Unexpected Love - 6

[ZonuniLeo]

UL-6

Ka luhna kawng tereuhte atanga Benji-an min kaihchhuah chuan ka hawikual ruai a. Josh ka hmuh tak loh vangin ka thaw huai mai. Haw leh mai ka rawt a, engmah sawi loin min letpui ve leh mai bawk aa..

Ka mutna ah Josh hlir ka ngaihtuah. A hmeltha zet kha ala ngai reng, a khabe a hmul to siar siar kha a inhmehin a lang pa takzet bawk. Anu leh Kelly khan ahnenah ka chungchang engtin nge an hrilh hrelo mah ila, ka ngai em em a, ka hnaih thei silo.

Josh nen kan thlalakho chu ka en leh ngat ngat a. Ka mut chhuah tawngkhawng ah ka lo muhil ve leh mai thin.

"Kim, i awmdan hi a thalo, hawiharh ve deuh la a tha ang.. Zanin chu chhuak ang u" ka peihlo kher mai. Nina chu hnial mah ila, a sawt dawnlo tih ka hria.

Benji cousin, Amaha kan flat chung chiaha cheng Dave chu alo han sawm a. Dave hi a felin a polite a, DU a thawk niin hmeichhe lam a ngaihsak lemlo. Keipawhin ka ngaina ve tawh viau, thian ang bakin kan inen lemlo ve ve.

Ka kawrfual khup thleng ka ha a, ka dul a lian chak in, thawmhnaw leinan pawisa ka hmang phal meuhlo nen, ka neihsa ho ka ring a, a mar lek lek ani. Pheikhawk flat bunin ka sam chu ka tawnkhawm tawp ringawt. Benji leh Dave carin kan chhuak a. Kan kalna hmun Nina thlan chu a nuamin a reh raih mai.

Dave nen kan thu a, Nina leh Benji an thu thung. Nina chu a tawng bawrh bawrh a, keini ho chuan kan lo zawm zeuh zeuh bawk.

Kawngka a Josh leh hmeichhe pakhat nalh zet mai lo lut ka hmuh chuan ka thu ngil zawt. Anni pahnih chuan min rawn hmulo in kan chhakah an thu a. Josh nen kan inhawi tawn chiah leh nghal.

Ka ngaihtuahna a buai vek, ka thil ei tui leh tui loh ka hrelo. Ka hawichhuak a, Josh ka va en chuan min lo en reng, kan mit in tawng zawk chu rang zetin ka la sawn nghal...

"Min lo hrethiam lawk ru, ka va inphih harh lawk..." tih leh thawh ka rual a, Wash room awmna lam ka pan a. Ka hmai phih in, ka sam ka ti huh bawk. Darthlalangah ka inen vang vang a, makeup ka hmang lemlo bawk a. Danglamna ka nei hranlo.

Muangchangin ka chhuak a, kawngka bulah bang nghenga Josh lo ding reng chu ka hmu phut, a kekawr ipte zen in, ka pen ri a hriat rualin a rawn hawi chhuak a. A khabe hmul chu a tuai zauh va, a faiin a lang pa em em bawk.

"Tu zawk kha nge kei aia i thlan chu? Ka pek loh engnge a pek che?" min endan mawlh chu... Mi tenawm tak angin min en ni maiin ka hria.

"I sawi awmzia ka hrelo" ka lo ti hmak a. Ka chungchang a sawi danah chuan ka lawmlo hle.

"Hei hi emni ka pek loh a pek che.." ka pum a rawn khawih a. A kut chu rang fahranin ka lo beng sawn nghal..

"Ka be peihlo che" kaltlang ka tum a, Hnehsawh zetin ka banah vuanin alamah min hnuk hnai a, ka hmuiah a rawn fawp zui zat. Keiin namsawn ka lo tum thung.

"A la ngai reng... " a aw thamsap chu hriat nuam ka la ti tho...

Dimtein min fawp a, a duhthawh tulh tulh thung. Ka hnarna chu engtiklaiin nge a bo zawh ka hrelo, duhthawh zetin ka lo chhanglet ve tih zawng ka hria.

A inla hrang a "Reilote chhung in ka theihnghilhtir vek thei che ani, hetiang hian emni phatsan ka nih?" za lo zetin a nui hak a, min endan chu ka tuar theilo, min en hniam tih a hriat ngawih ngawih, chutiang a en chu Josh lak atangin ka beiseilo.

