THE SICILIAN (BOOK III-V) By Mario Puzo

[Loma hmar]

CHAPTER 23A

Guilianno chuan ram rorel pawl emaw ram pum politician emaw te tihhlawhtlin theih loh chu a ti hlawhtling thei ta; Italy rama political party zawng zawng chu thil tum pakhat intawmin a zawmkhawm ta a ni: Guilianno leh a pawlte tichhe vek tur chuan.

July 1949-ah chuan Minister Trezza chuan Carabinieri atanga thlan chhuah mi sang nga, special force tia kohte chu Suamhmang suat mang tura siam an ni tih Guilianno leh a pawlte chungchang sawi a ni tih tilang chiah lem loin chanchinbumite hnenah a puang a. Chanchinbu mi te chuan sorkar thupuan awmzia chu an chuktuah rem thiam thei mai a. Chutianga chak taka hmalakna a neih nghal avang chuan Christian Democratic sorkar chu an fakin lawmpuina thu an ziak kur nasa hle.

Chutianga mi sang nga awmna Special force siam thei tura minister Trezza finna chu rampum huap chanchinbu ho chuan mak an ti hle a, an phu zawk a ni ber e. Chu sipaia tel te chu tlangval vek an ni ang a, tichuan hmeithai an awm dawn loh mai bakah, chhunte vau thut thilah pawh an fihlim dawn a ni. Commando an awm ang a, parachute sipai te, armor car nen, ralthuam hrawl chi leh thlawhna thleng pawhin an nei bawk ang. Engtinnge chutiangah chuan suamhmang satliahte chu an dinchan theih tehlul ang ni? Chung sipaite chu Colonel Ugo Luca-an a kaihruai dawn a, ani hi Indopui pahnihna hun laia Italy tana pasaltha te zinga pakhat niin, German General hmingthang tak, general rommel nen pawh an innuai chiam tawh a ni. Chanchinbu chuan ‘Italian thlaler sihal’ tiin hming lem an vuah sak a, rawlrala ral beih thiam zet mai a ni a. A tihdan kawnghmang leh remhriatnate chuan sicilian thingtlangmi satliah ve mai, Turi Guilianno chu a chawkbuai hlein an ring a ni.

Chanchinbuah chuan run dal tak tak chauhin para tereuhteah Sicilian Security police head atang Inspector Federico Velardi chu dah a ni tih tarlan a ni a. Colonel Luca pui turin Minister Trezza thlan a ni tih bak chu Inspector Velardi chanchin hi hriat tur a awm lem lo.

Chuta tanga thlakhat hnuah chuan Minister Trezza, Don Croce leh Palermo Cardinal chuan inhuhkhawmna runthlak tak chu an nei ta a. Cardinal chuan Guilianno-a thuthlung bu leh a tihchianna lehkha pawimawhte chungchang chu a hrilh ta hlawm a.

Minister Trezza chu a hlauthawng hle mai. Army ten an tih tur an tih zawh hma ngeiin thuthlung bu chu tih boral a ngai a ni. Special force siam a ni chu sut leh theih nise a ti hle, mahse an insiam vek tawh si, mahse sorkar chu left-party lam atanga nawrna a nasain, sorkarin Guilianno chu a hum niin an au chhuak reng bawk si nen.

Don Croce tan erawh chuan chu chuan thil a ti harsa deuh nangin a thil tum erawh a danglam eih lo; Guilianno that turin rilru a siamfel vek tawh a, A chief parukte thahna chuan duhthlan tur dang a siam lo a ni. Mahse Guilianno chu ama emaw friends of friends emaw kuta thi thei a ni lo, chutiang tur chuan a hmingthang mah mah tlat a, thah a nihna chu friends ho tan pawh thil sual tak a ni dawn tlat a, Sicily mipuite huatna chu an chungah burbun vek a ni dawn tlat a ni.

Eng pawh chu ni se la, Don croce chuan Minister Trezza mamawh ang chu a pawm pui zel a ngai tih a hria. he mi hi Premier of Italy ni tura a duh kha a ni miau va. “Kan tih tur chu hei hi a ni ang. Duhthlan tur dang i neichuang lo va, Guilianno chu i bei zel tur a ni ang, mahse thuthlungbu engmah lova ka chantir hma loh chuan damin lo la awm tir hram hram ang che, chu chu ka ti thei ngei tih ka chiang bawk.” a ti ta a.

Minister chu huphurh hmel takin a bu nghut a. Intercom chu hmetin, thupe aw tak hian, “Inspector kha rawn luh tir rawh,” a ti a. reiloteah chuan pa sang tak, mitmeng dumpawl nguai ruih hi a lo lut a. A che hle a, inchei dak thlarh mai, mi lian tak hmel pu a ni a.

“Hei hi Inspector Velardi a ni a,” Minister chuan a ti a, “Sicily-a security police head-a puan ka tum mek a ni. Sicily-a ka thawn tur sipai hotu kawppui tur a ni dawn a ni.” A mal malin a hmelhriattir a, Velardi hnenah chuan Thuthlungbu avanga an harsatna leh Christian democratic lalram a tih derthawn dan chu a sawifiah a.

“My dear inspector,” Minister chuan a ti a. “Sicily-ah chuan Don Croce ka aiawh anga ngai turin ka duh che a ni, Thu pawimawh hriat a mamawh ang chu ka hnena sawi ang chiahin i hrilh zel ang. i hrethiam em?”

Inspector chu a thu hriat paitawih tur chuan rei fe a inngaihtuah a. A hrethiam ta. A thiltih tur chu Guilianno do tura sipai hovin ruahmanna an siam ang ang chu Don Croce hnena hrilh zel a ni. Don Croce chuan chu chu Guilianno hnenah a him theih nan a hrilh chhawng zel ang. Don-in Guilianno tawpna hun tur a ni tawh e a th hun thleng chuan chutiang chuan a ti zel ang.

Inspector Velardi chuan, “thu pawimawh zawng zawng chu Don Croce hnenah hian ka hrilh zel anga maw? Colonel Luca chu mi a a ni lo va, Thu put ru a awm tih a hre thuai ang a, a thil ruahman laiin min tel tir duh lo mai tur asin.”

“Harsatna i nei a nih chuan,” Trezza chuan a ti a, “Ka hnenah lo sawi zel ang che, i hna tur chu thuthlung bu chu him taka awm tir a ni, chubakah Guilianno chu dam leh zalen taka thil tih fel a nih hma zawnga awm tir a ni bawk.”

Inspector Velardi chuan a mit dumpawl vawt ruih chuan Don Croce chu a en a, “I tana thawh chu ka lawm khawp ang,” a ti a, “Mahse thil pakhat ka hriat a ngai a, Thuthlung bu chu tihchhiat a nih hmain Guilianno chu a nung chunga man ni ta se, eng nge ka tih tak ang?”

Don chuan a pehhel lem lo, sorkar hnathawk a ni ve lo va, tlang takin a sawi thei a ni, “Chu chu tawrh zawh rual loh thil vanduaithlak tak a ni ang.”

Colonel Ugo Luca, Suamhmang ti bo tura sipai hotu atana ruat chu chanchinbu te chuan an chawimawiin an mi duh tak a nih zia an ziak nasa hle a. a military record te, huaisen lawmman a dawn te, a tihdan kawnghmang fing tak te chu chipchiar takin an chhuah a. Uipa fing tak a ni mai e, Sicilian ho tawrawtna nen chuan a induh dawn viau e, tiin an chhuah a ni.

Thil dang a tih hmain Colonel Luca chuan Guilianno chungchanga report awm te a zir chiang hmasa phawt a. Minister Trezza-an a office-a a va hmuh chuan chanchinbu hlui leh report hrang hrang nen a lo inchhawp hnawk ruih a. Minister-in engtikah nge a sipaite Sicily a pan pui dawn tih a zawh chuan ani chuan thawhpui tur a khawm mek a, en anga rei pawh nghak ila, Guilianno chu a la awm reng dawn tho tin a lo chhang mai a ni.

Colonel chuan report-te chu kar khat lai a zir chian hnuah thutlukna a nei thei ta a. Guilianno chu rawlrala inbeihnaah chuan zei tak a ni a, tih dan phung hman chik tak a nei bawk. A bulah chuan mi sawmhnih zen zawn an awm reng a, chung zingah chuan a chief te an tel bawk. Pisciotta chu a hnuai chiah a mi a ni a, Canio Silvestro chu amah vengtu bik, Stefano Andolini chu Intelligent lam hotu niin Mafia leh Don Croce nena an inkar thu kengtu a ni. Terranova leh passatempo chuan ho hran an neih phal a ni a, a huhova tih tur a awm a nih loh chuan Guilianno thupekna hnuaiah a hranin an che thei. Terranova chuan inrukbo lam a hma a, Passatempo chuan rel leh bank rawk vel a hma thung.

Colonel tana chiang em em mai chu Guilianno-a pawlah chuan mizathum aia tam lo an awm tih hi a ni. Chuti a nih chuan engtin nge, khang kum ruk chhung kha a dam khaw chhuah theih a, chu mi biala carabinieri te a lehkhalh a, sicily hmar thlang lam zawng a thunun theih? Engtin nge tlanga sipai tamtakin an phek zawnna te a tlanbosan theih? Tih chu Colonel ngaihtuahna tibuai tu a ni. Guilianno chuan a mamawh hun apianga a koh theih tur midang Sicily kuthnathawktu zingah an awm tih a chiang mai. Sorkarin tlang lama a zawn laiin chung mite chu khuaah hawin kuthnathawktu pangngai angin an awm leh mai dawn a ni. Montelepre khaw mi tamtak chu a pawla a ruka tel an ni ngei bawk ang a. A pawimawh ber chu Guilianno larna chu a ni; phatsan a nih theihna chance a tlem hle. Helna chawk chhuak duh ni se la chuan, phang lovin mi sang chuang fe chu a nei thei nghal ngei ang.

Chu bakah, thil buaithlak tak dang a la awm a, Guilianno hmuh theih loha a inkhuh bo theih dan chu a ni. Hmun pakhata hmuh a nihin boruaka thamral an maiin a bo leh daih zel dan chu. Colonel luca chuan a chhiar tam poh leh, a ngaihtuah nasa tial tial a ni mai. Chutah chumi do nana tih tur chu a hre ta, thil pawimawh tak angin a lang lo maithei, mahse nakinah a la pawimawh thei tlat a ni.

Guilianno chuan chanchinbu mite hnenah lehkha a thawn fo va, “Hmelma kan ni lo takzet a nih chuan - chu chu ka duh dan tak a ni a- ka thuziak hi i chhuah ngei ang,” tiin a tan ziah bawk. Chutah a suamhmang hnathawh chungchang a hmuh dan a sawi ta thin a ni. Colonel ngaihdanah chuan a thu hawnna chu invauna, tihluihna a ni a, a thuziak laimu chu hmelma ngaihdan mai a ni. Inrukbo chungchang te, rukruk chungchang bakah mirethei hnena pawisa sem a nih dan chiang taka sawifiah a ni thin. Guilianno-an carabinieri nena inkahna a neih a, thenkhat an lo thi a nih chuan, lehkhathawn a awm ziah a, indonaah chuan sipai chu an thih a ngai thin, tih a tel thin a. Carabinieri hnena rawn bei tawh lo tura ngenna a chuang ziah bawk. Mafia chief ho tihhlum an nih khan lehkhathawn a lo thleng a, chu tah chuan mihring dikna leh dan hmanga kuthnathawktu ten an chanvo an chan dawn chuan thil tiha lan tir a ngai thin, tiin a rawn sawifiah a ni.

Colonel-in mak a tih em em chu chung lehkhathawnte sorkarin tihchhuah a phal zel chu a ni. Minister Trezza hnenah lehkha tawite thawnin Sicily rama sipai rorelna neih a dil a, tichuan Guilianno chu mipuite lak atangin danchah a ni thei dawn a ni.

