ZÂN VÂK - 3

Episode kal lai dah luhna

Moderator: writers

Ar eL' Khawlhring
Posts: 69
Joined: December 28th, 2016, 1:46 pm

ZÂN VÂK - 3

Unread post by Ar eL' Khawlhring » May 21st, 2018, 8:20 pm

ZÂN VÂK
Chapter - 3

Zanriah ei kham chuan Puia pawh hrilh lem lo chuan muangchangin ka insiam a. Dar 7 a rik chuan inpeih at chungin Puia hnenah chuan nui duh miah lovin, "I lo kal ve dawn em?" ka ti a. Puia chuan mak tih hmel deuh fe a min en chungin, "Khawiah maw?" a ti deuh hu a.
"E, computer class ka pe dawn."
"Uang lo teh, khawnge lên i tum a?"

"Computer class ka pe dawn, min sawm ve miau sia lawm," ka ti a.
"A tu chuan maw?"

"Aw, nizana kan lenna nula upa zawk Jenny khan."
Chutah nuih hawk hawk pahin, "Vawiinah in lo inhmu a ni maw? Jenny paw'n engmah min hrilh bawk si lo va, nih leh ka'n insiam ange," a ti ta a.

Puia insiam chhung chuan Sawma hnenah kalin kan chhuah dawn thu hrilhin a naute ho chu lo vil deuh turin ka chah a. Tichuan Puia insiam zawh veleh chuan bike pawh keng ve ve duh lem lovin, a insenso thlak mai mai tiin ka bike chuan kan inphur chhuak ta a.

Jenny nu leh pate pawh lo awmin anni pahnihin computer class an inpek lai chuan tv en pahin kan lo titi mai mai hlawm a. Dik tak chuan mu daih mah se pawi ka tih loh nen, an meng ve ţut bawk sia. Mapuii lo kawm a, chhûn lam chanchin vel zawh chian a, titipui deuh ka duh tehlul nen.

Mapuii pa chu pa titi thiam tak mai niin sawi tur a hre em em mai a. A titi a ngaihnawm leh a hriatna a zau em avang chuan ka nin tur angin ka ning lo chauh zawk a ni. Chutah ka bengverh zawng tak mai, tunlaia ka ngaihven em em chinghne chungchang a rawn sawi chhuah takah chuan ka ţhu ţha ta sauh sauh a.

Mapuii pa, pu Rawna chuan, "Tun hnai a chinghnia Aizawl khawchhung a rawn lut an sawi hi in hre ve tawh em? a rawn ti ta a. Kei chuan, "Hre ve deuh e. A tak a nih chuan a mak khawpin ka hria," ka han ti te te a, engmah ka thil tawn chu sawi ka tum lo.

Chutah pu Rawna chuan ka lam rawn hawiin, "A tak ngei chu a nih hmel. Hei i hmuh angin kan kawmthlang, huan thlanglam aţang hi chuan thing hmun a ni thla nghal mai a. Tun hnai khan vawi hnih chu a chinghne rual an rawn û chiam chiam alawm. Tunlai mi tam tak hian sihal leh chinghnia hi an hre hre hrang miah lo. Chinghnia chu sihal lian tak niin an hre ve mai mai hlawm a ni. Hmu lo mah ila an râwl hi a ringin a hrawl bik a, hai theih a ni lo. Tin, thla hmasa thla bial lai pawh khan Aizawl khaw dai a farm pakhat chu an beih chiam kha. Kha pawh kha a hmutu te'n sihalah an puh tlat a, a ni lo. Nang, i farm vengtute karah sihal rualin i bawngte an rawn seh ngam i ring em?" tiin min han zawt zui a. Kei chuan, "Ring hauh lo ka pu," ka lo ti a.

"A dik, chinghne rual rilţam tihna a ni mai. Chutah pawh a ruala an awm loh chuan ran awmna an pan vak vak hleinem. Mihring pawh a huho lo chuan an bei ngam lem lo. Mal leh mal inhmachhawnah pawh hriamhrei keng chu engtin mah an ti ngam bik lo, naupang an nih ngawt loh chuan," a ti a.

