Page 1 of 1

Unexpected Love - 5

Posted: May 16th, 2018, 10:19 pm
by ZonuniLeo
UL-5

Josh a lo let chuan ka thutna ngaiah ka la thu reng. "Bawihi, Hospitalah kal ka ngai, tlai dar 7:00 vel a chhuak turin ilo inpeih thei angem?"

"Awle, khawnge kan kal dawn?"

"Kanu leh pa chenna ah" ka chalah a fawp zeuh va, a room lam panin inchungah a chho nghal a.

Nina ka ngaihtuah chhuak thut, ka call nghal "Hey, i va reh em em ve.. Min hre tawhlo emaw ka ti hial a.." a nui hawr hawr a. Ka ngai hle bawk..

"Hna kha min lo zawnsak em? Nang pawn min be duhlo, min ngaihsaklo lutuk" ka titau der vel ani ber...

A hnu lamah chuan Nina tawng ka ngaithla deuh char char. Benji chanchin a sawi tuiin a duh ngai reng reng loh heti taka a duh leh ta hi mak ka ti leh thin.

Josh kal tur a rawn chhuk a. Nina nen kan la inbe mawlh mawlh bawk. Ka vailiam satliah chu a lungawi loh hmel deuh riauin ka hria.

"Kim, Josh a tha zel maw?"

"Aw.. Anu leh pate an lokal a"

"Wow... Engnge a an? an fel em?"

"Aw.. Mahse, nuam ka tilo. Chhuahsan ka duh " ka tih chuan a rawn au hlut a.

"I a deuh emni? Kim, khatiang kha an vang teh ania aw.."

"Kan inthlau em ani, Nin.. Bakah buaina neuh neuh a awm bawk"

"Kan inhmuh vat angai anih chu, ka awl theih veleh ka lo bia ang che.. Saw.. Kan boss in min rawn en tlat, ka dah mai aw.. Kim"

Ka room ka ti fai a, Joshua room ka tihfai sak bawk. Mipa naupang thlalak kha ka ennawn leh thin.Amah a ang bawk si. Mahse Anu leh pate khan engmah an sawilo.

Ka tihfel zawh chuan Reenu eitur siam chu kan ei dun a, Inbe tam vak theilo mah ila, kan in ngaina ve tawh viau.

Ka phone thara Joshua thlalak dah ho chu ka en a, ka tan hian ala hlu dawn mange, Ka print tir vek a ngai dawn ani ka ti rilru neuh neuh a.

Tlai dar 6:00 ah ka inbual a, ka insiam zui nghal mawlh mawlh. Joshua kawr min leisak polka dot design, ka khup thlenga fual, ban tlawn, puan dai raih leh nude colour heel sang vaklo ka bun a. Coral bag ka keng thung. Ka sam chu ka thiam tawkin ka herh kawi deuh a. Ka hmai erawh ka duhdanin ka chei nasa lemlo.

Uluk zetin darthlalang hmaah ka inthlek a,.a lungawithlak viauin ka hria. Zahawm tak, nalh bawk si a inchei hi ka suangtuah fo thin, Joshua zarah ka duhdan takin ka inchei thei ta ani.

Joshua roomah ka lut a, tumah anlo awmlo. "Josh" ka au a..

A reh riau, inhnuaiah a awm pawh ani mahna. Inhnuaiah ka chhuk a, Reenu a lo awm, Josh a lokir tawh em tih ka zawt a. A lu a thing, dar 7 a inpeih hman turin min hrilh si a, tunah a ri tep a. A lo la let silo chu mak ka ti deuh.

Ka phone ka la chhuak a. Ka try ngat ngat. Switch off a ti tlat bawk si, living roomah chuan ka thu vang vang a. Ka hriat tirh atanga a vawikhatna anih vangin ka ngaih a tha theilo.

Max Hospital chu ka phone ta ringawt a. Dr.Josh a awm leh awm loh ka zawt a. Surgical roomah a awm mek thu min lo hrilh a, Ka thaw huai mai.

Ka nghah rei tak em vangin ka inthlak leh ta ringawt a. Josh lo haw lai chuan eitur ka lo insiam mek..

"Bawihi, tum loh deuhin hna ka nei leh a. Ka tihpalh takzet" a ti sup a. Hospitalah a rawn inbual sa ani ngei ang..a sam pawh ala huh hlap..

"A pawi hleinem, kal ka huphurh tehreng nen" ka lo nuih var var a, pawitihna ka neilo tak tak...

