WAKE UP CALL 18+ (Chapter -3)

[Noah Hringngen]

WAKE UP CALL

-Noah Hringngen




Chapter -3




Ka mittui chu ka hru hul thuai thuai a, tunge min rawn chhanchhuaktu chu hriat tumin ka en vat a, mahse ka mittui bawk chu.

Ka mittui chu ka biangah a luangthla nguah nguah a, ka thaw a veng ta huai mai. Tunah chuan ka him ta. Leiah ka thingthi hnawk a, ka kut pahnihin ka hmai ka hup a, hetianga mal taka awm tur hian eng thil nge tihsual ka neih bik le?


Ka darah min rawn vuan a, a kut chu paihthlak sak nghal lawp ka duh. Mahse a aw chu ka bengah a mikhual tawh lo. Jace-a a ni tih ka hria. Tunah chuan thawk pangaiin ka thaw leh thei ta.


“Ka lo pui ang che” zawi sapin a rawn ti a. “Ka ti na dawn lo che”. Ka hma zawnah rawn thingthiin a kut hit veng veng chuan ka hmai chu dimtein a rawn khawiha. Muangchangin ka hawi chhuak a, a mitmu lunghlu hring ang maia mawiah chuan keimah leh keimah ka inhmu a, The Indy Go a la hmuh ngei kha a ni. A mitmeng nem thek mai chuan ka rilru a ti ni zual a.


Engtik laiin nge chutiang chuan ka chet tih pawh ka inhre hman meuh lo. A awmah ka bei hnawp a, mahni inkhawngaihna mittui chu dan rual lovin ka hmaiah a rawn luangthla lum pup pup a. Tun mitkhapkar lekah chuan a tang chhungah chuan hun rei tak ata ka hmuh tawh ngai loh thlamuanna thar chu ka chhar leh a, amah vangin minung ka la ni a, lawmthu hrilh ngawt mai loh chu tih sak theih ka nei lo. Min rawn pui kha a tih tur em em a ni hran lova, midang pawhin puih min tum hek lo. Mahse ani erawh chu ka tan a rawn kal tlat si.


Minutes reilote ngawi renga kan awm hnu chuan ka in pawt mar tha a, a lam ka hawi a. Ani chuan lainat hmel tak hian min lo en renga. “Ka lawm e” ka ti sapa. “Min rawn puih avang khan ka lawm lutuk e. I tih kher pawh a ngai lo asin” chutia ka sawi lai mek chuan tukin a ka chhan dan zawng zawngte kha ka hrechhuak uar uar a. “Tukinah lah khan-“


A kutzungchalin ka hmui a rawn danga. “Chutiang sawi angai lo” tih pahin ka khup rawn thi tuam tuam chu a en a. “Ekhai aw...! Tih fai vat angai a nih kha” tih pahin ka kutah min rawn chelh a, min kai tho a. “Ka inah ka hruai ang che. Chuan i intifai dawn nia”


Min vawnna chu la sawnin ka lu ka thing a. A mi sawmna chu ka tan hnar phar rual ni lo mahse ka thei lo. Pawisa ka thawhchhuah vat angai. “A ngai lo. Ka lo kal thei lovang. Ka hna lama ka thlen phei vat angai. Ka inluahman tur tuak angai. Thla hmasa pawh ka pe tawh lova, chuvang chuan-“


“A tul lo” tiin ka thusawi lai chu min rawn pawtchat a. “Hetiang ang dinhmunah hi chuan i hnaah ka let tir thei lovang che” a mitmengah chuan ka lakah hlauhthawnna a nei a ni tih ka hmu thei a, ka purse ken chu a la lawka, a kal ta daih a. “Min rawn zui rawh” a rawn ti a.


A hnung a chak tak a umzui pahin ka purse a ken chu a kut atang ka va phih thlak sak lawp a, anite hi chuan a hrethiam ve tawp nang. “Ni lo ve, i hrethiam pha ve lovang. Zanina pawisa ka thawk chhuak lo a nih chuan naktukah chuan khawlai a vak rawlai tura hnawhchhuah ka ni tawh dawn” tih pahin ka inher a, Club luhna kawngka inhawng lam pan chuan rilru tumruh tak puin ka phei a. “Khawilai a vak rawlai nawn leh tur chuan ka inphal tawh lo. A thleng nawn leh tawh ngai lo bawk ang”


Mipa ban tha chak tak mai hian ka kawngah min rawn pawm kang lawp a, kan hmai a inhnaih khawp mai. A Car awmna lamah chuan naupang titau ang mai hian min pawm phei a, a phurawm viau rualin ka rin loh lam daih a ni. Au chiam ka han tum zet nanga a nui hmel hlimawm tak avang chuan ka au leh ta lo zawka.


