DIARY

[Zet Khawlhring]

DIARY

By - ZeT KhAwLhRinG

Ka zun chhuak chuan min ti harh a, light ka on a, banga kan sana tar chu ka melh zauh a, a bân tawi ber chuan dar 1 a lo kawk va tawh a, zung turin bathroom lam ka pan a. Ka let leh chuan Bawihtei room light lo la êng reng chu ka hmu a, "I off theihnghilh leh tawh ni maw?" ti rilru chungin off tur chuan ka lut a, thosilen pawh a lo zar lova, ka zar sak zawh chuan puan a lo sin that loh vangin sin that tir ka tum a, lehkhabu chhah/lian vak lo hi alo kuah a, a bianga a mittui luanna lo rang niaih chu ka hmu a, a mit te chu a bui lâk a, a sam pawh chu a thur bâm a, a tap nasa a ni tih chu hai rual a ni lo.

Second reilote chhung chuan engvanga tap nge ni ang, kan mut hma lawk lahin hlim takin a la nui ar ar si a, harsatna a nei em ni le? Kan mithmuhah a hlim thei em em si a, kan hriatpui si loh hian rilru natna a nei zawk em ni tih zawng zawngte chu ka ngaihtuahna chuan a dap kual hman vek a, thil pakhat ka hre chhuak a, a lehkhabu kuah chu a pa (amah hringtupa) in kan pa hnenah lo pe tura a tih a pek tak kha a nih ka ring nghal a, a chhungah engnge in ziak tih hre chak taka keu ka tum lai tak chuan a lukham hnuai a envelope lo lang chu ka hmu a, ka la a, ka chhiar hmasa ta zawk a.

Ka hmangaih ka fanu,

He lehkha chhiar thei tura i nunna zuaha a la awm avangin Pathian hnenah lawmthu awm rawh se.

I piancham hi i nu nen kan lawmpui em em che a, kan lei taksa i kiangah awm tawh lo mahsela kan hmangaihna che chuan a chenchilh reng che a, tluang taka i nun i hman a, i hrisel theih nan kan dil sak reng che a nia.

Ka fanu, hetia i nu nena nangmah chauh a kan kal san ta mai che hi hriatthiam loh chang i ngahin ka ring. He leiah hian kan duh dan leh kan remruat ang diak diak hian kan awm thei lova, khuanu'n kan tana a ruat hi kan pawm thiam a tul zawk a lo ni. Chuvangin, i chunga thil thlengte pawm thiam zir la, i nu leh pa nangmah chawm sei lian tu che kha zah tak leh hmangaih takin lo enkawl la, leia i Pathian hmuh theihte an ni tih lo hre reng ang che.

He lehkha ka ziah lai hian natna khumah ka mu reng a, thui tak han ziak turin chakna ka nei tawh lo, natna chuan ka taksa ei chhiain thihna chuan min lem mek a ni, rei ka dam tawh dawn lo tih ka hria, . .Bawihte, tih sak theih che ka va'n nei tlem tak em! ... I pa nih hi tling lo hle mah ila nang ka fanu i ni hi ka inchhuang tak zet a ni. I tan ro sum leh pai hnutchhiah tur che engmah ka nei lova, ka neih chhun ka diary i tan ka hnutchhiah a, kim lo mahse kan chhungkaw chanchin chu i hre thei ang. I nu nen kan hmangaih em em che tih hi i hre reng dawn nia.

Ka chau tak zet ta, hei chauh hi ka chah leh duh che. Thihna leh natna awm tawh lohna hmunah i nu nen kan lo nghak reng ang che, chu hmuna intawk khawm leh thei turin inbuatsaih la, Pathian duh zawngin i nun hmang thin ang che.

Hmangaih em em tu che,
I nu leh pa
.
.
.
.
.
Ka chhiar zawh chuan Bawihtei chu ka en a, a lungchhia chu a la in hnit faih faih a, chu lehkhabu chu chhiar tumin ka keu a, a phek hmasa berah chuan Bawihtei nausen lai leh a nu leh pa an pathuma an thlalak chu a lo inbel a, a hnuaiah chuan ‘Hlimlaini’ tih a lo inziak a, ka thlek vang vang hnu chuan a chhung thu chu ka chhiar tan ta a. . .

(A fiah zawk theih nan darkar 10 hmalam ka'n sawi lawk ang e)
Ka purun sen zaiin ka mit a ur thip avang chuan ka mittui a tla lek lek a, insût pah chuan ka mit chu ka kawr tlang hmawr chuan ka hru nawk nawk a, men a tih nawm phah deuh chuan ka hria. Sana chu ka en a, tlai lam dar 3 a lo ri dawn tawh a, ka chawhmeh siam chu a hmin leh hmin loh ka tem kual dan dan a.

Ka fanu chuan a piancham lawm nan a thiante chaw ei ah a sawm a, an rawn thleng tep tawh in ka ring a. An lo thlen hma a lo in peih hman hram chu ka duh a, ka theih ang tawkin ka hmanhmawh ve a, lum ka tih tak deuh avang chuan ka chalah chuan ka thlan a rawn bawl tiam tiam a, ka kut chuan ka han hui pâwk a. Chutih lai chuan kawtah chuan motor horn a rawn ri a, pawnah ka chhuak nghal a, kan pa chu garage ka hawn sak a, motor a dah fel hnu chuan kan inzui lut nghal a.

