THE SICILIAN (BOOK III-V) By Mario Puzo

Episode kal lai dah luhna

Moderator: writers

Loma hmar
Posts: 123
Joined: March 20th, 2018, 11:51 pm

Re: THE SICILIAN (BOOK III-V) By Mario Puzo

Unread post by Loma hmar » May 23rd, 2018, 9:26 pm

CHAPTER 19B

Ni hnih hnuah chuan Pisciotta chuan Don Croce chu Rome leh Palermo-ah chuan a zui ta a ni. Don Croce chuan lal chhungkaw zinga mi ang maiin a cheibawl a. Dik tak chuan Pisciotta chu A hmel hriam hrak te, a hmuihmul tlemte zuah te, A vun dawldang thim raih mai te, a mitmeng tawrawt leh nunrawng tak te, ngaihnobei riauna leh he khawvela thil awm zawng zawng hi a ringhlel ta vek emaw tih mai tur te chuan Borgia general, Cesare pawh a ang hle a ni.

Palermo-ah chuan Hotel Umberto, Don Croce-a ta ah chuan an thleng a, Pisciotta chu a tha thei ang bera enkawl a ni. Rome-a Minister Trezza a hmuh huna mi tur thawmhnaw thar lei turin hruai chhuah a ni a, Restaurant changkang ber berah Don croce nen zanriah an kil dun bawk a, chutah Don leh Pisciotta chu Cardinal of Palermo chuan a lo dawngsawng ta a ni.

Cardinal chu a dung a sang hle a, lukhum sen bial a khum a, puan sen lar a bat bawk a, a hmel hmang chu a mam hran loin zawnghri veina hnuhma a lang thei. Don Croce khan a sawi kur nasa viau nangin Pope dinhmun luah thei tura vote khat pawh hmu tur hmel a pu lo. Mahse a hun a zira inphiar ruk thiam tak, Sicilian a ni thung.

Pisciotta thlarau ngaihdamna serh leh sangte tih zawh a nih hnu chuan, Cardinal chu a tumah a lut ta a. Sicily-ah hian Holy church chu dinhmun hlauhawm takah a ding tih Pisciotta chu a hrilh a. Communist chu inthlana an chak a nih chuan, tunge thil lo thleng tur hria? Cathedral ropui tak chu hal chhiat vek a ni ang a, khawl thil siamna hmuna hman a ni maithei. Virgin mary lim te, Isua kraws te leh mithianghlim hote lim zawng zawng chu mediteranean tuipuiah paih a ni an a. Puithiamte chu thah an niin nunte chu pawngsual an ni bawk dawn a ni.

Chutah chuan Pisciotta chu a lo nui a, Tu Sicilian miin nge- Communist chu eng anga nunrawng leh pawlawh pawh ni se- nunho pawngsual chu suangtuah ngai ni? Cardinal chuan a lo nui chu a hmu a. Guilianno chuan Communist ho inthlan hmaa an insawimawina chu a tudai a nih chuan, amah, Cardinal ngei chuan easter sermonah Guilianno dikna leh hlutna chungchang thuhril a nei ang a, rome sorkar chu zahngaihna a ngen sak dawn a ni. Don Croce chuan chu chu Rome-a minister an hmuh hunah a hrilh thei bawk ang.

Chutah chuan Cardinal chuan an inbiakna chu a khar a, Pisciotta chu mal a sawm a. An kal hma chuan Pisciotta chuan Guilianno hnena entir tur lehkha ziak, inbiakna an nei ngei a ni tih tihchianna tur Cardinial chu a dil a. Cardinal chuan a lo remti a. Chu mi thila Holy church prince atna avang chuan Don chuan mak a lo ti hle, mahse engmah a sawi lo.

Rome-a minister hmuhna chu Pisciotta thiam dan zawng a ni zawk mah. Minister Trezza chuan Cardinal ang khan thlarau mi lem a chang ve lem lo. Minister of justice a ni a, Pisciotta lah chu bandit thu keng tu mai a ni bawk a. Pisciotta hnenah chuan Christian Democratic-in inthlana an chak lo a nih chuan, Communist ho chuan Sicily-a bandit awm zawng zawng chu an khawrhchhuak vek dawn a ni tih a sawi a. Carabinieri ten tlang lamah Guilianno do zawngin an la che reng tih chu thu dik a ni a, mahse chu chu tih loh theih loh a ni. A thangmawi zawnga tih a ngai a, chuti lo chu chanchinbu lama au thawm a nasa lutuk dawn a ni.

Pisciotta chu lo inrawlhin, “Your Exelency, in party chuan Guilianno chunga zahngaihna lan tir chu in ti thei dawn lo tih min hrilhna em ni?”

“A harsa viau dawn a ni,” Minister Trezza chuan a ti a, “mahse thil theih loh chu a ni lo, Guilianno chuan inthlannaa kan chak theihna tura min puih a, rukruk leh rukbo tel lova hun engemaw chen ngawi reng a a awm bawk a, a hming chu hlauhawm leh tawrawt lutuk lo tura a indah theih bawk chuan. America-ah engemaw chen awm boin a lo haw leh hunah ngaihdamna chu a nei thei maithei a ni. Mahse thil pakhat tiam theih ka nei, inthlannaa kan chak a nih chuan, a mah manna tura tha thawh a nasa lo vang. America lama kal a rilruk a nih pawhin kan dang lo vang a, lo dang turin America thuneitute hrilh an ni bawk lo vang.” a ngawi hlek a, “a mimal ang zawng pawhin keimah ngeiin ka thuneihna zawng zawng hmangin Italy President chu ngaidam tura lo hmin ka tum ang.”

Pisciotta chuan nui deuh sawng chungin, “Mahse Khua leh tui pangngai kan nih chuan, eng nge kan ei ang, Guilianno leh a mite hian? Sorkar chuan hlawh min pek theih dan kawngte a awm em, an hna bawlhhlawh tak kan thawk dawn a ni a.” a ti a.

Don Croce, laiking muhil ang maia maimitchhinga lo ngaithla rengtu chu, chutianga bandit satliah mai main sorkara pawisa a ngiat avanga minister thinur lo tawngchhuak tur dan nan chuan rangtakin a lo tawng chhuak a.

“Fiamthu a nih kha, Your Excellency,” a ti a, “Naupang mai a niin Sicily hi a vawikhat chhuahsanna a ni a, khawvel hmun danga dan pangngai ang hi a hrethiam ve lo a ni. Nang chuan chu chu i ngaipawimawh tur a ni lo e, ka kutah dah mai rawh.” Pisciotta chu ngawi tawh tur tih nan a han melh a.

mahse Minister hmelah chuan nui hmel a lo lang thut a, Pisciotta hnenah chuan,“A tha e, Sicily tleirawl nun zia a la inthlak lo chu a lawmawm hle mai. Keipawh khatiang kha ka ni thin a, dik nia kan hriat chu kan sawi hreh ngai lo. Intiamkamna aia nghet zawk thil dang i duh a ni ang e,” a ti a. A dawhkan lam chu banin red-border card, laminate thlap hi a rawn phawrh chhuak a, Pisciotta pek pah chuan, “Hei hi special pass keimah ngeiin ka sign a ni a, Police tihbuai miah lohin Italy leh Sicily khawi hmunah pawh i kal thei ang, a buk tawk rangkachak chu a hen ngei ang.” a ti a.

Pisciotta chu lawmthu sawiin a kun a, chu card chu a jacket hmalam ipteah chuan a thun a. An zin kawngah khan chutiang card chu Don Croce-an a hmang lai a hmu a; thil hlu tak a dawng tih a inhria a ni. hei nen hian lo man ta se engtinnge ni ang? Ram pum pui nghawr nghing dawt a ni ngei ang, tih chu a rilruah a lut zawk a. guilianno-a pawla Second-in-command-in Minister Trezza signature chuang security pass a ken chu engtin nge a theih? A han ngaihtuah viau nangin a chhan tur awm a hre bik lo.

Chutianga thil pawimawh a pekna chuan Minister chuan a chunga rinna a nghah zia leh a duhsak zia a lang a. An zin chhunga Don Croce-a ngilneihna chuan a tilawm hle bawk.Mahse heng zawng zawngah hian Pisciotta chu a la hmin lem lo. An kal hma chuan An inhmu tih tihchianna lehkha, Guilianno entir tur ziak turin minister chu a ngen a, mahse Minister chuan a lo hnial a ni.

Tlanga a let leh chuan Pisciotta chu Guilianno chuan uluk takin thu a zawt a, a la hriat theih ang zawng zawng thu mal tin te sawi vek turin a ti a. Pisciotta chuan Red-border pass card chu hmuhin, an pek avanga mak a tih zia leh minister tana a hlauhawm zia chu a sawi a. Guilianno chuan a darah a ben thak thak a, “Unaupa tha tak i ni,” a ti a, “Kei aiin anmahni rinhlelhna i ngah zawk daih a ni, mahse ka laka i rinawmna avangin thil nihna tak i hre fiah thei lo a nih kha. Don Croce chuan pe tur chein a ti a ni ang, Rome-a kala anamhni thu rawlruktu atana hman che an duh a ni.”

“Chu nawhchizuar fapa mai mai chuh,” thinrim takin Pisciotta chuan a ti a, “Kir leh nan he card hi ka hmang anga a hrawk hrui ka chhat dawn a ni.”

“Ni love, Card kha chu dah tha rawh, nakinah kan tan a la pawimawh ang. Chuan thil pakhat, kha signature kha minister signatur a ang viau a, mahse a ni lo, a lem a nih kha. An duh anga hman a nih chuan kha pass kha dan phal loh an ti ang a emaw, an duh anga hman a nih chuan thupek a ni a, trezza phalna ngei a niin record thlap a ni an ti leh mai ang. a lem a ni an tih hunah chuan record chu an thaichhe mai dawn a ni.”

Pisciotta chuan chu chu a dik tih a hria. Ni tin mai hian Guilianno, inhawng leh mi dik tak ni siin a hmelmate ruahmanna siam fel dan a chhui dik zel thei chu mak a ti telh telh mai a ni.

“A nih leh engtin nge an thutiam kha an hlen ngei ang tih kan hriat tak ang? Engvangin nge kan tanpui ang, politics lam hi kan khawih ngai si lo va.”

Guilianno chuan chu chu a lo ngaihtuah tawh a. Pisciotta chu a kherhkhiap deuh a, a duham tel deuh bawk. A hma pawhin an thil lak chungchangah an lo inhnial zauh zauh tawh a ni. Pisciotta chuan an pawlte hnenah chan tam zawk pe turin a lo nawr tawh thin.

“Duhthlan tur kan nei lo a ni,” Guilianno chuan a ti a, “communist hoin sorkarna an chang a nih chuan zahngaihna kan chungah an lan tir lo ang. Tunah chuan Christian Democrats leh Minister Trezza leh Cardinal leh ni e, Don Croce te hi kan thian leh thawhpui an nih a ngai tlat. Communist hi che thei lova kan siam a ngai a, chu chu a pawimawh ber a ni. Don Croce hmuin thil kan chingfel tawh ang.” Pisciotta darah a beng thak thak a, “Cardinal lehkha ziak i lo la chu i ti tha khawp mai, pass pawh kha a tangkai ngawt ang.”

Pisciotta chu a la hmin zan lo, “An tan hna bawlhhlawh tak kan thawk dawn a,” a ti a, “Chutah kutdawh ang maiin an ngaihdamna nghakin kan awm mai mai dawn a ni. Ka ring therte hlawm lo- hmeichhe a tak, mutpui kan duh avanga thil kan tiam zut satliah ang mai hi a ni. Keimahni tan bei ila, kan hnathawh atanga kan pawisa hmuh te hi mirethei hnena sem tawh lovin keimahniin nei ila, kan lo hausain Brazil emaw America-ah emaw lal ang maiin kan khawsa thei dawn a ni. tichuan sawng ho saw mamawh lovin kan awm mai dawn a ni.”