"Anni pawh haw kawngah ka rawn hrilh chiah, kan hna hi tum lawk loha awm angaih chang atam khawp mai" ka pawmpui thlap.

"Ka han inthlak anga, kan ei dawn nia" inchungah a chho va. A suit hak inhmeh zia chu ka lo ngaihtuah neuh neuh thung.

Kan eizawh chuan pawn lamah thuin kan inngheng rial a. "Delhi hi ka pianna ani a, Kapa leh Kanu hnathawhna ani bawk, Mizoramah ka awm tamlo a, unaunu pakhat neiin, ani chu Lungleiah pasal neiin a awm..." Joshua thusawi chu ka lo ngaithla uluk hle.

"Kapu boral vangin Kanu leh pate chu Doctor ka zirchhuah kumah Aizawlah an let a.Kapa chiah fapa a neih vangin a sumdawnna a kutah a hnutchhiah vek bawk nen, an hna an bansan ve ve a, tichuan, Kapu sumdawnna chu an enkawl ta ani. Tuna an awmna pawh hi kan chhungkua Delhi kan awmlaia kan chenna niin, an ngaina khawp mai" ngaihnawm ka lo ti hle.

"Josh, i zawh hnuah Mizoramah tinge i thawh ve nghal mai loh?" ka kut chu humin a hmer vang vang a...

"Ni e, Kapa pawn min ti fo mai. Helai hi nuam ka ti zawk rih ani maithei, haw hun te pawh ala awm ang chu.."

Inchhungah lutin Juice leh tui ka la chhuak a. Mut ala chhuaklo viau bawk....

Josh bula ka thut chuan phone in mi alo be mawlh mawlh a, Juice chu dawhkanah dahin ka ta tur chu ka keng a, ka in zeuh zeuh...

"Bawihi, Naktuk chawhnuah Mohali-ah zan hnih riaka kal kan ngai anih chu. Hospital chopper kan hmang dawn a, lokal ve ta che" zan hnih lai atello a awm chu ka peihlo ru kher mai.

"Kal love, In ka lo nghak ang... A rei lutuk loh chu" a ruk tak chuan ka huphurh...

"Ka lo haw hunah i hna tur kha kan chingfel dawn nia.." Ka lo theihnghilh leh der tawh. Bakah thawh tak tak ka tum chuanglo a, ka chhang lemlo. Kan mut chuan alo hma tawh vaklo.

A tuk Chawhnu lama Josh zin tura a chhuah chuan a khawharthlak kher mai. Tihtur awmlo bawk nen, ka phone ka khawih deuh reng a..

Josh chuan an thlen veleh min lo call a. A aw ka hriat chuan ka ngai zual hle. A awmlohna la rei loh tehlul nen, ka ngai veng veng reng mai..A whatsapp dp leh status te chu ka en a, a dpah kan pahnih thlalak hmangin a statusah erawh ka muhil lai a hmang thung. Ka ngaih a thain ka hlim veng veng ani.

Zanah chuan ka mu hma hle. Ka phone khawihlai ka lo muthilh san daih ani.

Chawhnu lam ah chuan pangpar nalh zet zet ka cut ho chu living roomah ka khawi mawlh mawlh a. Kelly lo lut ka hmuh chuan buaina ka hmachhawn dawn tih ka hre nghal.

"Khawnge Josh?" uluk zetin ka thawmhnaw vel chu a en a, a hmel landan vela min hmuhhniam zia a tilang thiam lutuk chu mak ka lo ti zawk.

"A zin .." ka thiltih lai chu a laklawh em vangin ka chhunzawm mawlh mawlh a.

"Engvanga la awm reng nge i nih? Ka hrilh chiang viau che si a, ka thusawi kha engvanga zawmlo nge i nih?" ka ngawireng a, chhan ka tumlo.

"Ka biak che chu..." a ti tuarh a, chiangzetin ka en a, "Josh hian ka kal a phallo ani" damthlapa ka tih chuan a thinrim zual sauh, engahmah ngailo in ka pangpar khawi bawk ka chhunzawm leh a.

"Mipa tihlawm dan chu i eizawnna ani bawk a, i lo hnehsawh viau pawh aniang, ka unaupa hi i thangah awk mahla Atan ka duhlo che" muangchangin ahmel ka en a, Ka thinrim em vangin ka hmai te chu a sa hat hatin ka hre hial...