Kan pa chuan, "Bawihtei te an lo la haw na nge? An lova thleng har ve?" a ti a.

"An lo thleng ve tep tawh ang." ka ti a, ka eirawng bawl a laklawh avang chuan choka lam ka pan san a.

Eirawngbawl ka peih hnu chuan Bawihtei leh a thiante ho chu an lo thleng ve ta a, khua a lum bawk nen fridge a ka thei tui dah vawh chu in tirin, tui an tih thu an sawi tliar tliar hlawm a.

A thiante ho haw na tur a hlat deuh hlawm avangin an thut hahdam hnu chuan chaw ei ka siam sak a, an puar tlang ve viau turah ka ngai. An ei tlem hran lo in ka hria, chawhmeh ka siam uluk bawk a.

A thiante ho an haw fel hnu chuan present an rawn ken sak ho chu kan hawng a, kan hlim tlang hle mai, kan hawn zawh hnu chuan a pa in kawr thar a lei sak chu a han ha chhin vel a, a hlim hle a, a nui sen sen reng a. A pa nen erawh chuan min helhkam tlat tu a awm a, chu chuan kan ngaihtuahna a hruai peng a ni teh chek ang chu ngawi rengin kan lo thlir leh ringawt thin.

A pa chu roomah kalin uluk taka paper var a intuam hi a rawn keng chhuak a, han en mai pawhin lehkhabu a ni ang tih chu a rin theih mai a, chu thil chu Bawihtei a pa in(amah hringtu pa)a thih san hma lawk a kan pa hnenah, "Kum 18 a tlin hunah i lo pe dawn nia" tiin a chah a, a tuk lawkah a boral ta nghe nghe a.

Bawihtei hnenah chuan a pa chuan "Hei hi i pain a boral hma lawkin min pe a, kum 18 i tlin huna lo pe tur che in min ti a, nakinah i hawng dawn nia." a ti a, mu turin mahni room lam kan pan ta a.

Bawihtei hi a hming tak chu Lalmalsawmi a ni a, a pa(ka pasal) nen hian a hming tak pawhin kan ko phal ngai lova, kan duat em em a. A mah hi a ngo in a hmel a tha a, kan hnena faktu pawh an awm leh nawlh thin a. A ruk tak chuan kan chhuang ve em em thin.

Kan venga an rawn awm tirh hian kan thenawmah mi inhnuai luahin an rawn awm a, a pa hi pa fel leh tlawmngai thei tak a ni a, kan pa nen hian an inkawm ngeih hle a, an inah a leng fo a, chapo thu ni lo se, kan dinhmun a inthlauh deuh vang nge kan inah hian an rawn chuangkai tam lutuk lo, pa inthlahrung tak a lo ni bawk nen.

A tawi zawngin sawi ta mai ila, chhungkhat laina an neih awm kan hre lova, nupa inngeih tak an ni a, tawng mawi lo nilo sela, retheitê mah nise, an hlim dun em em thin. An pa zawk hi a hnathawhna ah a chetsual avangin hnathawk thei lovin a awm a, an nu chuan rim taka hnathawkin an pafa chuan a chawm a, a hriselna in tuarin a pasal leh a fanu chu ngaihtuah em em in a boral san ta a, hetia eizawngtu berin a boral san takah chuan YMA leh thenawm khawtlangin theihtawpin an chhawm dawl a, an khawsa ve naw naw ani ber. Tun hnu a ka ngaihtuah leh hian 'YMA hi a lo ropui in mizo nih hi alo va han nuam tak em!' ka ti thin.

Bawihtei pa pawh chu a chet sualna avang leh an nu boral tuar nen a hriselna a pan ve tial tial a, a taksa a chaklo in damdawiinah hial dah a ngai ta a, kan pa nen hian inkawm ngeih tak an ni bawk nen theihtawpin kan enkawl a, Pathianin kan tana a ruat ah kan pawm tawp a, kar hnih damdawiin a a awm hnu chuan paper vara thil tuam hi kan pa hnenah a pe a, a fanu chu kum 18 a tlin huna lo pe tur leh lo hawng miah lo turin a intiam tir a, a tukah chuan a fanu ngaihtuah em emin a boral zui ve ta ani.

A fanu Bawihtei hi kan kutah a dah a, tha tak leh hmangaih taka lo enkawl turin min ngen a, fa kan neih theih loh avangin fa tak tak ang chiahin kan en a, a ni ai hian mahni fahrin ngei te pawh kan hmangaih thei chuangin ka ring lo. A ni pawh hian a nu leh pa dik tak kan ni lo tih hre mahse, a tet te atanga enkawl kan ni bawk a, nu leh pa tak tak ang hmiahin min en a, thu a awihin min hmangaih em em a, han vuina tur leh sawi selna tur pawh kan nei ngai lo.
.
.
.
.
****
Diary chu ka chhiar a, thawnthubu te pawh a ang ka ti lek lek hial a, hla thu te a awm leh zauh thin a, lehkhathawn a in zep tel zauh bawk a, a chhung thu chu hetiang hi a ni. . . .
.
.
.
.

