Savage Atonement(Lh Varte) Eps - 13 by Hk Renthlei

Episode kal lai dah luhna

Moderator: writers

HK Renthlei
Posts: 108
Joined: August 1st, 2017, 12:05 am

Savage Atonement(Lh Varte) Eps - 13 by Hk Renthlei

Unread post by HK Renthlei » June 24th, 2018, 8:12 pm

Savage Atonement
(Lh Varte)



Hk Renthlei




Eps - 13



Laurel chu hma takah a thova, choka a pan ta nghal a. Oliver a chhungte a hmuh chak vang nilovin coffee leh chhang siam a duh vang zawk a ni a. Hnunglam kawngkhar chu a rawn inhawng a, tlangval pahnih hi an rawn lang hlawl mai a. Alo hmu thut mak a tih ang bawkin an ni pawhin mak an tih hmel hle bawk a.

"Hi...." a naupang zawk hmelpu chuan a rawn ti ta thuai a. "Uncle Oliver a secretary i ni ang chu maw? Lehkhabu ziaktu nih ve ka chak ta hle mai," a rawn ti nghal bawrh bawrh a.

Oliver tupa a ni ngei ang chu.! Kum sawmhnih mi chu, rinhlelh rual lohvin.! A bula ding a aia upa deuh zawk chuan Laurel chu a rawn nuih var var a, Laurel chu a lo sen ap ap a.

"Chas...insum deuh teh, nula khawngaihthlak tak saw i ti zak alawm. Ka ṭhianpa hi chu ngaipawimawh duh suh...nula nalh deuh ala hmu ngai lo a ni ang e. Enteh, kei hi Richard ka ni a, Oliver tupa, hei hi ka ṭhianpa Charles Harley a nih hi. Nipui chhungin kan inhlawh a, ka nu nau kan awm sak a, holiday a thlawnin min hman tir dawn a. Spain ram pan tur kan ni a, kan rawn riak lailawk a nih hi. Ka nu hian a nuṭa pa hi a ngaihlu khawp a, a hmuh khat deuh hi chuan a phi ruai zel a, nula sum duh deuh te hian an lo man bet ang tih a hlau hlur mai a nih hi maw.! Uncle O hi zawng a veng nasa teh ania," a rawn ti zui bawrh bawrh a.

"Kan puih i ngai em?" Richard chuan a rawn ti leh nghal a.

Laurel chuan a lu a lo thing a. Richard chu a nui var var a, "Chuti a nih chuan Chas nen hian breakfast ei hma tui kan lo va cheng ang," hlim zet hian a lo ti ta a.

Darkar khat leh a chanve a ral leh meuh chuan an vaiin dawhkan an kil ho ta ṭham a. Elizabeth Turner chu a rinloh deuhin Oliver ang maia lian a niin, nu ṭha leh hlim thei tak a ni tih hriat reng a. Tih thinrim pawh a harsa hle ang tih a hre mai a.

"Graham chu a telve theilo amaw? A va pawi vele," Oliver chuan a u lam hawi chuan a han ti sup a.

Elizabeth chu a lo nguk hraih a, "Lo kal ve ngei tura ngaih a ni asin. Mahse hei tlangval pahnih ka nei a..."

"Marbella tuipui kam vel an thlen meuh chuan an puih reng che i ring em ni?" Oliver chuan tih pahin a tupa chu a han melh zauhva, a mitko a san khum zauh bawk a.

Richard chu a lo sen ṭawn ṭawn a. Chas erawh chuan Laurel chu a rawn nuihsak thung a. An in upat hleih loh tehlul nen! Chas chu a puitlin hmel riauva. Oliver chuan a ngaina lo nia hriatna a lo nei a. Laurel a rawn biak apiang chuan Oliver chu a lo inrawlh hman ziah bawk a. A mi chhawrin an chhungkaw mikhual a lo kawmngeih chu a duh lo a ni mahna, a lo ti rillru nauh nauhva. Richard an Chas nena University a an inchhar dan a sawi chu a lo ngaithla ve mai mai a.

Savage naupang ho chu an ngainatawm hlawm hle in a hria a, a thlir reng a, enkawl ngun leh zilhna ngaipawimawh thiam leh nungchang mawi tak an neiin a lo hria a. Richard chu a upa ber a ni a, ala naupan chhiat hmel hle a. A putea chu a ngaisang hle bawk niin a lang a. Mahse a pa hnungzuia Doctor zir a tum tih a sawi thung a. Richard dawtah chuan kum sawmpanga mi phir pahnih an awm a. Mipa ve ve tho an ni a, an sam chenin a inang a, an hmelṭha dun hle bawk.

"Paul leh Robert hi chuan a pa an chhun a, Richard leh Anna te hian Savage chhungkua an chhun thung a," Elizabeth chuan an chaw ei na seng fel pah chuan Laurel chu a titi pui bawrh bawrh a. "Ka nau bula thawh chu enge a an a.? A harsa viau lo maw? A thinchhe ve ropui si a," a ti zui bawrh bawrh a.

