Savage Atonement(Lh Varte) Eps - 8 by Hk Renthlei

Episode kal lai dah luhna

Moderator: writers

HK Renthlei
Posts: 108
Joined: August 1st, 2017, 12:05 am

Savage Atonement(Lh Varte) Eps - 8 by Hk Renthlei

Unread post by HK Renthlei » June 20th, 2018, 5:55 pm

Savage Atonement
(Lh Varte)



Hk Renthlei



Eps - 8


"Awle, awle..." Oliver chuan chik fahran hian a rawn en reng a. Laurel hrawk chu a lo rova, a thinphu a inthum rawn ta tluk tluk a. "He thil hi engtikahnge kan sawi ang tih ka lo ngaihtuah fo reng a ni. I chunga thil lo thlengte avang khan ka inthiamlo nasa hle tih sawi ta ila engtinnge i lo ngaih ang, Laurel? Mipa i hlauhna leh i huatna hi...pha duh lo mai rawh, kan hre tho alawm. Chutah a ṭhen laiah kei chu ka lo tel ve a, ka thiamlohna a tel ve avangin ṭanpui che ka duh a," tiin Oliver chuan ṭawngkam mai nilo mitmeng dam thlapa en chung hian a rawn ti zel a.

"Enge i sawi awmzia?" Laurel chuan a lo ti hmak a.

"Ngaihdan i nei thei nange? Oh, i hrethiamlo tak ang chu...mahse, Laurel, ngaihtuah teh, i damchhunga mipa hlauva i hun hmanral chu i thei dawn em ni?"

"Chutiang ka ni lo!"

"I ni lo maw? Ka nau duhtak, tunah ngei pawh hian duh ila chu khumah hruaiin hmangaihna ka chenpui thei che asin, mahse chumi thleng tur chuan i thidang vel anga, hlauhlawpin i awm dawn ani, i hai loh tawp kha. I chunga thilthleng kha thil ṭhalo tak a ni a, mahse a tawp vek tawh a, nunphung pangngai i zir a hun tawh alawm," Oliver chuan a lo ti nghat nghat mai a.

"Tichuan min zirtir anga maw? Ni lul love! Tunah hian helai hi ka chhuahsan nghal dawn. Oh, thil tum engemaw tak i nei tih rin nachang lo hria ila a ṭha tur, hna min pek chhan pawh a lo nih dawn chu. Tichuan i lehkhabu atana hman i tum anga, mahni maia hmeichhe tlachhe tawh mipa a tuihala siam dan...." te i ti anga.

"Tichuan thiltihtheih niah i ngai a. Mahse Laurel, lehkhabu a ziah chu ka tum lo. Engvanga chutiang ngaihdan chu nei tlat nge i nih?" Oliver chuan a lo ti let nghal vat a.

"I thuziah duhzawng nia ka hriat vang a nia," a lo ti ve mai a.

"A ni ngei tak ang," tiin Oliver chu a lo in sehruh ṭeuhva. "Laurel ka..." a rawn hnaih ruak a, Laurel chuan tlanchhiat a tum leh tum loh a lo en reng a.

"Ka sawi zawng zawng kha ka ti tak tak vek a ni. Helai kan chhuahsan hunah meuh chuan ka lehkhabu ka ziak zo anga, nang pawh hmeichhe pangngai, zalen tak angin i haw ang," a ti hriam hruih mai a.

"Chuti maw? Thilmak i ti dawn em ni?" Kha zet hian a lo ti let thung a. "Engtia awm danglam tir nge min tum tih han sawi chhin ta che," cho fahran hian a lo ti harh harh a.

A dar hlai zet chu a lo san zohva. "Ka hre bik lo le, mahse a lo thleng ngei ngei ang tih ka tiam a che. I nun ka lo tihchhiat nia i mi puh fo na ri hriat reng ai chuan kan tum poh a ni ang chu, a ni lawm ni?" A ṭawngkam nem tak phena thinurna in up chu a lo hre reng a.

Laurel chu hnuailamah a chhuksan ta daih a, khumah chuan a ṭhu hnawk a, a melh ngai melh rengin a thinphuba rang em em bawk a. Helaia a kal hi a tisual a ni, phuba lak a duhna khan khaw hmu lo lekin a siam a. Oliver khan hmeichhe pangngai ah chhuah a tum amaw? Engtia chetlak nge a tum ang? A khur dar dar mai a, a fawhna kha a han hrechhuak a, a endan te kha. Ama ât vanga helaia awm ve hi a ni a, mahse tihtur a nei ve tlat alawm, a ti puitling ngei bawk ang.

