READY FOR ROAR CH-4 Sentei Chhakchhuak Bochung

Episode kal lai dah luhna

Moderator: writers

Sentei Chhakchhuak
Posts: 159
Joined: October 26th, 2017, 2:02 pm

READY FOR ROAR CH-4 Sentei Chhakchhuak Bochung

Unread post by Sentei Chhakchhuak » May 22nd, 2018, 3:54 pm

CHAPTER 4

READY FOR ROAR

Sentei Chhakchhuak Bochung



Ka damchhunga ka theihnghilh theih tawh loh tur khawp natna min thlentu thil ngei chu. Senior high zirlai chauh ni mah ila bumna natzia hre turin ka puitling tlat a ni. Khumah chuan sakruak titihin kan school-a hmeichhe lar ve tak Bella nen an lo awm dun a nih chu.




Engthil nge an tih ang tih pawh hrilh hranpa ka ngai lo. Mi â ka ni tlat lova. An thiltih ai pawha min tinatu zawk chu Ermest min tihdan kha a ni. Hmeichhe vawt lutuk, thinlung pawh nei lo mahni ngaihzawngte pawh tilawm zo lo min ti a nih kha. A duh ang khan mutpui ila khatiang thu kha min sawi khum kher lo vang, ni lo...kha mihring hnena ka inhlan lo kha ka vannei tak zet a ni. Min lo hmangaih miah lo.




"Engthil nge i ngaihtuah a, kha kawr khan makna riau a nei em ni? I melh vung vung a nia aw."


Hun kal tawh ka ngaihtuahna lamah ka tihtur neih ka theihnghilh thei mai dawn alawm le.


"Kawr sen kha ha rawh." Ka kawr ken lai, a ban bul, ka khup chen vela fual chu ka khai kang a, a simple a, taksa lang tam si lovin a sexy ru phian lawi si, a țha hle tak ang. Pheikhawk sang ka ngainat loh a vangin flats bun leh tawp i la....mahse, ka ngaihtuahna chu a thlâwn chiang teh e.



"Flats bun leh tawp kha i lo tum ang e, hei hi bun ang che." Ka pheikhawk, mamawhna a awm takin ti a Savannah nen min lei luih tir tlat kha a rawn khai lang va va a. Laboutin scarpin heel sang țha zet mai hi a ni nghe nghe lehnghal. Ka kawr hak tur nen pawh a inrem thlap tak alawm. Zanin chu Maya duh dan ang thlapin ka'n inthuam ang e. Ani hi kan fashion mogul neih a ni a, thawmhnaw nalhte zawng a hre em.



"Waylon phut zawkna turin zanin chu han inthuam teh le." Maya thusawi avang chuan ka nui sak a, hetianga ka inthuam lai hi min hmu ngai si lova mak a ti ve teh ang chu.




Dar riat rik nan minute sawm panga a la awm, door bell lo ri ral ralah chuan kawngkhar hawng turin ka kal a. Kawngkhar ka hawna Blake Waylon hmel ka hmuh chuan ka thawmhnaw hak chu ka thlang sual lo tih ka hria. A mitmenga nalh min tihna lo lang chu hmuh hmaih rual ni hek lo le.


"Lo lut rawh, kal hmain in tur i duh hmasa em?" Ka zawhna min chhang dawn emaw tih laia a thusawi chu leh!


"Wow...zanin hian kal chhuak lovin inah kan tawm tlat mai dawn em maw ni le?"


"Chuti ka va inthlak leh anga a ni mai alawm." A thusawi awmzia ka hrereng tho nain thinrim der ve ka chak tlat. A nui suk duh chauh nia. Ka tum ka hlawhtling lo, ka lamah rawn kal hnaiin a taksa si chetin min kuah a. A rimtui Dior Sauvage hman rim chuan mipa a nih zia a tilang chiang hliah hliah. A rim chu ka hip lut vang vanga hetiang hian awm dun reng thei ta ila, ințhen hi ngai tawh lo se. Mahse, chu thil chu duhthusam mai chauh a ni rih si a nih hi. A dinner jacket hak te chu a ta tur a company siam bik liau liau ni awm hliah hliah a ni. Ei zawh vek mai hi ka duh, ka ngaihtuahna zet chu leh hmeichhe ngaihtuahna ni awma mawi pawh a ni lo ve.



