SHERLOCK HOLMES - THE HOUND OF THE BASKERVILLES (COMPLETED)

Hnuchhuina lampang chi ho
Rozami pachuau
Posts: 305
Joined: March 17th, 2018, 7:40 pm

Re: SHERLOCK HOLMES - THE HOUND OF THE BASKERVILLES chapter 1 - 7

Unread post by Rozami pachuau » June 18th, 2018, 7:56 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 7
(Rozami Pachuau)

MERRIPT HOUSE-A CHENG STAPLETON CHHUNGKUA

Zing khua a lo var chuan thil a danglam ta hlein ka hria. A hma zana lung tizîng ngawih ngawih In leh a vel chu a hmuh a nuam tain thlarau nun ram rethei tan pawh chawlh hahdamna tlâk hial niin a lo lang leh ta a. Zing ni chhuak chuan tukverh biang te leh pindan chhung chu a rawn chhun mawi zo ta vek niin a lang.

Sir Henry-a pawh chuan, “A Ina hi ni lovin keimahni zawk hi dem kai tur kan ni hialin ka hria. Kan zinna lamah kan chauh deuh avangin a In pawh kan hmu nikhua lo zo ta ni maiin ka hria. Hei kan han mu hahdam a, thil engkim mai hi a hlimthlak leh ta viau vek a nih hi,” a ti hial a.

Mahse kei chuan, “Mahse, nizan thil kha chu suangtuahna leh rilru inṭhoh eng emaw mai mai chu a ni lo alawm. Ṭap thâwm kha i hre ve em?” tiin ka zawt ta a. Sir Henry-a chuan, “Hria e. Ka muhil ṭan tawh tihin chutiang deuh chu ka hre tlat a ni. Eng emaw chen chu ka’n ngaichâng a; mahse, a rik chhunzawm leh ta lo va, ka mumang a nih vel ka ring ta mai a ni,” a ti a. Kei chuan, “Ka hre chiang khawp mai. Hmeichhe inhnît thâwm a ni tlat,” ka lo ti a.

Sir Henry-a chuan, “Khaw nge i’n ngaihven zui nghal teh ang,” tih pahin dar hmehrik a’n hmet a. Barrymore-a chu a lo lang nghal thuai a. Sir Henry-an thu a’n zawh chuan Barrymore-a chuan, “Ka pu, he In chhungah hian hmeichhe pahnih chiah an awm a, pakhat chu ṭawphnawk bumro zual thianfâitu chhiahhlawh a ni a, a mutna pawh In tepeng lehlamah a ni. A dang leh chu ka nupui a ni a, ka nupui chu a insût lo tawp tih ka hre chiang,” a ti ta mai a.

Mahse, chutia a sawi zâwng chuan a mitmeng aṭangin dâwt a sawi tih chu ka hre thei mai. A chhan pawh a mitmeng a danglam a, chu bakah, a hnu lawkah Barrymore-a ṭhiannu chu chiang deuhvin a hmel ka hmu a, a mit vûng leh a mitmeng sen deuh rêm râwm aṭang chuan zan lamah a ṭap tih chu tu khaw hrilh ka ngai lo. Mahse, engati nge Barrymore- a chuan dâwt a sawi mai? Engati nge a nupui chu lungchhe vânkâia a ṭah tak?

He Barrymore-a hi hriat phâk lohvin he thilah hian a inhnamhnawih em ni? Amah hi a ni lo’m ni Sir Charles-a ruang va hmu hmasa bertu kha? Tawlailira chuang, Regent Street-a kan hmuh kha Barrymore-a hi a ni thei ang em? Eng pawh ni se, Grimpen dak In hotu va hmu phawt ila thil a chiang mai ang. Thirhrui lehkha kha Barrymore-a kutah an hlan chiah em tihte va zawh tur a ni. Eng pawh lo ni se, Holmes-a hnena thlen tur eng emaw chu ka dawng ta.

Sir Henry-a chuan lehkha enfel tur a ngah deuh avangin tukṭhuan ei kham chuan ka kalsan ta thuai a. Phûlraiah chuan kalin khawper te tak te ka va thleng a, chutah chuan In lian deuh pahnih a lo awm a, pakhat chu khualbuk a ni a, a dang leh chu Dr Mortimer-a In a ni.

An dâk In hotu chu thlai hnephnawl zuartu a ni nghal a, thirhrui lehkha chungchang ka va zawh pawhin a lo la hre chiang hle a. “Ni e ka pu, min hrilh ang chiahin thirhrui lehkha chu Barrymore -a kutah ka pe alawm,” a lo ti a. Kei chuan, “Tu nge va pe?” tiin ka zawt a. Ani chuan, “He laia kan nau hian. James, kar hmasa khan thirhrui lehkha kha Hall-a mi, Mr Barrymore-a hnenah i pe ti raw?” a’n ti a.

An nau chuan, “Aw ka pa, ka pe alawm,” tiin a lo chhang a. Kei chuan, “Tu kutah nge i va pek?” tiin ka zawt leh ta a. Ani chuan, “Ani chu ka va kal lai chuan pindan chungnung lamah a lo awm a, a nupui hnenah ka pe ta a. A pe nghal ang tih thu pawh min hrilh,” a ti a. Kei chuan, “Barrymore-a chu i hmu em?” tiin ka zawt leh ta a. Ani chuan, “Hmu lo ka pu, pindan chungnung lamah a awm daih ka tih chu,” a ti a.

Kei chuan, “I hmuh si loh chuan engtin nge pindan chungnungah a awm tih i hriat theih?” tiin ka zawt ta zel a. Ani chuan, “A nupuiin a awm a ti alawm. Thirhrui lehkha chu a hmu na nge? Chuti a nih chuan ama’n rawn sawi buai ang hmiang,” a ti ta daih a. Han inchhuahchhalh zui zel chu thil sawngsawhlawt lo tak a ni ang tih ka hre mai a; mahse, Holmes-a thil hriat duh ber, Barrymore-a chu London-ah a awm lo reng reng tih hriat fiah chu a theih ta chuang lo a ni.

London-ah lo kal ta se, Sir Henry-a zui rutu kha lo ni ta se, amah chu Sir Charles-a dawm hlumtu a ni si a. Engtin nge ni ta zel ang? Barrymore-a hi lehlam pawl mi leh sa nge ni a, mahni thu pawha Biak In rawk duh khawpa sual ve hrim hrim? Baskerville chhungkua hi nghaisa nasa ta viau se hlâwkna eng nge a hmuh ang tihte ka ngaihtuah a.

The Times chanchinbu cheh thlak hmanga Sir Henry-a hnena hrilh lâwkna thu thawn te ka hre chhuak rum rum a. Kha thil kha a kutchhuak nge ni anga a suahsual rawngbawl hna tihkhaihlak tuma tu mi dang emaw tih? Barrymore-a tana thil hlâwk thei awm chhun chu Baskerville Hall luahtu an awm loh chuan he In riang ruang hi an In angah an ngai kumkhua thei mai dawn a ni.

Mahse, he thil hi chu aia thûk zawkah chuan a invêt hnawk ni ngeiin a lang. Holmes-a ngei khan kan hmaa buaina chhuak tawh zingah chuan a la khirh ber hial ang ti khan a sawi bawk si. Ka ṭhianpa chuan a tih tur zo thuai se, London khawpui chhuahsanin ka kova thil rit tak innghat chu rawn hlîp thuai se ka ti hliah hliah mai a ni.

Chutah ka ngaihtuahna kal dîng lai chu ka hnunga ke pên thâwm, a tlâna tlân thâwm hian a rawn chawk buai a, ka hminga min kohna ri ka hre zui ta bawk a. Chutia min han ko ta mai chu Dr Mortimer-a a nih ringin ka’n hawi lêt a; mahse, ka hmel hriat loh mi a ni tlat mai.

Chu pa chu pa tê tak tê, chêr deuh, inmêt fai veng vawng, hmaitlâng hriam deuh leh hmaifang ziarang chiang deuh, sam thangṭung ve deuh leh khabe pan lam, kum sawmthum leh sawmli inkara upa, hnangtah lukhum khum, thuamhnaw chhawhchhi buhpawlh rawng inbel a ni a. Nungcha eng ilo khung khawmna bâwm a pu a, a kut lehlam chuan phengphehlep manna lên hring a keng bawk.

Ka dinna hmun a lo thlen chuan, “Ka rin dan hi a dik chuan min lo hre thiam la, Dr Watson-a i nih ngei ka ring. He lai phulrai vela chêng hi chu kan thingtlang khawp a, tih dan phung pangngai anga han inhmelhriatna neih hmasak dîm dêm te pawh hi kan ti ve mang law nia. Kan ṭhian, Mortimer-a hnen aṭangin ka hming i hre tawh maithei, Merripit House-a chêng, Stapleton-a ka nia,” a ti nghal zaih zaih a.

Kei chuan, “He lai velah hian Mr Stapleton-a, leilung kutchhuak bihchian tuma khawsa a awm tih ka hriat avangin i phengphehlep manna lên leh i bâwm ken aṭang ringawt pawh khan i hming chu ka hre thei mai awm e; mahse, engtin nge ka hming i hriat theih chu le?” ka’n ti a.

Ani chuan, “Mortimer-a ka va tlawh a, a damlo enkawlna tukverh aṭangin a In bula i lo kal kha min lo kawhhmuh che alawm. Kan kalna tur kawng a inan deuh avangin ka rawn um pha ang che a, ka insawi chawp zel ang chu ka ti deuh a ni. Sir Henry-a chu a lo kalna lamahte hah chhe lovin a lo thleng ang chu maw?” a ti a.

Kei chuan, “A ṭha khawp mai, a lawmawm,” ka lo ti a. Stapleton-a chuan, “Sir Charles-a thih dan lungchhiatthlâk tak avang khan he laia rawn khawsak ve hi a duh lo vang tih kan lo hlau angreng khawp a. Anni ang mi neinung tan chuan hetiang hmuna han inkhung churuk reng mai chu a duh pawh rin ngam a harsa deuh bawk a ni.

"Mahse anni ang he laia an han awm ve hi chuan a chhehvela awmte tan chuan a nuam huai ṭhin asin. Sir Henry-a chuan hetiang puithuna thil vela hlauhthawnna hi chu a nei ve lo vang chu maw?” a ti a. Kei chuan, “A neih ka ring lo deuh a ni,” ti chauhvin ka chhang a. Ani chuan, “An ui hrâng chanchin hi i hre ve ngei ang maw?” a ti ta zel a.

Kei chuan, “Hre ve e,” ka ti leh mai a. Ani chuan, “He lai thingtlang hmuna mi chêngte hi chuan an ring nghet khawp lehnghal a. Phûlraia he ui an hmuh thu-ah hian kan koh khawm zah zah chuan chhia an chham ngam ang. He thil hi Sir Charles-a khan hre zingin a rilruah a bei nghet ve khawp a, a thih tâkna chhan pawh kha niin ka hria,” a ti a. Kei chuan, “Engati maw?” tiin ka’n zawt a.

Ani chuan, “A rilru kha a muang lo khawp a, eng ui pawh inlâr ta thut sela ani lungphu ṭha mang lo tan kha chuan thihpui tham a ni hial ang. Yew Alley-a a thih zan khan eng emaw chu a hmu tak tak ngei a nih ka ring khawp mai. A lungphu lam a ṭhat tawk loh avang leh amah kha ka ngainat em avangin thil ṭha lovin emaw a tlakbuak ang tih ka hlau reng a ni,” a ti ta zel a.

Kei chuan, “Engtin nge a lungphu a ṭha lo tih chu i hriat?” tiin ka zawt a. Ani chuan, “Ka ṭhian Mortimer-an min hrilh alawm,” tiin mi chhang a. Kei chuan, “Chuti, eng uiin emaw Sir Charles-a chu a ûm a, a hlauh luat avangin a thi ta niin i ngai a ni maw?” tiin ka’n zawt a.

Ani chuan eng danga min chhang lovin, “Chuti lova han hrilh fiah dan tur i hria em ni?” tiin min zawt lêt hlauh a. Kei chuan, “Ngaih dan ka la siam fel lo tawp mai,” ti chauhvin ka chhang a. Ani chuan, “Mr Sherlock Holmes-an a siam fel tawh em?” tiin min zawt ta a.

Chu thu ka’n hria chu ka phu deuh zawk a; mahse, a hmel ka’n en chuan han phût zawkna tur chhan eng mah awmin ka hre leh ta lo va. Ka hnenah chuan, “Dr Watson, nang hre lo ang chea han lan kual kawi vel chu thil ṭangkai a ni hauh lo vang. I ṭhianpa hnathawh ropui tak mai chuan heng thingtlang mite beng thleng hian a rawn fan a, nangmah hre tel lova ani ngawt Chhura umpui mu hriat lah thil theih a ni si lo.

"Mortimer-an i hming mi’n hrilh pawhin i nihna chu a tân phat rual a awm lo. He laia nang i awm chuan he thil hi Mr Sherlock Holmes-a chuan a ngaihven tih a chiang mai a, eng ngaih dan nge a neih tih lo ngaihven chu ka tan tih âwm loh a ni lêm lo asin,” a ti ta a.

Kei chuan, “Chu i zawhna chu ka chhang thei lo palh ang che tih ka hlau ngawt mai,” ka ti mai a. Stapleton-a chuan, “A nih leh amah chu a lo kal ve dawn leh dawn loh zâwt ta che ila thil âwm lo a ni ang em?” a ti ta zel a. Kei chuan, “Tunah chuan London khawpui a la chhuahsan thei rih lo. Thil dangah a la buai rih,” ka ti mai a.

Stapleton-a chuan, “A va’n pawi ve! He kan tana thil mak lutuk mai hi a mak loh dan a rawn hre maithei asin. I thil han thlir velnaah leh eng ilo hriat i tumna lamah ṭangkaina ka neih phawt chuan i sawi zel dawn nia. He thil i buaipui dan tur emaw, i thil rinhlelh zawng lam deuh emaw te chu hre tlangpui thei ta ila chuan ṭanpui theihna che emaw thu râwn pek theihna che emaw ka nei maithei a ni,” a ti a.

Kei chuan, “Kei zawng, ka ṭhianpa Sir Henry-a tlawh vel mai mai tura lo kal tak meuh meuh ka ni a, han ṭanpui theih pawh ka ni lo ve,” ka ti ta ngawt a. Ani chuan, “Ṭha lutuk! I fimkhur avang leh i fin thiam avangin i ti dik chiah a ni. Ṭul lo tawpa ka lo inrawlh ve avangin ka thiam lo chhiava a ni, ka sawi zuipui tawh hlek lo vang che,” a ti ta chiam a.

Thui lo tê kan han kal leh a, kan hma lawkah chuan kawng peng a lo awm a, chutah lungpui leh kâtchât te a lo inpawlh ta nuai a. Hla deuh hlekah chuan mei khu hi a chhuak ngiai ngiai a. Stapleton-a chuan, “He kawng hi kan zawh zel chuan Merripit House kan thleng mai ang. Darkar khat vel chauh pawh i tei khawtlai hman chuan ka farnu nena han inhmelhriattir che u ka duh ngawt ang,” a ti a.

Ka rilruah chuan Sir Henry-a kianga awm tur ka nih thu a lo lang zawk a; mahse, lehkha en fel tur a ngahzia kha ka’n hre chhuak leh thut a, ka khawihpui theih tur chi a ni hlawm lo tih pawh ka hria. Chu bakah, ṭhenawma mi chêng dangte pawh thlithlai turin Holmes-an min chah tih ka hre chhuak leh ta bawk a. Chuvangin, Stapleton-a min sawmna chu ka pawm leh ta a.

Kan kal pah chuan hnim hring cham dup mai te leh khawi maw lai lai lo hniam bik deuh te chu thlir chungin, “He phulrai hi a mawiin a nuam teh asin. Han fan vel te hi a ninawm thei lo reng reng a, a awm dan leh a zeizia pawh hi chhui chhuah sen a ni hek lo. A zauvin eng mah hian a luah khat lo va, a pianphung hi a mak ve hrim hrim bawk,” a ti bawrh bawrh a. Kei chuan, “Chuti he phûlrai hi i hre chiang viau a ni maw?” tiin ka’n zawt a.

Ani chuan, “He lai hmunah hian kum hnih chauh ka la awm a. He laia lo awm sate chuan mi thar ngaihin min la ngai. Ka lo kal ve chu Sir Charles-a thih hnu lawk kha a ni; mahse, ka thil tih duh zawng hi a ram dai dar theihna lam chi a ni ve miau mai a, kei aia hre chiang chu an tam vakin ka ring lo,” a ti a.

Kei chuan, “He hmun hi hriat chian a har viau a ni maw?” tiin ka zawt leh ta. Ani chuan, “Har teh reng mai. Entir nan, he lam, hmar lam te ang te hi, tlâng bâwk mak angreng tak tak a awm niai hi. A makna i hmu em?” a’n ti a. Kei chuan, “Sakawra han tlân deuh euh euh nan a îtawm hle mai a nih hi,” ti ngawtin ka chhang a.

Ani chuan, “Chutiang chu a ni ang tih mi tam takin an ring a, nunna an chân phah reng asin. Saw laia hnim duah bik deuhna hmun saw i hmu em?” a’n ti a. Kei chuan, “Hmu e, hmun dang aiin a leilung a ṭha bik a ang hle mai,” ka lo ti a. Stapleton-a chuan, “Saw saw alawm Grimpen Dûm hmun an tih chu. Saw lai hmunah saw chuan vawi khat petek sual zeuh chuan mihring tan pawh thihna, ransa tan pawh thihna tho a ni.

"Nimin lawkah pawh khan phûlraia tla ṭhin sakawr pakhat chu a lut a, a lo chhuak leh reng reng hlei nem. A lu chu eng emaw chen chu ka hmu zui a; mahse, a dawlh ta tho tho a ni. Khaw ro lai pawhin a kal tlang chu tih namai lo tak a ni a, khaw hnawm lai phei chuan hlauhawm râpthlâk tak a ni ringawt.

"Mahse, kei chu a lai takah pawh sawn ka kal tlangin damin ka lo kir leh thei ang. Khai! saw sakawr khawngaihthlak tak pakhat chu a lut pek a nih saw,” a’n ti zui zat a. Chu lai hnim hring zingah chuan eng emaw ni, buang deuh ther hi tâl velin ka va hmu a. Chutah a nghawng sei tak mai chu a’n tifân a, chung lam hawiin a lu a’n dâk chiam a, râpthlâk deuh mai hian a hrâm ta chiam mai a.

A hrâm ri ka’n hriat chuan ka tirilah ka khur ru er er a; mahse, ka ṭhianpa chuan chuti teh chiamin a la na ve pawhin ka hre lo. “A bo ta! Dûmin a dawlh ta a nih kha. Nikhatah pakhat zel a dawlh dawn a ni ang, khaw ro deuh lai hian an va rap a; mahse, khaw hnawm lai hian a lo hlauhawm zual ta si ṭhin a, an hre ve pha tawh si lo. He Grimpen Dûm hmun hi chu hmelmate kawta awmah a ṭha asin maw le,” a ti zui a.

Kei chuan, “I kal tlang thei si a maw?” tiin ka’n zawt leh hram a. Ani chuan, “Thei e, pa zuanzang deuh tan chuan kawng pahnih zawh theih a awm a, chung kawng pahnih chu ka hmu chhuak tawh,” a ti a. Kei chuan, “Mahse, eng atan nge sawtiang hmun hlauhawmahte va per kai i duh reng reng chu le?” tiin ka zawt leh ta zel a.

Ani chuan, “Saw Dûm hmun piah lama tlang saw i hmu em? Saw tlang saw he dûm hmun hian a hual vel avangin a va pawh zen zen theih loh tih theih a ni mai a. Sawng laiah sawn thingkung hmuh zen zen harsa tak mai chi leh phengphehlep danglam tak tak hmuh tur a awm alawm; a zawn dan i thiam chuan ka ti a nia,” a ti mai a.

Kei chuan, “Engtikah emaw ka va la tlawhpawh ve ang e,” ka ti ve ta hial a. Ani chuan mak tih hmel deuhvin min han melh a, “Khaih, chu zawng, a ngaihtuah pawh ngaihtuah der duh hlek suh. I thih hlauh chuan nangmah tihlum riakah che ka inngai dawn tlat a ni. Dama i lo kir leh theih a rinawm miah lo tih hrilh tlang nghal mai che ila a ṭha ber awm e. Chhinchhiahna eng eng emaw ka vawn tlat avangin chutiang chuan ka ti thei mai mai a ni,” a ti a.

Kei chuan, “Uai! Chu eng nge ni ta mai?” ka’n ti thut a. Chutih lai chuan rûm thâwm, fân ruih mai, lungchhiatthlak deuh mai hi phûlraiah chuan a rawn fâwn chhuak ta hlurh hlurh mai a. Khawi lam aṭanga lo ri nge tih lah a hriat theih hlek loh lehnghal. Ri deuh hluk hluk chu rûm vung vungah a lo chang chho va, chutah a ri hluk hlukah bawk chuan a let leh ta a.

Stapleton-a chuan hmel danglam tak mai hian mi’n melh a, “He phûlrai hi hmun dangdai tak zawng a ni,” a’n ti ngawt a. Kei chuan, “Eng thâwm nge maw ni ta ngai le?” ka lo ti a. Ani chuan, “Thingtlang mite hi chuan Baskervilles Uisathiam an ti mai a, sa seh tur zawngin a rûm a nih chu. Tun hmain ṭum hnih khat ka lo hre tawh ṭhin a; mahse, tun ṭum ang em hi chuan a la ring ngai lo,” a ti mai a.

Kan vel chu ka’n thlir kual ruai ruai a, sang deuh taka mulukawlh pahnih che zeuh zeuh chauh lo chu thil che hmuh tur dang reng reng a awm lo. Stapleton-a hnenah chuan, “Mi inzir sang i ni bawk a, chutiang thu riangvai te te chu i awih hlek lo vang maw? Chutiang thil ri han siam thei tur chu eng nge ni ang le?” ka ti a.

Ani chuan, “A chang chuan dûm hian eng ri mak tak tak emaw hi chu a chhuah ve ṭhin a, chirhdûm han insawhmuk kual vel emaw, tui lo irh chhuak tur emaw te leh thil dang dangte pawh a ni ve thei bawk ṭhin,” a ti a. Kei chuan, “Ni lo, tuna thil ri kha chu nunna nei, boruak hîp lut chi thâwm ngei a ni,” ka lo ti a. Ani chuan, “Nih pawh a ni mahna. Chirhdûp sava hrâm i hre tawh ngai em?” a ti a. Kei chuan, “Hre ngai lo tawp mai,” tiin ka lo chhang a.

Stapleton-a chuan, “Sava vang tak mai leh danglam tak mai, leilungah hian an chi a mang tawh awm mang e tih hial khawpa vang a ni a, England-ah phei hi chuan hmuh tur a awm tawh meuh lo; mahse, he laia phûlraiah hi chuan thil awm lo hi a awm ve mang law nia. Chirhdup sava la dam chhun hrâm ri kan hria pawh lo ni ta se mak ka ti hauh lo vang,” a ti a.

Kei chuan, “Ka thil hriat tawhah chuan a la mak ber pawl leh a ngaihna ka la hriat loh ber pawl a ni ta ve ang,” ka ti a. Ani chuan, “A ni asin, he hmun hrim hrim pawh hi zawlnei lem anchhelawh hmu tluk leka hmun tuihnai lo chu a ni ve reng reng awm e. Saw lai tlâng bâwk pang vel saw han thlir teh, eng angin nge i ngaih?” a ti leh ta a. A kawhna zawn vel lai chu lung tian bial deuh thliah thliah hian a khat deuh vek a. A hnenah chuan, “Eng nge maw ni le? Beram khung khawmna hmun em ni?” ka’n ti a.

Ani chuan, “Ni lo, min thlahtute In hlui a nih saw. Tun hma kha chuan he lai phulrai velah hian mihring an lo bit khawp mai a; mahse, an rauhsan hnuah chuan an sulhnu hluite chu khawih danglam lohvin an awm ang ang sawn kan hnutchhiah ta mai a, hmun dangah kan inbengbel ve ta mai a ni. Sawng saw chu an bûk, a chung awm tawh lo a nih hlawm saw. A chhungah sawn va lut ta hlawm la chu an mei chhemna hmun te leh an mutna hmun te pawh i hmu mai ang,” a ti a.

Kei chuan, “Chuti he lai vel hi khaw lian ve tham fe chu a lo nih dawn hi maw le. Engtik hun lai velah nge he lai hi pi leh pute chuan an lo luah chu le?” ka ti leh a. Ani chuan, “Ṭuan leh mang; a hun leh kum chiah sawi theih loh hun lai khan,” tiin min chhang a. Kei chuan, “He laia an chên chuan eng nge an tih ber?” ka ti ta zel a.

Stapleton-a chuan, “Heng lai tlang pangper velah hian ran an vulh a, hreipuia lung hriam an hman hun lai a nih avangin lung hriam aia hman tur thir laih chhuah tur an zawng vel mai mai a ni. Saw lai tlâng bâwka khua tih tham deuh saw i hmu em? Saw saw an sulhnu, an thir laih chhuah tumna hmun hlui a nih saw. Phûlrai velah pawh hian sawtiang deuh saw hmuh tur a awm nual ang. Ngawi rawh Dr Watson, min lo hre thiam lawk rawh, hei chu ‘Cyclopides’ (Saiklawpaids – rannung chi khat. Pll) a ni tlat mai,” a ti ta thut mai a.

Chutih lai chuan kan bul lawkah chuan tho emaw ni, phengphehlep note emaw ni hi a lo thlawk ve ve a, Stapleton-a chuan zuanzâng deuh mai hian a um zui thuai a. Chu thil lo thlawk chu Dûm hmun lam pan chuan a thlawk ta zel a; mahse, tîm aih lo hian Stapleton-a chuan a um zui ve zel a, a tlan pah chuan a lên hring ken chu a lek vau vau zel a. Stapleton-a ṭuan ṭhatzia ka hmuh chuan mak ka tiin ka ngai sang angreng hle a, a thil ûm lah chu thlawh pangngaia thlawk ta lo chuan a thlawk kawi zek zek bawk a.

Chutah, pên thâwm ka hria a, ka’n hawi lêt a, Merripit House lam panna kawng aṭang chuan hmeichhe pakhat hi a lo chhuak nawlh mai a. A hma khan ruamin a hliah avangin ka bul hnai mai a lo thlen hma loh chu ka lo hmu lo mai mai a ni. Phûlrai velah chuan hmeichhe tam tham an awm loh avangin chu hmeichhia chu Miss Stapleton a ni ang tih rin a harsa lo hle a.

Chu bakah, Miss Stapleton chu hmeichhe nalh tak a ni tia tuin emaw min hrilh ka hre zauh tawh bawk tlat a ni. Min rawn pantu hmeichhia chu a hmelṭha chiang kher mai, chu bakah, chutiang hmeichhia chu dawrpui naranah hmuh tur an awm zen zen lo bawk. Stapleton-a farnu a nih ngai chuan unau rau rau zinga a inang lo ber pawl an ni ngei ang.