Ka pa ka chhun avangin thil ka hre rei thei em em a, kum 10 mi lek ka nih laia kan in a mi an lo tlan khawm hum hum kha ka la hre reng thin. Kan pindan bangte chu an rawn thiat mawlh mawlh a, bungruate chu pawnlamah an thiar chhuak zung zung bawk a, inchhungah chuan YMA thutthleng an rem tlar pût a, kawmchhak tualzawl a ka nau te ho nena kan infiam chu kan chhuk thla ve a.

Kan kawt kan thlen chuan ka nî in min lo hmu a, thenawmte inah min kai lut vat a. Kan intih balh deuh avang chuan min silfai sawk sawk a, min silfai zawh hnu chuan ka nu thih thu leh damdawi in atanga an rawn phurh haw mek thu chu min hrilh ta a.

Kei chu ka lung fing tawh deuh bawk nen ka mittui a tla a, sawi tur hre lo chuan ka ngawi ta reng a. Ka nau erawh chu a la mawl thelh thelh khawp mai a, unau in chhang bung chiah ni mahila kan inkarah kum thum lai a tla a, unau pahnih chiah kan ni bawk a, kan in ngaina em em a, sikul chawlh hi chuan kan inzui chawt thin. Kan thenawm naute nen chuan an inkawm hlim leh thei mai a, ka nu vanram kai leh kai loh turah an inhnial laih laih a, thihna awmzia an la hrethiam ve tak tak lo.

Kan in a leng lo chuan mi an lokal khawm a, a then an titi a, a then an zai bawk a. Ka nau chu a muhil tawh a, kei pawh chu ka mut chhuak chu ka bu leh lak lak thin a, mu tura min tih pawh chuan ka duh lova, ka nu ruang kil in ka thu ve tlat a, ka nu unau te leh ruang kil thenkhatte chu an tap râwih râwih a, ka pa pawh chuan a mittui a hru zauh zauh a, a insum hram hram tih chu hai rual a ni lo. Tunhnu a ka ngaihtuah let leh hian ka pa tana a lo nat tur zia leh a lo pachan zia ka ngaihtuah a, tluk lo ka in ti hle thin.

Ka nu chuan lungngai hmel em em hian min lo en a, a mittui a tla zung zung a, ngatinge ti a zawh tum in biak ka tum a, ka tawng chhuak thei reng reng lova.

Khuangte leh khuangpui in thum rawn tluk tluk chuan ka mu thlu chu min ti harh a, ka mumang a lo ni reng a. Ka nu chu ka ngai zual ta em em a, ka mittui a tla zung zung a, ka nu chu ka bulah awm reng mahse nunna a nei tawh lova, mitthi lei hnuai thlan khur chhunga phum mai tur a ni tawh si.

A hmel dang vek tawh chu ka en a, a biang chu ka khawih a, lumna reng reng nei tawh lo hian a lo vawt vek tawh a, biak pawhin min chhang tur a awm tawh lo. Kan inchhung chu a ruak huaiin ka hria a, ka nau nen chuan he khawvelah ‘KA NU’ ti a han koh tur kan nei ve ta lo.

''Ka nu, engngatinge min kal san, Mama nen hian min khawngaih lo em ni, i tel lovin engtinnge kan lo awm theih ang, Mama lo harh hunah 'â nu khawnge ' ti se engtinnge ka lo chhan ang, ka nu lokir leh rawh."

Ka mittui a luang zung zung a, ka chhungril a nâ a ni, ka rum a, ka tap a, ka lo muhil zui a.

Ka harh leh chuan ni a lo chhuak siar siar tawh a, a then an haw a, a then an lokal hlawm bawk a. Ka nu vuina ah chuan kan in a lenglo leh pawn lamah pawh thutna inchan lo khawpin mi an lokal khawm a, kan inchhung khat vekin nu leh pa thu mahse ka nu a tel ve lo.

Ka nau Mama chu kan chhung te ho chuan thil te leiin pawisa te an pe a, nuam a ti em em a, ka nu thihna chu a hrethiam ve mawlh lo. Inlengte tin in chhungkhat laina te haw hunah a nun khua engtin tak hmang ang maw. Ka nu thihna in a nghawng chu a la tuar ve dawn chauh si a, nu te ngai rual lek nu tel lova zan pawh muhil hlei thei lo chu naupang lawm nepnawi vel mai mai chuan rei a hnem in a ti hlim reng thei dawn si lova.

Ka nu vuina programme an hman zawh chuan thlâ te kan la a, thlanmual lamah ka nu ruang awmna kuang chu an zawn a, kan inkawt a zamzo par chu ka thliak a, kuang zawntute chu kan zui ve hnak hnak a.

