READY FOR ROAR CH-5 Sentei Chhakchhuak Bochung

Episode kal lai dah luhna

Moderator: writers

Sentei Chhakchhuak
Posts: 159
Joined: October 26th, 2017, 2:02 pm

READY FOR ROAR CH-5 Sentei Chhakchhuak Bochung

Unread post by Sentei Chhakchhuak » May 23rd, 2018, 10:07 pm

CHAPTER 5

READY FOR ROAR

Sentei Chhakchhuak Bochung


Downtown Avenue,
Atlanta
Layla Devon

Ka phone ri-ah chuan peih lo zetin ka inthing harh a, a rik dan ațang chuan call pawimawh tih ka hria, chuti ni lo se ka chhang lo chiang viau ang chu. Sana ka en a, dar 5:30 a ni chauh mai ka ti. Tunang hma lutukah engthil nge thleng ta hi le.


"Devon ka ni e, eng thil nge ni ta?" Lehlam a mi thusawi ka hriat rual chuan ka harh chiang kek kawk khawp mai. Inthahna dang leh maw? Chu pawh Senator Wright thah a nih ațangin ni tam a la liam lo leh nghal. Kan misualte chu an ngampa sawt viau mai.



"Ka lo kal nghal ang." Thawhphan awm miah lovin khum ațang chuan ka zuang tho nghal a. Maya chu ka kai tho lo mai ang...phone in ka hrilh tawh mai a ni ang chu. Ka intifai sawk sawk a, ka silai leh FBI badge chu ka la a, in ațang chuan rang lutuk maiin ka kal chhuak nghal a.



Kan awmna ațangin inthahna hmun thlen nan minute 15 lai ka hmang maw le, chupawh zing kar traffic thawl lai a ni zawk mah. Atlanta-a hmun lunlai berte zing a mi Lenox square, the Kiser Loft apartment kawtah a ruang an hmu a ni awm e. A thattute hi an ngam pa salh salh khawp mai.



A hmun ka thlen chuan Blake pawh a lo awm vang tawh. Min hmuh ve leh min rawn panin coffee la khu vat vat hi min pe a, police lamin a hmun an lo hung tawh avangin muangmarin endikna hun kan nei thei dawn a ni. Perry leh Bridger pawh a hrilh tawh thu sawiin an ni pawh an rawn thlen țep tawh a rin thu a sawi a. A tir ațanga ka rin dan tho ni mah se he case hi a hnawkin inphum ru a awm tam hmel riauin ka hria.


A hmu hmasa bertu hnen ațanga report an dawn chu chulai hnuna thleng hmasa police hnen ațangin ka ngaithla a, a sawi dan chuan a hnathawk bangin mi pahnih inhnial buai a hmu a, pakhat zawk chuan silaiin a kap ta mai ni awm a ni. A hnu lawkah a kaptu chu a kal bo a, police lam arawn be nghal a ni e. Thil han hriat belh vak tur a awm loh hmel viau mai. A banrek a chhinchhiahna awm kha ni mak ta ber chu...a landan chuan kan mitthi hi mi pawimawh tak a nih hmel bawk si loh a.



Ka duhtawka ka endik leh hnuah chuan a ruang chu forensic lam buaipui turin kan ti a. Autopsy result a chhuah hunah a thih dan chiang tak chu kan hrethei dawn a ni. A lan dan maiah chuan kum sawmthum panga a chuang tawh ngei ang a, mihang niin a hming leh tunge a nih hriat theihna hrim hrim a awm miah lo.




Perry te an lo thlen chuan endik ngai ang zawng zawng kan lo endik zo vek tawh a. Ruang chu a mah ngeiin a ennawn ve thlap a, hnuchhuina tur engemaw tak hmuh a in beisei a ni mahna. A kaptu hi a fimkhur phian lehnghal a. Hnu hma zuk hnutchhiat miah lova. Hei hi tihpalh thil thu a inthahna a ni lo maithei, a thattu hian silai a hmang thiam viau bawk. A thihpui ngeina tur hmunah a kap chat a, chupawh vawi khat chauh a kap leh nghal. Eng ang pawhin hnu thup mah se ka chhuichhuak tho tho vang.




"Engmah in la ei lo vang tiraw." Perry-an a rawn tihchuan coffee no khat ka in bak kha engmah ka la ei lo tak e.


"Helai hmun chu forensic leh police ho vin lo buai pui tawh rawh se, kan mitthi ruang pawh autopsy tih turin an lak tawh dawn kha." A tihzawm zat a, in ei puar hmasak chu a pawi lo hle in ka hria, ti hi chuan ina haw leh tawh lovin office-ah kan tlang mai dawn a ni. Kan piah lawk a awm Krispy kreme donut breakfast and coffee shop tih intarna chu a pan nghal a, keini pawh chuan kan zui ve nghal bawk a.



"Kan hmasawn dan chen pawh kan Director (Director ka tih hi Field Director a ni zel rih ang aw) hrilh a ngai ang. Senator Wright a chungchang kha hmasawnna pakhat tal hmuh tur a awm em? Devon nang eng nge i dinhmun?"




