LALMUANAWMA: CLIMAX & BAD TRAGEDY! [Rintei Thattu Chhuina Kal Zel] (COMPLETED)

Hnuchhuina lampang chi ho
Chhantea Pautu
Posts: 113
Joined: March 19th, 2018, 10:31 am

LALMUANAWMA: CLIMAX & BAD TRAGEDY! [Rintei Thattu Chhuina Kal Zel] (COMPLETED)

Unread post by Chhantea Pautu » May 20th, 2018, 9:55 pm

CLIMAX: BAD TRAGEDY! [RINTEI THATTU CHHUINA KAL ZEL]
Author: Chhantea Pautu


Chapter 1

From The Begining!?

A hma daiha lo inmung fê tawh lo irhchhuah tanna chu kum 1966 kha a ni! Mizorama sipai thuthmun thenkhatte beih a ni a, India sawrkarin ama ramchhunga 'Jet Fighter' meuh a rawn hman hma khan sipai hmun thenkhat chu lâk hman a ni hial mai, Aizawl sipai hmun erawh lak a ni hman ta lo. Khatihlaia India sawrkar kha, ama ramchhung ngei beih nana 'Jet Fighter' meuh a hman avang khan dem a hlawh deuh hialin an sawi nghe nghe!

Thalai rual thahnem tham tak ramhnuaia rammu-a rawksai aka nun rumra leh ralti tak hmabak turin an inpe a! An sual chhan chu, an ram leh hnam tan a ni! Silai a ri a, thisen a luang a, nunau-in an tuar a, ram mipui an rûm a, hnamin hmelhmang thar hmabaka dah chungin hmalam hun thim a hmachhawn a. Kan ram chu thimin a tuam mup mup a, mahni in leh lo luahlum thei lovin mipui an chavai a, Kohhranho chu tawngtaiin a rampum huapin an ri mur mur a. Hnam Pasalthate leh min awptute inkara inremna a awm theih nan an tawngtai a ni! Chuti ang thim chhah tâwk tak chuan kum 20 chhung chu kan ram kha a tuam a ni.

Pu Laldenga hnuaia ram tana rammute leh India sawrkar chuan inremna, 'Peace Accord' chu an lo 'sign' ta a; chu chu kum 1986 kha a ni a. He thawnthu ziaktupa pian kum hmalam kum hnih khan a ni; hetih laia Mizoram Chief Minister Pu Lalthanhawla khan Pu Laldenga chu lalthuthleng a lo kian ta nghe nghe a! Tichuan, hnam sipai lo chhuakte chu India sawrkar chuan lo buaipuiin, Bangladesh ramri bula khaw pakhat Pharva khuaah an lo dawngsawng a, inremna saui tanin 'Mizo National Army(MNA)' te chuan an silaite an tung ta a ni!

Ram mipuite thaw a veng hawk a, Kohhran hrang hrangte'n,"Kan tawngtai chhanin a awm ta" tiin an lawm em em a!

Hetia, hnam sipaite lo chhuak hi, Pharva atang chuan Mizoram khawpui, Aizawl an pan a. Aizawl pana hnam sipai kalte hi CRPF te'n an 'escort' a ni. Hnam sipaite hi Bungtlang khuahah, an inthlakna turin thawmhnaw(civil dress) pek an ni a; mahse hnam sipaite hian duh lovin an hnam sipai 'uniform' nen ngat chuan Aizawl an lut ta zawk a ni.
Aizawlah chuan Mizoram mipui thahnem tham tak te'n an lo hmuak a, an motor chuanna-ahte chuan parthite an rawn vawm lut nawk nawk a! Zoram chu hlimin a lawm a, thawvenna tlang a chuang chhuak ta phawt mai. Ramin thim a zawhpêl a, hmelhmang thar a pu ta a ni. An tum ber, ram zalenna famkim hlawhchhuak lo mah se, an thawhrah chu ramin hmelhmai thar put na'n a hmang nameuh mai. Hnam sipaite kha an chhuanawmin an zahawm hle a ni.

Amaherawh chu, khatia, kum 20 chhung rammut a nih khan hnam sipaite zingah kawhmawh bawl lui talh duh tawk an lo awm ve zel a! Mi thinram tak tak, mahni rinhlelh zawng satliahte chunga kut leka, pawisawi an ni tih finfiahna tha tawk nei hauh si lova midang kutthlak duh tawk an lo awm zel a.
Tin, lohtheih loha hnam sipaite tana hnawksak, ngeiawm leh ninawm chimawm tak tak, ningkhawng hre lo khawpa ram hmangaihna rilru pu lo, 'Kawktu' ti-a an sawite kha an awm duh ve leh zel bawk! Chung mite tan chuan hnam sipai rammute zinga rawngra deuh leh kutza deuhte kha chu an tawrhhlelhawm viau thin reng a ni!
Mahse dikna hrulah hian, dikna ang taka lang, dik hauh si lo hi a kal ve thin a. Ram hmangaihna rilru pua inchhal ve si a, mahni duh loh zawng leh zuam zawngte zawng chawpa an chung inlek ta ngawt zel an awm thin! Thahnemngaihna hi a kalsual ve thei chawk bawk a!

Khatia 'Mizo National Army' te an rammut chhung pawh khan, thalai rual ram hmangaih tak takte karah, thianho mi panga inhlawmkhawma, an hotute hriatpui hauh lova duh duha chea sapatal ching hi an awm a; chung mite chu a hnu thlenga tu hriat theih mang si lova ram hmangaihna leh dikna duh intihna denchhena ram inkaihhruaina dan kalh zawnga khawsa hreh hauh lo pawl ruk pakhat lo dinna bulthut, a zung zungkaih tanna chu a lo ni ta a ni! An rammut chhungin ramhnuai sawrkar inkaihhruaina kalh zawngin an che ru fo a; hmingchhiat erawh, hnam sipai pumpui chungah a tla leh hlauh thung si thin. An chutih avang chuan mithenkhatte chuan hnam sipaite an hmuh tleu pha fo mai! Pawl pakhat hmingchhiat rup theihna erawh mi tlemte an ni thei thung thin si a ni!
Chung mite chuan khatia India sawrkar nena an inrem ta mai kha thinlung takin an pawm ve thei lova, an duhkhawp an la hmu lova, an duhkhawpin an la che tlat lo! Inremna saui tan a nih hnu-a, ram mipuite an hahdam huai huai hnu pawh chuan, anmahni ngaihdana dik an tìh kawng chu zawha sual rawngbawl tur erawhin an thisen lum chuan a nawr tlat a. A bultanna chu hote mah ni se, hun a kal tak deuh deuh hnu chuan an awm a ni tih hriat mang si lohin thil tha lo lo thleng thinah an inrawlhna a tam ta tial tial a; mahse hriatin an awm si lo. A hretu tan chauh lo chuan an hriat loh a ni!

Love Sufferer On Tragedy!)

"Muanawma a chesual!" tih thu chu a thinlungah a lo thangkhawk leh a!

Kum dang ang chu nise, zîngkar, tlâilam leh zânah khua a vawt deuh sûk tawh ang; a chhan chu, thlasik rim nam hriat theiha boruak inthlak chhoh hun a ni tawh tlat a. Mahse hemi ni, nileng erawh hi chuan khua a lum uap churh a, ni lah chu a sa vawl vawl hle mai bawk. Ruah sur tum inṭuaṭam vel a ni ngat ang!

Favâng khaw thengthawt khaw nawm lai leh boruak thîang tak hip luh vang vang tur a awm hunlai si-a, ni sensa hnuai khawlum uap churha thlantui fim bawl tak tak reng khawpa awm ngai ta chu, a ipik thlak lek lek thei a! Tlailamah erawh chuan ruah a rawn sur ta tak tak a, favang ruah sur a nih angin a ruahtui tlak a rual lo hle thung. Hmun thenkhata ruah bawhawk tam namen lova tam a sur laiin, hmun thenkhat leilung erawh a hul hiau thung lawi a. Hei hi a ni, favang ruahsur lêntlâk rual lo chu!

Chutia ruah a sur buan buan zawh chuan, khua a thiang kâk a, kha ruahsur khan, romei leh chhum awmchhun reng reng chu a tlengfai zo ta vek emaw tih mai tur a ni! Mi lunglêng mi tan phei chuan ngeiawm zawk khawpin ruah nan hnu hnimhnahte chu a fai sawr sawr hle a, ruahtui huh chambang hnimhnah luan huhtute chu ni chuan a chhun tle vei ser ser a. Siam zawh hlim ang maiin khawvel leilung chu a thar ser hian a hriat a. Khawhar mi tan chuan khawharna khawpin leilung lan danin a zir hle si!

A mi ngainat chunga thilthleng runthlâk tak avanga khawhara awm a, thinlung chhungrila hmangaihna parchhuak si lo kawl mektu Sangtei tan ngat phei chuan awm ngaihna hriat a har hle a ni! A thinlung chu a rum det det a!

Ni chu a tla dawn suar suar tawh. Tlailam boruak chu a hnîm rêih a, Muanawmate tualzawl tawp lama Bung zar hlim hnuaia thuthleng an dawhah chuan Sangtei chu a thu a. A melh ngai chu a melh ngawt ngawt a, a rawmawl chu a hum tat bawk. A ngaihtuahna a mang vek a; mahse hei hi a tan chuan a bultanna chauh a ni thei. Tawrhna rit leh tawrhhlelhawm zawk lo thleng zel tur hmachhawnin hmalama ke a pen a ngai si!

"Sangte, inchhungah lo lut tawh ta che"

Chhang lawk lovin a ngawi reng a, tawng zai chah a harsat a, hmangaihna avanga a phur rit tak chuan a uai fual hnawk a, hmangaihna chu na a ti em a ni!

"Sangte, lo lut tawh rawh, khatia i awm avang khan engmah kan siamtha thei tawh lo a sin! Chak taka i awm a ngai a nia!"

Sangtei chu muangchanga hawichhuakin amah betu chu a han en a; runthlâk zetin a melh a, a mitah mittui a tling pam a!

"Aw le, ka hrethiam e...ka rawn lut vat ang..." tiin za lo zetin a nui lui seih a. Amah rawn betu chu, 'Min lova luhsan rawh' tih melh hian a melh a!

Amah betuin inchhunga a luhsan chuan, ni a tlafel tawh. A thutna ngaiah thuin, a ngaihtuahna chuan Muanawma lam a hawi vek a. A thiannu, Rintei thattu zawngin tualthattu hnu a chhûi a ni tih an inhrilh laia hun an hmandunna in kha tuna a hma lawka in ngei hi a ni! A mitthla-ah- mipa, 'cool' ru tak, tawngtam lo, tlangnel china tawngduh viau, a changa a hmel a nelawm loh aia chhungrila fiamthu duh, a bula awmte tihlim tura ho taka awm hreh miah lo, hmeichhe sekrek khawih ang khawih hreh hauh lo, dam raih; a dam raih ruala thothang tha tak si chu a lo lang a! Dan rual lovin a biangah mittui a rawn luang a, a inhnit hlap hlap a!

"Muana, ka hmangaih che a sin...chu chu ka la hrilh si lo che a...!" hriat tham mang lovin a phun sep sep a.

A hmangaih a ni!

* * * * * * *

Lalthansangi hian a thiannu, Rintei thih hma kha chu Muanawma hi a hmu ngai lo; mahse a thiannu bialpa a nih miau avangin a hming erawh a hre fo mai! Rintei a thiha rinhlelh avanga man a nih khan rinhlelh loh nachang a hre lova. Ngaihdan mumal a nei hek lo. Mahse rinhlelhna thangvalh atanga Muanawma a fihlim hnu-a, Rintei nunhlui lungchhiatthlak zet an inhrilh a, an inkawm atang khan mipa rintlak tak a ni ang tih a hrethiam nghal a. Muanawma miziaah khan sawifiah thiam chiah si lova mi hip thei riau a awm tlat a ni! Karkhat vel lai an inchenchilh leh hnu phei kha chuan, hriat loh karin hmangaihna zûn hruiah a lo uai der tawh a!

Muanawma tawhsual tawh dan bawk khan a rilru a ko peng a, 'Engvang kher khera Hualtu khuaa zina ramchhuak nge maw a nih reng reng le? a ti rilru a! Hmangaihna avangin a thinlung chu a insawh a insawh a; awmzia erawh a nei si lo! He thilthleng pawi leh lungchhiatthlak zet mai avang hian Muanawma a hmangaihna chu thup rual lovin a puangchhuak ta phawng chu a ni e! 'Buichhia laih lovin a inpuang' tih zawng zawng a nei zo va.

Hmangaihna avangin a tap a! A hmangaihna dawngtu tur bera pawh a hrilh si loh chu! Heti em em hian a ni maw hmangaihna hian mihring a lo sawptliah theih! Sangte, a va hautak rem rem ve leh!

Kha tawhsual, ramhnuaia a thlen ni atangin nilina a ni ta hial mai! Muanawma hnuchhui kal mêkah khan Liandingngheta chu man a ni a. Muanawma'n Rintei pindan lehkhabu dahnaa samzai a hmuh leh, lehkhabua thisen kai a hmuhchhuah, forensic mithiam ten an 'test result' leh Liandingngheta DNA chu a inmil thlap mai! Tual thattu a ni reng ang em?
"HMELMA CHUAN A NGAM LOVANG A, MISUAL CHUAN A TI TLAWM HEK LOVANG, AMAH DOTUTE CHU A HMAAH KA VAW TLU ANG A, AMAH HAWTUTE CHU KA SAWISA ANG" - Sam 89:22,23



Link:
BBcode:
HTML:
Hide post links
Show post links

Chhantea Pautu
Posts: 113
Joined: March 19th, 2018, 10:31 am

Unread post by Chhantea Pautu » May 21st, 2018, 7:37 pm

LALMUANAWMA: CLIMAX & BAD TRAGEDY!
Author: Chhantea Pautu

Chapter 2

Intensive Care Unit!

Nurse duty chuan ICU-a damlo, nili zet nikhawhre lo va awm tawh chu a han en vang vang a, ''Vawiin hi ni ngana a ni ta!" tiin a phun sap a...

Chutihlai chuan damlo kut chu a rawn che aih aih a. Ramêngi chuan damlo chu a pan vat a, hmanhmawh taka chhuak lehin ICU-a damlo awm chunga mawhphurhna latu Doctor chu a ko ta vat a. Doctor a lo thlen chuan, a dinhmun chu a han enfiah nghal a, damlo thâwk lâk dan chu a han endik a. Damlo chu a rûm lo va, a meng hek lo; a mit vun erawh chu a phu leh dat dat thin a.

"Hma kan sawn hret niin a lang" Doctor tawngri chu a hriat theih chang chang a ni. Eng emaw chen a vil leh hnu-ah a chhuak ta a. Ramengi chuan damlo chu a han melh leh zawk a. Doctor chu a zui chhuak ve ta a.

* * * * * * *

Hualtu ram, Kawnpui ngaw hnuaia thil thlen zui dan chu hetiang hi a ni- Patling dung hnih chen vela sang, lêngkira Muanawma a tawlhthlak khan, a thlengthla rang hle mai. A thlengthla rang mah mah a ni. A ke lamin lei a tawk hmasa hlauh zawk a; mahse lungkhawkrawk kara a thlengthla chu a khawvel a thim mup a, a hriatna a tawp a, engmah a hre zui ta lo!

Ngaw an luh tan dawnin innghahkhawmna tur kha an ruat a. Chutah chuan Je-a leh Pa Rosiama(Je-a Putea) chu an awm daih tawh a. Muanawma chu darkar khat deuh thaw an nghak a, a lo la lang hlek si lo; a nghaktu tan chuan a rei duh zek mai. Khua chu a tlai rawih tawh a. An han nghak leh deuh a; mahse khua a tlai zel a, an ngaih a tha lo tan tlat! Khua chu a thim har tawh hauh lovang!

"Ka pute, ka ngaih a tha lo riau!"

"Ni khawp mai; mahse mipa puitling pachang tak tur chi a niin ka hria" tiin Pa Rosiam chuan a lo chhang a. "Thlen chu a lo thleng har a ni" a ti leh a.

"Heti ang ramhnuai pilrilah a la chhuakvak tam miah hlei nem!"

Je-a Putea chuan, "Tirawh, kan kalna hnu kha i han chhui leh teh ang" a ti ta nge nge a.

Khawthim hmaa an chet vat chuan an tan a samkhai zawk ngei ang. Khua lah chu a thim har dawn hauh lo lehnghal! Ngawa an luh tanna atang khan an sulhnu an chhui a. Ramhnuai, ngaw chhah zet, hmun rem tehchiam lo, a then lai hmun awih bengberek khawkrawk zet zetah chuan an kuk rawih rawih a; chhanna a awm lo! Je-a chuan an inthen tanna hmun chu a ngaihtuah a, chulam pan chuan a Putea chu a kalpui hmawk hmawk a.

"Ka pute, helai hi kan inthenna, ka hmuh hnuhnun berna lai chu a ni" a ti a.

A Putea chuan, "A hnûhmâ zawng la, i han enzui teh ang...kha khalam kha a kalna a nih hmel..."

Sa pela ramchhuak an ni lem lo bawk a, thawmdim lem lo-a kal Muanawma hnûhmâ chu hmuhhmaih a har zawk hle mai. Hnûhmâ awmna lam chu an chhui zel a, chutih pah chuan an au vak vak bawk! Lo fing chanve vel an kal leh hnu chuan, Muanawma inphih harhna kawrte tui awmna kha an thleng ta a, hnim palna hnûhmâ hmuh tur a awm lo zui nghal bawk. Chutih lai chuan ngaw hnuaiah khua a thim chu a ni tan der mai! Leilung erawh a la lang deuh riai ruai a, thil eng emaw hmuh theihna khawp chu a la ni e. Je-a chu Muanawma a tawlhthlak hmaa a dinna hmunah khan a ding a, a hawi ruai ruai a, a kuk rawih rawih a, a chang leh a thianpa chu a hmingin a han au a, chhangtu an la awm chuang lo!

"Kha Bawiha, i hnunglama lei pial deuh kha tawlhthlûkna hnuhmâ a va ang ve, han enchiang teh" tiin pa Rosiama chuan a va bih zui nghal a.

Chuhtah, an dinna hmun lêngkir sang vak lo hnuai chu a thlirthla vang vang a. Rangtakin lêngkir hnuai a panthla zui a, Je-a'n a zuithla nghal thuai a. An zuk thlen chuan Muanawma chu a lo mu sawp niai a. Pa Rosiama chuan a thaw a awm leh awm loh a han enfiah nghal a, hliam a neih leh neih loh a enchiang nghal zung zung bawk. Muanawma chu a thaw a la awm a, a lu-ah nasa vak lovin a pem a, a hnungzang leh nak vel a pilh deuh nin nian bawk; mahse koh a hre lo va, nikhaw hre lovin a awm niin a lang!

Pa Rosiama'n ruahmanna a siam zung zung a, Je-a chu an ramchhuahna ngaw hnuai, Dil rama ramriak thenkhatte pun turin a zualko ta a ni. Khuaah an inzawn thleng a, a zan a zanin Aizawl panpui a ni a, Durtlang Hospital-ah an lo admit a, a dinhmun an enfiah hnuah ICU-ah an dah ta a ni!

Muanawma nu a mangang takzet a, engmah hre lo va a fapa a awm chu, ani ang hmeichhe tan chuan manganthlak tak a ni. Sangtei a hrilh a, ani pawh a dang lo; thi tawh ang maiin a ngai a, mangannain a bawm a.Muanawma ICU-a a awm ni lina tlailamah, inah mamawh lamin Siama nen an kal a, zanah damdawi inah an chho lehnghal a! Ni nga chhung ngawt engmah hre lova awm ta chu thi tawh ang maia ngaih pawh thil awm thei tak a ni. Je-a pawhin nitin a thianpa chu a kan a, tih theih phei chu a nei lo! Tumahin tihtheih an nei lo a ni ber mai!
SI Zodinsanga pawh vawikhat chu a lo lang a. Pa Rokhuma tak phei chu, a hmelah a lungngai ru hle tih a lang thei!

* * * * * * *

Ramêngi chuan Zâna a thil tawn kha a ngaihtuah zui neuh neuh a. A dân pangngaiin a hun dik takah damlo dinhmun kha a enfiah a, chutia damlo bula a kal chu a banrekah kutin a rawn man chawt a. A phu chiang lutuk chu a auchhuak lo chauh a ni. A mantu kut chu a han en a, engmah hre lo emaw a tih, damlo kut kha a lo ni reng a...

The Damned Conspiracy!

Muanawma ni nga zet nikhawhre lova a awm chhûnga thil thleng pakhatah hian i han pêng lawk teh ang; nakkin zela thilpawimawh tak tur a ni tlat mai a.
He thil a thlen zan hi Muanawma ICU-a a awm zan lina zân rei tawh taka thleng a ni!

Muanawmate khûaa kawtthler pakhat, êngin a chhun phak loh chin, kawmkar hmun pakhatah chuan mipahnih hi an inbe ru sawr sawr a. An tawng chu a zawiin midang hriat an hlau hle tih a hriat. Mi pahnih inbiaa pakhat zawk chuan kawmkara lo awm tawh sa chu a va pan kha a ni a. Chupa chuan amah zuiru tu an awm tih a hre lo hlauh chu amah zuirutu tan a tihchi viau mai. Chutih lai chuan zinglam dar 01:00am vel chiah a ni.

Thli chu a thaw vûk vûk a, arsi pakhatmah a lang lo va, chhawrthla êng pawh chhawrtlak turin a êng a tangkai nep viau a; chu khawthim boruak hnîm ruih chu midang enthlâk leh zuiruk hna thawk mektu tan erawh duhthusama khaw awm dan duhawm a ni thung lawi a. Vawt tiin a khur hlak hlak a; tunhnaia a taksa a chak lo zual viau vang a ni!
Kawtthlera a chuangchhuak hlimhlawl khan, midang tanpui tur hmel pu lo zei zia zet mai hmel a hmuh avangin, eng emaw tak hriat tur awma a rinna chuan chupa chu a zuirûk tir ta ngawt a ni!
Mi pahnih tawngri chu hriat a châk hle mai; mahse anmahni a hnaih ang aiin thli thaw chuan ama lamah an tawngri a rawn chhem thlawk hlek si lo! A tan lah hnaih lehzual ngawt chu a tihchi hauh lo vang.

Chumite chu an inbe leh sawr sawr a, a hnu chuan a thimlai zel hrutin an kal ta a. Anmahni zuitu pawh chuan a zui zel bawk a, zuiruk an ni tih an hriat erawh a hlauhawm fu mai! Mi pahnihte chu kawmkar thim lai zel chuhin an kal zel a. A tawpah chuan khaw laili vel ni si, 'compound' zau tak a neih avanga thenawm awmchhunte in laka va fal deuh raih si-ah chuan an lut ta a!
Chu ina an han luh chuan anmahni zuitupa chu a rûm nghat a. In chu, thim china kal zel chungin a hnaih phei ve nghal a. Thil engpawh sawi se, an tawng chu hriat ve vek a duhna rilru a lian telh telh mai a ni!

Chu ina chêng chu mipathum an ni tih a hrechiang hle a, pa ber, pathlawi leh, a fate, nula leh tlangval an ni. Kum li nga liam ta khan chu in neitupa chuan nupui a lo sun tawh a. A nupui sun vawihnihna a ni nghe nghe! Bang bulah chuan bang thlâwp zaiha dingin bangah beng a dawh deuh daw daw a. In awmna hmun hi hmun zawl rem tak, a chhuat nghahchhana lei ring nghal a ni a, chu chuan bang hnaih pheia ngaihthlak rawngbawl hna thawktu tan kawng a ti awlsam hle. Inchhunga awmte chuan thawm an dim hranpa lo niin a hriat a, an ri lawng lawng lem lo bawk! Thli a thawt vûk vûk loh lai chuan, a ngaithla rutu tana hriat nuam tawk tak a ni.

"In va rawn lang har ve?" in neitupa chu a tawng hmasa ber a. A fate hi an awm lo a ni ngei ang, hlauthawng hmel leh thawmdim tum hmel a pu lo tlat.

Pakhat chuan, "Mi muttui lai tak a ni zawk..." a lo ti a. "Thil kal dan hi a duhawm lo riau tawh..." a tizui a.

Chupa tawngri a hriat chuan bang phena an tawng lo ngaithlatu chu a ner sawk a! Ha chang a thial ri bap a. Pakhat erawh a la ngawi reng thung. Bang phena ding chuan bihthlak a duh ta riau mai a. Tukverh lam pan chuan thawmdim takin a tawlh phei a. Parda inzar sir khat chu a kau deuh a, inchhung lam a han en chuan inneitupa leh mipakhat, a la hmuh ngaih hauh loh hi a hmu a. An khua leh tuia awm a ni miah lo mai! Pakhat chu chair-ah thu-in a ke lam chiah a lang a. Inneitupa chu a tawng leh a.

"Ka hlauthawng riau a nia..."

Chutah, anmahni enthlatu chuan thil hriatchhuah a nei thut a. A ipte a han dap a; mahse a phone a lo ak si lo. A chek tlak tlak a. Mi pathumte chu an ngawi deuh thap a, nakkinah chuan hmelthar pa chu, thupe aw khauh hian a rawn tawng ve ta a.

