READY FOR ROAR CH-2 Sentei Chhakchhuak Bochung

Episode kal lai dah luhna

Moderator: writers

Sentei Chhakchhuak
Posts: 159
Joined: October 26th, 2017, 2:02 pm

READY FOR ROAR CH-2 Sentei Chhakchhuak Bochung

Unread post by Sentei Chhakchhuak » May 16th, 2018, 10:09 pm

CHAPTER 2

READY FOR ROAR

Sentei Chhakchhuak Bochung


QUANTICO, Virginia

New Agent Training Course pawh kan zo fel a ni dawn ruai ta e. Agent ni tura training hi thil namai a lo ni lo. Blake Waylon nen pawh kan inhmu leh ngei a, a mize ngeng ngalh leh midang hneh theihna riau a neihte chuan a ni telin min hip hnai tial tial a, ka duh tih hi ka pha lo; mahse, ka tum min thulh tirtu atan erawh engthil mah hi țha tawk leh tling tawk a awm lo.



Ka pistol chu la kangin ka hma a target in khai chu ka tin vang vang a, 1...2...3... ka silai mu luhna zawn chu ka en a 10 ka score e...ka bula mite chuan kut an lo beng dar dar a, Blake chuan mit rawn siai zauhin a kutzungpui a rawn tipir va a.



Silai kah te zawng ka thiam ve zâwng tak a ni alawm le. Ka pa hnungzuiin a sapelnaah ka kal ve dat dat zel a, ka pa hi hmeichhia nih vanga inti no ngaithei lo chi a lo ni ve bawk nen kan unauin silai kah leh judo mahni inven nan min zirtir thlap maw le. A țangkai zia ka la hre chho zel chu a nih hi. Ka piah chiaha awm Maya target kah chu ka en a, 9 a lo score ve va mai. Silai kahah min tluk lo na in, PFT( Physical Fitness Test) ah ka tluk thei bau lo. PFT-ah hian a hniam berah point 12 hmuh ngei ngei a ngai a, a ni hi chu mipa țhen khat pawhin an tluk loh a ni tlat.



Kan training chhung hian engkim kan zir a ni mai. Hnu chhui dan ațanga, mahni in ven dan, case report ziah te, computer lama kan thiam dan te, motor khalh leh kan mi man hnungkhirh dan tur thlengin kan zir a, kan hmelmate ralthuam chhuhsak dan te.....aaaa zir loh a hleih pawh kan nei lo.




Kan hma a FBI Director thusawi chu ngun takin ka en a, vawiin hian kan training course zo in kan graduate ve tawh dawn a ni. He hun min hmanpui tur hian ka nau leh ka pi leh pu an rawn kal vang vang a, ka tana hun hlu lutuk min hmanpui hi ka lawmzia sawi fiah rual a ni lo. Ka pu, mi rinawm bur ram tana țhahnem ngai em em leh dikna ngaina em em tan chuan tunu FBI Agent a nei hi ram tana a tha thawh veah a ngai ngei ang.



Ka badge chu ka khawih a, tunah chuan dan dik tak hmangin ka nu leh pa thattu ka zawng thei tawh ang a, dan hnuaiah hremna na thei ang ber ka tawrhtir ngei ang. Tun hunah hian ka nu leh pa chu awm se min chhuang ve viau in ka ring a ni. Ni lo, an ni chu la dam se he hna hi ka thawk hauh lo vang.




Director's Leadership Award chu kan training chhunga zirna, ralthuam leh physical fitness a ti țha ber hnenah hlan a ni a, chu chu tudang ni lovin Blake Waylon ngei a ni. Tuma khum rual ni hek lo le. He mihring hi khawi lama țanga rawn kal nge a nih, kar 21 chhung ka training ho lai khan tunge a nih leh khawilam mi nge a nih chiah hi ka hre thei der lo. Kan training lai khan kan inhnimhnai viau tih ka pha lo, vawi eng emaw zat kan țhiante pawh kan thlim. Mahse training lai kan ni a, thil ropui lo leh chhuanawm lem loh tihna hun kan nei hran lo. Nula tlangval in date satliah ang ve tho hi kan ni.



