SHERLOCK HOLMES - THE HOUND OF THE BASKERVILLES (COMPLETED)

[Rozami pachuau]

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 13
(Rozami Pachuau)

LEN KAIH PHARH HUN LAI

Sir Henry-an Sherlock Holmes a’n hmu chu a lawm hle a, dik chauh phei chuan tun hnai deuhva thil thleng avangin Holmes chu London aṭanga a lo chhuk ve mai a lo beisei ru reng tawh a ni; mahse, bungraw chhe te pawh luhpui lova ka ṭhianpa a’n tlu lut ve râwih mai leh, ‘Ka bungrua chu chuti khati,’ pawh a ti zui ta chuang lo chu mak a tiin a ngaihna a hre lo hle a.

Tlai deuh fe-ah zanriah eiin Holmes nen chuan Sir Henry-a hriat atana kan duh tawk chin chauh Sir Henry-a hnenah kan sawi a; mahse, ka chan a chhe hle mai. A chhan pawh Selden-a thih thu Barrymore-a te hrilh tur dang awm hek lo, keima’n ka hrilh a ṭul tlat a.

Barrymore-a tak phei chuan a lo ngaithiam viauvin thawventhlak ta sawtin a hria a; mahse, a nupui chu lungchhe takin a ṭap ta zawih zawih a. Selden-a te ang mihring chu khawvel mit hmuhah chuan tual thah ching, ramhuai leh ransa inthlah pawlh tluk leka mi hnuaihnung mah ni se Barrymore-a nupui tan chuan naupang te tak te, a kut vuana duh duh lam zet zet ṭhin kha a la ni tlat. Nia, hmeichhe pakhat mahin an sûn loh mipa chu mi sual lai let tawp a ni tlat ṭhin.

Sir Henry-a chuan, “Zinga Watson-a chhuah bo aṭangin Inah ka tawm nileng zak a, ka thu tiam ka hlen avangin fakna awka tlem tal chu dawng ve âwm tak ka ni. Mahnia chhuak vak lo turin lo intiam kher lo ila chu zanin tlai te ang te hi chuan ka khawsa nuam ve deuh tur, Stapleton-a pawhin lengah min sawm asin maw le,” a ti a.

Holmes chuan, “I khawsa nuam phian pawh a ni mahna le; mahse, i nghawng i sawh tliak ta emaw tiin kan lo sûn hman nual che asin,” a ti ta a. Sir Henry-a chuan, “Uai! engti vai-zai nge ni ta ngai le?” a ti a. Holmes chuan, “He kan mitthi pa hi i thuamhnaw hlirin a lo inthuam alawm maw le. A hnena i thuamhnaw lo rawlruktu, i chhiahhlawh chu police nen an inchai buai laih a ṭul ang tih ka hlau ngawt mai,” a ti a.

Sir Henry-a chuan, “A ṭul lem lo vang. Ka thuamhnawah khan chhinchhiahna eng mah a chuang lovin ka hria,” a ti mai a.

Holmes chuan, “In zavai atan a tihzia a nih chu. He thilah hi chuan danpui thlawp lo zawngin ṭan in khawh tlatin a lang. Sualna rim zawnga hnar lên chi fing deuh tan chuan nangniho zawng zawng hi man khawm vek mai tur in ni nge ni lo tih pawh ka la chiang chiah bik lo. Watson-a thu rawn thlen khan chu chu a tichiang nasa mai,” a ti ta miau mai a.

Sir Henry-a erawh chuan, “He thil hi eng nge a an? Chin fel lam i hnaih tawh em? Watson-a nen hi chuan London khawpuia kan awm lai ang tho khan kan la bangbo niin ka hria a,” a ti a.

Holmes chuan, “Rei vak lovah he thil hi ka hrilh fiah thei nual che u-in ka ring. Thil buaithlak leh chingchivet tak zawng a ni chiang mai. Bung leh chang tam takah thil awmze hriat chian kan la duh hle a; mahse, kan hre chiang vek dawn tho mai,” a ti mai a.

Sir Henry-a chuan, “Watson-a hian a hrilh tawh chein ka ring a. He uisathiam rûm ri hi phûlraiah kan hria a, an titi lêngvâk hi zawlnei lem hrilh lawkna ai chuan a dik zawk daih. Khaw thlang (America) rama ka awm lai khan ui lam chanchin hi ka hre ve nual a, ui râwl leh râwl dang chu ka hre hrang khawp mai. He ui hi a hmui i phuar a, i thlun beh theih ngat chuan mi sual hnu chhuitu ropui ber i ni ang,” a ti ta a.

Holmes chuan, “Nangin min puih phawt chuan a hmui phuarin ka thlung bet thei ngei ang tih ka ring tlat,” a lo ti a. Sir Henry-a chuan, “Ti tura min hrilh apiang chu ka ti zel ang,” a ti a. Holmes chuan, “A ṭhat nasat chu; ti tura ka hrilh che chu awih ringawt la, a chhan leh vang lamah intibuai duh reng reng suh ang che,” a ti leh a.

Sir Henry-a pawh chuan, “I duh ang thlapin le,” a lo ti a. Holmes chuan, “Chutianga i tih ngat chuan he thil kan chin felna tur kawngpui kan sial tihna tluk hial a ni ang. Ka rindan chuan...,” a tih lai tak chuan a thu sawi chu a tawp thut a, ka lu chung lam chu a melh ta reng mai a.

Holmes-a chuan a ngaihtuahna leh a mit chu a’n hmang nasa khawp a, milim ni mai âwm hian che hlek lovin a ṭhu a. Sir Henry-a nen chuan, “Eng nge ni ta?” kan lo ti vat a. Holmes chuan chhungrila phûrna emaw, mak tihna emaw, eng emaw chu a thup tih ka hre mai a. A taksa chu che danglamin za chung lo mah se a mitmeng chu a hlimin a lawm em em a ni tih chu ka hre mai.

Bang lehlama milem tar chu kawkin, “Mi thiam kut chhuak han hmuh hi chuan ngaih san mai loh chu tih tur dang a vang ṭhin, min hre thiam teh u. Watson-a hi chuan kut chhuak nalh reng reng hre miah lo turah leh hlamchhiah vek turah min ngai thin a; mahse, min tisik vang mai mai a ni, kan thlir dan a dang ringawt a ni zawk. Hei, in thlalak tar hi a va indawt nalh em,” a ti ta he he mai a.

Sir Henry chuan ka ṭhianpa chu mak ti tak maiin a’n melh a, “I tilawmawm e. Heng thil hi chu ka ngaihven lo bawk a, sakawr leh bawng vel pawh ka hmu thiam zawk ta ve ang. Hetiang thil hi i ngaihsak hman tih reng reng ka lo hre lo va,” a ti a.

Holmes chuan, “Thil ṭha chu ka hmuh chuan ka hria alawm. Tuna ka hmuh hi kut chhuak nalh chu a ni. Kha laia mi kha chu Kneller kut chhuak a ni ang a, kha hmeichhia, maimaw thuamhnaw dumpawl inbel kha, a bula pa thau deuh kha chu Reynolds a ni ve thung ang. Chhungkaw thlalak vek em ni?” a’n ti a. Sir Henry-a chua, “Ni e,” a lo ti a. Holmes chuan, “An hming i hre hlawm em?” tiin a zawt a.

Sir Henry chuan, “Barrymore-an min hrilh fiah hlawm ṭhin a, ka hre tawh viauvin ka hria,” a ti a. Holmes chuan, “Khi, entlang keng mipa khi tu nge ni?” a ti a. Sir Henry-a chuan, “Khi khi, Rear-Admiral Baskerville a ni a, West Indies-ah Rodney-a hnuaia sipai ṭang hrep tawh a ni. Kawr-chung dumpawl ha, lehkha inzial keng khi Sir William Baskerville a ni a, Pitt-a hnuaiah Committees of the House of Commons Chairman a ni,” a ti a.

Holmes chuan, “A nih leh he laia min eptu, buikelek thuamhnaw dum leh puan ṭhui par nena induang hi?” a ti ta zel a. Sir Henry-a chuan, “Khi pa khi i hriat ve a dik ang. Khi pa khi alawm, Baskerville Uisathiam bul tumtu chu, kan misual Hugo-a chu a nih khi,” a ti ta a. Chu thlalak chu ngun deuh maiin kei pawh chuan ka en ve ta a.

Holmes chuan, “Khai aw! Pa inngaitlawm leh thâwm na lo tak niin a lang na a, a mitmeng khian hremhmun them a khap tel ngei ang. Khi aia pa tâwr ṭha deuh leh sual hmel deuh tur khian asin maw hmuh ka lo tum le,” a ti a. Sir Henry-a chuan, “A lem an ziah lah hi a dik chiang hle lehnghal. Milem hnung lamah khian a lem an ziaha hming leh an ziah kum, 1647 tih a chuang nghe nghe,” a lo ti a.

Holmes chuan an thlalak tar chungchang chu a sawi zui tam lo (‘Thlalak’ tih leh ‘Lem ziah’ tih hi ka sawi pawlh a, a chhan chu Milem tih leh Thlalak tih hi Mizo ṭawngah a danglam a, Milem hi chu a ‘lem’ zawka ka ngaih vang a ni. Mahse, a sap ṭawng lamah ‘portrait’ an tih hi a ziaha ziah a ni vek kher lo leh thei bawk si. Pll) Mahse, a hmuhnawm a ti thlu a ni ang chu chaw ei chhung zawng chuan a melh deuh reng a.

Sir Henry-an a pindan a pan a, min luh bosan hnu chuan Holmes-a thil ngaihtuah chu ka chhuipui thiam ve ta chauh va. Holmes chuan banga an thlalak tar chu khawnvarin a ên a, “Hmuh i nei em?” tiin min zawt a. Chu thlalak tar chu ngun deuh maiin ka’n en a, a lukhum khum te, a kawrng hawng var te, a hmel rum tak mai te, a hmui pan deuh leh a mitmeng nelawm lo tak te chu ka hmu ve vek a.

Ka hnenah chuan, “I hriat zawng mi zingah an deuh a nei em?” a ti leh a. Kei chuan, “A khabe-ah khi chuan Sir Henry-a nen an inang deuh,” ka lo ti a. Holmes chuan, “A inang deuh chauh a ni; mahse, ngawi lawk teh aw!” a ti a. Ṭhutthleng chungah a ding lawk a, a kut vei lamin khawnvar a lek a, a kut ding lam chuan milem lukhum chu a hup a, a hmai chauh lang thei turin a kutin a khuap kual ta a.

Mak ti deuh maiin, “E hiau!” ka’n ti ringawt a. Chu thlalak chu Stapleton-a hmel chiah chiah a ni. Holmes chuan, “Ha! i hmu thiam ve ta. Mihring hmel hi ka zir a, a chei mawina hi ka zir tel ve lo. Mi sual hnu chhui mi chuan inchei danglamna an inbel pawhin mi sual hmel chu a la hmu thiam tho tur a ni,” a ti a.

Kei chuan, “Hei chu a mak hle mai. A thlalak ni thei hiala mawi a ni,” ka ti a. Holmes chuan, “A ni ngawt mai, tisa leh thlarau thawhlehna a thleng ni hial awm a ni. Chhungkaw inthlah chhawng thlalak han bih chian tak tak hi chuan thawhlehnate pawh hi a rinawm ve thut thut asin. Kan Stapleton-a hi Baskerville a lo ni ve chiang mai,” a ti ta a. Kei chuan, “Ro luah tumin a phe sek a nih ve hi,” ka ti a.

