihpui a.

McMurdo chuan, “Thu dik chu kan phawrh chhuahsak em em ang, lo hlauthawng hlek suh u,” a ti mai a. A hmel han en reng reng chuan McMurdo-a chuan thinphu thut hi a nei lo tih a hriat mai. Chumi ṭuma an thil tih tur chu a kovah a innghat vek tih theih a ni a; mahse, a chet dan chu chhe tê pawhin a danglam chuang eih lo. Mi dangte pawh chuan a thisen vawh ṭhatzia chu an lo hmu ve a, an fak hle nghe nghe a ni.

Hotupa chuan, “Nangma’n a nia lo bawihsawm dawn ni. A hrawka i reh hma chuan rinhlelh tur chhe tê pawh a hmu tur a ni lo. I tukverh hliah thimna (Shutters) hi a awm lova a ṭha lo hle mai,” a han ti a. McMurdo chuan tukverh chu a’n endik thuak thuak a, a puan zarte chu tlemin a’n pawt phui deuh a, “A ni ngawt mai; mahse, tunah chuan tu ma’n min enthla thei tawh hlei nem. A hun a thleng ṭêp a ni ta,” a ti a.

Harraway-a chuan, “A lo kal dawn lo te hi a ni ang ka ti. Hlauhawm rim hi a lo hre hman a ni mai awm mang e,” a han ti a. McMurdo chuan, “Hlauthawng duh suh, a lo kal em em ang. I hmuh châk tluk zetin ani pawhin lo kal a châk ve alawm. Ngaithla teh u!” a han ti a. Pindan kila milim hûn ang zaiha che lovin an ṭhu a, ṭhenkhat phei chuan an zu no an tlak dâwn lai tak a lo ni a, an hmui leh dawhkan inkar kawng chanveah an zu no chu an hûm bet hmiah a.

Kawngkharah chuan ring tawk fe fe hian vawi thum a rawn kik ta a. McMurdo chuan kut phar chhuak chungin, “Ngawi r’u” a’n ti a. An ralthuam pai rûk chu an dawm sap sap a. Thawh pahin McMurdo chuan, “Chhe tê pawhin thâwm neih hlek suh u!” a han ti leh zet a. Kawngkhar lam chu a pan a, pindan aṭang chuan a chhuak a, fimkhur takin kawngkhar chu a khar leh ta a.

In chhung lama ringtu kal sualho chuan thawm ngaithlain beng an lo tun hru hru a. An ṭhianpa pen rite chu an hre thei a. Chutah kawngkhar pawnlawi zawk chu McMurdo chuan a hawng ta a ni ngei ang, kawngkhar hawng ri an hre leh ta zel a. Inchibaina ṭawngkam eng eng emaw an hriat hnu chuan In chhungah chuan mi dang ke pen ri a lo lut a, an aw hriat ngai loh tak mai an hre ta a. Rei lo teah kawngkhar kalh ri an hre leh ta zel a. An mi duh chu bel chhunga sa a ni ta mai.

Ngaihthlak hrehawm khawpa tenawm hian Tiger Cormac-a chu a’n nui ta uar uar pek a, Hotupa chuan a kâ a va hupsak vat a, “Mi â pa, ngawi chîp cham rawh. Min la tikhaw lo vek thei asin,” a han ti a. Pindan lehlam aṭang chuan inbe thâwm a lo chhuak a, an sawi awmzia erawh chu a hriat theih loh. Chutah kawngkhar chu a rawn inhawng leh a, hmuia kut dah chungin McMurdo chu a lo lut leh ta a.

McMurdo chuan dawhkan tlâng a rawn pan a, dawhkan kila ṭhute chu a’n melh a. A hmel lan dan chu a inthlak ta daih mai. Hnathawh tur ropui tak nei hmel hi a pu a; a hmelah chuan tumruhna hi pa mit chhe ber tan pawha hmuh theihin a lo lang bawk a. A tarmit vuah phenah chuan a meng rumin a mitmeng chu a phûr hmel kher mai. A hmel han en mai pawh chuan lei chung mihring zingah na nâ na chuan a thupui vai tur chi a piang tih a hriat hliah hliah mai bawk a.

Anni chuan nghakhlel takin an lo thlir ṭhap a, ani lah chuan eng mah a sawi si lo. A mal malin dawhkan kiltute chu a thlek kual diat diat a; a tawpah zawng, Hotupa McGinty chuan, “Hetah a awm tawh em ni? Khaw nge Birdy Edwards-a chu?” a han ti ta phawng mai a. Muangchang hian McMurdo chuan, “Aw, awm tawh e. Birdy Edwards-a chu hetah a awm tawh e; Kei hi Birdy Edwards-a chu ka ni,” a ti ta a!