"Nuam ka ti hle ania," Laurel chuan a lo ti ve mai a.

"Umm...awle, kan inang a nih chu. Kan dinhmun hre rana hrawn a ngai a, ui in saruh a hauh hlur ang maia thinchhia a ni. Lehkhabu thar a ngaihtuah lai ngat phei chuan tihbuai ngam chi pawh a ni lo. Tuna mi hi enge a an i rin?" Elizabeth chuan a ti sarh sarh a.

"Ka hrethei mai rih lo, a bung hmasa kan khawih chauh a ni a. A ngaihnawm hmel hle in ka hria. A changtupa tur kha ka lo khawngaih nghal ringawt a," Laurel chuan a lo ti hak hak a.

"Ka nau hi chu ka hria alawm, a hralh a tla leh viau ang. A phu pawh a phu ṭhin reng asin. A buaipui nasa thei hle si a, engtia a hnuaia thawk mai thei zawk nge i nih? Tumah a chhawr duh ngai silova?" tiin Elizabeth chuan dilchhut zet hian a zawt ta nge nge a.

"Ka dil alawm," Laurel chuan a lo ti ve mai a.

"Ka hrilh tawh reng che kha. Ka secretary turin ka duh a, ka chhawr mai a ni," Oliver chuan choka chhunga rawn luh pahin a rawn ti lut nghal tawng a. An lo phu nasa dun hle thung a. "Beth...i fate ho sawn helai hmun hi an ning ṭan niin a lang. Min rawn tlawh hun hi a diklo niin ka hria. Mahse tlailamah Arles ah kan kalpui thei ang,"

"Zing puma an tihbuai loh phawt che chuan maw? A ṭha alawm, vawiin te chu hna thawk lo ve mai la, Oliver. Kan inhmuh khat tehlul nen," Elizabeth chuan a lo ti nang nang a.

"Vanduai thlak takin, a ṭul tlat a ni, rilru hman a ngai alawm, ka u duhtak," nui huk huk hian a lo ti let a, a chhuak leh ta vut a.

"Mipa ho tak hi chu.! Elizabeth chuan a han ti nghat a. "Oliver ngat phei hi chu Savage thlah zingah pawh a thinchhe ber a nia! Mahse maw Laurel, a sawi anga kan awm ngei kha a ngai ang. Inchhung tifaiah kan chhawr hlawm ange, chhunchaw ei hun thleng tal chuan an chhawr theih mai ang chu," a ti zui bawrh bawrh a.

Oliver, a hnathawh tur nena inchhung lama a chho ta daih chu Laurel chuan mak a lo ti deuh hle a. "Oh, kan nufa kan awm ve chuan a tihtur hai hek lo," Elizabeth chuan nui chung hian a lo ti a. "Phirte pahnih nautet lai hian a lehkha pawimawh lutuk an lo eisak a, min la ngaidam ngailo reng reng, kan nufa a kan tlawh tawh hi chuan lo lawm a hnek hian a lo inthiarfihlim nghal vat zel zu nia. Khai aw, a va bal em em ve, enteh chhuar paw thur te hi, Laurel! Heng hi i tihfai a phal lo a ni ngei anga tiraw?" Oliver a zia hrechiang zet hian a ti nghal bawrh bawrh a.

Laurel chuan a lu a lo bu nghut ringawt a. Oliver khan a hnathawhna pindan chu khawih a phallo hrim hrim a ni.

"Awle, helai aṭang hian ṭan ang. Lalpa leh, han en mah teh!" Tih pahin chhuar chu a han hawng a, lehkha chhut sa hi a lo tla chhuak nghal nuaih mai a. "He thil hi chu i tihfel chi a ni Laurel," tiin a nui var var a. "Phir te sawn lehkhabu chhuar saw tifaiin lo rem ṭha sela, an ngawi rei thei deuhin ka ring....an thlawh kual vel loh chuan...tunge hria ang. An tha hi a han za mai mai khawp a, tunah rih chuan, ṭhanglian thuai thuai se ka ti ngawt mai," Elizabeth chuan nui chung hian a ti hak hak a.

Laurel chu a lo nui ve sak a. Elizabeth in a rawn pek lehkha tel chu a han en a, kum ruk liamta ami a ni tih a lo inchhu kalh a. A chung ber chu a han en a. Middle East lampang chanchin ziahna a lo ni a, Laurel chuan kut khur dar dar hian a en zel a, a duh chu hmu ngei dawna inhria in a thin a phu dat dat mai a. Lehkha chu a enlawr zel a, a thinphu chuan a taksa pum a nghawng a, a beng a kiu chum chum a. A hmu ta ngei....a hming inchhu a hmuh chuan a meng phe ruai a. Thawm a lo nei ni ngei tur a ni, Elizabeth chu a bulah a rawn ding nghal thuai a, ngaihtuah hmel deuh hian a rawn en a, chutah Laurel lehkha ken lai chu a han en leh a.