Stapleton-a chu mitmeng buang, sam rawng da deuh leh vun rawng zangkhai tak pu a ni a; mahse, he nu hi chu sam dum ṭha em em mai, ria, zahawm leh sang ṭha zeih zawih tak mai a ni bawk. Chu hmeichhe hmaifang chu a dikin a chiang a ni ber mai. A heh îtawm tak mai te leh a mitmeng dum mawi tak te chu en tel ta lo ila chu a hmelah ringawt chuan ‘khawngaihna’ tih sipel thiam lo hial hmel pu a ni ta ve ang.

A incheina zahawm leh inchawih tak tak mai te nena han en kawp a, phûlrai kawng ruh pakhata a ding han hmuh chu manhla tak a ni. Ka lukhum ka phawk a, eng thil mawihnai deuh emaw sawi ka rilruk lai tak chuan a aw ka’n hria a, a thu sawi ka’n hriat thiam phei chuan duh duh sawi thei pawh niin ka inhre ta lo va.

Chu hmeichhia chuan eng dang sawi hlek lovin, “Kir leh rawh! Pêng kawi hlek lovin London-ah kir leh nghal vat rawh,” a’n ti tawp mai a. Mak ka tih em avangin sawi tur pawh ka hre lo va; ani lah chuan mitmeng danglam tak maia min melh chung leh hmanhmawh awm deuh maia ke per chungin min hmachhawn ran mai a.

Kei chuan, “Eng vangin nge ka kir leh ang?” ka’n ti a. Ani chuan aw hniam deuh leh ti mai mai lo tih hriat deuh mai hian, “Ka sawi fiah thei lo; mahse, Pathian hmingin ka ngenna che hi zawm ngei ang che. Kir leh la, he phulraiah hian i ke rawn nghat leh tawh reng reng suh,” a ti leh ta mai a. Kei chuan, “Ka lo thleng hlim ve hlawt lah ni,” ka’n ti ngawt a.

Ani chuan, “Mihring! I tana ṭhatna tura thu hrilh che pawh i hre lo maw? London-ah kir leh ringawt rawh! Zaninah! He hmun hi eng vang pawhin chhuahsan ringawt rawh! Chu le, ka nuṭapa a lo kal e. Ka thu sawi kha chu sawi lang hlek suh ang che. Saw laia naubân saw min thliah peih em? He lai phûlrai hi naubânah chauh chuan a hausa viau asin; mahse, tun lai hi chu phulrai mawi vanglai zawng a ni lo deuh,” a ti ta daih a.

Chutih lai chuan Stapleton-a chu a thil ûm hlawhchham a lo kir leh tawh a, hah hmel deuh maiin a thaw hlawp hlawp a. “Uai Beryl!” tiin a farnu chu a’n au va. A aw chuan ngaihno a bei lo hlein ka lo hre pek mai. Miss Stapleton chuan, “Jack, i hah hmel hle mai,” a lo ti ve bawk a.

Stapleton-a chuan, “Hah e, ‘Cyclopides’ ka ûm alawm maw le. Favang tawp lamah phei hi chuan hetiang chi hi hmuh tur a tam loh teh lul nen ka’n chhuah kher kher chu a uiawm takzet a ni,” a ti a. A thu sawi chu a ngaihsak vakin ka hre lo va, a mit chuan kei leh hmeichhia chu a melh tawn deuh reng bawk a. “In lo inbe pawp ang chu maw?” a’n ti a.

Miss Stapleton chuan, “Aw. Hei, Sir Henry-a hi ka lo titipui a, phulrai mawina tak tak hmu tur chuan khua a hma tawh lo lam a ni tih thu ka lo hrilh alawm,” a ti a. Stapleton-a chuan, “He mi hi tu nge nia i rin?” a ti ta mai a. Miss Stapleton chuan, “Sir Henry Baskerville-a a ni ang chu ka ti mai,” a ti sam thên a. Stapleton-a chuan, “Teuh lo lutuk,” a lo ti a. Kei pawh chuan, “Kei chu mi satliah mai mai ka ni a. Sir Henry-a ṭhianpa, Dr Watson-a ka nih hi,” ka ti ve ta a.

Chu hmeichhe hmelah chuan lawmna aiin thinrimna a lang teuh zawk. Chutah, “Eng ilo mai mai kan lo sawi a,” a ti ta ngawt a. Stapleton-a chuan, “Han titi-na hun pawh in neih rei loh teh lul nen,” a’n ti leh sak a. Miss Stapleton chuan, “Dr Watson-a hi he lai rawn tlawh satliahtu ang ni lo, he laia awm nghet ve tur ang hrimin ka lo titipui vel alawm,” a ti leh ta zeih zeih a.

Chuta ṭanga thui lo te kan han kal leh hnu chuan an chênna hmun, Merripit House chu kan va thleng a. Chu an chênna hmun chu tun hma chuan hmun nuam tak pawh ni vein a màwi; mahse, tunah chuan an thuam ṭha velin an ti tunlai zo tawh a, a lunglênthlak nêp tawh tlat. An In hual chuan pangpar huan an siam a; mahse, an pangpar huana thil phun leh thing dingte chu phûlrai hmun danga thing ang bawkin a chawrche riau mai.

Pindan chhungah chuan chhiahhlawh pawr angreng fe hian min luhtir a. Pindan chhung ka’n luh chuan Miss Stapleton-i duhtuizia leh hautak turzia chu ka hre mai. Ka rilru chuan eng vangin nge he mite unau, lehkha thiam tak mai leh hmelṭha tak mai hi he lai hmun khawharah hian an lo kal tihte ka ngaihtuah neuh neuh a.

Ka ngaihtuahna hria ni awm tak hian Stapleton-a chuan, “Awm nan chuan hmun mak ve tak a ni ti raw? Mahse, kan hlim ve viau tho asin, ni lo’m ni Beryl?” a’n ti a. Miss Stapleton chuan, “Hlim teh reng mai,” a lo ti a; mahse, a aw aṭang chuan ama thu sawi ngei pawh chu amah pawhin a ring tawk lo tih chu a chiang mai.

Stapleton-a chuan, “Tun hma chuan sikulah ka thawk ṭhin a. Ka thawhna chu North Country-ah a ni. Keini ang thinlung pu tan chuan sikula han thawh chu a nitin hna thilin a ninawm thei lek lek mai; mahse, ṭhalai zinga han tal a, mi dang han ṭanpui ṭhin chu a nuam ve viau bawk. Mahse, hripui a lo lêng ta hlauh a, kan naupangte zinga pathum chu an thi a.

"Chuta ṭang chuan kan sikul chuan ngai a awh leh ta lo va, kei pawhin pawisa tam tak ka sên phah ta a ni. Kan naute kha ngaih chang han nei ṭhin lo phei ila chu he lai hmun hi a nuam lehzual tur hi a nia, thlai, rannung vel chanchin zirna tur hi a tam em asin. Dr Watson, phûlrai i thlir hmel ka’n hmuh khan heng thil hi sawi turin min cho chhuak tlat a ni,” a ti ta a.

Kei chuan, “Sikulah chuan lo thawk ta reng la chu i farnu emaw, i tan emaw pawh a khawharthlak nêp deuh tur tih ka lo ngaihtuah ve mek a,” ka ti a. Hmeichhia chuan, “Khawharthlak ka ti lo tawp mai,” a lo ti vat a. Stapleton-a chuan, “Kan thil zirna lama min pui thei tur lehkhabu kan nei a, ṭhenawm ṭha tak tak kan nei a.

"Dr Mortimer-a te ang te hi a kawm tlak teh asin. Sir Charles-a pawh kha pa kawm nuam elkhen mai a ni bawk. A ui pawh kan ui kher asin. Vawiin chawhnu lamte hian Sir Henry-a chu va tlawh chhuak ta ila kan va bawh buai lua ang em?” a ti ta a. Kei chuan, “Bawh buai lah lo ve, a lawm ngawt ang,” ka lo ti a.

Stapleton-a chuan, “Chuti a nih chuan ka rawn tlawh ang tih i lo hrilh mai mai dawn nia. He lai ram vel hi a hriat chian hma chuan puih theihna kawng kawngte pawh kan nei mahna. Dr Watson, pindan chungnung lamah lo chhovin ka rannung lak khawm sate i hmu duh lo’m ni? England chhim thlang lamah hi chuan a la khawm hnem ber ka ni ang. Chung i thlir kual zawh chuan chawchhun pawh kan peih ve titih mai ang,” a ti a.

Mahse, kan Hall lama kir leh thuai thuai chu ka châk tlat a. Phulrai awm dan reih ruih te, sakawr thi ta te, ransa hrâm mak tak kan hriat te zawng zawng khan ka awm a tinuam lo riau va. Chu bakah, Miss Stapleton-i thu sawi khan pawimawhna eng emaw tak a nei ngeiin ka ring tlat bawk si a, chawchhun eia min sawmna lawmawm tak mai pawh chu bawhzui ngam lovin ka kir leh ta thuai a.

Ka kir leh lam chuan kan lo kalna kawng bawk kha ka zawh lêt leh ta a; mahse, chu kawng aia kawng hnai zawk chu a lo awm a ni teh chêk ang chu, kawnga ka kal lai chuan kawng sira lungpui pakhat chungah hian Miss Stapleton chu a lo ṭhu a. A hah deuh avangin a biang chu a tai têk mai a, a nalh kher mai.

Ka hnenah chuan, “Dr Watson, lehkhalh tur che hian a tlân hlirin ka tlân a ni. Ka lukhum pawh ka khum hman lo. Ka muanchan vaih chuan ka unaupa khan thang rei min ti palh ang. Sir Henry-a emaw ka tih che avangin pawi ka ti hle a, pawi ka tih thu hrilh che ka duh a ni. Khawngaih takin ka thu sawi kha chu theihnghilh vek rawh, i tan chuan awmzia a nei ve lo,” a ti ta a.

Kei lah pek chuan, “Ka thei lo. Sir Henry-a ṭhian ka ni a, a ṭhatna tur chu ka duhpui ve alawm. Eng vangin nge London-a kir leh tura i duh em em?” ka ti ta tlat a. Ani chuan, “Dr Watson, hmeichhe ngaih ṭhat lohna thil mai mai maw le. Min hre chiang deuh la chuan ka thu sawi leh ka thil tih chhan hi ka sawi fiah zel thei lovin ka thiam lo tih i hre ngei ang,” a ti ta mai a.

Kei chuan, “Ni lo, chutiang a ni lo. I aw kha ka bengah a la cham reng a, ti tak hmel i pu a ni. I mitmeng danglam takte kha ka la theihnghilh thei hlei nem. Khawngaih takin Miss Stapleton, tlang takin thu sawi mai teh. He laia ka lo kal hnu hian eng thil emaw awm tlatin ka hre mai. Grimpen Dûm hmun ang deuh sawn khawi laiah emaw hian min hruai kawitu tur thil a awm a; mahse, chu kawng ka zawh vaih chuan pil hlenna hmiah tur niin ka hria. Sir Henry-a hnena hrilh lawkna thu i thlen duh chu khawngaih takin min hrilh rawh,” ka ti a.

A hmelah chuan chi-ai hmel a lo lang a; mahse, rei lo teah a mitmeng a sak thar leh ta thut a, “Dr Watson, i ngai thutak lua a ni. Sir Charles-a thihna khan kan unau hian min tawk na em mai a, min tawk na tur pawh a ni reng a, kan inkawm ngeih ve tlat a ni. An chhungkaw chunga anchhe leih buak tawh chungchang hian a tibuaiin a khawih ngui ve em em a, a rilru hlauhthawnna a sawi ṭhin pawh kha a thihna nen hian eng emaw ti zawng chuan inkungkaih ngeiin ka ring a ni.

"Chuti a nih tak si-ah chuan an chhungkaw zinga mi mi dang an lo lan leh takah chuan thil hlauhawm tak a tawng dawn niin ka hria a ni. Chu chu ka sawi tum chu a ni mai,” a ti ta tlat a. Kei chuan, “Eng thil hlauhawm maw?” ka’n ti leh hram a. Ani chuan, “Ui chanchin an sawi hi i hre tawh ang maw?” a ti a. Kei chuan, “Chutiang thu riangvai te te ka bengkhawn peih lo,” ka lo ti a.

Ani chuan, “Mahse, kei chuan thutakah ka ngai a ni. Sir Henry-a chu i theih phawt chuan an chhungkaw tana hmun ṭha lo tak aṭang hian hruai bo ang che. He khawvelah hian he lai hmun chauh lo pawh hi chênna dang a tam em. Eng vangin nge hetiang hmun râlṭitawmah hian chên reng a duh kher ang?” a ti ta zel a.

Kei chuan, “Hmun hlauhawm a nih avang hian a cheng duh ang. Chu chu Sir Henry-a te ang mihring nun zia a ni. Chiang deuh hlek zawka thil awm dan min hrilh theih si loh chuan amah lak sawn chu thil theih niin ka ring lo,” ka ti leh ta a. Ani chuan, “Eng mah hriat chian ka neih loh avangin sawi chian tur eng mah ka pai lo,” a ti ve ta tlat a.

Kei chuan, “A nih leh zawhna dang pakhat leh Miss Stapleton, he thil hi chutiang teh ruai a nih a, i ti tak tak meuh lo a nih si chuan eng vangin nge i unaupa hriat ve kha i hlauh em em? Hetiang thu pawisawi lo te mai mai chu tu tan mah han ngaih huat tur a ni hlei nem,” ka ti ta a.

Miss Stapleton chuan, “Ka unaupa hi chuan Hall luahtu tur hi a duh em em a ni. Miin Hall hi an luah chuan phûlrai vela mite hian an hlawk phah sawtin a ngai tlat a ni. Sir Henry-a tiralṭi thei zawng leh a kal bo leh theihna tur zawngin thu ka sawi tih han hre phei se chu a thinrim ngawt ang.

"Mahse, ka tih tur chin chu ka tiin ka hmaa chhuak chin chu ka hlen ta, eng mah ka sawi zui tawh lo nang e. Ka kir a hun ta, chuti lo chuan ka kal bo tih hriain nang ka titipui che hi a ring palh hlauh dah ang e. Mangṭha!” a ti ta mai a. Lungpui kârah chuan a her liam a, rei lo teah ka hmu thei lo ta thuai a. Kei erawh chu Baskerville Hall lam panin ngaihṭha lo zetin ka kal leh ta hnak hnak a



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » June 19th, 2018, 9:00 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 8
(Rozami Pachuau)

DR WATSON-A LEHKHATHAWN PAKHATNA

Tunah chuan Holmes-a hnena ka lehkhathawn ka’n tar lang zui tawh mai ang a. Heta ṭang hian thil awm dan chu a chiang zaw mah ta ve ang. Phek khat chu a lo tla bo tawh nain a hun laia ka rilrua thil awm ka ziah chhuah dan hian chhiartute a deh ve ngei ka ringin a fiah zawkna lai pawh a awm ta ve ang.

B a s k e r v i l l e
Hall Oct. 13th

My Dear Holmes,

He Pathian hnuchhawn ram kilkhâwra thil lo thleng chanchin ka rawn hrilhna che, ka lehkha hmasa leh ka thirhrui rawn thawnte kha i la buaipui reng ang tih ka ring. He lai hmun hi zawng, nawhchizuar-ho awmna venga kohhran mi leh sa inphum ru ve ang maiin ka nêl thei lo va, ka awm rei poh leh ka nêl lo tulh tulh mai.

He laia han tluk luh tawh chinah hi chuan England ram, ṭhangtharte’n duh tawka an cheibawl riruang zawng zawng hnuchhawnin pi leh pu sulhnu ramah kan kir leh hi a ni ngawt mai a, leilung kut chhuak nen kan inhnaih bik riauvin a lang ṭhin. Khawi hmunah pawh hian han vakvel ila, tun hmaa lo cheng tawh, an awm tih pawh hre lova thangtharte’n an theihnghilh tawhho hmun hlui leh sulhnu hmuh tur a awm a.

An chenna hmun hluite han thlir phei chuan In hniam te te, lunga sak, kawngkhar chêp tak tak aṭanga thalngul leh thalbur paipawn chunga lo vak chhuakte pawh mitthlaah a châm rum rum thei a. Kum tam kal ta kha kan thlir let thei asin. He lai ram ruak leh ram tuihnâng ngah lo ber maiah hian a engti tih lêkin emaw khuate an lo din ve rawk ni tihte pawh ngaihtuah theih tak zawng a ni.

Mahse, heng thil hi zawng, he laia nangin min tirhna chhan nen a inpersan deuh em mai a, i tan chuan ngaihthlak ninawm mai a ni sam viau ta ve ang. Kan awmna leiin ni a hêl leh hêl loh chungchanga i beng i chhut ngawn dan kha ka la theihnghilh thei lo. Chuvangin, Sir Henry Baskerville-a leh a chunga thil lo thleng dangte lamah ka pakai mai zawk ang e.

Tun hnaiah eng mah ka rawn sawina i hmu lo a nih chuan sawi tur thil a awm loh vang a ni tih lo hria ang che. Thil mak angreng tak mai a lo thleng leh ta a, chu erawh chu ka rawn sawi chhawm zel ang; mahse, chumi ka sawi hma chuan thil dang han hrilh phawt che a ṭulin ka hria. Chung zinga pakhat chu tâng tlan chhuak, phûlraia thep bo ta chanchin kha a ni.

Kha pa kha a tlan bo ta ni ngeiin a lang, hetia a tlan bo hlen ta daih leh phûlrai a chhuahsan ta hi he lai bial vela mite tan chuan mitmîm lak ang huai a ni awm e. A tlan chhuahna kha chawlhkar hnih lai a ni tawh a, chumi chhung chuan tu ma’n an hmuin a thâwm an hre lo. Chawlhkar hnih tâl tap chu he laiah hian a tei bo a rinawm lo va; mahse, biru dawn pawh ni se, a tan bihruk chu thil harsa lo tak a ni thei bawk ang.

An hmanlai In hlui khawi emaw ber pawh hi a tan chuan bihrukna hmun ṭha lutuk a ni thei mai ang chu; mahse, phulrai vela beramte hi a phil a nih ngawt loh chuan ei tur dang erawh chu a nei thung lo vang. Chuvangin, a tlan bo chhunzawm ta zel a ni-ah kan ngai mai a, he lai vela chengho pawh lungmuangin an mu ve thei ta e. Kan awmna hmunah hi chuan mahni inenkawl thei rual ṭhah pali kan cheng a, chuvangin, kan ngaihtuahawm lem lo.

Mahse, Stapleton chhungkua ka ngaihtuah erawh chuan ka awm a nuam chiah ṭhin lo a ni. Stapleton chhungkua hi an chênna a hla deuh va, buaina pawh tâwk palh se, va ṭanpui mai phak lohvah an cheng a. Mipa chhiahhlawh pakhat, hmeichhe chhiahhlawh pakhat leh anni unau mai an ni a. A mipa zawk, Mr Stapleton-a lah hi pa thahrui phiar lo zet mai a lo ni bawk si. He kan Notting Hill misual te ang te hi chu an Inah lo lut ru palh ta chauh sela chuan an chan a duhawm lo ve hle ta ve ang.

Kan ngaihtuah em avangin Sir Henry-a nen chuan he laia kan tawlailirpu, Perkins-a hi Stapleton chhungkaw zingah va riak ve ta se tiin thu kan rel a; mahse, Stapleton-a chuan a lo duh bau lo mai. Tih tak takah chuan kan Sir Henry-a hian kan ṭhenawm biang no tak hi a ngaihven ta riau tih thu sawi a ṭha awm e. He lai hmun hi ani ang pa viak ṭha tan chuan a khawharthlakin tih tur a awm tlem deuh hlek a, kan ṭhenawm nula lah hi a biang a no mai bakah a lo zei ve hranpa reng reng si nen.

A unaupa nena han khaikhin chuan chawlhkar khat khua a chên tawh hnua khawlai diak kâwi tak leh ṭhal romei ang tluk velin lung an intihlen hleih a ni. Kan mihringa lah hian a farnu hi a veng emaw ni lawi ni, a farnu hian a hlau hlein ka hria. Titi a’n sawi ve nikhua pawh hian a lawm zawng a nih leh nih loh hriat tumin a u hi a thlek châmchi hian ka hria a. A u hi pa ngilnei pangngai chu niin ka hria. Han hmu ve la chu hmuhnawm i tih ve zawng tak a nih ka beisei.

Hall kan thlen tuk khan Stapleton-a chuan Sir Henry-a hi a va tlawh a, a tukah Baskerville chhungkaw mi sual hmingthang, Hugo-a lo chettlatna hmun min kawhhmuh a. Chung lai vel min han kawhhmuh chu phûlrai kan dai dar hi a ni ngawt mai, a hmun pawh a ṭihbaiawmin a hlauhawm angreng hle a, khatiang thil sual tihna hmun atan pawh khan eng emaw zawng tak chuan a duhawm ve reng reng a ni.

Tlâng bâwk karah kawr ruam kan va hmu a, chu kawr ruam chu a sei lo va, a ân chiah chuan hnim ṭona hmun a inpharh bawk. Chu hnim ṭona inpharh laiah chuan lung lian pui pui pahnih hi a chawr ngoh mai a, a chhîp chu a zum vurh mai a, ramsa hlauhawm tak ngho pawh a ang kher mai. A hmun han hmuh mai pawh chuan Hugo-a sual rawngbawlna hmun chu a ni ang tih a rin theih mai bawk.

Sir Henry-a lah chuan a ngaihven em em mai a, mihringte chungthu-ah mihring ni ve lo, chakna leh thiltihtheihna nei ve si an tel ve a rin leh rin loh te Stapleton-a chu a zawt a. A aw chu tizangkhai lui mah se a zawhna chu a la thutak hle tih zawng phat rual a awm lo.

Stapleton-a chuan thu tam a sawi duh lo nain Sir Henry-a thin tihnat chu hlau lo se, kha aia tam daih kha sawi tur a hria ang tih chu a rin theih mai. Ramhuai ânchhe tuar chhungkaw ṭhenkhat an awm thu te a sawi a, Baskerville chhungkaw chungchangah chuan eng mah a sawi duh lo nain vantlang rin dan tlangpui chu a ṭâwm tih thu chu phat rual a awm lo vang.

Kan haw lam chuan Merripit House-ah chawchhun kan fâk a. Tah chuan alawm, Sir Henry-a chuan Miss Stapleton chu a kawm ngeih tak viau. A hmuh tirh phat aṭangin a ngaina nghal hle ni maiin a lang a, an inngaina tawn hle pawh lo ti ta ila ka tihsual lutuk chu ka ring teh chiam lo. Kan haw kawngah chuan Miss Stapleton chu a sawi chhuak ta deuh chhên a.

Chumi ni aṭang phei chuan a mipa zawk emaw a hmeichhia zawk emaw tal, Stapleton chhungkaw mi chu kan hmu ta ziah mai a ni. Zânin pawh hian hetah hian chaw an rawn ei a, kar leh lama Stapleton In lama lenkhawm zai an rel leh tawh hi.

Hetianga anni pahnih an lo induh theih chuan thil lawmawm tak ni mai awm a ni a; mahse, Stapleton-a hmelah hian he thil duh loh avanga mitngo râng vawi eng emaw zat ka hmu hman tawh tlat mai. A farnu tel lo chuan a khua a harin a baihvai ang tih chu hriat sa mah ni se hetianga pasal duhawm a neih theihna dâltua a ṭan vaih chuan mahni hma a sial tâwpkhâwk ka ti ngei ang.

An inhmangaihna hi par chhuak turin a duh lo tawp tih chu an han titi dun tur vawi eng emaw zah a bawh buai aṭang hian a chiang hlein ka hria. Heti a nih chuan; ti ila, he mite pahnih hi an induh chhoh zel chuan Sir Henry-a bula awm reng tura min chahna kha phurh chhuah a harsa lehzual sauh dawn a ni. Nula leh tlangval inngaizawngte hun bawh buai ching ka ni dawn a, ka chan a duhawm vak dawn lo.

Hmanni, Ningani khan kan awmnaah Dr Mortimer-an chawchhun a rawn ei a. Tunlai vel hian Dr Mortimer-a hian Long Down-ah eng ilo laih chhuah lam a bei a, tun hmaa he lai luahtute luruh a lai chhuak a, a hlim kher mai. Hetiang em ema mahni tuina lam thil ngaihven ṭha peih hi ka hmuh pawh ka la hre ngai lo. Rei vak lo kan ṭhutho hnuin Stapleton-a te unau an lo kal ve a, chutah Sir Henry-a duh dan angin Sir Charles-a thihna hmun, Yew Alley lam kan va en ta a.

He hmun hi kawng ruh ṭha tak mai, a sir tawn tawna thing ding zên ṭhulhin a karcheh a ni a, thing dinna leh kawng ruh inkarah chuan phaitualhnim ṭona a awm bawk. He kawng tawpah hian nipui laia chawlh hahdamna In hlui tawh tak leh rawp tawh tak a awm a. He dai-kawngkhar hi thinga siam, rawng var hnawih, a kalhna awm a ni. He dai-kawngkhar piah lamah hian phûlrai chu a inpharh cham ta durh mai a ni.

I ngaih dan kha hre rengin Sir Charles-a thih laia thil lo thlen dan ni awm chu ka rilru mitthlaah a lo lang a. Kan putara chu phûlrai panna dai-kawngkhar bula a din lai chuan phûlrai lam aṭanga thil mak tak leh hlauhawm tak lo kal chu a hmu a, hlau lutuka a tlûk hlum tawp hma loh chu a tlân ta a. A tlânna kawng pawh a awm ruah mai.

Eng hlauvin nge a tlân? Phûlraiah chuan beram vengtu atana an ui hman a va hmu em ni? Nge ui lian elkhen mai dum zer zur, thâwm chhuah miah si lo leh hlauhawm tak a va hmu? He thilah hian mihring suahsualna a inrawlh ve em? He kan Barrymore-a, pa hmai dâng deuh del dawl hian a sawi puan duh baka tam hriat a nei? Ka la chiang lo hle nain he vanduaina thla phênah hian heng zawhna hi a awm lo thei lo.

Lehkha ka rawn thawn hnuhnun ber hnu chea ka mi tawn chu Mr Frankland-a, Lafter Hall-a mi a ni. A awmna chu kan awmna (hall) chhim lam, mel li vela hla a ni ang. Pa upa lam tawh, hmai sen, sam var, pa nelawm loh angreng fe a ni a. A tuina ber chu Kumpinu danpui chai vel hi a ni a. Inkhinnaah ringawt pawh pachhe din chhuahna tham pawisa a khawhral tawh a. Inkhin vel hi nuam a ti ve hrim hrim a, a ṭanna lam pawh thlak thut mah se inkhin theihna a nih dawn phawt chuan a pawisa miah lo.