"I thusawi tur reng reng fimkhur takin ngaihtuah hmasa rawh Kelly, i unaupa hian ka kal a phallo a, chuvanga a bula la awm ka ni" ka aw chu a khur leh dar dar tawh. Ka hlauh vanga khur emaw a ti ang tih ka hlau zawk..

"Fimkhur taka ngaihtuah.." ngeiawm zetin a nui a, a hmui ati sawi zeuh bawk. "Mi chi hrang hrang kawp lawr, thiam neilo, fahrah lehnghal hian ka thusawiah fimkhur turin min hrilh ve khanglang a? Josh hian a hne vat ang che, nang ang hmeichhe hniam lutuk hi a mil rei chi ini lo"

Ka en kal a, henu hi a rapthlak tih bak sawifiahna tur ka hrelo. "Mihringpuite hmai zahna chang hre miahlo hi eng anga zir sang pawh nila, engahmah ka ngailo che. Fahrah leh mahni taksa zuar ka ni, kei aia i danglamna ka hrelo"

Thil tla ri thawm hria in kawngka lam kan hawi dun thawt a. Joshua Nu chu hmaidang lapin kawngka bulah alo ding a. A hmelah chuan kan thusawi zawng zawng chu alo hre vek tih a hriattheih. Engchin chiah nge a hriat phei chu ka hrelo.

A tlu mai dawn emaw tiin ka pan hnai a. Mahse inthlahrunna vangin ka pawh ngamlo, Kelly chuan a dawm vat a, keiin a thil khai tla darh nuaih chu ka chharkhawm a, Reenu in min lo pui bawk.

"Chhuak rawh..." tunge a tih ka hrelo. Josha nu chu ka en a. Kelly hmel nuisawng chu ka ngei takzet.

"Chhuak nghal rawh, Remkim" Joshua Nu aw chu thinrim insum tih a hriat hle. Ka ding a, awmdan tur ka hre mailo.

"Chhuak nghal turin a duh che anih chu.. Remkim" Kelly chu ka melh ngawt ngawt a. A lawm hmel leh nuisawng chu ka tenin ka haw ngawih ngawih..

"Josh ka lo nghak..." ka sawi zo hmanlo.

"Ka fapa chu keiman ka lo bia ang, ilo tel a ngailo" chairah a thu a, hnial chi anilo tih ka hria..

Engmah sawilo in, Inchunga ka roomah ka chho nghal a. Ka thawmhnaw pho chu sengin bagah ka dah lut mawlh mawlh, ka whatsapp tone ri chu enin Josh ani. "Ka ngai che" tih zawng min rawn thawn chu ka chhiar a. Mittui nen ka insiam...

Reenu kha kilkhatah alo ding zum ve reng a. Kan thusawi erawh engmah a hrethiamlo. Ka roomah ngawirengin alo lut a, "Didi" ka banah a vuan a, min lainat hmel ve khawp mai, min khai thlak pui turin ka lo ngen a. Inhnuai kan chhuk chuan Josha Nu leh Kelly anlo la awm. Kelly chuan tui intur alo pe mek a.

Ka bag ho chu pawnah dahin Reenu ka ventir a. A dang ka khai thla leh a, Ola cab min lo call sak turin ka chah bawk.

Ka khaithla leh a, a dang laktur ka nei tawhlo. Ka thawmhnaw zawng zawng ka keng seng lo nasa viau bawk "Nangma bungrua lo chu i la lo turah ka ngai, thubuai neih itan a hlauhawm tih pawh i hrethiam ve ang chu..." Kelly tawng vang chuan ka ding dat a. Joshua Nu ka zah vanga insum hram hram ka ni...

"I duh chuan i check vek thei ang" ka ti sap a..

"Ka fapa hi i tihbuai zui loh hram ka beisei. Khawngaihin inthiarfihlim ang che" a lam hawiin ka bu nghat a. Ka chhuak zui nghal. Vawikhat pawh ka hawilet lo.

Reenu Ola chah chu lo thleng tawhin ka bag ho pawh anlo dahlut vek a. Ka bag khai chu dahlutin kei pawh ka lut nghal, mittui karah Reenu chu ka nuih sak a. Lut nghal turin ka ti bawk.

Kan hmazawna tlan turin Ola Driver chu ka hrilh a. Kan tlanchhuak nghal, Reenu lan theihloh hnuah ka kalna hmun tur ka hrilh chauh, Reenu khan a hriat ve ka duhlo ani.

Ka phone la chhuakin Nina ka call a. Ka insum thei viau e..

"Nin, tunah hian ka rawn pan mek che, Khawiahnge i awm?" ka mittui ka hru zauh va. Driver hmuha tah ka duh hauhlo.