Thil dang pawimawh em em a zawn pakhat chu Guilianno-an hmeichhia a neih leh neih loh chanchin a ni a, mahse engmah a hmu lo. Suamhmang hovin Palermo-a nawhchizuar an tlawh thin thu leh Pisciotta chu hmeichhe lawm tak a nih thu report chu a awm a. Guilianno chu khang kum ruk chhung kha mipat hmeichhiatna tel miah lovin a hmang niin a lang tlat. Italian mi a nihna nen, Colonel Luca chuan chu chu theih loh a ni tih a hria. Montelepre-ah chuan chutiang hmeichhia chu an awm ngei tur a ni. Amah chu an hmuh hunah chuan hna chanve zo an ni mai.

A thil hmuchhuah pawimawh tak pakhat chu Guilianno leh a nu inlaichin dan chu a ni. Gilianno chu nu leh pa tana fapa ngainatawm tak a ni a, mahse Guilianno chuan a nu chu a ngaina zual bik tlat a ni. Chu pawh chu Colonel chuan a chhinchhiah a. Hmeichhia a nei lo takzet a nih chuan, a nu chu chaw chah atan a hman theih ang chu.

Heng inbuatsaihna zawng zawng a zawh hnu chuan, colonel chuan a thawhpui tur a thlang ta a. A ruat zinga pawimawh ber chu a hnugzuitu leh a mah bik vengtu atan Captain Antonio Perenze a ruat chu a ni. Captain Perenze chu thau lam deuh, rit tak a ni a, rilru sukthlek danglam zung zung mi a ni bawk. Mahse Colonel-in a hriatchian em em chu a huaisenna chu a ni, he huaisenna hian colonel nunna a chhanhim hun a la awm maithei a ni.

September 1949 a lo nih chuan colonel chu sipai sanghnih rual hruaiin sicily ramah chuan a kal hmasa phawt a. Guilianno tiropui zual ting tura a mah do tura Sipai sangnga hruai nghal ngawt chu a duh bik lo a ni.

A thiltih hmasa ber chu Sicily chanchinbu te Guilianno-a lehkhathawn an chhuah thin tihtawp sak chu a ni a. A dawtah chuan Guilianno a nu leh pate chu an fapa tanpuia puhin man an ni leh a. Chu mi hnuah Montelepre mi zahnih chuang chu Guilianno-a pawla tel ru anga puhin man an ni leh bawk. Chung an mi mante chu colonel-a hoten uluk taka an ven Palermo taninah thawn nghal zel an ni. Chung thil zawng zawng chu Mussolini-a Fascist dan, danbua la chuang reng hmanga ken kawh a ni.

Guilianno-ate in chu dap a niin leiverh chu hmuh chhuah a ni a, La Venera chu Florence-ah man a ni bawk. Mahse chhuah leh nghal a ni a, leiverh a awm thu chu a hriat loh thuin a tang a. A thusawi chu an rin vang ni lovin, Inspecor Velardi chuan Guilianno-an a tlawh palh hlauhin tih thuah a zalen chu a duh a ni.

Italy chanchinbute chuan colonel chu van tawng hial tur khawpin an fak nasa a, a tawp a tawpah chuan ‘tih tak takna’ nei mi a lo lang ta e, tiin an chhuah a ni. Minister Trezza chu a hlim hle a, Premier atanga lawmpuina lehkha a dawn hnuah phei chuan a mi thlan chu tha hlein a hria a. Don croce chauh chuan a lawm lo a ni.

A tirah chuan, Turi chuan Luca chet dan, carabinieri hmasawn dan chu a zir a. Chanchinbu hnena a lehkha thawn chhuah lo tura a remhriatna chu a ngaisang hle a, sicily mipuite an inbiakpawhna pawimawh tak a tichat a ni. Mahse Colonel-in Montelepre mipuite- tisual leh sual lote ang khat renga a man ta phiar mai tih a hriat chuan, ngaihsanna chu huatnaah a inthlak ta a ni. A nu leh pate man an han ni leh a, Guilianno chu tualthah chak hial khawpin a thinur ta a ni.

camarata tlanga a pukah chuan Guilianno chu ni hnih tawp ruahmanna siamin a awm a, Colonel Luca sipai sanghnih chuang chungchang a hriatte a thlir let bawk a. A tlem berah sangkhat chu Palermo leh a chheh velah, a nu leh pate a chhan chhuah changin an awm a. A dang zawng chu Montelepre, Piani Dei Greci, san Giuseppe Jato, Particino leh coleone chheh velah an insawrbing a ni, heng khua te hi indonaa hman mai theih tur member ruk a ngahna hmun an ni.

Colonel chuan Palermo-ah hmunpui a insiam a, chutah chuan khawih theih a ni lo. A thlem chhuak ngei tur a ni.

[Loma hmar]

CHAPTER 23B

Guilianno chuana thinurna chu beih dan tur ruahmanna siam nan a her rem ta daih a. a pukah chuan Pisciotta chu kovin a ruahmanna chu ahrilh ta a. a hnuah chief dang te- Passatempo, Terranova, Corporal Silvestro leh Andolini te chu an tana hriat tur pawimawh chin theuh a hrilh leh bawk a.

Palermo-a Carabinieri Headquarters chu Sicily khawthlang lama sipai ho zawng zawng hlawh sem chhuahna hmun a ni a. Thakhata vawikhat chu sipai inbuna leh rambung hmunpuiah khauh taka ven bungraw phurhnain pawisa sem chhuah thin a ni. Sipai maltinte hlawh tur chu lehkha ip chhunga thun sa vekin, thingrem chhungah an dah a, chu chu America siam ralthuam phurtu truck chungah kalh khum tlat a ni bawk .

Truck khalhtu chuan pistol a keng a, a bulah chuan hlawhbuaipuitu chu rifle kengin a thu bawk a, truckin Palermo a chhuahsan hma hretah jeep pathum kawng en thlithlai tur an chhuak a, hetah hian mi pali theuh machine gun keng vekin an chuang theuh a, sipai rual phur motor-in zuiin hetah hian sipai 20 chuangin machine gun leh rifle te nen an infam tup a ni. Pawisa phurtu truck hnungah chuan car pahnih mi paruk chuannain a zui a, chutah chuan inbiakpawhna radio a awm ve ve a, enge maw thulha Palermo emaw barrack hnai ber emaw biakpawh a, tanpuitu dil vat nan a tih a ni. Chutiang sipai rual chu bandit ten an suam a rinawm loh hle a, mahni inthah tumna mai a ni dawn a ni.

Hlawh phurtu rual chuan zing hmatakah Palermo chu a chhuahsan a, Tommaso Natale khuaah chawl phawtin, chuta tang chuan tlang kawngah Montelepre lam panin a kal leh ta a ni. hlawh semtu leh vengtu ho chuan hun an duh rei dawn tih hriain hmanhmawh takin an kal a, tlan pah chuan motorah salami te chhangte an eiin wine te an in a. fiamthu nen an nui bawk bawk a, Jeep khalhtute pawh chuan an silai chu jeep chhuatah chuan an dah mai a. Mahse montelepre thlen hma tlang tawp ber chhip an thlena, montelepre lam pana an chhuk dawn lai tak chuan an hmaah chuan beram rual tam takin kawng an lo hnawhkhat hmuk chu an hmuhin mak an ti hle a, hmahruaitu jeep te chuan beram rual zingah chuan lutin beram vengtu inthuam tawp tak takte chu an au tuarh tuarh a. Sipai ho chuan Montelepre thlen vat vat a barrack chhung luh vata chaw lum ei te, kekawrte nen chauha khuma mut emaw card khelha an chawhnu chawlh hman an duh tawh hle a ni. Hlauhawm awm tur chu a ni lo, montelepre-a barrack-ah chuan Colonel Luca hote mi zanga lai an awm a, an hnung lawkah chuan pawisa phurtu truck chuan beram rual awmna chu a rawn lut mek a, mahse an hmu theih lohah chuan chulai chu ngawi duk siin kalna tur kawng a kaw miah lo tih chu a ni.

Beram vengtute chu kawng tikaw turin an buai hle a, motor ten horn an pek tuarh tuarh pawh chu hre awmin an awm lo. Sipai ho chuan au elin an lo nuihzat vel a, anchhia an lawh thul. eng thil mah a la thleng lo.

Chutah beram vengtu zinga miparukte chuan truck chu an hnaihchilh thut a, chung zinga pahnih chuan an jacket chhung atanga silai phawrhin truck khalhtu leh hlawhsemtu chu car atangin an pet chhuak a, vengtu dangte pawh an silai an chhuhsak nghal bawk. A dang palite chuan hlawh awmna thingremte chu an vawrh chhuak nghal bawk a. Passatempo chu an hruaitu a ni a, a hmel bumro zet leh a taksa rorum zet chu silai kaw hmawr an hlauh ang thovin vengtute chuan an hlau a ni.

Chutih lai chuan chu lai awih tlanah chuan bandit rual silai keng an lo lang ta tuam tuam a, a hnung lama awm car pahnihte ke chu silai kah avangin a puakkeh tawh a, chutah Pisciotta chu car hmasa zawk hma takah chuan a rawn ding ta a. “Muangchangin in ralthuam tel lovin lo chhuk ang che u, zaninah Palermoah chaw in ei leh hman ang, in lak pasathat tum lem suh u, kan lak tur hi in pawisa a nih loh hi.” tiin a au hlawm a.

An hma lam hla feah chuan sipa [hur motor leh jeep te chuan tlang bulthut chu thleng tawhin, an hotu officer-in an hnungah tumahin an rawn zui lo tih a hriat chhuah chuan Montelepre an lut dawn ruai tawh a. Tunah chuan beram rual tam zawk chu kawngah chuan an lo awm tawh a, convoy dang lak atangin chu chuan a la hrang ta nawlh a ni. A radio chu phawrhin jeep pakhat chu kira han ngaihven turin a tir a, a dang chu zaizirin kawng sira ding turin thu a pe bawk a.

jeep chu a lo kalna lamah chuan a let chho leh ta a, kawng chanve vel a chho tawh ang tihah chuan machine gun leh rifle mu a rawn sur ta a, mi palite chuan silaimu thahnem tak an dawng nghal a. khalhtu awm ta lo chu jeep chu a hnung zawngin motor dang awmna lamah chuan lir thla leh ta a.

Carbinieri sipai officer chu jeep atanga lo zuang chhuakin sipai phur motor a chuang ho chu chhuk vata tan hmu siam turin a au tuarh tuarh a. Pawisa phur truck erawh an tan chhanchhuah ngaihna a awm tawh lo, tlang letliam lam daiha awm a ni a, Pawisa an iptea thun mektu Guilianno-a pawlte ho pawh chu kah ngaihna a awm hek lo. Guilianno-a hote chu tanhmun sang zawka awm an ni a, puak thei an kawl ngei a rinawm bawk si a, an tih theih awm chhun chu tanhmun siam a, a rem dan anga kah ve tawp mai chu a ni.

Montelepre maresciallo chuan hlawh semtu chu a lo nghak reng a. thla tawpah hi chuan pawisa a tlachham tawhin, a hote thenkhat ang bawkin Palermo-a restaurant changkang taka thiante leh nula nena zanriah kil dun a nghakhlel hle tawh thin a ni. Silai ri a hriat chuan a chiai kher mai. Guilainno chuan a sipai patrol chu chhunengah lehnghal a bei ngam lul lo vang, chubakah Colonel Luca sipai zanga lai helai hmunah an awm lai ngat phei chuan.

chutihlai tak chuan Maresciallo chuan thilpuak ri rin tak chu Bellampo barrack gate-ah chuan a hre ta a. A hnung lama armor car awm pawh chu puakin par a chhuang nghal hluah mai bawk a. Castelvetrano leh trapani panna lam kawng atanga Machine gun lian chi puak ri tawk tawk chu maresciallo chuan a hre zui nghal zat bawk a. Khaw pawn, tlang bulthut atanga silai te deuh zawk riin a zui nghal zat bawk. Montelepre-a sipai patrol a tirhte chu barrack lam pana an lo tawlhkir rawk rawk chu a hmu bawk a, a then chu jeepin an lo kal a, a then thung chu kein, an nunna atana an rawn tlan vawn vawn chu a hmu a. Guilianno chuan a chakna zawng zawng chu colonel Luca sipai zanga rual chungah a rawn hmang ta ti chu a lang chiang telh telh a.

montelepre chung tlang atang chuan Guilianno chuan a enhlatna hmang chuan sipai ho hlawh tur suam a nih lai chu a lo thlir reng a, degree sawmkuaa a inher chiah chuan kawtthlera sipai patrol a hoten an beih lai te, bellampo barrack an beih te leh kar kawnga carabinieri patrolte tawh chilhna te chu a hmu thei a. A chief-te chuan an thawk tha takzet a ni. Passatempo leh a hote chuan pawisa phur motor atangin pawisa chu an la tawh a. Pisciotta chuan convoy hnung lam chu a tukzal der tawh bawk a. Terranova, mi tharte hruaitu chuan bellampo barrack leh sipai patrol a bei mek bawk. cutah andolini, Fria davalo ngei mai chuan thawn thutna tur thil a buaipui mek bawk a.