"Aizawl lama kan hotute chuan in fimkhur tawk lovah an ngai a ni...chet la tawh lo va zin bo tura thupek i ni" tiin chair-a thu lam chu a hawi phei a.

"Hlauhthawn tur a awm tawh hlei nem...tunah ICU-ah a awm mek...a damchhuak lo mai thei..."

Hmeltharpa chuan, "Zin bo tura thupek i ni!" a ti chang ta fal a. "Zorinsangi thah kha kan ruahmanna a ni lo!" a tizui leh a.

"Eng chhuanlamin nge ka zin ang a?"

"I dap chawp a ngai ang...i thisen lum i thunun zo lo va...heti anga langsara pawikhawih hi kan chetdan a ni lo!" tiin a meng vawt raih a.

"Engtikah?"

"Tun atanga karkhat hnuah lo inpeih ang che! Ani hi chu engmah ti lovin awm mai mai se la, rinhlelh a la kai lovin ka hria?" tiin zawt mitmengin inneitupa chu a han melh a. Ani chu a lo bu nghauh a.

Hmeltharpa chuan thu a neih hmel viau mai. Hmaitlang hriam tak, mitmeng vawt raih mai hi ani a, a la upat lutuk a rinawm loh.

"Zaninah Aizawl ka pan leh nghal dawn a, Pu Rokhuma dahbo chungchang chu..."
Chutihlai chuan thli a rawn thaw leh hum hum a, chupa tawng chu hriatkim theih a ni ta lo; thli thaw chuan a awh rei zek a, a reh meuh chuan thil pawimawh dang an sawi ta lo. Hmeltharpa leh mipakhat chu an chhuak ta a, bang bula awm chuan in chu a tawlh hlat san hret hret a. An intawhpalh thut loh nan, thimthamah rei fê a la awm a, chumi hnuah a inthiarfihlim ta chauh a.


The Lone Investigator Return!

A banrekah a rawn man chawt a!

A hma lawka nikhawhrelo-a let reng, ICU-a dah hial ngai khawpa 'serious' si kha, fiah pangngai takin a rawn tawng a; a awih lo hial zawk! Damlo khan thil mak tak a sawi a, a ngen anga tihsak hram turin a ngen a. Ramêngi tan chuan hnial harsa tak a ni. Khami hnu khan nihnih zet chu che chang miah lo leh harh miah lovin a awm leh tawh; ICU viltu a nih tawhna zawng zawngah a thil tawn mak ber pawl a la ni e!

Ramêngi chuan, a hun pangngaiah, tihdan pangngaiin damlo dinhmun enfiah turin a kal leh a. ICU-a luh dawna an thawmhnaw hak tur bik chu a han ha a. Damdawi in lian leh changkangah chuan, tihdan phung pangngaiin, ICU-a duty tur nurse-te hi 'trained' thlap an ni thin. Ramêngi pawh hi chuti anga inzirna nei thlap chu a ni a. A inpeih thlap hnu chuan pindanah chuan a han lut a, damlo dinhmun chu a han enfiah nghal a, engkim a kaltluangin a pangngai hle; chutia a en vel lai chuan damlo chu fiahfai fel tak hian a rawn meng hlawl a-

"Doctor hmuh ka duh a ni..."

A mit fiah tak a meng leh a rawn tawngchhuak ta mai chu Ramêngi pawh makti awm takin a lang tawh lem lo. A lu a bu nghat a, Doctor ko turin a chhuak ta nghal a. Chutih hlan chuan Muanawma chu khumtlângah a lo thu tawh a, rei vak lo hnuah Doctor leh Nurse chu an rawn lut a.

Muanawma chuan, "Ka pu, ka dam tawh...chhuah ka duh...heta mut hi ka kham ta e!" a lo ti tawng a!

Doctor chu a han ngawi deuh vang vang a; chutah, "I dinhmun a zir zir le" a ti dam thluam a.

"Ka dam tawh a ni...ka pu"

"I chiang meuh a maw?"

"Aw ka chiang a lawm"

"Eng pawh nise, han mu tha leh hle hle phawt teh...i dinhmun ka lo enfiah phawt ang'e"

Muanawma chu thuawih takin a han mu ve leh mai bawk a. Doctor chuan a han en a.

"A mak hle mai!"

"Eng maw ka pu?"

"Mak ka tih zawk tak chu...i lo luh a, ICU-a kan dah hnu che, zan thumna atang kha chuan engkimah i tha vek; mahse ting'e i harhchhuah theih si loh le!?" zawh bik pawh nei hran lem lovin a han ti a.

Chutia a han sawi chuan, Ramengi leh Muanawma chu an han inmelh zawk a.

"Ka pu, chhuah ka duh tawh a ni" Muanawma chuan a han tinawn leh a.

"Awle, i chhuak thei ang; mahse 'ward' pangngaiah nihnih pumhlum i awm leh phawt a ngai ang"

"Ka thei lo vang!"

"Engvangin maw?"

"ka tih awmzia chu awm zui ka ngai tawh lovang, ka tha a lawm"

"Ngai e a, ICU atanga direct-a chhuahtir che hi kan dan a ni lo"

Muanawma chuan, "A nih leh nikhat..." a han ti leh hram a!

Doctor chuan a han melh vang vang a, "Ni ang hmiang; mahse i dinhmun a that loh phah a nih chuan, mawh kan phur lovang" a ti ta a.

"Awle, a tha a lawm, ka hrethiam e"

Hetia Muanawma a luhlul viau mai hi a awm lo hran lo hle mai. Hnuchhui chhunzawm tur a la nei tlat a, 'Liandingngheta chungchangah khan eng ang thu chiang nge Police lamin an neih tawh ang' tiin a ngaihtuah a, a hmanhmawh ru riau mai a ni. Mahse ICU atanga chhuah tlang pawp mai erawh chu, a âwm lo a ti ve deuh a, ama tan ni lovin, amah enkawltu Doctor-te tana a venthawn vang zawk a ni. Chhuah erawh a duh hmanhmawh ngang mai thung. Nikhat dang han awm khawtlai leh phawt chu a ngai si a ni!

Muanawma ramhnuaia tawhsual a tawh a, lêngkira a tlakthlak khan nikhua a hre lo zui nghal a, a lo harhchhuah chuan damdawiin pindan pakhat, reh reih rawihah hian a lo awm reng a. A lu chu a rit lûk a, a na deuh ngut ngut bawk. Chesawn mai lovin a awmna pindan chu a han melh kual fê a, a awmna hmun chu ngaihruat dan a thiam nghal mai a. A ngaihtuahna-ah chuan, 'Eng chena rei nge engmah hre lova ka awm?' tih hi a lo lut a.

A taksa chu a kham thum a; mahse a rilru erawh a harh tha hle si. A thil tawn kha a ngaihtuah lêt a; chutih lai chuan a awmna pindana rawn lut thawm hi a han hria a. Ngaihdan thar a nei thut a; a awm pangngaia awmin a maimi'chhing leh ta daih a. Engkim chu a hre vek tawh,'memory lost' lam a awm lo hlauh a nih a rinawm. Mut chu a ning hle a; mahse a ruahmanna atana tul hle-a a hriatna chuan a mut tir hram hram a, a taksa kham themthum leh luna rit lûk mai tan pawh a tha ve reng reng ang. Nikhua a han hriat achinah chuan a ril a rawn tam ta em em a. Riltam a hre thar a. A awmdan pangngai ang thei bera tihder erawh a ngai si! A ni ruk ni a lo thleng a; a hnuchhui lai a sukuk a hlauh avanga a rilru hmanhmawh chuan chuti anga tihder chu a peih ta ngang lo a ni.

Ning fê leh helhkham nei teuh hian nikhat chu a han tlingtla leh ta hram a. An chhuah ni chuan SI Zodinsanga hmu tura kal nghal mai a duh hle; mahse a nu chuan tih taktê hian a remti ta tlat lova, a tuka hmuh mai a tum ta a ni. Damdawi in atanga an chhuah ni chuan, Siama'n a rawn hruai a, a nu nen, Sangtei a tel ve bawk, an in lam an pan ta a ni.

In an thlenin a chhungte leh Sangtei mitmei pawh veng duh lovin a pindanah a luttlang chho a. A tih hmasak ber chu, a pindan chhuat vel chîk taka enfiah chu a ni. Dawhkana lehkhathem lo dahtu khan hnûhmâ a hnutchhiah a ring tlat a; a beisei ang hnûhmâ erawh a hmu miah lo mai. A thinrim chu a insehruh a. Tunhnai hian a thinchhe thar riau a ni!

Face to Face!

A Phone chu a phawrh a.

"Muanawma ka ni e. Pu Dinsang thil eng emaw zawh che ka duh a ni!"

Lehlam tawng chu a ngaithla a."Liandingngheta chungchangah thu thar in nei tawh em?" tiin a zawt leh a.

Lehlam chuan a duh angin a chhang lo a ni ngei ang; a ner deuh sak a. "Aw ka rawn hmu ve ang; naktukah..." a ti a. "Chawei kham ve leh ka rawn kal ang" a tihzawm leh a.

Lehkhathem kha a phawrh a, a han bih leh chiam a; engmah hriatbelh tur a awm lo. A thuziak zawng chu a ni mai! A dah tha leh a, inhnuai lamah a chhuk ta a. A dik tak chuan a lung a awi hlawl lo a ni! Thutkhawmna pindanah chuan Je-a a lo awm ve reng tawh a.

"I tha tawh maw?" tiin a lo nui var var a.

Muanawma chuan a 'mood' fuh lo zet chu thup hram hram a tum a. A nuih let a. "Nangmah vang a ni; i chungah ka lawm e!"

"Ho lutuk, thian tha karah lawmthu an sawi ngai lo...rawn kal teh, i damkawr lai hian lo inkutelh leh teh ang, ka hneh ve tawh tâk mial che-in..." tiin a kawr ban chu a hlim sawt sawt a.

Muanawma chuan Je-a kawr ban hlim lai chu a han en vang vang a, a nui suk a, "Ti chiah ila a ni mai a lawm..." a ti ve ta a.

Je-a hi a sang deuh zawk a, a pumrua pawh a lian deuh zawk. A pian pawh tha tak a ni; mahse inkutelhah hian Muanawma hi a hneh ngai hlek lo va, mak ve tak a ni! An han inelh fiam chu an nuidun hawk hawk a. Thutkhawmna pindanah chuan Sangtei a rawn lut ve a.

"Indim rih ta che maw le, Muanawm..." tiin Muanawma chu a rawn melh râm râm a.

"Iau...i va han duat awm deuh ve" Je-a'n a lo tifiam zauh a.

Sangtei chu a sen ap ap a!

Zanah a mu hma hle. Sangtei awmdan a chîkin thil awmzia a hai hauh lo; mahse tun dinhmunah chuan a ngaihsak hman lo a ni. Zan rei fê thlengin thil awmdan leh ni theite a chhût a, ICU-a a awm chhunga a ngaihtuahna kha a chhui nawn a, khawvar dawn lamah chuan a lo muhil ve sek a. Hma takah a harh leh a, a mu mumal meuh lo. Thiltih tur pawimawh tak a neih avangin, a chhungte harh ve hmain a chhuak ta daih a. A haw leh chuan chawei an lo peih tawh. Chaw a ei sawk sawk a, muang khawtlai si se lovin a insiam a.

Motor a lachhuah mek lai chuan a nuin,"Mama, khawnge i kal dawn?"

"Aizawlah..." ti ngawtin a chhang a.

"I la dam kawr a sin maw le aw..." tiin a nu chu a phun nang nang a.

Liandingngheta chu Cenral Jail lamah an lo dah tawh a, Muanawma chuan, Police lamin tualthattu-ah an ngai nghet hmiah tawh a ni tih a hrethiam mai. Rintei chunga rawng taka che duh khawpa misual bawraw chu hmuh a chak vak lo; hmuh ngei erawh a duh si. Tin, a tul bawk. SI Zodinsanga'n a hruai a.

"Pu Dinsang, in manna lamah buaina intawk em?"

"Tawk lo. A awlsam khawp mai"

Muanawma'n Liandingngheta a va hmuh chuan a rin ang a ni lo tawp mai! Kum 30 bawr vel, sar veng vawng, pa lian pangngai tak a ni, a hmelchhe lem lo kher mai lehnghal. Sual viau hmel pawh a pu lo va. An han inkawm dawn tan chu a huntawngin a tibeidawng ve ta a ni mai thei, a luhlul hmel kher mai a. Muanawma lah a huntawng avang bawka thinchhe thar a ni bawk!

"Rintei thattu chu i ni a...?" zawt titih hian Muanawma chuan a han ti bawl a.

Ngawi rengin Muanawma chu a melh a, a ngainat loh hmel kher mai!

"A pindanah i samzai leh thisen hmuh a ni a, kha kha keima hmuhchhuah a ni a sin..." Muanawma chuan a han ti leh ngat a.
Liandingngheta chuan, "Ka thah a ni lo" a ti hmuk a.

"I sam zai leh thisen kha engtin nge i sawifiah dawn!?"

"Police hnenah ka sawifiah vek tawh; mahse an awih chuang lo! I bula ka sawi nawn kher tulin ka hre lo!"

Muanawma thinrim chu a inseh ruh nasa hle; mahse a thil hriatfiah duh a sawitir theih nan a inthlahdul a ngai ti erawh a hria a. Police ho bula a lo sawi tawh chu ngaihthlak ve vek a duh tlat! A han ngawi vang vang a, muangchanga Liandingngheta mit taka en pahin, "Rintei kha ka hmangaih a sin!" a ti ta a.

A hma ami chuan, "Kei pawhin ka hmangaih ve tho!" a ti a, a han ngawi dat a, "Mahse Zorinsangi kha i ngaih ang ngawt a ni lo vang!" a han ti leh a.

"Eng'e i sawi awmzia!?"

"Mak tak a ni!"

Muanawma chuan sawi tir ngei a duh a ni. Heti hian a han ti ta a, "Kei pawh, a tir kha chuan amah thattu-a rinhlelh ka ni a; mahse finfiahna chiangtaka an ngaih lak atangin ka fihlim thei. Police hnena i sawi engkim chu min hrilh ta che. I thah a nih loh takzet chuan...ka pui thei mai thei che a sin"

Liandingngheta chu han inngaihtuah deuh niawm hian a lang a, rei vak lo chhung chu a han ngawi ren rawn phawt a; chutah Muanawma chu rawn enin, "Police ho pawhin an awi lo a ni..." a han ti tha leh a. Mangang beidawng hmel hi a pu lek lek zawk mai!

Muanawma chuan, "Ka awih leh awih loh tur chu ka sawi lawk thei lo; mahse kei chuan tualthattu diktak hi man ni ngei se ka duh mai a ni. Thil nithei awm ang ka hriat theih nan i thusawi ka ngaihthlak a ngai si a ni" a lo ti vat a. Tualthatu a nih loh rin chu harsa a ti ve hle tho!

"A tha a lawm. A tleirawl dawna khatia ka khawihchhe ta mai kha, ka thiam loh a ni..." tia bultanin Liandingngheta chuan a sawi tan ta a.

A sawi chhung chuan Muanawma chu, rilru natna, tlawmna leh thinrimnate'n a thinlung a luh nget nget a!

"Khatia a chunga ka chet tâk mai avang khan Jail bang zutin 'criminal record' nei ka ni ta a; chu chu a pindana ka thisen leh samzai i hmuh avanga keimah min man mai theihna chhan pawh a ni. Police lamin ka kutzia leh chhinchhiah ngai engkim hi an kawl vek tawh tlat a!
Mahse ka thah a ni lo tih ka sawinawn duh. Zorinsangi kha i hmangaih a nih chuan ka thusawi tur hian a thawng deuh mai thei che a ni; min hrethiam a ni ang chu!" a han ti leh rih a.

"Ka inchhir takzet a, hrehawm pawh ka tizui viau a. Jail atanga ka chhuah leh hnu, nula pangngai tak a nih chhoh tan khan, a nu leh pate awm loh laiin ka tlawh leh zeuh zeuh a. A lak atangin ka hla thei lova, rilru dang put harsa ka ti a ni!

"Mahse, Zorinsangi ziaah chuan mak tih zet ka nei a; chu chu hmeichhe lepler leh zei tak zia a lo pû leh 'sex' lama pawisak a nei lo thar ta kha a ni! A hmaa Zorinsangi ka hriat thin kha chu- Mi nunnem, inthlahrung dek thin leh zezawi nuhnâp mai kha a ni. Chu zia erawh chu a la nei reng tho a; mahse mak tak maia a zia a inthlaka a danglam thut thut thin chu a ni mak ka tih tâk em em chu!

"Min lo hrethiam la, engmah zep lovin, Police-te ka hrilh bâk thlengin ka han hrilh ang che.

"Chutia ka tlawh leh zeuh zeuh tâk hnu chuan, a zia, mak tak maia a inthlak chu ka hmu fova. Ama mize pangngai a put lai chuan a ti dek a, min tih leh hlau awm tak hian a awm a. A zia a rawn inthlak erawh chuan, mi a cho harh a, zei tak hi a ni ringawt! Pawisak leh tih tit tet a nei lova, chuti a nih avang chuan kan mudun zeuh zeuh reng a ni!

"Chumi hnu chuan, eng emaw avangin ka leng lo ta vang vang a. A hnu-a ka va zin leh chuan, mak tak mai bawkin a hmaa a ze put hmang ni pawha ka hriat loh hi a lo put belh leh tawh a ni! Ama ze pangngai- Ze nêm dam dap mai leh inthlahrung dêk, nunnem ru zet baka, ze harhvang zei herh hawrh tak, mi chophur harh thei khawpa zei hiam mai a nihna belhchhah turin ze dang a lo neihbelh ni berin ka hria. Chu a zia erawh chu a ngainatawm loh kher mai. Kawlh leh kawlhrawn rukna riau nei hian ka hre thin; mahse chutiang chuan a awm zen zen lo thung!

"A hmaa kan lo mut dun zeuh zeuh tawh avang khan, khati ang tura ngaihna chen kha ka nei a, ka han basa ngam viau dawn ngawt a; mahse chuti maia awlsama keuhthluk theih a ni tawh lo! Ka han inhlei dawn viau chuan a kawlh hra mai a, engkim huama tharum zawng pawha pawisak nei lo hmel nunrawng mitmeng zet hi ka hmu hialin ka inhria, ka che zui duh ngai tawh lo.

"Nichin khan i hmangaih thu kha i sawi zauh a; khati anga a awm chhan kha nangmah a kawp tak vang che pawh a ni mai thei. A ze kawlhhrawng, tualthah hreh miah lo anga lang mitmeng erawh kha chu mak ka ti khawp mai! Chuti ang chu ni mah se, ka hmangaih miau avangin ka beidawng duh chuang lova, a chhungte awm loh tum chuan ka leng fova, tha takin ka awm ve mai thin.

"Tichuan, ka len hnuhnun ber tumin thil a kalfuh ta lova, chu chu, a pindana ka samzai leh thisen a awmna chhan pawh kha a nih ngei ka ring. Chumi tuma ka va leng chu, nidang ang lo takin min lo dawngsawng a, a hmel hmuh a nuamin mi a lêm hle lehnghal. A chhungte tumah an awm lova, ka phur rilru viau nghe nghe! Chu chu, a pindana thi-a an hmuh hma karkhat vel kha a ni!

"A pindanah kan inkawm a, mipate tana duhthusam khawpa mize zei leh mi cho harh mai kha a chhuah leh pek a, chu chuan min tiphurin min ti ngampa sawt bawk. Ka awmhlei ta viau mai. Ani pawh chu a tang tung lova, chumi ni chuan mak ka mutpui leh thei ngei dawn niin ka hria a; Mahse chutia kan awm lai chuan ka beisei loh lutukin a zia a rawn inthlak leh thut a. A mitmeng ka han en a, huatna leh hmuhsitna mitmeng hian mi rawn melh a, min nuih sawng a, tihel nuih, nuihsawh rawngkai dik tak a ni. Ka chi-ai ru deuh hial a, chutia ka chi-ai hlek chhung chuan khawi atanga a låk nge tih pawh ka hriat lovin thil herhna(screw driver) hi a rawn lekchhuak thut a.

"Ka samah a kek nghek a, min chhun tumin ka lamah a rawn lek ta mai! Ka lo indang tawk tawk a, chuti chung chuan ka ban bul veilamah hian vawithum chu mi chhun hman a sin. A hmanrua lek fua fua pah chuan mi bawh bawrh bawrh va a, a mitmeng ka han en a, rapthlak tak a ni! Tualthattu mitmeng chiah chiah a ni mai.

"Chutia kan inbengberek lai chuan a pa a rawn haw a, thil awmzia a rawn hmuh chuan mak a ti hle mai. Zorinsangi chuan min lo hek ta zat zat a. Amah pawngsual tumah min puh leh ta a ni! A pa chu a thinrim ta hle mai a, Police hnena report-ah min vau a, ka kal leh a nih chuan min thah mai hreh loh tur thute a sawi hial a.

"Ka zak a, ka thinrim hle bawk; mahse tualthah kher hi chu ka thisenin a ngam ka ring lo! Min chhunna chu a thi duhin a na ka ti hle mai a, an in atang chuan zak tak leh thinrim takin ka haw ta a ni. Khami ni bak kha ka kal nawn leh ta lo bawk!" tiin Liandingngheta chuan a thusawi chu a tlip ta a.

Muanawma chu ngawi rengin a la thu a, ngawi reng bawkin a tho a; Liandingngheta chu a be leh tawh lo reng reng! A hriatduh a hria a; mak tihna rilru nen a chhuak a, Sawi tur a hre lo!

A rilru chu a kal thui hle a!

"MIFEL CHU TUM ANGIN A DUAH HLUAH HLUAH ANG A, LEBANON TLANGA SIDAR THING ANGIN A THANG UAK UAK ANG" - Sam 12:12

Link:
BBcode:
HTML:
Hide post links
Show post links

Chhantea Pautu
Posts: 113
Joined: March 19th, 2018, 10:31 am

Unread post by Chhantea Pautu » May 22nd, 2018, 7:33 am

LALMUANAWMA: CLIMAX & BAD TRAGEDY!
Author: Chhantea Pautu

Chapter 3

Multiple Personality Disorder!?

Amah lo nghaktu SI Zodinsanga chuan a lo hui lauh lauh a; hmu âwm pawhin a lang lo. SI Zodinsanga chuan a va pan ta hial a!

A bul a lo thlen chuan, "Eng'e i hmuh dan; tualthattu chu!" a han ti a.

Muanawma chuan a ngawih vang vang hnuah, "Pu Dinsang, 'Multiple Personality Disorder(MPD)' an tih hi i hre ve tawh ngai em?" tiin a lo zawt ta daih a.

SI Zodinsanga chu a hawi â viau mai a; a hre lo a ni ngei ang. "Hre lo tawp mai...eng lam nge ni a!?" a ti ta chiah reng a. Muanawma'n a zawhna kawnghawi lo lutuka a chhang chu a lawm vak lo niin a hriat!

"Rilru lam natna a ni ber awm e" tia Muanawma'n a chhân zawh chuan, "Rawn kal rawh, Restaurant fianrial tha tak awm hmasa berah ka chawlhpui ang che chu, ka 'treat' ang che" a tih zawm zat a.

Chu Police Officer, induhtawk ve tak chu a meng nur nang a; mahse Muanawma hian an tan hlutna riau a nei tlat a, chu chu a hria a ni chêk ang, tha tak chuan a zui ve leh ta zawk a. Restaurant-a thuthmun an han rem fel chuan, an eitur lamin an titi zui ta nghal a.

"Liandingngheta kha tualthattu a nih i ring nghet reng reng em?" tiin SI Zodinsanga chuan a han zawt nawn leh a.

"Ring lo!" ti ngawta chhân pahin Muanawma chuan an eitur chah chu a ei mawlh mawlh a. A taksa a chak lovin, eitur tha mamawh hnem hle-in a inhria a. SI Zodinsanga chuan makti leh lungawi lo hmel lek lek hian a han en a, a chek tlak tlak a. Muanawma chuan a lawm vak lo hmel chu a man thiam vat a, "Ka rin lohna chhan ka la sawi hlei nem Pu Dinsang" a han ti leh vat a.

"Han sawi ta che"

Muanawma chu a han ngawi vang vang phawt a, "Multiple Pesonality Disorder' hi 'fact' nge a nih 'fiction' tih thu-ah mithiamte ngaihdan hi a rual bik lem lo; mahse kei chuan a awm theih ka ring!" a han ti a.

SI Zodinsanga chuan, "Chu thil i han sawi teivet pawh chu...eng'e he thubuai nen hian a inkaihhnawihna ni tehchiam a!?" a han ti a, a lawm lo a ni tih pawh a thup duh tawh lo.

"Pu Dinsang ka sawi dawn a lawm...lo dawhthei ve deuh la maw le" a han ti leh a.

Chu SI, pa hmel pangngaitak leh pa inkhaithli ve tak chuan a dawhtheihna neih zawng zawng a sawmkhawm a ni ngei ang, hmel nur nang chung hian a ngawi ta reng a.

"Liandingngheta'n, Rintei'n thil herhna(Screw Driver)-a a chhun thu a sawi vel boruak kha eng angin nge in ngaih?" tiin Muanawma chuan a han zawt a.