Guilianno chuan a ngaihdan diktak chu hrilhfiah a tum a, “Aspanu, Christian democrats leh Don Croce nen kan inthap a ni a, kan chaka ngaihdamna kan chang a nih chuan, Sicily mipuite hian anmahni hruai turin min thlang ang a, engkimah kan chak a ni mai.” A han chawl hlek a, Pisciotta chu a nuih a, “Dik lo taka min khel a nih chuan nang leh kei hi mak tiin kan thidang em nang, mahse engzat nge kan hloh chuan ang? Communist hi kan do a ngai hrim hrim a, fascists aia hmelma lian zawk an ni a, an rorel dan tur chu a chiang a ni. Indona tak tak chu communist kan hneh hnuah, friends of friends leh Don Croce te nena indona a ni dawn a ni.”

Pisciotta chuan a dar a chhin ak a, “Thil dik lo lian tak kan ti a ni.”

Guilianno chu a nui nangin a ngaihtuah muk hle tho, Pisciotta chuan tuna an outlaw dinhmun hi a la duh, a nungchang nen pawh a inhmeh hle a ni. A rilru a chakin a fing viau na a, hmathlir anei thui lo a ni. Hun lo kal zel tur a hmu phak lo va, outlaw nih zel dinhmun tur a hmuthiam lo a ni.

Chumi hnu zan lamah chuan Pisciotta chu tlang hmawrah thuin sikret zuk a tum a, mahse a awm na tak avangin a paih leh ta daih a. A TB chu a zual zel tih a hria a, mahse tlang lama kar khat vel a chawlh chuan a zia leh mai ang. tuna amah tihrehawm tu erawh chu, Guilianno a hrilh tak loh, thil thenkhat vang a ni.

Cardinal leh Minister Trezza hmu tura an zin chhung zawng khan Don Croce nen chuan an inkawp char char a. Zanriah te ei dunin Don chuan Sicily hma lam hun tur a sawi fo a ni, hun hahthlak lo thleng tur chung chang chu. Don Chuan a ngaihsakin, friends of friends tana thawk tura khawngaih thla la taka a vehthlemna a ni tih a hrechhuak mai lo a ni. Kawng dang deuhin, Sicily ang mai chuan amah hmalam hun chu Guilianno nen ai chuan Don nen chuan a tha zawk ang tih hrilh hriata hmin a tum tih chu a hre lawk lo a ni. Mahse chu thu thawn chu a hrethiam a ni tih a lantir hauh lo va, mahse Don-a beiseina chuan a tihrehawm hle. A hma chuan mihring tumah hi hlauh a nei ngai lo va, Turi Guilianno tih loh chu. mahse Don Croa, a nun pumpuia ‘zahawmna’ nei- chu chu mafia lal ropui nih chhinchhiahna a ni a- chuan amahah hlauhna a tuh ta tlat a ni. Tuna a hriat chhuah taka chu, Don hian a tlan pel ang a, a phatsanin engtikniah emaw hmai leisiin an thal reng ang tih a hlau a ni.

(Chapter 19 ended)


[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 24th, 2018, 9:02 pm

CAPTER 20A

Kum 1948 April thlaa Sicilian Legislature inthlanna chu rome-a Christian Democratic Party tan chuan chhiatna rapthlak tak a ni. ‘Mipui Pawl’an tih Communist leh Socialist party inkawp, left-wing party te chuan vote 600,000 an hmu a, Democratic-in vote 330,000 an hmu bawk a. vote 500,000 dang chu monarchist leh party tenau dangten an insem a ni. Rome sorkar pawh a chiai ngei mai. ram pum inthlan hmain engemaw tak tih a ngai a ni, ram chhunga hmun hnuaihnung berin rampum chu Socialist ramah a hnuk lut mai dawn niin a lang.

Thla liam ta chhung khan Guilianno chuan rome nena an inremna angin a che a. Party dang poster tar ho te chu an pawtthla a, left-wing group ho headquarters te a run a, khaw hrang hranga an inhmuhkhawmna te pawh an ti buai bawk. Khawpui tinah chuan amiet chuan poster lian pui pui, pentui duma inziak, Communist chu thihna tih inziak te an tar a. socialist party workerte in te an hal bawk. Mahse inthlana nghawng nei pha tur chuan a campaign hun chu a tlai mah mah tawh a, inthahna rapthlak tak tak thlen tir lah a duh lo bur bawk si. Minister Trezza leh Don Croce leh Cardinal of Palermo inkarah chuan thu an inthawn tawn reng a. Guilianno chu a inthlana an dinhmun tihchian nan campaign chu a aia nasa deuha ti tura nawr a ni ta a ni. chung thu thawn ho zawng zawng chu Guilianno chuan a thuthlung bu-ah a dahtha zel a.

Thil pui tham tak chu tih a ngai a ni. Don Croce-a thluak tha tak chuan a ngaihtuah chhuak ta a. Guilianno hnenah chuan Andolini kal tlangin thu a thawn ta a.

Sicily-a left-wing lam tamna leh khirhna ber chu Piani Dei Creci leh San Giuseppe Jato khua te an ni a. Kum tam tak chhung chu, Mussolini hnuaiah pawh khan, may ni khat chu Revolution Day angin an lawm thin a. Chu mi ni tho chu St. Rosalia name day a nih tho avangin, Fascist sorkarin an khap loh nan sawkhaw kut angin an chhal ta daih a ni. Mahse tunah chuan May Day kawng zawh chu flag sen nen, thusawi ropui tak takte nen neih a ni ta thin a ni. Kar khat hnu vela may day lo thleng tur chu history-a ropui ber a ni dawn a ni. Tih dan thin pangngai angin, khaw pahnih te chuan a huhovin an lawm ang a. Sicily ram puma palaite pawhin an chhungkua rawn hruaiin a hma lawka an chakna lawmin hun an hmang dawn a ni. Communist senator, Leo Causi, thusawi thiam leh huaia hmingthang chuan thuchah pui ber chu a sawi dawn a ni. left wing ten inthlana an chak lawmna official taka neihna hun tur a ni.

Don Croce-a ruahmannaah chuan Guilianno leh a pawlte chuan chu may day lawmna chu an bei ang a, an titawp dawn a ni. Mipui tidarh turin an lu chungah Machine Gun an hmet puak ang. Chu chu intihthaihna campaign hmasa ber chu a ni ang, mipa taka inthawt lawkna, nem taka inzilh hauna chu. Communist senator, Lo Causi chuan Parliament membera thlan tlin a nihna chu Sicily ram luh phalna a ni lo tih a inhre tawh an. Guilianno chuan chu ruahmanna chu a rem ti a, a chief te - Pisciotta, Passatempo, Terranova, Silvestro leh Andolini te chu chu hna chu thawh anih theih nan inring renga awm turin thu a pe a.

Kum thum chu chu khaw pahnih inkar tlang zawl pakhat, Pizzuta tlang zum leh Cumeta tlang zumin a karcheh naah chuan a lawmna hi neih a ni thin a. Khaw mipuite chu chu tlang zawl pan chuan kawng kual tak, a chung zawl thlen dawn tepa inpawhah an lawn ve ve ang a, chutah chuan khaw pahnih mipuite chu intawkin kawng an zawh ho dawn a ni. Chu tlang zawl chu kalkhan pakhat paltlangin an thleng ang a, kut chu an hmang ho dawn ta ni. Chu kalkhan chu Portella della Ginestra tih a ni.

April 1948 inthlanah khan chu khaw pahnih te chuan Communist party chu an vote chiam mai a. Chu chuan Don Croce chu a tithinur kher mai, An khawchhung Mafia chief hovin an thunun niin a ngai a. Mahse Don chuan Catholic church an zah lohna vanga lungngai a ni tiin a puang a ni.

Cardinal of Palermo pawh a chiai kher mai. Chu khaw pahnihah chuan kal nghalin mass a nei a, Communist vote lo turin a vaukhan bawk a ni. An naupangte mal a sawmin a baptis bawk a, chuti chungin kohhran hawi lo zawngin an che ta tho a ni. Chu khuaa puithiamte chu Palermoah kovin, inthlanpui lo awm tura tha thaw nasa turin a hrilh a, Politics a kohhran hamthatna tur chauh ni lvin, hremhmun ata thlarau mawl tak takte chu chhanchhuak turin a ti a ni.

Minister Trezza chuan mak a ti ve vak lo. Sicilian ani ve thoin chu thliarkar history chu a hre tlat a ni. Chung khaw pahnih te chu an chapovin Sicily-a mi hausa te leh Rome-a lalte chu nasa takin an do fo thin. Piani Dei Creci-a mipuite hi greek ram atanga anmahni runtu turkish ho hlaua tlan chhia rawn lut an ni a. An greek kalphung tam tak an la chhawm a, Greek tawng an la hmangin greek holidayah pawh hnam incheinaa incheiin an lawm fo thin a ni. Mahse mafia ho nghehna hmun tak a ni a, Don Croce-an a thuhneh loh avang chuan Minister Trezza chu a hrilhhai hle a ni. Mahse chung khua leh a chhehvel khuaa vote zawng zawng chu mipakhat kaihhruaina hnuaia awm ani tih a hre tho a ni. Chu pa chu Socialist party mi Silvio Ferra a ni.

Silvio Ferra chu Indopui pahnihna laia Italian Army, Medal tam tak dawng a ni a. Africa rama ramchhuahnaah a medalte chu a dawng a, chutah chuan American Army-in an man a. US-a war camp-ah a huhoa tang zingah a tel a, chutah chuan mitang ho tana Democracy chungchang zirnaah a tel thin a ni. An thil zir te chu an camp bula khaw pakhata chhuah zawk an phal hnuah chauh a hrethiam a ni. America mite nun zalen halh mai a hmuh chuan mak a ti hle. An hnathawh nasatna chuan hlawhtlinna a thlen thei zel a ni. Sicily-ah chuan hna thawk nasa ber ber pawhin an fate tan eitur leh chenna in an thawk chhuak thei tawk chauh a ni. Hma lam tana inkhawl a awm thei lo.

A ram Sicily-a a lo kir leh chuan America tih dan duh mi tak a lo ni ta ni. Mahse Christian Democratic te chu mihausate hmanrua mai an ni tih a hmuh chuan Palermo-a Socialist Worker Study Group a zawm ta a. Zirna leh lehkhabu lamah a tui hal hle mai a. Chutah Marx leh Engels-a theoryte chu chipchiar takin a chhiar ta ngar ngar a, Socialist Party a zawm ta a ni. San Giuseppe Jato khuaa an party huaihawttu ni turin a awm ta a ni.

Italy hmar lama an tih theih loh chu kum li hnuah chuan a ti thei ta a ni. Red Revolution leh Socialist thurin chu Sicilian tawngin a letling a ni. Socialist party vote chu ram neih vena a ni tiin mipuite a hmin a. lal chhungkua ten ram zau tak tak an nei chu thlai chin nan an hman loh avangin then darh a ni ang a, an fate tan thlai chinna tur ram an nei thei dawn a ni tiin a sawi bawk. Socialist sorkar hnuaiah chuan hleprukna tih bo a ni ang tiin a hmin hlawm bawk. Riltama thihna a bo tawh ang a, sorkar hnathawkte chu mipui chhiahhlawh an ni tawh zawk ang, America angin. Easter zing lamah a thenawmte chibai bukin, “Krista chu a tho leh ta,” a ti a. Chawlhni tukah chuan Mass nei turin cathedralah a kal thin.

San Giuseppe Jato khuaa Mafia chhungkaw hoin a kal thui mah mah an tih chuan, a nui mai a, nakinah chuan a an thian nihna chu a la lawm hle ang tih a hrilh a, mahse a rilru chhungril berah chuan indona tawp ber leh pui ber tur chu Mafia ho nena indona a ni dawn tih a hria a ni. Don Croce-an inremna siam tura mi ruat bik a rawn tirh chuan a lo be duh lo a. Chu chu indonaa a huaisenna avang te, khaw mipuite zahna leh friends of friends ho biak dan a thiam riauna te avang chuan Don Croce chuan dawhthei taka nghah a thlang ta zawk a, Inthlannaah chuan chak dawn thoa a inhriat vang pawh a ni bawk.