"Engnge thleng?Kim, ka haw mek a.Ka lo nghak ang che" ka aw a thildiklo awm chu a hrethiam nghal vek ani, min nghahna tur a rawn sawi a. Ola cab Driver hnenah Nina min nghahna chu ka hrilh a.

Kan thlen chuan Nina alo awm vang tawh. A rawn thu lut a. An chenna lai Driver chu hrilhin kan tlanchhuak leh nghal.

"Kim, Benji an Khaw lamah a haw a, a khawhar thlak khawp mai. Thil diklo a awm tiraw? ..."

"Thlen hunah ka hrilh ang che, Benji chu engnge a tih?"

"Anu a damlo a, a rei viau maithei.. Aw.. Khalaiah khan ding rawh" tiin an chenna chu a kawk va a. Ka bag ho chu Driver chuan min rawn khaipui bawk a, vawikhatah kan zo der.

Driver chu fare ka pekfel hnuah an room lamah kan inkhailut a. Ka phone ri chu enin Josh ani. A ring zawh hnuah a sim card chu phawiin ka paih nghal a..

Ka chetdan chu Nina chuan min lo en reng a "Engnge thleng chiah?" ka bulah thuin, ka kut a vuan a.

Thil thlen dan chu muangchangin ka hrilh a. Kelly lo lan atangin... Nina thinrim lutuk chu a thu theilo, a tho va. A tei kual chhen..

"Kim, Kelly chu ka hria. Rapthlak lutuk, a sama hnuh hrep ka duh ani" a ti duh leh tak tak ngei ang. Za lo zetin ka thensak a.

"Josh hi engtikahmah ka hmu thei tawhlo ang Nin, Anu in a fapa tan min duhlo pawh hi thil awm tak ani...."

"Engnge awm a nihna?? Kan dinhmuna kan dinchhan hi kan duhthlanna anilo, Kim.. Theihse chhungkaw pangngaiah, mahni chak zawng zir theih te hi kan duhlo bik emni??" ka thiannu thinrim lutuk chu kan bengdai leh rih a...

"Khawngaihin Josh hian kan inzawmna alo hrechhuak a, a zawt che anih pawhin thudik hrilh suh aw..." Nina mitah chuan ka thusawi chu a ngaihdan anilo tih a lang chiang hle.

"Khawngaihin.. Nina, ka ngen takzet che ani" beidawng zeta ka tih chuan min en reng a, min kuah vang vangin "Awle... I tih tlat chuan leee...Ka awmchhung hi chuan i mal ngailo ang Kim" ka mittui a far ringawt...

Kan pahnihin eitur kan siam a, Inluahtur man to vaklo ka mamawh thu ka hrilh a, Nina chuan ka bula lo chen ve a tum thu sawiin, Ka lawm kher mai.

Zanah Josh nena kan thlalak chu kan en dun a, kan hun hmandan te Nina chu hrilhin ka mittui luang chu ka ngai pawimawh peihlo. Ani pawh chuan min lo tahpui bawk....

Zingah chuan Nina hna kal tura a insiam laiin keiin eitur ka lo siam a. Ka eitur siam vang nge ka uak tuarh tuarh mai, Nina chuan ngaihthalo zetin min lo en a.

"Kim, ka kallo mai dawn emni?" bathroom kawngka pawnah a ding a. Keilah luak thei silo in ka uak leh tuarh thin. Mittui tla phungin ka chhuak a.

"Ka tha mai ang, tunlai chu ka mu tha vaklo nen, ka pum thalo a chhuak ani maithei" tiin ka siam chhunzawm leh dawn a. Ka uak leh ta...

"Kim, va mu phawt teh, ka lo haw vat ang" Nina chuan roomah min kailutin min muttir a. Engmah eichakna pakhatmah ka neilo bawk.

"I iphone kha i switch off loh chuan Josh chuan i awmna a hre harlo tawp ang" a tih chuan ka hrechhuak zawk.

Hmanhmawh zetin ka switch off a. Ka phone hlui ka hmang leh rih mai aniang chu..

Nilengin ka mu a, ka lu hai nen... Tui bak engmah ka ka ah a lut theilo. Ka luak a chhuak zel bawk si, ka awmdan chu mak ka tiin ka hrethiamlo hle.

