Savage Atonement(Lh Varte) Eps - 12 by Hk Renthlei

Episode kal lai dah luhna

Moderator: writers

HK Renthlei
Posts: 108
Joined: August 1st, 2017, 12:05 am

Savage Atonement(Lh Varte) Eps - 12 by Hk Renthlei

Unread post by HK Renthlei » June 24th, 2018, 5:11 pm

Savage Atonement
(Lh Varte)


Hk Renthlei



Eps - 12



Oliver an a hnunga oil a hnawihsak a, a chul hauh hauh chuan che ngam lo hian a lo mu khawng reng a. Rei deuh hlek a nuai hnu chuan a taksa ṭang ṭeuh chu a lo inthlahdul ta in nuam a ti ta hle a. A hahdam thlakin a hlimawm hle a ni. A maimitchhing diar diar a, zawhte chu nise ahnar thlarh thlarh hialin a inring a. Chutah a han meng a, Oliver an chal chuar nanga a lo en reng chu a han hmu ta a. A hmelah leh a mitmengah chuan engmah a lang lova.

"Kha kha chu...tuemaw in i hnungah hriak an chulh a, an nuai a ni mai a, mahse hei hi chu..." tiin nichina a kutin a hnung a zutsak ang chiah khan a rawn ti ta a. A rawn tawhna chuan a thazam a fan raih raih a, a taksa pum chu a fan chhuak nghal a, a ṭek chuai chuai mai a. Hetiang hian em ni, nichina a khawih lai khan a awm ve ang?

A ngaihna hre lo zeta a lo en reng lai chuan Oliver chuan a rawn en chhuk thut a, "I hria maw..? a danglam theihzia kha.!" a rawn ti hluk a.

"Ka....!!"

"Shiish...!!"

A kawnga a rawn kuahna kut chu a thlah thut a, a mu zangthal ta der a. Oliver chu a chungah ala rawn kun a. A dara a rawn vawn sakna kut chu phihthlaksak a lo tum a. Oliver chuan a lo dang ta tlat a. A ṭe chhuak ṭhawt a, chutah a hlau lutuk chu a bing mup mup a, a thim thut a, a pil ta riai riai a.

Thim chu a ral riai riai a, Oliver an a hming a lam ri chu a han hria a. A meng chhuak nghal a, alo la mu reng a. Oliver chu a bulah lo la ṭhu in, rawn khawih duh hmel pawh a lo pu lova.

"I ṭha tawh maw?" a lo ti tawi tak a.

"Ka....!"

"I thidang a nih kha.!" bung zeta tih pahin vanlam a hawi a, "A vawt ṭan ta riau mai. Lut tawh ila a ṭha ang. Lo han kal la, ka rawn zui ve nghal ang che. Heng thil hi ka rawn senghawi phawt ange. Kha.! hei hi i theihnghilh dawn alawm," tiin a robe chu a rawn pe a. In lam pana a kal lai chuan Oliver a awmdan chu a ngaihtuah zui nauh nauh a. A hmel leh ṭawngkam damthlap phenah khan thinrimna nasa tak a thup tlata hriatna a nei a, mak a ti hle bawk a. A thihdan tak vang mai kha nge, a enchhinna a duhang a nih loh vang? A khur dar dar a, thlifim chhem vanga khur erawh a ni hauh lova. Helaia kal ve hi engvanga lo remti nge a nih reng reng a..? Engvanga Oliver hian helaia hruai nge a nih?

Chu ngaihtuahna chuan chumi ni aṭanga nitin chuan chhun leh zanin a chhanna hrechhuak thei silo hian a rilru a luah reng mai a. Chhun lamah chuan inngaihtuahna hun nei lo leka a siam ṭhin avang chuan a ngaihtuah tlem deuh hlek a.

Hna a ṭanpui meuh chuan an beingawrh char char hle mai a, nithum chhungin a bung hmasa ber chu an zo fel ta mai a. A bung hmasa chu mipa pakhat, a thiltihsual avanga inchhirna in a tihbuai chanchin hi a ni a. Enge a tihsual chu hriat ala ni hauh lo nangin Laurel chuan a lo khawngaih nghal hle ringawt a. A chhungril nun harsatna chu a rawn tawk telin tui takin a chhu malh malh zel a.