Chutia a tih aṭanga second sawm chhung vel chu reh tak tê hian pindan chhung chu a’n reh tlawk tlawk a, a ruak pawh ni se chu aiin a reh chuang awm lo ve. Mak ti leh thlabar tak chungin mit tuak sarih chuan anmahni bum-âwktu chu an melh ṭhap a. Chutah, darthlalang keh ri a lo ri a, tukverh puanzarte chu an rawn phih thla ta hlawk hlawk mai a.

Chutiang thil a’n hmuh chuan Hotupa McGinty-a chuan ṭê duai duai chungin kawngkhar lam a va bawh ruak a; mahse, kawngkharah chuan Coal and Iron Police-a mi, Captain Marvin-a chu puakruk kau sa kengin a lo lut ve chiah a, Hotupa chu a tin nghal a, tih ngaihna hre lovin Hotupa pawh chu a ṭhuthmunah a ṭhu leh ta a.

McMurdo nia an lo hriat ṭhin chuan, “Councillor, khatah khan ṭhu la, i him zawk ang. Nang pawh Baldwin, i kut kha i silai aṭanga i dah hlat deuh loh chuan a khaihlumtu tur che a hrilhhai lutuk ang. I silai kha dah chhuak rawh, siamtu Pathian hmingin ka’n... Khati kha chuan a tawk thei mai ang chu.

"He In hual hian mi sawmli an awm a, tlan chhuah tum chu thil tih chi a nih leh nih loh chu ngaihtuah zui ve tawh mai rawh u. Marvin, an silai kha han khawmsak rawh!” a ti ta a. A tih ngaihna dang chai awm hek lo, an silai an chhuhsak hnu pawh chuan ngui zetin dawhkan chu an la kil ta far a.

Anmahni bum-âwktu chuan, “Kan inṭhen hmain thu tlem tê sawi ka duh deuh. Rorelna hmuna kan inkhin hunah lo chuan min hmuh leh pawh ka beisei chiah lo. Ka chang changa in lo ngaihtuah ve mai mai atan eng emaw ka’n sih chhuah ang che u. Tunah chuan ka nihna in hre ta. Thil awm dan chu thlêngah chan sawm sa vekin ka’n hlui ang che u. Kei hi Birdy Edwards-a, Pinkerton-a mi ka ni.

"In pawl phîn darh tur hian min thlang chhuak a; ka tih tur a hautakin a hlauhawm hle a ni. Min ruaitute leh he laia Captain Marvin-a chauh lo hi chuan he ka thil tih tum hi an hre lo; ka duh ber, ka bula awm reng ṭhin pawh ka hrilh ngam lo a ni. Mahse hei, zaninah hian kan lehkhabu chhiar lai kan lo chhiar zo ta a, a lawmawm e, Pathian hnenah lawmthu awm rawh se. A chak zawkah ka ṭang ta a nih hi!” a han ti a.

Mi pasarihte chuan an en ṭhap a. An hmel han en reng reng chuan eng lai maha dam leh thei ngai tawh lo tur huatna an pai tih chu hai rual a ni lo. Chu chu McMurdo-a chuan chiang takin a zu hmu a, an hnenah chuan, “Kan infiamna hi a la tawp lovah in ngai a ni maithei, chutah zawng, thâp ṭul ang ang chu ka thâp ve mai a ngai a ni. In zinga ṭhenkhat hi chuan pawi in khawih zui lo vang tih ka hria, chu bakah, zaninah hian in zinga mi sawmruk, heta awm ve lote hi tan-In lam panin kalrem lâmin an lâm dawn bawk.

“He hna thawk tura min han tirh khan, hetiang pawl hi a awm thei ngai ang tih pawh ka lo ring pha ngai lo va. Chanchinbu lam hian an vawrh hluar mai mai emaw ka lo ti a; hetiang pawl a awm loh thu finfiahtua ṭan tumin ka lo phek chhuak a. Freemen nihna nen hian inzawmna neiin an sawi a, chuvangin, Chicago-ah ka kal a, Freemen-ah ka va ṭang ta a.

"Chutia Freeman a ka ṭan hnu chuan chanchinbu-ho vawrh hluar mai mai a nih ka rinna chu a nghet sauh a, a chhan pawh Freemen-ho chuan thil sual tih lam an âwn tlat lo a ni. Mahsela, ka tih tur ka hmaa tla chu ka tih a la ṭul tho va, chuvangin, lungalhthei laih chhuahna khurpui lam hi ka rawn pan ta a ni.