"Kha zawng, a hmai phih a tumna hmanrua mai a nih kha; a phuahchawp thiam ngawt a lawm!"

"A phuahchawp ni ta se, engtin nge Rintei pindanah khan a samzai a awm theih ang? Lehkhabu-a a thisen kai pawh kha?"

SI Zodinsanga chu sawi leh tur hre lovin a ngawi ta reng a. A hnu fê chuan, "Chu chuan tualthattu a ni lo tih a kawk hlei nem...a ni lo em ni?" a ti ta ngawt a.

Muanawma chuan, "Ka hre miah lo! Mahse, Liandingngheta banbul veilam kha inchiu-na hnuhma ser ang deuh hian hmun thum lai-ah a ser a sin!" a han ti leh a.

Lawm loh hmel fê hian SI Zodinsanga chuan, "A inchiu-na pawh a ni mahna...i thil hmuhchhuah avangin kan man ta chêk a, Liandingngheta chhanchhuah tumte pawh i ang e" a han ti ta ngat a!

"Ni ngawt lo ve, Pu Dinsang. Kei chuan tualthattu diktak man ka duh a ni" a ti a, SI Zodinsanga tawng leh hma chuan, "American Writer, Sydney Sheldon-a Novel, 'Tell Me Your Dreams' tih kha i chhiar ve tawh em?" a han tihzawm leh ta daih a.

"Chhiar lo!" a lo tibul hmak a.

"Chu tak chu a lawm, Liandingngheta hi awk chiang ta em ema i ngaihna chhan, 'Multiple Personality Disorder' chungchang hi pawimawh riauin a lang tlat a ni"

"Lehkhabu chhiar leh chhiar loh nen a inkungkaihna awm reng reng ka hre lo...heti ang mai maia hun khawhral turin ka hun a hlu lutuk" tiin SI Zodinsanga chu a ding ta hluai a!

Muanawma chuan, "Pu Dinsang, min hrethiam rawh, i hriatthiam theih dan turin sawi ka han tum ang'e" tiin thupha a han chawi a. SI chu a thu leh ta ruai ruai a

Muanawma chuan a han sawi tan leh a, "Kum 1998 khan American Writer, Sydney Sheldon chuan Novel, 'Tell Me Yours Dreams' tih chu a chhuah a. Chu thawnthu chu hmeichhe pakhat, Ashley-i, amah hringtupain a naupan laia a khawihchhiat avanga 'Multiple Personality Disorder(MPD)' natna vei chanchin, chu natna avanga tual a thah avangin ukil la naupang tak Davida'n theihtawpa chhanchhuah a tum dan chanchin hmanga a ruangam din chhoh a ni. A ngaihnawm zêk a sin!" a han ti a.

SI Zodinsanga chuan, "Sawi zel rawh" a lo ti hluk a!

"Multiple Pesonality Disorder(MPD)' natna neite chuan mihring miziaa thinrim theihna, hlim theihna leh 'feeling' hrang hrang awm ang ni si lo hian, mize hran hlak, chihnih emaw, chithum emaw an nei ta thin a ni! Chu an zia, a lo lanchhuah lai pawh chu, an awm pangngaia an awm hnu-ah an hre tawh ngai lem lo niin an sawi. Kha Novel-ah pawh khan Ashley-i khan ama mizia pangngai bakah mize dang pahnih a neih belh a. An hming, Toni tih leh Alette tiin a sawi nghe nghe a. Toni chu hmeichhe kawlhrawng, tualthah pawh hreh lo zia a ni a, Alette erawh chumi letling hlauh a ni thung!" a han ti a. A eitur lam chu a han eizo te te a, a hmui a tuaifai a, a mitmeng chu a thuk raih mai a!

SI Zodinsanga chuan, "Eng'e min hrilh chhan?" a lo ti leh boh a!

"A tuartu ber Rintei nundan kha ka ngaihtuah lêt a ni. Liandingngheta'n kum a tlin hmain a khawihchhia tih i hria ti raw?" Muanawma chuan a han ti a.

"Aw hria e. Man a awlsam phah ta reng a ni!"

"Khatih lai khan Rintei kha kum 10 vel chauh a ni. I hriat ve loh leh i hmuh ve loh chu, a Diary ziah a ni. Chubakah, Pa Rokhûma hnen atangin a chanchin chip chiar i zawt lo vang ti raw?" a ti leh ta zel a.

"Zawt miah lo!"

"Zawt tur i nia sin, Pu Dinsang! Kei chuan, tualthattua rinhlelh hian pawi a khawih ngei a ni tih finfiah na'n a nun hmasa hriat a pawimawh ang bawkin, a mi thaha nun hmasa hriat hi a pawimawh ve-in ka hria" tiin mak ti deuh tak hian SI chu a han en a.

"Multiple Personality Disorder' leh Sydney Sheldon-a Novel min hrilhna chhan kha ka zawt chein ka inhria!" a lo ti hluk a. Tlangval kum 26 bawr vel lekin a tihtur a hrilh niawma lang chu a ngaithei tehchiam lo a nih hmel!

"Liandingngheta chhanchhuah nan!" Muanawma chuan a ti ve ta khauh a.

SI chu a thinrim ta hle mai, a meng dur khup a, a nelawm loh viau mai bawk, "Police-te hi min ring lo hle mai maw!?" a ti deuh tuarh a. An chawlhnaa chawl vete chuan an rawn en thap a.

Muanawma chuan hmel pangngai thlap hian, "Keimah avanga in man a ni!" a lo ti mai a

"I va chapo ve le...nangmah avanga kan man a ni emaw ni lo emaw, tualthattu a ni tho tho!"

"Keimah, tualthattu-a min ngaih ang tho khan maw!?" Muanawma chuan a lo ti leh khauh a. Mak tih hmel zetin SI Zodinsanga chu a en ta reng a.

"Ihh..." tawng zui lovin SI chu a inthlahdul ta zawk a. Rintei thattu nia an rinhlelh avanga Muanawma an man lai khan, finfiahna nghet tak neiah an lo inngaiin, Muanawma lakah an uang viau a nih kha. Constable ngeiawm deuh phei kha chu!

Muanawma chuan a han sawizawm leh a, "Liandingngheta'n Rintei nena an inbengberek dan a sawi kha kei chuan ka awih tlat a ni. Rintei hi kum a tlin hmain a taksa leh rilru na taka hliam sak a ni a; chu chuan a rilru lamah nghawng tha lo tak a nei thei tih chu Doctor-te pawh zawt la, an hrilh thei ang che. Finfiahna awm lo mah se, a tawhsual tawh dante ka ngaihtuahin Rintei leh 'Multiple Personality Disorder' hi ka ngaihtuahzawm ta tlat a. Liandingngheta nena an inbengberek ṭuma Rintei zia a awm zui zel dan hriat a pawimawh khawp ang. Liandingngheta kha ka zawt ta lova, Pa Rokhûma tal ka zawh a la tul ang chu. Mahse hei hi Rintei thattu diktak kan hmuhna kawnga min pui theitu tur a nih leh nih loh erawh ka chiang lo! Pawikhawihtu diktak ni lo hi kan tawrhtir ka hlau hle a nia." a han ti leh a.

SI chu a ngawi tak rûn a. Muanawma bawk chuan, "Rintei serha mipa chi awm leh, Liandingngheta DNA hi en mil a ni tawh em? Min hrilh thei ang em Pu Dinsang?" tiin zawldawh takin a han zawt ta a.

SI chuan muang ban chat hian, "Aih...la enmil miah lo..." a ti a.

Muanawma chuan a rilru te tein, "Nangni ang meuh hi chuan tihsual neih loh tur a sin le; finfiahna thil niawmtak hmuh tâk avanga phurluata nawr tawk tawk that loh zia chu min man tum pawh khan in hre tawh hle si a" a ti a. A ri erawh chuan, "Enmil a tha ngawt lo maw?" a tidam diai thung a. Chhaihkawlh belh leh kha tha-in a hre tawh lo a ni!

SI Zodinsanga chuan, "Ni e...thiltih awm tak a ni a lawm" a ti tha ve ta a.

"Thil pakhat, nangmah tih chauh lo chuan an hriat miah loh tur ka han hrilh ang che. ICU-a ka awm chhung khan ka awm mai mai lova. Hualtu-a ka awm lai, Liandingngheta in man dawn tih min hrilh hnu pawh khan ka ngaihtuahna a chawl thei chuang lo. Mahse, vanduaithlak takin Hualtu ram, kawnpui ngawah khan ka chesual ta hlauh a, nikhawhre lo va awmin ICU-a dah hial ka ngai ta a nih kha. Hun erawh ho takin ka khawhral vek bik ta lem lo. Ka tawhsual tawh avanga nikhua ka hriatlohna atang khan ICU-a ka awm zan hnihna khawvar hma khan ka harh tawh. Thihpui tham nâ ka nei lo niin a lang. Mahse harchhuak angin ka awm duh ta miah lova. Ka awmna pindan kha a reh a, ngaihtuahna vahkual tir vel na'n duhthusam a ni tlat a ni. Tichuan, ICU-a ka awm zan lina zânah khan zanrehah ka chhuak a, kan vengah ka kal ta a! Hetia ka vachhuahna chhan hi; Liandingngheta chauh ni lo pawh a hma daih atang tawha rinhlelh dang ka neih tel vang a ni ber. Liandingngheta chu ka thangvalh hnaih bertu a ni. Mahse, khami zan atang khan tualthattu hi Liandingngheta a ni lo vang tih, rinna tur chhan tha tawk tak hria leh hmuin ka inhria. Tuna ka sawi ang bak erawh hi chuan ka hrilh chiang thei rih bik tlat lo che a ni. Hmabak tam tak a la awm tlat mai" tiin a han sawi leh a, a chawl det a, "I hote pawh la hrilh lo la ka duh a ni. Finfiahna chiangtak ka hmu thei rih lo tlat hi min tikhawmuangtu a ni ta a, an aw ri ka hria a, an hmel ka hmu thei tlat lo" tiin dawt tlem a han sawi zauh a. Mi pahnih hmel kha chu chiangtakin a hmu ngei a; mahse engkim, a hmuh leh hriat ang ang hrilh erawh him lovin a hria a ni! A diktak chuan he'ng thleng thlenga hrilh hi Muanawma hian a tum rih lo; SI Zodinsanga thinlung thawidam deuh tula a hriat vang mai a ni a.

Friendship Never End!?

"Eng'e an sawi?"

"Ka sawi thei rih lo!" tiin a sawi tlang rawng a. SI Zodinsanga chu a meng nûr hle.

"A nih leh, ICU viltu nurse kha engtin nge i hmin?"

"Thil chiang tak ka hrilh" ti ngawtin a lo chhang leh mai a.

Chutih lai chuan Muanawma phone chu a rawn ri a. Phone a han lâk chuan a nu a lo ni a. A han ngaithla vang vang a, a hmel chu a hrilhhai hmelin, a danglam hle a. SI chuan a phone hmang lai chu a lo en reng a. Muanawma hmel danglam ta viau a hmuh chuan, "Eng emaw a thleng a ni ngei ang" tiin ngaihdan a lo siam ve mek bawk.

Phone a han hmang zo chu Muanawma chuan engmah sawi lovin a melh ngai a melh vang vang a, a phone chu a han hum vang vang bawk. Rilru buai leh chi-ai hmel hian a lang deuh lek lek a. SI chuan a han be ta nge nge a; a hmel a enin thil awmdan awm ang chu a man thiam a ni ngei ang.

"Thil tha lo a thleng em ni? Eng'e ni ta?" a han ti ta a!

Muanawma chuan harhchhuak ta thut niawm tak hian a lu a han thing nawk a, "Ka thianpa Je-a pa chu, an inchhungah a tlusual a, ka pawh chhawn lovin a boral nghal a ni awm e!" a han ti a

"Ah! A ni maw..."

"Ka thianpain min intihhlum san hnu-ah ani hi ka thian neih chhun a ni a..."

"A pawi hle mai..."

Chutih lai chuan dar 3:00pm a ri vel mek a.

Muanawma leh Je-a inlaichin dan hi i han sawi zui leh lawk teh ang- Anni pahnih hi, a tak leh a mei ang maia inzui dun reng ni lo mah se, an inkawm tanna a rei tawh fê mai. Je-a a tleirawl chhuah chhoh tantirh hian, a nu chu a boral a, a pa nen chauh an khawsa zui ta a ni. Vanduaithlak takin unau pianpui dang a nei miah lova, a maltlat ve ngawk reng mai. Hun eng emaw lai phei kha chuan an pahnih hian an inkawp deuh chawt a. Je-a hian zu leh ruihtheihthil dang a ti ve zeuh zeuh fo va, nasa tak erawh chuan a ti lo. Muanawma erawh heti ang lamah hian a fihlim hlauh thung. A la tleirawl zual lai phei kha chuan Muanawma hi a thian kawpte reng rengin, engmah a tih ve loh avangin an zah ru em em fova. Je-a pawh hian, a hmuh laiin ruihtheihthil a khawih ngai lo. Mize inang lo, duh inang lo ni mah nise an inkawm fo tho mai. Inzui chawt erawh an ni lo tih kan sawi tawh kha. Je-a pa hi kum 50 bawr vel a ni tawh a. A pa-in a boral san ta chu a khawhar thlak kher ang chu!

Muanawma chu, a rang a rangin an vengah a haw nghal a, an inah pawh lut khawtlai lovin Je-ate inah a tlang a. A thianpa chu a pa ruang a va kilpui ve ta a. Tlaivar a ngai dawn ngeiin a hriat ta a ni. A tan chuan hun a hlu hle a; mahse mihring chunga vanduaina lo thlengte hi kan duh avang leh kan thu avanga lo thleng a ni miau lova, a buaithlak ta a ni ber mai. Engpawh nise misualte chan lam a that loh nan Pathianin lo chelhding hram rawh se!

Zankhuain a thianpa chu a kalsan lova, a bulah a awm ve chawt a. Je-a chu a mengsen ram a, a pawr phang mai bawk. A tuar hle a ni tih chu a hriat theih a. Muanawma chuan a thianpa dinhmun hrethiam tur khawpin a pa a lo sûn ve tawh a; hriathiamna thinlung chu Je-a tan a tawk rih viau mai bawk.
Postmortem a ni a. An vuiliam zawh chuan, Muanawma chuan Je-a chu a han bekbawr a, an in lamah a haw ve ta lawk a. A thianpa bula han awm reng chu duh viau mah se, tlai palh thut a, thilpawi thei awmin a hre tlat a. ICU-a a awm laia an venga mi, a enthlakte, a hmel hmuh ngai pawh ni lo, pa hmai hriam deuh thusawi kha a thinlungah a riak reng a.

"Karkhat hnuah lo inpeih ang che"

Khapa-in a biak, thuthlenga thu, a ke lam chauh a hmuh theih kha a hmel a hmuh tlat loh avangin a tawngri chauh a hria a. A aw atang kha chuan rin chu a nei thei mai; mahse a chiang ngei em tih a hre lo. Kawtthlera a zuiruk lai lah khan an inkhuh deuh hlun mai a, a tan tute ng'e tih hriattheih a ni si lo a ni! Khami zan atanga chhiar tana karkhat tling turin nili lo liam a nei tawh lova. Rinhlelh pakhat a nei a, a hmuh phak loha kal bo tir a tum miah lo. A buaithlak ta chu, a hmuhtheih loh pa kha tung'e a nih chiangtaka finfiahna a nei thei rih lo chu a ni. Rin chu a nei a, a rina chu a ni em tih rinthiam harsa a ti rih tlat thung. A mi zawn chu tung'e a nih a la hre lo! Chung vel avang chuan a ni, a thianpa lusûn pawh a duh anga a awmchilh theih loh. Kawng lehlamah chuan chhuanlam siam tur a dap viau a ngai ve a. A thil buaipui hi Je-a'n hria se a duh rih hauh si lo. Pa Rokhuma leh SI Zodinsanga hi chuan an hriat ngei a ngai a; mahse Rintei thattu a chhui tih a nu leh Sangtei'n an hria ringawt mai pawh hi a duh lo tan ta riau mai a ni. Ngawi renga a lo buaipui ta lo kha a la inchhir ang em tih erawh hriat a la ni rih lo!

Zanreha mipathum inbiakna a hriat atang khan, he thil lo irhchhuahna hi ril riau dawnin a hre thar tlat a. A chhungte tana thil hlauhthawnawm a awm ang tih pawh a hlauhlel love; chuvangin fimkhur lehzual a ngai dawn niin a hria a ni. Lehkhathem leh thu inziak bawk kha a ngaihtuahnaah a rawn lut leh thin a; eng'e a awmzia tih erawh, ngaihruat dan thiam har a ti hle. Thu rum tak kha a ni lova, han chhiar khan vauna a ang hle thung si. Mak ve tak a ni!

An in a han thleng chu, thutkhawmna pindanah a thu hnawk a, a chau takzet! Thuthlengah mu-in a han maimi'chhing vang vang a. A duhaiin khua a lum a, boruak a uap churh bawk. Chutia a han awm vang vang hnu chuan a tho a, ama pindanah kalin lehkha kha a han chhiar nawn leh a.

He thubuaiah hian a khin phak loh tawp tur, mi tu emaw, misual intelkhawm emaw a hmachhawn a ni mai ang em tih chu a ngaihtuahzui a. Chuti ang a nih chuan, a tih ngai leh awm dan ngai thlah lovin a buaipui zui zel ang a, he lehkha tifiah lehzual turin lehkha dang pawh a dawng leh mahna! Chu chu, vauna chiang zawk a nih ngei tawh pawhin a ring!

Muanawma chu a nuin a rawn au a. Inhnuaiah chhukthlain, a nu chuan thingpui a lo siam sak mêk a. Thingpui no chawi a, chhem hlarh hlarh pahin thutkhawmna pindanah a lut phei a. A inngaihtuah muk fê mai bawk. Sangtei a lo awm a, a lo melh zauh a, inbe zui lem lovin an awm a. Sangtei chuan Muanawma hmel a han hmuh khan biak lumlam chi vakah a ngai lo pawh a ni ang.

Muangchangin thutthlengah chuan a thu a, thingpui chu a han dût ri hraih a. Tlai ni tla tur chuan tukverh darthlalang chhan atang chuan thutkhawmna pindan chu a rawn chhun suar suar a. Nakkin lawkah ni chu a tla fel ang a, kawl a sen phût ang a, boruak a dai raih tawh dawn a ni. Ni zung chu chhumin a hliah avangin a lang sen phût tawh nghe nghe. Muanawma chuan thingpui senhang ngat chu a han dût ri leh hraih a. A thlumte, a pâwte, chini hmehte ai chuan a senhang ngat hi a ngaina laklawh riau a. Mihlim ho ang maiin! Inbe lova an awm vang vang hnuah...

"Sangte...?"

"Aw eng'e?" tiin Sangtei chuan a lo chhang var a.

Muanawma chuan, "Ka bulah hian lo thu teh...Changel chak zia ka lo hrilh ang che!"

"Changel chak zia a!?"

"Aw...Changel i hria ti raw?"

"Aw hria e...Balhla ang deuh hi a ni lawm ni?"

"Aw ni e...a chak a sin...rawn kal rawh, ka lo hrilh ang che!"

Sangtei chu nui ar ar pahin Muanawma bulah chuan a va thu a.

"Changel kung hi chem hriam takin han chhawk hmawk ila, a kung laimu rawn chawr leh hian a sat chhawktu mawngphe a hmu hman leh a sin..." a han ti tan a.

Sangtei chuan, "I ho emai a...awihawm loh loh" a han ti a.

"Lo ngawi la ka sawi dawn a lawm" tiin Muanawma chu a nui suk a! "Chuti ang khawp chuan a chawr chak a. A chawr chak em avang chuan, pa pakhat hian mak a ti ta viau mai a. Vawikhat chu changel chak dan chiah hre turin fiah a chak ta tlat mai a ni. Tichuan, a chem tahhriam hlim chuan, a chhip chu zawl dap turin changel chu a han fik rual hmawk mai a. A changel fik chhak lawka lungphek hlai ve deuh leh rit tha tak mai chu a han chawi tawrh tawrh a, rit a ti phian mai lehnghal. Chu lungphek rit tha tak mai chu, thaw ri tat tat chungin a han chawikang a, a changel fik chhum chhipah chuan a han chhipchhuan a. Amaha a tlak mai loh nan a inbuktawk dan a han siamrem a. A changel fik kha a len that avangin lung phek pawh chu a inhung rem tha em em a ni. Amah mai chuan a tla thei dawn lo tih a hriatchian hnu chuan, lung dang a zawng leh ta a. Nakkinah chuan, a zawh tawk lung lian tak pakhat hi a hmu leh a, rem takin a hun theih dawn em tih a han enfiah te te hnu chuan a changel fik tak awmna lam pan chuan ke-chawn sai ngar ngar khawp hian a han chawi leh ta tawrh tawrh a. Changel awmna a thlen hmain vawihnih lai a chawl nghe nghe; chuti ang khawpa rit chu a ni! A hmaa a lung dah hmasak kha tuna a lâk mêk ai hian a la rit zawk zui a..."

Sangtei chuan ngaihnawm ti hmel deuh leh thutak deuh hian a lo ngaithla a. Muanawma chuan a han melh zeuh a, a nui suk a. A sawizawm leh a, "A lung lâk hnuhnung zawk pawh chu changel chunga a dah hmasak zawk chungah chuan rem zet hian a han dah leh chiah a. A inhnek rem that em avangin kuta khawih loh chuan thli-in a chhem tla dawn hauh lo tih a chian hnu chuan, lungawi awm deuh hian a han thlek vang vang a, "Ti kha chuan i tawn tla zo tawh awm lo em mai a" a han ti sup a. Amahin a tla thei ang em tih a han enfiah leh hnu chuan a hawsan ta a ni. Zanah pawh a muhil tha thei lo, a phur lutuk chu a mumangah pawh changel tlawm lai hlir a hmu nghe nghe! A tukah chuan phur lutukin a changel fik awmna hmunah chuan a kal ta a. Changel awmna hmun a han thleng a, a thil hmuh avang chuan a ding chawt a, a thil hmuh chu a en ta tlawk tlawk a..."

Sangtei chuan, "Eng'e a hmuh?" a lo tivat a.

Muanawma chu a nui leh suk a. A sawizawm leh ta a. "A Thil hmuh chu hei hi a ni- changel chunga a chawi zawh tawk lung pahnih a chherchhuan chu leiah chuan a hrangin a lo tla daih a. Mak a tih tak em em chu changel laimu lo chawr ngauh mai chu a ni. Chuta tang chuan changel chu a chak hi a ti ta em em a!"

Sangtei chuan, "Chuan...engtin?" a han ti a.

"A tawp tawh..."

"I va han ho tak" tiin Sangtei chuan Muanawma chu a chum taih taih a.

Hei hi Muanawma rilru dik tak chu a ni. Sangtei tihhlim na'na Changel chakzia a sawi phênah hian a nun laimu innghahna chu a nghet ta em em a. Amah daltu chu tawntlang zel turin a inpeih hle tawh a ni; he thubuaiah hian eng pawh lo thlengin, lunglian tak lo awm pawh ni se la!

Muanawma chuan Je-a chu a riahchilh zui ve ta nghal a. Je-a pindanah an mudun mai thin. Kawng engkimah a thianpa chu a ngaihtuah ni berin a lang. A bulah a awm tam hle mai a; chutih laiin a hnuchhui erawh a ngaihthah thiang lo. Chhuanlam tur tingin damkawr angin a lang a, huanah hna an neih loh lai tak a nih bawk avangin, zan lamah Je-a bula awm tam viau mah se, chhun lamah hunawl a nei thei thung.

Je-a pa boral ni atangin nili lai a lo liam ve leh tawh a; chu chu, pa-hmai-hriama'n, "Kar khat hnu-ah lo inpeih ang che" tih a sawi zan atanga a karkhatna chiah a ni bawk! Hemi ni tak hian SI Zodinsanga'n a rawn be mial a. A thu rawn sawi chuan Muanawma beng a verh viau mai a; chu chu, "Rintei serha mipa chi an hmuh, 'laboratory-a' an vawn that chu a bo!" tih a ni.

Chu thil chu a bo a ni tih an hriatchhuah tâk dan chu heti ang hi a ni- Muanawma thurawn angin SI Zodinsanga chuan, Liandingngheta 'DNA sample' leh Rintei pawngsualtu chi an vawn that chu 'Forensic Expert' te'n an enfiah theih nan hma a la a; mahse an hmu zo ta hlek lo a ni awm e. Chuti ang a lo nih takah chuan Liandingngheta chu Tanina a la awm zui zel a ngai dawn a ang ta khawp mai. Muanawma chuan, he thil hi a lan dan ang ngawt ai hian a buaithlak tulh tulh niin a hria a. Kha thil kha a pawimawh viau mai si. Eng tia awm lo thei nge? Engtia bo nge? Tih lama ngaihtuahna sen vak mai chu a tum lo ta law law zawk a. 'Evidence' pawimawh tak pakhat chu a bo tawp a ni ta ringawt mai a! Tu emaw, thiltithei tak an inrawlh leh rawlh loh pawh sawi chian ngam har tak a ni ta telh telh mai! Tunah chuan 'Forensic Expert' ho kuta innghat tawh lova, ama thil hmuh leh hriat, a huntawngin a tawn thilte leh a ngaihruat zeldinna leh a chhuidawnnate, rem taka chuktuah khawma, a ngaidan finfiahna a zawn hmuh ngei a ngai dawn ta a ni!