"Mipa dang hnaihah i awm tur a ni lo a nia, keimah chauh min ngaihsak ang che." Thikthu a pe chhe dawn hle mai maw! Hetiang mipa chhe lo leh pa lutuk bula ka awm lai hian engtin nge mipa dang ka ngaihtuah phal tehlul ang le.



"Nangni pahnih kha tikhan in awm zankhua mai dawn em ni?" Maya thusawi ri-ah chuan ka harhchhuak zawk a, ka inlahrang rang teh e. Maya lam reng reng ka lo ngaihtuah chang tawh hleinem le. Kei hi ka â zo tawh a nih ber mai hi. Blake Waylon zûnah hian ka uai zawr zo ta e. Mahse, mipa hi ka ring ngam leh ang em? Mipa chu tuhrik hrik lehchhawng tiat pawha rin loh hi a him ta berin ka hria. Umm, hunin a la hril ang chu.





"A nih aw Maya... Kan inhmu leh dawn nia. Tikhan nang chu Netflix nen lo in-date mai rawh u. I bialpa Roger lah chu hmuh phakah a awm ve der si lova, keini chu tihian nuam kan lo va chen bik ang e aw." A thusawi chu Maya-i'n a run teh e.



"Kal mai mai teh u, 13 reasons why ka enna in dal." Tih pahin lei a rawn chhuah khum zauh a. 13 reasons why hi hmuhnawm zuk ti em em a maw le.




"Khawiah nge min hruai dawn?" Kan kalna tur hmun ka hre hauh hleinem le.



"Thuruk a ni rih, kan thlen hunah i hre mai ang." Zawt leh mah ila min hrilh duh dawn chuang lo tih ka hriat avangin ka zawt nawn duh ta bik lem lo. Car tukverh ațang chuan pawnlam pe un chu ka thlir a, khawpui nuam tak a ni. Kawngsir kea kalna tur an siamah te chuan nula leh tlangval inhaw lo tih hriat takte chu enghelh nei miah lova nui hawk hawk chungin an kal a. Awh ruk riauna ka nei tlat nia. Ni e, tunah chuan phuba lak duhnain min uairit em a, thindam takin ka hun ka hmang thei tlat lo alawm.



"I suangtuahna khawvel ațang khan lo let tawh rawh le, mipa dangin i rilru an luah chu a ni em lo vang chu maw? Ka bula i awmlai chuan midang i ngaihtuah phal a ni lo a nia aw Miss Devon." A fiamthu a ni tih ka hriat miau avangin huat enah pawh ka en lo. Ka kut chu la kangin a fawp vang vang a. Ka mur er er thei. A mi fawhna ringawt pawhin ka ngaihtuahna a la peng thei chu a nia. Thirhipthei ang mai a mi hipna ngah a ni miau alawm le.



"Kan thleng ta e. I ngainat ngei ka ring." Golden Eagle & Muchacho tih intar kulhna kawt parkingah chuan car chu a hung rem a.



"Wow...a nawm hmel lutuk tlat, tunah chuan eng pawh tui ti taka ka ei vek theih ka ring. Ka ril a țam ve râih tawh mai."


"Chuti a nih chuan lo kal rawh le. I duh tawka tam i ei dawn nia." Eitur rim chuan ka pum a fan raih raih thei nia maw le.



A hmun lah chu a nuam phian bawk si. Kan insawn luhna ala rei loh bakah hun thawl han chhuahna tur kan nei lo bawk hrim hrim nen hetiang hmun nuam hi a awm tih pawh ka lo hre reng reng hleinem.



Inchhunga țhutna awm chu kan kal pel zel a, khawiah nge min hruai dawn ni. Kan țhutna tur hmun kan thleng chu ka thaw halh mai. A mawi lutuk tak zet! Inngaizawngte tan chuan hmun duhthusam a ni ringawt a lawm le. Inchung zawlah chuan mi pahnih zel kil theih tur dawhkan a lo awm țhap a. Eng de sep sep a inkhai thliah bawk a. Khawpui chhung duh tawkin a la thlir theih zui. A romantic a ni tawp mai. Ka incheina pawh chu kan thlang sual lo chiang khawp e.