Holmes chuan, “Ni chiah e. He thlalak aṭang hian kan hriat duh pawimawh tak mai, kan la hriat thiam theih si loh chu a kim ta a ni. Watson, kan thu hnuaiah kan dah ta, kan dah fel ta e. Nakzan a ral hmain kan lên chhungah a phengphehlep man ṭhin ang maiin a tal buai ta ve ang. Baker Street chhungkua-in ro kan khawm leh dawn ta a nih hi,” a ti a. A nui ta hawk hawk a. A nui zen lo nain ka ṭhianpa a’n nuih hawk hawk hi chuan tu pa emaw chuan a awrh lawih ziah a ni.

A tuk zingah chuan hma takah ka tho emaw ka ti a; mahse, Holmes chu kei aiin a la tho hma ta zawk cheu mai. Ka’n thawh phat chuan kan kawngkhar panin pawn lam aṭangin a lo kal bauh bauh tawh a. Hlim deuh maiin ka hnenah chuan, “Vawiin hi a ral hmain kan nghahrângchal khuh hi kan lên chhung aṭang hian a tâl chhuak zo teh reng emaw kan en thei ang chu,” a ti a. Kei chuan, “Phûlrai i va fang hman elo?” tiin ka zawt a.

Holmes chuan, “Selden-a thih chungchangah Grimpen aṭangin Princetown-ah thu ka va thawn a ni. He thilah hi chuan a tua mah in inhnamhnawih buai ve a ngai dawn lo niin ka ngai. Cartwright-a pawh thil awm dan ka va hrilh bawk; va hrilh lo ila chu mitthi kha keimah emaw tiin ka bûkte luah bulah khan lungchhe vankaiin a ṭap thei tak tak ang,” a ti a.

Kei chuan, “Eng nge kan tih leh tur?” tiin ka zawt a. Ani chuan, “Sir Henry-a hmuh a ni mai. Hei le, heta hi le!” a’n ti a. Sir Henry-a chuan, “Chibai Holmes, sipai lalberin a sipai lawk zualte kianga râl a rel ang mai lah ni che,” a’n ti a. Holmes chuan, “Chu chiah chu alawm kan dinhmun hi. Hei Watson-a hian thu pek a lo ngaichang vel mek a ni,” a ti a.

Sir Henry-a chuan, “Kei pawh i thu pek nghakin ka awm e,” a lo ti ve bawk a. Holmes chuan, “A ṭhat nasat chu. Ka lo hriat danin zanin hi chuan kan ṭhian Stapleton-a te Inah chaw i ei dawn a ni maw kha?” tiin a zawt nghal a. Sir Henry-a chuan, “Ni e, lo kal ve nghe nghe turin ka duh che u asin. Ṭhenrual huihai thiam tak mai an ni a, in lo kal ve phawt chuan an lawm ngawtin ka ring,” a ti a.

Holmes chuan, “Kei leh Watson-a hi chu London lam pana kan kal a ṭul ang tih ka hlau ngawt mai,” a lo ti a. Sir Henry-a chuan, “London-ah maw?” tiin mak ti takin a zawt a. Holmes chuan, “Tun dinhmunah hi chuan London lamah awm ila kan ṭangkai zawkin ka ring a ni,” a ti leh ta zel a.

Sir Henry-a hmel chu a ngui rawih a, “He thil hi a tâwp thlengin in bawhzui ang chu ka lo ti a. He Hall leh phûlrai vel hi mahnia han tâl nan chuan hmun nuam tak zawng a ni lo khawp asin,” a ti a.

Holmes chuan, “Ka ṭhian duhtak, a tâwp thlengin min ring ngam la, ti tura ka hrilh che hi chu ka hrilh ang chiahin ti zel ang che. I ṭhiante hnenah chuan lo kal ve kan duh hle thu leh hmun danga kan awm a ṭul tlat thu hi i rawn hrilh dawn nia. Devonshire lamah hian kan lo kir leh thuai ang tih kan beisei. Ka thu chah che chu i rawn hre reng thei ang em?” a ti a.

Sir Henry-a chuan, “I tih tlat chuan le,” ti ngawtin a chhang a. Holmes chuan, “Tih dan dang a awm miah lo tih ka hrilh tlang mai ang che,” a ti ta zel a. Kan tlansan dawn nia a hriat avangin Sir Henry-a chu a lawm lo hle tih ka hre thei mai. Aw ngaihnobei lo tak hian, “Engtikah nge in kal ang?” tiin a’n zawt leh a.

Holmes chuan, “Tukṭhuan ei kham veleh a ni mai. Coombe Tracey lam kan pan phawt ang a; mahse, Watson-a chuan he hmunah hian a lo kir leh ngei dawn tih entir nan ang rengin a thuamhnaw chu hetah a hnutchhiah ang. Watson, Stapleton-a hnenah chuan i kal ve theih dawn loh avanga pawi i tih thu hrilhna lehkha ziak rawh,” a ti leh ta a.

Sir Henry-a chuan, “In ruala London lam pan ve mai chu ka duh a ni. Eng vangin nge he laiah hian ka tawm reng ang?” a ti a. Holmes chuan, “I awmna tur hmun a nih avangin. Ka hrilh ang apiang chein i awm ang tiin min tiam tawh a, tunah hian he hmuna awm tur che hian ka hrilh che a ni,” a ti a. Sir Henry-a chuan, “Chuti a nih chuan a ṭha e, ka lo awm nang e,” a ti ve ta a.

Holmes chuan, “Tih leh tur dang pakhat! Merripit House-ah chuan tawlailirin i va kal ang a. I tawlailir chu i thawn kir leh ang a, kein i haw dawn tih i hrilh bawk tur a ni,” te chu a la ti ta deuh deuh a. Sir Henry-a chuan, “Phûlraiah kein ka kal tlang ang a maw?” a ti a. Holmes chuan, “Ni e,” tiin a lo chhang mai si a.

Sir Henry-a chuan, “Mahse, chu chu ti lo tura min hrilh fo kha a ni si a,” a ti a. Holmes chuan, “Tun ṭumah hi chuan him takin i kal tlang thei ang. I huaisenna leh i pachanna hi chu ring tawk hle lo ila chu hetianga ti tur hian ka râwn lo vang che. Hetia i tih hi a ṭul tlat a ni,” a ti a. Sir Henry-a chuan, “Chuti a nih nafam chuan ka pal tlang nang e,” a ti ve ta a.

Holmes chuan, “Thih i la duh kher lo vang a, chuvangin i haw kawng pangngai, Merripit House aṭanga Grimpen Road panna kawng tluang pangngai bak chu dai hlek suh ang che,” a ti ta zel a. Sir Henry-a chuan, “I sawi ang chiah chuan ka ti ang,” a ti a. Holmes chuan, “A ṭha nasa e. Chawhnu lama London thleng hman ngei turin tukṭhuan ei kham veleh chhuak nghal thei ila ka duh hle mai,” a ti ta a.

A hma zan lawkah Holmes-an Stapleton-a hnena London a pan tur thu a hrilh lo hre tawh mah ila he thil hi chu mak ka la ti ta cheu mai. Phûlrai pal tlang hun loh lai berah Sir Henry-a pal tlang tura hrilhin, kei leh ani kan kal bo ang tih ka lo ring pha ngai lo reng reng; mahse, keini ang duang chuan Holmes-a remruatna lakah chuan eng mah kan sawi nawi thei lo, a sawi ang thlapa awih zel mai hi a fel ber mai.

Chuvangin, kan ṭhianpa chu kan mangṭha a, Coombe Tracey lam kan pan a, Coombe Tracey kan va thlen hnu chuan tawlailir pawh chu a hmanna a awm tawh loh avangin kan tir haw ta a. Tawlailir innghah khawmna hmunah chuan naupang te tak te hian min lo nghak a. Kan hnenah chuan, “Ka pu, eng nge tih tur?” a lo ti a.

Holmes chuan, “He lai relah hian chuangin khawpui lam i pan ang a, i thlen veleh ka hmingin Sir Henry Baskerville-a hnenah thirhrui i thawn ang a, thil chhinchhiahna lehkhabu ka thlauh palh kha a hmuh chuan Baker Street-ah bo thei lo chiin lo thawn lêt turin hrilh ang che aw Cartwright,” a ti a.

Naupang chuan, “Aw ka pu,” tiin a lo chhang a. Holmes chuan, “Chu bakah, rel chawlhhmunah khan ka thirhrui lehkha tur a awm leh awm loh han zawt nghal ang che,” a ti zui a. Naupang chu a lo kir leh thuai a, Holmes-a chu thirhrui lehkha a rawn pe a.

'Thirhrui lehkha hmu. Man theihna lehkha hming ziah awm lo nen lo kal dawn. Dar nga leh sawmli-ah lo thleng.
-Lestrade' tih a lo ni a.

Holmes chuan, “He thirhrui lehkha hi tukina ka thirhrui thawn chhuah chhânna a nih hi. Police-ho zingah chuan a tih tlak ber a niin ka ring a, a mi ṭanpuina kan mamawh bawkin ka ring. Ti rawh le, Watson, kan hmel hriat neih ve chhun, Mrs Laura Lyons-i va rîm ila kan tifuh ber ang,” a ti ta a.

Holmes-a remruatna chuan riruang a nei ṭan ta. Sir Henry-a tawktarhah hmangin Stapleton chhungkua chu kan kal bo ta emaw tia ngaih dan nei turin a duh a; mahse, a saseh hunah chuan kan thleng phei leh hman tho vang. London aṭanga thirhrui a thawn thu chu Sir Henry-an Stapleton-a a hrilh vaih chuan an ringhlel tawh reng reng lo vang. Kan mihring veh lai chu kan lên chuan a khuh bet hnai tial tial niin ka hria.

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Mrs Laura Lyons-i chu pisaah a lo awm a. Sherlock Holmes chuan zêp hnihne leh sawi duh loh chin nei ṭing ṭeng lovin a va dawr ta pawp pawp mai a, Mrs Laura Lyons-i pawh chuan mak a ti kher mai. Holmes chuan, “Sir Charles Baskerville-a thih thu-hla vel hriat chian tumin hna ka thawk a. Hei ka ṭhian, Dr Watson-a hian i thu sawite leh i sawi duh loh chinte min hrilh bawk a,” a’n ti nghal tawp mai a.

Mrs. Lyons-i chuan, “Eng nge ka sawi duh loh chu?” tiin cho deuh maiin a lo zawt a. Holmes chuan, “Sir Charles-a hnenah dai-kawngkharah dar sawmah i awm tih i hrilh thu kha i puang a. Chumi hun lai chu a thih hun a ni a, a awmna tur hmun atana i ruatsak chu a thihna hmun a ni tih kan hre bawk. He thil pahnih inkarah hian eng emaw chu zêp bo i la nei a ni,” a ti ta fawk fawk mai a. Mrs.Lyons-i chuan, “A hun leh a hmun chuan inzawlna eng mah a nei lo,” a lo ti a.

Holmes chuan, “Chutia inzawlna eng mah a neih si loh chuan thil awm dan chu a induh remchang palh lutuk ta ve ang; mahse, a inzawlna chu ngaihtuah chhuah theih hram kan tum tlat ang chu. Mrs Lyons, zêp nei miah lovin i hmaah chuan thu ka’n sawi teh ang. He thil hi tual thah thu angah kan ngai tlat a, thil awm dan dik hi kan hâi lan zel chuan i ṭhian, Stapleton-a mai ni lovin a nupui thlengin a kaihhnawih thei dawn a ni,” a ti leh ta hmiah hmiah mai a.

Chu nu chu a ṭhutna hmun aṭang chuan a lo zuang tho zawk a, “A nupui maw!” tiin a ṭê tuar a. Holmes chuan, “Heng te chu thurûk a ni tawh hlei nem. A farnu anga awm saw a nupui alawm,” a ti mai a. Mrs Lyons-i chu a ṭhuthmunah a ṭhu leh tawh a, a ṭhutthleng vawn bânte chu a hmer na khawp a, a tinte pawh a var pawp pawp a. Ama hriat tawk lek hian, “A nupui! A nupui chu leh! Nupui a nei si lo va,” a’n ti a.