Liandingngheta chu tualthattu a nih a la ring thei ta chuang hlek lova. Rintei nena an awmdan a sawi kha a ngaihtuah let chang erawh chuan, a thinlung a vit nget nget thin a. Rintei chu, 'lepchiah' tiin a han dem dawn a; mahse a harsatna kha 'Multiple Personality Disorder' ni thei ngeia a hriat avangin a han tîm leh deuh a. A chang erawh chuan he thu hi a thinlungah a lo lut leh thin- "Derthawng, i hming chu hmeichhia a lo ni e!" tih thu, tu emaw lo sawi tawh hi!

Mahse, a rin hi dik ta se: Rintei khan, "Multiple Personality Disorder' chu lo nei tak tak ta se.." tia a ngaihtuah leh chang erawh chuan; a chetdan leh Liandingngheta laka a awmdan kha a naupan laia khawihchhiat a nih vang a ni thei tih hriain, lainatna thinlung a pu leh tlat thung si a. A hnuchhui lai thû-ah phei chuan: a mi chhui hi, Rintei rawng taka thattu a ni pawhin a hre tawh lo! Pawikhawih thin, pâwl rûk, nghet taka intelkhawmte hnu a chhui ni hialte'n a inhria a. Engpawh chu nise, he thila ke a penluhna chhan chu, Rintei thattu chhuichhuah a ni; chu chiah chu a ni!

Zan lamah chuan Je-a nen an titi dun fo va. Zan reh tawh lamah hian Je-a chu chhuah nulh hi a ching a. Chutia a chhuah tawh chuan, Muanawma chuan a zui ve vat a, thlânmûalah an inzui thleng leh nge nge thin. A pa thlânah a lo awm a, va pawh duh chiah lovin, a vil reng thin. Hriat tham chiah si loh hian Je-a chu a phun sap sap a. Muanawma chuan a thianpa chu a khawngaih thei viau thin a.

Chutih lai chuan Muanawma chuan khawchhûngah a mit leh a beng a chhi ngun hle mai. Mahse, a mit a lên ngun viau chung leh, a beng a dawh zau viau chungte leh, a hriatnain hriat hmaih a neih hlau tak chunga a hriatna kalpel theitu awm lo tawp tura thil thleng a ngaihven chung chuan a bengverh zawng thil a hmu lem lo hle si! Pa-hmai-hriamate khan an ruahmanna an thlak zawkte pawh a ni mahna lê. A dik tak chuan, Muanawma chuan finfiahna fiah felfai fek fawk a mamawh tak zet a ni.

Zankhat chu Je-a nen mut hnu-in eng eng emaw sawiin an titi a. Inriak dang an awm tawh lova, an pahnih chauhin an riak tawh a ni. A titi hlut hnu chuan an han ngawidun vang vang a.

"Ka pa kha, amaha tlusual a nih ka ring thei lo!" tiin Je-a chu a rawn tawng chhuak ta hlut a.

Muanawma chuan, chhang lem lovin a thianpa chu a han en a. A hmel a pawr phang a, a mitmeng chu a nelawm lovin, a hmel a dur deuh khup hian a hriat a. Chumi phenah chuan rilru natna thuk tak pai hmel hi a pu tel deuh tlat bawk! Muanawma a ngawih reng tâkah chuan Je-a bawk chu a rawn tawng leh a.

"Muana, Rintei thattu kha hriat tumin i chhui ti raw?" a rawn tichhuak ta phawng a.

Muanawma chuan mak a ti viau mai. "A lo hre tawh reng a ni maw!" a ti rilru a. A makti hmel chu tihlan loh hram a tum a! "I pa ruang 'postmortem result' kha chiangtakin min hrilh thei ang em?" a ti ta daih a.

"A bek veilam, beng chung deuh chiahah na taka thil tauhna hnuhma a awm a; chu chu a thihpui niin an sawi" tiin Je-a chuan a han chhang a. "Amaha tlusual a nih ka ring thei lo!" a tih zawm leh a.

"FIR lam te hi...i rinhlelh si chuan..."

"A sarhû lai khan ka ti si lo...chubakah, tualthi a nih chuan keimah ngeiin ka buaipui ang" a han ti a. A hmel chu a dur khup a! A mit a sen rûm a!

"MIFEL TE TAN KHUA A LO ENG A, THINLUNG DIKTE TAN LAWMNA A LO THLENG" - Sam 97:11

Link:
BBcode:
HTML:
Hide post links
Show post links

Chhantea Pautu
Posts: 113
Joined: March 19th, 2018, 10:31 am

Unread post by Chhantea Pautu » May 22nd, 2018, 9:12 pm

LALMUANAWMA: CLIMAX & BAD TRAGEDY!
Author: Chhantea Pautu

Chapter 4

Blue Plan!

Thinrim insum zo lo va, che buan buan duh tur hmel hi a pu a. Muanawma chuan a hmel chu a han en thin a; a awmdan chu a duh miah lo!

"I tha maw?" tiin a han zawt a. Je-a chuan hre âwm pawhin a lang lo! A darah a va khawih a, a sâwi ta hial a!
Chutia a han sâwi tâkah chuan Je-a chu a inthlahdul a, pangngai tak hian a awm leh ta a.

"I pa boral thû-ah chuan engvanga ngaih tha lo nge i nih le?" tiin Muanawma chuan a han zawt a.

Je-a chu rei fê a ngawih hnû-ah a han thaw deuh hawk a; thil sawi tur nei, 'ka sawi ang nge sawi lovang' ti-a inngaihtuah mêkte pawh a ang mah mah mai. A rawn tawng chhuak ta a. "Thawnthu sei tak a ni" a han ti ngawt a. "Kum 1966 atanga 1986, kum 20 chhung, kan ram a buai laia 'Mizo Hnam Sipaite' kha eng angin nge i ngaih ve?" a han ti leh a.

Muanawma chuan, "Ka hrethiam lo...hnam rilru pute rilru atanga teh chuan, Mizo hnam tan an chhuanawm viau mai. Tunlai-ah, kan hnam sipaite'n zalenna an sual kha, awmze nei lo tawp anga chhuah duh tawk an awm erawh a pawi ka ti thin. Mahse, 'political party' te'n 'Mizo Nationalism' tih chhuanlama pawlitik an khel bawrh bawrh mai hi chuan, khang hnam sipaite hming kha a tichhe thei dawnin ka hria. Heti ang zawnga sawi thenkhatte hian ram leh hnam hmangaihna rilru tak tak put aiin, an 'political career' hi an rilru-ah an dah lian zawk hial mai thei, ka ti deuh" a han ti deuh duah a.

"A ni khawp mai...ka pa kha, 'Mizo National Army(MNA)' zingah a tel ve a; 'Remna Rûn' chhuak ngat a ni a sin" Je-a chuan a han ti a. "Muana, tuna ka thu hrilh tur che hi ngun takin ngaithla la, ka pa hi thih dan pangngaia thi ni-a ka rin lohna chhan chu i hrethiam theiin ka ring. Mahse thian tha ber leh thian tha ber indawr dan ang hi ni se la. Ka thusawi hi khawiah mah chhuak tawh suh se aw. Tin, ka sawi zawh hnû-ah engmah min zawtfiah zui miah lo turin ka ngen bawk a che. Mihring hming ka sawi tel dawn lo va; min zawt mah la ka sawi zui tawh chuang lo vang!" a han leh a.

Muanawma chuan, "Aw le" ti chauhin a lo chhang a. A rilru chuan thil tam tak a ngaihruat phah thung.

Je-a chuan a han sawi tan ta a, "Khatia, ram a han buai a, thalai tam tak ramhnuai sipaia an luh sup sup lai khan, ka pa chu a tirtê atangin ramhnuai-ah a chhuak ve nghal a. Mi tlawmngai leh dawihzep vak lo chi a nih avangin mite ngainat pawh a hlawh ta thuai a. Ramhnuai sipai Captain pakhat kaihza vengtu-ah a tang ta thuai nghe nghe a ni. Hun a lokal a, chu Captain chuan ramhnuai sipaite inawpna dan phêna pawl rûk pakhat awma tel turin ka pa chu a sawm ve ta a. Chu pawl rûk pakhat chu Ramhnuai sipai 'Inteligent' peng pakhat niin ka pa bulah Captain chuan a sawi mai a. Chu pâwlah chuan mi pasarih chiah an awm tur a ni. Ka pa an sawm ve tâkna chhan pawh hmun pakhata vai sipai nena an inkahnaah, chu pâwla tel zinga pakhat chu an kaphlum hlauh a ni awm e. Tichuan, ka pa chu engmah hrechiang lem lovin chu pâwlah chuan a tel ve ta a. A rûkin eng thil thil emaw an ti ta fova; a bikin khatih laia ramhnuai sipaite tana hnawksak ve tak thin, mizo, mahni mizo puite vai sipai hnena hek duh tawk, 'Kawktu' an tihte chungah khan roreltu an ni a, an hlauhawm hle a. An pawl hming kha ka pa khan a sawi lang chiah lo va, ka hriat tam a duh lo a nih ka ring. Rambuai chhung zawng khan chu pâwl chu ramhnuai sawrkar inawpna phênah a kal ve zel a. Ka pa chu an thiltihnaah tel ve fo mah se, an thiltihna zawng zawngah erawh a tel ngai lo. An pâwl inawp dan chiah leh a chhungrila an kaldan pawh a hre kilkelh lem lo a ni. Mahse an pâwla telte zingah chuan mi pakhat, amah aia upa zawk ngainat deuh mai a nei a; chupa hming chu, a thih hma pawh khan a sawi ri fo thin. Ani chu amah aiin a boral hmasa ta nghe nghe a ni. A thih dan chu thih dan pangngai ni-a a rin loh thû a sawichhuah zauh ka hre bawk. Chupa chu mi rilru tha, mi dik leh huaisen, tlawmngai lutuk chi ve tho niin a sawi a; chu pâwla a luh ve dan pawh ka pa luh dan nen a inang a. An pâwl member pakhat vai sipaiin an kahhlum avanga lut ve tho a ni. Ka pa nen chuan chu pâwl member-te zingah, a tira chu pâwl dintu ni lo awmchhun an ni bawk. Ka pa a awm ve tantirh pawh chuan chupa chu an mi rinrawl leh chhuanawm ber a ni mek nghe nghe a ni.

"Tumkhat chu thil eng emaw an tihna lamah an inhnial vak mai a. Ka pa-in a ngainat em em pa chu a lung a awi ta tlat lo mai a; a hnû-ah phei chuan an zing atangin a inthiarfihlim ta nge nge a. A chhan ni bera ka pain a sawi chu- Hnam sipai thenkhatte, Bangladesh rama an awm laiin lunghlu hlu tham tak kawltu an awm a. Ka pate awmna pâwl rûk lo dintu, member hlunte chuan neih ngei dan an ngaihtuah ta a. Chutihlaia thiltihnaa an rinrawl leh hmatheh ber, ka pain a ngainat em em pa chu dawt hrilhin an tih tir a. Hetia dawt an hrilh chhan pawh, an lunghlu neih tum dan chu a thianghlim tawk chiah loh vang a ni. Chu thil tihlawhtling ngei thei tura an ngaih lah chu, mi rilru ngil leh dik a lo ni kher si a; an ruahmanna a hriak vek chuan a tihduh loh an hlau a ni" a han ti a.

A han chawl a; botle-a tui chu a han in khawlh khawlh a, a sawizawm leh a.

"A dik tak chuan, a thiltih tur ringawt kha an hrilh a, a chhan leh avang dik tak pawh an hrilh chiang lo! Lunghlu chungchang phei chu a hre ve lo hrim hrim. A tih tura an tuk chu, lunghlu kawltu dah bo a, a bawm kawl chu ka pa-in a hrawn thin, Captain kuta him taka hlan a ni. Bawm chu hawn miah loh tur a ni a, hawng hlek lova Captain hnena thlen chu a tih tur a ni. Captain chu, ka pa leh chu pa chuan an hotu lu ber a nih leh nih loh pawh an hrechiang chiah lova! Mahse, bâwmah chuan lunghlu chu a awm ngei a nih a rinawm. Ka pa leh an ruahmannaa an hmatheh ber, chu thil ti tura an ruat chu, an zinga la awm rei lo an nih avangin, a tir atanga lo awm tawh sa mi pangate chuan, a rukin lunghlu atanga hlawkna tel an tum a ni thei bawk. Mahse thil a kaltluang ta lova. Chupa chuan, engtin tin emaw ni an ruahmanna tenawm tak chu a hrechhuak ta tlat mai a. Chutah, a kutin mi pawisawi lo nunna a lo la tih chu a hre zui ta bawk. A thian te'n ama kutin rûlkûa an zen tih a han hriat chuan a thin a rim ta hle a. Amah tirtute chu a chhuahchhal let ve ta sak sak mai a ni. Namen lovin an inhnial buai a, hriam leka kut inthlak duh hial khawpin thinrim hmel hmai sa an inchhawn hial a. Ka pain khap dai hlawm lo phei sela thil chhe zawk a thleng ngei ang. Captain chuan, bawm awmna chu a han zawt a; mahse chupa chuan, bawm a hmuh loh thu a sawi ve ta tlat a. Tumahin an awih lova, a finfiahna turin bawm chu a awm miau bawk si lo. Ruahmanna tenawm taka lunghlu neih an tum pawh chu, an nei thei ta bik chuang lo a ni. Ka pa thianpa chu an zing atanga a inthiarfihlim hnu chuan vawihnih khat bak an inhmu ta lova. Chupa ai chu midang, nunrawn hmelzet leh khawngaihna pianpui lo zet hi an la lut leh ta a ni. Ka pa pawh chu an zingah chuan a awm chho ve zel a; mahse an kal dan leh an thiltih dan a hmu tam chho telh telh a, an thiltih dan a dik zat lova hriatna a nei lian telh telh a. An ruahmanna leh an hmalâknate pawh a thianghlim chiah lo a ni tih a hre chho ta zel a. Ka pa pawh chuan chhuahsan mai a duh ta telh telh a ni. A hnu fê-ah phei chuan, ramhnuai sawrkar enkawlna hnuaia an pawl chu awm ni lovin: thian thenkhat kal filawr leh pawngpawrh zual, inlulin nuam ti, ramhnuai sawrkar hming behchhan si a, an mi huatzawngte, 'Kawktu' nia puh a, an chunga hlei len ching, thian ho khat intelkhawm satliah an ni tih a hre ru ta hlauh mai a. Ka pain chu thil a hriat tak hnu chuan, inthiarfihlimna remchang a melh ta rân mai a. A tawpah chuan a inthiarfihlim san thei ta hram a ni. A thianpa nen khan inhmu lehin an inkawp deuh ta chawt a, chumi hnu kum khatah, India sawrkar leh MNF te chu a inrem zui ta a, hnam sipaite chu ramhnuai atangin an rawn chhuak ta bawk a ni. Mahse ramhnuaia pawl ruk anga awmte chu an inhlawmkhawm kal zel a, khatia, India sawrkar nena an inremna kha an duh lovin an lungawi lo hle nghe nghe a ni. Ka han kaitawi tawh mai ang'e: tun thleng hian an kalphung tidanglam hret hretin an la awm ta zel a, a tira a dintute kha an boral deuh vek tawh. Mahse midangin an keng nung chho zel a, an awm tih pawh hriat lohin an awm ta reng a ni. Ka pa thianpa khan lunghlu kha kawlin an ring tlat a, tin, ka pa pawh, an pâwl a chhuahsan hnu-a a thianpa nena an inkawp deuh chawt avangin rinhlelh a kai ve bawk; chuvang chu a ni heti ang rilru ka put!" a ti a, a ngawi ta vang vang a.

Muanawma chuan zawhfiah duh tam tak a nei a- a sawifiah lo lulai em a ni; mahse engmah zawh a tum lo.

"CIA kalphung chungchang hi engtiangin nge i ngaihtuah thin?" tiin a han zawt ta zawk a.

Je-a chuan, "Ka hrethiam lo" a lo ti satliah a.

Muanawma chuan, "Cold war laia Russian secret service, KGB te nena an inbeihnate, British Secret service-te nena an tanrual tlatna phenahte hian, 'conspiracy' tam tak a awm ka ring a sin. A hotu lu, anmahni khâitu awm mah se, CIA huanga thawk Spy tam tak hi chuan, an hotute hriat hauh lovin, mahni mimal thila hlawkna um avanga thiltih an ngah ngawt ang le. I han sawi, rambuai laia hnam sipaite zingah pawh, an hotute hriat hauh lova mahni hlawkna um leh a dik lo zawnga thahnem ngai fal bik an awm hi mak ka ti hran miah lo mai; mahse, ngaih ropui zawk tur chu, dik tak leh fel taka tite an ni tho tho. Chutihlaiin chuti ang mite chuan hnam sipaite hmel an tihem tlat si a ni. Mipui thinlungah ser a siam bawk!" a han ti a.

Je-a chuan, "A dik ngawt mai" a ti a.

"Pawlitik huanga luta MLA hial ni thei, Joe Ngurdawla lehkhabu ziah kha i chhiar ngun ve viau ti raw?" Muanawma chuan a han ti ta daih a.

"Eng lehkhabu maw?"

"Wayne Cole, American Spy chanchin kha maw le"

"Eh! Lehlin a ni lo'm ni?"

"Kei paw'n lehlin emaw ka tia lawm; mahse Mizopa ziah ngei a ni"

"A nih chu maw le...ka lo hre miah hlei nem"

An han ngawi dun ta vang vang a...

"Chuti, Ian Fleminga'n James Bond-a chanchin a ziah phênah pawh, ngaihbel tur tingin a taka thil thleng a awm i ring ve lo maw?" je-a chuan a han ti a.

"Ka hre lo...a awm pawh a awm ang" tiin Muanawma chuan a lo chhang a.

A thianpa Je-a thusawi chu ngaihtuah zuiin a muhil thei ta mang hlek lo va. A hnu chhuiin a hnuhluhna leh a hnuchhui chhan ber, thil thlengte chu a inpersan ta riau hian a han hre leh rih a, muthilh harsa a ti viau mai; mahse khawvar dawnah reilotê a lo chhing ve sek a.

A tuk nileng mai chuan a pindanah a inkhung a, Je-a thusawi bawk chu a ngaihtuahna luhtu ber a ni. "...roreltu an ni..." tih a sawi lai khan Muanawma rilru-ah chuan thumal pahnih a lo lang zawk a, 'The Judges' tih chu!

A lehkhathem dawna thu inziak tawpa 'The Judges' tih inziak leh, a thianpain, '...roreltu an ni..." tia a sawite chu a han chhuidawn ngial a; inhmeh leh inmil riau mai hian a hria a ni. Je-a khan, kha pâwl hming kha a sawi lova, kha pâwla inhnamhnawihte hming lah a sawilang si lo chu a buaithlakna lai a ni. Chu aia la buaithlak mah chu- engmah zawt zui lo tura a ngenna kha a ni! Ngaihtuahna leh chhuidawnna baka ke han pen turin kawng a ping riauin a hria a, tihngaihna a hre lo ang reng hle a ni.

Je-a'n a rinhlelh angin, Je-a pa chu, mahnia tlusual ni lo va, thah a ni reng ang em? Je-a pa ramhnuai sipaipui, a kawmngeih em em chu tung'e ni ang? Je-a khan, a pa thianpa chu ama pa ai khan a boral hmasa a; a pa chuan thih dan pangngaia thi a nih a rin loh thu a sawi zauh a hriat thu kha a sawi a- chu chu tung'e ni ta ang le?

Muanawma'n chu'ng thu vel a ngaihtuah lai tak chuan, a rilru-ah Rintei pa, Pa Rokhûma pa thih chungchang a lo lang a. Amah, Pa Rokhûma khan, a pa thih dan kha mak a tih thu a hrilh tak a nih kha! Rintei pu nunhlui hriatchian tul tihna a nei lian ta hle mai a. A lehlamah, Je-a rindan, a pa chu thìh dan pangngai ni lova, tualthi ngei a nih a rin chu a dik theihna lai a awm tlat a ni. Je-a'n a sawi anga lunghlu chungchangah Je-a pa leh a thianpa chu rinhlelh an nih si chuan, he'ng thil inphiar vel zawng zawng pawh hi, pawl pakhatin lunghlu hmuhlet tuma an ruahhmanna kal zel pawh a ni ve thei tlat a ni.

Lunghlute, rangkachakte leh mihringin rohlû-a kan ngaihte reng reng hian sûai an nei a, a tam tham emaw, man tam tham emaw a nih phei chuan, mihring hi a tikhaw lovin a ti â vek thei tlat a. Sum, tuna 'pawisa' tia kan sawi chen hian âtna hlo a chang thei a ni; chuvangin pawisa leh thil hlû-a kan ngaihte'n min thunun hma ngei hian a hmangtu mihringte hian kan thunun ngei tur a ni. Miin rosum ûma thil a tih tawh chinah chuan a kal dik tawk tawh ngai lo. Hmangaihna chungchangah thleng hian a ni; nula emaw tlangval emawin rosum ûma hmangaihna 'game' a khelh tawh phawt chuan, hmangaihna hi rosuma leitlak lek khawpa hniamah a hmu tawh mai thin a ni.

Chuti ang vel chu a pindanah ngaihtuahna neuh neuh a, tlai ni tlâk dawn ruai-ah a pindan chu a chhuahsan ve ta chauh a. Sangtei kha a la haw lova, a tukah haw tum a ni a, Muanawma hian Aizawl lama dah a tum nghe nghe a ni.

Sangtei chu chokaah a lo awm a, chawei dawhkan bula chair inhûngah chuan Muanawma chu a han thu a.

"Sangte, khawvel ram hrang hrangte hian an ram a zalen theihna tura beitu, an ram leh hnam tana miropuia chhiar tlak tak an nei theuh ang a; nangin tung'e i ngaih ropui ve?" a han ti a.

Sangtei chuan anhnah a thliar fel melh melh a. "Mahatma Gandhi" tiin Muanawma chu a han chhang a.

"Engvangin?"

"Tharum tel lo, 'Non violence' ngaisang mi a nih avang leh; chuti ang taka a ram zalenna sualchhuaktu a nih avangin"

"Hun tawng a zirin tharum hi a tul hun a awm ve bawk a sin" tiin Muanawma chuan a han kalh fiam a.

Sangtei chuan, "Mahatma Gandhi'n India ram a zalen theihna tura tharum tel lova a beih ang bawk khan, Netaji Subhas Chandra Bose khan India ram tan zalenna a sual ve bawk. Mahse, ani kha chuan, tharum a hmachhuan thung. An pahnih hian India mipuite tan chuan 'hero' an ni ve ve a; mahse khawvelin a chhinchhiah danah, miropui zawk chu Mahatma Gandhi a ni ngei ang. India ram mipuite rilru-a milian zawk pawh Mahatma Gandhi tho a ni" a han ti a.

"Chu, Netaji Subhas Chandra Bose-a hnathawh ve chu, 'Engmah lo mai a ni' i tihna em ni?" tiin Muanawma chuan a han zawt a; a nui var var a.

"Ni lo ve, India ram tan chuan 'Freedom Fighter' dik tak leh, ram leh hnam tana mi chhuanawm tak a ni. Mahse, tung'e ka ngaih ropui tih min zawh avangin, ka mi ngaihropui chu miropui a nih zia sawi nan, midang nen ka han tehkhin mai mai a nih kha" Sangtei chuan a han ti leh a.

"Ka pi, i sermon tha dum dum hle mai..."

"A lo nih tak chu..."

"Naktukah pawh Driver bulah i thu thei ang"

"Hmela...!"

"Hmeichhe ril tak, min ngaihtuahtu ka nei a; mo atan an tha duh riau an ti..."

"I tawngthei..." tiin Sangtei chuan chum tumin a han tin ar ar a.

Muanawma chu a persawn zauh a, nui hak hak pahin a pindan lam a pansan ta a. "Chawei dawnah mi rawn ko la aw, Ka pi miril" a han tizui a.

"Teuh lo mai...chaw i nghei anga a ni mai"

Muanawma, a pindana a han lut leh chu a inngaihtuah mûk kher mai.

"Naktuk chu SI Zodinsanga hmuh ka ngai a ni. Thil zawh tur tul tak ka nei tlat mai" a rilruin a han ti a.

A khumah a kut pahnih lukhamin a han muzangthal ar ar a; a maimi'chhing vang vang a!


Searching Evidence!

Muanawma chu chawei kham atangin a pindanah a inkhung leh ta char char a. Thil thlen dan ringawt ngaihtuahin a zanlai ta der a; a mut erawh a chhuak der si lo! Kawnpui ngawa tawhsual a tawhdan te a chhuilêt a, amah thah tuma beihna a ni thei ang em tih hriatthiam har a ti hle mai. Lengkira a tawlhthlak hma hreta a thil hmuh kha chiang lo ruaia hmu kha a ni a. Ni tlak dawn tawh lam, ngaw hnuai thim deuh ruih tawh kara hmu kha a nih miau avangin, a mitvai khawhmuh mai pawh a ni ve thei bawk.

