MONEY| Penniless Love Chapter-14 Becky Rafa Renthlei

Episode kal lai dah luhna

Moderator: writers

Becky Rm Renthlei
Posts: 119
Joined: October 2nd, 2017, 12:52 pm

MONEY| Penniless Love Chapter-14 Becky Rafa Renthlei

Unread post by Becky Rm Renthlei » May 16th, 2018, 10:01 pm

MONEY|Penniless Love

Becky Rafa Renthlei

Chapter-14

Onslow Square
Lexham Gardens
Leena Bevan


Ka harh rualin pangti lum ham ham ina min nghenna ka hre hmasa ber a; mahse ka la meng chhuak mai bik lo. Kan accident dan kha ka mangphan deuh nge ka lungphu ala dik ta lo fo!

"Lee, i harh ti raw!?" Ka pasal aw dam thlap ka hriat chuan mak ka ti hle a, ka harh nâa ka la che lo mai ni lovin ka mit pawh ka meng miah si lo a, engtin nge Absalom hian ka harh tih a hriat theih le. Mak dangdai tak chu a ni.

"Umn, nâ i nei em?" Tiin ka meng chhuak ve ta nghal a, a mitmeng dam thlap ka hmuh rualin ka hahdam huai huai thei nia. Tunah zinglam dar nga ari dawn hnai tawh a, Mr.Solomos chhuah lai pawh ka'n hriat miah loh chu le.

Kha pa hmel kha a ṭha uchuak hauh lo a; mahse 'pa' tak a ni. Absalom nen an inchen thuak nghe nghe in ka ring.

"Leena Bevan, oh! Mrs.Colmer, i pasal aia ngaihven zawk thildang i nei em ni?" Ka pumah a kut dinglamin a rawn chûl riak riak a, hmangaihna min chenpui dawn lo tih hre tho mah ila ka múr deuh er er thei alawm le! Absalom-a blood type ka ni lo a, mahse, min tawhna hian thil ati thei tlat si.

"I ṭhianpa kha khawiah nge?" Tia ka zawh chuan, "Dazel Solomos ngaihven lo vin keimah, i pasal Absalom hian nâ ka tuar tih i hriat ka ring," Ati hmuk a.

"Ka duat viau che chuan awm dan chintawk i thiam lo ang tih ka hlau deuh si a chuvangin ka insûm," nui lek leka ka ṭawng lai chu min en reng a, a mitmeng thim ta deuh raih leh min duatna niawm tak lo lang chhuak ka hmuh chuan a âwmah hmai ka phûm ta daih a, ka zak deuh reuh.

"Money..!" A kut na lo lama ka biangah vuanin amah en tur chuan min kuai dâk ta riai riai a, ka biang sa hat hat chu a kut dai raiha a vawn chuan a nuam sawng sawng thei nia. A hmei ni tawh lovin a nupui kha ka ni tawh tlat a, ka lái deuh hû alawm le.

A hmui lum ham ham leh hnawng chapa min fawh chuan ka chhâng lêt ve vat a; mahse, a hmui kak kha ka hriatchhuah tâk vangin ka inlahrang rang ngei mai.

"I hmui kha a dam hunah âm takin ka fawp ngei ang che." Ka nui nghal var var a.

"Nâ ka nei tih i hre ve tal a, a zia e.."

"Yaar, Absalom, ka hlauhthawn zia hi i hrethiam pha kher lo ang."

"Hriatthiam turin i tilang tlat si lo a, Lee, i uncle hian ala duhtawk dawn hauh lo a nia, honeymoon hmangin bibo rih ta ila kan tifuh zawkin ka ring," thutak deuh zawka atih chuan ṭha ka ti riau. A chhan pawh ka inbuatsaihna ala ṭha tawk lo va, Absalom mai ni lo, atu ate pawh hmachhawn tur hian nasa lehzuala ka insawrbing angai tlat a ni.

Ka unaupa hrawn leh Lewis, ka nu pawh tiamin hremna pêk ngei ka tum ruh tlat si atin ni.

"Khawi hmunah nge honeymoon hman i duh?" A taksa ka chul pah dan dan a, kan accident khan hliam hranpa a nei hauh lo a; mahse a bân veilam ruh hi a auh deuh tih doctor khan a sawi a, an tuam thlap chung pawhin engtin emaw a chêt palh chuan nâ ala ti riau tih ka hria.

"Australia-ah kan kal anga, Sidney-ah Dazel-an farm house anei a kan hmang dawn nia," ati a.