Holmes chuan a dar a lo thing mai a. Chutah Mrs Lyons-i chuan, “Finfiah rawh! Han sawi chiang teh! I finfiah theih chuan...!” a ti a. A mitmeng chu sa zuar thinrim âng ai pawhin a hlauhawm zawk ta ve ang. Holmes chuan, “Finfiah thei tur chuan ka rawn inbuatsaih alawm,” tih pahin a ipte aṭangin lehkha ṭhahnem fe a’n phawrh a.

“Heta hi an nupa thlalak, kum li kaltaa York-a an lak a awm a. ‘Mr and Mrs Vandeleur’ tiin an chhinchhiah a; mahse, a hmel chu i hriat ve ngai chuan i hai chuang lo vang. Heta hi mi rinawm tak takin Mr and Mrs Vandeleur-te nupa an hrilh fiahna lehkha pathum a awm a, chung mite chu St. Oliver-a Private School-a a awm laia hretute an ni. Han chhiar la, an nihna ka sawi hi i la ringhlel emaw,” a ti a.

Chung lehkha chu Mrs Lyons-i chuan a’n en hlawm a, chutah tum ruh hmel tak maiin kan lam a lo hawi ta a. Holmes-a hnenah chuan, “Mr Holmes, he pa hian ka pasal ka ṭhen theih chuan min neih a tiam a. Dâwt vek min lo hrilh a nih hi. A thu sawi kha thu dik pakhat mah a awm lo.

"Engati nge hetia dâwt hlir min hrilh chu le? Engati nge? Ka thil tih zawng zawng kha ka tana ti-ah ka lo inngai ve ṭhin a; mahse, a tan chuan hmanrua mai ka lo nih hi. Eng vangin nge ka chunga rinawm chhuah ngai reng reng lo lakah hian rinawm ka chhuah bik ang? Eng vangin nge a thil tih tenawm tak avanga a tuarna tur pumpelhtir ka duh bik ang?

"In duh duh min zawt ula, ka hrilh theih ang ang chu ka hrilh zar zar ang che u. Thil pakhat erawh chu min hriatsak turin ka duh che u. Lehkha ka ziah lai khan kan Sir Charles-a kha a chungah thil ṭha lo a thleng dawn tih ka hre lo va, a thlen pawh ka duh hek lo. Min khawngaiha min lainattu, ka tana ṭhian ngilnei ber a ni ṭhin asin,” a ti ta bawrh bawrh mai a.

Sherlock Holmes chuan, “Ka pi, i thu sawi chu ka awih thlap e. Hetiang thil han sawi chhawn leh ṭhin hi a nuam lo thei viau maithei a, chuvangin, thil awm dan chu ka’n sawi ang a, ka sawi dik loh lai a awm chuan min lo sawi diksak zel zawk dawn nia. Sir Charles-a hnena lehkhathawn kha, Stapleton-a thu anga i thawn a ni tiraw?” a ti a.

Mrs Lyons-i chuan, “Ani’n ziah dan tur a sawi thlap a, a sawi ang chiahin ka ziak mai m a ni,” a ti a. Holmes chuan, “I pasal i ṭhenna tur chungchanga ukil rawihna leh inkhinna thila i pawisa senso rulhna tur chu Sir Charles-a hnen aṭangin i hmu thei ang tiin a hrilh che a?” a ti leh a. Mrs Lyons-i chuan, “Ni chiah e,” tiin a chhang a.

Holmes chuan, “Lehkha a ziahtir hnu che chuan in intiamna hmuna kal lo tur chuan a thlêm thlu leh ta che a,” a’n ti leh a. Mrs Lyons-i chuan, “Mi dang hnen aṭang emaw, hmun dang aṭang emawa pawisa ka dawn chuan a tan a tlawmngaihthlak lutuk dawn a, pa rethei tê mah ni se a neih sum zawng zawng pawh min pe mai ang tiin min hrilh leh ta a ni,” a ti a.

Holmes chuan, “Pa ngaihtuah kim ve fe zawng a ni. Tichuan, a tuk zingah chanchinbu i chhiar hma chuan Sir Charles-a thih thu chu i hre ta miah lo va?” a ti leh ta a. Mrs Lyons-i chuan, “Hre lo,” tiin a chhang a. Holmes chuan, “Inhmuhpuia Sir Charles-a i sawm thu chu sawi hlek lo turin Stapleton-a chuan a hrilh che a, chhia hial a chhamtir lo che maw?” a ti ta zel a.

Mrs Lyons-i chuan, “Tir e. Sir Charles-a thih dan chu a mak danglam riau va, thil awm dan dik tak hi an hâi lan vaih chuan rinhlelh kai hmasa ber tur ka nih thu min hrilh a. Min sawiṭhaih nasat em avangin ka ngawi ta reng mai a ni,” a ti ve zel a. Holmes chuan, “A ni ngawt ang; mahse, i ringhlel deuh tho a ni lo’m ni?” a ti leh a.

Tîm deuh hlek chung leh hnuai lam melh chungin Mrs Lyons-i chuan, “A chet dan chu a fel lo tawp tih chu ka hre ve tho alawm; mahse, ka lakah chuan rinawm sela a ruala ramhuai biak pawh ka la duh tho ta ve ang,” a ti ta phawng mai a.

Sherlock Holmes chuan, “Man buai tâwk lova in khaw chhuak thei hi nang phei chu i vannei hle-ah ka ngai. Chu bakah, i thu hnuaiah a awm a ṭul tih a hre ve reng a, chuti chung pawhin a tihlum mai lo che a, i vannei lehzual a ni. Thla eng emaw zat chhung chu kham kotlangah a nia i vah i vah ni. Mrs Lyons, tuk chhuah nuam le, kan chanchin i hriat zui thuai ka ring,” a ti ta a.

London aṭanga rêl lo kal kan nghah lai chuan Holmes chuan, “Kan harsatna leh kan chian lohna lai chu kan hmaah a tlu sawpin a inlar chiang zel e. He thil mak tak mai hi ka la sawi inzawm thiam thuai ang a, suahsualna lam chhuia ei zawngte leh hetiang chanchin zirtute tan chuan zir tham tak chu a ni ngei ang. Kum 1866-a Little Russia-a Grodno hmuna thil thleng te leh North Carolina-a Anderson-a te an thah thu te kha hei hian a phawk chhuak zeuh zeuh a; mahse, a inzawm thui ṭhin lo. Zanin kan mut hma ngeiin he kan mihring hi ka kuta a awm loh a lê leh ka ti mai,” a ti a.

London rêl chu a lo thleng a, a chhung aṭang chuan Lestrade-a a lo chhuak a, Holmes-a chu zah takin a chibai a, a ngai sang hle tih ka hre mai. “Eng nge?” tiin Lestrade chuan a’n zawt a. Holmes chuan, “Pui tham tak a ni. Kan tih tur kan ṭan hmain darkar hnih kan la nei a. Chaw ei nan hmang ila a ṭha ang. Lestrade, he hmun hi i la tlawh ngai lo a nih chuan i tlawh ṭum hi i theihnghilh har fe ta ve ang,” a ti a.

[Rozami pachuau]

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 14
(Rozami Pachuau)

BASKERVILLE UISATHIAM

Sherlock Holmes-a hian fin tawk lohna emaw ni, tih dan ṭha lo emaw ni a nei ve a nih ngai chuan chung zinga pakhat chu a thil tih tur reng reng, a hun tak lo thlen hmaa sawi a ching lo tlat hi a ni. A chêtnaah reng reng hian hmuipui pu a ni tih tilang tura chutianga thil awm dan sawi kim dep chu a ching lo a ni maithei a. Chu bâkah, a sawi avanga thil fel lo a awm palh a hlauh avanga chutianga ngawih chuh ta pawh chu a ni maithei; mahse, a bula khawsa leh a thawhpuite tan chuan a hrehawm ṭhin kher mai.

Tun hma pawhin hetianga eng mah hre lova hmaa chhuak apiang tawng buak bawrh bawrh hi ka lo ching tawh a, ti lo thei lo dinhmunah ka lo ding ve nual tawh bawk; mahse, chumi zana kan han inkhalh chhuak ta ngawt mai chu a hrehawm ka tih pawl tak a la ni. Kan hmaah tih tur pawimawh leh pui tham tak a awm tih chauh ka hria a, he kan thil tih hi kan thil buaipui lai hmawr bâwkna a ni dawn tih pawh ka hria.

Mahse, Holmes chuan eng mah min hrilh chiang ve hlek lo va, rin dan erawh chu ka nei ve ruai chauh a ni. Phul raiah kan tlan a ni tih ka’n hriat chuan ka phûr thar leh sawt a, kan hma lam pana kan chuanna sakawr a pên apiang mai chuan kan hmaa tih tur pui tham tak chu kan hnaih deuh deuh tih ka hre chiang em em bawk.

Tawlailir khalhtu chu kan hma lawka a ṭhut avangin thu pawimawh eng mah a sawi ngam lo va, thu sawngnawi te te, thluak bur leh chaw bel khawih pha lo chi, hmeichhe inhmu khawm sawi àwm lek lek kan sawi kan sawi a. Frankland-a In tlan pelin Hall lam kan pan zel a. Hall kan va thlen chuan tlan lut lovin tawlailir aṭangin kan chhuk a, tawlailir chuan man kan pe a, Coombe Tracey lamah kan tir kir a; keini chu kein Merripit House panin kan kal ta a.

Kal pah chuan Holmes chuan, “Lestrade, i ngho i vuah em?” tiin a’n zawt a. Chu police chuan, “Ka kekawr ka hak phawt chuan ka kâwng zâwnah hian iptê a awm ziah a, ka iptê hi ka kâwng zâwna a inreh chhung chuan a chhungah hian eng emaw chu a awm ve ziah,” a lo ti duah a.

Holmes chuan, “Ṭha! Hei ka ṭhianpa nen pawh hian rikrum thil tawng turin kan inbuatsaih ve asin,” a lo ti a. Lestrade-a chuan, “Mr Holmes, he thil hi a tâwp i thleng teuh ta hle a. Tunah eng nge kan tih dawn le?” a ti sauh sauh va. Holmes chuan eng danga chhang ta lo chuan, “Nghah,” tih ngawtin a lo chhang a.

Lestrade-a chuan a bul vel chu a’n melh kual a, Grimpen Dûm-Hmun chunga chhûm leivâk zîng chuai mai te chu melh chungin, “He lai hmun hi intihhlim nan chuan a ṭha hlek lo vang. Kan hma lamah sawn In aṭangin êng lo chhuak ka hmu,” a ti leh ta a.

Holmes chuan, “Saw saw Merripit House a ni a, kan thlen tum ram chu a nih saw. Dingdihlîpin kal u la, ṭhenawmpa’n a ei ruk tling khawm aṭanga Pathian ram thawhlawm a pek tam ṭhinzia thu in sawi ṭum aia ringin tîtî suh u,” a ti a.

Fimkhur tak chuan In lam kan pan phei ta zel a; mahse, In aṭanga hlam zahnih velah chuan Holmes chu a ding a, “Hemi thleng hi a tawk ang. Kan ding lamah lungpui tohlawt vel hi khaw thlir nan a remchang khawp ang, inphen nan pawh a ṭha tho vang,” a ti ta a. Lestrade-a chuan, “Hetah hian kan châmbâng ang a maw?” tiin a’n zawt a.

Holmes chuan, “Ni e, he lai aṭang hian kan lo lambun dawn a ni. Lestrade, he lai kawkel hi luah la, Watson, In chhungah khan i lut tawh maw kha? Pindan awm dan i hre thei em? He lam rawn deptu, tukverh zawng daikalh saw eng tukverh nge?” a’n ti a. Kei chuan, “Choka tukverh a nih hlawm ka ring,” tiin ka lo chhang a. Holmes chuan, “A nih leh a piaha êng deuh zâwk saw?” a ti leh a.