Silvio Ferra thatna ber chu a mihringpuite a hmangaih em emna hi a ni. Chutiang chu Sicilian minaranah chuan an vang hle. An thenawmte an dam loh chuan an chhungkaw tan ei tur a pe mai a, hmeithai thil ti hleithei lote pawh sekrek khawihah a pui mai zel bawk. Socialist party-ah chuan beiseina thar a awm tiin a puang a ni. Politics lam thu a sawi chuan chhimlam ho tawnghmang thiamna, Sicilian hovin an duh em em hmangin a sawi thin. “Keini tan chhang hi a tui em em ang hian, a intu mihausa ho tan chuan miretheite thisen hi a tui hle a ni,” te a ti thin.

Tichuan Silvio Ferra chu chhinchhiah a ni ta a. amah chhanhimtu chu Guilianno venhimna hnuaia awm a nih vang a ni. Chu chu Don Croce pawh che lova awm tirtu a ni ber. Silvio Ferra chu Montelepre-a piang a ni a, tleirawl a nih lai atangin theihna a neih zia chu hriat a ni tawh. Guilianno chuan a ngaisang hle thin. An kum a inthlauh deuh avangin thian hnai tak erawh chu an ni lo, Guilianno chu kum liin a naupang zawk a. chubakah Silvio chu indonaah a kal ta mai bawk si a ni. Pasaltha chawimawina dawnga a lo haw leh chuan, San Giuseppe Jato khuaah nupui a neih avangin a pem ta a. Politics lama a lo lar takah chuan, an politics chu danglam viau mahse thian niin Guilianno chuan a ngai a ni. Chutia Guilianno an sicilian voter-te ‘zirtir’ hna a tan dawn pawh chuan San Giuseppe Jato mipuite chungah emaw Silvio chungah emaw chuan engmah tih loh tur a ti a ni.

Ferra chuan chu chu a lo hriatin fing takin Guilianno hnenah chuan lawmthu sawina thawnin, a ma thuhnuaia awm a nih zia a hrilh a. Chu thuchah chu Ferra nu leh pate, anfate nena Montelepre-a khawsa kaltlanga thawn a ni. An fate zinga pakhat chu nula tleirawl a hming Justina a ni a, kum 15 mi lek a ni. A ni chuan lehkha them hi Guilianno pek turin Guilianno nu hnenah an inah a va pe a. Chutih lai tak chu Guilianno an a nu a tlawh lai a lo ni hlauh a, a kutah ngei a pe thei ta a ni. Kum 15ah chuan Sicilian hmeichhiate chu puitling an ni uaih tawh a, Turi Guilianno a hmuh chuan a hmangaih nghal a, mawi lo pawh sawi lovin a thlir ta veng veng mai a ni.

Turi Guilianno leh a nu leh pa leh La Venera chuan Coffee an lo in a, pek ve an tum chuan a lo hnar a. La Venera chauh chuan a hmelthat zia leh Guilianno an a aikaih hneh zia chu a lo hmu a. Guilianno chuan hmana hmeichhe naupangte kawnga lo tap a hmuh, pawisa a pek taka kha a ni tih reng a hre lo. Guilianno chuan a hnenah, “I unaupa hnenah chuan a thil pek avanga ka lawm thu leh a nu leh pate rawn ngaihtuah lo turin hrilh rawh, ka venhimna hnuaiah an awm reng ang,” a ti a. Justina chu rang takin a chhuak a, a chhungte hnenah chuan a va hrilh vat a ni. Chuta tang chuan Justina chuan Guilianno chu a ngaihzawng angin a ngai ta a ni. A unaupa a ngainatna avang chuan a inchhuan phah ringawt bawk.

Guilianno an Portella Della Ginestra hmuna kut tihbuai tumna a remtih tum chuan, Silvio ferra hnenah chuan thu thawnin may day hunah chuan eng thilah mah tel ve lo turin a hrilh a, San Giuseppe Jato mipuite chungah engmah a thleng lovang tih tiam mahse, Socialist party lam atanga lo do letna a awm thulhah thil thleng palh awm thei a nih avangin inthiar fihlim se a duh a ni. Amah, Guilianno chuan anmahni tih nat duh miah lo mahse friends of friends ho chuan socialist party chu tih chhiat vek an duh a, a bikin Ferra chu an tum bik dawn a ni.

Chu thu thawn a lo hmuh chuan Silvio Ferra chuan tum dang ang bawka amah tih hlauh an tumna maiah a ngai a. Don Croce-a fuihpawrh vang niah a ngai tlat a, engmah a ni lo a ti a ni. Socialist party chu chak turin ke an pen mek a, hetiang hun pawimawh, an chakna lawmna hun hmaih chu a duh thak lo.
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 26th, 2018, 8:40 pm

CHAPTER 20B

1948 May day zing kar hma takah chuan Piani Dei Creci leh San Giuseppe Jato mipuite chu chumi nia Portella della Ginestra piah tlang zawl pana an kawngzawh tur chuan an inbuatsaih mur mur a. Chu mi hun atana rawih Palermo-a Music band ho chuan hma an hruai a. Silvio ferra pawh chu a nupui leh fate pahnih hruaiin, San Giuseppe Jato mipui hmatawngah chuan a awm a, chhuang takin flag sen a keng bawk a. Tawlailir cheimawi leh a hnuktu sakawr pawh puan sen mawi taka khuh te chuan thil chhumna bel leh Spangheti bawm te, salad awmna thleng lian takte chu a phur tun a. Wine phurhna bik tawlailir pawh a awm bawk.

Naupangte chu kal pawh chuan an lamin ball te an pet a, sakawr chunga chuang mipa ho lah chuan chawhnu lama intlansiakna awm tur atan tihchhinna an nei vel thul.

Silvio Ferra ten khaw mipuite Portella Della Ginestra lama a hruai mek lai chuan, Piani Dei Greci mipuite pawh kawng leh lamah chuan puan zar sen leh Socialist party chhinchhiahna kengin an lo lang ve zui nghal a. Khaw mipui pahnihte chu intawkkhawmin, chibai an inbuk sup sup hnuah khawchhung thil thleng chungchang te, inthlanpuia an dinhmun chungchanga hlauhawm thleng thei te sawiin an ti ti mur mur a. Tlang kamah chuan he may dayah hian buaina awm tur anga sawi a ni a, mahse an hlau lem lo. Rome chu an hmusit a, Mafia an hlau thung, mahse an lakah an intulut lem lo. Inthlan hmasaah khan an pawisa lo tawh a, engmah a thleng chuang lo.

Chhun lai velah chuan hmeichhe ho chuan eitur an buatsaih tan a, naupang ho chuan lehkhachaihte chaihin an hlim hle. Communist Senator, Lo Causi chuan a thusawi tur a buatsaih mek bawk. Silvio Ferra leh mi thenhat chuan thing hmangin dawhsan an siam a, amah puitu te chuan senator chu a thusawi hmain inhmelhriat tirna nei hmasa turin an rawn a- naupang ho ril pawh a tam tan ta.

Chutih lai chuan thil puak ri tek tek hi a lo ri chhuak a, naupang hovin halpuah an keng a ni maw tia Silvio chuan ngaihtuah chungin a han dak chhuak a.

Chu mi ni vek zingkar hma takah, Sicily ni pawh a chhuah hma feah chuan Guilianno-te Headquarters chu mi sawmpahnih zel awmna pawl hnih chuan Portella Della Ginnestra kal khan awmna tlang lam panin an chhuahsan ve thung a. Pawl khat chu Passatempo-an hovin, a dang chu Terranova chuan a ho thung a. pawl hnihte chuan Machine Gun lian an keng ve ve a. Passatempo chuan a mite chu Monte Cumeta tlang awih pangah chuan hruaiin, fimkhur takin Machine Gun dahna tur an buatsaih a. Machine Gun kap tur chuan mi pali ruat an ni a, midang zawng chu tlang pangah chuan insem darhin Rawn beih let a awm thuta vengtuah an tang a ni.

Portella della Ginnestra leh lam, Monte Pizzuta tlang pang chu Terranova leh a hote chuan an luah ve thung a. Chumi hmun atang chuan an hnuaia kawn vel chu a lang ut a ni. Hei hi Carabinieri te an barrack atanga an lo chhuah thulha ven nan an ti a ni.

Tlang pang leh lam lehlam atang chuan an hnuaia Pianni dei greci leh San Giuseppe Jato mipuite a huhova kawng an zawh mup mup chu an hmu thei reng a. An zinga thenkhat te phei chu kawng zawh zingah chuan an chhungte pawh an tel nawk a ni. Mahse pawi an ti lem lo, a chhan chu Guilianno thupek kha a chiang hle a ni, Machine guns chu mipuite luchungah an tlan darh a, an khuaa an haw hma zawnga kah tur a ni a, tumah tih nat tur an ni lo.

Guilianno chuan he an vahchhuahna hi amah ngeiin hruai a tum a ni a, mahse may day hma ni sarih a la awm tihah chuan Aspanu Pisciotta chu a chuap lam natna avangin thisen a rawn chhuak ta vak mai a. Headquarters bul tlang panga an lawn chhoh laia thleng a ni a, a ka atangin thisen rawn chhuakin leiah a tlu hnawk a, tlangpangah chuan a lumthla ta a. A hnunga lo lawn ve Guilianno chuan a unaupa fiamthu emaw tiin a kein a lo tiding a, mahse a kawr hma lam thisenin a bual huh zuih a hmu ta a. A tirah chuan Sniperin rawn kapin a ri a hre lo palh emaw a ti a, Pisciotta chu a pawm nawlh a, tlang pangah chuan a chhoh pui ta a, Pisciotta chuan nikhua a la hriain, “Min dah thla rawh,” tiin a rawn phun sep a, chutah chuan Guilianno chuan silai hnathawh a ni lo tih a hre ta a ni. a rawn tawng chhuakah khan pawn lam atanga silaimuin a den avang ni lovin chhung lam natna vang a ni tih a lang a ni.

Pisciotta chu hlangah dahin Guilianno chuan a mite sawm nen Monreale-a doctor an pan pui ta a. Chu doctor chu an pawlin silai kahhliam an awm changa an pan fo a niin thuruk vawng thei tura ngaih a ni. Mahse Doctor chuan Pisciotta dam lohna chu Don Croce hnenah a report a, Doctor hian Palermo-a Hospital hotu ber nih a tum a, mahse chu chu Don Croce-a malsawmna tel lo chuan a theih tlat lo a ni.

Doctor chuan Pisciotta chu Monreale Hospitalah test dang ti turin a hruai a, Guilianno chu lo nghak turin a hrilh bawk a ni.

“Zingah ka lo let leh ang,” tiin Doctor chu a hrilh a, Pisciotta chu Hospitala veng turin mi pali a dah a, midangte nen chuan an pawl zinga mite inah biru turin an kal ta a ni.

A tukah chuan doctor chuan Pisciotta chuan damdawi pakhat, USA chauha hmuh theih tur, Streptomycin a mamawh thu a hrilh ta a. Guilianno chuan tih dan tur a ngaihtuah a. Chu damdawi chu rawn thawn tura Don Corleone hnena dil turin a pa leh Andolini a hrilh a ngai a ni. Chumi chungchang chu Doctor hrilhin Pisciotta chu Hospital atangin a chhuak thei ang em tih a zawt nghal a, Doctor chuan kar engemaw zat khuma a mut reng theih dawn chuan chhuah tir chu a phal a.

Tichuan Portella Della Ginnestra hmun beiih a nih lai chuan Guilianno chu Monreale-ah awmin, Pisciotta a that chhuah hmaa a awmna tur In ngaihtuahin a awm a ni.