“He lai hmun ka lo thleng a, ka tisual chhiava tih ka hre ta mai a. Chanchinbu lam pawhin thu puarpawleng an vaw vûng mai mai lo tih ka hre ta bawk. Chutah, he lai bial vel hi awp beh ka tum ta tlat a. Chicago-ah tu mah ka that lo va; ka dam chhung hun hman tawhah pawisa lem ka la siam ngai reng reng lo bawk.

"Ka pawisa pek che u pawh kha pawisa dang ang bawka hman tlak leh ṭha a ni ve a; mahse, khawhralah chuan ka inngai chuang lo. In mi duhsak zawng nih dan thiam vein ka inhria a, tichuan, sawrkar ûm lai angin ka insawi ta a. Ka rin ang chiahin chu chuan in lakah pawh min titlatlum ta hle a nih kha. Tichuan, in Lodge thianghlimah chuan ka lo tlu lut a, in rorelnaah pawh chanvo ka nei ve ta ṭhin a nih kha.

"Ṭhenkhat chuan nangmahni ang bawka lak tlak loh angah min sawi ngei ang; mahse, an duh duh chu lo sawi ve mai mai teh se; ka man tawh khawp mai che u hi maw. Mahse, eng nge ni thil awm dan dik chu? In pawl ka rawn zawm zan khan Stanger-a in kuk thlu a. In khatih tur thu kha ka lo va hrilh hman lo a nih kha; hun awm chai hek lo; mahse, Baldwin, i thah dawn khan i kut chu ka dawm hman ta hram a nih kha ti raw!

“In zinga ka awm lai khan in thil phiarruknaah ka tel ve ṭhin a, rawtna ka siam a nih ve pawhin ka dan leh theih ngei turah chauh rawtna ka siam ṭhin. Dunn-a leh Menzies-a thattute kha ka dang hman lo va, a chhan pawh in chet dan tur ka hriat tam tawk hman loh vang a ni; mahse, a titute kha chuan khaihlumna hruihrual an awrh theih ngeina tur erawh chu ka ngaihtuah ang.

"Chester Wilcox-a pawh kha ka hrilh lawk avangin a In kan chheu darh zan khan a bibo ta daih bawk a nih kha. In thil sual tih tur tam tak chu ka dang hman lo; mahse, in mi zawn an lo chhuah duh tlat loh changte; in mi chânin kawng dang a zawh tak daiha in chân chhuah loh tak te; in mi duh a lo bihruk tak daih dante han ngaihtuah kir neuh neuh ula, ka hnathawh chu in hre mai ang,” a ti a.

Insehruh ṭeuh chungin McGinty chuan, “Phatsantu tenawmpa,” a han ti khûr ngawt ngawt a. McMurdo nia an hriat chuan, “John McGinty, chutia min koh avanga i thin nâ a dam deuh dawn a nih chuan a pawi hlei nem. Heng lai velah hian nang leh i mithianghlim lo thlan chhuahte hi Pathian leh mihring hmelmaah eng emaw chen in lo ṭang ta a. I duh duha i chin leh ṭhin, nunau leh nangni kara lo tla tur hian patling tak tak an tel ve a ṭul a; a tih dan pawh kawng khat chiah a awm a, ka ti ta reng a ni.

" ‘Phatsantu’ min ti a; mahse, mi sang tam tak, ‘chhanchhuaktu’ tia min ko duhtu an awm ve ngeiin ka ring. He lai hmunah hian thla thum ka awm ta a. Ka thuruk chu puak chhuak dawn lovin ka nihna hre chhuak dawnin hre lo che u ila chuan hei aia rei deuh hi ka nghak ang a, in thuruk leh in mimal chanchin ṭheuh hi kimchang zawkin ka khawn khawm ang chu ka ti a; mahse, lehkha a lo thleng ta tlat a; ka hun ka hman tawi a ṭul ta a nih kha.

"Sawi tur tam ka nei tawh lo; mahse, hei hi lo hre rawh u, ka thih ni a lo thlen hunah pawh he lui ruama ka hna thawh chhe tê hi ka thlir lêt ang a, nuamsa deuhvin ka thih phah ve thei ang. Khai le, Marvin, ka chelh khawtlai tawh lo vang che. Phuar hlawm la, an chungah i duh duh ti rawh le,” a ti ta a.

