BEISEINA....!! Chapter 1

[Sbk Pachuau]

BEISEINA .....!!
Sbk Pachuau

Chapter 1


"Mâmte, mu leh tawh la, duh âiin i ṭhu rei tawh a nia!"

Ka mutna pindan aṭang chuan thlasik tlai nitla tur chu a lang chiang hle a, a mâwiin lung a tilêng a, ka nuam lo zualte a nih loh chuan ka thlîr ziah ṭhin a ni.

Ka nu chuan a sawi dik a ni! Vawiin tlai chu tlai dang zawng aiin ka ṭhu rei a, ka ngaihtuahnaah ka lo cheng tui lutuk lehpek a, tunah hian ka nu thu awiha ka mu nghal vat a nih loh chuan zanlamah ka buai leh lovang tih a sawi theih tlat loh a ni.

Mahse, vawiin chu ka hlim êm a, ka taksa pawh nidang zawng aiin a damin ka hria a, ka rilru hlimna chuan ka taksa pawh a tidam ve ni maiin a lang a ni.

Zanin hian ka ngaih êm êm, engtik lâi pawha ka ngaihtuahna luahtu, ka hmangaih êm êm chu a lo kal dâwn a, ka nghakhlel a, ka phúr a, ka huphurh tel deuh bawk.

Ka khuma ka mut leh hnu chuan ka phone chu la-in ka hmangaih Lalhriatzuala thlalak ka neih ho chu enin kan inhriat ṭandante chu ka ngaihtuah let neuh neuh a.

Kum hnih kalta-ah khan ka ṭhiannu Lawmi ûte inneihnaah a vawikhatna atân kan inhmu a, a hming hrim hrim chu ka hriatna a rei tawh a, amah taka erawh chu ka vawikhat hmuhna a ni thung. Hmêlṭha âi maha hmêl pa tia sawi chi, sâng ṭha zeih zawih tak mai a ni a. Ngo lam âia hang lam pâwl deuh, hawiher záng vah mai, thil chinchâng hre tak leh ṭawng tam lutuk lo a ni. A bialnu pawh a chhelo zeihzawih hle a, a hmêlṭha hle bawk. A hawiher leh awmdanah chuan Hriatzuala chu a duh ngawih ngawih tih a lang reng a, a si deuh reng a, Lawmi lah chuan a lo ei lo hle a.

Chumi hnu aṭang chuan kan inhmuh apiangin kan inbe ve ta ziah a, a zirna hmuna a chhukthlak leh hnu pawhin min rawn be ve leh zauh ṭhin bawk a. Kawm a nuam a, ṭawngtam em em lo mah se a ti ti chhunah a bengvarthlak mai piah lamah a ngaihnawm ka ti ṭhin hle a ni. Lehkha thiam thei tak a ni a, naupangtê-in matric a pass a, a zirlâiah a tui bawk a, a tiṭha thei hle a. Architect nih a tum avangin pâwl sawmpahnih a pass veleh India rama architecture lam zirna ṭha bera sawi Sir JJ College of Architecture, Mumbai-ah lutin B.Arch a zo a, tunah hian M.Arch a zir leh mêk a ni.

Ka ṭhiannu Lawmi te unâu zînga upa ber nen hian an inkawm ngeih êm êm ṭhin a, B.Arch an zir chhuak ṭep tawh tihin Lawmi û chu thluaka khawsikpui lut vangin a boral hlauh a. A ṭhian kawmngeih tak mai, unau ang hïala a enin a boralsan chu a tûar hle a ni. Lawmi nu leh pate chuan an fapa aiawhtu-ah ngaiin fapa ang maiin an en a, Hriatzuala pawhin a rawn haw apîangin a tlawh ve ziah a, Lawmi pawh farnu ang tak takin a en ve a ni.