A chang leh kawng tlang ṭha reng reng reng hi zawh a’n phal lo thut a, chutah an han inkhing a. A chang leh mi dai-kawngkhar te amah ngeiin a va ṭhiat a, hmakhawsang aṭang tawhin chu lai hmun chu vantlang kawng a ni tiin ṭan a’n khawh zui nghal vei ṭhin. Hnam leh hnam chungchangah te, hmun hlui hauh theihna dan chungchangah te thil a hre hle bawk a.

A thil hriat avang chuan Fernworthy khaw mipuite pawh a tihnihlawh hle chang a awm a, a chang leh mipui do zawngin a khawsa a; an chawimawi thul, an deusawh thul; ani chuan a engti zawng mah chuan pawisak a nei lo. Tunah pawh hian inkhinna tur thubuai pasarih vel pâi chungin a nia khawlai a len ni.

A thubuai neih zawng zawng hi a sawi fel meuh chuan a sum neih hi a hmang zo titih mai ang. A sum neih a khawhral hunah chuan mi dang khawih buaina tur eng mah a nei tawh lo vang a, he lai vela mite tan pawh a kawl a nuam phian zawk maithei a ni. Inkhin buai leh dan leh dun chungchang tih lohvah chuan pa ṭha pui mai a ni vei roh va, a rilru pawh a chhe lo.

He mihring hi kan thiltih laiah a tel vena ka hmu pha lo hle a; mahse, he lai hnaia cheng vete chanchin pawh hrilh zel tur chea min chah avangin ka rawn sawi tel ve mai a ni. Tun lai vel hi chuan he pa hi chuan phûlrai vel hi a entlang ṭha tak mai nen a thlir ṭhin a, mi tâng tlan chhuak kha hmuh mai a inbeisei deuh a ni awm e. Van lam chanchin ngaihven mi a nih avangin entlang lah chu a nei ṭha phian lehnghal.

Hetia ama In chhung aṭanga a entlang nena a inawm nilên theih chuan a tihzia hle ang. Mahse ṭhenkhat chuan Long Down-a mihring luruh a laih chhuah avang leh an lainâte phalna a lak loh avangin Dr Mortimer-a hi khin a tum an ti deuh tlat mai. Khawsak pangngai a ninawm changin min chawkhlim ṭhin a, a ṭha ve viau.

Mi tâng tlan chhuak chanchin te, Stapleton-ate chhungkaw chanchin te, Dr Mortimer-a te leh Lafter Hall-a mi Frankland-a chanchin te ka hrilh ta bawk che a, a pawimawh ber lai Barrymore-a te nupa leh nizan lama thil thleng mak tak mai chanchin ka’n hrilh leh ang che.

A bul ṭan nan, Hall-a Barrymore-a a awm leh awm loh finfiah nana i thirhrui thawn chungchangah kha chuan awmzia a neih tak teh chiam loh thu ka sawi tawh kha. Sir Henry-a hnenah thil awm dan ka sawi a, ani chuan a tih dan pangngaiin Barrymore-a chu a ko lawk a, thirhrui lehkha chu amah ngeiin a hmuh leh hmuh loh a zawt ta a. Barrymore-a hnenah chuan, “Naupang khan nangma kutah thirhrui lehkha a pe che em?” tiin a zawt a.

Mak ti awm taka meng chung leh inngaihtuah deuh hlek chungin Barrymore-a chuan, “Pe lo. Pindan danga ka awm lai a ni a, ka nupuiin min rawn pe,” a ti a. Sir Henry-a chuan, “Nangmahin em ni chhâng leh ta?” tiin a zawt leh a. Barrymore-a chuan, “Ni lo, a chhân dan tur kha ka nupui ka hrilh a, a chhukpui ta mai a ni,” a ti a.

Tlai lamah chuan ama thuin Sir Henry-a chu a rawn pan a, “Sir Henry, tukina i thil min zawhna chhan kha ka hre lo hle mai. I rin tlak loh khawpin hna ka thawk ta palh a ni ang tih pawh ka hlau hlel lo,” a ti a. Sir Henry-a chuan chutiang thil eng mah a awm loh thu sawiin a lo thlêm dâi a. Chu bakah, London lama a thuamhnaw ṭhuitir a lo thleng ta bawk e tiin a thuamhnaw hlui eng emaw zat a pe ta nghe nghe a ni.

Barrymore-a nupui hi hmuhnawm ka tih zawng tak mai a ni. Nu ritsak deuh tak, tumtlang angreng lawi si, hriat loh ngah ve deuh mai, zahawm tak si leh duhtui em em mai a ni a. He nu aia lawm har leh ṭap har hi chu an vang ngawt ang; mahse, kan thlen zanin a ṭap tih thu ka hrilh tawh che kha. Chumi aṭang chuan a hmelah ṭahna hnuhma ka hmu ta fo mai. Thinlung chhungril taka lungchhiatna nasa tak a pâi ni ngei tur a ni.

Ka rin dan mai mai phei chuan a tun hma nun dik lo lungchhiatpui vang emaw, Barrymore-a hi hmel en aia a sual vang em maw ni ang aw te ka ti rum rum mai. Eng pawh ni se, he Barrymore-a hi ka lo ringhlel tawh ṭhin reng reng a, chung ka rinhlelhnate chu nizana thil thleng chuan a rawn nemnghet lehzual ta sauh a ni. Chuti mah ni se he thil hi thil te tham te zawng a ni miau mai.

Pa mu nghet teh chiam lo ka ni tih i hria a, he Inah phei hi chuan eng emaw chenah ralveng ang renga ka awm ve avangin ka mu hi ka nghet lo lehzual a. Nizan ti ila, tukin kha a ni ang chu, dar hnih vel khan ka pindan pal tlangtu pên thâwm dim tak hian min han tiharh a, ka tho thuai a, kawngkhar hawngin ka va bih a.

Pindan inkalpawhnaah chuan pa ruangâm sei tak, thim phei map map hi ka hmu a. Amah tak chu ka hmu lo; mahse, a thla ka hmu a, a kutah khawnvar a keng nghe nghe. Kawr leh kekawr a inbel a; mahse, a ke chu khuhtu a awm lo. A thla mai mah hmu ni ila a ruangam sei dan aṭang chuan Barrymore-a a ni tih ka hre mai.

A kal zâwiin a fimkhur hle a, a chet danah chuan sawi fiah thiam theih si lohvin thil sual ti a ni ngei ang tih a rin theihin chanchin ṭha vahvaihpui zawng a ni hauh lo vang tih a hriat theih tlat a ni.

Ka sawi tawh angin pindan inkalpawhna chu pindan zauah a chhuak a, chutah lehlam tan tlang turin a kal ngil leh ta zel a. Ka mithmuh phak loh a thlen thlengin ka en zui a, chutah ka tlân chhuak a, ka va zui ru a. Pindan zau hung kual ka va thlen chuan In thluang phei lehlama pindan inkalpawhna a lo thleng hman tawh a, pindan pakhat aṭanga êng lo chhuak aṭangin pindan pakhata a lut lai ka va hmu a.

A luhna vel pindan zinga a khawi mah chu luah loh leh bungraw awm lohna a nih avangin chutia a han pil bo ta pawh chu a mak tulh tulh a ni tih chu i hre thiam mai ang. Pindan chhung aṭanga êng lo chhuak chu che hlek lova a rawn ên chhuah dan pangngai renga a rawn ên chhuah avangin Barrymore-a chu khawi lai kilah emaw che hlek lovin a ding a ni ang tih ka ring a. Theih anga fimkhurin kawngkhar chu ka va pan a, ka va bih ru ta a ni.

Barrymore-a chu tukverh darthlalang zâwn chiaha khawnvar keng chungin tukverh bulah a kûn a. A hmel chanve chuan ka lam a lo hawi avangin beisei nei âwm taka phûlrai lam a thlir vawng vawng pawh chu chiang takin ka va hmu thei. Eng emaw chen chu urhsun takin a dinna hmunah chuan a ding a. Chutah, a hrawk ril tak aṭanga ri chhuak tih hriat takin a’n rûm a, dawhtheihna zawng zawng khawhral ta ni awm fahranin a khawnvar ken lai chu a timit ta nghal a.

Chu veleh kei chu ka pindan lamah ka tlân phei leh vat a, ka pindan ka thlen hnu rei lo teah fimkhur taka ke pên thâwm lo kir leh chu ka hre zui ta mai a ni. Chumi hnu rei deuh hlek, ka muhil ṭan siar siar tihah chuan kawngkhar kalhna han herh ri rap hi ka hria a, khawi lam aṭanga lo ri nge tih chu ka hre thei tawh lo.

Ka thil hmuh leh hriatte chu a awmzia ka hre pha chiah lo va; mahse, a mawngkhal kan la hâi thlen chu a ṭul ngeiin ka ring. Ka ngaih dan leh chhuidawn thil mai mai ka rawn hrilh lo che a, i mi chah angin ka hmuh hmuh ka’n hrilh phawng phawng mai che a nih hi.

Tukin zing khan Sir Henry-a chu ka titipui fe a, nizan thil tlawh chhanin eng emaw tih zâi kan rel; mahse, chumi lam thu zawng, tunah chuan ka sawi rih lo mai ang, ka lehkha rawn thawn leh tingaihnawmtu atan i khek rih ang.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » June 20th, 2018, 7:07 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 9
(Rozami Pachuau)

PHULRAI CHUNGPIK ZAWN A DE

(Dr. Watson-a lehkhathawn pahnihna)

Baskerville Hall,
Oct. 15th

My Dear Holmes,

He lai hmun ka thlen tirha thil awm dan ka lo hrilh tam tawk lo che a nih chuan chumi tha ba rulh nan chuan hei thatchhiat haiderin tunah ka rawn siam deuh tlut tlut mai a ni tih lo hre thiam ang che, tunah phei chuan chanchin hrilh tur che a rawn inhnawh tâwt leh titih tawh a nih hi. Ka lehkhathawn hmasa hmâwr bâwk nan khan tukverh bula Barrymore-a a awm thu vel ka rawn sawi a, tunah pawh hian ka thu rawn ziah tur hian a barakhaih ve ngei che chuan ka ring.

Ka lo suangtuah phak loh zâwng tak maiin thil awm dan a inher kual ta a. Eng emaw ti zawng chuan tun darkar sawmli leh pariat kalta chhunga thil thleng khan thil a tichiang viau tawh; a lehlamah thung chuan a tihnawk telh telh niin a lang ve thung. Mahse thil awm dan chu ka’n hrilh phawt ang che a, nangma’n ngaih dan i lo siam zui dawn nia.

Zan lama Barrymore-a ka hmuhna pindan chu a tuk zing tukṭhuan ei kham hmain ka’n endik a. Khaw thlang lam depa tukverh, urhsun taka a va belhbul khan danglam bikna pakhat a nei a, chu chu eng dang ni lovin phûlrai hnaih ber laia mi a nihna leh phûlrai hmuh awlsamna lai bera awm a nihna chu a ni.

He tukverh bul pawn lamah hian thing pahnih a ding a, chu thing pahnih ding inkara han bih tlang fuh chuan phulrai chu chiang takin a hmuh theih a, tukverh dang aṭang chuan phulrai chu a hmuh ve theih bawk nain a lang ve ruai chauh a ni.

Chuti a nih chuan Barrymore-a chuan phûlraiah chuan mihring emaw, eng thil dang emaw pawh a thlithlai a ni ang tih a rin theih mai. Kha mi zan kha a thim em avangin eng nge a va hmuh theih ang tih phei chu ka hre pha tawh bik lo. Keia ngaih ve dan chuan hmangaihna zungzâm te pawh chhui tel tur a awm niin ka hria.

Chuti a nih chuan a rûk a râla a pindan a chhuahsan thu leh a nupui lungchhiatna thil vel chu kan sawi fiah ve thei mai law maw ka ti deuh. He mihring sakhmel hian hralh a tla ve viau dawn nia a lan avangin thingtlang nula tu emaw chu lo zêm thlu ta mah se mak tih tur lam chi a ni lo vang. Ka thil thlir dan hian awmzia a nei ve mai thei nain a dik leh dik loh chu ka hre lo tawp tih pawh i hre zawk ang chu.

Barrymore-a khawsak dan mak tak mai hian chhan leh vang eng pawh lo nei se keia tana thil harsa ber mai chu tu mah hrilh lova mahnia pai ngawt ngawt mai hi a ni. Tukṭhuan ei khamah chuan Sir Henry-a chu ka titipui a, ka thil hmuh zawng zawng ka hrilh vek a. Ka rin aiin mak a ti lo zawk.

Ka hnenah chuan, “Zan lamah Barrymore-a hi a vakvel ṭhin tih chu ka hre tawh a, thil awm dan zawh chian ka lo rilruk ve reng asin. I sawi hun ang velah khan zan hnih zan thum chu pindan inkalpawhnaa a pên thâwm ka hre tawh a ni,” a ti a.

Kei chuan, “Saw lai tukverhah sawn zan tin a va inthâwi ṭhin pawh ni hmiang,” ka ti a. Ani chuan, “A ni maithei. Chuti a nih chuan kan zui ru ang a, eng thil nge a va tih kan en zui thei ang chu. I ṭhianpa, Holmes-a kha he laiah hian lo awm ve ta se engtin nge a tih ang aw?” a ti a. Kei chuan, “I rawt ang chiah khan tiin Barrymore-a hi a enthla ve ngeiin ka ring,” ka lo ti a.

Sir Henry-a chuan, “Chuti a nih chuan kan zui ru dawn nia,” a ti a. Kei chuan, “Mahse, kan thâwm a hre ngei ngei ang,” ka ti a. Ani chuan, “He pa hi a beng a ṭha vak lo va, chu bâkah, a ṭul miau si a, min hriat tak leh min hre mai a ni ang chu. Zanin chu ka pindanah kan pahnihin kan meng ang a, a chet hun kan nghak dawn nia,” a ti a. A hmel han en reng reng pawhin sipai mut leh ngawt mai aia tih tur eng emaw a’n nei ta chu a hlim tih a hriat mai.

Sir Henry-a hian In sak thiam, Sir Charles-a rawihte kha a va be pawp a, he In pawh hi an sâwi danglam fê dawn ni awm tak a ni. Kan ṭhianpa hian an chhungkaw ropuina chhawm zel tur hian a ban phâka awm zawng zawng chu khawih leh vek a tum niin a lang. Plymouth aṭangin In chhung cheimawi thiamte leh bungsiam ṭhenkhat chu a chah chho ṭeuh tawh mai.

He In hi a chei ṭhat zawh hunah chuan a tikimtu atan nupui chiah a mamawh dawn a ni, chu lah chu a hmeichhe lamin aw an pawh chuan thil harsa lo tak mai tur niin ka ngai. Kan ṭhianpa chet dan ka hmuh hian ‘nula atchilh’ tih ṭawngkam awmzia pawh hi hre ve ta ruai ruaiin ka inngai.

Mahse, hmangaihna dik leh thamna ei ching mihring zawng, he khawvelah hian buaina tâwk lovin a kal rei thei ṭhin tak tak lo. Kan ṭhianpa hmangaihna khawvel tuifinriat pawh a fâwn buai vêl mêk a, amah lah chu a lungni lo em em mai lehnghal.

Barrymore-a chungchang kan sawi hnu khan Sir Henry-a chuan kal chhuah tumin a lukhum a’n ban a, kei pawhin ka’n ban ve nghal zat a. Chutah, “Watson, i lo kal ve dawn elo?” mi’n ti a. A mitmeng chu phivawk hmu mitmeng ni berin ka hre mai. Kei chuan, “Phûlrai i tlawh dawn leh dawn loha thu a ni mai ’lawm,’ tiin ka chhang a.

Ani chuan, “Dâwn e, ka tlawh dawn,” a ti a. Kei chuan, “Chuti a nih chuan thu pek ka hmuh dan chu i hria alawm. Zar buai che chu ka hreh teh nain Holmes-an zui zel tur chein min ti a, phûlraiah lek phei chuan nangmaha tei hauh lo turin a tih che kha,” ka ti a.

Nêlawm taka nui chung hian Sir Henry-a chuan ka darah a’n dawm a, “Ṭhian duhtak, Holmes-a chu fing teh mah se he lai vela ka awm ve hma khan he laia ka thil tawn tur hi a hmu kim bik tlat lo a ni. I hre thiam em? Mi dangte’n an mamawh lohna hmunah che chuan awm i châk bîk hauhvin ka ring lo. Keimah chauhvin ka kal tur a ni,” a ti ta tlat a.

Chutia a’n tih takah chuan ka dinhmun chu a duhawm ta lo hle mai. Sawi leh tur dapa ka inkhâp buai hlan chuan a lenvah tiang a hawl a, a chhuak ta daih mai a ni. Mahse ka mit hmuh phak lova a kalna tur a nih chuan eng chhuanlam mah a ṭha tawk thei lo reng reng tih ka’n hriat hnu chuan ka inthiam lo ta riau mai a. I hnenah lo kir lehin kan ṭhianpa chu eng vanduainain emaw a tlakbuak palh ta tih rawn sawi ṭul ta thut mai sela ka thin a na dawn lutuk a ni tihte ka’n ngaihtuah a.

Tlai luat a awm tak tak lo vang e ti chungin ka tlan chhuak ve ta vat mai a, Merripit House lam hawiin ka kal ta tih pawh hrilh i ngai kherin ka ring lo. Theih tawpa chakin ka um zui a, chutah kawng peng ka lo thleng a, kawng dik lo zawh hlauvin rei lo te ka inkhâp buai hman. Chutah tlâng bâwkah ka chuang chhuak a, phûlrai zau tak hmuh theihna hmun ka han thleng a.

Ka awmna aṭanga leipui fing khat dawn laiah chuan phûlrai kawngah Sir Henry chu a awm a, a kiangah chuan hmeichhe pakhat a awm a, Miss Stapleton lo chu tu dang an ni lo vang tih pawh a hriat mai. An chet dan aṭang chuan eng emaw ti chen chu inhriat thiamna ṭha tak an nei tawhin thu haw lam leh kal lamte pawh an inhre tawn ang tih chu a hriat mai; intiam lâwk lo chuan chutiang hmunah an inhmuh a rinawm lo viau.

Kawngah chuan thupui vai ni awm takin an kal dun a, a hmeichhia zawk chuan leilung dan pangngaiin ṭawng a chuh ni awmin ka hria, a kut chu nasa teh chiam lo hian a lek zeuh zeuh a, a mipa zawk chuan ngun takin a ngaithla ni ngei tur a ni, vawi hnih khat phei chu rem ti lo tih entir nan a lu a thing nghe nghe.

Lungpui phên aṭang chuan ka thlir reng a, engti chuan ka ti dawn ni maw tih ka ngaihtuah ve reng bawk a. An bula zu kal a, an inkawm ṭha lai zu chawh buai chu thil tih chi loh tawp a ni a; mahse, ka hna chu englai maha amaha tlattir loh a ni tlat bawk si.

Ka awmna aṭang chuan an awmna chu a hlat deuh avangin Sir Henry-a chungah thil ṭha lo eng pawh lo thleng dawn palh ta se, eng ka zu ti pha hauh lo vang a; mahse, chu aia hnaia kal chu ka tan thil nuamhnai lo tak mai leh harsa tak mai a ni. Ṭhiante nula kawm lai lo zuk pawlh nut chu thih hnuah ruh a ram duhte ka ring rum rum mai.

Chutah Sir Henry-a leh nula chu kawngah chuan an ding a, thupui vai ni awm takin an inbe mawlh mawlh a. Chutih lai tak chuan kei chauh chu an inbe lai hmutu ka ni lo tih ka hre chhuak ta thut a ni. Boruaka thil hring han leu zak hian ka mit a la a, ka’n thlêk chian chuan Stapleton-a phengphehlep manna lên hring a ni tih ka hre mai a, amah pawh chu ka hmu nghal bawk. Stapleton-a chuan kei aiin kan ṭhiante pahnih chu a hnaih zawk fe a, an lam panin a kal zel ni pawhin a lang bawk.

Chutih lai vek chuan Sir Henry-a chuan Miss Stapleton chu a lamah a’n pawt hnai thut a, a kut chu nula hnungah a suih ta a; mahse, nula chu tâl chhuah tumin hnung lamah a er a, a mipa zawk a zu kun hniam pawh chuan a dan nan a kut pakhat chu a lek chhuak a. Rei lo teah an inṭhen phawk a, hnung lam an hawi ta a. Stapleton-a a lo tel ve tâk vang a ni ber mai. Stapleton-a chu thâwm dim hlek lovin an lamah a tlan phei a, an hmaah chuan helhkam lianpui nei ni awm fahranin a phe ta sek mai a.

Eng thil chiah nge thleng ka zu hre pha lo nain Stapleton-a chuan Sir Henry-a chu naupang hritlânna tham lek leka thu dêngkhâwngin a vawm ni ngei tur a ni. Sir Henry-a chuan han sawi fiah a tumin han phat a tum a; mahse, a puzawn hual thin tirim zualtu mai niin a lang. Chutah, thu pe aw tih hriat tak mai hian Stapleton-a chuan a farnu chu a hruai hrang a, Sir Henry-a pawh chu lunghnûr zetin a lo kalna lamah a kir leh ta a. A hmel han en mai chuan lungngaihna chirhdup dai tur a ang kher mai.

Chutia ṭhiante nula kâwm fâl lai ka lo hmu kiau mai chu ka thiam chiahin ka hre thei lo va. Tlang pangah chuan amah tâwk zawngin ka chhuk a, min han hmu chu tihngaihna hre chiah lo mah se a lawm lo tawp tih chu ka hre mai. Ka hnenah chuan, “Uai! Watson, khawi lam aṭangin nge i rawn far thlak chu le? Lo kal ve suh ka tih ka tih chung pawhin min rawn zui hram em ni pek?” a ti a.

A hnenah chuan thil awm dan ka sawi a, ka zui rûk thu te, ka zui loh theih loh thu te, thil awm dan ka hmuh ve vek thu te ka hrilh ta vek a. Ka'n sawi zawh chuan a thinrim tih chu ka hre mai; mahse, chiang taka thil awm dan ka sawi avang chuan a lungni lo duh ta bik lo va, za deuh maiin a nui ve ta hawk hawk a.

Ka hnenah chuan, “Hetiang rampalaileng te ang te chu hmun fianrial ṭha lutuk hi ni mai awm a nia le; mahse, lemchanna dawhsana nula rîm ang lek a lo ni pek a nih hi; ka to lo hle lehnghal vei nen! Khawi laiah nge ṭhuthmun i lo rem?” mi’n ti a.

Kei chuan, “Khi lai tlangah khian,” tiin ka chhang a. Ani chuan, “Uai, i ṭhutna chu tlar hnung lam a nih chu. A unaupa erawh chu tlar hma lamah asin a ṭhut. Min rawn chim buai vel kha i lo hmu em?” a ti leh ta a. Kei chuan, “Hmu e,” ka lo ti a. Ani chuan, “He a unaupa hi a thluak a buai deuh a ni lo maw?” a’n ti ngawt a. Kei chuan, “Chutiang pawhin ka lo ngai lem hlei nem,” ka ti mai a.

Sir Henry-a chuan, “A thluak a buai lo tiin chhia zawng ka chham hauh lo vang le. Nichin lawk thleng kha chuan mi pangngai ni ve maiin ka lo hria a; mahse, tunah chuan chutiangin ka ngai ta lo, ani a â lo a nih pawhin kei tal hi ka â a ni ngei ang. Watson, eng ka ti ta nge maw ni reng reng le? Hei ka kiangah eng emaw chen chu i khawsa ta a, ka hmeichhe hmangaih tan hian pasal ṭha tak ka ni thei ve ngai ang em?” a ti a.

Kei chuan, “I nih lohna tur reng reng ka hre lo,” tiin ka chhang a. Sir Henry-a chuan, “Khawvel thila ka dinhmun hi chu a duh lo hranpa hauhvin ka ring lo va, chuvangin, keima mimalah hian duh loh thil a nei a ni ngei ang. Eng vangin nge min ngainat loh chu le? Ka hriat theih chinah chuan a hmei a pain a tua mah hi an pawi ka la sawi ngai si lo; mahse, a kutzungṭang hmawr ka khawih pawh a ui hlur mai si a nih hi,” a ti mawlh mawlh a. Kei chuan, “Chutiangin a ui thu a sawi em ni?” tiin ka’n zâwt a.

Sir Henry-a chuan, “Chu mai bak pawh a sawi ṭeuh maw le Watson. He hmeichhia hi ka hmuhna a la rei lo hle a; mahse, ka hmuh phat aṭangin ka ta tur niin ka hre tlat a, ani pawhin chutiang chuan a ngai ve tih ka hre mai, ka bula a awm chang hian a hlim em mai.

"Hmeichhia hi chu an duh zawng thilah chuan an mitmeng hian thu a sawi ta ṭhin a, an mitmeng aṭang hian thua an sawi chhuah aia tam daih hi a hriat theih asin. Mahse, kan mihringa hian min thlahfal duh reng reng lo va, vawiin kha ka hun neih ṭhat ve chhun, a hnena eng ilo ka fah vena hun tur a ni a. Kan han inhmu pawh kha a hmeichhia chu a lawm teh asin.

"Mahse, hmangaihna lam chu sawi a duh tlat lo va, ka sawi tur pawh kha min dang thei se chu min dang ngei ang. He lai hmun hi hmun hrisel lo leh hmun hlauhawm a nih avangin ka tlansan theih phawt chuan a lawmawm lutuk tlat ang tih thu vel hlir a ni a sawi. Mahse, kei lahin amah ka hmuh tawh avangin leh amah chu he lai hmuna a awm tlat avangin chhuahsan thu-hlaah chuan ka hmanhmawh miah loh thu ka hrilh ve tlat mai si.

“Chu bâkah, he hmun hi min chhuahsantir a duh takzet a nih chuan inneih a, kan pahniha chhuahsan dan ngaihtuah mai se a dik ber ang tih thu ka hrilh a. Inneih ka duh thu pawh ka hrilh vel mek a; mahse, a nuṭapa kha a rawn inrawlh buai zo ta vek a ni. A thin lah chu a’n rim khawp a, a mit-te chu a meng de raw raw mai asin.

"He hmeichhe chungah hian eng thil nge ka tih tak? Ani lah hian amah ka ngaihvennate hi a luak khum lo chauh si zawng a nih hi. Mi ṭha chhungkua aṭanga lo chhuak ka nihna chhuang hian ka lo pawngpawrh lu deuh em ni? Min tibuaitu hi a nuṭapa kher chu ni lo se chu mahni lungdamna khawp deuh zân pawhin ka chhâng lêt ve ngam tur hi a ni ngai a; mahse, a nuṭapa a lo ni kher si.

“A farnu chu a remchan phawt chuan neih nghal mai pawh ka duh thu ka’n hrilh a, chu chuan a tithinrim khawlo chhe zo ta ni bawkin ka hria. A hmeichhia lah kan bulah a ding ve reng a, kei pawhin thinrim awka hriam deuh ka lo lên a ni ta ve ang. I hmuh angin an inhruai hrang ta a nih kha. A ngaihna hlawl ka hre lo. Watson, he thil awmzia hi min han hrilh fiahsak la, i lei chhiar sen loh ka ba na’ng e,” a ti ta ngawt a.