A mumanga a nî fanu a hmuh tum kha a han hrechhuak a. Tawitlanga Pûk, misualte chetlatna ni anga a mumanga a hrilh kha,'Kawnpui ngawa a chunga thil lothleng tur a mangphanna a ni thei zawk ang em?' tiin a han ngaihtuah a; Kawnpui tlangdung leh Tawitlang tlangdung chu tlangdung inhne rial a ni tho si. Chutah, a chhan pawh a hriat lohin hming pakhat a rilru-ah a rawn lang a; Vanlalruata chu a ni!

A nî fanu, Vanlalruata nupui ni ta, a pasalin a ngaihsak loh zet, nau chunga boral ta thlarau chu a pindanah rawn kal leh ang hial hian a han hria a, "Pu Liansiama fanu thlarau pawh khan eng chu nge maw min hrilh a tum le?" tiin a han tawngchhuak ta hial a!

Dawhkana a thil chhinchhiahna lehkhabu tereuhte chu a han ban a. Chutih pah chuan chumi bula Note-book lo awm, Hualtu an kal tuma Je-a'n Hualtungamtawna-Ui-No-Neihna panna kawnga a thlauh, a ruka a chhar, a ruka chhiara amah fiam nana hman a tum lehkhabute chu a han ban a, a chhiar ta a. Chu thil chu diary ni lovin, thil chhinchhiah nana hman note book hi a lo ni a! Hualtu atang khan a khampheiin a haw a, a thi lo chauh kha a ni deuh ber mai a. ICU-ah, a tih der chhiar telin niruk ngawt a awm, a thianpa fiam a tumna hmanrua pawh chu a lo la ngaihven hman meuh lova, nihnih liamta mai khan a bag a phawrh a, chutih pah chuan chu thil chu dawhkanah chuan dahin, en pawh a lo la en hlek lo a ni!

A tuk zinga tho hmel chu a pawrchap a, a mu mumal miah lo tih Muanawma hmelah chuan a lang thei. A mitmeng a sen ram a, Rilru hah leh tih tur tih ngei tur ti hreh em em si hmel hi a pu hialin a hriat zawk mah mah e. SI Zodinsanga a 'call' zawk a, chaw an eikham hnuin Sangtei nen Aizawl an pan ta a ni. Sangtei chu an inah a dah phawt a, rei awm khawmuang lovin SI Zodinsanga hmu turin a kal leh ta nghal a ni; hemite inkawmna boruak hi a ngaìhnawm thei riau zel.

"Pu Dinsang, evidence chu a test result record nen lam em ni a bo?"

"Aw ni e. Chu nen chuan a ni" a lo ti nghat a.

"A va mak ve!"

"Ni e, a mak a ni!"

"Eng rilru nge i put phah?"

"Ka hrethiam lo"

Muanawma chu a han ngawi vang vang a. "Tun hmain, tualthahna thil ni ngeia rinhlelh si, finfiahna mumal awm loh avanga tih zuzi tâk chu a awm tawh em?"

"I huangtau mang'e!"

Muanawma chuan a han melh zauh a, "Ni e, ka huangtau takzet a ni; hriat ka duh tlat a ni!" a han ti ve ngat a.

"Hrilh duh lo ta che ila"

"Min hrilh dawn tlat a lawm"

An han ngawidun vang vang a. Chutah, SI Zodinsanga chu a nui ta hawk hawk a; chu veleh Muanawma pawh chu a nui chhuak ve ta a. Nidang aia inpawh zawkin an titi dun zui ta nghal a.

Muanawma ziaa mak leh ngainatawm ru riau chu; a nunah hun harsa tak tawng mek mah se, ngaihtuah tur tam tak nei mah se, han nuih hawk hawk emaw, mite'n an nel theihna tura han fiamthu bawrh bawrh emaw hi a hreh lem lova; a kum en aiin a hun leh a hmun a zirin a insiamrem thiam riau zel a ni. A harsatna tawn zozai khan a chher puitling zel mai bawk a. Hemi ni-a an inkawm tum pawh hian engkim inbe lawk sa a, inhmu an ni nghe nghe a ni.

SI Zodinsanga chuan, "Chuti ang chu, ka hriattheih chinah pahnih kan nei. Pakhat chu pa upa lam a ni a, kum 2009 a thleng a ni. Pakhat chu, hmeichhia, kum 28 mi vel a ni thung. Chu chu kum 2013 a thleng kha a ni" tiin chung 'case' pahnihte chu a tlangpui Muanawma hnenah chuan a han hrilh zawr zawr a. Muanawma chuan ngunthluk zet hian a lo ngaithla a. A sawi zawh chuan, a hmeichhia zawk chungchang chu a ngaihven ta riau mai a; mahse tun tumah hi chuan Rintei thìhna nen inzawmna nei thei mah se, kan sawi lang tawh meuh dawn rih lo a ni.

SI Zodinsanga nena an inkawm hnu chuan Muangchang lovin a haw zui nghal a. Anmahni ina haw lovin Rinteite inah a kal hmasa zet a. Haw kawnga a chhuidawnna vela a ngaihtuahnaa lo lut thil eng emaw chu a bawhzui dawn a ni.

Pa Rokhumate in a thlen chuan an lo awm ngei a. Mahse Muanawma chu, inchhunga lut ta mai lo chuan an kawmthlang lam, thlanglam kawngpui atanga kawt zawn kawngpui pan chhohna, Rintei pindan tukver hnuai maia kea kalna kawng vel chu a pan hmasa ta zawk. A han thleng thla a, a ding vang vang phawt a. Ngun zetin thil eng emaw ni chu a zawng ta a. A kun kât kât a; a thil zawn chu a hmu lo mai ang tih a hlauthawng hle a. Bang hrul phei hi chu Pa Rokhumate chhungkuain an tifai fo dawn lehnghal vei nen. Heti lai hmunah hian, a ma chemte ngei, Rintein a kawl sak tak, amah Rintei nghawng an zaina hmanrua ni zui ta, a chemte nalh leh mawi zet kha an lo chhar tawh a nih nghe nghe kha; chu chu a tir lamah khan kan sawi tawh a.

Muanawma chuan a thil zawn chu a hmu mai lo!

Pu Rokhûmate kawmthlang, Rintei pindan tukverh zâwn hnuai vel bawr chu ngun zetin a thlek kual a. A duh chu hmu mai lo mah se, zawn hmuh ngei a tum urh hle. "Thil awm lo zawn tum ang mai a lawm le; mahse a awm ngei tur a ni! Chuti ni lo se, Police report-ah a lang ang a, 'evidence' pawimawh tak a ni ngei ang. Heti lai velah hian a awm lo a nih chuan Rintei pindanah emaw khan a awm ngei tur a ni bawk. Khatah khan a awm reng fo si a" a ti rilru a. Ngun zawkin ke-a kal chhohna kawng sira hnimte chu a han keu leh sawt sawt a.

Ngun lehzuala 15minutes vel, hnim kar a keu leh kât kât hnu chuan, a mitmeng chu phur tih hriat zet hian a rawn de sawr sawr a. Hnim kar atang chuan, thil herhna(Screw-driver) fawng sen, plastic tha chi, han tihfaia lang fim sen deuh ral tur, thil kilhna, arsi landan anga kak herhna tura thir an vuah, tuiek khâwn bar tawh chu a han lek chhuak a. Lungawi âwm zet hian a han thlêk a, sarângah a khung a, "Ama pindana awm thin ngei kha a ni" a han ti zawi sap a.

A thil duh a zawn hmuh hnu chuan, Pu Rokhûmate ina lenglut turin hmel pangngai tak pu-in a chho a. Kawngka a han kik a, Lawmsangi'n a rawn hawng a, a lo phul hlut a. Muanawma chuan a hnar a han piai sak leh zauh a. Lawmsangi chu a ner nâng nâng a.

"I pa a awm em?"

"Awm" Lawmsangi chuan a ti hmak a.

Pu Rokhûmate nupa chu thutkhawmna pindanah an lo awm a. Muanawma chuan, phung pawh thlu mawihnai hran lem lovin biak lawk a duh thu Pu Rokhûma hnenah chuan a han sawi a. Ani chuan Muanawma hmel leh mitmeng a han en a; a pawimawh ang tih a ring thiam nghal a ni ngei ang, engmah pawh zawt lovin a lehkha chhiarna pindan lama kal turin a han ti a. An inzui lut ta a ni.

Muanawma chu Pu Rokhûma lehkha chhiarna pindana a luh dawn chuan a han ding leh rih a. Pi Remi hnenah chuan, "Nu Rem, hmana in Screw-driver fawng sen kha min lo hawh tir teh aw!"

"E! A bona a rei tawh a lawm..." tiin Pi Remi chuan a lo chhang thuai a.

Muanawma chuan, "Han hawh lawk ka duh a sin le" a han ti a.

Pi Remi hian inchhûng a vawngfelin, an bungrua a hrechiang thin hle a. Muanawma chuan a thusawi chu a rintlak ang tih a hria. Nu fel tak a ni reng a ni.

Pi Remi chuan, "Âw...a dang a awm tawh tho a sin" a han ti leh vat a.

"Awle...nakkinah" tiin Muanawma chuan a luhsan ta daih a.

Pu Rokhûma lehkha chhiarna pindanah chuan rei fê an inkâwm a. Muanawma chuan Pu Rokhûma pa, MNA-a a tan lai chungchang a han sawichhuak hmasa ber a; chu chu a dik reng em tih a han zawt zui nghal a. Pu Rokhûma chuan mak tiâwm deuh hmel hian Muanawma chu a han en a. Chu chu engtia hria nge a nih a han zawt let veleh chhawng a. Muanawma chuan a thil hriat leh hmuh a chhuidawnna atanga a rilru-a ngaihruatna lo awm, a dik leh dik loh hriatchian duha zawt mai a nih thû-in a lo chhang a.

"A dik a lawm...mahse rambuai laia a chanchin hi ka pa khan tih lansarh a duh lo hle niin ka hria; a inthup hram hram thin a sin! Chuti a nih avang chuan kei pawh hian ka sawichhuak ngai lova, ka nupui leh ka fate pawhin a sawi ngai hek lo. Engtin nge i hriat a, i sawichhuah theih zawk le...?" tiin Pu Rokhûma chuan Muanawma chu a han en vang vang a.

Muanawma chuan Pu Rokhûma'n a endan chu pawisa duh lovin, "A nih leh, a damlaia amah chauhina a hriat tur chi thil eng emaw a hnutchhiah che em?" tiin a han zawt a.

Pu Rokhuma chuan, "Chulam kan sawi hma chuan- engvanga ka pa chanchin chu ngaihven nge i nih? Mami thihna nen a inzawm em ni?" a han ti leh a.

Muanawma chu a han ngawi vang vang a, a thil hriat leh hmuhte atanga a thinlungin a rindan chu sawi mai a tha-in a hre ta zawk a. "Ka rindan mai phei chu a ni a..." a han ti tete a. "Misualin an bitum kha Rintei a ni lo! Nangmah hi a ni an bitum che! A tir chuan i pa kha a ni zawk nghe nghe; Rintei kha chu tum lawk loha thah a ni!" a han tihzawm a.

Pu Rokhûma makti chuan Muanawma chu chiang zetin a han en a, "Keimah hi maw!?" a han ti hû a!

"Aw. Nangmah hi!"

"Engtia ring nge i nih?"

"1995 kuma i pa boral dan, mak i tih thû i sawi kha ka la hre reng a sin"

"Tichuan...?"

"Ka thil hmuh leh hriatte nen ka chhuidawn zawm chho ta a, a dik ngei ang"

Pu Rokhûma chu a ngawi ta vang vang a. A inthlahdul a, muang dam dap hian, "Nangin i rin tlat si chuan...Muana, ka fapa ang maiin ka en thin che a; ka ringtawk a che" a han ti a.

"Chuvang chu a ni, i pa khan mimal thil deuh tak hnutchhiah che a neih leh neih loh ka zawh che" Muanawma chuan a han ti leh a.

"Ka pa thil min hnutchhiah hi ka lo ngaihven lutuk ngai lova, a pindanah thingrem pakhat chu a awm a. Ka hawng tawh nghe nghe a, lehkhabu leh file eng emaw chu a awm awm e. Thil khawih danglam zung zung mi ka ni lem lova, a ngai angin a la awm ngei ang. Duh bik deuh i nei em? I sawi mai thei em?" Pu Rokhûma chuan a han ti a.

"Keimah ngeiin chu thingrem chu hai ka duh! Rem min tihsak rawh" tiin Muanawma chu a mitmeng leh chetzia Pu Rokhûma lakah a ngengawl hle mai.

Muanawma chu, Pu Rokhûma chuan a mitah tak a han en a, "Aw le" a ti ta a!

Pu Liannghawrate nupa pindan ni thinah chuan an inzui lut ta a. Chu pindan chu, luah hnûm a ni tawh lo tih a hriat theih mai; mahse a balin a hnawk hran lem lo. Bungrua eng eng emaw an dah nual a; bungruate chu fel tak leh awmze nei taka rem an ni thung. Chhungpuinu zia a lang thei! Pu Rokhûma chuan pindan kilkhat chu a pan ding nghal a, chuta thingrem pakhat, tala lian vak lova kalh chu a han kawk a.

"Hei hi a nih hi..." a han ti ringawt a.

Tala chu a chahbi ken chuan a han hawlh rak rak a, thingrem chu a han hawng ta a. A chhûngah chuan lehkhabu leh 'file' eng emaw zat a awm a, lehkhapuan tla-hlanga thuziak chilh khawmte, kut ngeia ziak thuziakte chu a chunglângah mai chuan a hmuh theih nghal nghe nghe a.

Pu Rokhûma chu Muanawma lam hawiin a han inher a, "Ka pa khan, he'ng lehkhabu leh lehkha ziakte hi a roh hle a. Heti ang lam hi ngaihven tehchiam lo mah ila, ka pain a ngaihhlutna kha ka zah sak a, tun thleng hian ka la vawng tha a ni" a han ti a.

Muanawma chuan, "Ka pa Khûm, tunhmâ, i pa damlai emaw, a boral hnu emaw hian, in in-a rawn luhruk tum an awm tawh em?" tiin a han zawt a.

Pu Rokhûma chuan, "Ka hriat theih chinah chuan chuti ang chu a la awm lo tawp mai!"

"Hnuhma danglam deuh pawh maw...? Ka tih awmzia chu, he pindanah hian...?"

"Aw, awm miah lo!"

"A mak zawk hle mai!"

"Mahse..." tiin Pu Rokhûma chu a han maimi'chhing vang vang a.

Muanawma chuan, "Mahse...engtin maw?" a lo tivat a.

"Ka pa boral hnu khan, ka hriat ngai mi pawh la ni lo nula pakhat, kan khawhar min hnema rawn leng rei fal riau chu a awm tak" a han ti a. "Ka pa pindan hi hmun pawimawh, thil pawimawh dahna niin i ring tihna em ni?" tiin zawhna a han zawt leh rih a.

Muanawma chuan, "Chu chiah chu..." tih chauhin a lo chhang a.

"Chuti a nih zawngin he pindan nena inkaihhnawih, thil thleng hotê chanchin chu i hre duh ngei ang chu maw?"

"Hre duh tehreng mai" Muanawma chuan a lo ti mai a. A bula khum ruakah chuan thuthmun remin a han inkuangkuah nghal at a, a tawng ngaichângin Pu Rokhuma chu a melh ta ran a.

"Chu nula chuan, tlangval pakhat, mi ang mang lo, tawng pawh tawngfiah mumal thei lo hi a rawn hruai ve deuh ziah a. Chu tlangval chu ven hautak zet mai a ni. Inchhung hmun hrang hrang hi a fangkual zung zung a, han hauh vak hleihtheih a ni thin si lova, a buaithlak thin khawp mai! A rawn hruaitu chuan a unaupa a nih thu a sawi a; kha hmeichhia kha nula mak pawl tak a ni âwm e a. Amah chu, mihlim an tih ang lampang chi hi a nih hmel a. Amah nen chuan thutkhawmna pindanah Pathian thu sawiin kan titi fova, titi lah chu a ngah zêk a, a phûl hlut thin. Chutia kan inkawm lai chuan a unaupa chuan inchhûng hmuntin hmuntang chu a lo fang kual a; vanneihthlak takin eng pawi mah a khawih kan hre ngai lo thung. Tumkhat chu, tlai dar thum velah ka haw a, chu nula chu kan in-ah lo awm a. I nu Remi nen hian thutkhawmna pindanah an lo titi tui ngang mai a. An bulah chuan tlangvala kha a awm lo tih ka hre thei nghal a. "A teihawi leh pek a ni maw" ti rilru chungin ka nui suk a. Ka pa pindanah thil pawimawh lak lawk ka ngaih avangin, ka han lut a. Ka pa pindan kawngkhar chu a lo kau deuh a. Kan kalh ziah thin a, i nu Remi a lût anga, a kalh leh theihngilh a nih ringin, engmah ngaihtuah zui lem lo chuan ka han lut a. Tlangvala chu a lo awm reng mai. Ka pa thingrem kalhna tala hi a lo khawih ri ruk ruk a, ka han lut chu a phu zuk a, a rak ta ruai ruai mai a. Mak ka ti ang reng viau a; a unaunu chu a rawn tlan vat a, i nu Remi pawhin a rawn zui ve nghal bawk. A unaunu chuan thuphâ a chawi ta mawlh mawlh mai a. A hmel chu a khawngaihthlala ta riau a, a zia kha a mak reuh hle a ni! Mahse, kan ina rawn chuankai chu an thulh chuang hlei lova. Chumi hnu chuan, kha tlangval, mi ang pha zân lo kha ka pa pindan vela a tawi hrut hrut lai, vawithum vel ka nang leh nghe bawk. Khang lai khan han rinhlelh nachang ka hre hran lova; mahse i han sawi hmangin thil awm thei nithei chu, ngaihruat thiamin ka inhria" Pu Rokhûma chuan a han ti a.

Muanawma chu hnual deuh sawt hmel hian a han lang a; engmah phei chu a sawi lo. Pu Rokhûma bawk chu a han tawng leh a.

"Muana, hei ka pa thingrem chu ka hawng tawh a, han envel ta che; mahse heta mi, eng thil pawh i lâk dawn chuan, min hriattir a ni ang chu" a han ti leh a.

Muanawma chuan, "Engpawh nise, midangin min la hawn khalh lo turah ngai ang!" a han ti ve thung a.

Pu Rokhûma chuan a chhuahsan a, a chhuah hnu pawh chuan thingrem chhûnga lehkhabu chu en mai lovin Muanawma chuan thingrem chu a han chhin leh tete a! A kalhna tala kua vel chu uluk zetin a han en a, a thaw hak a, a lawm loh hmel hle mai! Thingrem chu a han hawng leh a, a chhûnga lehkhabu, lehkha leh 'file' te chu a han thliar tan ta a. Eng'e a zawn tih, a hriat bik loh avangin a lâk hmasak apiang chu en liam mai lovin a en ngun viau zel a. A duh tak chu hmuh a duh tih, a uluk dan atang chuan a chiang viau mai bawk.

Chhuatlaiah chuan a thu sawp nuaih a, lehkhabu leh lehkha chu thliar pahin a bih thuak thuak zel a. 'File' pakhat chu a han phelh a, a chhûnga lehkha, kutziaka dah chu a mal malin a han thliar zung zung a- "Pu Liannghawra chu a chengvawng awm hle mai" tiin a han phun sap a. Chutah, lehkha pakhat, kutziak mawi lem lo taka ziah, a thupuia,"MIDANG CHUNGA RORELTU NIA INNGAITE CHUNGCHANGA THUDIK CHU!" tia dah chuan Muanawma mit a la ta hle a.

"A thupui vuah duh dan kher kher chu a mak hle mai!" a han ti leh sap a. Tukverh êng lam a pan a, a insiamrem sauh sauh a, muangchangin a chhiar tan ta a.

Chu kutziak lehkha chu chilhkhawm a ni; a thubul chu- "Rorelna fawng vuantu tur nia inngaite dik lohna chu ka hrechhuak ta. Kei, Liannghawra hian an dik lohna ka hailana ka sawisel tãk avangin an zing ata ka kal hrang ta ani!" ti hian a intan a.

Muanawma chuan a chhhiar zel a; chutia a chhiarlai chuan thutkhawmna pindan lam atangin Pi Remtluangi chuan a rawn au tuar tuar a. A thil chhiarlai ata a hawichhuak phawk hra a. Pi Remi aw chu mangang awrawl a ni tlat mai!
A awmna pindan kawngka chu a rawn inhawng rirawk a, Lawmsangi chu thlaphan hmel em em hian a rawn lût a, a thaw huam huam a, reilotê chu tawngchhuak lawk thei lovin a kha a chih a. A lo tlanluh phat atang khan, Muanawma chuan thil eng emaw a thleng a nih a ring thiam nghal a. Lawmsangi tawngchhuah theih hmâ-in hmanhmawh leh fimkhur tak si hian thingremah chuan lehkhabu, lehkha ziak leh 'files' chu a rem tha zung zung a, Tala chuan a han kalh leh ta chiah a. A thil chhiar lai erawh kha chu a ak tha nghal daih thung!

Muanawma chuan, "Lawmte, eng'e ni ta a!? I va hlauhthawn hmel ve!?" a han ti a.

"Ka...ka...ka...pa-in engmah a hre lo...a...a...a...a...biak theih loh!"

Muanawma chuan a darah a han vuan a, pindan atang chuan hmanhmawh takin a chhuahpui ta nghal a, rangtakin pindan chu a khar a, a ding dat a- "He pindan kalhna chahbi hi i pa ipteah a awm ang, zuk la la, rawn chho lehnghal la, tha takin kalh ang che" a han ti a.

Lawmsangi chu hmanhmawh taka tlanin chahbi chu a va la a. A lo lêt leh hnû-ah chauh Muanawma chu a kal a.

Pi Remi chuan an mut pindan lamah thawm ri dawp a hria a. A va luh chuan a pasal chu chhuatah a lo tlusawp reng mai a ni. A han ko a, a chhang ta hauh lova, biak a hre lo nge a hriat loh! Muanawma a va luh ve lai pawh chuan Pu Rokhûma chu chhuatah a lo la mu reng a, a lo then ngawt ngawt mai a.

Muanawma chuan rang takin khumah a hlang chho a, a taksa hmun hrang hrang a han dap ngial pawhin pawnlamah na lai âwmang a hmu hauh lo; mahse na em em tuar tih hriat tak mai hian a then ngawt ngawt mai si! Hriatthiam a har ta tlat mai! Damdawi lam leh natna lampanga thiamna nei a ni lova, engtia han tih tur nge a hre lo!
Mahse, thaa a hriat dan anga a chet mai a ngai dawn a ni. A nau Siama a 'call' nghal vat a, a rang thei ang bera motor nena thleng phei vat turin a han hrilh a. An inbiak zawh chuan Pu Rokhûma hmel chu a han en a; ngaihthatthlak loh khawpin hmuh a hrehawm! A mar chu a han enfiah a, a mumal lo riau mai! Chutah, Lawmsangi hnenah chuan puan nem leh tuivawt la turin a han ti a, ani chuan a rawn la vat a. Pi Remi hnenah chuan Pu Rokhûma chal vel chu dep turin a han ti a. A pang chu a sa vur a, a sen tul hian a hriat tlat a ni!

Muanawma chuan mut pindan banga sana intar chu a han en a; a nghaktu tan chuan a rei sam viau thin reng a ni. Rei vak lo an indeh hnu chuan Siama chu a rawn thleng ta a, hmanhmawh zetin Aizawl lam an pan ta nghal a ni. A hmanhmawhthlak a, a ngaihthatthlak hek lo. Muanawma chuan a khalh chak viau reng a ni; a fimkhurna thinlung erawh a thlahdul hauh love.

Aizawl Civil Hospital an han thleng a, an lo 'admit' nghal a, Doctor-in a dinhmun a han enfiah vat a, chumi hnû-ah ICU-ah an dah lut ta hial nghe nghe a ni. Thil tul zualpui an han buaipui zawh chuan, Muanawma chuan Pi Remtluangi chu a han kai hrang a, thil eng emaw hi a hrilh mawlh mawlh a. Muanawma'n eng emaw a sawi lai chuan a lo bu nghoh nghoh a. Hrethiam tih hriat zet hian a han en a. Muanawma chuan a rang lama haw-a Pu Rokhûmate ina riah a tum a ni; chhan tha tak avanga riah chu tum a ni tlat.

Muangchang khawtlai lovin a haw ta nghal a, fimkhur leh chak tak siin a tlan par par a. Hmanhmawh chhan a nei tlat a ni. Lehkha ziak chhiar tura tukverh êng lam a pan khan, tukverh pawn lam chu a han melh zawk a. Pu Rokhumate kawmthlang kawngpui sirah, Bike bula mipakhat ding, ama awmna pindan lam rawn en vang vang kha a hmu tlat a ni. Chuvang a ni a, khati ang thil hmanhmawhthlakah pawh kha pindan kalh kha a ngaihpawimawh em em ni. Heti ang dinhmunah hi chuan thleng thei lova ngaih hi a thleng thei tlat zel. Khawvela lawng lar, TITANIC pawh kha chhe thei lo tura ngaih a ni; a zinkawng vawikhat zawhna zawh tluan lovin a chhe tlat si!