Halpuah ri niawm tak lam a hawi chuan Silvio Ferra rilru chu thil pathumin a luah nghal zawk a. Pakhatah chuan Naupang pakhatin mak ti taka a kut a hup chu a ni, a tawpah chuan lehkha chaih hrui chu vuan ta lo chuan thisen thar lam tak a rawn chhuak ta zawk a, lehkhachaih erawh chu Mount cumeta tlang chung vanah chuan a leng ta vel mai mai a. Pahnihnaah chuan a hriatchhuah tak avanga thlabarna chu- halpuah hal nia a hriat kha machine gun puak ri zawk a lo ni. Pathumnaah chuan sakawr dum lianpui hi khalhtu awm lovin mipui zingah chuan a tlan vel chiam a, a taksa atangin thisen a chhuak zuaih zuaih bawk. Chutah Silvio ferra chu mipui zingah chuan a tlan lut a, a nupui leh a fate chu a zawng ta nghal a.

Monte Pizzuta tlang pang atang chuan Terranova chuan an hnuaia mipuite chu entlang hmangin a han thlir a. A tirah chuan mipuite chu hlauh vangin leiah an bawk emaw a ti a. Mahse che lo vin, mitthi angin an thal phung tih a hmuh chuan machine gun pute chu a pawtsawn ta a. Mahse a machine gun ri a reh hnuah pawh chuan Mount Cumeta tlang lamah chuan machine gun puak tek tek chu a la hre thei. Terranova chuan Passatempo chuan silaimu chu kah hniam lutuk a niin mipuite thah teuh an ni tih chu a la hmu lo niin a ngai a. Minute reiloteah chuan silai ri chu a tawp a, Portella della Ginnestra chu hmun rapthlak takah a chang ta thut mai a ni. Na tuar leh lungngai tap thawm chuan chulai hmun chu a luah khat ta a. Terranova chuan a mite chu a hui khawm a, machine gun chu an thiat darh a, tlang letliam lam pan chuan an kal ta a. Chutia an kal lai chuan Guilianno hnenah thil thlen dan chu a report ang nge report lovang tih thuah a inngaihtuah nasa hle a, Guilianno chuan amah leh a mite chu a tihhlum mai a hlau hle. Mahse Guilianno chuan chiang takin an thusawi a ngaithla dawn tih a hria a, amah leh a hote chuan an silai kah kha an lu chung lamah vek a ni tih an chiang hle bawk a ni. Headquarterah chuan a inreport ngei tur a ni. Passatempo-an a tih ang chuan a ti ve ang em tih a ngaihtuah a.

Silvio Ferra-an a chhungte a hmuh chuan machine Gun ri chu a tawp tawh a. A chhungte chu an na lovin thawh chhuah an tum mek a, mahse pawt thu leh hlawmin minute sawmpanga tal bawk leh turin a ti a. Mipakhat sakawr chunga chuangin Piani Dei Greci-a carabinieri pun tura a tlan chhuak chiah chu a va hmu a, chu pa kah tawk lova a tlan tlang theih avang chuan inbeihna chu a tawp a tih a hria a, a tho ta a.

Mipui sang tam tak chu Portella della ginestra atang chuan anmahni khaw panin an haw dul dul a, leiah chuan mitthi leh hliamte chu an thal phung bawk a. mitthi kuaha lo tap hawm hawm tawk lah bo lo. Zing lama chhung taka an ken an banner te pawh chu lei vaivut zingah tu khawkha ngaihsak lovin a awm vel mai mai bawk. Silvio Ferra chuan a chhungte chu kalsanin hliam buaipui tur chuan a kal a. Mi thenkhat tlanchhe mek te chu ko dingin hlang zawntu atan te a hmang a. Mitthi thenkhat chu naupang te, hmeichhiate an ni tih a hmuh chuan rapthlak a ti hle. A miatah chuan mittui a hnai hle mai, Amah zirtirtu te zawng zawng, Politics hmanga ram siamthat sawitu te khan an ti dik lo a ni, voter te hian sicily-ah danglamna an thlen lo vang. A atthlak mai mai a ni, an dikna chanvo neih an tum avangin thah an ni si a.

He chanchin Guilianno, Pisciotta khum bula awm hnena rawn thlentu chu Hector Adonis a ni a. Guilianno chuan Pisciotta chu tlansanin rang takin an hmunpui lam chu a pan nghal a. Montelepre chhak tlangah chuan Terranova leh Passatempo chu a ko ta a.

“In tawn hmain hei hi hre rawh u,” tiin guilianno chuan a han ta a, “Eng anga rei pawh ni se a mawhphurtu chu hmuh chhuah a ni ang a, a rei poh leh hremna a na ting a ni mai. Tunah inpuan ula thihna in tuar lo vang.”

Passatempo leh Terranova chuan chutiang reng renga Guilianno thinrim chu an la hmu ngai lo. Guilianno-an zawhna a zawh chuan che ngam lovin, che miah lovin an ding a, mipui lu chung lama kap turin an silai chu an dah tih huai takin an sawi a, mipui kah a ni tih an hmuh chuan an kah lai chu an chawl a ni.

Chumi hnuah chuan Guilianno chuan machine Gun khawihtu te chu zawhna a zawt leh a, thil awm dan a chhuidawn ta a.Terranova machine gun chu minute nga chhung an tih tawp hmain a kap hman a, Passatempo chu minute sawm chhung. a kaptute chuan mipui lu chung lamah an kap tih chiang takin an sawi a, tihsual palh emaw, silaiin a tin hnuai deuh theih dan tur a awm miah lo an ti a ni.

A kaltir vek hnu chuan amah chauhin a awm ta a, bandit a nih atanga a vawikhatna turin tawrh rual lohin zahna a tawng niin a hria a. Outlaw anga kum li aia tam a awm chhungin miretheite a la tihnat miah loh athu pawh a uanpui ve thin. tunah chuan chu chu a dik ta lo a ni. a huhovin a that ta si a, a rilru chhungril berah chuan an tan pasaltha ni tlakah a inngai tawh lo. Chutah thil awm palh thei a ngaihtuah a, Tihpalh thil thua thleng a ni thei maithei. A hote chu Lupara-ah chuan tha tak ni mahse Machine Gun rit tak chu an la bel tlat lo. Chhuk zawnga an kah khan a angle an teh sual ve thei tlat a ni. Terranova emaw Pasatempo emaw chuan an ti thlawn lovang tih chu a hria, mahse chutiang thil ti tur chuan tham theih an nihna lai a awm ve tlat a ni. Chubakah chanchin a hriat tirha a rilrua thil lo awm hmasa ber ang khan anmahni ni lo midang, chu thil titu chu an awm ve a ni maithei bawk.

Mahse chutianga tum lawkna thil a awm a nih chuan, mipui tam zawk an thi ngei ang a, insuatna rapthlak lehzual a ni ngei ang. Chuti a nih loh chuan, Guilianno chuan a ngaihtuah a, chu inthah buaihna chu ama hming tih hliau tumna a ni thei. Chubakah Portella della Ginnestra beih rawt chhuaktu kha tunge kha? Chu thil intawng fu palhte chu lem tur chuan a tan tam lutuk a ni.

Thil chiang tak leh hnial rual loha thudik ni ta chu Don Croce-an a lehkhalh chiang hle tih hi.
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 27th, 2018, 10:28 pm

CHAPTER 21A

Portella Della Ginnestra hmuna inpawng thahna chuan Italy ram pum a thawn zet mai. Chanchinbu te chuan nunau pawisawi lo thlenga thah an nih thu chu a phek hma lamah cn tial biai buai a. mi sawmpanga an thiin sawmnga chuang zetin hliam an tuar bawk a ni. A tirah chuan Mafia ho tih a nih rin a ni a, Silvio Ferra pawh chuan a thusawinaah chu thil thleng chu Don Croce-a mawhphurhna niin a sawi a ni. Mahse hetiang atan hian Don chu a lo inbuatsaih lawk vek a, Friend of friends member ruk ten magistrate hnenah Passatempo leh Terranova te an hmuh thu intiamkam meuhin an sawi a. Sicily mipuite chuan Guilianno-an chanchinbu-a a lehkhathawn hmingthang takah engvanga he thil thleng hi dem lo nge a nih tiin mak an ti hle a, mak tak maiin Guilianno chu a reh vang vang a ni.

Inthlanpui thlen nan kar hnih a la awm tihah chuan, Silvio Ferra chu cycle-in San Giuseppe Jato atangin Piani Dei Greci panin a kal a. kawngah chuan mi pahnih tawkin an ni chuan din turin an au a, mahse chak takin a tlan ta zawk a, a hawi let chuan an rawn um tang tang tih a hmu a, mahse an inhlat tial tial a, a tlansan ta thuai a. Piani Dei greci a luh hnuah phei chuan hmuh phakah an awm tawh lo a ni. Chumi hnu darkar thum chhung chu Socialist Community house-ah chu lai biala party hruaitu dangte nen hun an hmang a, an zawh meuh chuan ni a tla dawn ruai tawh a ni. Thim hmaa in thlen thuai thuai a duh hle mai a. Cycle-a chuangin central Square a tan tlang a, a mi hmuh a hmelhriatte chu hlim takin chibai a buk pah zel a. Mi pali hian an rawn hual ta thut a. Silvioa chuan pakhat chu montelepre-a mafia chief a ni tih a hria a, a thaw deuh huai a. Quintanna chu naupang an nih lai atang tawha hre tawh a ni a, Silvio chuan helai bialah hi chuan Guilianno ti thinur lo tur emaw a dan pakhat, “Miretheite hmuhsit loh” bawhchhe lo turin Mafia ho an fimkhur hle tih a hre ve tho a ni. Tichuan nui chungin Quintana chu chibai a buk a, “I in atangin i awm hla hle mai maw,” a ti a.

Quintana chuan, “Hello, ka thian, i rualin reilote kan lo kal ve ang, buaina siam miah lo la i na lo ang. Ngaihtuah ho lawk tur kan nei a ni.”

“hetah kan ngaihtuah ho thei alawm,” Silvio chuan a ti a. Hlauhnain a zem ar ar a, ralrama indona hmuna a hlauhna ang kha, hlauhna a thunun theih thin ngei khan. Thil atthlak ti lo turin a insum hram hram a. Mi pahnih chu lo kalin a ban leh lam lehlamah an rawn man a, Kawtthlerah chuan an kai ta a, cycle chu amahin a lir a, a sir zawnin a tlu ta a.

Ferra chuan khaw mipuite thil thleng ngaihvena an rawn chhuak chu a hmu a. rawn pui ngei tur hi an ni a, mahse Portella della Ginnestra hmuna thil rapthlak thleng avang khan an thlarau a ngui zo va, a tu amah chuan thawm takngial pawh an chhuah lo a ni. Ferra chuan lei chu a keartuiin a tlawh chhan a, community house lama kir leh a tum a. Hla deuh hlek tawh mahse a party worker puite kawngkhara an rawn dak chu a hmu thei, buaina a tawk tih an rawn hmu ve reng lo em ni aw? Tumah chu an che chang chuang lo. “Min pui rawh u,” tiin a au a, mahse khaw mite tumah chechang an awm lo, dawihzep a tiin a zahpui hlawm kher mai.

Quintanna chuan hmalamah a nam dawrh a, “A a teh suh, inbiak kan duh mai a ni, bengchheng tawh lovin min zui tha hle hle rawh,” a ti a.

Khua chu a thim a ni ruai tawhin, thla pawh a rawn dak duk duk tawh a. A hnugzanga silaia an hawlh reng chu a hre rauh rauh a, that tur chu ni se town square-ah khan an thah daih tawh ang a, amah rawn tanpui tum a thiante pawh an that ve ngei ang. khaw tawp lam pan chuan an kal zel a, that loa an chhuah theihna chance ala awm a, mita hmutu an tam bakah a tam zawk chuan Quintana chu an hre tlat a ni. Tlan chhuah tuma a beh chuan an buai palhin an kah mai a hlau a, nghah phawta an thu ngaihthlak phawt a rilruk ta a.