"Australia te chu ka pianna ram a ni a, ka pa lu nghahna hmun a ni bawk, tu emawin min hmu palh anih chuan min hre ngei ang," ka ti sap a.

"Farm house-ah alawm kan awm dawn, ka taksa hahchawlhtir angai a, tun dinhmunah hi chuan tumah hmachhawn chi kan ni lo. Police lam inrawlh kan duh bawk si lo."

"Ok, i thu thu ni rawh se, lo mu hahdam la, breakfast buatsaih a hun dawn a.." ti a thawh ka tum chuan ka kawngah nghet zetin min kuah a, "Lee, i pasal tak takah min pawm em?" Ka mitah a en rûn a, "Pawm tehreng mai, thutiam chham duaha hlenchhuah si loh ai chuan signature pêka kumkhaw daih kha a pawimawh zawk lo vem ni!?" Tiin ka rilru dik tak ka sawi ta a.

"Tuna i sawi kha i rilru tak tak anih chuan ka damchhungin ka venghim ang che . I ta chu ka ta, ka ta chu i ta.." a sawizawh rualin ka mitah a rawn fawp zauh a, tuna alandan cool ruih hian min hneh tak zet. Dollar ai pawha hlu zawk intiamkamna rintlak a nih ngei ka beisei.

"Ka pasal damlo tan breakfast ka siam ngei angai dawn e, Colmer huaisenpa," zawi sapa tiin khum aṭang chuan ka tho ta a, min dang ta bik lo.

Nimin khan min chhan nân a tel ve miah loh naah kut a tuar a, ani ang sum leh pai a buaina nei lo leh milar lutuk hian vawikhat chauh pawh a kâ a âng anih chuan ka uncle te mai mai zawng an che chhe khawp ang. Mahse, ka tân a hlauhawm theih dawn avangin kut a tuar ta zawk kha a nia. Absalom nge nge belhtlak a lo ni tehmeuh mai.

Chokaah ka zai rât rât a, Hindi hla ka sak hian ka confi tlat zel! Mumbai-ah engtikah nge ka kal leh dawn hriat pawh va ni suh.

"Niminah accident i tâwk a, tunah i zai leh vak vak lawi si, i pasalin a hriat phâk loh ngei ka beisei." Dazel aw ka hriat thut avangin ka phu zawk a, ka zai tawp hmak.

"Eng ati nge min tâi râna i awm le! I fanu ka ni lo a, i nupui lah ka ni lo cheu bawk. Ka engmah i ni lo." Ka ti hmak a, a ṭawngkam ngeiawm tak hi ka rilrem zawng a ni lo tlat.

"Ka eng mah i ni bik lo, ka nupui mizia ang deuh i nei tih mai loh chu, i hmelah phei chuan ka nupui i ang miah lo thung." A nui suk a, min chhaihkawlh a tum deuh em maw ni.

"Nupui i nei tawh maw!?" Mak ka ti hle a.Tlangval emaw ka lo ti ve char char a, a zia ta deuh e, Absaloma ṭhiante hi pakhat mah hriat ka nei lo a, a unaupa hrawn Shane chauh kha ka hriat ve chhun a nia ka ngaina hle bawk.

"Fa pawh ka nei tawh alawm, Money.." Min koh dan avang chuan rum mangkhengin ka melh a, ka pasalin min koh pawh ka ngei tawh nâklaia ani lehzelin min ko hi ka ngaihdan a ni hauh lo. Apple juice dawhkana chhawp tur ka ken lai chu hmang ṭangkaiin a hmaiah ka theh ta ṭhawt a, a thinrim miah lo.

"Australian thin tertek nei i ni maw!? I hmelṭha a; mahse, i..." a sawi zawh hma hmain, "Ṭawng tawh reng reng suh, chuti lo chu breakfast ka siam kêp lo ang che," ti nghauhvin bacon siamna hmanrua ka la tau sawk sawk a, Absaloma ṭhian ni lo se chuan a châk lo nasâ ang.

"Ok, Leena, ka nupui lo thlen hunah tuna min tih anga i tih vaih chuan a nuih a za hauh dawn lo ania," tiin choka chu a chhuahsan ta a.

Dazel nupui a lokal dawn a maw! A pasal ang maia ngeiawm thiam mihring anih chuan kan inmil lo sa. Mahse, hmeichhe ṭhian erawh ka mamawh viau lawi si.