Oliver chu a inlahrang deuh tlat a, chaw ei lai pawhin a ṭawng meuh lova. Laurel chuan tuikhuaha thilthleng kha a lo hrechang tawh bar lova, zana a muthilh theih loh chang changin a taksaa Oliver a kut dam takin a chulna kha a hrechhuak ṭhin a. A vun mam tak a kutin a chul te, a hnung a zut laia a taksa awmdan te kha! A taksa chu engthilemaw a thisen tiluma a marphu tirang thei hian a fan tlat ṭhin a.

Zingtin Oliver lehkha chhiar chhungin huan chu a lo tifai ṭhin a. Nuam a ti hle a, a ngaihtuahna te a tifimin a taksa thlengin a tiharhin a hre ṭhin. A lehkha ziah kha a la chhunzawm zel a, phuba lak a duhna chu a tilang tam sauh sauh bawk a. A pui theitu tur chanchinbu hlui chu zawnna hun pawh a la nei ta chuang lova. Oliver chu pa fing tak a nih avangin a hun kal tawh chu zawt mahse a hrilh duh a ring chuang lova.

Nikhat chu khua a lum zual hle a, Oliver chuan chawl tawh turin a hrilh bawk a, thil ngaihtuah tur a neih thu a sawi a. Laurel chuan a huan tihfai chu kalsanin tuikhuah lam chu a pan ta a. A thihdan ni aṭang khan a la kal leh ta lo reng reng a. Mak takin niluma a taksa phova awm mai mai chu a chak ta riau mai a. A tuichen kawr chungah chuan robe a ha a, a hma ang em em a saruak nia inhriatna phei chu a nei ta hauh lova.

Tuikhuah sirah chuan mutna chu kaipharhin hrukpuan a phah a, hriak a inchulh dalh dalh a. Ni chu a lum nuam hle a, ni êngin tui a chhun tlet neuh neuh chuan a mit a tivai a, a maimitchhing ta diar diar a. Nisa in a taksa a rawn em chuan Oliver a kutin a taksa a zutsak kha a hrechhuak a, a pumchhung a let but but a, a ngaihtuahna chu a haw hle bawk a.

A mut a lo chhuak a, Province a lo thlen aṭanga a nun danglam sawtzia ngaihtuah chung zelin a muhil ta a. Tunah zet chuan a sam thlah leh Oliver a thawmhnaw leisak a hak ṭhin chu ngaiah a neih ta hle tih a inhrechiang ta hle a.

A harh hlawl chuan amahin a awm lo nia inhriatna a nei ta a. A hawi kual ruai ruai a, Oliver chu a piah lawkah chuan hmel chang deuh pu chung hian a lo ding reng a. Laurel chu a ṭhu chhuak hlawl mai a, a tuichenna kawr bahna tihtlak chu a siam ṭha nghal mawlh mawlh a.

"Ka koh che kha i hre nange..?" Oliver chuan a rawn ti tawi tuk a.

"Ka lo muhil a, min mamawhna i neih ka ring lova, chawhnu lam chu ka chawlh theih tur thu kha i sawi a..?" Laurel chuan a lo ti niah niah a.

"Mahse helaia nisa a inpho kang tur em khawpa i at chu ka ring lova..?" tiin a rawn hnaih a, Laurel chu a rawn khawih a. Laurel chu a lo tawm chawih a, a dar kang chu a thip hlar mai a. Mahse a lo awmdan teh chaih chuan Oliver a thinrim in up reng chu a cho chhuak ang tih a hlau hnuhnawh ta hle a. Ani lah chuan rang zetin a lo tawlhsawn san nghal daih mai a.

"Helaia i awm hi ka ring lova, huana i kal daih ka ring a..?" a ti a.

"Kal daih a...?" Laurel chuan a lo ti ha a.

Khawiah nge kal se a tih? Khawiah nge a kal ang?

"Ni e, kal bo daih mawle.! Helai aṭanga hla takah i tlanbo daih ka lo ring a.!" a thinrim chu puakkeh mai tur ni hian a lang a, "Mahse a lo ni lova, helaiah hian ilo awm a, nisa a in phovin..." a sawi duh sawi chhuah tum lo tih hriat zet hian a hmui a chip ta hmak a. Laurel chu a lo lawm hle a. Oliver thinrim insum ṭawng chuan a tihlau hle mai a.