Ka inring hmanlo. Ka thiltih ka hriat meuh chuan Joshua hmaiah ka lo beng fel vek tawh.

A phun sup a, a kal nghal, a thinrim hle ang tih ka hria. Kei pawh ka thinrim ve tho.

Muangchangin breathe in, breathe out kan ti vang vang phawt a, ka thinur na zawng zawng chu bo vek se ka duh.

"I hmel chuh.. Engnge thil diklo?" Nina chuan ka thut veleh alo ti nghal a. Josh te thutna lam enin ka hawi chho va, a hmeichhe hruai chuan hneawm khawpin a taksa chu a khawih zing lehnghal...

"Engmah diklo awmlo ve, kan haw tawh mai dawn mi? Dave" Dave chuan min hniallo hlauh. Kan pahnih chhuak chu Josh chuan min enreng tih ka taksa chuan a hria, vawikhat pawh ka en velo thung.

"Engvanga mood danglam vek nge kan nih le?" A Motor khalh hmalam en ngar chungin Dave chu a tawng sup a, mi tawng tam anilo va. Lehkha a chhiar nasa em em bawk.

"Josh kha i hmu em?..." ka sawi zo hmanlo.

"Kim, hmalam i pan mek niin ka hria, Josh lakah erawh fimkhur la, hmalam panin theihtawp i chhuah tur ani" Dave chuan a sawi dik. Ni e.. Ka fimkhur a ngai ani. midang nilo in Josh ani a, ka naute pa ani bawk.

Ka ngawi reng a, engmah sawi chakna ka neilo. Khati em em a min hmusit kha tawrh har ka ti.

In kan thlen thleng chuan ka ngaihtuahna ka kawm char char, Dave lakah tawng tam loh hi inthlahrun a ngai lemlo, engmah ka sawi chhuak peih tawh thlawtlo ani ber.

Ka inbual a, vanneihthlak takin Dave a haw nghal. Hahdam zetin ka khumah ka mu dar dar a, zanin thilthleng ka ngaihtuah apiangin ka lungawilo ngawih ngawih ani ber e.

Nina leh Benji hna a kal turin an chhuak a, chawhnu lamah ka inentir a hun vangin kan In bul hnaia clinic pawnah Doctor nghakin ka thu ran a. Ka Doctor pan hi a thiam leh thiam loh pawh ka hre chuanglo. Kan In atanga pan a awlsam vanga pan ka ni deuh ber.

Doctor room atanga lo chhuak chu Josh ani. Enge a tih? ka inher vat a. Min hmuh ka hlau viau bawk.

Ka hnunglamah chiangtakin ding an awm, ka taksa chuan Josh ani tih min hrilh.

"Hello..... Bawihi"

Muangchangin ka inher a, ka hmuh chak loh zia ka hmelah a lang chhuak hialin ka ring.

"Hi..." ka chhang chaklo hle. Mahse, kan bul vela midang awmte tan hmuhnawm siam ka tumlo.

"I tha em?" chik fahranin min en a, uluk zeta min thlir chu nuam ka tilo...

"Tha e, i tha zawk maw?" kalsawn tumin ka pen a..

"Kal rih suh, naute hi thla engzatnge?" ka bana a vawnna chu thinthlak duh hle mah ila, ka insum ani..

Ka chhuahsan atangin thlarukna kan hmang mek. Thla li pawh ti ila, a fuh tho ve.

"Thla 4 a tling tep ang" a ding khawng deuh luh chu ka hmu.

"Lokal teh" pawnlamah min kaichhuakin a car dahna min panpui a.

"Engnge ni? Ka luh a hun tep ania..."

"Carah lut phawt rawh"

"Josh, ka theilo... Ka thleng tep tawh" awmlo lutuk mai...

"Ka pawm luh kher i duh chuan..." min rawn pan chu hmuin rang zetin carah ka lut sawk sawk a. A nuihdan chu ka ngei tawk a tling.

"Khawnge min hruai dawn?" min chhan tum hmel a pulo, a car khalh ringawt ngaihtuah a ang..

"Josh...." ka vin thawt a. A duh duha min tikual hi ka kham riau....

"Max-ah, Harish-an a check ang che.. Khalai Doctor ho en che kha ka duhlo" Josh chu ka en ha a, hepa hian engnge a hriat leh tak??

"Ka tan pan a awlsam a, an thiam ve em em bawk. Khawngaihin let leh rawh" ka lawm loh zia chu a hrethiam ve ang chu...