Palermoa-a hmunpuiah chuan colonel Luca chuan pawisa phur motor a hloh chanchin chu a lo hria a, amah ang lo takin a dam ruih mai. Mahse chhungrilah eGuilianno finna avang leh a sipaite chet vel dan engtin nge a hriat theih tih ngaihtuahin a thin a so but but a. Inrawknaah chuan carabinieri pali an thi a, indona hmun dangah chuan sawm an thi bawk a ni.

Captain Perenze-a kawngkaa a rawn tlan luh lai chuan hliam report ngaithlain colonel Luca chuan phine a lo la vuan reng a. Captain chuan bandit thenkhat chu an hliamin pakhat a thi a, indona hmunah chuan hnutchhiah a nih thu a dawng zo chiah a. mitthi chu a taksa-a lehkha pawimawh awm atang leh Montelepre mi pahnihin an sawi dan atangin tu dang ni lovin Guiliano ngei a ni tih a rawn thlen a ni.

A fimkhurna leh khang a inbuatsaihna zawng zawng theihnghilhin colonel chuan hnehna avanga klawmna sang tak a nei nghal a. Sipai nun chu hnehna roupui tak neih te, tih dan kawnghmang pu tak tak te a ni a, mahse chu chu silaimu leng vakin tihpalh thil thua tawn palh mai maiin a rawn khingthla ta a, suamhmang ropui tak chu silaimu lenngvak satliahin a tawng ang maw? A fimkurna rilru chu a lo let leh ta, chu vanneihna chu a tha mah mah a ni. Thang a ni maithei, a lo ni nih chuan a inbarh lut anga thangkamtu chu a leh awh hlauh mai ang.

Colonel luca chu a inbuatsaih ta a. rang taka kal maithei tur sipai rual, hneh theih loh tur khawpa thuam chu. Armor car a hmasa ber a, a hnungah silai kahtlang theih loh carah Colonel chu chuangin, a bulah Inspector Velardi chu a thu bawk a, a ni hian mitthi chu hriat a nih theih nana pui tur anga insawia kal ve a ni a, a takah chuan chu mitthi chuan thuthlung bu a keng lo a ni tih tichiang turin a ni mah zawk. An hnungah chuan sipai phur motor, a chunga chungte inring renga awmin a zu bawk a. Jeep sawmhnihin hmalam en thlithlai turin an kal hmasa bawk a ni. Montelepre-a sipai ho chu khaw pawhtu kawngte veng tur leh tlang lam atanga lo chhuknate veng tura thupek an ni a. ke a kal sipai rualin, kawng pui sir tawn tawn chu an veng reng a ni.

Colonel leh a quad chuan darkar chanve chiah Montelepre thlen nan hun an hmang a. Lo tibuaitu an awm lo, an thawk rip bawk a, suamhmang tan chuan beih chi an ni lo a ni. mahse colonel chu thu hrilhhaithlak takin a lo hmuak thung a ni. Inspector velardi chuan ruang, tuna bellampo barrack-a ambulance-a awm mek chu Guilianno a ni lo thei mai thei a ti a. Silaimu chuan a hmel chu ti chheh hneh viau mahse Inspector bum tur chuan a tha tawk tlat lo. Montelepre khaw mi midang, ruang en tura an tihluihte pawhin Guilianno a ni lo an ti a, thang chu a lo ni ngei a ni. Guilianno chuan Coonel Luca chu he hmunah vengtu nen lo kalin, lo lambun theih a inbeisei ni ngei tur a ni. Colonel chuan inven lawkna nasa tak neih tur a ni a ti a, mahse Palermo-a an hmunpuia kir leh vat a duh a; Rome hnena chu mi nia thil thleng chu amah ngeiin hrilh a duh a, chubakah Guilianno thi anga sawi chu a put chhuak lo a ni tih te nen. A kir leh lamah lambun tawk lo tura a sipai rualte a tirh vek hnuah, a hma lama jeep pakhatah chuangin a kal ta a, Inpector Velardi pawh a bulah a chuang ve a.

Colonel hmanhmawhna chuan an pahniha nun chu a chhanhim ta a ni. Palermo an thlen dawn hnaihah chuan, Luca chuanna car hmasa kha a laiah a tlan a, thil puak ri ring tak a lo chhuak ta a ni. Luca car chu boruakah feet sawm laia sangin a invawrh a, chu tlang pangah chuan alh hluah hluah chugin a tla darh ta nuaih a ni. Sipai phur motor a hnaih deuha mi chu mi pariat an thi a, m 30ah sawmpanga lai an hliam bawk a ni. Luca cara chuang officer pahnihte chu an darh hneh zet mai.

Colonel luca an chanchin tha lo chungchang Minister tezza ahrilh lai chuan, hmun pui lama sipai sangthum la awm te chu Sicily-a thawn luh a dil nghal a.

Don Croce chuan heng inrunna hi Guilianno-a nu leh pa alermo jail-a an tan chhung chuan a awm ren ang tih a hre mai a. An chhuah theih nan ruahmanna a siam ta nghal a.

Mahse sipai dang rawn luh belhna chu a dang thei ngang lo a ni. Sipai sanghnih rual chuan Montelepre leh a bul vel an luah nghal a. Chistian Democratic sorkarin thuneihna a pek angin Colonel trezza chuan Montelepre khua leh palermo huam chhunga Guilianno pawl nia rinhlelh mi zasarih lai chu thu zawhfiah atan a man khawm bawk a. Nitlak atanga zing khawvar thlengin curfew puan a ni a. Mipuite chu che thei lovin an inah an awm a, zin mite chu phalna bik an neih loh chuan jail lamah thawn an ni nghal thin. Chu lai bial pumpui chu sorkar siam hrehawmna chuan a tuam ta hlup mai a ni.

Don Croce chuan buai phili tak chungin Guilianno lama tuifawn chim chin sang mek chu a lo thlir reng a.

[Loma hmar]

CHAPTER 24A

Colonel Luca lo kal hma chuan, Guilianno chuan a duh hun hunah Montelepre a lut thei a, Justina Ferra chu a hmu fo thin. A chang chuan Justina chu Guilianno te inah thuthawn hrilh tur emaw Guilianno-an a pa oawisa a pek lawm tur emawin a kal thin a. Palermo kawtthlera a nu leh pate nena an kal lai Guilianno chuan a hmuh hma chuan hmeichhe hmeltha takah a lo thang chho ta tih a hre mai lo. Kut atana thil pawimawh Montelepre-a awm ve lo lam turin khawpuiah chuan an kal a. Guilianno leh a hote chu an thil mamawh lam turin an kal ve bawk a ni.

Guilianno chuan thlaruk vel lai chu a hmu tawh lo a, chumi chhung chuan a lo thang hmanin a zen thlarh hman a. Sicilian hmeichhia tur chuan a sang hle a, a ke sei thlarh chu a pheikhawk ke artui sang lei thar nen chuan a inhmeh hle. Kum 16 chauh a la ni a, mahse a hmel leh pianhmang chuan Sicily ram mawina a keng tel a, nula puitling chiah chiah a ni tawh mai. a sam dum dar vaw siau mai chu hair-comb in a kilh bet a. Mitmu lian kel kawl a ni a, a hmuia confi tak hmel lo lang chu a tleirawlna phatsantu ber chu a ni mai awm e. Kawr var, a hmalama ribbon sen uaithla a inbel bawk a.

A hmel chu ngainatawm hliah hliah a niin Guilianno chuan rei tawk fang a thlir veng veng a. Cafe bang nei lovah hian thuin a bul dawhkanah chu a hote chuan an kil bawk a. Justina chu a nu leh pate nena an lo kal chuan an rawn hmu a. Justina pa chuan hre awm hmel a lan tir lem lo. A nu pawh chuan hmun dang a en vat a, Justina chauh chuan a rawn en a ni. Rawn chibai em tur chuan sicilian a ni tlat, mahse a mitah tak rawn enin , a hmuiah chuan nu hmel a pu deuh a. kawttthler ni sa rumrut hnuaiah pawh chuan zanthim hnuaia eng de zeuh ang maiin a sicilian tleirawl hmelthat leh mawina chuan a ti langsar larh mai a ni. outlaw a nih hnu hian Guilianno chuan hmanaihna hi a ring lem lo. A ngaihah chuan hmangaihna chu inpekna leh phatsan nihna tura chi kui tiahna mai niin a ngai, mahse chu tih lai chuan a la tawn ngai reng reng loh a tawng ta tlat- Mihring dang hmaa thingthia inpumpek chakna leh a bawih ni tura intiam chakna chu, chu chu hmangaihna a ni tih ahre lo mai a ni.

Thla a liam hnuah pawh chuan Palermo-a kawtthler nisa hnuaia Justina Ferra ding lai hmel chuan Guilianno thinlung chu a luah ta reng a. L:a Venera nena an zan hun nuam tak a neih tawh ngai loh avanga sex lama tuihalnaah a ngai mai a. Chutah a ngaihtuahnaah chuan Justina chu hmangaihna chenpui ringawt lo deuh, a aia nasa zawkin a suangtuah tih a inhre chhuak a. Colonel Luca sipai sanghnih zet an awm chungin montelepre-a luh ruk dan te pawh a ngaihtuah thleng hial. A rilruah chuan thil hlauhawm tak a inmung mek niin a hria.

Heng thilte hi atthlak mai mai a ni. A nunah chuan kawng hnih chiah hmabak a nei a- Carabinieri te thaha awm emaw America rama inhumhimna zawn chu a ni. He hmeichhia hi a suangtuah zui reng a nih chuan America chu theih loh sa a ni mai. A rilru atanga a dahbo a ngai a ni. A lo thlem thlu theia a hruai bo a nih chuan, a pa chu a hmelma hlauhawm tak a ni nghal mai, chungte lah chu a ngah sa nasa mai si a. Hmeichhe pawisawi lo thlem thluk a chin avangin Pisciotta pawh talhfiak nen a lo hrem tawh a, kum kaltaah pawh khan pawngsual vangin a mite pathum a tihlum bawk. Tuna Justina a suangtuah dan chu hlim takin awm se, hmangaih ve se, ngainain amah a inhmuh ang hian hmu ve se tih chu a ni. A mitmeng chu hmangaihna leh inrintawnnain khat se a ti a ni.

Mahse a rilruah chuan thil tih dan tur a siam fel chu a ni deuh der mai. A chet dan tur chu a ngaihtuah fel tawh a ni. Chu hmeichhia chu a nei mai ang. A ruk thei ang berin, a nu leh a pate lo chuan mi dangin an hre lo ang, ni e, Aspanu leh a chief thenkhat te chuan an hriat a ngai bawk ang chu. Inhmuh nana him tawk a nih veleh tlangah an rawn hruai ang a, tlangah chuan ni hnih khat te chu hun an hmang dun thei ang chu. Guilianno-a nupui nih chu a hlauhawm viau ang a, mahse America rama rang taka a kal theih nan ruahmanna a siam ang a, amah pawh a tlan chhuah theih veleh a zui ve nghal bawk ang. Harsatna pakhat a la awm, eng tin nge Justina chuan a ngaih ve ang?