"A nih leh ka pu, chinghnia hi Mizoram chhungah an awm tawh lo tih te hi kan hriat dan a ni ve mai sia, a va mak ang reng ve," ka lo ti ve leh zel a.

"Chu tak chu alawm mak chu. Mizoram chu sawi loh, India ram chhungah pawh an chî a mang tial tial a. India ram chhungah hian 400 pawh a awm tling tawh kher lo vang. Mizoram chhungah hian a awm tawh lo chu kan tingawt thei lo na a, hmuh mai tur leh sawi tur erawh a awm tawh lo," a han ti leh a. Sawi tur a hre zek mai.

A ţawng duh bawk a, a titi kal laklawh lai chuan a ngaihdan han hriat law law chu ka duh a.
"A nih leh ka pu, 'Werewolf,' mihring chinghnia a chang ţhin an tih hi i rin zawng a ni em?" ka han tih chuan a nui hawk hawk a.

"Ka ring lem lo nachungin, thisena setana hnena inthawi ţhin zingah hi chuan chang thei an awm ka ring ve tho mai. Chu pawh rin dan deuh mai mai a ni. Setana hian a hnena inpumpekte chungah hi chuan thil hi a lo ti thei ve em a," a ti leh a.

Mapuii lam chu hawiin, "Nang i ring em?" nui chung hian ka va ti a. Mapuii chuan, "Ka hre lo e a," ner sak pahin a lo ti a.

Chutah pu Rawna chuan, "Kan mutsan ang che u, hlim deuhin lo inkawm rawh u," tiin an pindan lam chu min pansan ta a.
Pu Rawnate nupa chu an 'Polite' reuh ka ti hle mai. Nge ni an fanu hi tlangval chin hriat vak loh lakah pawh an ngaihtuah lem lo zawk? Mapuii hi ka lo sual vak te an hlau lo em maw ni le? Jenny te lah pindan hrang daihah class an inpe bawk si. Tihian ngaihngam deuhin an awm tho chu a nih hmel sia. Nge ni Pathian ţih tak chhungkua an nih vangin ngaihngam takin an fate hi Pathian kutah an dah zawk le?

Hun rei ve tak kal tawh, ka tlangval chhuah hlim a ka ngaihzawng nu nen kha chuan an inang lo kherin ka hria. Kha ka ngaihzawng nen khan minute sawm tal pawh 'Chance' han neih ve a, thuruk han sawi dun te kha kan châk ve thei em em a. A nu lah khan min mutsan kha a han tum lo thei lailêng khawp a. Thingpui hâng vawi hnih a in hnuah a mu tawh dawn emaw kan tih hnu paw'n thingpui a han chhuang ţha leh a, kan piahah a la ţhu ţha ang soh soh a. Bei tidawng leh zual turin dar 10:30 a rik tawh paw'n a tarmit a la, kristian tlangau chanchinbu te kha a la chhiar tak deuh deuh ţhin kha a nia. Ka bialnu ve nen kan beidawng lutuk kha kan innuih tawp zel ţhin lai te kha mitthlaah a lo lang uar uar a. Mapuii nu leh pate nen chuan an inang lo mange.

Chutia a nu leh pa an mut takah chuan hun remchang ka hmu ta ni a ngaiin engdang sawi tawh lovin Mapuii hnenah chuan Sangtei chu eng nge a an zui zel ka'n zawt nghal teh tawp a. Ka duh tih a hre tho va, amah Mapuii lakah chuan zêp buai vak ngaiin ka hre tawh lo.
Mapuii chuan, "Ţha chu a intia, mahse a ţha vak lo a ni," a ti a.
"Eng nge a awmzia? Ţhat lohna thil eng nge a neih? Ka hnenah pawh a dam ţep thu min hrilh sia," ka lo ti vat a.