"Oh, Laurel. Ka duhtak, ka lo ngaihtuah pha lo reng reng a...kha nula kha i ni maw, i ni tiraw? I hming kha ka hriathnu niin ka lo hre deuh reng a. Oh, ka nau khawngaihthlak! Tichuan Oliver chuan a zawng hmu ta nge nge che a ni maw...ka la hrechiang hle asin. Kan nu leh pa te an la damlai a ni a, kan cousin thihna khan min nghawng em em ṭheuhva, an fa pathumna ang maia an lo en ṭhin a ni a, i hrethiam anga. A nu leh pa te hi an khirh lutuk a, a hlau fo ṭhin reng a, ka nau khawngaihthlak Bobby kha... a nu leh pate khan a lakah an phut sang lutuk ṭhin a," Elizabeth chuan a ti ngui ta raih a.

A chunga thil thlengah khan Oliver chu a inthiam lo fova, kha nula kha....Bobby nula kawp kha....Oliver an a hrilh tawh che anga, a bialnu hlui te zinga pakhat a ni a, mahse Bobby khan Oliver angin a zia a lo hre ve silova. Bobby hming tak chu Peter a ni a, koh duat nan Bobby kan ti mai ṭhin a. Petera hnenah pawh khan Oliver khan bumna hmangin a mutpui ṭhin niin a sawi tho a ni. Peter pawh chuan Lisa thusawi chu a lo awih em em thova.

Petera a thih meuh kha chuan, Oliver kha a danglam vek a, kan hre vek a ni, ka nu phei chu a buai rilru thei em em a. Chanchinbu mite hian mipui rilru an hneh thei hle si a, a zilh mawlh mawlh ṭhin a, fing tak leh rilru fima an thiltih an fiah zel loh chuan tihsual a nei ang tih a hrilh fo a ni...chutah a ti ta reng a.."

Oliver chuan ka nu in hmuh ve ngei che a duh tih a hrilh tel che em? Ka ni chuan dawt i sawi a ring miah lova. Mahse Oliver khan a ngaithla duh tlat lova. A luhlulin a rilru a khauh tlat a, a dik niin a inngai nghet bur ringawt mai a, ka nu pawhin a thlemthlu zo ngang lo a ni.

Thudik kha a hnu fe ah a hrechhuak leh ta si a, a thiltih khan a nghawng nasa lutuk a, a kehchhe lo chauhva, chanchinbu-a a hna chu a bansan nghal hmiah bawk a. Engtin emaw tak ṭanpui leh dan che a zawn tur thu a sawi bawk a, a zawng ta char char che a, a thuziak lo dikloh zia kha chanchinbua chhuahtir leh a tum lahin an lo duh der silova...ama hming ṭha sa a tichhe zo ang an ti tlat a ni. Oliver hi chu mite rilru ngaichang thiam chi a ni a, naupangte a nih lai aṭangin mi khawngaih thei tak a ni ṭhin a. A thiltihsual chuan a nun a ti hrehawm em em mai a, nitin hian a nun a eichhe zel niin ka lo hre ṭhin a, mahse tunah chuan a hmu ta che a, ka...Enge Oliver hi i ngaihdan? I haw em em ang chu tiraw?" tiin Laurel chu a rawn thlir vang vang a.

Engtinnge Elizabeth chu thudik a hrilh theih ang? Mahse dawt vek chu a hrilh thei lovang. A hmui a pet fan fan a, a mitmenga tawrhna lo lang erawh chu a thup thei lova. "A thiltih kha thudik nia a hriat vanga ti a ni alawm. Ka pahrawn kha dawtsawi thiam tak a ni a, ka nu, mit ngeia thilthleng hmutu pawhin ka thusawi aiin a thusawi chu a awih zawk tho alawm," Laurel chuan a lo ti khur dar dar a.

Phir te an lo luh takah chuan an sawizawm leh ta lova, an nu chuan tihtur a lo hrilh zung zung a. Laurel chuan a chanchin inziahna zawng chu la in a pindan lam a panpui ta nghal a. Mi khawngaih thei tak maw a lo nih a, thutak chuan a tichhe vek dawn a ni. He thil hi a ni lawm ni a duh em em kha? A khur zawih zawih a, chhuar ngheng chuan a ding reng a. Mi dawihzep ang maiin a awm ta em ni? A hmanraw neih chuan Oliver chu a tichhia in a timualpho thei ta a ni mai alawm, tiin a ngaihtuah ta a.

Chhunchaw ei kham chuan Arles lama lenchhuah an tum ta a, Oliver chuan lehkhabu a mamawh lei pah a duhthu a sawi a, Laurel chuan kal ve tura a duhthu a sawi chuan mak a lo ti hle a.