Thil awmzia chu sawi fiahsak ka’n tum ve bawk tak nain keia ngei pawh chuan a ngaihna ka hre lo lutuk a, ka lu a hai
chhe lo chauh a ni ve bawk si. Kan ṭhianpa nihna, sum dinhmun, a kum leh nungchang bakah a ruangâm zawng zawng chu han hnualsuat tur thil chi pakhat mah a awm hauh lo va, an chhungkaw vanduaina tawrh ṭhinte chu hnualsuat phah nan an hmang a nih chuan le, tu khaw sawi phâk a awmin ka hre thung lo.

A hmeichhiain eng mah sawi ve thei lo va, a nuṭapa ngawtin thu a sawi felsak chhên mai leh a hmeichhia pawhin hnial a tum miah lo te chu a mak hlein ka hre ringawt a. Mahse, chumi chawhnu lamah chuan Stapleton-a ngei chuan min rawn tlawh a, a chêt dan chungchanga a inchhir thute leh thil dangte sawiin thupha a rawn chawi a ni ber mai.

Thu chhia pai zui reng a rem lo tih entir nan zirtawpni lo thleng leh turah chuan Merripit House-a zanriah ei turin min sawm ta a. A kal hnu chuan Sir Henry-a chuan, “Kha pa kha a thluak a buai ka ti ngam ta hauh lo mai. Tukin zinga a mitmeng kha ka theihnghilh thei lo va; mahse, tun ṭuma a ngaihdam rawn dilna kha chu ngaihdam dilna zawngah a pawmnahawm ber awm e,” a ti zui a.

Kei chuan, “A khawsak dan kha a sawi fiah em?” tiin ka lo zawt a. Sir Henry-a chuan, “A sawi dan chuan a farnu hi engkima a engkim a nih âwm chu. Chu zawng a âwm ve viau, hetiang hmeichhe hlutna a lo man pha ve chu thil lawmawm takah ka ngai. Khawsa dun reng reng an nih avangin ani nen chauhva an khawsak pawh hian a khua a har ṭhin a, chuta ani han hloh lehzel chu a tan a hautak lutuk ang tiin a sawi a ni.

“Ka ngaizawng a ni tih a la hre lo a ni âwm a; mahse, a mit ngeia a’n hmuh takah leh a hnen aṭangin ka la bo mai thei a ni tihte a’n ngaihtuah chuan a ngaihtuahna a buai zo va, eng ang pawhin ani chu lo khawsa mah se kan ngaithiam tur a ni tiin min hrilh. A farnu anga hmeichhe hmelṭha, dam chhunga kawl churûk reng mai tuma rilru a lo pute chu a inthiam lovin mahni hma sialthlak a ti ve hle awm e.

"A farnu chuan pasal neia a chhuahsan dawn rau rau chuan keini ang, ṭhenawm hnai hi nei se a duhsak thu a sawi bawk. Mahse a tan chuan pasal neia han kaltir hrim hrim chu a harsa viau ang a, hun eng emaw ti chhung chu a inngaihtuah fim a, a intihpachan a ṭul ang. Thla thum chhung tal ka nghah a, chumi chhunga ṭhian kawma kawm a, hmangaihna changchawi hlek lova ka kawm theih chuan ani chuan eng mah a hnial zui dawn lo a nih âwm chu,” a ti a.

Stapleton-an a farnu a keipui sahauh hlurna chhan chu chutiang vel chu a ni a, thil awmzia kan hre chiang ta e. Kan la duang hnawk zinga a zai ṭhenkhat chu kan chhui ta nual a, zai dang i chhui leh dawn teh ang. Chu kan thil chhui tur chu zana insût thâwm leh Barrymore-a nupui ṭap hmel leh amah Barrymore-a zan lama a vahvel thu kha a ni.

My dear Holmes, ka hna hi ka thawk chhe hranpa lo ti raw? Lawmpuina thu min theh chhuah dawn lo’m ni? Kan thil chhui leh tur phei hi chu zan khat thil thua kan chinfel a ni nghe nghe. Zan khat thil thua tifel angin ka’n insawi rawk a; mahse, a dik tawk lo, zan hnih a ni a, a zan khatnaah eng mah kan ang lo a ni chauh zawk a ni.

A zan khatnaah chuan zing dar thum thleng ṭhelhin Sir Henry-a nen kan meng a, thâwm eng mah kan hre lo va, a hautak kher mai. A tawpah phei chuan kan ṭhuthmunah kan muthlu ta ve ve a ni. Bei tidawng duh hlek lovin a zan hnihnaah chuan kan meng dun leh ta a. Khawnvar herh hniamin meizial kan zu a, hun a kal muang duh kher mai; mahse, kan hmaa thil lo thleng tur nia kan beisei chuan min tiphûr a. Kan nghak chhuak hram zawng a ni.

Zing dar khat a’n ri a, dar hnih a ri leh a, kan beidawngin kan bansan ṭep tawh tih chuan thawk leh khatah kan ṭhuthmunah kan ṭhu ngil zawt a. Pindan inkalpawhnaah chuan thil chîk ri kan hre ta tlat mai. Chu ri chu a ring lo hle a, rei lo teah hriat phak lohvah a liam ta a. Chutah Sir Henry-a chuan a pindan kawngkhar chu dim tein a hawng a, kan en zui ta a. Kan hmaa kal chuan pindan lai a lo thleng tawh a, keini pawh chuan zawi tein kan zui ta zel a.

Thâwm dim kan duh avangin kan pheikhawk kan phelh lâwk vek a, chuti chung pawhin thingphel chhuata ke kan han nghah dawn apiang chuan fimkhur takin kan ke kan nghat dê dê a, chuti chung pawhin thâwm chu kan la nei ta tho mai. Kan ṭhiana chu lo bengvar deuh se chu kan thâwm a hre ngei ngei ang.

Pindan kan va thlen chuan a hmaa ka lo hmuh tawh ṭuma a tih ang chiahin tukverh zâwnah khawnvar a lek a, tukverh darthlalang si rêt chuan a hmai a dah a, ngun takin pawn lam chu a lo thlir veuh veuh mai a. Tih dan tur eng mah kan sawi lâwk lo va, sawi lawk pawh a theih kher lo vang. Sir Henry-a chu inthlahrung hauh lo leh tîm eih lovin pindan chhungah chuan a’n pên lut ve pawp a.

Barrymore-an a lo hmuh chuan a thaw hawk mai. A hmelah chuan zâmna lo chu hmuh tur dang reng reng a awm lo. Sir Henry-a chuan, “Barrymore, he hmunah hian eng nge i tih chu le?” a’n ti a. Barrymore-a chuan, “Eng mah ka ti lo ka pu. Tukverh hi a inkalh ṭhat leh ṭhat loh enin zan tin ka thlithlai ve reng ṭhin a nia,” a ti a.

A hmel chu a chi-ai ti bâka han sawi fiah dan thiam ka châk hle mai. Hetah hian ka thu sawi kim loh han sawi zawk ka duh a, Baskervill Hall hi a chhâwng a ni a, tunah hian a chhâwng hnihnaah kan awm mek a ni. Sir Henry-a chuan, “In chhâwng tukverh hi maw?” a’n ti a. Barrymore-a chuan, “Ni e ka pu, tukverh zawng zawng ka thlithlai vek ṭhin,” tiin a lo chhang a.

Sir Henry-a chuan vin deuh hlek hian, “Barrymore, lo ngaithla teh. I lak aṭang hian thu dik phih chhuah kan tum tlat a, chuvangin, tâl buai duh suh. Sawi mai rawh! Kha tukverhah khan engnge i tih?” a ti ta a. Kan ṭhiana chu a mangang hlein a lang. A kut a nuai nawk nawk a, chutah, “Ka pu, eng pawi mah ka khawih lo. Khawnvar hi tukverh zawnah ka lek mai a ni,” a ti a.

Sir Henry-a chuan, “Engati nge tukverh zawnah hian khawnvar hi i lek kher?” tiin a zawt a. Barrymore-a chuan, “Sir Henry, chu zawng min zawt suh. Min zawt hlek suh. He thil hi ka thuruk a nih loh vang chauhvin ka hrilh thei lo che a ni. Keimah chauh lo, mi dang chu kaihhnawih ve thei se chu ka hrilh em em ang che,” a ti a.

Ngaih dan ka lo nei ve thar thut a, khawnvar chu tukverh hnuai lam biang aṭang chuan ka la a, “Hriattirna angrengin a keng a ni ang. Chhânna a awm teh reng emaw i’n en ang hmiang,” ka ti a. Khawnvar chu Barrymore-a tih ang chiah chuan ka’n lek a, pawn khaw thim lam chu ngun takin ka en a, chiang lo ruai hian thing dingte leh phulrai inpharh cham durh chu thla êng chiang mang lovah chuan a lang thei vuai vuai a.

Chutah hla deuh hlekah chuan êng a rawn de ta vê vê a, lawm avangin râwl ka chhuah ta hialin ka hria. Sir Henry-a hnenah chuan, “Saw, sawta saw le!” ka’n ti a. Barrymore-a chuan, “Ni lo, ka pu, saw chu eng mah a ni lo; awmzia a nei lo reng reng. Ka pu, ka thu sawi hi...,” a ti ta lawm lawm mai a.

Sir Henry-a chuan, “Watson, i êng ken lai kha tukverh vângtan zawng khan han thên teh aw. Saw, saw laia mi pawh sawn a vâng zawngin a thên ve chiah alawm! Zawnghnap, heti chung pawh hian inbiakna hmanrua anga in hman thu hi zêp i la tum ang maw? Han inpuang fai vek rawh le! Saw laia i lungrualpui saw tu nge ni a, eng thilah nge min lo phiarruk ni?” a ti ta khur khur mai a.

Barrymore-a hmelah chuan thlaphânna inlâr lovin luhlulna a rawn inlâr a, “Chu zawng ka chungchang thil a ni a, i chungchang a ni hauh lo mai. Ka sawi dawn lo,” a ti ve ta ngat a. Sir Henry-a chuan, “Chuti a nih chuan ka hnen ata i chhuak nghal hmiah ang,” a ti a. Barrymore-a chuan, “A ṭhat nasat chu ka pu, chhuahsan a ṭul leh ka chhuahsan anga a ni mai alawm,” a ti leh a.

Sir Henry-a chuan, “Chhuak pawh ni la mâkchhiatin a nia i kal ang ni. Zah nachangte hi hre ve ni ngai la chu zah ve âwm tak a ni. In chhungkua hi he In chhungah hian kum za chuang lo cheng tawh in ni a, nang lahin hei keimah min lo kher ru mek si a, man chhuak lo hlauh phei che ila ka nasa lo ngawt ang,” a ti leh ta a. Barrymore-a chuan, “Ni lo, ka pu, nang zawng ka kher hauh lo che, i tana thil pawi a awm lo,” a ti a.

Hnung lam aṭang chuan Barrymore-a nupui aw hian, “I chhiatna tur thil a ni lo,” a rawn ti ve ta bawk a. Barrymore-a nupui hrawl pui mai chu kawngkharah a lo ding to mai a. Thu chhe buaipui chu ni lo ila a hmel chu a nuihzatthlak ka ti ngei ang; chutiang nu tumtlang pui roh chuan shawl a bât a, pawnfen chhing angreng deuh a rawn fêng ve ṭut tlat alawm.

Barrymore-a chuan, “Eliza, kan chhuah a ṭul a ni e. A tawp kan thleng ta. I bungrua têl khâwm rawh le,” a lo ti a. A nupui chuan, “Karei maw, John, heti chen chen hi maw ka pawh buai tak che John? Sir Henry, keima thiam loh vek a ni, keimah vang vek. Ani hi chuan ti tura ka ngen ang leh ka tih angin thil a ti ve mai chauh a, thiam lohna eng mah a nei ve lo,” a ti a. Sir Henry-a chuan, “Chuti a nih leh han sawi chiang teh u! Thil awmzia hi eng nge ni?” tiin a zawt a.

Barrymore-a nupui chuan, “Ka unaupa khawngaihthlak tak mai chu phulraiah sawn rilṭâm dangchârin a vâkvêl a, he laiah keini kan awm si chuan chuti ngawta tluk hlumtir chu kan thei lo a ni. He laia kan êng lek lan hi chu chaw kan buatsaih peih tawh tih hrilhna a ni a, a êng rawn dêt ve saw chu chaw va pekna hmun tur min hrilhna a ni,” a ti a.

Sir Henry-a chuan, “Chuti i unaupa chu...,” a’n ti a. Barrymore-a chuan, “Ni e, tang tlan chhuak Selden-a, mi sual kha a ni. Ka thurûk a ni lo va, ka hrilh thei lo che u ka tih kha. Tunah zawng thil awmzia in hre ta a, nang kan phiarrûkna che a ni lo tih i hre tawh ang chu,” a ti ta a.

Ngawi rengin Sir Henry-a nen chuan kan inen a. Barrymore-a nupui chuan, “Ni e, ka pu, ka hming chu Selden ve tho alawm. Saw laia mi saw ka nau a nih saw. A tleirawl laiin a duh ang kan tihsak zel a, khawvel hi a duh dana a chhir kawih theih a, a nawmchenna hmun tur atana siam emaw tihna rilru nen a lo ṭhang chho va, duh duh ti theiah a inngai ta a ni.

"Chutah a lo ṭhang lian zel a, ṭhian sual a kawp a, kan chhungkua chu hmingchhiatna khurah hnûk lûtin ka nu pawh thin na ngawih ngawihin a siam a. Thil sual pakhat aṭangin thil sual dangah a pakai zel a, a tawpah phei chuan khaihlumna dawhsan tlansan tura hetia a tlan chhuah hial hi a ngai ta a ni. Mahse ka pu, keia tan chuan ani chu hmana naupang ka infiampui ṭhin, naupang sam kir bip bep kha a la ni reng tho mai.

“He laia ka awm tih a hriat vang hi alawm lung In aṭang pawha a chhuah. He laiah kei ka awm a nih chuan ka hlamchhiah mai thei dawn miah lo tih a hria a, zan khat chu rilṭam dangcharin he lai hi a lo vâk thleng hlawl a, amah ûmtute lah a hnung lawkah an lo kal ve si, eng nge ka tih ang? Kan lo hrâi puarin kan lo tuam hlawm a; mahse, ka pu, i lo thleng ta tlat a. Ka unaupa pawh chuan phûlraiah him zawkin a inring bawk a, a kal chhuak ta a ni.

"Zan khat kar danah hian tukverhah hian khawnvar kan va chhi eng ziah a, a la dam chuan ani pawhin êng a rawn dêt ve a, a tukah ka pasal hian ei tur a va hlui ta ṭhin a ni. A kal bo mai beiseiin nghakhlel takin kan thlir a; mahse, he lai hnaia a awm ve chhung si chuan kan ngaihthah thei lo a ni. Chu chu thil awm dan a ni a, felhlelhna a awm a, tawrh tur thilte a awm a nih chuan ka pasala chungah tla lovin ka chungah tla rawh se,” a ti ta a.

Sir Henry-a chuan, “Barrymore, hei hi thu dik a ni em?” a ti a. Barrymore-a chuan, “Dik e Sir Henry, a dik vek,” a lo ti a. Sir Henry-a chuan, “I nupui i hmangaih avang zawngin ka dem lo tawp mai che. Ka thu sawi kha chu theihnghilh leh vek rawh. In pahnih khan in pindanah kal ula, naktuk zingah he thil hi kan la sawiho leh dawn nia,” a ti ta a.

A kal hnu chuan Sir Henry-a chuan tukverh chu a’n hawng a, hla deuh takah chuan êng chu a la de vê vê a. Sir Henry-a chuan, “A saw ti ngam mak ka ti ngawt mai,” a’n ti a. Kei chuan, “A êng chhit saw he lai aṭang chauhva hmuh theih tur pawh hi a ni mahna,” ka lo ti a. Sir Henry-a chuan, “A ni maithei a ni. Saw lai hmun saw engtia hla nge ni ang le?” a ti ta thut mai a. Kei chuan, “Lungpui khawkrawk hmun bul vel kha a nih ka ring,” ka lo ti a.

Sir Henry-a chuan, “Mel hnih khat baka hla a nih loh chu,” a ti a. Kei chuan, “Chuti chen chen va ni suh,” ka lo ti a. Sir Henry-a chuan, “Barrymore-an chaw a va pek ṭhin chuan a hla teh chiam lo vang. He kan mi sual hian saw laiah sawn a lo nghak dawn a ni a; Watson, saw mihring saw ka va man dawn a ni,” a ti ta thut mai a. Kei pawh chuan chu chiah chu ka ngaih dan a lo ni ve bawk a.

A dik chauh chuan Barrymore-a te hian he thil hi anmahni duh thua min hrilh an ni lo va, a karin kan kar chhuak a ni ber zawk. He mihring hi khawtlang tan mi hlauhawm a ni a, mi rethei tirilṭam zawngin thamna dawng ve lo mah se hrawkhrui chhat zawnga khawsa a ni a, tu hian nge la vanduaipui ang? Kan tih tur kan tih loh avangin Stapleton chhungkaw zinga mi pawhin a tuar mai thei. Chu zawng, Sir Henry-a duh zawng han ni thei tur a ni lo reng reng.

Sir Henry-a hnenah chuan, “Ka lo kal ve ang e,” ka ti a. Ani chuan, “Chuti i puakruk han la la, i pheikhawk bun rawh. He mihring hian a êng chhit saw a tihmih hmain chhuak vat ila a ṭha ang,” a ti a. Rei lo teah pawnah kan chhuak a, thing buk chhe te te kârah chuan kan phei ta a. Zan khua chu a hnawngin a rim a thiang lo hle a, a chang changin chhum kârah thla a lo lang leh zauh zauh ṭhin a, phûlrai kan va thlen phei chuan ruah phingphisiau a tla seng seng a.

Sir Henry-a hnenah chuan, “Hriamhrei i pai em?” ka’n ti a. Ani chuan, “Ram chhuah tiang ka keng,” a lo ti a. Kei chuan, “Pa ngawltawt tak a nih avangin kan hnaih chilh thut dawn nia. A inrin hmain kan ṭhâwng thut tur a ni,” ka ti a. Sir Henry-a chuan, “Watson, he thil hi Holmes-an engtin nge a ngaih ve ang le? Sualna inlar hun zan khaw thim laia tei chhuah hi eng ang takin ngai ang maw?” a ti a.

A thu sawi chhânna ni âwm fahran chuan Grimpen Dûm hmun bula ri mak tak mai ka lo hriat tawh kha a lo ri leh ta hem hem mai a. Zan khaw reh laia chutia ri thûm chi leh ri nghawr chia a rawn bei ta mai chu a rapthlak duh kher mai. Sir Henry-a chuan ka kawr ban a rawn dawm a, a hmel a lo dâng sâwp sâwp a. Ka hnenah chuan, “Watson, chu eng nge ni mai?” a’n ti a.

Kei chuan, “Ka hre bik lo. He lai phûlrai vel awitu hi a nia. Vawi khat chu ka hre tawh,” ka lo ti a. Chutih lai chuan rûm ri chu a reh tawh a, a reh hian a reh vung vung a. Sir Henry-a chuan, “Uisathiam rûm ri a ni,” a ti ta phawng mai a. A aw han lawih chhiat dan aṭang chuan a zâm bechhe tawh tih ka hria a, ka thisen kal pawh a pawng ṭawlh ṭawlhin ka hre mai. Ka hnenah chuan, “He ri hi eng nge an vuah?” a’n ti leh a.

Kei chuan, “Tu’n maw vuah?” ka lo ti ve thung a. Ani chuan, “He lai vela chêngte hian maw le,” a ti a. Kei chuan, “Khai, hengho zawng, mi mawl te te an ni a, anni thuchang mai maite chu engahnge i lak thutak duh ang ni?” ka ti mai a. Mahse, Sir Henry-a chuan, “Ngawi rawh, Watson, eng nge an vuah chu le?” a la ti ta fo va. Chu zawhna chu ka kunpial thei lo tih hriain, “Baskerville Uisathiam rûm ri an ti alawm,” ka ti ta a.

Chu thu a’n hriat chuan Sir Henry-a chu a rûm nghat a, rei lo te a ngawi a. “Uisathiam zawng a ni mawlh ang; mahse, saw lai hla deuh tak aṭanga lo kal saw niin ka hria,” a ti a. Kei chuan, “A lo rik chhuahna lai chiah hriat hi a har khawp mai,” ka ti a. Ani chuan, “Thli tleh dan zulzui khan a ringin a ring lo tlat a ni. Kha lam kha a ni lo’m ni Grimpen Dûm hmun lam kha?” a ti a.

Kei chuan, “Ni e,” ka lo ti a. Ani chuan, “Chuti a nih chuan khi lai khi a nih khi. Watson, han sawi chiang teh, uisathiam rûm ri niin i hre ve lo maw? Naupang chhia ka nih tawh loh hi. Thu dik sawi te chu hreh ma ta hlek che,” a ti a. Kei chuan, “Ka hriat hmasak ṭum chuan Stapleton-a nen kan ni a. Ani chuan sava danglam deuh hrâm ri a ni ang e a ti ve thung asin,” ka la ti ta hrâm hrâm a.

Sir Henry-a chuan, “Ni lo, a ni thei lo, uisathiam râwl a ni. Chhei le! An thawnthu sawi ṭhin hi a lo dik em ni dawn ngai? A chhan leh vang hriat si loh thilah hian kan chan hi a lo chhe viau tak tak em ni chu le? Watson, an thawnthu sawi ṭhin hi i ring ve lo vang chu maw?” a ti ta sek sek mai a. Kei chuan, “Ring ve teuh lo mai,” ka lo ti a.

Ani chuan, “London khawpui aṭang kha chuan he thil hi thil nuihzatthlak tak a ni a; mahse, he laia han awm meuh chuan a dan a dang daih mai. Ka patea ruang bulah lah chuan uisathiam hniak a awm lehnghal! Thil awm dan hi a inhmu rem ve thlup vek mai. Watson, pa dawihzep ni chuan ka inhre hauh lo va; mahse, kha râwl kha chuan ka thisen a hmet khang lo chauh a ni, ka kut pawh hi han dek mah rawh,” a ti a. A kut chu kahpathir ban ang maia vawt a lo ni a.

Kei chuan, “Naktuk lamah zawng eng mah a ni zui lo vang,” ka ti a. Ani chuan, “Kha rûm thâwm kha chuan ka suangtuahna beng hi a chhuahsan leh lawk lawk tawhin ka ring lo. Eng nge kan tih tak ang le?” a’n ti a. Kei chuan, “Kan kir mai dawn em ni?” ka lo ti a. Ani chuan, “Teuh lo lutuk; he laiah hian kan mihringa rêk turin kan lo kal a, kan rêk ngei tur a ni. Ti rawh le, he phûlrai ramhuai hi zaninah hian an inlâr kim leh kim loh i han fiah vek teh ang,” a ti ta tlat a.

Thim zingah chuan zawi tein kan kal a, kan vêl chu tlâng bâwk khawkrawk angreng tak takin a bawl ṭuk a, kan hma lamah chuan kan êng hmuh kha a la de sêt sêt a. Thimthama êng de sêt sêt lam han pan ngawt mai pawh chu a bangbothlak duh kher mai. A chang chuan kan êng hmuh chu han hla tawlh tawlh vei hian ka hre ṭhin, a chang leh kan hma lawka awm angin kan hmu ve leh bawk ṭhin.

Rei deuh mai kan kal hnu chuan kan hnaih ta tak zet tih a hriat a. Khawnvar kan hmuh chuan lungpui keh kârah hian a lo inzep a, a sir tawna lung bang a awm tlat avangin thli pawhin a chhêm hlum miah lo va, chu bakah, Baskerville Hall lam aṭang lo chuan hmuh pawh a hmuh theih tawh meuh lo. Keini chu lungpui phênin kan tawlh phei zel a.

Kan va hnaih deuh pawh chuan chu khawnvar chu ngaihventu awm lova alh ve mai hi a ang hle a, eng emaw ti zawng tak phei chuan a lunglenthlak duh angrengin a mak angreng khawp mai. Sir Henry-a chuan, “Engtin nge kan tih ang?” a’n ti sê sê a. Kei chuan, “I nghâk rih ang. A êng chhit bul velah hian a awm ngei ngei ang. A phe vel ilo tal pawh hmuh tur a awm mai thei asin,” ka ti a.

Chu thu chu ka sawi zo hman awrh tih chuan amah chu kan hmu ta a. A khawnvar chhitna chhak lawk lungpuiah chuan a lo fu vang mai a, a hmel han en chuan thil sual tih châka rilṭam ngawih ngawih hmel a pu a. A khabe hmul ther fup mai leh a sam pheng tak mai te han hmuh a, a taksa balhzia te han suangtuah chuan tlang pang vela cheng, ramsa chhe chi ni ve mai awm a ni.

A hnuai lawka a êng chhit chuan a mit a han ên a, a mit chu ding lam leh vei lamah a lên zek zek reng a, ramsa dan chêp, sapeltute thâwm hre tawh si hi a ang kher mai. A lungmuang lo tawp a ni tih chu a khawnvar ênga a hmel ka en chuan ka hre mai a. Barrymore-an eng emaw ti taka êng a dêt kual dan kâwi hnih khat kan lo ti ve ta lo pawh a ni maithei a, a nih loh leh a awm a nuam lo ve mai mai pawh a ni maithei; mahse, lungmuang chuan a ṭhu lo tawp a ni.

Kan bihrûkna aṭang chuan ka zuang chhuak thut a, chutih rual rual chuan Sir Henry-a pawh a rawn zuang chhuak ve nghal a. Chu veleh kan mi sualpa chuan lunga min rawn vawm pahin ṭe tuar tuar chungin hmun him lam a pan a. Chutih lai kher kher chuan vanneihthlak tak maiin chhûm kâr aṭangin thla a lo chhuak a, kan hmaa mihring tlan chu kan ûm ta chiam mai a.

Puakruk chuan kan kap fuh thei ang; mahse, mi tlanchhe tawh hnu kah nan ka puakruk ka puanhnuai tlat si lo. Pa tlan chak ve tawk tak ve ve kan ni nain kan mi ûm chu kan ûm pha lo kher mai. Zan thla êngah chuan eng emaw chen chu hmu zui mah ila, lungpui karah a pil bo ta thuai a. Thaw hlawp hlawp chungin lungpui kan dawm a, kan ding dun ta rân mai a.

Kan dinna hmun kalsana In lam pan leh kan tum lai tak chuan thil mak tak mai pakhat a lo thleng ta tlat mai. Thla êng chuan kan awmna vel chu tlang piah lam aṭangin a rawn chhun ruih a, thla leh kan awmna inkar tlâng bâwk khawkrawkah chuan chiang deuh maiin mi pakhat ka han hmu a, eng mihring nge a nih erawh chu ka hre pha lo.