Mak tih hmel lek lek hian, "In inbia a maw?" a ti ta. Min rawn biak thu kha Mapuii a hrilh lo tihna a nih hmel hle mai. Keiin min rawn biak thu ka lo sawi laklawh tawh si.
"A, aw... A chanchin ka zawh che kha i hrilh aniang chu ka ti mai. Hei hi a number a ni lo'm ni?" tiin message ka dawn number chu ka entir a. "Aw, a nih hi," a ti ve mai a.
"Eng nge a ţha vak lo i tih tak kha han sawi chiang lawk teh," ka ti a, ka ngaih a ţha chiah lo.
"Eng dang ni lo ve, a hriselna hi a pan ve lutuk a," ti ringawtin min chhang a. Mahse Mapuii hmelah chuan thil thup, eng thil emaw ni sawi lan duh loh a nei niin ka hre tlat a ni. Mahse ka zawt lui duh ta rih lo va.

"Khawiah chuan nge an awm ve reng reng a?" ka han tih chuan, "Aw, ni dawn tak, hei kan ţhenawm chiah in hi," a ti ta mai a. Hriat ka lo chak em em Sangtei te in chu kan lenna bul lawka mi hi lo ni rengin. Ka phûr sawt hle mai.
Mapuii hnenah chuan, "Chuti, naktuk lamah te a la ziaawm vak lo a nih chuan tlawh ve ila a ţhat dawn chu," ka ti a. Mahse Mapuii min chhânna chu ka beisei ang a ni lo kher mai.

"A chi loh ang."
Mak ti deuhin Mapuii chu ka en tawp.
"Engvangin maw?" ka ti a. Mapuii chu inngaihtuah âwm deuh hian a ngawi vang vang a. Ka rilru te te chuan, 'Mapuii hian a thîk deuh emaw ni le,' tih hi a lo awm hman dawn dawn a, tlangval luck ni ve âwm ziazâng chuan.
Keiin ka lo ngaichâng reng tih a hriat takah chuan Mapuii chuan, "Thla liam ta lawk aţang khan Sangtei pa hian an in-a kal te hi a lawm vak ngai lo va, keimah tih loh hi chu lengah pawh a duh vak lo," a ti ta a. Mak ka ti ang reng hle mai.

"Eng nge a chhan?" ka han tih chuan hnuai lam en chung hian, "Ka hre chiah bik lo, a nupui a sûn ațang khan a mizia hi a danglam vek," a ti a.
"Sangtei chuan eng natna nge a vei reng reng a? Natna tihdam theih loh a vei em ni?" tia ka han zawh leh chuan, "U Rin, amah la zawt mai rawh, tihdam theih loh chu a ni hauh lo vang," a tih chuan ka thaw deuh huai a.

Mahse, "Chuti, staff ka nih angin tlawh ve hrim hrim tal tur a nih chu," ka'n ti hram a.
Mapuii chuan, "A chi loh ka tih chu. Nuam i ti chuang lo vang. A chhan dik tak zawng ka hre lo na a, a nupui boral vang a nih kan ring vek. Mi fel biak nuam tak ni ţhin si kha a mizia a inthlak thawk a ni ber mai. Inleng pawh an nei tawh ngai lo."

"Eng hnathawk nge a nih a?"
"Doctor a nia" a ti a.

Chutih lai chuan ţhianpate class inpe pawh an zawh tak avangin engmah sawi chhunzawm lovin thingpuite kan in zawh hnu chuan kan haw zui ta nghal a.

Ka ţawng duh loh em avang chuan Puia ngaih a ţha vak lo tih ka hre reng. Chanchin min zawt na a, kimchang chuan ka hrilh lem duh lem lo va, engmah pawh min zawt zui ta bik lo.

Zanin chu mut vat ka duh. Chinghnia pawh ka buaipui peih rih lo, an rawn kal ka ring tawh chiah lo bawk a. Mahse, rilţam chuan an awm reng thei hauh lo ang a, khawi hmun emaw takah chuan an che leh ngei chuan ka ring.