An veng a thlen chuan Pu Rokhûmate in a panding nghal a. Inchhûnga lut mai lovin thawm a awm leh awm loh a han ngaichang hmasa phawt a. Thawm danglam a hre hauh lo mai!


Dar 10:30pm chiah a ni a.

Thawm hre lo mah se, Muanawma chu a la lût duh ta chuang lo. Muangchang leh fimkhur em emin Pu Rokhûmate in chu a han hêl chhuak leh phawt a, chumi hnû-ah kawngka kalhna chu uluk takin a han enfiah leh a; a rin ang hehû chuan thil danglam a thleng lo niin a lang. Je-a in lam panin a kal leh ta nghal a! Hetia, a thianpa in a pan leh kherna chhan hi, engmah hrilh lova riahbo san thaa a hriat loh mai bakah, chhan tha tak dang a awm a ni. Zanrei lam a ni tawh na-a, Je-a chu a la meng ngeiin a ring tlat a; a mengrei fo châwk tlat a ni!

A thlen phei chuan dar 10:47 vel a ni tawh. Inchhûng chu a lo thim thuap a, mak tak maiin kawngkharpui chu a lo inhawng huau thung si! Muanawma chu inchhûngah a han pen lut a, thawm riva reng reng hriat tur a awm lo! Ring vak lo, fiah tak siin a thianpa chu a han au a; tumahin an chhang lo! An pahniha an mutna thin, Je-a pindan chu a han pan a; chutihlai chuan a tirila tham er ertu eng emaw a awm a ni ngei ang; Muanawma chu chhûngrilah a tim ru er er a, a hmulthi a ding sang sang hial a ni! Amah pawhin mak a ti viau mai! Karen tiêng turin a han lêt leh tete a.

Muanawma hi mi dawihzep tak a ni lem lova; amaherawh chu, Rintei boral lai bawr leh, a lusûn hlimchhawn lai khan, 'Anxiety' leh 'Depression' khan a tlakbuak nasa a, a chiai hmâ-in, ho tetea phut zuk zuk a ching hle; mahse enkawlna tha tak a dawng a, tunhnu hian ngai a lo awh leh tawh a. Zanina a awmdan erawh mak a inti rilru hle mai. A chhan lah a hre hauh si lova! Karen chu a han tiêng a, Je-a nena an mutna pindan chu a han pan leh a; tumah an awm lo! Karen tiêng pah zelin inchhûng pindan chu a han enkual zel a; tumah an awm chuang lo! Khaw'nge a thianpa chu a awm tak ang!? A han ngaihtuah a- thlanmual lamah a kal a nih a ring ta ber a. "Ani hi, eng'e a tih ang?" tih zawhna chu a thinlungah a lo lang zawk a.

Pâwnah chhuakin kawngka a khar tha a, thlanmual lam panin a kal ve ta nghal a. A hmanhmawh fê mai. Thlanmual a thlen phei hma deuh chuan phun bul bul thawm a hre ta tlat a. A ding dat a, khawilam nge tih hriat tumin a beng a han chhi a; thlanmual sir veilam niin a hria a, thlanmual bul lawka hmun fai lai pawh kha a ni thei bawk. Thawmdim leh fimkhur takin thawm awmna lam chu a pan ta hriau hriau a, saron pangpar buk phen atang hian mi pahnih ruangam hi, chiang lo ruaiin a va hmu thei ta a; an awma a rinna hnuhnung zawk kha a dik a ni tih a hre thei nghal bawk.

Chu'ng mi pahnihte awmna chu a fai zau deuh avangin chiangtaka an tawng hre thei tur erawh chuan a hnaih thei lo. Pawi a ti hle a; tun ang zanrei tawha thlanmuala mi pahnih, rui lo hai lova inbe ru sur sur chuan, thil tha tih tur an phiar lo tawp ang tih chu chiangin a hre nasa mai si a! Chumite pahnih ruangam chu ngun taka a han enin, a tu-a-mah chu Je-a an ni lo tih a hria. Chumite chetla chu a thlir ta reng a, an tawng a hrechiang mumal thei lo chu a run ngang mai! Thliin a rawn beng fuh châng erawh chuan an tawng chu chhum bung zet zetin a hre thei a.

"...zin turin..."

"Hotupa.............mipakhat...."

"......a vil deuh tlat mai...."

"......a hlawhtling khat...........damdawi inah...."

An tawng chu a hre chhumbung deuh mah mah chu a ni e. Darkar chanve vel zet an tawng bul bul hnu chuan khawchhûng panin chumite pahnih chu an kal ta a. An kal hnu chuan Muanawma chu chechâng lovin minute 15 vel a han awm leh phawt a, a awmhmun atang chuan a chechhuak ve ta chauh a. An dinna hmun chu a han pan a, sikret zuk bung a awm ram a, pakhat chu a han chhar zauh a, a ding vang vang a, Je-a chu a pa thlanah a awm lo tih a chian hnu chuan khawchhûng lam panin a kal ve leh ta a ni.

Je-a chu a lo awm tawh a, a mut pindanah sikret zuin a lo si vang vang a, a lo mu zangthal ar ar a.

"Khawng'e i kal a; i lo awm lo va. A thim vek a, kawngka i khar bawk si lo?"

"Ka teihawi mai mai maw le; chu min zawng elo?"

"Zawng e maw le..."

"Thlanmual lamah a ni ang maw?"

"Ni chiang e...engati nge?"

"Eng dang love; ka pa thlana ka kal apiangin min zui i tum ziah a lawm" tiin Je-a chu a nui suk suk a.

Muanawma chu a nui ve mai a. "Zanin chu ka rawn riak dawn lo..." a han ti a.

"Ngati maw?"

"Kan ina riah lawk a tul" tiin Muanawma chuan dawt a han sawi a.

Je-a chu a han ngawi ta vang vang a, "Thianpa, rawn riak duh tawh lo mai rawh..." a han ti a.

"Engvangin maw?" Muanawma chuan a han ti ve thung a.

Rei fê a ngawih hnû-ah Je-a chuan, "Muana, ka zin dawn...eng emaw chen chu ka zinbo dawn..." a ti a. A mitmeng chu lungngai awm deuh hian a lang a. Khawhar hmel zet hian a lang tlat!

Muanawma chu a han ang zuau a; mahse a ngaihtuahnaa awm chu sawichhuak lovin a ngawihpui ta zawk a. "A tha a lawm, engmah ka zawt lo vang che!" a han ti thung a.

"Muana, engkim i hre vek tih ka hria..."

Muanawma chuan mak tih hmel deuh tak hian a thianpa chu a han en a, "Eng'e i sawi awmzia!?" a han ti a.

"Nang hi chuan, kawng engkimah min hrethiam em em zel tih ka hria a ni" tiin Je-a chuan a lo chhang a. "Min ngaìhtuah avangin ka lawm e..." a han tihzawm leh a.

Muanawma chuan, "A ho lutuk..." a lo ti satliah a. "Khawiah nge i zin ang, flight-in em ni?" tiin a zawt zui a.

"Phâiah...aw, flight-in..."

Muanawma chuan a thianpa hmel chu a han en a, a mitmeng chu sen deuh ram hian a hria a. Thinur hmel ni tlatin a lang!

"Je-a, i tha maw!?"

A lo hawichhuak a, Muanawma chu a rawn en vang vang a. "Ka tha e. Heta i riah dawn loh chuan va mu tawh rawh, haw tawh rawh; mahniaa awm lawk ka duh khawp mai" a han ti a.

Muanawma chuan a thianpa chu a han en leh vang vang a; be leh tawh lovin, ngawi rengin, muangchangin a chhuahsan ta a. A thinlung delhtu a ngaihtuahna rit tak nen chuan a pen chhat chhat a, Pu Rokhûmate in lam a pan ta a ni. A thlen chuan, Pi Remtluangi'n a pêk, chahbi a phawrh a, tala chu herh hawngin inchhûngah a lut a. Karen a tihên vek hnû-ah, Pu Liannghawra pindan ni thin lam chu a panding leh ta nghal a. A lût a, thingrem kha a hawng a, hmanhmawh lo takin, lehkhabu, 'files' leh, kutziaka dah lehkha ziakte chu thliarin a en tan leh ta malh malh a.

A zavaia enchhuah nan hun a duh rei viau mai a. Thingrem chhûnga thil awmte phawrha, a mal mala a en vek hnu chuan, a thil duh pahnih chiah a hmu a. A pahnih chuan Pu Liannghawra'n kutziaka a dah ve ve an ni. Pakhat chu, a hmaa a iptea a ah that tâk kha a ni a. Pakhat leh chu, Baladesh ramchhung, Mizoram nena an inrina hnaih lam, Changpui Tlangdung, ngaw chhah zet hnuaia thil thleng eng emaw chanchin ziahna a ni a.

Muanawma chuan a han chhiarchhuak dap a, a chhiarchhuah zawhah, a hmaa a ah that tawh, Pu Rokhûma a damloh tâk thut avanga a chhiar zawh hman loh chu a han chhiarchhuak leh dap a. Chu'ng kutziak lehkha pahnihte chu a thlek tawn ta chhen a. Uluk lehzualin a han chhiarchhuak nawn leh ve ve a. Chutah, pakhat zawk chu, thingrema lehkhabu leh 'files' a dahluh hnu, Pu Liannghawra kutziak lehkha dangte a dahluh leh hnu chuan, pawnlang tak, hmuh mai awlsam tak turah chuan a han dah lui ngat a! A hmaa a lo ah that tawh sa zawk erawh kha chu uluk zetin a thlep tha a, a ipteah chuan a ak leh ta hmak thung a ni. Thingrem chu a han kalh tha leh thlap a, a dingchhuak a, a han zi mar tiah tiah a; khua chu a lo var tan tawh a.

* * * * * * *

"THLALER CHU DILAH A CHANTIR ṬHIN A, RAMRO CHU TUIHNAAH TE A CHANTIR BAWK ṬHIN" - Sam 107:35

Link:
BBcode:
HTML:
Hide post links
Show post links

Chhantea Pautu
Posts: 113
Joined: March 19th, 2018, 10:31 am

Unread post by Chhantea Pautu » May 23rd, 2018, 7:52 pm

LALMUANAWMA: CLIMAX & BAD TRAGEDY!
Aithor: Chhantea Pautu

Chapter 5
Stealing Manuscript!

Muanawma chuan choka lam a pan a, che hmanhmawh hauh lovin thingpui a han lum a, a ngaihtuahna chu a châwl thei lo reng reng!

A thil chhui hi a rin loh dan takin a irhchhuak a ni tih a hriat tantirh atang khan manganna leh lungngaihnain a delh ta reng a. A lo hmangaih ve em em, Rintei a tualthih ni atanga tunthleng mai hian, hahthlak khawpa lungngaihna lungchhiatthlakin a delh fo mai! Mahse a ti tawh a, a kal tawh a, a tan tawh a, he kawng hi a zawh tawh; a zofel ngei tur a ni ang. Chuti chung chuan, a khin phak loh tawp tur mi tute emaw a hmachhawn dawn niin a inhria a ni! A rûm hak a, zingkar boruak thiang tak chu hîpin a han thaw ham ham a; boruak rim pawhin thlasik rim a nam tan ta emaw ni chu le!?

Thingpui chu a so barh barh a, ketli dawt hmawra tuihû rawn inphuhchhuak bat bat chu a en reng a; heti ang mai hian, mihring nun chhungrila thilchhia inup so nasa lutuk sosang chuan chhuahna a rawn zawng a, a tâwpah a rawn chhuak a, tuiso hu chhuak ang mai a sa, khawihngam loh khawpa 'vin' a rawn ni a, pawi a khawih thin!

Muangchangin thingpui chu a thli a, a nghah daih chhungin Pi Remtluangi biain Pu Rokhûma chanchin a han zawt a. Thingpui chu vawikhat a han dut ri hraih a, a lem ri khalh a...

Khang hun zawng zawnga a chunga thil lo thlengte kha a ngaihtuah let neuh neuh a; a va han tlusawp teuh ve thin ngai em! Tawrh awmzia a hria a, lungngaihna leh harsatna nasa tak a tuar tawh avangin hlima nuih hlutzia a hria. Muanawma hian nun hi eng'e a hre khawp ang! A beisei chu Rintei thattu zawnchhuah a ni. Chu chu hlawhtling dawna a lan tawh hnû-ah hian, a tana thiltih huphurhawmin a la hmuak ta cheu mai! SI Zodinsanga hnena ti tura a ngen tur thil hi, theih nise tih loh tir a duh ang; mahse hlauhawm hi chhuah zalen a nih chuan pawi a khawih nasa telh telh thin a, khuahkhirh a ngai a ni. Chumi hnû-ah, he thil vel avanga Pu Rokhûmate chhungkua, nun derthawnga an awm chu, ngaihngama khua an hawi theih nan ruahmanna a siam a ngai bawk! Chu erawh zâninah a hlawhtlin leh tlin loh a hriat mai ang chu!

A pa-in lehkha a hnutchhiah kha a han ngaihtuah chhuak a- "Ânchhia" tih thu chuan a thinlung a rawn luh ngut ngut a! An chhungkaw thlahtu, a pi leh pute khawlohna rah titawp turin a pa-in mawhphurhna a pe a, chu mawhphurhna a pêk chu hlen famkim turin, engzata tam nge a man pêk la ngai ang? A man chu a pe mêk tawh em ni? Khang hun zawng zawnga a chunga lungchhiatthlak thil lo thleng zozaite kha; tuna a thinlung luhtu ni mêkte ang hi!

Chung thil a ngaihtuah lai chuan, a tawngtai khat tawh zia a han ngaihtuah chhuak a. A pi leh pute thil tihsual avanga an chhungkua umzuitu ânchhia chu, Isua Krista Thisen zarah chauh lo chuan a kiang hauh lovang. Tawngtai turin a rilru a siam ta a. Thingpui a in zova, no ruak chu chawei dawhkanah a dah ri rak a. Mahse, Pu Rokhûmate tawngtai pindan pan ta lo chuan, Rintei pindan chu a pan ta zawk a. A lût a, chhuatah thingthiin urhsun takin a tawngtai a, a pi leh pute sualna avanga thupha chawiin ngaihdam a dil a, chumi avanga an chhungkaw chunga ânchhe awm theite lakkian sak a, Isua Krista Thisena hung tlat turin a dil ta hial a!

'Biakin kan pan thei kher lo a nih pawhin, khawi hmun atang pawha kan auh hre phakin Pathian hi a awm reng; eng hunah pawh' tih hi a thurolum a nih tlat avangin a chunga lungchhiatthlak lo thlen tanna pindan pan ta kha a ni reng a! A tawngtai zawh chuan dar 7:00 a lo ri tawh. A phone banin SI Zodinsanga a han 'call' a, darkar chanve zet an inbia a. A duh anga tih a nih tur thu SI Zodinsanga chuan a lo hrilh a. Muanawma hmelah chuan, phur hmel emaw, hlim hmel emaw, hahdam ta huai hmel emaw reng reng a lang chuang lo! A thiltih tur tih loh a duh zâwkna chuan a delhrit em a, a chau a ni!

Midang thawm a lo ri nak nak tawh a. Pawnah chhuakin kawngka a kalh tha thlap a. A thianpa, Je-a in lam panin a kal ta a ni.

A va thlen chuan thawm a lo reh thiap a, kawngka chu tala lian zet hian a lo inkalh bur a, Muanawma chuan a ngaihna a hre lo hle mai; heti em ema a chhuah hma hi a lo ring hauh lova. An inah chaw tlem tal bar tumin a kal ta a; chaw erawh a châk lovin, a ril a tam hran lo hle thung. An in a thlen hma deuh chuan, a lam panin naupang pakhat hi a lo tlan dar dar a, Muanawma chu lehkha ip pakhat hi a rawn pe a, a inchar uluk phian mai.

"U Muanawm, U Je-a'n lo pe rawh a ti"

"Amah chu khawiah nge?"

"A zin dawn..."

"A kalna a rei tawh em?"

"Rei lutuk lo..."

"Ka lawm e, i fel hle mai" Muanawma chuan a han ti a.

Naupang chuan, "A pawimawh lutuk a ti..." a han ti leh a, a kal ta nghal a.

"A pawimawh maw?" Muanawma thinlungah chuan chhiar nghal duhna a awm ta tlat a. A chârna a pawtthler a; kutziak lehkha a lo ni a, Je-a kutziak ngei a ni. Chhiar pangngai chiah lo hian a han en pawr pawr a. Chutah, hming pakhat inziak a zu hmuh chuan a tawp chat a, a mengdur khap a, "Vanlalruata..." tiin a phun sap a. Lehkha chu chhiarzawm leh tawh lovin a ak ṭha ta daih a, SI Zodinsanga a be ta nghal a.

SI nen an inbe zo a. An inah lûtin, chaw pawh ei lovin a pindanah a lut tlang nghal a, uluk zawkin a thianpa Je-a lehkha chu a han chhiar nawn leh a. A chhiar zawh chuan, a melh ngai a melh tlawk tlawk a.

"A pawi ka ti. I zalen chuan i hlauhawm lutuk a ni..." a han ti sap a.

A thinlung chu mangangin a rum a!

Hun rei lo téah Police an lo thleng ang a, Vanlalruata pawh an man ve tawh ang; mahse chutah chuan a tawp mai dawn lo tih, Muanawma chiahin a hre thung si a.

Dar 11:47am a ri a. Muanawmate kawt zawlah chuan 'private car' pakhat hi a rawn ding a. A chhung atang chuan mi pathum hi an rawn chhuak a. Muanawma'n motor ri a hriat chuan a pindan atangin a lo chhuak a, inpui a zuk thlen chuan, chung mipathumte pawh chuan inchhung an rawn lut ve chiah a. Mi pathum zinga pakhat, pa vantlang tak, lukawlh tal mai, sa nei ve tak leh dulkiar lek lek, 'glass' dum, a mit bial chi vuah vah chuan a kut pharin Muanawma chu a han chibai a.

"Inspector Hruaihlua ka ni e" tiin a mi hruai pahnihte chu a han hmelhriat tir nghal a. SI Zodinsanga chuan engkim a lo hrilhfiah chiang hle tawh a ni ngei ang; Muanawma chu hawihawm takin a be nghal thei tlat.

Muanawma chuan, "Pu Hruai, in lo kal chu a lawmawm e; hei hi han en teh..." tiin Je-a lehkha chu a han entir nghal a.

Inspector Hruaia chuan a han en vang vang a, "I inpeih chuan i kal nghal mai ang u hmiang" tiin Muanawma lam chu a han hawi a. Vanlalruatate in lam panin an kal ta a ni.

Police motor keng lo leh, civil dress-a an rawn kal hi Muanawma duhdan a ni a, SI Zodinsanga hnena a hrilh dan pawh kha a ni reng a ni! An veng mi ten police an hmuh chuan, an phawkleka, thil a kal khawloh a hlau tlat a ni! He thubuaia IO chu SI Zodinsanga ni mah se, he thubuai kaihhnawihah tho, lengpui lama kal a ngaih avangin, amah a rawnkal thei lova; a aia Officer puitling tak a rawn kal hi Muanawma chu a lawm hle a ni!

Vanlalruatate in chu an va thleng a, a lo awm ngei a, amah chauhin a lo awm nghe nghe. An han lût phat chu Inspector Remsanga chuan, "Pu Siamkunga thah thû-ah man i ni e" a han ti a. A mi hruai pahnihte chuan a sir tawn tawnah an dinchilh nghal bawk. Kutkawl an bun tir zui nghal rap a.

Vanlalruata chu a hrilhai hmel hle a; tawng nachang pawh a hre hek lo! Chutah, Muanawma chu a han en a, a meng thip ta rawm rawm a; Muanawma avanga man a ni tih a hrethiam tih a lang reng mai. Ngawi rengin an tih ang ang chuan a awm ta tawp a, a bulah Muanawma a awm ve tlat a ni! Car-ah an luhpui a, Aizawl an panpui ta a ni. Muanawma chuan, an liam hnu thlengin an kalna lam chu a thlir vang vang a.

"Pakhat chu..." a ti sap a.

Nilengin SI Zodinsanga'n chanchin a rawn hrilh lo!

Tunah chuan khua a tlai leh viau tawh, thimhlimin a nang chho tan a; chutihlai chuan, Muanawma chu Pu Rokhûmate thenawm hnai ber inah a han lut zawk a. Nula pakhat nen an rawn chhuak leh a, Pu Rokhûmate in lam chu an pan dun ta a. An han lut dun a, rei fê an reh vang vang hnû-ah an pahnihin an lo chhuak leh a. Muanawma chuan kawngka a kalh tha a, Pu Rokhûmate kawmthlang kawngpui sira car awmna lam chu Muanawma leh nula chuan an pan a, nakkin deuhah chuan car chu a kal ta a.

Pu Rokhûmate in chu a reh tlawk tlawk a, a thim vek bawk. Mahse, zanlaiah chuan an kawngkapui kalhna tala chu, thawmdim leh fimkhur em em hian, mipakhat hian a rawn hawlh ri rak rak a, rei vak lo a hawlh hnu chuan tala kalh chu a inhawng ri rak a, chupa chu a lut ta a. Minute 15 vel hnû-ah chuan a rawn chhuak leh a, thim thamah chuan a pil bo zui ta thuai a.

Muanawma muhil a han harh chuan ni a lo chhuak iarh tawh a. Nizan khan a tul avangin a phone kha a 'off' tlat a; a phone chu a han 'on' a. Chumi zawhah Pu Liannghawra pindan ni thinah a lût a, thingrem kha a han hawng a, a hmaa Pu Liannghawra thu ziak a dah luh leh kha a lo awm ta hauh lova.

"A hlawhtling e. A hun hman chhung a rei loh tehreng nen...a che 'professional' hle mai!" a han ti a. A nui sak a; a nuih khât tawh tehreng nen!.A phone chu a rawn ri a.

"Muana maw?"

"Aw...ni e; eng'e chanchin?"

"Nizan i phone i off a...vawiinah lo kal zawk mai ta che...phone-a han sawi a va rem lo ve..." SI Zodinsanga aw chu a danglam riau a!

"Aw le...ka lo kal ang"

Muanawma'n Aizawl a thlen a, SI Zodinsanga nena an han inhmuh chuan, mithi dahna hmun an pan nghal a. An han lût a, nunna a nei tawh lo tih hriat zet hian, a thianpa Je-a chu a lo inzalh a. A nghawngah chemtea vihna hnuhma a awm a.

"Lengpui Airport thlen hma deuha kan hmuh a ni" SI Zodinsanga chuan a lo ti a.

Muanawma chu a ngawi reng a. Chu Police Officer thusawi chu hre lo ang mai hian a awm a. "Liandingngheta chu i chhuahtir thei tawh ang" a han ti a.Ngawi rengin mitthi dahna hmun chu a chhuahsan ta a.

Chapter 6
The Conclusion of Case!

Muanawma kal chhuak ta chu Sl Zodinsanga chuan a thlir zui vawng vawng a; chutah, hriat tham mang loh hian a phun sup a, a hmelah chuan thil hriat duh tam tak a la nei tih a lang a. Muanawma liam hnu chuan lu thing nar nar pahin a kal sawn ve ta a ni.

Muanawma chuan a Iu chu rit lukin a hria; a tana mi pawimawh, a nuna a seng Iuhte leh amah hnaihtute a va chân hnem tawh tak! Amahah hian nun hi a inlehburh zing tawh ngawt mai! Hnunglam kha chhui kir se a tân chuan nunhlui tawrh har, ngaihlét châkawm loh a ni! In-chhungkhurah leh pawn lamah dema den a lo do dai tawh a, a hnu leh zelah pawh amah tlakbuaktu thinlung thawveng lo chu a la chawl thei chuang lo.

A sawi chhuah thiam chiah si loh hian a chhungrilah vilhtu engemaw a awm a; a hriatthiam dan ber chuan chhungrilah a na nget nget a ni ber mai! A thianpa Je-a hi a sûn nge a thinlung thawngtu thil thleng hian a delh rit lutuk zawk!? He thil thleng hi a duh loh dan leh a beisei loh dana a chinfel a ngai a, tuar se a duh loh tawpin a tuar a ngai a; chu phei chu a thleng dawn tih a rin hriatna a rei tawh!

An In a thleng chu thuthlengah a thu hnawk a, a melh ngai a melh a, che lo chang lovin a thu ngawi reng a; a chang leh a han maimi’chhing leh vang vang thin. Chuti ang chuan rei fé a awm. Chutah, a tho thut a hmanhmawh takin a pindanah a tlan chho a, Je-a lehkha a dah that chu a la chhuak a. Lehkha chu a han en vang vang a, a pawt pharh a, a vawithum nan a han chhiar nawn leh ta a.

A chhiar zawhah khumtlângah chuan thuin a hmai a hup a, a mitmeng chu a sen ram a! A rilru chu a na thar leh chiang khawp mai; he’ng zawng zawng hi engvanga Io thleng nge a nih tih a ngaihtuah a.

Lunghlu vang maw? Thil hlu hi chu hlu hle mah se; chutah chuan natna, tawrhna, âtna, chintâwk hriat Iohna leh zahawmna hlohna nen...thil inthlungkhawm a va han tam kher ém! Sum duh lutuk vang vek a ni!