"I tellohna turah i inrawlhin ka hria, Josh.." ka thinrim vangin ka tawng ringlo..

"I telna chu ka inrawlhna tur vek ani" a aw chhuak nelawm loh leh a thusawi inpersan zet chu mak ka ti....

Ka telna anih vanga a inrawlhna chhan tur ka hrethiamlo? Josh hi a A deuh tawh ani ngei ang.

Max kan thlen chuan hnial a sawt loh zia ka hriat vangin ngawirengin ka zui a, Harish-a roomah min hruaiin min hmuh chuan alo nui var var a. A lawm hmel ve hle, kan la chengdun reng emaw ati niin ka hria.

Zawhna min zawt lova. Josh nen an sawi teuh thung. An khawl dahna hmunah min hruaiin uluk zetin min check a. Harish leh ka Doctor pan thin inthlauhzia chu ka lo chhut ve nauh nauh a...

"A tha e, a lawmawm hle mai" engemawni a ziak mawlh mawlh a, Josh a pe a, an innelin an inpawh hle tih a hriat. An pahnih chuan an inbe leh reng a, eng chungchang nge an sawi ka hrelo bawk nen, ka lo teikual san daih a..

"Bawihi, lokal rawh le.. Ka room min hmuhpui ve la" Harish chuan pawn thleng min thlahin min fiam bawrh bawrh a. A bula awm a hahdamthlak takzet ani.

Joshua room kal tur chuan liftin inchung lam kan pan phawt a, a room chhung chu a zauin, damdawiin chhung anglo tak zela an cheibawl chu mak ka ti angreng.

Thutthleng nalh zet, nawmhmel deuhah chuan ka thu a, ka pheikhawk tlawh thla in, woollen carpet chu ka rap a. Ka ke kham a ziain, a hahdamthlak sawng sawng.

"Tichuan ka fa alo ni reng a... Ka hriat lohin engtia tih nge i tum?"

Ka phu zawk.."Engmaw i sawi? Awihawm loh lutuk" ka lo ti hluai a. Ka hlauthawng nghal em em bawk.

"Apa ka nihna angin enkawl che u hi ka mawhphurhna ani tih i hriat ka ring" ka bulah a rawn thu a. A thusawi chu tih hlawhtlin ngei a tum dawn tih ka hria, chu chuan min ti mangang. Anu kha.. Engtinnge niang??

"Apa i nilo" awih se ka duh rualin ka duhlo bawk. Ka rilru a buai nuaih ani.

"A tul chuan engkim ka ti ang, ka nemnghet vek bawk ang" A tih tak tak chuan engkim a hrechhuak anga, A fa ani tih pawh chiang takin a lantir ngei ang.

"Josh, haw ka duh..."

"Ka Inah i lo let nghal ang, hnialna ka ngaithla duhlo, a tul phawt chuan eng hmanrua pawh hman ka hrehlo tih hria ang che" min en run a, ka hriat thin Josh a anglo. Tuna ka hmuh hi Josh dangdaih ani.

Kan In kan pan a, ka boruak tawn tehnuaih vang chuan ka chau rawih thei. Ina ka luh chuan tumah anlo la awmlo. An haw a hun tawh si...

Pawna Josh awm vangin kawngka ka kalh sauh sauh va. Ka khum chungah thu in ka inngaihtuah veng veng a .

"Kim" Nina ani.. Ka tho va, kawngka kalhna ka hawn chuan alo nui var var a. A hnungah Josh alo ding...

"I insiam emni? Puih i ngai em? Ka ngai ngawt ang che" a tih chuan rum zetin Josh ka va melh a, ngeiawm zetin alo nui suk.

"Ngailo ve.." ka room lam ka pan leh nghal a.

Nina chuan min rawn zui lut a " I hmanhmawh kher mai Kim, Josh hnena i let leh tur chu ka lawm tak tak ani, Naute tan pawh a tha ber" ka thawmhnaw lakkhawm chu phurzetin bagah alo dahlut mawlh mawlh a.

"Kal ka duhlo..." Kawngka bula Josh lo ding run chu hmuin ka tawnglai ka tawp chawt a.

"In zo tawh em? Bawihi" a mitah chuan zaidamna leh min duatna ka hmuin ka hria, a lemchanna ani ngei ang.

"Josh, i duat viau a ngai ang, surprise visit ka rawn nei fo dawn ania" Nina chu a nui hak hak a. Kan boruak chu hria ang pawn a awmlo.