"Engmah thil thar hriat belh tur em em a awm hran lo, vawiin hian a chhungte ka va hmu ang chu ka ti deuh a."



"A țha khawp ang, a boral hma velin a awm dan a danglam em tih te, vauna a dawng em tihte rawn hriat i tum dawn nia aw."



"Aw le, sir. Chuanin naktuk tuk leh hian in Senator țhen khatten press conference an nei dawn a, eng thil emaw hriattheih kan nei maithei a ni."



"A țha e, chuti anih chuan vawiinah Director hneh Washington i kal tur thu i report dawn nia aw. Chuan Waylon nang chuan tuna kan mitthi hi lo bawhzui la, mi bo report a awm leh awm loh police hnenah i lo ngaihven dawn nia, inthahna bul hnaia cctv record en bawk la aw. Kei leh Bridger hian kan rinhlelh kan man ho leh gang țhenkhat inrawlh an awm em tih kan lo buaipui thung ang." A ruahmanna chu a țha ka ti khawp mai, tawnhriat ngah chu an ngaihtuahna pawh a lo fim deuh e.




"Midang thi tate an chhuina report kha field office dang hnen ațangin ka lo dil bawk dawn nia. He inthahna hi a hmawr bawk thuai i tum teh ang u." Perry arawn tih leh chuan ka rilrem zawng tak a ni, kei tluk a tawp khar vat vat duh hi an awm lo vang. Ka nu leh pa thattu hian engchiah nge a duh ang ni. Mi thil tithei tak chu a ni tih rinhlelh rual a ni lo.



Nizan lawkah Blake nen hun nuam tak kan hmang a tunah lem mitthi leh inthahna chungchang hlir kan buaipui leh ta chu a nia, hmangaihna inbual at tir hman hi chu kan ni mawlh lo, chuti chung chuan hmangaihnaah ka pil mek lawi bawk si a.



Kan thawhpuite hian kan inkawp tih hria an awm mang lo a, Quantico-a kan training puite tih loh kha chuanin. Kan team leader Perry Mason nen kan inbiak lai khan min lo melh leh veng veng țhin, a mitmenga min thlakhlelhna lo lang țhinte hi ka tan chuan nuam tihna tur thil ni mahse kan hun tawnin a zir miau si lova, han induat viau theih pawh a ni rih lo a nih hi.




A car-a chuang turin min ti naa, ka car hi helai hmuna hnutchhuah ngawt theih a nih loh avangin ka car chuan office lam ka pana, kan office kan panna elevator-ah chuan kan pahnih chauhin kan chuang chho a, a hun remchang hmuh chu a bawh pelh lo chiang kher mai. A lamah min pawt hnaiin min kuah hlu hlu a, ka hahdam ta ti niawm takin thawk a la siai siai bawk. Min dang an lo luh ve a hlauhawm thu ka sawi lahin a ngaithla duh der lo lehnghal. Helai hmuna titi siamtu nih hi ka duh lo viau asin maw le.



"Awm mai mai rawh, duh leh midang chuan min lo hmu ang hmiang, ka bialnu ka kuah ve a ni mai alawm." A ti duh lek chauh mai si a. Pawi lo e, a lungawina a nih chuan a duh ang chu ka tih tir mai a ni ang chu. Insum buai duh lovin ka kuah let ve ta nge nge a. A kianga awm hi chu a thlamuanthlak hliah hliah mai a nih hi. Elevator a din chuan hreh zetin min thlah ta nge nge a. Office chhung kan luh meuh chuan nichina min thlahlel hmel taktu kha ni tawh lovin Blake Waylon FBI special agent tum ruh leh tawhkhirh hmel tak a ni leh daih tawh.




Ka chair-ah chuan ka hnu thla hnawk a, he kan case buaipui hi a zawh hunah chuan he hna hi bansanin kan law firm ka enkawl chhunzawm tawh ang chu. Kan Director bulah chuan kalin ka tum dante chu ka va hrilh a, a ni pawhin Field Office dang a lo biak tur thu asawi bawk a, tikha chuan thlamuang takin Washington-ah Senator ho chetla ka thli thlai thei tawh ang chu.



Beep.... beep....ka message tone ri a ni. Min lo thawntu ka hmuh rualin a lamah ka hawi phei a, a phone lo lek kang zoh zohin hawng rawh a tih chuan thuawih takin ka hawng ve mai bawk.


"Lunch ei dun ang. I hnam hun tur min lo hrilh la." Tihte hi a lo ni a. Hetianga min thlahlel taka a awm hian nuam ka ti veng veng zel.


"Senator Wright nupui ka hmuh zawh hunah ka hman ang." Mit siai lai emoji ka dah tel țeuh lehnghal. A phone a bih ruala a nui var var hmel chu hmuh a nuam teh e.



"Staple house nge Home grown?"


"Home grown"


"Nangni pahnih kha in phone-ah khan thil hmuhnawm bik riau a awm em ni? Khatia in nuih vur vur a?" Maya in a rawn tih chuanin ka phone chu ka dahthla rang teh e. Za em em in a la nui hawk hawk zui lehnghal a. Ka va han ngei tak e aw... Waylon lam ka va hawi chuan a lo nui ve suk suk mai.