Kolkata lamah lehkha zira ka awm daih avangin a hming leh chanchin ka hriat hnu fê-ah amah ka hmu ta chauh a ni a, Lawmi te chhûngkua-in fapa leh unâu anga an en avangin ka lo en mihrang bik lem lova. Mahse, ka lo beisei âi chuan pawh a har ang reng ka ti a, amah ṭawng bawrh bawrh chi a lo ni lo bawk nen kan inbiak ve zauh zauh hnu-ah pawh ka nêl viau lem lo a ni.

Kan awmna lum lutuk avang chuan zan lamah pawh muthilh ka harsat hle a, kum khat chuang ka awm hnu-ah pawh Kolkata boruak hi ngaiah ka la neih thei meuh lo chu a ni ber a. Zan reiah lehkha zir peih tawh loh hnua online ka hrat hle a, ṭhianho kan awmna groupah ka nawi ziah a. Zanlâi pelh tawhah mahnia nuih chur chur a awl viau a, ka nuihchhuah tak hawk châng lah a tam, zan tumtawinan ka hmang remchâng phian a ni.

Zankhat chu, ṭhianho groupah ka nawi leh mai mai a, exam a hnaih deuh tawh avangin reilote tal zir leh tumin ka ṭhiante ho chu ka mangṭha ta thuai a. Ka lo inzirtui deuh ni tur a ni ka duhtawk meuh chuan khawvar nan dârkâr tlemte chauh a lo awm tawh a, ka mut hnu chuan ka phone-ah alarm ka set leh tê tê a. Alarm ka set zawh hnu chuan message ka check leh zung zung a, Hriatzuala message a lo awm ve tehmial a, ka hawng nghal vat a.

"Va meng rei ve!" tihtê mai hi a lo ni a, a la online tih ka hmuh chuan ka chhâng vat a.

"Nia, exam a hnai deuh tawh a."

A chhiar nghal mai lova, a laklawh a nih ringa dah mai ka tum lâi tak chuan min rawn chhâng let a.

"Zir ṭha thei maw?"

"Umm... zir ṭha thei a ni mai."

"Ṭha deuhin i exam dawn nia."

"Aw le, ka lawm e!"

"Muttui..."

"Muttui le..."

Kan exam chu ka tiṭha viau lova ka hriat avang chuan ka rilru chu a nuam lo ru hle a, ka fail em chu ka ring chiah lo thung. Exam zawh zan chuan ka rilru nawm loh deuh vang nge ni ka mut a chhuak thei rêng rêng lova, whatsapp group lama ka ṭhiante pawh an mu deuh vek tawh a. Exam lâia ka mut tlem avang khan ka muthilh mai ringin ka'n chhîng ngial a, awmzia a awm tam lo hle a, ka beidawng chuan thu ngaihnawm deuh chhiar tur a awm takin tiin fb-ah ka lut ta ngawt a.

Chhiar tur ka zawnlâi chuan whatssap message a lo lut zut zut a, a tam zawk chu group a ni a, private message pawh a awm ve pheuh pheuh a. Hriatzuala message a rawn thlen ve leh tak nawlhah chuan ka hawng nghal vat a.

"Exam chu tiṭha bawk em?

"Tiṭha nang âw .... "

"Zia lo ve!"

"Nia, zia lo..."

"Fail lo tawka tiṭha lo maw?"

"Umm...ni vel ang.. hahaa"

"Final exam hunah ṭha deuhin i ti tawh ang a..." a rawn ti leh a.

"Nia, kan tum ang chu."

"Ka dah phawt ang e aw? Ka project khawihlâi hi ka'n chhunzawm leh lawk ang e."

"Aw le, bye."

"Bye..."