Mi tupawhin sum hi mihringte avanga lo awm a ni tih a theihngilh a; sum hi engkim tih theihna hmanraw awm chhuna a ngaih a, hmatheh pawimawh bera a neih tawh chinah chuan, chu mihring chu âtnain a zui mai thin. A à a ni tih a inhrethiam ngai der lo lehnghal! Sum hi mihring avangin a lo awm a, mihring erawh sum avangin a awm ngai Iovang. Zahawmna dik hi sum leh pâia lei theih a ni ngai lo!

A thinlung chu eng’e lo thleng leh ang tih ngaihtuahnain a Iuah a. Eng hlauhawm nge lo thleng tur chu? Ke hi a lo pen thui mah mah tawh em ni ang? A tho a, a inbual harh a, muangchangin Je-a thil dahthat la turin an In lam a pan leh ta a.

A thil lak tur a lak zawha an In a thlen leh chuan khua a thim tan tawh, Pu Rokhuma’n a lo nghak reng tawh a. Ani hi a hmel pawh a lo opangngai leh thlap tawh, a in tura tur a tel theih dan erawh hriat a har, Damdawi In an kalpui hmaa a vannei ta a ni.

“Muana, zanin chu kan In lamah rawn léng teh; chawte han ei la kan kal mai dawn em ni ang?”

“Chawei pawh ka châk fahran lo...”

“A nih loh leh kan Inah i ei mai dawn nia...”

Muanawma chu a han ngawi vang vang a, Pu Rokhuma zawhna chhang lem Io chuan, “Je-a ruang kha engtin nge an tih tak i hre mial em?” a han ti a.

“An postmortem zawhah a Ni Lianthuamite’n an hlawm ang”

“Ka lainat ngawt mai”

“Ni e, a lainatawm viau mai”

Pu Rokhuma han tawng danah chuan a fanu râwngtaka thattu chu tunge a nih a la hre lo tawp tih a hriat! Muanawma chu a han inngaihtuah harh thut a, Pu Rokhuma ang bawk hian Police lam pawh thil nihna tak hre lovin an la vai dawn tih a hrechhuak a, zia lo a ti ang reng hle, SI Zodinsanga erawh chuan a hre thawi tawh tho mai.

“Min lo nghak ta che, ka han insiam ang’e” a ti zawi sap a, muangchangin a pindan lam chu a pan san a.

A dik tak chuan phurna leh thathona reng reng a nei lo, chhuahvah pawh a chak nahek lo. Lehlamah Pu Rokhuma rilru put dan tur a chhut sak chuan a hrethiam khawp mai thung. Je-a ruang an en hnu khan SI Zodinsanga pawh kha phungthlu lo zetin a kal san ta a nih kha!

Police hnena engkim hrilhfiah leh sawifiah chu a mawhphurhna a ni a; chuti ang bawk chu a lakah Pu Rokhuma pawhin a phut ngei dawn a ni. Amaherawh chu engthawl taka misual hnu chhui a ni ve lo va, thinlung phurrit nei reng chungin mi hlauhawmte hniakhnu a chhui a, harsatna nasa tak tawk chungin a ding tlat a; chauh zawng a chau ve thin hle a ni.

Engpawh chu nise fukna hmun turah fu chat phawt mai teh ang.

Pu Rokhumate In an va thlen chuan SI Zodinsanga a lo awm ve reng tawh a, thutkhawmna pindanah an thu khawm thap a; he hmunah hian Rintei tualthih atanga kum khat chuang fé hnuah a hmawr bawkna an nei dawn a ni.

SI Zodinsanga chu a rawn tawng chhuak hmasa ber a, “Muana, Liandingngheta a chhuah theih tawh thu kha i sawi ngawt a, rindan chu nei tho mah ila hriatthiam har ka la ti hle mai" a han ti a.

“A dik a lawm, ka thiam loh a ni Pu Dinsang...” tia thupha chawiin, “Tualthattu tak chu a thih tawh avangin Liandingngheta kha kawl a tulna chhan a awm tawh lo a ni” a han tih zawm a.

“Tualthattu a thi tawh a...Muana tunge ni...!?” Pu Rokhuma chuan mak a tih hmel ang reng hle mai.

“Rin ka nei...” SI chuan a lo ti sap a.

“Aw ni e, ka Pa Khum a thi tawh a ni...a bul atangin engkim hrilhfiah ka han tum chhin ang’e. Pu Dinsanga hian a ring dik a ni; Rintei thattu chu ka thianpa Je-a kha a ni” a han ti ta a.

Ṭhutkhawmna pindanah hian Pu Rokhuma, SI Zodinsanga, Pi Remtluangi leh Lawmsangi an awm a, Muanawma thusawi avang chuan an ngawi thap hlawm; ani chuan a han sawizawm lehnghal a...

“A tir lamah kha chuan a nunhlui engemaw avangin Je-a Pa thih thu avanga man tâk Pu Vanlalruata kha ka han ringhlel deuh hman a, tin, Rintei Diary ziaha amah lenchilh ve ṭhintu ‘Pathlawi pakhat’ a tih nen khan hmehbel a remchang ve riau mai bawk tih ka hre hnuhnawh zui a; mahse...”

Chutih lai chuan Lawmsangi chu a lo tawng ve a, “Aw...khapa kha a rawn léng thin tak tak” a lo ti ve a.

“Lawmte, a dik ang ka ring: Pu Vanlalruata hian sulhnu pawr tak nei mah se, ka han chhui ka han chhui khan Rintei thata pawngsualtu a nih rin lohna chhan ka nei ta a, chu chu ka Pa Khuma'n Liandingngheta hming a sawi rik atang leh an lo inkhak tawh dan a sawi atangin a intan a; Rintei'n a tleirawl chhuah tak tak hmaa a thil tawn ka hriat khan thlékna lam tur min kawhhmuh ta niin ka hre bawk.

“Ka rin dan chu Pu Dinsanga’n harsa chung chung leh tlawmngaia Lehkhabua thisen awm leh Rintei pindana samzai awm a lo enfiah tir khan a rawn nemnghet ta chiah a. Hualtu khuaa ka zin lai a lo nih kher avangin ka tel ve ngai hauh lovin Pu Dinsangate hian Liandingngheta chu an lo man ta a ni.

“Ka zinna hmunah tawhsual ka tawh tâk avangin engmah bawhzui thei lovin ka awmzui ta nghal a; mahse, chu chu kal kawng dik lova ka kal zel tur kawng dika min hruai tantu a ni ta hlauh thung. Engtin nge a nih theih in ti mai thei a; heti ang hi a ni...

“Khatia ramhnuaia tawhsual tawka léngkir sang vak lova ka tlakthlaik hma khan mihring hlimthla chiang tak ka hmu a; mahse, chu hlimthla chuan ka lu-ah tak min rawn vuak zui ték avangin a hmel kha chiang takin ka chhinchhiah thei ta lo a ni; ka lo hmuh hmasak hlauh avang erawh chuan a kutthlak tuar na hman lovin léngkirah khan ka bu liam hman a, ka tlâkna lamah ka insawh nikhawhrelo zui ta a nih kha; vanneihthlak takin chhiatna tham khawp hliam ka tuar ta lo hlauh bawk” a han ti a, tui a han khiat khawlh a; a sawi zawm leh ta a...

“Damdawi Ina min dah hnu khan nikhawhreloin ka awm rei lo; nihnih hnulam kha chuan ka harh tan tawh a, rinhlelh tur thil ka hmuh leh ka hriat avangin harh chhuak angin ka awm duh lo mai a ni; a chhan chu, kha hmun fianrial leh rehah khan tuma tih buaina tel lo va ngaihtuahna sawrbing ka duh vang a ni.

“Thil ka han chhui dawn chhoh khan, zan khat chu kan khaw lama mi tu emaw thlithlai kha tul tlatin ka hre ta a; chu chu ICU pindana ka awm, a zan lina zan kha a ni nghe nghe. Min viltu Nurse kha engemaw tiin ka hrilhfiah thei mai a, hlauh erawh a hlauthawng khawp mai; mahse kha thil kha ka tih a tul tlat a ni.

“Chumi zan chuan ka chuakvâk fuh hle nghe nghe a, ka beisei loh lutukin phiarukna phiar chhuaktute inrawnkhawm lai ka bihthlak theih phah ta a ni. Chu chu he thilah hian Pu Vanlalruata’n inrawlhna a nei a ni tih chiang taka ka hriatna a ni bawk nghe nghe. Ama In ngeia inhmukhawm an nih avangin ka thangvalh dai tura ka ruat zingah a tel nghet ta a; puanzar phena rem leh rem lo, lang chiang thei vak lo chunga bihthla ka nih avangin a aw ka hriat si mi pakhat hmél erawh kha chu ka hmu thei ta lo. An hmel ka hmuh theihte thla lak sak tumin ka Phone ka han dap a; mahse tawhsual ka tawh atang khan Phone ka kawl tawh lo tih ka lo hre lo palh a ni reng mai.

“A hmel ka hmuh theih si loh, a aw ka hriat si khan ka ner sawk nghe nghe a; a chhan chu kha aw kha ka hriathnu ni tlata ka hriat vang a ni. Chumi tuma an thil sawi avang chuan ka Pa Khuma dinhmun derthawn zia ka hriat phah a, thli kha a thawt tak hum hum avangin an thusawi kimchang erawh ka hre thei ta lo va. Ka Pa Khum, Damdawi Ina luhpui ngai khawpa i awmna chhan pawh kha he’ng mite kuthnu hi a nih ngei ka ring” a han ti a, Pu Rokhuma chu a rum nghat a.

“Tichuan, Pu Dinsang Liandingngheta kha tualthattu a ni lo tih hre saa rawn hmu ka ni! Thil hlui engkim ka hriat duh avangin ka chhimbudawi mai mai a nih kha. Ka ti fuhin ka hria. A chhan chu, Liandingngheta Rintei’n a beihléta a hliam dan kha a hmaa ka mi rinhlelh ser ka hmuh nen ka chhuidawn theih phah a ni. Tin, Rintei awmdan, Multiple Personality Disorder(MPD) nia ka rinhlelhna pawh khan awmzia a nei hle mai bawk...nang phei chuan min hrethiam lo lek lek a nih kha; mahse finfiahna ka la neih miau loh avangin Liandingngheta tâng kha ka hruaichhuak thei ta li mai chauh a ni.

“Tichuan, Liandingngheta chhanchhuah theihna a nih beiseiin Rintei serha mipa chi leh Liandingngheta DNA enmil turin ka ngen che a, mak tak maiin kha mipa chi leh a ‘test result’ kha a bopil ta hmiah mai si a; khata tang phei kha chuan ka ngaihdan zam sa leh chhuidawnna mai lo chu hmatheh tur ka hre tawh tlat lo!

“Kawngdik lam zawh tan tak tak a tul tawh laiin Je-a pa a han boral zui a, kha khan min tikhawmuang hlek a; mahse remchangah ka la thei zel tho. Je-a ka rinhlelh tanna chu Pu Vanlalruatate Ina tute emaw inhmukhawm ka bihthlak zan atang khan a ni a; a hma chuan amah Pu Vanlalruata ka rinhlelhna dai tawh kha ka chhuanglum leh tan mék a ni. Kha aw neitu, a hmel ka hmuh theih si loh kha ka target tih ka hrechiang a, a hmel ka hmu thei ta lo chu pawi ka ti hle a, a aw kha erawh ka thianpa aw ni ngeiin ka hre si; finfiahna ka nei tha tawka ka hriat loh avangin enthlak rih ka tum ta a ni. An inhmuhkhawm zan khan karkhat hnua tualthattu kal bo tir a tul thu an sawi avangin ka thlithlai ru ta reng mai a.

“Damdawii In atanga ka chhuah hlim khan kan Inah Je-a nen kan inelh fiam a, chumi tuma a kawrban a han hlim chuan a banpuama thil zum engemaw hmanga vihna hnuhma ser ka hmu a; chu chu Liandingngheta Rintei’n Screw Driver-a a Vihna ser nen khan a inang hle tih ka hrechhuak a, chuta tang phei chuan Je-a chu ka rinthu tak meuh meuhin ka ringhlel ta bur a ni deuh ber mai. Ka ring sual lo tih pawh kn hre zui ta nghe nghe a, chu chuan ka thinlung pawh a vit na hle a; ka thianpa ber a nih tawh miau vang a ni.

“Ka ngaihdan finfiah nan Screw Driver chu Rintei pindan hnuai, ka chemté an chhara hmunah khan ka zawng chhin ta ngawt a, ka hmu ngei a, a lo tuiék bar tawh nghe nghe. Ka nu Remtluang, in Screw Driver a nih Ieh nih loh chian nan hawh ka dil che a, a bo tawh thu sawiin a thar in lei tawh tho thu min hrilh zui leh a nih kha” tiin Pi Remtluangi lam chu a han hawi a.

Tui a han in leh a; a sawizawm leh ta zel a...

“Je-a chu a pa boral denchhenin ka vil ta tlat a, rei tak ka tel lo va awm tir ka tum lo ve ringawt mai a ni. An Inah ka riahchilh a, thil tam tak kan sawi dun a, amah pawh khan he kan hnuchhui lai ka bawhzui dan hi engemaw chen chu a hria tih ka hria a, vawihnih khat phei chu hemi chugchangah zawhna min zawt nghe nghe. A pa thih dan kha a rinhlelh ve avangin amah kha a buai ru hle a, zan khat phei chu a mitmeng a sen vek a, a meng â phût a, pawisak nei lo hmeihmai rapthlak zet hi a pu a, tualthah mai chaka tuihal hmel hi a ang ber awm e.

“Tual lo that ta pawh ni se a sual vang leh tum lawk vanga tualthat duh tur chi niin ka hre ta lo va; ka thianpa a nih avanga ka lainatna thinlung pawh a ni maithei bawk. Mahse Pu Dinsang, tun hmain pawikhawihna liantham, tualthahna, a titu hriat si loh a awm leh awm loh ka zawt ta che a; a chhungte atangin Je-a nungchang chungchang ka theih ang angin ka chhui zui bawk. Chuta tang chuan amah khan buai thut thut a lo nei fo a ni tih ka hre ta bawk a ni; amah manna tur khawp finfiahna emaw, amah chu pawikhawihtu a ni ngei tih tichiangtu tur emaw pawh engmah ka la nei chuang lo; ka ngaihdan chu a dik ringin ka zui satliah lek a la ni tho!

“Je-a nena Hualtua kan zin tum khan a Diary ni ngei tura ka rin hi a thlauh a, a ruka chhiar saka amah fiam nana hman tumin ka chhar a, amah chu ka hrilh duh ta lo a ni. Chhiar lovin engemaw chen chu ka lo dah mai mai a; mahse vawi khat chu ka hmu fuh a, ka han en nak chuan ka thil chhui lai mék kaihhnawih thil a chhinchhiah tam tak ka hmu ta tlat mai! Je-a ka rinhlelhna thangvalh chu hun sawn ka tum ta lo; chutihrualin amah lo, midang inhnamhnawih an awm tih ka hria a; ani chu hmanraw pakhat mai a ni.

“Chutih lai chuan, zan khat chu Je-a chuan zin bo a tum thu a sawi ta tlat mai a, chét a hun tih ka hria. Ka thianpa mah ni se, a hri vei tha lo, ze phunglung lutuk nen kha chuan chhuah zalen chi a ni lo tih ka hria a; chuvangin Pu Dinsang, ka rawn hrilh thawi ta vat che a, Léngpui lam pan turin ka ngen ta che u a nih kha. Tichuan, Rintei rawngtaka thattu chu midang kut tuarin a thi ve ta a ni” tiin a thusawi chu a han tlip a, “Kha kha ka sawiflah thiam dan ber a ni” a han tih zawm a.

An ngawi thap a, hun rei vak lo chu tumah an tawng chhuak lo: Pu Rokhuma chuan a aw a han thian kharh a, “Muana, ka lawm e” a han ti ringawt a, engmah a sawi belh tawh lo.

SI Zodinsanga a rawn tawng veleh thung a, “Je-a chu tualthattu a ni ngei tih finfiahna, Court lama dinpui tlak kan mamawh dawn a ni; tin, Mutiple Personality Disorder(MPD) leh he thubuai inkungkaihna awm ang kha ka la hrethiam ta chuang lo” a han ti a, a nui deuh a.

“Rintei khan amah khawihtu Liandingngheta leh Je-a kha mahni invenhim tumin; a nihna takah chuan tualthah pawh hreh miah lovin a bei lét ve ve a ni. Doctor finfiahna lehkha chu kan nei lo nâ a, Multiple Personality Disorder hi a awm tak tak a nih ngai chuan Rintei khan he natna hi a vei ngei a ni ang tih ka ring; ama ze pangngaiah mi nunnem leh pawisawi ngai lo, mi inthlahrung dék chi a ni” a han ti a, “Finfiahna rintlak i duh chuan Je-a lehkha min hnutchhiah hi han chhiar ve teh. He Pen-Drive ah hian Je-a pa thihnaa inhnamhnawihte hlimthla i hmu bawk ang. Ka thianpa kha a pa phuba lakk a tumna lama thi a ni” tih pahin Pen-Drive hi a han lek va va a.

“A dik ang; a bulah khan ruang dang kan hmu a ni” SI Zodinsanga chuan a lo ti ve a. Muanawma lehkha pék chu a han chhiar a; a chhiar zawh chuan a thlep tha a, Muamawma pék lét pahin, “Kan la mamawh leh chein ka ring” a han ti a.

Muanawma chuan, “Tehreng mai...Pu Dinsang, kan khin hi an lian lutuk a ni” a ti a, “Engemaw chuan min la umzui ngei dawn a ni...lo chhinchhiah reng mah rawh...”

Muanawma chu pawnah a va chhuak a, van chu a lo thiang kuk a, arsi an lo pe iarh a; thlifim a thaw vawt seng seng a. Muanawma chuan thawk a han la ham ham a. Thil sanichhuah duh tâk loh tam tak a la nei a. Lunghlu inchuh thuhlate, Rambuai laia thil thlengte, thlanmual titite...

Amah hian hma bâk tam tak a la nei a ni.

* * * * * * *
Letter of Confession!
[Je- Inpuanna Lehkha]

Ṭhian duhtak,

He thu i hnena sawi a ngai ta hi pawi ka ti a, i ngaihdam ka ngai a ni.

Police lama pék tur lehkha ka rawn dah tel a, ka lehkha hi i hmuh veleh muangchang khawtlai lo va i chét nghal a ngai dawn a ni; chu chu Vanlalruata chungchang vang ani ang. Ka pa thattute zingah a tel ve tih ka hria a, ka Pa kha mi kuttuara thi a nih ka rinthu ka sawi tawh kha.

Thil tamtak, thil nihna tak i hre tawh tih ka hria, ka han sawi belh ang‘e; chumi hmain Vanlalruata hi lo mantir vat turin ka chah duh che a ni, i tân a hiauhawm thei dawn tlat! Hmanhmawh la muang suh ang che, i man ngei tur a ni ang. Thiamloh chantirna khawp finfiahna i duh a nih pawhin kan inah kal la, ka mimal thil ka dahthatna bik chu i hriat kha, kha tah khan a awm ang. Kan Inah khan Camera ka dah tih tumahin an hre lo. Chulam chu duhtawk ila; i nun nghawng pawi thei thil ka tihsual ka sawi a ngai ka hreh takzet a ni; sawi erawh a ngai si.

Ka miziaah hian i la hriat ngai loh hrivei mak tak mai ka nei a, chu chu inthunun zo lo khawpa rawva leh rapthlak taka chét chang ka nei thin hi a ni; ka thisen rawn lum thin hi ka thunun hman ngai lo! Chu tak chu ka thinlunga ser min siamtu i pawi ka khawihna chhan chu a ni.

Ka mi kawpte zingah chuan mi hlauhawm tak, pawisak pawh nei lo anga ngaih ka ni a; mahse chuti ang ngawt chu ka ni bik lo. Ka natna vei tha lo tak, ka thisen rawn lum thunun zo lo khawpa ka chét thinna hian buaina min tawh tir thin a ni zawk; pawi ka khawih fo tawh a. Rintei chunga thil rapthlaktak lo thleng hi pawi ka ti em em a ni!

Ka harhfim hnuah i lakah ka inthiam thei ngai lo va, inthup reng rengin ka hun ka hmang a, ‘The Judges’ chhuahsan thei lo tura thlun beh ka ni a, chhuah luih tum ila ka pa nunnain a tuar dawn tih ka hriat avangin bet lo tak chungin kan hotute thuin ka awm ta zel a ni.A tâwpah ka pa nunna chuan a tuar ta tho a nih kha!

Mizoram buai lai huna ‘The Judges’ zinga ka pa thianpa ka tih kha pa Rokhuma pa pu Liannghawra a ni a. Thian inkawnmgeih tak, khawkhata awm an ni chung khan sual lama zungkaihna tenawm tak avangin an inkawm ngam loh thu ka pa khan a sawi thin. Pu Liannghawra aia ka pa hi a naupan hle zawk avangin û ang tak takin a en a, a ngaina hle.

A diktaka sawi chuan Pu Liannghawra kha tualthahna kulhnu thupa thah a ni! Vanlalruata hian inrawlhna a nei lian hle bawk. Pu Liannghawra laka an duh anga an hlawhtlin tâk loh avangin ruahmanna tenawm dang an duang leh ta a; chumia an tum tur chu pu Rokhuma a ni ta thung a. Khawkhata awm kan nih avangin ngun taka thlithlai tura tih ka ni. Ka chanpual tur ka tihna kawngah i pawi ka khawih ta ni. Khami ni khan Pu Rokhuma kawma chhimbudawi tuma kal ka ni a. Tumah an awm lo a ni ang, kawngka ka han kik a, tumahin min chhang lo. Ka han kik nawn leh ṭhin a, tumahin min chhan chuan loh avangin haw leh mai tumin ka rilru ka siam a; mahse, kawngkhar chu a kau tih ka hriat veleh ka rilru ka thlak thut a, Inchhungah ka lut ta ni.

Inchhung chu a lo reh dak a, aw thianin ka han au hlawm a, min chhangtu an awm loh avangin ka rilru a verther tulh tulh a; kan thil duh, an nei ngeia kan rin chu dap duhna ka nei lian telh telh a; ka thinlung chu setana’n a luah leh tan mék a ni ngat ang! Hlauhthawnna leh timna ka tlachham tawlh tawlh mai.

An thutkhawmna pindanah ka lut a; an thil dahna vel chu ka melh kual ruai a, ka kal Ieh tur chiah chuan inhnuailam pindan Ian theihna darthlalang atang chuan ka mit sir hian thil hmuh ka nei ta tlat a. Ka han en chiang a; inhnuai pindan kawngkhar chu a inhawng huau a, Khumah chuan Rintei a mu a, a muhil a nih hmel; che chang lovin ka en ta reng mai a ni. Boxer tawite leh kawr bahlawk panté hi a ha a, a mut dan chu a duhawm lam mah mah a ni. A muthilh tui hmel hle a, a kutin lehkhabu a keng a; a lekhabu chhiarlai a muthilh san a ni ngei ang.

Ka rilru chu vertherna hlirin a khat tawh a; rilru siam thut ang maiin inhnuai lamah ka chhuk a, pindan kawngka ka thlen chuan ka ding a, Rintei muhil lai chu ka en leh ta veng veng mai a. Tun hnu hian ka va han inzahpui tak em! Hla pakhat hi zawitein a in-play ri riai riai a.

Chutia ka en reng lai chuan a rawn harh a; mitla lék lovin ka en tih a hriat chuan a ṭhu thuai a, a bula thawmhnaw chuan a awm bawr a hup vat a, thlabar hmel em em hian min han en a. Mahse a thlabar hmel chuan rei a awh lo, thinrim mitmeng tur ngan mai hian a mitmeng chu a inthlak leh vat a; misual ni ta se, tualthah châka sahal mitmengah ka chhiar ngei ang. A ze inthlâk danglam nasa tak chuan min ti hrilhhai lek lek a ni.

Kei pawh, sual luhchilh ka nihna a reh mai bik lo! A banah ka man a, ka lamah ka pawt hnai dawrh a. Ani pawh a awm mai mai bik lo! Min beilét a; nasa tak a ni. Chutah, khum bul dawhkana hmanraw awm chu a chuh that a, min chhun tumin min rawn bei leh ta mai. Kei chu ka banin ka lo indang a; ka ban puam dinglamah hian vawi hnih min chhun hman! A na hle a, a thip vang vang mai; mahse ka thisen a lum laklawh tlat a ka thiltih lai chu tawpsan mai ka turn lo!

A bek dinglamah ka beng nghek a, khumah a tlu zawi hnawk a. Ka duh ang tawka ka chét hnuah ka thianpa pawi ka khawih tih inhriatna a lo awm a; zahna tur hmachhawn ngam loh avangin ka thinlungah thil tha lo lehzual a rawn lut ta a ni. Tichuan, dawhkana chemte chu ka han ban a; Rintei hrawkah chuan ka zai ta a ni!