Mut pah chuan ka phone ka han en a, Mapuii message a lo awm reng mai.

"Khawngaihin Sangtei'n natna a neih chungchang vel ka sawi kha tumah hrilh suh aw," tih, Mapuii message hi a lo ni a.
"Aw le," tiin ka va chhâng a.

"Ka ring nghal lutuk che hi a mak ka ti," tih hi a rawn thawn leh a.
"Lungngai suh, min ring rawh," ka ti a.

"U Rin, i fel ka ti e."
"A, eng chu nge maw ka felna ni reng reng le," ka ti a, ka nuih te lam lam a za.

"A, i fel ve hrim hrim," te a rawn ti vel a.
"Chhe lo min ti a nih chu," ka'n ti ve zauh a, ka va zei tak em....

"Ti e, ti tak tak," a rawn ti a.
"Hehe, a va lawmawm ve, nang tak i chhe lo. A nih muttui phawt aw," ka ti zui a.
"Hmn, nih muttui le.

***************

Thawhţanni, ni sakei a lo inher chhuak leh ta. Chanchinbu hrang hrangah chuan Aizawlah chinghnia a rawn lut tih an ţial chei chuai mai. Chanchinbu ţhenkhat lah chuan kan hostel piah a Gurunga-te bawngpui pahnih leh Thapa-te bawngpui pakhat an lo seh hlumtir thul. Chanchinbu chhuahtu ţhenkhat hi chu an nikhua lo mah mah ţhin chu a ni. Gurunga-te bawngpui a seh lo va, an bawng no pahnih erawh a seh ngei a. Tin, Thapa-te bawngpui a seh hek lo, bawng an vulh lo hrim hrim. Hosteler ho ka chhiartir ve chuan anni pawh an nui ve ringawt hlawm.

Mahse library dawhkan a Hringlang chanchinbu lo awmah erawh chuan durtlang dai a bawng no pakhat an seh thu chu an lo tarlang a. He chinghniate hian an awmhmun an sawn rih dawn a ang hle mai.

*************

Sangtei pawh chuan class pangngai takin a rawn kal leh thei tawh a. Tunah chuan kan inkâwm nêl tak tak tawh. Inngaihzawnna lam engmah la sawi dun tak tak lo mah ila library-a a rawn kal zin tâk danah leh ka hnaih thei ang ber a ţhutna a rawn rem ziah danah ka laka a rilru put hmang a chiang ve thawkhat tawhin ka hria. Staff ka nih avangin engmah min hrilh ngam lo chauh niin ka ngai tawh. Inngaihzawnna lam han sawi dun tak tak turin hun thawl kan nei lo ve ţhin em a ni.

**************

Chinghne thawm a reh rih chu a ni ta. Mahse mi thiamte sawi hmangah Mizoram aţanga an insawn chhuah nghal mai chu a rinawm lohin tlang hranah an insawn rih lawk chauh pawh a ni thei. Tin, thla a mang leh rih ta bawk nen zan lama chêt thawh an chîng rih lo pawh a ni ve thei bawk.

Mut pah chuan ka phone ka tuai nauh nauh a. Eng engemaw ho te te message a sawiin Sangtei nen chuan kan inbe reng a. Chutah chuan engkim chiang taka sawi hun ni ta a hriain ka duh thu leh ka thinlung luah khattu a nih zia ka han hrilh ta tawp mai a. Ka laka a rilru put dan ka zawt zui ve nghal a. Tichuan thinphu dêp dêpin a chhânna lo thlen hun ka lo nghak a.

Min chhân mai loh avangin ka beidawng lek lek tawh. Han zawh nawn a han nawr tut tut lah ni thei chiahin ka hre si lo. Mahse message a rawn type mek tih ka hmuh ve takah nghakhlel si, huphurh bawk si chuan ka lo nghak a. 'I zak lawm ni zah pawh, ve nasa a che,' tih message ka dawng ang tih ka hlau zek zek mai.