Caesero Ferra chu Guilianno-a pawla a ruk tea kum nga chhung tel tawh a ni a, thuruk leh pawimawh khawn khawmtu a ni a, ralbeihnaah a tel ngai lo. Amah leh a nupui chuan Guilianno-a nu leh pa chu an hmelhriatin thenawm mai, an atanga In sawmna vela awm an ni a. Montelepre-a mi tam tak aiin lehkha pawh a ti thei a, lo neih ringawtah a lungawi ve lo. Justina naupang a nih laia a pawisa a tih bo leh Guilianno-an a dang a pek a, a venhimna hnuaia awm an ni tih hrilhna lehkha a pek khan, Caesero Ferra chuan Maria Lomberdo chu va tlawhin Guilianno-a rawngbawl turin a va inpe a ni. Palermo leh Montelepre-a thu pawimawh- Carabinieri ho chet kual dan te, Guilianno-an rukbo a tum sumdawng hausate chet vel dan te leh Police ho hnena thu rawlruktu nihna te khawn khawmin a pe chhawng thin. Heng rukbona atang te hian chan a nei vein, Montelepre-ah khualbuk tereuhte a hawng ve ta a ni. Silvio Ferra sipai atanga a lo kir a mipuite tana thawktu a rawn nih khan, a in atanga chhuak turin a ti a, a rin dan a pawmpui lo ni lovin, chhungkaw tana hlauhawm a awm a hlauh vang zawk a ni. Ferra chhungkua venghim tura a intiamna kha Guilianno a hriat nawn tir leh a, Guilianno chuan Silvio Ferra venghim tur khan theihtawp a chhuah ta reng a ni. Silvio thah a nih khan phuba lak tiamtu chu Guilianno bawk a ni.

Ferra chuan Guilianno chu a dem lem lo, Portella della Ginnestra hmuna inpawng thahnain Guilianno a tihbuai zia te, a tuar zia leh hrehawm a tih ziate a hria a ni. Ferra chuan Portella della Ginnestra hmuna thil thleng runthlak tak kha a kuma a kum a chhui zui a. Passatempo hote khan an Machine Gun kha an lek hniam lutuk em ni? Nge Passatempo, thisena tuihal nia hmingthangtak chuan, a nuam a tih vangin a che ta vak zawk? Nge ni a Guilianno-a pawlte atang ni lo, friends of friends atang emaw security police atangin emaw machine gun nena lo beitu dang an awm zawk em ni? Caesero chuan Guilianno tih loh chu a rinhlelhna atangin tumah a la thaibo lo, guilianno chu thiam lo ni se, a chenna khawvel chu a chhe vek dawn tawh tlat a ni. A fapa a hmangaih ang chiahin Guilianno chu a hmangaih a, a naupan lai atanga a hriat tawh a ni a, rilru kawi emaw, kawlhrawnna a tih lan a la hre ngai lo.

Tichuan Caesero Ferra chuan a mit leh a beng a chhi ta kar a. An pawl zinga member ruk, Colonel Luca-an a man bangte chu in tur leisakin a titi pui fo va, chubakah khawchhunga friends of friends memberte leh a khualbuka lo kalte inbiakna te pawh a hmaih lo. Zan khat chu nui hawk hawk chunga ‘Ramsa’ leh ‘Rambuai pa’ an tih te chungchang an sawi a, Don Croce-an chung mihlauhawm pahnihte chu a hnena thu hrilh rutu angel-ah a lo chantir dan te chu. Ferra chuan a sicilian rinhlelhna fing tak chuan a han ngaituah chhunzawm a, a inzawmna a hmu ta a ni. Passatempo leh Stefano Andolini chuan Don Croce an va hmu tih chu. Passatempo chu, ‘ramsa ang maia tawrawt’ tia koh a ni fo va, ‘Fra Diavalo’ tih pawh Stefano Andolini hminglem a ni. An hmunpui atanga hla tak, Villaba-a Don Croce-a inah chuan eng nge an va tih? A fapa tleirawl chu Guilianno-te inah chuan thuthawn hmanhmawhthlak tak nen chuan a tir ta nghal a, ni hnih hnuah chuan Guilianno nena an inhmuhna hmun tur chu hrilh a ni ta a ni. Chungte chu Guilianno a hrilh a, Guilianno chuan engtin vak chhang lovin thup tlat turin a ti thung a. Ferra chuan engmah a hriat belh lo. Tunah thla thum hnuah Guilianno hnen atangin kohna a dawng a, chanchin kal zel chu hriat theih a inbeisei a ni.

Guilianno leh a pawlte chu tlang pilril tak, Luca sipaite thlen phak lohna hmunah an awm a. Ferra chu zanah chhuakin Pisciotta chuan inhmuhna hmun turah chuan a lo hmuak a, camp an thlen chuan khua a var ruai tawh a ni. Guilianno chu uluk takin a lo inchei a, hei tluk hian a hmeltha thei chuang tawh awm lo ve.

Pisciotta chu kal tir a nih hnuah an pahnih chuan an thu dun ta a. Guilianno chu awm nuam lo ni awm takin a lang a, mahse pangngai tak hian, “Thu pawimawh tak i rawn ken avang khan ka lawm hle a ni, chhui zui zel a niin tunah chuan a dik tih hriat a ni tawh a, a pawimawh hle a ni. Mahse mahse ka koh nachhan che chu thil dang daih a ni, i rin loh lam daih a ni ang a, i i lungnih loh loh hram ka beisei.”

Ferra chu a phu deuh zawk a, mahse hawihawm takin, “Min ti lungni lo ngai lovang, i lakah ba ka ngah em mai.”

Chutah chuan Guilianno chu a nui ta a, tlang taka nuiin, Ferra-an a naupan lai atanga a hriat than tak a ni.

“Uluk takin ngaithla rawh,” Guilianno chuan a ti a, “Nangmah biak che hi ka ke pen hmasak ber a ni a, i pawm lo a nih chuan a bak ka sawn lo vang. kan pawla hotu ka nihna ang ni lovin, Justina pa i nihna vang chauhin biak che ka duh a ni. A hmeltha tih chu i hria a, i kawngkhar bula khawpui tlangval hmeltha tak tak rawn lengte pawh i hme thin em em ang. A hlutna pawh i vawnhim sak tih ka hria. Ka nuna a vawikhat nan hetiang ngaihtuahna hi ka nei a ni tih hre bawk la, i fanu hi neih ka duh a ni. I phal lo a nih chuan ka sawizawm tawh lo ang a, ka thian i la ni reng thovin i fanu pawh ka venhimna hnuaia awm a la ni reng tho ang. I remti a nih chuan i fanu chu he thil hian a tilawm em tih ka zawt ang a, a lo duh loh a nih chuan chu chu a tawpna a ni ang.”

Caesero Ferra chu sawi tur pawh hre loin a awm reng a, chutah bah nuaihin, “Ka han ngaihtuah phawt ang e,” a ti a. A ngawi ta veng veng a. A lo tawng chhuah leh chuan zah em em hian, “He khawvela mi zawng zawng ai pawh hian ka fanu pasal tur chuan ka duh ang che, Silvio, a thlarau chawl hahdam se, pawhin min pawmpui ngei ang,” sawi harsa a ti leh hle a, “Ka fanu himna ka ngaihtuah a ni, Justina chu i nupui a nih chuan, Colonel Luca chuan mana tantir nan a hmang ngei dawn a. friends ho lah i hmelma an ni tawhin a chungah thil tha lo an thlen tir maithei bawk a. America-a i tlan bo ngei a ngai a, chuti lo chu tlangah hian i thi mai dawn si. Naupangtea hmeithai ni tur chuan ka phal lo a ni. Tlang taka ka sawi avangin min ngaidam ang che, mahse i tan nun a harsa tawh em em a chu chuan min ti lungngai a ni. Inneihna chuan i thihna a thlentir thei a ni. Ka ngainat vang che leh zah vang chauh chein tlang takin ka sawi a nih chu. I hma lam hun chiang taka i hriat leh uluk taka i ngaihtuah chian hnu atan he thil hi chu kan dah that phawt a ngai a ni.” a sawi zawh chuan inveng ru takin Guilianno chu a tilawm lo em tih a en a.

Mahse a tilunghnur ringawt a, tlangval naupangte hmangaihnaa hrilhhai taka siam a awm ang hian a ni. “Ka hnial a ni lo ania Turi,” a ti a.

Guilianno chu a bu nghat a, “Heng te chu ka ngaihtuah vek tawh a ni. Ka ruahman dan chuan i fanu chu a ruktein ka nei ang a. Inneih serh leh sang chu Abbot Manfredi-an a buaipui ang. Hetah tlangah hian kan innei ang a, hmun dang chu ka tan a hlauhawm tlat a ni. Nang leh i nupuiin i fanu in rawn zui theih a, inneih inhriatpui theih nan ruahmanna ka siam ang a, ni thum ka bulah a awm ang a, chutah i inah ka rawn dah leh mai dawn a ni. I fanu chu hmeithai a lo nih chuan nun thar bul tanna tur khawp sum a nei ang a, a hma lam hun i hlauh pui a ngai lo ang. i fanu hi ka hmangaih a, a damchhunga ven him ka duh a ni. A chhe ber pawh lo thleng se a hma lam hun chu ka ruahman sa vek ang. Mahse keimah ang neih chu risk a sang khawp mai a, pa i nih angin hnial turin dikna i nei a ni.” a ti a.

Caesero Ferra rilru chu a khawih hle. he tlangval hian tlang tak leh awlsam takin a sawi a ni. Guilianno kuah tur chuan a tho a, “Duhsakna ka hlan a che,” a ti a, “Justina chu ka lo bia ang.”

A kal hma chuan Ferra chuan a thu hrilh a lo tangkai avanga a lawm thu a hrilh a, Guilianno hmel lo danglam ta daih a hmuh chuan mak a ti hle. A mit chu a meng zau sawt niin a lang a, hmeltha tak kha marble chang ang khakin a lang a ni.

“Stefano Andolini leh Passatempo chu kan inneihnaah ka sawm ang e,” a ti a. Inneihna chu a ruka tih a nih dawn chuan chu thil chu mak tak a ni tih Ferra chuan a hnuah chauh a hre chhuak a ni.

[Loma hmar]

CHAPTER 24B

Sicily-ah chuan hmeichhe tan vawikhat mah a fala a la hmuh ngai loh nena inneih chu thil thleng ngai lo a ni lem lo. Hmeichhia te chu an in kawta an thutin, pasal la nei lo chu chutiang chuan an inpho lang thin a, kawtthler lam an hawi vawlh vawlh ngai lo, chutiang a nih loh chuan lepchiah leh mihur anga ngaih an ni mai thin. An in bula rawn kal mipate chuan Biakinah a nih ngawt loh chuan biakna hun remchang an nei ngai lo. Biakinah pawh chuan Virgin mary lim leh an nute mitmeng fim tak hnuaiah a la ni zui. Mipate chuan nulate lan dan emaw reilote an inbiak zawkna emaw atanga an hmangaih takzet a nih chuan, ziaka an bawhzui a ngai thin. lehkha thawn chu uluk taka phuaha a duhna puang chhuak turin. hei hi thil khirh tak a ni a, a chang chuan a ziak thiam bikte rawih an ni thin bawk. Chhiar sual palh leh a thluk a dik loh palh vaih chuan inneihna lam aiin anmahni sunna hman a ngai mai thin. Chuvang chuan Guilianno-an justina pa hnena ngenna a thlen pawh chu thil awm lo a ni lem lo, Justina hnenah a duhna engmah la tilang miah lo pawh ni mah se.