"A lum nuam em a, ka ti ta mai a ni," awmze nei lo zet hian a lo ti let niah niah a.

"Ka hmu alawm," a ṭawngkama elsenna lo lang leh ta avang chuan Laurel chu alo thaw huai a.

"I kawr bahna thla kha a lang kuau mai ang," tih pahin a kawr bahna chu a rawn tihthlak sak a. Laurel chu a lo insangmar nghal at a, mahse a kutin a tawh chu a duhloh vang a ni hauh lo. A lo hlimpui hle zawk s, mahse Oliver thung chuan a lo ngaisual ta a.

"Oh...Pathian hmingin.!" thinrim fahran hian a rawn ti ta hlur mai a. "Pawngsual che ka tum lo ania, Laurel, kan hriat dun tawh kha. I awmdan tehchai fo hian mipa a cho zawk tlat a nih hi, ka..."

Laurel chuan a thusawi chu a hre zui ta lova. A pahrawnin a puhna ang chiah ṭawngkam kha a rawn hmang a ni. A pahrawn kha ama thiamloh leh a cho chhuah avanga pawngsual niin a insawi thiam a. Tunah khan Oliver khan a rawn ti veleh ta chiah a ni. Engmah dang reng reng a hrechang tawh lova, a ding chhuak a, chu aw ri leh mi hur nia puhtu lak aṭanga tlanbo tum chuan a kalna chin pawh ngaihtuah hauh lo chuan a tlan ta chiam a, Oliver au ṭhawt ri chu a hre viai viai a, chutah tuiah chuan a tla ta pawrh a, a taksa sa vur chu tuivawta a inchiah tak thutah chuan a phu zawk a. Thawh a han tum a, tui a lem pawrh a, a hak ta bawrh bawrh a. Tuikhuah mawng chu rah a han tum a, a beng a kiu chum chum a, tui chuan a taksa awng apiang chu a rawn hnawhphui nghal zel a, a phar buai nasa hle mai a.

Tuemaw hian a awmah na zet zet hian a rawn nem sawk sawk a. Thawk luih tir ṭalh a lo tum a. Lo hnial a duh viau nangin a che thei hauh lo mai a. A han khuh khawk khawk a, a thaw chhuak hrawih hrawih mai a, harsa ti zet hian a han meng chhuak hram a. Tuikhuah bulah a lo mu a, a bulah Oliver chu a lo ding a, a thawmhnaw zawng zawng chu a lo huh zo vek a, tui a lo far tluk tluk bawk a.

"Tui chunga kal leh i tum hunah chuan min hrilh lawk tawh dawn nia. Min hrilh duh ang em?" huat hmel zet hian a rawn tihkhum ngial a. "Engthil nge tih i tum reng reng a Laurel? Ka khawih avang che khan tuia zuan thlak i tum amaw?" A rawn ti nem thlap a. A ṭawngkam nem tak phena mi chuan a lo tihlau hle mai a.

A khawihna avang a ni lo tih hrilh a duh a, amah intihhlum a tum lo tihte..! A thusawi vang kha a ni zawk tih hrilh a duh a...a thusawi kha...!! A pahrawn tihdan ang chiah a ni. A thluak a buai mum mum a, a hrawk lah a thip hlur mai a. A ṭawngchhuak thei reng reng lova, a khur hlawk hlawk a. Oliver an a rawn pawm thawh lawp pawh chuan a lo ṭang hauh lova. Oliver kawr chu a huh zawr vek a, a taksa ah chuan a bet thlap mai a, a taksa lumin a rawn tawh chuan a lo thaw huai a. In lam pana a pawm lai chuan Laurel chuan a pawm leh kuah chu thil hrehawm tak a ni lo tih a hrechhuak thut a. A hlimthlak riauva....a him ta...!!

"Naktuk aṭangin tuichen i zir tawh ang," tih nghut pahin chunglam a panpui zel a. A mutna pindanah a pawm lut a, khumah a nghat ta chawrh a. "Che hlek suh, i thitih atthlak zet khan a la nghawng che a nih kha. I luak a chhuak anih pawhin insum reng reng suh. Tui i lem ṭeuh anih kha," bung zet hian a ti ta nghut a.

"Khawiahnge i kal dawn?" tiin Laurel chuan a lo au ṭial riai a, a kalsan mai a hlau hle a.