Chutia huphurh, nghakhlel ru zet a ka lo awm lai chuan a message chu a lo thleng ta. Thinphu dêp dêpin ka han hawng a.
"Sir Rin, ka awm danah nang paw'n i hriatthiam vek ka ring, hai rual a awm em ni?" tih hi a lo nia. A awm dan aţang chuan min duhin min ngaina ve takzet niin ka hria a. Mahse a sawi ngei loh chuan ngaih a ngam lo ve deuh alawm.

"Tichuan?" ka va ti ringawt a.
"Ka rilru dik tak ka hrilh che ang a, mahse thu min tiam ve thung rawh aw," a ti ta a. Mak awm ve aw thu han intiam nghal ngawt dawn chu. Thutiam chu bawhchhiat chi rual a ni tawh si lo. 'Aih' ka tih chuan a rilru dik tak min hrilh duh awm bawk si lo. Umn, ka thutiam tur chu thil harsa lutuk a ni em lo'ng chu maw.

"Aw le," ka ti ta a.
"Ka duh zia che hi ka sawi thiam lo zawk a, ka duh che piah lamah ka hmangaih che niin ka hria," a rawn tih chuan ka hlim lutuk hi awm ngaihna ka hre lo. Mu chung chuan ka nui vur vur a, ka nui chhuak teuh lutuk chu ţhianpa Puia'n thawm a lo hria ang tih hlauvin lukham te chu ka seh chawt chawt a. Ka ke artui pahnih chuan khum mawng lam te chu rang lutuk hian ka khâwng tlir vei tlat tlat a, ka inlukhûp thûl, a va nuam hawr hawr tak em.

Chutah message ka han en leh chu, "Mahse," tih hi a ni. Ka nui lai chu ka tâwp chiang khawp mai.

"Eng nge mahse?"
"Mahse maw...., khawngaih takin..., i thinlung zawng zawng chuan ka lakah i rilru pe suh aw," a rawn ti ta. A ngaihna ka hre lo kher mai.

"Eng nge a awmzia Sangte, ka duh che, ka hmangaih che min ti zo chauha ni lawm ni, keiin ka hmangaih lêt ve che chuan a tâwk a ni mai lawm ni, dawt min hrilh nghal ringawt tihna em?" tiin lungawi lo deuh hian ka thawn lêt a.

"Sir Rin, chutiang a ni lo asin. Ka hmangaih lutuk che. Mahse nang nen kan kal thui hmain ka hmangaih vang chein hrilh tlang che a ţha ka ti zawk, inchhir a kan tlai hma ngei hian."

Eng tak sawi ang maw tia rilru nuam lo zet a ka awm lai chuan, "Sir Rin, thla hnih liam ta khan ka awm nuam lo ser ser ţhin inentir a kan va kal, result kan han hria chu, thisen cancer veina chance sâng tak ka lo nei a lo nia. Cancer phei chu an ti chiah lo nain ka rilru hrehawm loh nan ka pain min hrilh mai mai nge ka hre lo, ka pa chu i hriat angin doctor a nia, college kal pawh hi a rem ti tawh lo zawk a. Mahse i awih angem ka hre lo, min hre lo in min be ngai lo pawh ni la, i hmel tal hmuh hrim chakin ka rawn class ve ţhin a nih hi. Ka pa lakah chuan chhuanlam siamin, ka natna atan hian botany subject aţangin medicinal plant(ramhmul damdawi) hmuh chhuah/zir chhuah ka tum thu ka hrilh thung a ni," a ti ta le!

Chu thu ka'n hriat chuan ka rilru a hnîm ruih mai. A mak ka tia ka khawngaih rualin ka thinlung takin ka hmangaih nghal vawng vawng mai thung si.

"Chuvang tak chuan min hmangaihin ka lakah i rilru zawng zawng pe lo la ka duh a ni. I nat sei hmain hrilh vat che a ţha ka ti. Tunah chuan thil awmzia ka hrilh ta che a, i duh chuan min kalsan thei tawh e," a rawn ti ta a.