Hemi bak hi chu han sawi vak tur pawh a awm tawh lo. McMurdo nia an lo hriat pa chuan Ettie Shafter-i hnena pek tur lehkha, uluk taka châr hi a hmain Scanlan-a a lo pe tawh a; Scanlan-a pawh chuan hre thiam inti tak maiin McMurdo-a chu a mit a siai khum sak a.

Chumi tuk zing takah chuan nula hmelṭha deuh mai leh mi pakhat, intuam khâwr deuh ṭei ṭui hi a bika rel tlan turah chuan an chuang ve a; chu rel chu Railroad Company-in a bik taka an tirh ngat a ni nghe nghe a. Chu rel chu chak takin a lim pur pur a, chu lai hmun, hmun ṭihbaiawm tak chu a tlansan ta thuai a.

Chumi ṭum chu Ettie Shafter-i leh a ngaihzawngpain Hlauhna Lui ruama an ke an nghah hnuhnun ber ṭum a ni ta. Chumi aṭanga ni sawmah chuan Chicago khawpuiah an innei a, an inneihnaah chuan Jacob Shafter-a pawh a tel ve nghe nghe.

Scowrers-ho chungthu chu an vua leh vangte’n an puihbawm phak lohna hmunah an rel a. Scowrers member dangte chuan theih tawpin an ṭhiante chu chhan an tum a; mahse, an hlawhtling chuang lo. Lodge pawisa chu an han hmachhuan bawk tak ṭhin nain Lodge pawisa meuh pawhin thil a ti thei tam lo. Thu hretu deh khirh, thil engkim hretu chu ukil-ho chuan an khêng thla zo ta lo va, an pawl pawh chu an keh darh phah ta a, Hlauhna Lui ruama hlauhna thla inzar pawh chu a kiang ve ta.

McGinty-a chu a nghâwng an tansak a, a thih dawn darkarah phei chuan a tâl nasain a ṭê nasa hle nghe nghe mai. Amah zuitu lawk deuh deuh mi pariat pawhin an hotupa chan ang chu an chang ve bawk a. Mi dang sawmgnga zet chu tân hun chhung inang lo nuaiin an tâng bawk a. Birdy Edwards-a hna chu zawh a ni ta.

Birdy Edwards-a hlauhthawn ang ngeiin an infiamna chu a la tawp ta mai lo. Mi dang a khing a, mi dang a khin leh a ṭul chho ta zel mai. Ted Baldwin-a khan khaihlum a pumpelh a, Willaby-a te unau pawhin an pumpelh ve ta bawk a, chu mai ni lovin a hlauhawm zinga chhiar tel tur chi, mi eng emaw zatin an pumpelh tlat bawk mai.

Kum sawm chhung zet chu he khawvel aṭang hian an khuangcher bo ta vang vang a; mahse, an zalen ni a lo her chhuak veleh ta tlat mai. Chumi ni a lo thlen chuan Edwards-a pawh chuan a nun ralmuanna chu a bo ve ang tih pawh a hria. Scowrers thi bang chuan phuba la turin chhe thianghlim an chham a, an thutiam pawh chu hlen ngei an tum ruh tlat bawk.

Edwards-a chu Chicago aṭangin an ûm chhuak a, ṭum hnih chu an that teuh hle; a ṭum thumnaah chuan thah ngei pawh an inring. Chicago aṭang chuan hming thlakin California lamah a chhuk a, chuta a awm lai chuan a nun tihlimtu ber, Ettie Edwards-i chu a’n thi lehnghal a. Vawi khat chu an that leh ṭhelh a, chu lo vawi khat dang pawh an that leh ṭhelh bawk a.

Chutah Douglas-a hming invuahin hmun pakhat, lui ruam ang deuhvah hian English mi pakhat, Barker-a nen an thawk a, chutah chuan hausakna tham an hai chhuak ta a. A tawpah chuan amah umtute chuan an rawn chhui thleng ṭêp tih thâwm a hria a, an rawn nanchin hma chiah chiahin England lamah a kalsan ta daih a. Tah chuan Douglas-a, John Douglas-a, nupui duhawm tak mai nei, Sussex biala cheng, nichina a chanchin kan chhiar hrep tawh, chanchin mak tak mai neitu kha kan lo thleng ta a ni.

A TLANGKAWMNA

Douglas-a chungthu chu rorelna sang zawkah an thlen a, chuta an rel dan chuan mahni inven tum avanga tual thatah an lo puh a, a chhuak ta mai a. A nupuia hnenah chuan Holmes-a'n lehkha a thawn a, “England aṭang hian engti kawng zawng pawhin hruai chhuak ringawt rawh. A relh bosan tak hlauhawmna aia thil hlauhawm kha a tan a inpharh mai thei a nia. England-ah hian i pasal tan himna tur a awm lo,” tiin a va ziak a.