Quintana chuan fiah takin, “At thlak taka i communist thiltih ho hi titawp turin kan duh che a ni. Ginnestra beihnaa friends of friends ho i puhna kha kan ngaidam che a, mahse kan dawhtheihna chuan ngaihsak a hlawh lo va, kan tlachham tawh viau a ni. a finthlak viauin i hria em ni? I chhunzawm zel a nih chuan i fate ho pa nei lova awm turin mn nawrlui tihna a ni ang.”

He tih lai hian khaw chhung chu an chhuahsan tawhin, Monte Cumeta panna kawng lung khawkrawk hmunah an kal mek a, Ferra chuan beidawng takin hnung lam a han en a, mahse tumahin an rawn zui lo. Quintanna hnenah chuan, “Politics ang thil te thamah chhungkaw pa ber i that duh anga maw?” a ti a.

Quintana chu ngeiawm zetin a nui a, “Ka pheikhawka chil an chhak vang pawhin mi ka that tawh.”

A bana vuantute chuan an thlah a, Ferra chuan a hun a thleng ta tih hriain a che ta phut a, chu kawng khawkrawk zet, thla engin a chhun en riai riai-ah chuan a tlan thla ta phut a.

Khaw mite chuan silai puak thak ri chu an hria a, Socialist party hruaitu pakhat chu carabinieri pun turin a kal a. Zingah chuan Silvio Ferra ruang chu tlanga lung keh karah an hmu ta a. Police hovin khaw mipuite zawhna an zawh chuan tumahin thil thleng an hmuh thu an sawi lo. Tumahin mi palite chungchang chu an sawi lo va, Guido Quintana an hriat thu an sawi bawk hek lo. Siilian hel hmang an ni tlat a, Omerta dan an bawh chhe duh lo tlat a ni. mahse thenkhat chuan an thil hmuh zawng zawng chu Guilianno pawlte zinga pakhat hnenah a hrilh a.

Inthlan puia christian Democratic an tlin theihna tur chuan thil tam tak tih a ni a, Don Croce leh friends of friends ho chuan an hna an thawk tha hle mai. Portella della Ginnestra hmuna inpawng thahna chuan Italy pumpui a thawng a, Sicily-ah chuan chu aia nasa daih chuan hna a thawk a- mipuite chu a ti thlabar a ni. silvio Ferra thah a nihna chu thil tih hnuhnung ber a ni ta a ni. Kum 1948 inthlanpuiah chuan Sicily-ah Christian Democratic party chu hneh taka thlan tlin a ni ta a, chu chuan Italy ram puma an chakna pawh a pui ta a ni. Hma lam hun rei tak chhung ro an la rel zel dawn tih chu a lang thei a ni. Don Croce chu Sicily ram hotu a ni ang a, Catholic church pawh chu ram sakhua a ni zel ang a, chubakah Minister Trezza chu tunah ni mai lo mahse, nakin lawkah italy Premier a la ni mai dawn a ni.

A tawpah chuan Pisciotta sawi kha a thleng dik ta a ni. Don Croce chuan Hector Adonis kaltlangin thu a rawn thawn a. Christian Democratic Party chuan Guilianno leh a mite tan ngaihdamna a pe thei lo vang, a chhan chu Portella della Ginnestra-a inpawng thahna vang kha a ni. Hmingchhiat a nsa lutuk dawn a, politics-a inbeihna a lo tho thar leh ang a, chanchinbute chuan thinur takin an au chhuah pui ang a, italy pumah tharum thawhna thleng thei a ni tlat. Don croce chuan dan pangngaiin Minister Trezza kut chu phuar tlat a ni a, Palermo Cardinal pawhin hmeichhia leh naupangte samtu nia ngaih chu a tanpui thei tawh lo vang tiin a sawi a. Mahse Don Croce erawh chuan ngaihdam a nih theih nan theihtawp a la chhuah zel ang a ti a, eng pawh ni sela, Guilianno chu Brazil emaw U.S-ah emaw kal mai turin thurawn a pe a, chutiang a nih chuan amah, Don Croce chuan puih pawh a inhuam a ni.

Guilianno chu chu thil inphatsanna tenawm tak avangin engtinmah chet a thawh lo chu a mite chuan mak an ti zawk ahle, thil nihphung pangngai tura ngai ang maiin a awm a ni. Tlang pilril lamah a mite chu a hruai a, chiefte chu a camp bul hnaiah, inrawn a tul thut pawha rang taka inhmuhkhawm a nih theih nan camp nei turin a ti a. Ni a liam a, amah chauhin a awm tam tial tial a, hnungtawlh lam a pan tial tial emaw tih ma tur a ni. a chiefte chuan nghakhlel taka thupek an nghah chhung chuan kar khat lai a lo liam ta reng mai.

Tuk khat chu tlang pilril lehzualah a mah chauhin, vengtu pawh nei lovin a vak chhuak a. Thim hnuah a lo haw chauh a, an meichhemna bulah chuan a ding a, “Aspanu,” a tia , “chief ho zawng zawng kha han ko khawm rawh.”

Prince Ollorto-a chuan Acre sangkhata zau ram za zet a nei a, chuta tanga thlai dehchhuah chhuah avang chuan kum tam tak chhung Sicily chu Italy tana eitur tharchhuaktu pawimawh tak a lo ni tawh a ni. Ser thur leh thlum te, buh, mau, Olive kung hriak tam tak thar thin te, wine tam tak pe chhuak grape te, Tomato hmun zau tak, hmarcha hring leh bawkbawn- nawinawk rawng pa darben lu tiat zeta lian te chu. Ram thenkhat chu loneitute nen tharchhuah zaa sawmnga ve ve-a insem tura luah hawh tir a ni bawk a. Mahse ram neitu dang ang bawkin Prince Ollorto chuan khawl hman man te, thlai chi man leh phurh kual nana lirthei hman mante a pung nen a han la hmasa phawt a. Thlantui far zawih zawiha a thawh chhuah zaa sawmhnih panga chang thei lo neitu chu mi vannei tak an ni. Nitina inhlawh chawpa khawsa leh riltam lohna tawk tawk thawkchhuaktu te lakah chuan chan tha tak a la ni tho.

Ram chu a tha a, mahse ramneitu lal chhungkua ten an ram thahnem tak chu lo a neih lohin an dah mai mai a, hmantlak loh ang mai a ni chho ta a ni. kum 1860 chho velah khan mi ropui Garibaldi chuan mirethei ten anmahni puala ram an neih a lo tiam tawh a. Mahse tun thlengin Prince Ollorto chuan thlawhmaa neih lo ram acre sang tam tak a la nei tho a ni. Chutiang bawkin lal chhungkaw dangte pawhin pawisaah chantirin, thenkhat chu midang tih lawm nan an hralh thin bawk.

Inthlan hnuhnung berah khan party zawng zawng, Christian democratic tiamin ram insemsawm dan tih chak leh ennawn an tiam vek hlawm a. Chu danah chuan Ram zau tak neitute ram, loa neih loh ho chu loneitu rehthei tak tak ten a hming chauha man neiin an nei thei ang tih a ni.

Mahse he dan hi lalchhungkua ten an rawih mafia chief ten ram hauh tumte an tihthaih thin avangin tih hlawhtlin a ni ngai lo. Ram hauh ni turah chuan mafia chief te chu ram riah sakawr chung a chuangin an kal kual a, loneitu te chuan ram chu an hauh ngam ngai lo. Chutianga va hauh lui an awm pawhin chumi chu amah leh an chhung zinga mipate chu thah tura chhinchhiah an ni ta thin a ni. chutiang chuan kum za chuang lai an lo kal tawh a, Sicilian tawhphawtin chu dan chu an hre vek a ni. ram chu mafia chief vengtu a neih chuan, ram chu neih tuma hauh a ni ngai lo. Rome chuan dan za chuang a pass a ni thei, mahse tangkaina a nei ngai lo. Don Croce-an Minister Trezza hnen a, “In dante hian kan chungah eng nge tih theih a neih?” tia a lo sawi ang deuh kha a ni.

Inthlan zawh hnu reiloteah chuan, Prince Ollorto-a ram, loa neih ngai loh hauh theih hun hawn chu a lo thleng dawn ta a. Acre sang za lai mai chu sorkarin sem tura a tih chu a ni. Left-wing party leader te chuan mipuite chu an chanvo ram chu hauh turin an nawr a. A hun a lo thlen chuan loneitu mi sangnga chuang chu Prince Ollorto-a lalin bl, gate pawn maiah chuan an pungkhawm a. Sorkar official-te chu puanin lian tak hnuaiah dawhkan leh chairte nen, ram hauhna fel taka chhinchhiah a nih theih nana hmanraw ngai turte nen an inchhawp a, loneitute zinga thenkhat chu Montelepre atanga lo kal an ni.

Prince Ollorto chuan Don Croce-a thurawn zuiin Mafia chief parukte chu a ram veng tur chuan a ruai a. Chumi zing ni chhuah hnuah chuan, thlan tla zawih zawih chungin, mafia chief parukte chu Prince Ollorto-a ram hungna bang bulah chuan sakawr chunga chuangin a chhuk chho zawnin an vei tawn ta tlauh tlauh a. Loneitu kal khawm, Olive thing chhura rual zet tur hnuaia awm khawm te chuan chung mi paruk, an kawlhrawn avanga sicily ram pum puia hmingthang em em te chu an thlir thup a. Hmalam pan tur chuan an hlau tlat a, thilmak a lo thlen hlauh dahin tiin an nghak thup mai a ni.

Mahse chu thilmak chu dan kengkawhtu lam chu a ni dawn hauh lo, Minister Trezza chuan maresciallo te chu direct order pein, carabinieri te chu an barrack huang chhungah an awm vek tur a ni tiin. Palermo leh a chhehvelah chuan National Police form ha tumah hmuh tur an awm miah lo bawk.

Prince Ollorto a ram hungna pawn lamah chuan mipui chuan an nghak thup a. Mafia chief-te pawh chu an vei kual dan ngai rengin an vei kual reng a, an hmel chu a thutak run a, an silaite chu a paiah khungin, lupara hi an darah an ak theuh bawk a. An kawngah chuan pistol paiin, chu erawh chu an jacketin a khuh theuh a ni.Mipui tihthaih zawngin an che lo- a dik takah chuan an hmu lo der hmiah zawk a, a chhuk chhoin an kal ringawt a ni.

Kuthnathawktute chu, chung sakawrte chu an chauin emaw an chunga chuangte chu an kalbopui emaw beisei ni awm takin, an chawfun leh wine burte chu an thetin an hawng ve sauh sauh a. Mipa deuh vek an ni a, hmeichhia tlemte an awm a, chung zingah chuan hmeichhe naupang Justina chu a nu leh a pate nen an awm ve a, Silvio Ferra thattute an hlauh bik loh zia tih lan nan an lo kal ve a ni. A tu amah chuan sakawr chungchuangte chu an pel ngam lo va, dan anga an neih tur ram pawh an hauh ngam lo a ni.

Chutia an chet ngam lohna chu an hlauh vang chauh pawh a ni lo, heng sakawr chungchuangte hi ‘mi zahawm’ an ni a, a nihna takah chuan an chenna khua-a dan siamtu an ni ber. Friends of friends te hian sorkar ruk ang deuh an din ve a, chu chu rome sorkar aiin a chak zawk daih a ni. Rukru emaw ranrual rukhmangin emaw loneitu ranrual leh beramte lo ru ta se, a tuartu chuan carabinieri hnena a report chuan a bungruate a hmu let leh tawh ngai lo. Mahse heng mafia chief-te a va hmuh a, za-a sawmhnih a chawi bawk chuan a thil chu a hmu let mai ni lovin a hnu leh lamah chutiang chu a tawk dawn tawh lo tih tiamkamna nen a haw hleh thin. Mi thinram phunglung deuhin zu no khat vang maiin pawisawi lo nunna lo la ta se, dawta thudik lo sawi leh omerta dan avangin sorkar chuan thiam loh a chan tir thei ngai lo, mahse a tuartu chhungkuate chu heng mafia chief-te zinga pakhat hnena an kal chuan phuba leh dikna chu hlen chhuah a ni thin a ni.