Holmes, he thil hi ka mitvâi leh hmuh sual thil a ni hlek lo tih lo hre mawlh teh. Chu ka thil hmuh chu ka dam chhunga thil ka hmuh dangte ang bawka chiang leh fiah a ni a. Ka’n hmuh phâk chinah chuan chu mihring ruangâm chu sang deuh leh cher deuh a ni.

Chu pa chu ke kâk deuhvin a ding a, a kut a kuangkuah a, tlemin a lu a kun deuh bawk a, chu lai ram vel chu hmun nuam tak a nih loh avanga lungchhe hmel a pu hial mai. Kan mi tâng tlan chhuak kha chu a ni lo chiang bawk, a chhan pawh kha pa tlan liamna aṭanga he mi ka hmuhna hi chu a hla tham a; chu bâkah, he mi hi chu a sang zawk fê bawk.

Mak tih luat vanga ṭê chhuak chungin Sir Henry-a chu ka’n kawhhmuh ve dawn a; mahse, kan inbengberek chhungin chu pa chu a lo pil bo leh hman a ni. Mihring ka hmuhna lamah chuan kal ka duh hle nain a hma lawka kan ui rûm thâwm hriat khan Sir Henry-a awm a la tinuam lo va, chuvangin, thil mak tawn tur dang zawnga han vah chhuah leh pawh a duh chiah lo a ni.

Ka mihring hmuh thar hawiher ni âwma ka’n chhuidawn, thunei hmel pu tak mai ni âwma ka suangtuahna hlimawm tak maite chu Sir Henry-a chuan min ṭawmpui ve thei ta lo. Ka hnenah chuan, “Tân In vengtu a ni tih hriat reng. Kan mihringa tlan chhuah hnu kha chuan tâng vengtu hlirin he phûlrai hi an luah tawh alawm,” a ti lekfang a.

A sawi dik maithei; mahse, finfiah deuh kher chu ka châk zek zek mai. Princetown khuaa mite hnenah mi tâng zawnna tur hmun vel kan han zawt a; mahse, min hrilh theih an nei mumal lo.

My dear Holmes, nizan lama kan chet dan chu chutiang chu a ni a. Hna ṭha tak ka thawk tih hi min lo hriatsak ve hram ang che. Ka thu rawn sawi tam ber hi chu thil ṭul lo a ni ngei ang tih ka ring; mahse, thil awm dan dik tak i kawl vek phawt a, chuta ṭanga a pawimawh i lâwr zui leh ka duh zawk a ni. Hma kan sâwn zel tih pawh hrilh che ila a pawiin ka ring lo.

Barrymore-a te chet dan pawh a awmzia kan hriain eng vanga hetianga che nge an nih pawh kan hre chhuak ta a, he lai dinhmun insuih hnawk hi chu tlem chuan kan phelh thâwl deuh chuan a lang. Mahse, kan phûlrai ber mai hi a awmzia kan la hre lovin a chin kan la hre thei ta hauh lo mai a, pahmei din chhuah hun tur nen beiseina chauh lo chuan eng mah kan la thlir ngam lo.

Lehkha ka rawn ziah leh hunah chuan he phûlrai pawh hi tlem chuan ka sawi fiah thei deuh tawhin a awmzia pawh ka rawn sawi kimchang thei tawh maithei a ni. Thil dang ber aiin nangmah ngei kha lo chhuk la chuan a fel vek maiin ka ring a, ka duh bawk a ni. He laia keimah deuh ngawt maia khawsak hi ka tan chuan a nuam lo tih pawh hrilh i ngai kher lo vang.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » June 21st, 2018, 7:40 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 10
(Rozami Pachuau)

DR. WATSON-A THIL CHHINCHHIAHNA
LEHKHABU PHEK ṬHENKHAT

Sherlock Holmes-a hnena ka lehkhathawn ka tar lang ta a; mahse, hetia ka lehkhathawn tar lan zel hi ṭha lo zawkin ka hre leh ta zawk. Chuvangin, ka hriat rengna leh ka thil chhinchhiahna bu aṭangin kan thu khel lai hi i chhui zui tawh teh ang. Dik chauh chuan thil lo thleng reng reng chu ka thinlung phêkah nawh reh huphurhawm khawpa nghetin a inziak a, chuvangin, ka hmaih tam teh chiam lo vang. Khai le, mi tâng tlan chhuak kan ûm vak tuk aṭang khan i chhui zui leh teh ang.

October ni 16 : Khua a duaiin chhûm leivak a zîng, ruah a sur seng seng. In leh a velah chhûm hlâwm a vak dêl dêl a, a changin a hniamin a sang leh ṭhin a, phûlrai velah pawh a zîng ve viau bawk. Tlâng bâwk pang vel a bawh kual leh reih ṭhin. In chhung leh pawn lamah pawh awm a nuam lo. Sir Henry-a lung a ngui. Thil ṭha lo lo thleng tur awmin ka hria a, chhungrilah ka rit ru tlat; sawi fiah thiam si loh min delh rittu hian min timangang zual.

Mahse, hetiang hi chu thil âwm ve tak a ni lo’m ni? Thil mak leh râpthlâk tling khawmin min hual vel vek tih hi tu phat rual mah a awm lo va, ngaih ṭha lovin let let mah ila ka thiam tho. Hall luahtu hnuhnung ber chu an chhungkaw anchhe dawnin a tlakbuak avangin a thi a. Chutah he lai thingtlang mite hian phûlraiah uisathiam ni awm tak, ransa hlauhawm leh mak tak an hmuh thu an sawi zûr ût bawk.

Keimah ngei pawhin uisathiam rûm thâwm ṭum hnih ka hre tawh. He thil hi zawng, thil awm thei a ni lo va; a awm a nih hlauh pawhin leilung pianze pangngai hrin zawng a ni lo vang. Chuti mah ni se kei zawngin ka awih dawn chuang lo, ka chhia leh ṭha hriatnain a phat thei lo. Duh leh Stapleton-an awih se, Dr Mortimer-a pawhin awih rawh se.

Eng thilah mah mi fate tluk lo mah ila puithuna âtthlak leh eng ilo mai mai ring lova mahni chhia leh ṭha hriatna thiang hman nachang ka hriatna lo hi chu induhna tur dang ka nei lo va, hei chauh hi chu ka vawng reng dawn. Mahse he ui mak tak, mei leh kât phuh chhuak thei an tih hi chu hrilh fiah thiam a ṭul tlat hun chu a la awm ang. Hetiang thu lawilo mai mai hi Holmes-a ngaihthlak peih chi a ni lo va, kei lah Holmes-a kaihza vengtu ka ni si.

Eng le khaw le, thu dik chu thu dik a ni a, uisathiam rûm ri chu ṭum hnih zawng ka hre tawh ngei alawm. Uisathiam chu a nih leh lo awm ta tak tak se chuan thil engkim hi a fiah-fai vek mai tur; mahse, chutiang ui hrawl chu khawiah nge a bihrûk ang a, khawi lama chaw nge a ei ang a, khawi aṭanga lo kal nge ni ta ang? Engati nge chhûn-lâwnah tu ma’n an la hmuh si loh? A eng ti zawng pawhin han sawi fiah dawn ila a har hle mai. Ramhuai anga han chan dawn pawhin a buaithlak tho va; ramhuai a ni lo han tih dawn lahin a chunga kan zawhna tarlante khi chhân dik thlap theih a ngai bawk.

He uisathiam chauh hi a la ni ta lo lehnghal. London khawpuia enthlatu, tawlailira chuang kha tu nge ni? Phûlrai hnaih lo tur khan tu nge Sir Henry-a lehkhaa vawm? Hmelma tih a rinawm zâwng leh ṭhian hnathawh a nih a rinawm zâwng a inchen reng bawk si. Kha lehkha rawn thawntu kha London-ah nge a la awm hemi hmunah hian a lo kal ve? Tlâng bâwk panga ka hmel hriat loh hmuh vuai kha lehkha ziaktu kha a ni thei ang em?

Ka mi hmuh kha phûng hmuha hmu vuai chauh mah ni ila he lai hnai vela ṭhenawm zinga mi hi chu a ni thei lo reng reng. He laia chengho hi chu ka kawm kim vek tawh a, a tu mah hi han ni thei tur a ni lo. Stapleton-a aiin a sang fe a, Frankland-a aiin a chêr zawk daih a, Barrymore-a lah chuan min zui ruin min rawn tlan hual hman dawn miah si lo; mahse, kha pa kha a la tlanchhe ve tho si a ni. London-a kan mi hmuh zawk khan min la zui ru ta zel a ang khawp mai. He mi hi hmuin man thei ila chu kan buaina neuh neuh hi a reh vekin ka ring tlat a, chumi ti tur chuan ka rilru ka siam ta a.

Ka thil tum rûk chu Sir Henry-a hrilh vek mai tur em ni ang? Nge a thup thei ang berin ṭhaa ka hriat dan chu ka bawh zui zel zawk dawn? Phûlraia kan thâwm hriat khan a thâ a la tikhur deuh reng a, chuvangin, hrilh buai ta lo mai ila, a rilru a hah nêp ang a, ka tih duh ka ti thei tho si ang. Tukina tukṭhuan kan kîlnaah tlemin hmarcha sawh kan bâwl hlek.

Barrymore-an Sir Henry-a biak a duh thu a sawi a, Sir Henry-a lehkha chhiarna pindanah lutin vawi hnih vawi thum chu awki sang deuhva an inbiak ka hria. Chutah Sir Henry-a lo dâkin mi rawn ko. Ka hnenah chuan Sir Henry-an, “Ama duhthua thil awm dan min hrilh vek hnua a puzawn kan um zui ta kha kan ti dik lo deuhvin a hria a, a lung a awi teh chiam lo a nih chu,” tiin a sawi.

Chutih lai chuan Barrymore-a chu hmai dâng lâp chung leh nasa taka insum chungin a ding. Sir Henry-a hnenah chuan, “Ka pu, ka thu sawi ka duhthawh lu deuh a nih chuan min ngaidam ang che; mahse, Selden-a in ûm tih tukina ka’n hria chu mak ka ti khawp mai. A ûmtu tur ka sawm belh loh pawhin kan ṭhian khan ûmtu a ngah tawk,” a ti.

Sir Henry-an, “Nangma duh reng vangin min lo hrilh ni la chu thil a danglam deuh tur; mahse, nangmah ni lo, i nupui khan kan kar luih tlat avangin min hrilh ta chauh a nih kha,” a ti ve thung. Barrymore-an, “Sir Henry, khati khan in tiin kan thu sawi avangin amah in ûm zui ang tih kha ka lo ring pha ngai lo reng reng,” a ti ve leh a.

Sir Henry-an, “Kha mi kha vantlang tan mi hlauhawm a ni a. Phûlrai velah hian In fâl tak tak pawh a awm nual a, kan mihringa lah tih tur leh tih loh tur sawi lâwk thei mihring a ni si lo. A hmel i hmuh phawt chuan chu chu i hre thiam mai ang. Mr Stapleton-a In te ang te hi han ngaihtuah la, amah mai lo chu han venga han humhim tur tu mah an awm hlei nem. Kan khung bo a kan tântir hma loh chuan khawi hmun mah hi a ralmuang lo,” tiin a sawi.

Barrymore-an, “Ka pu, tu Inah mah a lut luiin tu mah a tiralṭi lo vang tih ka sawi ngam e. He lai bial vel tan hian mi hnawksak a ni zui tawh reng reng lo vang. Sir Henry, rei lo te hnuah kan ṭhiana hi South America lam panin a kal dawn a ni. Pathian hmingin, phûlraia a la awm reng thu hi police hnenah chuan sawi lul suh u. He laiah hian a awm an ring tawh lo va, lawnga a kal theih hun nghakin a biru a ni. A awmna in sawi a, a chet dan leh a bihrûk dan in sawi vek dawn chuan ka nupui nen hian fihlim ngaihna a awm bik lo. Ka pu, police hnena eng mah sawi lo turin ka ngen tak meuh che a ni,” tiin a ṭahawh.

Sir Henry-an, “Watson, engtin nge i ngaih ve?” tiin min zawt. Keiin, “He ram aṭanga him taka a tlan chhuah chuan mipui tan a zangkhaithlak sawt dawn tihna a nih chu,” tiin ka chhang. Sir Henry-an, “Mahse, a kal bo hmain pawi a khawih hman ang em?” tiin min zawt zui. Chu zawhna chu, Barrymore-a chuan, “Ka pu, chutiang thil âwm ang lo lutuk chu engti kawng mahin a ti lo vang. A mamawh zawng zawng kan phuhrûksak vek alawm. Thil sual a tih vaih chuan a awmna a puangzar lekfang a ni mai,” tiin a lo chhang.

Sir Henry-an, “A ni khawp mai; mahse, Barrymore...,” a tih lai tak chuan Barrymore-a chuan, “Ka pu, Pathianin malsawm che rawh se. Ka lawm tak zet a ni! Selden-a hi an man leh vaih chuan ka nupui hian a lungchhiatna hi a tuar zo tawh kher lo vang,” tiin a lo pawtchat. Sir Henry-an, “Watson, rûkrûknaa tel ve ang hialah a nia ka inngaih ni; mahse, kan ṭhiana chu han mantir thei pawh kan nih tak loh chu ti raw? A nih leh, Barrymore, a tawk e,” a ti zui a.

Lawm thu chhumbung deuh sawi niah niah chungin Barrymore-a a kal sawn a; mahse, a ding a, “Ka pu, kan chungah i ngilnei em em a, chuvangin, theih tawpa puih ve che ka duh ang. Sir Henry, thil eng emaw ka hria a, a hma lama lo sawi tawh âwm tak hi a ni nain thubuai an chin fel hnua ka hmuh chhuah ve chauh a ni miau mai a. Tu mah ka la hrilh lo. Sir Charles-a thihna chungchang kha a nia,” a ti leh hnuhnawh.

Sir Henry-a nen chuan kan ding mar dun zawt a, Sir Henry-a chuan, “A thih dan i hria em ni?” tiin a zawt. Barrymore-an, “Hre lo ka pu, chu zawng ka hre lo,” tiin a lo chhang. Sir Henry-an, “Chuti eng thil nge ni?” tiin a zawt. Barrymore-an, “Eng vangin nge khatih hun lai khan dai-kawngkhar bulah a va kal tih ka hria a ni. Hmeichhe pakhat hmuh a duh avanga va kal a ni,” a ti.

Sir Henry-an, “Sir Charles-an maw hmeichhe hmuh a va tum?” tiin a zawt. Barrymore-an, “Ni e ka pu,” tiin a lo chhang. Sir Henry-an, “Hmeichhe hming chu?” tiin a zawt. Barrymore-an, “Ka pu, a hming chu ka hrilh thei lo che a; mahse, a hming lamtawi chu ka hrilh thei ang che - L.L. tih a ni,” tiin a chhang. Sir Henry-an, “Barrymore, he thil hi engtia i hriat nge ni?” tiin a zawt.

Barrymore-an, “Ih, Sir Henry, i patea khan khami tûk khan lehkhathawn a hmu a. Englo, lehkhathawn hi chu a hmu ṭhahnem ve reng reng ṭhin a; mahse, khami tûk kha chuan kha lehkha pakhat chauh kha a hmuh avangin ka hre chiang em a ni. Coombe Tracey aṭanga lo kal a ni a, hmeichhe kuta ziah a ni bawk,” a ti.

Sir Henry-an, “Tichuan?” a lo ti. Barrymore-an, “Ka pu, chu thil chu ka ngaihven zui ta lo reng reng a, ka nupui pheiin min hriat chhuahtir leh lo se chu ka theihnghilh zui hmiah ang. Kar hmasa deuh lawk khan Sir Charles-a lehkha chhiarna pindan a phiat fâi a; a thih hnuah kan la tifâi ta lo reng reng a; thuk hnung lamah khan lehkhathawn hâl hnu kan hmu a.

"A phêk chu a kâng ral ṭêp tawh a; mahse, a sir khat chu a lo la kâng ral lo va, chhiar theih a la ni nghe nghe. A thu belh ziahna (P.S- postscript)-ah chuan, “Khawngaihin, khawngaih takin, patling dik tak i ni bawk a, he lehkha hi hâl la, dar sawmah chuan dai-kawngkharah lo awm ang che,” tih a inziak a. A hnuaiah chuan a hming lamtawi, L.L tih a chuang,” a ti a ni.

Sir Henry-a chuan, “Chu lehkhathem chu i la kawl em?” tiin a zawt zui a. Barrymore-a chuan, “Kawl lo ka pu, kan han khawih chêt chuan a sawm ta vek a ni,” tiin a lo chhang. Sir Henry-a chuan, “Sir Charles-a khan he kut ziak ang vêk hi lehkhathawn dang a hmu em?” tiin a zawt a.

Barrymore-a chuan, “A, ka pu, a lehkhathawn hi ka ngaihvenpui lem lo va, he lehkha pawh hi lehkha dang awm lova a rawn mal thlen avang chauhvin ka lo chhinchhiah deuh mai a ni,” a ti. Sir Henry-a chuan, “L.L tih hming lam tawi han pu thei tur chu i hre mai lo maw?” tiin a zawt leh a. Barrymore-an, “Hre lo ka pu. He hmeichhia hi chu man thei ila chu Sir Charles-a thih dan hi kan hre fiah thei maiin ka ring,” tiin a lo chhang.

Sir Henry-an, “Barrymore, he thil pawimawh tak hi engti tiha han zêp khawtlai nge i nih ka hre thiam pha lo tawp mai,” tia a chhuahchhalh chuan Barrymore-a chuan, “Englo a nia ka pu, he lehkha kan hmuh chhuah hnu lawk hian keimahni kha Selden-a chungchangah kan buai phili zo ta a. Chu bâkah, Sir Charles-a kha kan ngaina ve em em a, hmeichhia nena inkaihhnawih theia eng ilo han hailan kha a sâwt vak si loh phei chuan...,” a’n ti dêk dêk a.

Sir Henry-a chuan, “A hmingchhiat phah ang tih i hlau a ni maw?” tiin a lo pawtchat a. Barrymore-a chuan, “Ka pu, thil ṭha zawk a inher chhuah ka ring lo a ni; mahse, tunah hian ka chunga i ṭhat êm avangin ka thil hriat zawng zawng sawi lova zêp ṭhen hi i laka thil sual ti-ah ka inruat tlat a ni,” a ti a. Sir Henry-a chuan, “A ṭha e Barrymore, i duh leh min kalsan tawh rawh,” tiin a kaltir.

Barrymore-a kal hnu chuan Sir Henry-a chuan ka lam lo hawiin, “Watson, he thil thar hi eng angin nge i ngaih?” tiin min zawt. Kei chuan, “A hma aiin a buaithlak sauh zawkin ka hre mai,” tiin ka lo chhang. Sir Henry-a pawh chuan, “Kei pawh chu chu ka ngaih dan a ni; mahse, L.L chu kan zawn chhuah vaih chuan he thil hi a fel duak dawn tihna a ni ve thung. A sawi duh palh hlauh chuan thil awm dan hre vektu pakhat kan hmu chhuak ta tihna a ni mai a ni,” a ti.

Kei chuan, “Eng pawh ni se, he thil hi Holmes-a i hrilh ve nghal vat teh ang. Ani chuan he thil hi a lo zawn rûk reuh reuh a nih ka ring tlat a ni. He laia a lo chhuk nghal vat loh phei chuan ka ngai ṭhelh duai ka ti ngei ang,” ka ti. Ka pindanah ka chho nghal a, he mi tûka kan inbiakna hi Holmes-a hnena thawn turin ka buatsaih nghal a. Holmes-a chu chutih lai vel chuan a buai nasa tih ka hre mai.

A chhan pawh Baker Street aṭanga a lehkha lo kal emaw, a thirhrui lo kal emaw chu tawi te te a ni a, ka thil hrilhte pawh a chhawr nahawm leh chhawr nahawm loh pawh a rawn sawi ngai reng reng lo va. Ka hna lam pawh min sawipui ngai reng reng lo. An intihhmingchhiat tumna thil a buaipui mek chuan a uaibet hneh hle tih chu hrilh kher ka ngai lo; mahse, tuna kan thu thar hawn hi chuan a chawk phûr thar lehin a ngaihven lo thei lo vang. He lai hnaiah a’n awm ve lo chu a pawi ka ti angreng kher mai.

October ni 17 : Vawiin chu ruah a sur nileng zak a; phûlraia kan mi tâng tlan chhuak, hetiang khaw vawta belh tur hulhiap nei lova a’n khûr kual vel tur ka ngaihtuahin ka khawngaih ngawt mai. A enga pawh lo khawih pawi sela, a sual man eng emaw chen chu a têl tawh a ang hle. He mihring ka’n ngaihtuah hi chuan tawlailira mi chuang ve pakhat leh thla ênga hmel hriat loh ka hmuh kha ka ngaihtuah. Kan thla êng lâwm mihring khan he ruah hi pâwnah tuar ve tak ang maw!

Tlai lamah chuan ka ṭhelrêt kawr ka ha a, phûlrai hnâwng takah chuan ka vakvel a, thil lungchhiatthlak pui pui hlir ka ngaihtuah. Ruah lah a bang thei si lo va, ka ṭhelrêt kawr khuh phak bak apiang a nan mai, thli a thaw hle bawk. Hmun dang pawh heti hi a nih chuan Grimpen Dûm hmun chu a nasa viau tawh ta ve ang. Tun ang huna Grimpen Dûm hmuna tlu lut palhte an awm chuan Vantirhkoh Gabriel-a aia tenau chuan an kai chhuak lo tawp ang.

Zan thla ênga kan che vel min lo thlirtu awmna Tlang Thim (Black Tor)-ah ka va chuang ve a, a chhîp rualrem lo takah chuangin hnuai lam phûlrâi chu ka thlir a, chhûm a zing chuai mai. Tlang Thim vei lam hla deuh hlekah chuan Baskerville Hall chhip zum pahnih a lang thei a, mihring sulhnu hmuh tur a vang kher mai. Hman zana kan mi hmuh sulhnu pawh ka hmu chhin lo reng reng.

Ka kir leh lam chu Dr Mortimer-an tawlailir khalhin min rawn ûm pha a. Ani hian ni tin min tlawh ziah a, kan chanchin pawh a ngaihven em em bawk. A tawlailirah ka chuang ve a, a uite bo a ngaihtuah thu min hrilh. A ui chu phûlraiah a tla a, a bo ta mai ni awm tak a ni. A hmuh leh mai theih thu te ka’n hrilh ve nual nain Grimpen Dûm hmuna sakawr tla kha ka rilruin a hre reng a, beiseina tak tak chu ka neihpui teh chiam lo.

Kawng bumboh taka kan inkhalh zel lai chuan, “Mortimer, thu danga lai chuan he lai vel mihring hi i hriat loh an tlem ngawtin ka ring ka ti,” ka’n ti phawng mai a. Ani chuan, “Hriat loh ka neih âwm pawh ka hre hlei nêm,” a lo ti ve mai a. Kei chuan, “Hmeichhe pakhat, a hming lam tawia L.L. tih hmang thei hriat i nei em?” ka’n ti a.

Rei lo te a’n inngaihtuah hnu chuan, “An awm lo. Heng lai velah hian mi vakvai, an chanchin leh an hming sawi theih loh an awm neuh neuh va, chu chu an nih nghal loh chuan. Ngawi lawk teh, Laura Lyons-i chu a awm a, a hming lam tawi pawh L.L. a ni; mahse, Coombe Tracey-ah a chêng,” a ti a. Kei chuan, “Tu nge a nih le?” tiin ka’n zawt zui a. Dr Mortimer-a chuan, “Frankland-a fanu a ni,” a ti a. Kei chuan, “Frankland putar duailova maw?” ka ti a.

Dr Mortimer-a chuan, “Ni chiah e. Lem ziak thiam Lyons-a, he lai phûlrâi vela ram lem ziak tura lo kal a nei a; mahse, mihringah pawh a ngawltâwt chi a lo ni kher si a, Lyons-a chuan a tlansan ta a ni; mahse, a tu thiam loh mah a ni bik lo. Mi sual upa deuh leh mi sual naupang deuh an intawng a, a kârah Laura-i a lo tlazep a, a mawh zawng zawng a phur ta a ni ber mai,” a ti mai a.

Kei chuan, “Engtin nge a khawsak?” tiin ka’n zâwt leh a. Dr Mortimer-a chuan, “A pa chuan sum tlem chu a pe awm e; mahse, inkhin a ṭul leh ṭhin avangin a pe tam thei bik lo vang. He lai vela mite’n an khawngaih a, Sir Charles-an sum tlem a pe a, Stapleton-an a pe a, keiin tlem ka thawh ve bawk a, khawl chhut lam hna thawk thei tur chuan sumdâwnna bul kan ṭansak,” a ti a.

Dr Mortimer-a chuan kan thil chhui chinchang hriat a duh hle nain eng mah ka sawi tam duh lo. Kan thuruk ril ber ber thlenga mi tin mi tang hnena kan sawi a ṭulna ka hre lo tlat. Naktuk lamah Coombe Tracey-ah kalin Mrs Laura Lyons chu ka zawng chhuak ang a, eng emaw chu ka ang mahna.

Dr Mortimer-a nena tawlailira kan han chuang ta chu fing ka inti ve ngawt mai. Mihring lu-ûm chanchin hlir kan sawi zui a, titi dang kan sawi miah lo. Sherlock Holmes-a thlafêmah kum kha leh chen kha a lo thlawna hman ral ka duh bik loh avangin duh loh zâwng sawi pumpelh dan chauh chu ka thiam chhuak ve tawh. Vawiina thil thlengah chuan chhinchhiah tur dang pakhat chauh a awm tawh.

Mortimer-a chu zanriah eiin kan hnenah a châmbâng ve ta a, Sir Henry-a chuan zanriah ei kham chuan Dr Mortimer-a nen lehkha an deng a. Kei chu lehkhabu dahna pindanah awmin Barrymore-a chuan coffee min rawn pe a. Chu lai hun remchang chu chuhin Barrymore-a chu eng ilo ka zâwt ta a. A hnenah chuan, “I laina khawngaihthlak tak mai kha khawiah nge a awm tak?” tiin ka zawt a.

Ani chuan, “Ka hre lo ka pu. A kal bo tawh ka beisei, buaina chauh lo chu he laiah hian min rawn thlen lo reng reng! Ni thum kaltaa chaw ka va pêk ṭum tih loh kha chu a chanchin ka hre zui ta lo reng reng,” a ti a. Kei chuan, “Chumi ṭum chuan i hmu em?” tiin ka zawt a. Barrymore-a chuan, “Hmu lo ka pu; mahse, ka va kal leh chuan chaw chu a lo awm tawh lo,” a ti a.

