MONEY| Penniless Love Chapter-18 Becky Rafa Renthlei

Episode kal lai dah luhna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

MONEY| Penniless Love Chapter-18 Becky Rafa Renthlei

Unread post by Ngaia » May 23rd, 2018, 9:31 pm

MONEY|Penniless Love

Becky Rafa Renthlei

Chapter-18

Onslow Square
Lexham Gardens
Colmer Apartment
London
Leena Bevan


Thinrim lutukin choka chhungah ka vei tawn chhên a. Engtin nge kha nu nen khan an lo awm theih zawk! Tenawm tih piahlama tenawm a ni.

Phûr em em in car khalh ka zir a, lunch tur ka leisak ve pawh dining table-ah ka la dah ngât a, dik tak chuan ka thinrim lutuk hian avaiin ka eizo vek anga ka mu hle hle zawk dawn em ni ang. Ni lo, chu pawh ala thâ nat thlâk uchuak lo em mai. Ka vaw pherh vek zawk dawn em ni!?

Uncle Lewis laka phuba lâk ka tum vang vekin ka nunah mipa ka seng lut a, thik loh ka tum poh leh ka kawchhug a so balh balh si.

Kha nu khan min la melh rum shala lehnghal a! A sakhmel dâng lap khawpa sawisak ka châk et et nia! Duh aiin ka la khawih na lo mah mah zawk a ni.

Hamish-a sawi dan kha chuan Absalom hian 'girlfriend a nei lo' atia nih kha. Mahse, saruak deuhthawin carpet dûp chungah an lo inbawh ûr a, kei hian hrethiam lo turah min ngai vel amaw!? A teuh lo nasâ.

Dining table-a eitur ka dah chu ka hawng ta a, ala dai chhe lutuk lo e.

Wine pawh chi li lai ka inchhawp ta bawk a, thinlung tak pe si lo a min nupui chei ve ngawt hi ka ngaihdan a ni lo mai ni lovin ka lawm hauh lo. A naupang zawk ka ni nâ a, chuti mai maia bum awlsam turah min ngai deuh em maw ni.

"Lee, wine in vak vak kha ka remti lo in ka hria," Absalom-a rawn lût chu en pawh ka en duh lo a, a lo sawi ve aiah nothum ka in ang. Wine chu ka inthlit zui zat a, a zâwnin nothum ka'n in tehreng a nih kha..Haji! In min phalsak loh poh leh a thlum tui ting ting nimaiin ka hria.

"Min runluih kha a ṭul miah lo. I lung a awi lo a nih chuan ṭha takin kan sawi dun thei a nia," dam thlup a min biakna chuan ka thinlung a tawk che pha eih lo.

"I nupui phuahchawp hian zan lamah ka chawm ṭha tawk lo che tih ka lo hre lo a ni." Ka ti hmak a.

"I hmuh ang kha a ni lo tih vawi sawmkua ka sawi a ngai dawn a nih pawhin ka sawi mai tur a lawm."

"Khatiang model hnutê pawh nei ṭha ṭhum lo kha i duh chuan London fashion.com-ah an tam ang, kei pawhin pasal lerh tak neih ka duh chuan eng company chairman-ah emaw putar ngaihzawn tur leh thlêm thlûk tur ka hmu ve mahna.." tiin ka no a intur chu ka tlâk leh pap a.

"Leena Bevan, ṭawngkam pangngaiin a inbiak theih tih ka sawi lo vem ni?"

"Ṭawngkam pangngai aia tlêma sâng deuh hman phalsak ka ni lo em ni!? Absalom Colmer second wife ka lo nireng zawk nge, affairs satliah tih pawh ka hriat si loh. Inneih zungbun lah ka kutah hmuh tur a awm lo va, khawi ilo i kalnaah kan inneih certificate kha i phawrh chhên awm chai si lo." Thaw chham dâwna ka ṭawng lai chu mit khap miah lovin min en nia!

"I buaina ber chu eng nge ni ta, zungbun i bun loh vang nge kha nu Kayla Bolton nen min hmuh dun vang zawk kha?" Ati thûm chhak a.