Thenawma rukru tenau daihrei chi an awm chuan tihhlum an ni mai a, chi leh chi inkar buaina pawh zahawm taka chinfel a, ram ri chungchang buaina pawh dan hremi rawihnaa insen vak ngai lovin tihfel mai a ni. Heng mafia chief parukte hi thubuai remtu an ni a, an thutlukna chu tih danglam emaw ngaihthah theih a ni lo. Hremna chu a nain ram danga tlan bo a nih ngawt loh chuan pumpelh theih a ni lo.heng mi parukte hian Sicily-ah na na na chuan thu an neiin Italy Premier meuh pawhin a thunun theih loh te an ni. Chutichuan mipuite chuan Prince Ollorto-a ram hungna bang bulah chuan an nghak ta tlawk tlawk mai a ni.
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 28th, 2018, 10:28 pm

CHAPTER 21B

Mafia chief-te chu in hnaih takin an kal lem lo a, inhnaih taka an kal chuan chak lohna lan tirna a ni tlat a ni. A hrang hlakin, mahni a inrelbawl hrang lal ang maiin, mahni tawk theuha mi hlauhawm an nih zia lang larhin an kal a ni. An zinga hlauhawm ber, sakawr buang rang ruai mai chunga chuang chu Bisacquino khuaa mi Don Siano a ni a. Kum 60 ral kai tawh a niin a hmel chu a sakawr ang maia buang leh tial ruan mai a ni. A hmaa Mafia chief pakhat a thah avangin kum 26 mi a nih atangin a hmingthang tan a. Chu pa chuan Don Siano pa a lo that tawhin chutih lai chuan Don Siano chu kum 12 a ni a, a pa phuba lak nan kum 14 zet a nghak a ni. Nikhat chu thingkung atangin a hnuaia a pa thattu sakawr chunga chuang kal mek chungah chuan a far thla a, A hnung lam atanga kuah bet tlatin khaw chhung kawtthler lun lai berah an tlan lut a. Chulai mipui tam tak hmuh lai ngei chuan Don Siano chuan a hlep tan ta a ni, a hmsa berin a hnar a hlep a, chutah a hmui, a beng leh a serh te chu. Chutah ruang thihnuang chu a kuta vuanin, a mi thahte in lam sakawr chunga chuangin a pan a, an in hma takah chuan a va dah a ni. chuta tang chuan a lal ramah chuan nunrawng leh khauh takin ro a rel a ni.

Mafia chief pahnihna, sakawr dum, a beng chunga pehbuk sen lar inthiat vauh chunga chuang chu Piani Dei Greci khuaa mi Don Arzana a ni a. Mi rilru fim leh ngun taka thil ngaihtuah mi, inhnial buai a awm reng rengin ngaihdan chi hnih a awm tih ringtu a ni a. Politics lam avanga Silvio Ferra thah duh lo a ni chungin chu pa hmabak chu a ngaihruat lawk tho a ni. Silvioa Ferra thah a nih khan hrehawm a ti hle a, tih theih a nei bawk si lo a ni, Don Croce leh midang ho chuan a bial chhunga entirna siam kha a ngai tawh an tih tlat vang a ni. A rorelna chu zahngaihna leh ngilneihnain a ni fo va, heng mi nunrawng tak tak paruk zingah hian mi ngainat hlawh ber a ni. Mahse tuna mipui tlim hmur hmaah hi chuan a hmel chu a rumin a rilru chhungril nemna chu nawhreh ang hmak a ni.

Pathumna chu Caltanissetta khua ami Don Piddu a ni a, a sakawr lu chu pangpara cheimawi a ni a. Fakderna lawm mi, mahni hmel chapo pui leh thuneihna atchilh mi a ni a. An khaw kut an hmannaah loneitu tlangval, nula laka thei tak pakhat chu nula hovin an lo ngaisang em em a, a chhan chu a lam pahin a keah tengeng a vuah a, silk kawr leh kekawr hring, Palermo-a thui ngat a ha a, Madrid siam Guitar perha a zai vang a ni. Chu thingtlang tlangval luck an fakderna chuan Don Piddu chu a tithinur kher mai. amah ang mipa dik tak ngaisang lova chutiang mawl satliah leh tuai ang lek an ngaihsan vang chuan a puak keh lo chauh a ni. Chupa chu a lam leh ngai ta lo, a chhan chu an lo panna kawngah a taksaa silaimu luhna kaw chukin hmuh a ni ta a ni.

Mafia Chief palina chu villamura khuaa mi Don Marcuzzi a ni a. Isua tuarna tawmpuia mahni inhrem thin ni a hriat a ni a, a inah a ma pualin chapel a nei bawk a ni. Khawsak awlsam tak a ni a, a thuneihna chu hlawkna atan a hman loh avangin rethei tak a ni bawk. Mahse thuneihna neih chu nuam a ti em em thung. A sicilian puite puih nan chuan a hah thei lo emaw tih mai tur a ni a, mahse friends of friends tih dan hlui thlenga zawm duh mi a ni. A tupa, Police hnena an hmelma mafiate thu rawlruk tu, omerta dan bawhchhetu a tihhlum atangin a lo hmingthang ta a ni.

Pangana chu Particino khuaa Don Buccila a ni. Guilianno outlaw a nih tirh vela Hector Adonis hnena a tupa tana dilsak tura lo kal kha a ni. Kum nga lai a liam tawh a, pound sawmli zetin a rih belh leh tawh a ni. Khang kum nga chhung khan a hausak belh leh viau tawh chungin a lemchan kawr ang tak, loneitu thawmhnaw ang kha a la ha ta reng tho va. Zaidam tak a ni chungin rinawm lohna a ngaithei loin, rukrute chu kum zabi 18 na lai vela englih lal ten naupang rukhmang an tihhlum ang khan a tihlum mai thin.

Parukan chu Guido Quintana a ni a, Montelepre khua chu a hming maiin a lal ram chu a ni ve a ngai a, Coleone khaw tihbaiawm tak la tu a nih avanga lar ta a ni. hetianga a tih nachhan chu Montelepre chu Guilianno-a venhimna hnuaia awm a nih tlat vang a ni. Corleone-ah thung chuan, a tualthah chakna thinlung phuhrukna a hmu a ni. Chhungkaw palite chi leh chi inkar buaina chu a dik lo zawk nia ngaih chhungkuate mang barhin a ti reh a. Silvio Ferra leh Union buaipuitu dangte a that bawk a. mafia chief-ah chuan a mah chauh chu miten an zahna aia an huatna nasa zawk chu a ni.

Chung miparuk, an larna leh zahawmna leh mi hlauhawm tak te chuan a ni, Prince Ollorto-a ram atanga loneitu rethei tak tak lo dodaltu te chu.

Jeep pahnih, silai keng mi chuan khah thapna chu Montelepre atanga Palermo panna kawngah chuan chak takin a tlan a, Prince Ollorto-a ram hungna bang lam pan chuan a inher ta a. Mi pahnih tih loh midang zawng chuan hmai an tuam theuh a, an mit zawn chauh reh kuak a ni. hmai tuam ve lo te pahnih chu Guilianno leh Pisciotta te an ni a. Hmai tuam ho zingah chuan Corporal silvestro te, Passatempo leh Terranova te an tel a. Andolini pawh hmai tuam chungin Palermo lam kawng chu a lo veng a. Mafia sakawr chung chuangte atanga fit sawmnga vela hlaah chuan Jeep te chu a ding a, mipui lam atang chuan silai keng dangin an rawn belh bawk a. Chung mite pawh chuan hmai an tuam vek a ni. Olive thing hnuaiah an lo intihlim a, Jeep pahnih a lo lan veleh khan eitur bawm hawngin ralthuam leh hmai tuamna an la chhuak ve nghal a ni.

A kualin zau takin an insem darh a, sakawr chung chuangte chu an rifle chuan an tin thap a, an vai chuan mi sawmnga vel an ni. Guilianno chu jeep atang chuan lo zuang chhuakin, mitin chu an awmhmun turah an awm vek em tih a endik a. Sakawr chung chuang paruk te kal kual vel chu a thlir a, an rawn hmu tih a hre thei, mipuite pawh chuan an rawn hria tih a hmu thei bawk. Sicily tlailam ni sa chuan chu lai ram hring nghulh mai chu a chhun sen ruaiin a hriat a. Mi paruk lekin loneitu khirh ve tak tak san tamtak an tihlau thei mai chu Guilianno chuan mak a ti zawk hle. Aspanu chuan rulturnei dawhthei lo tak angin a bulah chuan a lo nghak reng a. Aspanu chiah chuan hmaituam chu a duh lo va; midang zawng chuan friends of friends leh heng mi parukte chhungte hian phuba an lak mai an hlau a ni. chung er letna zawng zawng chu Pisciotta leh Guilianno chuan an tuar dawn ta a ni.

An pahnih chuan kawnghren Buckle rangkachak rawng, sakeibaknei leh mupui lem chuang chu an hreng ve ve a. Guilianno chuan a kawnga a pistol pai chauh chu a ralthuam ken a ni a, kum liam taa Duchess hnen atanga a lak emerald zungbun a bun bawk. Pisciotta chuan Machine pistol a keng a, a hmel chu a chuap natna avang leh phurna avangin a dang hlein a hriat; Guilianno chu che har a ti hle. Mahse Guilianno chuan a thupek tihhlawhtlin a nih ngei theih nan uluk takin a thlir kual a, a hote chu circle chanve angin an inrem a, mafia chief te tlan chhiat an duh tak hlauh a, an kal kawng tur an zuah a ni. An tlan chhia a nih chuan an ‘zahawmna’ an hloh ang a, mi an thunun theihna an hlohin, kuthnathawktute chuan an hlau tawh ngai dawn lo a ni. Mahse Don Siano-an a sakawr chu her tir a, bang lam pana a kal leh,midangin an zui chu a hmu a. An tlanchhe dawn lo a ni.

Lal in hlui tawh tak inchhawng sang pakhat atang chuan Prince Ollorto chuan thil thlen dan chu a telescope, arsi thlir nana a hman thin chuan a lo thlir reng a. Guilianno hmel chu chu chiang takin a hmu thei a- mit meng bial deuh te, a hmai fai tha tak leh a hmui thilphal hmel tak thin, tunah chuan tum deuh hmak te chu. A hmela chakna lo lang chu dikna avanga chakna a ni tih a hmuchiang hle. A Sicilian puite chu a hrechiang a, tuna thil thleng turah hian mawhphurtu chu amah a ni dawn ta a ni. Chung miropui parukte chu pawisa hmanga a phuar beh te an ni a, an tlan chhe lovang. Tuna a ram hungna bang pawna mipui te chu an lo tihlau viau tawh a, tunah Guilianno chu phuba latu angel ang maiin an hmaah a rawn inlan ta a ni. Prince chuan ni te chu thim ruai ruaiin a hria a.

Turi chu sakawr chungchuangte kawng hnaih takah chuan a va kal a, Pisciotta pawh chu a bul lawkah chuan a rawn ding ve a. Sakawr chung chuangte chuan a kalna chu an en lo va, an ding hek lo. An hmel chu hriatthiam har tak a ni a, An darah chuan Lupara an ak theuh chungin, tumahin lakthlak an tum chuang lo. Guilianno chuan a han nghak deuh a, chu mite chuan vawithum lai an rawn kal pelh leh hnu chuan, a tawlh hnung a, Pisciotta hnenah chuan zawi sapin, “An sakawr atang khan la thla ula ka kutah rawn pe rawh u,” a ti ta a. Kawng chu kaltlangin lungbang ngheng chuan a va ding ta a.