Kei chuan, “Saw chu chaw eina pindan a ni e,” ka lo ti a. Holmes chuan, “Tukverh puanzar an hlîm a nih saw. A ram awm dan hi i hre deuh ber ang. Va phei la, eng nge an tih va en teh ang che; mahse, i awm ve tih hriattir hlek suh,” a ti a. In lam pan chuan ka dingdihlip phei ta hlau hlau a, pangpar buk leh pangpar hungna bangte phên phei zelin tukverh aṭanga ka bih theihna hmun ka va thleng a.

Pindan chhungah chuan mi pahnih chiah, Sir Henry-a leh Stapleton-a an lo ṭhu a. Coffee no an inchhawp a, meizial an zu ve ve a. Stapleton-a chu phûr âwm fahran hian a ṭawng bawrh bawrh a; mahse, Sir Henry-a hmai chu a dângin a ṭhuthmunah chuan a rilru a bet lo hle niin a lang. Chutia ka thlir reng lai chuan Stapleton-a chu a tho va, pindan chhuahsanin an In bula bûktê dang an sakah chuan a va lut a.

Chutih lai chuan Sir Henry-a chuan a coffee novah chuan coffee a lo inthlit belh leh a. Stapleton-a chu bûktê chhungah chuan a lut a, bûk chhung aṭang chuan thâwm mak angreng fe hi a lo chhuak a. Stapleton-a chu bûk chhungah chuan rei awm lovin a lo chhuak leh thuai a, In chhungah chuan a lut leh a. Chu veleh ka ṭhiante awmna lam panin ka tlan kir leh ta thuai a.

Ka thil hmuh ka va sawi zawh chuan Holmes chuan, “Watson, hmeichhia chu a awm ve lo maw?” a ti a. Kei chuan, “Awm lo,” ti ngawtin ka lo chhang a. Holmes chuan, “Pindan dangah êng a awm hlek si lo va, choka chauh a ên si chuan khawiah nge a awm ve tak ang?” a ti a. Kei chuan, “A awmna tur âwm ka hre lo tawp mai,” ka lo ti ve mai a.

Nichin deuh khan Grimpen Dûm-Hmun chunga chhûm leivâk a zîn thu kha ka sawi tawh a. Chu chhûm chu kan lam panin a lo tawlh phei a, hniam deuh takah chuan a buk luih mai a. Thla êngah phei chuan vur hlâwm a ang rum rum mai. Holmes chuan chhûm chu a’n melh a, hriat tham mang loh hian a phun nawk nawk a, “Watson, kan lam a rawn pan tlat mai,” a’n ti chhuak phawng mai a.

Kei chuan, “A pawi tham em ni?” tiin ka lo zawt a. Ani chuan, “Pawi tham teh reng mai. Ka remruatna zawng zawng bawhchhe vek theitu awm chhun ti hial ila a dik ang. Kan ṭhiana pawh chu a awm rei tawh lo’ng chu maw. Hei dar sawm a ri tawh a. A lo chhuah laia he lai hmun hi chhûmin a lo la thlen hman loh chuan kan hlawhtlingin a nunna pawh kan la chhan hman ang,” a ti ta hial a.

Kan chung lam vansangah chuan khua a thiang kûk mai a, thla chanve a de a, arsite pawh a de chiai a. Kan hma lawkah chuan Merripit House chu a ding luah a, pindan êng pakhat chu a thim ta hmak a, chhiahhlawhhovin an muthmun lam panin choka an kalsan ta a ang hle mai. Chaw eina pindan chauh chu a êng tawh a, a chhunga mi pahnih awmte lah chu an rilru a inang lo hle ta ve ang.

Chhûm leivâk chuan In lam a hnaih tial tial a, a hmawr fêm phei chuan tukverh a va dek pha viai viai tawh a. Huan sir lehlam phei chu a hmuh theih loh dêr tawh mai. Kan hmuh lai ngei chuan chhûm chuan In chu a tuam a, a chhâwng hnuai lam chu khuh bovin a chhâwng chung lam chauh chu a lang a, In chhâwng chin chu chhûm lawng te pawh awm ngai a nih chuan a ang hle ta ve ang.

Kan bula lungpui chu Holmes chuan a’n bêng a, a awmhmunah a ke a per ṭawk ṭawk a, “Tun aṭanga minute sawm panga ral hmaa a lo chhuah loh chuan kawng hi a hmuh theih tawh miah lo ang a, kan kut pawh keimahni ngei pawhin kan hmu thei lo vang,” a ti a. Kei chuan, “Hmun sang zawk lam panin kan tawlh hla deuh dawn em ni?” ka’n ti a. Holmes chuan, “Ni e, a ṭhain ka ring,” a lo ti a.

Chhûm leivâk chu a tawlh ve zel a, keini pawh In aṭanga mel chanve vel laia hlaah kan tawlh hla a; chuti chung pawhin chhûm chu a lo tawlh ve zel tho mai. Holmes chuan, “Kan tawlh thui lutuk tawh. Kan puihbawm theih hmaa a ûm phâk chu ka rem ti thei lo vang. Eng le khaw le, kan awmhmun hi kan tlansan tur a ni lo,” a ti a. A ṭhingṭhi a, leiah a beng a zu chuktuah a, “Lawmawm lutuk! A lo chhuak tawh niin ka hria,” a’n ti a. Phûl rai reh duk maiah chuan ke pên thâwm kan hre ta a.

Lung phêna biru chungin chhûm leivâk khuh phâk bâk chu kan thlir reng a. Ke pên ri chu a lo ring tial tial a, chhum kâr aṭang chuan kan mi nghah chu a lo chhuak a, a vel chu mak ti deuh mai hian a thlek zak zak a. Chhûm leivâk kâr aṭanga thla ênga a lo chuang chhuak ta thut chu a mak a ti ve deuh ni ngei tur a ni. Kan awmna bul lawk kawngah chuan a lo kal a, kan kal pel ta zel a. A kal pah chuan awm nuam lo tih hriat tak maiin a vel chu a melh ruai ruai zel a.

Holmes chuan, “Ngawi r’u. Inring r’u le, chu a lo kal!” a ti a, puakruk kau ri ka hre nghal zat a. Chhûm leivâk zîng chûk lam aṭang chuan ri deuh tlet tlet a lo chhuak a. Chutih lai chuan kan awmna aṭang chuan chhûm leivâk chu hlam sawmnga vela hlaah a la awm a, eng thil tak lo zuang chhuak ang maw tiin kan thlir ṭhap a.

Holmes-a bul lawka awm ka nih avangin a hmel chu chiang takin ka hmu thei a. A hmel chu a dâng hle mai a, a phûr hmel hle bawk a, a mitmeng pawh thla êngah chuan hmuhnawm thamin a fiah bawk; mahse, a mitmeng chu a lo danglam thut a, hma lam chu ngun em em maiin a melh a, mak tih luat avangin a hmui chu tlemin a chîp lo deuh hlek bawk.

Chutih rual rual chuan Lestrade-a chu mangang deuh maiin a ṭê tuar a, hmai lei nawr zawngin a bawkkhup ta thlawrh mai a. Ka zuang tho vat a, awmze nei vak lo hian ka puakruk ka’n vuan ve ngawt a, chhûm leivâk zing aṭanga thil mak tak mai lo chhuak chuan ka ngaihtuahna a chawk buai zo vek bawk.

Ka thil va hmuh chu uisathiam zawng a ni ngei mai, uisathiam lianpui mai, dum zuar mai a ni a, thi thei mihring vulh zingah chutiang uisathiam chu ka la hmu hlek lo. Uisathiam kâ aṭang chuan mei a alh chhuak zuai zuai a, a mit pawh a meng de rû a, a hmui leh a kamsir vel chu a dêt hian a dê ṭhut mai bawk a.

Chutiang thil chu mihring nihphunga thisen vawt tak tan pawh a râpthlâk vei nen rilru lama hlauhthawnna nei tan chuan a aia râpthlâk leh hlauhawm zawk reng reng a awm lo ta ve ang. Pên sau tak mai hian chu uisathiam dum zer zur chu kan ṭhianpa kalna lam pan chuan a tlan a. Mak kan tiin kan râp thlu a ni ang chu kan zâwn a lo thlen pawh chuan kan lo melh liam ringawt a.

Chutah kan tih tur hre chhuakin min pelh chiah chuan Holmes nen kan han kâp rual ṭhawih a. A tu zawk emaw chuan kan fuh a ni ngei ang, a rûm ngul ngul a; mahse, ding duh chuang lovin a tlan zel a. Hla deuh hlekah chuan Sir Henry-a lo hawi lêt lai ka va hmu a, chu thil râpthlâk tak mai a han hmuh chuan mangang lutukin a kut a phar lawm lawm a. Thla êngah chuan a hmai chu dâng var vekin ka va hmu hial mai.

Mahse, uisathiam rûm thâwm khan kan hlauhna zawng zawng a nuai reh ta vek niin ka hria. Nâ a tih ve theih chuan a thi ve thei tihna a ni a, thi thei na nâ nâ chu kan that thei tihna a ni. Chumi zana Holmes-a han tlan chu mihring tlan ka hmuh tawh azawngah chuan ṭhahnem a la ngai ber awm e. Tlan chak ve tawk hlein ka inhria a; mahse, Lestrade-a ka tlansan nasat tluk zetin Holmes chuan min tlansan hla ve mai.

Kan hma lawkah chuan Sir Henry-a chu a ṭê tuar tuar a, uisathiam lah chu a rûm hum hum mai bawk a. Uisathiamin Sir Henry-a a zuan a, a bawh thlu lai chu ka va hmu hman chiah a. A hrawk a peh thler vek ka lo ring hman tawh a; mahse, chutianga a tih hma chuan Holmes chuan a puakruka a mu inthun zawng zawng chu chu ramhuai kah nan chuan a hmang fai ta vek a. Uisathiam chu khawngaihthlak deuh maiin a’n rûm leh a, chutah a let tawp a, a che zui ta lo va.

Ka puakruk chu a lu nen chuktuahin a chêt zui leh vaih chuan ka kâp ngei ang tiin ka’n inring nghal a; mahse, a lo thi reng tawh mai. Sir Henry-a lah chu a tlûkna hmunah nikhaw hre lovin a let reng a, a kawr nghawng phelhin a taksa kan han en vel a; mahse, hliam eng mah tuar lovin kan lo chhan hman hlauh mai a. Holmes-a lawm lutuk pawh a ṭawngṭai ve nualin ka hre mai!

Chutah a lo meng diar diar a, Lestrade-a zu damdawi (brandy) ken chu a’n khiat khawlh a, a lo meng chhuak ta a. A lo men chhuah chuan Sir Henry-a chuan, “E khai! Eng thil nge ni? Kha thil kha eng nge ni le?” a’n ti a. Holmes chuan, “A thi tawh. In chhungkaw bawh buaitu thlarau sual chu kan zalh fel ta,” a lo ti a.

Chu thlarau sual chu kan kiangah a let reng a, a taksa chu a hrawlin a chak pawh a chak elkhen ta ve ang; mahse, uisathiam an tih ang dik tak chi hi a ni lo va; Ina khâwi mai mai chi pawh a ni hek lo; a inchawh pawlh vel ni maiin a lang. A sathiam ve deuh roh va, keipui tiat zet a ni bawk. A thih hnuah pawh a khabe aṭang chuan meialh dumpawl lam deuh la thlauh fovin a lang a, a mit pawh mei alhin a la hual rengin a hriat bawk.