Inngaihtuah buai ka ngai lo khawipin ka hria. Ka thinlung ngaihtuahna chu amah hmangaihnain a lo khat zo tawh a. Chu a natna chuan ka hmangaihna a tizual zawk si a. He natna hi a thihna tur kawng hawngtu a lo nih pawhin kei chuan a damchhung hun tal chu hmangaih tak a vawn tlat chu ka tih tur, ka mawhphurhna a ni tih chiang takin ka hre ta. Amah vanga khua ka lo tlaia lengţûl ka lo chang ta a nih pawhin pialralah min lo nghak ngei dawn tih hi ka chiang em a. Thlah lo va nghet tak a vawn chu ka tum ruh ta tlat a ni.

*****************

Hun a liam a, kan karah hmangaihna pawh a vul chho zel a. A sawi ang ngeiin an in-a inhmuh chu a rem ta lo va. Chuti chung chuan zan lamah Mapuii-te inah kan inhmu zeuh zeuh reng a. Chhun lamah college-ah hun fâl awm thei lo mah se, library-ah 'Fair' takin kan inkawm mai ţhin. Mahse zirlaite mit lo meng ve ta chu, min sawi zeuh zeuhin thil an man thiam chu zia lo ka ti deuh ţhin. Umn, pawi lo teh se, hetiang dinhmunah hi chuan ding lo se hetiang hi kan ni bik nâng.

***************

Chinghne thawm pawh Aizawlah chuah a reh ta vang vang rih chu a nia. Ka rilruah erawh chuan rawn chhuak leh se ka ti ngei mai. Ka pa phuba ka la la lo tlat. Gurunga-te huana ka kah fuh lah kha a hmunah thî baw nei nuai mah se, chhui zui tur awm hlek lohin a hnu a tawp hmiah a. A thi lo a nih a rinawm si a. Chinghnia ka huatna erawh a la reh chuang si lo. Han tawn fuh leh chu ka châk zek zek mai.


Khua a thiang a, thla bial zan a ni bawk a. Thla eng lawm a guitar kuah a hosteler ho nen han zai vak vak a châkawm hle mai. Chuti a nih loh paw'n ţhian ho, ngaihzawngte nen emaw 'World bank road side' vel a han 'Pari pari' te pawh a châkawm khawp mai. Tin, Sangtei va hmuh a hlim taka thla êng lawm a inkuah veng veng pawh a chakawm bawk.

Mahse lehkhabu chinfel ngai tam tak hemi zan hian ka nei a. Sangtei lah test an neih dawn hnaih avangin han inchhiar ve lawk a duh bawk a. Lungleng ru tak siin zaninah hi chuan kan inhmuh a rem dawn lo a ni.
Hosteler ho pawh a ţhen mahni khaw lama an haw lai a ni, a ţhenin zirlai an bih a, a ţhen an chhuak bawk a. Tumah han zâi pawh an awm lo va, a reh vawng vawng hle mai.

Phone message rawn ri pawh chhäng hman lêk lovin zan dar 10 a pelh pawh chuan ka la buai a. Ka tukverh bula lehkhabu rem khawm en fel leh tur a ka han din chiah chuan ka thlang lawk aţang chuan chinghnia hi a rawn û thut mai. A râwl a lianin a ring si a, ka phu zawk nghe nghe a. Chhâwntu dang an awm loh avangin chinghne maltlat tih ka hrethiam nghal mai.

Ka tihtur hre chhuakin ka silai ka chuh lawk a, a mu ka thun fel nghal a. Tumah pawh hrilh lem lovin kawmthlang lamah chuan ka tlan chhuk nghal a. Chinghne û ri ka hriatna lai bawr chu ka han thlen chuan engmah ka hmu lo va. Tlem a ka han chhuk leh deuh chuan chinghne kal liam tur chiah mei hmawr chu ka torch light chuan a va chhun fuh ta a.