Bang nghenga a din lai chuan thihna ngei tur rin kham a pel tih a inhria a, a thil tih chuan a hma lam hun a hril tih pawh a hria, mahse a tim eih lo a, nuamlo tihna pawh a nei hek lo, he khawvel laka a thinurna thuk tak chu a ni mai. Heng mi parukte hnungah hian a fawng vuantu Don Croce a awm tih a hria a, Don Croce chu a ni a hmelma hnuhnung ber chu. Chutah mipui a tanpui mekte chungah chuan a thinur veleh ta thun a, engvanga kaih her awlsam viau nge an nih? Engvanga hlauhna nei tlat nge an nih? Theih nise ralthuam a pe ang a, Sicily thar siam turin a hruai mai tur hi a ni a. Mahse chung mirethei tak tak, riltama thi lo chauhte khawngaihna chuan a rawn luah khat leh a, mipuite tiphur turin chibai nan a kut a han phar a, mipui chu an ngawi thup a. Silvio Ferra awm se chuan a chawhphur hlawm dawn tehlul nen tiin a ngaihtuah zawk a.

Tunah chuan Pisciotta hun a thleng ve ta. Hnung lamah pen khat a han pen a, Terranova leh Passatempo leh Silvestro lamah chuan a bu nghat a, an ni chuan an mi sawm nga rual te lamah chuan an kal nghal a, tlan chhuahna atana an siam chu khar turin an tawlh rual deuh a, an hual bet ta a. mafia chief-te chuan an sakawrte chu chapo takin an la kal tir reng a, thil thlen dan chu an hmuin an hrethiam vek nachungin hre lo ang hmiahin an kal ngaiin an kal ngauh ngauh reng a ni. An indona thawhkhatna chu an chak ta a, tunah chuan Guilianno-a hun, a hlauhawm ber leh tawp ber a tih dawn leh dawn loh hun chu a lo thleng ta a ni.

Pisciotta chu Don Siano-a sakawr kalna tur takah chuan dingin, ngeng ngalhin chu hmel hlauhawm tak lamah chuan ban a phar a. Mahse Don Siano chu a ding lo. sakawr chuan pen san a tum chuan a chunga chuang chuan nghet takin a lu chu hmalam pan turin a pawt tlat a. Pisciotta chu lo awm sawn lo se an chil ngei ang. A kal pelh chhung zawng chuan Pisciotta chuan tualthah chak nuih taka nui chungin a lu a lo kun a, chutah hmalama pen thutin sakawr mawngah chuan machine pistol chu a chuktuah a, a hmet puak ta a.

Boruak rimtui tak, pangpar rim nam cham cham mai chu sa ril chhuak te, thisen rawn chik chhuak leh sa ti them leng vel chuan a luah khat ta a. Silaimu tam tham tak lut chuan sakawr ke chu a paih thlawk daih a, sakawr pawh chu a tlu nghal tawp bawk a, Don Siano chu sakawr ruang chuan delhin mi paliin rawn la chhuakin a kut an hnungkhirh hmak a. Sakawr chu a lo la nung a, Pisciotta chuan va pan hnaiin zahngaihna lantirin a luah chuan silai chuan a phuh thawt a.

Rapthlak tih avanga rum ri leh hlim avanga au thawm hi mipui zing atang chuan a lo chhuak a. guilianno chu a awm ngai rengin a la awm a, a pistol pawh a paiah a la awm reng a ni. Aspanu Pisciotta chuan eng nge a tih leh dawn tih hrechak ni awm takin kut kuangkuahin a lo thlir reng a.

Mafia chief panga dangte chuan an kawng zawh chu an la zawh reng a. Silai riah khan an sakawrte an buai deuh nangin rang takin an thunun leh vat a ni. A hma ang tho khan muang changin an kal leh ta a. Pisciotta chu an kalna turah chuan a lo ding leh a, a ban chu a lo phar leh a, a hmasa bera kal Don buccila chu a ding ta a. A hnunga midang ho pawh chuan an sakawrte chu an pawt ding ta a.

Pisciotta chuan, “In chhungkua ten in sakawr hi chu nakinah an la mamawh ang, ka thawn hlawm ang tih ka tiam e. Tunah lo chhuk ula, Guilianno in zahna rawn lan tir rawh u,” a aw chu a ringin mipui ho pawh chuan chiang takin an hre thei a ni.


A reh vang vang a, chutah an sakawr atang chuan an lo chhuk ta a. Mipui lam hawi chuan chapo takin an ding a, an mitmeng chu a hriamin a tawrawt hle. A hualtu te atang chuan mi 20 rual hi lo chhuakin inring tak leh fimkhur takin chung mi pangate chu an hnungkhirh a, an paruk chuan Guilianno hmaah chuan an hruai ta a.

Guilianno chuan a hmela engmah lang lovin chu mite chu a lo en a. Quntana chuan a lo ti hminghliau tawhin, thah hial a lo tum tawh a, tunah chuan an dinhmun a inthlakthleng ta chiah a ni. Quintana hmel chu kum nga chhung khan a inthlak tam pui lo hle- phakar hmel tak kha a la ni reng- mahse a mitmeng chu a ruakin, a mafia hmel phenah chuan a inngaihtuah nasa tih a hriat theih.

Don Siano chuan guilianno chu hmuhsit hmel zetin a en a, Buccila hmelah chuan mak ti deuh hmel a lang thei a, a tana tul miah loha inhambuai hmel ang deuhin. Don dangte chuan a mitah tak rum takin, mi zahawm berin a tih dan tur ang takin an en a. Guilianno chuan chung mite chu an hmingthan avangin a hre vek hlawm a; a then phei chu a naupan laia a hlauh em em te an ni, a bikin Don Siano chu a ni zual a. Tunah chuan Sicily mipui zawng zawng hmuh theihin a tihminghliau ta hlawm a, an ngaidam ngai lo vang. Hmelma hlauhawm ber an ni kumkhua dawn a ni. Eng nge a tih tur chu a hria, mahse heng mite hi mi pasal leh pa duh lai an ni a, an faten an tuar dawn hle a ni. Chapo takin an en a, hlau hmel an pu lo. An rilru chu a hriat hle, Guilianno chuan a thil tih tur chu ti rawhse, chutiang ti ngam tura theihna a nei ngai a nih chuan. Don Siano chuan Guilianno keah chuan chil a chhak thawt a.

Guilianno chuan anmahni chu a enkual dan dan a, “Thingthi ula Pathian nen inremna thu sawi rawh ule,” a tu amah chu an che chang lo.

Guilianno chu a inher a, Mafia chief parukte chu bang bulah chuan an ding tlar a ni. Guilianno chuan a mite intlarna hmun a thlen chuan a inher a. Aw ring tak, mipuite hriat phak ngei tura ringin, “Pathian leh Sicily hmingin ka that a che u,” Pisciotta darah chuan a khawih zauh a.

Chutih lai chuan Don Marcuzzi chuan thingthit a tum a, mahse Pisciotta chuan silai a lo hmet puak hman tawh a ni. Passatempo, Terranova leh Silvestro te pawh chuan hmai la tuam reng chungin an kap ve a. Chung mihring taksa parukte chu silaimu tamtakin a nuaina avang chuan bangah chuan an insawh dawt dawt a. Lung var tha tak takte chu thisen leh tisa themin a bual huh zuih a ni. Chung taksate chu hrui hmanga lam tir ang maiin, silaimuin a den reng avang chuan bangah chuan an insawh dawt dawt mai a ni.

Lal ina inchhawng sang atang chuan Prince Ollorto chuan a telescope chu a hawi san a, a hnua thil thleng chu a hmu ta lo a ni.

Guilianno chu hmalam panin bang lamah chuan a kal a. A pistol rit talh mai chu a phawi a, Mafia chief tlu tawh te luah theuh chuan a kap nghauh nghauh a.

Lo thlir rengtu mipui lam atang chuan au te thawm a lo chhuak a, reiloteah chuan Mipui sang chuang fe mai chu Prince Ollorto-a ram luhna gate-ah chuan an tleh lut ta hum hum mai a ni. Guilianno chuan a lo thlir reng a. Mipui atang chuan tumah a mah rawn pan an awm lo tih a hria.

(Chapter 21 ended.)
[*]Loma_Hmar[*]

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Loma hmar
Posts: 123
Joined: March 20th, 2018, 11:51 pm

Unread post by Loma hmar » May 29th, 2018, 10:22 pm

CHAPTER 22

Kum 1949-a Isua thawhlehna champha chu a ropui hle mai. Sicily thliarkar pumpui chu pangparin a khuh chhuak vek emaw tih mai tur a ni a. Palermo kawtthlera inchhawng bathlarte chu mawi tak taka chei a niin, kawng pui sir vel te chu pangpar rawng chi hrang hrang nena cheimawi a ni a. Palermo kawtthlerah chuan mipui an zi nuaih nuaih a, dar 9-a Palermo Cathedrala mass neihnaa kal tum an ni, chutah chuan palermo Cardinal ngei chuan mass chu a theh dawn a ni. Thingtlang khaw lam atang pawhin chu hun hmang tur chuan mi tam tak, an nupui fanau te nen an lo kal khawm a, easter zing inchibai dan pangngaiin mi an tawh apiang chu, “Krista a tho leh ta,” tiin chibai an buk a, Turi Guilianno chuan dan pangngai bawkin, “A hming ropui rawhse,” tiin a chhawn ve zel a.

Guilianno leh a mite chuan zan hmasa khan Palermo chu an lut a. Thingtlang loneitu incheia incheiin, jacket thawl leh lian pui pui an ha a, an jacket hnuaiah chuan machine pistol an ak theuh a ni. Guilianno chuan Palermo kawtthler chu a bel hle; kum ruk bandit a nih chhung khan lalchhungkaw hausa deuh rubo tur te, restaurant changkang taka zanriah kil a, a tlawh ngei tih hriatna lehkha hnutchhiah tur ten a lut ru fo a ni.

Chutiang hunah chuan Guilianno tan hlauhawm a awm ngai lo, kawtthlerah chuan Corporal Canio Silvestro hruaiin a kal fo thin.

A hmalam pen sawmhnih velah mi pahnih an kal a, kawtthler sir lehlamah chuan mi pali an awm bawk a, a hnung lam pen sawmhnih velah bawk mi pahnihin an zui bawk a. Carabinieri ten Guilianno chu an lo tih din a, ID en an dil chuan heng mi, zahngaihna nei miah lo kap nghal thei tura inbuatsaihte tan hian target tha tak an ni ngei ang. restaurant a luh chuan, chaweina hmun chu amah vengtute chu dawhkan dangah thuin an luah khat vat thin.

Tukin zingah pawh hian he khawpuiah hian a hote mi sawmnga lai a hruai a, Aspanu pisciotta te, Passatempo, Terranova leh Canio Silvestro te telin. Stefano Andolini chu buk nghakah an hmang a ni. Guilianno leh Pisciotta te Cathedrala an luh chuan a hote mi sawmliin an zu nghal a, a dang sawm chu Corporal leh Terranova hovin tlan chhuahna tur motor nen building hnung lamah an awm bawk a ni.

Cardinal chuan Mass a buatsaih mek a, a puithiam kawr rangkachak rawng leh var nen, a nghawnga isua khenbeh lai lem a awrh te, a aw ropui tak te nen chuan huhang ngah tak leh mi thianghlim ni mai awm a ni a. Cathedral chu Isua lim leh Virgin Mary limin a khat a. Gulianno chuan tui thianghlimah a kutzungtang a zuk hnim a, a thingthit pah chuan inchung mum ceiling zau tak chu hmuin bangah te chuan mithianghlimte lim entu mombati sen mawi tak te chu a tlar tuarh bawk a.