Breakfast atan spanish Bacon leh Toast, Apple juice leh theirah tharlâm ka dah chhuak a, zankhat thil lekah ka nundan a inthlâk ta dawrh mai zel chu a nia! Billionaire nupui ka ni ta. Hindi hla ring lutuka sak mai chi nge ni anga, India rama zu rim na lutuk ka in ṭhin 'Rum' kha ka tauh leh zawk dâwn. Ha! A eng mah mah chu ka châk leh lo e.

Absalom-a eitur tray-ah ka rem malh malh a, kan mikhual Dazel erawh ka ken kêp duh lo lui ngat a. Amahin inngaihtuah ve mai mai teh se.

Mumbai-ah chhiahhlawh number one ka ni zing tawh lutuka, tunah te chuan Colmer Toys company chairman, Leena Bevan Colmer ka ni tawh alawm le.

Ka lo nih châk em em ṭhin dinhmun kha ka luah ṭan ta chu a ni a, a lawm nan vawikhat sâng deuhin zuang ta ila, ka Lung lam a effect êm lo ang chu maw..

Master Bedroom
8:00 Am
Absalom Colmer.

Lewis Bevan thusawi hnuhnung ber khan ka thin ala tirim reng.

'Leena hnaihah awm suh, a pasal tur ka hual sa vek tawh' ati anih kha.

Ka nupui alo ni hman tluka lawmna tur thildang ka nei theiin ka ring tawh lo.

Inneih thuai thuai ka duh vang khan contract paper lam reng reng kan lo hrechang tawh lo a, dan ang thlapin, tiamchin awm miah lovin ka nupui a ni fel hmak tawh. He khawvela rorelna sâng ber pawhin a ṭhiat danglam thei îkhaw lo. Ka 'Money' kha ani tlat alawm.

Lewis Bevan laka ka chêtdan tur erawh thurûk ani rih a, Leena pawh ka hrilh lo. A chanpual ka ît vang ni lovin hun reitak rethei leh nun hrehawm taka dah tute hi ka thinlung hian a ngaidam thei bik lo a ni.

A thianghlimna leh zahawmna tichhe thawthânga sum âtchilh hmeichhiaah an chhuah a, chuti chung chuan mahni inhai kuak tumin ṭan ala khawh ve hrâm hrâm chu a nia, ka lainat ve thlâwt. Wool company lar lutuk fanu hmelṭha leh hleitling zet ti retheitu hian hremna a hmu ngei tur a ni. Ka nupui alo nih tâk vang ni lo in, ka hlimna leh lawmna min thlentu hmeichhia a ni tih ka pawm thlap tawh.

"Hey, breakfast ka peih tawh e," enghelh nei loh hmel fê in tray chawi chung hian a lo lut a, zinglam thawhphan pawh zuk nei miah lo a!

"Thank you, wife..." ka thluak sakhal tak hian ka nupui a ni tih a pawm chiang êm a, invenna pawh hmang tawh lo turin ka hrilh ngei ang. Leena hian ka fa a pai phawt chuan tun aia thûk zawkin kan inzawm ngei ka ring nghet tlat bawk.

"Wife..! Money, Lee, i duh dan dan hian min ko a, i ṭhianpa nghal zet kha hrilh ang che, 'Money' tia min ko leh a nih vaih chuan Seol tawntirhah ka thawn liam ngei ngei ang." Thinrim takin ati hmarh hmarh a, ka nui huk.

"Dazel-an a ko che a maw!"

"Ko chiang e, dik tak chuan ka lawm lo."

"Ka lo hrilh dawn nia," ka ti tak nâ a ka nuih ala za reng, Dazel Solomos hian a chimawm a lo chhuah leh pek a ni ngei ang. A nupui lakah Leena phuba ka lâksak ngei a ngai dawn a ni hi. Tactic hrang hrang ka nei ve alawm le. Ka ngaihtuahna avang chuan ka nui leh hawk a, Leena breakfast siam tui danglam zet pawh ka ei hnem kher mai!

"Kan mikhual Solomos kha ka pe ve lo a nia," napkin-in ka hmui bul vel a rawn hru thuak thuak a, min duat thar ta riau. A kum zat ngaihtuah phei chuan a inhmeh hlawl lo a. Ka hriat loh mizia eng zat tak la nei ang maw.

"Lee, Dazel hi ka ṭhianṭha tak a ni a, a chungah ṭhat chhuah hrâm la ka lawm khawp ang."