"I inbualna tur ka buatsaih dawn," tawi fahran hian a lo ti hlur a. "Vawt i tih hle kha," tih pahin a kalsawn ta nghal a. Laurel chu a lo maimitchhing chial a. Oliver chuan a sawi dik a ni. Tuiluma inchiah chu thilṭha tak a ni ngei ang. Oliver lo kir leh chuan a lo muhil lek lek hman a. Robe lianpui a rawn ha a, Laurel chuan engmah danglamna leh hlauhna a lo nei lova, a lo let leh ta chu a lo thlamuang siai siai zawk a.

"Laurel..!"

Muthilh a chak hle tih hrilh a duh em em a, mahse Oliver chuan a rawn sawi nawk nawk a, a men luihtir ṭalh a. Laurel chu a meng diar diar a, Oliver chuan thinrim meng dum kuk hian a lo en reng a, a thinrim mitmeng chu a dum fiahin a de sar sar mai a.

"Thidang tawh rih lo la, a ṭha ang," tiin a nem kal lui ta dawt dawt a, bualin chhungah a nem lut ta a. Tui chu a han zen chhin a, "Lut rawh," ṭeng zet hian a han ti zui a. "Ni lo, ka kal dawn hleinem. Tuikhuaha tlakhlum leh inbualna kuanga inchiah hlum hi a awlsam dan a inang reng a nia," a lo ti bul leh ta hmuk a.

A thawmhnaw a phelhsak lai te chuan a lo ding thle bawk bawk a. "Laurel," fiak ṭhak hian a rawn ti leh a. Hrethiam lo zet hian a lo en a, athinrim ve ta ut ut a, "Oh...Pathian hmingin.!" tih sup pahin tuiah chuan a chiah lut ta bawrh a. Tuilum chuan a taksa vawt khawng tak chu a chiah ta vang vang a. Zankhuaa inchiah hial a duh a, mahse Oliver chuan a rawn phih chhuak thuai a, hrukpuan hlai zetin a rawn tuam a, a hruhul ta mawlh mawlh a.

"A ṭha e," ngeiawm zet hian a rawn ti hul hak a. Laurel chu a lo ṭe ṭhat a, "Laurel ka hriat ṭhin leh ka...."

"I huat em em kha," khabe inkhawng hlawk hlawk hian a lo tihkhalh bauhva.

"Hetah hian lo awm reng rawh. Inhnuaiah brandy ka zuk la ange. Enginnge mawlh che a?" tiin thinur meng dur khuih hian a rawn en a, "Ka tawh hlek che aiin tuia tlakhlum kha i thlang zawk amaw?" Kawlh hmel zet hian a lo ti a.

"Chutiang a ni lo, i thusawi vang kha a nia," aw ṭial ruai leh khur dar dar hian a lo ti a.

"Enge ka sawi a..?" Oliver chuan a lo ti hu a, robe chhah deuh hian a rawn tuam lum a, a ta a nih ngei a lo ring a.

"Mipa cho chhuaka in pawngsual tir angin min sawi a nih kha," a ti ta a.

"Chuvang chuan tuikhuaha inchiahhlum i duh ta amaw.?" Awih lo hmel zet hian a lo ti hu a.

"A sawi dan a ni tlat alawm," zawi sap hian a lo ti a. "Ka pahrawn khan khatiang chiah khan min ti alawm. Ka dikloh vang niin a....a...." a sawi zawm thei ta lova. A thinlunga natna tharlam lehzual avang chuan a rum chhuak kawk a. Oliver chuan a sam a hrukhul sak a, hrukpuan chu dahin dimte hian a nawr sawn a, a hmel chu a ruh ṭeuhva, a beka a mar chu a phu zaih zaih mai bawk a.

"Oh...Lalpa leh.! Laurel.! Ilo rindan....? Oh...ka...hetah hian lo awm rawh. Ka rei....lovang," thawp sat hian a ti ta ringawt a.

A chungah ngilneihna lantirin a khawngaih leh ta ani ngei mai.! Laurel chu a lo lungawi lo hle mai a. A hauh hrep hnuah a khawngaih leh ziah a. A enchhinna zinga pakhat a ni ve ngei anga, mahse a chauh em avangin pawi pawh a ti peih lova. A duh ber chu Oliver kuahna hnuaia mut hle hle chu a ni. A ngaihtuahna a hriatchhuah rual rual chuan a ding khawng nghal lah a. Oliver kuah chu a duh alawm, mahse...?? A lo inngaihtuah buai fe lai chuan a lo kir leh a, a inlahrang riau hian a lang leh tawh a, no hian intur a rawn keng bawk a.