Ka nu thlan an vur zawh chuan zamzopar ka thliah chu ka dah a, ka sweet ah pakhat leh biscuit ka lo ah chu thlan vur na lei thar sur ah chuan ka phum a, ka nu ei ve atan ka ît em a ni. Ka nau chuan ka tih ang chuan ti ve in eitur a neih te chu a phum ve a, ka nu ruang an phum zawh meuh chuan ka nu thihna chu a hrethiam ve tan ta.

"Â u, Â nu hi a lo tho tawh dawn lo a mi."

Chhan a va’n han har tak em! . . ka nau kut chu ka vuan a, lungchhiat avanga aw thâm tiak chuan, "Aw, lo tho tawh dawn lo, vanramah a awm tawh a lawm" ka ti chhuak thei hram a. Ka nau lungngai hmel leh mangang hmel mawlh mai kha aw. . .

Kum khua a ka nu a zal tawh na tur thlan chu ka en ngawih ngawih a, he khawvela in hmu leh tawh ngai reng reng lo tur chuan ka mangtha a, in lam pan chuan kan haw ve ta a. . .

Ka nu boral atang chuan hun a liam ve zel a, ka pa pawh chu a hna zawm alo hun ve leh ta a. Ka pa; a hna kal a ngai bawk si, in lam enkawlah rin tlak kan la ni lo bawk nen ka nî fanu nula ve uaih tawh chuan min awm pui a, a ni a lo awm takah chuan ka pa pawh chu a hahdam ve ta deuh a.

Kan khawsa ve naw naw a, ka pa sawrkar hnathawk a ni bawk a, sum lamah chuan kan harsa hran lo. Mahse, nu tel lova khawsakna inchhung chu a kim lo tlat, kan inchhung chu a tla bal hret hret a, ka nu dam lai a kan inchhung hnûm hlarh thin te, kan in leh a vel fai han thin te kha a hnawk hle tawh a. Keini chu sawi loh kan inkawt a pangpar te pawh chuan duat taka enkawl a, zing tin leh tlai tin tui pe thin tu ka nu chu an ngai ve thin ngawt ang. An hnahte chu a ro zo a, a par ve chhun te pawh chu fe re te te an ni hlawm a. Ka nu damlai a mawi taka par vul thin kha hmuh tur a awm tawh lo.

Hun a liam a, kum a liam ve zel a, ka pain ka nu damlai a chin ngai reng reng loh chu a ching thar a, tlai tak takah office a rawn haw a, zu rim a rawn nam haw fo a, zan riah pawh kan rualin a kil ta meuh lo. Kan lakah erawh a sual hran lova, kan in erawh a zahawm lo tulh tulh in ka hria.

Ka nî fanu U Thani lah chu a lo awm tirh chuan a fel ve viau a, tunah erawh engnge maw a hriat ni, a inchei hlarh hlarh reng a, chhunah kan sikul kal hlanin a bialpa in a rim a, nileng lengin engmah ti lovin an lo inkawm a, kan sikul ban hma deuh hian a haw ve chauh zel a.

Ni khat chu chawhnu lam kan chawlh avangin ka haw hma a, in ka thlen chuan kawngkhar chu ka hawng a, inchhungah chuan tumah ka hmu lo a. U Thani chu a muhil a nih ka ring a, ngawi reng chuan ka nau nena kan room lam chu ka pan a ka inthlak zawh chuan thiante nena infiam tura len chhuah leh mai ka tum a.

Room atanga ka chhuak chu mipa tawng thawm ka hre ta tlat, ka beng dawh in ka han ngaithla chiang a, U Thani room atanga dim taka phun leh zauh thin chu ka hria a, hriat chian chu ka chak ta tlat a.

Thawm dim takin U Thani room lam chu ka pan phei them them a, a room kawng khar chu a lo inkalh a, a room bang leh ka beng chu ka chuk tuah a, thawm chu ka ngaithla a, thawm chu a reh daih a, mahse thaw ri halh halh ri chu ka hre thei a.

Enge an tih hriat chakna chuan ka chhungril atang chuan min tur at at a, bang awng chu ka zawng kual a, ka hmu ta mai reng a, ka bih dek dek a, ka rei lehh!. . .ka rin phak bak a ni. A bialpa nen chuan ruak vekin khumah chuan an lo mu dun a, an infawp mawlh mawlh bawk a, an duh thawh dun em em leh nghal.

Ka la hmuh ngai reng reng loh ka hmuh avang chuan ka zak lutuk chu ka kâ ka hup a, rei pawh en ngam lo chuan ka tlan chhuak a, thiante zingah pawh kal ta lo chuan mahni in ka tei rek rek a.
Sikul ban hun awm velah chuan ka haw a, U Thani chuan eirawngbawl a lo tan mek a, sikul uniform thlak vek a min hmu thut chu a hamhaih chiang kher mai. A hmel a hlauhthawnna lo lang chu ka hmu thei a.

"Engtik lai khan nge i lo hawn a?" a ti a.

"Chawhnu kan chawl a, i muhil a nih ka ring a, ka leng leh daih a," ka ti liam puat a. A ngaih a tha zan lo tih chu a hriat theih a, engmah erawh sawi zui lovin a ngawi ta daih a.