"Chutiang sawi lo in kan inneih hmaa ka pawisa, ka hlawh chhuah kha min pe dawn nge, i la kawl dawn!?" Atih chuan ka juice in lai ka phuh chhuak teuh kher mai! Thil pangngai taka sawi ka tum pawh hian pawisaah bawk kan tawp leh zel zawng a ni e.

"Ka kawl sak ang che, i mamawh hunah sawi la, i duh engkim pêk i ni ang." Dam thlapa ka ṭawng chuan min en vang vang a, "Kum khat leh thla nga hnuah a vaiin ka duh vek ang."

Ka thil eina sengfel paha tiin dawhkan chungah a ṭhu tharh a, damdawi eitura min chawh ho chu a mal tê tê a a en kim vek hnu-ah, "Honeymoon hman i duh chuan hengho hi ṭha takin ei ang che," Inti thunei fahrana atih chuan ka nui leh ṭêp.

Nupui ka vawikhat neihna a ni a, ani tân pawh pasal a vawikhat neihna ve tho a ni. Chuvangin awm dan tur kan hrethiam lo a ni ber mai. Hmangaihna chendun chu sawi loh! Kan lai deuh hû a hriatna ka nei.

"Lee, min chhuahsan ngai lo ang tiraw!?" Tia ka zawh thutna chuan ati hamhaih deuh nge min en vang vang a, chutah dar san âk chung hian, "Hunin ala hril ang chu.." ati ta sap a.

"I mamawh engkim pek i ni ang tih ka sawi lo vem ni! I pasal ka ni tawh a, ka awmna chu i awmna tur a ni bawk."

"Ka awm reng hi," nui sak chungin min rawn pan a, khuma a lo lawn kai ve tâkah chuan rang fahran hian ka lo kuah a, ka thlahlel thar ta riau hi ka inhrethiam bik lo. Venhim ka duh tehmeuh mai; mahse, chumi bâk ka chhungrilah hian eng emaw min mawlhtu a awm tlat a, hmangaihna anih loh ngei ka beisei bawk.

"Absalom, ka birthday a thleng ṭep tawh a, khawngaihin ka ngenna che min tihhlawhtlin sak thei angem!?" A kut zên thlarha ka khabe kual chûl dan dan paha atih chuan hnial phal chi ninghal lo chuan.

"Sawi la..!"

"Ka hmel ang chiah Barbie doll min siamsak rawh, pakhat chauhin.." ati ta a.

Ka lo theihnghilh daih alawm le! Barbie doll ni lovin Ice cream doll ngatin a nia ka siam dawn ni. A hming tur pawh phuah hran a ngai reng reng tawh hleinem.

"Ka kianga i awm renga fa min hrinsak chuan i duh ang chu ka tihsak ve ang che," tiin ka blackmail ta a.

A mengphawk ngei mai!

"Fa maw! Invenna hmang tura min tur sektu kha tunge kha..!" ala nui duh ṭhak lo lehnghal a, ahma leh tun inang tawh hek lo. Khawvel a changkang tulh tulh ang chiahin ka rilru pawh a puitling ve zel a, fa neiha chhungkaw din lam a lang tlat tawh.

"Fa min hrin sak la, mipa emaw, hmeichhia pawh nise, ka company-a ka share hmun thuma ṭhena hmun khat ka pe ang che." Tiin ka thlêm ta a.

"Ka lo inngaihtuah ang."

"Nupa kan nih te chuan fa kan nei tur a ni dawn lawm ni..!?"

"Englo, fa neih lam ka lo la ngaihtuah chhin lo atin ni!" Tiin a melh ngai a melh reng a, 'Aw le' tia min chhân ka ring deuh kha a nia, a teuh lo.

"Inngaihtuah nan darkar chanve hun ka pe ang che, min chhân dan azirin Paradise kawng kan zawh dawn nia, ka bân nâ hian Vanram kawtchhuah kan fanna tur a dál hauh lo tih hre sa bawk la," ka tih chuan a nuih a zat hmel hle a, sex hmang fo tawh mah ila, ka thlâkhlelhna a kiam chuang der lo.

"I hun min pêk chu a tlêm lam hret a ni." A nui zui ar ar a, a ha var rual ṭhap rawn lang chuan a hmelṭhatna a belhchhah tulh tulh nia.

Hetianga inpawh hian vawikhat mah kan la titi ngai lo a, a nuam dangdai hle bawk. Khumah min ngheng chialin a mu ve a, nâ nei zawk ang maiin zuk awm thiam a!