A hmui de ṭhuk mai chu ka’n chûl a, thimthamah chuan ka kut chu a lo de ve nghal a. “Phosphorus a nih hi,” ka’n ti a (Faws-fa-ras - Bawlhlo chi khat aṭanga siam chhuah a ni a. Mei ang chiah a nihna lai a awm a; a alh erawh a na ve lo. Thingthlavar pawh hi hetiang lam chi bawk hi a ni. Cinema-a mei alha an zuan luhna leh an zuan chhuahna tam tak hi he ‘Phosphorus’ hi a ni. Pll)

Holmes chuan uisathiam ruang chu a hnîm a, “A fing-sual thiam kher mai. Ui hian rim dang a hriat theihna a hloh miah lo vang. Sir Henry, hetia hlauhlawpa kan han siam che hi chu ngaihdam kan ngai ngawt mai. Uisathiam hmuh ka lo inbeisei a; mahse, hetiang kher hi ka lo beisei lo a ni,” a ti a. Sir Henry-a chuan, “Ka nunna in chhanhim alawm le,” a lo ti a. Holmes chuan, “Chhanhim ngaiin kan siam atin alawm. Ding chhuak thei turin i chak tâwk tawh em?” a ti a.

Sir Henry-a chuan, “In zu-damdawi kha ka lo thâwk khat leh ang e, vawi khat chauh ka’n khiat leh ang a, a thar ang maiin ka chak leh tawh ang. Khai le, eng nge tih in rilruk tak?” a’n ti a. Holmes chuan, “He laia hnutchhiah che hi kan rilruk a ni. Thil dang han buaipui leh tur chuan i chak tawk tawh rih lo. Hetah hian lo awm la, a tu emaw ber hi chuan Hall lam panin kan kalpui ang che,” a ti a.

Sir Henry-a chuan din chhuah mai a’n tum a; mahse, a thâ a la ṭha tâwk lo va, a ke lêr thlengin a khur zawih zawih a. Kan kai ding a, lungpui chungah kan lawntir a, a kuta a hmai hup tlat chungin a khur hlawk hlawk a.

Holmes chuan, “Kan kalsan tawh ang che. Kan hnathawh hmabâk thawh a ṭul tlat a, mit khap kar tin mai hi a hlu em em vek tawh a ni. Tunah chuan thil awm dan kan hre chiang ta a, kan mi duh man chhuah a ni kan hna ni ta. Kan mihringa chu Inah chuan kan hmu tawh hlekin ka ring lo, kan silai ri khan he a thil tum zawng zawng hi a tlawlh ta vek tih a hrilh hre ve tawh maithei a ni,” tih pahin Merripit House lam pan chuan sau deuh deuhvin a pên pawp pawp a.

Kei chuan, “A awmna aṭangin kan awmna hi a hla deuh va, chu bâkah, chhûm leivâk hian kan silai ri kha a thup ve deuh maithei a ni,” ka ti a. Holmes chuan, “A uisathiam ko kir tur khan a zui ve ngei ang tih ring tlat rawh. Ni lo, tunah chuan a tlan bo daih tawh ang! Mahse, a In hi kan va dap ang a, kan va chian mai ang chu,” a ti a. Kawngkharpui chu a lo inhawng a, kan tlan lut a, pindan tin mai chu kan fang lawr ta zung zung a, a chhiahhlawh putar pawh chuan mak min ti kher mai.

An chaw eina pindan chauh lo chu a lo thim ṭhiap a, chaw eina pindana khawnvar chu Holmes chuan a chuh lawk a, pindan tin mai chu a fang lawr ta zeih zeih mai a. Kan mihringa hmel reng reng kan hmu lo va; a In chhâwng pindan pakhat erawh chu a lo inkalh a. Lestrade-a chuan, “He pindanah hian tu emaw chu a awm a ni, a thâwm ka hre tlat. Kawngkhar hi i hawng ang u,” a ti a.

Pindan chhung aṭang chuan rûm thâwm fiah lo tak leh thil han innâwk ri hi a lo chhuak a. Holmes chuan kawngkhar kalhna chung zâwnah tak chuan a’n tlawh dawt a, kawngkhar chu chhung lamah a intheh hawng ṭhuai a; puakruk hûm chungin kan pathum chuan pindanah kan tlan lut ta a; mahse, kan mi suala hmel hmuh tur reng reng a lo awm lo va; mahse, kan beisei loh leh mak kan tih zawng tak mai thil dang kan va hmu ta thung a.

Chu pindan chu thil hlui eng ilo dahna atana cheibawl hi a ni a, pindan bang velah chuan bawm tam tawk tak, a panga darthlalang vuah hi a lo inhûng thluah a, chumi chhungah chuan phengphehlep chi hrang hrang leh phengphehlepa chang mai tur pangang chi hrang hrang, a In neitupa hlauhawm takin intihharh nana a hman chu a lo awm dul mai a.

Pindan laiah chuan sût a ding a, chu sûtah chuan mihring a inphuar bet a, a’n phuar vel nasa khawp a, a phuarna chuan a hliah zo deuh vek a, mipa nge hmeichhia tih pawh a hriat mai hleih theih loh. Chu an mi phuar beh hrawkah chuan hrûkpuanin an hrêng a, sûtah chuan a hrawka an hrênna chu an suih bet leh chiah a.

Sûta an mi phuar beh chu a hrawka an hrênna mai bâkah a hmai chuan hnuai lam chu puan dangin an hreng leh a, chumi chungah chuan mitmeng dum ṭha tak, lungngaihna leh zahna mitmeng a lo lang a, a mitmeng chuan zawhna tam tak a pâi bawk.

An phuar behna chu kan han phelh thuai thuai a, kan han phelh fel chuan Mrs Stapleton chu kan hmaa chhuatah chuan a ṭhingṭhi hnawk a, a lu nalh tak mai a han kûn chuan a hnunga hruihruala vuakna hnu-hma chu ka hmu nghal a. “Kan mi suaksual-nunrawng-hmelchhe-zahpuiawm-pa chuh! Lestrade, i zu-damdawi bûr kha! Ṭhutthlengah ṭhuttir rawh! A thidang a nih hi,” Holmes chuan a’n ti a.

Mrs Stapleton chuan a mit a rawn meng a, “A him khawchhuak em? A tlan chhuak thei em?” a’n ti nghal a. Holmes chuan, “Ka pi, kan lak aṭang hian a him thei tawh hlei nem,” a lo ti a. Mrs Stapleton chuan, “Ni lo, ka pasal ka ti lo; Sir Henry-a maw le. A him em?” a ti leh a. Holmes chuan, “Him e,” a lo ti a. Mrs Stapleton chuan, “Uisathiam ve kha?” a’n ti leh a.

Holmes chuan, “A thi tawh,” tiin a lo chhang a. Mrs Stapleton chu lungawi âwm takin a’n thaw hawk a. “A va’n lawmawm em! A lawmawm a nih chu! Karei, kan mihringa hi! Min nghaisak dan hi han en ve teh u,” tih pahin a bân pharin a kawr ban a’n hlim a, a lo pem nuai mai a, a râpthlâk kher mai.

Mrs Stapleton bawk chuan, “Hei hi chu eng mah tham a ni lo, a na miah lo! Ka rilru leh ka thlarau hi a nghaisa retheiin a tithangtlâwm lutuk em mai. Min hmangaih ve nia ka hriat chhung chuan min tiduhdah ta deuh pawh ni se, min tikhawhar ta deuhvin min bum mah se ka tuar thei. Engkim hi ka tuar ve thei mai; mahse, a hmanrua chauh ka lo nih hi,” tih pahin a ṭap ta zawih zawih mai a.

Holmes chuan, “Ka pi, i theih tawk i tih ve hi a tan thil ṭangkai a ni tak tak lovin a ṭhat phah tak tak chuang miah lo. Chuvangin, a awmna tur hmun min hrilh mai rawh. A suahsual bawlna thila i lo ṭanpui tawh a nih chuan tunah hian i sual tlen fai nan min han ṭanpui ve thung teh le,” a ti ta a.

Mrs Stapleton chuan, “Tlan bona tur hmun khat chiah a nei. Dûm-hmun lai takah hian thil laih chhuahna khur hlui a awm a. Chutah chuan a uisathiam pawh a khung ṭhin a, chutah chuan tlanchhiat palh thut pawha awm nan hmun a buatsaih lawk bawk. Chu hmun chu a tlanchhiatna tur a ni,” a ti a.

Holmes chuan khawnvar chu tukverh chhanah a’n lek a, pawn lamah chuan chhûm leivâk chu a lo phui tlat a, “Han en ta che u, zanin angah hi chuan Grimpen Dûm-Hmun kalkawng chu tu pa mahin an hmu thei lo vang,” a ti a.

Mrs Stapleton chuan nui chungin a kut a’n bêng a. A mitmeng leh a ha chu a de ṭhet ṭhet hian a hriat a; mahse, a hmuh zu nuam hlek lo va! "A kal lam chuan kawng chu a hmu maithei a; mahse, a chhuak leh tawh ngai lo vang. Engtin nge zanin angah te chuan kalna tur chhinchhiah nana tiang phun tlar a hmuh theih ang? Kan pahniha kan phun a ni a, Dûm-Hmun pan nana kan tih a ni. Awi, vawiin te khan lo va pawt phawi ta vek ila ṭha tur! Lo pawt phawi ila chu in duha in kaih leh, in duha in kaih khaikhup atan in kutah a awm mai tur a nia le,” a ti ta vawng vawng a.

Chhûm leivâk a kian hmaa va ûm zui chu a sâwt dawn miah lo tih pawh a lang tlang ta reng mai. Chuvangin Lestrade-a chu Stapleton-a te Inah chuan kan hnutchhiah a; Holmes nen chuan Sir Henry-a hruaiin Baskerville Hall lamah kan kal ta a.

Stapleton-a te nupa chanchin chu zêp theih ni ta hek lo, a hmeichhe hmangaih chu mi nupui a nih thu Sir Henry-a hnena puan chhuah a ngai ta miau mai a; mahse, pachang takin chutiang thu dengkhawng pawh chu a la tuar thei ta zel. ‘Pachang takin a tuar thei’ ka’n ti tak nain a khua a sik zui ta chiam mai a, Dr Mortimer-an a enkawl ta nghe nghe a. Sir Henry-an Hall a luah hmaa taksa hriselna lama malsawmna a dawn ang a dawn leh theih hmaa khawvel hêl chhuaka zin dun an tum ta nghe nghe a.

Tunah chuan he ka thu ziak mak danglam tak mai hi a hmawr bawk ka tum hnai tawh a, chhiartute pawhin hlauthawng leh rinhlelhna mitmeng nen min lo thlir rei tawk thawkhat ta bawk vei nen, kan tawpna lah a lungchhiatthlak viau bawk si.

Uisathiam kan tihhlum tuk tuk leh chuan Mrs Stapleton chuan Dum-Hmuna an kawng zawn chhuah chu min kawhhmuh a. A pasal um zui nana chuti taka chu hmeichhia chu a phûr avang chuan a pasal chuan a lo tikhawngaihthlak hle tih a hriat mai theih a.

Dûm-Hmuna lei sakhat zingzum inkhawh lut hmawra dingin Dûm-Hmun tiang inphun kawi phei thliah chu kan hmu a. Chu tiang inphunna zul-zui chuan kan han kal ve chhin a, kan han dai pelh palh changte chuan dûm chu tawp chin nei lovin a hniam ruai ruai zel a, chu bakah, dûm rim chu a chhe em em bawk a.

Thawk khat phei chu dûm-a thil pakhat lo lawr chu Holmes chuan a va la mai dawn a, a kâwng thleng hmawkin dûm chu a dai a, kan kai chhuak leh a. Keini chuan kai chhuak lo phei ila chu a pil hlen daih ta ve ang. A thil va lak chu pheikhawk dum a lo ni a, a pangah chuan, ‘Meyers, Toronto,’ tih a lo inziak a. Holmes chuan, “Chirh-dûma inbual phah nana hmanah chuan a ṭha tawk viau bawk e. Kan ṭhian Sir Henry-a pheikhawk bo kha a nih hi,” a ti a.