Ka pa lah a ruih fo avang chuan U Thani awm dan chu ka hrilh duh lova, ka hrilh chuan U Thani chu a hauh vak ka hlau ve a ni, ka khawngaih ve deuh pawh a ni mahna, kan in tha en ve ta mai mai a. A nun dan erawh a sim chuang lo, ka pa rui chu a mu vat thin bawk nen zan rei tak tak thleng a bialpa chu a leng ta fo a, an thawm pawh ka hre leh zauh zauh thin. Engmah ka sawi ngai lo na in kan in zahawm lo ta lutuk chuan ka rilru erawh a ti na vawng vawng thin.

Nei si lo, nghei chuang si lo a awm reng ta na na na chu zep reng theih ani ta lo, a pum lam chuan a thil tih chu a rawn hai lang tan ta a, a tlangvalpa chuan a nei leh duh si lo, a duh tawkin a chen a, duh tawk a ngah hnu ah a thlauh thla leh si, tanpui a ngaih hunah a ensan a, mualpho na zawng zawng U Thani chuan a phur leh si.

Ka nî te ho chu an thinrim em em a, an fanu chu dah tha in ka pa thiam loh ah an bur bun ta vek a, dem chitin rengin an dem a. Ka pa thiam loh na chen pawh a awm ang, inchhung tha takin min uap se, office ban te hian zu in khawtlai lovin rawn haw vat thin se, kan in chu a zahawm ve anga, hetiang thil hi a thleng kher lo mai thei. Mahse ka pa chu ka dem ve ngawt phal lo, engang pawhin awm se ka pa a ni miau a, U Thani pawh a lerhin mipa a duh ve êm! A tuh rah a seng a ni ve mai.

Kan in a a awm reng a rem tak si loh ah chuan an in lamah a haw leh a, keini chu kan pafa thum bawk chuan kan awm leh ta a.

Hmeichhe awm loh na a ni bawk a, inchhung te chu a ni neih nuaih a, ka pa unaute ho lah chuan ka pa chu nupui nei leh turin an nawr reng bawk a. Ka pa pawh chuan a hnial reng thei ta lova, kan veng nuthlawi nu Zuali chu a lo zei bawk nen ka nu thih atanga kum li hnuah chuan an innei ta a, mang lamah pawh ka la mang chhin ngai reng reng loh nu hrawn chu ka nau nen chuan kan hrawn ve ta.

Ka pa nupui thar chuan fa pakhat kei aia nau hmeichhia hi a rawn chhawm lut a, naupang na na na chu kan inkawm nel mai a, unau tak tak ang chuan kan awm tlang ve mai a, kei erawh chuan ka pa nupui nu Zuali chu ka nu tiin ka ko ve thei tlat lo. Ka sual vang leh ka rilru dik loh vang pawh a ni mai thei e, ka nu ti a ko turin ka nu din hmun luah zo thei in ka ngai tlat lo. Tun thleng hian ka nu ti a ka ko lo kha ka la inchhir ngai lo.

Kan ina an lo awm tirh chuan min duat thei em em a, kan unau tan chuan nu tha tak a nih dawn hi ka ti hman a, chu ka ngaih dan chu a inthlak danglam hma khawp mai, thla thum awrh a liam tih ah chuan a zia a lang tan ta a, kan unau chungah chuan a thin a chhe telh telh a, ka pa awm lai erawh chuan nu zaidam ber a ni leh lawi si. A fanu chu a vulh bik tulh tulh a, keini unau chu min thlahthlam tulh tulh thung a.

Ka nau chu a damloh avangin ni hnih lai chu sikul a kal tawh lova, a chau ang reng hle a. Exam a hnaih tawh avangin ngaihtha vak lo chuan sikul chu ka kal san a, ka haw chu in chu a lo reh ruih a, ka nau chu amah chauhin a lo awm a, khumah a lo mu a, a khawsik chu a lo khur hlak hlak a, ka nau damlo amah chauh a an lo len chhuah san vek chu ka ngaithiam lo hle a, ka thin a rim bawk a. Ka pa hnenah engkim ka hrilh vek tawh ang tiin ka in sawh ka in sawh a.

Ka nau chu ka bia a, min chhang mumal ta tlat lo, a mit meng chu a â deuh ruai a, a kut te chu a khawr deuh a, a tin te chu a lo duk ruih a, ka mangang tak zet tawh a, "Mama, ti khan lo awm la, ka nî te ka'n pun ange, lo thlaphang reng reng suh aw" ka ti a, mangang takin ka nî te in lam chu ka pan a, ka thlen chuan thil awm dan ka hrilh zung zung a, hmanhmawh takin damdawi in lam kan pan ta nghal a.

Damdawi in kan thlen chuan doctor leh nurse te chu an lo fel em em a, min lo buaipuiin engkim a tul ang ang an lo ti zung zung a, demna tur an awm lo, nachhawkna a an chiu hnu chuan a ziaawm ve ta deuh a, mahse, hma erawh a sawn chak vak lo a.

A thisen test result chu a rawn chhuak a, malaria PF a lo ni a, ka hlauthawng tak zet ta, ka nau chuan min kal san mai ang tih ka hlau hle a, a din hmun han en in beisei a sang vak bawk si lo. A natna chuan a lo hneh tawh êm a tin ni. Paracetamol mum khat mai mai a lo chhawk chi zia zang a lo ni lo.