An mahni hi Texas lam chhuak an ni a, lo neitu an ni awm e. Wheat an ching bera, sakawr pawh tlem an vulh thu a sawi a, engtikah emaw kan kal theih ngei ka beisei. Mahse a khawsak dan tam takah hian khawilai thing tlang loneitu fapa an lohna riau hi ka hmu țhin. Mize dang daih leh mihring dang daih, mihausa fapa duat sual an riau chang hi a nei țhin tlat a ni. Ka ngaihtuahna mai mai pawh a ni mahna.



Tunah chuan kan awmna hmun tur pawh kan hre ta e...kan vanneih asiamin kei, Maya leh Blake kan training pui 3 dangte chu Atlanta field office lamah kan awm dawn a, midang ho chu Cincinati, Honolulu, Chesapeake leh hmun dang dangah dah an ni. Maya nen apartment kan inluah țawm leh thei dawn a, a zia phian dawn e. Ka hna ka țan huna ka tih hmasak ber leh ka thupui lianber tur chu ka nu leh pa thattu zawn chhuah a ni. A harsa ang tih ka hria; mahse kan hotute țha takin ka sawi pui ang a, ka ti thei em em ang, ka hlawhtling nghal dawn lo tih ka hria, kha chain murder case kha midang khawih lai a nih dawn avangin ka tan inrawlh ve a rem dawn lo tihte pawh ka hre ve, thil thar hlek a awm erawh chuan ka ngawi mai mai dawn hauh lo.

*****************

Atlanta FBI Field Office (Atlanta Division)
Chamblee, Georgia
Blake Waylon


Kan Division headquarter hmaah chuan ka ding a, tunah chuan Waylon chhungkaw fapa duat ni tawh lovin FBI special agent ka ni tawh tlat. Ka nihna hi tumahin an hre tur a ni lo bawk. Kan chhungkua hi hre lo chu an vang viau ang, a chhan chu America rama ralthuam siamchhuaktu company lian ber berte zing a mi kan ni tlat Thales Group hre lo hi chu khawi hmun kawmkil leh planet dang ațanga rawn kal an ni hial ang. Kan chhungkuain indona ralthuam an siam chhuah mup mup laiin kei an fapa hi FBI agent ka ni leh daih lawi a, thil inrem lo tak chu a ni. Khawvel a ni miau a, thil inrem lo leh mak tak tak a thleng fo tur a nia lawm.



Kan bula rawn ding chu ka en a, a țhat ngaiin a țha reng mai, ni lo a ni telin a țha telh telh ka bialnu a ni hi ka chhuang hle a ni. A fing a, kan tui zawng a in ang bawk a, ka hmuh hmasak ber ațang khan ka theihnghilh mang pawhin ka hre lo. Inter Law college competition a ni a, mahni inring tawk tih hriat lutuk mai a, kan thu inchuh a vaw thla pap pap zel leh finfiahna a neih dan leh hmuhchhuah dan bawn lutuk kha ka theihnghilh mai mai tawh lo vang. Rin loh taka Shay's pub & wine bar-a kan inhmu kha khuannu ruat a ni.



Cambrige-ah khan ka țhianpa, Yale-a ka zirpui leh ka roommate nupui neihna a kal ka ni a, Bar-ah kan kal hlauh kha kei misual țawngțai khat ve tak tan pawh hian Pathian hnena lawmthu sawi mawlh mawlhna tur a ni. Ka thlah mai mai phal leh tawh hian ka ring lo. Midang ta a ni tur hi ka ngai ngam teuh lo. A bul hnaiah mipa dang an awm ringawt pawh hi theih ni se chu khap beh ka duh hial ta ve ang. Kei hi hmeichhe pakhat zûnah ka uai zawr zo ta a nih hi.

******************

UNKNOWN POV*


Ka hma a t.v hlaipui a thu puan chu ka ngaithla a, ka tum a hlawhtling leh ta, kei hi tumahin ka kawng min dal dawn lo. Ka cigar zuk chu ka fawp vang vang a, CNN reporter-in tuahthahna thlen thu a puan lai chu thlamuang taka thu der der chungin ka lo ngaithla mai mai chu a nih hi. Khati zat mihring an thi tawh chung khan tu tih nge an hrethei hauh lo. An hre lo reng ang chu, an zingah ka lamțang an awm tlat alawm.