He thil ka sawi avang hian i rilru a na thar leh ngei dawn tih ka hria a; mahse sawi ngei a tul tih chhan ka nei. Rintei ze inthlak kha a ni; ze danglam tak a ni. Khatia kan inchai buai chhung khan mangang hmel a pu lo va a au hek Io! Tumruh hmel tak mai leh thahnemngai em em hian min bei lét a, min tihhlum duh em em khawpa huatna mitmeng ka hmu tlat a ni. Kei pawhin mak ka ti tak zet!

Rintei, khum awngphah chuar nuaih leh thisen inchiahpiah nuaih chunga a mu chu ka han ennawn leh a; chutah, ka sulhnu pawr awm theite ka thian a; chemté leh Rintei’n min chhunna Screw Driver chu tukverhah ka theh chhuak a; chutih lai chuan inchung lamah thawm ka hria a, hmanhmawh leh fimkhur takin tukverhah ka zuangthla ta a ni! Ka tla na teuh hle nghe nghe!

Chuta tang chuan i pawi ka khawih a ni tih ka inhriatna chuan min chhui reng a; rilru nuamin hun ka hmang ngai ta mang lo! Rintei thattua puh i niha man i nihte, thiam loh chantir i nihte khan hrehawm ti takin hun ka hmang a, tih theih ka nei si lo. ‘The Judges’ thununna hnuaiah ka awm a, an ruahman dan ni lo va ka chétna chuan an thin a ti ur em em a. Tih tur ti lo thei lovin ka pa karfungah hmangin min thunun tlat a, ka tan chuan a buaithlak takzet mai!

An tan i hnawksak tan tih an hria a, warning pek che tul an ti tan a; vauna Iehkha i hmuh kha i pindanah keimah ngei min dah tir a ni. ‘The Judges’ kut hi i la tuar ngei dawn a, i chhungte tan pawh a hlauhawm a ni; an khawih phak apiang an khawih thin! Chuvangin lo tawp san ang che; a tlai lutuk hmain lo tawp san ang che aw. I khin atan chuan an lian lutuk; i tawrh zel hi ka duh lo a ni.

I tan a hlauhawm tan tih ka hriat avangin a ruka inthiarfihlim tir che ka duh a, zin puiah ka sawm ta che a ni. Ka puteate khuaa kan han zin khan an umzui dawn che tih hriat rukna ka nei a; ka ngaihtuah em em che a ni. Ka hlauhthawn ang ngeiin tawhsual i tawk ta a nih kha!

Hualtungamtawna-Uino-Neihna kan en tum khan ka thil chhinchhiahna ka tibo a; ngaihngamin ka awm tawh lo. ‘The Judges’ nena kan inzawmna thil ka chhinchhiahna a ni a, ka tana thil pawi thei tam tak ka ziak a ni. Damdawi Ina i awm lai khan ka han dap deuh dawn a; mahse ka vanduaina ai a ni ang ka hmu mai ta lo!

Ka Pa a borala ka bula i awm chawt takah khan engemaw hriat ruk i nei ṭeuh tawh ang tih ka ring a. Kei pawhin thutlukna harsa tak, dik tak ni si chu ka siam ve ta a ni. Nang hian min la man chhuak dawn tho tho tih ka hriat tlat avangin ruahmanna dang ka siam ve ta a. ‘The Judges’ hotute aṭangin zin bo tura thupek ka ni a; chutih laiin ka pa chunga chét dan tur an lo phiar ru a, ka pa nunnain a tuar ta a ni. Mahse min bum bik lo, ka pa khawihtute ka hre vek tho. An zinga mi thenkhatte chungah kut lek ve ka tum ta a; zin bo tura min tihna chu remchangah lain ka che ve dawn a ni. Ka thian, kan inhmu leh tawh kher lo vang!

Ngaihdam theih loh khawpa nasain i pawi ka khawih a; mahse, Rintei phuba chu keimah ngei hian ka lak sak dawn che. Chu chu ka chungah ngei hian a thleng ang!

Nang chuan tawp san tawh rawh!

Je-a

* * * * * * *

Chapter 7
Broken Heart!

Chung thil hnuah chuan ni a liam a, thla a liam a, Muanawma nun chu a ngui ru hle a, an inchhungkhur boruak a nawm vak loh thla a ni lehnghal. Hemi thla hi Rintei thih dan, thih chhan leh a thattu an hriatchhuah atanga thla sarihna a lo ni tawh a; kha thil an buaipui zawh fel hnu khan a nunah harsatna, mite’n an hmuhpui hauh si loah ipik mangannain a tlâkbuak hun lai a tawng leh a! Lehlamah chuan Sangtei nena an hun hman dun hlimawm leh rei lo tak si kha a tan hlu tak a ni thung! Mahse, an hlim hun chhung kha a rei lo khawp mai!

Thla kal ta, May thla kha Sangtei’n a chhan leh avang sawi duh mumal meuh mang si lo va Muanawma tâna biakpawh theih loha a inlakhran thla a ni bawk!

Muanawma rilru chu a dam lo hle a!

A nuna harsat hrang hrang avang khan a buan tawk aia lian hret buaina buan buaithlak tak, a chhungril luhchilhtu kha a nei leh a; mite hmuh leh ngaihdanah chuan a pawn lam pangti chu a himin a dam, an hmuh phék loh, a nun lairil erawh a bihchiang ve viautu nih loh chuan a dam lo tih a hriat loh!

Chuti ang hun harsa leh khirhah chuan a tâna ding leh thlâwp rengtu ni tur a beisei chuan a phone call a pick-up duh lo va, a message a chhang duh hek lo! Social media lama biakpawh tuma a han inbox ngial pawhin thi tawh ngaih thu inbunruah nana thi tawh hnena lehkhathawn ang maiin chhanlét a hlawh ngai lo! A whatsapp message-in ngaihven a hlawh lo va, a thawn thlawn mai mai lek a ni! A thiam loh a nihna a tam hle ang tih a hriat avangin ngaihdam a dil tluk tluk a, ngaihdam dilna leh pawi tih thu thawnin a theih anga tam biakpawh a tum a; mahse a beiseina chu beisei loh bei tidawngtu a nihna tura beihna beidawnthlak mai mai a ni!

Chhanlétna pakhat pawh a dawng lo!

Hmeichhe laka induh a thiam hran lo hi a buaina neih zinga a chîn thin thil tul hran lo tak a ni. He thil hi chîng lo tawp se tha tur; a ṭo thei awm chuang tawp si lo va! Hei vang hian buaina a tawk fo va; a thiam zawng tak chu ngaihdam a dil fé tawh hnua beiseina neihna tur khawp mitmeng leh awmdan hmeichhe laka a hmuh theih tawh loh hnua reh hmak hi a ni! Hei hi chu a thiam ve ang reng khawp thung!

Bathlarah chuan a inngaihtuah nasa hle a; tunah chuan a thinlunga hmeichhia a lakluh thar chu a thinlung kilkhata thehthang ve mai mai a duh tawh a; a ti ngei bawk ang. A nunah he thil hian karkhat bak a daih tur a ni reng reng lo.Phone call hmanga biak pawh leh fb lam leh whatsapp lama biak pawh tumna chauh pawh duh tawk lovin a hmun ngeia kal chilhin a pan ve tak tawk tawk kha a nia; mahse vawikhat biak lek pawh hlawh lovin a beidawng haw! Hmeichhe chapo tak ni hian a han hre deuh a; mahse ngaihtuah zui tlakah a dah ta lo zawk!

A han rum nghat a; inchhunga lut tura a inher rual chuan a nu a rawn kal a...

“Mama, hei kan kal tawh dawn a nia...nang i damsam lo nen, Siama nen kan zuk kal mai a niang chu”

“Aw le; mahse fimkhur ula aw”

“I naute pawh ka bia a, rawn thlen hlan an nghahhlelh khawp kha...”

“In rawn thleng tlai viau ang a...?”

“Ka hre lo le”

A diktak chuan a nute kalna tur emaw thiltih tur lam emaw chuan a rilru a luah nép hle mai; Sangtei nena an inkar ngawt chu a ngaihtuah a! Tunah chuan a reh ve tawh ang. A chat ang a, a chat hlen bawk ang; chu chu a inngaihtuah vang vang hnua a thutlukna siam dan hnuhnung ber chu a ni!

Mitthi nita hmeichhia avang khan a thinlung a keh tawh a; tunah, nula leh mipa inlaichinna chungchangah bawk, minung damlai hmeichhia avangin a keh nawn leh tawh chu a nia! Engpawh chu nise, a thinlung leh taksa hian chawlh hahdam a mamawh reng reng! A hah a, a chau a, a hliam a, a dam miah lo! Dam phawt se engemaw tak chu a la ti leh ang a, engtin emaw tak a la awm ve ngei ang!

Inhnuai lamah a chhuk thla a, a nute chu an lo kal tawh a. Pindanah thuin Rintei thih ni atanga Hualtu ram, Kawnpui ngawa a chetsual ni thlenga a awm dan, a thil tawn leh chet dan a vawn reng theih nana a pawimawh bik lai nia a hriat a chhinchhiah chu a ban en a.

Kha hna zet kha chu atan hna hautak tham tak a ni. A vawikhatna a ni a; a tihdan apiang mai kha a la tih ngai loh vek, a tan a hmasa ber zel a ni. A tir phei kha chuan zei a inti hlawl lo va; mahse, Siamtu hian a thiltiha vannei thei turin a hual a ni ngei ang, kawng harsa leh hna khirh, hlauhawm leh ralti ni mah se, mak tak leh fuh zetin a tlingtla thei a, Pu Rokhuma’n amaha beiseina a neih kha a tibeidawng bik lo ta hram chu a nih kha! Mahse kha thil a chinfel avang khan a thaw a veng lo va, a hlimphah lo va, a phur phah nahek lo; a chhan pawh kan hriat tawh kha!

Naktuk zanah chuan a pa boral hnua an chhungkaw member la damte chu an kim thap tawh ang. A farnute an rawn haw ang a, a ni’n nidanga a fiam dan ngaite khan a lo fiam leh ang a, hun rei lote chauh tal pawh Sangtei vanga a thinlung dam lo tak hi a theihnghilh thei mahna! A ngaihtuahnaah thil pakhat a rawn lut zawk a; chu chu Hualtu khuaa an zin hmaa a pindana Je-a’n a lo dah lehkhathem kha a ni! He lehkha hi a thianpa hnen atangin vauna(warning) a nih thu a hre tawh a!!

A thubuai buaipui buaithlak lai chingfel tawh mah se a thinlungah chuan a chunga he thilin a nghawng lo thleng tur hi a pumpelh mai dawn lo nia inhriatna a nei tlat a, a helh em em chu vauna lehkha chu a ni; ama tâna hlauthawng a ni lo va, a chhungte tan zawk hian a ni! Chuti ang thil ngaihtuah Chung chuan a pindan lama chhoh a han tum a; chutah, kawngka chu zawi deuh tak hian an rawn kik karh karh a. A va hawng chu hmuh a beisei loh tawp a va hmu a.

“Thil hrilh lawk che ka duh aaa...ka...ka lo lut lawk thei ang em?”

Muanawma chuan hmel pangngai thlap hian a lo dawngsawng a; ngawi rengin a han en ren rawn phawt a, chumi hnuah, “Lo lut rawh, Eng’e ni ta Sangte?” a ti ve ta a.

Nidang ang lo zetin tlangnel hmel vak lo hian Sangtei chu a lut a, nuam pawh a tih hmel vak lem lo. Muanawma chuan, “Sitting room lamah sawn lo va thu rawh...thingpui ka’n siam nghal ang’e...”

“A ngai lo...ka in châk lo a nia...”

Muanawma chuan engtinmah a chhang lo va, hawi pawh hawi lét lovin choka lam a pansan a thingpui chu a va siam a...

“Kha Ie...in ka lo tum chiah hrim hrim a...” a han ti a. “Eng’e min hrilh i duh chu...?” a han tizui zat a.

“Muana, min ngaidam rawh...ih...ngaihdam dil che ka duh a ni” a inthiam lo hmel hle!

Muanana chuan a chhang lo; amah ngaihdam diltu chu a en reng a, a mitmeng chu Sangtei chuan chhiarthiam har a ti hle...

“Ka dik lo a ni...i harsatna kha ka lo hrethiam lo a...” Sangtei chuan a han ti leh a.

Muanawma chuan a la chhang chuang lo! A hmaa ṭhu a melhna mit chu a la sawn a pawn lam a thlir ta daih a. Sangtei chu a han thaw halh a, sawi tur vang a ti hle tawh bawk! Rei fé an ngawih dun hnuah muangchangin Muanawma chuan a hmaa ṭhu hmeichhe hmelchhe lem lo tak chu a han en leh a...

“Kan tih sual pakhat chu kan facebook account pass-word kan inhriatpui leh, ka phone atanga i account lut a, notification leh inbox ka Phone-a thleng tura ka set palh kha a ni; off dan ka thiam tawh miah lo lehnghal...” tiin za lo takin a ban then sak a. “My Dear...” a han ti zui a; chîk taka entu tan chuan tiel hmel a pu lek lekin a hriat nghe nghe ang! ‘My Dear’ tih hi mipa pakhatin facebook inbox lama Sangtei a kohna a ni a.

“Eng maw...!?”

“Lo haw duh suh, tihvak ngaihna a awm lo; Phone thar ka nei tép tawh. Eng lo a nia...i inbox dawnte hi ka Phone ah a rawn thleng thin; thawkkhat laia i thianpa tharin inbox lama tawngkam CK deuh taka a rawn chhaih ṭhinna che phei kha chu hmuh hrehawm ka ti thin khawp mai...” Muanawma chuan a han ti leh a.

Sangtei chu a ngawi reng a...

Muanawma hian a laka Sangtei a lungawi lo hi chu a dem hran lo, ama’n thiam lohna a nei em em ang tih a ring tlat a; mahse, a biak duh loh atanga hun rei lote hnu maiah mipa dang nuam ti taka a kawp leh thei mai kha mak a tiin a rilru a dam chiah lo a ni! Mahse dem vak erawh a tangkai nép hle si!

“Muana, min ngaidam dawn nia...” tih paha Sangtei chu thoin kal mai a han tum a...

“Sangte, ka ngaihdam i ngaihna turin eng thil mah ka chungah i tisual lo, riIru dam takin awm rawh. I hlim chuan a tawk...”

“Ka lawm e, Muana...”

“Nang nena kan inkawp leh tawh loh hi ka beisei! Ruah a sur dawn a nia va haw vat rawh...Pa Rokhumate Inah a ni em i innghah?” tiin a han nui var var a.

“Aw ni e...mahse Muana...”

Muanawma nui chu a tawp thut a, “Sangte haw vat zawk rawh, ruah a sur dawn ka tih chu...heta i awm ve reng hi ka duh lo...i laka ka rilru put dan hi ka thlâk leh palh ang...kal tawh rawh!”

* * * * * * *

A khawhar miah lo anga kan ngai thei a nih chuan Muanawma chu kan chik tawk lo a ni ngat ang! Kawlkil lam a thlir vang vang a. Mipa leh hmeichhe inlaichinnaah, mi tuemaw ngai em em sia a ami ngaih a ngaihna pawh a mi ngaih laka tilang ngam tawh lo khawpa inven a ngai ta dinhmuna din chu thil khirhkhan ve tak a ni e.

Pawnah thli a thaw vuk vuk a, ruah sur tur a inṭam tan a, kawmchar lamah rangva a ri ṭhuai ṭhuai a. Tukverh darthlalang atanga lang thei Japan Zawngtah kung che lawih lawih chuan In bang a vaw pha lek lek thin; mi thenkhat chu an thenawmte Inah an tlankhawm sap sap a.

Mahni sahim nana sak leh sualchhuah, sum senga an lo din ve pawh ring zo lo va tlanchhuahsan ngai khawpa nawrluitu thli tleh tur inhrosa vel chu nep lo tak a ni! Muanawma chu engin nge maw mawlh ni, thli chu hlauh nachang pawh a hre ve lo! Sangtei nena an inkar khawlh tak ngawt chu a lo ngaihtuah a. An intawn tirh kha a ni...chu’ng hun kal ta chu a mitthla a. Hun chunga thuneitu nise a tihsual Siam tha turin kha hun kha a pawtkir mai tur hi a nia. A tih loh tawp tur amah enkawltu Pathian thu meuh mil lo taka a awm dante kha! Lehlamah chuan a khua a har a, a thinlung ruak hnawhkhah a duh luatah a chesual a ni ber; amah leh amah chu a han inthiamchawp leh rih a!

Rangva chu a rawn ri leh tuarh a; vawk In chung chu a kau hâwk a!

Ding taka a ngaihtuahna a kal tlat avangin Muanawma chuan chu thli huaisar takin pawi a khawih chu a ngaihven lo! Sangtei a bém ta ngawt mai kha pawi tih riau chang a nei thin.Khati khan a tha zawk a sin le; thian ang khan! Thian ang chauh khan lo ni zel se an inkara harsatna awm tam zâwk hi a awm Io tur hi a nia! Mahse, Sangtei khan mitmei a hmuh tlat a tin ni!

Tunah chuan a tlai tawh; tlai tawh tak a ni. A chhan chu Muanawma hian ngaihzawng anga a kawp tawh hmeichhia hi thian anga kawm zui a duh lo! A tihdan a ni lo! A thiam ve hek lo! Kalsan chuan kalsan, inkawp chuan inkawp; chu chu a ni mai! Hmangaihna avanga inlaichinnaah hian ‘thian’ nihna ze dik a tel tur a ni zâwk tih hi a ngaihdan a ni tlat thung a!

Khua a rawn thim a, thla a éng lo va, arsi de hmuh tur a awm Io.

Muanawma chuan a hun kal tawh, a hun tawn hlimawm tak takte a chhui kir a; mak tak maiina a dinhmun leh hun tawn mék nena inhmeh vak lovin a nui sak a. Thim karah a inngaihtuah a, a hmaah hun hlimawm tak a la awm ang tiin a hmabak a thlirlawk a. Mahse, a pum chu a rawn na ṭan ta rém rém a; haider harsa khawpin a rawn na zui ta hial a!

Climax: Bad Tragedy!

Ni rawn chhuak chu a ṭang tha et awtin khua a thiang hle a; zan lamah khua a nuar nasat teh reng nen.

A pum nawm vak loh avanga a muhil thei lo kha a tlaivar deuh thaw a, khawvar dawn tépah reilote a muhil ve sek chauh. A pum a la nawm vak loh avanga tho peih mai lovin muthmun atangin an In bula sava chiar nak nak chu a ngaithla. A lung a leng em em ringawt mai a; Sangtei a ngaih vang chu a ni si lo, a khua a har ru riau reuh a. Whatsapp a lut chhen a, amah tiphur thei message engmah a dawng lo.

“Engvang nge le...tukin hi...!?” a ti rilru nauh nauh a!

A hun kal tawh bawkin a rilru a luah leh a. Inngaihzawnna kawnga a kaltluan lutuk lohnate ngaihtuah lét neuh neuh pah chuan engvang nge ni ang tih pawh a chhut lo chuang lo; ama zir loh a nih a ring rum rum zawk thin. A nunah hian engpawh tawk se la, paltlang thei tura hmalam pan chu a tih tur a ni tih a hria.

A ngaihzawngte lakah hriatthiamna a ngah viau emaw a lo intih lai hian a lo ngah tawk lo hle a ni mai thei. A chang chuan tumah hmangaih lohte hi tha zawk dawn riaua hriat chang a nei a; mahse mi va hmangaih lo turin a thinlung a khap ngawt thei si lo! A hmalam hun ngaihtuahin a let a let a!

A chauh deuh avangin chhun lamah engmah a ti peih lo va, ngaihtuahna kawm pahin a muzal mai mai a, zan lama a muhil tha lo chuan a ṭhîng lét a, a tâwpah chuan a muhil ta nge nge a. A Phone ‘ring’ ri ring vak lo rimawi ri riai riai chuan a tiharh a, rum tiah tiah chungin a han ban a; SI Zodinsanga a lo ni. Sana a han en a, dar 9:27pm a ni a. Tho mai peih lo va a mut leh vang vang hnuah, “Pu Zodinsanga chuan eng’e maw a duh le?” tia phun sap pahin a tho ve ta a.

Chutah, hriatchhuah thut neiin a pindan atang chuan inhnuai lamah a chhukthla vat a, choka lamah chuan thawm a ri rak rak a, “Ka nute an lo thleng tawh e, min kaitho duh lo a ni ngei ang” ti rilru nauh nauh pahin choka lamah chuan a lut phei a. A nu chu a lo awm ngei a, chawei thleng a lo sil ri rak rak a.

“Ka nu, in lo thlenna a rei tawh em?”

“Rei lo ve...hei, chaw kan eikhamna pawh a la rei vak lo...”

“Min kaihthawh tur a lawm le...nizan ka pum nuam lo ka muhil mang lo va, chhun lama ka mu ka lo mutui deuh a niang...khaw’nge Kimkimite ho hi an awm a...?”

“I Pu Thangmawiaten kan hmu chak e an tia, an léng phei lawk a nih kha, an rawn haw tép tawh ang”

Chutih lai chuan Kawngka chu an rawn kik dat dat a, Muanawma chuan, “Ka va hawn ang’e...Pu Zodinsanga a ni ang, nichin khan min rawn phone a...” tiin kawngka lam chu a pan a. A va hawn chuan Pu Zodinsanga chu a lo ni ngei mai a. Muanawma chuan Thutkhawmna pindana luhpui pahin, “Ka nu, hei Pu Dinsanga hi thingpui kha rawn siam kep nghal mai teh aw” tiin a nu chu a han au a, a nu chuan a rawn chhang lem lo va. Pu Zodinsanga chuan Muanawma chu mak tih hmel zet hian a lo en hâ a!

Mak takin Muanawma chu a tawngduh riau mai, a inléng pa tawng vena hun pawh a siamsak hek lo, hlim hmel mawlmang zet hian a titi a, a nui sang mai bawk. Pu Zodinsanga chuan mak a ti em em mai a, a thu hrilh tur pawh chu hrilh a huphurh takzet tawh! Chutah, Muanawma chuan rei a ti ta deuh a niang, a nu chu a han au leh a; mahse, tuma’n an chhang lo!

Muanawma chu a tho vut a, chokaa luh pah chuan, “Ka nu?” a han ti a, tumah an lo awm si lo. Chhuah leh pahin, “Khaw’nge maw ka nu chu a lo kal bo hman le” a ti nuah nuah a. “Pu Dinsang, zanin chu ka farnute an rawn hawng a, Siama leh ka nuin an zuk hruai a, ka muthilh hlanin an rawn thleng pek a, ka Pu Thangmawiate Inah an leng lawk a ni awm e...” a han ti leh a. “Ka nu pawh chu khaw’nge maw a kal ni...thingpui chu keima’n ka’n siam mai ang’e” tih paha chokaa a lut tur chiah chu Pu Zodinsanga chuan aw zawi fiah ang reng tak hian a ko ta a.

Muanawma chu a ding chawt a, Pu Dinsanga hmel a hmuh chuan a hmel a danglam ve nghal, “Eng’e thil awmzia?” a han ti sap a!

“Muana, a pawi ka ti khawp mai, zanin dar 7:00 vel khan Rangvamual thlen hmain i nute chu an chesual a ni; I nu ruang leh Siama ruang leh Mawii ruang chuan in In hi a rawn thleng har tawh lo vang; Kimkimi erawh hmuh a la ni lo. Ka rawn biak lai che khan chanchin kimchang ka la hre lo va, in In ka rawn panna lamah ka hrechiang ve chauh a ni, hmaichhan ngeia hrilh che thain ka hre ta zawk a ni...a pawi ka ti...!”

Muanawma chu a tawng lo va a dinna ngaiah che Iovin a ding reng a, SI Zodinsanga chu a en tlawk tlawk a; a thu hriat chuan a thawng takzet a ni. Hmalamah a pen chhat chhat a, SI Dinsanga kalpelin thutkhawmna pindan pawnlama hulhliap an siama thuthlengah chuan a va thu hnawk a, a kun ta tlawk tlawk a...

Pu Zodinsanga chuan lainat zetin a han en a; a tir atanga a tawrhnate kha a ni hi chuan a hriatpui a ni. Hahchawlhna hun a nei ve dawn tan chauh a, a chungah lungchhiatna bawk a thleng leh si; tun tum phei chu a thuah chhah tha hle leh nghal! Rintei thattu a hriatchhuah dan a sawifiah ṭuma Muanawma'n a hnena a thusawi kha a han hrechhuak a, "Pu Dinsang, kan khin hi an lian lutuk a ni...engemaw chuan min la umzui ngei dawn a ni...lo chhinchhiah reng mah rawh...” a ti a nih kha; umzuiin a awm ta mai em ni?

Muanawma rilruah chuan, ‘The Judges’ tih thu leh a thianpa’n lehkhaa a thuziahte kha a rawn lang zut zut a; tunah chuan a tana tawrhna vawrtawp tak tak chu a lo thleng ta e!

A khawvelah chuan thim a tam zawk a!

A TAWP TA E!

"RETHEITE CHU HREHAWMNA AṬANGIN HMUNSANGAH A HLANG ṬHIN A, RAN RUAL ANGIN CHHUNGTE A SIAMSAK ṬHIN" - Sam 107:41

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 12th, 2018, 2:25 pm

Ngaihnawm thlawt e👍

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)