A sawi ang tak in Nina chu alo haw harlo.
"Kim, inluah tur tha deuh ka hria ania, ka thawhna hmuna thawk vete an insawn dawn a, a luahman pawh kan ngam tawk viau ang. An bungraw tam zawk a chhawm theih dawn bawk..."a aw-ah chuan a phurzia alang.

Kei pawh ka lawm hle. Benji tihbuai rei kha ka hlauh ber ani. Thaw a veng ta sawt mai.

"Kim, vawin engnge i lo an? Ka duh anga hma pawn ka lo haw theilo" a tih chuan ka that thu ka hrilh a.

"Benji pawh anu atha ta aniang, naktukah lo chhuk a tum thu a sawi a, kan indan tur pawh ka la hrilhlo, a lo chhuk hunah law law ka hrilh mai ang"

"Nin, in inkar tibuaitu nih ka duh miahlo.. Keimah vang hian inbuai anih vaih chuan..."

"Ka unaunu i ni a, i awm theihlohna ah ka awm thei biklo, Kim.. Ka awmchhung chu i mal ngailo ang ka tih kha.."

Ka nuna thilthleng tamtak zingah hian Nina aia hlu hi avang khawp mai, A chungah ka lawmin tibuaitu ka ni reng chu ani si a, Amah bak tihbuai ngam he Khawvelah hian tumah ka nei heklo.

Engmah ka ei peihloh vangin Nina chuan a ei mawlh mawlh a. Kan pahniha kan awm chuan Josh ka ngaihna pawh a reh sawt thin.

Zing ka tho chu ka khuasikin ka luak a chhuak leh em em reng a, hrehawm tiin thup tum hle mah ila, luakchhuak chu thup theih hek loh....

Sofa a ka thu khur dar dar chu min en reng a. "Inentir vat la a tha ang Kim, hetiang ringawt chu tha ka ti miahlo. Engmah i ei bawk silo, a hma a i pum that loh khan hetiang hian i awm miahlo" Nina chuan a ti bawrh bawrh a.

"Ka tha ve leh mai ang, va in siam rawh. I tlai ange.. Benji chu i hmuak dawn em?" ka mu a. Khawlum tawk hnuaiah chuan puan lum ka sin bawk.

"Kal loh theih ka duh emai, Kim.. Ka ngaihtuah che" Nina min ngaihtuah zia chu ka hria. Ka tibuai em em reng mai hi ka inthlahrung ve ngawih ngawih thung.

Nina chhuah hnu chuan Joshua phone min pek chu ka en vang vang a. Ka on ngam bawk silo. Engtinnge a lo haw-ah a awm ang tih ka ngaihtuah a, ka hmu chak takzet. Ka ngai em em bawk. Ka mittui a luang a, ka tap ringawt chu ka inthiamlo hle. Ka no ta lutuk ani tiin ka in ngaihtuah a. Mahse, ka tap zel tho si.

Josh chuan kei aia tha a hmu leh thuai ang, kei erawh chuan engtikahmah ka theihnghilh ngailo ang tih ka hrechiang...

Eng chena rei nge ka tah pawh ka hrelo. Ka khawsik a reh a. Ka inbual fai vat a. Ka theih ang angin Benji chenna chu ka tifai a. Nina hi hmeichhe che fel tak anih vangin tih rei tur phei chu a awmlo.

Anlo thlen chuan Benji chu a rawn nui lut vur vur a "Nina hian insawn chhuah in tum thu a sawi a, kan pathuma kan insawn dawn anih loh chuan ka phal miahlo" a ti sup a.

Benji hi Josh ang thova palian aniin Josh erawh a chenlo hret ang tihtur ani. A nelawm in a fel hle bawk.

"Chutiangin i ti theilo ang, kan tibuai lutuk ang che..." ka inthlahrung takzet ani. Nina chhuhsak ka ang bawk si.

"Kim, ka ti tak tak.. Hetah hian kan pathumin kan cheng ang. I tan hrehawm tihna tur pakhat mah a awmlo. Nan unaunu i ni a, mihrang i nilo" Benji chu ka en ran a. Ka mittui a luang leh ringawt tawh...

"Ka lawm lutuk... Benji, tunlai chu ka tahbelh riau aaa" ka ti ta ringawt a.

Tlai lamah Nina nen rawng kan bawl a. Kan hlim dun leh viau. Ka thil siam engngemaw ber chuan ka luak a ti chhuak leh a, luak thei silo in bathroomah ka inkhung reng a. Ka chhuah veleh

"Enteh, Kim... Nagaland thei hrang hrang alo hawn anih hi, kan ei chhin.... Awi... Thur lutuk" Nina then nawk nawk chu enin ka nuih lo theilo.