"Hei hi in rawh," satliah zet hian a rawn ti a. "Tichuan i dar kang lai kha tihdan kan ngaihtuah dawn nia. Zingah a nat lutuk loh nan."

Brandy a lem chuan a pum chu a sa thla rum rum a. A pumchhung chu a tisa hut hutin a thisen zam a zui a, a lu a hai chiai chiai a, a zang riau hian a inhria a. Oliver an a rawn pawm kan leh chuan a nghawngah a lo kuah chial a, hmai ruh ṭeuhva a rawn en chhuk chuan mawi zet hian a lo nuih chho var var mai a. Oliver an khuma a nghah lai chuan a la nui reng a.

"Khawiahnge i mut kawr?" bung zet hian a han ti nghut a. Laurel chuan a lo hrilh ve mai a. A mutkawr cotton puan nghawng chip zet a hmuh chuan a ner sawk a, "He thil hi i ha thei lovang. A puan hian i dar kha a nawk na dawn asin. A dang i nei lo em ni?" a ti ta hlur mai a.

Zak deuh tak hian a lu a lo thing a, "I hak awm chi hawhtir tur che ka nei tlat silova, mutkawr ka ha ve ngai lo tlat a, i ti ve mai dawn em ni ang?" Zang vuh hian a rawn ti ta a.

"Ka ti ve mai mahna le," a lo ti ve sap a.

Bomb pawhin vawm se mak a ti lo zawk ang tih tur hian a rawn en a. Laurel chu a nuih a lo za hle mai a, zalen leh hlim ta riau hian a inhria a.

"I robe hak kha phelh a ngai a nia," tiin mak la ti zet hian a rawn en reng a.

"Ka pawiti hleinem," a lo ti liam ve mai a. A nun a hlim ru riauva, engemaw hlimna riau hian a luah khat a, hlimna engemaw inthup tawh lo tur neiin a inhre tlat a. "Bakah nang chu ka pahrawn i ni hleinem, i ni em ni?" Huaisen zet hian a lo ti a. Oliver mitmeng dum fiah tak hnuaiah chuan a lo khur dar dar a.

"Ni lo..i pahrawn ka ni lo," a lo ti let hmak a. "Damdawi ka zuk la ange," tiin a chhuak ta daih a.

"Solarcaine a nih hi. Ka farnu fate hian a tlai hnuah chauh an vun kang hi an hrechhuak ṭhin a, an mut dawn veleh hian an ṭahpui chawk a," rawn luh pahin a ti a.

"Farnu i nei amaw?"

"Enge i beisei.? Gordona lu aṭanga chawr chhuak ringawt turah min ngai elaw?" elsen zet hian a rawn ti a. "Ni e, farnu ka nei ve alawm. Kei aiin a upa daih a. G.P pasalah neiin a hlim hle a ni. Fa pali an nei a, kum sawmhnih leh kum sawm pahnih inkar an ni," a ti a.

A chhungte a sawi rik vawi khatna a ni a, a chhungte chanchin a sawi chuan a lo tihrilhai hle ang lawi a.

"Ṭhu rawh le, Laurel. I robe hi ka han phelh ang e," a lo tihsan leh daih a.

Laurel chuan thuawih zetin a lo dawh ve mai a. A awmdan chu a zang huih a. Oliver darah chuan a lu a nghat a, ani chu a lo ṭangmar sauhva. A robe hak chu a rawn phelhsak a, a dar chu a thip hlur tawh mai a. Oliver an damdawi a rawn hnawihsak lai chuan a lo maimitchhing diar diar a. A thil hnawih chuan a dar thip hlur chu a ti dai nghal sawng sawng a. Laurel kut chuan a kawr nghawngah a lo vuan a, a awm mam thlap mai chu a chul châk hle a.

"Laurel..!"

Laurel chuan a lo rum khum mai mai a. Oliver chuan hriam deuh hraih hian a rawn ko nawn leh a. "Muthilh i tum em ni?" a ti a.