"A pahnih hnihin, tunah chuan i laka ṭhat chhuah hian kawngro a su tam tehchiam lo niin ka hria a, chuvangin hnathawh tur ka zawng ang. Modelling lamah ka kal ang nge Bar-ah ka thawk zawk ang âw.." ka ti vei ngial a.

"Ngawi chip cham rawh, i lo haw hma khan ka muhil ti ila i awih dawn chuang si lova mahse, ka muthilh hlanin Kayla a lokal tih erawh i thinlung dum zet khan hre ve reng reng rawh se, finfiahna pek tur che lah ka nei der si lo." Ti nghutin wine chu a inthlit ve nghal a, chhân dan tur ka ngaihtuah rauh rauh lai chuan,

"Nupui ka nei tawh a, chu ka nupui chimawm zet thunun tur chuan ka thâ leh zung ka sêngral hnem viau bawk. London to Mumbai-a ka buaipui nitin zantin chu 'Money' a ni." Thinrim insum zeta tiin min melh deuh kâwk nia!

"Min thunun ṭha tawk lo te pawh a ni mah na," tiin ka lu hai chiai chiai chu duh lovin ka inthing deuh nak a, Absalom-a thusawi hi awih ka duh. Mahse, ka va hmuh dan khan a zir lo êm a, tun dinhmunah chuti maia awlsamin ka rilru ka siam thei lo.

"Kayla kha ka koh a ni lo."

"I duh duh kawp la, kei pawhin ka duh duh ka kawp ve ang, kan inneih chhan theihhnghilh tur khawpa naupangchhia lah i ni hek lo." Tiin ka ṭhutna aṭang chuan ka ding hliai a.

"Ṭhu la, i plate-a eitur bâng zawng kha eizo vek ang che, wine erawh nokhat pawh inbelh tawh suh." Zawi supa tiin min melh rûn a, hundang chu ni se ka ṭhu leh ang. Mahse, tun hun a ni tlat si alawm le.

"Ka eitur leh inturah thu neih tum suh, ka hlawh kha avaiin min pe la, Flat luah tur ka zawng dawn." ka ti ve hmak hmak a.

"I duh thu rênga min nei i ni, ka hmuh phâk lohva awm i tum a nih chuan kei aia tawrhhlelhawm mipa he khawvelah hian i tawng lo ang," tia min vauna chu a chiang kelh kawlh khawp mai.

"Pasal i nihna i tih hlawhtlin hun hunah leh hmeichhe dang laka i fihlim hunah i nupui dik tak angin ka awm ang," ka ti ve ta a. Dar san âwk chung hian, "Insawifiah vak hi a ṭulna ka hre hrep lo e, tunah insiam la zungbun lei turin kan chhuak ang." Hnial chi iah loh hian ati hmuk a.

"Zungbun ka mamawh lo, eng mah ka mamawh lo, Mumbai ka lêt leh theih nan ka sum thawhchhuah kha min pe la i duh tawkin i Kayla chu lo duat ang che," min chhânna tur ka hriat peih loh vangin beng hup chungin dining hall ka chhuahsan ta a.

A run mai mai ang chu..

A ve lutuk a! Sum ka nei lo pawh a ni maithei. Paradise zinpui tura ka thlan hian min duh khawp lo a nih chuan South America lamah ka ṭuan mai tur a ni. Shala..

Kan nupa pindan-ah rui chhâ chungin ka tei sek sek a, hetiang ringawt chuan phuba lâk chu sawi loh ka ralthûm thei maiin a nia ka rin ni.

"I insiam zo tawh em?" Absalom-a pindan chhungah rawn lutin min nuih suk a, thinrim hmel a pu miah lo chu mak ka ti!

"Khawiah mah kal tumna ka nei lo a nia," tiin Briena call ka tum ta a, ka phone ka bihsan zui daih.

"Dazel te nupa chuan Sidney-an thleng tawh."

"Min hrilh lo mah la Briena'n min hrilh tho ang," tiin ka call lui ngat a, ala in off zuiah..

"Tinge i luhlul em em mai le, inrem nawm zia ka la temtir dawn che nia," ka bânah vuanin inhnuai lamah min hruai thla dâwr dâwr a, theihtawp chhuahin ṭang sateh mah ila thâah ka hneh teuh lo.

Apartment kawtah min dinpui ta chauh a.