"Mahse chhungkaw thil a nia," a lo ti niah niah a. Chumite nufa hovin an rawn tihbuai tak dan kha a han hrechhuak a, a sen ṭawn ṭawn mai a. Oliver rawn en dan ah lah chuan theihnghilh tir a tumloh hmel hle lehnghal a.

"I lo kal ve tur a ni," a lo ti nghet bur a.

Hmeichhe pangngai ho tihdan angin maw...nizan ang te kha maw?" Laurel chuan a lo ti zang vah a.

"Chutianga i ngai duh leh a ṭha a ni mai alawm...ni e," a lo ti let hmiah a.

Laurel chuan a tilungawi nia hriatna a nei a. Chhunchaw ei laia Richard nen hlira an inbiak lai pawh khan lungawilo hmel a pu tawh sa reng reng a, Laurel chuan mak a lo ti rilru hle mai a.

"Chas nen Car hran kan nei a. Engvanginnge kan bulah ilo chuan ve mai lohvang?" Richard chuan a lo ti thuai a.

An hnung maia Oliver lo ding chu a lo hre reng reng lova. "Richard, Laurel hi ka secretary ania, hetah hian hnathawk tura awm a ni, in tihlim mai mai tur ni lovin," vawt zet hian a lo ti a. Oliver zia chu a danglam em avang chuan Laurel chuan a lo ngawihsan mai mai a. Richard kalsawn veleh a rawn hmachhawn nghal a. "Laurel, i nun bul i ṭan dawn chauh a ni a, a zuana zuan lovin fimkhur takin pen muang deuh ang che...chubakah, ka tupa nen kher phei chuan ni lo hram sela," rawng zet hian a rawn ti ta bawrh bawrh a.

Laurel chuan a lo ngei em em mai a. Richard kha ngaizawngah a lo ngai em ni? A va ti mak ve le! An inbe satliah ringawt a ni si a...inchhung lama a chho chu Oliver chuan a lo en reng a. "Chung lama i chhoh dawn chuan ka jacket min rawn lak nghal ang che, khumah khan ka dah kha," vin deuh tak hian a la rawn ti zui a.

Oliver pindanah chuan hreh deuh tak hian a lut a, chawhma lama a hnathawhna chu a lo la hnawk nuaih a, khawl chhutna bula lehkha phek inkhup chu a han hmu a, a la a, a thuziak chuan a mit a la ta hle mai a.

"Tisa thil taka in dawnsawnna," tih inziak chu a han chhiar a, a thil chhiarlai chu a pawimawh hle a ni. "Inrin loh laia barakhaih thut a ṭha," thinlung lam hriatna kaihhnawih dan, thinurna, hlauhna te a la nei reng a, mahse a chhan ala hriatchhuah theih loh," tih ang reng hi a lo in chhu ṭeuh mai a.

Lehkha dang pawh a tam hle a, Oliver thiltum chu a chiang ta hle hian a hria a, a lo rinhlelh ang ngei khan a chanchin a lo ziak dawn reng a lo ni, hman ngei a lo tum a nih chu. Chuvang chauhva helaia hruai hi a ni ngei ngei ang, hmeichhe pangngai anga nun zirtir a tumna chu a chhuanlam lek a lo nih dawn chu, tisa thil tak thlenga a nun thuruk zawng zawng chu haichhuah sak vek a lo tum a ni.

"Laurel!"

Inhnuai lama rawn ko tu chu a hmanhmawh hmel hle a, Laurel chuan a lehkha ziah a chhiar tih hriattir a tum bik lova. A jacket chu a phih dawrh a, hnuailam pan chuan hmanhmawh zetin a chhuk ta thuai a.

Enge a tih tak ang? Helai hmun chhuahsan thuai hi a ṭha ber anga...mahse a kalchhuah mai chuan a phuba lakna tura a ruahmanna ala tihlawhtling silova. Thil engemaw tak chu tih a ngai a ni. A enchhinna reng rengah a tel tawh lovang a, nizana khatiang thil a thlentir mai te kha a lo va â em....Oliver kuahna khan him riau khan a in hriattir a, ui lai reng reng nei lo khan a taksa kha a lo hlan a, a pawi lutuk thlen hmain...a hmui a pet fan fan a, a mitmenga huatna nasa tak lo lang chu thup hram hram tumin a khap sawk sawk a.

"I va rei ve,"

"Ka sam ka khuih a," tiin a hnungchhawn nghal a. "Kha i jacket chu," a ti a.

Oliver chuan a lo enchik hle hian a hria a, mahse a lo hre lo ṭhin zawk pawh a ni ang, englai pawhin a lo enchik reng fo dawn a lo ni. A tan chuan thil nung pakhat a lehkhabu ziak tur atana ṭangkai leh inzir nana a hmanlai chauh a lo ni si a. A la hre khawp ang! A hma khan a lo haw hle a nih pawhin tuna a rilru put phel hi chu a hma ami let engemaw zat lai a ni.