"Absalom, i nupui kha..." Dazel aw vin lutuk ka hriat rualin ka ṭhu chhuak nghal a, Leena pawh ka phih tho dawrh bawk.

Bedroom kawngka bulah Dazel Solomos chu a rawn ṭhingṭhi thla hnawk a, a bânpuam aṭanga thisen lo chhuak chu a lâr ṭha ngei mai! Eng thil nge thleng ta hi!

"Dazel...!" Khum aṭangin ka tho chhuak nghal a, Leena erawhin buai chiai miah lovin Dazel chu a pan a, ka thawh chhuah ruala ka taksa na ut ut chu haider theih pawh a ni lo. Ka nâk hnuailam a na ngut ngut mai.

"I nupui hi khawi pindanah emaw thukru rawh, Apartment kawtah i security te leh Lewis Bevan ṭhuihhruaite an insual nasa a nia.." Dazel aw thâm ṭuak chu hriat a har lek lek.

Engtin nge a nih theih!? Kei ka che ṭha thei der si lo. Dazel lah chuti bawk, a hliam aṭanga thisen chhuak chu ka nupuiin a buaipui mawlh mawlhna, he Apartment hian pindan rûk pakhat a nei tak alawm le.

"Lee, corridor zawh phei la, kawngkhar dumah khan lutin keimah emaw Dazel emaw in kan lo koh hma che chuan chhunglamah inkalh hnan tlat ang che." Ka sawi zawh rualin thâwm mak deuh ka hre zui nghal a, Leena che lawk lo chuan ka thin atirim hlur tawh.

"Mahse, Absalom..!"

"Mrs.Colmer, i pasalin thu ka pe che a nih chu, hmanhmawh rawh." Ka ti chang ta fak a, eng dinhmunah pawh ding ila a him ngei tur a ni.

"Aw le," tih pahin ka biangah a rawn fawp zuai a, master bedroom chu a chhuahsan ta a, a mitmeng dul raih kha ka hmu hman.

Ka chênna hmun thleng thlenga min umzui ta hi a lutuk lam hret a ni. Dazel chemte-a vittu pawh hi atu a pawh ni rawh se, hremhmun lamah ka thawn liam ngei ang.

Inhnuai lamah thawm ari ṭuk ṭuk a, Hindi ṭawng hmanga riat nawk nawk te pawh ka hre pha a, dârthlalang keh ri chuai chuai chuan ka mipa rilru a kaitho ve ṭan ta.

Ka duh angin che ṭha thei lo mah ila, a tawp thleng ngam turin ka inbuatsaih ngei angai. Dazel hmel dâng lap leh a hmui duk char chuan ka thinrimna ati zual mai ni lovin tualthah mai duhna thinlung min puttir hial chu le.

"Absalom, ka hnunga chemte bur hi i phawi thei angem.." harsa ti zetin a rawn ṭawng chhuak a, ka bân leh lam ka hmang thei der si lo. Thinrimna sawifiah rual lohin min chîm mek a ni. Ka ṭhiana hi hmun hniha an vit a ni maw!

"Tuar hrâm hrâm rawh," tih pahin a hnunga chemte bur chu ka phawisak ta a, a chal hnâwng chap leh a mitmeng hniam raih aṭang chuan a thidang lek lek tih hrilh hranpa ka ngai lo. Mak takin kan room lamah tumah an lo la chho miah lo a, inhnuai lamah erawh thawm a ṭha hle. Che thei îk ila chuan ka chhuk tawh ngei ang. Mahse, tuna ka dinhmun en hian chhuk chi ziazâng ka ni si lo.

"Dazel..Absalom...min chhan r'u.." hmeichhe aw thâm chhalh ri ka hriat rualin Dazel pawhin a hre ve a ni ngei ang a rawn meng kâwk a.

"Brie..."

"Ka nupui aw a ni.." a sawi zo hman chiah, nikhua hre lo vin a tlu zui ta a, ka chelh hman ta lo.

Australia aṭangin Briena a lo thleng ta tihna a nia, Lewis Bevan-a kid ten an man tihna!

Thâwk ka la hawk a. Thihchilh ngai mah se atawp ka thlen ngei a ngai ta e..

'I'm Absalom Colmer'

Ka nupui leh ka ṭhiante pahnih an him chuan a tawk mai lo vem ni! Ka kut na lo lam ka hûm ruh ṭalh ṭalh a, pindan chu ka chhuahsan ta a...

End of chapter-14

©<++++[BeckirafARenthleI]++++>®



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: No registered users and 29 guests