"Hamish, tlereuh zawrhna changkang ber i hriatah min va dah rawh le," tiin Rolls Royce chhunga lo ṭhu a driver chu thu a pe khauh a, ka hnial ta lo.

"Ka duhzawng tak min leisak dawn a nih loh chuan i ruala kal tumna ka la nei fo." Ka tih chuan a kiai suk a.

"I kutzung ṭang sawmah khan bun vek i duh pawhin kan lei mai tur a ni." Ati sup a.

Chumi hnu chuan car-ah min nawr lut rawk rawk a, ka tlânbo hlau ang hrimin ka kutah a vuan rûn bawk.

Kan Absalom-a damlo ve chu a luhlul tulh tulh emaw tih mai tur a ni.

Shopping Mall
2nd floor

"I lungawina zân tur thlang ang che, vawikhat inneihna a awm angin zungbun vawikhat bun kha a tawk viau," tlereuh ka enkual dan dan lai chuan ka beng bulah a rawn phun sup a.

"Sawm ka thlan nghal loh.."

"I kutṭang zawng zawnga i bun chuan miin mak an ti ngawt ang che," Sapphire mit hring nghalh mai hi ka kutah a rawn hmehbel a, "Bun chhin rawh le,"

"Hetiang zawhte mit rawng ang ka duh îkhaw lo mai," tia ka pêk let chuan, "Money, helai hmunah hian ka mikhual vak lo a nia, tunah pawh reporter pali velin min veh a nia," tia sawi lai chuan ka hawikual vat a.

A sawi dik chiah.

Ka hnung lawkah camera awrh mi pakhat a lo ding a, kan hnunglam aṭanga lâk a duh chiah lo a ni ngei ang kan hawichhuah hun nghâk niawm tak hian min en uluk hle.

"Nang kha, kan thlâ lâk i duh em ni?" Tiin alamah ka phei ta a, Absalom pawhin min zui ve mai.

"Yes, miss..."

"Miss ka ni lo Mrs..zawk. Mrs Colmer," tinawn lehin ka nui sak a. Khawvel hriata a nupui ka nih thu puanzar hi ka hmalam hun atan a ṭangkai dawn tlata ka hriat vang a ni.

"Yes, ma'am, khawngaihin vawikhat chuah in thlâ ka la ang," atih chuan ka kianga ding rum nghut chu ka hre pha reng.

"Money, tun hi khatiang tihna hun a ni lo, i bun tur thlang la kan haw ang," dawhtheihna tlachham aw zeta atih chuan ka nuih a za lo.

"I duh chuan min hawsan thei reng a nia, he reporter hi a duh pêk ngei ka tum." Tih pahin a bânah ka vuan a, reporter chu ka hmachhawnpui ta a.

Vawithum lai thlâ min laksak hnuah zungbun chu ka thlang zawm leh ta a, a 'hausakna ren rual loh' tih ang deuh khan ren miah lovin zungbun manto ka thlang mai ang chu.

"Mall kan chhuahsanin tlailam dar thum ari tawh a, ka kutzungṭanga Sapphire de sep sep chu ka en kham thei hlawl lo!

"Colmer chhinchhiahna' Absalom-a ṭawng chu a zawi hlê nâ a, ka hre pha vek tho.

"Ka hnungzângah Colmer Toys tih târ ka phal a nia, khawi hmunah pawh kal ila tute pawhin an lo hriat vek dawn avangin ka zak eih lo. Mahse, chu chuan man a nei thung, dollar maktaduai tluk mah suh ila chumi aia hlû nunna ka neih miau avangin i share hmun thuma ṭhena hmun khat min pek chuan ka dam chhung tur hi kum 60 angin chhut ta ila kum 30 dang la bâng zawng i nupuiah ka ṭang ang."

"Â hah! Leena khawngaihin thu fahrah tê tê sawi lo khan ka malpui hi dressing rawh le, nupui thiam thil nei lo ka ngaisang tehchiam lo a nia," tiin ka thusawi ve kha engah mah ngai lo tih hriat tak hian Sofa-ah a ṭhu thla a, 'Sakawr ki' nei bula sawi pawh a hlawk zawk ngei ang.

Apartment-ah minute sawm dawn kan awm leh tawh a, Hamish-an dinner tur a buatsaih dawn avangin nuam ka ti ropui.

