Chapter -24
May Renthlei
"Zo..Zomuansang duh tawk rawh." Ka ṭawng chu hria ang pawhin a lang lo. Ka thinrima, ka hlauthawng tel bawk.
"Ka chunga i thiltih tekha i hre lo vem ni?"
Ka nghawng leh a chhehvela fawh kual thuak thuak pah chuan ati chang rata. Tawp a tum loh hmel ngang mai.
"Pawngsual nih ai chuan thih pawh ka duh zawk." Kati zawi rata. A che lai pawh chu a tawp chawta.
Chiang lo ruai leh mit menga tawrhna hlir lang chuan min melh phi riaia.. Kei pawh ka na ve ngawih ngawih.
"Eng tin nge engmah sawi lova min kalsan ngawt theih? Ka ngaih vedan tur lam i ngaihtuah ve miah lo em ni?" Aw vin lam mah chuan mintih khuma.
Hawi sawn ka tum chu ka khabe ah vuanin a mit taka en thei tur chuan min kuai dak dawrha.
"Ka chunga i awmdan zawng zawng tekha ngaihtuah let zawk ta che." Ṭap lo chauh chuan kati a.
"Min kalsan kher angai em ni? Kan sawi dun thei reng..."
"Sawi pui theih tur che pawhin i awm em ni? Eng tin chiah nge i awmdan avang khan ka nat tih pawh i hre lo. Nang chuan.."
"Shh. Ka hria, ka hria e." Harsa tih hmel zet chuan a ti hrawka.
"I laka ka awmdan a vanga i lungawi loh tur zia chu ka hrethiam. I tan dawn sawn thiam a harsa ang tih pawh ka hria. Nang mahah bak eng tik lai mahin ka insawr bing ngai lova. Midang ka ngaihtuah tel vechiah khan i hrethiam lo a ni."
Nia, a sawk dik. Min duata, min ngaihsak em em reng avang khan ka pangchang lutuka. Awm dan chin tawk ka lo hre lo tepawh ania nge.
"Ka hriatthiam theih dan turin i awm miau lo alawm. Ṭha takin engkim kha min hrilh ve ṭhin nimai la chu ka hrethiam ve em em ang." Tal chhuah tumin ka che laiha. Min nek chep zual sauha. A taksa si renga ka awm avang chuan ka pangngai thei lo leh zual.
"Ka thiamloh a ni. I nat ka hlauh luatah thu tlukna dik lo ka siam tih ka pawm e." A awmdan siam rema. Ka dara a lu arawn nghah tak avang chuan a hmel landan ka hmu thei tawh lo. Mahse ka intih nat rualin, kei ang bawkin a lo na ve hle tih erawh ka hria.
"Min kal bosan ngawt erawh ka pawm thiam thei lo. Ka hrethiam thei ngai bawk hek lo ang." A sawi zawng ringawt pawh chuan a thinrim zia leh a lungawi loh zia chu a hriat.
Thil dang a sawina ṭawngkam nen chuan ngaihthlak in nawm hleih tak a ni.
"Kha tianga ka tih chhan chu i hria ani lawm ni?"
"Khami ni a thil thleng avang khan maw?" Ka lak aṭang chuan a awm sawna. Ka ruak huaiin ka hria.
"Ni love. Thil thleng tam tak tuar thei tawh lo tura min siamtu erawh a ni."
Ka laka aṭanga Zomuansanga hla ta dawrh leh thil thleng tam tak tekha tawrh har tiviau mah i la, kal bo tumna rilru ka pu ngai lo. A mah erawh chu, Bawihbawihi nena an awm dun lai ka hmuh leh chiah erawh kha chuan ka tuar thei ta ngang lo a ni.
"I ngai dik lo a ni. Min zawt chiang phawt ni la chu, heng kan natna leh hrehawmna kan tawrh zo zai te hi kan pumpelh thei tur ania."
"Thil thleng tekha hriat nawn emaw, ngaihtuah let leh ka duh tawh lo." Lu thing nakin, ka pen sawna.
"Ka thil tawn avanga ka hrehawmna zo zai belhchhah turin ka nu in ka chunga a thiltih te ka hre chhuaka." Tawt zeta a thil sawi chhuah avang chuan room kawngkhar hawn ka tum chu ka ṭhulh leha.
"Pawi katih pui khawp mai che." Kati zuai raiha.
"Kha tihlai khan ka mamawh che a, ka ngai ngawih ngawih bawk che asin. Ka thil tawn zawng zawng avang khan ka thi thei hial dawnin ka inhria a. Nang tal chu awm la tawrh dan ka thiam tur."