Silai pawh ka lek hman lo. Ka um zui tih a hriat vang a ni chek ang, a tlan pur pur tawh mai sia, kei light keng, silai keng leh ani zan thimtham a mit fiah lutuk mai nen chuan kan inthlau hret chu a ni e.
Khawiah emaw tal a lo din khawtlai beiseiin a ruam lamah chuan ka chhuk ve zel a. Kawng mumal a awm lo nen, kal a har kher mai. Chutah ding detin kawngţum zawngin ka torch light chuan ka han ên kual a. Ka thlang thingkung phênah chuan a mei rawn lawr ka hmu ta hlauh mai le. Light pawh tiêng ngam lovin, thla êng ringin dîm tein ka pan ţhem ţhem a. Ka thleng dawn hnai a, silaia tin ka tum rual chiah chuan ruam lam panin a tlanchhe leh ta tlat mai.

Ka va chhuah rua lo mai em ti chungin ka tlan pai thla ţak ţak a, tlan chak a har hle mai. Chutah thil pawi zet mai a thleng ta. Ram hrui inzam chu ka pal nawk a. Bawkkhup zawng a ka tlu thla chu, chu lai tak chu ko, feet 5 vel a sâng chu lo niin. Min lo dâltu tur awm hek lo le, ka tla tlang thla fua a, bawkkhup zawngin ka zuk tla chawrh a, lungah ka lu ka tauh chawrh bawk. Chutah ka lu a rawn hai muai muai a, nikhua ka hre lo chhunzawm ta a.

Ka han harh chuan ka lu na tluk tluk chu ka hre hmasa ber a. Chutah thil awmzia ka hre chhuak zui nghal bawk. Ka sana bun lai chu ka han en dawn a, torch light ka lo thlauh daih si avangin thla êng ring chuan hnai takah ka han en hram a, dar 11 a lo ri chiah mai. Ka chhuah hun aţanga ka han chhût chuan minute 5 vel chu nikhaw hre lovin ka lo awm reng a ni tih ka hre chhuak a.

Ka lu na lai chu ka han khawih a, a lo pâwng lian hle mai. A ban deuh chap danah chuan a thî ngei a ni tih ka hre bawk a. Amaherawh chu nasa lutuk chuan a thî lo niin ka ring ringawt a. Hre chiang a han fiah turin ka torch light ka tibo daih mai bawk si. Ka âwm ruh lah chu a na ngawt ngawt a, thâwk a sak ţalh mai. Ka zuk sawh chiang em bawk a ni.

Thawh ka han tum a, ka tho ţha thei ta mang hlek lo mai. Ka nâk lo na zawk avang chuan ka thlep leh hnawk a. Ka nâk pawh chiang takin ka lo sawh ni ngei tur a ni. Chutah thawh ka han tum leh ka insanmar lai tak chuan alawm, min ti ka hautu, thil mak zet mai ka hmuh tak ni.

Ka nâk leh ka âwm ruh na dawm chung a din chhuah ka han tum leh chiah tihah chuan ka awmna piah mual, ka ep chiah tlâng pâwng laiah chuan mihring ding ka va hmu ta thut mai le! Mipa a ni tih a pian aţang chuan a hriat theih a. Thla êng hnuaiah a ni a, a hmel chu va hmuh theih lohin hlimthla ang hian a lang a. Ka mit vai emaw tiin ka mit ka han nuai chawt chawt a, mahse a awmna ngaiah chuan a awm reng tho mai. Chutah tlemin a che hret a ni tih ka va hmu bawk a. Chutiang hmun, ramhnuai lehnghalah tun ang huna mihring ka han hmu ngawt mai chu a mak hian a mak a ni tawp mai a ni.

Kim lo riauva ka inhriat avangin ka han indap thut thut a. Ni e, a lo kim lo chiang khawp mai. Khawnge ka silai kha a awm tak le? Ka insawh rual khan a per bo nge ni? Ka ke bul velah chuan dap pahin ka'n melh kual thuak a, ka hmu mai lo.