Arles khua chu a mawi hle a, Oliver chuan a u Range Rover hnungah chuan a Ferrari chu a dintir a. Laurel chuan chhuksan thuai thuai a duh a, chawhnu puma a hmuh phak leh a zir zel tura awm a duh lova, a thinur rilru ṭeuh mai a, nizana hmangaihna chenpui a tum lai te khan. Hmangaihna chen....a sen ṭawn ṭawn a. Hmangaihna awzawng chenpui a lo tum lo. Hman ṭangkai a lo tum zawk a lo ni, hmana a tih ang bawk khan...a tihdan a danglam deuh a ni mahna. Car a din rual rual chuan a zuang chhuak nghal a, amah chauhva hun hman a duh hluah hluah a.

"Khawia kal nge i tum a?" Oliver chuan a lo ti hlur a, a ding chawt a. "Ka hnuaia hnathawk i nih hi theihnghilh suh ang che. Ka tupa leh ṭhianpa bula hun hman ilo in beisei a nih chuan theihnghilh nghal rawh. Eitur leikhawl kan ngai a, Anna ilo venpui theih chuan ka farnu pawh a lawm ngawt ang," nelawmloh fahran hian a lo tihkhum hmuk hmuk a.

"Chuti chu tunah zet chuan in enkawltu, nau awmtu ley Secretary hna ka kawp ta tihna a ni maw, a ni em? I hnuaia ka thawh ve aṭang hian hun awl reng reng ka la nei lo tih i theihnghilh niin a lang, vawiin tlai tal hi chu keimaha hun hman ka duh ve a, keimah chauhvin, ka mimal duhzawng ka ti ve dawn a ni, min dang thei lovang!" Thinur zet hian a lo tihkhum nghal tawn tawn mai a.

"Tehchai reuh che hian," Oliver chuan a lo ti hrawih a. Laurel chuan a tawlhsawn san nghal a, Elizabeth in a thinrim hlauhawm theihzia a sawi kha. Tun ang hmelpu khawpa a thin a ti ur thei chu mak a inti zawk hle a. Mahse a lehkha ziak kha a chhiar tawh a, hepa hian a duh duhin a awm tir tawh lovang. A rilru a tisak ve ṭang a, a hlau rilru hle bawk a.

"Oliver, engthilnge ni ta?" Elizabeth chuan chik zet hian a rawn en a, a lo kal lai reng reng an lo hmu lova. "In in hnial elo?" A rawn ti he haw a.

"Inhnialna nei tur khawpin kan inhnaih love. Kan inhnial hleinem Beth. Thil tihtur pawimawh ka nei a, kal hrang ṭheuh ila, darkar hnih khat hnuah kan inhmu khawm leh dawn nia," a ti ta zung zung a.

"Oh, kan vaiin Roman ho in hlui te kan fang ho ang chu ka lo ti a!" Elizabeth chuan lungawiloh hmel zet hian a lo ti nang nang a.

Oliver a rawn ṭawng chhuah leh chuan Laurel chuan hrehawm a lo ti em em mai a. "Ni e, mahse Laurel hian amaha vahvel a duh zawk alawm, ani hi chu a dan a dang deuhva, a reng rengah keite chu tihtur ka nei ka tih lawk kha," a lo ti leh vut a.

An inṭhen darh chuan Laurel chu Chas chuan a rawn zui ta vat a. "Richard bulah i kal ve dawn emaw ka ti a," Laurel chuan a lo ti he haw a.

"Oh, Rick chu a nungchang hi a ṭha khawp a, ala naupang chhia hle a ni, bakah a uncle O hi a ngaisang leh lutuk a, ka ning deuh thut ṭhin alawm. Enteh, vawiin tlaiah lengchhuak dun ila, chaw te eiin, lamna ah te kan kal anga....nau awma inhlawh hma in han leng khawthawng hmasa ila," a ti ta a.

Richard te nufa awmdan a sawi duhdan chu ngaihdan siam har a lo ti hle a. Chas ṭawngkamah chuan Richard sawmna avanga telve chauh a nih thu a sawi a, a reng rengah Elizabeth chuan a fate dang pathum chu tlangval pahnih enkawl tur ringawt chuan a thlahthlam a ring lova. Nu fel tak leh fate enkawl uluk tak a ni tih a hmu reng a, Chas chu an hruai ve satliah mai mai niin a hria a. Mahse mahni maia vahvel ai chuan kalpui neih chu ziaawm a ti reng reng a. An kalsawn dun laia Oliver hmel a hmuh phei chuan a lawm rilru hle mai a.

"Enge i ngaihdan? Zingah helai hi kan chhuahsan dawn chauhva, zanin chu hlim deuhvin hmang ila," tiin a la rawn sawm zui zel a.

"Ka hre mai rih lo, nakinah kan la ngaihtuah ṭha leh dawn nia. Khua a lo tlai meuh chuan ka bulah i awm peih tawh lo mai thei asin," Laurel chuan a lo ti hak hak a.