Mutchhuak zet hian a lo meng diar diar a, Oliver a nghawng chu a en ran a. A kut chuan tim deuh dai hian a han tawk a, a chul ta dan dan a, "Muhil ila ala pawi thei em ni?" tiin a lo ham bai bai a.

"Ka bulah leh ka khuma harh i hreh loh a thu a ni mai alawm. Chu chu i duh em ni?" a lo ti bul ta hmuk a.

Oliver an damdawi bur a chhin ṭhata a dah ṭhat lai chuan a lo kuah nghet sauh sauhva, a nghawngah a hmai a lo phum kak a.

"Laurel.," vin deuh taka tih leh ṭhawt pahin a rawn kuai dak a, a robe hak an phelh chu a tawlhthla a, a hnute chunglam a lo lang ta hiai a. Laurel chuan a ngai pawimawh hauh lova, Oliver kuahna hnuaia awma thlamuang taka muthilh chu a lo thlahlel ber a.

"Min kalsan suh, Oliver. Ka bulah awm rawh," a lo ti zawi sap sap a.

"I duh amaw?" a ngaihna a hriatloh hmel hle a, "I thusawi hi i hrechiang lo a nih ka ring. Enge i sawi tih hi...nge i hre zawk, Laurel? I mi sawmna hi i hrechiang em?" A ti ta mawlh mawlh mai a.

Laurel chu a harhchhuak zawk a, talchhuah tumin a han chesawn a, a robe hak chu a tlathla zual sauhva. Oliver a lo thaw ri hrawk chu hriain a en lam chu a han en ve a. Hlauhna chuan a rawn tuam ta hlup hlup mai a.

"Oliver...!"

"Ni lo Laurel...!" nghet charh hian a lo ti a. "Khawngaihin....," tiin a mit chuan rawp takin a taksa chu a rawn melh kual ta a. Khuma a muttir lai chuan Laurel chu a lo chhaw chhaih mai a, a taksa a engemaw tak lo thawk chu a duh lo em em mai a.

"Ka haw ngawt ang che...." a lo ti hram hram a, Oliver chuan a lu a lo thinsan mai a.

"Min haw lovang tih ka tiam a che. Min haw reng reng lovang," thawp sat hian a lo tihsan ve thung a.

A hmuia a rawn fawh rual chuan a kut chuan a nghawng a rawn chul nghal a. A taksa ṭang ṭeuh chu tihreh sak tumin a rawn chul kual ṭan a. "Min kuah rawh," tiin a ngen ta sup a, a lo kuah ve mai bawk a. Oliver chuan a robe hak chu a phelh a, a vun mam tak mai leh lum tak chuan a rawn nek ta a. Laurel chuan lo khawih leta lo chul a chak hle a, dimte hian a lo chul ta dan dan a. A hmuia dim leh duat taka a rawn fawhna chuan a ti khur dar dar a, a taksa pumin a rawn sik rual chuan a rawn kuah nghet zual ta sauhva.

"Laurel...ka chunga i thiltih hi i hrethiam hauh lovang," tih pahin uar zet hian a rawn fawp ta ngawr ngawr a. Laurel chuan a lo kuah let ve ṭawk ṭawk a. Oliver chuan a zeizia hre zet leh fawhna tur hre tak hian a fawp kual dan dan zel a, a kut chuan a chul kual hauh hauh bawk a.

Laurel chu a lo ṭang ru ṭeuh a, mahse a chunga Oliver a thiltih chu pawi tihna a nei lovin a lo rum hak a. Ani chuan a rawn fawp uar zual sauhva. Ama duhna chu chhanlet phut takin a rawn kar pah zel a. Zei taka Oliver a chetna chuan phurna a pe a, eng thil emaw hian thlawh bosanin a aiah thildang rawn pe tur niin a inngai a. Oliver kutin a hnute hmur a rawn tawh chiah chuan a lo thaw hak hak mai a. A lo rinchhin ngai miah loh leh chutiangin a awm thei ang tih mumang lamah pawh a lo man chhin ngailoh ang chuan a awm ta a. A khur dar dar a, a thil mamawh chu Oliver chauhvin a pek theih a ni tih hriatna a neih avang chuan a lo kuah nghet sauh sauhva. Oliver a taksa ruh ṭung mai leh a mipa nihna tho uaih in a taksa a nawk te chuan a lo za chuai chuai mai a, a lo thaw halh halh mai a. Chutah Oliver chuan a thawh kan san ta deuhva. Enge a en tih hriat tuma a han en chuan ani chuan a lo en let reng a.