Saket-a a chenna kan thlen chuan dar 8:00 alo pel tawh. Ka room thinah ka bag ho chu kan dah leh a, engmah ka khai an phalloh vangin Reenu leh Josh chuan an rawn khai a, min hmu thut chu Reenu pawh a lawm ve hlein ka hria.

Hmanhmawh zetin ka inbual a, ka room kawngka chu uluk zetin ka kalh sauh sauh a, hahdam zetin khumah chuan ka mu. Ka chau deuh bawk nen, ka muhil harlo ve tlat, Josh pawhin min rawn tibuai hauhlo anih hmel

Zingah erawh ka harh hma hle. Inhnuaiah chhukin eitur ka zawng a, vanneihthlak takin fridge-ah cake tuihmel zet leh ice cream lo awm chu la chhuakin ka ei mial mial a. Ka naupai hi eichak ka neih a, ka riltam tawh chuan dan theih anilo.

Ka ei zawh chuan pawnah ka chhuak a, pangpar an par nalhin min ti dam sawng sawngin ka hria. Pool lama thawm awm chu hriain ka va pan a. Josh tuiah lo chengin a nawmhmel hle.

"Lo lut ve rawh"

"Ka thiam velo" thutthlengah thu in, ka enreng a. A pian pa hrak leh inkhaithli zet chu hmuhnawm tak ani.

"Ka zirtir ang che"

"A chakawm khawp mai, nidangah le" Tui atanga a rawn chhuah chuan rangzetin inchhungah ka lut a, ka chetdan chuan a nuih atiza leh ngei ang.

Breakfast kan ei mawlh mawlh a, ka ei leh thei viau tho. "Bawihi, chawhnu lamah bazar turin ilo inring dawn nia" ka thawmhnaw hak chu a enkual dan dan a.

"Ngai lo mai rawh se, a rei tawh dawnlo. Thla 3 vel bak ani tawhlo" thawmhnaw lei ka mamawhna ka hre lemlo. Ka chhuak vak lo bawk a.

"Hospitalah ka kal anga, ka rawn hruai ang che, lo inpeih ang che" a kal nul nul a. Hnialin awmzia a awmlo thin lutuk chu ka nuih a za hial zawk.

"Mahni thuduh leh lutuk" ka phun sap a. A duh ang anga min tihkawi a tum ni berin ka hria.

Chawhma lam chu khumah ka mu hahdam a, Harish khan nitin mu hahdam ziah turin min hrilh, ka zawm theih zawng tak ani, tihtur ka neilo lutuk chu engemaw tak ngaihtuah chhuah ka duh...

Khuma muchung chuan Ina awm chunga ka tih ve theih tur ka ngaihtuah ngat ngat a. Engmah ngaihtuah chhuah ka neilo. Ka tho va, ka inbual zawh chuan ka kawr, T shirt lian deuh second hand ka thin chu ka ha a, leggins ka ha leh tawp, ka sam chu hnunglamah tawnin ka inpeih der tawh.

Josh chu ka roomah a rawn lut a, ka lo inpeih tawh a hmuh a, a mitko san zeuh chu ka lo hmu. Ka la inpeih a ringlo ani ngei ang.

A carin kan chhuak a. Select Citywalk - min hruai hnai viau e. A chhunga H&M (Hennes & Mauritz) ah kan lut hmasa ber a. Rai kawr pawh anlo ngah khawp mai, a hma ang bawkin Josh chuan a thlang vek a. Pawi ka tilo nasa, kei aiin nalh leh tha a hre fe zawk bawk.

Eitur pawh kan lei hnem kher mai, naute thawmhnaw cute zet zet chu ka en leh veng veng thin. A duhawmin a nalh hlawm takzet...

"Nidangah naute mamawh chu aw.." ka darah min kuah a, motor park na lam kan pan a, ka khai ve a phal bawk silo, hahdam zetin ka lo tei vel mai mai a...

Ka thawmhnaw tur a tam leh tawhin a dahna pawhin a daih tawhloh thu sawiin ka phun ka phun a.. engmah hria angin a lang duh miahlo lehnghal.

Ka in dahfel vel chu Josh chuan min en reng, ka tihfel zawh chuan balconyah chhuakin midang a bia a, engnge a sawi pawh ka hrechuanglo.

Tlailamah Noodles ka eichak vangin ka siam a, Reenu erawh chuan a ngaina velo, Josh ka fin leh atang khan Reenu hi englai pawhin a awm nghal a, a nuam ka ti sawt. A hnen atang hian Hindi pawh zir ve a ngai ani.