"Ka ring chiah lo.." Chas chuan a lo ti let thung a. Chas mitmengin a rawn endan teh fo chu a lo ngei deuh hlek a. A mitmeng chu a nghal lutuk mah mahin a hria a. Mipa ho hi an inang vek em ni? Duhamna leh mahni hmasial tak vek an lo ni em ni? Mak a ti rilru deuh hle a.

A rilru hria niawm tak hian Chas pawh chuan a sawm nawn leh ta rih lova. Fiamthu a thiamin midang kawm dan a lo thiam hle a, Laurel pawh chuan a lo nuihpui hawk hawk reng a. Chutah an kir leh lamah chuan Laurel chuan Oliver angin tihluihna leh vauna a hmang ve lo tih a hrechhuak zawk a, Oliver nena a han khaikhin ta mai chu...a inchhuih khut a, a khur dar dar mai a. Oliver leh tleirawl han khaikhin te chu; Oliver Savage chuan a tan awmzia engmah a nei lo. Engmah reng reng! Mahse tleirawl bula hun hman dan tal a lo zirtir alawm. Mipa dang bula hlau lova awm a lo zirtir der tawh a lo ni. Ama tana ṭangkai tura a lo hmang a nih pawhin a lo thlawn chuang lo a lo nih hi.

A kir hnuhnung berah an ṭang a. Chas chuan a darah a rawn kuah a, hma a sawn zia hriain a lo hnar lem lova, Chas kuah reng chuan midang chu an va fin ve ta a.

"In va tlai bik ve. Kan nghak reng tawh che u alawm," Oliver chuan a lo ti hlur mai a.

"Minute nga chauh alawm kan nghah Oliver. Thin chhe viau ṭhin teh suh.! Engmah ngaihtuah awm tur a awm lo ka tih kha..."

"A dik alawm. Laurel chu ka bulah a him tawk em em alawm," tiin Chas chuan a rawn kuah a. "A him lutuk tlat, zaninah pawh chaw ei turin kan lengchhuak dun dawn asin, tiraw Laurel?" a rawn ti ta zung zung a.

Hnial a lo tum zuau a, mahse Oliver lehkhabu ziah tum chungchang kha a han hrechhuak leh nghal a, a thin a rawn rim thar leh ta a.

"A ni maw? Len chhuah pui chu i tum amaw? Oliver chuan a rawn ti hriam hraih a, a rawn kal hual vut vut a.

"Aw," Laurel chuan a lo ti ta nghat a. Chas lenchhuahpui chu a duh pawh a ni lo, mahse Oliver chuan chhuak dun lo se a ti tih a hriatna chuan runluih duhna a neih tir a, kal ve lo se a tihna chhan pawh a la hre cheu, a tan chuan ani chu thilnung satliah ve mai, a lehkhabu ziah atana a enchhin na mai a ni a, a thiltih lai chu a tawp a thlen phawt loh chuan a bungrua midangin an lo hmang ve tur chu a phallo a ni.

"I thiltih hi i hriatchian ngei ka beisei," Laurel hriat theih tur tawk lek hian a han ti sup a. "Fimkhur hle ang che, Laurel. I nunhlui i theihnghilh thei ta chu a lawmawm hle a, mahse vawikhata i tih vak chuan a ṭha lovang. I la hre tlem hle si a...mipat hmeichhiatna lamah ngat phei chuan, a bul ṭan dan phei chu i thiam tawh a ni mai thei e, mahse a tak tak ila tawng lova, buaina i tawh mai ka hlau hle a ni," ngaihtuah hmel deuh hian a rawn ti leh a.

"Buaina ka lo tawk a nih pawhin min pui turin Chas a awm dawn alawm," no zet hian a lo tih khum a. Oliver thinrim hmel a hmuh chuan a hlim ru sauh sauh a.

"I pahrawn khan dawt a lo sawi lo a lo ni mahna. I lo phu tawk reng thil a lo ti pawh a ni ang e," rawng zet hian a ti zui ta hrep a.

Dar ruk a lo rik chuan midang zawng chuan an kirsan ta a. Elizabeth chuan zing hma taka chhuah a duh a. Chas pawh chuan an haw hma tur thu a sawi bawk a, "Arles te chu Paris anga khawpui lian a ni em ni? Dar sawm a rik chuan an inkhar vek tawh ang chu," a ti hak hak a.

An pahnih chauhva an han awm takah chuan Oliver laka hnehna chang nia a inhriatna kha a bo nghal a. A fala an han awm takah chuan Chas nungchang chu a danglam nghal ta mai reng a. A duh aia nghetin a darah a rawn kuah a, tawlhsawn a lo tum chuan a kut dahthlak pahin a hnute ala tawhsak zui zauhva.

Makti hmel deuh hian Laurel chu a rawn en a. "Chuti taka i lo in duh up ka ring lova, Savage te ang mipa bulah i cheng lehnghal a," a lo ti zui a.