Ka hawi let leha. A vawikhat nan Zomuansanga mittui tla ka hmu. Ka ngeng a chhun vawt vawt. Kuah vawng vawng mai chu ka duh.
Mi chak tak, engkim tithei leh nei vek ṭhintu Zomuansang kha hmuh tur a awm lo a. Mi khawngaihthlak leh ṭanpui ngai ngawih ngawih hmuhin ani, ka hmuh tak ni.
"Khan tiang zo zai ka pa nena kan chungah ati tawh chung pawh khan ka mamawh em avangin kei chuan ka pawm leha. Mahse a hma ang tho khan atan engmah ka lo la nipha chuang lo. Sum dawnna hmanrua chauh ka ni." A sawi zawng techuan thinrim leh rilru natna avangin a seh chilh nawk nawka.
A nu vanga a tawrh nasat zia hre chiangtu kani a. A tana a nat tur zia ka dawn pui phak che che.
"Keiman ngeiin hrilh che kha ka tuma. Mahse.." Ṭawng zawm lo in ka ngawia.
"Ka kiangah awm ve ni la chu ka tuar thiam deuh mahna. Ka engkim i ni a. Eng tik lai mai pawhin ka mamawh em em reng si che a."
In herin, in hnuai lamah min chhuk thlak sana nal nala.
Ka mittui rawn tla chu ka hru thuaia. Ka room ah zawi zeta lutin khumah ka ṭhu thla hnawka.
"Lungngaihna leh harsatna ka tawn apiangin ka hre chhuak hmasa ber zel che a. Hlimna ka tawn pawhin chuti tho. Ka engkimah hian i tel ve veka. Chu vangin ka engkim i ni." Tih a sawi lai kha ka hrechhuaka.
A lakah ka inthiam lo a ni. Ka ṭanpuina leh min mamawh ngawih ngawih laiin a kiangah ka awm ngai si lova.
A tawrhna belh chhah tur zawngin ka kal bosan zawk chu ania.
Ka lu na ut ut avang chuan chhawkna ka ei a. Chhuk thlak leh pawh ka hreh, thlahlelh viau mah i la.
"Zan in kha riah tlang nghal kan tuma. Chu vangin induh tawkin lo che vel teh u." Tih Puitei hnen aṭanga message ka dawn chuan ka nui suka.
Nizan lamah ka mut mang loh avangin damdawi ka ei leh bawk nen ka mut arawn chhuaka. In khuh ṭha sauh sauhin ka muhil ta daiha.
Ka harh leh meuh chuan khua a lo thim vek tawh. In hnuai lamah ka chhuk thla vata. Zomuansanga hmuh ka inrin nen a awm hauh lo. A kal ta ani ngei ang. Ka chan hlen dawn tak tak ta anih ka ring. Ni lo, ka chan hlen phal teuh lo mai. Ka ta ni lo tur chuan ka phal lo a ni.
Zanriah ei chu hun tawh mahse ka ei tur tak ngial siam tur pawhin tha reng ka nei lo.
Dining table bawh thlar chuan ka ṭhu zawi ngawih ngawiha.
"Ka ril aṭam tawh viau asin. Mahse eng ei tur mah siam anih hmel si lova, ka chhuah lehnghal mai angaih hmel." Rawnti tu aw ka hriat chuan ka thla a muang nghal rawih rawih.
Che lo lek chuan ka en tawpa. A lo kir leh avang chuan va kuah vawng vawng mai chu ka duha. Ka inthunun hram hram zawk a ni.
"Kan siam a nge." Muang changin ka ding chhuaka.
"I ṭha em? I landan a dik miah lo ania." Min rawn pan hnai nghal ruaka.
"Ka ṭha e." A mah pawh en ngam lo chuan ka chhanga. Ka ṭah erawh a chhuak ru ṭeuh thung. Engkim vang hian.
"Kan ei chhuak zawk dawn em niang? I chauh hmel e mai." A kut dam thlapin ka hmai chu arawn khawih kual riak riaka.
"Ngai lo. Ka siam thei alawm. A rei lo ang."
"Aw le." Ngaih ṭhaṭ hmel chiah lo chuan ati supa.
"I siam chhungin ka lo han intifai a nge." Ka bu nghata.
Mahse ka kaltir mai thei lo. A inher rual chiah chuan a hnunglam aṭangin ka kuah chawta. Ka insum thei tawh ngang lo a ni.
"Lo hawi suh." Ka lam hawia rawn inher a tum chuan ka lo ti vata. A taksa lian takah chuan ka bei thlapa. Nghet takin ka kut chu suih zawmin, ka kuah thlapa.