"Laurel.! Min duh ve a ni tiraw.? I insawi anga châkna neilo hmeichhia chu i lo nilo a nih hi," a lo ti dam ruih ta mai a.

Tuisika theh ang mai hian Laurel chu a vawt nghal vek a, "Ni lo..." kha zeta tihchhuah rawih pahin a in nem kang a, "Ka...."

"Min mamawh a nih kha," Oliver chuan a lo tihsan leh ta tlat a.

"Ka..." a harh chiang ta hle a. Oliver a ṭawngkam tin te kha a hrechhuak leh ta a. Hmeichhe pangngaia chhuah a tum thu te kha.! Tuna a thiltihdan en hian a lo hlawhtlin tir ṭep a ni. Talchhuah tumin a han ṭang sa teh a, ani chuan a lo delh bet nghet zual sauhva. "Tal buai duh lo mai teh Laurel.! Nangmah leh nangmah i inngaihtuah buai kha tawpsan nghal rawh," a rawn ti sap a. A hmui chuan a pangti nem lai chu a rawn nulin a rawn fawp kual dan dan a. Laurel chu a lo sa pap pap a. Oliver a fawhna chu a thlahlel zual sauh sauh ta mai a. Engkim mai chu a theihnghilh ta vek a, a taksa chuan chu mipa taksa a mamawh zia chauh chu a hriatchhun a ni ta.

Oliver chuan a fawp lawr zel a, a hnute te chul sakin a hmur chu a sehsak ner ner a, an in en ta vawng vawng a. An inhrethiam tawn dun ta hle mai a, thaw hawk hawk chungin a hma aia uar leh duhthawh zawkin an in chul kual leh ta a.

Nuam ti zet leh duhthawh em em hian Oliver a sam chu a lo ṭham tawn tawn a, a taksa chu zawi thlapin a lo inpeih em em tawh mai a. Chutah Oliver chu a khawng ta ut a, a che ta lawk lova.

"Car thawm ka hria ania, tuemaw ni tehchai chu," a ti hluk a. Laurel, châkna avanga hmai sen ṭan chu a en ta vung vung a.

"A hun takah min rawn tibuai pawh a ni mahna le," tih pahin a tho ta nghal a, a robe la in a inbel nghal mawlh mawlh a. Laurel zak lutuk chu a lo sa pup pup thung a. Oliver a taksa a hmuh chuan a zak lehzual a. Che lovin a mu reng a, car lo hnai zel ri chu a ngaithla kar a. Chutah a khur ta zawih zawih mai a. A kut vawt thlar chuan a hmai sa hut hut chu a hup a, engthilnge a tih tak mai le? Oliver khan engtinnge a lo ngaih tak ang? Mihring pangngai angah a ngai ve ang nge a enchhinna kal zel ni ang? A taksa chu a vawt rawih rawih a, hmeichhe puitlinga siam a tum dan chu khatiang kha em ni ang? Hmangaihna chenpui kha maw.? Hetiang em hian mipa hi an rilru a lo chhe thei ngai em ni? Car lo thleng thawm leh ṭawng ri nawk nawk thawm chu a han hria a.

"Laurel...ka farnu leh a fate an nia. I peih loh chuan lo chhuk ve kher pawh a ngai lem lovang. Zan an riak ve dawn satliah chauh ania," a rawn ti ta lawng lawng a. A thusawi danah chuan 'chhungkaw thil ania, lo tel ve rih lo mai rawh' tia hnarna niin a lo ngai a. Laurel chuan lukhamah a hmai a phum a, a ṭap khur ta ngawr ngawr a. Engtinnge Oliver a taksa mamawh em em a a awm theih? A inzahpui em em bawk a, engtinnge zanina an awmdan hi a theihnghilh theih ang? Oliver khan a theihnghilh thei ang em?

Hetah hian phuba lak tuma kal a ni a, a aiah enge ni ta? Enge lo thleng..? Oliver laka a thinurna leh a huatna khan hetiang thil hi a thlentir mai ani lo maw? A thaw a veng ta huai a, a ni ngei ang.! A huatna te a chunga a thinrim em em na te avang khan he thil hi a lo thleng ta a ni.



********LhpiecesRenthlei*********



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)