Kei chuan, “Chuti a nih chuan chu laiah chuan, chutih lai chuan a awm ngei tihna a nih chu,” ka ti a. Barrymore-a chuan, “Ka pu, chu chu i ngaih dan tur ni awm tak a ni; mahse, mi dang pawhin an la thei tho va,” a ti ta a. Kei chuan, “Chuti mi dang an awm tih i hria a ni maw?” tiin ka zawt a. Ani chuan, “Awm e ka pu; phûlraiah hian mi pakhat dang a la awm a ni,” tiin min chhang a. Kei chuan, “Chu mi dang chu i hmu tawh em?” ka ti leh a.

Ani chuan, “Hmu lo ka pu,” tiin min chhang a. Kei chuan, “A nih leh engtin nge a awm tih i hriat theih si?” tiin ka zawt a. Barrymore-a chuan, “Chawlhkar khat kalta velah khan Selden-an min hrilh a ni. He mi dang pawh hi a inthup ve tho va; mahse, mi tâng chu a ni lovin ka hria. Dr Watson, ka duh zawng a ni lo kher mai, ka pu, ka hrilh dawt mai ang che, ka duh lo tawp a ni,” a ti a. A âwah chuan duhthawhna a lang tam hle mai.

Kei chuan, “Barrymore, lo ngaithla teh. He laiah hian i pu ṭanpui turin ka lo kal a, i pu chauh lo hi chu ka ngaihtuah lo. Eng nge i duh loh thil chu mi’n hrilh teh,” ka ti ta a. Barrymore-a chu rei lo te a’n tîm zawk a, “Heng thil vel hi ka pu!” tih pahin tukverh lamah a kut a’n phar ngawt a, “Khawi laiah emaw hian thil ṭha lo a inmung a ni, a dik lo tawp ka ti ngam. Sir Henry-a hi London lamah kir leh se ka lawm ngawt ang,” a ti ta mai a. Kei chuan, “Eng nge i hlauhthawnna chhan chu?” tiin ka zawt a.

Ani chuan, “Sir Charles-a thih dan kha ngaihtuah ta che! He phûlrai hi zanthimah tu’n nge pal tlang ngam ang? A thâwm chhuah ṭhin hi a rapthlak lo vem ni? He hmel hriat loh mi pakhat, inthup tlat, nghah nei ni awm tak hi ngaihtuah ta che! He mi hian eng nge a nghah? Eng nge a awmzia? Baskerville thisen pu tan thil ṭha a ni lo tawp ang. Sir Henry-a hian Hall enkawltu thar ruai thuai thuai se ka ti ngawt mai,” a ti ta bawrh bawrh mai a.

Kei chuan, “He hmel hriat loh hi eng nge maw a chanchin le? A chanchin sawi tur tlem tal i hre lo maw? Selden-a chuan eng thu nge a lo hrilh che? A bihrûkna hmun emaw, a thil tih emaw a hre mial lo maw?” ka ti a. Barrymore-a chuan, “Ṭum hnih khat chu a hmu tawh a; mahse, pa dehkhirh zet mai a ni a, a nihna puang tur lam thil eng mah a ti duh lo.

"A tirah chuan police a nih a’n ring zet nain mahni duh vanga awm a nih a ring leh ta zawk a ni. Eng vanga he lai vela awm ve nge a nih phei chu a hre lo na a, pa hawihhawm leh fel tak chu ni awm chuan a hria,” tiin min chhang a. Kei chuan, “Khawi lai hmunah nge a chêng a tih?” ka’n ti leh a. Barrymore-a chuan, “Tlang panga In hlui velah sawn,” a ti a.

Kei chuan, “Khawi lama chaw nge a ei chu le?” ka ti ta zel a. Ani chuan, “Râwlthar pakhat a kawl a, chu chuan a mamawh apiang a pe zel a ni. Coombe Tracey lam aṭangin mamawh ilo chu a lam ṭhin ni awmin ka hria,” a ti a. Kei chuan, “A ṭha e Barrymore. Engtikah emaw he thu hi kan la sawi zawm leh dawn nia,” tiin ka thlah ta a.

Barrymore-a kal hnu chuan pawn khaw thim lam chu ka bih a, eng vangin nge hetiang khaw duai hrehawmah hian bûk hlui ilo velah chuan mihring chu a tawm duh ang? Huatna avang a nih hlauh chuan a huatna thinlung chu a ti mai mai lo viau ang a, tum dang nei a nih chuan a tum a ruh viau a ni ang tihte ka ngaihtuah a. Zan tam a ral leh hmain he thil hi ka ching fel vek ang a, a hnawk lai tak hi ka hai lang ang tiin ka rilru ka siam ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » June 22nd, 2018, 8:39 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 11
(Rozami Pachuau)

TLANG THIM CHUNGA MIHRING

Ka thu ziah bung hnuhnung ber, kan chhiar zawh tak khan October thla, ni 18 thleng a huam phâk a, tun aṭang hi chuan kan thawnthu pawh a tawpna lam panin chak takin a tlan ti ila ṭawngkam ulh lua a ni lo vang chu. Ka ziah tawh chin baka thil lo thleng zui ta hi ka thinlungin a la hre chiangin ka rilruah a bei nghet khawp a, ka thil chhinchhiahna lehkhabu râwn hauh lo pawhin a indawtin ka la sawi zar zar thei ang.

Thil pawimawh tak tak pahnih, Laura Lyons-in Sir Charles-a hnenah lehkha a thawn tih leh, a thih zan chiah khan, a thih hun darkar vela inhmuhpuiah a sâwm tih ka hmuh chhuah aṭang khan chhunzawm mai ila a ṭha awm e. Chu lo leh pawh thil dang ka la hmu chhuak ta cheu, phûlraiah hian mi pakhat a awm ve a, tlang pangper vela hmanlai mite chênna bûk hluiah a khawsa tih ka la hmu chhuak ta.

He thil pahnih hre chung pawha thil awmzia ka la hâi lan theih loh chuan finna damdawi tlem leh huaisenna damdawi tlem azawng chu ka mamawh a ni ngei ang. Laura Lyons-i chungchanga ka thil hriat chu Sir Henry-a pawh ka la hrilh hman lo, a chhan pawh ka hriat zan khan Dr Mortimer-a kha tlai tak thlengin a lêng a, lehkha an dêng dûn tlat a ni.

Mahse, tukṭhuan einaah chuan ka thil hriat thar chu ka hrilh ve a, Coombe Tracey-ah ka kal dawn avangin a lo kal ve duh ang em tih te ka zawt nghal a. Lo kal ve mai chu a duh teh nain kan han ngaihtuah nawn leh a, mahni chauhva kal a dik zawkin kan ring leh ta a ni. Kan va intih thutak poh leh kan hriat duh chu ka hre teuh lo mai dawn niin kan ngai a, chuvangin, Sir Henry-a tel lovin ka va kal ta a.

Coombe Tracey ka va thlen chuan ka hmeichhe zawn awmna chu ka’n zâwt vel a. A awmna hmun a laili avangin a zawn pawh a lo hautak lo hle nghe nghe a. Ka mi zawn pindanah chuan hmeichhe pakhat, chhiahhlawh ni ngei tur hian puithu lo zetin min tir lut a. Ka luh veleh chuan hmeichhia, Remington lehkha chhutna khawl hmaa lo ṭhu chu hlim taka nui chungin a lo zuang tho va; mahse, hmel hriat loh ka ni tih a’n hriat chuan a ngui leh rawih a, a ṭhutna pangngaiah ṭhuin ka kal chhan min zawt ta a.

Mrs Lyons-i chu han hmuh phut chuan hmelṭha elkhen ni hian a lang a. A hmelṭhatna lo chu han sawi chhâwn mai tur ka hre lo. Mitmeng mawi tak, a mawi tawk chauhva buang paw chêk mai, a sam lah chuti bawk. A biang lah chu ṭhuangvuak deuh mah se a sam chuan a cheimawi em mai a, ṭhuangvuak lo aiin a mawi ang e tih hial tlak a ni a, ‘rose’ pangpar parh lai taka a chi insiamna dum neuh neuh ang mai a ni.

A hmel chu han hmuh tirh phat chuan a nalh tih mai bak chuan han hrilh fiah ngaihna vak a awm lo; mahse, ngun lehzual zawka han en chuan a hmel chuan sawisel a hlawh leh tlat. Mrs Lyons-i hmelah chuan dik lohna eng emaw a awm a ni ngei ang, a hmel put dan chuan ngaihno a bei lo tlat a. A hmui vun a pan lua nge, a mitmeng chu han en chian chuan a thîp lua nge, a hmel chuan bihchian a dawl tlat lo; mahse, hei zawng, ngaihtuahna mit nena thlirna a ni tawh.

Chutia ka kal chhan min han zawh takah chuan ka tih tur chu fimkhur taka tih chi a ni tih ka hre chhuak thar leh ta uai uai a. a hnenah chuan, “I pa nen khan kan lo inhmelhriat ve hlauh mai a,” ka’n ti ngawt a. Ka’n tih dan chu a zei lo hu hu riauvin ka hre leh hnuhnawh a.

Ani chuan diau lo zet maiin, “Ka pa nen chuan inzâwlna kan nei reng reng lo. Ka pa pawisa ka ba lo va, a ṭhiante lah ka ṭhiante an ni ve hek lo. Sir Charles Baskerville-a te ang te leh mi ngilnei dang te kha chuan min pui ta lo phei se chu rilṭamin ka vakvai thei hial ang chu,” a ti ta hmiah mai a. Kei chuan, “Sir Charles Baskerville-a chanchin kha a nia sawipui tur chea ka lo thawh ni,” ka ti a.

A lehkha chhutna khawl chûl vel niap niap pah chuan, “A eng chanchin nge ka hrilh theih ang che?” a ti a. Kei chuan, “Amah kha i hria ti raw?” ka’n ti ṭan a. Ani chuan, “A lei ka ba nasa hle tih ka sawi daih tawh kha. Tunah hian mahni ka lo inchâwm ve thei ta a nih ngai pawhin ka dinhmun chhiat avanga min khawngaih vang chauh a ni ngei ang,” a ti a.

Kei chuan, “Lehkha in inthawn ṭhin em?” tia ka’n zawh chuan chu hmeichhia chuan min han melh vat a, a mitmeng pawh a danglam daih mai. Vin rawl lek lek hian, “Chutiang thu chu eng vanga inzâwt ta mai nge kan nih?” a ti a. Kei chuan, “Hmingchhiat pumpelh nan ka’n ti mai maw le. He thil hi kan khawih phâk lova a awm hmain keima’n ka’n zawt thlithlai vel che a ni,” ka ti a.

Rei lo te chhung chu a’n ngawi a, a hmai pawh a dâng sawtin ka hre mai. Chutah intipaukhauh thar leh ta ni hian ka hre bawk a, ka hnenah chuan, “A nih leh le, ka chhâng nang che. I zawhna kha eng nge ni kha?” a ti leh ta a. Kei chuan ka zawhna ngai chu zawtin, “Sir Charles-a nen khan lehkha in inthawn ṭhin em?” ka ti a. Ani chuan, “A thilphalna leh a ngilneihna avangin a hnenah chuan ṭum hnih khat chu lehkha ka thawn ngei mai,” a ti a.

Kei chuan, “I lehkhathawn chu a ni leh thla i la hre reng thei em?” tiin ka zawt a. Ani chuan, “Thei lo,” ti ngawtin min chhang a. A hnenah chuan, “Amah kha i kâwm tawh reng em?” tiin ka zawt a. Ani chuan, “Kâwm tawh e, ṭum hnih khat chu. Coombe Tracey-ah hian a lo kal a. Pa tuallîm lo tak a nih avangin a chhuak zen zen lo a ni,” a ti a. Kei chuan, “Chuti i kâwm khât hle si a, lehkha i thawn khât hle bawk si chuan engtin nge ṭanpui thei tur chea i dinhmun khirh tak chu a hriatpui ve theih tâk che le?” tiin ka zawt a.

Chu ka zawhna chu hmân aṭangin a chhânna a lo buatsaih tawh emaw ni teh chek ni rang deuh mai hian, “Ka chan chauhzia chu mi ṭhenkhatin an hre nual a, chung zinga pakhat chu Sir Charles-a ṭhianpa, Mr Stapleton-a a ni a. Mr Stapleton-a hi mi ngilnei tak mai a ni a, a hnen aṭang bawk hian Sir Charles-a chuan thil awm dan a hria a ni,” a ti ta zel a.

Mr Stapleton-a hi, Sir Charles-a chuan mi hnena a thil pek hlantuah a hmang fo tih ka hriat avangin a thu sawi chu a dik ngeiin ka ring nghal a; mahse, Mrs Lyons-i hnenah chuan kan thu kal lai khelin, “Inhmuhpuia sâwmin Sir Charles-a hnenah khan lehkha i thawn tawh reng reng em?” tiin ka zawt leh ta a.

Chutah zawng Mrs Lyons-i chu thinrimin a sen leh ta ṭân ṭân mai a, ka hnenah chuan, “Ka pu, he thil hi thil inzawh âwm loh chi tak ni tak meuhvin ka hria,” a ti a. Kei chuan, “Ka pi, kei pawhin pawi ka ti ve tho; mahse, ka zawhna che chu min chhang la ka duh tho,” ka’n ti leh ngat a. Ani chuan, “Chuti a nih chuan ka chhang ang che; teuh lo mai,” a ti ta a. Kei chuan, “Sir Charles-a a thih ni khan i thawn lo maw?” ka’n ti zui leh sak a.

A thinrim hmel chu thlaphâng hmelin a rawn luah a. “Thawn lo” a tih pawh chu a ri hre lovin a hmui phun ka hmu a ni mah mah zawk. Kei chuan, “I hriat rengna a ṭha vak lo a ni maithei. I lehkhaa thu inziak ṭhenkhat chu ka la sawi chhawng thei hial ang. ‘Khawngaihin, khawngaih takin, patling dik tak i ni bawk a, he lehkha hi hâl la, dar sawmah chuan dai-kawngkharah lo awm ang che,’ tihte pawh a awm kha,” ka ti ta zel a.

Chu thu ka’n sawi chuan a thidang dawn ni hian ka hria a; mahse, thidang ta lovin a lo harh leh a, “Hawihhawmna an tih te hi khaw nge maw a awm zawh tak le?” a’n ti a. Kei chuan, “Ngawi rawh, Sir Charles-a kha pa hawihhâwm lo anga i ngai dawn a nih chuan i tisual duai ang. Lehkha kha a hâl ngei a; mahse, lehkha hi a chang chuan hâl hnuah pawh chhiar theihin a awm ve leh tlat ṭhin. I ziah thu chu i pha tawh lo’ng chu maw?” ka ti a.

Ani chuan, “Nia, ka ziak ngei alawm. Ka ziak e. Eng aiah nge ka’n phat ang? Ka tan eng nge a zahthlakna? Min pui turin ka duh a, a biaka ka biak ngei chuan min ṭanpui duhin ka ring a, mi hmu turin ka ti ta a nih kha?” a ti a. Kei chuan, “Mahse, a hun hi thlarau sual inlâr hun a va ni em?” ka’n ti leh hram a. Mrs Lyons-i chuan, “London-ah a kal dawn tih ka hria a, thla tam tak chhung a thang bo dawn alawm. A hma lahin ka remchang lo ve khanglang si,” a ti a.

Kei chuan, “Mahse, In chhunga inkawm lova pawna han inkawm kher te chu?” ka ti leh a. Ani chuan, “Tlangval Inah chutiang hunah hmeichhia an kal mai mai dawnin i ring em ni?” a ti ve thung a. Kei chuan, “A nih leh chuta i va kal chuan engtin nge thil a kal tak?” tiin ka’n zawt a. Ani chuan, “Ka kal ta lo,” tiin mi chhang ta mai a. Chu zawng mak ka ti deuh em mai a, “Mrs Lyons!” ka’n ti chiam ringawt a.

Mrs Lyons-i chuan, “Ka kal lohna chhan chu thil pawimawh tak vang a ni a, ka kal lo ngei bawk tih ka hrilh a che,” a ti a. Kei chuan, “Eng thil pawimawh avanga kal lo nge i nih chu le?” tiin ka zawt ta zel a. Ani chuan, “Chu zawng keima mimal thil a ni a, ka hrilh thei lo vang che,” a ti ta tlat a.

A hnenah chuan, “Chuti zawng, a thih hun lai vel chiaha inhmuhpuiah Sir Charles-a chu i sâwm a, a thihna hmuna inhmuhpuiah i sâwm bawk a, i hmun ruatah chuan a hunah i kal ta lo tih chu phat i tum lo maw?” ka ti ta khawl mai a. Ani pawh chuan, “Chu chu thil awm dan dik tak a ni,” a ti ve mai a.

Thawh pahin, “Mrs Lyons, i hriat zawng zawng i sawi duh loh avang hian mawhphurhna nasa tak i inbel a, i dinhmun i dah chhe hle bawk a ni. Police ka pun mai chuan i dinhmun hi a namai lo tih i hre mai ang. Sual kâi lo i nih ngat chuan eng vangin nge a tirah khan Sir Charles-a hnena lehkha i thawn thu kha zêp i tum reng reng?” ka ti a.

Ani chuan, “Aw ka sawi mai chuan dik lo takin thu tlûkna in siam ang a, hmingchhiat theihna thilah ka inrawlh palh ang tih ka hlau alawm,” a ti a. Kei chuan, “Anih leh eng vangin nge i lehkha chu Sir Charles-an tichhiain tiboral se i tih em em?” ka ti leh ta zel a. Ani chuan, “Lehkhathawn kha chhiar ngat la chu i hre thiam ve mai ang,” a ti mai a. Kei chuan, “Ka chhiar si lo alawm,” ka’n ti ve ngawt a. Ani chuan, “Chhiar âwm tak khan a thute kha i rawn sawi chhawng ve nual si a,” a ti a.

Kei chuan, “I thu belh chauh kha ka chhiar a, a lehkha tak kha chu ka sawi tawh angin a kang ral vek a, chhiar theih hek loh. Sir Charles-a thih nia i lehkhathawn chu eng vangin nge Sir Charles-a chuan tiriral se i tih em em tih zawhna bawk chu zawt leh che ila a ṭhain ka hria,” ka ti leh ta a. Ani chuan, “Chu zawng mimal thil a ni,” ti bawkin min chhang leh ta a. Kei chuan, “Chuti a nih chuan vantlang hriata inzawh mualpho i hlau deuh deuh tur a ni,” ka’n ti leh thla ngawt a.

Ani chuan, “Chuti a nih chuan ka hrilh ang che. Ka chanchin duhawm lo tak hi i lo hre ve tawh a nih ngai chuan inngaihtuah chiang mang lovin pasal ka nei a, ka inchhir zui hle bawk,” a’n ti phawt a. Kei chuan, “Ka lo hre ve alawm,” tiin ka lo tlip a. Ani chuan, “Ka pasal, ka ngei em em chuan min bawh buai ta reng a; mahse, danin ani chu thiam a chantir tlat si.

"Sir Charles-a hnena lehkha ka thawn lai vel hian pawisa sum eng emaw zah sên chuan ka zalenna hloh tawh neih leh theih dan a awm tih ka lo hria a. Chu chu ka tan chuan thil thlakhlelhawm ber a ni; rilru lungmuanna, hlimna, mahni inngaihtuahna; thil engkim a ni mai. Sir Charles-a kha mi thilphal a ni tih ka hria a, keima kâ ngei aṭanga thil awm dan a hriat chuan min pui duhin ka ring a ni,” a ti a.

Kei chuan, “A nih leh eng vanga kal ta lo nge i nih?” tiin ka zawt nawn leh a. Ani chuan, “Mi dang hnen aṭanga ka thil duh chu ka dawn tak avangin,” tiin min chhang ta a. Kei chuan, “Chuti a nih si chuan eng vangin nge thil awm dan chu Sir Charles-a hnena i hrilh leh loh?” ka ti ta zel a. Ani chuan, “A tuk zingah a thih thu chanchinbuah kha chuan lo hmu ta lo ila chuan ka hrilh leh ngei ang,” a ti ṭha ve mai a.

Ka hna chu a tâwp titih maiin a lang. Ka la tih theih awm chhun chu Sir Charles-a thih lai bawr vel khan inṭhenna tur thu an thlun leh thlun loh zawh chhuah a ni ta chauh mai. Mrs Lyons-i thu sawi chu dik anga ngaih loh theih pawh a ni lo. Baskerville Hall-ah va kal chu ni se, a kal nan tawlailir a mamawh ngei ang a, tawlailir a hman si chuan a thup theih lo vang. Eng mah ang chuang lova ka’n awm ta chu ka lung a awi lo hle a. Ka rawngbawlna hnaah ka hlawhchham leh ta ni berin ka hre mai.

Mahse, a hmel te, a awm dan te ka’n ngaihtuah chuan ka lakah thup a nei niin ka ring nghet tlat bawk si. Engati nge a hmai kha a dân? Engati nge a kara ka kar chhuah hma khan eng mah a sawi duh loh? Engati nge kha thil kha sawi a châk loh riau? Heng zawng zawng hrilh fiahna hi kan neih theih chuan a sawi ang ngawta thil pawi tham lo chu a ni hlek lo vang; mahse, han bawhzui leh chuan ngaihna ka hriat tawh loh avangin phûlrai vela lung bûk hlui vel va fan ka rilruk ta a.

Mahse, chu lam pana ka han inkhalh chhuah meuh chuan ka thil tih tur chu thil namai a ni lo tih ka hre chhuak a. Tlang pang velah chuan bûk hlui za tam a awm a, tlang pakhat panga bet khawm a nih loh avangin ram zau fe zawng ka dai dar a ṭul ta ve ang. Mahse, hman zan khan Tlang Thim chhîpah kan mihringa kha kan hmu a, chuvangin, kha lai vel kha zawn ṭan nan hmang ila a ṭha ang.

Ka mi zawn tawm rûkna ka hmuh hma loh chu ka bûk hmuh apiang chu ka zawn ṭanna aṭang chuan suar tluan ta hmiah hmiah ila; ka hmuh hunah chuan puakruk ngula ka nawr chhuah theih pawhin a kâ aṭangin thu dik nawr chhuak ila. Regent Street mipui zingah min tihawihai tawh a, tun ṭumah hi chuan phûlrâiah kan intawng chêk ang a, chuti mai zawng a ni tawh lo tih a hre ve ngei ang.

Chuti kher lo pawhin ka mi duh awmna bûk ka hmuh a, a chhuak vâk bo a nih palh chuan a lo haw thleng ka lo nghak ang a, duh leh ni thum pawh ka lo châng mai ang. Holmes-a hlawhchhamnaa ka hlawhtlin theih chuan ka tan beisei leh chuan tur dang a awm lo. London-ah lah khan Holmes kha a hlawhchham tlat si.

Tun thleng hi chuan vanneihna hi ka lama ṭang lovin ka duh loh lamah a la ṭang zar zar a; mahse, vanneih ni a lo thleng ve ta tlat mai. Chu vanneihna thu min thlentu chu tu dang ni lovin Mr Frankland-a ber kher a ni lehnghal. Ka kal tumnaa kal tur chuan Mr Frankland-a In, kawngpui bul lawka mi kal pelh a ṭul a, a In zâwn ka thlen lai chuan, “Chibai, Dr Watson, i sakawrte kha chawlh pein lo ṭhu lut la, zu no khat lek min dawmpuiin min han lawmpui teh,” a lo ti a.

A fanu a enkawl dan ka hriat chuan he pa hi ka ngaina thei hlawl lo va; mahse, ka tawlailir leh Perkins-a chu tirh haw thuai ka duh avangin ka tan thil remchang tak a lo ni ve bawk si a, zanriah ei huna ka haw tur thu Sir Henry-a lo hrilh tura ka chah zawh chuan ka tir bo ta nghal a. Frankland-a chu a inchhungah ka zui lut ta a.

Chek tlak tlak chung hian Frankland-a chuan, “Vawiin hi ka tan chuan ni ropui tak, chhinchhiah tlak tak a ni. Thil pahnih ka’n tih fuh pek chu. He lai velah hian Kumpinu dan hi a la hman tlak a, a hmang ngam mihring an awm tih hriattir ka tum tlat a ni. Middleton-a huana kawng kaltir phalna ka hmu a, a kawngkharpui aṭanga yard za leka hlaah kawng a kal tlang dawn a ni.

"A ṭha i ti ve lo maw? Heng kan milian buang thêng thûngho hi vantlang duh dan bâkin an khawsa thei lo tih hrilh hriat an hun ve tawh reng reng, pher phur hlawm hian! Fernworthy khaw mipui mimirin intithei taka hlimhlawp an bâwlna hmun, ngaw pakhat chu ka kharsak asin le.

“Heng mipui mimir nazawng hian an duh duhna hmunah ṭhu khawmin lehkhachhia leh saidawiûm ruakte hi an paih thei emaw an ti ngawt pek a, a dik hlek lo. Dr Watson, he thil pahnihah hian hnehtu ka ni asin. Hmanah khan Sir John Morland-an ama ram chhunga ransa ilo mai mai khâwina hmunah silai a tipuak a, dan lo a ni e tiin ka khing a, min hneh lo va. Chumi tih lohvah chuan tun ṭum hi ka lawmna ni awm chhun chu a ni leh mai,” a ti bawrh bawrh a.

Kei chuan, “Engti tiha chutia ti nge i nih chu le?” ka lo ti a. Ani chuan, “Ka pu, lehkhabu lamah bih la a chiang zaw mah ang. Frankland-a leh Morland-a, Court of Queen’s Beach-a an inkhinna thu kha chhiar tlak tak asin. Pound zahnih ka sêng a; mahse, thiam ka chang tho,” te chu a la ti ta deuh deuh mai a. Kei chuan, “I tan hlâwkna emaw, ṭhatpuina tel tur emaw a awm em ni?” tiin ka zawt a.

Ani chuan, “Teuh lo, awm lo ka pu. He thilah hian hlâwkna tur thil eng mah ka nei lo tih sawi theia ka awm hi chu ka induh phah hle asin. Vantlang hmakhaw ngaiin, khua leh tui dik tak ka nihna ang chauhvin a ni heng thil hi ka tih. Zanin lamah chuan Fernworthy khaw mipui chuan ka lim an hâl leh ngeiin ka ring tlat.

"An hâl hnuhnun ber ṭum khan an chet dan khap turin police ka hrilh tawh a, a police lam pawhin an dan theih loh avangin an hming a chhe hle nghe nghe a ni. Frankland-a leh Regina inkhinna thu hian mi beng zawng a verh dawn maw le. An mi hmuhsit ṭhat duh loh man hi an la têl ngei ang tih thu ka hrilh a, ka thu sawi chu a lo thleng dik dawn ta a nih hi,” a ti leh ta zeih zeih a.

Kei chuan, “Engti kawngka-in maw?” ka lo ti a. Ani chuan thil engkim hre vek hmel pu hian, “A chhan pawh a hriat châk em em thil hi ka hrilh thei reng a; mahse, kan mi suaksualho hi eng vang mahin ka pui dawn lo reng reng,” a ti mai a.