Caesero Ferra chuan a fanu, Justinain a chhan dan tur chu ngaihtuah buai tul a ti lem lo. Hmeichhe naupang mai a nih lai pawhin, “arabinieri lak atangin Guilianno venghim ang che,” tiin a tawngtaina a khar ziah thin. Maria Lombardo hnena thu thawn va dah pawh a phur thei hle. La Venera ina leiverh chungchang hmuhchhuah a nih thu a rawn rik chhuah khan, Justina chu a thinrim nasa kher mai. a tirah chuan a nu leh pa chuan hmeichhia leh Guilianno-a nu leh pa an man vanga thinurah an ngai a, mahse thikna avanga thinur a ni th an hre leh a ni.

Chuvang chuan Caesero Ferra chuan a fanu chhanna chu a ring lawk thei mai a. Mahse chanchin a hriata Justina-in a lo dawnsawn dan chuan a thawng deuh. Chimawm zetin, thlem thlu tura ruahmanna lo siam lawk ang maiin leh Guilianno chu tlawm ta ang maiin a nui a ni.

Tlang pilril takah chuan Norman kulh ram tawh, kum 20 zet luah tawh loh chu a awm a. Chutah chuan Guilianno chuan inneih lawmna leh Honeymoon hman a rel a. Aspanu hnenah chu lai hmun chu lo buatsaih a, beih thut thil thua vengtu atan mi engemaw zat dah turin a ti bawk a. Abbot Manfredi chuan sabengtung hnuh tawlailirin Monastery chu a chhuahsan a, chutah tlang lamah zawn bawm hmangin Gilianno-a pawl ten an zawn a ni. Abbot chuan Guilianno-a nupui nei tur chu a pawmpui chiah lo, inchibai nana an inkuah zawhin fimthu hian, “ ‘Mahni chauha inkhel chu a chak lo ngai lo’ tih thufing kha i hre phawt ang chu,” a ti a.

Guiliann chu a nui hawk hawk a, “Mahse ka hlimna ka ngaihtuah ve a ngai alawm,” a ti a. Chutah Abbot-an a ngainat tak loneitu ten, sum siamnaa chhuanlam atana an hman fo chu a han belh ve zauh a, “I hria em, St.Joseph khan Apostol-te hmuihmul a ziah hma khan a ma hmuihmul a zit hmasa phawt asin,” Chu chuan Abbot nuih a ti za hle a, chutah bawm tetak te, lehkha pawimawh awmna chu hawngin Gulianno chu inneih certificate mawi tak, rangkachak rawnga inziak chu a pe a.

“Inneihna hi Monastery-ah chhinchhiah a ni ang,” a ti a, “mahse hlauthawng suh, tumahin an hre lo vang.”

Mo leh a nu leh pate chu a hma zanah an lo thleng tawh a, kulh-a pidan pakhat, tihfai sa vekah an awm a ni. Guilianno chuan a nu leh pate an awm ve loh avang chuan kim l a ti deuh hle a, mahse Colonel Luca hoten ngun taka an enthlak lai an ni bawk si a.

Aspanu Pisciotta, Stefano Andolini, Passatempo, Canio Silvestro leh Terranova te chauh chuan inneihna chu an hman pui a. justina chuan a zin thawmhnaw chu inneih kawr var, Palermo-a thui tir chuan a thlak a. Guilianno chu a han nuih a, ani chu a lo hamhaih vek thei hial a ni. Abbot chuan inneih inkhawm chu tawi fel takin a nei a, tichuan kawtzawl lamah chuan chhuakin chutah chuan dawhkan leh chairte bakah wine leh sa leh chhangte a lo awm sa thlap a. rang takin an ei a, mo leh moneitu tan no an dawm bawk a ni.

Abbot leh Ferra-te an let lehna tur chu a hlain kawng hlauhawm tak a ni a. Chulai vela carabinieri te lo kal hlauhthawnna a awmin, chu lai veng tura vengtu an dahte nen inkahna a awm maithei leh nghal. Abbot chuan kal vat vat a duh a, mahse Guilianno chuan a la chelh a.

“Vawiina i thil tih avang hian lawmthu ka hrilh a che,” Guilianno chuan a ti a, “Kan inneih hun a zawh veleh zahngaihna chungchang thil tih tur ka nei a, mahse i puihna ka mamawh a ni.” reilo vaklo chu zawitein an han inbia a, chutah Abbot chu a bu ta nghat a.

Justina chuan a nu leh pate chu inthlah nan a kuah a. A nu chu a tapin ngenngawl takin Guilianno chu a melh a. Chutah Justina chuan a beng bulah eng emaw a hrilh a, a nui ta hawk hawk a. Inkuah lehin a nu leh pate chuan an sabengtung chu an kal tir ta a .

Mo leh moneitu chuan an inneih zan hmasa ber chu kulh chhung mutna pindan pui berah chuan an hmang a. Chu pindan chu a ruak vek ni mahse mattress te, lukham, bedsheet leh rizai te pawh palermo atanga leiin dah vek a ni a. Batharoom lian tak mai, bath tub awm sa a awm a, tui erawh chu Guilianno an tuiluang lai atangin a thiar a. perfume leh inthiarnaa mamawh thil, Justinain a la hmuh ngai reng reng lohte pawh a lo chhawp sak a ni.

Saruakin a awm a, a tirah chuan a zakin a kutin a mal mal inkar chu a hup tat tat a. A vun chu a mam nalh hle a, a pian chu a zen thlarh nangin a hnute chu nula puitling ta angin a kawh lah thung. fawh a tum chuan tlemin a thlesawn deuh a, a hmui sir chiah a fawp thei a. Guilianno chuan dawhthei takin a nghak a, mipat hmeichhiatna lama a zei vang ni lovin, ral beih dan chungchanga a kawnghmang hriatnain a tih tir a ni zawk mah. A sam dum tak chu a hma lamah uaithlak tirin a hnute chu a hliah sak a. Chutah Palermo kawtthlera hmeichhe puitling anga a hmuh tak dan kha a hrilha, a hmelthat leh mawi zia thu nen.

Justina chuan a unaupa tana thuchah a rawn ken sak atang khan amah hmangaihnaah a tluk luh tawh thu te hrilhin, chu mi tuma hmana naupang pawisa a pek kha a ni tih Guilianno-an a lo hriat tawh loh avanga a thinur zia thute a hrilh a. Kum 11 a nih atangin zan tin a tawngtaisak thin thu leh chuta tanga a hmangaih tak thu te nen. chung thu chu Guiianno-an a hriat chuan a hlim kher mai. A sam chu a zut sak reng a, a ni chuan a kut lum tak chuan lo manin kut an invuan a, “Inneih chungchang sawipui tur chea i pa ka zawh khan mak i ti em?”

Ani chu a nui a, “Palermo kawtthlera min en dan ka hmuh hnu kha chuan ni lo ve,” a ti a. “Kha mi ni atang khan i tan ka lo inbuatsaih tawh a ni.”

Turi chuan a hmuiah a fawp a, chutah a mitah, a hnuteah a fawp thla zel a, a vun chu a novin a taksa lumna chuan a hmui chu a tikang dawn hialin a hria. A rimtui tak chuan a zel hneh hle a, he khawvel natnain a tihbuai loh, thihna rim nam miah lo chu. Chutah mal chu zutsakin a tisa chakna sosang tak avanga insum thei lovin a kapkarah a zen lut ta a, chutah chuan mak tih vangin a nui chhuak hawk a ni. Duhthawh tak, mahse dam deuh siin hmangaihna a chenpui ta a, ani chuan duat taka chul chungin a lo chhawn ve a, a tawpah chuan nawmna vawrtawp chu a rualin an chen dun ta a. tawng lovin, nawmna nasa tak avanga an te deuh that that tih loh chu thawm an chhuah lo, zankhuain hmangaihna chu an chen dun ta a. Vartianah chuan chau takin justina chu a mu ve ta hram a.

A ni thum ni, an hun tawp ber niah chuan tlang kar hla deuh taka silai kap ri chu an hre ta a, Justina chuan a hlauthawng hle a, mahse Guilianno chuan a thlamuan a. Khang ni thum chhung khan hlau hlawpa a awm theihna turin theihtawpin a fimkhur a. a ralthuam a keng ngai lova, chapelah a dah tha vek a ni. A fimkhurna a hloh ngai lovin, a hote pawh hmuh phak loha awm turin a ti vek a ni. mahse silai ri an hriat hnu deuh lawkah chuan Pisciotta chu a kokia sazupui pu chungin a lo lang a, chung ch justina hmaa theh phei pahin, “heng te hi i pasal tan lo chhum rawh, a duh ber a nih kha, i ti khawlo a nih pawhin sawmhnih lai ka la nei tho a nia.” nui chungin a ti a. Justinain a vun lipa a tihfai chhung chuan Guilianno chu a mitmei ta zauh a. Mipa pahnihte chu kal hrangin an thu dun ta a.

“Well, Turi,” Pisciotta chuan, “Kan nun thap nan chuan a hlu tawk tak meuh maw?” nui deuh chungin a ti a.

Guilianno chuan, “Ka hlim hle a ni, tunah chuan sawng sazupui sawmhnih lai i kah dan chu min han hrilh teh le.” a ti a.

“Luca sipai veivakte zinga pakhat an ni a,” Pisciotta chuan a ti a. “huam chin kan siamah kan lo tiding a, Armor car pahnih an ni a, pakhat chu kan rahpuah bomb-in a vawrh a, tuna i nupui tharin sazupu a rawh ang mai sawn an kang nasa ang chu. car pakhat zawk chuan a silaite chuan lung mai mai kapin Montelepre lam a pan ta a ni. zingah chuan an thiante ngaihvenin an lo let leh ngei ang, zanina in chhuah a ngai a ni.” a ti a.

“Vartianah Justina hruai turin a pa a lo kal dawn a ni,” Guilianno chuan a ti a, “kan inhmuhkhawmna tur kha i ruahman tawh maw?”

“Buatsaih tawh e.”

“Ka nupui a kal hunah,” ‘nupui’ tih a sawi lai chuan a dang a awk deuh a, Pisciotta chu a lo nui hawk a, guilianno pawh chu nui vein a chhunzawm a, “Khang mite kha chapelah lo hruai la, kan ching fel dawn a nia.” A han ngawi deuh a, “Ginnestra chungchang thu dik ka hrilh che khan mak i ti em?” a ti a.

“Aih”

“Zanriah kil turin i awm hman ang em?”

“In honeymoon zan tawp berah hian maw?” Pisciotta chuan a lu a thing a. “Mothar ei tur siam ei kawngah chuan fimkhur rawh tih thufing kha i hria alawm.” Pisciotta chuan thufing hluiin a sawi, thilsual tihna kawnga thurual pui tura thian thar rinawm loh theih dan a sawi chu a sawi chhawng a ni. Guilianno chu nupui nei lo tur a nih zia a sawilanna a ni.

Guilianno chu a nui a,, “Hen thil te hian rei tak a daih thei hleinem, nun thar atan kan inbuatsaih a ngai a ni. Naktuka kan tih tur kan tih zawh thlengin kan huam chin a him tih tichiang ang che.”

Pisciotta chu a bu nghat a. Justina eirawngbawlna lam chu hawiin, “A hmeltha kher mai, kan bul lawkah a thang lian a kan lo hre lo chu a nia. Mahse fimkhur rawh, a pain a thinram tih a sawi a nia, i silaite khawih tir hauh suh ang che.”

Chu pawh chu sicilian tawng mei nei mawi lo tak pakhat a ni a, mahse Guilianno chuan hre awm pawhin a awm lo. Pisciotta chu olive thing zingah chuan a pil bo ta a.

Justina chuan pangpar la khawmin burah a khawi a, dawhkanah chuan a dah a. Turi chuan a a hlauthawng deuh tih a hmu thei, silia ri vang kha a ni thei a, Pisciotta lo lan thut vang pawh kha a ni thei e. Inhmatawnin dawhkan chu an kil a, muangchangin chaw chu an ei a. eisiam thiam lo tak a nih lem loh hi, tiin Guilianno chuan a ngaihtuah a. Tin, chhang leh sa te, wine te chu a rawn chhawp zung zung bawk a, a nuin a zirtir tha hle nih hi. Tin ei a thei ve hle tih a hmu bawk a, bawrhsawm tak chu a ni lo tih a hriat. A thlir reng tih a hmuh avang chuan Justina chuan a mit ko a san ak a. Rawn nuihsak chungin, “I nu ei siam nge ka siam tui i tih zawk?” a ti a. Guilianno chuan, “I siam zawk mawle, mahse ka nu chu hrilh miah suh ang che.”