Chutiang chuan hotê tê sawiin bul kan ṭan a, kan inbe zing tial tial a, kan hunawl apîangah kan inbe ta ziah a. Nulat tlamgvalna lam hawi zâwngin kan inbe ngai lova, eng nge a chhan hriat si lohin kan inbe tui ve êm êm mai a ni. A thil zir a awlâi lem lo va, a beih ngawrh zual chânga a message hmuh tur a awm lohte hian ka khua a har ru hle ṭhin a. Midang kawm tur awm nual mah se ani nena kan inbiak hian ka khawhar a hnem ber a, a tira thu ho tê tê sawi ṭhin kha kan inkawm rei telh telh a, kan thil sawi pawhin a huap zau telh telh a. Thil a hre zâuvin a thlir thiam a, ka thil hriat loh záwngte han zawt ila ṭha takin min hrilh mai zel a. A chapo lovin kawm a nuam tak zet a, a tira ka lo ngaih ang âi daihin a rilru a ṭha-in a puitling hle a ni.

Ka chanchin pawh ka hrilh ve nasa viau a, ka bialpa chungchâng thlengin ka hrilh a. Tuna ka bîalpa hi a nihna takah chuan ka duh êm êm hran lova, ṭhianten min nawrna avanga kawp ve mai ka ni a. Amah phei chu a hmelṭha-in hmeichhe lakah pawh a tla na vîau a, lehkha thiam thei tak a nih bakah sports lam a lo thei lehzel bawk nen Kolkata Mizo zîngah pawh a langsar hle nghe nghe a, Lalṭhazuala niin 'Ṭza' tia hriat lar a ni thung a ni.

A buai ve theih ṭhin êm avangin phone calla min rawn biak bak hi chu kan inbe ngai meuh lova, eng emaw châng zeuha whatsapp vela kan inbe zauh tih loh hi chu min rawn call hi a ni mai a. Ka ngâi thutak lutuk lem lo bawk nen ka vui hran lo hle a, a hminga bialpa te na na na chu midang ai chuan kan vei deuh e tih a ni mai a, chuti tih lohah chuan ka ngaihtuahna a luah tam lem lo khawp mai.

Final exam a hnai tawh hle a, ka ṭang ru ve viau a. Hriatzuala min fuihna avang pawhin ṭha taka tih chu ka tum ve tlat a, ka theihtawp chu ka chhuah ve nasa hle a ni.

Zankhat ka lehkha zir chu ka hnâr a rawn thi ringawt a, ka khawihin ka tauhfuh pawh a ni si lova, chutia a rawn thi ringawt mai chu mak ka ti hle a. Ka lehkha zir ngawrh deuh vang leh zan mut tam loh vangah ka puh ta ngawt a, ka roommate chu a muthilh tawh avangin kaitho duh lovin keimahin ka inbuaipui a. Ka chhûngte pawh ka hrilh duh lem lova, ral aṭang chuan inngaihtuah a nat duh bakah hritlang khawsik hlekah pawh ka nu hian min ngaihtuah ṭhin em avangin nawm loh satliah angte hi chu engmah ka hrilh duh ngai lem lo a ni.

Nikhat chu ṭhianten len chhuahpuiah min sawm a, hawi thawven pah ka duh ve bawk avangin ka lo remti hle a. Kan ṭhianpa pakhat hi a thawhna company-ah manager a ni a, a motor kawl chu a rawn thawh chhuahpui thei hlauh a, chu chuan kan kal ta a. Nicco Park-a kan la kal hlawm loh avangin chuta kal chu kan rawt a, Salt Lake City lam pan chuan kan tlan ta nghal a.

Kan awmna hmun aṭangin a hla deuh bawk a, kan thlen meuh chuan haw leh hun chhûng tur nena chhutin kan awm rei hman dawnin kan hre lova. Ṭhu khawmuang lem lovin kan kal kual zung zung a, hun thawl neiha duhtawka han chuan kual vel chu a chakawm hle a, tuia han inchiah velte hlei hlei chu ka chak a. Ka ṭhiante chuan thla an la mawlh mawlh hlawm a, pool awmna lamah chuan kalin pool lang thei tur chuan kan vai chuan kan la a, tlai kan hlauh avang chuan haw mai chu kan tum ta a.