Ka kuta zungbun hian min phuar ve deuh tak taka ka'n hriat chu le

"I nuih khan i hmelṭha zual sawt!" Absalom-a hmel tak rûn chuan khawdang hawi lêk lovin min lo en reng chu niin!

"Ka hmelṭhat vang alawm nupuiah min neih," zâm miah lova ka chhân vang chu nge a kiai leh suk a. Amah hi a hmelṭha fê zawk si a...

"I hmel aṭha a, i nalh hle bawk. Mahse, i leili erawh 'Apache hriamhrei' ṭha mi ang a ni lawi si." Chimawm zeta nui mah ni se a ṭha ve chiang alawm.

"Nang chu Greek milim ang maia chapo hmel i pu thung," ka tih chuan 'inhnial tawh lo ang' ti niawm tak hian a bân a vai thuak a, chutah, a kekawr hâk lai chu a phelh ta a.

"Eng nge maw tih i tum le?" Bedroom pawh ni lo a kekawr a phelh vang chuan ka hawi hau a, tunah North Pole pan hun pawh ninghal lo chuan..!

"I râk leh chiam hmain ka malpui hi dressing rawh le, i uncle leh i blood type zawng zawngte hi kan dahṭha dawn a nih chuan rîkrum thila hliam enkawl i thiam hmasak angai a nia," ti deuh duahin ka chhíp aṭanga ka keler thlengin min en chhuak dap nia.

"Inrawlh ve tum buai duh suh." Dressing-na hmanrua vel ka la khawma eng mah thiam bîk ka nei lo nâa thiam loh pawh ka nei em em chuangin ka hre lo.

A malpui hliam ka tihfaisak lai chuan a ṭhen leh sawk zel a, dim viau tum mahila ka dim hleithei meuh lo chu a ni e.

"Fai lutukin inbual ang che," Kekawr hâk ṭhat paha atih chuan ka nui sak a, lunch ei laia ka wine in rim kha a tak deuh mah mah a ni maithei.

"Inbual lo ta ila ka kiangah i mu dawn lo em ni?"

"Money, i pasal ka nih angin i kiangah lo chuan mut tumna ka nei reng reng lo. Nakin zelah pawh chu chu hria ang che." Tiin ka kutah a vuan a, "Apartment hnunglamah dinner kan kîl dun dawn nia, nunphung pangngai zawh leh tur hian theihtawp chhuah ve la, Dollar mena meng zek zek lovin i pa company-tungding tur hian i thluak sawrbing ang che 'I ta ngei an chhuhsak che chuan la lêt leh turin hma i la dawn lo em ni!?

Absalom-a thusawi chuan ka chhungril a nghawr dawt dawt mai! Bevan Company rochuntu tur ka ni tih a lo hreru reng a maw!? Inneih certificate a hmanhmawh em em chhan kha eng dang vang ni lovin ka rokhawm tur thu a hriat vang lek a lo nih hi.

"Absalom, hei vang hi em ni nupuia min neih nachhan! Dollar mena meng chu kei ni lovin nangmah zawk anih kha, eng anga tam rosum pawh nei ila i hmingin ka dah dawn reng reng lo." thinrim sehchilh nawk nawka ka chhânna chuan ati lawm hauh lo tih a hmel dur ta khup aṭang chuan ka hre mai.

"Kei hian Bevan company-ka hminga awmtir ka tum vangin nupuiah ka nei ang che maw! Â hah! I pa company ang hlir panga hi London-ah pawh lo zuar se, buai map lovin ka lei thei ang chu maw le." Ka kut a vawnna chu thing thlain rum lutuk hian min melh a, "Nang hian i duh duha min puh chhe ringawt turin ka tân eng nge i nih?

"Ele, i nupui phuahchawp pathumna te pawh ka ni mahna..." kawng dawm meuhvin ka en chho a, a hmel ruh ṭâlh ṭâlh leh a mitmu buang fiah ta sawt chu ka hmuh hmaih bik lo.