Beiseina erawh tlem ka la nei a, a natna ber an hre tawh a, a damdawi dik takin an enkawl anga, a tha ve leh mai ang. Ka nau tan chuan ka tawngtai mawlh mawlh a, Pathian chu ka ngen ngawih ngawih a, tawng mawi lo ni lo se, kha tih lai khan ka ngen bakah ka nau ti dam tura thu pê te pawh ka ang zawk mah a, a tur in ka tur a ni ber mai.

Beisei nei tak leh hlauthawng reng rengin kan awm a, sana chu kal muang ka ti em em a, zan chu ral thuai thuai se tiin zing khawvar chu ka nghak hlel em em a, manganna zan khaw thimin a nan chin a, lungngaihna mahni chunga a han tlak ve meuh chuan a mi deh dan a dang zar mai. Khua chu varin chhun eng chu ni se, a tawrh a ziaawm deuh mahna! Chû ni thar lo chhuak tur chuan ka nau tan pawh chuan malsawmna rawn kengin atan damna ni te pawh a ni mai thei a sin tiin ka ngaihtuah a, ka beisei bawk a.

Chu ka beiseina chu mit khap kar lovah um bo in a awm ta, ka nau chu a thawk a buai ta tlat, a kaw tawp tak meuh ah kan ding ta. Doctor leh nurse te chuan an theihtawp an chhuah chungin a nunna chu an chhan zo ta lo. Beiseina tlem kan lo neih ve chu sarah a zam ral ve nghal a, ka nghilh dup a, ka tuar thiam thei thlawt lo, chuti mai a liam turin ka phal lova, ka la inpeih hek lo.

"I nau chu i nu kiangah hlim takin a awm tawh dawn a lawm." ti a min hnem a min tawrh pui tute chu ka tan hmelma an ni a, an mi hnemna tawngkam mawi tak te chu ka tan chuan thu thinthawng, tawng huatthlala ah an chang zo a, min tawng thlamuanna te chu ninawm mai an chang zo ta, an zinga nun hman a awm ve pawh ka peih meuh lo.

Hmangaihtu neiin ka in hre lova, mal riau in ka in hria a, he khawvelah ka nu tih tur ka nei tawh lova, mangan changa min thlamuantu ber leh hmangaih taka min enkawltu nu ka nei ve tawh lova, he lei a ka dam chhan ve ni a ka ngaih ka nau, ka neihchhun in min boral san ve leh ta si.

Dam chhan neiin ka in hre lova, dam bik nih chu nuam ka ti lova, nun chu nuam ka ti mawlh lo. Thih chu ka tan nuam ber tawh zawkin ka ring a, ka nunna hlu tak chu ti tawp turin ka rilru ka siam fel ta a.

Beiseina reng reng nei tawh lova beidawnna in a hneh tlat tawh, mi dawihzep ti a ka lo ngaih thin mahni in tihlum te chu an dinhmun ah ding a, an chan ang ka chan ve meuh chuan huaisen ka ti thar ta riau mai .

Ka nunna ka tih tawp hmain ka nu leh ka nau thlan chu vawi khat tal hmuh leh hram ka duh a, chumi zawhah ka chhungkhat lainate, ka thiante leh ka thil neih ve te kal san in he khawvel hi ka mangtha tawh ang a, ka chatuan hmun tur lam ka pan ve tawh ang.

Thlanmual lam chu ka pan chhat chhat a, a lo reh ruih a, thla eng chuan chu thlanmual reh tak chu a ên ruih a, ka nu thlanah chuan ka thu a, lunglennain min zem a, chhungkaw kim a hlim taka kan awm ho lai te ka ngaihtuah a, hun kan lo hman tawh mual liam ta te chu mitthla ah a lo lang zut zut a, lunglenna chu khawharna in a rawn zui a, dan rual lovin ka mittui chu a rawn luang zung zung a.

Thli fim a tleh heuh heuh a, arsi lang pe tuarh te chu ka mit ah chuan an mawi thar ta riau a, thla eng lawm a rannung hram ri chiah chiah te chu rimawi an chang zo a, Pathian thil siam ropui zia leh a them thiam zia te chu ka hre thar uaih uaih a.

Thlânte chu ka thlir kual a, lungduh mual liam ta te ka ngaihtuah a, thenkhat dam duh in an theih tawp chhuahin an in enkawl a, ka nau ngei pawh kan theih tawp tak meuh meuh kan chhuah a, mahse, a tana hun ruat chu kan ti danglam thei si lo. Thenkhat lah Pathianin nunna hlu tak min pek chu mahni ta emaw tiin an duh hunah an lo ti tawp ve mai bawk a, kei pawh chung ho zinga tel ve tur chuan ka inbuatsaih mek chu a ni si a. Ka nu leh ka nau chuan ka thil tih tum chu engtinnge an ngaih ang le, tunah te hian min lo thlir reng a ngem le.