Oliver lo kir leh chuan khum khuhna tur puan a lo zawng mek a. "Generator ka tinung a, eitur khu i dah lut thuai teh ang," hmanhmawh zet hian a rawn ti a. Inchhungah chuan hna an thawk dun ta mawlh mawlh a. Oliver a choka tifai vel chu a melh zauh zauhva. A pahrawn khan inchhung sekrek a khawih ngai lova, a pi lah khan a pu kha choka ah chaw eitur lo chhuan chu a zei a ti hle a.

An thawh zawh tak duakah chuan Oliver chuan ṭhutthleng pakhatah a nem ṭhu hnawk a, intur a siam nghal a. "Thingpui aw ni ang," tiin a chhuang nghal a. "Nakinah tuikhuahah sawn tui ka va dah ange...khawlum ni a chen nan," satliah zet hian a ti leh a.

"Tuikhuah â?" Laurel chu a lo phawk hra a.

"Aw, sawlai theikung piahah sawn tuichenna tura siam a awm alawm. He in neitu hmasa hian a siamtir a, lemziak mi a ni a, nula saruaka an lem ziahsak tura a duhte thlem nan a hman ṭhin a nia. Oh, Pathian hmingin!" Tiin Laurel hmel lo danglam chu a han en a. "Ka tifiam mai mai a nih kha...tuikhuah chu lemziak tupa siamtir chu a ni ngei a, mahse a fate pali bakin an hmang ngai lo. Hmeichhe rilru neilo leh vawt inti siin khatiangte a min melh, ilo ngaihtuah thui lutuk a nih kha. Enge ilo ngaihtuah reng reng Laurel? Engvanga helaia lo kal ve hi remti reng reng nge i nih?" A rawn ti zui ta mawlh mawlh a.

"Ka hrilh tawh che kha," harsa ti zet hian a lo ti hram a.

"Min hrilh kha chu ka hria e. Mahse a chhan dik tak nilova hriatna ka nei tlat a ni," tiin thingpui chu a siam mawlh mawlh a.

Oliver chuan a lo ringhlel amaw? A chhan diktak chu a hre em lovang chu, tim deuh tak hian a han melh zak zak a, a hawisawn rang hle bawk.

"Laurel, i duh ang angin min en thei ang, ka bawh huam huam dawn hleinem che, hmeichhia in mipa pianhmang a en fo chu thiltih loh tur leh thianglo a ni hleinem, i hria alawm. I kawr hak lai kha a lum viau lo maw?" inzawm lo zet hian a rawn ti leh ta zung zung a. "Kha aia thawmhnaw hak nuam deuh tur kha i keng em?" A lo ti leh ta a.

A ken ve kha...pheikhawk pum hniam te leh linen puan suit pahnih.

"Swimsuit i keng em?" Laurel lo sen ṭawn ṭawn a hmuh chuan a lo inthing nawk a. "I keng hauh lovang. I neih pawh ka ring love, i nei em?" A ti leh ta a.

"Tuikhuah a awm tih ka hre hleinem," Laurel chuan a lo ti vat a.

"Ni e, saruaka tuicheng tur chuan he khawvela engmah hian a thlemthlu zo lovang che tih ka hria. Khawlum tak hnuaia tuiin vun a han chiah dai riai tluka nuam chu a vang hle asin...Kan hmangaihte taksa kan fawh tih lohvah chuan," a ti ta a.

Laurel chuan a hmai lo sen nasa zual sauh chu a hria a, a zak lutuk chu a kun daih a. "Chutiang thu sawi suh," thawp sat hian a lo ti a.

"Engvangin maw? A tibuai deuh che elo? Ilo buaina tur a awm hleinem. Hmeichhe vawt leh phurna neilo i nih kha hre reng ta che," Oliver chuan a rawn ti let nghal zat a.

"Â...a tenawm ka ti tlat alawm!" Laurel chuan a lo tihkhum nghek a. "I hmeichhe ṭhiante chuan an hriat chak zawng a ni mai thei a, mahse...."