"Helai khawpuia tacos siam tuina ber hmun a nih hi. I ngaina tih ka hria alawm. Eng pawh hi a tui em em vek a nia." A thusawi chu a dik ngei ang.



"Enchalida taco hi ka lo ei ang e."


"A ei ang kha ka lo ei ve ang e. Wine i duh tel em?" A tih chuan wine lam hi ngaina vak lo mahila zanin chuan in ve pawh pawi ka ti tehchiam lo.


"A țha alawm." Thildang tehchiam sawi tur ka hre lo tlat nia.


"Merlot (mer-lo ti a lam tur) rawn la tel ta che." Waiter chu kan ei tur la turin a kal kiang nghal a. Ka zam thar ta riau lehnghal. Tleirawl ngaihzawng nei thar ang mai alawm ka nih le. Blake Waylon mi uap hi a na em a ni.



Kan eitur lo thleng chuan min chhanhim a ni hawt e. Inbe tawh lovin ka eitur chu ka ei nghal mawlh mawlh a, wine chu ka tem pah hlek bawk a. A tui tak zet a ni.



Ka tacos ei tawh zawng zawngah a la tui ber, ka ril ațam tawh vang nge phei chu ka hre lo. Ni lo, an thil siam hi a tui ve hrim hrim a ni.



Kan thil ei zawhah lam pui tura min sawm chuan ka hnar lo chiang teh e. A taksa rem thlapin min kuah a, min kuah nghet mah mah zawk. Music milin min insawipui a, lampui pawh a nuam kher mai. A bulah hi chuan engkim a nuam vek mai a nih hi.



Kan haw leh lam pawh chuan ka kalsan hlau ni awm hrimin ka kut a chelhbet tlat a, car tlan lai ațang hian khawiah tehlul nge ka kalsan ang ni, nuam erawh ka ti ru veng veng.



Kan apartment kan thlen chuan lo lut tura ka sawmna chu 'ka lo luh chuan haw leh ka tum tawh dawn si lova' tiin min chhanga duhthawh tawkin min fawp a, ka hnar lo chiang teh e. Lo hnar te chu a atthlak zawk. Kan hun hman chhunga ka ngaihtuahna luahkhattu a ni zawk asin. Amahah hian nicotine a awm a ni ngei ngei ang heti tak maia vei a awl hi. Heroin tiin nghei a har an ti tluk zetin a tel lo a nun hi harsa ka ti țan chu a nih ber hi a. Heroin ai pawhin a ngawl vei a awl zawk hial ang.



A taksa hnuai lamin min dona chu hriat loh der a har țan viau mai. Hetiang a nih chuan angelte dai ngam loh ram kan dai dawn tlat. Ka ngaihtuahna chu ka taksa hian a zawm der si lova. In la hrang hmasa zawkah ațanga kan taksa a insi lo chiah chu ka ruak nghal huai thei nia.



Ani pawh a thawkdan a dik bik lo, ka sam hnawk niaih chu min siamțhat sak pahin min fawp leh vang vang a.



"Tunah hian ka kal lo anih chuan zanin hian ka kalsan thei hauh lo vang che. Chu thil chu thleng turin i duh ka ring si lo. Ka lo riak ve mai dawn aw, zanin chauh." Ka phal dawn lo tih a hresa reng tho ang chu.


"A theih loh, let tawh zawk rawh." Lu thing nar nar chungin a âwmah ka kut ka nghat a. Kei pawhin ka rilru tak chuan lêt lo se ka ti. Min mamawh tluk zet hian ka mamawh ve tho, tisa thil takin kan inhip em em tlat a ni. Mahse, ka thutiam kha ka hrereng ka zawm thei tur a ni. Mahni thutiam bawhchhe țhin ho hi ka haw viau bawk.



Ka fawhna che hi lo ngaihtuah chhunzawm ang che ti ni awm hrimin min fawp leh vang vang a. 'Mangțha' ti sapin a kal nghal nulh roh a nih chu.




Ka hmui chu ka khawiha mumang a ni lo, a tak ngei a ni. Inchhungah lutin ka intihfai hnu thleng pawhin ka la pangngai zan lo hialin ka hria. Khumah ka mu thlawrh a, manglama hmuh zui tumin ka chhin san ta riai riai a.