Car kawngkhar a hawn hma chuan ka mitah min rawn en zeuh a, kawngkhar chu hawngin passenger seat-ah chuan dimtein min nghat a. Ani pawh chu a driver seat-ah rawn thuin a ban chak hmel zet hmang chuan steering chu an her kual pawp a.


“Thil har vak a ni hleinem. Ni lawmni?” a rawn ti a.


A car a tinung a, a tlanchhuah laite chuan awihawm loh khawpin kan ngawi dun renga. Ka purse kilhna pawng chu ka khal neuh neuh reng a, chutia ka hawi kual vel pah chuan tihpalh ang deuha lan tumin a hmel chu chiang deuh hlekin ka va thlek a, a engkim mai chu a lo mawi vek chu niin. Hmui mawi tak a nei a, a khabe kual lah chu duhthusamin a mawi a, a khabe atang a biangah hmul a to chho bawka.


A rilru lak pen nan ka aw ka thian ri kharh a “Umm...,a hmain club-ah i rawn la kal ngai vak lo em ni? A chhan chu nizan tih loh kha chu ka hmuh ngai che pawh ka hre lo” tiin chil ka lam khalh a. “Zaninah erawh i rawn kal leh a”


Ka lam rawn hawi pahin a rawn nui suk a, chutah chuan a hmui vei lamah hmui beh a beh a ni tih ka va hmu a. chu chuan a ti lang sexy lehzual. “I sawi dik e. Nizan kha ka vawikhat rawn kalna a nia. Ka mit la deuh thil ka hmu a, chuvang chuan zu tlem in turin in leh rawn chian turin ka rawn kal nawn leh a ni”


Eng dang maha chhang lo chuan tukverh lam ka hawisan daih a, chutiang em emin kan tlan rei hran lo. Khawi lai hmunah nge kan awm tih zawh ka tum mek lai chuan in cream rawng kawngkhar pawl nei awmna lamah chuan kan tlan lut a.


Engine a off a, ka lam a rawn hawi a. “He lai hmun hi a nia” a nui suk a, Car atang chuan chhuakin a han zi mar te te a. Car ah chuan rawn dakin vur khawng ang maia ka lo thu khawng reng lai chu min rawn en a. “I lo chhuak ve daawn nge ka bathroom khi hetah hian ka rawn sawn thla ang a i intifai dawn zawk?” tih pahin a nui huah huah a, kawngka lam chu a pam a. A lam dan confi tak mai chuan a ti lang sexy zual sauh a.


Chutia a kal lai ka thlir reng lai chuan a jeans hak chhan a a mawngtam ra6wn puar nalh tak mai chu ka hmuhhmaih thei lo.


Ka thaw haka, ka mit zawna ka sam chhawlleng rawn tlate chu ka chhem kang lawp a, rilru fim tak ka put angai. Car atang chuan ka chhuak a, ngaihtuahna mumal ka la pu thei lo. A inah chuan ka zui lut dawn nge ka inah ka haw dawn nge, ka hna lamah ka let leh zawk dawn?


An kawngkapui bulah chuan ka ding rana, light chu dim ruaiin a chhi a, thutkhawmna pindante chu a lang hnim deuh ruih a.
Leather dum hmanga siam furniture, mei chhemna thuk, tv lian tawk tak, lehkhabu dahna bawm leh a sirah computer table a inhung bawka. A inrem dan zawng zawng chu a duhawmin a rim pawh a nung sar a, vanilla rim a nam chem chem a.


Pindan inkalpawhnaah chuan muang fan raihin ka phei a, kawngka lo inhawng hmasa berah chuan ka daka, bathroom a lo ni a. A chhung chu rawng pawl vek hmanga chei niin a fai hle a, mahse Jace-a hnuhma awm hmuh tur engmah a awm lo. Hmun dang ka hawi leh a, kawngka pakhat kar atang chuan pindan inkalpawhna lamah chuan eng a rawn chhuak raiha.


Chu lamah chuan muangchangin ka phei leh a, zawitein kawngka chu ka nam hawng riai riai a. Rang takin ka zuang let nghal dawrh a, a chhungah chuan kekawrte nen chauh a Jace-a a lo awm lai ka va hmu a. A hnungzang hlai tha tak maiah chuan tattoo nalh zet mai hi a inchhu thla ruah a, a chet zawnga a tihrawl han che velte chuan thawk thlengin a ti har thei mai dawn alawm le.


END OF CHAPTER -3