Zanah Josh Hospitalah a kal a, alo haw dawnloh thu a sawi lawk, ka thawveng sawt mai. A bula ka awm loh hnu khan ka ngai viau thin a, a bula ka awm leh hnu erawh hi chuan kan inpawh talo riauin ka hre lawi. Keima ngaihdan ringawt nge ka hrelo.

Thil ri bur bur chuan min ti harh. Sana ka en a, Dar 9:00 alo kawk vah tawh. Ka room atanga ka chhuah chuan Josh roomah hna anlo thawk mawlh mawlh a. Paruk vellai anni, an hna theuh hnehsawh zeta an thawk mawlh mawlh chu ka thlir reng a...

A room a zau tehreng nen, a room bul chiah room nena indaidanna chu anlo la sawn vek a, a zau duai duai kher mai.

Ngawirengin inhnuaiah ka chhuk a, Josh pawh alo lut ve chiah. "Bawihi, Ka roomah i rawn insawn angai, vawinah an zo vek ang" Hnial sawt heklo le... Ka ngawi reng a.

Sum a awm chuan engkim hi a awlsam ani. Tlaiah chuan engkim anih tur ang ani vek hman tawh. Closet readymade nalh leh simple zet a siam, lian zet fit chawp vek ngai leh thildang an rawn dah bawk a. Josh chuan lo enpuiin an fit mawlh mawlh a, kei chu tualah ka tei vel mai mai thung..

"Bawihi, Kan room hi rawn en teh"Josh chu inchung bathlar atangin a rawn au va. 'kan' tawngkam a hman chu ngaihthlak nuam ka ti. Thuawih taka ka chhoh chuan kawngka bulah dingin min kai lut a...

A zauin closet pawh a changkang kher mai. Hmeichhe hmantur tih a hriatin a lian bawk a, dah khat vek tur chuan thawmhnaw a ngai hnem hle ang. A chhak deuhah naute khum cute zet leh a thawmhnaw bawm tur alo awm thlap a. Bathroom zau tha tawk pahnih a awm bawk. Thut hahdamna tur a awm nual a. Zau hem hawm tak ani.

Pawisa hi chuan thil a ti thei teh e. Ka thawmhnaw chu keimah kherin tihfel ka duh vangin Josh leh Reenu rawn thiar phei chu uluk zetin ka lo rem a, ka closet awmna chu a thawl tha bawk a. Chet vel a nuam khawp mai.

Vawikhatah ka tizo peihlo, ka ham bai bai a, Josh chuan chawl tawh mai turin min hrilh a, kei pawhin chawlh ka mamawh tih ka hria, ka intleuh fai a, A khuma ka mut chuan thlamuanna riau ka nei tlat, ka muhil vat a...

Zing ka thawh chuan ka closet chu ka va en a, alo in rem fel zo vek tawh. Josh hi mi chefel thlap ani tih ka hria, mahse hetiang thleng thleng min tihsak ka beisei miahlo.

"Bawihi, zanin dar 7:00 a chhuak turin lo inpeih rawh aw.. Harisha naute inhualna ah kal ngei ngei kan ngai" a chhuah dawna a tih chuan ka peihlo ru hle. Josh kal chhuak chu ka en reng a. Armani suit a hak chu a inhmehin a lang zahawm takzet. Kei hi engvanga min kaltir mailo nge anih ka hrethiam theilo.

A hausa a, a zahawmin a chhelo em em bawk, hmeichhe nalh leh zahawm tak tak a duh apiang a thing thei ngei ang. A hnena mahni taksa hralh a, fahrah ni bawk lehnghal hi engvanga min chelh tlat nge anih ka hrelo..

A fa vang ani ngei ang. Ani ang mahni inenkawl zo tak hian afa lo piang tur hi a thlahthlam duh hauhlo ang. Naute vang chauha ka chunga tha pawh ani thei. Kei tehlul hi ani ang mi zahawm tan tangkaina pakhatmah ka neilo.

Dar 5:00 pelh deuhah ka inbual a, a nuam bawk nen, ka inchiah rei kher mai. Ka zawh chuan muangchangin ka insiam a, kawr fual pawlduk, ka khup chena fual ka ha a, ka vun no zet chu a kap eng hle tih ka hria, rai kawr aniin hak a nuam a, a simple viau bawk. Pumps sen ka bun a, ka sam chu hnunglamah Nina min zirtir angin ka tawm chho vek thung.