*******************

Blake Waylon


Ka hmaa hmeichhe ding chu amah a ni lo ta hial emaw ka ti dawn a lawm. Hetianga a inchei lai hi ka hmu ngai si lova. Ka thlarau hi ka taksa ațanga thlawh chhuah hlauhawm khawpin ka awm nia. A kawr hak chuan a taksa nalh lutuk chu a tilang chiang lehzual ngei mai. Kuah lawka fawh nawk nawk hial a ni ka duh ni. Ka insum zo lova ka kuah tâk nge nge kha. A rimtui hman rim te nen lam chuan a ta tura siam ni awm tak a ni. A rimte chu a thlum chêk chêkin ka hria. Hmeichhe pakhat vang hian mihring hi a lo danglam theih teh e.




Vawiin nilengin kan awm dun chung pawhin ka ngai em em mai chu a nia. Zanriah eipuiah ka sawm khan min lo hnar ka hlau khawp a, vanneihthlak takin a rem ti hlauh lehnghal. A chhuak tam lo tih ka hria a, ka hruai tumna hmun pawh hi a la kal hauh lo vang. Kei pawh ka vawi khat kalna tho a ni. Ka țhian pakhat helai hmuna awm hnen ațanga ka hriat a nia. Ka thlang sual lo chiang tih a hmun kan thlena a mitmeng ațang khan ka hre thei.




A mitmeng de set set kara hlimna lo lang tluka hmuhnawm hi he khawvelah hian a tam kher lo vang. Teuh lo, a awm lo hial zawk ang. Hmangaihna hi a awm tak tak a nih ngai chuan tuna ka awm dan hi hmangaihna chu a ni ngei ang. Ka nihna dik tak hi hre ta se hetiang mitmeng hian min la en ang em? Min haw viau mai lo vang maw? Mahse, tihsual ka nei ve reng reng hleinem. Ani chân tura ka inngaihtuah ringawt pawhin ka tawt up up thei nia.



Engtikah mah thudik hi a hriatchhuah loh ka beisei, kan chhungkaw chanchin erawh thup reng theih loh hun ka nei ngei ang. Thales group fapa naupang zawk hian kan company zawm lova FBI special agent ka ni daih hi chanchinbu mi pakhat pawhin an hriat vaih chuan khawvelin an hria a ni mai. Ka tan inthup reng theih lah a ni hek lo vang.



Tacos tui ti taka a ei hmuhte chu thil nuam tak a ni. Hmeichhe thil ei pawh hmuhnawm ti takin ka thlir dauh dauh ta mai chu a nia. Layla a nih chhung chuan eng pawh ti se a hmuhnawm em em vek ang.



A vun nel thepte ka khawih leh chak a, a tawpah chuan lampuiah ka sawm ta nge nge. Ka kuah nghet mah mah tih ka hria, ka thlahdul phah lem hlei lova. Kuah reng mai hi ka duh a ni. Thlamuang tih hriat taka ka dara a lu a nghah ang hian nakin zelah pawh min thlamuanpui se ka duh a ni. Atan mipa rintlak leh inghahngamna nih tluka duh dang ka nei lo.



Kan haw kawng tluanin a kut ka vawn sak a, lak sawn pawh a tum bik chuang lo. Min hmangaih em tih chu ka hre lo kei hi chuan ka hmangaih tih hi chiang takin ka hria a ni.



An apartment kan thlen pawhin inchhungah luh tir mai phal lovin duhthawh lutukin ka fawp a, ka nghawngah min kuah let chialin min chhan let ve tan tan kha. Ka taksa hnuailam chu thunun hleihtheih a ni lo. Hmeichhe nalh leh itawmte chu a hre ve chiang em alawm. Harsa ti tak chungin ka kalsan tak hram kha. In ka thlen thleng pawhin a mitmeng tisa chakna avanga vai riai kha ka mitthla-ah a cham reng. Duh ni ila ka thlem thu thei ngei ang, a hnua a inchhir leh tur ka duh loh avanga insum tlang mai chauh ka ni. A duhthu ngeia ka hnena a inpek hunah lei eden-te chu chinlem nei lovin kan la chen ang chu. A hmel ka mitthlaa ka hmuh ringawt pawhin ka taksa a ti danglam thei nia maw le, rapthlak zawk hian. Tui vawta inbual ka ngai ngei dawn a nih hi.


*********************



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)