Zawhtein beisei nei taka an en ang hian a lo la en kiau a, “A nih leh La Venera siam angin a tui ve em?”

Turi hian nula tleirawl ngaihzawng a la nei ngai lo a, mak a ti deuh hle. Mahse a rilruah chuan zawhna lo lang leh tur a dap nghal a, a dawt lehah chuan La Venera nena sex an hman dun dan a ni leh ngei ang. Chutiang zawhna chu dawn a duh lo ang bawkin a chhanna pek a duh lem lo. La Venera lakah chuan he tleirawl laka a neih ang hmangaihna chu a nei lo tih a inhria, mahse La Venera chu zahna riau a la nei tlat.

Justina chu a nuih deuh suk a, ani chuan dawhkan tih fel pah chuan achhanna chu a lo la nghak reng a, “La Venera chu ei siam thiam tak a ni a, nangmah nena tehkhin chu thil fair lo tak a ni ang.”

A lu chungah chuan thleng a rawn thlawk phei fua a, chu tah za takin a nui ta hawk hawk a. Mahse Justina chu a inhnit faih faih tih a hmuh chuan, a kutin a ban a. Tlai ni tlak hnu eng rii riaiah chuan an ding dun a, a beng bulah chuan zawi tein, “Ka fiamthu a nih kha, khawvela ei siam thiam ber i ni alawm.” a nui hmel a hmuh lohna turin a nghawngah chuan a hmai a phum daih a.

An zan tawp berah chuan hmangaihna chen dun ai chuan tawng lamah an ram tang a. Justina chuan La Venera nena an chungchang a zawt a, a ni chuan hun kal tawh a nia theihnghilh mai a tul thuin a chhang a. Justina chuan eng tin nge an inhmuh thin ang tih a zawt leh a, ani chuan America lama a kal theih nana ruahmanna a siam mek thu leh a hnua a zui tur thu a hrilh a. Mahse chu chu a pain a hrilh tawh a, a hriat duh zawka chu America-a kal hmaa an inhmuh dan tur a ni. Guilianno chuan a tlan chhuak thei lo palh thei tih chu Justina rilruah chuan a lang miah lo tih a hmu thei a, Lungchhiat thlak takin an tawp thei a ni tih ngaihtuah tur chuan a la naupang deuh a ni. Justina-i pa chu vartianah a lo kal a. Justina chu a tawp nan Guilianno awmah a bei leh a, an kal liam ta a.

Guilianno chu kulha chapel awmah chuan a lut a, Pisciotta leh a chief dangte chu a lo nghak ta a. A nghah pah chuan chapela a thuhruk a ralthuamte chu a lo inbel fel vek a.

An inneih hmaa Abbot Manfredi nena an inbiaknaah, Ferra-an Andolini leh Passatempo te Portella della Ginnestra hmuna inpawng thahna a thlen hma ni hnihah khan Don Croce nen a ruka inhmuhna an neih a rinhlelhna chungchang a hrilh a. Abbot jnenah chuan a fapa a tina lovang tih a tiam a, mahse thudik a hriat a tul miau si a ni. Abbot chuan thil thlen dan zawng zawng chu a hrilh ta a, Turi rinlawk ang chiahin a fapa chu a hnenah a lo inpuang a ni.

Don Croce chuan Andolini hnenah Passatempo chu Viilaba-a inhmuh rukpui tura rawn hruai turin a lo ngen a. Mi pahnihte an inbiak chhung chuan Andolini chu pawna lo nghak tura tih a ni. Chu chu inpawng thahna thlen hma nihnihah khan a ni a. Kha thil thleng rapthalk tak hnuah khan Andolini chuan Passatempo chu a vehthlem ta a, Guilianno thupek kalh zawng leh mipuite pawng kah tur khan Don Croce chuan sum tam tak a pe nei tih a inpuang ta a ni. Passatempo chuan Andolini chu a vau bet a, Andolini chuan a pa, Abbot Manfredi tih loh chu tumah a hrilh ngam ta lo a ni. Manfredi chuan a ka chip tlat turin thu a lo pe a, kha thil thlen hnu kar khat chhung kha Guilianno chu thinurnain a khat a, hria ni se an pahnihin a tihlum nei ngei dawn a ni.

Guilianno chuan a fapa a tih nat loh tur thu chu Abbot chu a tiam nawn leh a. Guilianno chuan a thil tih tum dan chu Pisciotta hnenah a hrilh a, mahse Justina Monteleprea a kir leh hnu, honeymoon an hman zawh hnuah chauh a ni ang. Moneitu a nih hmaa chutiang thil tih chu a duh lo a ni.

Tunah chuan Norman ho kulh rama chapel awmah chuan a lo nghak ta a ni. Maicham chhe bang ngheng chuan a lo ding a, chutiang chuan Pisciotta-an a chief-te a rawn hruai chuan a lo dawngsawng a ni. Corporal chu Pisciotta-an a lo hrilhfiah tawh avangin Passatempo leh Andolini hmachhawn thei turin a insiam rem a. Maicham bula Guilianno hmaah chuan chu mi pahnihte chu hruai an ni a. Terranova, engmah hre ve lo chu chapel lung thutthlengah chuan a thu a. Zan rei tak thleng chulai huam chhung ven hna a kaihruai a, a chau hle a ni. Guilianno chuan Passatempo chunga a thil tih tur chu midang reng reng a hrilh lo.

Guilianno chuan Passatempo chu ramsa hlauhawm tak ang a nih zia a hria a- midangin an hriat chuan a bul vela thil inthlakthleng chu a man vatin hlauhawm rim a hre vat mai dawn a ni. Guilianno chu nidanga Pasatempo laka a fimkhur ang thovin a fimkhur reng a. Amah hlat thei ang berah a dah fo thn. A nihna takah chuan Passatempo mawlna chua ngei em avangin Trapani bul lam thunun turin a tir daih a ni. Thu rawlruktu tihlumtu atan te, ‘an mikhual sawm’ khirh deuh hlek te tlanna sum an pek hma zawnga vautu atan te a hmang a. passatempo an hmuh ringawt pawhin mitangte chuan an hlau a, inbiakna an tifel zung zung thin. Chu chu a la tawk lo fo a nih chuan Passatempo chuan anmahni leh an chhungte chunga a tih dan tur, hlimpui zawk niawm fahranin a hrilh ta thin a, chung ‘mikhual’ te chuan a rang thei ang bera chhuah an nih theih dan an ngaihtuah ruai thin.

Guilianno chuan Passatempo chu a machine pistola tin chungin, “Kan inthen hmain kan bate kan tlak tur a ni, ka thupek zawm lovin, Don Croce a hnen atangin Portella della Ginnestra hmuna mipui te that turin pawisa i dawng a ni.” a ti a.

Terranova chuan ama himna ngaihtuahin chik zetin Guilianno chu a en a, Guilianno chuan tunge dik lo tih hmuh chhuah a tum a ni maithei. Amah chu rinhlelh a ni maithei bawk, amah inven nan a chet ve pawh a tul thei a ni. Mahse Pisciotta pawh chuan a silaiin Passatempo chu a tin ve ta a.

Guilianno chuan Terranova hnenah, “Nang leh i pawlte chuan kan thupek in zawm tih ka hria, mahse Passtempo chuan a zawm lo a ni. i nunna pawh a ti derthawng ve a ni, thudik hre chhuak lo ni ilang chuan, in pahnihin ka tihlum ang che u. mahse tunah chuan amah nen kan chinfel a ngai ta a ni.” a ti a.

Stefano Andolini chu che hlek lovin a awm a, a tana khuanu ruatah chuan a innghat leh tawp a. Guilianno lakah chuan a rinawm tawp a, Pathian ringtu ten Pathian chu anmahni tichhe duh tu a ni lo an rin loh a, Amah chawimawi nana thil sual an tih ang hian. Tihnat a ni lo ang tih chu a ring bur tawp a ni,

Passatempo pawh chuan chu chu a hria a, ramsa thil hriatlawk theina nei ang deuhin a thihna chu a hnai tawh tih a hre thei. Ama tawrawtna chauh lo chuan a chhan him thei lo tih pawh a hria, silai pahnihin a tin reng si a. Hun chelh khawtlai deuh a, bei nge sei run dung tia beih pawp a ni mai. “Stefano Andolini-an thu thawn leh pawisa min hlan a ni- chhiar tel ve rawh,” a ti a; Andolini-an amah inven nan chet a rawn thawh ang a, chutah chuan ama tan chetna kawng a inhawn a beisei a ni.

Guilianno chuan Passatempo hnenah chuan, “Andolini chuan a sualna chu a puang tawh a, Machine Gunah khan a kut a nghat ve lo. Don Croce chuan keimah min bum angin a bum ve mai a ni.” a ti a.

Passtempo chuan chiai zetin, “Mahse m za chuang ka that tawh a i sawisel ngai lo, tin Portella thil thleng kha kum hnih kal ta a mi daih a ni tawh a. Kum sarih kan awm ho a, kha chiah kha a ni i thu ka la zawm loh awmchhun chu. Don Croce chuan ka thil tih avanga pawi i tih loh nachhan tur chhan tha tak min pe a ni, chu chu thil tak tak ti turin i nem lutuk thin a ni. Chubakah midang khati zat kan that tawh a khatiang mi tlem te thah chu eng nge ni vak? Keimah thuin vawi khat mah i lakah ka la rinawm lo ngai lo.” a ti a.

Chutih lai chuan Guiliano chuan chu pa thil tihin nghawng a neih len zia hrilhfiah chu beisei bo a ni tih a hria a. chuti chung chuan engvanga he thil hi dodal tlat nge a nih? Chutiang deuhthawa rapthlak chu a mah pawhin ati fo a ni lo’mni? lumettu tihhlum te, puithiam lemchang khen beh te, inrukbo leh carabinieri ho thah te, zahngaihna tel hauh lova spy ho thah te kha? Passatempo hi ramsa ang mai a nih chuan, amah chu eng nge a nih bik? Sicily vengtu maw? Chu a thil tih tur chu a hreh hle mai. “Pathian nena inremna i siam nan hun tlem ka pe ang che, thingthi la tawngtai raw le.” a ti ta a.

Midang chuan Pasatempo chu an hlat san a, a ni chu thingthi tur awm takin a awm a, chutah a taksa tawi bing tak chuan Guilianno lamah a bawh phei ta thut a, Guiliann chuan hmalamah amah tawk tur chuan a pen a, a machine pistol chu a hmetper ta a. Silaimu chuan Passatempo boruaka a la awm laiin a va deng a, chuti chung chuan a taksa chu a leng phei tho a, a tluk pah chuan Guilianno chua hrut thuak tho a ni. Guilianno chu a pen sawn a.

Chumi tlaiah chuan Passatempo ruang chu carabinieri patrol ten tlang panna kawngah chuan an hmu a. A taksaah chuan lehkha thema ‘Guilianno phatsantu chu thi vek rawh se’ tih inziak hi alo inkilh bet a.

(Book IV ended. Wait for Book V)

[Loma hmar]

BOOK V : TURI GUILIANNO AND MICHAEL CORLEONE, 1950

CHAPTER 25

TLANGVAL SENIOR S2 EPISODE 8 BY:Nunuifrankyhmar
viewtopic.php?f=6&t=6814

Tui taka michaela muhil lai chu a rawn harh zawk a, khuarkhurum atanga phih chhuah sawk ang mai hi a ni. Tukverh engluhna dangtu chu a khar avangin thla eng ruai chu a lo lut thei lo a, chuvangin room chu a thim phui hmak a ni. A lungphu ri tih loh chu thawm hriat tur awm lovin rapthlak khawpin a reh ruih a. Room chhungah chuan midang awm tlata hriatna a nei a ni.