Kei chuan, “A tlan pahin Stapleton-an a paih a ni ang,” ka lo ti a. Holmes chuan, “Ni chiah e. Uisathiam a hnimtir a, a chhuah fel hnuin a la keng ta zel a; mahse, a chan a chhe ta tih a hriat chuan a tlanchhiat a ṭul ta a, a tlanna lamah pawh a keng ta zel ni tur a ni. Chutah he lai a lo thlen hian a paih a ni ngei ang. Hemi thleng hi chuan him takin a la kal zel tih hriat nana kan hmang mai lo hi chu hmanna dang kan nei teh chiam lo,” a ti a.

Ngaih dan tam tak chu nei zui thei teh meuh mah ila a hriata kan hriat theih tur chin atan, chu bak chu khuanu’n a duang lawk lem lo a ni ngei ang, eng mah kan ang zui thei ta lo. Dûm-hmunah lah chuan hniak-hnu han hmuh theih miah loh turin rahna hnu apiang chu a rawn inhnawh phui leh vat zel a.

Eng emaw chen kan kal hnu chuan lei sakhat deuh lai kan va thleng a. Kan thlen rual rual chuan a hmel hmuh mai inbeisei deuh tak chungin kan han hawi kual ruai ruai a; mahse, a hmel reng reng a lang lo va, sulhnu hmuh tur pawh a awm lo.

Chuti a nih chuan kan khawngaihna damdawi mamawh, pa dehkhirh lutuk chu Grimpen Dûm-Hmun khawi laiah emaw a inphum a ni ang tih rin loh rual a ni lo. A inhumhimna thliarkar tlan thleng hman lovin Stapleton-a chu a tlanchhiatna lamah a vanduai ta a ni chiang mai.

Chu lai thliarkarah chuan hnu-hma hlui eng eng emaw kan hmu a. Thil laih chhuahna khur hlui pawh kan va hmu ngei bawk. A bul lawkah chuan eng ilo lai chhuaktute bûk hluite kan hmu a, chu lai dûm rimchhe lutuk leh boruak hrisel lo in-irh chhuak ṭhin chuan a um bo ta hlawm a ni ngei ang.

Bûk pakhatah chuan ban pakhatah khaidiat a lo inthlung a, a bul velah chuan ruh nawi a awm ṭeuh va, chu lai hmun chu a uisathiam thlunna hmun a ni ngei ang tih chu a hriat mai. Chung ruh nawi zingah chuan ui ruang khel filh tawh a awm a, a bul velah chuan ui hmul buang a tla ṭeuh bawk a.

Holmes chuan, “Khai, Mortimer-a chuan a ui bo chu a hmu leh ngai dawn tawh lo a nih hi. He lai hmunah hian thil thar hmuhnawm tak, kan hriat phak loh eng mah a awm lo ve. A ui chu kan val-nunrawnga hian a thukru mai thei a; mahse, a râwl erawh chu a thukru tel thei lo va, chuvangin, chhûnlâwnah pawh a rûm ri khan phûl rai a nghawr ta ṭhin a ni.

"Mamawhna tur ṭul zual bik a neih hunah chauh Merripit House bula an bûktê chhungah khan a dah ṭhin a ni ngei ang. He lai ṭîna thil ban hi a ui a chulhna a ni ngei ang. Hei hi a nih dawn hi a mei alh bûr chu. Baskerville chhungkaw chungchanga uisathiam hrâng a awm thu a hriat aṭanga a ngaihtuah chhuah chawp mai mai a ni ang.

“A thil tih dan hi a fin-vervek-thiamthlak hle a ni. Khatiang ui ṭihbaiawm kha chuan mi tâng tlan chhuak te ang te pawh kha phul raiah han ûm ta mah se tlan hlum tawp mai loh chu tih leh tur dang reng reng a nei miah lo. Hetiang ui chanchin hi chu he lai thingtlang mi mawl awm khawm hian an ngaihven zui ngam dawn lo tih a hmu pha reng a ni ngei bawk ang.

"Watson, London-a kan awm lai khan ka hrilh tawh che a, ka’n hrilh nawn leh pek ang che. Hetiang mi hlauhawm bitum tur hian tu ma’n min la ruai ngai lo,” tih pahin a kut chu phul rai lamah a'n phar a.

[Rozami pachuau]

SHERLOCK HOLMES
THE HOUND OF THE BASKERVILLES
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 15 (Last chapter)
(Rozami Pachuau)

THLIRLETNA

November thla, sahmulphahthla tia an lo sawi fo ṭhin tawp lam a ni a, Holmes nen chuan zan khat chu kan ṭhu dun a, chhûm a tamin khaw awm dan chu pa ngaihtuahna nei mang lo duh dan ni awm fahran hian a nuam lo riau va. Baker Street-a kan pindan chhungah chuan meilum kan ai a. Devonshire lama kan va chet nek hnuah khan Holmes chuan thil pui tham tak tak pahnih a khawih zui leh tawh a.

Pakhat chu Colonel Upwood-a nunrâwn thu-hla a ni a, chu chuan Nonpareil Club-a lehkhaden chungchanga thu thang nalh lo tak a khawih tel nghe nghe. Pahnihna chu Mlle Carere-i thih chungchanga a nuhrawn, Mme Montpensier a chhan thu-hla vel a ni. Mlle Carere-i thih chungchang ka’n ti leh ngawt pek a, a thi tawp lo va, thla ruk hnuah nung dama New York-a an hmuh mai bakah pasal a nei lehnghal. Holmes chuan Mme Montpensier chu an puhna dik lo tak aṭang chuan a thiar fihlim hlauh nghe nghe.

Hlawhtlinna pakhat aṭanga hlawhtlinna danga ka ṭhianpa chu a zuan kai zel theih avangin a hlim hle a, chuvangin, Baskerville chhungkaw thila ka hriat thiam loh lai leh thil awm dan dangte chu sawi turin ka cho chhuak thei hlauh mai. A dik chauh chuan he hun hi ka lo nghakhlel em em a, ka lo thlir ru veng veng ṭhin.

A chhan pawh thil dang a buaipui zui zel chuan a rilru-ah thu mu hnu chu a cham bantir reng duh lo ang a, a ngaihtuahna zawng zawng chu nunhlui chhui nan hmang lovin vawiina a tih tur ngaihtuah nan a hmang zo vek ang a, nikhua a lo rei chuan a mangnghilhin a theihnghilh zui mai ang tih ka hlau hlel lo a ni.

Chutih lai chuan Sir Henry-a leh Dr Mortimer-a chu London-ah an awm ve a, khawvel hrût chhuaka zin an tum lai mek a ni. Chumi ni chawhnu chuan min rawn tlawh a, chutia min rawn tlawh takah chuan Baskerville chhungkaw thil han sawi zui pawh chu thil tih awm loh a ni lem lo.

Holmes chuan, “Thil awm dan kha keini, khawi aṭanga inṭan nge ni a, khawi zawngin nge a kal a, eng vanga lo inṭan nge ni a, eng vanga khatia kal ta zel nge tih hre bulfuk lova lo buaipuitu tan chuan a khirhin hriat thiam a harsa a; mahse, Stapleton-a inti tan erawh chuan thil lang tlang sa leh harsa lo tak a ni.

“Ṭum hnih chu Mrs Stapleton ka kawm leh hman tawh a, chuvangin kan thil buaipui kha a letling zawng pawhin ka hre chiang viau tawhin ka hria. Ka thil chhinchhiahna chhuarah khan hemi chungchang ka ziah tlemte chu ‘B’ huang chhungah i hmu thei ang,” a ti a. Kei chuan, “I hriat dan ang angin han sawi mai zawk la a ṭha zawk ang a,” ka lo ti a.

Holmes chuan, “Ni e maw le, sawi hmaihte hi ka nei nual ang tih pawh ka hlau hlel lo. Thil kal tawh hi chu thil ngaihtuah lai mek kan neih hi chuan theihnghilh a awl ve riau mai. Ukil thiam tak hi chuan an ṭan duhna zawng taka ṭang tlat tur hian chawlhkar hnihte inbuatsaihna hun an nei thei a; mahse, kei zawng thil pakhat aṭangin thil dangah ka pakai zel a, ukil thiamho ang chuan a sawi lamah chuan ka che nalh thei lo vang.

"Tunah pawh Mlle Carere chungchang hian Baskerville Hall chungchang kha a luahlan leh titih der tawh a ni. Naktukah buaipui tur thil dang ka hmaah an rawn chhawp leh maithei a, chu chuan Upwood-a chungchang leh kan French nula chungchang hi a nuai reh leh titih mai ang. Kan uisathiam buaipui tak nek chungchang chu ka theih anga chiangin sawi ka’n tum ang a, theihnghilh leh sawi hmaih palh te ka neih chuan min lo hrilh zel dawn nia.

“Tisa thila ka chhia leh tha hriatna chuan an chhungkaw thlalak kha a daw lo tawp tih min hrilh a, kan mihringa kha Baskerville chhungkaw zinga mi a ni ngei tih ka hre ta a. Sir Charles-a nau, Rodger Baskerville-a fapa a ni a. Rodger Baskerville-a chu hmingchhe lailet tawpin South America-ah a tlan lut a, nupui nei lovin a thi ta ni awmin an sawi a nih kha.

"Mahse, nupui zawng pakhat na nâ na chu a lo nei ve a, fa pawh pakhat chauh a nei a, a fa chuan a pa hming a chhawm nghal a. Chu a fapa chuan Beryl Garcia-i, Costa Rica nula hmelṭha a nei a, Rodger Baskerville-a fapa, nupui nei ta chuan sum tam tham deuh a neih hnu chuan a hming chu Vandeleur tiin a thlak a, England-ah a tlan lut a, Yorkshire khaw chhak lamah sikul a din ta nghe nghe a ni.

“Hetia sikul a dinna chhan hi eng dang ni lovin England a panna lamah chuan a chuanna lawngah zirtirtu pakhat nen an inchhar a, chu pa tha leh tui ring chuan sikul ṭha tak din theih a inbeisei a, a din ta reng bawk a; mahse, chu a zirtirtu ṭhian chhar, Fraser-a chu a thi leh ta hlauh mai a, an sikul pawh chu a tihtlak loh zui ve ta mai a.

"Chutah Vandeleur-a te nupa chuan an hming chu Stapleton tiin an thlak a, an neih sum khawl sa ang ang leh an suangtuahnate chu England chhim lamah an pempui leh ta vek a, chutah rannung chanchin zirin a inlek buai zui leh ta a. British Museum-ah pawh phengphehlep chi khat chu he Vandeleur-a hming nen hian ṭhen hran hleih theih loh khawpin a inkungkaih nghet a, phengphehlep chungchangah na nâ na chuan thil hre ber pawl a ni hial ta ve ang.

“Tunah chuan kan tana he mihringin pawimawhna a neih vena chin kan chhui thleng dawn ta. Kan mihringa chuan ram zau tawk tak chunga lal a hrawt theihna daltu chu mi pahnih chiah an awm thei tih a hmu chhuak ta ni ngei tur a ni. Devonshire-a a va kal tirh chuan tum dan mumal a nei teh chiam lovin ka ring a; mahse, thil ṭha tih tuma kal chu a ni lo tawp ang tih ka ring sa thung, a chhan pawh a nupui chu a farnu anga cheibawl a duh tlat.