"Ka tihpalh. Ka kalsan che avang pawhin pawi kati." Kati tham ṭiaka. Ka biangah mittui arawn luang thla papa.
"I thiamloh ani lo. Ka thiamloh vek zawk alawm." Ti dam thlapin, ka kuahna kut chu awlsam te in a phelha. Ka lam hawiin arawn inhera.
"Natna tam tak ka thlen che avangin keimah hi ka inhaw zawk." Ngainatawm zeta min melh dam raihin ka mittui tla chu zawitein min hruk sak pah bawka.
"I nu vanga i tawrhna tur lam ka ngaihtuah pha miah lova." Naute ang mai chuan ka ṭapa.
"A tawk tawh e. Engkim aṭha vek tawh alawm." A awmah chuan duat zetin min kuah bei thlapa. Ka bo pil leh kak tawh. Kanin len hleih zia ka hre thar leh uai uai bawk.
"Ka chungah i thinrim em kha." In la babe zet chuan kati a. A nui dat thung.
"Thinrim tehreng mai. Mahse i kal bo avang mai khan min hmangaih loh phah chuang lo tih ka hria. Tunah chuan engkim aṭha vek tawh e. Eng vang mahin ka lak aṭanga i awm bo hi ka phal tawh ngai lo vang." Hahdam hmel takin thaw a la sang sanga.
"Chan che hi ka duh bik lo." Mit chhang vang vang chuan kati a.
A lungphu ri dap dap leh a rimtui tak te hi hriat reng mai ka duh.
"Min en teh." Min kuahna chu ti thawl hlekin ati thum chhaka.. Ka melh chho kiau a. Ka chalah a lo fawp zauh thunga.
"Ka hmangaih che." Ka mit taka min melh fiah kak chung chuan a ti a.
"Kei pawhin ka hmangaih lutuk che." Eng tik lai mai pawha fawh chakawm hliah hliah, a hmui sexy zetin ka hmui arawn sik rual chuan ka lo chhang let ve vata.
Khawvel pum pui hi ka ta ani maiin ka hria. Ka nun ruak, khawhar leh hrehawm tak chu hnawh khahin a awm mek a ni..
A intihfai lai chuan keiin zanriah ka lo buatsaih vethunga. Ka hahdam veng veng. Ka che vel zawng zawngte pawh chu a zangkhai vah. Current hi thim thut pawh nimah se ka eng phet phet thei tho in ka inring.
"A va rimtui em em ve a." Ka kawngah kuahin, ka darah a khabe arawn nghata...
"I rimtui zawk." Nui seihin ka lo ti ve thunga.
"A hmin ani deuh thaw tawh mai. Lo ṭhu rawh." Ka thil siam chawh rak rak pah chuan kati a.
"Lo kuah che hi ka duh zawk." Kal sawn tum lo bur chuan ati a.
"Ka chetna i dal alawm."
"Ka ngai che." Chimawm chhuahin a lo tive thunga.
Ka hnial avangin a awmdan a thlak phah ka ring ta lo bawka. Ka hnial duh ta lo..
Mahse a chet kual reng avang chuan ka pangngai lo. A ni ang bawk hian.
"Ka peih tawh e." Hreh hmel zet chuan a awm sawna. Ka thaw huai thung.
Zanriah ei kham lamah vethung erawh chuan tv en chungin inngheng rialin kan ṭhu a. Zau tak nisi ah chuan chep zetin kan ṭhu duna.
"Eng tikah nge Aizawlah i let ang?"
"Kan haw rual ang chu." Ka kut arawn huma. A inlen hleih lutuk chu nuih tepawh a za dawn alawm mawle.
"Kum1 tal awm ka la ngai." A lo rum nghuta.
"Ka thil zir hi a lak lawh alawm." Kati leh hrama.
"Kan nupui i ni dawn tho tho va. Thil dang i mamawh hleinem." A ti nguta.
"Pasal nei tih tak avanga in lama awm ka tum miah lo. Ka thiamna tehi hman chhuah ka duh a ni."
"Ka tan chauh i hmang dawn alawm. Bakah fa tepawh kan la nei a nga, chutih hunah chuan.."
"Kan la ngaihtuah ṭha leh dawn nia." Ka lo ṭawng chhunzawm khalha..
"Fate kan neih hunah chuan hnathawh ka tum lui lo ang. Mahse tunah chuan kan la nei em hleinem."
"A nih chuan min pui thei ang. Ka hotel en kawltu tur ka mamawh tho alawm. Ka mikhualte ei tur tui tak tak i lo siamsak ṭhin a nga. A ṭha mai em?"