"Cheng dun tihah a secretary ka ni mai a, ngaihdan danglam deuh i lo nei niin ka hria Chas," Laurel chuan a lo ti nghal a.

"Oh, ka ring chiah lo, a dik tak chuan ka ring lo hul hual. I duh ang ang chuan insawi thiam mahla Laurel, Oliver a awmdan leh ka bula kal tura a duhloh na che kha chuan chhan ṭha te zawng a nei ngei ang," Chas chuan a lo ti dam thlap a.

"A ni ngei ang. Mimal tuikhuaha sangha man ru tu ni maiin ka inhre hial a ni. Tunlai nula te hi mipa pakhat ta chauh an ni lo tih a hriat a hun ve tawh a ni mahna, a dik em? Keilah ka lo lawm hle si a," Chas chuan za vak lova nui chung hian a lo ti a.

Lo hriat thiam ve awm tak! Laurel chu a thinrim ta hle a, a talchhuak lawp a. "I ngai diklo vel vek a nih chu Chas. Oliver secretary ka ni mai, a nula ka ni lo," a lo ti hrep a.

"Chuti maw? Chuti si engatinge nizana kan lo thlen lai khan pindan pakhat chauh a en si? Mutna pindan pakhat chauh a eng a, kan thlen hnaih fe ah inhnuai lam chu a rawn eng ve chauh a ni. Eng ngaihdan nge nei se min tih, Laurel?" Chas chuan cho zet hian a rawn ti ta mai a. "Insawifiah ila duh em ni?" A ti ta a.

Chas chuan a ti dik ngei a, mahse hrilhfiah kher a ba lova, ani lo buai ve na tur pawh a awm lo.

"Duh lem love, Chas, kan thiltih tum hi ṭhulh leh mai teh ang. Min hruai haw mai ta che," Laurel chuan a lo ti let nghat a.

"Uncle O hnenah kei aiin amah i thlang zawk tih hriattir nan maw? Ni love, baby Rick-an a uncle a chhuan zia thu a sawi sek hi ka nin tawh mah nak alaia. Kha pa kha a â ka ti ngawt mai. Hun hlimawm tak ka hmanpui dawn che alawm Laurel," a ti ta a.

Laurel chuan a lo ten em em tawh a. Oliver khan a lo sawi dik chiah a ni.

"Ka duh lo mai ange, ka lawm e Chas. Kir leh mai ka duh tawh a," a lo ti nghat nghat a.

Chas chuan a hmui a tisawi zauhva, a mita tisa phurna lo lang chu Laurel chuan a lo en reng a, a taksa chu a rawn enkual nasa mai a, a it tih hai chi rual a ni lo.

"Enge ni ta, Laurel? Savage-a anga ka tihlawm zawhloh che i ring deuh elaw?" A ti leh ta a.

A hruai kir duh ta chuang lova. Chas awmdan chuan a tihlau deuh hle a. Chaw an ei anga, a haw pui mai ang chu...an chaw eina a wine an rawn chhawp chu tui a tih loh avangin Chas chuan a in zo vek a. Restaurant an chhuahsan chuan dar sawm a ri dawn tawh a. Chas chuan lamna hmuna kal a rawt a, mahse Laurel chuan haw a rawt ve ta tlat thung a.

"Awle, mahse haw kawnga chawlh rei deuh i remtih dawn chuan le, a ni em?" tiin a rawn en chik hle a.

In kawng chanve zet an thleng tawh tih chuan kawngsirah a car chu a dintir ta a. A thim in a reh ruih a, motor veivak hmuh tur a awm hauh lo bawk a. Motor engine a tih thih a, a lam a rawn hawi chuan Laurel chuan a lo hlau hle tawh mai a.

"Inthlahdul rawh," Laurel lo ṭang ṭeuh chu hrethiam niawm tak hian a rawn kuah a. "Enge hlauh tur awm?" A rawn ti sar sar a.

"Elizabeth khan min lo ngaihtuah tawh hle ang. Hma taka chhuah kha a duh si a," Laurel chuan a lo ti hram hram a.

"He thil hi Elizabeth in rem a ti lo anga maw? Savage i tihna a ni zawk lo maw? Enteh, enge i ngaihtuah a, mipa dang bula awmin a dang i ngaihtuah tlat amaw? Kan hlim dun viau ka lo ring a," Chas chuan a lo ti bul hmak hmak a.

"Chaw ei puiah min sawm alawm," Laurel chuan a lo ti let ve hlak a.

"Ni e, mahse chaw eipuia insawm chuan a dawt zela kan tihtur a hriat reng alawm."

"A man ka rul anga maw? Awle, a pawi ka ti hle mai, Chas, mahse i sawm fuhlo deuh a nih chu," cho zet hian a lo ti ta kha kha a.

Chas kuahna aṭang chuan a talchhuak a, car aṭanga chhuakin kawngpui lam a pan ta nghal a. A hnunglama Chas phun sup thawm leh car a tinung ri chu a hre nghal a, a sirah chuan a rawn tlan phei ta a.