"A tum dan chu la zam fel ziktluak lo mah se a farnu chu bumna hmanrua atana hman a tum a ni ngei ang tih chu chawlhni tuka sa hmeh kher lo pawhin a hriat theih. A tum ber chu Baskerville chhungkaw In rochun chhawm a ni a, a tumna tihlawhtling tur chuan eng hmanrua mah a hmang hreh reng reng lo. Tichuan, a bul ṭan nan an chhungkaw In rochun bulah chuan hmun a’n khuar ve phawt a, chutah Sir Charles Baskerville-a leh ṭhenawm dangte nen an han inhmelhriatin an inkawmngeih chho ta zel a.

"Sir Charles-a chuan an chhungkaw laka titi thangva leng nalh lo tak, uisathiam chungchang a hrilh ta a, ama thihna kawngpui a sial ta a ni. Stapleton-a tiin a hming lam ve tawh mai ila, chuan Sir Charles-a lungphu chu a ṭha vak lo tih hriain a phut nasat deuh chuan a thi mai ang tih a hre kar a. A thil hriat chu Dr Mortimer-a hnen aṭanga a hriat a ni nghe nghe ang.

“Sir Charles-a chu pa puithu thei tak mai a niin uisathiam chanchin pawh chu a ngai thutak hle tih a hria a. Chet thawh dan tur chu a suangtuah chhuak ta vat a; mahse, a hmanraw hman chu tual thattu-ah puhin lo man chhuak ta pawh ni se, a tan chuan thil hlauhawm a tlem ngawt ang.

"Tih dan tur riruang a duan tawh hnu chuan a nalh thei ang bera a thil ruahman chu phurh chhuah dan a ngaihtuah ta a. Mi naran chu ni sela, uisathiam kawlh tawk tak an neih a, an thunun theih chuan an lungawi mai ta ve ang; mahse, ani, pa fing verther chungchuang deuh chuan a uisathiam chu ramhuai note ni awm takin a cheibawl thiam ta tlat a ni.

“A ui pawh kha London khawpuia Fulham Road-a awm, Ross and Mangles hnen aṭanga a lei a nih kha. A zuartute pawhin kha aia ui kawlh leh chak kha chu an nei tawh lo. Stapleton-a chuan a ui lei chu North Devon tlangah kaiin phûl raiah a kalpui a, tu ma hmuh mang lohvin a In a thlen a. Hetih lai hi chuan a phengphehlep ilo vel vaina lamah Grimpen Dûm-Hmun pal tlangna kawng a lo hmu chhuak hman tawh a, chuvangin, a ui pawh chu thliarkarah him takin a dah a. Hun remchang a chang ta ran mai a ni.

“Mahse, a hun remchang zawn chu a hmu mai bik lo. Sir Charles-a chu zanah chuan Hall aṭang chuan a vak chhuak duh tlat lo va; Stapleton-a chuan a ui nen chuan phûl rai chu an kan zing ta dup mai a. Chutih lai vel chuan thingtlang mite’n an lo hmu a, uisathiam chanchin chu a thang nasa leh ta zual a ni.

"A nupui chu Sir Charles-a thlem chhuak turin a kar a; mahse, a nupui lah chuan a lo duh lo ve tlat a. A vau chhuak zo lo va, tharumte pawh a thawh ta hial a; mahse, a nupui chu a duh ang a tihtir thei ta lo a ni. Heti a nih avang hian eng emaw chen chu Stapleton-a chuan tih ngaihna a hre ta lo va.

"Mahse, Sir Charles-an a thil pek hlantu-ah a hmang ta hlauh mai a; chumi denchhen chuan Mrs Laura Lyons-i ngaizawng derin a pasal a ṭhen theih dawn phawt chuan a nei ngei ngei ang tiin a tiam a. Dr Mortimer-a thu râwn anga Sir Charles-a chuan Hall chhuahsan rih a tum tak thut avangin a chet vat vat a ṭul ta a.

"Mrs Lyons-i chu lehkha ziak turin a kar a, tlaia inhmuhpuiah sawmin Sir Charles-a chu Mrs Lyons-i chuan Stapleton-a duh dan ang chiahin a thlêm chhuak ta a. Mrs Lyons-i chu Sir Charles-a hmu lo turin a thlem thlu leh ta zel a ni. Heng thil zawng zawng hi Coombe Tracey-ah a va tifel vek a, a tlan haw leh vang vang a, a ui chu a duh ang takin a cheibawl a, a va hruai chhuak leh a.

"Phûl rai panna dai kawngkhar bulah chuan ui chuan Sir Charles-a chu a ûm ta chiam mai a, mangang lutukin Sir Charles-a pawh chu ‘Yew Alley’-ah a tlan ta chiam mai a ni. Chu lai hmun vela khatiang uiin mihring a han ûm ta chu a râpthlâk turzia chu i hre thiam mai ang. Sir Charles-a pawh chu a thinphu nasa lutuk tuar lovin a tlu hlum ta a ni.

"An inûm lai hian Sir Charles-a chu kawngah a tlan a; ui erawh hi chu kawng leh thing phun tlar inkar, phaitual hnimah a tlan ve thung a, chuvangin, ui hniak hi hmuh tur a awm lo a ni. Sir Charles-a a tluk tak hnu chuan ui chuan a va hnaih a, a va hnîm a; mahse, a lo thih tawh avangin a kalsan leh ta mai a. Chutia va hnîm tura a va panna lamah chuan hniak-hnu a hnutchhiah a, chu chu Dr Mortimer-an a lo hmu ve ta a ni.

"Stapleton-a chuan a ui chu ko kir lehin Grimpen Dûm-Hmuna thliarkarah a dah a, thil awmzia hre lovin police leh thingtlang miho an buai ta nuai nuai a, kan beng a lo thleng ve ta hial a nih kha. Chuti vel chu Sir Charles Baskerville-a thih dan chu a ni a. Tual thattu dik tak, a hlen chhuaktu tak chu rorelna hmaa hruai hleih theih lohvin a mawhphurtu chuan a sawngbawl a, a fing verther filawr hle tih i hmu thiam mai ang.

“Uisathiam chu tlang bum nan chuan duhthusama ṭha a ni a. He thila tel ve dangte chu Mrs Stapleton leh Mrs Laura Lyons an ni a. An tel ve han ti mah ila kut tak tak chu an hnawih ve hlek lo va, an hre ve riai riai lek chauh va. Stapleton-a chu an ringhlel hle a. Mrs Stapleton phei chuan Sir Charles-a chunga Stapleton-a kutthlak tum thu hi a hre nghe nghe a, uisathiam a kawl tih pawh a hre bawk.

"Mrs Lyons erawh chuan eng mah a hre ve lo va; mahse, an inhmuh hun tiam, amahin a ṭhulhsan tak, Sir Charles-a a hrilh hriat ve leh tawh si loh chuan a ngaih a ti ṭha lo hle a. A enga pawh ni se, he hmeichhe pahnih hi Stapleton-a thu hnuaia kûn an nih ve ve avangin Stapleton-a tan hlauhthawn tur a awm chiah lo. A hna chanve chu a zo tawh a; mahse, a harsa zawk leh a khirh zawk a la hmabak tlat.

“A tirah chuan Canada-a Baskerville ro luah theitu dang an awm chu Stapleton-a chuan a hre nghal mai bik lo pawh a ni ang; mahse, Dr Mortimer-a kâ aṭangin thil awm dan kimchang chu a hre ta tho va. Henry Baskerville-a lo thlen tur thu leh a lo thlen tur ni pawh a hre ve bawk a.

"Chutiang thu a’n hriat chuan Stapleton-a chuan ro luahtu tur chu Devonshire a thlen hmain, London-ah a thah theih mai lo’m ni tih a ngaihtuah a. Sir Charles-a thlêm chhuak tura a puih duh loh aṭang khan a nupui pawh a ring zo tawh lo va, chu bakah, a thunun theih loh mai hlauvin a mit hmuh phak lohva a awm pawh a phal ta lo va, London-ah a rawn hruai ve ta nghe nghe a ni.

“Craven Street-a Mexborough Private Hotel-ah an thleng tih ka hmu chhuak leh tlai khawhnu a. An thlenna hmun hi ka mi tirh chuan a va en ngei a; mahse, an thleng tih kan hre chhuak zo ta lo a ni. He Hotel-ah hian Stapleton-a chuan a nupui chu a kalh khum a, khabe hmul vuah chawpin Dr Mortimer-a kha Baker Street-ah a rawn zui a, chutah Northumberland Hotel-ah a zui ta zel a.

"Stapleton-a nupui chuan a pasal thil tum chu a hre thawi ve vuai vuai a; mahse, a pasal chu sakei hlauh takin a hlau tlat a; a chhan pawh a pasalin a nghaisak nasat ṭhin em vang a ni; dinhmun hlauhawma ding nia a hriat mi pakhat hnenah pawh chuan lehkha a ziak ngam ta lo a ni.

“Stapleton-a nupui chuan lehkha lo thawn palh ta se, a pasalin a lo hmuh vaih chuan a nunna thlengin a tuar ang tih a ring tlat a. Chuvangin, thumal hrang hrang chep thlain lehkhaip pawna a kut ziak pawh chu a tidanglam ta a. Chu lehkha chuan Sir Henry-a kut a thleng a, thil fel lo a awm tih a hre ṭan ve ta chiah a ni.

"Stapleton-a tan chuan Sir Henry-a thuamhnaw eng emaw neih chu a ṭul ta khawp mai. A chhan pawh a uisathiam hman ṭul ta thut se, a ui chuan Sir Henry-a rim a hriat hmasak a ṭul dawn tlat a ni. Chumi tih tum chuan a phe vel ta a.

"Rinhlelh rual lohvin chhiahhlawh, tu emaw ber kha pawisa ṭhahnem tham takin naupang lawm a ngaihtuahsak a ni ang; mahse, a pheikhawk han lak theih hmasak chu a thar a lo ni a, a hman tumna nen a inrem ta lo va. Pheikhawk thar duh lova a hlui zawk a lak bo tak tlat avang hian uisathiam tak tak kan chai dawn tih ka hre ta mai a ni.

"Thil thleng reng reng hi a mak a, a danglam poh leh bih ngun a ngai zual ṭhin a, a tihnawk zualtu leh a timaktu apiang hi a chhui dan dika kan chhui thiam chuan a tisamkhaitu a ni thei bawk. Tichuan, a tuk lawkah kan ṭhiante chuan min rawn tlawh a, Stapleton-an tawlailirin a rawn zui ve bawk a. Ka pindan leh ka hmel a han hriat mai theih danah he kan Stapleton-a hi suahsualna thilah hian mikhual mai zawng a niin ka ring lo.

“Tun kum thum kal ta chhung khan West Country-ah mi In rawk puitham tak tak ṭum li a awm a, a engah mah chuan a titu an man chhuak lo. Chumi zinga a hnuhnung ber, nikum May thlaa Folkstone Court-a thil thlengah phei chuan an chhiahhlawhin rukrupa chu a va phawk thut mai a; chu rukru, mahni chauhva che, hmai tuam chuan dimna leh tîmna chhe tê pawh nei lovin a lo kap hlum nghal hmiah mai a ni.

"Stapleton-a pawh hi hetiang thil te te-ah hian a lo intuai hriam tawhin kum eng emaw zah chhung chu thianghlim lo takin a lo nung tawh ṭhin a ni ang tih ka ring tlat. Pa chet thawh thiam tak mai leh inpeih sa reng mai a nihzia chu min han tlan bosan thut a, ka hming mi’n hrilh lêt sak aṭang khan kan hre mai thei âwm e. Khata ṭang khan he thil hi ka buaipui a, London-ah chuan a tan hun remchang a awm dawn lo tawp tih a hria a. Dartmoor lamah kir lehin Sir Henry-a lo thlen hun a nghak ta a ni,” a ti a.