Senator Wright nupui hmu tura ka kal dawn chuan Waylon pawh chu police lam be turin a chhuak ve nghal a. Ka car chu hetah hnutchhiahin Department car ka hmang tawh dawn a ni. Blue Sedan chu ka khalh a, Blake khan Black SUV a khalh thung...Senator nupui hian engthil emaw tak hnuchhui ti awlsamtu min hrilh thei hram se ka ti mange.



***************************



Unkown PoV*


Ka hma a chanchinbu inpharh chu la lawkin ka nuai hlawm tawp tawp a, thinrim takin ka hma zawna television vawm nang chuan ka hmang a, ka thinrimna erawh chhete pawhin a reh phah lo.



Chanchinbuah khan eng thu nge an chhuah kha le. Tuah thahna dang leh maw? He thil hi ka tih tir a ni reng reng lo. Tunge hetiang thil lo ti ang. Ka hnuaia thawkte zing a mi hi an ni thei ang em? Ni lo, an ni chuan an ti ngam lo tawp ang, ka thinrimin ka chet duh dan an hrechiang em em tlat. Hetiang a nih chuan kan ruahmanna kha a chhe vek thei dawn asin. Rorel țhat leh kan ngai dawn a ni.



Greyson chu phone-ah biain rang taka lo kal turin ka ti a, midang pawh min lo hmu turin ka ti bawk a, kan senator bera chu a lo kal thei dawn lo. Washington lamah silai khuah khirh chung changa debate neih turah a tel dawn a, kar thum hnuah Senate-ah bill hi put luh a ni ang a, an pass vaih chuan ka sumdawnna peng pakhat ka chân dawn tihna a ni. Chuthil chu ka thlen tir lul lo vang. Bill hi pass a nih dawn ai chuan Mr. President he khawvel hi i chhuahsan a ngai mai a ni ang chu. Warning vawi tam tak ka pe tawh che a, ngaithla duh lovin i beng i chhu ngawng lui zel tlat a nih kha aw.



Nizana inthahna thleng chanchin chu t.v chanel tinah an la puang dum dum a. Kha thil titu khan kan chhinchhiahna ang chiah a hmang ve tlat bawk si a, a nih chuan a thattu khan a hrechiang hle tihna a ni thei ang. Chemte hmang thiam tak nih a ngai ang. Mi pangngai mai mai tan kan zai dan ang chiah a zai kha chu thil harsa lutuk a ni tlat.



A titu hi police leh FBI lamin an chhui ngei ang a, he thilah kher kher hi chuan puih theih ka chak zek zek, kan hming tichhia a, kan tum mi tibuai theitu hi dah bo ka duh a ni. FBI ho aia ka hmu hmasa a nih chuan lawmman atan silai mu a dawng ngei ang.



Heng in thahna phenah hian ka awm a ni tih tumahin an hre der si lova. Eng tikah mah an hre ngai bawk hek lo vang. Ka mi chhawrte hi an rinawm tawk tih ka hrechiang em em tlat. Kan senator tenawm tel lo hian. Ani hi chuan min phatsan hi pawi a ti lo tih hi ka hrechiang em a ni. Min puih duh loh chuan a mah leh a chhungte hi an chatuan hmun pan turin ka nawr liam duh dawn tih hi a Senator a ni tih a hriatchian tluk zetin a hrechiang em!




Kan ralthuam siamte hi America sawrkar pawhin a hmangin a lei nasa; mahse, kan sumdawnna peng pakhat ka enkawl lai Silai siamchhuahna lam hi Senate-ah silai khuah khirhna dan an pass hlauh chuan a tlachhe vek dawn tlat a. Chuvanga tun hun thlenga President hial thah tumna rilru pu ka ni.



Inthahna tam tak a thlen phah lehnghal a. He ka thil tih hi ka chhungten an hre miah lo, an hriat pawh ka duh bawk hek lo. Ka unaupa FBI special agent a awm saw'n engtikah emaw chuan min chhui chhuah hun a la nei maithei. Chu thil chu a thlen loh nan țawngțainaah chham tel hial ka duh a nia. Engtikah mah a hre tur a ni lo.




Chanchinthar an puan chu ka ngaihthlak chhunzawm zel a, thi ta kha tunge a nih hriat a la nih loh thute, a mah hria chuan Police leh FBI hrilh tura ngenna an puang chuai chuai bawk a.



A dawt chiahah chuan British Lal chhungkaw zinga mi Prince Harry nupui neih chanchin an puang chuai chuai bawk a. Meghan Merkle American Actress, mihang thisen kai maw a nupui chu. Tunah chuan British Lal chhungkua pawh an da zat zo tawh a nih hi. Duh leh lo dazat mai mai rawh se ka tan chuan tuna ka thil buaipui lai hi a pawimawh zawk fe.



He kan thil buaipui hi kan zawh fel hunah chuan Carribean tuipui kamah chawlh hmangin ka kal daih ang.


*********************



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)