A thu sawi vel chu ka nin deuh avangin chhuahsan theihna remchang melhin ka lo her ka lo her tawh a; mahse, kan pu chu phurpui hle angin lang ila, a thil tih chu ngaihvenpui viau ila a lawm dawn hlek lo tih ka hmu tlang thuai a, “Ramsa ilo kah ruk chungchang a ni ngei ang maw?” ka ti ta sauh sauh a. Ani chuan, “He, he he, ka nau, chu aia thil pawimawh zawk deuh fe chu a ni a. Kan tâng tlan chhuak ve te ang te hi?” a ti a.

Kei chuan, “A awmna i hriat thu i sawi dawn chu a ni em lo vang chu maw?” ka’n ti a. Ani chuan, “A awmna chiah chu ka hre lo maithei a; mahse, police-in an man theihna hmun tur chu ka hria. Kan mihringa man tur hi chuan a chaw dawnna hmun hriat a, chhui zui mai tur a ni ang tih te hi i lo ngaihtuah ve tawh ngai em?” a ti ta mai a.

Thu dik kawngka a kik ṭan vel mek niin ka hre mai. A hnenah chuan, “A ni chiah alawm; mahse, engtin nge phûlraiah hian a la awm tih i hriat theih?” tiin ka zawt ta a. Frankland-a chuan, “A chaw kensaktu ka hmuh avangin ka hre mai maw le,” a ti a.

Barrymore-a khawngaih avangin ka rilru chu a lo ngui rawih hman a. He kan mihring philî peih tak maiin a duh duha a chinleh theih tura han awm chu a lungchhiatthlak em asin; mahse, a thu sawi chhunzawmna chuan ka rilru a tizangkhai leh ta hawk mai. “A chaw chu naupang pakhatin a kensak ṭhin a, ka In chung aṭang khian ka entlang hmangin a hmuh theih reng. A kawng zawh pangngai, a zawh hun bi dik takah a zawh ziah,” a ti ta a.

Hei lo liama vanneihna! Mahse, ka phûr ru em em a ni tih chu tihlan loh hrâm hrâm ka tum a. Barrymore-a khan mi dang awm ve pakhat chu naupangin a ei leh in tur mamawh ang ang a pek thu a sawi a, chu mi chu Frankland-a chuan mi tang tlan chhuak emaw a lo ti pek a nih chu. Heng thil te hi chu lo hre tawh ni ila chu ka buaina tur tam tak ka pumpelh ngei ang.

He kan putara lah hi ngaihsak lo leh a thu sawi awih âwm lo taka ka lan loh chuan a fel dawn hlek bawk lo. Chuvangin, a hnenah chuan, “Phûlrai vela tu pa chaw emaw hi a fapa tu’n emaw a kensak vel mai mai a ni ang,” ka tih khum ta a. Chutianga hnialkalhna thu chuan kan pu duhtak chu a tiṭawng ta zawt zawt mai a.

Phûlrai inpharh duai lam chu kâwkin, “Karei ka pu chu i timak! Saw lai Tlang Thim an tih mai saw i hmu em? Saw tlang piah lama tlang bâwk hniam deuh, hnim hling nei bawm chûk saw i hmu em? Saw lai saw phûlraiah hi chuan lung tamna ber hmun a ni. Saw lai hmunah sawn beram vulhtuin hmun a khuar ang maw? Ka pu, i thu han sawi chu zawh dawra suk tin aiin a inhmu lo zawk,” a ti a. Kei chuan thil awm dan hre chiang mang lovin ka’n sawi ve mai a nih thu ka hrilh a.

Chutia dawih zawk chan ka’n chang ta chuan a tiphur thar leh ta a, “Ka pu, ngaih dan ka siam hma hian ngaih dan siamna tur hmanraw ṭha tawk ka nei ṭhin tih hria la a ṭha ang. Kan nauva chu a thil fûn ken nen ka hmu fo alawm. A chang phei chuan ni khatah vawi hnih te ka hmu a. Ngawi rawh, Dr Watson, ka mit a dik tâwk lo nge, saw lai tlang pangah sawn thil chê awmin ka hre tlat mai,” a ti ta thut mai a.

A thil che va hmuhna chu hla tham fe a ni a; mahse, hnim hring kara thil dum deuh chu ka va hmu a. Frankland-a chuan In chung chhohna kailawn pan pahin, “Ti rawh ka pu, ti rawh. Nangma mit ngeia hmuin ngaih dan i siam ve dawn nia,” a ti a. A entlang, ke pathum nei a hûn chu In chungah chuan a lo chhawp sa diam a, hlim deuh mai hian, “Thuai, Dr Watson, thuai vat, tlang bâwk letliama a pil hmain!” a’n ti a.

A dara thil fun pu chungin naupang chhe zet hi tlang pangah chuan a chho bauh bauh va. Tlang chhip a’n thlen chuan ni thlarah a sakruang chu ka hmu zawk a, a vel chu thlek zak zak chungin tlang bâwk letliamah chuan a pil bo ta a. Frankland-a chuan, “Ka sawi dik em?” a ti a. Kei chuan, “Dik meuh mai. Kha naupang kha chuan thurûk a paipawn tel ni ngei tur a ni,” ka lo ti a.

Frankland-a chuan, “A thurûk ken chu police naran tan pawh suangtuah thiam a har lo hle ta ve ang; mahse, kei chuan kam khat pawh ka sawi dawn ṭhak lo, Dr.Watson, nang pawh thuruk venghim tur chuan ka duh che a ni. Kam khat tê pawh phuh chhuak hlek suh! I hre thiam em?” a ti a. Kei chuan, “I thu le,” ka lo ti mai a.

Frankland-a bawk chuan, “Zahthlak takin min nghaisa a nia, zahthlak tak a ni. Frankland-a leh Regina inkhinna thubuai a fel meuh chuan he ram hi a nghawr dat ang. Police ṭanpui tur hi chuan eng thil mahin min thlêm thlu dawn lo. Kan mi â phûnglûngho hian ka lim hâl lovin ka lei taksa ngei pawh hi hâl mah se kan police-ho hi chuan pawi an ti tawp lo vang. Ngawi teh, kal mai teh suh. He ni lawmawm tak lawm nan hian a bûra zu la awm hi chu i khiat zo law law teh ang,” a ti a.

Mahse, a ngamthlêmna zawng zawng hnehin ka haw kawnga ka chênna hmun thlenga mi va thlah a inhuamna pawh chu mawihnai takin ka hnial fithla thei ta a. A mit hmuh phâkah chuan kawng pangngai ka zawh zel a; mahse, rei lo teah kawng pangngai pensanin phûlraiah chuan, nichin lawka naupang pil bona lam pan khan ka liam ve ta vat a.

Thil reng reng mai chuan min duhsak ta viauvin ka hria a, he vanneihna hun hi ka bawhpelh vaih chuan ka beih nasat tawk loh vang leh thahrui ka neih tawk loh vang ka ti ngei ang. Tlang bâwk chhip ka han thlen chuan kawlkilah ni a her liam tawh a, hmun tam tak chu la hring cham dup mah se hmun tam tak chu a hlim ruih a. Piah deuhvah chuan Belliver Tlang leh Vixen Tlangte a to lurh a, hmuhnawm ti mi tan chuan hmuhnawm tham fe zawng a ni ta ve ang.

Chutih lai chuan khawvel zawng zawng chu a reh ruih hian a hriat a, thil che eih pawh hmuh tur a awm lo. Van sang takah chuan sava rang rik rek hi a thlawk liap liap a. Lei chung van hnuai luahtu awm chhun chu kei leh chu sava mai chu niin a lang hial mai. Chutia reh ta vung vung mai leh ram ruak inpharh duai mai chuan ka hna min ngaihtuahtir a, min tizâm lek lek a. Kan nauva lah chu hmuh tur a awm der si lo.

Mahse, ka hnuai lam, tlang bâwk keh karah chuan lunga sak bûk hlui eng emaw zat a ding kual a, chung zinga a laita ber chu khaw chhengchhiat nia han tawm hul theihna mai âwm hmel pu a ni ve nghe nghe a. Chu bûk hlui ka’n hmu chu ka hlim hle mai. Chu ngei chu kan mihringa tawmkûk chu a ni mawlh ang. A tawp a tawpah zawng ka tum ram ka thleng ve ta.

Chu bûk hlui pan chuan Stapleton-a phengphehlep veh fimkhur ang maiin ka va kal ṭhem ṭhem a, ka va hnaih deuh chuan mihring chênna a nih mai theih dan tur te hmuin lungawi takin ka hnaih zel a. A bang pawp lai, a kawngkhar atana an hman ni awm tak chhun chiah chuan lungpui karah kawng tih tlak loh fe a kal a. A chhung chu a reh ṭhiap mai.

Hmel hriat loh mihring chu a chhungah a tawm a nih loh pawhin phûlraiah a chhuak vâk a ni ang. Thil phurthlak deuh tawn tur awm anga a’n lan chuan ka thazâmte chu a lian sawt sawtin ka pheikhai pawh chu a zâng hlein ka hria a. Ka meizial ka paih a, ka puakruk kâwm vuanin kawngkhar lam pan chuan chak angreng fein ka kal a. A chhung ka’n bih chuan a lo ruak hiai a.

In chhung chu ruak mah se ka kal thlâwn chiah lo niin ka hria. He hmun hi kan mihringa chênna hmun chu a ni chiang mai. Ṭhelretpuan hian kawmawl an lo têl a, chu puan têl chu hmasang mite’n mut nana an hman ṭhin lung phêk chungah an lo dah a. Thuk ni awm ang berah chuan mei vâp a awm a. A bul lawkah chuan chaw chhumna hmanraw tlem a awm a, a bulah chuan balṭin chanvein tui a inhung bawk a.

Eng thil chi hrang hrang dahna emawa hman, bur ruak eng emaw zat chuan chu hmun chu eng emaw chen chu an luah tih a tilang a. Pindan thim deuh riai chu chiang lehzualin ka’n hmu thei a, pindan kila thir thlêng leh ‘spirit’ bur chanve la awm chu ka hmu zui a. Pindan laiah chuan lung phêk, dawhkan atana hman mai remchang angreng fe hi a awm a, chumi chungah chuan puana têl, thil têl tê tak tê hi a inhûng a, nichin lawka naupang dara bei ka hmuh kha a ni ngei ang.

Chu puana fun chu ka’n bih chiang a, chhang tlâwn khat, bawng lei ṭin (bawng sa ṭin, vawk sa ṭin, rosgulla ṭin, bawng lei ṭin - hrethiam maw? Pll) pakhat, theite um ṭin hnih a lo awm a. Chung thil ka’n dah thlak leh lai chuan a hnuaia lehkha inziak chu ka hmu ta thut a, pencil hian chhe deuh maiin : ‘Coombe Tracey-ah Dr Watson-a a kal deuh chiah,’ tih hi a lo inziak a. Chu thil chu mak ti tak maiin eng emaw chen ka thlêk a.

Heti a nih hrim hrim chuan Sir Henry-a ni lovin keimah zawk hi a nih dawn hi kan ṭhian inthup hian a lo enthlak. Amah tak chuan min zui lovin naupang kha min enthlaktir a, hei hi naupang thu thlen chu a nih dawn hi. Phûlrai vela ka awm chhung hian tu hriat loh emaw chuan eng thil mah ka la ti lo a ni hial ta ve ang. Kan hriat ve si loh, a ruka min ṭhamtu, eng emaw chu kan velah awmin ka hre deuh rêng a; lênah chuan kan in-awk hnawk tawlh tawlh ang a, a tawpah chuan min la hmet hlawm tawp ta ve ang.

Thu pakhat a thlen chuan thu dang pawh a thlen chêk ang tih rilru puin bûk chhung chu ka’n melh kual chiam a; mahse, he hmun mak tak luahtu nihna emaw, chet dan emaw, a thil tum emaw hai lang thei tur eng thil mah ka hmu ta miah lo va. Ka hmuh chhuah tak ber chu he bûk chhunga mihring chêng hi chuan eng ilo mamawh, khawsakna tur thil a mamawh tlem em em a, chaw leh tuisik chauh pawhin nuam a ti thei hle dawn awm mang e tih mai a ni.

Ruah sur nasat chang te leh a awmna bûk chung chhiatzia te ka’n hmuh chuan heti khawpa hrehawma khawsa peih chuan tum ruh tak a nei ang tih ka ring tlat a. He mihring hi kan hmelma chimawm tak mai nge ni ang a, vengtu ‘angel’ tih te pawh ka ngaihtuah rum rum. Chumi hre chiang zet lo chuan he bûk hi ka chhuahsan lo vang tiin ka intiam ta a.

Pawnah chuan khua a la thim fel chiah lo va, ni zung pawh kawlkil hmuh phak loh aṭangin a la inkâp chhuak a, khawvel chu pha leh pha lovin cheimawi a la rawn tum ta hram hram emaw ni chu aw, tih mai tur a ni. Grimpen Dûm Hmun rapthlak tak te pawh a lang lunglenthlak ve lek lek mai.

Grimpen khaw zâwn te, Baskerville Hall chhip zum te leh Stapleton chhungkaw chenna In te chu ka thlir vawng vawng a. Chutih lai kher kher chuan lengzem zai han phuah mai thiam te pawh ka châk ve rum rum mai; mahse, lungleng hman ka ni lo va, lunglen chu ka tan pawh thil thiang va ni suh. Hmel hriat loh lo thlen hun chu a hnai ve tial tial tih ka hre tlat.

Rei deuh hlek ka nghah hnu chuan a lo kal ta. Pheikhawka lung han pal rik ka hria a, a lo ri nawn leh a, a lo hnai tial tial zel a. Buk chhung pindan kil thim lai berah ka tawlh let a, ka puakruk phawrhin ka kau va, ka ipteah ka khung leh a, ka zen hnan ta a. Hmel hriat loh pa hmel ka hmuh zet hma loh chu inhmuhtir ka tum hlek lo va.

Ka thawm hriat chu a reh leh ta daih a, buk pawnah chuan a ding ni ngei tur a ni. Chutah a lo ri nawn leh a, buk lam chu a rawn pan a, buk kawngkharah chuan mihring hlim a rawn lang a. Ka aw hriat ṭhan em em mai hian, “Watson, tlai ni tla tur chu a mawi teh e maw. Buk chhunga tawm lovin pawnah lo chhuak la nuam i ti fe zawkin ka ring,” a rawn ti ta mai a!

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » June 25th, 2018, 7:07 pm

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 12
(Rozami Pachuau)

THIHNAIN PHULRAI A TUAM

Ka beng a dik ta lo emaw tiin eng emaw chen chu awm ngaihna ka’n hre mang lo va; mahse, ngaihtuahna fim ka’n hman chinah chuan ka phurrit zawng zawng chu a kiang ta duak a. Chu aw chang fek fawk, fiah tak mai chu he khawvel ram zauvah hian tu dang aw han ni thei a ni lo. Hlim lutukin, “Holmes! Holmes!” ka ti a. Ani chuan, “Lo chhuak la; mahse, i puakruk kha fimkhurpui ang che,” a ti a.

Bang pawpah chuan ka chhuak a, ani chu a lo ṭhu diai a, ka mak ti hmel a’n hmuh chuan nuihza hle ni hian ka hria a. Holmes chu a cher hle a, fur ruahtuiin duhtawka a chhut, ṭhâl ni sain duh tawka a hem zui leh tak ni awm fahran hian a hmel a pawr hle bawk a; mahse, a hmel leh mitmeng vel chu a fimin a la fel viau lawi a. A hmuihmul vel pawh Baker Street-a a awm lai ang maiin a la met fai a, a puanphawk ‘suit’ hakte pawh chu a la dek nalh angreng hle mai.

A kut vawn pah chuan, “Tun ṭum tlukin ka hmu che hi ka la lawm ngai lo,” ka ti a. Ani chuan, “Mak i ti bawk a?” a lo ti ve a. Kei chuan, “A ni ngawt mai,” ka ti mai a. Holmes chuan, “Nang changin kan inhmu hi mak i ti lo. Ka chawlh hahdamna hmun mi rawn zawn chhuahsak hi mak ka ti hle a, kawngkhar aṭanga pen sawmhnih vela hla ka lo thlen phei hi chuan a chhungah i awm tih ka’n hre lehzel a, mak ka ti tulh tulh mai a ni,” a ti a. Kei chuan, “Ka hniak aṭangin a ni maw?” ka’n ti chawt a.

Ani chuan, “Ni lo ve Watson; he khawvel mipui zingah hian i hniak kha ka chhui thei ngai pawhin ka ring lo; mahse, kei mi bum i tum deuh tak tak a nih chuan i vaihlo leina dawr sawn ang che; meizial, Bradley Oxford Street tih chuang ka hmuh kha chuan thenawm hnaivaiah ṭhianpa Watson-a a awm tih ka hre mai a ni. I mei bung pawh kha lai kawng sirah khan i la hmu thei ang chu. Buk chhunga i tleh luh dawnin i paih tih ka hre mai,” a’n ti a.

Kei chuan, “Dik chiah,” ka lo ti a. Holmes chuan, “I deh khirh dan ka ngaihtuahin he buk luahtu lo kir leh chu inring sain i lo nghak ang tih ka ring tlat alawm. An mi sual khawi hi ka nih i lo ring tak tak a ni maw?” a ti a. Kei chuan, “Tu nge i nih phei chu ngaih dan nghet tak ka nei lo va; mahse, hriat chian zawng ka lo tum nasa alawm,” tiin ka chhang a.

Holmes chuan, “Watson, ṭha lutuk! Engtin nge ka awmna hi i hmuh chhuah chu le? Mi tâng in um zan khan em ni min hmuh? Kha mi zan khan fimkhur lo takin thla êng thlârah ka ding ta hial a nih kha,” a ti a. Kei chuan, “Hmuh chu ka hmu ngei che alawm,” ka ti a. Ani chuan, “Tichuan, he bûk i lo thlen hma loh hi chu bûk zawng zawng i fang lawr ta vak mai a?” a ti ta zel a.

Kei chuan, “Ni lo ve, i nau kha kan hmu a, kha khan he bûk zawnna tur lam hi min kawhhmuh mai a ni,” ka ti a. Ani chuan, “Kan putar entlang nei kha a nih chiah chu. A entlang hmai, niin a chhun tlet ka’n hmuh hmasak ber ṭum kha chuan eng nge a nih ka hre mai lo asin,” tih pahin buk chhung chu a’n bih a. “Ha! Cartwright-an eng ilo a rawn keng a ni maw? Hei chu eng lehkha nge ni ta? Coombe Tracey-ah chuan i va kal maw?” a’n ti a. Kei chuan, “Kal e,” ka ti a.

Ani chuan, “Mrs Laura Lyons hmu turin maw?” a ti a. Kei chuan, “Ni chiah e,” ka lo ti a. Ani chuan, “Ṭha! Thil thuhmun kan buaipui ti ila a sual tampui lo ve. Kan thil hriatte kan thawh khawm chuan he kan thu khel lai hi kan hre chiang hle ta ve ang,” a ti a.

Holmes-a hnenah chuan, “He laia i lo awm ve chu ka lawm tak zet a ni. He mawhphurhna hi ka tan chuan a hautak lutuk deuh a, ka tlin lo thei tak ngial dawn. Mahse, engti tiha he laia lo kal nge i nih a eng nge i tih reng reng? An intihhmingchhiat tumna thil buaipuiin Baker Street-ah i awm reng emaw ka ti asin,” ka ti a. Ani chuan, “Chutichuan lo ngai la ka ti reng a ni,” a ti mai a.

Kei chuan, “Chuti chu min chhawr tho va, min ring tak tak chuang lo a nih chu! Holmes, chu aia u deuh chu phût ve ngam tur ka niin ka inhria,” ka ti ta a. Ka lawm lo viau mai. Ka hnenah chuan, “Watson, he thilah hian, thil dang kan buaipui tawh ṭhin a, i hlut ang bawkin ka tan chuan sawi fiah thiam phâk lohvin i ṭangkaiin i hlu a. Bum che anga ka lo lang a nih chuan min ngaidam ang che.

"A dik chauh chuan i hmakhua ka ngaih avang zawkin a nia hetia ka tih ni, i dinhmun hlauhawmzia ka hriat hian keimah ngei lo kalin thil awm dan rawn en fel hi ṭul tlatin ka hria a ni. Nang leh Sir Henry-a kiangah hian awm ve ta mai ila chu in thlirna tlang aṭangin khua ka chuan ve mai ang a, chu bakah, kan bitum tur mihring huphurhawm tak mai hi a inveng fimkhur thei vek bawk ang.

"Hall-a ka awm a, ka kal vel theih lohna tur hmunah kalin ka tih theih loh tur tam tak ka ti thei a. He thilah hian tu khaw hriat hlawh lovin ka tel ve a, a saseh hun tak tak a lo thlen chuan theih tawp ka chhuah leh thei tho si ang,” a ti a. Kei chuan, “Mahse, engati nge thil awm dan hi min hrilh ve duh hlek loh?” tiin ka chhuahchhâl zui ta zel a.

Ani chuan, “I hriat ve chu kan sawtpui dawn miah lo va, chu mai ni lovin ka tel ve tih hi an hriat chhuah phah thei hial zawk a ni. Min hrilh duh pawimawh eng emaw i nei palhin i ngilneihna avangin ka taksa nawm zawkna tur thil min tihsakte i tum dah ang tih a hlauhawm tlat a ni.

"Express pisa-a an naupang chhawr, Cartwright-a kha i la hre chawk ang a, kha kha ka kawl a, ka thil mamawh tlem te: chhang tlawn khat leh kawr nghawng fai min pe zel a ni. A bak eng nge ka la mamawh? Ka mit bakah mit hnih dang ka neih belh a, a zuan a zâng ṭha em em bawk,” a ti a.

Kei chuan, “Chuti ka thu rawn thlen zawng zawng kha tha chuang senna thil vek a ni maw!” ka ti a. Ka ziah laia ka induh phah vezia leh peih loh a chhuah changa ka hahpuizia ka ngaihtuahin ka lung a chhe zawk hial a, ka aw pawh a khur hlawk hlawk mai.

Holmes chuan a ipte aṭangin lehkha tel a phawrh a, “Thian duhtak, heta hi i thu rawn thlen kha chu ka keu ngun teh hlawm asin. Rem ka ruat fel khawp a, nikhat chauh a ni a rawn thang ṭhin. He thil mak tak maia i ṭhahnemngaihna leh i thluak i hman thiamna hi fak ta che mah ila ka pawih fak che a ni hlek lo vang,” a ti a.

Kei chu lunghnur deuh pawh lo ni ta ila, Holmes-a min chawimawina awka chuan ka thinrim a chawk reh a. Phûlrai a lo luah ruk ve thu pawh chu ka hriat loh a lo dik zawk niin ka hre leh ta a ni.

Ka thinrim hmel a kiang ta deuh tih a’n hmuh chuan, “Ti kha chuan a zia deuh. Khai le, Mrs Laura Lyons-i i tlawh thu chu mi’n hrilh rawh le. Coombe Tracey-a cheng zingah chuan ani chauh saw min pui thei âwm hmel pu nia han rin mai chu ka tan a harsa hlek lo a nia. Dik chauh phei chuan vawiinah lo va kal ta lo la chu naktuk lam chu ka va tlawh chhuak emaw ni ang ka lo ti deuh asin,” a ti ta zel a.

Chutih lai chuan khua a thim chhelh tawh a, boruak pawh a vawt ta deuh bawk a, buk chhungah kan tawlh lut ta a. Buk chhungah chuan kan ṭhu dun a, Mrs Lyons-i nena kan inbiakna thute chu ka hrilh a. Holmes chuan ngaihnawm a’n ti khawp a, duh tawk a ngah hmain vawi tam tak ka sawi nawn ta awm e.

Ka sawi zawh chuan, “Hei hi a pawimawh ber a ni. He thila ka rilru tibuaitu, a ngaihna ka hriat loh lai a rawn tifiah ta. He hmeichhia leh Stapleton-a inkarah hian eng thil emaw a awm tih i lo hre ve tawh emaw?” a’n ti zui a.

Kei chuan, “Chutianga eng thil emaw han tih em tur chu ka lo hre ve hlei nem,” ka ti a. Holmes chuan, “Eng thil emaw chu a awm tih hai rual a awm hlei nem. An inhmu ṭhin a, lehkha an inthawn a, an inhre thiam tawn em em a. He thil hian kan kutah hriamhrei ṭangkai tham tak mai a rawn dah ta a ni. A nupui hi la hrang thei phei ila...,” tia a sawi lai chuan, “A nupui a?” ka lo ti a.

Holmes chuan, “Eng ilo min hrilh hnem ta bawk a, ka’n hrilh ve hlek ang che. He hmeichhia, Miss Stapleton anga awm hi a nihna dik tak chu Stapleton-a nupui a ni,” a ti ta mai a. Kei chuan, “Chhe heu! Holmes, i hre chiang maw? Engati nge Sir Henry-a nen an inhmangaih a phal si?” ka ti a.

Holmes chuan, “Sir Henry-an he hmeichhia hi lo hmangaih ta pawh ni se tu dang mahin tuar lovin Sir Henry-a chauh hi a tuartu tur chu a ni. Sir Henry-a hian hmangaihna khurpuiah a zuan luhpui loh nan a veng tlat tih chu i hmu ve reng a. A farnu ni lovin a nupui a ni zawk tih ka’n sawi nawn leh ang e,” a ti leh mai a.

Kei chuan, “Mahse, engati nge hetia tlang bum tuma a phêt sek?” tiin ka zawt a. Holmes chuan, “Nula anga a nupui a awmtir hian a hmang ṭangkai thei zawk fe ang tih a hmuh phak vang a ni mai,” a ti leh mai a.

Stapleton-a chunga rinhlelhna ka lo neih rukte leh sawi fiah thiam si lohva mak ka tih riauna te chuan awmzia a nei dawnin ka hre ṭan a. He kan phengphehlep man tuma phe vel mihring, pa âwm nêm tê nia lang hi nui sen sen ṭhin mah se a thinlungah chuan tual thah thu a riak ve ṭhinin dawhtheihna tawp chin nei mang lo neiin eng ilo a duang thei ang tihte ka ngaihtuah a.

Holmes-a hnenah chuan, “Chuti chu amah hi a ni maw kan hmelma, London khawpuiah pawh min lo enthlatu kha?” ka ti a. Holmes chuan, “Chutiang chu niin ka zawl chuan min hrilh alawm,” a ti mai a. “Sir Henry-a hnena phulrai hnaih lo tura hrilhna lehkha kha a farnu hnen aṭanga lo kal a nia!” ka’n ti leh a. Holmes chuan, “Ni chiah,” a lo ti mai a.

Thil awmzia chu a lang ṭan ruai ruai e. Holmes-a hnenah chuan, “Holmes, he thil hi i hre chiang maw? Engtin nge hmeichhia hi a nupui a ni tih i hriat?” ka’n ti a. Holmes chuan, “Stapleton-a nena in inhmuh hmasak ber ṭum khan thu dik pakhat a lo hrilh ve palh hlauh mai che a, a hnuah vawi za tam a inchhir tawhin ka ring nghe nghe. Eng emaw hun lai khan North of England-ah zirtirtu-ah a lo ṭang tawh a.