Kan chhungkuate, ka nau thihna te chu ka ngaihtuah zel a, lunglenna leh khawharna chu thinrimna in a rawn thlak a. Ka nau boralna ah chuan ka nu hrawn chuan mawh a phur a ni. Ngaihsakin lo enkawl tha se, a hun takah a natna kha enkawl nise, a boral bik lo ang. Kha thihna kha a tana ruat a ni lo, keimah leh keimah chu ka inhrilh nawn mawlh mawlh a.

Chuta karah kei leh zelin an lawmna famkim nan ka inthiar fihlim san ang maw!... teuh lo mai. Kei leh zel ka awm loh te chuan hnar a hlit phawi ang hlauh an ni dawn a sin. Ka nu te nena theih tawpa kan lo sual chhuah ve kan in leh lo chu chuti mai a awlsam chuan an pum bilh bik hauh lo ang. Ka kut chu ka hum ruh a, thinrim avang chuan ka ha chang chu ka thial bap bap a. Ka in awh hlum na tur atana ka hrui ken chu ka lak atanga hla thei ang ber ah chuan ka vawm bo ta.

Ka nu leh ka nau chu ngaihdam ka dil mawlh mawlh a. Ka nêp zia te, ka lo dawihzep zia te, an tana tih sak theih ka neih tlem zia te chu ka hre chhuak uaih uaih a. Thlan lung ngheng chuan ka lo muhil a.

Thing delh loh lung delh loh ta na na na chu ka sei lian chho ve zel a, puitling ti a chhal theih ka lo ni ve ta, college hial ka lo rap ve ta in, ka nuhrawn pawh ka chungah a lang a pau in a sual ngam tawh lova, a fa bik chu la duat bik viau mahse eng teh ual ah ka ngai tawh lo. Mahni a in enkawl thei ka ni ve ta bawk a, in khata cheng ho reng ta chu in hauh chang leh inhmuh thiam loh chang awm thin mahse reilote ah kan lungawiin kan theihnghilh ve leh mai thin. Ka nu leh ka nau min boral san ta te ka ngaihna chu a reh ve hret hret zel a, engemaw chang chuan ka la ngai veng veng thin.

Kawl bul chu a rawn sen phût a, kan college sihhmui a kan picnic tur chu ka helhhawlh a ni teh chek ang chu ka muhil hlei thei tawh der lova, mut luih hram ka tum a, ka harh tulh tulh zawk a, muthilh leh tum zui ta lo chuan ka tho a, vai pathian thawh hma chuan zing boruak tha chu ka hip ve hman teh mial a.

Ni chu khawchhak lam tlang kar atang chuan a rawn dak dek dek a, chhun lama chaw zawng chi ho zingah chuan chawngzawngte chu an lawm fal bik amaw tih mai turin an chiar noh noh a, reilote ah hringfate tan malsawmna thlen turin ni chuan van sang lam a pan ding zel a.

Picnic na a kal vawi khat tel ve na tur a nih avangin ka phur em em a, chubakah, class kal reng a ninawm bawk nen han in tih thawvenna hun tha kan nei chu kan phur tlang ve em em a, ka helh hawlh avang chuan chaw pawh ka ei hlei thei meuh lova, ka kham vat a, ka inbual sawk sawk a, ka in siam nghal a, darthlalang hma ah chuan kan inthlek vang vang a, ka lungawi thawkhat ve viau mai.

Zan lamah ka pa bike ken ka dil fel diam tawh avang chuan chabi ka la, ka chhuak nghal a, ka chhuah dawn a ka pa'n "Fimkhur rawh aw, i chesual palh hlauh ange." a tih pawh chu ka chhang hman tawh lo. Ka thiante nen innghah khawmna hmun tura kan tih chu ka pan ding ta nal nal a.

Chumi ni chu ka hmangaih hmasa ber ka tawnna tur ni a ni ang tih ka ring pha reng reng lova, rin ngaihna lah ka hre hek lo.

Innghah khawmna hmun tur ka thlen chuan an lo awm sup sup tawh a, ka thiante ho zawng chuan ka mit ka len kual ruai a, ka awmna piah deuh atang chuan Biaka chuan min lo hui lauh lauh a, an awmna lam chu ka pan phei nghal a. An bul ka thlen chuan Biaka chuan,"Tunge i phurh dawn?" a lo ti nghal tawng a.

"Phurh tur ka neih pawh ka hre lo" ti a ka chhan zawh rual rual chuan, "Emily saw phur mai teh, Kimkimi phurh ka duh sia, amah a bus a chuan tir a hreh deuh a, i duh chuan i c.k pui nghal dawn nia," a'n ti chhunzawm nghal zat a.

Phurh tur dang ka nei lo bawk nen tui vak lo chuan, "Pawi hlei nem" ka ti a. kan thiante ho chuan min lo fiam zauh hlawm bawk a.

Ngaihzawng hi ka ngaihsak vak lem lova, thianten min dem fiam chu thuhran nise, ngaihzawng ti a han sawi tur ka la nei lo. Kan thian panga chuan bike kan keng vek a, an bialnu te an phurh vek dawn avang chuan Emily pawh chu phurh ka remti ve mai mai chauh a ni. A inchei duh dan te, a sam a chhip a, kang vah a a trawn te, a mit dum kual ruih te, an thianho a an nui ring thei lutuk te chu ka lawm hran lo.