"Ka hmeichhe ṭhian i tih ho te chuan inbiak satliah leh titi ho mai mai sawi an duh hleinem, Laurel," Oliver chuan a lo ti nem duai a, Laurel hmai sen ṭan lo dang leh ta lawp lawp chu a lo en reng a. "Lo kal rawh le. Zanin hian hna kan thawh hmel loh bawk a, in tal hi chenna tlakin siam teh ang. Helaiah hian nuamsa taka awm i inbeisei lovang tiraw? Karkhatah vawikhat eitur zuar motor a lo kal a, bazar thil leia chhuakvak hman ka ni lova. A engzawk nge i tih duh? Khum siam nge bawlhhlawh hrukfai?" Bung zet zet hian a rawn ti ta nghut nghut a.

"Khum ka lo siam ange," Laurel chuan Oliver hmel pawh en ngam lo chuan a lo ti ve thuai a, ani chuan elsen zeta melh chung hian mutpuan dahna chu a lo kawhhmuh a. Thingrem lianpui hawn tuma a kun chuan a nghawng hnunglam a lo lang a, Laurel chuan a sam dum hlap chu khawihsak chhin chakna a nei thut a, chutah rapthlak inti zet hian a ding ta lah mai a, Oliver chuan dinchhuah pahin a awmdan hriatsak niawm tak hian ala rawn melj de rah rah lehnghal a.

Amah leh amah a inhrethiam lo hial a. Mipa reng reng a haw em em a, an tawh zeuh pawh a duh lo, a bul hnaia an awm pawh a duh lova, mahse mak takin Oliver kha tawh chhin leh khawih chhin chakna a nei tlat si a. A hrethiam lova, a phuba lak chak lutuk vang a nih te a ring rum rum a. A reng rengah Oliver chu a hriatchian fe loh chuan enge a thiltih tumah awmzia a neih chuan ang..?

Laurel eisiam chu an kil dun ran a, Oliver thil eilai chu a lo en reng a, a che reng reng chu a zei thlarhin muangchang in a ei a, a pahrawn anga ei buan buan chi ani hauh li. A hmel leh a pianphung chu kumruk liamta a mi ang tho kha a la ni a, mahse a hriat ai khan a lo sang zawkin a lo lian zawk fe a.

"I chau em..?"

Oliver chuan a en reng chu a lo tihkhum hluk a, Laurel chuan a enchik hle mai si a.

"Chau ve deuh ve, mahse ka thawmhnaw pawh ka la phawrh lova," tiin car a Oliver an a dahluh leh kha a hrechhuak thut a.

"Ka va laksak ang che, mahse zanin chuan ti rih lo mai rawh, naktuk lamah pawh i ti hman em em ang. Nihnih khat hma chu hna kan ṭan thei dawn chuang lova, lehkha chhiar hmasak rih ka duh a, chumi chhungin ilo intifel ve mai dawn nia. Vur rama kal tur anga inthuam up reng lo khan," tiin Laurel suit hak chu a rawn en a. "Laurel engvanginnge khatiang thawmhnaw mak pui pui kha i inbel? I sam tihdan te kha...Mipa hnar nan em ni?" Tiin a rawn zawt ta mawlh mawlh a.

A hmuh hnemin a hre hnem lutuk hret a ni. "Tihian....a....a thianghlim zawk alawm, a hnawksak lova," tiin a sam a chhip lama a zial tawm vek chu a han tawk zauh a. "Ka duhdan a nih hi," Court a thlalaka a hmel leh sam landan kha a han hrechhuak a, a sam kha a ther huangin a balh hmel hle a, ukil ho lo endan kha a han hrechhuak leh a, a tim nghal chawih mai a, " ka inhmeh zawk alawm," a ti leh ta thuai a.

"I rindan a nih chuan le," tiin Oliver chuan a lo en reng a. "Han mu tawh rawh, i thawmhnaw chu khilai chhohna ah khian ka lo dah mai ang...tin, Laurel...."

Laurel chuan a li en let vat a, "Tuilum a tam kha, i inbual duh chuan tuman an tibuai lovang che," nghet charh huan a rawn ti zui a.

Laurel chuan rum zet hian a lo melh let nghek a. A tibuai lo reng ang, Oliver Savage nula duhzawng leh itzawng a ni lo tih a inhai bik hleinem, mahse chu chuan a tina deuh zawk a, engemaw tibuai riau tu a awm a, Oliver a nula duhzawng nilova a inhriatna in a tihnat riau na chuan a muthilh dawn thlengin a tibuai a.



********LhpiecesRenthlei*********



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)