Chutah hawi chhuak lehin mihring ka hmuhna lam mual pâwng lai chu ka han hawi leh a. Chhe hei! A va han mak ngai em! Eng nge a awmzia ni ta ngai le ka thil hmuh hi, min barakhaih chiang lutuk tlat. Mihring ka va hmuhnaah khan mihring awzawng a lo awm tawh lo. Kha mihring awmnaah chiah chiah khan Chinghne pianhmang ka va hmu ta tlat mai le! A dik a dik chuan ka phu chiang khawp mai. Chu chinghnia chuan van lam, thla eng lamah dâkin a han û ta ruah ruah mai a nih kha.

Zan thim ngam inti ve tak, hlauh nei lem lo mah ni ila, tun ţum zet zawng min ti mûr ve sung sung thei hial mai. Chutah theihtawp chhuahin, na tia ţhen chawk chawk chungin ka han ding chhuak ta hram a. Ka ke rêk a lo ulh bawk nen, harsa fat fat tak a ni.

Ka thil hmuh chu eng laiin nge a lo bo hman pawh ka hre lo. Mit khap kâr zawk tak tak aniang, hmuh zui tur reng a lo awm tawh lo. Chhui zui chi ziazâng ka nih tâk loh avangin muangchângin chhak lamah ka inham tâng chho bek bek a. Ka silai leh torch light bo pawh ka ngaihsak hman tawh hek lo. Tlûk leh din fâwmin,a châng leh a bawha bawkvâk chungin, thi lova ruangin hostel compound chu dar 12 pelh hnu chuan ka thleng ve thei ta hram a.

Kan kawngkhar lan theihna ka thlen chuan min ngaihtuah hmel fea Puia vei tawn chhen chu ka hmu na a, ka chauh lutuk avang chuan ka au chhuak peih tawh lo. Chutah ka bawk thlawp a. Ka thawm chu hriain Puia chu rang takin, min ko mawlh mawlh chungin a lo tlan phei a, chutah min paw bahlah nawlhin inchhungah min luhpui a, ka khumah chuan min mut ta a.

Ka hliamte tuilum a min silfaisak hnu chuan nachhawkna min pek chu mum hnih ka'n hmawm ţhawt a. Thingpui min siamsak te ka in zawh hnu chuan ka harh ta sawt mai. Chuta thil awm dan kimchang ka han sawi chuan Puia pawh chuan mak a ti kher mai. Tunah chuan zing dar 1 ri tawhin thla pawhin liam lam a pan ţan tawh.


Chinghnia chhui tur a ka kal thlak ţanna hmun lamah chuan thâwm a rawn awm tak sut sut avangin tukverhah chuan Puia chu a dâk vat a. "A thawm a va lian deuh ve, sa lian tak a ni ngei ang," tia a sawi zawh rual chuan na pawh hre chang tawh lovin ka tho zawk a. Tukverhah chuan dâk ve nghalin mak ti leh a ngaihna hre lo takin thâwm rawn awm mekna chu kan thlir reng a. Ka rilru chuan 'Chinghnia kha a rawn lêt leh a ni mai awm mange,' ka ti a.

Hnim pik rawn che luai luai chu Puia chuan 'Emergency light' chuan a lo ên vat a. Chutah le, beisei loh lutuk maiin hnim pik kâr aţang chuan Sawma a lo chhuak ta heu mai le!

Puia nen chuan, "Sawma," kan ti rual ţhawt a. Mak tiin kan inen tawp ringawt. Chutah Puia chu hmanhmawh zet a tlan chhuakin kawmthlang lam, Sawma awmna lam chu a pan ta nghal a.

(Tawk leh rih phawt se, ka mitin a tlin ngang lo mai. Mahse chapter dang aiin a tawi chuang lo aw. Chapter tin hi word 5000 vel ţheuhin ka khaikhawm tawp zel mai e. Comment hmuh lo inbeisei ve leh thung ang aw)😍😍😍



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: No registered users and 2 guests