A kal tur ang ang kan thlen kim chuan kan chhuak ta a, bus tlan liam zawh kan nghak a, an tlan liam zawh hnu chuan kan thian ho chuan kan in zui chhuak ve diah diah a, harsatna tawk lem lovin kan picnic na hmun tur chu kan thleng ve ta a.

Khua a lum bawk a thenkhat chu tui an cheng nghal bawrh bawrh a, keini thian ho pawh chuan mi hmuh lohna tur deuh thutkhawmna atana rem si chu kan zawng nghal zung zung a. Kan duh ang kan hmuh hnu chuan kan thu bial laih a, Muana chuan a hma zan lama Biaka nen an lo ngaihtuah lawk diam tawh a senchi chu a rawn phawrh zâl zâl a, mipa ho in kim chuan a rawn thli kual dan dan a, hmeichhe ho in atan beer a rawn phawrh tel bawk a.

Kan lu a kai tan ta, awki a sang tulh tulh a, tawng kan inchuh nawk nawk a, hmeichhe ho pawh chu an beer in a thawh deuh takah chuan kham khawp lovin kan in lai chu min dawm pui ve zel a, ka rin aiin an in thei phian leh nghal a.

Zu hi ka in zen zen ngai lova, kût bawr ah leh picnic ni khuate, thian ho chaw eikhawm velah hi chuan ka in ve mai thin a, a hnu ah ka ti zui leh ngai lo. Rui buai khawp in ka in ngai lova, tlem a ka kai deuh chuan ka duh tawk mai thin. Zu hi a hranpain a sualna ka hre lova, a hmangtu a zir ka ti ve thin. Chumi avang chuan kohhran leh khawtlang duh loh zu hi a tha e ka tih na erawh a ni chuang lo.

Rei tawk fang titi pah a kan thut ho hnu chuan a kawp te te chuan an kal hrang ta hlawm a, Emily nen chauh chuan kan bang ta. Sawi tur ka van hle a, hmawlhin lei chu ka thai ka thai a, enge a beisei chu ka hre lova, min haw hran lo tih chu ka hria.

Ngaihzawng ka la nei ngai lova, zei loh sa bawk nen han tih vak dan tur ka hre mai lo. Ngaihzawng angin ka en lo hrim hrim a, tawm fal pui phei chu ka duh lo hrim hrim, duh loh chu thuhran a ngam pawh ka ngam hek lo. Zu te in in lu te kai ve deuh mahse ka rilru a fim tlat a, ka chhia leh tha hriatna ka hlauh ngai lo.

Sawi mai tur a hre bîk lo bawk nen amah chauh a kal san ka hreh si, tui chen puiah ka sawm ta ringawt a, lungawi hmel vak lo chuan min zui ta tho a, tui chenna ah pawh chuan ka hnaih tha vak duh lova, miin min fiam ka hlauin ka zak tlat. A hnu deuhah chuan a mi duh zawng a hmu a niang chu an bo ta daih a, ka thawveng huaiin ka hria.

Tui chu ka cheng zel a, a thuk lamah mi an tlem avang chuan ka awm ber a, tui ka hleuh lai chuan ka chawn tha ka leng chat ta hlauh mai a, a na ka ti lutuk chu ka then nai nai a, ka ke ka leng thei tawh lova, lei ka rap pha bawk silo. Ka bul hnaiah midang han pun tur an awm mai lo nen ka rilru a buai deuh a, ka pil barh a, rilru fim ka pu leh thuai a, ka ban hmang chuan a ko tlang lam pan chuan ka in hai phei a, ka thleng hram hram a, ka chhuak lawk thei lova, ka tla thla leh thin a.

Tu emaw hian ka banah min rawn vuan a, min kai chhuak thei hram a, ka hawi chhuak a, a hmel ka en a, ka zak lutuk chu ka sen nghal tawn tawn a, kan college a hmeltha ka lo tih ruk ve em em Zotei a lo ni a, pangngai tak pawh a ka zah em em biak pawh ka biak that ngam ngai loh hma a chutiang a ka awm chu ka zak kher mai. Ka ke hmawr chu ka en a, ka kezungtangte chu a tha chuan a lo pawt khawr vek a, zah rengna hun a ni lo tih ka hria, ka chawn tha chat chu ka hrilh a, ka chawn leh ke vel chu min hmeh sak nawk nawk a, ka dam sawng sawng in ka hria.

"Ka lo en reng che a, i tal buai deuhin ka hria a, i pil bawrh khan midang hrilh ka tum a, he lama i rawn in hai phei leh takah kha chuan i ti fiam vel mai mai a nih ka ring a." a ti siam siam a. Zak viau mah ila chutia min buaipui vel chu nuam ka ti letling phian a. . .

(Note: Chhiartute tan a awlsam nan vawi khatah dah zawh ka tum a, mahse, a leng ta si lova, bung 1 leh bung 2 angin kan dah mai dawn nia.)