Josh lo luhlai reng reng ka hrelo. Darthlalanga ka inen chuan min lo en reng tih ka hmu chiah. "Josh, kal loh mai ka duh. Engmah ka ha nalh theilo.."

"Lawkin.." bawm nalh zet a rawn phawrh a, thi simple leh man to hmel tak ka nghawnga min awrhtir chu ka enreng a, a nalhin ka duhzawng tak ani.

A lam min hawitirin min kuah a, ka dulah a kut nghat zauhin min enreng a, "I nalh lutuk tlat.."a ti sup a, min endan chuan ka chhungril thlengin a nghawng ....

A khabe hmul to chu ala metlo, A inhmeh takzet ani. Armani tuxedo a ha zaih a. A inhmehin a chhelo hluah hluah..

A rolex sana chu enin "Bawihi, kan kal dawn emni? Kal chhung a rei deuh ang" ka kutah min kai a, ka hmuiah fawp zeuhin tunah chuan ahma a ka 'Josh' kha a ang leh tawh. Ka pheikhawk sang bun nen, ka lo rit ta deuh bawk a, ka kal chak theilo..

Darkar chanve dawn zet kan tlanin ka hre mai. Harish nen an zirlai atanga inhria annih dan leh an chhungkaw zinga mi ang maia an ngaih thu, kan kal ngei a tul dan min hrilh a, kan kalna hmun chu ka vawikhat hmuhna niin movie vela mi ang mai niin ka hria...

An chei nasa in mihring pawh an tam hle. Josh nen kan thleng chu minlo lawm laih laih a, ka tlangnel ve nghal maithei. Mahse, a ri nuaih nuaih a, Josh chuan ka kutah min chelh reng a. Chutiang hmuna kal chu ka nuam tihzawng erawh ani lemlo.

"Hello, Kim...Josh... Ka nau hi hmelhriat ve rawh u" Harish chu a hlim hmel khawp mai. Christian chu anni ngei e. Mahse, an hnam tihdan phung erawh an zawm vek thung tiin Josh chuan min hrilh.

A nau chu a hmeltha in a u ang bawka nelawm ani. Josh chu unaupa ang maiin a en tih ka hmuthiam bawk. Josh chu Harish-an mipa ho zingah hruai pheiin ka kal kual vel ta ngawt a.

"Tihdan hrang hrang maw?" Kelly aw ka hriat chuan ka insangmar hle. Helai hmunah hian a kal ve dawn tih reng ka hrelo. Alam hawia ka inher chuan restauranta Josha kalpui hmeichhe nalh zet kha abulah alo ding a, an chhelo viau nangin an bula awm erawh ka thlang ngailo ang.

"A fa ni miahlo chu a fa-ah puhin abulah i cheng leh a... Anu khan hriase engtinnge a ngaih ang le?" a thiannu bulah chuan zawite hian engemaw hi a sawi sap a. An nui vel chu ka lo enreng a..

"Oh... Ka thiannu hi ka unaupa kawplai mek, Anu leh pa duhpui em em Dr. Michelle anih hi.. Nangmah vang hian a thlah chu ring duh suh" Michelle a tih chu alo nui hak a. "Oh... Kelly, engkim sawi angailo" a aw chu a nalh viau leh nghal. Mizo anglo mahse, Mizo a ni tih erawh ka hrethei thung.

"Fapa neihchhun leh Nu inkar chhe vek tur pawh pawiti hauhlo nang ang mi hniam lutuk hi an vang khawp ang, mahni nihna hre miahlo" ka khur dar dar a. Kan bul hnaia awm ten Kelly tawng an hrethiamlo hlauh chu ka vanneihna awmchhun ni maiin ka hria...

"Kelly, i lei kha veng tha rawh" a tawng ringlo nangin a hlauhawm thung. ka hnung atangin Josh chuan min rawn kuah a. Awmdan tur pawh ka hrethiam chiahlo. "Bawihi hi ka nei thuai ang" ka ding ngil awt a, ka balance hlohin ka tlu tur chu a ban tha chak zet chuan min lo vuan a.

Kelly mitah chuan min thah mai a hrehlo tih a lang chiang hle. Michelle erawh a ngawi hmak thung.

"Bawihi, kal ang le" min kaisawn a, ngawirengin a kalna lam chu ka pan ve mawp mawp ringawt.