Chumi aṭang chuan thla hnih lai a lo ral leh tawh a, thil awm dan pawh chu kan lo mangnghilh leh titih tawh a. Chutah tuk khat chu kan lehkhathawn bawmah chuan lehkha them mak zet mai hi a lo awm nawlh a, chu lehkha themah chuan thu dang inziak lovin, “Khai aw, Mr Holmes!” tih ringawt mai hi a lo ni teh reng a!

Chu lehkha themah chuan tu hming mah a inziak lo va, thu ziak dang pawh a awm hek lo. Holmes-a lah chuan, “Watson! Suahsualna thuk ber mai,” a ti duh lek chauh a.

Chumi zan tlai deuh tawh takah chuan Holmes chu mi pakhatin a rawn len khung a. Chu pa chu Mr Cecil Barker-a, Manor House-a mi kha a ni. Barker-a hmel chu a pawr hle a, “Mr Holmes, chanchin ṭha lo tak mai ka rawn thlen,” a han ti a. Holmes chuan, “Ka hlau reng a ni,” a lo ti a. Barker-a chuan, “Thirhrui i dawng lo maw?” a han ti a.

Holmes chuan, “Tu’n emaw lehkha them min rawlruk,” a ti mai a. Barker-a chuan, “Douglas-a kha alawm. A hming chu Edwards-a a ni e an ti a; mahse, keia tan chuan Benito Canyon-a ka ṭhian, Jack Douglas-a a ni reng tho vang. Kar thum kaltaah khan Palmyra, South Africa panin an chhuak a,” a ti ta zel a. Holmes chuan, “Nia,” a lo ti ringawt a.

Barker-a chuan, “Nizan khan an chuanna lawng chuan Cape Town a thleng a. He thirhrui lehkha hi tukinah ka hmu a : ‘St Helena-ah Jack-a chu lawng aṭangin a tla a, a bo daih. Engti tiha che sual nge a nih tu ma’n an hre lo. -- Ivy Douglas,’ tih a ni,” a han ti a. Holmes chuan, “An va dek nalh ve,” a ti mai a. Barker-a chuan, “A chet sual vang a ni na nge?” a han ti a.

Holmes chuan, “Teuh lo,” a lo ti a. Barker-a chuan, “Heng Scowrers-ho, chatuan anchhe dawngho hi, ngaihdamna thinlung...,” Holmes chuan, “Ni lo ve ka pu duhtak. Laiphir zaibun leh puakruk mawlmang lutuk tih vel mai mai a ni lo. Hranghlui kutchhuak a ni. Moriarty-a kuthnu hi chu ka hmuh chuan ka hre êm,” a lo ti a.

Barker-a chuan, “Mahse, eng vangin nge hetia a lo chet ve ngawt ang?” a han ti a. Holmes chuan, “A titu hi hlawhchham thiang lo, mi tling lutuk, tih apianga hlawhtling zat zat tur a nih vang a ni mai. Khawkherh mu chhut keh nan thir denna tuboh an hmang a ni mai, an ti lutuk deuh; mahse, khawkherh chu a keh alawm le,” a ti ringawt a. Barker-a chuan, “He pa hian eng nge lo inrawlh ve-na tur a neih?” a han ti a.

Holmes chuan, “He thil hi Moriarty-a hote zinga pakhat hnen aṭanga ka hriat ve mai a ni a. American-ho hian England leilungah tih tur an neih takah chuan he mi sual rapthlak ber hi an be tlawn a, an ruai ta a ni mai. Chutah chanchinbua an mi duh thattu tur a hlawhchham thu a’n hriat khan a thiamna a’n hmang ve ta hlak a nih hi. Atirah khan hlauhawm lo thleng leh tur chu a nêp lo vang tih ka sawi a, ka sawi dik em?” a ti ta a.

Barker-a chuan, “Hetiang mi sual lutuk hi kan se zawl chhuah mai mai ang a, a chet dan khing phak hi kan awm lo vang maw? Kan sepui ruah tuar tlawk tlawk mai dawn em ni?” a ti ta a. Holmes chuan, “Chutiang zawngin eng mah ka sawi lo. Khin phak loh a ni ka ti lo; mahse, hun min han pe ta che u; hun min pe rawh u!” a han ti a. Ngawi reng hian a ṭhu ta tlawk tlawk a.

A TAWP TA.

The Hound of the Baskervile lo chang leh rawh u aw.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)