"Zirna lam thil buaipuitu pawl an awm avangin zirtirtu hi chu chhui an awlsam viau a. Eng ilo tlemte ka’n zawt deuh zeuh zeuh va, thil lungchhiatthlak tak avangin chu sikul kilkawitupa; hming dang daih chu a nupui nen an pil bo ta daih tih ka hmu chhuak a. Chu pa pianhmang pawh chu min hrilh a, Stapleton-a pianhmang nen a induh chiah a ni. Chu sikul enkawltu hlu chu rannung ilo chanchin ngaihvenin a khawsa an han tih phei chuan ka duh ang ka hmu ta tih ka hre mai,” a ti a.

Khua pawh a thim sawt hle a; mahse, thim chhah bur zawng a la ni lo. Holmes-a hnenah chuan, “He hmeichhia hi a nupui a nih si chuan a khawi laiah hian nge Mrs Laura Lyons-i chu a lo zuan luh ve tak?” tiin ka’n zawt leh a.

Ani chuan, “Chu lai chu kan chan ṭhat vena lai a ni. Hmeichhia i va kawmna khan thil tam tak a tichiang a. Mrs Lyons-i chuan a pasal kha tum reng vangin a ṭhen tih ka lo hre hlei nem. Tum lawka inṭhen an nih chuan Mrs Lyons-i chuan tlangval nia a hriat Stapleton-a chu neih mai a inbeisei ngei ang,” a ti a.

Kei chuan, “Mrs Lyons-i chuan thil awm dan hre palh ta se?” ka’n ti a. Holmes chuan, “Kan tan hmeichhe ṭangkai tak a ni maithei a ni. Naktukah kan pahnihin va hmu ila a ṭha ang. Watson, i râl venna hmun aṭangin i tawm bo rei lutuk tawh lo maw? Baskerville Hall-a awm tur i ni asin,” a ti ta a.

Chutih lai chuan khua pawh a thim tawh a. Arsi tlem a lang nghe nghe. Holmes-a hnenah chuan, “Zawhna pakhat leh chauh Holmes. Nang leh keia karah chuan thup tur eng mah a awm lo va. He thil hi eng nge a awmzia? He kan Stapleton-a hian eng nge a duh?” a ti a.

Holmes chuan phun sep sep lek hian, “Watson, tual thah a tum a ni. Sulhnu nei lo leh khawngaihna tel miah lova tual thah a tum a ni. Thil awm dan kimchang min zawt bik suh. I ṭanpuina azarah ka lên hian a khuh kim teuh hle tawh a, ani pawhin Sir Henry-a hi a awhtir ṭêp tawh zawng a ni.

"Mahse, thil hlauhawm tak pakhat a la awm, chu chu kan inrin hmaa chet a thawh palh a ni. A rei berah ni hnih hnuah chuan he thil hi ka kutah liau liau a awm tawh ang, chumi hun lo thlen hma chuan nuin naupang dam lo a vil aia uluk zawkin i mihring venhim tur hi veng ang che. Vawiina i chet dan hian a hril chiang a; mahse, a kiangah awm reng la chu ka duh; Ngaithla teh!” a ti ta thut mai a.

Phûlraiah chuan ṭê thâwm râpthlâk tak mai a lo fâwn chhuak a, thlaphang mangang au thawm, rei tawk tak han thlûk kual vel ri a ni. Chu râwl ka’n hriat chuan ka thisen a khal lo chauhvin ka hre mai. “Karei, chu eng thawm nge ni ta ngai le?” ka ti a. Holmes chu a zuang tho vat a, buk kawngkharah chuan a va dak a, zan thim lam chu ngun lutuk maiin a va bih a, “Lo ngawi rawh, bengchheng suh,” a’n ti a.

A hma aia ring zawk mahin ṭê thawm chu a lo chhuak leh a. Hnai ta sawt leh khawngaihthlak ta sawtin ka hre mai. “Khawi lamah nge?” a’n ti a. A aw aṭang chuan Holmes-a, pa sehhel ber leh pa huaisen ber pawl pawh chu a zâm titih tih ka hre mai. Zan thim lam chu kawkin, “Saw lam saw niin ka hria,” ka ti a. Ani chuan, “Ni lo, saw lam saw a ni zawk!” a ti a.

Chutah ṭê thawm chu a lo chhuak leh a, chutia a’n thar thawh leh takah chuan a hlauhawm sawtin a lang a, a hma aiin tlemin a beu nêp tawh bawk. Holmes chuan, “Uisathiam kha a ni! Ti rawh Watson, lo kal rawh! Kan tlai luat vaih zawngin aw,” a ti a. Phûlraiah chuan Holmes chu a tlan a, ka ûm ve ta chiam mai a.

Kan hma lawkah chuan beidawng mangang au rawl a lo chhuak thut a, ri thum deuh dup hian a zui a. Ding chungin kan han ngaithla a. Thawm dang eng mah awm lovin zan chu a reh leh tlawk tlawk tawh mai. Holmes chuan a chal a dawm a, a ke a per ṭawk ṭawk a. “Watson, min lehkhalh ta. Kan tlai ta lutuk!” a ti a. Kei chuan, “Ni lo, a ni thei lo. A ni ngawt lo vang,” ka’n ti ringawt a.

Holmes chuan, “Ṭhaa ka rin dan pakhat angin ka’n ti ta lo kher kher a ka â ngawt mai. Watson, i awmna hmun tura i awm loh avanga thil lo thleng hi en teh! Mahse, a chhe ber pawh lo thleng se phuba chu ka la tho tho vang,” a ti bawrh bawrh a. Meng chiang mang lo chuan lungpui kar velah kan tlan phei a, thawm rapthlak tak lo chhuahna lam pan chuan tlang pangah chuan kan chhuk ta zel a.

Hmun pawng deuh kan chuan chhuah apiang chuan Holmes chuan beisei nei takin a vel chu a thlir ziah a; mahse, thil che eih pawh hmuh tur a awm si lo. Ka hnenah chuan, “Hmuh theih i nei em?” a’n ti a. Kei chuan, “Eng mah ka hmu thei lo,” tiin ka lo chhang a. Holmes bawk chuan, “Mahse, chu ngaithla teh,” a ti a.

Rûm thawm ring lo tak hi kan hria a. Kan vei lamah a ni ngei mai. Chu lai vel chu awih pang a ni a, lungpui leh hmun khawkrawk tamna hmun a ni a. Chu lai hmun khawkrawk takah chuan eng thil dum emaw hi a hmuh theih a. Kan va pan hnaih chuan ka hmu chiang thei ta tial tial a, mi pakhat, hmai lei nawr zawnga mu a ni.

A lu chu a delh titih a, a awm dan a dik lo tawp tih a hriat mai. A taksa pawh chu bingbilet tur ang mai hian a innawr tawm kual vel chiam a. Chuti taka awm ing euh chung chuan eng rûm thawm tak la chhuah thei ang maw tiin ka ngaihtuah a. Kan va thlen phei chuan chu pa kâ aṭang chuan eng thâwm mah a chhuak tawh lo.

Mi ruang chu Holmes chuan a zu dek a, a nawhalh ênga mitthi ruangâm kan han hmuh chuan thawk leh khatah dul aṭangin khawsikin min ṭhâm nghal chuai chuaiin ka hre mai. Kan mitthi chu tu dang ni lovin Sir Henry Baskerville-a ngei a ni. A thuamhnaw chu han ngaihhai theih tur a ni lo. Baker Street-a kan hmuh hmasak ber ṭuma a hak ngei kha a ni. Holmes-a nawhalh leh kan beiseina chu a thi rual vel chiahin ka hria.

Holmes meuh pawh a rûm kâwk a, thimthamah chuan a hmai pawh var pawp pawpin ka hria. Kut nuai nawk nawk chungin, “Kan mi nunrawngpa chuh! Nunrawng hmelchhe lutuk! Holmes, he thil lo thleng avang hian ka inthiam thei tawh ngai lo vang,” ka ti a.

Ani chuan, “Watson, nangmah ai chuan kei hi dem tur ka ni zawk. He thil hi fel fai taka zawh kher ka tum a, ka mi buaipui chuan a thih phah ta a nih hi. Hei baka thil lungchhiatthlak hi ka hnathawhnaah ka la tawng ngai lo; mahse, engtin nge he phûlraiah hian a chhuak vak lui ang tih ka hriat bik ang?” a ti mawlh mawlh a.

Kei chuan, “A ṭê ri kan han hre lehnghal a! A ṭê ri ber mai kha! Kan chhan thei lo chu a ni ta si a! He uisathiam nunrawng lutuk hi khaw nge a awm chu le? Saw lai lungpui bul velah sawn a la tawm sen reng pawh a ni mahna. Khaw nge Stapleton-a pawh hi? Hemi mawh hi chu a phur ngei ang,” ka ti a.

Holmes chuan, “A phur ngei ngei tur a ni. A duh loh pawhin kan bel lui tho tho vang. An pafa (?) in a tihlum a, pakhat chu thil hlauhawm, hmuh thiang lo hmu nia a inhriat avangin a thi a, a naupang zawk chu inchhanhim tuma a tlanna lamah a tlu hlum a. Tuna kan tih tur chu uisathiam leh a pu inlaichinna finfiah hi a ni. A thawm kan hriat mai loh kha chu finfiahna kan nei miah lo. Sir Henry-a lah hi a tluk vanga thi a ni ngei si. Mahse he mihring hi eng ang pawhin fing verther mah se ni dang a tlak leh hmain ka thu hnuaiah ka dah tho tho,” a ti ta a.

Mi ruang karchehin lungawi lo deuhvin kan ding dun a. Kan thawh hahna zawng zawng rulh nana mi ruang kan han kil ta mai chu kan lung a awi lo dun kher mai. Thla a lo chhuak ta bawk a, kan mi khawngaihthlak tak tlukna bul lungpuiah chuan chuangin phûlrai lam chu kan thlir a. Hla deuh takah chuan êng a de sêt sêt a. Chu êng chu Grimpen lam aṭanga lo dê a nih avangin Stapleton chhungkaw chenna hmun a ni ang tih a rin theih mai a. Chumi lam hawi chuan ka kuttum ka’n lek a, “Eng vangin nge kan va man nghal mai loh ang?” ka ti a.

Holmes chuan, “Kan thu buai hi a la fel tlat lo. Kan mihringa hi a tawp thlengin a fing verther tlat a. Kan hriat hi chu ṭangkai bawk mah se kan finfiah theih chin hi a pawimawh zawk a ni. Chet fuh lohna pakhat chauh kan neih pawhin kan mi sual khawi saw a chhuak mai ang,” a ti a. Kei chuan, “Eng nge kan tih theih le?” ka ti a. Holmes chuan, “Naktuk lamah tih tur chu a tam ang. Zaninah chuan kan ṭhianpa tan khawvela tih tur hnuhnung ber chauh kan ti thei tawh a ni,” a ti a.

Mi ruang lam chu kan pan leh a. Mi ruang han tluk kawih dan vel ka’n hmuh ngawt pawh chuan ka mittui a parawl ṭeuh mai. Holmes-a hnenah chuan, “Holmes, ṭanpuitu kan pun a dik ang. Hall thlengin puak phei a ngai ang a, chu zawng kan pahnih chauha tan chuan a harsa ang. Uai, i rilru a dik ta na nge?” ka’n ti a.

Chutih lai chuan Holmes chu mi ruang chungah a kun a, vai ṭawng ni awm tak hian a chiar ta nawk nawk a! Chutah a lo tho chhuak a, ka kut vuanin a’n lâm kual hlek a, a nui hawk hawk bawk a. He mihring hi Holmes-a, ka ṭhianpa, pa invawng zo tak mai leh nui zen zen lo kha ni lovin, a kawr ang ha mi dang an nih ka ring rum rum mai. Ka hnenah chuan, “Khabe hmul! Khabe hmul! He pa hian khabe hmul a nei!” a ti chhuak ta a.

Kei chuan, “Khabe hmul a?” ka lo ti a. Holmes chuan, “Sir Henry-a a ni hauh lo, a ni lo tawp, kan ṭhenawm, mi tang tlan chhuak kha a ni!” a ti ta a. Hmanhmawh fe hian mi ruang chu kan han kai let a, thla êngah chuan a khabe hmul chu a lo kawh suang mai a. A mitmeng duhawm lo tak te, a chal nalh lo tak te chu lungpui bula khawnvar ênga ka hmuh ngei kha a ni. A hmel ka’n hmuh chuan thil awm dan ka hre fiah ta uar uar a.

Sir Henry-an Barrymore-a hnena a thuamhnaw hlui a pek thu kha min hrilh a. Barrymore-a chuan Selden-a hnenah a lo hlan chhawng leh ta tihna a ni mai. Pheikhawk, kawr, lukhum; Sir Henry-a thuamhnaw vek a ni. Thihna hi chu lungchhiatthlak teh meuh mah se he mihring hi chu thi tura belruat a lo ni ve laklawh tawh a, a zia tak a awm. Thil awm dan chu Holmes pawh ka hrilh ve nghal a.

Holmes chuan, “Kan ṭhianpa chuan a thawmhnaw hi a thih phah ta a ni. Sir Henry-a pheikhawk kha Hotel-ah a bo va, uisathiam hnim atan an lo ru a nih hi. Uisathiam chuan a buntu hre hrang ve tawh hek lo, he mihring hi a ûm hlum ta tawp mai a ni. Thil mak deuh mai pakhat chu : Engtin nge thimthamah Selden-a hian uisathiamin a ûm tih a hriat mai theih chu le?” a ti a.

Sam tein kei chuan, “A thâwm a hria a ni mai alawm,” ka ti a. Holmes chuan, “Hetiang mi ngawhngawl hi chu uisathiam hmuh avangin a ṭê chhe duhin ka ring lo. A au chhuah chuan an man leh mai dawn asin. A ṭê thawm kan hriat dan khan uisathiamin a um phak hma fe aṭangin a hmu lawk ni ngei tur a ni. Engtin nge a hmuh a, a hriat mai theih?” a ti ta zel a.

Kei chuan, “Thil mak tak mai pakhat chu, he uisathiam hi, kan rin dan hi a dika kan ngaih chuan...,” ka’n ti a. Holmes chuan, “Rin thil thuin eng mah kan ti lo,” a lo ti hmiah mai a. Kei chuan, “A nih leh eng vangin nge he uisathiam hi zaninah kher hian phûlraiah a tlat chhuah chu le? Phûlraiah hi chuan a vakvel mai mai lo niin ka lo hria a. Sir Henry-a’n phûlrai a tlawh lo tih a hriat chuan Stapleton-a hian uisathiam hi a chhuah duh hlekin ka ring lo,” ka ti a.

Holmes chuan, “I thil hriat duh chu kan hre thuaiin ka ring a. Ka thil hriat duh ve kha chu kan hre lo kumkhua maithei a ni. Tuna kan ngaihtuah tur chu, he kan mihringa ruang hi engtin nge kan tih dawn? Mulukawlh leh sihal inchuh ral tur ringawt chuan kan hnutchhiah thei si lo,” a ti a.

Kei chuan, “ Police lam kan hrilh theih hma chuan bûk pakhatah hian i dah rih mai ang,” ka ti a. Holmes chuan, “A ṭha e. Kan pahnih chuan kan zâwn zo mai ang chu. Uai, Watson, heta hi le! Kan mihringa ngei chu a ni. A va’n huangtauvin a va huaisar ngai ve le! Rinhlelhna mitmeng nen lo melh hlek suh. Chuti lo chu ka remruatna zawng zawng a tlawlh leh palh ang,” a ti a.

Thim zingah chuan mihring a lo phei zel a, meizial a rawn zu a. Thla êngah chuan Stapleton-a a ni tih ka va hre mai thei a. Min han hmuh chuan a ding det a; mahse, a lo kal leh ta zel tho va. A lo kal hnaih deuh chuan, “Uai, Dr Watson, nang i nia lo? Zan tun ang hunah chuan he laia hmuh atana ka beisei loh ber pawl i ni. Chhei, eng thil nge ni ta? Inhliam palh an awm e lo? Sir Henry-a chu a ni êm lo vang chu maw?” a ti a.

Min kal pelin mi ruang chungah chuan a va kûn hniam a. A va hmuh chian chuan a thaw hawk a, a meizial ken lai a thlauh nghal tawp bawk a. “Hei, hei hi tu nge ni?” a’n ti a. Kei chuan, “Selden-a. Princetown tan In aṭanga tlan chhuak kha a ni,” ka lo ti a. Stapleton-a chuan min han melh a, a hmel chuan ngaihno a bei lo hle. Theih tawpa a insum avangin a inthup mai mai a, chuti ni lo se chu anchhia min lawh duh ngei ang.

Min melh reng chung chuan, “A va’n zia lo tak em! Engti tiha thi nge a nih chu le?” a ti a. Kei chuan, “Heng lungpui vel aṭanga a tlak avang hian a nghawng ruh a sawh tliak ni awm tak a ni. A ṭê thawm kan hriaa kan pan ta a ni,” ka ti a. Ani pawh chuan, “Kei pawhin a ṭê thawm kha ka hria a, ka lo kal ta a ni. Sir Henry-a ka ngaihtuah deuh va,” a ti a.

Insûm hman lovin kei chuan, “Engati nge Sir Henry-a chu i ngaihtuah bik?” ka lo ti hmanhmawh a. Stapleton-a chuan, “A lo kal tur thu a sawi a. A lo kal tak lohvah chuan mak ka ti deuhvin ka ngaihtuah a. Ṭê thâwm kha ka hre leh ta zel vei nen. Thu danga lai chuan...," tih pahin ka lak aṭanga mit la sawnin Holmes chu a’n melh a, "A ṭê thawm bakah hriat dang in nei em?” a’n ti a.

Holmes chuan, “Eng mah kan hre lo. I hria em, nang?” a’n ti a. Ani chuan, “Eng mah kan hre lo,” a ti a. Holmes chuan, “A nih i zawhna chu eng nge a awmzia?” tiin a zawt a. Stapleton-a chuan, “Heng lai thingtlang mite hian uisathiam huai nei te an sawi a, chutiang titi vel chu a tam riau alawm. Zan lamah phûlrai velah hian an hre ṭhin ni awm a ni. Chutiang thawm chu hriat tur a awm leh awm loh ka hre châk mai mai a,” a ti a.

Kei chuan, “Chutiang thil eng mah kan hre lo,” ka ti a. Stapleton-a chuan, “He kan ṭhianpa khawngaihthlak tak hi eng vanga thi nge nia i rin?” a ti leh a. Kei chuan, “A inngaihtuah buai nasat avang leh ni sa leh ruahsurin a sawisak retheih avangin a rilru a buai zo ta a ni ngei ang,” ka ti a. Chutah, “He phûlraiah hian mi â thau khawh ang maiin a tlan chiam a, a nghawng a sawh tliak ta ni ber awm a ni,” ka tihsan a.

Stapleton-a chuan, “Chu chu ngaih dan pawm tlak pawl tak a nih ka ring. Mr Sherlock Holmes, eng nge i ngaih ve dan?” a’n ti a. A rilru pawh a hah nêp tawh hlein a lang. Holmes chuan lu bûk pahin, “Mi nihna i hre chak kher mai,” a lo ti duh lek chauh va. Stapleton-a chuan, “Dr Watson-a a lo kal hnu hi chuan i lo lan ve thuai kan lo ring deuh reng asin. He thil lungchhiatthlak tak hi i rawn hmu ve hman chiah chiah a ni,” a ti a.

Holmes chuan, “A ni ngawt mai. Ka ṭhianpa sawi kha a dik tawkin ka ring. Naktuk lamah chuan London-ah thil hriat reng nuam lo tak ka pai haw dawn a nih hi,” a ti leh mai a. Stapleton-a chuan, “Eu! Naktukah i kir leh mai dawn elo?” a ti a. Holmes chuan, “Ka tum alawm,” ti ngawtin a chhang a.

Stapleton-a chuan, “Heng thil thleng mak tak tak kan hriat thiam ve loh hi nang i lo kal chuan hre thiam deuh turah ka’n inngai ngawt a,” a ti leh ta a. Dar sawi chhîn pahin Holmes chuan, “Hlawhtlin hi a inbeisei theih ziah bik loh a nia. Thil awmze hriat chian tum tan chuan thu dik hi a pawimawh a, thawnthu leh tlangkam mai mai hi a pawimawh tak tak lo. He thil buaipui hi chu a luhaithlak khawp mai,” a ti ve ta zel a.

Ka ṭhianpa thu han sawi chuan thu dik a sawi a nih a rinawm hle mai a, a thu sawi chu la run vak pawhin a lang lo. Ngun deuh mai hian Stapleton-a chuan Holmes chu a lo melh a. Chutah ka lam a lo hawi a, “He mi khawngaihthlak tak hi ka In lamah dah ila ka ti deuh va; mahse, ka farnuin a hlau dawn tlat si a, thil dik ni theiin ka hre mang si lo. A hmai hi kan khuh chuan zing thlengin a him maiin ka ring,” a ti a.

Stapleton-a sawi ang chuan kan ti a. A In lamah lêng tura min sawmna pawh chu hnarin Holmes nen chuan Baskerville Hall lam panin kan chhuak a. Stapleton-a pawh chu ama In lam panin a haw ve ta hnak hnak a.

Kan kal pah chuan Holmes chuan, “A tawpah zawng kan lên den kan ṭhâm khawm thei teuh ta hle mai. Kan mihringa han inthup theihzia kha! A duh loh zawk a tihlum tih a hmuh kha chuan chhe te tala han zah der ve deuh âwm a ni a le. Watson, London-a kan awm lai khan ka hrilh tawh che a, ka’n hrilh nawn leh ang che, he mihring aia deh khirh zawk hi kan la tawng kher lo vang,” a ti a.

Kei chuan, “A hmu ta che kha chu zia lo ka ti ngawt mai,” ka lo ti a. Holmes chuan, “A tirah kha chuan zia lo ka ti ve viau a; mahse, pumpelh ngaihna a awm lo a nih kha,” a ti mai a. A hnenah chuan, “Hetah i awm tih a hriat avang hian a tum dan a thlak duhin i ring em?” ka ti a.

Ani chuan, “A fimkhur sawt ang a, beidawng chetin chet a thawh vak duh maithei a ni. Mi sual dangte ang bawkin a inngai fing lutuk ang a, min bum let tawp ta emaw a ti maithei a ni,” a ti mai a. “Engah nge kan man nghal mai loh vang,” tiin ka zawt leh ta zel a.

Holmes chuan, “My dear Watson, nang zawng chet thawh tur chia piang i ni. Eng emaw han tih deuh rep rep hi i châk zel mai. Ti ta mai mai ila, zanin hian lo man ta ngawt ila eng nge kan ṭhatpuina tur? Amah khinna turin eng mah kan finfiah thei hlei nem. A fin vervekzia hi! A hmanraw hman hi mihring chu ni se eng emaw chu kan ang maithei a; mahse, a ui hrawl pui mai hi lo hling tain rorelna hmunah pawh hûng ta ruau mah ila, a pu chan chhiatna tur eng mah a sawi thei dawn miah lo,” a ti ta a.

Kei chuan, “Thil buaithlak tak zawng a ni ve ngawt mai,” ka ti ta ngawt a. Holmes chuan, “Kan thil hriat hi mi dang ngaihah chuan rin thu leh ngaih dan mai a la ni hlawm. Kan thu hriat kan tih ve fo pawh hi rorelna hmunah chuan phawrh chiah ila finfiah thei lo ta pui chu min eu hluah hluah mai ang,” a ti ta tlat a. Kei chuan, “Sir Charles-a thih thu kha kan sawi ang a,” ka’n ti dek dek a.

Holmes chuan, “A taksaa hnu-hma eng mah awm lova a ruang chhar ringawt a nih kha. Nang leh kei chuan hlauh vanga thi a ni tih kan hria a; mahse, engtin nge chu chu thu remna vaw thlatu mi sawmpahnih, thinlung sak tak takte kan hrilh hriat ve theih ang? A thil hlauh kha kan hre bawk a, chu pawh tihngaihna a awm leh lo bawk.

"Uisathiam a awm tih hi engtin nge kan hai lan ang? Khaw nge a ngho hnu-hmate chu? Uisathiam chuan mi ruang a pet ngai lo tih kan hria a, Sir Charles-a pawh kha uisathiamin a ûm phak hmain a thi tih kan hre bawk a; mahse, a finfiah chu kan thei tlat lo,” a ti ta zung zung mai a.

Kei chuan, “A nih leh zanin ve kha?” ka’n ti leh a. Holmes chuan, “Zaninah pawh eng kan ang chuang lo. Kan ṭhiana thihna leh uisathiam hian inzawmna a nei fumfe lo. Uisathiam kha kan hmu miah lo va. A thâwm kan hre ngei a; mahse, kan ṭhianpa kha a ûm ngei a ni tih kan finfiah thei lo. Ka ṭhian duhtak, tunah hi chuan eng mah kan ti thei lo tih hi i pawm mai mai teh ang. Eng emaw kan tih theihna tur chuan chhiat huama thil eng emaw kan tih a ṭul a ni,” a ti ta a. Kei chuan, “Eng thil nge tih i rilruk deuh?” tiin ka zawt ta zel a.

Holmes chuan, “Thil awm dan hi Mrs Laura Lyons-i kan hrilh chian hunah chuan eng emaw min tihsak ve ngeiin ka beisei hle a. Chumi rem tur chuan ruahman dang ka nei a ni. Thil lungchhiatthlak kan kawl sa hi naktuk nileng atan pawh a la tawk viauin ka ring a; mahse, naktuk ni tlak hmain a fawng lamah kan vuan ve ang tih ka beisei,” a ti a. A bak chu eng mah ka zawt chhuak zo ta lo. Eng ilo ngaihtuaha kun tlat chungin Baskerville Hall dai kawngkhar min hruai thleng a.

A hnenah chuan, “I lo lut ve dawn em?” tiin ka’n zawt a. Holmes chuan, “Dawn e; inthup a ṭulna ka hre tawh lo; mahse, Watson, thil pakhat chauh, uisathiam chanchin kha chu Sir Henry-a hrilh hlek suh ang che. Selden-a thihna chhan kha chu Stapleton-an kan rin dan tura a duh ang chiah khan phuah chawp leh mai rawh. Naktuk lama a kraws put tur a zawh loh phah ang e. I thu rawn thawn kha ka chhiar sual loh chuan naktuk hi an Ina chaw a ei hun tur niin ka hria a (Stapleton-a te Inah),” a ti a.

Kei chuan, “Chu chu niin kei pawh ka hria,” ka lo ti a. Holmes chuan, “Chuti chhuanlam i siam ang a, amahin a kal ang. Chu chu thil harsa a ni lo’ng chu. Zanriah bawp kan man hman tawh lo a nih pawhin ei bang nawi tal chu kan la zut pha ang tih ka beisei,” a ti ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)