Mu chung chuan a inher a, a bul lawk chhuatah chuan thil dum bik deuh hi a hmu thei a, khum bula khawnvar chu banin a han tieng a, milim lu bung kha a lo ni a. Dawhkan atanga a tla riin a tiharh niin a ngai a. Thlamuang deuh takin a han nui a, a thaw huai a. Chutihlai chuan chhuatah chuan thil ri deuh hraih hraih hi a hre leh a, achu lam chu a hawi nghal vat a. Engin a chhun phak loh deuh chiahah chuan Aspanu Pisciotta hmel hriam leh thim raih chu a va hmu ta a.

Pisciotta chu kawngkhar nghengin chhuatah chuan a lo thu a, i inhumhimna venhimna khauh tak leh vengtu tam tak karah pawh heti hi a ni a, tia hnehna lawm niawm fahranin a lo nui sawng a.

Michaela chuan a sana, dawhkana a dah chu a han en a. Dar thum a ni tawh a, “Lo kal hun i thlang mak kher mai, eng nge i nghah a?” Khum atang chuan a tho va, rang taka inha nghalin, tukverh pardah chu a hlim nghal a; thla eng chu a rawn lut raih a, “Eng vangin nge min kaihthawh mai loh?” Michaela chuan a ti a.

Pisciotta chuan a ke chu a tawm a, rulin mi a chuk dawna a lu a kan ar ang maiin a lang. “Mi muhil lai thlir hi nuam ka ti a ni, a chang chuan an muthilh reng laiin thuruk te an chhakchhuak thin a ni.”

“Thuruk ka sawi ngai lo,” Michaela chuan a ti a, “Ka mumangah pawh ni se.” Pawn kawt zawlah chuan a chhuak a, Pisciotta chu sikret a theh a, an zu dun ta a. Michaela chuan Pisciotta awm ri tawp tawp leh insum taka a khuh chu a hria a, thla engah chuan a hmel chu mitthi hmel ang maiin a lang a ni.

An ngawi vang vang a, chutah Pisciotta chuan, “Thuthlung bu chu i nei ta em?” tiin a zawt a.

“Aw.”

Pisciotta chu a thaw hak a, “Turi hian he leia thildang zawng aiin min min ring a- a nunna atan hian min ring a ni. Tunah chuan keimah chiah hi zawng hmu theitu ka ni. Mahse thuthlungbu ah chuan min ring hauh thung lo. I nei em ni tunah?”

Michaela chu a han tawi khawmuang deuh a. Pisciotta chua a lo nui hawk hawk a, “Turi ang mai i ni,” a ti a.

“Thuthlungbu chu America-ah a awm tawh,” Michaela chuan a ti a, “Ka pa kutah him takin a awm a ni.” Tunis lam a pan mek tih Pisciotta chuan hre lo se a duh a, tumahin hre rih lo se a duh a ni.

Michaela chuan a zawh duh chu a zawt ngam lo lek lek a ni. A ruktea a rawn tlawh chuan chhan a nei ngei ang. Villa vengtute rawn paltlang nachhan chu kawng khat chiah a awm, a tawpah chuan Turi chu rawn kal a inpeih tawh tihna a ni mai. “Engtik nge Gulianno chu a lo kal dawn,” tiin a zawt ta a.

“Naktuk zanah,” Pisciotta chuan a ti a, “Mahse hetah ni lovin.”

“Eng vangin nge nih loh ang?” Michaela chuan a ti a, “He lai hi hmun him a nih hi.”

Pisciotta chu a nu leh hawk hawk a, “Mahse ka rawn lut thei a, ni lo’mni?”

Chu thu dik chuan Michaela chu a tibuai deuh hle. Eng tin nge Don Domenico-a ordera vengtu awm te chu a paltlang theih tih a ngaihtuah tha leh a, nge Don chuan a luh tir zawk em ni? “Guiliano-an a rel fel tur a ni ang chu.” a ti a.

“Ni lo ve,” Pisciotta chuana ti a, “Kei man ka rel ang. An chhungkua chu an him ang tih i tiam ngei a, mahse Don croce-an heta i awm tih a hre tlat, Inspector Velardi pawhin. Khawi hmunah pawh enthlatu an nei vek a. Eng nge i ruahmanna chu? Inneihna nge, birthday party nge, mitthi sunna? Eng atna thil nge min hrilh hlawm hi? Sicily a awm te hi sabengtung ang vek turah min ngai a mi?” hriam hrakin a ti a.

“Tlan chhuahna tura ka ruahmanna chu ka hrilh lo ang che.” Michaela chuan a ti a, “I duh leh min ring lo la, i thu thu a ni e. Guilianno i rawn hruaina tur chu min hrilh mai rawh, ka lo awm mai ang. Min hrilh lo a nih chuan nang leh Guilianno te in nunna atana in beih chhungin naktuk zanah chuan him takin Americaah ka awm tawh ang.” a ti hmak a.

Pisciotta chua nui leh hawk a, “Sicilian dik tak angin i tawng a ni- he rama i awm kumte kha ho lam takin i hmang lem lo ve. ” A thaw hak a, “A tawp mai tur hi rin harsa ka ti a ni.” a ti a, “Kum sarih dawn zet chu kan beiin ka tlan chhia a, phatsan kan niin, inthahna a awm bawk a. Mahse Montelepre-ah chuan lal kan ni, keimah leh Turi hi- chu chu kan tan a ropui tawk hle a ni. Mirethei tan a ding a, kei chu keima tan. A tirah chuan ka ring lem lo, mahse kum hnih outlaw kan nih kum hnih hnuah chuan keimah leh kan pawla mite lakah a dik zia a tilang a ni. A secod-in- command, a naupa ni bawk, a mi rin ber ka nih kha i hria maw? A neih ang chiah kawnghren buckle rangkacak rawng ka hreng ve a, min pek a ni. Mahse Particino-a loneitu fanu tleirawl pakhat ka thlem thlu a, a rai ta hlauh mai a. A pa chu Guilianno hnenah kalin kan chanchin chu a hrilh a, eng nge turi chuan a tih i hria em? Thingah min phuar betin hruihrualin min vau a ni. Lo neitu emaw kan mite emaw hmaah ni lovin, chutianga inzahlohna chu tih lan a duh lo a ni. Mahse a thupek ka zawm lo leh a nih chuan, min that ang tih ka chiang a ni. Chu chu kan Turi-a hi a ni tlat.” A hmui a tuai chuan a kut chu a khur dar dar a. A hmuihmul pan te chu thla eng hnuaiah chuan tle deuh ser a..

Thawnthu mak tak a ni, eng vanga min hrilh nge a nih? tiin Michaela chuan a ngaihtuah a.

Mut pindanah chuan an lut leh a, Pisciotta chuan mlim lu chu a chhar a, “Nangmah kaihthawh nan che hei hi chhuatah ka vawm a ni, a chhungah khan thuthlungbu kha a awm em ni?” a ti a.

“Aw, awm e.”

Pisciotta hmel chu a hniam rawih a, “Maria Lombardo khan dawt min hrilh a ni. A neih leh neih loh ka zawt a, a neih loh thuin min chhang a. Chutah ka mithmuh lai ngeiin i kutah a pe che a ni.” A nui hul hak a, “A fapa ang chiahin min en a,” a ngawi vang vang a, “Kei pawhin nu ang chiahin ka en a ni.”

Pisciotta chuan sikret dang a dil leh a. Dawhkanah chuan wine burah chuan wine tlem a la awm a, Michael-a chuan thli chhuakin Pisciotta chu a pe a, a ni chua lawm takin a lo in a.

“Ka lawm e,” a ti a, “Tunah chuan kan tih tur lam hawi tawh la, Castelvatrano khaw pawnah Guilianno chu ka lo hruai ang. Ka hriat theih nan che Car lang tlang theiah lo chuang langin, Trapani kawng atangin lo kal ang che. Lo tawh dan che chu ka rawn ngaihtuah chawp mai ang. hlauhawm a awm chuan lukhum rawn khum ang che, tichuan kan lo lang lo mai ang. A hun tur chu zing vartianah a ni ang. chu chu i ti thei ang em?”

“Aw,” Michaela chuana ti a, “Engkim ruahman fel vek a ni tawh. Thil pakhat ka hrilh ang che, niminah Stefano Andolini khan Hector Adonis nena inhmuh an tiam kha a bawhpelh a ni. Proffesor chu a lungngai hle a ni.”

A vawikhat nan Pisciotta chu a phu zawk a, chutah a dar a chhin ak a, “Pa tereuhte-a chu a vanduai thei riau a ni. Naktuk zing vartian a thlen hma zawng mangtha le,” Michaela kut chu a vuan a.

“America-ah chuan min rawn zui mai rawh.” Michaela chuan a ti hluai a.

Pisciotta chuan a lu a thing a,“Ni lo ve, Sicily-a awm reng ngang hi ka nia, ka nun dan hi ka duh a ni, a tul chuan Sicily-ah hian ka thi mai ang. mahse ka lawm e.”

A thusawi chuan Michaela chu a khawih deuh hle. Pisciotta chanchin h a hre tlem viau chungin he pa hi Sicily ram lei lung leh a tlang vel atanga laksawn chu thil har tak a ni ang tih a hre thei a ni. A tawrawt in, thisen chhuah pawisa miah lo a ni a; a vun rawng te, a awphawite pawh chu a sicilian ngawih ngawih a, ramdang chu a ring ngam thlawt lo a ni.

“Gate-a kal tlang turin ka pui ang che,” Michaela chuan a ti a, “Ni lo ve,” Pisciotta chuan a ti a, “Kan inhmuhna hi thuruk ni rawhse.”

Pisciotta a chhuah hnu chuan, muhil thei lovin Michaela chu khumah chuan vartian thleng a mu reng a. A tawp a tawpah Guilianno chu a hmu dawn ta a ni a; America lam panin an kal dawn a ni. Guilianno chu eng ang m nge a nih ang tih a ngaihtuah rilru deuh hle a. A mi ngaihsan a ni ve tho ang em? He thliarkar thunun a, hnam pum nghawng dawrh thei bawka chu. Khum atanga thovin tukverh eng luhna daltu chu a hawng a. Khua chu a var chiang tawhin, ni lo chhuak mekin tuipui a chhun ruih mai chu a thlir a, ni zung thlarah chuan lawng thlunna pana motor boat kal mek chu a hmu ta a. Villa chu chhuahsanin Peter Clemenza hmuak tur chuan tuipui kam lam panin a kal ta nghal a.

Tukthuan an kil dun a. Michaela chuan Pisciotta-an a rawn tlawh thu chu a hrilh a. Peter Clemeza chuan Pisciotta-an gaurd te a paltlang chu mak ti awm pawhin a awm lem lo.
Chumi tuk pum chu Guilianno nena an inhmuhna atana ruahmanna siamin an buai a. Villa enthlatu chu an awm ngei ang tih a rinawm a; Chet dan danglam deuh, motor tam ta deuh thut chu an ngaihsak viau ngei ang. Chiang takin Michaela chu thlir reng a ni ngei bawk ang. Sicilian Security Police head Inspector Velardi leh a hote chu an inrawlh lo a ni thei, mahse thil rapthlak tak a lo thleng lo ang tih tunge hria?

Ruahmanna an siam zawh chuan chaw chhun an fak a, Michaela chu chhun lama mu turin a kal ta a. Zan lama fim taka awma duh a ni. Peter Clemenza chuan tih tur a ngah hle mai- kal velna tur buaipuia a hote thu a pek a ngai a, tin a unaupa Don Domenico hnenah thil awm dan a hrilhfiah a ngai bawk.

Michaela chuan tukverh puanzar chu a zar a, khumah chuan a mu a. a muhil mai thei lo. Darkar 24 hnuah chuan thil rapthlak tak thleng thei a ni tlat, hrelawk thei deuh roh tein a inhria a. Mahse Long Island lama a haw hun tur a suangtuah a, a nu leh pain kawngka bulah an lo hmuak a, a zinkawng thui tak a chu a tawp dawn ta a ni.