Kan ṭhiannu Christy chu thlalak lawm deuh mai hi a ni a, pool bula ding chung chuan a lo va selfie mawlh mawlh a. A bialpa ve deuh Rema chu auvin an han la dun leh tê tê a, keini ho chuan kan lo nghak ṭhap a, a hmanhmawh phah chuang lem hlei lova. Chutia Christy te thla la kan en lâi chuan pool sîr lehlama Ṭza leh hmeichhe pakhat inkai riala kaldun chu ka va hmufuh ta hlauh a, ka bul chiaha ding Hmingi pawh chuan a hmu ve ni ngei tur a ni min rawn nghawk zauh a.

Ka vei lovin ka ngâi em em lo naa phatsan nia ka inhriatna chuan min tiawm nuam lo angreng hle a, ka duh êm êm vanga inngâizáwng ni lovin aman min zar hneh êm avang leh ṭhiante min nawrna vang chauha lo chhâng ta kha ka ni a, chutia min phatsan leh midang nena min kawp chu ka zakin tlem chuan ka na ve a ni.

Ani chuan min rawn hmu ve lem lova, a nula kalpui nen chuan hlim hmel takin an nuidun a, an awmdan chu inngaizâwng an ni tih a hai theih loh a ni ber a.

"Kan va be duh kher ang em?" Hmingi chuan a rawn ti sa sa a.

"Ngai lo, ti sawn awm rawh se. Zana min rawn biak hunah ka lo zawt ang a, chuta min chhandan azir chuan a rinawm leh rinawm loh chu kan hrethei mai ang," ka lo ti vat a.

Hmingi chuan, "Lalṭhazuala mai mai chu a va zakthei lo ve mawle! Khati khawp khan a duhin a zar che a, kan khawngaihin i duh lo chung kan nawtlui zawk che a, a bum che a nih vaih chuan keimah min hmachhawn a ngai ang," thinrim deuhin a ti hmarh hmarh a, ṭhian dangten an hriat tam ka hlauh avang chuan ka lo khap vat a.

Haw kawngah pawh chuan kei âi mahin a la nâ emaw tih mai turin a phun zui nang nang a, ngâwi rengin ka lo ngaithla liam mai mai a. Phatsan nih chu a nuam chiah lo naa chuti takin ka na lem lova. Mahse, ngaihzâwngte na na na chu hmeichhe dang nena han hmuhdun takah chuan sawi tur ting chuan ka na ve a ni mai a, chumi tih lovah chuan ka tuar viau lem lovin ka hria a.

Zana min rawn biak chuan danglamna engmah awmin ka hre lova, nidang ang thovin min ngaihzia leh ka bula hun hmang tura hun a neih loh si ziate chu a rawn sawi leh ṭeuh a. Chhun lama a hmeichhe kalpui kha a farnu a nihte ka ring ta hîal a!

"Vawiin lam i buai leh em? Eng nge i tih?"

"Buai nilêng a ni mai! Kârleha Mizo hovin thiltih tur kan neih kha ka ṭhianpa nen hun neitu turte kan ruat fel a, chawhnu lamah lab-ah ka awm thung."

A dawt sawi chiang lutuk vang chuan amah ka hmuhdan a danglam chawpchilh nghal a, vawiin chungchângah khan eng ang pawhin chhuanlam siam mah se ka ring ngai dawn lo a ni tih ka inhre nghal thlap bawk.

"A nih chuan vawiina Nicco Park-a ka hmuh kha i phirpui a nih dawn chu." Ka sawi zawh rual chuan ka nui pah hak bawk. Ka ngaihnepzia chu hria se la kan inbiakna chu a titawp nghal hmakin ka ring!

"Engtin....khawiah... Vawiinah maw?" a vawikhatna atân nulâte ngaihzawn rawn Lalṭhazuala chu a dang a awk ve ta a ni.