"Ka lo ei ve chhin" Nina bulah thuin Ka ei a, ka ei zel a. Nina chuan makti zetin min lo en thung.

"A hmain i ei thei ngailo, lawkin....Kim, Nau i pai ani lo maw?"

Ka thil thial lai ka tawp chawt a. Nina chu ka en reng ringawt. Josh nen khan vawikhatmah invenna kan hmang ngailo. Ka lo ngaituah ngai hauhlo...

"B....lo chhuak teh" Nina chuan a ti chul a. Kei chu ka melh ngai melhin ka lo thu ngawt ngawt thung.

"Engnge ni?Nan..." Nan chu Bena kohdan ani.

"Enteh..sawlaiah khan khawngaihin pregnancy test kit 2 va lei lawk la" a bialnu biangah a piai zauh a, Benji chu a chhuak zui nghal.

Fahrah ka ni a, keimah ang bawka fahrah siam leh chu ka hreh ber ani. Mahse Josh ka hriattir thei lo. Ka ngaihtuahna a buai nuaih nuaih a. Benji lo let lai pawh ka hrelo.

Nina in bathroomah min kailut a. A tihdan tur min hrilh hnu chuan ka ti nghal. Ka tawngtai khat hle. Pathian lakah ka inthlahrung a, ka be ngailo, Lo ni lo hlauh se tiin ka tawngtai phah hial a. Keimah pawn en ngam loin kawngka bula ding Nina chu ka pe a.

A au chul mai, "Nutei ka ni dawn e... B, lo tlan tehhh. Kim.. Vawikhat chiah ti leh rawh" min nawr let a. Kawngka a khar leh sawk sawk.

Ka tihnawn leh pawhin positive tho. Kei hian hremna ka phu tawk ka dawng ani ngei mai. Ka naute khawngaih vangin ka tap a. Keimah ka in haw em em bawk.

Room pakhat zawka Khumah ka mu a, Nina chu a phurin ka chet ve pawh a phallo. Soup tuihnai zet min siamsak chu chaklo teh mah ila, ka eizawh hma a kalsawn duh silo. Ka eizo vek a. Thei pawh uluk taka silfai min chhawp teuh bawk.

Zanah chuan ka inngaihtuah nasa lutuk a. Ka muhil tlem hle. Ka phone hlui zawka Josh thlalak chu ka en ka en a, hria se engtinnge a ngaih ang? A thin arim angem?

A thinrim ngei ang. Ka taksa chu duh mahse, kei ang mai nena faneih chu a duh hauhlo ang. Chuvangin ka naute hi ka pai anga, keimah ngeiin ka enkawl ang. Ka ta chauh ani... Josh chuan min ngaihsakloin a reh hmak ani si a.

After 5 months

Benji leh Nina nitin hnathawkin an chhuak a, kei Inah ka awm reng thung. Ka chhuak khatin ka chhuah ve chhun chu inentir ani mai, ka inkhung nasa lutuk a. Kal chhuah pawh ka hreh hle. Josh hmuh palh ka hlau em em bawk.

Zanah Benji hnenah Dawra min kalpui turin ka sawm a. Ka ATM card ka keng tel, an thawhchhuah ringawt rinpui reng hi thil nuam anilo.

Kawrfual ka ha a, ka dul puar chu a lang tawh hle. Nina pawhin ka dul len chak bikzia chu a sawireng thin. Thlathum chhung khan tui leh theithur bak ka ka-ah a lut thei miahlo. Ka cherin ka tla hle a. Tunah chuan ka ziaawm ve tawh. Zantin Joshua thlalak enlo in ka muhil theilo a, ngaiah ka neih tawh ani ber.

Benji nen chuan kan kal phei dat dat a. Kan sira Car ding dat ka va en chu ka che thei tawhlo. Chiang lutukin Josh chuan min lo en ve reng bawk. Car thar anei ani ngei ang.

Benji chuan engmah hre ve heklo. "Tinge i din daih a?" tih pahin ka banah a rawn kai a. Josha hmel insehruh talh talh chu hmu in hmanhmawh zetin kan kal hlawk hlawk a. Motor kaltheihlohna ah chuan lut chhoin angaihna hrelo zetin Benji chuan min rawn zui a..

"Kim, engnge awmzia? I tha em? I hmai a dang (pale) vek..."

"Josh ka hmu" harsa zetin ka tawngchhuak a. Ka khur nasa hle bawk.