"Ṭha mah mah. Ka zir chhuah hma hauhin hna ka hmu nghal ania." Ka nui ar ar a.
"Mahse tunah chuan i hotel a nga thawk tur chuan ka la inpeih chiah lo. Min lo nghak rih thei a ngem?" Ka awmdan siam rem hretin ka melh chho rana.
"Thei mai ang." Ka lu ah arawn tauh bapa.
"Ka lo zin ngun viau thung ang." Nui sukin ati a.
"Lutuk." Ka kuah hnalha. Min lo kuah let ve vata..
Awm hrang leh pawh ni i la, a hma ai kha chuan a zia deuh tawh ang chu.
"Bawihbawihi nena in infawh ni khan eng tin nge ka lo kal tih i hriat?" Ka kuahna chu thlahin ka awm sawn vata. Ka awmdan vang chuan min la nuih zuia.
"Nui suh sawi rawh." Tum barin kati a.
"Thikthu chhia hi kei chauh ka lo nibik lo anih dawn hi." Chimawm lutukin min melha.
"Ka thik lo, ka thinrim zawk."
"Thik lo la chu i thinrim dawn em ni?"
"Hmp." Hmalam hawiin ka ṭhu ngil at a.
"I thinrim lai chuan sawi ka duh lo." Sir zawngin mi rawn kuah lehnghal hlun tho a.
"Ka thinrim lo." Hriat ka duh avang chuan kati nghal zata.
"Tak zet."
"Tehreng mai."
Kan ṭhuṭna hnung ngheng tur chuan a awm hniam duaia. Keiin a taksa phiar fat leh hlai ṭha tak chu ka ngheng ve thunga.
"Ka nawm loh em avangin Bawihbawihi te nena kan meeting zo kha haw nghal mai ka tuma. Mahse ka lu arawn nat zual zel avangin ka car tak ngial pawh ka khalh haw thei lo. Chu vangin Bawihbawihin min khalh hawsak ta ringawta."
"Mi dang an awm mai lo em ni? I driver pawh." Ka lo ti hrama. Hahthlak hian.
"Vanduai thlak takin awm lo. Bawihbawihi damdawi min pek kha ka lu nat tawh em avangin eng damdawi chiah nge anih tih pawh hre lovin ka ei ve maia. Chu vangin engmah kha mu mal taka hriat pawh ka nei lo. Che thei lovin ka zawi em em tih loh chu."
Thaw hle hle in ka lo ngaithla a.
"Ka lo kal tih i hre tho bawk sia."
"Cctv.. " A tih chuan a dah tih ka hrechhuak veleh chiah.
"In chhungah em chuan dah lo mah i la, pawn lamah chuan ka dah fer furin ka hria." A nui nghawr data.
"Lo nih vel tak chu. Thungrulh nan che mipa dang ka la fawp ve khawp ang."
"Ka phal teuh lo mai. Ka ta i ni a, tu mipa mah hian an hnaih che emaw, i bul hnaia an awm pawh hi ka phal ngai lo vang." Ka fiamthu mai ania. A la la thu tak em em zuia.
Tlemin kei ai chuan a thikthu hi a pe chhe deuh ṭhin chuan ka hria.
"Ka lo kal tih i hriat chhuahin tlem talin i hlauthawng em?"
"Sawi pawh ka peih lo zawk." A ti hmuka. Min chhandan aṭang hrim hrim pawh hian ka ngaih ruat thiam tho tho e.
"Ka mut a chhuak tawh." Ham bai baiin kati a.
"Aw le. Kan mu dawn nia."
Min pawm kang nghal nawlha. Tlak hlauin a nghawngah ka kuah nghal hnalha.
Ka khumah dimtein min nghata.
"Muttui aw." Ka sawi zo chiaha. Ka khumah arawn inthawlh venghal zata.
"Ka bula mut i tum ngawt em ni a?" Thawh ka tum chu min kuai mu lehnghala..
"Tum lo in ka mu mek tawh zawk. Min hnial suh."
A taksa si bet thlapin min pawt phei nghal rawpa. A awm nghenga mut bak baka nuam tih ka nei bik chuang hleinem.
"Eng tin mah kati lo ang che. Tui deuhin muhil rawh." Ka chhipah arawn fawp vang vanga.
"Nang pawh le." Mit ka chhing zuia. A lungphu ri dat dat ngaithla chung chuan ka muhil ta vang vanga.
A hnuaiah ka chhunzawm nghal.
BONUS... .....LAST CHAPTER