"A ṭha e, nang leh i pa company hi eng atan mah ka ti lo. I duh ang anga awm turin ka chhuah zalen a che." Ti nghutin Apartment lam a pan ta nul nul a, sawi sual ka neih awm ka hriat tlat siloh avang leh a nupuia min neih ve tâk ngawtna chhan hi ka pa rosum vang a ni tih ka hre ve chiang em mai. Uncle Lewis lak aṭanga min chhanhim ta te kha tiṭha a inti ngawt ang chu.

'Chhuah zalen' tih lai tak kha ka la man fiah lo deuh! Ni hnih leh zan hnih a nupui hming ka pu ve ta a, chuta ṭang chuan min pêt chhuak tihna em ni ang.

Chumi hnu chuan ngawireng leh lungni lo zet hian Aparment lam chu ka pan ve ta a. Ka nun a nuam ve dâwn chauhva harsatna fahrah tê tê ka tawk leh si. Tumah rinchhan lo va kal tum hi a lo fuh ber anih dawn awm hi maw!

Apartment chhungah Absalom-hmuh tur a awm lo a, Hamish-an dinner a peih vek tawh avangin ka tân engmah tih a ngai hran lo a, tih tur ber pawh ka hriat si loh! Dinner ei nan ala hma bawk nen, "Hamish, minute sawmpanga lek car khalh kan zir dawn em ni ang," tiin ka sawm ta a.

"Madam, tuna tan chuan a tlai tawh deuh lo maw! I pasal hnenah phalna la hmasa phawt la.." inthlahrung aw taka atih chuan ka ner sak a.

"A phal vek alawm, reilote bâk angai nâng dinner ei hma chauh," tia dawt ka sawi chu a hrechhuak ang tih ka hlau hnuhnawh viau.

Min hnial ngaihna vak a hriat loh vang leh Absalom-a ber a bibo daih sia lungsi zân lo hian kan inzui chhuak ta a.

Colmer Apartment
Dining Hall
Absalom

Ka thin so bulh tidai turin darkar chanve lai Barbie doll ka siam a, 'Adriana Lima' doll, special order kan hmuh pawh khawih ṭan a hun tawh vangin Money doll nen ka draft diam tawh bawk a. Company lama kal ngai lovin Apartment-ah a ruangâm ka din mai a ni ang chu...

Nichin zet kha zawng ka thinurna chawhthawhin a awm ve chiang alawm. A pa company chuhpui an thâwthânga Leena'n min puhna kha paidam harsa ka ti.

A duh phawt chuan chhuak rawh se, hrehawmna han tem leh chhin se a thinlung sehhel lutuk hi a hmin ve deuh mahna...

Ka nupui a nihna erawh thaibo mai mai theih a ni tawh lo thung. A hlawh kha pe-in Flat chu luah chhin se ka hnena awn tluka nuam khawi hmunah mah a awm lo tih hrechhuak ve phawt rawh se...

©<++++[BecvkirafARenthleI]++++>®

Note: Tun ṭum ka story zet zawng keima post a mawi lo khawpin harsatna a awm reng a, ka inthiam hlawl lo bawk. Mahse, power supply te, Internet problem vang a ni deuh ber a.

Chuvangin tihian ruahmanna ka siam ta a ni.

Money|Penniless Love hi chapter 18 ah hian chawlh lailawk nei ta ila, current mumal kan nei thei si lo a, chumai ni lovin incheck up-a ka kal a lo hun ta bawk nen Season 1 anga tihtawp rih mai hi ṭha ka ti ta deuh a ni.

Keima lamah erawh inmi ṭawngṭaipuina avangin hma ka sawn chho zel a, hmundanga incheck up tura ka zin tur erawh tun hi a tawpna tura ngaih a ni a, a bâk chu Pathian thu thu a ni e.

Min nghak duhte tan leh ka story min hlutsak tute tan erawh 'ka lo kir leh ang' tiin tiam thei lo mah ila, Pathianin rem min ruatsak anga a hma anga regu leh hriselna ṭha zawk nena lokir leh ngei erawh ka tumin ka la beisei ve a ni tih min hriatsak ula ka lawm hle ang.

Ka lo lêt leh thei a nih chuan tuna kan tawpna chiah hi zawm kan tum bawk ang. Season 1 ti mah ila post ngai vek a ni anga ṭhen hran a ni chuang dawn lo tih ka'n sawi nghal a ni e.

©<++++[BeckirafARenthleI]++++>®



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)