"Oh, lo kal rawh Laurel, in ti ûp viau mah ta che!" tiin a sirah chuan a tlan ve zel a, Laurel in a lo ngaihsak duh tak lohvah chuan a aw chu a hriam ta hraih a. "Enge i ngaihtuah reng reng a? Ka beisei tur che chu i hre lawk vek tho lawm ni?" a rawn ti hriam ta hraih a.

Laurel chuan a sawmna alo pawm ta kha a inchhir hle mai a. Oliver lehkha ziak kha hmu lo se chuan tunah hian him takin inah a mu tawh awm si a.

Him takin! A pum a rawn so bulh bulh a, a khur dar dar a, mahse a hlauh ber tur chiang taka a hriat hman hma in Chas chuan car kawngka chu a khar ri bur a, a rawn tlan pel thuak a. "Savage i duh a nih kha. Awle, in hruai haw tir mai ta che!" A rawn ti ṭeng chhuai s.

A tlansan tak tak a ring hauh lova, mahse Chas chuan a tlansan daih a ni. A motor chuan in lam pan lovin Arles lam a pan daih thung a. Mihring chenna hmun chu engtia hla nge a nih lah chu a hre der lova, a hlau em em mai a, pheikhawk hniam a lo bun hlauh chu vannei a in tiin in lam kawng nia a hriat lam chu a pan ta ringawt a. Tuemaw puitu a hmuh mial takinna ti rilru a. Rannung hram chi tinreng a ri chuah chuah , atir chuan a hlau dawn a, mahse an tina dawn lo tih a inrin luih tir hram hram a. Zan boruak chu a thiangin thing par rim a nam chek chek a. Car thawm a hria a, Oliver a nih ringin a lo lawm hman hle a, mahse car chuan a awmna a rawn thleng ta hauh lova, a peng bo ta daih a.

Oliver car a nih a rin ringawt laia a thinlunga thil lo awm kha enge ni? Eng rilru nge a lo put hman kha...hlimna te, mahni chian lohna riau leh beiseina te, thawven huaina leh enge ni ta...? Eng thil nge ni ta?

A ṭhu hnawk a, a khur zawih zawih a, a rilru buai nuaih nuaih chu tihreh a tum a, kha car kha Oliver car ni turin a duh a, rawn pan sela, rawn kuah sela, a ang chhunga him taka awm chu a thlahlel ta em em a. A nun a letling zo ta. Province ah hian Oliver laka phuba lakna remchang nei tur leh tihchhiatna hmanrua siam turin a kal a. Mahse...a aia natna nasa zawk tawrh a hmabak ta si a. Mipa chu a hmangaih a, mahse mipa hmangaih letna erawh chu a dawng hauh lo thung ang.

Oliver chu a hmangaih ani! Thlamuan thlak huaiin a hria a, a awmdan leh a chunga a thiltih zozai te kha...thinurna leh phuba lak a duhna vang emaw a lo ti a. Mahse a awmdan leh a rilru chu a tilang tur a ni lovang a, a hmangaihna chuan a laka a rilru put dan a tihdanglam dawn chuan loh avangin Province a kal chhan chu tihhlawhtlin ngei a ṭha ang, mahse engtinnge a tih theih tak ang? Oliver chuan a hmangaih a ni tih hria se engtinnge a lo tih ang, rapthlak a lo ti ngawt ang chu, a ramsa khawi laiin a hmangaih chu, a tlanbosan duh hial ngei ang.

Amah hian a kalbosan tur a ni. Amah leh amah a inring zo lo anga, a chebuai thuai ang, Oliver chu a fing a, a rilru a hriatsak thuai anga. Chutiang a lo thlen hma ngeia a kalbo a ngai a ni. A ṭah a chhuak ta hluah hluah a. A diklo vel vek a ni. Oliver chuan ama tana hlawkna tura hman leh a tum a, anin a lo hmangaih avangin a duh ang angin a awm tir a, Oliver chu engtika lo hmangaih ṭan nge a nih le..?

Muangchang hian a kal leh ta zel a, a sana a bih zauh zauh reng a. Mihring chenna hmun reng reng ala hmu lova, Arles leh in inkar kha a ramhnuai hle reng a, kawnga in ding a hmuh pawh a inhre ta lova. In hlat leh hlat loh lah chu a hre der silova, Chas kha a haw tawh ang em, a awm ve ta lo chu engtinnge a sawi ang? Tuman engatinge an rawn zawn loh? Engvanga Oliver laka phuba la ngam ta lo nge a nih? Engvanga hmangaih tur khawpa â nge a lo nih? A ngaihtuahna a buai nuaih nuaih a, a hah lutuk nen, kawngsirah chuan a ṭhu ta hnawk a, a lu a na tluk tluk a, a kut chuan a dawm ta vawng vawng a.



*******LhpiecesRenthlei*********



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)