Guilianno-a hote chu bang dungzuiin, maicham hnaih lamah chuan an insem darh a. Thutnaah chuan Pathian be tura lo kal mipui an thu thup a, thingtlang lam mi a dum veka inthuam te, khawpu mi easter kawr thar mawi taka inthuam te chu. Guilianno chuan Virgin Mary lim hmingthang tak leh mithianghlim ho lim bulah a ding tih a inhre thut a, a mawina chuan reilote a rilru a kuaipeng zawk a ni.

Puithiam leh maicham rawngbawltu te thu chham te, mipuiin an lo zawm mur mur te chuan Guilianno chu a nghawr dawt dawt ni berin a inhria a. Mass a chan hnuhnun ber chu kum nga liam ta, lumettu Frisella-an a phatsan hma hret kha a ni a. Bo ta riaua inhriatna leh mahni inrapnain a rawn deng deuh dawt a ni. A hmelmate chungah vawi engzatnge, “Pathian leh Sicily hmingin ka tihlum a che,” a tih tawh? Lal Isua a thawh leh ang khan he easter tukah hian lo tho leh hlawm se, a tirh liamna kumkhaw thimna atang chuan lo chhuak leh mai se a ti hle. He mi tukah hian an mahni zawm turin Cardinal chu a tir liam leh maithei lehnghal. Cardinal chuan a thutiam a bawhchhia a, dawt a hrilhin a phatsan a, a hmelma a lo ni ta a ni. Eng anga mawi leh nalh pawhin he Cathedral ropui tak chhungah hian thu chham mah se awm zia awm chuang lo. cardinal chu Pathian nena inremna sawi hmasak tir zet chu thu chuangtlai mai mai a ni ang em? Khawnaihnaa khat a ni reng dawn lo vem ni? Gulianno a phatsan a ni tih inpuang turin a inngaitlawm tawk ang em?

Mass chu a tawp lam a ni tawh a, mipuite chu maicham hungna bulah sakrament thianghlim chang turin an intlar a. Guilianno-a hote thenkhat chu a dawng turin an thingthi ve a. hemi hma ni hian Monastery-a Abbot Manfredi hnenah sual puanna an nei diam tawh a, an thiang a ni, he inkhawm zawha thil sual an tih leh hma loh chuan.

Cardinal chu maicham hnung lamah chuan a lut a, chapela tawngtai tura a thingthit chiah chuan Guilianno leh a hote chuan an rawn hual ta a ni. Midang chuan chu hmun thianghlim chhuah ka zawng zawng chu an dang ping vek bawk a.

Cardinal chu anmahni hmachhawn tur chuan a lo tho chhuak a, mahse Pisciotta chu a hmu ta a ni. A hmel chu a lo la hrereng a, mahse tuna a lan dan ang hi chu a ni lo. Tunah chuan a thlarau man tura ramhuai lo kal, hremhmuna hemhmin tura hruai tura lo kal hmel chiah a ni mai. Guilianno chuan, “Pu zahawm, Ka mitang i ni ta e, ka thu anga i awm chuan i na lovang, vawiin easter hi tlang lamah ka mikhual angin i hmang ang a, i lal in ropui taka zanriah atana i ei ang chiah kha ei pui che ka intiam e.” a ti a.

Cardinal chuan thinrim takin, “He Pathian inah hian silai keng mi i rawn hruai lut ngam a maw?” a ti a.

Guilianno chu a nui hawk hawk a, a thil tih leh tur a phur avangin nichina zah rukna a neih zawng zawng kha a bo vek tawh, “Chu aia nasa pawh chu ka ngam asin,” a ti a, “I thutiam thianghlim i bawhchhiat avangin ka dem che a ni. Kei leh ka mite ngaihdamna min tiam a, mahse i hlen ta lo a nih kha, tunah chuan nang leh he Biakin hian a man in pe tur a ni.”

Cardinal chuan a lu a thing a, “He hmun thianghlim atang hian ka che sawn lo vang, i ngam chuan min that la, khawvel pumah i hmingthang kher ang chu.”

“Ka hming a thang tawh sa reng alawm, ka thu anga i ti dawn lo a nih chuan ka nawr deuh che a ngai dawn a nih chu. I puithiam zawng zawng hi ka that ang a, phuar chungin ka hruai ang che. Ngawi renga i lo kal a nih chuan tu chungah mah thil pawi a thleng lo ang a, karkhat hnu lekah i let leh mai ang.”

Cardinal chuan kraws chhinchhiahna a han siam a, Guilianno-an a kawhhmuh kawngkhar lam chu a pan ta a. Chu kawngkhar chu Cathedral hnung lam panna a ni a, chutah chuan Guilianno-a pawl dangte khan Cardinal Official Limousine leh a khalhtu chu an lo thunun reng tawh a. Limousine chu easter pangpar bawra chei a niin a sir tawn tawnah chuan Cathedral puan sen a inzam phei raih bawk a. Guilianno-a mite chuan kohhran hotu dangte car pawh an lo man tel bawk a. Cardinal chu limousine-ah chuan lutin a sirah Guilianno chu a thu lut ve nghal a. A hote pahnih chu a seat hnung lamah thu lutin, Pisciotta pawh chu Driver bulah chuan a lut ve nghal bawk a. Car chu khawpui chhungah chuan a tlan ta a, Carabinieri veivak ho te chuan salute an lo pe thin a, chungte chu Guilianno-an ti tura a hrilh angin Cardinal chuan malsawm nana kut vaiin a thlah zel thin. Kawng bumboh deuh an thlen chuan Cardinal chu car atanga chhuak tura tih a ni a, chutah chuan Guilianno-a hote dangin Cardinal zawnna tur nena lo inchhawpin an lo nghak a. Car leh a khalhtu chu hnutchhiahin tlang lam pan chuan an bo zo ta a.

Camarata tlang pilrila pukah chuan Guilianno chu a sawi ang chiahin a awm a ni, Cardinal chuan a lal ina a ei anga tui tha tha chu a ei a. Thlarau lama thuneitu a nihna anga hlau leh zahtu bandit te chuan, eitur an chhawp apiangin a malsawmna an dil thin a ni.

Italy chanchinbu te chuan lungawi lohna an chhuah nasa hle. Sicily mipuite erawh chu an thinlungah thil pahnih a awm a: sakhaw serh leh sang tihbawlhhlawh avanga hlauhna leh Carabinieri te zaktaka siam an nih avanga an lawmna chu. An lawmna em em chu Guilianno, Sicilian-in rome a hnehna chu a ni; tunah chuan Guilianno chu ‘mi zahawm’ tawpthang a lo ni ta a ni.

Mi zawng zawngin hriat an chak em em chu, Guilianno chuan Cardinal thleng nan eng nge a duh ang? tih a ni a, a chhanna chu awlsam te, tlanna sum tam tawk tak a ni.

Chu kohhran thianghlim chu, thlarau nun kaihruaitu mai a ni chungin, sumdawng hausa leh lalchhungkaw hausate hnuaia kun kher ngai lovin, rang takin tlanna sum cheng maktaduaih za chu a pe mai a ni.

Mahse Guilianno chuan thil tum dang a la nei a.

Cardinal hnenah chuan, “Kuthnathawktu mai ka ni a, van lam tihdan anga kaihhruai ka ni lem lo. mahse ka thu ka la zuk ve ngai lo. mahse nang, Catholic church Cardinal meuh, i thawmhnaw thianghlim leh La Isua kraws nen meuh hnam mawl ho ang maiin dawt min hrilh a. I chanvo thianghlim khan a chhan hauah lo ang che,” a ti a.

Cardinal chuan a kaihza tha chu zawi vekin a hria a.

Guilianno chuan a sawi zawm a, “Mahse i vannei hle a ni, i tih tur dang ka nei tlat a ni.’ Chutah a thuthlung bu kha Cardinal chu a chhiar tir ta a.

Tunah chuan a nunna chu zuah a ni dawn tih a hre ta a. Cardinal, Pathian hremna beisei tura zirtir thina chuan Guilianno-an a demna aiin chu thuthlungbu chungchang chu a ngaihven ta zawk a ni. Pisciotta hnena a lehkha ziah kha a han hmuh chuan hlauhthawn avangin kraws chhinchhiahna a han siam a.

Guilianno chuan, “My dear Cardinal, heng lehkha pawimawh te i hriatna hi kohhran leh Minister Trezza hnen thlen ang che. christian democratic sorkar tihchhiat vek theihna ka neih chu i hmu ta a. ka thihna chu in tan thil vanduaithlak tak a ni ang. He thuthlung bu hi in thlen theih loh hmun him takah a awm dawn a ni. Tupawhin an ringhlel a nih chuan engtinnge ka hmelmate chu ka tih thin tih Don Croce zawt turin i hrilh dawn nia.”

Cardinal rukbo a nih atanga kar khatnaah chuan La Venera chuan Guilianno chu a kal san ta a ni.

Kum thum chhung chu leiverh atang chuan a inah chuan a kal thin a, a khumah, a taksa lum nuam takah chuan nuam a chen thin. La Venera chuan a sawisel ngai lo va, hlimna leh nawmna a pek bak chu a beisei ngai hek lo.

Mahse zanin chu a danglam hle a ni. Hmangaihna an chen dun zawh chuan. La Venera chuan Florence-a a chhungte kianga kal a tum thu a sawi ta a. “Ka thinlung hi a chak lo em em a,” a ti a, “I nunna hlauhawm taka a awm hi ka tuar thei tawh lo a ni. Ka mithmuh ngeia kah thluk i nih hi ka mangah ka hmu fo a, Ka pasal kha Carabinieri ten ama In bulah, ramsa ang maiin an kaphlum a. A taksa chu pawnchhe hnangkhai thi hnuang ang chauh a nih thlengin an kap a ni. Chutiang chu i chunga thleng tur angin ka mangah ka hmu thin a ni.” A A hnute lamah chuan a lu a kun a, “Ngaithla rawh, ka lungphu chu ngaithla teh”

Guilianno chuan a ngaithla a, mumal lo taka a lungphu chuan Guilianno chuan a hre thei a. A hnute hnuai a taksa ruak kang chu a chhungril hlauhna avanga thlan chuan a ti-al deuh hlap a. Venera chu a tap ta a, Guilianno chuan a sam a chul sak a.

“A hmain i hlau ngai si lo va,” a ti a, “Thil engmah a danglam hleinem.”

La Venera chuan a lu a thing mat mat a, “Turi, pawisak i nei lo sawt riau a ni,” a ti a, “Hmelma i insiam zel a, thil tithei tak tak te. I thian te hian an hlauhpui tawh che a ni. I nu saw kawngka kik riah ringawt pawh a dang bawm bawm zel asin. I tlan bo kumkhua thei lo vang.”

Guilianno chuan, “Mahse keimah ka inthlak danglam chuang hleinem,” a ti a.

La Venera chu a tap leh tan ta a, “Ah, Turi, i inthlak chiang a lawm. Mi thah i awlsam lutuk tawh. I nunrawng chu ka ti hauh lo. Mahse thihna chungchangah i fimkhur lo sawt riau a ni.”

Guilianno chu a bu nghat a. A hlauh zia chu a hmuhin a hriatthiam loh lungngaihna chuan a rawn bawmin a inhria a, “Chutia nih chuan i kal tur alawm,” a ti a, “Florence-a i khawsak theihna tur pawisa ka pe ang che. Engtik niah emaw chuan heng thil te hi a la tawp vek ang a. Inthana a awm tawh lovang. ruahmanna ka nei a ni, bandit ka ni kumkhua dawn hleinem. ka nu chu tui takin a muhil thei tawh ang a, kan la inhmu khawm leh vek dawn alawm.”

A thusawi chu a ring miah lo tih a hmu a.

Zinga a chhuahsan hma chuan hmangaihna an chen dun leh a, a tawp nan Phurna nasa takin, an mamawh an inphuhru tawn ta a ni.
[*]Loma_Hmar[*]

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)