"Senator Wright rawng taka thah a ni a, hei hi tu thil tih nge ni ang. Police lam ațangin engmah kan hre thei lova, FBI in he case hi an la dawn, he thihna thleng hian a hma a thihna thleng ho nen khan inzawmna an nei ngeiin alang." Chu reporter mai mai chu inzawmna an nei ngei ni in alang lova, an inzawm vek a ni. Nangni uicho Senator leh President hian ka sumdawnna hi tih tawp a control in tum amaw? In kuang lo innawr a ni, nang ni chuan ram enkawl zawk rawh u. Kan sumdawnnaah hian rawn inrawlh tum buai duh lo mai rawh u. In nunna inla duh a nih chuan. In la bansan lova in kalpui zel a nih chuan a dawt leh ah chuan Mr. President nangmah ngei khan silai mu i dawng ve tawh ang.



Ka cigar zuk chu ka nawr tawk a, tun ațanga minute 20-ah hian meeting pawimawh lutuk mai ka nei, kan kal zel dan tur kan rel angai...kan senator pawh kha a rawn tel ngei ang. A ni hi chuan min phatsan ngam dawn lo hrim hrim, inthlan lai khan ka sum in ka pui nasa em mai, kei hi awm lo ila Senator hi a ni thei dawn lo tih a hrechiang ve tlat.



Tuna ka michhawrte hi chuan min ti beidawng hauh lo vang. A hma a ka chhawr țhin zinga mi Theodore lah khan a fimkhur loh luatah hnu hma a hnutchhiah a, vanneihthlak takin kha hmeichhia khan a hriatna a hloh hlauh mai pawh a, thah ve kher ngai ka ti ta lo. Keimah ngeiin ka finfiah a, damdawiin a a awm lai pawhin a hmunah doctor-te ka zawt thlap a, a hriatna hloh hi a nei let leh mai mai tawh lo vang a ti a nih kha. Tihian awm mai mai rawh se. A țul ta viau a nih chuan duh leh kan dahțha leh mai a ni ang chu. Theodore pawh a thil tihsual man telin a pan tur lam lam pan tura ka tirh liam ve nghal kha. Vanram erawh a pan ka ring bik lo, a damlai khan thil țha tih nei miau hek lo i.



Minute nga a la awm tihah Greyson a rawn thleng a a ni hi FBI agent hlui niin a awm țhat duh loh em avanga an ban tak a ni. Phuba lak nan tiin kan pawl min zawm ve ta a ni. A hnung chiahah chuan Ebrahim-an a rawn zui ve bawk a, a mi hi chu America ram haw em em tu a ni, President thah phei chu a phur ber a ni ngei ang. Bomb lama mithiam bik a ni nghe nghe.



Khawnge kan hun vawng dik em em țhin hi tun tum chu a tlai tlat mai, chhan țha tawk tak a awm ngei ang. Chanchinthar a rawn hawn beisei phawt ang. Kawngkaa Senator rawn lut chu ka en reng a, mi dawihzep, mahni ram phatsantu a nih hi, ani pawh hi President kan dahțhat hunah chuan engtin emaw tak tih angai a ni. Meeting pawimawh telna tur aneih thu a sawi zut lehnghal a tunah chuan a ni tel lo hian engmah kan tih theih dawn loh avangin ka la dawh hram hram a ni e.




A tawp a tawpah chuan kan mi nghah pawh chu a lo thleng ta, a ni tan hi chuan țawngkam hawihhawm leh thupha chawina tih ang reng vel hian hmun an chang lo. A thu hriat thar ang ang chu a sawi par par a, a ni hi silai kap thiam lutuk ni in world champion hial lo ni tawh a ni, a thiamnate chu a țha lo lamah a hmang ta hlauh zawk mai pawh a.


Kan ruahmannate kan thu thar hriat ang angte kan sawi ho hnuah a hun tura tana țha ber chu kan hrethei ta, mahse chumi hmain la inhmuhkhawm leh phawt kan ngai ang. Kan uicho President chuan a chatuan hmun a pan thuai dawn e.


*******************



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)