"I hmeichhe kalpui nen pawh khan in inhmeh lutuk a nia, kei ai chuan a tihlim thiam zawk che a nih hmel!" Ka ṭawngkam chu a ngeiawm tih ka hre naa ka insûm duh lem lova.

"Ka insawifiah....."

"Insawifiah a ngâi rêng rêng lo, ka mit ngeiin ka hmu a, ka bengin i dawt sawi ka hre zo chiah bawk a, a chiang tawk viau e. Nang nen hian sawidun tur kan neih ka hre tawh lova, chuvangin, min lo biak tawh loh ngei ka beisei." Ka sawi zo chu ka thâwl hawk a.

A rawn call leh pawh chuan ka lo la duh tawh lova, ka phone silent-ah ka dah hmak bawk. Message pawh a rawn thawn hnem viau a, pakhatmah chhiar lovin ka clear hmak a, ani nena inzawmna neih chu ka tum tawh lo bur mai a ni. Fel leh dik nia ka inngaih vang pawh ni lovin mifel lo leh dawt sawi chîng rêng rêng chu ka ring leh thei tawh ngai lova, min bia a nih erawh chuan ṭha takin ka chhâng ve zel tho a. Amaherawh chu, ka rinna an hlawhchhuak zo tawh ngai lo thung a ni.

Hriatzuala ka ngâi ang reng hle a, ka biak chak zual zanah tak chuan a reh hmiah a, va biak hmasak ka hreh bawk si, chumi zan ang rêng rênga ka ngaih chu ka la hre lo a ni.

Ka nu nen kan inbiak zawh chuan Lawmi nen kan inbe leh reng a, thil awmdan ka hrilh chuan a thin a rim ve hle a. Lawmi hian Ṭza chu la hmu chiah lo mah se an inbe fova, ralkhat aṭangin an innêl ve tawh hle a ni. Chutia kan inbiak mawlh mawlh lâi chuan Hmingi chuan min rawn call a, Ṭza pawhin vawihnih a rawn call hman a ni.

Kan inbiak zawh chuan Hmingi chu ka call let nghal a, a lo lak rual rual chuan Ṭza chungchâng chu min zawt nghal a.

"A rawn be tawh che em?"

"Be tawh e, min bum tih pawh ka manchhuak chiang hle bawk," ka tih chuan ka lo rindan ang chiahin a rawn sa hle a.

"Ka phone ang a, ka va hau hrep teh ang. Hetianga bum leh mai mai tur che chu a hma khan khati tak khan lo nawr lo che sela ṭha tur a nia, ka va ankhum chîam ang e," thinur tih hriat takin a ti tan tan a.

"Va biak a ngâi lo. Engkim a tawp tawh a, va sawi thar leh kha a ṭul lem love. Engah mah kan ngâi zui lo tih a hriat khan a tawk chiah, umzui ang ziazânga va biak leh kha a ngâi tawh lo," ka lo ti thung a.

Mutnaah chuan ka inngaihtuah neuh neuh a, ka chunga thil thleng chu ka tâna ṭha tura Pathian ruat a nih ka ring ta tlat a. Ṭza kha ka thinlung takin ka duh thei ngai lova, ka rilru ka pe lui thei lo a ni ber e. Khatianga inkawp reng chunga ka rilru ka pek theih mîau si lohah chuan a tân pawh a tlawmthlak dawn a, ka tân lah mahni inhremna a ni ngawt bawk si nen inṭhen fel hma hi atu ve ve tân pawh a ṭha zawk a ni tih ka pawm thlap a ni.

Hriatzuala lah chu a reh vang vang mai si a, ka mamawh lâi taka biak tur a awm lo chu ka thin a lo rim ru ve ngawt a. Nihnih lâi kan inbe tawh lova, ka ngaihte pawh a ṭha lo lek lek a. A bîalnu nen an inbe nasa deuh a nih ka ring ta deuh ngawt a, ka rilru erawh a nawm phah chuang hauh lo thung.