[Loma hmar]

CHAPTER 26A

Kum sarih lai suamhmang a nih hnuah chuan, Guilianno chuan chu lai a la ram chu chhuahsana a suangtuah thin America rama a tlan bo ahun tawh tih a hria a. America chu a pain a naupan laia a chanchin ahrilh thin, ram ropui tak, retheite tan pawha diknain a ro a relna hmun, sorkar chu mihausaten an chawhbuai ve loh a ni a, neih nei lo sicilian te pawh hna an thawh phawt chuan hausa taka an awm mai theihna hmun a ni.

An inthian thatna a lang a pauva puanchhuahna atan Don chuan America-a mi Don Corleone chu biain Guilianno a tlan chhuah nana pui tur leh humhimna pe turin a ngen a. Don Croce chuan a ma tan chauha ti a ni tih chu chiang takin a hre tho nangin duhthan tur a nei tlem riau tawh a ni, a hote chakna chu a kiam tial tial si a.

Tichuan Zaninah hian America mi, Michael Corleone hnena intulut turin Aspanu Pisciotta hmu turin a kal dawn ta a ni. He tlang hi a chhuahsan dawn ta a ni. he tlang hi kum sarih chhung zet chu a inhumhimna hmun a lo ni tawh a. A lal ram te, a thuneihna te, a chhungte leh a thiante a kalsan dawn ta a ni. A sipaite an pherh zo a, a awmna tlang lah daidar a ni ta bawk a, a inhumhimna sicily mipuite lah chu Colonel Luca Special force te chuan an tidarh hneh hle bawk. A awm reng a nih chuan hnehna chan a mual mual chu a nei ang, mahse a tawp dan tur chu a chiang hle a ni. tunah chuan duhthlan tur dang a nei tawh lo tlat a ni.

Guilianno chuan a Lupara chu a ak a, a machine pistol pawh chu pai thain Palermo lam pan chuan a kal ta a ni. Kawr var nghawng nei lo a ha a, a chungah chuan jacket a iptea silaimu hnawh khah tan chu a ha bawk a. A sanaah chuan darkua a ri chiah a, mahse chhun lam hlimthla chu thla a chhuak tawh chungin van lamah chuan a lang ruih tho a ni. insuamna tih reh tum Special force ho patrol chu an awm reng a vangin a hlauhawm hle a, mahse Guilianno chu hlau hauh loin a kal a ni. khang kum liamtaah khan hmuh theih loha awm dan a hlawhchhuak tlat a. Helai biala mipui zawng zawng hian a mah thup bo theih an duh vek tlat a, siai patrol an awm chuan amah an hrilh mai a, hlauhawm a awm a nih leh an venghimin an inah pawh an riah tir hial thin. A bei dawn a nih chuan beram vengtu leh loneitu te chu in hawrkhawmin a hnuaiah an rawn awm mai ang. An mahni humtu a ni thin a, an phatsan ngai lo ang.

An inneih atanga thla khatnaah chuan Colonel Luca sipaite leh a hote thenkhat indona a thleng zauh zauh a. Colonel Luca chuan Passatempo thihna chu an tihah a chhal tawh a. chanchinbu te lian takin Guilianno-a pawlte zinga mi hlauhawm ber pawl chu special force te thawhrim leh huaisen avanga thah a nih thu an puang a. Colonel Luca chuan ruang chunga lehkha them an bel kha a thup bo hmak a, mahse Don croce chuan Inspector Velardi hmangin a hre tho a ni. Portella della hmuna inthahnaa inphatsanna tenawm tak kha Guilianno chuan a la thutak takzet tih a hre mai.

Colonel Luca sipai sang ngate chuan Guilianno chu an nawr chep ta hle a ni. Mamawh lei turin Palermo-ah pawh a lut thei tawh lo vin, a chhungte leh Justina-i tlawh tur pawhin Montelepre-ah a kal thei tawh hek lo.A hote tam tak chu phatsan leh thah an ni a, thenkhat chu Algeria leh Tunisia lamah an tlan chhe nual bawk. Mafia pawh chu a langin anmahni dotu an ni ta a, an inzawmna te chu Guilianno pawl te carabinieri ten an man theih nan an hmang ta a ni.

A tawpah chuan a chiefte zinga pakhat chu dah that a ni leh ta bawk a.

Terranova chu a vanduai ve hrim hrim a ni. A thatna chuan a vanduaina a thlen pawh a tih thei awm e. Passatempo anga mitawrawt a ni lo a, Pisciotta anga fing kherek a ni hek lo. Fra Diavalo anga hlauhawmna a nei loin Silvestro anga theihna nei a ni bawk si lo a ni. fing ve tawk tak chu a niin ngainatawm tak pawh a ni. Guilianno chuan an mi rukbote thiana siamtu leh pawisa leh thildangte mirethei hnena semtu berah a hmang thin. Guilianno thil tum zan thim hnuaia palermo kawtthlera poster tartu pawh kha Terranova leh a hote hi an ni. thisen chhuaha inbeihna tam zawkah chuan a inhnamhnawih ngai lem lo.

Amah hi hmangaihna leh ngainatu mamawh tak mai a ni a. Kum liam ta maiah khan Palermoah hmeichhia a nei ve a, ani chu hmeithai fa naupang te te pathum nena khawsa an ni. Chu nu chuan bandit a ni tih a hre ngai lo a, rome sorkar hnathawk sicily-a chawlh hmang emaw a ti mai thin a ni. Pawisa a pek te leh naupang ho tana tilpek a kensak thin avang chuan a lawm thin em em a. Mahse thil lang chiang tak chu an innei thei lo chu a ni. A ngainatna leh ngaihsakna a mamawh ang chu a lo pe zawk thin a ni. Terranova-an a tlawh chuan eitur tuihnai tak a lo siam sak a, a thawmhnawte a suk sakin phurna nasa tak nen hmangaihna an chen dun thin. Chutiang inkungkaihna chu friends of friends ho lakah chuan thup reng theih a ni lo va, Don Croce chuan hun remchanga hman atan a dah tha ta khiau a ni.

Justina chuan tlangah chuan Guilianno a rawn tlawh a, a kal kawngah chuan Terranova chu a bodygaurd a ni thin. Justina hmelthatna chuan Terranova chu lunglenna nasa tak a pe a, a him lo tih hre reng chungin a bialnu chu a tawpna atan tlawh a tum ta a. A bialnu leh a fate chu kum engemaw chhung daih tur pawisa pek a duh bawk a ni.

Zan khat chu amah chauhin palermo-ah chuan a lut ru ta a. hmeithai chu pawisa pein hun engemaw chen a hmuh theih loh tur thu a hrilh a. Ani chu tapin chutiang chu a phal lo a, a tawpah chuan a nihna dik tak chu a hrilh ta a ni. A bialnu chuan mak a ti hle. Terranova chet dan phung chu a dam dap reng a, chutichungin mi hmingthang Guilianno-a chief te zinga pakhat a lo ni reng mai. Phurna sang tak nen hmangaihna a chen pui a, chu chuan Terranova chu a tilawm hle. Chutah tlai lam hun chu naupang pathumte nen chuan an hmang a, Terranova chuan card khelh puiin an chak a nih chuan pawisa tak tak a pe ta thin a, hlim takin an nui hawk hawk reng mai a ni.

Naupang hote an mut hnu chuan Terranova leh a bialnu chuan vartian thleng thakin hmangaihna an chen dun leh a. Terranova chuan kal a tum ta a, a tawp nan an han inkuah leh vawng vawng a. Chutah terranova chu an Cathedral hma chiah kawtthler pawh tu kawtthler pawhtu chu zawhin a kal ta vat vat a. A hlim hle a, a thla a muangin, a rilru pawh a chawl a, invenna lam a ngaihtuah miah lo a ni.

Zing boruak thiang tak chu motor ri chuan a rawn luahlan ta a. Car dum pathum hian chak takin an rawn pan a. Kil tin atang chuan silai keng mi an rawn lang ta tuam tuam mai a ni. Car atangte chuan midang an rawn zuang chhuak bawk a, mi pakhat chuan inpea a ban phar turin a rawn au ta a.

terranova chuan cathedral chu a han melh hram a, Mithianghlimte lim chu a bul lawkah chuan a awm tih a hria. Inchhawng bathlarte chu a dumpawl leh engin an chei 00a, van thiang takah chuan ni a chhuak mek bawk. terranova chuan chung thil mawite chu a hmuh tawpna tur a ni tih a hria. Kum sarih chhung a vannehna chu a lo tawp dawn ta, thil pakhat chiah tih tur anei a ni.

Ama thihna tur zuan khum tur ni awm takin a han zuuang vak a, a taksain lei a thlen rual chuan a pistol chu phawiin a kap ta nghal a. sipai pakhat chu tawlh dawrhin a thingthi nghal hnawk a. terranova chuan silai chu hmehper leh a han tum a, mahse chutih lai chuan a taksaah chuan silaimu za chung zet chu rawn lutin a taksa leh ruh te chu a rawn phin darh ta leuh a ni. A lehlam takah chuan a vannei letling a ni- na tuar hman lovin, a bialnuin a phatsan a ni mai em tih pawh ngaihtuah hman lovin mual a liam ta a ni.

Terranova thihna atang chuan Guilianno chuan an tawpna a hnaih ta tih a hria a. A band chu a tawp ta niin a ngai. Hlawhtling taka ral beih an nei hlei thei tawh lo a, tlangah an biru reng thei tawh hek lo. Mahse a mah leh a chiefte chu an tlan chhuak theiin thihna an pumpelh a beisei tlat a. Tunah chuan hun a tlem ta takzet mai. A tih duh fo thin thil a awm a, tichuan Corporal Canio Silvestro chu a ko ta a.

“Kan hun a tawp ta a ni,” Silvestro hnenah chuan a ti a, “Nangmah venghim thei che Englanda i neih thu kha vawi khat min hrilh tawh a. Tun hi i tan kal hun tak a ni, kal tura phalna pek i ni e.”

Corporal chuan a lu a thing a, “America lama him taka i kal hunah ka kal thei reng alawm. Min la mamawh a. Ka phatsan lo vang che tih i hriat kha.”

“Ka hria alawm,” Guilianno chuan a ti a, “Ka ngainat riau thin che kha i hria ang chu, mahse bandit i ni tak tak ngai lo. Sipai leh police dik tak i ni reng thin. Ithinlung chuan dan pawisakna a nei reng tlat a ni. Chuvangin nang chuan i nun khawchhuah nan beih i harsat lo ang. Midang tan hi chuan a harsa viau thei tlat a ni, suamhmang kan ni kumkhua dawn a ni.”

Silvestro chuan, “Bandit angin ka ngai ngai bik lo che.”

“Kei pawhin mawle,” Guilianno chuan a ti a, “Khang ku sarih chhung khan eng nge maw ka tih le? Dikna atan bei niin ka inngai a, miretheite tanpui ka tum bawk a. Sicily tihzalen theih ka inbeisei a, mi tha tak nih ka tum ve a ni. Mahse hun dik loh vah kawng hmang dik lo mai a ni. Tunah chuan kan nun chhan nan kan tih theih ang ang kan tih a ngai a ni. Chuvangin Englandah chuan i kal ngei a ngai a ni. I him tih ka hriat chuan ka lawm hle ang.” Silvestro chu a kuah a, “Ka thian tha diktak i ni,” a ti a, “Khangte kha thupek a ni e.”

Thimhlimah chuan Guilianno chuan a puk chu chhuahsanin Palermo khaw pawn mai a Cappuccini monasetery pan chuan a kal ta a. Chutah chuan Aspanu Pisciotta thu nghakin a lo awm dawn a ni. heta puithiam pakhat hi a pawlte zinga mi niin Leihnuai pindan mitthi dahna hmun vengtu a ni a, he pindanah hian mitthi za chuang lai a awm a ni.