Kei chuan, “Ngawi rawh! I la sawi dik tluang zel a; mahse, thil pakhat i sawi hmaih. Hetia a kal bo chhung hian a uisathiam chu engtin nge a lo awm ve?” ka lo ti a. Holmes chuan, “He thil hi ka ngaihtuah viau tawh a, thil pawimawh tak pawh a ni. Stapleton-a hian tu emaw, rinrawla neih mai theih a nei ang tih chu a rinawm sa a; mahse, chu a mihring chhawr chu a thil tih dan zawng zawng hrilhin a kutah a indah lo tawp ang tih a rinawm bawk.

"Merripit House-ah hian chhiahhlawh, Anthony-a a awm a, he pa hi Stapleton-a nen kum tam tak an lo inkawp tawh a. Sikula Stapleton-a a thawh lai daih tawhin an lo inhrawn tawh a ni. Chuvangin, Stapleton-a farnu anga lang kha Stapleton-a nupui a ni tih pawh a hre kiau ang tih a hriat sa. He pa hi a tlan bo ve daih tawh bawk.

“England-ah hi chuan ‘Anthony’ tih hming hi a lar lo hle a, Spanish leh Spanish-American-ah chuan ‘Antonio’ hi a lar hle thung a, hei hian ngaihtuah thui tak min neihtir thei ang chu. Anthony-a hian sapṭawng a thiam hle a; mahse, a ṭawng chu Mrs Stapleton ang deuh hian a khawngkhawbai leh zeuh ṭhin a ni. Keimah ngeiin Anthony-an Grimpen Dûm-Hmun a pal tlang lai hi ka hmu a, chuvangin, a pu awm loh hlan chuan an uisathiam hi a lo enkawl a ni ang tih a rin theih khawp mai; mahse, eng atana hmanah nge tih chu a hriat a rinawm loh.

“Tichuan, Stapleton-ate nupa chu Devonshire-ah an chhuk a, Sir Herny-a nen in chhuk ve ta thuai a nih kha. Hetih lai vela ka khawsak dan hi i hriat ve a dik ang. Chanchinbu aṭanga thu cheh thlak bel khawm ka endik lai khan ka mit aṭanga hla lo teah lekin ngun takin ka thlek a nih kha. Khatih lai khan rim tui chi khat ka hre ta tlat a ni. Rim tui inhnawih chi hi chi hrang hrang sawmsarih leh panga a awm a, sualna hnu chhuia vak vel chuan chutiang chu an hre hrang vek tur a ni bawk.

"Hetiang rim tui ka hriat theih leh theih lohvah hian ka hlawhtlinna leh hlawhchhamna a innghah chang a awm ve fo mai. Rim tui khan he thilah hian hmeichhia a tel ve tih min hrilh a, chuvangin, Stapleton chhungkua pawh khatih lai khan ka rilruah an lo cheng hman daih tawh a ni. Tichuan, uisathiam tak tak kan tawng dawn tih ka hre sa a, kan misual-hmai-thinghawng-vuah-ching-a pawh chu rin dan ka nei sa daih tawh a nih tak chu.

“Ka tih tur chu Stapleton-a enthlak a ni a; mahse, i kiangah ka awm chuan chu chu a theih dawn miah loh. Nangmah chawpin ka vai tihder ta vek che u a, London khawpuia awm anga ka lan chhung zawng khan phûl rai chhehvelah ka awm ve ta a ni. Hetiang thil puitham buaipui ta vekah chuan i ngaih ang em emin harsatna ka tawk lo.

"Coombe Tracey-ah ka awm deuh ber a, thil thleng eng emaw a lo awm a, bih hnaih ka duh chang chauhvin bûkah kha chuan ka awm a. Thingtlang naupang anga incheiin Cartwright-a kha a lo kal ṭhin a, ka hlawkpui ṭhin khawp mai. Stapleton-a ka enthlak lai chuan Cartwright-a chuan nangmah a enthla ve thung che a ni. I thu rawn thawn reng reng kha chu ka lo hmu ve vat zel a ni tih ka hrilh tawh che a, Baker Street aṭangin Coombe Tracey-ah a lo kal chhâwng zel a ni.

"I thu rawn thawn kha a ṭangkai hlawm khawp a, Stapleton-a chungchang bik i rawn sawina phei kha chu ṭangkai tak a ni. An nupa nihna ka hai lan theih phah a, ka dinhmun ka hriat chian phah bawk. He kan thil buaipui hi mi tâng tlan chhuak lo awm ve hlauh mai leh Barrymore-a te chhungkhat hnai a lo ni hlauh mai khan a tihnawk zual a. Ṭha tak maiin i ching fel thei a, a lawmawm; mahse, khatih lai khan keima pualin ka lo ching fel ve tawh bawk asin.

"Min rawn zawn chhuah vel lai kha chuan thil awmzia chu ka hre vek tawh a; mahse, dan hmaa thiam channa tham tur ka la dap chhuak lo mai a ni. Stapleton-an Sir Henry-a tihhlum a tum a, mi tâng tlan chhuak a tihhlum zawk hlauh zan pawh khan thil chu hre chiang teh mah ila thiam channa khawp kan ṭhâm fuh thei lo a nih kha.

"Chuvangin, tih dan awm chhun chu amah kha a mana kan man tak meuh meuh a ngai a, chumi ti tur chuan Sir Henry-a kha vengtu awm lova kan tlattir a, kan thlêm chhuah a ngai tlat a ni. Chutiang chiah chuan kan ti ta a; Sir Henry-a a phu hlum ṭhelh a, keini’n Stapleton-a nghawngah hruihrual kan vawm âwk ve thei ta bawk a; mahse, kan hruihrual vawm awh aṭanga tâl chhuakin suih loh pipu uaiin a inbilh hlum ta tho tho a nih kha.

“Khatia Sir Henry-a kan han tithlabar kha chu keima thiam loh a ni teh meuh nain chhûm lo zîng tur leh uisathiam mak danglam bik lutuk tak kha kan lo beisei phak lo a ni. Mi thiam pakhat leh Dr Mortimer-an an sawi dan chuan Sir Henry-a lungphu dik lo zui ta deuh hlek leh a thin nâ kha chu a dam leh mai ang a, khawvel an hrut chhuah hnuah phei chuan a thar anga a dam leh mai a rinawm viau a ni. Sir Henry-a tan chuan a hmeichhe hmangaih tawh laklawh han ṭhen a ṭul tlat kha a na ber ang. A chhan pawh hmeichhia khan a bum nia a hriat tlat vang a ni.

“Stapleton-a nupui chanchin kha tlem i’n chhui leh hlek teh ang. Stapleton-a a hmangaih vang emaw, a hlauh vang emaw, a hmangaih bakah a hlauh vang emaw pawhin Stapleton-a nupui khan a pasal thu kha a kawi a ngilin a zawm a. Stapleton-a duh dan ang ngeiin a farnu awmin a awm a. Chuti takin a thu chu awih mah se setana rawng han bawlpui tak tak dawn chuan a nupui khan kel ṭan chin a nei tlat zel a ni. A pasal hêk chhe si lova Sir Henry-a tirh bo dan a ngaihtuah a, a thiam ang kawng zâwng zâwngin a bei a nih kha.

“Stapleton-a te ang meuh pawhin thîkthu hi an lo pai ve a ni ngei ang. A remruatna zawma a nupuiin Sir Henry-a a’n lêm a, Sir Henry-an Angel note anga a nupui a’n en tak tak chuan insûm zo lovin a puak chhuak ve bawrh bawrh mai a nih kha. An inkawmngeih chu phal chin neiin Sir Henry-a chu Merripit House tlawh fo turin a kuai bet ta tlat a, chutia a tih phawt chuan engtikah emaw a hun remchang melh chu a hmu dawn niin a ring tlat a ni.

"Mahse, a tih tak tak ni a lo thlen chuan a nupui kha a hel ta tlat a. Mi tâng tlan chhuak thih dan kha hriain Sir Henry-an an Ina zanriah a rawn ei ve zan chuan an uisathiam chu In bula bûkte-ah an dah tih Stapleton-a nupui chuan a hria a. A pasala sual rawngbawl tur chu a theih angin a khap a, an intibuai ta fê a. Chutia an inhauh buai tak vak avang chuan Stapleton-a chuan hmeichhe dang a ngaihzawn tel thu te a sawi a.

"Chutiang thu a’n sawi takah chuan a nupui chuan huatna thinlung lo chu eng mah a pai ta lo va, Stapleton-a pawhin chu chu a hmuhin a chet sual phah thei dawn tih a hre nghal mai bawk a. Tichuan, a phuar bet a, Sir Henry-a hnena inralrinna tur thu eng mah sawi thei lo turin a kalh khum ta tlat a. A beisei dan chuan thil zawng zawng a fel vek hnuah a nupui chu thlêm lungawi leh a, a thu hriat ang ang pawh zêp tura hup beh a ni ngei ang; mahse, hetah hian Stapleton-a chuan thil a ngai sual duai a ni.

"Hmeichhia reng reng, Spanish thisen pu an nih phawt chuan chuti mai maia palzam chi an ni lo va, uite thlêma thlêm lungawi leh mai mai theih an ni ngai hek lo. Khai, my dear Watson, ka thil chhinchhiahna bu keu lova ka hrilh fiah theih chin che chu ka sawi zo ta a ang viau mai. Thil pawimawh hrilh fiah loh ka neih awm phei chu ka hre lo va,” a ti ta a. Kei chuan, “Sir Charles-a ang lek kha chuan Sir Henry-a hi chu hlauh vanga a thih mai chu a ring lo vang maw?” ka lo ti a.

Holmes chuan, “A uisathiam kha a kawlhin a ril a ṭâm em mai a, Sir Henry-an a hlauh-hlum loh chuan a seh hlum tho tho ta ve ang,” a ti a. Kei chuan, “A ni ngawt mai; mahse, thil pakhat a la awm. Stapleton-a chuan ro luahtu nihna pawh lo chang ta teh reng sela, tu hriat lohva hei leh chen a lo inthupna chhan leh thil dang hi engtin nge a sawi fiah ang a, a rochun tur chu engtin nge a khâwm mai theih ang?” ka ti leh ta a.

Holmes chuan, “A buaithlak tham viau ta ve ang; mahse, chutiang lehzel hrilh fiah tur chea mi han beisei chu i phût nasa lua a ni lo maw? Thil kan tawh leh thil awm tur erawh hi chu ka hre bik teh chiam lo. Mi pakhat chet dan tur a nih lek phei chuan ka hre lo khawp a nia; mahse, i zawhna chhânna tur ang deuh chu heti zawng hian chher chawp ka’n tum ang e.

“South America lamah tlan thla lehin a pian leh murna hmun aṭangin a nihna a thai lang ang a, England rawn tlawh hlek lo pawh hian thil a tifel mai thei; a nih loh leh London khawpuia a châm ṭul hun chhung rei lo teah chuan a insiam danglam chiam mai thei; a nih loh vek leh ṭhian tuihnai lo deuh tu emaw ruaiin ro luahtu a nihna a innemnghehtir ang a, ro pawh a khawm mai ta ve ang.

"A enga pawh ni se, a khawsak tawh dan enin eng emaw ti zawng chuan ro khawm dan chu a zawng chhuak thei ang tih ringhlel lo ila a ṭha ang. Ngawi teh, my dear Watson, hei eng emaw chen chu rim takin hna kan thawk ta a, tlai khat na reng reng chu a hlimthlak deuh zawngin hun i hmang ve teh ang. Les Huguenots enna tur ‘ticket’ man to ber chi ka neih kha. De Reszket an tih hi i hre ve tawh ngai em? Darkar chanve hnuah inpeih sain chhuak ila, Marcini-ah zanriah kan bar phei mai mai dawn nia,” a ti ta a.
]
www.storyfb.com mizo story thar englai pawhin chhiar tur a awm reng
A TAWP TA.

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/